ཞེ་ཆེན་དགོན་བསྟན་གཉིས་དར་རྒྱས་གླིང་གི་ངོ་སྤྲོད་མདོར་བསྡུས།
གསང་སྔགས་སྔ་འགྱུར་བའི་མ་དགོན་ཆེན་མོ་དྲུག་གི་ཡ་གྱལ་མདོ་ཁམས་སྡེ་དགེའི་ཆོས་རྒྱལ་གྱི་དབུ་བླ་ཁག་ལྔའི་ནང་ཚན་ཞེ་ཆེན་དགོན་བསྟན་གཉིས་དར་རྒྱས་གླིང་ནི། རྒྱལ་དབང་ལྔ་བའི་བཀའ་ལུང་ལྟར་ཞྭ་སེར་བསྟན་པ་རྒྱས་བྱེད་ཁྲི་ཆེན་ཆོས་རྗེ་རབ་འབྱམས་པཎྜི་ཏ་ཧུ་ཐོག་ཐུ་ནོ་མི་ཧན་བློ་བཟང་ཐུབ་བསྟན་བསྟན་པའི་རྒྱལ་མཚན་ཨེར་ཏི་ནི་ཞེས་མཚན་གྱི་ཅོད་པན་དཔྱངས་ནས་མདོ་ཁམས་སུ་ཕེབས་ཏེ་རབ་བྱུང་བཅུ་གཉིས་པའི་ས་སྟག་ཕྱི་ལོ་<1698>ལོར་ཕྱག་བཏབ། མཚན་གསང་སྔགས་ཆོས་གླིང་ཞེས་གསོལ།
རྗེས་སུ་རྒྱལ་མཆོག་བདུན་པའི་ལུང་དོན་ལྟར་རྗེ་རབ་འབྱམས་པའི་སྐུ་རབས་གཉིས་པ་འགྱུར་མེད་ཀུན་བཟང་རྣམ་རྒྱལ་གྱིས་ཤིང་ཡོས་ཏེ་ཕྱི་ལོ་<1735>ལོར་མདོ་ཁམས་གནས་ཆེན་ཉེར་ལྔའི་ནང་ཚན་བདུད་རྩི་ཡོན་ཏན་གྱི་གནས་མཆོག་སེངྒེ་གནམ་རྫོང་གི་མདུན་ཞོལ་དུ་གནས་སྤོས་ཏེ་ཕོ་བྲང་དཀར་དམར་གཉིས་གཙོས་རྟེན་དང་བརྟེན་པ་བཅས་གསར་བཞེངས་ལེགས་པར་གྲུབ་ཅིང་རྒྱལ་བསྟན་སྤྱི་དང་བྱེ་བྲག་སྔ་འགྱུར་བའི་ཕ་ཆོས་བཀའ་མ་མདོ་སྒྱུ་སེམས་གསུམ་སོགས་མདོ་སྔགས་རིག་གནས་དང་བཅས་པ་ཐོས་བསམ་སྒོམ་པས་འཛིན་སྐྱོང་སྤེལ་བའི་བསྟི་གནས་ཉག་ཅིག་ཏུ་གྱུར་ཏེ་ཕྱོགས་དང་རིས་སུ་མ་ཆད་པའི་སློབ་མའི་ཚོགས་རྒྱ་ཆེར་འཕེལ།
དེ་ནས་རྗེ་དེ་ཉིད་ཀྱི་དོན་གྱི་བསྟན་པ་ཡོངས་རྫོགས་ཀྱི་མངའ་བདག་ཏུ་དབང་བསྐུར་བའི་རྒྱལ་ཚབ་སྐུ་ཕྲེང་དང་པོ་པདྨ་གསང་སྔགས་བསྟན་འཛིན་ཆོས་ཀྱི་རྒྱལ་པོ་ཉིད་ཡུལ་དབུས་ལྷ་ལྡན་དུ་ཕེབས་ཏེ་རྒྱལ་མཆོག་འཇམ་དཔལ་རྒྱ་མཚོའི་ཞབས་ལ་གཏུག་ཅིང་། རྗེ་རབ་འབྱམས་པའི་སྐུ་རབས་གསུམ་པ་རིག་འཛིན་དཔལ་འབྱོར་རྒྱ་མཚོ་ལ་བསྟན་འཛིན་དོན་ཡོད་ཆོས་རྗེའི་ཆོ་ལོ་བསྩལ་ཏེ་བཀའ་ཤོག་ཤེལ་བམ་བཅས་གནང་། རྗེ་དེ་གཉིས་ཀྱི་སྐུ་དུས་སུ་སྐྱེ་བདུན་རིལ་སྒྲུབ་ཆེན་མོ་དང་། ས་ཟླའི་སྒྲུབ་མཆོད་ཆེན་མོ། སྤྲོས་བཅས་ཚེས་བཅུ་ཆེན་མོ། བཀའ་བརྒྱད་ཁྲོ་བོ་རོལ་བའི་གཏོར་བཟློག ལོ་མཇུག་དུས་རིམ་ཆེན་མོའི་གཙོས་དུས་མཆོད་ཆེ་ཁག་ལྔ་རྗེས་འབྲེལ་དང་བཅས་པ་གཏན་འཇགས་སུ་བཙུགས།
གཞན་ཡང་རབ་བྱུང་བཅུ་གསུམ་པའི་ཤིང་གླང་ཕྱི་ལོ་<1805>ལོར་སྒྲུབ་སྡེ་བདེ་ཆེན་པདྨ་འོད་གླིང་ཕྱག་བཏབ་ཅིང་རྒྱལ་དབང་ཀརྨ་པ་ཐེག་མཆོག་རྡོ་རྗེས་མ་ཧཱ་པཎྜི་ཏ་ཞེས་བསྔགས་པའི་ངེས་དོན་གྱི་དགེ་བའི་བཤེས་གཉེན་ཆེན་མོ་དབོན་སྤྲུལ་པཎ་ཆེན་འགྱུར་མེད་མཐུ་སྟོབས་རྣམ་རྒྱལ་དང་། སྔོན་མེད་མཛོད་ལྔའི་ཤིང་རྟ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱི་སྐུ་སྐྱེ་སྔ་མ་གྲུབ་ཆེན་ཤེས་རབ་ཡར་འཕེལ་སོགས་རྫོགས་ཆེན་གྱི་ལྟ་བ་ཀློང་དུ་གྱུར་བའི་གྲུབ་ཆེན་བཅུ་གསུམ་དང་ཁྱད་པར་སྐྱབས་མགོན་དབོན་སྤྲུལ་པཎ་ཆེན་གྱི་ཞལ་སློབ་ཏུ་གཏོགས་པ་ངོ་མཚར་བཀའ་བབ་བདུན་ལྡན་འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་། རྒྱལ་བས་ལུང་བསྟན་འཇམ་མགོན་བསྟན་གཉིས་གཡུང་དྲུང་གླིང་པ། སེམས་དཔའ་ཆེན་པོ་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོ་སོགས་སྔ་འགྱུར་བཀའ་གཏེར་རྒྱ་མཚོ་ལྟ་བུ་ལ་ཕྱག་རྗེས་ཀྱི་རེ་ཁཱ་ཆེས་ཆེར་བཀྲ་བའི་ཕྱོགས་བྲལ་གྱི་སློབ་ཚོགས་མང་དུ་ཕེབས།
དེ་ནས་རབ་བྱུང་བཅོ་ལྔ་པའི་ཤིང་སྦྲུལ་ཕྱི་ལོ་<1905>ལོར་རྗེ་རབ་འབྱམས་ལྔ་པ་འགྱུར་མེད་ཀུན་བཟང་བསྟན་པའི་ཉི་མ་དང་རྒྱལ་ཚབ་གསུམ་པ་འགྱུར་མེད་པདྨ་རྣམ་རྒྱལ་འཇམ་དཔལ་དབྱངས་མི་ཕམ་རིན་པོ་ཆེ་གསུམ་དགོངས་མཐུན་གྱིས་ཐེག་མཆོག་བཤད་སྒྲུབ་པདྨའི་དགའ་ཚལ་ཕྱག་བཏབ་ཅིང་། དེ་ནས་རིམ་བཞིན་བཤད་སྒྲུབ་ཟུང་འབྲེལ་གྱི་སྒོ་ནས་ལོ་བསྟར་ཆགས་སུ་འཆད་ཉན་སྒོམ་སྒྲུབ་ཀྱི་རྒྱུན་བསྐྱངས་པས་ཡོངས་རྫོགས་རྒྱལ་བསྟན་སྤྱི་དང་བྱེ་བྲག་སྔ་འགྱུར་རྙིང་མ་བའི་བསྟན་པའི་བཀའ་བབ་ཉག་ཅིག་ཏུ་གྲུབ། དུས་ཕྱིས་སུ་ཧུ་ཐོག་ཐུ་ནོ་མི་ཧན་རབ་འབྱམས་དྲུག་པ་སྣང་མཛད་གྲུབ་པའི་རྡོ་རྗེ་དང་འཇམ་མགོན་ཀོང་སྤྲུལ་རིན་པོ་ཆེ་རྒྱལ་ཚབ་ཐུགས་རྗེའི་གཏེར་ཆེན་གྱི་ཡང་སྤྲུལ་འགྱུར་མེད་པདྨ་རྡོ་རྗེ་གསུམ་གྱི་ཐུགས་བསྐྱེད་ལ་བརྟེན་ནས་བཤད་གྲྭ་དེ་ཉིད་དགོན་དེའི་གཡོན་ཟུར་གྱི་མདུན་ཆེན་ཕུན་ཚོགས་དར་ཐང་དུ་སྤོས་ནས་གཙུག་ལག་ཁང་རྟེན་དང་བརྟེན་པ་བཅས་དང་གྲྭ་ཤག་སྤྱི་གཉེར་ཁང་དང་བཅས་པ་གསར་བཞེངས་མཛད་ཅིང་། མཁན་ཆེན་བློ་གྲོས་རབ་གསལ་དང་མཁན་ཆེན་གང་ཤར་དབང་པོ་བོད་སྤྲུལ་མདོ་སྔགས་བསྟན་པའི་ཉི་མ་སོགས་ཀྱིས་ལས་ཐོག་གི་མཁན་པོའི་ཐུགས་འགན་བཞེས་ཏེ་གོང་གསལ་ལྟར། ལོ་བསྟར་ཆགས་སུ་རང་ལུགས་ཀུན་མཁྱེན་ཡབ་སྲས་ཀྱི་རང་རྐང་ལེགས་པར་བཟུང་སྟེ་མདོ་སྔགས་གཞུང་ལུགས་ཀྱི་བཤད་ཁྲིད་སོགས་ཚུལ་བཞིན་གནང་བའི་རྒྱ་བོད་ཀྱི་སློབ་མའི་ཚོགས་ཀྱང་མང་དུ་འཕེལ་བ་ལས་གཙོ་ཆེ་བ་འགའ་ཞིག་གི་མཚན་ནས་སྨོས་ན། མཁན་པོ་འཕགས་སྒང་དང་མཁན་པོ་འགྱུར་མེད་བློ་ལྡན་སོགས་རང་དགོན་གྱི་བླ་སྤྲུལ་སྤྱི་དང་། གཞན་ཡང་སྨིན་གླིང་གདུང་སྲས་རིན་པོ་ཆེ། ཟུར་མང་དྲུང་པ་རིན་པོ་ཆེ། མཁར་མགོ་འཇམ་གྲགས་མཆོག་སྤྲུལ། སྒ་སྟོད་ཁྲ་འགུ་སྤྲུལ་སྐུ། ཟུར་མང་གར་དབང་མཆོག་སྤྲུལ། བོན་བསྟན་རྒྱམ་སྤྲུལ་སྐུ། བལ་ཡུལ་ཤར་ཁུམ་དགེ་བཤེས་སངས་རྒྱས་བསྟན་འཛིན། མཁན་ཆེན་ཆོས་དབྱིངས་ཁྱབ་བརྡལ། མགོ་ཚ་མཁན་ཆེན་ཨོ་རྒྱན་བསྟན་འཕེལ། ཁྲོ་ཤུལ་མཁན་རིན་པོ་ཆེ་འཇམ་དཔལ་རྡོ་རྗེ་སོགས་རྒྱལ་བསྟན་སྤྱི་དང་བྱེ་བྲག་ལ་མཛད་རྗེས་བླ་མེད་གནང་བའི་མཁས་གྲུབ་ཀྱི་སྐྱེས་ཆེན་བགྲང་ལས་འདས་པ་བྱུང་ཡང་། དུས་དབང་གིས་གངས་ལྗོངས་སྤྱི་སྒོས་ཀྱི་ལུགས་གཉིས་ལ་ཉམས་ཉེས་ཅུང་ཟད་བྱུང་བར་བརྟེན་དགོན་འདིའི་བཤད་སྒྲུབ་ཀྱི་བསྟན་པ་ལ་འཕོ་འགྱུར་སོང་ཡང་རྒྱལ་བའི་འཕྲིན་ལས་ཀྱི་འཇུག་པ་རྒྱུན་མ་ཆད་ཅིང་སྐྱེ་དགུའི་བསོད་ནམས་ཀྱི་ལང་ཚོ་ཆེས་ཆེར་དར་བ་ལ་བརྟེན་ཕྱི་ལོ<1979>ལོར་གྲུབ་དབང་བླ་མ་དགེ་ལེགས་འཕེལ་རྒྱས་དང་སྐྱབས་མཆོག་འཁོར་ལོའི་མགོན་པོ་ཁྱབ་བདག་དིལ་མཁྱེན་རྡོ་རྗེ་འཆང་འགྱུར་མེད་ཐེག་མཆོག་བསྟན་པའི་རྒྱལ་མཚན། སྐྱབས་རྗེ་རབ་འབྱམས་རིན་པོ་ཆེ་འགྱུར་མེད་ཆོད་ཀྱི་སེངྒེ་སོགས་རང་དགོན་གྱི་བླ་གྲྭ་རྒན་རིམ་དག་གི་ཐུགས་བསྐྱེད་ལ་བརྟེན་ནས་བསྟན་པའི་མེ་རོ་གསོས་ཏེ་བཤད་སྒྲུབ་ཀྱི་བསྟི་གནས་ཁག་ཏུ་རྟེན་དང་བརྟེན་པ་བཅས་གསར་བཞེངས་གནང་།
རིམ་བཞིན་སྒྲུབ་འཕྲིན་ཕྱག་བཞེས་སོགས་སྔར་གྱི་མཐོང་རྒྱུན་དག་སླར་གསོ་དང་ཁྱད་པར་རྡོ་རྗེ་འཆང་མཁྱེན་བརྩེ་རིན་པོ་ཆེ་སྔར་ཕྱི་ལན་གཉིས་སུ་གཞིས་ཀྱི་ཆོས་སྡེ་ཆེན་མོ་འདིར་ཕེབས་ཏེ་སྔ་འགྱུར་བཀའ་གཏེར་གཙོ་བོར་གྱུར་བའི་སྨིན་གྲོལ་གྱི་གདམས་པ་དག་ཅིག་ཆོག་ཏུ་བསྩལ་ཞིང་དགོན་འདིའི་ཡང་དབེན་གྱི་སྒྲུབ་སྡེར་སྒྲུབ་པའི་རྒྱལ་མཚན་བསྒྲེངས། ལོ་བསྟར་ཆགས་སུ་མཐོ་སློབ་ལེགས་བཤད་ཉི་ཟླའི་དགའ་ཚལ་དུའང་སྒྱུ་འཕྲུལ་གསང་བ་སྙིང་པོ་འགྲེལ་ཊཱིཀ་སྟོང་ཐུན་དང་བཅས་པས་མཚོན་མདོ་སྔགས་ཀྱི་བཤད་རྒྱུན་ལེགས་པར་བཙུགས་ཏེ་དུས་ཕྱིས་སུ་རྒྱལ་ཚབ་རིན་པོ་ཆེ་འགྱུར་མེད་བཤད་སྒྲུབ་བསྟན་འཛིན་དང་དབོན་སྤྲུལ་རིན་པོ་ཆེ་འགྱུར་མེད་གཞན་ཕན་འོད་ཟེར་མཁན་ཆེན་པདྨ་རྡོ་རྗེ་སོགས་རང་དགོན་གྱི་མཁན་སྤྲུལ་དག་གི་ཐུགས་སྟོབས་ལས་སྔར་བཞིན་བཤད་སྒྲུབ་ཀྱི་བསྟན་པའི་དབུ་འཕང་ཡུན་དུ་མཐོ་ཞིང་གནས་བཞིན་མཆིས་ལ་དགོན་འདིའི་ཕྲིན་ལས་ཀྱི་རྒྱུན་ཧ་ཅང་སྨིན་པས་དགོན་ལག་ཀྱང་སུམ་བརྒྱ་ཁ་ལྷག་ཅིག་བཞུགས་སོ།།
ཞེས་སྔ་འགྱུར་བསྟན་པའི་ཉི་མ་འོག་མིན་རྒྱལ་བ་ཞེ་ཆེན་པའི་གྲྭ་མཐར་འཁོད་པའི་ཚུལ་ཁྲིམས་རྣམ་དག་དང་སངས་རྒྱས་རྡོ་རྗེ། ཚུལ་ཁྲིམས་གཞོན་ནུ། ཡོན་ཏན་བཟང་པོ། མགོན་པོ་རྡོ་རྗེ། འགྱུར་མེད་བསྟན་པ་རྣམས་ཀྱིས་སྔོན་བྱོན་གྱི་དམ་པ་དག་གི་ལོ་རྒྱུས་ཆོས་འབྱུང་ལས་བཏུས་ཏེ་ཕྱོགས་གཅིག་ཏུ་བསྒྲིགས་པ་ལགས་སོ།། གདན་རབས་རྣམ་ཐར་རྒྱས་པར་གཟིགས་འདོད་པ་དག་གིས་རྗེ་བླ་མ་རྒྱལ་ཚབ་རྡོ་རྗེ་འཆང་ཡབ་སྲས་སོགས་ཀྱིས་མཛད་པའི་ཆོས་འབྱུང་རྣམ་ཐར་ལས་རྟོགས་པར་བྱའོ།།
བསམ་ཚུལ་འབྲི།
༄༅།། བོད་རྒྱལ་ལོ་ ༢༡༤༨ རབ་གནས་ལྕགས་མོ་གླང་གི་ལོ་གསར་གྱི་ཤིས་ཚིག