ལྔ་བཅུ་ང་དགུ་ལོའི་སྡེ་དགེ་དཔལ་རྒོད་ཁག་ཅིག་གི་ལོ་རྒྱུས།
༈ མདོ་ཁམས་ཆུ་བཞི་སྒང་དྲུག་མི་ལོ་ལྔ་བཅུའི་ལོ་རྒྱུས་ཕྱོགས་བསྡུས་ཀྱི་དེབ་ནང་འཁོད་པའི་སྡེ་དགེ་དཔའ་རྒོད་རྣམ་པའི་ལོ་རྒྱུས་ཕྱོགས་བསྒྲིགས།
༡༽སྡེ་དགེ་བཀྲ་ཤིས་དཔལ་ལྡན།
སྡེ་དགེ་བཀྲ་ཤིས་དཔལ་ལྡན་ནི་སྤྱི་ལོ་༡༩༥༨ལོར་བོད་ལྷོ་ཁ་ལྕགས་ཚ་གྲི་གུ་ཐང་དུ་བོད་ཀྱི་བསྟན་སྲུང་དང་བླངས་དམག་གི་སྒྲིག་འཛུགས་དབུ་ཚུགས་རྗེས་སྡེ་དགེ་བརྒྱ་དཔོན་ཚུལ་ཁྲིམས་བསྟན་འཛིན་གྱི་དམག་ཁོངས་སུ་ཡོད།བཙན་བྱོལ་དུ་འབྱོར་རྗེས་བོད་མི་སྤྱི་མཚུངས་ལྟར་ཐོག་མར་ལ་དྭགས་དང་སྦིར་སོགས་སུ་ལམ་བཟོར་བསྐྱོད་པ་དང་།དེ་ནས་འཚོ་བའི་མདུན་ལམ་གྱི་ཆེད་དུ་ས་གནས་ཀུ་ལུ་མ་ན་ལིའི་ཁུལ་དུ་བཟའ་ཟླ་དང་མཉམ་དུ་ལས་ཀ་འདྲ་མིན་བྱས་མྱོང་ཡོད།དེ་ནས་ས་གནས་ཀུ་ལུ་མ་ན་ལིའི་བོད་མིའི་གཞིས་ཆགས་རྡོ་སྦི་དཔལ་འབར་གླིང་གཞིས་ཆགས་ཚུགས་པ་ནས་བཟུང་ས་གནས་ས་གནས་སྡོད་བྱེད་བཞིན་ཡོད་པའི་ལོ་རྒྱུས་སུ།
༢༽སྡེ་དགེ་དཀོན་མཆོག་རྒྱལ་མཚན།
སྡེ་དགེ་དཀོན་མཆོག་རྒྱལ་མཚན་ནི་སྤྱི་ལོ་༡༩༥༨ལོ་ནས་རྒྱ་དམར་པོའི་དམག་གིས་ཁྱིམ་གཞིས་དགོན་ཁག་སོགས་བཙན་བཟུང་བྱས་ནས་བཟུང་།གསེར་རྟ་ཁ་ནས་ཕར་རྒོལ་དམག་གིས་གྲ་སྒྲིག་མ་ཐུབ་གོང་ནས་རྒྱ་དམག་གིས་ཚུར་གཏོར་ཏེ་བྲོས་བྱོལ་སྐབས་མཚོ་སྐྱ་རིང་དང་སྔོ་རིང་ལ་ཁོང་གི་དམག་ཤོག་ནས་མི་སུམ་བརྒྱ་ཙམ་རྒྱ་དམག་གིས་བསད།འཕྲོས་མི་བརྒྱ་ལྷག་ཙམ་ཞིག་འཐབ་འཛིངས་དང་བྲོས་བྱོལ་གྱིས་མཐར་སྤྱི་ལོ་༡༩༥༩ལོར་རྒྱ་གར་དུ་འབྱོར།སྤྱི་ལོ་༡༩༦༡ནས་༡༩༦༢བར་གཡས་རུའི་བརྒྱ་ཤོག་གི་དམག་ཁོངས་སུ་ཞུགས་ཏེ་དམག་མིའི་ལས་འགན་ཅི་ཐུབ་ཞུས་ཡོད་པའི་ལོ་རྒྱུས་སུ།
༣༽ཆུ་སྒང་བརྒྱ་དཔོན་སྡེ་དགེ་སྤ་ཁ་མགོན་པོ།
སྡེ་དགེ་བརྒྱ་དཔོན་སྤ་ཁ་མགོན་པོ་ནི་སྤྱི་ལོ་༡༩༣༠ལོར་སྡེ་དགེར་སྐྱེས།སྤྱི་ལོ་༡༩༥༥ལོར་རྒྱ་དམར་ནས་དམངས་གཙོ་བཅོས་བསྒྱུར་ཞེས་པའི་ལས་འགུལ་བརྩམས་སྐབས་དགོན་པའི་ལས་སྣེ་རྣམས་འཛིན་བཟུང་འཐབ་རྩོད་བྱེད་འགོ་ཚུགས་སྐབས་དགོན་ཆེན་དགོན་ནས་ཕྱིར་ཐོན་ཏེ་འབྲི་ནུབ་ཕྱོགས་སུ་བྲོས་བྱོལ་ཐོན།འབྲི་ནུབ་པས་རྒྱ་དམར་ལ་ངོ་ལོག་ཟིང་འཁྲུགས་བྱ་མུས་ཡོད་སྟབས་དེ་དང་མཉམ་དུ་གཅིག་བསྒྲིལ་ཐོག་དམག་འཁྲུགས་ཐེངས་མང་བྱས་པ་དང་།༡༩༥༩ལོར་ལྷ་སར་འབྱོར།༡༩༥༨ལོར་ལྕགས་ཚ་གྲི་གུ་ཐང་དུ་ཆུ་སྒང་ཐོག་མར་དབུ་འཛུགས་སྐབས་སྒྲིག་ཁོངས་སུ་ཞུགས་ཏེ་རིམ་པས་མཚོ་སྣ་དང་།ལྷ་རྒྱ་རིའི་ཕྱོགས་སུ་དམག་བསྐྱོད་མཐར་སྡེ་དགེའི་དམག་ཤོག་ཁག་གཅིག་ཀོང་པོར་བསྐྱོད་སྐབས་དེའི་ནང་ཕྱིན་ཏེ་སྐབས་དེར་དགྲ་འཐབ་ཐེངས་མང་བྱས་མཐར་༡༩༥༩ལོར་གློ་ཡུལ་བརྒྱུད་རྒྱ་གར་ཕྱོགས་སུ་བཙན་བྱོལ་སྤྱི་མཚུངས་འབྱོར།༡༩༦༦ལོར་སྦིར་སྡེ་དགེ་གཞིས་ཆགས་ཐོག་མར་འགོ་འཛུགས་སྐབས་གཞིས་ཁོངས་སུ་ཕེབས།༡༩༧༢ནས་ལོ་གཉིས་རིང་གཞིས་ཆགས་ཀྱི་མཛད་འགན་བཞེས་གནང་།༡༩༧༩ལོར་ཚེ་དུས་བྱས་པ་བཅས་ཀྱི་ལོ་རྒྱུས་མདོར་བསྡུས་སུ།
༤༽ཆུ་སྒང་བརྒྱ་དཔོན་སྡེ་དགེ་བླ་མ་ཆོས་གྲགས་རྒྱ་མཚོ།
ཆུ་སྒང་བརྒྱ་དཔོན་སྡེ་དགེ་བླ་མ་ཆོས་གྲགས་རྒྱ་མཚོ་ལགས་སྤྱི་ལོ་༡༩༥༨ལོར་ལྕགས་ཚ་གྲི་གུ་ཐང་དུ་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིགས་ཁོངས་སུ་ཞུགས་ཏེ་བརྒྱ་དཔོན་གྱི་གོ་གནས་ཐོག་བསྟན་དགྲ་རྒྱ་དམག་དང་རང་སྲོག་འབེན་ལ་བཙུགས་ནས་ཤི་འཛིང་ལན་གྲངས་བྱས་པ་དང་།སྤྱི་ལོ་༡༩༥༩ལོར་རྒྱ་གར་དུ་བཙན་བྱོལ་ལ་འབྱོར་རྗེས་རྣམ་གྲོལ་གླིང་དགོན་པའི་ཕྱི་རྒྱལ་ཆོས་ཚོགས་ཞིག་གི་བླ་མར་བསྐོ་གཞག་གནང་མཐར་དགུང་ལོ་༨༨ཐོག་དགོངས་པ་ཆོས་དབྱིངས་སུ་ཐིམས་པ་བཅས་ཀྱི་ལོ་རྒྱུས་སྙིང་བསྡུས་སུ།
༥༽སྡེ་དགེ་ཚེ་དབང་ནི།
སྡེ་དགེ་ཚེ་དབང་ནི་ཁམས་སྡེ་དགེ་ཉག་ཤིས་དུ་སྐྱེས་ཤིང་།ཕྱི་ལོ་༡༩༦༠ནས་༡༩༦༩བར་བསྟན་སྲུང་དང་བླངས་དམག་གི་ཁོངས་སུ་ཞུགས་ཏེ་དམག་གི་བྱ་བ་གང་ཐུབ་ཞུས་པ་དང་།གློ་དམག་སྡེ་ཚན་དང་པོའི་གྲས་སུ་ཡིན་པའི་ལོ་རྒྱུས་སུ།
༦༽སྡེ་དགེ་དབང་ཆེན་ནོར་བུ།
སྡེ་དགེ་དབང་ཆེན་ནོར་བུ་ནི་ཕྱི་ལོ་༡༩༥༧ལོ་ནས་དམར་པོ་སྲིད་གཞུང་ལ་ངོ་ལོག་འགོ་འཛུགས་སྐབས་སུ་ཞུགས་མྱོངས་ལ།གླིང་ཚང་ས་ཁོངས་སུ་རྒྱ་ནག་དམར་པོའི་མཉམ་དུ་འཐབ་འཛིང་བྱས་སྐབས་རྒྱུ་ནོར་དང་ཁང་གཞིས་ཡོངས་རྫོགས་ཤོར་ཀྱང་།མཐར་༡༩༥༨ལོར་ཨ་འབྲུག་མགོན་པོ་བཀྲ་ཤིས་ཀྱི་དབུ་ཁྲིད་འོག་མདོ་སྟོད་ཆུ་བཞི་སྒང་དྲུག་གི་དམག་ཁོངས་སུ་ཞུགས་ཏེ།མགོ་ལོག་ཕྱག་མཚལ་སྤྲུལ་སྐུ་ཁོངས་ནས་དགྲ་རྒོལ་གདོང་ལེན་བྱེད་སྐབས་ཟླ་བ་གཅིག་གི་ནང་ལ་དགྲ་རྒོལ་ཐེངས་བཅུ་གཅིག་ཙམ་བྱས་པས་མཐར་ཨ་ཆེན་གངས་རྒྱལ་དང་མཚོ་སྐྱ་རིང་དང་སྔོ་རིང་སོགས་ལ་རྒྱ་དམག་ཁག་གསུམ་ཙམ་གྱིས་བསྐོར་ནས་སྤྲུལ་སྐུ་ཁོང་གཙོས་བོད་མི་སྟོང་ཕྲག་སུམ་ཅུ་སོ་ལྔ་ལྷག་ཙམ་གྱི་ཚེ་སྲོག་ཤོར་ཡོད།སྤྱིར་ཕྲན་རང་ཉིད་བྱ་རྒོད་རྣམ་རྒྱལ་རྡོ་རྗེའི་དཔོན་ཞབས་སུ་གཏོགས་ཤིང་།སྤྱི་ལོ་༡༩༥༩ལོར་མཐར་བཙན་བྱོལ་དུ་འབྱོར་རྗེས་༡༩༦༠ལོར་ཨ་འབྲུག་མགོན་པོ་བཀྲ་ཤིས་དང་བྱ་རྒོད་རྣམ་རྒྱལ་རྡོ་རྗེ།འབའ་བ་རྒན་ཡེ་ཤེས་གསུམ་གྱིས་གློ་མུ་སུ་ཐང་དུ་ཆུ་སྒང་སྒྲིགས་འཛུགས་དམག་སྒར་བཙུགས་པ་ནས་བཟུང་ལོ་ལྔ་ཡི་རིང་དམག་གི་ལྔ་དཔོན་བྱས་ཤིང་།སྤྱི་ལོ་༡༩༦༦ལོར་རྒན་ཡེ་ཤེས་ནས་ཕྲན་རང་ཉིད་ལས་ཁུངས་ཨ་མའི་དོ་བདག་འགན་འཛིན་དགོས་པའི་བཀའ་ཕེབས་དོན་ལྟར་སྤྱི་ལོ་༡༩༧༤བར་དེ་དོན་ཞབས་ཞུ་ཞུས་ཁུལ་བྱས་པ་ཡིན།མཐར་ཕྲན་གྱི་རེ་སྨོན་ལ་༧སྤྱི་ནོར་གོང་ས་སྐྱབས་མགོན་ཆེན་པོའི་སྐུ་ཚེ་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་ལྷུན་གྱིས་འགྲུབ་སྟེ་བོད་ཀྱི་བདེན་མཐའ་མྱུར་དུ་གསལ་བའི་སྨོན་འདུན་ཞུ་རྒྱུ་དང་།ལྷག་དོན་མདོ་སྟོད་ཆུ་བཞི་སྒང་དྲུག་གི་འགལ་རྐྱེན་མི་མཐུན་པའི་ཕྱོགས་ཐམས་ཅད་ཞི་ཞིང་མཐུན་པའི་སྨོན་འདུན་ཞུ་རྒྱུ་དང་བཅས་པའི་ལོ་རྒྱུས་སུ།
༧༽ཆུ་སྒང་བཅུ་དཔོན་རྫ་ཆུ་ཁ་བ་རྒྱ་མཚོ།
གུས་པ་གློ་མདོ་ཁམས་ཆུ་བཞི་སྒང་དྲུག་དང་དམག་ནང་མི་ལོ་ཧྲིལ་པོ་༡༢རིང་སྒྲིག་ཁོངས་སུ་ཞུགས་པ་ཡིན།དེ་རྗེས་དང་དམག་ཨང་༢༢པའི་ནང་དུ་ཞབས་ཞུ་ལོ་༡༩རིང་ཞུས།གློ་དང་དམག་ནང་དུ་བསྡད་སྐབས་ང་ཚོའི་བརྒྱ་དཔོན་ནི་ཏྲེ་ཧོར་བསྟན་འཛིན་མཆོག་དང་དགེ་རྒན་ནི་ཨ་མདོ་སྒྲོལ་མ་སྐྱབས་རྣམ་གཉིས་ཀྱི་འོག་ལ་ཡིན་ལ་ཕྲན་རང་ཉིད་བཅུ་དཔོན་གྱི་གོ་གནས་ཡོད་པའི་ལོ་རྒྱུས་སུ།།
༨༽སྡེ་དགེ་ནོར་འཕེལ་ནི།
ལྷོ་ཁ་ལྕགས་ཚ་གྲི་གུ་ཐང་དུ་བསྟན་སྲུང་དང་བླངས་དམག་ནང་ཞུགས།དེ་རྗེས་ལྕགས་ར་དཔལ་འབར་སོགས་སུ་དམག་འཐབ་ནང་ཞུགས།རྗེས་སུ་བཙན་བྱོལ་ནང་འབྱོར་རྗེས་གློ་སྒྲིག་འཛུགས་ནང་ཞུགས་པ་སོགས་ཀྱི་ལོ་རྒྱུས་སུ།
༩༽སྡེ་དགེ་ནོར་བུ་ནི།
སྤྱི་ལོ་༡༩༥༨ལོར་བོད་ལྷོ་ཁ་ལྕགས་ཚ་གྲི་གུ་ཐང་དུ་བོད་ཀྱི་བསྟན་སྲུང་དང་བླངས་དམག་གི་སྒྲིག་འཛུགས་དབུ་འཛུགས་སྐབས་དབྲ་ཕྲུག་ངག་དབང་བརྒྱ་ཤོག་ཁོངས་སུ་ཡོད་པ་དང་།བཙན་བྱོལ་དུ་འབྱོར་རྗེས་བོད་མི་སྤྱི་མཚུངས་ལྟར་ལམ་བཟོར་བསྐྱོད་པ་དང་།དེ་རྗེས་ལྡི་ལིའི་བསམ་ཡས་གླིང་གཞིས་ཆགས་སུ་ལོ་ཤས་རིང་བསྡད།དེ་ནས་འཚོ་བའི་མདུན་ལམ་གྱི་ཆེད་དུ་ས་གནས་ཀུ་ལུ་མ་ན་ལིའི་ཁུལ་དུ་གནས་སྤོས་བྱས་ཏེ་ལས་ཀ་འདྲ་མིན་བྱས་ཏེ་རྗེས་སུ་འདས་གྲོངས་སུ་གྱུར།ཤུལ་ལུས་གཟའ་ཟླ་དང་བུ་ཕྲུག་གཅིག་བཅས་ས་གནས་ཀུ་ལུ་མ་ན་ལའི་བོད་མིའི་གཞིས་ཆགས་སུ་གནས་སྡོད་བྱེད་བཞིན་ཡོད་པའི་ལོ་རྒྱུས་སུ།
༡༠༽སྡེ་དགེ་ཡིད་ལྷུང་བ་ཐུབ་དགའ།༼ཐུབ་བསྟན་ནོར་བུ།༽
ཐོག་མ་ལྕགས་ཚ་གྲི་གུ་ཐང་དུ་ཆུ་གཞི་སྒང་དྲུག་བསྟན་སྲུང་དང་བླང་དམག་སྒར་དབུ་བརྙེས་སྐབས་དམག་གི་སྒྲིག་ཁོངས་སུ་ཞུགས་ཤིང་།དེ་ནས་མཚོ་སྣང་ཡ་མ་རོང་དུ་སྤོས་པ་དང་།དེ་རྗེས་ཨེ་ལྷ་རྒྱ་རི་དུ་སྤོས་མཚམས་དམག་སྒར་ནས་ལོ་༢༠ཡན་དང་ལོ་༤༠མས་མི་གྲངས་༤༠ལ་འཇབ་དམག་དང་དམག་དུང་བཅས་ཀྱི་སློབ་སྦྱོང་སྤྲད་སྐབས་དེར་ཞུགས།ལི་ཐང་ཨ་ཐར་དུ་ཨ་རིལ་རྒན་བཅས་ལྷ་རྒྱལ་རིར་འབྱོར་སྐབས་སློབ་སྦྱོང་ཚར་ནས་རྒྱུགས་སྤྲོད་དུས་ཡག་པོ་བྱུང་འདུག་ཅེས་བཀའ་གནང་།དེ་མཚམས་སུ་དམག་སྒར་གསུམ་ཚུར་བསྡམས་ནས་སྔོན་དུ་སློབ་སྦྱོང་ཐོན་མི་རེ་ནས་མི་༡༠༠རེར་སློབ་སྦྱོང་སྤྲད་དགོས་པ་དམག་སྒར་ནས་བཀའ་ཕེབས་པ་ལྟར་དེ་ལྟར་བྱས།དེ་རྗེས་ཡར་ལུང་ཕོ་བྲང་གཞིས་ཀར་ཕྱིན་པ་དང་།༧གོང་ས་མཆོག་ར་མ་གྲུ་ཁ་ནས་མོན་རྟ་དབང་བར་དུ་ཕེབས་སྐྱེལ་ཞུས།དེ་རྗེས་ཕར་ལོག་ནས་རྒྱ་དམག་དང་འཐབ་འཁྲུགས་ཐེངས་མང་བྱས་པ་དང་།ཨ་འབྲུག་སྦྱིན་བདག་དམག་སྒར་ལྷོ་ནས་ཟན་གྱེ་ར་ལ་སྤོས།ཀོང་པོ་ནས་སྡེ་དགེ་དང་ཨ་མདོའི་དམག་གསང་སྔགས་ཆོས་གླིང་དུ་འབྱོར་སྐབས་ཟན་གྱེ་རར་རྒྱ་དམག་གིས་བཀག་ནས་ཡར་འགྲོ་མ་ཐུབ་པར་རྩ་རི་ཕྱི་བསྐོར་རྒྱབ་ནས་རྒྱ་གར་མེ་སུ་མ་རིར་འབྱོར།དེ་ནས་མི་གྲངས་༥༠༠ཐམ་པ་ཌལ་ཧོར་དུ་སློབ་སྦྱོང་ལ་བཏང་བ་ལྟར་ཕྱིན་པ་དང་།དེ་སྐབས་དམག་སྤྱི་ཨ་མདོ་ཁྲ་མོ་དང་སྨར་ཁམས་བློ་གསལ་གཉིས་འབྱོར་ནས་རྒྱ་གར་དམག་སྡེ་ཨང་༢༢ནང་དུ་གང་ཚུད་ཕྱིན་པ་ལྷག་འཕྲོས་ཀུ་ལུ་མ་ན་ལི་ལམ་བཟོ་དང་གཞིས་ཆགས་བཅས་སུ་ཞུགས་པའི་ལོ་རྒྱུས་སྙིང་བསྡུས་སུ།
༡༡༽སྡེ་དགེ་བཀྲ་རྣམ།
སྤྱི་ལོ་༡༩༣༠ལོར་ཕ་བཀྲ་ཤིས་དོན་འགྲུབ་ཀྱི་བུ་སྡེ་དགེ་ནུབ་རྒྱུད་ཕྲལ་སོ་ཞེས་པའི་ས་གནས་སུ་སྐྱེས།སྤྱི་ལོ་༡༩༥༨ལོར་ཆུ་སྒང་དང་དམག་ཁོང་འཛུལ་ཞུགས་ཀྱིས་སྡེ་དགེ་བརྒྱ་དཔོན་བསྟན་འཛིན་ཁ་འོག་ལྷོ་ཁ་གང་སར་དམག་འཐབ་གྲངས་མང་བྱས་མྱོང་ཡོད།སྤྱི་ལོ་༡༩༥༩ལོར་རྒྱལ་བ་རིན་པོ་ཆེ་གསང་ཕེབས་གནང་སྐབས་ར་མ་གྲུ་ཁར་སྲུང་དམག་ནང་ཡོད་རིམ་པས་ཕེབས་རྗེས་སུ་སྤྱི་མཚུངས་བསྙེགས་ཏེ་རྒྱ་གར་འབྱོར།༡༩༦༦ལོ་སྦིར་སྡེ་དགེའི་གཞིས་ཁོངས་གནས་སྡོད་བྱས་ཏེ་ད་ལྟ་འཚོ་བཞིན་ཡོད་པ་བཅས་ཀྱི་ལོ་རྒྱུས།
༡༢༽སྡེ་དགེ་བསོད་ནམས་འོད་ཟེར་ནི།
སྤྱི་ལོ་༡༩༢༨ལོར་སྡེ་དགེ་ཡིད་ལྷུང་དུ་ཕ་སྐལ་བཟང་དོན་འགྲུབ་དང་མ་སྦྱིན་པ་མཚོ་གཉིས་ལ་སྐྱེས།༡༩༥༨ལོར་ལྕགས་རྩ་གྲི་གུ་ཐང་དུ་ཆུ་སྒང་ཐོག་མར་དབུ་འཛུགས་གནང་སྐབས་སྒྲིགས་ཁོངས་སུ་ཞུགས།དེ་ནས་རིམ་པས་དམག་སྒར་མཚོ་སྣ་དང་ལྷ་རྒྱ་སོགས་སུ་སྤོ་བཞུད་དང་འབྲེལ་སྡེ་དགེའི་དམག་ཤོག་ནང་མཉམ་བསྐྱོད་ཀྱི་རིམ་བཞིན་དྭག་པོ་དང་ཀོང་པོ་ཕྱོགས་སུ་བསྐྱོད།ལམ་བར་དམག་འཐབ་ཐེངས་མང་བྱས་མཐར་༡༩༥༩ལོར་རྒྱ་གར་དུ་འབྱོར་རྗེས་ཨ་རིར་དམག་སྦྱོང་ཕྱིན་ཏེ་སྦྱོར་བརྡར་མཐར་ཕྱིན་ཀྱང་བོད་དུ་མཆོང་བབས་བྱ་རྒྱུའི་གོ་སྐབས་མ་ཐོབ་ཅིང་རྒྱ་གར་དུ་ཕྱིར་ལོག༡༩༦༦ལོར་སྦིར་སྡེ་དགེ་གཞིས་ཆགས་འགོ་འཛུགས་དང་རྒྱུན་བཞིས་ཁོངས་འཛུལ་ཞུགས་བྱས།༧༠༠༧ལོར་འདས་གྲོང་ཕྱིན།
༡༣༽སྡེ་དགེ་བསོད་ནམས་རྡོ་རྗེ་ནི།
སྤྱི་ལོ་༡༩༣༧ལོར་སྡེ་དགེ་ཡིད་ལྷུང་ཞེས་པའི་ས་གནས་སུ་སྐྱེས།༡༩༥༩ལོར་དམངས་གཙོག་བཅོས་བསྒྱུར་གྱི་ལས་འགུལ་ལ་ངོ་ལོག་བརྒྱབ་སྟེ་དམག་འཐབ་ཐེངས་ཁ་ཤས་བྱས་ཏེ་ཡུལ་བྱོལ་དུ་ཡོང་།བོད་དབུས་ཕྱོགས་སུ་འབྱོར་སྐབས་ཆུ་སྒང་དང་དམག་གི་སྒྲིགས་འཛུགས་དབུ་ཚུགས་སྐབས་ལ་ཁེལ་སྟབས་དེ་གའི་དམག་གི་སྒྲིགས་ཁོངས་ནང་སྡེ་དགེ་བརྒྱ་དཔོན་ཚེ་དབང་མགོན་པོའི་དམག་ཤོག་ནང་དག་ཀོང་སོགས་བརྒྱུད་དམག་འཐབ་ཐེངས་མང་བྱས་མཐར་སྤྱི་མཚུངས་རྒྱ་གར་དུ་འབྱོར་རྗེས་ཨ་ཡི་ཊི་སྦི་ཁོངས་སུ་ལོ་ཤས་ཞབས་ཞུ་ཞུས།༡༩༦༦ལོ་སྦིར་སྡེའི་གཞིས་ཁོངས་སུ་གནས་མཐར་༢༠༠༦ལོར་འདས་གྲོངས་སུ་ཕྱིན་པའི་ལོ་རྒྱུས་མདོར་བསྡུས་སུ།
༡༤༽སྡེ་དགེ་གསེར་ལོ་ནི།
སྤྱི་ལོ་༡༩༣༣ལོར་སྡེ་དགེ་ཡིད་ལྷུང་དུ་སྐྱེས།ཕ་སྐལ་བཟང་ཟེར་བ་སྔོན་མ་ནས་འདས་གྲོང་ཕྱིན་ཡོད་སྐད།སྤྱི་ལོ་༡༩༥༦ལོར་དམངས་གཙོ་བཅོས་བསྒྱུར་ཞེས་པའི་ལས་འགུལ་ཞིག་རྒྱ་དམར་གུང་ཁྲན་ནས་སྤེལ་འགོ་ཚུགས་སྐབས་དེར་ངོ་ལོག་བརྒྱབ་སྟེ་དམག་འཁྲུག་ཐེངས་མང་བྱས་མང་བྱས་མཐར་དབུས་ཕྱོགས་སུ་བྲོས་བྱོལ་ཡོང་།སྤྱི་ལོ་༡༩༥༨ལོར་ཆུ་སྒང་སྒྲིགས་འཛུགས་དབུ་བརྙེས་སྐབས།དམག་ཁོངས་སུ་ཞུགས་ཏེ་སྡེ་དགེ་བརྒྱ་དཔོན་ཚེ་དབང་མགོན་པོའི་འོག་རྒྱ་དམར་ལ་འཐབ་འཛིང་མང་དུ་བྱས་མཐར་སྡེ་དགེའི་དམག་བྱིངས་དང་ལྷན་ཅིག་དག་ཀོང་སོགས་སུ་ས་སྲུང་བསྡད།མཐར་དེར་རྒྱ་དམར་དམག་མི་ཕོན་ཆེན་དཔུང་འཇུག་བྱས་བྱུང་སྐབས་དགྲ་འཐབ་མང་ཙམ་བྱས་རྗེས་༡༩༥༩ལོར་རྒྱ་གར་དུ་འབྱོར་༡༩༦༦ལོར་སྦིར་སྡེའི་གཞིས་ཁོངས་སུ་ཞུགས།༢༠༠༦ལོར་འདས་གྲོངས་སུ་ཕྱིན།
༡༥༽སྡོང་ཚེ་དཀར་དགེ
མདོ་ཁམས་ཤར་ཕྱོགས་སྡེ་དགེ་མངའ་ཁུལ་དཔེ་ཝར་རྫོངས་ནས་ཡིན་པའི་སྡོང་ཚེ་དཀར་དགེ་ནས་ལོ་རྒྱུས་ཞུ་འབྲས།སྡེེ་དགེ་འབྲི་ནུབ་མངའ་ཁུལ་དུ་སྤྱི་ལོ་༡༩༥༩ཟླ་༦པའི་ནང་འབྲི་ནུབ་ཕྱོགས་སུ་ཟིང་འཁྲུག་ལངས་ཏེ་བདེ་ལྷུང་ཞེས་པར་གནམ་ས་གཉིས་ནས་དམག་བརྒྱབ་སྟེ་སྡེ་དགེ་དང་གོ་འཇོ་བཅས་ཕོ་མོ་ཁྲི་ཕྲག་ཁ་ཤས་ཡོད་པ་གོ་འཇོ་སྨད་ནས་སྟོང་ཕྲག་གཅིག་དང་ཕྱེད་ཙམ་ཐར་བའི་ནང་ནས་རང་གི་ནང་མི་༡༨ཡོད།དེང་ནང་ཕ་མ་རྒན་ཁོང་ལོ་༧༠དང་༨༠ཅན་གསུམ་ཡོད་པ་འགྲོ་རེ་བྲལ་ནས་རང་གི་ཁུ་བོ་ཚེ་ཆེན་དང་ཨ་རྡོར་མཉམ་སྡོད་དགོས་པ་རྒྱ་ལག་ཏུ་ཟིན་ནས་ལོ་༢༠བཙོན་ཁང་ནང་སྡོད་དགོས་བྱུང་བ་དང་།རང་དང་ནང་མི་གཞན་རྣམས་དང་།གོ་སྡེ་གཉིས་མཉམ་དུ་འོང་ནས་གོ་འཇོ་གསེར་ལྡིང་ཁར་རང་ལ་མེ་མདའ་ཕོག་ནས་རྨས་སྐྱོན་དང་།སྤུན་མཆེད་ཉེ་འབྲེལ་བརྒྱ་ཕྲག་མང་པོ་བསད་རྨས་ཤོར་བ་དང་།དེ་ནས་སྡེ་དགེ་རྒྱལ་པོ་དང་བློན་འཁོར་ཉུང་བསྡུས་ལྷ་ཐོག་ནས་ཆབ་མདོ་རྫ་སྟོད་བརྒྱུད་ཀོང་པོ་ཕྱོགས་དང་ལྕགས་ར་དཔལ་འབར་དུ་འབྱོར།དེ་ཕྱོགས་སྡེ་དགེ་སྲས་དོན་ཡོད་ཅན་མི་སྣ་བཅུ་ཕྲག་ལྷག་གནམ་གྲུ་ནས་འབྱོར་བར་གོ་ལག་མདའ་རྫས་ཕོན་ཆེན་ཐོབ་པར་ཟླ་ངོ་ཁ་ཤས་དེ་ཕྱོགས་སུ་བསྡད།བོད་ཟླ་༡པོའི་ནང་ཡང་བསྐྱར་རྒྱ་མིས་ཕྱོགས་གང་ས་ནས་དམག་བརྒྱབ་ནས་རི་ལུང་གང་སར་རྒྱ་བོད་གཉིས་ཀྱི་རོ་ཁྲག་གིས་གང་བར་མིག་མཐོང་བྱུང་།དེ་ནས་རྒྱ་འོག་སྤྲད་གསུམ་ཞེས་པའི་ཕོ་མོ་ཉིས་བརྒྱ་ལྷག་ཙམ་བྱང་ཕྱོགས་སུ་ཁ་ཐུག་ཏུ་ཕྱིན་པས་ཞག་ཤས་རྗེས་མདོ་གཞུང་ཞེས་པར་སླེབས་ཏེ།དེ་ཕྱོགས་དམག་འཐབ་བྱ་བའི་སྒང་སླེབས་པས་ཉིན་མཚན་བར་མེད་འཐབ་འཛིང་ཐོག་བྱང་མ་ཊའི་ལམ་ཁར་ཉིན་མཚན་བདུན་ནས་བརྒྱད་ཙམ་ལ་སླེབས།དེ་ནས་ཐང་ཁེ་ཁྲེ་ཞེས་པའི་ལྕགས་ཁྲབ་འཁོར་ལོ་འགས་ཉིན་མཚན་གསུམ་ཙམ་དེད་བྱུང་བར་བསད་རྨས་མང་པོ་དང་།གནམ་གྲུ་ནས་ཕེབས་པའི་མི་གྲངས་བཅུ་གྲངས་ཙམ་ཡོད་པ་གར་སོང་ཆ་མེད་སོང་།དེ་ནས་ཁ་ཟས་མེད།རྒྱབ་གོས་མེད།ཟླ་ངོ་གཅིག་ཙམ་བྱང་ཐང་རི་དྭགས་ཀྱི་ཤ་ཁྲག་ཟས་ནས་འོང་།དེ་ནས་ཨ་མདོ་སྟོད་མར་སླེབས་པར་མི་ཟས་ཕྲན་བུར་ཐོབ།དེ་ནས་རྒྱ་མི་དང་དགྲ་ཐེངས་༣༠ནས་༤༠བྱུང་བར།རང་གི་སྤུན་ཚེ་རིང་ཕུན་ཚོགས།བློ་གསལ་ཚེ་རིང་།ལྷ་མོ་ཨ་ནེ།ཚེ་དབང་སྒྲོན་མ་བཅས་བསད་ཤོར།འཕྲོས་ནང་མི་བདུན་སྟོད་མུ་གུམ་ཞེས་པར་བལ་པོའི་ས་མཚམས་སུ་སྤྱི་ལོ་༡༩༦༡ལོར་སླེབས་པའི་ལོ་རྒྱུས་སུ།
༡༦༽ཕྲད་པ་ཚང་གི་བསྟན་འཛིན་རྒྱ་མཚོ།
སྤྱི་ལོ་༡༩༥༦ལོར་མདོ་ཁམས་ཕྱོགས་དམངས་གཙོ་བཅོས་བསྒྱུར་ཞེས་པའི་ཤིན་ཏུ་མ་རུང་པའི་བྱུས་ངན་བཟོས་རྐྱེན་སྡེ་དགེ་མངའ་ཁུལ་ཧོར་སོག་རྫོང་ཕྲད་པ་ཚང་གི་བསྟན་འཛིན་རྒྱ་མཚོའི་ལོ་རྒྱུས་མདོར་བསྡུས།ཕྲན་གྱི་ཕ་རྒན་ཚེ་དབང་ཞེས་པར་ལོ་༥༦ཅན་མིག་གཉིས་ཀར་མེད་པ་འཐབ་རྩོད་བྱས་པས་ཕྲན་ཚོ་སྤུན་མཆེད་དྲུག་ཡོད་པའི་ནང་ནས་གསུམ་ལྷ་ལྡན་ཕྱོགས་སུ་ཡོད་པར་གཉིས་ཆུང་ཆུང་ཡིན་པ་དང་།ཆེ་ཤོས་ངག་དབང་བཟང་པོ་ལ་རང་འཁོར་བློ་མཐུན་མི་བཅུ་བདུན་ཡོད་པར།འཆི་གསོན་ཅི་འགྱུར་འགྱོད་མེད་ཀྱི་བློ་ཐག་གཅིག་ཆོད་ཐོགཧོར་སོག་རྫོང་ནང་རྒྱ་དམག་ལྔ་བརྒྱ་ཙམ་ཡོད་པར་དྲག་རྒོལ་གྱི་ཉིན་མཚན་བཅུ་བཞི་འཛིང་བས་མཐར་རྒྱ་མི་གསུམ་ཤོར་བ་ལས་གཞན་རྣམས་བསད།དེ་རྗེས་སྡེ་དགེ་ཕྱོགས་ནས་སྟོང་དམག་གཉིས་ལྷག་གིས་སྐད་ཐོས་སྐབས་གེ་ཤོད་ཟེར་སར་ལམ་སྒུག་གི་དམག་འཐབ་བྱས་པར་ཚུར་གྲུ་ཚ་ཀུན་དགའ་བསད།ཕར་རྒྱ་དམག་གཅིག་སྟོང་དྲུག་བརྒྱ་ཙམ་བསད་ཐུབ་པའི་ཡུལ་མིའི་ཁས་ནས་བཤད་པ་ཐོས་བྱུང་།དེ་ནས་དཔལ་ཡུལ་ཁྲམ་ཐར་སྒ་རྗེ་བཅས་ལ་དགྲ་ཐེངས་བཅུ་གསུམ་ཙམ་སོང་བས།འོག་ནུ་ཚེ་དབང་།སྦོས་འགོ་དཀོན་མཆོགགྲགས་འགོ་དཔལ་འབྱོར།སྦྲད་རྟེ་དཀོན་མཆོག་སོགས་མང་རབ་བསད་ཤོར་བ་དང་།ཕར་རྒྱ་དམག་སྔ་ཕྱིར་བཞི་བརྒྱ་དང་ལྔ་བརྒྱ་ལས་མ་ཉུང་བར་བསད་པ་གོ་ཐོས་བྱུང་།དེ་མཚམས་ལྷ་ལྡན་ཕྱོགས་ནས་སྤུན་མཆེད་གཞན་རྣམས་འབྱོར་བ་ཕ་རྒན་དང་བཟའ་མི་རང་འཁོར་བཅས་མི་ཚང་བཅུ་གསུམ་འབྲི་ཆུ་ནུབ་རྒྱུད་ཕྱོགས་སུ་འབྱོར།དེ་ཕྱོགས་སུ་རྒྱ་མཁར་འོག་མ་སྡོང་ཚེ་བཅས་ཡོད་པར་སྐྱིད་སྡུག་ལེགས་ཉེས་ཅི་བྱུང་མཉམ་ཁུར་བྱ་རྒྱུའི་ཐོ་ལོ་ངོ་གཉིས་ཙམ་དེ་ཕྱོགས་སུ་བསྡད་པར་དགྲ་ཐེངས་ཁ་ཤས་འཛིང་ཐོག་རྒྱ་མི་སྔ་རྗེས་བརྒྱ་སྐོར་བསད།སྤུན་ཆུང་བཀྲ་ཤིས་ཕུན་ཚོགས་དང་།ཨ་ཁུ་དབང་ཕྱུག་གཉིས་བསད་ཤོར་བ་དང་ང་རང་ལའང་རྨས་སྐྱོན་བྱུང་།རྒྱ་མིའི་མེ་མདའ་རིང་ཐུང་བཅུ་དྲུག་ཙམ་ཐོབ།ཨུ་རུ་སུའི་བལྟ་སྐོར་བ་མི་གཅིག་བསད་པ་དང་།དེ་རྗེས་༡༩༥༩ལོར་ཟླ་༦པ་ཙམ་ལ་རྒྱ་མིའི་དམག་ཤུགས་ཤིན་ཏུ་ཆེ་སྟབས་སྡེ་དགེ་ནུབ་མས་གོ་འཇོ་བྲག་གཡབ་ཕྱོགས་སྐྱོད་པར་ལམ་བར་དུ་རང་གི་མི་བདུད་འདུལ་སྤུན་འཇམ་དབྱངས་ཚེ་འཕེལ།ངག་དབང་བཟང་པོ།ཚེ་རིང་བཀྲ་ཤིས།ཨ་འབང་།དཔལ་འབྱོར།ཚེ་དཔགདབང་འདུད་བཅས་བསད་ཤོར་བ་དང་།འོག་མ་རིག་རྣམ་རྨས་སྐྱོན་ལྕི་བར་འཇུ་སྐལ་བཟང་འཆི་མེད།མ་དཔལ་གཡང་བཅས་དཔོན་གཡོག་ཉི་ཤུ་ཙམ་ཤུལ་སྡོད་མ་བྱས་མཐུ་མེད་བྱུང་བ་དང་།སྡེ་དགེ་སྲས་དབུ་དགའ་གཙོས་དཔོན་འབངས་ལྔ་བརྒྱ་བསྐོར་ཤར་བསྐྱོད་ཀྱི་ལྷ་ཐོག་དང་།ཆབ་མདོ་རི་བོ་ཆེ་བརྒྱུད་ཤོ་སྟ་ལྷོ་གསུམ་ཕྱོགས་སུ་འབྱོར།ལམ་བར་དགྲ་ཐེངས་བདུན་བརྒྱད་ཙམ་འཐབ་ཀྱང་ཚུར་བསད་རྨས་མ་བྱུང་།དེ་མཚམས་སྡེ་སྲས་དོན་ཡོད་ཅན་ཁམས་པའི་མི་སྣ་བཅོ་ལྔ་ཙམ་གནམ་གྲུ་ནས་ཕེབས་འབྱོར་བྱུང་བས་དགའ་ཚོར་ཆེན་པོའི་ངང་ཟླ་ཤས་དེར་ལུས།དེ་མཚམས་རྒྱ་མིའི་གནམ་ས་གཉིས་དམག་ཤུགས་ཤིན་ཏུ་ཆེ་བར་བརྟེན་ཉིན་མཚན་ལྔ་དྲུག་ལ་འཐབ་འཛིང་བར་མེད་ཀྱི་མཐར་མང་སྣེ་ཉུང་གིས་མ་བརྟན་པར་བྱང་ཁ་ཐུག་ཏུ་བྲོས་བྱོལ་ཅི་མཐར་ཕྱིན་པས་ལམ་བར་ལུག་ར་བསོད་ནམས།བློ་གྲོས།བསམ་དགའ་བཅས་བསད་ཤོར་བ་དང་།སྤུན་པད་རྒྱལ།དཀར་དགེ།དབང་རྒྱལ།སྲིང་མོ་ཚེ་རིང་ཆོས་སྒྲོན་བཅས་རྨས་སྐྱོན་བྱུང་བར་ཞག་མང་པོའི་མཚམས་འདམ་གཞུང་དུ་སླེབས།དེ་ཕྱོགས་ཀྱང་ཤིན་ཏུ་དམག་ཤུགས་ཆེ་བར་ཉིན་མཚན་བར་མེད་ཀྱི་དམྱལ་བ་ས་ཐོག་ཏུ་ཐོན་པ་ལྟར་གྱི་ཉིན་བཅུ་བཅོ་ལྔ་ཙམ་ལ་བྱང་མོ་ཊ་ལམ་ཁར་སླེབས།དེ་ནས་ཐང་ཁེ་ཁྲེ་ཞེས་པས་ཉིན་གསུམ་དེད་བྱུང་བར་འཇམ་དབྱངས་ལྷ་ཕྲུག་བསད།ཕྲན་གྱི་མགོ་ལ་མེ་མདའ་ཕོག་ནས་རྨས་སྐྱོན་བྱུང་བ་དང་།བྱང་མི་མེད་ལུང་སྟོང་དུ་སླེབས་ནས་ཉེས་མེད་རི་དྭགས་ཤ་ལ་ཟས་སྤྱོད་ཀྱི་ཟླ་བ་གཅིག་ཙམ་འགོར།དེ་ནས་ཨ་མདོ་སྟོད་མར་འབྱོར་ནས་མི་ཟས་ཕྲན་བུ་བཟའ་རྒྱུ་རག་ནས་མ་ཤི་ཙམ་བྱུང་བ་དང་།རང་ཡུལ་ནས་བལ་པོའི་འཚམས་བར་དགྲ་ཐེངས་བདུན་བཅུ་དོན་གསུམ་སོང་བ་དང་།སྤྱི་ལོ་༡༩༦༡ལོར་བལ་པོའི་ས་མཚམས་མུ་གུམ་ཟེར་ས་འབྱོར་བ་བཅས་ཕྲན་གྱི་ལོ་རྒྱུས་སྙིང་བསྡུས་སུ་ཕྲད་པ་བསྟན་འཛིན་རྒྱ་མཚོས་ཕུལ།
༡༧༽སྡེ་དགེ་ཀླུ་ཐོག་ཚང་འཇམ་དབྱངས་ཚེ་རིང་།
སྤྱི་ལོ་༡༩༥༩ལོར་སྡེ་དགེ་འབྲི་ནུབ་མངའ་ཁུལ་དུ་ཟིང་འཁྲུགས་ཡོང་ཉེར་དམར་པོའི་ལམ་ལུགས་དམངས་གཙོ་བཅོས་བསྒྱུར་ཟེར་བའི་ལས་འགུལ་ལ་ཁས་ལེན་བྱ་བྲལ་ནས་ལུས་སྲོག་ལོངས་སྤྱོད་བློས་བཏང་སྟེ་རྒྱ་དམར་ལ་འཐབ་འཛིང་ཐེངས་མང་བྱས་ནས་གོ་འཇོ་གསེར་ལྡིང་ཁར་ཕན་ཚུན་བསད་རྨས་མང་དག་ཞིག་བྱུང་སོང་།དེ་ནས་སྡེ་དགེ་གྲས་ཨོ་དགའ་གཙོས་དཔོན་གཡོག་ལྔ་བརྒྱ་ཙམ་ཆབ་མདོ་དང་།རི་བོ་ཆེའི་རྒྱུད་དམག་འཐབ་ཁ་ཤས་བྱས་ནས་ལྕགས་ར་དཔལ་འབར་དུ་སླེབས།དེ་ནས་ཞག་ཤས་རྗེས་སྡེ་དགེ་སྲས་དོན་ཡོད་གཙོས་གནམ་དམག་མི་གྲངས་༡༧གནམ་ནས་གཡུག་ནས་མཉམ་དུ།གོ་ལག་དང་གཏར་བཅས་འབྱོར་བྱུང་།དེ་ནས་ཟླ་བ་ལྔ་ཙམ་གོ་མཚོན་གསར་པ་རྣམས་བེད་སྤྱོད་བྱ་སྟངས་སློབ་སྦྱོང་བྱས་ནས་རྟ་དམག་གཅིག་སྟོང་ཙམ་གོ་སྒྲིག་བྱས་ནས་སྤུ་དེ་དུང་མ་ནས་དགྲ་འཛིང་ཉིན་ཤས་བྱས་ཀྱང་མཐར་མང་སྣེ་ཉུང་གིས་མ་བརྟན་པར་ཕྱིར་ལོག་བྱ་དགོས་བྱུང་བ་མ་ཟད་དམག་མི་མང་པོ་མཚོན་འོག་ཏུ་ཤོར་སོང་།༡༩༦༠ལོ་མགོ་ཙམ་ནས་རྒྱ་དམག་ཁྲི་ལྷག་ཙམ་གྱིས་ས་ཕྱོགས་ཁག་བཞིས་ནས་གནམ་ས་གཉིས་ནས་རང་དམག་ལ་རྒོལ་བརྡུང་བཏང་བས་རང་མི་སྐྱ་སེར་༦༠༠༠ནས་༧༠༠༠ཙམ་བསད་བཟུང་ཐོང་རྩ་མེད་བྱུང་ཡོད།དེ་ནས་གུས་ཚོ་འདམ་གཞུང་དུ་སླེབས།འབྲི་གུང་དང་སྨན་རི་བཅས་སུ་རྒྱ་དམར་དང་།དམག་འཁྲུགས་ལན་གྲངས་བརྒྱབ་ནས་ཤི་གསོན་མང་པོ་བྱུང་སོང་།དེ་ནས་གུས་ཚོའི་མདའ་རྫས་རྫོགས་ལ་ཉེ་སྐབས་ཨ་འབྲུག་ངག་དབང་ཕུལ་གཙོས་གནམ་དམག་གྲངས་༡༢དང་མདའ་རྫས་བཅས་རོགས་རམ་འབྱོར་བྱུང་།དེ་གར་ཉིན་གསུམ་ཙམ་དམག་འཐབ་བྱས་ནས་མཐར་བྱུང་མི་མེད་ལུང་སྟོང་དུ་སླེབས་ནས་རི་དྭགས་ཤ་ལ་ཟ་སྤྱོད་མ་གཏོགས་གཞན་ཟས་རིགས་སྣེ་གཅིག་མེད་པ་ཟླ་བར་ཕྱིན་སོང་།དེ་ནས་ཨ་མདོ་སྟོད་མ་རྒྱུད་མི་ཟས་ཕྲན་བུ་འབྱོར་ནས་ཤི་དགོས་མ་བྱུང་ཙམ་བྱུང་སོང་།དེ་ནས་བལ་པོའི་ས་མཚམས་མུ་གུམ་རྒྱུད་ནས་༡༩༦༡ལོར་རྒྱ་གར་ལ་འབྱོར་སོང་།གུས་ཀྱི་ལོ་རྒྱུས་འདི་ཙམ་ཡིན།༢༠༠༩ཕྱི་ཟླ་༤ཚེས་༢ཉིན་བལ་ཡུལ་ནས་ཕུལ།
༡༨༽སྡེ་དགེ་མ་ཐང་ཡག་དགའ་ནི།
སྡེ་དགེ་ཕྱི་འབྲོག་ནང་སྤྱི་ལོ་༡༩༩༡ལོར་སྐྱེས།ཕ་མིང་བསོད་ནམས་དབང་ཕྱུག་ཟེར་གྱི་ཡོད།༡༩༥༩ལོ་ཙམ་ལ་བོད་དབུས་ཕྱོགས་སུ་ཡུལ་བྱོལ་དུ་ཡོང་།༡༩༥༨ཆུ་བཞི་སྒང་དྲུག་གི་དམག་མིའི་སྒྲིགས་ཁོངས་སུ་ཞུགས།དམག་སྤྱི་འབར་ཆུང་མཐུ་སྟོབས་འོག་དམག་བསྐྱོད་བྱས།རྒྱ་དམར་ལ་འཐབ་འཛིང་ཐེངས་ཁ་ཤས་བྱས་རྗེས་སྡེ་དགེའི་དམག་བྱིངས་མཉམ།སྤྱི་ལོ་༡༩༥༩ལོར་རྒྱ་གར་དུ་འབྱོར།དེ་ནས་སྦིར་གཞིས་ཆགས་ནང་༡༩༦༦ལོར་འཛུལ་ཏེ་ད་ལྟའང་འཚོ་བཞིན་ཡོད་པ་བཅས་ཀྱི་ལོ་རྒྱུས་ཉུང་བསྡུས་སུ།
༡༩༽སྡེ་དགེ་འབར་ཆུང་དཀོན་མཆོག་སངས་རྒྱས།
སྡེ་དགེ་འབའ་ཆུང་དཀོན་མཆོག་སངས་རྒྱས་ནི།ཕ་བློ་བཟང་༡༩༡༩ལོར་སྡེ་དགེ་རྫ་ཆུ་ཁར་སྐྱེས།༡༩༥༥ལོ་ཙམ་ནས་རང་ཡུལ་དོར་ཏེ་བོད་དབུས་ཕྱོགས་སུ་ཁ་གཏད་དེ་ཡོང་།མཐར་༡༩༥༨ལོར་ཆུ་སྒང་འགོ་འཛུགས་སྐབས་སྡེ་དགེའི་དམག་ཁོངས་སྒྲིགས་སུ་ཞུགས་ནས་སྡེ་དགེ་དམག་སྤྱི་འབར་ཆུང་མཐུ་སྟོབས་དམག་ཤོག་ནང་དམག་བྱིངས་ལ་མཉམ་བསྐྱོད་མཉམ་འཐབ་བྱས་མཐར་༡༩༥༩ལོར་སྤྱི་མཚུངས་རྒྱ་གར་དུ་སྐྱབས་བཅོལ་དུ་འབྱོར།༡༩༦༦ལོར་སྦིར་སྡེ་དགེའི་གཞིས་ཆགས་སུ་ཚུད།༢༠༠༠ལོར་འདས་གྲོངས་སོང་བ་བཅས་ཀྱི་ལོ་རྒྱུས་སྙིང་བསྡུས།
༢༠༽༈སྡེ་དགེ་འོད་གསལ་ནི།
སྤྱི་ལོ་༡༩༣༨ལོར་ཕ་ཚེ་དབང་ཆོས་འཕེལ་གྱི་བུར་སྡེ་དགེ་ཡིད་ལྷུང་ཞེས་པའི་སར་སྐྱེས།༡༩༥༥ཙམ་ནས་དབུས་གཙང་ཕྱོགས་སུ་གནས་སྐོར་ཆོས་མཇལ་གྱི་ཚུལ་དུ་ཡོང་།ཕྱིར་རང་ཡུལ་དུ་ལོག་ཉེའི་སྐབས་ཆུ་སྒང་དམག་སྒར་དབུ་འཛུགས་རྒྱུའི་སྐད་འཆར་ཐོས་ཏེ་ངང་འཐེན་བྱས།དེ་ནས་རིང་མིན་༡༩༥༨ལོར་དབུ་འཛུགས་སྐབས་དེར་དམག་མིའི་སྒྲིགས་ཁོངས་སུ་ཞུགས་ཏེ་སྡེ་དགེ་དམག་སྤྱི་ཆུ་རྡོ་དབང་དགའི་དམག་ཤོག་ནང་།དཔལ་ཆེན་ཆུ་བོ་རི་དང་།ར་རྨད་གྲུ་ཁ་བཅས་སུ་དམག་འཐའ་ཐེངས་མང་བྱས།མཐར་༧སྐྱབས་མགོན་རིན་པོ་ཆེ་བཙན་བྱོལ་དུ་ཕེབས་སྐབས་ར་རྨད་གྲུ་ཁ་ནས་རྒྱ་གར་ས་མཚམས་བར་ཆིབས་ཞབས་སུ་བཅར།དེ་རྗེས་དམག་མང་དང་མཉམ་དུ་༡༩༥༩ལོར་རྒྱ་གར་དུ་འབྱོར།༡༩༦༦ལོ་སྦིར་སྡེ་དགེའི་གཞིས་ཆགས་སུ་ཡོང་།སྤྱི་ལོ་༡༩༩༡ལོར་འདས་གྲོངས་སུ་ཕྱིན་པ་བཅས་ལོ་རྒྱུས་སྙིང་བསྡུས།
༢༡༽སྡེ་དགེ་ཚེ་རིང་།
གུས་པ་སྡེ་དགེ་ཚེ་རིང་ནི་སྡེ་དགེ་ཡ་ལུང་ལྷ་རྒྱབ་ཏུ་སྤྱི་ལོ་༡༩༣༥ལོ་ཕ་བཀྲ་ར་དང་།མ་ཆོས་ཉིད་ལྷ་མོ་གཉིས་ཀྱི་བུར་སྐྱེས་ཤིང་།སྤྱི་ལོ་༡༩༥༩སྤྱི་ཟླ་༡༡ནང་བསྟན་སྲུང་དང་བླངས་དམག་ཏུ་སྤོ་བོ་སྤྲ་མོག་ལ་འཛུལ་ཞུགས་བྱས་པ་ཡིན།སྤོ་བོ་སྤྲ་མོག་ཁ་ར་ཟམ་པ་ལ་རོགས་པ་གཉིས་དང་གུས་པ་རྣམས་རྒྱ་དམར་ཡོད་མེད་ཀྱི་སྔོན་ལ་བལྟ་བར་བཏང་བྱུང་།དེ་སྐབས་རྒྱ་དམར་གྱིས་ཟམ་པ་དེ་སྦར་རྫས་བརྒྱབ་སྟེ་ཟམ་པ་གཏོར་ནས་གུས་པའི་རོགས་པ་གཉིས་དང་རྟ་དྲེལ་བཅས་པ་ཆུ་ལ་ལྷུང་སྟེ་ཚེ་སྲོག་ཤོར་སོང་།ངའི་ལག་གཡས་པ་དེར་རྨས་སྐྱོན་ལྕི་མོ་ཞིག་ཕོག་འདུགམཐའ་ཨ་ཀ་ཏ་ལ་ང་གཉིས་རྒྱ་དམར་གྱི་མེ་མདའི་ཁ་ནས་ཐར་ཙམ་ཞིག་བྱུང་སོང་།དེ་རྗེས་སུ་དམག་དཔོན་ཆ་འཕྲིན་ཟླ་བ།རྒྱ་རྡོ་དོན་གྲུབ་དང་།ཆབ་མདོ་ཚེ་རིང་རྡོ་རྗེ་བཅས་ཀྱི་འོག་ལ་དམག་མི་བྱས་ཏེ་རྒྱ་དམར་ལ་ཁ་གཏད་བྱས་ནས་དུས་ཚོད་རིང་པོར་བསྡད་པ་ཡིན།དེ་སྐབས་སུ་ང་ཚོ་དང་རྒྱ་དམར་གྱི་དམག་མི་ཆུ་ཕར་ཁ་དང་ཚར་ཁར་བསྡད་དེ་དམག་བརྒྱབ་ནས་རྒྱ་དམག་མང་པོ་བསད་ཐུབ་པ་བྱུང་སོང་།དེ་ནས་བྱང་ཧ་ལི་སྒང་དུ་སླེབས་དུས་ང་ཚོ་དམག་དཔོན་ཕུར་པ་ཕྲིན་ལས་དང་།ལི་ཐང་རག་ར་སོགས་མཉམ་དུ་ལྟོ་ཚང་གཅིག་གི་འོག་ལ་བསྡད་ནས་རྒྱ་དམར་ལ་དམག་ཤུགས་ཆེན་འཛིང་པ་ཡིན།ཀོང་པོ་རྒྱ་ཟླ་དང་ཞོ་ལ་ལ་ནང་ཡང་ང་ཚོས་རྒྱ་དང་མཉམ་དུ་འཛིང་པ་རེད།ཕུ་མ་བྱང་ཐང་ལ་རྒྱ་དམར་མཉམ་དུ་དམག་བརྒྱབ་པའི་སྐབས་སུ་ང་ཚོའི་བསྟན་སྲུང་དང་བླངས་དམག་མི་གསུམ་གྱི་ཚེ་སྲོག་ཤོར་ཡོད་པ་དང་གཅིག་སྨས་མ་བྱུང་ཡོ་པ་རེད།དེ་ནས་ང་ཚོ་ལ་དཀའ་ངལ་ཤིན་ཏུ་ཆེན་པོ་ཕྲད་བྱུང་།ཧོར་ཁ་རྫ་རོང་པ་ལ་རྒྱ་དང་མཉམ་དུ་དམག་བརྒྱབ་ནས་ང་ཚོ་བསྟན་སྲུངས་དང་བླངས་དམག་མི་མི་གྲངས་ལྔ་བཅུ་ཙམ་གྱི་ནང་ནས་ཁ་བྲལ་དགོས་བྱུང་སོང་།དེ་སྐབས་ལ་དགེ་རྒན་ཕུར་པ་འཕྲིན་ལས་དང་ང་གཙོས་པའི་མི་གྲངས་བདུན་ཙམ་ཕྱིར་ཐར་ཐུབ་པ་བྱུང་སོང་།དེ་ནས་འབྲུག་ཡུལ་ལ་ཡ་སྟོང་པ་ཟེར་བའི་ལུང་པ་དེ་ནང་སླེབས་སྐབས་རྒྱ་དམར་གྱིས་རྗེས་དེད་བཏང་བ་དང་མཉམ་དུ་ཁ་གཏད་བྱེད་བཞིན་རྒྱ་དམར་གྱི་མེ་མདའི་ཁ་ནས་ཚེ་སྲོག་ཐར་ཙམ་ཞིག་བྱུང་སོང་།མཐའ་འབྲུག་ཡུལ་རྒྱུད་ནས་རྒྱ་གར་འཕགས་པའི་ཡུལ་དུ་འབྱོར་ཐུབ་བྱུང་།
༢༢༽སྡེ་དགེ་བཟོད་པ།
སྡེ་དགེ་བཟོད་པ་ནི།ཕ་བཀྲ་ཤིས་ཚེ་རིང་གི་བུར་སྤྱི་ལོ་༡༩༣༠ལོར་སྡེ་དགེ་ཡི་ལྷུང་དུ་སྐྱེས།༡༩༥༠ཙམ་ནས་བོད་དབུས་ལྷ་ལྡན་ཕྱོགས་སུ་གནས་མཇལ་ཆེད་དུ་འབྱོར་ཡོད་ཀྱང་།ཕ་ཡུལ་ལ་ཕྱིར་མ་ཕྱིན་པར་མུ་མཐུད་དབུས་ཕྱོགས་སུ་བསྡད།༡༩༥༨ལོར་ཆུ་སྒང་བསྟན་སྲུང་དང་བླངས་དམག་སྒར་དུ་འཛུགས་ཞུགས་ཀྱིས་སྡེ་དགེ་དམག་སྤྱི་ཆུ་རྡོ་དབང་དགའི་དམག་ཤོག་ཏུ་བསྡད།དཔལ་ཆེན་ཆུ་བོ་རི་སོགས་སུ་དམག་འཐབ་ཐེངས་ཁ་ཤས་བྱས།སྤྱི་ལོ་༡༩༦༦ལོར་སྤྱི་མཚུངས་རྒྱ་གར་དུ་སྐྱབས་བཅོལ་དུ་ཞུགས།༡༩༦༦ལོར་སྦིར་སྡེ་དགེའི་གཞིས་ཆགས་འགོ་འཛུགས་སྐབས་གཞིས་ཁོངས་བསྡད་དེ་ད་ལྟའང་འཚོ་གནས་སུ་ཡོད།
༢༣༽སྡེ་དགེ་ཡིད་ལྷུང་འཆི་མེད་རྣམ་རྒྱལ་ནི།
༡༩༣༩ལོར་སྡེེ་དགེ་ཡིད་ལྷུང་དུ་སྐྱེས་༡༩༥༦ལོར་རྒྱ་དམར་གྱིས་དམངས་གཙོ་བཅོས་བསྒྱུར་གྱི་ལས་འགུལ་སྤེལ་སྐབས་སྡུག་ནད་མ་ཐེག་སྟེ་ངོ་རྒོལ་གྱེན་ལངས་རྐྱེན་ཡུལ་བྱོལ་དུ་ཡོང་དགོས་བྱུང་།རིམ་པས་བོད་དབུས་ཕྱགོས་འབྱོར་སྐབས་ཆུ་སྒང་སྒྲིགས་འཛུགས་དབུ་ཚུགས་པ་དང་དུས་མཉམ་འཁེལ་སྟབས་མཉམ་ཡོད་མི་གྲངས་ཉི་ཤུ་ཆབས་ཅིག་སྡེ་དགེའི་དམག་ཁོངས་ཞུགས་ཏེ་བརྒྱ་དཔོན་ཚེ་དབང་མགོན་པོའི་འོག་རྒྱ་དམར་ལ་འཐབ་འཛིང་ཐེངས་མང་བྱས་མཐར་སྤྱི་མཚུངས་༡༩༥༩ལོར་རྒྱ་གར་འབྱོར་རྗེས་ཨཡི་ཊི་སྦི་ཞེས་པའི་རྒྱ་གར་དང་བོད་ཀྱི་ས་མཚམས་ཉུལ་ཞིབ་རུ་ཁག་ནང་འཛུལ།༡༩༦༦ལོར་སྒྲིག་ཁོངས་ནས་དགོངས་ཞུས་ཀྱིས་སྡེ་དགེའི་གཞིས་ཆགས་སུ་གནས་སྡོད་བྱས་མཐར་༡༩༩༨ལོ་དུས་ཆོས་སུ་གྱུར་པ་ཡོད་པ་བཅས་ཀྱི་ལོ་རྒྱུས།
༢༤༽སྦས་རབ་ཚང་།
༈མདོ་ཁམས་སྡེ་དགེ་རྫོགས་ཆེན་སྦས་རབ་ཚང་གི་བོད་བསྟན་སྲིད་ཀྱི་ཆེད་དུ་ཆུ་སྒང་བསྟན་སྲུང་དང་བླངས་དམག་གི་སྒྲིག་འཛིགས་ནང་དུ་ཞུགས་ཏེ་རྒྱ་དམར་འགོག་རྒོལ་གཡུལ་འགྱེད་བྱས་པའི་ལོ་རྒྱུས་སྙིང་བསྡུས།
སྡེ་དགེ་རྫོགས་ཆེན་སྤས་རབ་ཚང་ནི་རྫོགས་ཆེན་སྡེ་པའི་ནང་ནས་མི་ཚང་ཕྱུག་ཤོས་དང་སྟོབས་འབྱོར་ཆེ་ཤོས་ཤིག་ཡིན་ཞིང་སྡེ་དགེ་རྒྱལ་པོའི་མི་ཆེན་གྱི་གོ་གནས་དམ་དོད་ཉི་ཤུ་རྩ་ལྔ་ཐོབ་ཡོད།སྤས་རབ་ཚང་ལ་བུ་འབུམ་པ་དང་།འཆི་མེད་རིག་འཛིན།བུ་མོ་ཕུན་ཚོགས་ལྷ་མོ་བཅས་མིང་སྲིང་གསུམ་ཡོད།སྤས་རབ་འབུམ་པས་ཚོང་དཔོན་ཚང་གི་བུ་མོ་མིག་འཛོམས་མནའ་མ་བསུས་ཏེ་ཁོང་གཉིས་ལ་བུ་དགུ་དང་།བུ་མོ་གསུམ་ཡོད།དེའི་ནང་ནས་སྤས་རབ་འབྲུག་གྲགས་མ་གཏོགས་གཞན་བུ་བརྒྱད་རབ་བྱུང་དང་ངུར་སྨྲིག་གི་སྡེ་འཛིན་ཤ་སྟག་གནང་སྟེ་མི་རེས་རྫོགས་ཆེན་དགོན་པའི་བསྟན་པ་འཛིན་སྐྱོང་སྤེལ་གསུམ་གང་ཅིར་འགན་ཁུར་གཡུར་དུ་ཟ་བ་གནང་ཡོད།བསྟན་དོན་ཁོ་ནའི་ཆེད་དུ་སྤས་རབ་བ་ཡས་ཀྱིས་འགོ་ཁྲིད་བྱས་ཏེ་སྟོད་རྒྱ་གར་དང་།སྨད་རྒྱ་ནག་བར་ཁམས་དབུས་མདོ་གསུམ་ས་གནས་གང་སར་བྱ་བ་ལས་ཀྱི་འཁོར་ལོའི་བསྟན་དོན་དཔལ་འབྱོར་མཁོ་སྒྲུབ་གནང་ཕྱོགས་ཐད་མདོ་ཁམས་ཁུལ་དུ་སྙན་གྲགས་དང་ལྡན་པ་ཞིག་ཡིན།སྤས་རབ་ཚང་གི་བུ་དགུ་དང་བུ་མོ་གསུམ་བཅས་རིམ་བཞིན་འདི་ལྟར་ཏེ།༡གསོང་ཚེ།༢དར་རྒྱས།༣ཐོད་ཅོག༤ཁྱུང་རྒྱས།༥བ་ཡས།༦འབྲུག་གྲགས།༧ཨ་དཔལ།༨མགོན་རིན།༩བུ་གཅིག་གྲོངས།༡༠བུ་མོ་ཆེ་བ་སངས་རྒྱས་ཆོས་སྒྲོན།༡༡བུ་མོ་ཆུང་བ་གཡང་ཆེན།བུ་མོ་གཅིག་སྔར་ནས་འདས་གྲོངས་སུ་ཤོར་བ་བཅས་ནི་སྤས་རབ་འབུམ་པའི་བུ་རྒྱུད་ཡིན།ཁོང་གི་སྤུན་མཆེད་རྒན་པ་འཆི་མེད་རིག་འཛིན་ནི་རྫོགས་ཆེན་རིན་པོ་ཆེར་སྲི་ཞུ་ཞབས་འདེགས་བླ་ན་མེད་པ་སྒྲུབ་མཁན་གྱི་ཕྱག་གཡས་པ་ལྟ་བུ་ཞིག་ཡིན་པ་མ་ཟད།སྡེ་དགེ་རྒྱལ་པོའི་སྤྱན་ཟུང་གི་བུང་བ་གསེར་གཟིགས་ཀྱིས་དམ་དོད་ཉི་ཤུ་རྩ་ལྔའི་གོ་གནས་གནང་འདུགདེ་བཞིན་ལོ་ལྟར་རྫོགས་ཆེན་དགོན་པ་དང་།ཞེ་ཆེན་དགོན་པའི་མཆོད་ཡོན་སྦྱིན་བདག་ཆེ་ཤོས་ཡིན་པ་སྟེ་དགོན་སྡེ་ཁག་གཉིས་ལ་ལོ་ལྟར་སྐུ་འགྱེད་དང་མང་ཇ།དགེ་འདུན་པར་ལོ་ལྟར་གྲྭ་ཆས་འབུལ་དགོས་རིགས་འབུལ་རྒྱུ་དང་།གཡར་དགོས་རིགས་ལ་དེ་མཚུངས་ཞབས་ཞུ་དོན་འབྲས་སྨིན་ངེས་ཀྱི་མཚོན་མདོར་ན་དགོན་པའི་ཕྱི་ནང་གང་ལ་དགོས་ངེས་ཀྱི་མཆོད་སྦྱིན་ལོ་ལྟར་ཆགས་མེད་འབུལ་གྱི་ཡོད།སྤྱི་ལོ་༡༩༥༠ཡས་མར་བོད་ཤར་ཕྱོགས་ཁུལ་དུ་བཙན་རྒྱལ་རྒྱ་དམར་གྱིས་བཙན་གནོན་ལོ་མང་རིང་བྱས་མཐར་༡༩༥༨ལོར་ནས་རང་ཡུལ་རྫོགས་ཆེན་འབྲོག་རུ་དང་།རྫོགས་ཆེན་དགོན་གཉིས་ལ་གནས་སྡོད་མ་ཐུབ་པར་རང་ཡུལ་གྱི་ས་ཤོར་ཏེ་མི་ཡུལ་དུ་ཡོང་དགོས་སྐབས་རྫོགས་ཆེན་བྱང་རྒྱུད་འབུམ་ཁོག་ཞེས་པ་དེར་འབྱོར་སྐབས་རྒྱ་དམག་གིས་མཐའ་ནས་བསྐོར་ཏེ་འགྲོ་འོད་འདུག་གསུམ་ལ་བཀག་འགོག་བྱེད་ཤུགས་ཆེ་རུ་ཕྱིན་སྟབས་ཉིན་གྲངས་བསྟུན་ཏེ་རྒོལ་འཛིང་རྒྱུན་རིང་གནང་བ་དང་།དགྲ་བོ་འདོད་བློ་ཁེངས་པ་ཞིག་བསད་པ་མ་ཟད་ཁམས་པའི་ལུང་པ་སྟོད་སྨད་དུ་སྤས་རབ་ཚང་གིས་རྒྱ་དམར་དང་གཡུལ་འགྱེད་བྱས་པའི་ལོ་རྒྱུས་ནི་འཛམ་བུ་གླིང་དུ་བཞག་ཐུབ་པ་བྱུང་ནའང་རང་དམག་མང་པོའི་ཚེ་སྲོག་གི་མཆོད་པ་གངས་ཅན་ལྗོངས་སུ་བཞགདེ་རྗེས་འབུམ་ཁོག་ནས་ཐོན་ཏེ་བྱང་སྡེ་རྫ་ཆུ་ཁ་བའི་ཁུལ་རྒྱུད་ཡོང་སྐབས་ཨ་རིག་རྫ་པའི་ཁུལ་ཕུར་ཁང་དགོན་པའི་རི་རྒྱབ་ཏུ་རང་ཕྱོགས་ཀྱི་རྟ་དམག་བཞི་བཅུ་ལྷག་ཙམ་གྱིས་རྒྱ་དམག་དང་གཡུལ་འགྱེད་དགྲ་འཐབ་ཤུགས་ཆེ་བྱས་ཏེ་རྒྱ་རོའི་རི་ཐང་གང་བ་བཟོས་ཀྱང་མཐར་མང་སྣེ་ཉུང་གིས་མི་བརྟན་པ་གཏན་འཁེལ་ཡིན་སེམས་སུ་བཟུང་སྟེ་སྤས་རབ་བ་ཡས་ཀྱིས་བརྗོད་དོན།འདིར་འདུས་སྐྱབས་གནས་བླ་མ་རྣམ་པ་དང་།མཁན་པོ།ཡུལ་མི་ཕོ་མོ་ཆེ་ཆུང་ཚང་མ་སྐྱོབ་ཐབས་དགོས་པ་བརྟེན་དཔུང་དམག་སྤུན་སྲིང་ཚང་མས་ཁོང་རྣམས་ཁྲིད་དེ་དམག་ས་གཡོལ་ཐབས་ཀྱིས་ས་ཕྱགོས་གཞན་དུ་སོང་།དགྲ་བོ་གོམ་གང་ཁྱེད་རྣམ་པའི་རྗེས་སུ་ར་མདའ་རྗེས་གཅོད་ཡོང་མི་ཐུབ་པ་གདོང་ལེན་དང་བཀག་འགོག་ང་ཡིས་བྱ་འོང་ཞེས་གསུངས་པ་ལྟར་རང་དམག་དང་ཡུལ་མི་ཚང་མ་བྲོས་འཐབ་ཅི་རིགས་ཀྱི་སྒོ་ནས་ས་ཕྱགོས་གཞན་དུ་ཕེབས།སྤས་རབ་བ་ཡས་ཀྱིས་དགྲ་བོ་གདོང་བཀག་དང་འཐབ་འཛིང་ནི་མདའ་མཚོན་གྱི་ནུས་པ་མ་རྫོགས་བར་ཕྱི་ནུད་མེད་པ་རྒོལ་རྡུང་སྣ་ཚོགས་བྱས་ཀྱང་མཐར་དཔའ་བོ་ཉིད་ཕུར་ཁང་དགོན་པའི་རི་རྒྱབ་ཏུ་དགྲ་འོག་ཏུ་ཚེ་སྲོག་ཤོར།སྐབས་དེར་རྫོགས་ཆེན་གྱི་བླ་སྤྲུལ་མཁྱེན་བརྩེ་སྤྲུལ་སྐུ།རྫོགས་ཆེན་མཁན་རབ།ཚོང་དཔོན་ནོར་ཡོན།སྤས་རབ་ཚང་།ཚོང་དཔོན་ཚང་སོགས་མང་པོ་ཡོད་པའི་གྲས་ཀྱི་དཔའ་བོ་ཁག་གཅིག་རྒྱའི་ལག་འོག་ཏུ་ཤོར་བ་མ་ཟད་གོ་ལག་དང་དངོས་རྫས་ཕལ་ཆེ་བ་རྒྱའི་ལག་ཏུ་ཤོར།རྫ་ཆུ་ཁ་ཁྲི་འདུ་ཆུ་དམར་བར་དགྲ་འཏབ་ལན་མང་བྱས་ཏེ་བྱང་རྒྱུད་ནས་བྱང་ཨ་ཆེན་ཐང་སོགས་རྒྱ་དམར་ལ་འཐབ་རྒོལ་གྲངས་མང་བྱས།དེའི་ཁུལ་དུ་གནམ་གཤིས་ཤིན་ཏུ་གྲང་ངར་ཆེ་བས་འགྲུལ་བསྐྱོད་མ་ཐུབ་པའི་ལྷོ་ནུབ་ཕྱོགས་སུ་ཁ་བཏད་དེ་སོང་ཡོད་འདུག་ཀྱང་རྒྱ་དམག་གིས་འགྲོ་ལམ་ཕལ་ཆེར་དགག་སྲུང་བྱས་པའི་རྐྱེན་གྱིས་རང་འདོད་ལྟར་ཡོང་ཐབས་བྲལ་སྟབས་ནུབ་ཕྱོགས་ཁོ་ནར་ཁ་གཏད་དེ་ཉིན་མཚན་ལྟོས་མེད་དུ་ཕྱིན་པ་དང་།ནག་ཆུའི་ཉེ་འགྲམས་ཨ་མདོ་སྟོད་མར་འབྱོར།ཨ་སྟོད་གཡས་གཡོན་དུ་རྨས་སྐྱོན་ཕོགས་པ་རྣམས་གསོ་ཐབས་དང་།ཆད་ལུས་སོང་བའི་ཡུལ་གྱར་བ་རྣམས་ཇ་ཐེངས་གཅིག་གི་ངལ་གསོ་ལྟར་བྱས་ཏེ་ཟླ་ཤས་བསྡད་ཡོད་འདུགཨ་མདོ་མ་ནས་ལྷོ་ཤར་ཕྱོགས་སུ་ཁ་བསྒྱུར་ཏེ་ཤག་ཆུ་ཁའི་སྡེ་སྨད་ནས་འབྲི་རུ་སྡེ་བ།ཤོ་བསྟར་ལྷོ་གསུམ་ཁུལ་ནས་སྤོ་བོ་ནང་བཅས་སུ་དགྲ་འཐབ་ལན་མང་བྱས།སྤས་རབ་འབྲུག་གྲགས་སྤོ་བོའི་ཡུལ་དུ་གཡུལ་འགྱེད་སྐབས་དགྲ་ལག་ཏུ་ཤོར།ཆེས་སྙན་གྲགས་ཆེ་བའི་སྡེ་དགེའི་རྒྱལ་སྲས་དང་།བཟློག་ཟླ་བྲལ་བའི་དཔའ་རྒོད་ཆུ་སྒང་དམག་སྤྱི་སྡེ་དགེ་འཆི་མེད་མགོན་པོས་དབུ་ཁྲིད་འོག་ལྕགས་ར་དཔལ་འབར་དང་སྤོ་བོ་སྤྲ་མོག་སོགས་སུ་ཆུ་སྒང་བསྟན་སྲུང་དང་བླངས་དམག་མིའི་ཕོགས་དཔོན་བྱས་པ་སོགས་མདོར་ན་དམག་དོན་ཐད་བློས་བཏང་ཆེན་པོ་དང་།གྲུབ་འབྲས་མི་ཚང་རེ་རེས་འདི་འདྲ་ལེན་ཐུབ་པ་བྱུང་ཚེ་ང་ཚོའི་རང་དབང་རང་བཙན་ཤོས་དགོས་དོན་ཅི་ཞིག་ཡོད།ལྕགས་ར་དཔལ་འབར་གཡས་གཡོན་དུ་སྤས་རབ་ཚང་གི་དཔའ་བོ་ཁ་ཤས་རྒྱ་ལག་ཏུ་ཚེ་སྲོག་ཤོར་བ་དང་།རང་དམག་ལ་ཕམ་ཉེས་ཆེན་པོ་ཤོར་ཏེ་རྒྱལ་ཤོད་བན་དཀར་ཁུལ་དུ་རྒྱ་མིར་འཐབ་ཞོར་དང་བྲོས་ཞོར་དམག་ས་གཞན་དུ་ཕྱོགས་ཐོན་ཞུ་གྲབས་སྐབས་རྒྱ་དམག་གིས་ཤིང་ནགས་མེར་སྲིགས་བཏང་བས་སྤས་རབ་ཚང་གི་ཕ་འབུམ་པ་གཙོས་དཔའ་བོ་མང་པོ་མེ་འོག་ཏུ་འདས་གྲོངས་ཤོར།གསོན་ལྷག་རྣམས་རྒྱ་མིས་འཛིན་བཟུང་བྱས་ཏེ་རྒྱ་ཤོད་བན་དཀར་ནས་རོང་པོ་རབ་བརྟན་དགོན་བར་རྡུང་རྡེག་ཚད་མེད་བཏང་བཞིན་ཁྲིད་དེ་བཙོན་ཁྲིམས་འོག་ཏུ་ཤོར་༡༩༨༩ལོར་རྒྱ་མིའི་སྲིས་བྱུས་གུ་ཡངས་ཟེར་བའི་དུས་སྐབས་ཤར་བ་དང་ཐོད་ཅོག་དང་མགོན་རིན་གཉིས་བཙོན་འོག་ནས་གློད་གྲོལ་ཐོབ་ཀྱང་ཟླ་བ་ཁ་ཤས་རྗེས་སྐུ་འཚོ་བཞུགས་མ་ཐུབ་པ་ཕྱི་མའི་སྔ་ལམ་དུ་གྱུར།མདོར་ན་སྤས་རབ་ཚང་གི་བུ་དགུ་དང་།ཚ་བོ་བསམ་འཕེལ་བླ་བདེ་བཅས་བཅུ་པོ་དེ་དག་གི་བྱས་པ་རྗེས་མེད་དུ་མི་འགྲོ་བ་དང་།བསྟན་སྲིད་ཀྱི་ཆེད་དུ་རྒྱ་དམར་ལ་ངོ་རྒོལ་ལས་འགུལ་གྱི་ནུས་ཤུགས་ཇི་ལྟར་བཏོན་པ་རྣམས་ཕྱི་རབ་རྗེས་འཇུག་རྣམས་ཀྱི་ཡིད་དུ་འཇོག་དགོས་པ་གལ་ཆེ་དོན་ཆེར་རྩིས་ཏེ་རྒྱ་གར་འཕགས་ཡུལ་དུ་སྐྱབས་བཅོལ་ཡུལ་གྱར་བ་ཤུལ་ལུས་ཚ་བོ་ཚེ་རྣམ་མམ་སྡེ་དགེ་བློ་བཟང་གིས་རྒྱལ་ས་ལྡི་ལི་གསར་པར་བྲིས།ཞོར་འཕྲོས་སུ་སྤས་རབ་ཚང་གི་མ་རྒན་མིག་འཛུམ་དང་བུ་མོ་གཡང་ཆེན་གཉིས་འགྲོ་ལམ་གཞན་ཞིག་མ་བརྙེད་པ་ཡིན་སྟབས་རོང་པོའི་ཁུལ་དུ་མི་ལོ་༢༧རིང་ལྷགགཡང་ཆེན་གསེར་ཆུང་ཚང་གི་བུ་ཕུན་ཚོགས་སྟོབས་རྒྱལ་དང་མཉམ་དུ་གཉེན་བསྒྲིགས་བྱས་ཏེ་ཁོང་གཉིས་ལ་བུ་དྲུག་དང་བུ་མོ་གསུམ་ཡོད།༡༩༨༩ལོར་རོང་པོ་ནས་ཕ་ཡུལ་རྫོགས་ཆེན་དུ་གནས་སྤོས་བྱས་ཏེ་ད་ཆར་སྡེ་དགེ་རྫོགས་ཆེན་དུ་གནས་སྡོད་བྱེད་མུས་ཡིན་པ་དང་།༢༠༠༢ལོར་འདས་གྲོངས་སུ་གྱུར།མ་གཡང་ཆེན་དང་ཕ་ཕུན་ཚོགས་སྟོབས་རྒྱལ་གཉིས་ལ་བུ་དྲུག་དང་བུ་མོ་གསུམ་ཡོད་པ་རིམ་བཞིན།བུ་པདྨ་ནོར་བུ་དང་།བསྟན་ཐུབ།ཚེ་རྣམ།སྨན་ལྷ།བསྟན་འཛིན་ནོར་བུ།སྐལ་ལྡན།བུ་མོ་སྒྲོལ་མ།ཉི་མ་མཚོ་མོ།བུ་མོ་གཅིག་བཅས་འདས་གྲོངས་སུ་གྱུར་པ་སོགས་ཡིན།སྤས་རབ་ཚང་གི་བུ་མོ་ཆེ་སངས་རྒྱས་ཆོས་སྒྲོན་ནི་གླིང་ཚང་རི་འགུལ་ཚང་གི་མནའ་མ་བསུས་ཏེ་བུ་བཞི་དང་བུ་གཉིས་དང་བཅས་ཏེ་ད་ཆར་རྒྱ་གར་བྱང་ཕྱོགས་སྒང་ཏོག་ཏུ་གནས་སྡོད་བྱེད་མུས་ཡིན་པ་བཅས་ལོ་རྒྱུས་མདོར་བསྡུས་དང་།ཁོ་བོ་ཚེ་རྣམ་༡༩༨༣ལོར་བཙན་བྱོལ་དུ་རྒྱ་གར་ལ་འབྱོར་ནས་ད་ཆ་ལྡི་ལིར་བོད་སྒར་བསམ་ཡས་གླིང་དུ་གནས་སྡོད་བྱེད་བཞིན་ཡོད།བོད་བསྟན་སྲིད་ཀྱི་ཆེད་དུ་རང་སྲོག་དོར་བའི་འདས་པོ་དེ་དག་དང་དེ་དང་དེ་འདྲ་བའི་ཁམས་དབུས་མདོ་གསུམ་གྱིས་དཔའ་བ་དཔའ་མོ་རྣམས་ཀྱི་རྗེས་དྲན་ཆེད་དུ་ཚ་བོ་ཚེ་རྣམ་མམ་སྡེ་དགེ་བློ་བཟང་པས་༢༠༠༨ཟླ་༡༢ཚེས་༣ཕུལ།
༡༩༥༩སྔོན་གྱིས་སྤས་རབ་ཚང་གི་མིང་སྲིང་རྣམས་ཀྱི་མིང་།
གསོང་ཚེ།དར་རྒྱས།ཐོད་ཅོགའཁྱུངས་རྒྱལ།བ་ཡས།འབྲུག་གྲགས།ཨ་དཔལ།མགོན་རིལ།བུ་གཅིག་ཆུང་དུས་ནས་འདས་གྲོངས་སུ་ཤོར།བུ་མོ་སངས་རྒྱས་ཆོས་སྒྲོན།དབྱངས་ཅན།བུ་མོ་གཅིག་འདས་གྲོངས་སུ་ཤོར།བུ་བརྒྱད་ཆ་ཚང་བོད་བསྟན་སྲིད་མི་རིགས་ཀྱི་དོན་དུ་རང་སྲོག་དོར་བས་ཆུ་སྒང་བསྟན་སྲུངས་དང་བླངས་དམག་གི་སྒྲིགས་འཛུགས་ནང་དུ་འདས་གྲོངས་སུ་གྱུར།ཚ་བོ་བསམ་འཕེལ་བླ་བདེ་ཡང་སྤས་རབ་ཚང་གི་ཚ་བོ་ངོ་མར་ཡིན་ཞེས་ཁོང་ལྕགས་ར་དཔལ་འབར་དམག་འཁྲུག་བྱས་ས་རུ་དཔོན་ཞིག་ཡིན་པར་གོ།བུ་དགུ་དང་ཚ་བོ་གཅིག་བཅས་བུ་པོ་འདི་དག་རྒྱ་མའི་བཙན་གནོན་འོག་ཏུ་བསད་པ་དང་མནར་གཅོག་འོག་ཏུ་འདས་གྲོངས་སུ་གྱུར་པ་ཤ་སྟག་ཡིན།གཞིས་བྱེས་གཉིས་སུ་གནས་པའི་སྤུན་ཟླ་ཡོངས་ཀྱིས་དྲན་གསོའི་ཆེད་དུ་ཡིན།ཕྱིས་སུ་སྤས་རབ་ཚང་གི་བུ་འདི་དག་གི་གཅུང་མོ་དབྱངས་ཅན་ནི་ཤུལ་ལུས་སུ་ལྷག་ཞིང་འདི་ཡི་བུ་ཕྲུག་རྣམས་ཀྱི་མིང་།ཚེ་རྣམ།པདྨ་ནོར་བུ།བསྟན་འཛིན་ཐུབ་བསྟན།སྨན་ལྷ།བསྟན་འཛིན་ནོར་བུ།བསྟན་འཛིན་སྐལ་ལྡན།བུ་མོ་ཆེ་བ་སྒྲོལ་མ།ཉི་མ་མཚོ་མོ།བུ་མོ་ཞིག་འདས་གྲོངས་སུ་གྱུར་པ་བཅས་ཡིན།མ་དབྱངས་ཅན་གྱི་གཅེན་མོ་སངས་རྒྱས་ཆོས་སྒྲོན་ནི་གླིང་ཚང་རིན་མགུལ་ཚང་ལ་གནའ་མར་སོང་ནས།༥༩ལོར་བཙན་བྱོལ་དུ་འབྱོར་ནས་ད་ཆ་འབྲས་ལྗོངས་ཁུལ་དུ་གནས་མུས་སུ་ཡིན།སྤས་རབ་ཚང་གི་བུ་འདི་རྣམས་ཀྱིས་བོད་བསྟན་སྲིད་དོན་དུ་རང་སྲོག་དོར་བས་དྲན་རྟེན་གྱི་ཆེད་ཚ་བོ་ཚེ་རྣམ་མང་སྡེ་དགེ་བློ་བཟང་པས་སྤྱི་ལོ་༢༠༠༩ཟླ་བ་༢ཚེས་༧ཉིན་ལ།
༢༥༽སྡེ་དགེ་ཀླུ་ཐོག་ཚང་འཆི་མེད་མགོན་པོ།
༡༩༥༩ལོ་སྡེ་དགེ་འབྲི་ནུབ་མངའ་ཁུལ་དུ་ཟིང་འཁྲུགས་ཡོང་ཉེར་དམར་པོའི་ལམ་ལུགས་དམངས་གཙོ་བཅོས་བསྒྱུར་ཟེར་བའི་ལས་འགུལ་ལ་ཁས་ལེན་བྱ་ཐབས་བྲལ་ནས་ལུས་སྲོག་ལོངས་སྤྱོད་བློས་བཏང་སྟེ་རྒྱ་དམར་ལ་འཐབ་འཛིང་ཐེངས་མང་བྱས་ནས་གོ་འཇོ་གསེར་ལྡིང་ཁར་ཕན་ཚུན་བསད་རྨས་མང་དག་ཅིག་བྱུང་སོང་།དེ་ནས་སྡེ་གེ་གྲས་ཨོ་དགའ་གཙོས་དཔོན་གཡོག་ལྔ་བརྒྱ་ཙམ་ཆབ་མདོ་དང་།རི་བོ་ཆེའི་རྒྱུད་དམག་འཐབ་ཁ་ཤས་བྱས་ནས་ལྕགས་ར་དཔལ་འབར་དུ་སླེབས།དེ་ནས་ཞག་ཤས་རྗེས་སྡེ་དགེ་སྲས་དོན་ཡོད་གཙོས་གནམ་དམག་མི་གྲངས་༡༧གནམ་ནས་གཡུག་ནས་མཉམ་དུ།གོ་ལག་དང་གཏར་བཅས་འབྱོར་བྱུང་།དེ་ནས་ཟླ་བ་ལྔ་ཙམ་གོ་མཚོན་གསར་པ་རྣམས་བེད་སྤྱོད་བྱ་སྟངས་སློབ་སྦྱོང་བྱས་ནས་རྟ་དམག་གཅིག་སྟོང་ཙམ་གོ་སྒྲིག་བྱས་ནས་སྤུ་དེ་དུང་མ་ནས་དགྲ་འཛིང་ཉིན་ཤས་བྱས་ཀྱང་མཐར་མང་སྣེ་ཉུང་གི་མ་བརྟན་པར་ཕྱིར་ལོག་བྱ་དགོས་བྱུང་བ་མ་ཟད་དམག་མི་མང་པོ་མཚོན་འོག་ཏུ་ཤོར་སོང་།༡༩༦༠ལོ་མགོ་ཙམ་ནས་རྒྱ་ཁྲི་ལྷག་ཙམ་གྱིས་ས་ཕྱོགས་ཁག་བཞིས་ནས་གནམ་ས་གཉིས་ནས་རང་དམག་ལ་རྒོལ་བརྡུང་བཏང་བས་རང་མི་སྐྱ་སེར་༦༠༠༠ནས་༧༠༠༠ཙམ་བསད་བཟུང་ཐོག་རྩ་མེད་བྱུང་ཡོད།དེ་ནས་གུས་ཚོ་འདམ་གཞུ་དུ་སླེབས།འབྲི་གུང་དང་སྨན་རི་བཅས་སུ་རྒྱ་དམར་དང་།དམག་འཁྲུག་ལན་གྲངས་བརྒྱབ་ནས་ཤི་གསོན་མང་པོ་བྱུང་སོང་།དེ་ནས་གུས་ཚོའི་མདའ་རྫས་རྫོགས་ལ་ཉེ་སྐབས་ཨ་འབྲུག་ངག་དབང་ཕུལ་བྱུང་གཙོས་གནམ་དམག་གྲངས་༡༢དང་མདའ་རྫས་བཅས་རོགས་རམ་འབྱོར་བྱུང་།དེ་གར་ཉིན་གསུམ་ཙམ་དམག་འཐབ་བྱས་ནས་མཐར་བྱང་མི་མེད་ལུང་སྟོང་དུ་སླེབས་ནས་རི་དྭགས་ཤ་ལ་ཟ་སྤྱོད་མ་གཏོགས་གཞན་ཟས་རིགས་སྣེ་གཅིག་མེད་པ་ཟླ་བར་ཕྱིན་སོང་།དེ་ནས་ཨ་མདོ་སྟོད་མ་རྒྱུད་མི་ཟས་ཕྲན་བུ་འབྱོར་ནས་ཤི་དགོས་མ་བྱུང་ཙམ་བྱུང་སོང་།དེ་ནས་བལ་པོའི་ས་མཚམས་མུ་གུམ་རྒྱུད་ནས་༡༩༦༡ལོ་རྒྱ་གར་ལ་འབྱོར་སོང་།གུས་ཀྱི་ལོ་རྒྱུས་འདི་ཙམ་ཡིན།༢༠༠༩ཕྱི་ཟླ་༤ཚེས་༢ཉིན་བལ་ཡུལ་ནས་ཕུལ།
One Response
བསམ་ཚུལ་འབྲི།
སྡེ་དགེའི་རྒྱལ་བློན་དང་བུད་མེད་ཆེ་ཁག་གི་ཆས་གོས།
དཔའ་པོ་རྣམས་ལ་གུས་མདུན་ཞུ།།