སློབ་ཡོན་བྱ་དགའ་ཞིག་ལ་སྙན་ཞུ་འབུལ་ཕྱོགས་སྐོར།
ཀུན་ཕན་ཐེབས་རྩ་ཚོགས་པའི་སློབ་ཡོན་བྱ་དགའ་ལ་སྙན་ཞུ་ཇི་ལྟར་འབུལ་དགོས དཀོན་མཆོག་སྐྱབས་ཀྱིས་འོས་སྦྱོར་བྱས།
ཀུན་ཕན་ཐེབས་རྩ་ཚོགས་པས་མ་འོངས་བོད་མིའི་སྤྱི་ཚོགས་ཡར་རྒྱས་དང་། ཁྱད་པར་དུ་ཀྲུང་གོ་ནང་ཁུལ་གྱི་བོད་ཀྱི་སློབ་གསོའི་མ་ལག་འཐུས་སྒོ་ཇེ་ཚང་དུ་གཏོང་བ་དང་། གསོན་ཤུགས་ལྡན་ཞིང་ཐུན་མོང་མ་ཡིན་པའི་སྲོལ་རྒྱུན་རིག་གནས་རྒྱུན་འཛིན་བཅས་ལ་ཞབས་འདེགས་སྒྲུབ་པའི་ནུས་པ་ཡོད་པའི་མི་སྒེར་རྣམས་ལ་རོགས་སྐྱོར་བྱེད་བཞིན་ཡོད། སྙན་ཞུ་འབུལ་མཁན་རྣམས་ངེས་པར་དུ་བོད་སྐད་ལ་ཡིག་ངག་(ཡུལ་སྐད་ལ་ཁྱད་མེད)གཉིས་ཐོག་ནས་བྱང་ཆུབ་པ་དགོས།
གོམ་པ་དང་པོ། ཁྱེད་ལ་འཚམས་པའི་སློབ་ཡོན་བྱ་དགའ་འདེམས་དགོས།
ཀུན་ཕན་ཐེབས་རྩ་ཚོགས་པས། ཀྲུང་གོའི་ནང་ཁུལ་གྱི་མཐོ་རིམ་སློབ་གླིང་ཁག་ཏུ། དངོས་གཞི་དང་དངོས་གཞིའི་རྗེས་ཀྱི་སློབ་སྦྱོང་བྱེད་བཞིན་པའི་སློབ་མ་རྣམས་ལ། སློབ་ཡོན་བྱ་དགའ་རྣམ་གྲངས་འགའ་རེ་སྤྲོད་ཀྱི་ཡོད།
1. དངོས་གཞིའི་སློབ་ཡོན་བྱ་དགའ།
1) བོད་ཡིག་མཐོ་འབྲིང་མཐར་ཕྱིན་སློབ་མའི་སློབ་ཡོན་བྱ་དགའ། (TMSMSGS) འདི་ནི་མཐོ་འབྲིང་མཐར་ཕྱིན་པའི་ལོ་དེ་ཉིད་ཀྱི་ནང་དུ་སློབ་ཆེན་ལ་རྒྱུགས་འཕྲོད་ཟིན་པའི་སློབ་མ་ལ་སྤྲོད་པའི་བྱ་དགའ་ཞིག་ཡིན། སྙན་ཞུ་འབུལ་མཁན་རྣམས་ངེས་པར་དུ། རྒྱའི་སྐད་ཡིག་མ་གཏོགས་པའི་སློབ་ཚན་གཞན་པ་ཚང་མ་བོད་སྐད་ཡིག་ཐོག་ནས་སློབ་ཁྲིད་བྱེད་པའི་མཐོ་འབྲིང་ཞིག་ནས་མཐར་ཕྱིན་པ་ཡིན་དགོས།
2) ཕུལ་བྱུང་སློབ་ཆེན་སློབ་མའི་སློབ་ཡོན་བྱ་དགའ། (IMSA) འདི་ནི་ཀྲུང་གོའི་ནང་གི་མཉམ་འབྲེལ་སློབ་ཆེན་ཁག་ཏུ་སློབ་ཞུགས་བྱས་པའི་སློབ་མ་ལ་སྤྲོད་པའི་བྱ་དགའ་ཞིག་ཡིན། དངོས་གཞིའི་སློབ་ཡོན་ཐད་རོགས་སྐྱོར་འཚོལ་འདོད་པའི་སློབ་མ་ཚོས་རང་ཉིད་ཀྱི་སློབ་སྦྱོང་སྡེ་ཚན་དང་འབྲེལ་བ་བྱས་ཏེ། སྡེ་ཚན་དེ་ཉིད་དུ་ཀུན་ཕན་ཐེབས་རྩ་ཚོགས་པའི་སློབ་ཡོན་བྱ་དགའི་ལས་གཞི་ཡོད་མེད་འདྲི་བརྩད་བྱ་དགོས།
2. དངོས་གཞིའི་རྗེས་ཀྱི་སློབ་ཡོན་བྱ་དགའ།
དངོས་གཞིའི་རྗེས་ཀྱི་སློབ་ཡོན་བྱ་དགའ་ནི། རབ་འབྱམས་ཞིབ་འཇུག་དང་འབུམ་རམས་ཞིབ་འཇུག་སློབ་གཉེར་བྱེད་པའི་སློབ་མ་རྣམས་ལ་སྤྲོད་པའི་བྱ་དགའ་ཞིག་ཡིན་ཞིང་། སློབ་ཡོན་ལོ་ངོ་གསུམ་བར་དུ་སྤྲོད་ཀྱི་ཡོད། ད་སྔ་ང་ཚོས་དངོས་གཞིའི་རྗེས་ཀྱི་སློབ་ཡོན་བྱ་དགའ་རྣམ་གྲངས་ལྔ་སྤྲོད་ཀྱི་ཡོད།
1) གཞི་རིམ་རྩིས་ཚན་དགེ་རྒན་གྱི་ཆེད་ལས་མི་སྣའི་སློབ་ཡོན་བྱ་དགའ། (PTSRST) འདི་ནི་དངོས་གཞིའི་རྗེས་ཀྱི་མཐོ་རིམ་ཡོན་གནས་སློབ་གཉེར་བྱེད་འདོད་པའི། གཞི་རིམ་སློབ་གྲྭ་ཆུང་འབྲིང་གི་རང་བྱུང་ཚན་རིག་དགེ་རྒན་ལ་སྤྲོད་པའི་བྱ་དགའ་ཞིག་ཡིན། སྙན་ཞུ་འབུལ་མཁན་རྣམས་ལ་མ་མཐའ་ཡང་ལོ་ངོ་གསུམ་གྱི་འབྲེལ་ཡོད་ལས་ཀའི་ཉམས་མྱོང་ཡོད་དགོས་པ་མ་ཟད། བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
2) ཁྲིམས་ལུགས་དང་བཟོ་ཚོང་དོ་དམ་ཐད་ཀྱི་བུད་མེད་ཆེད་ལས་མི་སྣའི་སློབ་ཡོན་བྱ་དགའ། (PTSWLB) འདི་ནི་ཁྲིམས་ལུགས་དང་བཟོ་ཚོང་དོ་དམ་ཐད། དངོས་གཞིའི་རྗེས་ཀྱི་ཡོན་གནས་སློབ་གཉེར་བྱེད་འདོད་པའི་བུད་མེད་ཆེད་ལས་མི་སྣར་སྤྲོད་པའི་བྱ་དགའ་ཞིག་ཡིན། སྙན་ཞུ་འབུལ་མཁན་རྣམས་ལ་མ་མཐའ་ཡང་ལོ་ངོ་གཉིས་ཀྱི་འབྲེལ་ཡོད་ལས་ཀའི་ཉམས་མྱོང་ཡོད་དགོས་པ་མ་ཟད། བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
3) སྤྱིར་བཏང་ཆེད་ལས་མི་སྣའི་སློབ་ཡོན་བྱ་དགའ། (PTSDS) འདི་ནི། “གཞི་རིམ་རྩིས་ཚན་དགེ་རྒན་གྱི་ཆེད་ལས་མི་སྣའི་སློབ་ཡོན་བྱ་དགའ།” ཞེས་པ་དང་། “ཁྲིམས་ལུགས་དང་བཟོ་ཚོང་དོ་དམ་ཐད་ཀྱི་བུད་མེད་ཆེད་ལས་མི་སྣའི་སློབ་ཡོན་བྱ་དགའ།” ཞེས་པ་གཉིས་ཀྱི་ནང་དུ་མ་ཚུད་པའི་ལས་རིགས་འདྲ་མིན་ཐོག་གི་ཆེད་ལས་མི་སྣ་རྣམས་ལ་མཐོ་རིམ་སློབ་གཉེར་བྱེད་པར་སྤྲོད་པའི་སློབ་ཡོན་བྱ་དགའ་ཞིག་ཡིན། མོས་པ་ཡོད་པའི་སྙན་ཞུ་འབུལ་མཁན་རྣམས་ལ་མ་མཐའ་ཡང་ལོ་ངོ་གསུམ་གྱི་འབྲེལ་ཡོད་ལས་ཀའི་ཉམས་མྱོང་ཡོད་དགོས་པ་མ་ཟད། བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
4) དངོས་གཞིའི་རྗེས་ཀྱི་བུད་མེད་རྩིས་ཚན་སློབ་མའི་སློབ་ཡོན་བྱ་དགའ། (PGSWS) འདི་ནི། ཉེ་སྔོན་དངོས་གཞིའི་སློབ་མཐར་ཕྱིན་ཞིང་། སྲོལ་རྒྱུན་བོད་སྨན་ཕུད་པའི་རང་བྱུང་ཚན་རིག་གི་ཐོག་ཏུ། རབ་འབྱམས་ཞིབ་འཇུག་དང་། ཡང་ན་འབུམ་རམས་ཞིབ་འཇུག་གི་སློབ་གཉེར་བྱེད་འདོད་པའི་བུད་མེད་སློབ་མ་རྣམས་ལ་སྤྲོད་པའི་སློབ་ཡོན་བྱ་དགའ་ཞིག་ཡིན། སྙན་ཞུ་འབུལ་མཁན་རྣམས་ཀྱི་བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་སློབ་ཆུང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
5) སྤྱིར་བཏང་དངོས་གཞིའི་རྗེས་ཀྱི་སློབ་ཡོན་བྱ་དགའ། (PGDS) འདི་ནི། ཉེ་སྔོན་དངོས་གཞིའི་སློབ་མཐར་ཕྱིན་པའི་སློབ་མའམ། ཡང་ན་ཡོན་གནས་དེ་དང་མཚུངས་ཤིང་། བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་དང་། “བུད་མེད་རྩིས་ཚན་སློབ་མ།” ཞེས་པའི་ཚན་པ་རུ་མ་ཚུད་པའི་སློབ་མ་རྣམས་ལ་སྤྲོད་པའི་བྱ་དགའ་ཞིག་ཡིན།
རྒྱལ་སྤྱིའི་སློབ་ཡོན་བྱ་དགའ།
ཀུན་ཕན་ཐེབས་རྩ་ཚོགས་པས། ཕྱི་རྒྱལ་གྱི་མཐོ་རིམ་སློབ་གླིང་ཁག་ཏུ་མཐོ་རིམ་སློབ་གཉེར་བྱེད་འདོད་པའི་སློབ་མ་དང་ཆེད་ལས་མི་སྣ་རྣམས་ལའང་མི་གྲངས་ཚད་ཡོད་ཀྱི་རྒྱལ་སྤྱིའི་སློབ་ཡོན་བྱ་དགའ་སྤྲོད་ཀྱི་ཡོད། སྙན་ཞུ་འབུལ་མཁན་གྱིས་ངེས་པར་དུ་དངོས་གཞིའི་སློབ་གཉེར་ཡོངས་སུ་གྲུབ་ཡོད་དགོས་པ་དང་། བོད་ཡིག་དང་དང་ཕྱི་རྒྱལ་སྐད་ཡིག་གི་ཆུ་ཚད་དེ་འབྲེལ་ཡོད་གཏན་འཁེལ་གྱི་ཚད་གཞི་དང་མཐུན་དགོས། ད་སྔ་ང་ཚོས་རྒྱལ་སྤྱིའི་སློབ་ཡོན་བྱ་དགའ་རྣམ་གྲངས་གསུམ་སྤྲོད་ཀྱི་ཡོད།
1) ལས་ཐོག་དགེ་རྒན་གྱི་རྒྱལ་སྤྱིའི་སློབ་ཡོན་བྱ་དགའ། (PTSISISEP) འདི་ནི། ཆ་རྐྱེན་ཚང་བའི་སྙན་ཞུ་འབུལ་མཁན་ལ་འབྲེལ་ཡོད་བསླབ་གཞིའི་ཤེས་བྱ་དང་། སློབ་ཁྲིད་ཐབས་ལམ། སློབ་གསོའི་དོ་དམ་བཅས་ཀྱི་ནུས་རྩལ་མཐོར་འདེགས་གཏོང་བར་དམིགས་པའི། སློབ་གསོའི་ལས་རིགས་པར་སྤྲོད་པའི་སློབ་ཡོན་བྱ་དགའ་ཞིག་ཡིན། སྙན་ཞུ་འབུལ་མཁན་རྣམས་ལ་མ་མཐའ་ཡང་ལོ་ངོ་གསུམ་གྱི་འབྲེལ་ཡོད་ལས་ཀའི་ཉམས་མྱོང་ཡོད་དགོས་པ་མ་ཟད། བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
2) སྤྱིར་བཏང་ཆེད་ལས་མི་སྣའི་རྒྱལ་སྤྱིའི་སློབ་ཡོན་བྱ་དགའ། (PTSIS) འདི་ནི། རང་ཉིད་ཀྱི་ལས་རིགས་ལ་རྒྱལ་སྤྱིའི་རང་བཞིན་གྱི་སློབ་གཉེར་དགོས་ཤིང་། ལས་ཐོག་དགེ་རྒན་གྱི་ཚན་པ་རུ་མ་ཚུད་པའི་ཆེད་ལས་མི་སྣ་རྣམས་ལ་སྤྲོད་པའི་བྱ་དགའ་ཞིག་ཡིན། སྙན་ཞུ་འབུལ་མཁན་རྣམས་ལ་མ་མཐའ་ཡང་ལོ་ངོ་གསུམ་གྱི་འབྲེལ་ཡོད་ལས་ཀའི་ཉམས་མྱོང་ཡོད་དགོས་པ་མ་ཟད། བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
3) དངོས་གཞིའི་རྗེས་ཀྱི་རྒྱལ་སྤྱིའི་སློབ་ཡོན་བྱ་དགའ། (PGIS) འདི་ནི། ཉེ་སྔོན་དངོས་གཞིའི་སློབ་མཐར་ཕྱིན་པའི་སློབ་མའམ། ཡང་ན་ཡོན་གནས་དེ་དང་མཚུངས་ཤིང་། ཕྱི་རྒྱལ་ནས་དངོས་གཞིའི་རྗེས་ཀྱི་སློབ་གཉེར་བྱེད་འདོད་པའི་སློབ་མ་ལ་སྤྲོད་པའི་བྱ་དགའ་ཞིག་ཡིན། ཚན་རིག་དང་ལག་རྩལ་རིགས་སློབ་གཉེར་བྱེད་མཁན་ལ་དམིགས་བསལ་མཐོང་ཆེན་བྱེད་ཀྱི་ཡོད། སྙན་ཞུ་འབུལ་མཁན་རྣམས་ཀྱི་བོད་ཡིག་གི་བྱང་ཚད་དེ་མ་མཐའ་ཡང་བོད་ཡིག་མཐོ་འབྲིང་མཐར་ཕྱིན་སློབ་མའི་ཡོན་ཚད་དང་མཉམ་པ་ཞིག་དགོས།
གོམ་པ་གཉིས་པ། “སྔོན་དཔྱད་རེའུ་མིག”ཁ་བསྐང་དགོས།
ཁྱེད་ཀྱིས་རང་ཉིད་ཀྱི་དགོས་མཁོ་དང་ཡོན་ཚད་ལ་མཐུན་པའི་སློབ་ཡོན་བྱ་དགའི་རྣམ་གྲངས་ཤིག་བདམས་རྗེས། སློབ་ཡོན་བྱ་དགའི་སྔོན་དཔྱད་རེའུ་མིག་དྲ་ཐོག་ནས་ཁ་བསྐངས་ཏེ། སྤྱི་ཟླ་༦ཚེས་༡༥ཡར་སྔོན་དུ་ཡར་སྤྲོད་དགོས། གལ་སྲིད་ཁྱེད་ཀྱིས་རེའུ་མིག་དེ་དྲ་ཐོག་ནས་ཁ་སྐོང་མ་ཐུབ་ན། གློག་ཡིག་བརྒྱུད་ནས་སློབ་ཡོན་བྱ་དགའི་གཞུང་ལས་ཁང་ལ་འབྲེལ་བ་བྱས་ཏེ། Wordདང་། ཡང་ན་PDFརྣམ་པའི་རེའུ་མིག་སྐུར་བར་རེ་ཞུ་བྱེད་དགོས། (རྒྱལ་ནང་གློག་རྡུལ་ཡིག་སྒམ། [email protected] རྒྱལ་སྤྱིའི་གློག་རྡུལ་ཡིག་སྒམ། [email protected]) ང་ཚོའི་སློབ་ཡོན་བྱ་དགའི་ཚོགས་ཆུང་གིས་ཁྱེད་ཀྱི་སྔོན་དཔྱད་རེའུ་མིག་ལ་དཔྱད་བསྡུར་བྱས་རྗེས། ལས་གཞིའི་དོ་དམ་པས་ཁྱེད་ལ་ཟླ་ངོ་གཅིག་གི་ནང་དུ། ཁྱེད་ཀྱི་གནས་ཚུལ་དེ་གཞི་རྩའི་ཆ་རྐྱེན་དང་མཐུན་ཡོད་མེད་ཀྱི་བརྡ་ལན་སྤྲོད་ཀྱི་རེད། གལ་སྲིད་ཆ་རྐྱེན་དང་མཐུན་ཡོད་ན། སྙན་ཞུ་ཆ་ཚང་བ་ཞིག་འབུལ་ཆེད། ང་ཚོས་ཁྱེད་ལ་སྙན་ཞུའི་རེའུ་མིག་ཆ་ཚང་བ་ཞིག་འགྲེལ་བཤད་དང་བཅས་པ་བསྐུར་ཡོང་གི་རེད། གལ་སྲིད་ཁྱེད་ལ་དེ་མིན་གྱི་དྲི་བ་འདྲ་ཡོད་ན། སློབ་ཡོན་བྱ་དགའི་འབྲེལ་ཡོད་ལས་བྱེད་པར་གོང་བཀོད་གློག་རྡུལ་ཡིག་སྒམ་བརྒྱུད་ནས་འབྲེལ་བ་བྱས་ཆོག་ལ། ཐད་ཀར་ཁ་པར་བཏང་ནས་འབྲེལ་བ་བྱས་ཀྱང་ཆོག འབྲེལ་གཏུག་ཁ་པར་ནི། (028) 85182531 (རྒྱལ་ནང་།)
གོམ་པ་རྗེས་མ་དེ་ཅི་ཞིག་ཡིན་ནམ།
བོད་ཡིག་མཐོ་འབྲིང་མཐར་ཕྱིན་སློབ་མའི་སློབ་ཡོན་བྱ་དགའ། བོད་ཡིག་མཐོ་འབྲིང་མཐར་ཕྱིན་སློབ་མའི་སློབ་ཡོན་བྱ་དགའ་ནི་ལོ་རེར་ཐེངས་རེ་དཔྱད་འདེམས་བྱེད་ཀྱི་ཡོད་ལ། དཔྱད་འདེམས་དུས་ཚོད་ནི། ལོ་རེའི་སྤྱི་ཟླ་༩ནས་སྤྱི་ཟླ་༡༡བར་ཡིན་ལ། དཔྱད་འདེམས་མཇུག་འབྲས་དེ་སྤྱི་ཟླ་༡༢ནང་དུ་ཁྱབ་སྒྲོག་བྱེད་ཀྱི་ཡོད་པ་དང་། སྤྱི་ལོའི་ལོ་གསར་ནས་འགོ་བཙུགས་ཏེ་སློབ་ཡོན་རོགས་དངུལ་འགྲེམས་གཏོང་བྱེད་ཀྱི་ཡོད། སྙན་ཞུ་འབུལ་བའི་དུས་བཀག་ཁག་ནི། སྤྱི་ཟླ་༩ཚེས་༡༥ཡར་སྔོན་དུ། སྙན་ཞུ་འབུལ་མཁན་གསར་པ་ཚང་མས་སྔོན་དཔྱད་རེའུ་མིག་ཡར་སྤྲད་ཟིན་དགོས། སྤྱི་ཟླ་༡༠ཚེས་༢༥ཡར་སྔོན་དུ། སྔོན་དཔྱད་ལ་ཆོག་མཆན་ཐོབ་པའི་སྙན་ཞུ་འབུལ་མཁན་ཚང་མས་སྙན་ཞུའི་ཡིག་ཚགས་ཆ་ཚང་བ་ཞིག་ཡར་སྤྲད་ཟིན་དགོས།
དངོས་གཞིའི་རྗེས་དང་ཆེད་ལས་མི་སྣའི་སློབ་ཡོན་བྱ་དགའ། (འདིའི་ནང་དུ་རྒྱལ་ནང་རྒྱལ་སྤྱི་གཉིས་ཀ་ཚུད་ཡོད།) ཀུན་ཕན་ཐེབས་རྩ་ཚོགས་པའི་དངོས་གཞིའི་རྗེས་དང་ཆེད་ལས་མི་སྣའི་སློབ་ཡོན་བྱ་དགའ་གཉིས་ཀ་ལོ་རེར་ཐེངས་རེ་དཔྱད་འདེམས་བྱེད་ཀྱི་ཡོད་ལ། དཔྱད་འདེམས་དུས་ཚོད་ནི། ལོ་རེའི་སྤྱི་ཟླ་༨ནས་སྤྱི་ཟླ་༡༠བར་ཡིན་ལ། དཔྱད་འདེམས་མཇུག་འབྲས་དེ་སྤྱི་ཟླ་༡༢ཟླ་སྟོད་དུ་ཁྱབ་སྒྲོག་བྱེད་ཀྱི་ཡོད་པ་དང་། སྤྱི་ལོའི་ལོ་གསར་ནས་འགོ་བཙུགས་ཏེ་སློབ་ཡོན་རོགས་དངུལ་འགྲེམས་གཏོང་བྱེད་ཀྱི་ཡོད། སྙན་ཞུ་འབུལ་བའི་དུས་བཀག་ཁག་ནི། སྤྱི་ཟླ་༦ཚེས་༡༥ཡར་སྔོན་དུ། སྙན་ཞུ་འབུལ་མཁན་གསར་པ་ཚང་མས་སྔོན་དཔྱད་རེའུ་མིག་ཡར་སྤྲད་ཟིན་དགོས། སྤྱི་ཟླ་༨ཚེས་༡༥ཡར་སྔོན་དུ། སྔོན་དཔྱད་ལ་ཆོག་མཆན་ཐོབ་པའི་སྙན་ཞུ་འབུལ་མཁན་ཚང་མས་སྙན་ཞུའི་ཡིག་ཚགས་ཆ་ཚང་བ་ཞིག་ཡར་སྤྲད་ཟིན་དགོས། རྗེས་ལུས་ཐེབས་པའི་སྙན་ཞུ་ཚང་མ་ཐེངས་རྗེས་མའི་དཔྱད་འདེམས་དུས་རིམ་བར་དུ་ཕྱི་སྣུར་བྱེད་ཀྱི་ཡོད།
བསམ་ཚུལ་འབྲི།
བོད་ཀྱི་འགྲོ་བ་མིའི་གྱོན་ཆས་བྱུང་རིམ།