སྦྲུམ་མར་ཉེན་ཁ་ཆེ་བའི་ནད་རྟགས་འགའ།
སྦྲུམ་མར་ཉེན་ཁ་ཆེ་བའི་ནད་རྟགས་འགའ།
ཡོང་ཁུངས། མཚོ་སྔོན་བརྙན་འཕྲིན་ཁང་།
དང་པོ། སྐྱེ་ལམ་ལས་ཁྲག་བཞུར་བ།
སྐྱེ་ལམ་ལས་ཁྲག་བཞུར་སྐབས་ན་ཟུག་ཡོད་མེད་གཉིས་ཡོད། སྦྲུམ་མའི་མངལ་ལས་ཁྲག་ཉུང་ཙམ་བཞུར་ཡང་ཉེན་ཁ་ཧ་ཅང་ཆེ་བས། སྦྲུམ་མས་སེམས་ལྷོད་པོའི་སྒོ་ནས་ངལ་གསོ་དགོས།
མངལ་སྦྲུམ་ནས་ཟླ་དྲུག་འགོར་རྗེས་ཧ་ཅང་སེམས་ཆུང་བྱ་དགོས། རྒྱུ་མཚན་ནི་བུ་རོགས་ལ་སྐྱོན་ཞུགས་ནས་རྨ་བཟོས་པ་དང་། དེ་ལས་ཁྲག་བཞུར་བ་ནི་སྦྲུམ་མའི་ལུས་ཁྲག་ཡིན་པས་མ་བུ་གཉིས་ཀར་ཉེན་ཁ་ཆེན་པོ་ཡོད། དེ་བས་རང་འདོད་ལྟར་རྨ་བཅོས་སོགས་མི་བྱེད་པར་མྱུར་དུ་སྨན་པར་སྟོན་དགོས།
གཉིས་པ། ཕོ་བར་ཟུག་གཟེར་ལངས་པ།
1.སྦྲུམ་མར་ན་ཟུག་ལངས་པ།
མངལ་སྦྲུམ་དུས་ཟླ་མཚན་མི་འབབ་ཀྱང་རྒྱུ་ཞབས་ལ་ཟུག་གཟེར་ལངས་སྲིད། དེ་ནི་བུ་རོགས་ཆེ་རུ་གྱུར་ནས་བུ་སྣོད་ལ་གནོན་ཤུགས་སྟེར་བ་དང་། བུ་སྣོད་ནང་གི་ཁྲག་དེ་ཕྱིར་བཞུར་ན་སྐབས་འགར་མཁྲེགས་པོར་འགྱུར་སྲིད། ཁྲག་མཁྲེགས་པོར་གྱུར་ན་མ་བུ་གཉིས་ཀར་ཉེན་ཁ་འབྱུང་ཉེན་ཡོད།
2.སྦྲུམ་མའི་ཁམས་དམར་རྒྱུ་ལམ་ལས་སྦྲུམ་བུ་འཕེལ་བའི་རྐྱེན་གྱིས་ན་ཟུག་ལངས་བ།
ཐོག་མའི་ཟླ་གསུམ་གྱི་ནང་ལ་སྦྲུམ་མར་ན་ཟུག་འབྱུང་བ་ནི་རྒྱུན་ལྡན་ཡིན་ཡང་ན་ཟུག་ཇེ་ཆེར་སོང་ན་རྒྱུན་ལྡན་མིན། རྒྱུན་ལྡན་ལྟར་ན་སྦྲུམ་བུ་མངལ་ནང་དུ་འཕེལ་བ་ཡིན་མོད། སྐབས་འགར་བུ་སྣོད་ཕྱིར་མངལ་སྦྲུམ་པའང་ཡོད་པས་ཉེན་ཁ་ཆེ་སྟེ། དེའི་ནང་དུ་སྦྲུམ་བུ་ཤོང་ཚད་ཧ་ཅང་ཆུང་བས་ཡིན།
ཟླ་གསུམ་ལོན་མ་ཐག་སྦྲུམ་བུ་མངལ་ཕྱིའི་ཁམས་དམར་རྒྱུ་ལམ་དུ་ཆེ་རུ་ཕྱིན་པ་དང་བསྟུན་ནས་ཁམས་དམར་རྒྱུ་ལམ་ལ་ཟུག་གཟེར་འབྱུང་བ་དང་ཁྲག་འབབ་པ་ཡིན། ཁྲག་ཁོག་ལ་བླུགས་ན་ལུས་པོར་གནོད་ནས་མཐའ་མར་སྦྲུམ་མ་འཆི་འང་སྲིད།
གསུམ་པ། ལུས་སྟོབས་ཉམས་པ།
སྦྲུམ་མའི་ཁྲག་ནང་དུ་ལྕགས་རྒྱུ་མང་པོ་དགོས། ལྕགས་རྒྱུས་ཁྲག་རིལ་དམར་པོར་གསོ་རླུང་དྲངས་ནས་མ་བུ་གཉིས་ཀ་གསོ་བཞིན་ཡོད་པ་རེད། ནམ་རྒྱུན་སྦྲུམ་མའི་ཁྲག་ནང་དུ་ལྕགས་རྒྱུ་མ་འདང་ན་ཁྲག་ཤེད་ཉམས་འགྲོ། དེ་དུས་སྦྲུམ་མའི་ལུས་སྟོབས་ཇེ་ཞན་དུ་འགྱུར་བ་ཡིན། ནད་རྟགས་ནི་པགས་པའི་མདོག་དཀར་པོར་འགྱུར་བ་ཡིན། དེ་བཞིན་མིག་ལྕིབས་དང་ཁ་ཤའི་ནང་ཡང་དཀར་པོར་གྱུར་ཡོད་པས་མིག་ལྕིབས་དང་ཁ་ཤར་བལྟས་ན་ཤེས་ཐུབ། སྐབས་དེར་མྱུར་མོར་གསོ་བཅོས་མ་བྱས་ན་སྦྲུམ་མའི་ཁྲག་ཤེད་ཉམས་ནས་བྱིས་པ་སྐྱེས་སྐབས་ཉེན་ཁ་ཆེན་པོ་ཡོད། དེར་སྔོ་ཚོད་ཀྱི་རིགས་དང་ཁྲག་གསོ་བྱེད་ཀྱི་ཟས་རིགས་ཟ་དགོས།
བཞི་བ། ལུས་ཚ་རྒྱས་པ།
ལུས་ཚ་རྒྱས་པ་ནི་གཉན་ཁ་རྒྱས་པའམ་ལུས་ཚ་མཐོ་བ། སིབ་བུ་དང་ཆམ་པ་ཕོག་པ་སོགས་ཀྱི་རྐྱེན་ལས་བྱུང་བ་ཡིན། ཆམ་པ་ཕོག་པ་ལྟར་གསོ་བཅོས་བྱ་རྒྱུ་དེའང་ལས་སླ་མོ་ཞིག་མིན། ད་དུང་ལུས་ཆུ་བསྲད་པའི་ནད་བྱུང་ནའང་ལུས་ཚ་རྒྱས་སྲིད་པས། ངེས་པར་དུ་ཆུ་ཁོལ་མང་ཙམ་འཐུང་དགོས།
ལྔ་བ། རྐང་ལག་དང་ངོ་གདོང་སྐྲངས་པ།
མགོ་ན་བ་དང་མགོ་ཡོམ་འཁོར་བ། མིག་རབ་རིབ་ཏུ་གྱུར་བ། ཁྲག་རྒྱུ་མི་བདེ་བ་བཅས་ཀྱི་ནད་ཕོག་སྲིད། དེའི་ནད་རྟགས་ནི་ལུས་ཉབ་ཉོབ་ཏུ་འགྱུར་བ་དང་ཁྲག་ཤེད་མཐོ་བ། རྐང་བ་ཅུང་སྐྲངས་པ་ནི་རྒྱུན་ལྡན་ཡིན་པས་སེམས་འཚབ་མི་དགོས། ལོངས་ཚིག་སྐྲངས་ན་ཉེན་ཁ་ཆེར་མེད་མོད། ངོ་གདོང་དང་ལག་པ་སྐྲངས་ཏེ་གློ་བུར་དུ་ལུས་པོ་གཟུགས་མགོར་མི་ཐེག་པའི་ཚོར་སྣང་སྐྱེས་ན་ཉེན་ཁ་ཆེ།
ཁྲག་རྒྱུ་མི་བདེ་བ་འགོག་པའི་ཐབས་མཆོག
1.སྦྲུམ་མར་ཁྲག་རྒྱུ་མི་བདེ་བའི་སྐབས་སུ་སེམས་ཁམས་ལྷོད་ལྷོད་ངང་ངལ་གསོ་དགོས།
2.ཁ་ཟས་སུ་ཤ་ཟ་དགོས་པ་ལས་ཚྭ་ཟ་མི་རུང་།
3.ཡང་ན་ཁ་ཟས་སུ་ཚྭ་ཉུང་ཙམ་མ་གཏོགས་འདེབས་མི་ཉན།
4.རྐང་བ་ཁོ་ན་སྐྲངས་ན་ཉེན་ཁ་དེ་འདྲ་མེད།
བསམ་ཚུལ་འབྲི།
གཞིས་ལུས་བོད་མིར་གནང་བའི་གལ་ཆེའི་གསུང་འཕྲིན།