སྡེ་དགེའི་རྒྱལ་བློན་དང་བུད་མེད་ཆེ་ཁག་གི་ཆས་གོས།
༈ རྒྱལ་བློན་དང་བུད་མེད་ཆེ་ཁག་གི་ཆས་གོས།
ཡོང་ཁུངས། སྡེ་དགེའི་རྒྱལ་རབས་དངུལ་དཀར་མེ་ལོང་ནས་དྲངས།
རྒྱལ་པོའི་ཆས་གོས།
ད་ནི་བྱེ་བྲག་རྒྱལ་བློན་སོགས་ཆེ་རྒྱུད་རྣམས་ཀྱི་ཆས་གོས་དང་འཚོ་བའི་སྐོར་ཅུང་ཟད་གླེང་ན་སྡེ་དགེ་ཆོས་རྒྱལ་ཆེན་པོ་བླ་ཆེན་བྱམས་པ་ཕུན་ཚོགས་ནས་དགེ་སློང་རྡོ་རྗེ་འཛིན་པའི་ཚུལ་དུ་ཕེབས་པ་རྣམས་ནི་ཆོས་གོས་རྣམ་གསུམ་སོགས་དགེ་སློང་གི་ཆས་སྤྱི་ལྟར་ལ། བོད་དུ་བླ་ཆེན་གྱི་ཆས་གོས་དམིགས་བསལ་དབུ་ཞྭ་ཐང་ཞུ་དང་། རྐྱ་བེར། ཁྲི་བེར། ཆིབས་ལ་རིན་ཆེན་རྒྱན་སྤྲས་སོགས་སྤྱི་ལྟར། ཁྲི་བཞུགས་སྐབས་ས་ཞུ་མནབས་སྲོལ་དང་། ཆོས་རྒྱལ་ཆེན་པོ་རྟེན་སྐྱ་བོར་གྱུར་པ་རྣམས་ནི། སྤྱིར་ཡུལ་འདིར་སྔར་གླིང་གེ་སྲ་རྒྱལ་པོས་བདག་གིར་བཟུང་པའི་ཡུལ་གྱི་ལྟེ་བར་སོང་གཤིས། ཡུལ་མི་རྣམས་ཀྱི་ཆས་གོས་གླིང་དུས་ནས་འགྱུར་བར་ཆེར་མ་ཐེབས་པས། སྟག་གཟིག་ནོར་འགྱེད་རྩོམ་སྒྲུང་ཞིག་ལས། གདོང་མི་འགྱུར་སྤྱི་དཔོན་རོང་ཚ་ཁྲ་རྒན་དེས། །དབུ་ཞྭ་ཞྭ་འདབས་ཡར་འཛོང་ལ། །པདྨ་ར་གའི་ཏོག་གིས་སྤྲས། །རྨ་བྱའི་འབྲུ་ཤར་ལྔ་པ་བཙུགས། །གོས་ཆེན་རྒྱན་གཞི་སེར་པོ་ལ། །ཆུ་སྲམ་དཀར་པོས་མཐའ་རྒྱན་བརྒྱབ། །ཆུ་དར་དཀར་པོའི་སྐུ་ཆིངས་གསོལ། །རྐང་ལྷམ་འཇའ་རིས་སུམ་བསྐོར་ལ། །ཆུ་དར་དམར་པོའི་ལྷམ་སྒྲོག་བཅིངས། །རྐང་གོས་ཁ་དོག་དཀར་པོ་ལ། །དམར་སྨུག་དར་གྱི་གདོང་དམར་ཅན། །སེར་པོ་གསེར་གྱི་རྣ་ལོང་ཅན། །སྔོན་མོ་གཡུ་ཡི་ཕྲ་རྒྱན་ཅན། །ཁམས་པ་དངུལ་གྱི་གློ་ཟུང་ལ། །རྒྱ་བྱུར་སྤྲུག་མའི་ཕྲ་རྒྱན་ཅན། །གཟི་ཞག་ནོར་བུའི་མགུལ་རྒྱན་གསོལ། །གོས་ཆེན་སེར་པོའི་ཕོ་ཁུག་ལ། །སྟོང་སྐུད་དམར་པོའི་ཚར་ལོས་བརྒྱན། །བ་སོ་དཀར་པོའི་ཁ་འཐེན་སྤྲས། །སོགས་བྲིས་འདུག་པ་དང་ཕལ་ཆེར་མཐུན་ཏེ། ཆོས་རྒྱལ་རྣམས་དབུ་ཞྭ་པདྨ་ར་གའི་ཏོག་ཅན། གཟབ་སྤྲོས་སྐབས་མཛོད་གོས་སེར་སྐྱའམ་གོས་ཆེན་རྒྱ་གཞི་སེར་སྐྱ། གཟབ་སྤྲོས་འབྲིང་དུ་མཛོད་གོས་སེར་སྨུག་གམ་གོས་ཆེན་གསེར་མ་སེར་སྐྱ། དུས་རྒྱུན་འཇམ་རིས་ཅན་སེར་སྐྱའི་ན་བཟའ་ལོང་བུ་ཁེབས་ཙམ་ཤུར་བུ་བཅིངས། འཁྱིལ་ལྷམ་འཇའ་རིས་ཅན་སེར་པོ། མགུལ་རྒྱན་གཟི་ཞག་དང་། མགུལ་གབ་ནང་འགེལ་ཙམ་ལས་གཞན་རྒྱན་སྤྲས་མེད། ཆིབས་ལ་རིན་ཆེན་རྒྱན་སྤྲས་སོགས་སྤྱི་ལྟར། ཕྱིས་སུ་ཐང་ཇའི་ཞྭ་མོ་ལྕགས་འདབ་མ་བྱེ་རུའི་ཏོག་ཅན་སྤྱི་ལྟར་མནབས།
༈ གཉེར་ཕྱག་ལྷན་རྒྱས་ཀྱི་ཆས་གོས།
ནང་བློན་གཉེར་ཕྱག་རྣམས་ཞྭ་གྱ་ལ་ཞེས་སྟོད་སྐུད་དམར་པོའི་ཛར་ལོ་ཞྭ་འདབས་མཚམས་བར་སླེབས་པ་གྱོན། གཟབ་སྤྲོས་སྐབས་སྲམ་སྐོར་ལ་རྒྱན་གཞི་དམར་པོའི་ཁ་གདན་ཅན། གཟབ་སྤྲོས་འབྲིང་ལ་ཁ་གདན་གསེར་མ། གཟབ་སྤྲོས་བསྡུས་སྐབས་ཁ་གདན་འཇམ་རིས་ཅན། ཤུར་ཚང་སྐེད་ཆིངས་ཁ་དོག་སྣ་ཚོགས་པས་པུས་མོ་ཁེབས་ཙམ་བཅིངས། ནང་འཇམ་དགུན་འབུ་རས་དང་དབྱར་དར་ཁྲུའུ་དམར་པོ་ལས་བྱས་པའི་རྒྱ་གསེར་གྱི་སྒྲིབ་ལེབ་ཤན་ཅན། སྐྱེས་པ་རྣམས་ཕུ་དུང་གཡས་པ་ཕུད་ཅིང་གུས་ཞབས་དགོས་ཚེ་ཕུ་དུང་ཕྲག་ཐོག་ནས་མདུན་ལེན་སྲོལ་དང་། རྐང་དོར་འབུ་རས་དཀར་པོ་ལ་གདོང་དར་དམར་པོ་ཅན་གྱི་དོར་ཁྲ་ཆེན་པོ་ལྷམ་སྣ་བར་ལྷུག་རྒྱུ་ཡོད་པ། མགུལ་དུ་གཟི་ཞག་སྐེད་ཁ་ཡན་འཁོར་བ། གསེར་གྱི་རྣ་ལོང་གཡུ་ཕྲ་བྱེར་རྩབ་ཚེ་བུམ་མ་ཡ་རེ། གསེར་དངུལ་བཀྲ་མའི་གློ་ཟུང་ལ། གཡས་སུ་ཕོར་ཤུབ་དང་གཡོན་དུ་པོ་ལྡི་དཔྱངས། སྐེད་དུ་གྲི་རིང་དཀར་ཤང་ཐོག་བྱང་ཅན། གསེར་དངུལ་གྱི་མཆན་གབ་མཛོད་དར་གྱིས་མཆན་ཁུང་གཡོན་དུ་འགེལ། འགག་ལྷམ་སྣ་མ་རྡོག་བརྩེགས་ཅན་བཅས་གྱོན་སྲོལ་དང་། མདུན་སྐོར་དང་དཔོན་ཁག་རྣམས་ཞྭ་གྱ་ལ་སོགས་གོང་མཚུངས་ལ། གཟབ་སྤྲོས་རྒྱས་སྐབས་སྲམ་གདན་གོས་ཆེན་གསེར་མ། འབྲིང་སྐབས་འཇམ་རིས་ཅན། བསྡུས་སྐབས་སྲམ་ཁ་ཡི་ཙམ་ལས་གཞན་ཁྱད་པར་མེད། ཧོར་འདྲ་དང་གཉེར་ཕྱག་མདུན་སྐོར་དཔོན་ཁག་བཅས་ཀྱི་སྒེར་གཡོག་རྣམས། འབུ་རས་ཁ་ཕྲ་ཡི་མགོ་དཀྲིས། གཟབ་སྤྲོས་རྒྱས་སྐབས་སྲམ་ཁ་གདན་འཇམ་རིས་ཅན། འབྲིང་སྐབས་སྲམ་ཁ་ཡི་བསྡུས་སྐབས་དབྱར་ཕྲུག་གོས་དང་དགུན་གོས་ཆེན་འཇམ་མའི་ཚ་རུ་གྱོན། གཞན་སྐེད་གྲི་དང་། མཆན་གབ། གློ་ཟུང་། དོར་ཁྲ་ལྷམ་སོགས་འདྲ། དམག་དཔོན་དང་དཔའ་ཟན་རྣམས་སྟག་ཤན་དང་གཟིག་ཤན་གྱོན་སྲོལ་ཡོད། རྒྱལ་པོ་དང་གཉེར་ཕྱག་མདུན་སྐོར་དཔོན་ཁག་བཅས་ནས་སྐྲ་ཉི་ལེ་བ་ཐད་ཀར་སྐྲ་སྒོ་ཕྱེས་པ། ནང་རེ་བཞིན་སྐྲ་ཤད་རྒྱག་དགོས། ཧོར་འདྲ་མན་ཆད་དཔྲལ་བ་ཐད་སྒོ་ཕྱེས་པ་ལྟག་པའི་མཚམས་ནས་སུམ་ལྷས། སྟོང་སྐུད་ནག་པོའི་སྐྲ་ཚར་ཆུང་ངུ་རེ་ཡོད།
༈ བུད་མེད་ཆེ་ཁག་གི་ཆས་གོས།
ཆེ་ཁག་རིགས་ཀྱི་བུད་མེད་རྣམས་གཟབ་སྤྲོས་སྐབས་སྐྲ་ལྷས་ཞིབ་ལ། སྐྲ་མཐུད་སྟོད་སྐུད་ནག་པོ། སྐུད་ཁའི་ཐད་ཙམ་ནས་ཅོ་རྔ་ཞེས་སྣེ་གཉིས་སུ་བགོས་ཏེ་སྟོང་སྐུད་ཁ་དོག་སྣ་ཚོགས་དང་ལྷས་པ། མགོ་རྒྱན་དཔྲལ་བར་སྤོས་ཤེལ་བྱེར་ཏོག་ཅན་ཅི་ཆེ། སྤྱི་གཙུག་ཏུ་གཙུག་གཡུ་ཞེས་གཡུ་བྱེར་སུམ་རྩབ་ཅན། ལྟག་པར་གསེར་མེ་གཡུ་ཕྲ་ཅན། རྒྱབ་ཏུ་སྐྲ་མཐུད་ཐད་སྐྲ་སྲུང་ཞེས་གཟི་བྱེར་རྩབ་མ་རྐེ་འཁོར་ཙམ་གཉིས་གསུམ་གང་འཛོམས། སྐྲ་མཐུད་དང་ཅོ་རྔའི་མཚམས་ནས་སྐྲ་མཐེན་ཞེས་བྱེར་ཞིབ་དང་གཡུ་ཆུང་སོགས་གཡས་གཡོན་ཕྱོགས་རེར་ཞག་པ་བཞི་ལྟེབ་ཅན། དེ་རྒྱབ་ཀྱི་སྐེ་རགས་འོག་ཡར་བཏགས་བྱེད་གསེར་དངུལ་བཀྲ་མའི་ཡར་འཐེན་ལ་གཡུ་བྱེར་གཟི་སོགས་ཀྱི་ཞག་པའི་སྣེར་དོ་ལྷས་ཀྱི་ཛར་ལོ་འཕྱངས་བ། ཅོ་རྔ་གཡས་གཡོན་ལ་གཟི་བྱེར་སུམ་རྩབ་རེ་དང་གཡུ་གང་ཤོང་བརྒྱུས་མཛེར་བྱས་པ། གཟི་མགུལ་དཀྱིལ་དུ་གསེར་གབ་དྲུག་ཕྲ་ཅན། གྱོན་གོས་སྲམ་ཁ་གདན། ནང་འཇམ་རྒྱ་གསེར་ལེབ་ཤན་ཅན། དེའང་ཕྱི་གོས་ཕུ་དུང་གཉིས་ཀ་འདུང་པ་ལས་ཕུད་སྲོལ་མེད། ལྷམ་རྡོག་རྐྱང་ཤས་ཆེར་གྱོན། གསེར་དངུལ་བཀྲ་མའི་གློ་ཟུང་ལ་གཡས་སུ་མཚུར་ཁུག་དང་། གཡོན་དུ་གྲི་ཆུང་དཔྱངས་པ། མདུན་དུ་གསེར་དངུལ་བཀྲ་མའི་སྦ་ཁུག་གམ། དངུལ་ཐག་གི་སྤང་རྒྱན་དང་ཁྲོབ་ཁྲོབ་དྲ་བ་དྲ་ཕྱེད། རྒྱབ་དར་འབུ་རས་སམ་དར་དམར་ཆེན་གྱིས་རྒྱབ་སྟོད་ནས་དཀྲིས་ཏེ་མདུན་དུ་ཁུག་མདུད་བྱས་པའི་སྣེ་གཉིས་མདུན་ནས་དཔྱངས་སྲོལ་མཆིས། དེས་འགྲེས་ཏེ་རིམ་པ་འོག་མ་རྣམས་ལའང་ཕྱོགས་མཚུངས་ཡིན། དེ་ལྟར་ཕོ་མོའི་གོས་རྒྱན་འདི་དག་སྡེ་དགེ་གཞུང་གི་མཛད་སྒོ་ཁག་དང་མདུན་བྲོ་སོགས་ཀྱི་སྐབས་སུ་དེ་ལྟར་ཡིན་པ་ལས། གཞན་ཡུལ་ཕྱོགས་སོ་སོའི་ཆས་གོས་རྒྱན་ཆ་སོགས་ཅུང་མི་མཚུངས་པ་ཡོད།
༈ རྒྱལ་བློན་བྱེས་ལ་ཕེབས་སྐབས་ཀྱི་ཆས་གོས།
སྡེ་དགེ་རྒྱལ་བློན་སོགས་སྒར་ཆེན་བཏེག་སྟེ་བྱེས་སུ་འགྲོ་སྐབས་ཆས་གོས་གོང་མཚུངས། སྔོན་དུ་རྐྱ་དར་ཞེས་དར་མདུང་བ་དན་དབྱིབས་ཅན་གཞི་དཀར་པོ་ལ་གསེར་འདུལ་གྱི་འཁོར་ལོ་རྩིབས་བརྒྱད་ཀྱིས་མཚན་པའི་མུ་ཁྱུད་དང་དར་ལྕེ་གསུམ་དམར་པོ། རྔ་ཐུག་དམར་པོ་ཅན་གཅིག དེ་མཚུངས་འཁོར་ལོའི་རི་མོ་མེད་པ་བཅུ་གཉིས་བཅས་རྐྱ་དར་བཅུ་གསུམ་སྔོན་དུ་འགྲོ་བའི་རིམ་པར། ཧོར་འདྲ། མདུན་སྐོར། དཔོན་ཁག་གཉེར་ཕྱག་སོགས། ཆོས་རྒྱལ་ཆེན་པོ་ནང་འཁོར་བཅས་དབུ་བླ་ཁག་སོགས། རྗེས་མོ་སྨན་རྣམས་བཅས་རྐྱ་འགྲིག་གཅིག་རྗེས་གཅིག་གིས་ཟིན་ཙམ་ལས་རྟ་རྒྱུག་སོགས་ཡེ་ནས་མི་ཆོག་སྐད། གཉེར་ཕྱག་རྣམས་དང་ཕྱོགས་ཀྱི་དཔན་འགོ་བཞི་ལ་རྐྱ་འགྲིག་ཏུ་སྒེར་གཡོག་བདུན་རེ། གཉེར་ཤུལ་ཡོད་པའི་མདུན་སྐོར་རྣམས་སྒེར་གཡོག་ལྔ་རེ། མདུན་སྐོར་དང་དཔོན་ཁག་དཀྱུས་མ་རྣམས་སྒེར་གཡོག་གསུམ་རེ། ཧོར་འདྲ་དུད་ཁག་རེ་ཟུང་དཔོན་སྐྱ་གཡོག་ཁྲིད་ཀྱི་ཐོབ་ཁུངས་ཅན་རྣམས་སྒེར་གཡོག་གཅིག་རེ་བཅས་ཁྲིད་ཆོག ཧོར་འདྲ་དཀྱུས་མ་རྣམས་ཀྱིས་གཡོག་པོ་ཁྲིད་མི་ཆོག གཞན་དཔོན་ཁག་སོགས་སུ་གང་གིས་ཀྱང་རྐྱ་འགྲིག་ཏུ་གཡོག་པོ་དང་དྲེལ་བོན་སོགས་ཁྲིད་མི་ཆོག་པར་སྔོན་དུ་དྲེལ་བ་བཏང་དགོས་འདུག མི་སེར་རྣམས་ཡུལ་བྲོ་འཁྲབ་པ་དང་གཏོ་བོག་འཕེན་པ། བླ་ཆེན་སོགས་ཆིབས་བསུ་སྐྱེལ་སོགས་སུ་གཟབ་སྤྲོས་དགོས་སྐབས། མགོ་དཀྲིས། དོར་ཁྲ། སྲམ་ཁ་ཡི་ཙམ་ལས་ཞྭ་གྱ་ལ་དང་སྲམ་ཁ་གདན་སོགས་གྱོན་མི་ཆོག མི་སེར་གྱི་བུད་མེད་རྣམས་སྤང་རྒྱན་དང་ཁྲོབ་ཁྲོབ་ཚབ་དངུལ་ཐག་གཉིས་སྦྲེལ་ཙམ་ལས་གཞན་ཕྱོགས་མཚུངས་ཡིན། དུས་རྒྱུན་སྐུ་དྲག་རྣམས་ཀྱིས་ཞྭ་གྱ་ལ་དང་དོར་ཁྲ་སོགས་མི་གྱོན་ལ། མི་སེར་རྣམས་དབྱར་ལྭ་བ་དང་དགུན་ལྤགས་ཙག་སོགས་འཚོ་བ་བཟང་ཞན་ལྟར་གྱོན་ཅིང་། འགའ་ཤས་འཁྱགས་གྲིར་ཤི་ལ་ཉེ་བའང་ཡོད།
བསམ་ཚུལ་འབྲི།
བོད་མིའི་སྒྲིག་འཛུགས་ཀྱི་འཛིན་སྐྱོང་སྒྲིག་གཞི།