ཧ་ཅང་ཡིད་དགའ་ཞིང་གཟི་བརྗིད་ཆེ་བའི་གར་སྟེགས་ཤིག
༢༠༡༦་༣་༢༤ ད་ཐེངས་ཀྱི་གར་སྟེགས་འདི་ནི་ང་ལ་མཚོན་ན། ཧ་ཅང་ཡིད་དགའ་ཞིང་གཟི་བརྗིད་ཆེ་བའི་གར་སྟེགས་ཤིག་རེད། ༧ དཔལ་རྒྱལ་བའི་དབང་པོ་ཀརྨ་པ་ ༡༧ ཨོ་རྒྱན་ཕྲིན་ལས་རྡོ་རྗེས་དབུས་པའི་སྐྱབས་ཡུལ་དགེ་འདུན་པའི་སྡེ་དང་། རང་རིགས་གཙོས་པའི་རྒྱལ་ཁབ་ལྔ་བཅུ་ལྷག་གི་དད་ལྡན་གྲངས་ཆིག་ཁྲི་ལས་བརྒལ་བའི་ མདུན་ཐད། ཅུང་ཙམ་མཐོ་རུ་སྟེགས་ཤིང་ཁྲ་ཚོམ་རྣམ་པར་བཀྲ་བའི་གློག་སྒྲོན་གྱི་མཛེས་འོད་ འདྲ་མིན་འཕྲོས་པའི་ཁྲོད་དུ། ངས་རང་གི་བྱམས་ལྡན་ཕ་མས་གནང་བའི་རང་བྱུང་ལྷན་སྐྱེས་ཀྱི་སྐད་ངག་མི་དམན་པ་ ཞིག་ཡོད་པ་དེ། འགྲོ་མགོན་ཆོས་ཀྱི་རྒྱལ་བོ་༧དཔལ་རྒྱལ་ དབང་ཀརྨ་པ ༡༦ རང་བྱུང་རིག་པའི་རྡོ་རྗེའི་ཞལ་གསུང་དྲོན་མོ། མ་འོངས་མངོན་གཟིགས་ཀྱི་ལུང་བསྟན་གླུ་ཨ་ལ་ཐ་ལ་ཞེས་པ་གླིང་སྒྲུང་སྒྱུ་རྩལ་ གྱི་ཚུལ་དུ་མཛད་པ་དེ་ཉིད། རྗེ་གང་ཉིད་ཀྱིས་མཛད་པའི་གདངས་དབྱངས་དང་། ངའི་དྲིན་ལྡན་ཕ་ལོའི་སྒྲུང་ངག་ལས་འདན་མའི་ཐ་ལ་དྲུག་འགྱུར་ཟེར་བ་དེ་གཉིས་ རིམ་བསྒྲིགས་ཀྱིས་གྱེར་ལེན་བྱས་པ་ཡིན། ནམ་རྒྱུན་གར་སྟེགས་གཞན་ནས་གླུ་གཞས་དང་གདངས་དབྱངས་གྱེར་སྐབས་ཀྱི་ཚོར་བ་དེ་ དང་གཏན་ནས་མི་འདྲ་བ་ཞིག་ལ། ད་ཐེངས་རང་གིས་ཚེ་འདིར་ཚོགས་བསག་བསོད་ནམས་ཀྱི་རྒྱུ་རུ་འགྱུར་བའི་ངག་གི་ མཆོད་སྤྲིན་ཞིག་འབུལ་གྱི་ཡོད་སྙམ་པ་དང་། འདི་ནི་ང་ལ་མཚོན་ན་སྐལ་བཟང་དགེ་ལེགས་ཀྱི་ཉིན་མོ་ཞིག་ཀྱང་རེད་སྙམ། སྤྱིར་ངུར་སྨྲིག་གི་ན་བཟའ་ལུས་ལ་འཆང་ནས་གར་སྟེགས་སུ་གླུ་གཞས་ལེན་པ་ནི་དེ་ ཙམ་མིག་ལ་མཛེས་པོ་དང་རང་ལ་བདེ་སྣང་ཞིག་མེད་པ་རྒྱུན་ལྡན་རེད། འོན་ཀྱང་དེ་ནུབ་ཀྱི་མཛད་སྒོ་དེ་ནི་ཆོས་དང་འཇིག་རྟེན་གང་དང་ཡང་མི་འགལ་ཞིང་། སྲོལ་རྒྱུན་དང་འབྲེལ་ཞིང་དེང་རབས་དང་མཐུན་པའི་དུས་རབས་ཉེར་གཅིག་པའི་ནང་བའི་མཛད་འཕྲིན་སྐྱོང་སྟངས་ཤིག་རེད། དེའི་ཕྱིར་རང་གིས་ཀྱང་དགའ་དད་སྤྲོ་གསུམ་གྱི་ཀློང་ནས་ཡོངས་སུ་མཇུག་གྲུབ་སོང་།
གངས་རིའི་ལྷ་སྲས་ནས།
བསམ་ཚུལ་འབྲི།
དུར་སའི་རྡོ་རིང་འདྲ། རྩོམ་པ་པོ། ང་ཆེ་པོ།