སྡེ་དགེ་ཆོས་རྒྱལ་ཆེན་པོའི་བཀའི་མདུན་ན་འདོན་གྱང་ཁང་དགེ་སྟོབས་ལགས་ཀྱི་ལོ་རྒྱུས།
སྡེ་དགེ་ཆོས་རྒྱལ་ཆེན་པོའི་བཀའི་མདུན་ན་འདོན་གྱང་ཁང་དགེ་སྟོབས་ལགས་ནི་ཡབ་གྱང་ཁང་སྤྲུལ་སྐུ་དང་ཡུམ་སྒེར་རྨ་བྱ་ཚང་གི་བུ་མོ་གཉིས་ཀྱི་སྲས་སུ་རབ་བྱུང་བཅུ་དྲུག་པའི་ཆུ་བྱ་སྤྱི་ལོ་༡༩༣༣ ལོར་ལྷོ་ཁ་རུ་སྐུ་འཁྲུངས།
སྤྱི་ལོ་༡༩༣༨ ལོར་ཁོང་གི་ཡབ་གྱང་ཁང་སྤྲུལ་སྐུ་མཆོག་ནས་ལྷོ་ཁ་རུ་ཡོད་པའི་གཞིས་ཀ་ཕྱིར་སྤྲོད་གནང་སྟེ་སྡེ་དགེ་ནུབ་རྒྱུད་འཛོམ་ཐོག་ནོར་བུ་རྩེ་ཕོ་བྲང་གི་ཁྱབ་ཁོངས་སུ་ཡོད་པའི་སྡེེ་དགེའི་མདུན་ན་འདོན་གྱང་ཁང་ཚང་གི་གཞིས་ཁྱིམ་དུ་ཕེབས་པ་དང་དགེ་སྟོབས་ཡུམ་སྲས་གཉིས་ལྷ་ལྡན་བཀྲས་མཐོང་ཚང་གི་ཁྱིམ་དུ་བཞག །
སྤྱི་ལོ་༡༩༤༠ ལོར་སྡེ་དགེ་ནས་བསུ་མཁན་ཕེབས་འབྱོར་བྱུང་སྟེ་དགེ་སྟོབས་ཡུམ་སྲས་གཉིས་ཕ་ཡུལ་དུ་བསུས་པ་དང་། སྐབས་དེར་སྡེ་དགེ་ཚང་གི་མདུན་སྐོར་སློབ་གྲྭ་གསར་འཛུགས་གནང་ཡོད་དེའི་ནང་དུ་སློབ་ཞུགས་གནང་ནས་སུམ་རྟགས་དག་གསུམ་གཙོས་བོད་ཡིག་ལ་སློབ་སྦྱོང་མཐིལ་ཕྱིན་པ་གནང་། དེ་རྗེས་རྒྱ་གར་དུ་ཕེབས་ནས་དབྱིན་ཡིག་ལའང་སློབ་སྦྱོང་མི་དམན་པ་གནང་ཞིང་ཕྱིར་ཕ་ཡུལ་དུ་ཕེབས་ནས་སྡེ་དགེའི་མདུན་ན་འདོན་འོག་མ་སྐལ་བཟང་འཆི་མེད་ལགས་ཀྱི་སྐུ་མཆེད་བདེ་དགའ་ལགས་དང་གཉེན་སྒྲིག་གནང་།
སྤྱི་ལོ་༡༩༥༦ ཙམ་ནས་རྒྱ་དམར་གྱིས་བཙན་འཛུལ་དྲག་གནོན་ཛ་དྲག་ཇེ་ཆེ་རུ་གྱུར་པའི་སྐབས་ནས་བཟུང་སྡེ་དགེ་རྒྱལ་སྲས་ཨོ་རྒྱན་རིག་འཛིན་འཇིགས་མེད་སེང་གེ་མཆོག་གི་སྐུའི་སྲུང་བྱའི་མགན་ཁུར་གཙོ་བོར་གནང་སྟེ་སྤྱི་ལོ་༡༩༥༩ ལོར་སྡེ་དགེའི་འབྲི་ནུབ་སྤོ་ལུ་རྫོང་གི་ས་ཁོངས་འོལ་འབེལ་རྫ་དཀར་ཟེར་བ་དང་། ལྕེ་ཚ་ལ་མགོ། ཁོ་ལ་ནགས་གདོང་། མཇུག་གེ་མདའ། རེ་ཆུ་ཁ། བྲག་གཡབ་གསེར་གཞུང་བཅས་ནས་དགྲ་བོ་རྒྱ་དམག་དང་དམར་འཛིང་ལན་མང་བྱས་ཏེ་ལྕགས་ར་དཔལ་དུ་འབྱོར་བ་དང་། མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་མེ་སྒྱོགས་མདའ་དཔོན་གྱི་གོ་གནས་དང་། དེའི་རྗེས་སུ་ཆུ་སྒང་དམག་སྤྱིའི་འགན་ཁུར་གནང་།
སྤྱི་ལོ་༡༩༦༠ ལོར་ལྕགས་ར་དཔལ་འབར་དུ་རྟེན་གཞི་བྱས་ནས་ཡོད་པའི་ཆུ་སྒང་དང་བླངས་དམག་ཐོག་ཏུ་རྒྱ་དམར་གྱིས་ཕྱོགས་ཡོངས་ནས་རྒོལ་རྡུང་དྲག་པོ་གཏོང་བའི་སྐབས་དཔའ་ངར་ཞུམ་མེད་ཀྱིས་ཉིན་མང་པོའི་རིང་དུ་འཐབ་འཁྲུག་ཤུགས་ཆེར་བྱས་ཀྱང་མཐར་མང་སྣེ་ཉུང་གིས་མ་རྟེན་པར་ཁོང་དང་རྒྱལ་སྲས་ཨོ་དགའ་སྐུ་འཁོར་མང་པོ་ཞིག་འཛིན་བཟུང་བྱེད་ཤོར་བ་དང་། རིམ་པས་ཆབ་མདོ་ཁྲིད་ནས་སྤྱི་ཆེན་འདུ་ཁང་དུ་བཙོན་འཇུག་བྱས་ཏེ་ཚ་འདྲི་རྡུང་རྡེག་བཟོད་དཀའ་བ་ལན་མང་བཏང་ནས་མནར་གཅོད་ཚད་ལས་འདས་པ་མྱོང་དགོས་བྱུང་།དེ་རྗེས་ལྷ་ས་རུ་ཁྲིད་དེ་དམག་མིའི་བཙོན་ཁང་དུ་རྒྱུན་རིང་བཅུག །
སྤྱི་ལོ་༡༩༧༨ ལོར་རྩ་བའི་གློད་གྲོལ་བྱུང་ཡོད་ཀྱང་ལས་མི་རུ་ཁག་ཟེར་བར་ལོ་ལྔ་ཙམ་སྡོད་དགོས་བྱུང་བ་བཅས་ཀྱིས་ཁྱོན་མི་ལོ་ཉེར་གསུམ་ཙམ་བཙོན་དུ་ཚུད་དེ་སྤྱི་ལོ་༡༩༨༥ ལོར་བཙན་བྱོལ་དུ་ཕེབས་ཐུབ་པ་བྱུང་།
སྤྱི་ལོ་༢༠༢༠ ཟླ་༡༠ པའི་མགོ་ཙམ་ནས་སྐུ་གཟུགས་ཅུང་ཞིག་མ་བདེ་བ་བྱུང་སྟེ་སྨན་དཔྱད་རིམ་གྲོ་སོགས་ལྷོད་གཡེང་མེད་པ་ཞུས་ཀྱང་མ་ཕན་པར་ཉིན་རེ་བཞིན་སྙུན་གཞི་ཇེ་ལོད་དུ་སོང་ནས་མཐར་དགུང་གྲངས་༨༨ ལ་ཕེབས་པའི་དམ་པ་དེ་ཉིད་སྤྱི་ལོ་༢༠༢༠ ཟླ་༡༠ ཚེས་༣༡ཉིན་གྱི་ཐོ་རེངས་ཆུ་ཚོད་༣. ༡༣ ཐོག་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་བྱུང་བ་བཅས་ཀྱི་རོབ་བསྡུས་སུ།
ཚེ་དབང་བསོད་ནས་སྤྱི་ལོ་༢༠༢༠ ཟླ་༡༡ ཚེས་༡ ཉིན་བྲིས།
བསམ་ཚུལ་འབྲི།
ཞེ་ཆེན་དགོན་བསྟན་གཉིས་དར་རྒྱས་གླིང་གི་ངོ་སྤྲོད་མདོར་བསྡུས།