ཕག་ནད་ཆམ་རིམས་དང་འབྲེལ་བའི་ཤེས་བྱ།
ཕག་ནད་ཆམ་རིམས་དང་འབྲེལ་བའི་ཤེས་བྱ། རྩོམ་པ་པོ། བར་ཕུ་ཕུན་ཚོགས།
དང་པོ། ཕག་ནད་ཆམ་རིམས་འགོ་སྟངས།
༡༽ ཕག་པ་སོགས་དུད་འགྲོའི་རིགས་ལ་འབྲེལ་འདྲིས་ཆེ་བའི་ཕྱུགས་བདག་གམ་བཤལ་པ། ༢༽ཕག་ནད་ཆམ་རིམས་ཕོག་པའི་ཕག་ཤ་བེད་སྤྱོད་བྱེད་པ། ༣༽ཕག་ཤ་སོགས་ཤ་རིགས་རྗེན་པའམ་ལེགས་པར་མ་བཙོས་ནས་ཟ་བ།
གཉིས་པ། ཕག་ནད་ཆམ་རིམ་འགོས་སླ་བའི་མིའི་རིགས།
༡༽ ནད་གཅོང་ངམ་ཡུན་རིང་ནད་ཀྱིས་བཏབས་ནས་སྨན་བཅོས་ཡག་པོ་མ་བྱས་པ། ༢༽ ལོ་ན་༦༥ ཡན་གྱི་ལུས་སྟོབས་ཉམས་པའི་རྒས་འཁོགས། ༣༽ ལུས་གཅིག་གིས་སྲོག་གཉིས་འཚོ་དགོས་པའི་སྦྲུམ་ལྡན། ༤༽ ལུས་ཟུངས་མ་སྨིན་པའི་བྱིས་པ་ལོ་ན་ལྔ་ཡན་མ་ལོན་པ།
གསུམ་པ། ཕག་ནད་ཆམ་རིམས་ཀྱི་ནད་རྟགས།
༡༽ ཚ་བ་འཕར་བའམ་ཚ་བ་ཡོད་པ་ལྟར་སྣང་བ། ༢༽ གློ་ལངས་བ། ༣༽ མིད་པར་གཉན་ཁ་རྒྱས་པའམ་རྨ་ཐོན་པ། ༤༽ སྣ་ཆུ་མང་ལ་དབུགས་འཚུབ་པ། ༥༽ མགོ་བོ་ན་བ། ༦༽ ལུས་ཡོངས་མ་བདེ་བ་སྣང་བ། ༧༽ གྲང་ཤུམ་རྒྱག་པ། ༨༽ ངལ་དུབ་ཆེ་ལ་སྒྱིད་ལུག་པ། ༩༽ དྭང་ག་མ་བདེ་བ། ༡༠༽ ཞེ་ལོག་བྱུང་བ། ༡༡༽ དྲོད་ཁོག་བཤལ་བ།
བཞི་པ། རང་གཞན་ཀུན་ལ་ཕག་ནད་ཆམ་རིམས་འགོས་ཁྱབ་མི་ཡོང་བའི་ཐབས་ལམ།
༡༽ ཡ་ཆམ་ནད་རིམས་ཕོག་སྐབས་ཁ་རས་གང་ལེགས་ཀྱི་ཁ་དང་སྣ་ལེགས་པར་བཀབ་དགོས། ༢༽ ལས་ཀ་བྱས་མིན་ལ་མ་ལྟོས་པར་དག་རྫས་སྤྱད་དེ་ལག་པ་ཡང་ཡང་བཀྲུ་དགོས། ༣༽ གལ་ཏེ་ཁྱེད་ལ་ཕག་ནད་ཆམ་རིམས་དང་འདྲ་བའི་ནད་རྟགས་ཐོན་ཚེ་མི་མང་ཡོད་ས་ནས་རྒྱང་ཐག་རིང་ཙམ་བཞུགས་དགོས། ༤༽ མཛའ་གྲོགས་སོགས་འབྲེལ་ཡོད་རྣམ་པར་འཚམས་འདྲི་གནང་སྐབས་ལག་པ་གཏོང་བ་དང་འཐམ་འཁྱུད་བྱེད་པ་འོ་སྐྱེལ་བ་སོགས་མ་བྱས་ན་ལེགས། ༥༽ ལག་ཕྱིས་ཤོག་བུའི་རིགས་བེད་སྤྱོད་བྱས་མ་ཐག་གཟབ་གཟབ་དང་ནན་ཏན་ངང་གད་སྣོད་དུ་གཡུག་དགོས། ༦༽ གལ་ཏེ་ཁྱེད་ལ་ཕག་ནད་ཆམ་རིམས་གྱིས་མནར་བའི་ནད་རྟགས་ཐོན་ཚེ་སྨན་པ་བསྟེན་བསྟུགས་ངེས་པར་དུ་གནང་དགོས། ༧༽ གལ་ཏེ་ཁྱེད་ལ་ཕག་ནད་ཆམ་རིམས་ཕོག་ཡོད་ཚེ་ནང་དུ་ངལ་གསོ་བསྟེན་པ་ལས་ལས་ཀ་དང་སློབ་གྲྭ་སོགས་མི་ཚོགས་ཡོད་སར་བསྐྱོད་མི་རུང་། ༨༽ ཕག་ཤ་སོགས་ཤ་རིགས་ལེགས་པར་བཙོས་ནས་མཆོད་པ་ལས་རྗེན་པ་གཏན་ནས་བཞེས་མི་ཉན།
བསམ་ཚུལ་འབྲི།
དབུས་རྒྱུན་གྱི་ ༢༠༡༥ ལོའི་ཚོགས་འདུ་ཐེངས་དང་པོ་གྲོལ་བ།