སྡེ་དགེའི་རྫ་བཟོའི་ལག་ཤེས་དང་རྫ་མ་རིགས།
སྡེ་དགེའི་ཕྱོགས་ཀྱི་རྫ་བཟོའི་ལག་རྩལ།
ཡོང་ཁུངས། སྡེ་དགེ་དྲ་བ།
བོད་ཀྱི་རྫ་ཆས་སྒྱུ་རྩལ་ནི་ལོ་རྒྱུས་རིང་ལ་རྣམ་གྲངས་དང་བཟོ་དབྱིབས་ཕུན་སུམ་ཚོགས་ཤིང་། དེ་ནི་བོད་ཀྱི་དུས་རབས་སོ་སོའི་རིག་གནས་ལག་རྩལ་གྱི་སྙིང་བཅུད་ཡིན། སྡེ་དགེའི་ཕྱོགས་ནས་མཁར་སུམ་མདོ་དང་། སྨན་ཤོད་ས་གནས་ཁ་ཤས་རྫ་ཆས་འདྲ་མིན་བཟོ་བའི་ལག་རྩལ་དམིགས་བསལ་བ་རེ་དར་ཡོད་ལ། ལག་ཤེས་དེས་ཡུལ་སྡེ་མང་པོ་ཞིག་གི་ཡོང་སྒོའང་བརྟེན་མྱོང་ཡོད་པ་རེད། རྫ་ཆས་བཟོ་བ་ལ་་མཐུན་རྐྱེན་མང་པོ་ཞིག་འཛོམས་དགོས། དཔེར་ན། ཐོག་མར་རྫ་མ་བཟོ་བྱེད་ཀྱི་མ་ལག་ལེན་པ་དང་། ལྕི་བ་ལེན་པ། ས་འདེམས་པ། རྫ་བཟོའི་ལག་ཆ་སྒྲིག་པ། རྫ་མ་དངོས་བཟོ་བ། སོ་གཏོང་བ། རྫ་རྫོང་རྒྱག་པ་སོགས་ཀྱི་གོ་རིམ་མང་དག་ཅིག་བརྒྱུད་དགོས། 
རྫ་མའི་རྣམ་གྲངས་ལའང་ཁོག་ལྡིར་དང་། མེ་ཁོག ཁོག་མ། རྫ་མ། བསྙལ་ཁོག པ་རུ། མཆོད་ཀོང་། བཞུར་ཀྱོག ཆུ་བན། ཁུར་གྱམ། བག་ཡངས། ཆང་སྣོད། ཞོ་རྫ། ཇ་རུ། རྫ་གླིང་། རྫ་ཆོད་སོགས་རྣམ་གྲངས་མང་ཞིང་རེ་རེ་ལའང་ཆེ་ཆུང་དང་བཟོ་དབྱིབས་ཁྱད་པར་ཧ་ཅང་མང་པོ་ཡོད། ས་གནས་སོ་སོའི་མིང་འདོགས་ཚུལ་དང་བཟོ་དབྱིབས་རྣམ་གྲངས་ལའང་མ་འདྲ་བ་མང་པོ་ཡོད། དེང་སང་་བོད་ཀྱི་སྤྱི་ཚོགས་སུ་རྫ་ཆས་ཀྱི་ལག་རྩལ་ཆ་ཚང་རྒྱུད་འཛིན་ཐུབ་མཁན་ཧ་ཅང་དཀོན་པོར་གྱུར་ཡོད་ཀྱང་། སྡེ་དགེ་སྨན་ཤོད་དུ་བོད་ཀྱི་ཐུན་མིན་སྲོལ་རྒྱུན་རིག་གནས་ལ་དགའ་ཞེན་དང་། རིན་ཐང་མཐོང་མཁན་ཚོས་རྫ་བཟོ་དང་ཤིང་བཟོ་སོགས་ཀྱི་ལག་རྩལ་མ་ཉམས་རྒྱུན་འཛིན་ཐོག དེ་དག་སོ་སོར་འཛིན་གྲྭ་ཟུར་བཙུགས་བྱས་ཏེ་གཞོན་སྐྱེས་ཚོར་སློབ་སྦྱོར་སྤྲོད་ཀྱིན་ཡོད་པ་རེད།
བསམ་ཚུལ་འབྲི།
སྡེ་དགེའི་བྲོ་ཆེན་གྱི་བྲོ་ཚིག་དཔེ་དེབ་གསར་ཐོན།