དུར་སའི་རྡོ་རིང་འདྲ། རྩོམ་པ་པོ། ང་ཆེ་པོ།
༈ དུར་སའི་རྡོ་རིང་འདྲ།
རྩོམ་པ་པོ། ང་ཆེ་པོ་འམ། དགྲ་རྣོ་རྩེ།
བཙན་པོའི་སྟོབས་ཤུགས་ལ་འགོའི་རྡོ་ཕུང་འདྲ།།
མེས་པོའི་ཚེ་སྲོག་ལོ་ཟླའི་གཟུགས་སུ་གྱུར།།
གངས་དཀར་རི་བོའི་མཐའ་ནས་ངུ་འབོད་བྱེད།།
མགོ་བོ་གཡུག་བཞིན་གཡུག་བཞིན་རྒྱང་དུ་ཅེར།།
མི་ཕོའི་ཀི་སྒྲ་བགྲེས་པོའི་ཁ་རྒྱན་འདྲ།།
རྟ་ཕོའི་རྨིག་སྒྲ་བྱིས་པའི་རྣ་ལོང་རེད།།
ཁུ་བྱུག་རྒྱང་བཞུད་གཅིག་གི་གཏམ་བརྗོད་དེས།།
དམར་ཆུང་སྙིང་གི་འདབ་མ་འཐོར་ལ་ཉེ།།
ཨ་ཕས་དཀོན་མཆོག་ཟེར་ནས་སོ་སྒྲ་འཆའ།།
ཨ་མས་ལས་དབང་ཟེར་ནས་མིག་ཆུ་བཞུར།།
བླ་མས་སེམས་ཅན་གསུངས་ནས་ཕྱག་རྒྱ་བཅའ།།
ཡ་ཆུང་ཁོག་པའི་རྒྱ་མཐོངས་བྱེ་ལ་ཁད།།
རྒོད་པོའི་སྙིང་ཤ་གཏམ་གྱི་མདའ་མོའི་སྣུན།།
ཀླད་མེད་དཔུང་པ་རིན་ཆེན་དར་གྱི་རྒྱན།།
གངས་རིའི་ལས་དབང་མཐའ་ལ་ཐུག་པ་འདྲ།།
འཁྱམས་པོའི་སྙིང་ཁ་འདི་ན་གཟེར་གཅིག་གདའ།།
རེ་ཅན་རྒས་པོ་མི་རྟག་ལམ་ལ་ཆས།།
མདོ་མེད་འཁྱམས་པོ་ས་མཐའི་ཡུལ་ན་ལུས།།
ལང་ཚོ་མི་རྟག་ཉིན་རེ་བཞིན་དུ་ཟད།།
ཀྱེ་མ་སེམས་ཀྱི་རེ་ཐག་ཆད་ལ་ཉེ།།
ད་ནི་མི་བསྡོད་ཡུལ་ལ་ལོག་ནས་འགྲོ།།
ཕ་ས་སྨུག་པོའི་ཆེད་དུ་ལས་ཤིག་བྱེད།།
ལ་དང་ལུང་པའི་དོན་དུ་རྒས་སོང་ན།།
མདོ་མེད་འཁྱམས་པོའི་བསམ་དོན་འགྲུབ་པ་ཡིན།།
སྐྱེ་བ་ལན་གཅིག་ཕ་མའི་རེ་བ་རེད།།
འཆི་བ་ལན་གཅིག་འཁོར་བའི་ཆོས་ཉིད་རེད།།
སེམས་དང་བསམ་པའི་རེ་ཐག་ཆད་སོང་ན།།
གསོན་པོ་བསྡད་ཀྱང་དུར་སའི་རྡོ་རིང་འདྲ།།
རྩོམ་པ་པོ། ང་ཆེ་པོ་འམ། དགྲ་རྣོ་རྩེ།
བསམ་ཚུལ་འབྲི།
སྡེ་དགེ་སྐུ་ཚེའི་དར་བཤད།