སློབ་དཔོན་ཆེན་པོའི་ཀཿཐོག་རྡོ་རྗེ་གདན་གྱི་གནས་བཤད།
ཨོ་རྒྱན་ཆེན་པོསཿ
འཛམ་བུ་གླིང་གི་མཐའ་ཁོབ་ཡུལ༔
གངས་ཅན་ལྗོངས་ཀྱི་ལྟེ་བ་ཉིད༔
ཀཿཐོག་མི་འགྱུར་རྡོ་རྗེ་གདན༔
འཁོར་ལོ་ལྔ་ལྡན་ཞི་ཁྲོའི་གནས༔
ང་ཡི་སྒྲུབ་གནས་མང་ཡོད་ཀྱང༔
གནས་ཀྱི་རྒྱལ་པོ་འདི་ཁོ་ན༔
ཁམས་ཡུལ་གནས་ཀྱི་རྒྱལ་པོ་སྦས་པའི་ཡུལ༔
འཁོར་ལོ་ལྔ་ལྡན་ཀཿཐོག་རྡོ་རྗེ་གདན༔
དེ་ཡི་སྒྲུབ་གནས་བརྒྱ་དང་ཉི་ཤུ་བཞི༔
ཁྱད་པར་མདོ་ཁམས་ས་ཡི་ཐིག་ལེ་ཆེ༔
ཀཿ་ཐོག་མི་འགྱུར་འཁོར་ལོ་ལྔ་ལྡན་གནས༔
རྒྱ་གར་རྡོ་རྗེ་གདན་དང་བཀོད་པ་མཚུངས༔
སྒྲུབ་པ་གང་བྱས་མི་འགྲུབ་གཅིག་ཀྱང་མེད༔
ཁྱད་པར་ནད་གདོན་རྐྱེན་གྱིས་བཏབ་པ་རྣམས༔
གནས་བསྐོར་འདི་བྱས་ཙམ་གྱིས་ནད་གདོན་ཞི༔
ཁྱད་པར་མ་འོངས་སྙིགས་མ་ལྔ་བདོའི་དུས༔
སྲོག་བདག་རྒྱལ་པོ་གཟའ་ཀླུ་ལ་སོགས་པ༔
ནག་ཕྱོགས་ཁ་དར་ནད་རིམས་སྣ་ཚོགས་དར༔
ནད་གདོན་དེ་ཉིད་སེལ་ཕྱིར་རིམ་གྲོ་ནི༔
ཐབས་ཀྱིས་བཅོས་ན་གཏོ་སྨན་གང་གིས་ཀྱང༔
ཕན་པ་དཀའ་བས་དེ་དུས་གནས་འདི་ལ༔
ཕྱག་དང་སྐོར་བ་བྱས་ན་དེ་ཡིས་ཕན༔
གནས་སྐབས་བར་ཆད་རྐྱེན་བགེགས་འདི་ཡིས་སེལ༔
ཕྱི་མ་ས་ལམ་བར་ཆད་འདི་ཡིསབཟློག༔
གསོལ་བ་གང་བཏབ་ཡིད་བཞིན་ནོར་ལྟར་འགྲུབ༔
སྨོན་ལམ་གང་བྱས་ཆུད་ཟོས་སོང་རེ་ཀན༔
ཁྱད་པར་གནམ་ལོ་ཡོས་ལོ་ནམ་ཤར་ཚེ༔
གནས་ཡུལ་ཀུན་གྱི་རྩ་གསུམ་དཔའ་བོ་དང༔
མ་མོ་མཁའ་འགྲོ་དམ་ཅན་ཆོས་སྐྱོང་འདུ༔
ཁྱད་པར་འཇའ་ལུས་མཁའ་སྤྱོད་འགྲུབ་པའི་གནས༔
ཁྲེགས་ཆོད་གཞི་དང་ཐོད་རྒལ་ལམ་བསྒོམ་ན༔
མི་ལོ་བདུན་ནས་འཇའ་ལུས་ངེས་པར་འགྲུབ༔
ཚེ་འདིར་བྱང་ཆུབ་མཆོག་གི་ལམ་བགྲོད་ཞིང་༔
ཕྱི་མ་ཕྱག་རྒྱ་ཆེན་པོ་ཐབས་མཆོག་གི༔
དངོས་གྲུབ་འབྲས་བུ་ངེས་པར་ཐོབ་ནུས་པ༔
གནས་ཀྱི་རྒྱལ་པོ་འདི་ཉིད་ཁོ་ན་ཙམ༔
པདྨའི་སྒྲུབ་གནས་འཁོར་ལོ་་ལྔ་ལྡན་ཞིང་༔
སྒྲུབ་གནས་བརྒྱ་རྩ་བརྒྱད་ཀྱི་སྙིང་པོ་སྟེ༔
འདི་ལ་དད་དང་ཡིད་ཆེས་མོས་གུས་ཀྱི༔
གནས་སུ་མ་གྱུར་མི་ཀུན་བདུད་ཀྱི་རིགས༔
གང་ཞིག་ང་ཡི་སྦས་ཡུལ་འདི་ཉིད་ཀྱི༔
ཐ་ན་མཚན་ཐོས་པ་ལ་ཡི་རངས་ཀྱང་༔
འདི་དང་ཕྱི་མ་བར་དོ་ཐམས་ཅད་ལ༔
མི་དེ་པདྨ་ང་ཡི་སྐྱབས་འོག་ཚུད༔
རང་གཞན་དོན་གཉིས་ལྷུན་གྱིས་འགྲུབ་པར་འགྱུར༔
གཞན་ཡང་ལོ་རྒྱུས་ཕན་ཡོན་བརྗོད་མི་ལངས༔ ས་མ་ཡ༔རྒྱ་རྒྱ་རྒྱ༔
(ཀཿཐོག་རྡོ་རྗེ་གདན་ནི་ད་ལྟའི་ཀཿཐོག་དགོན་པ་ཆགས་ས་འདི་ཡིན་ལ། སྔོན་ཆོས་རྒྱལ་སྡེ་དགེ་ཚང་གི་དབུ་བླ་ཁག་ལྔའི་ཡ་གྱལ་ཞིག་ཡིན།)
བསམ་ཚུལ་འབྲི།
མཁན་ཆེན་ཤེས་རབ་བཟང་པོའི་ལོ་རྒྱུས་སྙིང་བསྡུས།