ཀུན་མཁྱེན་ཀློང་ཆེན་པའི་གསུང་རབས་ཁག་ཅིག་ངོ་སྤྲོད།
༄༅། །མཛོད་ཆེན་བདུན་སྤར་དུ་བསྒྲུབས་པའི་དཀར་ཆག་རིན་ཆེན་མེ་ལོང་བཞུགས་སོ། །
༼ཞེས་པའི་ནང་ནས་ཟུར་འདོན་བྱས་པ་ཞིག༽
༼དེ་ལ་ཀུན་མཁྱེན་ཆེན་པོའི་བསྟན་བཅོས་ཀྱི་གཙོ་བོ་ནི། མཛོད་ཆེན་བདུན་དང༌། ངལ་གསོ་སྐོར་གསུམ། སྙིང་ཐིག་པོད་བཞི་རྣམས་ཡིན་པས། དང་པོ་མཛོད་བདུན་ནི། མདོ་རྒྱུད་བསྟན་བཅོས་མཐའ་དག་གི་དོན་ཐོས་བསམ་བསྒོམ་པས་གཏན་ལ་འབེབས་ཅིང༌། ཐེག་པ་དང་གྲུབ་མཐའ་སྤྱིའི་གནད་སྟོན་པ། ཟབ་ཅིང་རྒྱ་ཆེ་བའི་བསྟན་བཅོས་ཡིད་བཞིན་རིན་པོ་ཆེའི་མཛོད་རྩ་བ་ལེའུ་ཉེར་གཉིས་པ༑ དེའི་དགོངས་འགྲེལ་ཊཱིཀ་ཆེན་པདྨ་དཀར་པོ། ཁྲིད་ཡིག་ཟབ་དོན་རྡོ་རྗེ་སྙིང་པོ་དང་བཅས་པ་ནི་དང་པོའོ། །གྲུབ་མཐའ་རིན་པོ་ཆེའི་མཛོད་ནི་ཡིད་བཞིན་མཛོད་རྩ་འགྲེལ་དུ་ཡང་ཕྱི་ནང་གི་གྲུབ་མཐའ་རྒྱས་པར་བཤད་མོད་ཀྱི། གཙོ་བོར་ནང་པའི་མདོ་དང་སྔགས་ཀྱི་གྲུབ་མཐའ་གསར་རྙིང་གི་བཞེད་སྲོལ་བཅས་རྒྱ་ཆེར་བསྟན་པ་ལེའུ་བརྒྱད་པ་སྟེ། མཛོད་འདི་གཉིས་ནི་རྒྱུ་འབྲས་ཀྱི་ཐེག་པ་ཀུན་གྱི་ལམ་གནད་སྤྱིར་བསྟན་པས་ཐོས་བསམ་གྱིས་སྒྲོ་འདོགས་གཅད་པར་བྱ་བའི་གཞུང་ཟབ་ཅིང་རྒྱ་ཆེ་བ་ཡིན་ནོ། །མན་ངག་རིན་པོ་ཆེའི་མཛོད་ནི་རྫོགས་པ་ཆེན་པོའི་ལམ་གྱི་སྔོན་འགྲོ། གང་ཟག་གང་ཡང་རུང་སྟེ། བསླབ་བྱ་དང་གདམས་པ་ལམ་དང་འབྲས་བུའི་ཆོས་རྣམས་ཀྱི་ཉམས་ལེན་གནད་འགག་དྲིལ་ནས་སྐལ་བཟང་རྣམས་ལ་ཞལ་གདམས་སུ་སྤེལ་བ། ཐམས་ཅད་དྲུག་ཚན་རེ་རེའི་ཆིངས་སུ་བསྟན་པ། དེ་རེ་རེ་ལའང་བསམ་ན་དོན་རྒྱ་ཆེན་པོ་འདུས་ཤིང་སེམས་ལ་འཆང་བའི་མན་ངག་ཏུ་གྱུར་པས་ཡོན་ཏན་རིན་པོ་ཆེའི་གཏེར་དང་ལྡན་པའོ། །ཁྱད་པར་དུ་འོད་གསལ་རྫོགས་པ་ཆེན་པོའི་ལམ་དངོས་ནི་ཀ་དག་ཁྲེགས་ཆོད་དང༌། ལྷུན་གྲུབ་ཐོད་རྒལ་གཉིས་ཡིན་པས། ཀ་དག་ཁྲེགས་ཆོད་ཀྱི་ཉམས་ལེན། ཆོས་ཐམས་ཅད་གདོད་ནས་རྣམ་པར་དག་པའི་རང་བཞིན་རྫོགས་པ་ཆེན་པོ་བྱར་མེད་ཡེ་སངས་རྒྱས་པའི་དགོངས་དོན་རྗེན་པར་སྟོན་པ་ཆོས་དབྱིངས་རིན་པོ་ཆེའི་མཛོད་རྩ་བ་ལེའུ་བཅུ་གསུམ་པ། དེའི་འགྲེལ་པ་ལུང་གི་གཏེར་མཛོད་ཅེས་བྱ་བ། མཚན་གྱི་རྣམ་གྲངས་གཞན་ཆོས་དབྱིངས་གསལ་བ། རྟོགས་པའི་སྣང་བ། ཐེག་པའི་རྒྱལ་པོ་ཞེས་གྲགས་པ་དང་བཅས་པའོ། །འདི་ནི་གཙོ་བོ་ཀློང་སྡེའི་ཀ་དག་ཆོས་ཀྱི་དབྱིངས་སྟོན་ཚུལ་ཡིན་ཀྱང་ཀུན་བྱེད་རྒྱལ་པོ་སོགས་སེམས་ཀྱི་སྡེའི་ཀ་ནས་དག་པའི་སེམས་ཉིད་དམ་བྱང་ཆུབ་ཀྱི་སེམས་གཏན་ལ་དབབ་པ་དང་ཡང་མཐུན་ཞིང༌། རང་གཞུང་ལས། སྡེ་གསུམ་ཀློང་དགུ་རྫོགས་པ་ཆེན་པོའི་དོན། །ཞེས་སོགས་གསུངས་པ་ལྟར་རྫོགས་ཆེན་སྡེ་
གསུམ་གྱི་རྒྱུད་ལས་བསྟན་པའི་ཀ་དག་གི་དགོངས་པ་གཞི་ལམ་འབྲས་གསུམ་གྱི་གནད་གསལ་བར་བྱེད་པ་ཡིན་ནོ། །གནས་ལུགས་རིན་པོ་ཆེའི་མཛོད་ནི་རྫོགས་ཆེན་སྡེ་གསུམ་གྱི་ཀ་དག་ཁྲེགས་ཆོད་ཀྱི་དོན་འགྲེལ། རང་བྱུང་འོད་གསལ་ཡེ་ཤེས་ཀྱི་གནས་ལུགས་རྗེན་པར་སྟོན་པ། གཙོ་བོར་གསང་བ་མན་ངག་སྡེའི་ཁྲེགས་ཆོད་ཀྱི་ཉམས་ལེན་དང་མཐུན་ལ། ཐེག་པ་འོག་མ་པའི་སྤང་བླང་བྱ་རྩོལ་གྱི་གཟེབ་ལས་གྲོལ་བའི་གཉུག་མ་དེ་ཁོ་ན་ཉིད་ཀྱི་དོན་ལྷུག་པར་བསྟན་པ་རྡོ་རྗེའི་དོ་ཧ་ཆེན་མོ་མེད་པ་ཕྱལ་བ་ལྷུན་གྲུབ་གཅྀག་པུ་སྟེ། འོད་གསལ་རྡོ་རྗེ་རྩེ་མོ་རང་ལུགས་ཀྱི་དམ་ཚིག་གི་མདོ་ཆིངས་ཆེན་པོ་བཞིའི་ཆིངས་སུ་བཅིངས་ཤིང༌། དེ་རེ་རེ་ལའང་དེ་ཁོ་ན་ཉིད་དུ་གནད་བཀྲོལ། རང་བྱུང་ཡེ་ཤེས་སུ་འགག་བསྡམ། སྐྱེ་མེད་བསམ་ཡུལ་ལས་འདས་པར་ཆིངས་སུ་བཅིང༌། རྒྱུ་འབྲས་བྱ་རྩོལ་ལས་འདས་པར་ལ་བཟླ་བ་སྟེ་རྡོ་རྗེའི་གནས་ཆེན་པོ་བཅུ་དྲུག་གི་རྣམ་པར་བསྟན་པ་རྩ་བ་ལེའུ་ལྔ་པ། དེའི་འགྲེལ་པ་དང་བཅས་པའོ། །དེས་ན་མཛོད་ཆེན་འདི་གཉིས་ནི་ཀ་དག་ཁྲེགས་ཆོད་ཀྱི་དགོངས་པ་ཇི་ལྟ་བ་བཞིན་དུ་སྟོན་པའི་བསྟན་བཅོས་ཡིན་ལ། སྔ་མ་བཞག་ཐབས་གཙོ་བོར་བསྟན་པ་དང༌། ཕྱི་མ་འདི་དེ་ཁོ་ཉིད་དུ་ལ་བཟླ་བ་གཙོ་བོར་མཛད་པ་ལྟ་བུ་ཡིན་ནོ། །ཐེག་མཆོག་རིན་པོ་ཆེའི་མཛོད་ནི་རྫོགས་པ་ཆེན་པོ་གསང་བ་མན་ངག་སྡེའི་རྒྱུད་བཅུ་བདུན་དང༌། མན་ངག་བརྒྱ་བཅུ་དགུའི་དོན་འགྲེལ་སྟོན་པ་སྐུ་གསུམ་གྱི་བྱུང་ཚུལ་ནས་ལྷུན་གྲུབ་འབྲས་བུའི་རྣམ་གཞག་ལ་ཐུག་གི་བར་རིམ་པའི་ཁང་པ་ཉི་ཤུ་རྩ་ལྔས་རྒྱས་པར་བཤད་པ་འདིར་མན་ངག་སྡེ་གསང་བ་འོད་གསལ་སྙིང་ཐིག་གི་རྒྱུད་དང་མན་ངག་རྒྱ་མཚོ་ལྟ་བུ་གཞི་ལམ་འབྲས་བུའི་ཚུལ་ཐམས་ཅད་དང༌། ཁྱད་པར་དུ་ལམ་ཁྲེགས་གཅོད་དང་ཐོད་རྒལ་གྱི་གསང་དོན་མ་སྦས་པར་བཀྲོལ་བ་འཇིག་རྟེན་གསུམ་ན་རྨད་དུ་བྱུང་བའི་རིན་ཆེན་གཅིག་པུ་བ་ཉིད་དོ། །དེ་ལྟར་ཐེག་མཆོག་མཛོད་བརྗོད་བྱ་ཤིན་ཏུ་རྒྱ་ཆེ་བས་རིམ་ཁང་དྲུག་པ་མན་ཆད་ཀྱི་གནད་དོན་ཉམས་ཁྲིད་ལྟ་བུར་བསྡུས་ཏེ། གཞི་དངོས་པོ་གཤིས་ཀྱི་གནས་ལུགས་བསྟན་པ་ནས། མཐར་ཐུག་འབྲས་བུའི་གྲོལ་ས་ཆེན་པོ་ལ་ཐུག་གི་བར་གྱི་རྡོ་རྗེའི་གནས་བཅུ་གཅིག་ཏུ་བསྟན་པ་ཚིག་དོན་རིན་པོ་ཆེའི་མཛོད་དམ། འོད་གསལ་མཛོད་དུའང་གྲགས་པ་འདི་ནི་ལམ་ཁྱེར་གནད་གྱི་དོན་འགྲེལ་ཟབ་མོའོ། །མཛོད་ཆེན་འདི་གཉིས་ནི་དོན་འདྲ་ལ་རྒྱས་བསྡུས་ཙམ་གྱི་ཁྱད་པར་ཡིན་ཞིང༌། གསང་བ་མན་ངག་སྡེའི་དགོངས་པ་མཐར་ཐུག་པ་འོད་གསལ་སྙིང་ཐིག་གི་ལམ་གནད་ཚུལ་བཞིན་བསྟན་པ་ཡིན་ནོ། །དེ་ལྟར་བྱང་ཆུབ་ཡན་ལག་བདུན་ནམ། རྒྱལ་སྲིད་རིན་པོ་ཆེ་བདུན་གྱི་གྲངས་དང་མཚུངས་པའི་མཛོད་ཆེན་བདུན་ཞེས་ཡོངས་སུ་གྲགས་པ་འདི་ནི། རྒྱལ་བའི་བསྟན་པ་མཐའ་དག་གི་དགོངས་དོན་འདུ་བའི་ལེགས་བཤད་ཀྱི་རྒྱ་མཚོ་ཆེན་པོ། ཟབ་གསང་རྡོ་རྗེ་སྙིང་པོའི་ནོར་བུ་རིན་པོ་ཆེ་རིན་ཐང་མེད་པས་གང་བ། སྐལ་བཟང་བློ་ཡི་འདོད་པ་ཅི་དགར་འཇོ་བའི་གཞུང་དམ་པ་གཞན་པའི་སྤྱོད་ཡུལ་ལས་འདས་པ་འཕགས་ཆེན་སེམས་དཔའ་ཆེན་པོའི་བསྟན་བཅོས་ཁྱད་པར་ཅན། རྒྱལ་བ་རྡོ་རྗེ་འཆང་གི་བཀའ་དང་རྣམ་དབྱེར་མེད་པ་ཉིད་དུ་གྲུབ་པའོ། །
ངལ་གསོ་སྐོར་གསུམ་ནི། རྫོགས་པ་ཆེན་པོ་སེམས་ཉིད་ངལ་གསོ་ལེའུ་བཅུ་གསུམ་པ༑ དེའི་བསྡུས་དོན་ལྡེ་མིག་ཀུནྡའི་ཕྲེང་བ། རྒྱ་ཆེར་འགྲེལ་བ་ངེས་དོན་ཤིང་རྟ་ཆེན་པོ། བསྡུས་དོན་པདྨ་དཀར་པོ། དགེ་བ་གསུམ་གྱི་དོན་ཁྲིད་བྱང་ཆུབ་ལམ་བཟང་དང་བཅས་པ་འདི་ནི། རྒྱུ་འབྲས་ཐེག་པ་རྒྱ་མཚོའི་གནད་ཐམས་ཅད་འགལ་མེད་ལམ་གྱི་རིམ་པར་འཆར་ཞིང༌། རང་སེམས་འོད་གསལ་གསང་སྔགས་ཀྱི་དེ་ཁོ་ན་ཉིད་དུ་ལྟ་བ་གཏན་ལ་འབེབ་པ་གཙོ་བོར་སྟོན་པ་ཡིན་ནོ། །གཉུག་མ་རང་གནས་ཀྱི་ཏིང་འཛིན་བསྒོམ་པའི་ལམ་ཟབ་སྟོན་པ་བསམ་གཏན་ངལ་གསོའི་རྩ་བ་རྡོ་རྗེའི་གནས་གསུམ་པ། དེའི་བསྡུས་དོན་པུནྚ་རཱི་ཀའི་ཕྲེང་བ། ཟབ་མོའི་གནས་ལུགས་དག་གིས་གསལ་བར་བྱེད་པའི་རྒྱས་འགྲེལ་ཤིང་རྟ་རྣམ་དག འོད་གསལ་སྒོམ་པའི་དོན་ཁྲིད་སྙིང་པོ་བཅུད་བསྡུས་དང་བཅས་པ་ནི་བསྒོམ་པ་གཙོ་བོར་སྟོན་པའི་བསྟན་བཅོས་སོ། །ཆོས་ཀུན་ལ་བདེན་ཞེན་གྱི་འཆིང་བ་བཅད་ནས་སྒྱུ་མའི་དཔེ་བརྒྱད་ལྟར་སྟོན་པ་སྒྱུ་མ་ངལ་གསོ། རྩ་བ་ལེའུ་བརྒྱད་པ། བསྡུས་དོན་མནྡ་རའི་ཕྲེང་བ། བློ་གྲོས་སྣང་བ་རྒྱས་བྱེད་རྒྱས་འགྲེལ་ཤིང་རྟ་བཟང་པོ། འོད་གསལ་གྱི་དོན་གསལ་སྟོན་དོན་ཁྲིད་ཡིད་བཞིན་ནོར་བུ་དང་བཅས་པ་ནི། ཆོས་ཐམས་ཅད་སྒྱུ་མའི་དཔེ་བརྒྱད་ལྟར་ཤེས་ནས་གང་ལའང་མ་ཆགས་པར་བྱེད་པའི་སྤྱོད་པ་གཙོ་བོར་སྟོན་པའི་བསྟན་བཅོས་ཡང་དག་ཡིན་ནོ། །ངལ་གསོ་སྐོར་གསུམ་གྱི་ཆོས་འབྱུང་ཤེས་རབ་གསལ་བ་ཞེས་སྤྱི་དོན་ལེགས་བཤད་རྒྱ་མཚོ་དང་དཀར་ཆག་པདྨ་སྟོང་ལྡན་ཏེ་ངལ་གསོ་སྐོར་གསུམ་གྱི་རྩ་བ་དང་ཡན་ལག་གི་ཆོས་སྡེ་བཅོ་ལྔ་བཞུགས་སོ༑ ༑
སྙིང་ཐིག་པོད་བཞི་ནི། པཎ་ཆེན་བི་མ་ལས་རྩོམ་པར་བསྐུལ་བ་བཞིན་དུ་པཎ་ཆེན་དྲི་མེད་བཤེས་གཉེན་གྱི་རྫོགས་པ་ཆེན་པོའི་གདམས་ཟབ་བི་མ་སྙིང་ཐིག་ཅེས་གྲགས་པ་ཟབ་པ་པོད་བཞི་དང་མན་ངག་བརྒྱ་བཅུ་དགུ་སོགས་ཆོས་སྡེ་ཤིན་ཏུ་རྒྱས་པ་དེ་ཉིད། སྙིང་པོ་ཉུང་ངུར་བསྡུས་པ་བི་མ་ཡང་ཏིག་དང༌། སྐུ་ཡི་སྐྱེ་བ་སྔ་
མར་རྫོགས་ཆེན་པདྨ་སྙིང་ཐིག་གམ་མཁའ་འགྲོ་སྙིང་ཐིག་གི་དཔེ་གཏེར་ནས་གདན་དྲངས་པས་རྗོད་བྱེད་ཚིག་གི་ཆ་དབང་བར་གྱུར་ཀྱང༌། ཀུན་མཁྱེན་ཉིད་ཀྱི་སྐུ་དུས་སུ་ཁྲེགས་ཆོད་དང་ཐོད་རྒལ་གྱི་ཉམས་ལེན་རྩལ་རྫོགས་པས་འོད་གསལ་དག་པའི་སྣང་བ་ལོངས་སྐུའི་ཞིང་རབ་འབྱམས་མཐའ་ཀླས་པར་གཟིགས། ཤིང་མོ་ཡོས་ཀྱི་ལོར་མཆིམས་ཕུའི་གནས་སུ་མཁའ་འགྲོ་སྙིང་ཐིག་ཉིད་དགོངས་པའི་གཏེར་དུའང་བབ་ནས་བརྗོད་བྱའི་དོན་མ་ལུས་ཐུགས་ལ་ཤར་ཏེ། ཟབ་ཅིང་རྒྱ་ཆེ་བ་ཤོག་སྐྱ། ཡང་ཟབ་རྣམས་ཤོག་འདྲ། ཤིན་ཏུ་ཡང་ཟབ་རྣམས་ཤོག་སེར་ཏེ་སྐོར་གསུམ་དུ་འདུས་པའི་མཁའ་འགྲོ་ཡང་ཏིག་ཆོས་སྡེ་ལྔ་བཅུ་རྩ་ལྔ་པ་མཛད། མཁའ་འགྲོ་སྙིང་ཐིག་ཚིག་ཉུང་ལ་རྒྱུད་དོན་བརླིང་ཞིང་རྟོགས་དཀའ་བ་ལའང་དོན་རྒྱས་དཀྲོལ་ལྟ་བུར་ཡང་འགྲོ་ཞིང༌། སྔར་རྫོགས་ཆེན་བཀའ་མའི་གདམས་སྐོར་རྣམས་བསྡོམ་པ་ཟབ་མོ་ཡང་ཏིག་གི་པོད་དང་གསུམ། དེ་ཐམས་ཅད་ཀྱི་ཉམས་ལེན་གནད་དུ་དྲིལ་བ༑ ཐིག་ལེ་མཆོག་གསང་རྫོགས་པ་ཆེན་པོའི་ཆོས་སྡེ་བླ་མ་ཡང་ཏིག་གམ། ཡང་ཟབ་ཡིད་བཞིན་ནོར་བུར་གྲགས་པའི་ཆོས་སྡེ་སུམ་ཅུ་རྩ་ལྔ་པ་སྟེ་དེ་ལྟར་བཞི་པོ་འདི་ནི་རྫོགས་པ་ཆེན་པོའི་ཉམས་ལེན་གནད་ཀྱི་མན་ངག་གི་ཆོས་སྡེ་ཡིན་ལ། དེ་ཀུན་གྱི་ནང་ན་སྙིང་པོར་དྲིལ་བ་བླ་མ་ཡང་ཏིག་ཡིད་བཞིན་ནོར་བུ་འདི་གདམས་པ་ཐམས་ཅད་ཀྱི་མཐིལ་དུ་གདམས་པར་མཛད་པ་ཡིན་ནོ། །གཞན་སྙན་རྒྱུད་ཐིག་ལེ་གསང་སྐོར་དང་བཅས་པ་སྟེ། སྙིང་ཐིག་སྡེ་གསུམ་གསུམ་དུ་བརྩིས་པའི་ཆོས་ཀྱི་རྣམ་གྲངས་བཞི་བཅུ་ལྷག་ཙམ་མོ།།༽
འདིའི་གཤམ་ན་གསལ་བཤད་འདི་འདུག༼ ༈ དེ་ལྟར་མཁས་མཆོག་མི་ཕམ་པའི་གསུང་ལ་ཕྲན་བུའི་བསྒྱུར་བཀོད་གོང་འོག་གི་རྟགས་ཙམ་མ་གཏོགས་གཞན་ཐོག་མཐའ་ཀུན་གསུང་བསླད་མེད་རང་སོར་བྱས་ཤིང༌། སྐབས་དོན་གྱི་ཁྱད་པར་དམིགས་བསལ་བ་རྣམས་ཚན་སོ་སོར་ཕྱེས་ཏེ་འདི་ལྟར་བྲིས་ཞེས་སྐུ་ཞབས་མཆོག་སྤྲུལ་རིན་པོ་ཆེའི་བཀའ་ཕེབས་སྤྱི་བོར་བསྩལ་པ་བཞིན་མཁན་ཟུར་ཐུབ་བསྟན་སྙན་གྲགས་ནས་བྲིས་པ་དགེ་ཞིང་བཀྲ་ཤིས་པར་གྱུར་ཅིག དགེའོ།། །།༽
བསམ་ཚུལ་འབྲི།
གོང་ས་མཆོག་གིས་གཟེངས་རྟགས་བཞེས་ནས་ལོ་༢༥འཁོར་བ།