འདོན་སྤེལ། 2013/04/22 2:55 PM རྩོམ་པ་པོ།

munlam1_2013_4_20

སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་ལས་ཁུངས་བཙུགས་ནས་ལོ་གཅིག་འཁོར་བ་དང་སྟབས་བསྟུན། སྨོན་ལམ་ཚིག་མཛོད་ཐོན་རིམ་༡.༡ གསར་དུ་འགྲེམས་སྤེལ་བྱས་ཡོད་པ་རེད། ད་ལྟ་སྨོན་ལམ་ཚིག་མཛོད་དེ་ཀུ་ཤུ་རྟགས་ཅན་གྱི་གློག་ཀླད་ནང་ལེགས་འགྲུབ་དང་། སྐར་ཁུང་རྟགས་ཅན་ནང་དུ་བསྐྱར་བཅོས་བྱས་ཡོད་པ་རེད།

དེ་ཡང་ཕྱི་ཟླ་༤ ཚེས་༢༠ ཉིན་གྱི་སྔ་དྲོ་དྷ་ས་གངས་སྐྱིད་ཉེ་འཁྲིས་སུ་ཡོད་པའི་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་དུ་གསར་འགོད་ལྷན་ཚོགས་ཤིག་བསྐོང་སྟེ། སྨོན་ལམ་ཚིག་མཛོད་ཐོན་རིམ་༡.༡ པོ་བེད་སྤྱོད་གཏོང་ཕྱོགས་དང་། དེའི་ཁྱད་ཆོས་བཅས་ཞིབ་འཇུག་ཁང་དེའི་འགན་འཛིན་བློ་བཟང་སྨོན་ལམ་གྱིས་ངོ་སྤྲོད་གནང་ཡོད་པ་རེད། ཀུ་ཤུ་རྟགས་ཅན་གྱི་གློག་ཀླད་ནང་ཚིག་མཛོད་དེ་དམིགས་བསལ་གྱིས་བེད་སྤྱོད་སྣ་འཛོམས་བྱེད་ཐུབ་ཀྱི་ཡོད་པ་རེད།

སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་བོད་ཀྱི་ཚིག་མཛོད་ཆེན་པོ་ཞིག་སྒྲིག་གི་ཡོད་ནའང་། ད་ཐེངས་ཀྱི་ཚིག་མཛོད་ཐོན་རིམ་༡.༡ པོ་ནི་བོད་ཀྱི་ཚིག་མཛོད་གྲགས་ཅན་ཁག་ཕྱོགས་བསྡུས་བྱས་པ་ཞིག་ལས། གསར་སྒྲིག་བྱེད་བཞིན་པའི་ཚིག་མཛོད་ཆེན་མོ་དང་འབྲེལ་བ་མེད་སྐོར་དང་། ད་ལྟ་པར་རིས་ཡོད་པའི་བོད་ཡིག་དང་དབྱིན་ཡིག རྒྱ་ཡིག་བཅས་ཡོད་པའི་ཚིག་མཛོད་ཅིག་ཀྱང་གསར་སྒྲིག་བྱེད་འཆར་ཡོད་པ་དང་། དེའི་ནང་གི་མིང་ཚིག་ཁག་ཀྱང་བོད་དབྱིན་རྒྱ་གསུམ་ཐོག་སྒྲ་གདངས་ཀློག་རྒྱུ་ཡོད་པ་ཞིག་སྒྲིག་འཆར་ཡོད་སྐོར་ཡང་བློ་བཟང་སྨོན་ལམ་གྱིས་འགྲེལ་བརྗོད་གནང་སོང་། སྨོན་ལམ་ཚིག་མཛོད་ཐོན་རིམ་༡.༠ དེ་༢༠༡༠ ལོར་འགྲེམས་སྤེལ་བྱས་ཡོད་པ་རེད།

ཞིབ་འཇུག་ཁང་དེའི་ཉིན་དེར་སྤེལ་བའི་གསལ་བསྒྲགས་ནང་འཁོད་དོན། སྨོན་ལམ་ཚིག་མཛོད་ཐོན་རིམ་༡.༡ ཅན་ནི། བོད་ཡིག་ཚིག་མཛོད་དང་། དབྱིན་བོད་ཚིག་མཛོད། བོད་དབྱིན་ཚིག་མཛོད་བཅས་སྡེ་ཚན་གསུམ་ཡོད་པའི་མཉེན་ཆས་ཚིག་མཛོད་ཅིག་ཡིན་ལ། ཚིག་མཛོད་འདིར་བསྡོམས་པའི་མ་ཚིག་ཉིས་འབུམ་ལྷག་ཡོད་པ་མ་ཟད། སྡེ་ཚན་གཅིག་ནས་གཞན་ལ་ཐད་ཀར་བརྒྱུད་ནས་འཚོལ་ཐུབ་པ་བཟོས་ཡོད་པས་སྟབས་བདེ་ཡོད།

དེ་སྔོན་སྨོན་ལམ་ཚིག་ཐོན་རིམ་དང་པོ་སྐར་ཁུང་རྟགས་ཅན་གྱི་གློག་ ཀླད་(Windows)ཁོ་ནའི་ནང་མ་གཏོགས་བེད་སྤྱོད་མི་ཐུབ་ཀྱང་། ད་ཆ་ཀུ་ཤུ་རྟགས་ཅན་གྱི་ཀློག་ཀླད་ནང་དུའང་བེད་སྤྱོད་ལེགས་པར་གཏོང་ཐུབ་པ་བཟོས་ཐུབ་ཡོད་པ་དང། ཀུ་ཤུ་རྟགས་ཅན་གྱི་གློག་ཀླད་ནང་བོད་དབྱིན་ཡིག་རིགས་ཀྱི་ལས་ཀ་གང་ཞིག་བྱེད་ནའང་ཚིག་མཛོད་འདིར་འབྲེལ་མཐུད་བྱེད་པར་ཧ་ཅང་སྟབས་བདེ་ཡིན་པས་བོད་ཡིག་དང་དབྱིན་ཡིག་འབྲི་ཀློག་སྦྱོང་གསུམ་བྱེད་པར་ཕན་ཐོགས་ཆེན་པོ་ཡོད། ཚིག་མཛོད་འདི་ནི་དྲ་འབྱེད་མཉེན་ཆས་ཁག་དང་ཀུ་ཤུ་བཟོ་ཚོང་ཁག་གིས་བཟོས་པའི་མཉེན་ཆས་མང་ཆེ་བར་ཐད་ཀར་བེད་སྤྱོད་གཏོང་ཆོག་པས་ན། བོད་་ཀྱི་སྐད་ཡིག་དང་འབྲེལ་བའི་སྟོང་ཆ་ཆེན་པོ་ཞིག་བསྐངས་ཐུབ་པ་བྱུང་ཡོད།

munlam_2013_4_20 སྨོན་ལམ་ཚིག་མཛོད་ ༡.༡ ནི་སྐར་ཁུང་རྟགས་ཅན་གྱི་གློག་ཀླད་(Windows) ནང་ལའང་བེད་སྤྱོད་ལེགས་པར་ཐུབ་པ་མ་ཟད། དེ་སྔོན་གྱི་ཚིག་མཛོད་ལས་ཁ་འབྱེད་མགྱོགས་པ་དང་། བོད་ཡིག་ཚིག་མཛོད་ལ་ཞུ་དག་དང་བསྐྱར་བཅོས་ཐེངས་གཉིས་པ་བྱས་ཡོད་པས་ཕན་ཐོགས་གང་ལེགས་ཡོང་བའི་རེ་བ་ཡོད།

འོན་ཀྱང་ད་དུང་ཚིག་མཛོད་འདིའི་ནང་སྐྱོན་དང་ནོར་འཁྲུལ་རིགས་ཡོད་སྲིད་ན། བེད་སྤྱོད་གནང་མཁན་ཚོས་དུས་ཐོག་ལ་འདི་གར་འབྲེལ་བ་གནང་ན་རིམ་པས་ཡར་རྒྱས་གཏོང་ཆོག་པ་མ་ཟད། འདི་ག་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་བོད་ཡིག་གི་ཚིག་མཛོད་ཆེན་མོ་ཞིག་ཀྱང་རྩོམ་སྒྲིག་བྱེད་བཞིན་མཆིས་ན། ཁྱོན་ཡོངས་ནས་རྒྱབ་སྐྱོར་རོགས་རམ་ཡོང་བའི་རེ་སྐུལ་ཞུ་རྒྱུ་དང། བེད་སྤྱོད་གཏོང་ཚུལ་ནི་ཚིག་མཛོད་འདི་སྒྲིག་འཇུག་བྱས་རྗེས་བེད་སྤྱོད་གཏོང་ཚུལ་འདི་ག་ལས་ཁུངས་ཀྱི་དྲ་རྒྱ་www.monlamit.org ལ་གཟིགས་རོགས།

ཚིག་ མཛོད་འདི་ནི་བོད་ཀྱི་བོད་མི་རིགས་དང་རིག་གནས་ཀྱི་སྲོག་རྩར་གྱུར་པའི་བོད་ ཀྱི་སྐད་ཡིག་རྒྱུན་འཛིན་དང་དར་སྤེལ་ཆེད་དུ་དམིགས་ནས་བཟོས་པ་ཡིན་པས། ཚོགས་སྒེར་སུས་ཀྱང་ཚོང་བསྒྱུར་གཏན་ནས་བྱེད་མི་ཆོག ཚིག་མཛོད་འདི་བཞིན་འདི་གའི་དྲ་རྒྱའི་ལམ་ནས་ཐད་ཀར་ཕབ་ལེན་བྱ་ཐུབ་པ་དང་། མཉེན་ཆས་འདི་ཕན་ཚུན་ལ་ངོ་སྤྲོད་དང་བརྒྱུད་སྤྲོད་གང་མང་ཡོང་བའི་རེ་བ་ཞུ་ཞེས་འཁོད་ཡོད་པ་རེད།། ཡོང་ཁུངས། བོད་ཀྱི་བང་ཆེན་དྲ་བ།

བསམ་ཚུལ་འབྲི།

' རྩོམ་འོག་མ།

རྒྱ་ནག་ཏུ་ས་ཡོམ་གྱིས་མི་གྲངས་༡༢༤ ལྷག་འདས་གྲོངས།

སྨོན་ལམ་ཚིག་མཛོད་ཐོན་རིམ་༡.༡ གསར་དུ་འགྲེམས་སྤེལ།

བསམ་ཚུལ་འབྲི།

འབྲེལ་ཡོད་ཀྱི་རྩོམ་གཞན།