སྡོང་ཚེ་དཀར་དགེ
ཡོང་ཁུངས། ཆུ་སྒང་ལོ་རྒྱུས་ལས་དྲངས།
སྡོང་ཚེ་དཀར་དགེ
མདོ་ཁམས་ཤར་ཕྱོགས་སྡེ་དགེ་མངའ་ཁུལ་དཔེ་ཝར་རྫོངས་ནས་ཡིན་པའི་སྡོང་ཚེ་དཀར་དགེ་ནས་ལོ་རྒྱུས་ཞུ་འབྲས། སྡེེ་དགེ་འབྲི་ནུབ་མངའ་ཁུལ་དུ་སྤྱི་ལོ་ ༡༩༥༩ ཟླ་ ༦ པའི་ནང་འབྲི་ནུབ་ཕྱོགས་སུ་ཟིང་འཁྲུག་ལངས་ཏེ་བདེ་ལྷུང་ཞེས་པར་གནམ་ས་གཉིས་ནས་དམག་བརྒྱབ་སྟེ་སྡེ་དགེ་དང་གོ་འཇོ་བཅས་ཕོ་མོ་ཁྲི་ཕྲག་ཁ་ཤས་ཡོད་པ་གོ་འཇོ་སྨད་ནས་སྟོང་ཕྲག་གཅིག་དང་ཕྱེད་ཙམ་ཐར་བའི་ནང་ནས་རང་གི་ནང་མི་ ༡༨ ཡོད། དེང་ནང་ཕ་མ་རྒན་ཁོང་ལོ་ ༧༠ དང་ ༨༠ ཅན་གསུམ་ཡོད་པ་འགྲོ་རེ་བྲལ་ནས་རང་གི་ཁུ་བོ་ཚེ་ཆེན་དང་ཨ་རྡོར་མཉམ་སྡོད་དགོས་པ་རྒྱ་ལག་ཏུ་ཟིན་ནས་ལོ་ ༢༠ བཙོན་ཁང་ནང་སྡོད་དགོས་བྱུང་བ་དང་། རང་དང་ནང་མི་གཞན་རྣམས་དང་། གོ་སྡེ་གཉིས་མཉམ་དུ་འོང་ནས་གོ་འཇོ་གསེར་ལྡིང་ཁར་རང་ལ་མེ་མདའ་ཕོག་ནས་རྨས་སྐྱོན་དང་། སྤུན་མཆེད་ཉེ་འབྲེལ་བརྒྱ་ཕྲག་མང་པོ་བསད་རྨས་ཤོར་བ་དང་། དེ་ནས་སྡེ་དགེ་རྒྱལ་པོ་དང་བློན་འཁོར་ཉུང་བསྡུས་ལྷ་ཐོག་ནས་ཆབ་མདོ་རྫ་སྟོད་བརྒྱུད་ཀོང་པོ་ཕྱོགས་དང་ལྕགས་ར་དཔལ་འབར་དུ་འབྱོར། དེ་ཕྱོགས་སྡེ་དགེ་སྲས་དོན་ཡོད་ཅན་མི་སྣ་བཅུ་ཕྲག་ལྷག་གནམ་གྲུ་ནས་འབྱོར་བར་གོ་ལག་མདའ་རྫས་ཕོན་ཆེན་ཐོབ་པར་ཟླ་ངོ་ཁ་ཤས་དེ་ཕྱོགས་སུ་བསྡད། བོད་ཟླ་ ༡ པོའི་ནང་ཡང་བསྐྱར་རྒྱ་མིས་ཕྱོགས་གང་ས་ནས་དམག་བརྒྱབ་ནས་རི་ལུང་གང་སར་རྒྱ་བོད་གཉིས་ཀྱི་རོ་ཁྲག་གིས་གང་བར་མིག་མཐོང་བྱུང་། དེ་ནས་རྒྱ་འོག་སྤྲད་གསུམ་ཞེས་པའི་ཕོ་མོ་ཉིས་བརྒྱ་ལྷག་ཙམ་བྱང་ཕྱོགས་སུ་ཁ་ཐུག་ཏུ་ཕྱིན་པས་ཞག་ཤས་རྗེས་མདོ་གཞུང་ཞེས་པར་སླེབས་ཏེ། དེ་ཕྱོགས་དམག་འཐབ་བྱ་བའི་སྒང་སླེབས་པས་ཉིན་མཚན་བར་མེད་འཐབ་འཛིང་ཐོག་བྱང་མ་ཊའི་ལམ་ཁར་ཉིན་མཚན་བདུན་ནས་བརྒྱད་ཙམ་ལ་སླེབས། དེ་ནས་ཐང་ཁེ་ཁྲེ་ཞེས་པའི་ལྕགས་ཁྲབ་འཁོར་ལོ་འགས་ཉིན་མཚན་གསུམ་ཙམ་དེད་བྱུང་བར་བསད་རྨས་མང་པོ་དང་། གནམ་གྲུ་ནས་ཕེབས་པའི་མི་གྲངས་བཅུ་གྲངས་ཙམ་ཡོད་པ་གར་སོང་ཆ་མེད་སོང་། དེ་ནས་ཁ་ཟས་མེད། རྒྱབ་གོས་མེད། ཟླ་ངོ་གཅིག་ཙམ་བྱང་ཐང་རི་དྭགས་ཀྱི་ཤ་ཁྲག་ཟས་ནས་འོང་། དེ་ནས་ཨ་མདོ་སྟོད་མར་སླེབས་པར་མི་ཟས་ཕྲན་བུར་ཐོབ། དེ་ནས་རྒྱ་མི་དང་དགྲ་ཐེངས་ ༣༠ ནས་ ༤༠ བྱུང་བར། རང་གི་སྤུན་ཚེ་རིང་ཕུན་ཚོགས། བློ་གསལ་ཚེ་རིང་། ལྷ་མོ་ཨ་ནེ། ཚེ་དབང་སྒྲོན་མ་བཅས་བསད་ཤོར། འཕྲོས་ནང་མི་བདུན་སྟོད་མུ་གུམ་ཞེས་པར་བལ་པོའི་ས་མཚམས་སུ་སྤྱི་ལོ་ ༡༩༦༡ ལོར་སླེབས་པའི་ལོ་རྒྱུས་སུ།
བསམ་ཚུལ་འབྲི།
བཟི་སྨན་སྤྱད་ནས་ངའི་རོགས་པ་བཅུ་གསུམ་གྲོངས་ཚར་སོང་།