འདོན་སྤེལ། 2013/01/16 6:39 AM རྩོམ་པ་པོ།

སྡེ་དགེའི་ལོ་རྒྱུས་སྤྱི་དོན་ཟླ་ཤེལ་གསར་པའི་མེ་ལོང་ལས་དྲངས།རྩོམ་པ་པོ།སྡེ་དགེ་ཐུབ་བསྟན་ཕུན་ཚོགས།

རྒྱལ་སྲས་སྤོམ་བྲག་པ་ནི།རབ་བྱུང་གསུམ་པའི་ལྕགས་སྟག་སྤྱི་ལོ་1170 ལོར་འབྲི་ལུང་དམ་པ་ཆོས་ཕྱུག་ཅེས་པ་དེང་སྡེ་དགེ་དབོན་པོ་སྟོད་ཀྱི་འབྲི་ཆུའི་རྒྱུད་འདིར་སྐུ་འཁྲུངས།དགུང་ལོ་ལྔ་ནས་འབྲི་ཀློག་མཁས་པར་མཁྱེན།དགུང་ལོ་དགུ་པ་ནས་མ་རྒྱུད་གསན། དགུང་ལོ་བཅུ་བཞི་པར་འགྲོ་མགོན་རས་ཆེན་གྱི་སྙན་པ་གསན། མཚན་ཐོས་པས་ཏིང་ངེ་འཛིན་ཁྱད་པར་ཅན་རྒྱུད་ལ་སྐྱེས།རྨི་ལམ་དུ་རྗེ་བཙུན་མས་ཁྱོད་ཀྱི་བླ་མ་འགྲོ་མགོན་རས་ཆེན་ཡིན་པར་ལུང་བསྟན། དེ་ནས་ཞག་བཅུ་ན་འབོ་སྐར་སྒང་དུ་འགྲོ་མགོན་རས་ཆེན་དང་མཇལ། རབ་ཏུ་བྱུང་བའི་མཚན་བསོད་ནམས་རྡོ་རྗེར་གསོལ། དེ་ནས་བཟུང་བླ་མའི་བཀའ་ལྟར་སེམས་ངོ་སྐྱོང་ཞིང་སྒོམ་སྒྲུབ་མཛད་པས་ཉམས་རྟོག་ཁྱད་པར་ཅན་འཁྲུངས། སྒྲུབ་བརྒྱུད་ཀརྨ་ཀཾ་ཚང་གི་གདམས་ངག་ཐམས་ཅད་ཚང་ལ་མ་ནོར་བ་བུམ་པ་གང་བྱོལ་གྱི་ཚུལ་དུ་ཞུས། དེ་ནས་རྨེ་འདོར་བྱོན།ཐུགས་ཕྱོགས་མེད་ཀྱི་རི་ལ་གཏད་པའི་ཚེ་རྗེ་ཀརྨ་པ་དུས་གསུམ་མཁྱེན་པས་གར་ཡང་མ་འགྲོ།གནས་འདི་ཉིད་དུ་སྒོམ་ན་དོན་གཉིས་མཐར་ཕྱིན་པར་འགྱུར་རོ།།ཞེས་གསུངས་པ་གསན་ནས་གནས་དེར་ལོ་བཅུ་དྲུག་ཏུ་བསྒོམས་པས་ཉམས་རྟོག་གི་ཡོན་ཏན་མཐའ་ཡས་པ་འཁྲུངས། ལས་བཞིའི་ཕྲིན་ལས་གྲུབ། མི་དང་མི་མ་ཡིན་པ་ཐམས་ཅད་དབང་དུ་འདུས།ལོངས་སྤྱོད་ཆར་ལྟར་དུ་འབབ་པ་སོགས་སྙན་པས་ཕྱོགས་ཐམས་ཅད་ཁྱབ། ཀརྨ་པ་སྐུ་ཕྲེང་གཉིས་པ་གྲུབ་ཆེན་ཀརྨ་པཀྵི་རྗེས་སུ་བཟུང་ཞིང༌།སྒྲུབ་བརྒྱུད་ཀརྨ་ཀཾ་ཚང་གི་གདམས་ངག་མ་ལུས་པ་གནང་བས་སྒྲུབ་བརྒྱུད་དོན་གྱི་བདག་པོར་གྱུར།བཀའ་བརྒྱུད་གསེར་ཕྲེང་གི་བླ་མ་བརྒྱུད་པའི་རིམ་གྲས་སུ་ཚུད།དེ་ནས་ཁྲ་ཤོད་སྤོམ་བྲག་ཏུ་གདན་ས་བཟུང་ནས་བཞུགས།དགུང་ལོ་རེ་ལྔ་པ་ཤིང་རྟ་སྤྱི་ལོ་ 1234ལོར་ཀརྨ་པཀྵི་དང་ལྷན་དུ་སྨར་ཁམས་ཕེབས་པའི་ཚེ་སྐུ་ཁམས་མི་བདེ་བ་བྱུང་ཞིང༌། ཀརྨ་པཀྵི་ལ་ད་ནི་ཁོ་བོ་འགྲོ་བ་འདུག རྗེ་འགྲོ་མགོན་རས་ཆེན་གྱིས་སྨར་ཁམས་སུ་མ་འགྲོ་ཡང་ཡང་གསུང་བ་ལ་གློ་བུར་དུ་འོང་དགོས་བྱུང་བས་བླ་མའི་གསུང་བཅག་པས་ལན་པར་འདུག ཅེས་སོགས་གསུང་མགུར་མང་པོར་གསུང་ནས་སྐུ་གཤེགས་སོ། །

བསམ་ཚུལ་འབྲི།

' རྩོམ་འོག་མ།

ཁྲོ་རུ་ཚེ་རྣམ།

སྤོབ་བྲག་རྒྱལ་སྲས་སྤྲུལ་སྐུའི་རྣམ་ཐར།

བསམ་ཚུལ་འབྲི།

འབྲེལ་ཡོད་ཀྱི་རྩོམ་གཞན།