འདོན་སྤེལ། 2015/10/22 9:36 AM རྩོམ་པ་པོ།

ཁོང་གི་ཕ་མེས་དང་ཁྱིམ་བརྒྱུད་ནི་ཡ་རབས་ཀྱི་གཤིས་རྒྱུད་དང་རྣམ་དཀར་དགེ་བ་ལ་བརྩོན་མཁན་ཞིག་རེད་ཅེས་ཐོས་པ་ཙམ་ལས་ཆུང་དུས་ཀྱི་ལོ་རྒྱུས་དང་ཡབ་མེས་ཀྱི་རྒྱུད་པ་ནི་ང་ལ་ཆ་རྒྱུས་དེ་ཙམ་མེད། འོན་ཏེ་མི་ལོ་ཧྲིལ་པོ་བཞི་བཅུ་ལྷག་ཙམ་ལ་བསྒྲུབ་པ་ཉམས་བཞེས་ཁོ་ན་མཛད་ནས་རྟོགས་པ་ནང་ནས་བརྡོལ་བའི་གྲུབ་པའི་དབང་ཕྱུག་དོན་བརྒྱུད་ཀྱི་རྒྱུན་འཛིན་པ་ཆེན་པོ་ཞིག་ཡིན། ཁོང་ནི་དྲུང་རམས་རྒྱལ་སྤྲུལ་གཙོས་འཕགས་ཆེན་སེམས་པ་དུ་མའི་ཞལ་སྔར་ནས་ཇི་ལྟར་ཐོབ་པའི་གདམས་ངག་རྣམས་སྙིང་པོ་ཉམས་ལེན་གྱིས་གནད་དུ་བསྣུན་ཏེ་རང་སེམས་ཕྱག་རྒྱ་ཆེན་པོའི་གནས་ལུགས་ཕུ་ཐག་ནང་ནས་ཆོད་པ་ཞིག་ཡིན་པ་ནི་ཁོང་གིས་མན་ངག་ངོ་སྤྲོད་སྐབས་དང་། དུས་རྒྱུན་ཐོལ་བྱུང་དུ་བཀའ་བསྩལ་པའི་ཞལ་གསུང་དྲོན་མོ་དག་ལས་ཀྱང་ཤེས་ནུས། ངས་ཆེས་ཐོག་མར་ཁོང་མཇལ་དུས་ནི་བདག་གི་མི་ཚེ་ལ་འཕོ་འགྱུར་ཆེན་པོ་འགྲོ་བའི་ཀྱོག་མཚམས་ཀྱི་དུས་ཚིགས་ཤིག་སྟེ་ལོ་གསུམ་ཟླ་གསུམ་གྱི་བསྒྲུབ་པ་འགོ་འཛུགས་བྱེད་སྐབས་ཀྱི་སྤྱི་ལོ་༡༩༨༩ལོའི་སྟོན་དུས་དེར་ཡིན། འདི་ནི་ངའི་མི་ཚེ་ནང་དུ་ནམ་ཡང་བརྗེད་མི་སྲིད་པའི་ལམ་སྟོན་གྱི་སྒྲོན་མེ་ཆེན་པོ་ཞིག་ཁོ་བོའི་བསོད་ནམས་ཀྱི་བགོ་སྐལ་དུ་ཐོབ་པ་སྟེ་ཁོང་གི་ཐུགས་རྗེ་བཀའ་དྲིན་ལ་བརྟེན་ནས་ངས་རང་གི་མི་ཚེ་རིན་ཐང་རྙེད་ཐུབ་པའི་དུས་ཚིགས་ཤིག་ཡིན་ཞེས་བརྗོད་ནའང་ཆོག སྤྱིར་བཏང་ལས་འབྲས་ལ་ཡིད་ཆེས་ཤིང་སྐྱེ་བ་སྔ་ཕྱི་ཁས་ལེན་པའི་ནང་པ་སངས་རྒྱས་པ་ཞིག་གིས་ངོས་ནས་བཤད་ན་ང་དང་ཁོང་གི་འབྲེལ་བ་ཡང་ཚེ་འདི་ཙམ་དུ་མ་ཡིན་པར་སྐྱེ་བ་ཚེ་རབས་མང་པོ་ཞིག་ཏུ་ཁོང་གིས་རྗེས་སུ་བཟུང་ཡོད་པའི་ཡིད་ཆེས་བཅོས་མིན་ཞིག་སྙིང་ཁོངས་ནས་སྐྱེས་མྱོང་། རྒྱུ་མཚན་ནི་ཁོང་གི་མཚན་ཐོས་པ་ཙམ་དུ་སེམས་ལ་དད་པ་དང་དུང་བ་ཞིག་གཞན་གྱི་བསྐུལ་མ་དགོས་པར་རང་ཤུགས་སུ་སྐྱེས་པ་སྟེ། རང་ལོ་བཅོ་ལྔའི་དུས་སུ་བདག་གི་ཞང་ཚང་དུ་ཉེ་གཏུགས་ལ་སོང་ནས་སྤུན་མཆེད་ཁ་ཤས་དང་ལྷན་དུ་ཆུ་དཀར་མོའི་རི་ཁྲོད་དུ་གཅོད་ཚོགས་ཀྱི་བསྒྲུབས་པ་བྱས། ཁ་དང་ལག་པ་ལ་སྡོད་ཚུགས་མེད་ཅིང་བྱ་སྤྱོད་ཧ་ཅང་སྤྲ་ཚགས་ཆེ་བའི་ངའི་ཆུང་དུས་ཀྱི་གཤིས་ཀ་ངན་པ་དེས་བླ་མ་ཕལ་ཆེར་ལ་སྐུར་འདེབས་ཤ་སྟག་བྱེད་ཀྱི་ཡོད་ཀྱང་། བླ་མ་རྡོ་རྗེ་རབ་བརྟན་གྱི་མཚན་ཐོས་པ་ཙམ་ནས་སེམས་ནང་དུ་རང་བཞིན་གྱི་དགའ་ཞེན་ཞིག་བསླེབས་ནས་ཁོང་ལ་སྐུར་འདེབས་དང་ངན་སྨྲས་ནམ་ཡང་བྱེད་མྱོང་མེད། སྐབས་དེར་ངའི་སྒྲུབ་གྲོགས་བླ་མ་རྣམས་ནི་ཁོང་གི་སློབ་མ་ཤ་སྟག་ཡིན་སྟབས་ཁོང་གི་ངོ་མཚར་བའི་རྣམ་ཐར་མང་པོ་ཐོས་པས་ངེས་པར་མཇལ་ཐུབ་པ་ཞིག་བྱེད་དགོས་སྙམ། འོན་ཏེ་རང་ངོས་ནས་ཁོང་མཇལ་བར་འགྲོ་དགོས་ཚེ་འོག་ལ་བཞོན་རྒྱུའི་རྟ་མེད་ལ། རུམ་དུ་འཛུད་རྒྱུའི་སྒོར་ཡང་མེད། ད་དུང་རང་གི་ཁ་ཟས་རྒྱབ་གོས་ཡོངས་རྫོགས་ཞང་ཚང་མགར་ཚ་ཚང་ཁོ་ན་ལ་བརྟེན་ནས་བསྡད་ཡོད་སྟབས་ཁོང་ཚང་ལ་ཅ་སུན་པོ་བཟོ་མ་ནུས་ནས་གནས་སྐབས་བླ་མ་མཇལ་རྒྱུའི་གོ་སྐབས་མ་ཐོབ། འོན་ཏེ་སྐབས་དེ་དག་ཏུ་ངའི་སེམས་རྒྱུད་ལ་འགོང་པོ་ཞུགས་པ་ནང་བཞིན་བྱེད་མི་འོས་པའི་ལས་ཀ་ཇི་སྙེད་ཅིག་གི་ནག་ཉེས་ཀྱི་ལོ་རྒྱུས་ཟིན་ཐོ་བཀོད། གཉེན་ཉེ་ཕལ་ཆེར་དགྲ་རུ་བཟུང་སྟེ་ཐ་ན་རང་ལ་ཧ་ཅང་བརྩེ་བའི་སྲུ་མོ་དག་ལའང་བཅའ་རྡུང་བྱས་པ་གྲངས་ཚད་མེད། ཞང་ཚང་གི་སྤུན་མཆེད་མིང་སྲིང་ཡོངས་ལ་འཛིང་རྩོད་ཇི་ཙམ་བྱས་ཀྱང་ཁོང་ཅག་གིས་བྱམས་སྐྱོང་ཁོ་ན་ལས་མཁོན་འཛིན་གྱི་ཡ་ལན་བྱེད་མྱོང་མེད། དེ་ལྟར་དུས་ཀྱི་འགྱུར་འགྲོས་ཟླ་དྲུག་གི་ཡུན་ཚད་ཁྱུག་ཙམ་གྱིས་ཡོལ་ཏེ་སྟོན་འགོ་ཚེས་པའི་ཉིན་ཞིག་བན་ཆེན་དགོན་གྱི་དགེ་བསྐོས་ཡིན་པའི་དྲིན་ཅན་གྱི་ཞང་པོ་ཆུང་རྒྱལ་དེ་ཉིད་རང་ཁྱིམ་དུ་གཟིགས་བསྐོར་ཕེབས་ཏེ་གུས་པར་སྒྲུབ་ཁང་དུ་ཞུགས་རྒྱུའི་སློབ་སྟོན་དང་མཐུན་འགྱུར་གནང་བའི་ཞལ་བཞེས་ཐོབ་པ་ལྟར། ལམ་ཐག་རིང་བའི་ཕ་ཡུལ་དུ་མ་དྲིན་མོ་ཆེ་ལ་ངོ་ཐུགདང་སྒྲུབ་ཁང་སྡོད་རྒྱུའི་ཐག་བཅད་བྱས་ཟིན་པའི་གནས་ཚུལ་བཤད་པར་སོང་། ཕ་ཡུལ་གྱི་ནང་མི་གཉེན་ཉེ་ཀུན་གྱིས་ལམ་ཐག་རིང་དྲག་པ་དང་ལོ་ན་ཆུང་དྲག་པ་བཅས་ཀྱིས་སྒྲུབ་ཁང་དུ་འདུག་རྒྱུ་ལ་མོས་མཐུན་མ་བྱས་ཀྱང་། བླ་མའི་ཐུགས་རྗེ་དང་རང་ཉིད་ཀྱི་ཚོགས་བསགས་བཅས་ལ་བརྟེན་རང་སེམས་ལ་སྙིང་སྟོབས་ཤིག་རྙེད་དེ་སེམས་ཐག་གཙང་བཅད་ཀྱིས་བན་ཆེན་དགོན་གྱི་སྒྲུབ་ཁང་དུ་འདུག་རྒྱུ་བྱས། གལ་སྲིད་སྐབས་དེར་སྒྲུབ་ཁང་དུ་འདུག་རྒྱུའི་གོ་སྐབས་བྱུང་མེད་ཚེ་ལོག་ལམ་དུ་ཞུགས་ལ་ཉེ་ཡོད་པས་མཚན་ལྡན་བླ་མའི་ཐུགས་རྗེ་དང་། བྱམས་ལྡན་ཞང་པོའི་བཀའ་དྲིན། བརྩེ་ལྡན་སྤུན་གྱི་རོགས་རམ་བཅས་ལ་ནམ་ཡང་བཀའ་དྲིན་ཆེ་ཞེས་སེམས་སྟེང་ནས་བརྗོད་ཀྱིན་ཡོད། དེ་ལྟར་བན་ཆེན་དགོན་དུ་འབྱོར་མ་ཐག་ཞང་པོ་ཆུང་རྒྱལ་གྱིས་མཇལ་དར་དང་སྒོར་གཉིས་མཇལ་རྟེན་ཕུལ་རྒྱུ་བསྩལ་གནང་བ་ལྟར་བླ་མ་རིན་པོ་ཆེ་མཇལ་དུ་སོང་། ཁོ་བོའི་ཡིད་ལ་བླ་མ་ནི་གཟིམས་ཆུང་རྫིག་པོ་ཞིག་གི་ནང་དུ་གཡོག་འཁོར་ཞབས་ཕྱི་དང་ལྷན་དུ་གྲ་རྒྱས་པོ་བྱས་ནས་བཞུགས་ཡོད་རྒྱུ་རེད་སྙམ་མོད། དངོས་གཞི་བླ་མ་མཇལ་སྐབས་དེ་ལྟར་མ་ཡིན་པར་གསར་ཞུགས་ཀྱི་སྒྲུབ་གྲྭ་བ་ཁ་ཤས་དང་ལྷན་དུ་སྒྲུབ་ཁང་ཞིག་གསོས་བྱེད་བཞིན་འདུག་ལ་ས་རྡོ་སོགས་གྲྭ་པ་རྣམས་དང་མཉམ་དུ་སྐྱེལ་འདྲེན་བྱེད་ཀྱི་གདའ། ཁོར་ཡུག་གི་རྐྱེན་གྱིས་ཕྱག་འཚལ་རྒྱུ་མ་བྱུང་ཡང་གུས་ཞབས་ཆེན་པོས་མཇལ་དར་ཕུལ་བས་བརྩེ་བའི་སྤྱན་གྱིས་གཟིགས་ཤིང་འཛུམ་པའི་མདངས་དང་ལྡན་པས་མཇལ་དར་དང་མཇལ་རྟེན་ཕྱག་གིས་བཞེས་ཏེ་ལམ་བར་ནས་དཀའ་ངལ་བྱུང་མིན་སོགས་བཀའ་འདྲི་གནང་བྱུང་། ལན་གང་ཡང་འབུལ་མ་ནུས་པ་ཀྲོང་ངེ་ལོངས་བསྡད་པས་ཞང་པོ་ཆུང་རྒྱལ་གྱིས་གནས་ཚུལ་རྣམས་ངོ་སྤྲོད་ཞུས་སོང་། སླར་ཡང་ཁོང་གིས་བརྩེ་བ་ཆེན་པོས་“ད་ཨ་ཉོག་དཀའ་ཡོད་རྒྱུ་རེད། ངལ་གསོ་གྱིས།’’ཞེས་གནང་བ་ཐོབ་པ་ལྟར་ཞང་པོའི་གྲྭ་ཤག་ཏུ་ཕྱི་ལོག་བྱས། སེམས་གཏིང་ནས་བླ་མ་འདི་ཉིད་རང་གི་རྩ་བའི་བླ་མ་ཡིན་སྙམ་པའི་ཚོར་ཤེས་ཤིག་ཀྱང་རང་བཞིན་གྱིས་སྐྱེས་བྱུང་། ཉིན་ཤས་རྗེས་སྒྲུབ་སྒོ་བསྡམས་ཏེ་སྒྲུབ་ཁང་དུ་འཛུལ་ཞུགས་བྱེད་མཁན་སྒྲུབ་གྲྭ་བ་ཉེར་གསུམ་ཡོད་པ་ལས་རང་ཉིད་ཆུང་ཤོས་ཀྱི་གྲས་ཡིན་པར་བརྟེན་སྒྲུབ་གྲོགས་ཡོངས་ཀྱིས་ཤ་ཚ་དང་སྙིང་རྗེ་བྱེད་བཞིན་ཡོད་ཀྱང་ཁོང་ཅག་གིས་ང་ལ་མདོ་ཉོག་དང་མདོ་རྐུན་སོགས་ལས་དངོས་མིང་འབོད་མཁན་མེད། རྒྱུ་མཚན་ནི་ངའི་ཕ་ཡུལ་མདོ་གཞུང་དང་ཁ་ཐག་ཉེ་བར་བརྟེན་དེ་ལྟར་མཚང་མིང་བཏགས་སོང་། མིང་དེ་ཐོག་མར་འབོད་སྐབས་རང་བཞིན་གྱིས་སེམས་ལ་ན་ཟུག་སྟེར་བཞིན་འདུག་ཀྱང་རིམ་བཞིན་དངོས་མིང་ལྟར་ཆགས་ནས་ཕྱིས་སུ་རང་གི་རྩོམ་ཡིག་ཁ་ཤས་ཀྱི་འཇུག་བྱང་ལའང་མདོ་ཉོག་དང་མདོ་རྐུན་ཞེས་སྨྱུག་མིང་བེད་སྤྱོད་བྱས་མྱོང་། བླ་མས་ཀྱང་ང་ལ་མདོ་ཉོག་ཅེས་འབོད་ལ་དམིགས་བསལ་གྱིས་བྱམས་སྐྱོངས་དང་བདག་གཅེས་གནང་བ་དག་ད་ལྟར་དྲན་ལམ་དུ་འཆར་ཚེ་ངོ་གདོང་མིག་ཆུས་རང་བཞིན་དུ་བརླན་འགྲོ། ཆེས་ཐོག་མའི་སྒྲུབ་ཁང་གི་ཉམས་བཞེས་ནི་སྔོན་འགྲོ་ཡིན་པས་བློ་སྦྱོང་གི་རིམ་པ་རྣམས་ཕྱག་ཆེན་ངེས་དོན་སྒྲོན་མེ་དང་། ཁྲིད་ཡིག་ཀུན་བཟང་བླ་མ་གཉིས་ཟུང་འབྲེལ་གྱིས་ཁྲིད་གནང་སོང་། ངའི་བླ་མ་ཁོང་ཚིག་གི་འགྲོས་ལ་དེ་ཙམ་མཁས་པ་མ་ཡིན་ཀྱང་མྱོང་ཁྲིད་མན་ངག་གི་ལམ་ནས་ཐུན་མོང་དང་ཐུན་མིན་གྱི་བློ་ལྡོག་རྣམས་སེམས་ལ་ཝ་ལེར་འཆར་ཐུབ་པར་གསུང་མཁན་དེ་འདྲ་ད་ལྟའི་དུས་ཀྱི་ཁ་བཤད་མཁན་པོ་སུ་ལའང་མི་འདུག འོན་ཏེ་གུས་པའི་གཤིས་རྒྱུད་ནི་ཆེས་ལེ་ལོ་དང་སྙོམས་ལས་ཀྱི་དབང་དུ་ཤོར་མཁན་ཞིག་ཡིན་སྟབས་སྔོན་འགྲོའི་བསགས་སྦྱོང་རྣམས་ཚད་ལྡན་འགྲོ་ཐུབ་པར་བྱུང་མ་སོང་ལ་ཐ་ན་སྔར་དགོང་གི་གསང་གསོལ་ཆད་པའི་གྲངས་ཚད་ཀྱང་ཧ་ཅང་མང་། འོན་ཏེ་དམ་པ་རྣམས་ནི་དམན་ལ་ལྷག་པར་བརྩེ་བའི་ངང་ཚུལ་བཞིན་ངས་བྱ་ངན་སྤྱོད་ངན་ཇི་ཙམ་འཁྲབ་ཀྱང་ཁོང་གིས་བྱམས་བརྩེ་ཆེན་པོས་འཛུམ་མདངས་དང་ལྷན་བསླབ་བྱ་ཟབ་མོ་རེ་རེ་ཙམ་ལས་བཀའ་རྐྱོན་ཚིག་གཅིག་ཙམ་ཡང་གསུངས་མྱོང་མེད། སྤྱིར་ཁོང་གི་གཤིས་རྒྱུད་ནི་ཧ་ཅང་འཇམ་ལ་ཞལ་རས་སྨུག་པོ་ལས་འཛུམ་མདངས་ཀྱི་རྒྱུན་ནམ་ཡང་མི་ཆད་ཅིང་ལོ་གསུམ་གྱི་དུས་ཡུན་ནང་དུ་རང་གཞན་སུ་ལའང་བཀའ་རྐྱོན་ཕར་བཞག་ཞལ་རས་ནག་པོ་ཙམ་ཡང་སྟོན་པ་མཇལ་མྱོང་མེད། སྐབས་འགར་ཁོང་ཐུན་བཤེར་ལ་ཕེབས་སྐབས་ང་ཚོ་སློབ་མ་ལེ་ལོ་ཅན་ཁ་ཤས་ཐུན་ཞབས་སུ་སྐད་ཆ་ཤོད་བཞིན་ཡོད་པ་ཁོང་གིས་གཟིགས་ཚེ་ཐག་རིང་པོ་ནས་ཞལ་འདོན་གྱེར་བཞིན་ང་ཚོ་ལ་འདོན་སྒྲ་ཐོས་སུ་བཅུག་སྟེ་ང་ཚོ་རང་ཤག་ཏུ་ལོག་ཟིན་རྗེས་གཞི་ནས་ཐུན་བཤེར་མཛད། སྟོན་པ་སངས་རྒྱས་ཀྱིས་བྱམས་པའི་སྟོབས་ཀྱིས་བདུད་ཚོགས་འདུལ་བ་བཞིན་ཁོང་གིས་བྱམས་བརྩེ་དང་ཞི་བ་ཁོ་ནས་ང་ཚོའི་གཤིས་རྒྱུད་ངན་པ་དག་བཅོས་མཛད་པ་ནི་དེང་སང་སློབ་མའི་རྣམ་འགྱུར་བཟང་ངན་ཙམ་ལ་བརྟེན་ནས་གནས་དབྱུངས་བཏང་བ་དང་ཆད་པ་བཅད་མཁན་གྱི་དགེ་རྒན་རྣམས་ཀྱིས་ལན་གཅིག་གཟིགས་ན་ཅི་མ་རུང་། སྔོན་འགྲོ་བླ་མའི་རྣལ་འབྱོར་འཇུག་གྲིལ་ལ་ཉེ་སྐབས་དངོས་གཞི་ཕྱག་ཆེན་གྱིས་ངོ་སྤྲོད་གནང་བའི་དུས་སུ་སླེབས། ཉིན་མོ་དེ་ནི་ཐོག་མར་མེད་ནས་ནམ་ཡང་འབྲལ་མ་མྱོང་པར་རྟག་ཏུ་འགྲོགས་ཀྱང་རང་ངོ་རང་གིས་མ་ཤེས་པའི་རང་སེམས་ངོས་བཟུངབའི་དུས་ཤིག་ཡིན་པ་དང་། རྒྱ་ཆེ་ས་ནས་བཤད་ན་འཁོར་འདས་གཉིས་གཞི་གཅིག་ཏུ་སྒྲིལ་བའི་དུས་ཚིགས་སམ་འཁྲུལ་སྣང་གིས་རྒྱས་བཏབས་པའི་འཁོར་བ་ལ་གྱེས་བརྡ་བཏང་བའི་ཉིན་མོ་དེའང་རེད། ཉིན་དེའི་སྔར་མོ་ནས་སྒྲུབ་བླ་ཀརྨ་གསང་སྔགས་བརྒྱུད་བླ་མས་སེམས་ངོ་སྤྲོད་གནང་རྒྱུའི་སྐོར་གོ་བ་དང་། ད་དུང་ཆོས་གྲོགས་ཁ་ཤས་ཀྱིས་དེ་རིང་སེམས་རིག་ཤན་འབྱེད་རྒྱུ་རེད་ཅེས་ལབ་སོང་བས་ཧ་ཅང་དོ་སྣང་ཆེན་པོས་ཞོགས་ཟས་མགྱོགས་ཟ་བྱས་ནས་སྒུག་ཡིན།
རྔ་སྒྲས་བསྐུལ་བ་དང་མཉམ་དུ་སྒྲུབ་གྲོགས་ཡོངས་རྫོགས་ལྷ་ཁང་ནང་དུ་འདུ་འཛོམས་བྱས། ཉིན་དེར་བླ་མ་རིན་པོ་ཆེའི་དབུས་བསོད་ནམས་རྒྱ་མཚོ་དང་། བན་ཆེན་ཉི་མ། བསྟན་པ་རབ་རྒྱས་བཅས་འཕགས་པའི་གནས་བརྟན་ཆེན་པོ་དགྲ་བཅོམ་པ་དག་གདུལ་བྱའི་དོན་དུ་སྐུ་གཟི་མདངས་ལྷམ་མེར་བཞུགས་པ་བཞིན་དུ་གྲལ་དུ་འཁོད་ཟིན་འདུག ཐོག་མར་བླ་མ་རྡོར་རབ་ཀྱིས་རྒྱལ་བ་བཀའ་བརྒྱུད་པ་ནི་མོས་གུས་ཀྱི་བཀའ་བབ་ཡིན་ཚུལ་དང་ཕྱག་རྒྱ་ཆེན་པོ་ལ་མོས་གུས་གལ་ཆེ་ཚུལ་སྐོར་བསྡུས་ཙམ་གསུངས་ཏེ་གསོལ་འདེབས་དབྱངས་རྟ་སྙན་པོས་ལན་ཁ་ཤས་གྱེར་ནས་ངོ་སྤྲོད་ཀྱི་དངོས་གཞི་ལ་འཇུག་སོང་། ཁོ་བོའི་ཡིད་དུ་སེམས་ངོ་སྤྲོད་པ་དང་། སེམས་རིག་ཤན་འབྱེད་པ་སོགས་ཐ་སྙད་ཁ་ཤས་སྒྲུབ་གྲོགས་ཚོའི་བརྒྱུད་དེ་སྔར་ནས་ཐོས་ཟིན་སྟབས་དམིགས་བསལ་གྱིས་ངོས་བཟུང་རྒྱུ་ཞིག་དང་ཤན་འབྱེད་རྒྱུ་ཞིག་ཡོད་ཚོད་སྙམ་ཏེ་རེ་སྒུག་བྱས་མོད་བླ་མས་འཛུམ་མདངས་ཤིག་དང་ལྷན་ངས་ཁྱེད་རང་ཚོ་ལ་ངོ་སྤྲོད་མ་བྱས་པའི་གོང་དུ་དྲི་བ་གསུམ་ཡོད་ལ་དྲིས་ལན་དག་ལ་བསམ་གཞིག་བྱེད་པའི་དུས་ཡུན་ཆུ་ཚོད་གཅིག་དང་ཕྱེད་ཡིན་། ཆུ་ཚོད་གཅིག་དང་ཕྱེད་ཀྱི་དུས་ཡུན་ནང་ཁྱེད་རང་ཚོ་སོ་སོའི་ཐུན་ཁང་ནང་དུ་ལོག་ཏེ་བསམ་བློ་དཔྱད་བསྡུར་ཞིབ་ཚགས་ཐོག་ནས་རང་གིས་གང་ཞིག་རྙེད་པ་དེ་ཉིད་ལན་འདེབས་བྱེད་རྒྱུ་ལས་གཞན་ཞིག་གིས་གང་བཤད་པ་དེ་ལ་ལད་ཟློས་བྱེད་རྒྱུ་མེད། དྲི་བ་ནི། དང་པོ་རང་གི་སེམས་ཟེར་བ་དེ་གང་འདྲ་ཞིག་ལ་ཟེར་བ་དང་སེམས་དེ་རྙེད་རྒྱུ་ཨེ་འདུག་ལྟོས། གཉིས་པ་སེམས་དེ་དབྱིབས་དང་ཁ་དོག་གང་འདྲ་ཞིག་འདུག་གམ་ལྟོས། གསུམ་པ་སེམས་དེ་ཐོག་མར་བྱུང་ས་དང་བར་དུ་གནས་ས་ཐ་མ་འགྲོ་ས་གང་རེད་ལྟོས། དེ་ལྟར་ལེགས་པར་བལྟས་ཟིན་རྗེས་གང་རྙེད་པའི་དྲིས་ལན་དག་ང་ཚོ་ལ་བཤད་དགོས་ཞེས་གསུངས། ངེད་ཅག་སོ་སོའི་ཐུན་ཁང་དུ་ལོག་རྗེས་བསམ་བློ་བཏང་མོད་འདི་རེད་སྙམ་པའི་ལན་ཞིག་མ་རྙེད། ངས་ནམ་རྒྱུན་སེམས་ཟེར་དེ་བ་རང་གི་སྙིང་ཁོ་ན་ལ་ངོས་འཛིན་བྱེད་ཀྱི་ཡོད། རྒྱུ་མཚན་ནི་སེམས་དང་དྲན་པ་སྙིང་སོགས་ནི་འབྲོག་པ་དག་གིས་ཐ་སྙད་གཅིག་གི་ཁྱབ་ཁོངས་སམ་དོན་གཅིག་མིང་གི་རྣམ་གྲངས་ལྟ་བུར་བེད་སྤྱོད་བྱེད་ཀྱི་ཡོད་པར་མ་ཟད་སྙིང་ལ་ད་དུང་མིང་གཞན་པ་སེམས་འབུ་ཞེས་ཀྱང་བརྗོད་ཀྱི་ཡོད། ད་དུང་ངའི་སྤུན་མཆེད་ཀྱི་ང་ལ་བཀའ་རྐྱོན་བཏང་སྐབས་སྙིང་དྲན་པ་མེད་པ་ཡིན་ནམ་ཞེས་པའི་ཚིག་འདི་རྒྱུན་ལྡན་དུ་ཐོས་ཀྱི་ཡོད་སྟབས་སེམས་ནི་སྙིང་ཁོ་ན་ལ་ངོས་འཛིན་བྱེད་བཞིན་ཡོད། དེ་ནི་ཧང་སངས་དགོས་པ་དང་ཧ་ལས་དགོས་པ་ཞིག་མ་ཡིན་ཏེ་དེང་རབས་ཚན་རིག་ཡར་རྒྱས་ཆེ་བའི་ལུང་པའི་མི་ཕལ་ཆེ་བས་རྣམ་ཤེས་ཀླད་པ་ལས་གཞན་མ་ཡིན་པར་བཤད་པ་དང་ཕྱོགས་མཚུངས་པ་ཞིག་ཡིན། གང་ལྟར་ཉིན་དེར་ངས་བརྟག་དཔྱད་ཇི་ཙམ་བྱས་ཀྱང་སྙིང་དེ་སེམས་སམ་རྣམ་ཤེས་ཡིན་པའི་རྒྱུ་མཚན་མ་རྙེད་ལ་དེ་ལས་གཞན་པའི་སེམས་འདི་རེད་ཟེར་བ་ཞིག་ཀྱང་མ་རྙེད། དེས་ན་དབྱིབས་དང་ཁ་དོག་བྱུང་གནས་འགྲོ་གསུམ་སོགས་གང་ཡང་ཤོད་ཐུབ་པ་མ་བྱུང་བས་ངས་བླ་མ་ལན་འདེབས་ཇི་ལྟར་ཞུ་སྙམ་ནས་འཇིགས་སྐྲག་སྐྱེས་ནས་བསྡད། ཆུ་ཚོད་གཅིག་དང་ཕྱེད་ནི་ཁྱུག་ཙམ་དུ་ཕྱིན་ལ་རྔ་སྒྲའི་བརྡ་ཡིས་ལྷ་ཁང་དུ་འཛོམས་དགོས་པ་བསྐུལ་བ་དང་མཉམ་དུ་སྒྲུབ་གྲྭ་ཡོངས་རྫོགས་ལྷ་ཁང་དུ་འདུ་འཛོམས་བྱུང་། ཁོ་བོ་ལ་ནི་ལན་འདི་ཡིན་སྙམ་པ་ཞིག་ཞུ་རྒྱུ་མེད་སྟབས་ཆེས་ཉམ་ཆུང་གི་ཚུལ་དུ་གྲལ་འཇུག་ཏུ་བསྡད། བླ་མས་ཆེས་ཐོག་མར་ཁོང་གི་སྐུ་ཚ་བསོད་ནམས་དབང་རྒྱལ་ལ་ཁྱེད་ཀྱི་སེམས་རྙེད་སོང་ངམ་དེ་ཉིད་དབྱིབས་དང་ཁ་དོག་གང་ཞིག་འདུག་ཅེས་བཀའ་འདྲི་གནང་སོང་། མཆེད་པོ་ཁོང་ནི་དུས་རྒྱུན་སྤྲོ་སྣང་ཆེ་ལ་དགོད་གཏམ་བཤད་ལ་དགའ་བ་མ་ཟད་ཁ་ཡངས་ལ་ཁོག་དཀར་བའི་མི་ཞིག་ཀྱང་རེད། འོན་ཀྱང་སྐབས་རེར་ཁོང་ཁྲོ་ལངས་དུས་བཟོད་མི་ཐུབ་པའི་གཤིས་རྒྱུད་གྱོང་པོ་ཞིག་ཀྱང་ཡོད་པས་སུ་ཡིན་ནའང་ཁ་རྩོད་བྱེད་ངེས། རྟག་ཏུ་ང་ལ་བྱམས་སྐྱོང་དང་སྙིང་རྗེ་བྱེད་བཞིན་ཡོད་ཀྱང་ཐེངས་ཤིག་ངས་ཀུ་རེ་དང་སྤྲ་ལག་བྱས་པར་བརྟེན་རྒྱག་བརྡུང་ཤི་ལ་ཁད་ཙམ་བྱས་མྱོང་། གང་ལྟར་ཁོང་གིས་གད་མོ་དང་ལྷན་སེམས་མི་རྙེད་རྒྱུ་ཅི་མི་འདུག་དཀར་པོ་དཀར་རྐྱང་ཞིག་འདུག་ཅེས་ཞུས་སོང་། དེ་ནི་ཁོང་གི་རྟེན་འབྲེལ་གྱི་ཆེད་དུ་ཞུས་པ་ཞིག་ཡིན་ཞེས་རྗེས་སུ་གསུངས་འདུག དེ་ནས་རིམ་བཞིན་བླ་མས་བཀའ་འདྲི་གནང་བ་དག་ལ་སློབ་མ་རྣམས་ཀྱིས་བླ་མའི་བཀའ་ལྟར་སོ་སོའི་འཆར་སྣང་གཙོ་བོར་བྱས་ཏེ་རྒྱུགས་འབུལ་ཞུས་སོང་ལ་དེ་དག་ལས་ད་ལྟའང་ཁོ་བོས་དྲན་བཞིན་པ་དམིགས་བསལ་ཅན་ཁ་ཤས་ཡོད་པས་འདིར་བཤད་འདོད་བྱུང་། གཞན་ཡང་མཆེད་པོ་གཞན་ཞིག་གིས་སེམས་ནི་སྙིང་རང་དང་དེ་ཡང་ཁྲ་ཁྲ་རེད་འདུག་ཅེས་སོང་བས་བླ་མས་སྙིང་སེམས་ཡིན་ན་་བློ་རིག་བཀྲ་བ་གྲགས་པའི་མཆེད་པོ་གཞན་ཞིག་གིས་སེམས་ནི་འདི་རེད་ཟེར་བ་ངོས་བཟུང་མེད་ཀྱང་ལག་པ་དང་ལྷན་དུ་བསྙབས། རྐང་པ་ལྷན་དུ་གོམ་པ་སྤོ། ཁ་ལྕེ་དང་ལྷན་དུ་སྐད་ཆ་བཤད། མདོར་ན་འགྲོ་འཆག་ཉལ་འདུག་གང་བྱེད་ཐམས་ཅད་རོགས་པ་བྱེད་མཁན་གྱི་དམར་དམར་འདྲ་བོ་ཞིག་འདུག་ཅེས་ཞུས་སོང་། ཁོང་གིས་བཤད་པ་རྣམས་ནི་བརྗོད་པ་དག་ལ་ཚིག་གི་གོ་རིམ་ལེགས་པ་བཅས་ཀྱི་ངའི་ཡིད་སེམས་འཕྲོག་སོང་ལ་མཆེད་གྲོགས་གཞན་ཁ་ཤས་ཀྱིས་མགོ་བོ་ལྕོག་ལྕོག་གིས་བདེན་ཁ་སྟེར་སོང་། འོན་ཏེ་བླ་མས་ཡང་བསྐྱར་དམར་དམར་དེ་གང་དུ་འདུག་དེ་ཉིད་རྒྱུ་མཚན་གང་གིས་དེ་དམར་པོ་ཡིན་པར་ཁྱེད་རང་གིས་མཐོང་སོང་ངམ་ཞེས་རེ་རེ་བཞིན་བཀའ་འདྲི་གནང་ནས་མཐའ་རྣམས་དཀག་སོང་བས་ཁོང་ལ་ཡང་བསྐྱར་ཞུ་རྒྱུ་གང་ཡང་མི་འདུག ཕྱིས་སུ་ཧ་གོ་བ་ལ་ཁོང་གིས་མི་ལའི་མགུར་འབུམ་ནང་གི་རྫི་བོ་རས་པས་ཞུས་པ་དེ་གཟིགས་མྱོང་ཡོད་པ་འདྲ། དེའི་ནང་དུ་དམར་ཆུང་བདེ་རླག་མཁན་ཞིག་འདུག་ཅེས་ཞུས་པ་དེ་དམར་པོ་འདྲ་བོ་ཞིག་ཡིན་ས་རེད་སྙམ་ནས་ཞུས་པར་ངེས། དེ་ལྟར་རིམ་བཞིན་རྒྱུགས་འབུལ་ཞུས་པ་དག་ལ་བཀའ་འདྲི་ཟབ་མོས་མྱོང་བ་རང་ཐོག་ནས་མཐའ་རྣམས་དཀག་ཏེ་གང་ཡང་ཞུ་རྒྱུ་མི་རྙེད་པ་བཟོ་གནང་བཞིན་འདུག་ལ་གུས་པ་ལ་བཀའ་འདྲི་གནང་བའི་ལན་དུ་སེམས་གང་ཡང་རྙེད་མ་སོང་ཞུས་ཡིན། མུ་འགོད

' རྩོམ་འོག་མ། མཁན་རིན་པོ་ཆེ་ཀུན་དགའ་དབང་ཕྱུག་རྗེས་སུ་དྲན་པ།

འབྲེལ་ཡོད་ཀྱི་རྩོམ་གཞན།

• ༧སྐྱབས་རྗེ་ཁམས་སྤྲུལ་རིན་པོ་ཆེ་དགོངས་པ་གཞན་དོན་དུ་གཤེགས་པར་མྱ་ངན་དང་གདུང་སེམས་མཉམ་བསྐྱེད་ཞུ་བཞིན་ཡོད།
• ༈ འཕགས་ཡུལ་རྫོང་སར་བཤད་གྲྭའི་མཁན་ཆེན་ཀུན་དགའ་དབང་ཕྱུག་མཆོག་གི་མཛད་རྣམ།
• འཛི་སྒར་བླ་མ་དབང་རྡོར་རིན་པོ་ཆེའི་རྣམ་ཐར།
• མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
• མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།