ཧོར་འདྲ་བྱི་སུག་རབ་བརྟན།
ཧོར་འདྲ་བྱི་སུགརབ་བརྟན། ལོ་༧༩། ༢༠༡༢་༡༢་༡༩ཉིན་བལ་ཡུལ་བྷོ་དྷ་ཕྱོགས་ཀྱི་བོད་གཞུང་རྒན་གསོ་ཁང་།
༈བྱི་སུག་རབ་བརྟན་ལགས་ནི་༡༩༣༣ལོར་བྱི་སུག་ཚང་གི་ཁྱིམ་དུ་སྐྱེས་ཤིང་།བྱི་སུག་ཚང་ནི་སྡེ་དགེའི་ཧོར་འདྲ་རེད།ཁོང་ལ་སྤུན་མཆེེད་བུ་བྱི་སུག་ཨ་པད་དང་།དགེ་ལེགས་རབ་རྒྱས་(དཔལ་སྤུངས་དབོན་རྒན་ཕྱག་མཛོད་)གཉིས་ཡོད་པ་དང་སྲིང་མོ་མང་པོ་ཡོད་འདུགརྒྱ་མི་བོད་ལ་སླེབས་དུས་ཁོང་གིས་སྡེ་དགེའི་བཙུན་མོ་འཇམ་དབྱངས་དཔལ་མོའི་གཡོག་པོ་བྱེད་ཀྱིན་ཡོད་པ་དང་།ཤོ་རྟ་ལྷོ་གསུམ་ལ་ཆུ་བཞི་སྒང་དྲུག་གི་དམག་དཔུང་གིས་རྒྱ་དམག་ལ་དགྲ་འཐབ་བྱས་དུས་སུ་ཁོང་ཡང་དེར་ཞུགས་ནས་འཐབ་འཛིང་བྱས།འོན་ཀྱང་སྟབས་མ་ལེགས་པ་ཞིག་ལ་རྒྱ་ནག་གིས་འཇུ་བཟུང་བྱས་ཏེ་ལོ་ངོ་མང་པོ་ཞིག་གི་རིང་བཙོན་དུ་ཚུད།བཙོན་གྲོལ་ཐོབ་རྗེས་སུའང་ཕྱི་བཙོན་གྱི་ཐོག་ནས་དམ་དྲག་ཆེན་པོ་ཡོད་པས་མ་ཚད།ཧུར་བཙོན་པ་མང་པོས་ལོ་ངོ་དུ་མའི་རིང་འཐབ་རྩོད་བརྒྱབ་ནས་སྡུག་གྱོང་མནར་གཅོད་མང་པོ་མྱོང་དགོས་བྱུང་།དེ་ནས་ཕྱི་ལོ་ཆིག་སྟོང་དགུ་བརྒྱ་དགུ་བཅུ་གོ་གྲངས་ཙམ་ན་རྒྱ་གར་དུ་བྲོས་བྱོལ་སླེབས་ནས་སྦི་རི་དང་འབྲས་ལྗོངས་ཕྱོགས་སུ་ལས་ཀ་ཙག་ཙིག་བྱས་ཤིང་།རྗེས་སུ་བལ་ཡུལ་དུ་འབྱོར་ནས་བཟོ་གྲྭ་ཞིག་གི་སྒོ་སྲུང་ལོ་གསུམ་རིང་བྱས།དེ་ནས་༢༠༠༤ལོ་ཙམ་ན་བལ་ཡུལ་བྷོ་དྷ་མཆོད་རྟེན་འགྲམ་གྱི་བོད་གཞུང་རྒན་གསོ་ཁང་དུ་ཚུད་ནས་ད་ལྟ་དགེ་སྦྱོར་བྱེད་བཞིན་འཚོ་ཡོད།
༼འདིའི་འོག་ཏུ་བྱི་སུག་རབ་བརྟན་ལགས་ཀྱི་མི་ཚེའི་ལོ་རྒྱུས་མཁོ་སྒྲུབ་ཆེད་ཁོ་བོ་དང་དབོན་སྟོད་འཇམ་དབྱངས་ཕུན་ཚོགས་གཉིས་༢༠༡༢་༡༢་༡༩ཉིན་ཆེད་བཅར་ཞུས་སྐབས་ཁོང་གིས་གསུངས་པའི་ལོ་རྒྱུས་རྣམས་འགོད་རྒྱུ་ཡིན།༽
༡༽སྡེ་དགེ་ཤར་བརྒྱུད་ནས་ཐོག་མའི་ངོ་རྒོལ།
ཕྱི་ལོ་༡༩༥༥་དང་ང་དྲུག་ལོ་གཡས་གཡོན་དུ་སྡེ་དགེ་ལ་དམངས་གཙོ་བཅོས་བསྒྱུར་བྱས་བྱུང་།མི་མང་པོ་ཞིག་འཇུ་བཟུང་བྱས་སོང་།སྐབས་དེར་སྡེ་དགེ་ཤར་ཕྱོགས་ནས།སྨན་ཤོད་ཨ་སྐྲུན་ཕུན་ཚོགས་དང་།ཨ་ཁྲི་བུ་གཉིས་སྔོན་མ་བྱས་ཏེ་འགོ་ཁྲིད་ནས་ངོ་ལོག་བྱས་པ་རེད།དེའི་སྐབས་ང་རང་སྡེ་དགེ་རྒྱལ་མོ་འཇམ་དབྱངས་དཔལ་མོའི་གཡོག་པོ་བྱས་ཏེ་དར་རྩེ་མདོར་ཡོད།སྐབས་དེར་རྒྱ་མི་ལ་ངོ་རྒོལ་ཡག་པོ་ཐུབ་སྟེ་དམངས་གཙོ་བཅོས་བསྒྱུར་བྱེད་མ་ཐུབ་པ་རེད།འོན་ཀྱང་རྒྱ་དམག་གིས་མགོ་སྐོར་བཏང་སྟེ་དཔལ་ཡུལ་ཕྱོགས་ནས་ཡར་རྒྱ་དམག་ཕོན་ཆེར་ཁྲིད་དེ་ཨ་སྐྲུན་ཕུན་ཚོགས་དང་།བློ་གྲོས།གྲྭ་པ་ཆོས་རྡོ་བཅས་ཁོང་བུ་སྤུན་གསུམ་གྱིས་གཙོས་སྡེ་དགེ་མང་པོ་བསད་སོང་པ་རེད།ཁོང་ཚོའི་སྤུན་མཆེད་རྫོང་སར་གྲྭ་པ་བསོད་ནམས་ཐར་ཏེ་ཁོང་གིས་སྤུན་མཆེད་འདས་པོ་ཚོའི་རྗེས་མཆོད་བྱས་པ་རེད།འོན་ཀྱང་རྗེས་སུ་ཁོང་ཡང་རྒྱ་དམག་གིས་བསད་པ་རེད།ཕུན་ཚོགས་འདས་ཤུལ་དང་ཁོང་གི་བུ་དང་བུ་མོ་ཞིག་བཅས་མ་རྒན་ཞིག་གི་མཉམ་དུ་ལྷག་སོང་པ་རེད།
༢༽སྡེ་དགེ་ནུབ་བརྒྱུད་ནས་ངོ་རྒོལ།
དེའི་རྗེས་སྡེ་དགེ་ནུབ་བརྒྱུད་འཇོ་མདའི་ཕྱོགས་ནས་ངོ་རྒོལ་བྱས་པ་རེད།
ང་དང་རྒྱལ་མོ་གཉིས་རྒྱ་མིས་ཡར་མར་ཁྲིད་བྱེད་འདུག་གིན་ཡོད་རེད།རྒྱལ་སྲས་ཨོ་དགའམ་ཨོ་རྒྱན་སྐྱབས་བོད་མི་ངོ་ལོག་པའི་ལྷན་དུ་ཕེབས་ཟིན་པ་རེད།ལྷ་ས་ནས་ང་ཕོད་དང་ཀརྨ་པ་གཉིས་ཆབ་མདོར་ཕེབས་སོང་།དེར་ཉིན་བརྒྱད་དགུ་ཙམ་ཚོགས་འདུ་འཚོགས་པ་རེད།དེ་ནས་ཆབ་མདོ་ཕྱོགས་སུ་ལོ་གསུམ་རིང་དམངས་གཙོ་བཅོས་བསྒྱུར་མི་བྱེད་རྒྱུའི་ཐག་གཅོད་བྱས་པ་རེད།དེ་འདྲ་བྱེད་དུས་མི་ཆེ་བ་རྣམས་ངོ་ལོག་བྱས་ཏེ་ཡར་མར་བྲོས་ཚར་རེད་དེ།ད་དམངས་གཙོ་བཅོས་བསྒྱུར་བྱེད་ཀྱི་མ་རེད་ཚུར་འཛོམས་ཤོག་ལབ་ནས་ངོ་ལོག་པ་རྣམས་ཚུར་འཇོ་མདའ་ལ་འཛོམས་བཅུག་པ་རེད།སྐབས་དེར་ངན་ཁྲད་བློ་དགའ་དང་གྱང་ཁང་པད་འཕྲིན་གཉིས་ངོ་ལོག་པའི་འཐུས་མི་ཡིན་བྱས་ནས་བཅར་སོང་།ཡིན་ནའང་རྗེས་སུ་རྒྱ་མི་ཡིས་དེ་གཉིས་ཀྱིས་ཡོང་གི་མི་འདུག་ཚང་མ་འཛོམས་དགོས་ཀྱི་འདུག་ལབ་པ་རེད།རྗེས་སུ་འཆི་མེད་མགོན་པོ་བཅར་མ་སོང་མ་གཏོགས་གཞན་དག་ཚང་མ་བཅར་བཞག་སོང་།དེ་འདྲ་བྱས་ནས་ལོ་གསུམ་ཕྱིན་སོང་།དེ་ནས་རྒྱལ་མོས་ཚེ་དབང་བསོད་ནམས་ཟེར་བའི་གཡོག་པོ་ཞིག་ཡོད་པ་དེ་ཁྲིད་ནས་དར་མདོར་ཕྱིན་སོང་།སྐབས་དེར་ང་དང་གཡོག་རྒན་ག་ལུག་གཉིས་ཁྲིད་མ་སོང་།ལོ་གཅིག་ཙམ་གྱི་རིང་རྒྱལ་མོ་ཅིའང་གོ་རྒྱུ་མི་འདུགསྲས་སྤོ་ལུ་ལ་བཞུགས་ཡོད་རེད།ཁོང་གིས་ང་གཉིས་མར་ཤོག་གསུངས་ནས་སོང་པ་ཡིན།ཟླ་བ་གཅིག་ཙམ་རིང་དམག་འཁྲུག་ལངས་སོང་ལ།ང་ཚོ་ས་ངན་ཕྱོགས་སུ་བྲོས་པ་ཡིན།
༣༽བྲག་གཡབ་གསེར་རྡིས་ཁ་ནས་རྒྱ་དམག་དང་ཐུག་པ།
ས་ངན་དང་བྲག་གཡབ་ཀྱི་ས་མཚམས་བྲག་གཡབ་གསེར་རྡིས་ཁ་ལ་འབྱོར་དུས་དགྲ་བརྒྱབ་བྱུང་བས།འོག་མ་རི་རྣམ་ལ་མེ་མདའ་བརྒྱབ་ནས་ཁོང་གི་ལག་པ་གཉིས་བཅག་པ་དང་།གྲོད་ཁོག་ཟུར་ནས་ཕར་བཤག་སྟེ་རྨས་སྐྱོན་ཚབ་ཆེན་བཟོས་ཟིན་འདུགདེ་ནས་ང་ཚོ་ས་ཁུག་ལུང་སྟོང་ནང་ཡིབ་བསྡད་ཡིན།དེ་ནས་མར་ང་ཚོ་འགྲོ་དགོས་དོན་ནི།རྫ་ཡུལ་བརྒྱུད་ནས་རྒྱ་གར་ལ་འགྲོ་འཆར་བྱས་པ་རེད།དེའི་སྐབས་རྒྱལ་མཁར་མགོན་རྣམ་དང་།ངན་ཕྲད་བློ་དགའ།གྱང་ཁང་དགེ་སྟོབས་སོགས་ཡོད།
རི་རྣམ་རྨས་རྗེས།གླིང་ཁ་གཤིས་པའི་རྒྱ་དཔོན་འཆི་མེད་རྡོ་རྗེས་མི་རྟ་བརྒྱ་ཙམ་ཁྲིད་དེ་རི་རྣམ་བྲག་གཡབ་ལ་བསུ་མཁན་འབྱོར་སོང་ལ།རི་རྣམ་གྱི་འདུག་རོགས་དཔལ་གཡང་དང་དེ་མིན་མི་བཅུ་ཙམ་བཅས་སྐྱིད་སྡུག་གང་བྱུང་མཉམ་དུ་བྱེད་ཀྱི་ཡིན་ཟེར་ནས་བསུས་སོང་པ་རེད།གླིང་ཁ་རྒྱ་དཔོན་ནི་རི་རྣམ་གྱི་ཤག་པོ་མནའ་བཞག་དེ་འདྲ་རེད་འདུགརི་རྣམ་གྱིས་ང་ཚོ་ལ་ད་ཁྱེད་ཚོ་ཡར་ཡར་སོང་གསུང་བྱུང་པས།སྡེ་དགེའི་སྲས་དང་རྒྱལ་མཁར་མགོན་བཅས་ང་ཚོ་མི་ལྔ་བཅུ་དྲུག་ཅུ་ཙམ་ཡོད་པ་དེ་བྲག་གཡབ།གོ་འཇོ།ཕྱིར་འབྲོག་ནང་ནས་བྱས་ཏེ་མཚན་རྐྱང་རྐྱང་ལ་སོང་པ་ཡིན་ལ་ལྷོ་རྫོང་དུ་འབྱོར་སོང་།དཔལ་འབར་དུ་འབྱོར་རྒྱུ་ལ་ཉིན་གཉིས་ཀྱི་མཚམས་སུ་སླེབས་པའི་དགོང་མོ་ཞིག་ལ།གནམ་གྲུ་ཞིག་ལྡིར་སྒྲ་ཤར་རེ་སླེབས་བྱུང་བས་རྒྱ་དམག་ཡིན་ནམ་དྲན་དེང་ཚོ་དོགས་པ་ཆེན་པོ་ལངས་སོང་།འོན་ཀྱང་སྔོན་མ་ནས་ས་ཆ་དེར་སླེབས་ཟིན་པའི་སྡེ་དགེ་བ་མཁར་མདོ་བཀའ་སྟོབས་དང་།འཇུ་ཆུང་པད་སྟོབས་སོགས་ང་ཚོ་སླེབས་ཡོང་གི་འདུག་ཟེར་གོ་ནས་ལེན་མཁན་སླེབས་བྱུང་ལ།ཁོང་ཚོས་གནམ་གྲུ་ནི་ཨ་རིའི་གོ་ལག་སྐྱེལ་མཁན་རེད་ཟེར་གྱི་འདུག
༤༽ཤོ་པ་མདོ་ལ་ས་སྲུང་དང་འཐབ་འཛིང་།
དེ་ནས་རྒྱལ་མཁར་མགོན་རྣམ་དང་སྡེ་དགེའི་རྒྱལ་སྲས་རྣམས་ཆུ་སྒང་དམག་སྒར་ལ་ཡར་ཕྱིན་ཏེ་ང་ཚོ་གཡོག་པོ་མི་བཞི་བཅུ་ལྔ་བཅུ་ཙམ་ཤོ་པ་མདོ་ལ་ས་སྲུང་མངགས་སོང་།སྐབས་འདིར་ཆུ་སྒང་དམག་སྒར་གྱི་སྡེ་དགེའི་དམག་སྤྱི་མཁར་མདོ་དཀར་སྟོབས་དང་།འཇུ་ཆུང་པད་སྟོབས་གཉིས་རེད།དཀར་སྟོབས་ནི་ཤོ་རྟ་ལྷོ་གསུམ་དང་སྤུ་མའི་ཕྱོགས་སུ་དགྲ་རྒོད་ཆེན་པོ་ཟེར་ནས་ཧ་ཅང་སྐད་གྲགས་ཡོད་རེད།ཁོང་གཉིས་ལྷོ་རྫོང་གི་རྫ་རྒན་ནས་རྒྱ་དམག་གིས་བཟུང་སྟེ་བཙོན་དུ་གྲོངས་པ་རེད།ང་ཚོས་ས་སྲུང་བྱེད་ས་དང་རྒྱ་དམག་ཡོད་ས་གཉིས་ཡར་མར་ཙམ་རེད།ང་ཚོ་ཤོ་བ་མདོ་དང་།རྒྱ་དམག་ནི་ལྷོ་རྫོང་ལ་ཡོད་རེད།དེ་ནས་དགོང་མོ་ཞིག་ལ་རྒྱ་དམག་བཤར་སོང་ཟེར་བའི་ཆ་ཞིག་འབྱོར་སོང་།རྒྱ་དམག་ང་ཚོའི་སྟེང་དུ་ཡོང་གི་ཡོད་པ་ཧ་གོ་གི་ཡོད་རེད།དེ་ནས་ང་ཚོ་རྒྱ་དམག་ལ་ཐུག་མཁན་མར་འགྲོ་དགོས་རེད་ལབ་ནས་མཚན་མོ་ཞིག་ལ་རྒྱ་དམག་ལ་གཏད་ནས་མར་སོང་ཡིན།དེ་དུས་གནམ་གཤིས་དགུན་ཁ་རེད།ང་ཚོ་གཏེར་དཀར་ལ་ཞེས་པ་དེའི་ལ་སྐེད་ཙམ་ལ་སླེབས་དུས་ཕར་ཙམ་ཞིག་ན་མེ་གཏོང་གིན་འདུག་པ་རིག་བྱུང་།ཚང་མས་མེ་ལ་གཏད་ནས་རྟ་རྒྱུག་བྱས་ཏེ་ཕྱིན་སོང་།ངས་ང་ཚོ་མེ་རྩར་མི་འགྲོ།རྒྱ་ཡིན་སྲིད་ལབ་སྟེ་ཁུག་ཅིག་ལ་རྟ་ལས་བབ་ནས་བསྡད་ཡིན་དེ།དེ་མ་ཐག་ཕར་ཕྱོགས་ནས་མེ་མདས་བཙག་བྱུང་།ཕར་ཚུར་ཅིའང་མཐོང་གི་མི་འདུག་སྟེ་མེ་མདའ་འཕངས་ནས་འཛིང་རེས་བྱས་ཡིན།དེ་ལྟར་འཛིང་གིན་འཛིང་གིན་ལ་པར་རྒྱབ་ལ་ཕྱིན་ཡིན་དེ།ལམ་ཁ་ཤེས་མཁན་སུའང་མི་འདུགཡིན་ནའང་དེ་ནས་མར་སོང་རྗེས་མཚམས་ཤིག་ལ་ལྷོ་རྫོང་གི་དམག་སྤྱི་བྲག་སྟེང་ཞེས་པ་ཁོང་ཚོ་དང་ཐུག་སོང་།དེ་འདྲ་བྱས་ནས་ང་ཚོ་འཛི་ཐོ་མར་རྒྱབ་ལ་སླེབས་སོང་།རྒྱ་དམག་ནི་འཛི་ཐོ་ལ་སྐོར་རྒྱུག་ཅིག་བྱས་ཏེ་ཕྱིར་ལོག་སོང་འདུག
༥༽དཔལ་འབར་དུ་ཉིན་མཚན་གསུམ་འཐབ་འཛིང་བྱས་པ།
དེ་ནས་ང་ཚོ་ས་སྲུང་སྡོད་སར་ཡར་སླེབས་དུས་ས་སྲུང་བརྗེ་མི་སླེབས་བྱུང་བས་ཕྱིར་དཔལ་འབར་ཆུ་སྒང་དམག་དུ་ལོག་སོང་ཡིན།སྐབས་དེར་ཆུ་སྒང་དམག་སྒར་ནས་ང་ཚོ་ལ་མདའ་བོག་བགོས་གནང་སོང་བས་ད་ནི་དགྲ་བོ་དང་ཐུག་ན་ཅི་སྐྲག་དྲན་ནས་ཧ་ཅང་དགའ་བོ་བྱུང་།དགུན་ཚེ་ང་ཚོ་དེར་བསྡད་ཡིན་ལ།ལོ་སར་རྗེས་ཙམ་དགྲ་རྒྱབ་བྱུང་བས་ཉིན་གསུམ་བཞིའི་རིང་འཛིང་རེས་བྱས་ཀྱང་།མང་སྣེ་ཉུང་གིས་མ་ཟིན་པ་དགོང་མོ་ཞིག་ལ་ང་ཚོའི་སྒར་གཏོར་ཤོར་སོང་བྱུང་བས་ཁག་ཅིག་གིས་ད་ནི་རྒྱ་ལ་མགོ་བཏགས་ན་དགའ་ས་རེད་ཟེར།ངས་ད་ཁྱེད་རང་ཚོས་མགོ་བཏགས་ན་ཐོགས།ང་ནི་ག་བར་ཤི་སོང་ན་དེ་རེད་མ་གཏོགས་རྒྱ་ལ་ནི་མགོ་མི་བཏགས་ཐག་ཆོད་ཡིན།ཤི་སོང་ན་ནི་ཤི་བ་རེད་ཅེས་ལབ་ཡིན།དེ་འདྲ་བྱས་ཏེ་ཟ་ཡ་འཐུང་ཡ་སོགས་ཅི་ཡང་ཁྱེར་རྒྱུ་མ་རག་པ་སྒར་གཏོར་ཤོར་སོང་།ང་ནི་པེ་ཝར་རྒྱ་རིལ་བུ་ཚེ་དབང་ཕུན་ཚོགས་དང་། པེ་ཝར་ར་རྣ་བུ།ཀརྨ་རྡོ་རྗེ་བཅས་ཁོང་གསུམ་དང་ཐུག་སོང་།ང་ཚོ་ནི་སྡེ་དགེ་བའི་གཡོག་པོ་འགའ་ཤས་རེད།དེ་ནས་མུན་རུབ་བྱུང་བས་ང་ཚོ་ལུང་པ་ཞིག་གི་མདའ་ནས་མར་ཡོང་སྟེ་ལམ་མདོ་ཤིང་ནགས་ཤིག་གི་ནང་ལ་སླེབས་སོང་ཡིན།ཕྱི་ཉིན་མ་ནང་ཆེན་བ་ཚོ་ཁག་ཅིག་དང་ཐུག་སོང་པས།ཁོང་ཚོས་ཤ་དང་མར་རྩམ་པ་ཏོག་ཙམ་སྤྲད་བྱུང་།སྤྱིར་བཏང་ཁོང་ཚོ་ལའང་མང་པོ་མི་འདུགདེ་ནས་རྒྱུས་མེད་ཡིན་དུས་ཕྱོགས་གང་དུ་འགྲོ་དགོས་གཏན་ནས་ཤེས་ཀྱི་མི་འདུགའོན་ཀྱང་རྒྱལ་མོ་དངུལ་ཆུའི་ཕྱོགས་ལ་བཏུགས་ནས་དེ་ཆད་སོང་ན།བྱང་ལ་ཡར་སོང་ན་ཐར་ས་རེད་དྲན་ནས་རྫ་རྒན་ཟེར་ས་ཞིག་ལ་སླེབས་ན་དྲན་ཏེ་ཡོང་པ་ཡིན།ཉིན་ཞིག་ང་ཚོས་ཇ་བཀོལ་བཞིན་འདུག་ཡོད་ལ།ཡར་མར་སོ་པའང་བཞག་ཡོད།མཚམས་ཤིག་རྒྱ་སླེབས་བྱུང་ལབ་སོང་པས།ང་ཚོ་ཤིང་ནགས་ནང་ཕར་སོང་ཡིན་ཏེ་རྒྱ་དམག་ནི་སྟོད་ལ་སླེབས་ཚར་འདུག་ལ།ང་ཚོའི་སྟེང་དུ་མེ་མདས་བཙག་བྱུང་།རོགས་པ་རྣམས་མར་གཟུར་སོང་པས།ངས་མར་མ་འགྲོདེར་རྒྱ་དམག་ཡོད་རེད།འདི་ནས་ཕར་སྲིབ་ལ་འགྲོ་དགོས་རེད་ལབ་ནས།སྲིབ་རིའི་ཕྱོགས་ཀྱི་ནགས་གསེང་ལ་སོང་པ་ཡིན།དེར་གངས་འབབ་ནས་གངས་ཧ་ཅང་འཐུག་པོ་ཆགས་འདུགའོན་ཀྱང་ཁོང་ཚོ་ནི་ཕྱིན་ཟིན་སོང་།དེ་ནས་ང་ནི་སྔོན་མ་ང་ཚོས་ཇ་བཀོལ་སའི་འགྲམ་དུ་སླེབས་སོང་པས།ཇ་བཀོལ་སའི་ཧ་ཡངས་ཤིག་ཡོད་པ་དེ་ལག་བཟུང་བྱས་ནས་སྲིབ་ལ་སོང་པ་ཡིན།འོན་ཀྱང་ང་ཕར་ཙམ་སོང་པ་དང་རྒྱ་རྣམས་ཐབ་རྩར་སླེབས་ཚར་འདུགདེ་ནས་ང་ཤིང་ལྟག་ཕུང་ཞིག་གི་རྩ་ལ་ཡིབ་བསྡད་པ་ཡིན།རྒྱ་དམག་ནི་ཉིན་གང་དེར་བསྡད་སོང་ལ།ཡར་མར་ངོ་ལོག་པ་འདུག་གམ་བལྟས་ནས་རི་བཤེར་སོང་།འོན་ཀྱང་གངས་ཁྲོད་དུ་ངའི་རྐང་རྗེས་ཏག་ཏག་ཡོད་རེད་དེ།གཏན་ནས་རིག་གི་མི་འདུགདེ་ནས་མུན་རུབ་བྱུང་བས་རྒྱ་ཕྱིན་སོང་།ང་ཕྱིར་ཐབ་རྩར་ཡོང་མོད་ཟ་ཡ་སོགས་ཅིའང་བཞག་མི་འདུགསྔོན་མ་ཤ་འདྲ་ཏོག་ཙམ་ཡོད།དེ་ནས་འདིར་རོགས་པ་རྣམས་འཇུ་བཟུང་ཐེབས་མེད་ན་འདིར་ཚུར་ཡོང་གི་རེད་བསམས་ནས་ཐབ་རྩ་དེར་ཉལ་བསྡད་ཡིན།མཚམས་ཤིག་རྐང་པ་ནས་བཟུང་སྟེ་འཐེན་སོང་པས།ད་རྒྱ་སླེབས་འདུག་དྲན་ནས་བལྟས་ནས།རོགས་པ་གསུམ་རེད་འདུགཁོང་ཚོས་ག་ཚོད་རྨས་སོང་ཟེར་བས།ང་རྨས་མ་བྱུང་ལབ།དེ་ནས་སྔོན་མ་ང་ཚོས་གཡག་ཅིག་ཕར་ཙམ་དེར་བསད་ཡོད་པས་དེར་བལྟས་པས་ཤ་ཏག་ཏག་བཞག་འདུགདེ་ཟོས་ནས་བསྡད་པ་ཡིན།ཕྱི་ཉིན་མ་ང་ཚོ་ཡར་ཙམ་སོང་པས་ཡང་རྒྱ་སླེབས་བྱུང་བས།རྒྱ་དམག་གིས་ཉིན་གང་རི་བཤེར་སོང་།ང་ཚོ་ནི་ཉིན་གང་ཁུག་ཅིག་ལ་བསྡད་བསྡད་ཡིན།རྒྱ་དམག་དགོང་མོ་མར་ལོག་སོང་།དེ་འདྲ་བྱས་ཏེ་ཉི་མ་གསུམ་ལ་ང་ཚོ་དེར་ལུས་སོང་།ཉིན་གསུམ་པའི་ཕྱི་ཉིན་མ་སོག་མོ་ཚང་གི་བུ་གསུམ།འཇུ་ཆུང་ཚང་གི་བུ་གཅིག་བཅས་རྒྱ་དམག་གིས་ཁྲིད་འགྲོ་བ་རིག་སོང་།སྐབས་དེར་རྒྱ་དམག་ལྔ་བརྒྱ་དྲུག་བརྒྱ་ཙམ་འདུག
༦༽ཤ་གཅིག་པུས་ཟླ་བ་གསུམ་གྱི་དུས་ཚོད་བཅད་ནས་དགྲ་བོའི་བཞོན་རྟ་འཕྲོག་པ།
དེ་ནས་དགུན་ཁ་ནས་དབྱར་ཟླ་ལྔ་པའི་བར་ང་ཚོ་བཞི་ས་དེར་བསྡད་ཅིང་ཟླ་བ་གསུམ་རིང་ཤ་གཅིག་པུ་ཟོས་པ་ཡིན།དེ་ནས་ཉིན་ཞིག་པེ་ཝར་ར་རྣ་བུ་ངེད་གཉིས་སོ་པ་སོང་པས་རྒྱ་དམག་གིས་ཟོག་དང་བོད་མི་མང་པོ་ཞིག་དེད་ནས་སླེབས་བྱུང་།ཁོང་ཚོས་འདེད་རྒྱུ་ནི་བོད་མི་ངོ་ལོག་པ་ཚོའི་ཤུལ་ལུས་ནང་མི་རྒན་རྒོན་ཚོ་དང་བྱིས་པ་སྒོ་ཟོག་བཅས་རེད་འདུགས་ཁུག་ཅིག་ལ་སླེབས་དུས་ཁོང་ཚོས་ཇ་སྐོལ་སོང་ལ།རྟ་ཟོག་རྣམས་རི་ལ་མངག་བྱུང་བས།ངས་རྟ་ཞིག་རག་ན་ཏོག་ཙམ་འགྲོ་ཐུབ་ས་རེད་དྲན་ཏེ་རོགས་པ་ལ་ལབ་ཡིན།རོགས་པས་ཀྱང་དེ་འདྲ་རང་དྲན་འདུག་པས་ངེད་གཉིས་ཀྱིས་དང་པོ་ནས་རྟ་དྲག་བ་གཉིས་ལ་དམིགས་འབེན་བཟུང་སྟེ།ཁོང་ཚོའི་ཟུར་ནས་རྟ་གཉིས་བཞོན་ཏེ་སོང་ཡིན།ག་རེ་ཡིན་ནམ་ཧ་མི་གོཁོང་ཚོས་རྒྱབ་ནས་ཚུར་མེ་མདའ་རྒྱབ་མ་བྱུང་ལ།ར་མདའ་ཡང་སླེབས་མ་སོང་།དེ་ནས་ཡར་ཙམ་སོང་ནས་མར་བལྟས་པས་རྒྱ་དམག་ནི་ཇ་འཐུང་ནས་མར་ཕྱིན་སོང་།དེའི་དགོང་མོ་ང་ཚོའི་རོགས་པ་གཉིས་ལ་ཐུག་སོང་།རོགས་པ་གཞན་གཉིས་ཀྱིས་ད་རྟ་ཁྲིད་ནས་རྒྱ་དེད་ཡོང་གི་རེད་ཟེར་གྱིན་འདུག་པས།ངས་དེ་འདྲ་ཡིན་ན་ང་གཉིས་འགྲོ་ཆོག་ལབ་ནས་ང་དང་བ་རྣ་བུ་གཉིས་མཚན་གང་སླེབས་ཡོང་ཡིན།མཚན་མོ་མ་གཏོགས་ཉིན་མོ་རྒྱ་དམག་གིས་རིག་འགྲོ་གི་ཡོད་དུས་འགྲོ་ས་ཡོད་མ་རེད།
༧༽རྒྱ་དང་ཐུག་ནས་འཐབ་འཛིང་བྱས་ཏེ་རྒྱལ་ཁ་བླངས་པ།
ཕྱི་ཉིན་མ་སྨུག་པ་ཆེན་པོ་འཁྲིགས་འདུག་པས་ཏོག་ཙམ་སོང་པ་ཡིན།ལུང་པ་དེའི་ཡར་སྣེ་ལ་ནང་ཆེན་གོ་ཆེ་སྒར་ཆེན་སྤྲུལ་སྐུ་དཔོན་གཡོག་རྣམས་བཞུགས་འདུགའོན་ཀྱང་རྒྱ་དམག་དེར་སླེབས་ཚར་སོང་།རྒྱ་དམག་གིས་ནང་ཆེན་བ་མཐོང་མ་སོང་ལ།ཁོང་རྣམ་པ་ཏག་ཏག་བྲོས་ཐར་སོང་།ང་ཚོ་དང་ཉིན་གང་འཛིང་རེས་བྱས་ཡིན།སྐབས་དེར་རྒྱ་དམག་ལྔ་བཅུ་དྲུག་བཅུ་ཙམ་འདུགཁོང་ཚོས་རྒྱ་དམག་གསུམ་བཞི་རེ་བྱས་ཏེ་མདུན་ལ་གཏོང་ཡོང་གི་འདུག་པས།ངེད་གཉིས་ལ་རྫ་གསེབ་ཅིག་ཏུ་འཐབ་ར་ཡག་པོ་རག་སོང་པས།རྒྱ་ག་ཚོད་སླེབས་ན་དེ་ཙམ་བསད་པ་ཡིན།དགོང་མོ་མུན་རུབ་ཁར་རྒྱ་མི་བཞི་ཙམ་མ་གཏོགས་ཚང་མ་གསོད་ཐུབ་སོང་།དེ་ནས་ངའི་མདའ་རྫོགས་ཚར་སོང་།རོགས་པ་ལ་ཁ་ཤས་ཙམ་ལས་མི་འདུགསྐབས་དེར་ངས་རོགས་པ་ལ་ངས་མེ་མདའ་བཅག་ནས་འོག་ལ་འཕེན་ཡོང་རྒྱས་ག་རེ་བྱས་སོང་ལྟོས་ཨ་ལབ་ཡིན།དེ་ནས་མེ་མདའ་རྡོ་ལ་བརྡབས་ནས་ཆག་རོ་རྣམས་འོག་ལ་འཕངས་ཡིན།དེ་གཡུག་ཡོང་དུས།རྒྱ་ཞིག་ཐོ་རེར་ལངས་ནས་རྒྱང་ཤེལ་ནང་བལྟས་བྱུང་།ངའི་རོགས་པས་ལྟོས་ཨ།ངས་ཆ་མགོ་ལ་གཏད་ནས་རྒྱག་ཡོང་ཟེར།ཁོས་མདའ་ཞིག་འཕང་བྱུང་པས།རྒྱ་དེ་ཏག་ཏག་རིལ་སོང་།དེ་ནས་རྒྱ་གསུམ་ཙམ་འདུག་པས་ཕྱིར་བྲོས་ཕྱིན་སོང་།
༨༽རྒྱ་དང་ཐུག་ནས་དགྲ་ལག་ཤོར་བ།
ཕྱི་ཉིན་མ།ང་གཉིས་ཀྱིས་མེ་མདའ་གཡུག་ནས་ཕྱིན་པ་ཡིན།གང་ཡིན་ཟེར་དགྲ་དང་ཐུག་ན་མདའ་ནི་ཡོད་མ་རེད།དེ་ནས་ང་ཚོ་ཡོད་སའི་ལ་ཁ་དེར་རུ་ཁང་ཞིག་ཡོད་རེད།འོ་དེ་ལ་གཏད་ནས་ཕྱིན་པ་ཡིན།ནམ་རྒྱུན་ང་ཚོ་ཕར་འགྲོ་ཚུར་འགྲོ་བྱ་ས་རེད།ང་གཉིས་ལ་དོགས་པ་ཅིའང་སྐྱེ་མ་སོང་།ཡིན་ནའང་སྟབས་མ་ལེགས་པ་ཞིག་ལ་ང་གཉིས་རུ་ཁང་སྒོར་སླེབས་དུས་རྒྱ་དམག་དེའི་གང་བྱས་ནས་བསྡད་འདུགདེ་ནས་འགྲོ་ས་འཕག་ས་ཁོ་རང་རག་མ་སོང་།འོ་དེ་འདྲ་བྱས་ནས་བཟུང་སོང་།ཉིན་གསུམ་བཞི་ཙམ་གྱི་རིང་རྒྱ་དམག་གིས་རི་བཤེར་སོང་པས།ནང་ཆེན་བ་རྒན་པོ་ཞིག་དང་།ཁོང་གི་ཚ་བོ་ཞིག་ཀྱང་རག་བྱུང་བས་ཉིན་འགའ་དེར་ལྷག་སོང་།དེ་ནས་དམག་སྒར་ཆེན་པོ་ཞིག་གི་ནང་དུ་ཁྲིད་སོང་ལ།དེའི་ནང་ནས་སྐད་ཅ་མང་པོ་དྲིས་སོང་།འོན་ཀྱང་རྡུང་རྡེག་སྡུག་པོ་གཏོང་གི་མི་འདུགཁོང་ཚོས་ཕྱི་ཉིན་མ་སྨ་བོ་ཤང་དུ་དེད་ནས་མི་མང་ལ་འཐབ་རྩོད་རྒྱག་བཅུག་གི་ཡིན་ཟེར།ངས་ག་རེ་བྱ་རྒྱུ་ཡོད་ན་གྱིས།ད་ནི་ཁྱེད་རང་ཚོའི་ལག་ནང་ཡོད་རེད་ལབ་པ་ཡིན།སྨ་བོ་དེད་ནས་ཁང་པ་ནག་ཁུང་ཞིག་གི་ནང་དུ་སྨ་བོའི་མི་གསུམ་དང་བཅས་ང་ཚོ་མི་བདུན་བརྒྱད་ཙམ་བཙུད་སོང་།
༩༽བཙོན་འོག་གི་ལོ་ཟླ་དང་ཚེ་སྲོག་གི་གནས་སྟངས་སྐྱོ་བོ།
དེ་ནས་ཤོ་བ་མདོ་ཆུས་ལ་དེད་སོང་།དེར་བཙོན་པ་སྟོང་ཕྲག་ཙམ་འཚང་ཁ་ཤིག་ཤིག་བཅུག་འདུགཁང་པ་སྟེང་ཤོད་གཉིས་འདུག་ལ།འོག་མ་རྣམས་ལ་སློབ་སྦྱོང་བ་ཡིན་ཟེར།གོང་ནས་ཕར་ང་ཚོ་ཡིན།དེར་ཟ་ཡ་འབྲས་སྐམ་པོ་ཕོར་བ་གང་རེ་ལས་ཅིའང་སྤྲད་མ་སོང་།དེས་ཉིན་གང་རྒྱགས་དགོས་ཀྱི་འདུགའབྲས་ཏེ་སོ་སོས་བཙོས་ནས་ཟ་གི་ཡོད།
ཟླ་བ་གཅིག་ཙམ་རྗེས་ལྷོ་རྫོང་ལ་དེད་སོང་།དེ་ནས་སོ་སོའི་ལོ་རྒྱུས་རྣམས་རྟག་པ་བཤད་བཅུག་གི་འདུགའདི་ལའང་བཙོན་པས་གང་ཚར་འདུགདགོང་མོ་ཉལ་བའི་སྐབས་སུའང་སྒང་གཏད་ནས་ཉལ་བ་ལས་ཤོང་གི་མི་འདུགའདི་ནས་མི་མང་རྩ་ནས་བསྡུས་པའི་ནས་མང་པོ་བསགས་འདུག་པས།དེ་ཚོ་བཙོན་པ་རྣམས་ལ་བརྔོ་བཅུག་པ་དང་།འཐག་བཅུག་གིན་འདུག་ལ།ཉིན་རེར་ཇ་རྩམ་དུས་གསུམ་ལ་སྤྲོད་ཀྱི་འདུགདེ་འདྲ་བྱས་ཏེ་ལྷོ་རྫོང་ལ་བཙུད་བྱུང་།སྟོན་ཁ་རེད་དུས་ལྷོ་རྫོང་དེ་འཛི་ཐོ་ལ་སྤོ་རྒྱུ་རེད་ཟེར།དེ་ནས་འཛི་ཐོ་དགོན་དུ་བཙུད་བྱུང་ལ།རྗེས་སུ་ལས་ཀ་རང་བྱེད་བཅུག་བྱུང་པས་དུས་ཚོད་ཡག་པོ་ཆོད་འགྲོ་གི་འདུགདགོན་དེའི་ནང་གི་ལྷ་སྐུ་རྟེན་གསུམ་ཚང་མ་གཏོར་འདུགསྐུ་འདྲ་ཆེན་པོ་དེ་ཚོ་ཕྱི་ཁོག་ལུས་འདུག་མོད་གཟུངས་གཞུག་བྲུ་ཚར་འདུག་ལ།དེར་ལོ་གཅིག་ལྷག་ལུས་སོང་།དེ་ནས་ང་ཚོ་མང་པོ་ཞིག་ཆབ་མདོ་དམག་མིས་དེད་སོང་།མགོ་བཏགས་ན་ཕ་ཡུལ་ལ་གཏོང་གི་འདུག་པས།མི་གཞན་དག་གིས་ཟེར་ན་ང་ཚོའི་རོགས་པ་སྔོན་མ་གཉིས་ཀྱིས་མགོ་བཏགས་ནས་ལག་ཁྱེར་ཞུས་ཏེ་ཕ་ཡུལ་ལ་འགྲོ་གི་ཡིན་ལབ་སོང་ཟེར།རྗེས་སུ་ཕ་ཡུལ་ལའང་སླེབས་མི་འདུག་ལ་འདི་བར་(རྒྱ་གར་དང་བལ་ཡུལ)ཡང་སླེབས་མི་འདུགཕལ་ཆེར་ཕར་མཚོ་སྔོན་ཕྱོགས་སུ་སོང་ཡོད་ཚོད་འདུགཆབ་མདོའི་བཙོན་ཁང་དུ་ཡུན་རིང་བཞག་མ་སོང་།དེ་ནས་དར་རྩེ་མདོ་ལ་དེད་ནས་ལོ་གཉིས་ཙམ་རིང་བཙོན་ལ་བཅུག་སོང་།དར་མདོ་ནས་དབུགས་ཆད་མ་སོང་མ་གཏོགས་ཁ་ལག་ནི་འབྲས་རྐྱང་རྐྱང་ཡིན་དུས་གཟུགས་པོ་ཧ་ཅང་སྐྱོ་བོ་ཆགས་སོང་།ཕལ་ཆེར་ད་ནི་ཤི་འགྲོ་ས་རེད་དྲན་སོང་།
༡༠༽སྡེ་དགེར་བཙོན་འཇུག་དང་མི་མང་གི་འཐབ་རྩོད།
༈སྡེ་དགེ་ལ་ཡར་དེད་རྗེས་བཙོན་ཁང་དུ་རྩམ་པ་རག་སོང་བས་གཟུགས་པོ་ཡར་སོས་བྱུང་ལ།ཟླ་བ་གཉིས་གསུམ་ཙམ་གྱི་རྗེས་ཨའུ་ཙང་དྲག་བསྐྱེད་བྱུང་བས་མོ་ཤོད་ནང་དུ་ཚལ་ཞིང་འདེབས་ལས་བྱེད་མཁན་མངག་བྱུང་།དེ་ནས་ལོ་གཉིས་ཙམ་བཙུད་རྗེས་ཉིན་ཞིག་བཙོན་དཔོན་གྱིས་ང་ལ་ཁྱེད་རང་ནང་ལ་མངག་གི་རེད།ལོ་གསུམ་ལ་དོ་དམ་ཡིན་ཟེར་ནས་བཏང་སོང་།ལོ་གསུམ་ནི་ཕྱི་བཙོན་ཟེར་བ་དེ་རེད་འདུགའོན་ཀྱང་ལོ་གསུམ་གྱི་རྗེས་སུའང་དོ་དམ་དེ་ག་རང་རེད།དེས་མ་ཚད་ཕ་ཡུལ་སླེབས་རྗེས་ཉིན་བཅུ་རེའི་རྗེས་སུ་མི་མང་གིས་མང་ཚོགས་དཀྱིལ་དུ་པུས་མོ་བཙུགས་བཅུག་ནས་ལོ་དང་ལོ་འཐུད་དེ་འཐབ་རྩོད་གཏོང་བྱུང་པས།ངས་བཙོན་ཁང་དུ་ཡོད་ན་ཅི་མ་རུང་བསམ་པ་དེ་འདྲ་ཧ་ཅང་སྡུག་པོ་གཏོང་བྱུང་།ལས་ཀ་ལས་ན་ནི་གཅིག་འགྲིག་གི་མི་འདུགམ་ལས་ན་ནི་གཅིག་འགྲིག་གི་མི་འདུགངོ་མ་སྡུག་པོ་ཞིག་གཏོང་བྱུང་།སྡུག་པོ་ཞིག་གཏོང་བྱུང་།(སྐབས་འདིར་ཁོང་གིས་སྐྱོ་ཉམས་ཆེན་པོ་སྟོན་བྱུང་།) གོ་སྐབས་བཟང་པོ་ཞིག་ལ་ཏིང་ཐོ་ཕིང་གི་དུས་ཙམ་ཡིན་ཚོད་འདྲ།གང་མཚམས་ཤིག་ལ་ནག་ཅན་པའི་ཞྭ་མོ་ཕུད་ནས་མི་གཞན་ལྟར་འགྲོ་ཆོག་པ་བྱུང་།
༡༡༽རང་ཡུལ་རང་དབང་མེད་དུས་ས་མཐར་འཁྱམ་རྒྱུར་གདམ་པ།
ངའི་སྤུན་མཆེད་བྱི་སུག་ཨ་པད་རྒྱ་གར་ལ་སྔོན་མ་ནས་སླེབས་སོང་པ་རེད།ཁོང་ཕ་ཡུལ་དུ་ཐེངས་དང་པོ་སླེབས་དུས་ཁོ་རང་གི་སྐྱེས་དམན་དང་།ཐེངས་གཉིས་པའི་སྐབས་བུ།ཐེངས་གསུམ་པའི་སྐབས་ང་བཅས་ཁྲིད་སོང་།འོན་ཀྱང་ང་ནི་ལམ་འཛིན་འདྲ་ཅིའང་མེད་པ་བྲོས་བྱོལ་ཡོང་དགོས་ཀྱི་ཡོད་པ་རེད།ང་དང་ངའི་རོགས་པ་ཨ་མདོ་བ་ཕོ་གསར་གསུམ་དང་ནང་ཆེན་བ་གཅིག་བཅས་ཁྲིད་གླ་སྤྲད་ནས་ཡོང་བ་ཡིན།ང་ཚོ་ལྷ་ས་ནས་ཚུར་ཡོང་རྗེས་གངས་འབབ་ནས་ཉི་མ་བཅོ་བརྒྱད་ཙམ་འགོར་སོང་ལ།གོམ་པ་མང་པོ་རྒྱག་དགོས་བྱུང་བས།ཡང་སྐྱར་ཤི་ལ་ཁད་ཅིག་མྱོང་སོང་།ང་ཚོ་འགྲམ་གྱི་ས་མཚམས་བརྒྱུད་ལ་ཕྱིན་ནས་ཚུར་ཡོང་པ་ཡིན།བལ་ཡུལ་སླེབས་རྗེས་དང་པོ་སྤུན་མཆེད་ཀྱི་ནང་ལ་བསྡད་པ་ཡིན།དེ་ནས་རྫོང་གསར་བཤད་གྲའི་ནང་གྲུམ་གདན་འཐགས་ཏེ་བསྡད་པ་ཡིན།དེ་རྗེས་ཕྱག་མཛོད་བཀྲ་ཤིས་རྣམ་རྒྱལ་གྱིས་སྒང་ཐོག་འགྲོ་གསུང་བྱུང་པས་དེར་སོང་ནས་ལོ་གསུམ་ཙམ་བསྡད་ཡིན།ཉིན་ཞིག་ཨ་པད་(ཁོང་གི་གཅེན་པོ་)གྲོངས་སོང་ཟེར་བའི་ཆ་ཞིག་འབྱོར་བྱུང་བས་བོད་ལ་ཕྱིར་འགྲོ་དགོས་མིན་ནམ་དྲན་དེ་བལ་ཡུལ་ལ་ཡོང་བ་ཡིན།འོན་ཀྱང་ཆབ་སྲིད་ཀྱི་འུར་ལངས་འདུག་པས་གཏོང་གི་མི་འདུགདེ་ནས་སྲི་ཐར་དང་རྫོགས་ཆེན་བ་ཀུན་བཟང་ཆོས་སྒྲོན་གཉིས་ཀྱིས་མཚམས་སྡོད་ཤོག་དང་ཁོང་གཉིས་ཀྱིས་རྒྱགས་སྤྲད་ཡོང་ཟེར།དེ་ནས་འབྲི་གུང་བླ་མ་གཡུ་སྒྲ་སྙིང་པོ་ཞུ་བ་དེས་འཕགས་པ་ཤིང་ཀུན་འགྲམ་ལ་ཁང་པ་ཞིག་གཡར་བྱུང་བས་ལོ་གཅིག་ཙམ་བསྡད་ཀྱང་།ཁོང་གཉིས་དང་གཡོག་མོ་བཅས་རྐུན་མས་བསད་ནས་ངས་ལོ་མཆོད་བྱས་ཏེ་ཁོང་ཚོའི་ཁང་པའི་ནང་ལོ་གཅིག་རིང་བསྡད།
དེ་ནས་སྒ་པ་བ་ཞིག་གིས་འཇོར་ལ་ཁེལ་བོད་མའི་གཞིས་ཆགས་སུ་བཟོ་གྲྭའི་སྒོ་སྲུང་བྱས་ནས་སྡོད་ཟེར་བས།དེར་སོང་ནས་ལོ་གསུམ་ཙམ་གྱི་རིང་ལས་ཀ་བྱས།ཉིན་ཞིག་རྒན་མོ་གསུམ་སྐོར་ལམ་ནང་ནས་ཐུག་སོང་།ཁོང་ཚོས་ད་ལྟའི་རྒན་གསོ་ཁང་འདི་ཡག་པོ་ཞིག་འདུགཁྱེད་རང་ཚུད་ཐབས་གྱིས་ཟེར།དེ་ནས་ང་རང་གིས་ཧ་ཅང་ཡག་པོ་འདུག་དྲན་ནས་འཚོལ་མཁན་ཡོང་བ་ཡིན།ཡག་པོ་འདུག་པས་ཚུད་ན་འདུག་དགོས་དྲན་སོང་།
༡༢༽ཚེ་འཇུག་གི་ལོ་ཟླ་རྒན་གསོ་ཁང་ནས་ཚེས་པ།
དེ་ནས་སྡེ་དགེ་སྐྱིད་སྡུག་གི་བྲག་ཡག་བུ་དང་ཀླུ་ཐོག་འཆི་མེད་གཉིས་ལ་ལབ་ནས་དོན་གཅོད་ལ་སོང་པ་རེད།ཉིན་ཞིག་དོན་གཅོད་ལས་བྱེད་བལྟ་མཁན་སླེབས་བྱུང་བས་ཁྱེད་རང་རྒན་གསོ་ཁང་དུ་ཚུད་ལེ་རེད་ཟེར།དེ་ནས་རྒན་གསོ་ཁང་དུ་སླེབས་ནས་ད་བར་ལོ་དགུ་ཙམ་ཕྱིན་སོང་།
༼མཆན།བཅར་འདྲི་ཞུ་ཡུལ་ཁོང་གིས་དུས་ཚོད་དང་གྲགས་ཀ་རྣམས་གཏན་ནས་ངེས་ཀྱིན་མི་འདུག་པས།འདིའི་ནང་བསྡོམས་རྒྱག་མ་ཐུབ་པའི་རིགས་མང་པོ་བྱུང་སོང་།༽ ༢༠༡༢ ཕྱི་ཟླ་དང་པོའི་ནང་མཁོ་སྒྲུབ་པ་འཆམ་ར་དྲི་མེད་རྒྱལ་མཚན།
བསམ་ཚུལ་འབྲི།
བྲག་ཡག་མགོན་རྣམ་གྱི་དམག་འཐབ་ལོ་རྒྱུས།