སྡེ་དགེའི་རྒྱལ་རབས་རིན་ཆེན་ཕྲེང་མཛེས། ༼བཅུ་པ་༽
སྡེ་དགེའི་རྒྱལ་རབས་རིན་ཆེན་ཕྲེང་མཛེས། ༼བཅུ་པ་༽མཛད་པ་པོ་བར་མ་མཁན་པོ་ངེས་དོན།
༈ གཉིས་པ་ལས་འཛིན་གྱི་རིམ་པ་ནི། དེ་ལ་ལས་འཛིན་གྱི་རིམ་པ་ཞེས་པ་ནི་དགོན་པའི་ལས་དོན་གྱི་གཙོ་བོའི་འགན་འཛིན་པ་རྣམས་ཡིན་ལ། དེའང་དགོན་པའི་ཕྱི་ནང་གི་ཆོས་སྤྱོད་ཀྱི་ལས་དོན་ཕལ་ཆེར་སྡེ་དགེ་ཆོས་རྒྱལ་ཆེན་པོ་ཉིད་ཀྱིས་གཟིཊ་ཤིང་གཙོ་བོའི་ཁུར་བཞེས་ཏེ་འཁོར་ལོ་གསུམ་གྱི་ལས་ཚད་མེད་སྤེལ། དེ་འོག་སྡེ་དགེའི་གཉེར་ཕྱག་དང་། དགོན་དཔོན་བླ་མ་ཆོས་ཁྲིམས་གསུམ། མི་ཆེན་བརྒྱད། གླིང་ཁག་གསུམ་གྱི་བཅུ་དཔོན། སྤར་ཁང་དུ་སྤར་དཔོན་དང་དྲུང་ཡིག །སྤར་གཉེར་པ་རྣམས་ཡིན། དེ་ལས་སྡེ་དགེའི་གཉེར་ཕྱག་ནི་གཉེར་ཆེན་གསུམ་གྱིས་གཙོ་བོ་རྒྱལ་ཆུས་ལ་གཟིགས་པ་དང་། ཕྱག་མཛད་ཀྱིས་གཙོ་བོ་དཔལ་འབྱོར་ལ་གཟིགས་དགོས། དགོན་དཔོན་བླ་མ་ནི་བློ་ཆེ་ཞིང་གཞུང་དྲང་བ། དགོན་འདིར་གཏོགས་ཀྱི་གྲྭ་པ་ཡིན་པ་ཐབས་མཁས་ལ་གནས་པ་ཞིག་གོང་སྨོས་འོས་ཐོ་དྲུག་གི་སྒོ་ནས་བསྐོས་པ་ཡིན་ལ། དགོན་དཔོན་གྱིས་གཙོ་བོ་དགོན་པའི་ཆོས་སྤྱོད་ཀྱི་ལས་ལ་གཙོ་འགན་བཞེས་ཏེ་དགོན་པའི་ཕྱི་ནང་ཡོངས་ལ་གཟིགས་པ་དང་། དུས་མཆོད་ཆེན་པོ་རྣམས་ཀྱི་ཚོགས་དབུར་སྐབས་འགར་སྡེ་དགེ་ཆོས་རྒྱལ་ཆེན་པོའི་སྐུ་ཚབ་ཏུ་བཞུགས་པ་དང་། མདོར་ན་དགོན་དཔོན་ནི་དགོན་པའི་གཙོ་འཛིན་པ་ཡིན་ལ། ཆོས་ཁྲིམས་པ་གསུམ་ནི་སྔར་སྨོས་དགོན་དཔོན་དང་ཕྱོགས་མཚུངས་རེ་འོས་ཐོ་དྲུག་གིས་བཞག་ནས་གཙོ་བོ་དགོན་པའི་བཅའ་ཁྲིམས་ལ་གཟིགས་ཤིང་གཞན་ཡང་དབང་ཆ་ཆེན་པོ་ཡོད། མི་ཆེན་བརྒྱད་ནི་དགོན་པའི་ཚེས་དུས་སྒྲུབ་མཆོད་ཀྱི་ཐེབས་རྩ་གཏོང་བའི་སྤྱི་པ་ཡིན། དེ་དག་ནི་ཕལ་ཆེར་མདུན་ཧོར་སོགས་ཆེ་རིགས་དགོན་ཉིད་ཀྱི་གྲྭ་པ་ཡིན་པ་འབྱོར་ལྡན་ལས་གྲུབ་ཅིང་མི་ཆེན་དེ་དག་གི་འོག་ཏུའང་སྤྱི་བུ་ཞེས་འབྱོར་ལྡན་མང་དུ་ཡོད། མི་ཆེན་དེ་དག་གི་གཙོ་འཛིན་ལ་མི་དཔོན་ཞེས་བརྗོད། གླིང་ཁག་སོ་སོ་ལ་བཅུ་དཔོན་ཞེས་གླིང་སོ་སོའི་དུས་མཆོད་ཀྱི་ཐེབས་རྩ་གཏོང་བའི་སྤྱི་པ་བཅུ་རེ་ཡོད། དེ་དག་གི་གཙོ་འཛིན་ལ་ཡང་དཔོན་ཞེས་གྲགས། སྤར་ཁང་དུ་སྤར་དཔོན། སྤར་གཉེར། དྲུང་ཡིག་གསུམ་གཙོ་བོ་ཡིན་ལ་གསུམ་ཀའང་དགོན་རང་ཉིད་ཀྱི་གྲྭ་པ་ཡིན་པ་ཞིག་དགོས། སྤར་དཔོན་གྱིས་གཙོ་བོ་སྤར་ཁང་གི་ཕྱི་ནང་ལས་དོན་ལ་གཙོ་འཛིན་བྱེད་ཅིང་། འདུ་བའི་ཚོགས་ཆེན་སྐབས་སུ་ཉིན་བསྟར་ཚོགས་ལ་གཟིགས་བསྐོར་བྱེད་ཅིང་ཚོགས་པའི་སྒྲིག་ལམ་ལ་གཟིགས་དགོས། དགོན་དཔོན། མི་དཔོན། སྤར་དཔོན་གསུམ་ལ་སྡེ་དགེའི་གཉེར་ཕྱག་གི་གོ་ས་ཡོད། དེ་ལྟར་དགོན་ཆེན་ལྷུན་གྲུབ་སྟེང་འདི་ཉིད་ཀྱི་བཤད་སྒྲུབ་ལས་ཀྱི་བྱ་བཞག་ཐམས་ཅད་གཙོ་བོ་སྡེ་དགེ་ཆོས་རྒྱལ་ཆེན་པོ་ཉིད་དང་། སྡེ་དགེའི་གཉེར་ཕྱག་བླ་ཆེན་བཞི། བླ་དབུ་ཆོས་བརྒྱད་ཅེས་དགོན་དཔོན་བླ་མ་དང་དབུ་མཛད་བཞི། ཆོས་ཁྲིམས་གསུམ། བླ་ཆོས་བཞི་ཞེས་པ་དགོན་དཔོན། ཆོས་ཁྲིམས་གསུམ་རྣམས་ཏེ་འདི་དག་གིས་ཁུར་བཞེས་པ་ཡིན་ནོ།། ༈ བཞི་པ་རྒྱུན་གྱི་དགོན་པའི་སྒྲིག་སྲོལ་ཇི་ལྟར་ཡིན་པ་ནི། དགོན་ཆེན་ལྷུན་གྲུབ་སྟེང་ཞེས་བྱ་བའི་ཆོས་གྲྭ་ཆེན་པོ་འདི་ཉིད་ནི། སྡེ་དགེ་ཆོས་རྒྱལ་ཆེན་པོའི་རྩ་བའི་གདན་ས་ཡིན་གཤིས་ཕྱི་ནང་གི་སྒྲིག་སྲོལ་གཞན་ལས་ཤིན་ཏུ་ལེགས་པ་ཡོད་དེ། དེའང་ཚོགས་ཆེན་རྣམས་ཀྱི་དབུར་བཞུགས་ངོར་མཁན་ཆེན་སོགས་རིམ་བྱོན་དང་། ཤར་ནུབ་རྒྱལ་མཚན་སོགས་རྫོགས་པའི་སངས་རྒྱས་ལྟ་བུའི་སྐྱེས་ཆེན་བགྲང་ལས་འདས་པ་རྣམས་ཕེབས་ཤིང་། སྡེ་དགེ་ཆོས་རྒྱལ་ཆེན་པོ་ཉིད་ཀྱང་ཚོགས་ཆེན་ཕལ་ཆེའི་དབུར་བཞུགས་ནས་ཚོགས་པའི་སྒྲིག་དང་ཀུན་སྤྱོད། ཆོ་གའི་ཆིངས་དང་ཕྱག་ལེན་སོགས་གྲྭ་ས་ཆེན་པོའི་སྲོལ་ཤིན་ཏུ་ལེགས་པ་དང་ལྡན་པ་མཛད་ཅིང་། གྲྭ་པའི་རྒྱུན་གྱི་ཀུན་སྤྱོད་ཆོས་ཁྲིམས་དང་། འདུལ་ཁྲིམས་གཙང་ཞིང་ཆོས་སྤྱོད་ཀྱི་བྱ་བ་ལ་བརྩོན་པ་ཤུགས་ཆེ་སྟེ། སྡེ་དགེ་ཆོས་རྒྱལ་ཆེན་པོ་ཉིད་དང་། སྐབས་འགར་ཆོས་ཁྲིམས་པ་རྣམས་གླིང་ཧྲག་ཏུ་ཕེབས་ཏེ་ནང་དུས་སུ་གཏོར་མ་འདོན་པའི་ཏིང་ཤག་གི་སྒྲ་དང་། ནུབ་དུས་སུ་གཏོར་བསྔོ་གཏོང་བའི་དྲིལ་བུའི་སྒྲ་ཡོད་མེད་ཚུན་ཆད་ཀྱང་གཟིཊ་ཏེ་བཅའ་ཁྲིམས་ཤིན་ཏུ་དམ་པོར་མཛད་ཅིང་ཆོས་སྤྱོད་ཀྱི་བྱ་བ་དར་རྒྱས་སུ་གྱུར། དེའང་ངོར་མཁན་ཆེན་བཀྲ་ཤིས་ལྷུན་གྲུབ་ཀྱིས་བཀོད་པའི་དགོན་འདི་ཉིད་ཀྱི་བཅའ་ཡིག་ལྷག་བསམ་མཛེས་རྒྱན་ལས་འདི་ལྟར་འབྱུང་སྟེ། དེའང་སྡེ་དགེའི་ཡབ་མེས་གོང་མ་རྣམས་ཀྱིས་སྔོན་ནས་ཀྱང་དཔལ་ལྡན་ས་སྐྱ་པ་ཞེས་སྙན་པའི་བ་དན་སྲིད་པ་གསུམ་ན་གཡོ་བས་འཇིག་རྟེན་གྱི་ཆེ་རྒུ་མཐའ་དག་གི་རལ་པའི་རྩེར་ཞབས་སེན་ནོར་བུ་བཀོད་ཅིང་ལྷ་དང་བཅས་པས་འདུད་པའི་གནས་སུ་གྱུར་པ་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་ཞབས་ཟུང་བསྟེན་ནས་མཆོད་ཡོན་གཉིས་ཀའི་ལུང་གིས་ཆེན་པོའི་གོ་སར་བཀོད་པ་ནས་བཟུང་དེང་སང་གི་བར་ལ་གཞན་དབང་དུ་མ་གྱུར་མོད་ཀྱང་། རང་ཆེའི་སྒོ་ནས་གཞན་ལ་ཕྲག་དོག་པའི་ཟུར་མིག་ཙམ་ཡང་བྱས་མ་མྱོང་བར་བརྟེན། རང་སྡེ་མངའ་འབངས་དང་བཅས་པས་དཀོན་མཆོག་གསུམ་ལ་གུས་པས་མཆོད་ཅིང་ཆབ་འོག་ལུགས་གཉིས་ཞིང་ས་དགེ་ཚོགས་བྱམས་པའི་ཆར་གྱིས་སྐྱོང་བཞིན་པ་ནས། འཕགས་ཚོགས་འདུས་པ་རྒྱ་མཚོའི་བཞུགས་གནས་ཀུན་དགའ་ར་བ་གསར་བསྐྲུན་དང་སྔར་ཡོད་ཀྱི་ཞབས་ཏོག །སྐུ་གསུང་ཐུགས་ཀྱི་རྟེན་རབ་ཏུ་སྤེལ་བ་སོགས་རྣམ་པར་དཀར་བའི་བྱ་བ་རྒྱ་ཆེར་སྤེལ་ཞིང་འཕགས་པའི་དགེ་འདུན་ལ་བསྙེན་བཀུར་བཅས། འདི་དག་བསྟན་པ་སྤྱི་དང་བྱེ་བྲག་གི་ཆེད་དུ་ཐུགས་བསྐྱེད་བླ་ན་མེད་པས་སྒྲུབ་པར་མཛད་འདུག་པ་འདི་ལ། འདིར་ཚོགས་པ་ཀུན་གྱིས་ཐུགས་ལ་བཅགས་ཏེ་བཅའ་ཡིག་འདི་དང་མི་འགལ་བར་ལག་ལེན་ཚུལ་བཞིན་ཐེབས་པར་བྱེད་དགོས། དེའང་སྔོན་ལས་བཟང་པོ་དང་དགེ་བ་དཔག་ཏུ་མེད་པའི་མཐུས་མི་ལུས་རིན་པོ་ཆེ་ཐོབ། བསྟན་པའི་སྒོར་ཞུགས། སྐྱེས་བུ་དམ་པས་ཟིན། ལམ་བཟང་པོ་དང་འཕྲད་པའི་དུས་འདིར་ཆོས་ཚུལ་ལ་གནས། ཚུལ་ཁྲིམས་མངོན་ལྐོག་མེད་པར་བསྲུང་ན་དགེ་འདུན་བསྟན་པའི་གཞི་ཡིན་པར་གསུངས། རང་གཞན་གྱི་འདི་ཕྱིའི་དོན་ཐམས་ཅད་མིའི་ལུས་ལ་བརྟེན་ནས་བསྒྲུབ་དགོས། མི་ལུས་དེའང་རྒྱུ་དང་གྲངས་དང་། ངོ་བོ་བཅས་ཀྱི་སྒོ་ནས་རྙེད་དཀའ་ཞིང་། རྙེད་ཀྱང་ཡུན་རིང་དུ་རྟག་པའི་གོ་སྐབས་མེད་ཅིང་། སྤྱིར་སྐྱེས་པའི་ཕྱིར་འཆི་ངེས། འཆི་བའི་རྐྱེན་མང་། གསོན་པའི་རྐྱེན་ཉུང་སྟེ་བྱི་བ་དཀར་ནག་གི་དཔེ་བཞིན་ནོ། །གལ་ཏེ་ཅུང་ཟད་འཚོ་བའི་རིང་ཡང་སངས་རྒྱས་ཀྱི་བསྟན་པ་དང་མཇལ་དཀའ་མོད། མཇལ་ནས་དེས་གསུངས་པའི་གསུང་རབ་དྲི་མ་མེད་པ་ལས་བྱུང་བ་བཞིན་མི་ལུས་ལ་སྙིང་པོ་ལེན་དགོས། འགའ་ཞིག་གིས་བསམ་པ་ལ་སྙིང་པོ་ལེན་པར། ལེགས་ཚད་གོན། ཞིམ་ཚད་ཟ། གསོག་སྲུང་བྱི་བ་ལས་རེམ། སྒེག་འཆོས་བྱ་ཕོ་བས་ཆེ། མཐོན་པོའི་ངོ་ཟིན། མཉམ་པོ་ལ་མཐུན་འཇུག་ཤེས། དམའ་བ་ལ་ཁ་ཏ་འགྲོ། འཚོང་ལ་ཁེ་འགྱུར་ཐོན་པ་འདི་ཀ་སྙིང་པོ་ཡིན་ནམ་སྙམ་ན་དེ་ནི་མ་ཡིན་ཏེ། དེ་དག་ནི་མི་དགེ་བ་དངོས་ཡིན་པས་རབ་ཏུ་བྱུང་བ་ཙམ་གྱིས་སྤང་དགོས། དགེ་བ་རྣམ་དག་བྱེད་པ་ལ་གནས་དང་གྲོགས་གལ་ཆེ་སྟེ། མདོ་སྡེ་རྒྱན་ལས། གནས་བཟང་བ་དང་གྲོགས་བཟང་བ། །རྣལ་འབྱོར་བདེ་བའི་ཡོན་ཏན་ལྡན། །ཞེས་གསུངས་པས་གནས་དགོན་སྡེ་དང་གྲོགས་དགེ་བའི་བཤེས་གཉེན་ལ་བསྟེན་ནས། དེའི་ངག་བཞིན་མ་ཉམས་པར་འབད་རྩོལ་བྱ་དགོས། སྡིག་གྲོགས་བསྟེན་ན་ཉོན་མོངས་པ་སྣ་ཚོགས་འཕེལ་ཏེ་སྤངས་། དགེ་བ་དགེ་བའི་བཤེས་ལ་བསྟེན་ན་འཕེལ། །སྡིག་གྲོགས་བསྟེན་ན་ཉེས་པ་འཕེལ་འགྱུར་ཞིང་། །སྡུག་བསྔལ་རྩ་བ་སྡིག་པའི་གྲོགས་སྤངས་ནས། །དགེ་བའི་འབྱུང་གནས་དམ་པར་བསྟེན་པར་བྱ། །ཞེས་གསུངས་པས་ན་བླ་མ་སློབ་དཔོན་ལ་སོགས་པ་ཆོས་བཞིན་མཛད་པ་རྣམས་ལ་བསྟེན་དགོས། བསྟེན་པ་དེ་དག་གིས་ཀྱང་དགོན་པའི་ཚོ་འཛིན་དང་བསྡུ་བ་རྣམ་བཞི་ཅི་ལྕོགས་བྱ་དགོས། ཁྱད་པར་དུ་དབུ་མཛད་དང་ཆོས་ཁྲིམས་རྣམས་ཀྱིས་ཆོ་ག་ཆོས་སྤྱོད་སོགས་རང་ལུགས་ཀྱི་ཆིངས་ཕྱག་ལེན་སྒྲིག་རྣམ་བཞག་མ་འཕྱུག་པར་བྱས་ཏེ། ཕྱི་ནང་ལུས་ངག་གི་ཀུན་སྤྱོད་འདུལ་བའི་བསླབ་བྱ་རྣམས་ལ་འབད་པ་ཐོན་པའི་ཡོན་ཏན་དང་། ནང་སེམས་ཉིད་ཀྱི་ཉམས་ལེན་ཐེག་པ་ཆེན་པོ་ཕ་རོལ་ཏུ་ཕྱིན་པ་གསང་སྔགས་རྒྱུད་སྡེ་དང་མཐུན་པ་ཉམས་སུ་ལེན་པའི་སྒོ་ནས་ཆོས་ཚུལ་ལ་གནས་པ་དང་། ཚུལ་ཁྲིམས་ངོས་ལྐོག་མེད་པར་བསྲུང་བ་གལ་ཆེ། དེའང་ཁྲིམས་ཉིས་བརྒྱ་ང་གསུམ་པོ་ཐམས་ཅད་ལ་སྒྲིབ་པ་མེད་པ་ཙམ་དཀའ་ནའང་། རགས་པ་འདི་དག་ཅི་ནས་བསྲུང་དགོས། འདི་དག་མ་སྲུང་ན་བཙུན་པའི་མིང་འདོགས་པའི་རྒྱུ་མཚན་ཡང་མེད་པས་རྩ་བ་བཞི་ཆང་དང་སྔ་སྤང་དགོས་ཏེ། སྲོག་གཅོད་པ་ནི་མིའམ་མི་མ་ཡིན་པ་གསོད་པ། མ་བྱིན་པ་ལེན་པ་ནི་གཞན་གྱི་ནོར་མཐུའམ་འཇབ་བུའི་སྒོ་ནས་བདག་གིར་བཟུང་བ་དང་། ཁྱད་པར་གཤིན་པོའི་ནོར་བརྐུ་བ་དང་རྔམ་སེམས་བྱེད་པ་ནི་ཤིན་ཏུ་སྡིག་པ་ཆེ་བར་གསུངས། གཤིན་པོ་དེ་རབ་བྱུང་ཡིན་ན་དང་པོ་ཐ་མའི་བྱིན་རླབས་མ་བྱས་པར་ཁྱེར་ན་ཕྱོགས་བཅུའི་དགེ་འདུན་གྱི་རྫས་ལ་བརྐུས་པར་འགྲོ། དང་པོ་ཐ་མའི་བྱིན་རླབས་བྱས་ནས་བརྐུས་ན་མཚམས་ནང་དེའི་དགེ་འདུན་ལ་བརྐུས་པར་འགྲོ་བས་མ་བྱིན་པ་ལེན་པའི་ཁོངས་སུ་འདི་ལས་སྡིག་ཆེ་བ་མེད། གལ་ཏེ་གཤིན་པོ་དེ་བར་དོར་ཡོད་ན་དེ་ངན་སོང་དུ་འགྲོ་བའི་རྒྱུ་བྱེད་པས་ངེས་པར་འཛེམས་དགོས། རྫུན་ནི་གཞན་བསླུ་བའི་སེམས་ཀྱིས་མི་བདེན་པའི་ཚིག་སྣ་ཚོགས་སྨྲ་བ་སྟེ་དགེ་འདུན་གྱི་དབྱེན་དང་། རང་གཞན་ཀུན་ཕུང་གི་རྒྱུ་འཁྲུགས་རྩོད་སོགས་ཀྱི་རྩ་བར་འགྲོ་བས་རང་ལའང་གོས་པ་མ་ཚད་འཇིག་རྟེན་དུའང་མི་གྲར་དྲང་པོར་མི་འགྲོ་བས་རང་གིས་རང་བསླད་པ་ཡིན་ཏེ། ཆོས་རྗེ་ས་སྐྱ་པཎྜིཏས། རྫུན་གྱིས་ཕ་རོལ་བསླུས་སོ་ཞེས། །སྙམ་ན་རང་ཉིད་བསླུས་པ་ཡིན། །ཞེས་གསུངས་པས་ན་སྤང་དགོས། མདོར་ན་ངོ་ཚ་ཤེས་པ་ཁྲེལ་ཡོད་པ་སྡོམ་པ་སྲུང་བ་རྣམས་ནི་རབ་ཏུ་བྱུང་བར་འདི་ཕྱི་གཉིས་ཀར་མཛེས་པའི་རྒྱན་ཡིན། འཚོང་དང་ཁེ་བུན་སྣ་བཞི་བྱེད་པ་ནི་བསྟན་པ་སྤྱི་ལ་གནོད་པས་ངེས་པར་སྤང་དགོས། འདོད་ལོག་བུད་མེད་བསྒྲོད་པ་སོགས་ཚུལ་བཞིན་མ་ཡིན་པའི་བྱ་བ་སྟེ་དེ་དག་སྤང་དགོས། མདོར་ན་ཁྱིམ་དང་བུད་མེད་ལོངས་སྤྱོད་ལ་ཆགས་པའི་འཚོང་ཁེ་སྤོགས་སྤེལ་བ་སོགས་སྡོམ་པའི་མི་མཐུན་ཕྱོགས་ཡིན་པས་སྤང་དགོས། ཆང་ནི་ཚུལ་དང་མི་ལྡན་པ་ཐམས་ཅད་བསྐྱེད་པའི་གཞི་ཡིན་ཏེ། འདུལ་བ་ལས། བཅས་ལྡན་རྣམས་ཀྱིས་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་ལྡོག་པར་བགྱིའོ་ཞེས་ཁས་བླངས་པ་དེ་དྲན་པར་བྱས་ནས། ངན་འགྲོ་བསྒྲུབ་པའི་རྩ་བ། ཐར་ལམ་འགོག་པའི་གེགས། བག་མེད་ཉེས་པ་འཕེལ་བའི་གཞི་རྩ་ཆང་ཡིན་པས་ངོས་ལྐོག་གང་དུའང་འདི་ཕྱི་དཔང་པོར་བཞག་ཏེ་སྤང་དགོས། ཁམས་ངན་པས་ནད་པའི་སྨན་ལྟ་བུ་དང་། ཕུད་ཆང་ཙམའང་ཚུར་ལེན་པ་མ་གཏོགས། ཕྱོགས་དེ་ན་ཆགས་སྡང་སྐྱེས་བུ་འགུགས་པའི་གཡོ་སྒྱུ་དྲུག་ཅུ་རྩ་བཞི་ཡོད་མོད་ཀྱི་འདི་དང་ཕྱི་མ་སྐྱེ་བ་ཀུན་ཏུ་སྡུག་པའི་གནམ་ལྡིབས་དོགས་ཡོད་པས་ངེས་པར་གཟབ་དགོས། རང་མི་འཕྱུག་པའི་དྲན་འཛིན་གལ་ཆེ། ཐབས་ལ་བསླུ་བའི་བདུད་ཡོད་ཅེས། རྒྱལ་བས་གསུངས་པ་དྲན་པར་གྱིས། ཞེས་གསུངས་ཤིང་། སྤྱིར་རབ་ཏུ་བྱུང་བས་ཆང་བཏུང་ན་དམྱལ་བ་ངུ་འབོད་ཅེས་པ་ལྕགས་ཁང་སྒོ་མེད་མེ་རབ་ཏུ་འབར་བའི་ནང་དུ་སྐྱེས་ནས། བསྲན་བརླག་མེད་པའི་ངུ་འབོད་སྙིང་གི་དཀྱིལ་ནས་བྱུང་བ་ལྟ་བུ་མྱོང་དགོས་གསུངས། འཐུང་མཁན་ལྟ་ཞོག་རབ་བྱུང་ལ་འཆང་འདྲེན་མཁན་ཡང་སྐྱེ་བ་ལྔ་བརྒྱར་ལག་རྡུམ་དུ་སྐྱེ་བར་གསུངས་པ་སོགས། མདོ་དྲན་པ་ཉེར་བཞག་ལས་ཉེས་པ་མཐའ་ཡས་པ་གསུངས་པ་ལ་དཔང་པོར་མཛད་འཚལ། བྱེ་བྲག་ཏུ་ཆོས་སྡེའི་གྲྭ་པའི་ཁྲོད་དུ་ནག་ཆང་མི་འགྲིམ་པར་གནད་ཆེ། རྒྱུ་མཚན་རང་གི་མ་དང་སྲིང་མོ་ཡིན་རུང་གཞན་གྱི་མ་སྲིང་མ་ཡིན་པའི་ཕྱིར་གྲོགས་མཆེད་དམག་སྐུད་སོང་བའི་དཔེ་ལྟར། མ་ནས་མི་འགྲིམ་པ་ཨེ་ཝཾ་ཆོས་ལྡན་ལྟ་བུ་མ་བྱུང་ཡང་དགོན་ནང་དུ་བུད་མེད་ཞག་ཉལ་མི་ཆོག །གལ་ཏེ་གཞན་འཕྱར་ཁ་སྒྲོགས་པའི་གཞི་ཞག་ཏུ་སྡོད་པས་གཙོས་ཆུ་ལེན་འཕྱར་ཁ་སོགས་མངོན་མཚན་ཆེ་བ་བྱུང་ན་ལུགས་གཉིས་ཀྱི་ཆད་པ་ཡོད་ཅིང་། སོ་སོས་དྲན་ཤེས་པ་བྱུང་ན་དགེ་བའི་བཤེས་གཉེན་རྣམས་ཀྱིས་ལོངས་སུ་སྤྱོད་པའི་དཀོར་རྫས་སྦགས་པའི་ཉེས་དམིགས་ལ་བསམ་མི་ཕོད་ཅིང་། གླིང་ཧྲག་ཏུ་ན་བཟའི་ཛལ་པ་འགོང་པའི་ཉེས་པའང་སོ་སོའི་སྐྱེ་བོས་སྦྱོང་དུ་མེད་མོད། སྐྱེ་བ་དམན་པ་ལ་ནི་རྣམ་སྨིན་དེ་གས་ཆོག་པར་འདུག་ཀྱང་གོ་ཤེས་པ་ག་ལ་ཡོད། གཞན་ཡང་དགེ་བའི་བཤེས་བཙུན་རྩྭ་སྔོན་འབྲེག་པ། སྐྱེ་ཤིང་གཅོད་པ། ཤྭ་མིག་མང་། རྡོ་རྐོ་བ། མདའ་རྩེད། འཆོང་རྒྱུག །ཀུ་ཅོ་འདོན་པ། དོན་མེད་ཀྱི་འཆལ་གཏམ་སྨྲ་བ་སོགས་མི་བྱ་སྟེ་སྤྱིར་རང་གི་བཅས་པ་ཉམས་ཤིང་། བྱེ་བྲག་ཆོས་སྡེ་ཆེན་པོའི་ཀུན་སྤྱོད་ལད་པ་བཅས་ཉེས་པ་དང་འགལ་བ་གཉིས་ཀ་འབྱུང་བས་ཐུགས་ལ་ངེས་དགོས། རང་གི་གྲྭ་ཤག་གམ། བླ་མ་སོགས་ལ་ལྐོག་ཏུ་རེ་གཉིས་ནས་མང་པོ་འཚོཊ་ཏེ་དོན་མེད་བག་མེད་ཀྱི་ཅ་ཅོ་སྣ་ཚོགས་པ་སྨྲས་ན་ཆགས་སྡོང་རྨོངས་གསུམ་གྱི་གཏམ་འཕེལ་བས་རང་དབང་མེད་པར་ཕྱོགས་རིས། སྡེ་ཚན། གྲྭ་ཚང་ཕན་ཚན། རང་རང་གི་བླ་མ་སློབ་དཔོན་སོགས་ཀྱི་ཞེན་ཕོ་རུས་ཡིན་པའི་སྣང་བས་རང་སྐྱོན་ཀུན་མི་མཐོང་བར་སྤྱིར་སྐྱེས་བུ་དམ་པ་རྣམས་དང་དགེ་འདུན་ལ་སྐུར་པ་འདེབས་པ་འབྱུང་བས། དེས་ན་དམྱལ་བ་མནར་མེད་ཅེས་པ་ལྕགས་བསྲེགས་ཀྱི་ཐབ་དཔག་ཚད་སྟོང་ཡོད་པའི་ནང་དུ་མེ་མུར་དང་དབྱེར་མེད་གཅིག་ཏུ་འདྲེས་ཤིང་ཁར་ཁྲོ་ཆུ་ཁོལ་མ་བླུག་ཏེ་མནར་བས་ཐར་དུས་མེད་པའི་སྐྱེ་གནས་སུ་སྐྱེ་བའི་ལས་བསགས་པ་ཡོད། སྒོས་སུ་རང་གི་སློབ་དཔོན། མཆེད་གྲོགས། གྲྭ་ཚན་སོ་སོའི་སྐྱོན་ཡོན་གླེང་བས་འཁྲུགས་ལོང་འཁོན་འཛིན་དུ་སོང་ནས་འཆད་ཉན། རིམ་གྲོ། བསླབ་བྱ། སྒྲིག་སྲོལ་སོགས་ལས་གཡེལ་བའི་རྒྱུ་དང་། གཞན་ཡང་མི་དགེ་བ་མང་པོ་འབྱུང་ངེས་པས། བདུད་དང་པོར་ངག་ལ་འཇུག་ཅེས་པའི་དོན་ཤེས་པར་བྱས་ཏེ། དེ་བཞིན་དུ་མ་སོང་བར་སེམས་ཀྱི་གླང་པོ་དྲན་ཤེས་ཀྱི་ལྕགས་ཀྱུས་འཛིན་དགོས། གཙོ་ཆེར་རང་གི་ཆོས་ལུགས་དེ་ལ་ཉམས་རྟོགས་མ་བྱུང་བར་རི་བོང་ཅལ་རྒྱུག་གི་རྗེས་སུའང་འབྲངས་གལ་མི་ཆེ་སྟེ། དཔེར་ན། །རྐང་པ་ཡ་གཅིག་མ་བཙུགས་པ། །གཉིས་ཀ་བཏེགས་ན་འགྱེལ་བའི་རྒྱུ། ཞེས་པ་ལྟར་དང་། བྱང་ཆུབ་སེམས་དཔའི་ནོར་བུའི་ཕྲེང་བ་ལས། ཐོག་མར་བརྩམས་པ་གང་ཡིན་པ། །ཞེས་སོགས་གསུངས་པ་བཞིན་མཐར་ཕྱོགས་གཅིག་གི་གོ་བའི་བརྡ་ཙམ་མི་ཆོད་ཀྱིས་དོགས་པ་ཡོད་པས། རང་རང་གི་ཆོས་ལ་གོམས་འདྲིས་ཀྱི་སྙིང་རུས་བྱུང་ན་གཞན་རྗེས་རྒྱུག་པ་ལ་སྙིང་པོ་དེ་ལྷག་གཅིག་མེད་ངེས་པས་ན་ཐུགས་ལ་ཞོགས། ལར་གྱི་ཀུན་སྤྱོད་ཀྱང་གཙུག་ལག་ཁང་དུ་ཚོགས་ཟིན་ནས། གཙོ་ཆེར་ཁ་འཁྲུགས་དང་ལག་འཐབ་རིགས་མི་བྱ། གལ་ཏེ་བྱེད་མཁན་བྱུང་ན་ངོ་དབང་དུ་མ་སོང་བར་དབུ་ཆོས་ནས་ཕྱིར་འདོན་པ་དང་བཤགས་པའི་ཕྱག་གྲངས་འཚལ་བཅུག །གྲྭ་པ་འབྱོར་ལྡན་འགའ་རེས་སྐྱིད་ཆོས་བྱེད་ནས་ཚོགས་སུ་མི་འགྲོ་བ་ཡོད་པས་དེ་ལྟར་མི་བྱེད་པར་ཚོགས་སུ་འགྲོ་དགོས། རབ་ཏུ་བྱུང་བ་རྣམས་ཀྱི་ཆ་ལུགས་ལ་མཁོ་བའི་གདིང་བ། གྲྭ་ཞྭ། གཟན་ཤམ་སོགས་ཆ་འགྲིཊ་བྱེད། གྲལ་ལ་འདུག་ཚེའང་བཟུར་འདུག །མགོ་གཏུམས། རྒྱབ་བསྙེས། དགེ་འདུན་གྱི་དབྱེན། རེ་རེ་གཉིས་གཉིས་མགོ་བཏུད་དེ་གཏམ་གླིང་འདོན་པ་དང་། གྲལ་གྱི་དཀྲུགས་ཤིང་སོགས་མི་བྱ་སྟེ། མི་གཅིག་གིས་འདོན་པའི་དཀྲུག་ཤིང་བྱས་ན་དགེ་འདུན་གྲངས་དུ་ཡོད་དེ་སྙེད་ཀྱི་ཞལ་འདོན་བཅག་པའི་ཉེས་པར་འགྲོ། ཆོ་ག་རྣམས་རང་རང་གི་དབང་མ་ཐོབ་པར་རྣམ་གྲངས་སུ་མི་མཛུད། གལ་ཏེ་བགྲང་ན་ཕན་ཡོན་ལས་ཉེས་དམིགས་ཆེ། ཇ་ཐུག་སོགས་གསོལ་སྐབས་ཅག་ཅག་དང་ཙུག་ཙུག་གི་སྒྲ་ཆེན་པོ་དང་། མཆོད་བཞིན་པས་ཁ་མི་འགེག་པར་གཏམ་གླེང་མི་བྱ། ཀུན་རིག་སོགས་ཆོ་ག་ཚར་གྲངས་ཧ་ཅང་མང་ན་ཚིག་ཟུར་ཉམས་ཤིང་མ་དག་པར་འགྲོ་བས་ཆོས་སྒྲོག་ལྟ་བུའི་གང་མྱུར་དང་། ཁྲོམ་ཚོགས་ལྟ་བུའི་སྐད་རྒྱང་མི་མཛད་པར་འདོན་པ་སྒྲིག་འདོན་དང་། ཕྱག་རྒྱ་མ་བྱས་ན་ཆད་ལྷག་ཤིན་ཏུ་ཆེ་བས་མ་ཆད་པར་གལ་ཆེ། དབང་རྣམས་ཐོབ་ནས་དབང་གི་དམ་ཚིག་ཉམས་ན་དབང་ཐོབ་ཀྱང་མི་ཕན་པའི་སྟེང་དམ་ཉམས་སུ་འགྲོ་ཞིང་། ཕྱིར་མར་རྡོ་རྗེའི་དམྱལ་བར་སྐྱེ་བས་དེའི་སྤང་བླང་རྩ་ལྟུང་བཅུ་བཞིར་ཐོས་བསམ་ལ་འབད། འདི་མེད་ན་དགེ་བ་མང་པོ་བྱས་ཀྱང་མི་ཕན་ཏེ། འཁྲུལ་སྤང་ལས། འདི་མེད་ན་འགྲམ་རྩ་ཟད་པའི་ཁང་རུལ་བཞིན། །ཞེས་གསུངས། མདོར་ན་རང་ཉིད་སློབ་གཉེར་མཁས། ཚུལ་ཁྲིམས་གཙང་། བསྙེན་སྒྲུབ་མང་དུ་བྱས་ཀྱང་གཞན་ལ་ཁྱད་གསོད་དང་། ང་རྒྱལ་སྤངས་ནས་དམན་ཆ་འཛིན་དགོས་པ་སོགས་བཅའ་ཡིག་ལྷག་བསམ་རབ་དཀར་ལྟར་སྤང་བླང་བྱ་དགོས། ཁ་སྣའི་དུད་པ་འཐེན་མི་རུང་ཞིང་། དགོན་ནང་དུ་སྡོད་ཚེ་ཞྭ་རིགས་གོས་རིགས་མི་གཅིག་པ་དང་། གླིང་ཧྲག་ཏུ་ཕན་ཚུན་འགྲོ་ནའང་རབ་ཏུ་བྱུང་བ་མ་ཡིན་ཡང་གཟན་དཀྲིས་མེད་པར་མི་འགྲོ། རབ་ཏུ་བྱུང་ནས་གཟན་ཤམ་མེད་དུ་འགྲོ་ག་ལ་སྤོབས། སེར་ཁྱིམ་པའི་ཆ་ལུགས་ཙམ་ལ་ནི་འགྲན་ག་ལ་ནུས། གྲོང་ཆོག་སོགས་ཕྱོགས་སུ་འགྲོ་ཚེའང་ཐམས་ཅད་ཀྱིས་གྲྭ་ཆས་མི་བསྐྱུར། བོད་སོག་གི་ཨེམ་ཆི་འགྲོ་བ་ལྟ་བུ་ཅི་ལ་རུང་། ཆོམ་རྐུན་སོགས་ཀྱིས་འཇིགས་པའི་སར་འགྲོ་ནའང་མང་པོ་བསྡོངས་ནས་འགྲོ་བ་ཙམ་ལས་གོ་མཚོན་ཐོགས་ནས་འགྲོ་བར་མ་གསུངས་ན། དམག་མིའི་འགྲོ་ཆས་ལྟ་བུ་ག་ལ་རུང་། ཕ་གཞིས་སོགས་སུ་ན་ཚ་དང་དགོས་པའི་དབང་གིས་མི་འགྲོ་ཁ་མེད་བྱུང་ན་བླ་ཆོས་ལ་དགོངས་པ་ཞུས་ནས་དུས་ཞག་དཀྲིག་སྦྱར་མ་བྱུང་བར་འགྲོ་མི་ཆོག །གྲོང་ཁྱིམ་དུ་དགོས་མེད་ཀྱི་ཞག་གྲངས་བསྡད་ན་གཉེན་པོ་ཆུང་བ་རྣམས་ཆུད་ཟོས་སུ་འགྲོ། ཆེ་འབྲིང་རྣམས་ཀྱང་ཐུགས་དམ་གྱི་སེལ་དུ་འདུག་པས་གནད་ཤེས་པར་མཛད་དགོས། ཁྱི་དང་ཉེ་ཚད་རྨ་དང་ཉེ་ཞེས་པའི་དཔེར་ཡིན། གྲྭ་པ་ཆས་ཀ་ཤིན་ཏུ་དཀོན་པ་ཡིན་ན་བཞི་གྲྭ་ཡན་གྱིས་གྲྭ་ཆས་མི་བསྐྱུར་བ་བསོད་སྙོམས་ཇི་ལྟར་རིགས་པར་བྱེད། དེས་བསྟན་པ་དང་དགེ་འདུན་གྱི་ཁྲིམས་ལ་མི་འགལ་བ་མ་གཏོགས། རྐུ་རྫུན་ལ་སོགས་པ་བྱེད་པ་རྣམས་ནི་རང་གི་སྡོམ་པ་འཇིག་པས་འཕྲལ་ཡུན་ཀུན་ཏུ་སྡུག་བསྔལ་བསྐྱེད་པའི་རྒྱུ་ཡིན་པས་མི་བྱེད་པར་གལ་པོར་ཆེ་གདའ། དཀོར་རྫས་རྣམས་སུ་ཤ་ལ་གཅོད་པ་ལྟ་བུ་འཇུ་དཀའ་བར་ཤེས་པར་བྱས་ནས་འཇུ་བའི་ཐབས་ཁ་བཏོན་སོགས་ལ་འབད་པར་བྱ་དགོས། དེ་ལྟར་མིན་ན་དཀོར་ཟོས་པའི་ཉེས་པ་ཆེན་པོས་དམྱལ་བར་སྐྱེ་ཞིང་། ཆུང་བ་རྣམས་ཀྱང་སྐྱེ་བ་ཕྱི་མར་སྦྱིན་བདག་གི་སྒོ་ཁྱི་དང་བོང་བུ་དང་བྲན་གཡོགས་རྣམས་སུ་སྐྱེ་བར་བཤད་པས། སྲོག་འཚོ་ཙམ་གྱི་ཆོག་ཤེས་ལ་བརྟེན་ནས་ཐོས་བསམ་སྒོམ་གསུམ་ལ་འབད་དགོས། ཆོས་སྤྱོད་སྨོན་ལམ་རྣམས་མ་ལོབས་པར་ཆོ་ག་རྣམས་མི་བལྟ། སྒྲུབ་མཆོད་ཆོ་ག་རྣམས་ལོབས་ནས་དེ་ཙམ་གྱིས་ཆོག་ཤེས་མི་བྱེད་པར་ཀུན་ཏུ་དགོས་པའི་གཞུང་བདུན་ལ་སོགས་པའི་སློབ་གཉེར་གཞན་རྣམས་ལ་ཡོན་ཏན་ཅི་མཆིས་འབད་དགོས། དེ་ལྟ་བུའི་སློབ་སྦྱོང་མཛད་མཁན་བྱུང་ན་དཔོན་པོ་ལ་སོགས་པས་ཀྱང་མགོ་འདོན་བདག་རྐྱེན་གྱི་སོར་འདོན་པར་མཛད། གང་གི་ཕྱིར་ན། ཡུལ་དེར་མཁས་པ་བྱུང་ན་ཆོས་ལོག་སུན་དབྱུང་བ་དང་། དམ་པའི་ཆོས་ཉམས་སུ་ལེན་ཤེས་པ། མཁས་པ་དགའ་བ་བསྐྱེད་ནུས་པ་སོགས་བསྟན་པ་ལ་ཕན་པའི་དགོས་པ་ཡོད། དེ་དག་གི་ཡན་ལག་ཏུ་ཆོས་ཁྲིམས་ཉེས་སྐྱོན་མེད་ཅིང་བློ་གཙང་བ། བསམ་པ་དཀར་བ། བྱ་བ་སྤྱི་སོར་གནས་ཤིང་བསྟན་པ་ལ་སེམས་ཉེ་བ། རང་འདོད། ཕྱོགས་ཞེན་མེད་པ་གཟུ་བོར་གནས་པ་གཅིག་གིས་ཁྲིམས་མནན་པའི་ངག་བཞིན་བྱ་དགོས། ཆོས་ཁྲིམས་འདི་སངས་རྒྱས་ཀྱིས་འདུལ་བ་ནས་བཅས་པ་དང་མཚུངས་པ་ཡིན་པས་བདག་པོ་དང་རྒྱབ་གནོན་བླ་མ་དང་དཔོན་པོ། དགེ་འདུན་སྤྱི་དང་བཅས་པས་བྱས་ནས། དེ་ལ་ཐམས་ཅད་ཀྱིས་དམ་བཞག་བྱེད་པ་གལ་ཆེ། དེས་ཀྱང་གྲྭ་པའི་དཀྲུགས་ཤིང་དང་། ཡོན་བདག་ལ་མ་དད་པར་བྱེད་པའི་སྤྱོད་ངན་སྣ་ཚོགས་བྱེད་པ་རྣམས་ཀྱི་མགོ་གནོན་དང་། ཞལ་ཏ་སྔོན་དུ་འགྲོ་བའི་སྒོ་ནས་ཀུན་སྤྱོད་ངན་པ་ལས་བཟློག་པའི་ཐབས་ཚུལ་སྣ་ཚོགས་པས་བཟང་པོར་སྦྱར། དངོས་སུ་བསླབ་འོས་པ་རྣམས་ལ་རང་གིས་བསླབ་སྟེ། དེའང་ང་རྒྱལ་ཅན་རྣམས་ལ་སྨད་ཅིང་སྐྱོན་ཤེས་པས་ཞུམ་པའི་ཐབས་བྱས། ལེ་ལོ་དང་སྒྱིད་ལུག་པ་རྣམས་ལ་དགེ་ཡོན་གྱིས་སྤྲོ་བ་བསྐྱེད་དེ་བརྩོན་འགྲུས་ལ་སྦྱར། ཤེས་རབ་ཆུང་ཞིང་དབང་པོ་རྟུལ་བ་རྣམས་ལ་བསྟོད་ར་ལྟ་བུའི་སྒོ་ནས་སྤྲོ་བ་བསྐྱེད། ཤེས་རབ་ཆུང་ལ་སྡུག་བསྲན་ཆེ་བ། བསམ་པ་བཞིན་མ་འགྲུབ་པ། ཁམས་འདུས་པ་རྣམས་ལ་སྐྱོ་བ་སེལ་བ། ཁམས་འདུས་ཞི་བའི་ཐབས་བྱ། སློབ་གཉེར་ལ་འདུན་པའི་དོན་གཉེར་ཡོད་ཀྱང་མཐུན་རྐྱེན་མེད་པ་རྣམས་ལ་མཐུན་རྐྱེན་འཛོམས་པའི་གྲོགས་དན་བྱ། དབུ་ཆོས་ཀྱིས་དངོས་སུ་བསླབ་མི་འོས་པ་རྣམས་ལ་མགོ་སྡུད་མཆེད་གྲོགས་གཉེན་འདུས་སོགས་ལ་སློབ་ཏུ་འཇུག །ཚུལ་ཁྲིམས་འཆལ་ནས་ཁྱིམ་པ་མ་དད་པ་རྣམས་རྩ་བ་ལ་སྐྱོན་བྱུང་ན་བསྐྲད་པར་བྱ་ཞིང་། སྐྱོན་མ་བྱུང་ཙམ་ཡིན་ན་བསྡིགས་པ་དང་། སྨད་པ་དང་། ཕྱིར་དགྱེར་བའི་སྒོ་སྣ་ཚོགས་ཀྱིས་གདུལ། དེས་ཀྱང་མ་ཉན་པར་ཚར་གཅད་འོས་པ་རྣམས་བརྡུང་བཙོག་དྲག་པོ་མི་བྱ་བར་གནས་ནས་དབྱུང་བའི་ལས་བྱ། དེ་ཐམས་ཅད་ལའང་འཕྲལ་ལ་ཁྲོ་བ་ལྟར་སྣང་ཡང་། ཕུག་བྱམས་སྙིང་རྗེའི་སྒོ་ནས་ཕན་འདོགས་པའི་བསམ་པས་བྱ་དགོས། དེ་བཞིན་དུ་ཡོན་བདག་བཟང་པོ་རྣམས་ལ་གཟེངས་བསྟོད་དང་། བར་པ་རྣམས་ལ་བསླབ་བྱ། ངན་པ་རྣམས་ལ་ལྷུང་བཟེད་ཁ་སྦུབས་ལྟ་བུའི་ལས་བྱ་བ་གསུངས་པ་བཞིན་གང་ལ་གང་འདུལ་གྱི་སྒོ་ནས་ཆོས་ཀྱིས་ཕན་གདགས་ཏེ་བསྟན་པ་ལ་མོས་གུས་བསྐྱེད་དུ་གཞུག །ཁ་སྨྲས་དང་། ཁ་མཆུ། ནང་རྩོད་མི་འབྱུང་བའི་ཐབས་རང་ལ་ནུས་པ་མེད་བཞིན་དུ་གཞན་གྱི་མགོ་འདོན་དང་སྐྱབས་ཁེབ་ལྟ་བུའི་བདག་འཛིན་མི་བྱ། ཁ་ཡག་ཤོད་སྒྲོབ་ཅན་གྱི་ཁོར་གཡོཊ་མི་བརྟེན། གལ་ཏེ་དེ་འདྲ་བྱེད་མཁན་བྱུང་ན་རང་དང་འབྲེལ་ཐག་གཅད་པ་གལ་ཆེ། སྐྱེ་བོ་ཐ་མལ་པ་རྣམས་ཀྱིས་ཀྱང་དགེ་འདུན་ལ་ཕྱག་དང་ཞེ་ས། བསྙེན་བཀུར་བྱ། དགེ་འདུན་འབྱོན་ལམ་དུ་སྡོད་པ། རྐང་བརྐྱང་། ཞྭ་གོན་པ། རྟ་ཞོན་པ། ཚོགས་པ་གཤགས་ནས་འགྲོ་བ་སོགས་མི་བྱ་སྟེ། བསྟན་པ་ལ་སྨ་འབེབས་སུ་འགྲོ་ཞིང་། རང་གི་བསོད་ནམས་ལ་གནོད། དགེ་འདུན་པ་ནི་ལྷ་དང་བཅས་པའི་འཇིག་རྟེན་ཐམས་ཅད་ཀྱི་སྐྱབས་གནས་ཡིན་པ་ཤེས་དགོས་སོ། །ཞེས་པ་རྗེ་བླ་མ་འཇམ་མགོན་ཐམས་ཅད་མཁྱེན་པ་སངས་རྒྱས་ཕུན་ཚོགས་པའི་ཞལ་སྔ་ནས་མཛད་པའི་དགོན་གནས་ཀྱི་བཅའ་ཡིག་ལྷག་བསམ་རབ་དཀར་གྱི་ཚིག་དོན་འགའ་རེ་ལུང་འདྲེན་ལ་བསྟེན་པ་སོགས་ཐུན་མོང་བ་རྣམས་ཀྱིས་གོ་དཀའ་བར་བརྟེན། ལུང་རྣམས་བཏུས་ཤིང་དགོས་དོན་རྣམས་དབྲི་བསྣན་ཅུང་ཟད་དང་། ཨེཝཾ་ཆོས་ལྡན་སོགས་གྲྭ་སའི་བཞེད་སྲོལ་མཐོང་བ་རྣམས་གོ་བདེ་བའི་ངག་གིས་བཀྲལ་བའི་བཅའ་ཡིག་ལྷག་བསམ་མཛེས་རྒྱན་ཞེས་བྱ་བ་འདི་ནི་ཡངས་པའི་ས་ཆེན་ཆོས་བཞིན་སྐྱོང་བ་མི་དབང་ཆེན་པོའི་བཀའ་སྩལ་ཕེབས་ངོར། ཕན་བདེ་གླིང་དུ་དགེ་སྦྱོར་གྱི་ཐུན་མཚམས་སུ་མྱུར་བར་བྲིས་པའི་དགེ་བས་རྒྱལ་བའི་བསྟན་པ་དར་ཞིང་བསྟན་འཛིན་འཕེལ་བ་དང་། བསྟན་པའི་སྦྱིན་བདག་ཆེན་པོའི་ཆབ་སྲིད་མངའ་ཐང་དབྱར་མཚོ་ལྟར་གོང་ནས་གོང་དུ་འཕེལ་བའི་རྒྱུར་གྱུར་ཅིག །གང་གི་གསུང་དུ་ཁ་གསལ་མ་བསྟན་པ་ཆང་འདི་སྔོན་གྱི་ཆང་ཐོ་སོགས་ལ་དན་ཆ་ཡོད་མེད་འདུག་ཚེ། ད་ནས་བཟུང་སོག་ཁང་མན། ཚུར་རི་ཀླུ་མཁར་བྲག་ཆུ་འཐུང་། ཕར་རི་ཀོ་ཀོའི་ལམ་སྣེ་ཆུང་ཆུང་ཡན། རྡོ་ཁོ་ཐང་ཕུག་གྲུབ་ཆེན་ཆོས་ཁྲིམས་མན་བཟུང་གི་བར་ལམ་འདིར་ཆང་ཁུར་འགྲིམ་དང་འཐུང་བ་སོགས་ཆང་གི་མིང་ཡང་གྲགས་མི་ཆོག། གལ་ཏེ་གབ་གསང་གིས་ཁུར་འགྲིམ་འཐུང་བླུད་བྱེད་མཁན་བྱུང་ན། རིག་ངེས་མཐོང་ངེས་མིང་ཟིན་སྐད་དན་གྱིས་འདི་གར་ཆོས་ཁྲིམས་དང་། གཉེར་ཁང་སྒོར་སྦྲན་མཁན་བྱུང་ན་ཆང་ཁུར་འཐུང་མཁན་གང་ཡིན་ཆས་ཀ་སྲབ་འཐུག་དང་བསྟུན་པའི་ཆད་པ་མཛོ་ནས་འབྲི་ཁལ་ཡན་གྱི་ཆད་པ་བླངས་ནས་རིག་མི་དེ་ལ་གཏང་རག་ཏུ་སྦྱིན་པ་དང་། གཞན་ཁྲིམས་མཐུན་གྱི་ཉེས་ཆད་དགར་རོ། བུད་མེད་ཀྱང་ཆེ་མགོ་དཀར། ཆུང་ལང་གོག་ཡན་དྲག་ཞན་འབྲིང་གསུམ་དགོན་ནང་དུ་ཞག་ཉལ་མི་ཆོག །གལ་སྲིད་བག་མེད་བྱུང་ན་བཅའ་ཡིག་དྭངས་ཤེལ་མེ་ལོང་ནང་ལྟར་ཆད་པ་ཟམ་ལུས་མེད་པར་བྱེད། ཟམ་ཆེན་ཁ་ནས་བཟུང་བླ་མ་ཆོས་རྗེ་མིན་པ་དྲག་ཞན་མེད་པ་ཀུན་གྱིས་ཞྭ་ཕུད་འབུལ་བ་དང་། གཞུང་ལམ་མ་གཏོགས་གླིང་ཉིན་སྲིབ་གང་ཡང་རྟ་ཞོན་ཁྲིད་མི་ཆོག །གལ་ཏེ་ཤེས་བཞིན་ཞེ་སུན་བྱེད་པ་བྱུང་ན་ལུས་ཆས་བླངས་ནས་བླ་བྲང་དུ་འབུལ། དུས་ཇ་བཙུག་ཆོག་ཀུན་ལ་གྲྭ་པའི་ཚོགས་བཞུགས་དང་སྐུ་རིམ། མཚམས་པ་དང་གཞི་བསྙེན་སྡོད་མི། ན་ངེས་པའི་ནད་པ་མ་གཏོགས། རང་དོན་གྱི་མཚམས་དང་། མི་ཁོམ་པ། ལས་ཚན། སྤར་ཁང་ནང་ཟེར་བའི་ཟ་འདོད་དྲག་ཞན་སུ་ལའང་འགྱེད་མང་དཀོར་གྱི་སྐལ་བ་ལེན་པ་དང་སྦྱིན་པ་བྱེད་མི་ཆོག །ཕ་གཞིས་སུ་འཁོར་ཞག་འགྲོ་བའང་ལྷ་རུ་བའི་རིགས་དབྱར་ཐོག་འདིར་ལམ་ཞག་ཕར་ཚུར་བཞི་བརྩིས་པའི་ཞག་སོ་བཞི་སྡོད་ཆོག་པ་དང་། རྦས་པ་སོཊ་ཉེ་སྐོར་རིགས་ཀྱང་དབྱར་ཞག་བཅོ་ལྔ། དགུན་ཞག་བཅོ་ལྔ་འགྲོ་ཆོག །ན་ཚ་ཤི་ཆད་མི་འགྲོ་ཀ་མེད་བྱུང་ན་ཆོས་ཁྲིམས་པས་གནད་དང་བསྟུན་པའི་དུས་བསྒོ་བ་ལྟར་མ་གཏོགས་རང་མོས་སུ་འགྲོ་བ་དང་། སྡོད་ཡུན་སོགས་རང་མོས་མི་ཆོག་པ་བཅས་ཀུན་གྱིས་ཡིད་འཇགས་གྱིས། ཞེས་བཅའ་ཡིག་བཀོད་པ་འདི་བཞིན་དགོན་པའི་སྒྲིག་སྲོལ་ཤིན་ཏུ་ལེཊ་པར་སྣང་ངོ།། ༈ གཉིས་པ་བསྟན་པའི་རྩ་བ་བཤད་གྲྭའི་སྐོར་ནི། དེའང་སློབ་དཔོན་དབྱིག་གཉེན་གྱིས། །སྟོན་པའི་དམ་ཆོས་རྣམ་གཉིས་སོ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་པ་སྨྲར་བྱེད་པ། །སྒྲུབ་པར་བྱེད་པ་ཁོ་ནའོ། །ཞེས་གསུངས་པ་ལྟར་སངས་རྒྱས་ཀྱི་བསྟན་པའི་སྙིང་པོ་ནི་སྒྲུབ་པ་ཉམས་ལེན་བྱེད་པ་ཡིན་ཅིང་། དེའང་གཞུང་ལུགས་དྲི་མ་མེད་པ་ལ་ཐོས་བསམ་གྱི་ཤེས་རབ་བསྐྱེད་པ་ལ་རག་ལས་པས་བསྟན་པའི་རྩ་བ་ནི་དམ་ཆོས་འཆད་ཉན་བྱེད་པ་འདི་ལ་ཐུག །དེས་ན་ཆོས་གྲྭ་ཆེན་པོ་འདི་ཉིད་དུ་མཁྱེན་དཔྱོད་རབ་ཏུ་རྒྱས་པའི་མཁས་གྲུབ་བསམ་གྱིས་མི་ཁྱབ་པ་ཞིག་གིས་མདོ་སྔགས་རིག་གནས་དང་བཅས་པའི་གཞུང་གི་བཤད་པ་དང་མན་ངག་གི་ཕྱག་ཁྲིད་མཐའ་ཡས་པ་མཛད་ཅིང་། བློ་གསལ་དོན་གཉེར་ཅན་བསམ་གྱིས་མི་ཁྱབ་པ་ཞིག་གིས་གུས་རྟག་གི་བརྩོན་པ་ལྷུར་བྱེད་པའི་ཐོས་བསམ་དྲི་མ་མེད་པས་རིགས་གཞུང་དར་རྒྱས་སུ་བྱུང་ཡོད་པ་ནི་རྣམ་ཐར་ལོ་རྒྱུས་ཀྱི་ཁོག་ལས་ཤེས་ཤིང་། རབ་བྱུང་བཅུ་བཞི་པའི་ནང་སྡེ་དགེ་ཡབ་ཆེན་གྱི་དུས་སུ་དཔོན་སློབ་བྱམས་པ་སྨོན་ལམ་དང་། མཧྭཔཎྜིཏ་འཇམ་དབྱངས་དགྱེས་པའི་བློ་གྲོས་གཉིས་ཆེད་དུ་གདན་འདྲེན་གྱིས་མདོ་སྔཊ་རིག་གནས་དང་བཅས་པའི་བཤད་གྲྭ་བཙུགས་པར་བཤད་པས་མཚོན། མཛེས་ཕུ་བཀྲ་ཤིས་རབ་བརྟན་གླིང་གི་བཤད་གྲྭ་དངོས་སུ་བཙུགས་པ་ནི། སྔར་རབ་བྱུང་བཅུ་དྲུག་པའི་ཤིང་རྟ་ཕྱི་ལོ་༡༩༥༤ལོར་སྡེ་དགེའི་བཙུན་མོ་འཇམ་དབྱངས་དཔལ་མོས་རྒྱལ་སྲིད་སྐྱོང་བཞིན་དེ་ཉིད་ཀྱིས་དབུ་འཛིན་དང་རྩ་བའི་སྦྱིན་བདག་མཛད། ཁྲོ་ངེ་ཚང་ནས་རྡ་སྒོར་སྟོང་ཕྲག་ལྔ། བྱ་རྒོད་ཚང་ནས་འབྲི་མ་བརྒྱའི་མར་རྒྱུན་བཞག་པ་སོགས་ཀྱིས་བདག་རྐྱེན་བྱས་ཏེ། སྔར་གྱི་མཛེས་ཕུ་ལྷ་ཁང་ཉམས་གསོ་ཅུང་ཟད་དང་། དེ་འཁྲིས་སུ་བཤད་གྲྭའི་གྲྭ་ཤག་བདུན་ཅུ་ཙམ་བཟང་ལེགས་གསར་དུ་བསྐྲུན། བཤད་གྲྭའི་ཁང་ལས་མ་ཟིན་སྔོན་དབྱར་གནས་མཁན་པོ་བསོད་ནམས་མཆོག་གྲུབ་ཀྱིས་སྲིབ་དགོན་ལྷ་ཁང་དུ་སྤྱོད་འཇུག་སོགས་ཀྱི་གཞུང་བཤད་མཛད། ཁང་ལས་ཟིན་ནས་ཤིང་ལུག་ཕྱི་ལོ་༡༩༥༥ལོ་སྨད་ཙམ་དུ་རྫོང་གསར་ཁམས་བྱེའི་མཁན་རབས་གཉིས་པ། དབོན་སྟོད་མཁན་ཆེན་མཁྱེན་རབ་ཆོས་ཀྱི་འོད་ཟེར་ཆོས་གྲྭ་འདིར་གདན་དྲངས་ནས་བཤད་གྲྭ་དངོས་སུ་དབུ་བཙུགས་ཏེ་ཕོག་གྲྭ་བ་ཉེར་ལྔ་ཙམ་ལ་གཞུང་བཤད་ལོ་ངོ་གཉིས་ཙམ་མཛད། དེ་ནས་རྒྱལ་མཚན་བླ་མ་ཆོས་གྲགས་རྒྱ་མཚོ་མཆོག་གིས་མཁན་རབས་གཉིས་པའི་ཁུར་བཞེས་ཏེ་འཆད་པའི་དགའ་སྟོན་ལོ་གཅིག་ཙམ་སྤེལ། དེ་ནས་རྫོང་གསར་འཇམ་དབྱངས་ཆོས་ཀྱི་བློ་གྲོས་ལ་བཤད་གྲྭའི་མཁན་པོ་ཞིག་གནང་དགོས་ཚུལ་ཞུས་པ་ལྟར་པདྨདམ་ཆོས་ཁམས་བྱེ་བཤད་གྲྭའི་སྐྱོར་དཔོན་མཛད་བཞིན་པ་འདི་གའི་བཤད་གྲྭའི་མཁན་པོར་མངའ་གསོལ་བ་ལྟར་ཕེབས་ཏེ་མཁན་རབས་གསུམ་པའི་ཆོས་ཁྲིར་བཞུགས་ནས་ལོ་ངོ་གཅིག་ཙམ་ལ་འཆད་སྤེལ་གྱི་རྒྱུན་སྐྱོང་། དེ་ནས་དགོན་པ་བཅོས་བསྒྱུར་དང་ཁེལ་བས་རེ་ཞིག་བཤད་གྲྭའི་གོ་སྐབས་བྲལ། བཤད་གྲྭ་འདིར་ཉིན་ལྟར་ཆོས་ཐུན་དང་བསྐྱར་སྦྱངས་རེ་མཛད་ཅིང་ནངས་རེ་བཞིན་རྒྱུན་ཆགས་གསུམ་པ་དང་བཅས་ཡར་མར་གྱི་ངོར་གསོ་སྦྱོང་མང་ཚོགས་དང་། ཉིན་རྟག་པར་མཛེས་ཕུ་མགོན་ཁང་དུ་གྲྭ་པ་བཞི་རེ་འདོན་རེས་ཀྱིས་བསྐང་གསོ་རྒྱས་པར་གསུངས། བཤད་གྲྭ་འདི་བཙུགས་ནས་མཁན་རབས་གསུམ་དང་ལོ་ངོ་བཞི་ཙམ་ལས་མ་སོང་བས་འཆད་པའི་རྒྱུན་སྐྱོང་བའི་མཁས་ཆེན་དེ་ཙམ་མ་བྱུང་ཡང་དབྱར་གནས་མཁན་པོ་བློ་གྲོས་བསྟན་འཕེལ་དང་། ངག་དབང་མཐུ་སྟོབས་སོགས་ཉམས་ལེན་ཆེ་བའི་ཆོས་པ་རྣམ་དག་མང་དུ་བྱུང་ཞིང་། ད་ལྟར་བཤད་གྲྭ་ཆེན་པོ་ཉམས་གསོ་དང་འཆད་ཉན་ཕྱོགས་བརྒྱར་འཕེལ་བ་འདི་ལྟ་བུའི་རྟེན་འབྲེལ་དུ་གྱུར་པས་ཕན་ཐོགས་ཆེན་པོ་བྱུང་། ༈ གསུམ་པ་བསྟན་པའི་སྙིང་པོ་སྒྲུབ་གྲྭའི་སྐོར་ནི། དེའང་སངས་རྒྱས་ཀྱི་བསྟན་པའི་སྙིང་པོ་ནི་ཆོས་ཚུལ་བཞིན་དུ་སྒྲུབ་ཅིང་ཉམས་སུ་ལེན་པ་ཡིན་ལ། ཆོས་གྲྭ་འདི་ཉིད་དུ་བཞུགས་པ་ཐམས་ཅད་ནི་ཐེག་པའི་མཐར་ཐུག་རྡོ་རྗེ་ཐེག་པའི་ཉམས་ལེན་ལ་བརྩོན་ཅིང་གུས་པ་ཅན་ཤ་སྟག་ཡིན་པས། སྤྱི་འགྲིག་ཏུ་འབྱུང་འདུལ་དང་། ཀྱེ་རྡོར་བསྙེན་ཆེན། ཀུན་རིག་རྣམས་ཀྱི་བསྙེན་སྒྲུབ་ནི་ངེས་པར་དུ་དགོས་འདུག་ཅིང་། གཞན་ཡང་མགོན་པོ་ཆེ་ཆུང་། འཇིགས་བྱེད། མཁའ་སྤྱོད་སོགས་མང་པོའི་བསྙེན་སྒྲུབ་ཉམས་ལེན་བྱེད། བསྙེན་སྒྲུབ་དེ་དག་ཀྱང་ཕལ་ཆེར་དགོན་སྡེ་འདི་ཉིད་དུ་བྱེད་ཅིང་། སྒྲུབ་སྡེའི་གཙོ་བོ་ནི་རི་ཁྲོད་དྲྭ་མ་སྒང་གི་སྒྲུབ་གྲྭ་ཡིན། སྒྲུབ་སྡེ་ཆེན་པོ་འདི་ཉིད་ནི་རབ་བྱུང་བཅུ་བཞི་པའི་ནང་སྡེ་དགེ་ཡབ་ཆེན་གྱིས་གསར་དུ་བཞེངས་ཤིང་། འཇམ་མགོན་སངས་རྒྱས་ཕུན་ཚོགས་སོགས་སྐྱེས་ཆེན་དུ་མའི་བཞུགས་གནས། མཐོ་ཞིང་གཙང་ལ་དབེན་ཞིང་ཉམས་དགའ་བ། གནས་པ་ཙམ་གྱིས་བསམ་གཏན་འཁོར་བ། མཐར་སྐོར་དུ་ནགས་ཚལ་མཛེས་པས་བསྐོར་བའི་སྤང་ལྗོངས་ཡིད་དུ་འོང་བའི་དཀྱིལ་དུ་ཆགས་ཡོད་ཅིང་སྒྲུབ་པ་སྡེ་དང་བཅས་ཤིན་ཏུ་དར་རྒྱས་སུ་བྱུང་། ཕྱིས་ཡོངས་རྫོགས་བསྟན་པའི་སྲོག་ཤིང་ཆེན་པོ་རྫོང་སར་འཇམ་དབྱངས་ཆོས་ཀྱི་བློ་གྲོས་མཆོག་དང་སྡེ་དགེ་མཆོད་ཡོན་ཟུང་གིས་ཉམས་གསོ་ཟླ་མེད་མཛད་དེ། སྒྲུབ་གྲྭའི་རྟེན་དང་བརྟེན་པར་བཅས་པ་དང་། སྒྲུབ་ཁང་ཁང་མིག་བཞི་བཅུ་ཙམ་ལེཊ་གསོའི་ཐོག་སྙན་བརྒྱུད་འཛིན་པའི་སྒྲུབ་སྡེ་བཙུགས་ཏེ། སྒྲུབ་དཔོན་དགོན་ཆེན་ལྷུན་གྲུབ་སྟེང་རང་ཉིད་ཀྱི་ཟུར་བླ་རེ་མངགས་ཏེ་ས་དགོན་ཁག་ནས་འདུས་པའི་སྒྲུབ་པ་བ་ཉེར་བརྒྱད་ཙམ་ལོ་བཞི་རེའི་བར་གྱི་བཅད་མཚམས་ཀྱིས་སྒྲུབ་པའི་རྒྱལ་མཚན་སྒྲེངས། ལོ་བཞིའི་རིང་ལ་སྒྲོལ་དཀར་ཚེ་སྒྲུབ་ཟླ་བ་གཅིག །ཀྱེ་རྡོར་བསྙེན་ཆེན་ལོ་གཅིག་དང་ཟླ་བ་ལྔ། མགོན་པོ་ཕྱི་སྒྲུབ་ཟླ་བ་དྲུག །གསང་སྒྲུབ་ཟླ་བ་དྲུག །མདུན་བསྐྱེད་ཀྱི་སྒྲུབ་པ་ཟླ་བ་དྲུག་བཅས་དང་། ངོར་འཇིགས། མཁའ་སྤྱོད། དཔལ་མགོན་ཞལ་རྣམས་ཀྱི་བསྙེན་སྒྲུབ་ཟླ་བ་བཅུ་གཅིག་མཐར་གྲུབ་རྒྱལ་ཚེ་སྒྲུབ་ཟླ་བ་གཅིག་བཅས་མཛད། སྒྲུབ་སྡེ་འདིར་ནི་གཙོ་བོ་ཐུན་མིན་ཚར་ལུགས་ལྟར་གྱི་སྲོལ་རྒྱུན་སྐྱོང་ཞིང་གོང་སྨྲས་ཀྱི་བསྙེན་སྒྲུབ་ཐམས་ཅད་ཀྱང་ཉིན་ལྟར་ཐུན་བཞིའི་རྣལ་འབྱོར་དང་། ཚར་ལུགས་གཏོར་བསྔོ་ཟླ་རེའི་དུས་བཞིའི་སྐབས་ཚར་ལུགས་ལྟར་གྱི་དུས་གཏོར་གྱི་རིམ་པ་མཛད། དུས་མཆོད་སྐོར་ལོ་བསྟར་ཀྱེ་རྡོར་སྒྲུབ་མཆོད་རྡུལ་ཚོན་གྱི་དཀྱིལ་འཁོར་ལ་བརྟེན་པ་དང་། ཆོས་ཉིད་མ་ཞེས་གྲགས་པ་ཚར་ལུགས་ལྟར་གྱི་བསྐང་གཏོར་ཉིན་རེར་ལྷ་རྒྱས་རེས་དང་བཅས་པའི་དུས་མཆོད་ཡོད་ལ། ཟླ་བ་ཡར་མར་གྱི་ངོའི་གསོ་སྦྱོང་དང་། ཉིན་ལྟར་སྔ་དྲོར་གཏོར་མ་བརྒྱ་རྩ། ཉིན་གུང་ས་ལུགས་བསང་བསྡུས་དང་ཡུལ་ལྷའི་བསང་། ཕྱི་དྲོར་གསུར་བསྔོ་རྣམས་ཆག་མེད་གསུང་རྒྱུ་བྱུང་། བསྙེན་སྒྲུབ་གང་དང་གང་མཛད་པ་ཐམས་ཅད་ཀྱི་སྔོན་དུ་སྨིན་གྲོལ་རྒྱས་པ་མཁས་གྲུབ་ཆེན་པོ་གཞན་དང་སྒྲུབ་དཔོན་བླ་མ་ཅི་རིགས་པས་བསྩལ་ཏེ་སྒྲུབ་པའི་ཆིངས་དང་། སོ་སོའི་དམིགས་རྣམ་སོགས་ཕྱག་ཁྲིད་ལེགས་པར་མཛད་དེ་བསྙེན་པས་མཚན་ཉིད་ཕུན་སུམ་ཚོགས་པ་དང་ལྡན་པའི་སྒྲུབ་སྡེ་ཆེན་པོ་ཞིག་ཏུ་མཆིས། སྒྲུབ་སྡེ་འདི་ཉིད་དུ་གཏན་བཞག །མཆོད་རྒྱུན་དང་སྒྲུབ་པ་པོའི་འཚོ་བའི་ཐེབས་རྩ་འབྲི་མ་བརྒྱ་དང་སུམ་ཅུའི་སྐོར་ཡོད་ཅིང་དེ་དག་ཕལ་ཆེར་ལྷོ་འབྲོག་ཁོག་ཏུ་བཞག་འདུག །ཞིང་རྩ་ཕལ་ཆེར་རྫ་པའི་ཕྱོགས་སུ་ཡོད་ལ། ལོ་ལྟར་མར་རྒྱུན་དང་སྟོན་ཐོག་སྡུད་པར་བྱེད། སྒྲུབ་གྲྭ་ཆེན་པོ་འདི་ཉིད་ལས་སྙན་བརྒྱུད་བསྟན་པའི་བདག་པོ་བླ་མ་རིན་པོ་ཆེ་ངག་དབང་ཆོས་འཕེལ་བཟང་པོ་སོགས་གྲུབ་པའི་གོ་འཕང་མཐོན་པོར་གཤེགས་པ་དང་། གཞན་ཡང་ཉམས་དང་རྟོགས་པའི་དཔལ་མངའ། མཁྱེན་བརྩེ་ནུས་པས་གཞན་ཕན་ཕྲིན་ལས་ཀྱི་འཇུག་པ་རབ་ཏུ་ཡངས་པའི་སྐྱེས་བུ་བགྲང་བ་ལས་འདས་པ་བྱོན་པས་རྒྱལ་བསྟན་རིན་པོ་ཆེའི་སྲོག་ཆེན་པོའི་གཞིར་གྱུར། གཞན་ཡང་ལྕགས་ར་འཇིགས་བྱེད་ལྷ་ཁང་འབུམ་པ་རྒྱ་ཚའི་ཕོ་བྲང་གི་ཤུལ་དུ་མཁན་ཆེན་ངག་དབང་བསམ་གཏན་བློ་གྲོས་མཆོག་གིས་ཉམས་གསོ་བཀོད་ལེགས་མཛད་དེ། ཚར་ལུགས་ལྟར་གྱི་རྡོ་རྗེ་འཇིགས་བྱེད་ལས་གཤིན་དང་བཅས་པ་བསྙེན་པའི་སྒྲུབ་གྲྭ་གསར་དུ་བཙུགས། ལོ་རེའི་བཅད་མཚམས་ཀྱིས་ལོ་བསྟར་དགོན་ཆེན་རང་ཉིད་ཀྱི་ཟུར་བླ་རེ་སྒྲུབ་དཔོན་མངགས་ཏེ། ལོ་གཅིག་གི་རིང་ལ་ཚར་ལུགས་འཇིག་བྱེད་ལས་གཤིན་དང་བཅས་པའི་བསྙེན་པ་འགྲོ་བར་བྱེད། གཞན་ཡང་གསང་བདག་བློ་གཏེར་དབང་པོ་མཆོག་གི་སྒྲུབ་གནས་ལ་གླེ་སྟེང་ལྷུན་གྲུབ་ཡང་རྩེའི་དབེན་གནས། དབེན་གནས་སྤུར་ཞེའི་རི་ཁྲོད། སྨྱ་ཁོག་རྫོང་ཅན་རྩེ། པད་ཤེལ་དཀར་རི་ཁྲོད་སོགས་སྒྲུབ་གནས་མང་དུ་མཆིས་པ་དེ་དག་ཏུ་སྒྲུབ་པའི་རྒྱལ་མཚན་འཛིན་པ་མང་ཙམ་བཞུཊ་སོ།། ༈ གསུམ་པ་ཉམས་གསོ་ཇི་ལྟར་བྱུང་བ་དེང་གི་གནས་ཚུལ་ལ། དེའང་སྔོན་དུས་སུ་འཕགས་བོད་ཀྱི་ཡུལ་དུ་ཕན་བདེ་མ་ལུས་པའི་འབྱུང་གནས་སངས་རྒྱས་ཀྱི་བསྟན་པ་རིན་པོ་ཆེ་འདི་ལ་འཕེལ་འགྲིབ་དུ་མ་བྱུང་ཞིང། དེ་མཚུངས་སུ་སྐྱེ་དགུའི་བདེ་སྐྱིད་ཀྱང་ཉམས་གུད་སྣ་ཚོགས་པ་བྱུང་བ་དང་ཚུལ་མཚུངས་པར། བོད་རབ་བྱུང་བཅུ་དྲུག་པའི་ས་གླང་ཕྱི་ལོ་༡༩༤༩ལོའི་ཟླ་བ་བཅུ་པའི་ཚེས་གཅིག་ཉིན་ཀྲུང་ཧཱ་མི་དམངས་སྤྱི་མཐུན་རྒྱལ་ཁབ་ཅེས་པ་ཚུགས་ནས། དེ་ནས་རིམ་པར་བོད་ཡངས་པའི་ཁྱོན་དང་བཅས་པ་ལ་དབང་བསྒྱུར་ཏེ་མེ་སྤྲེལ་ཕྱི་ལོ་༡༩༥༦ལོར་ཁམས་ཁུལ་དུ་དམངས་གཙོ་བཅོས་བསྒྱུར་ཅེས་པའི་བྱ་བ་མགོ་བརྩམས། ས་ཁྱི་ཕྱི་ལོ་༡༩༥༨ལོར་ངོ་ལོག་ཁྲིམས་འགལ། ཁྱད་དབང་བཤུ་གཞོག་ཏེ་བཞི་རྒོལ་འགུལ་སྤྱོད་ཅེས་པའི་ལས་འགུལ་བརྩམས་ཏེ། དེ་སྐབས་དགོན་འདི་ཉིད་ཀྱི་ཐང་རྒྱལ་ལྷ་ཁང་། བསམ་གྲུབ་མཐོང་གྲོལ་ཆེན་མོ། སྤར་ཁང་། མཛེས་ཕུ་ལྷ་ཁང་ཙམ་མ་གཏོགས་ལྷ་ཁང་དང་བླ་བྲང་རྟེན་དང་བརྟེན་པར་བཅས་དང་དགོན་པའི་ཆོས་སྤྱོད་ཀྱི་ལས་ལ་ཉམས་གུད་ཆེན་པོ་དང་། བླ་མ་དགེ་འདུན་སྡེ་བཅས་ཚད་མེད་པའི་སྐུ་ངལ་ཆེན་པོར་གྱུར། དེ་ནས་དགོན་ཆེན་འདི་ཉིད་སི་ཁྲོན་ཞིང་ཆེན་སྲིད་གཞུང་གིས་སྲུང་སྐྱོང་བྱ་བའི་དགོན་པའི་གྲས་སུ་བཞག་ཏེ། དཔེ་ཝར་མཆོག་སྤྲུལ་རིན་པོ་ཆེ་འཇམ་དབྱངས་བསོད་ནམས་དབང་པོ་མཆོག་དང་། ཤར་བླ་མ་དགེ་འདུན་རྒྱ་མཚོ། ནུབ་བླ་མ་ནམ་མཁའ་དབང་ཕྱུག་སོགས་དགེ་འདུན་པ་བརྒྱད་ཙམ་ལྷ་གཉེར་པ་བཞག་ཏེ་ལོ་ཤས་གཙུག་ལག་ཁང་ཆེན་སོགས་ཕྱི་ནང་སྲུང་སྐྱོབ་མཛད། དེ་ནས་མེ་རྟ་ཕྱི་ལོ་༡༩༦༦ལོ་ཟླ་བ་ལྔ་པ་ནས་༡༩༦༧ཟླ་བ་༡༠པའི་བར་རིག་གནས་གསར་བརྗེ་ཞེས་སྙིང་ནས་ཡ་ང་བའི་ལས་འགུལ་ངན་པ་བྱུང་སྟེ། མེ་ལུག་ཕྱི་ལོ་༡༩༦༧ལོར་ཕྱོགས་གཞན་དང་མཚུངས་པར་སྤར་ཁང་ཆོས་མཛོད་ཆེན་མོ་རྟེན་བརྟེན་པ། ཐང་རྒྱལ་ལྷ་ཁང་ཕྱི་ལྡེབ་བྲིས་དང་བཅས་པ་དང་། མཛེས་ཕུ་ལྷ་ཁང་ལྡེབ་བྲིས་དང་བཅས་པ་ཙམ་མ་གཏོགས། སྤྲུལ་པའི་ལྷ་ཁང་བསམ་གྲུབ་མཐོང་གྲོལ་ཆེན་མོ་དང་། ཐུབ་སྐུ་རྒྱབ་ལུང་མ་གཙོས་རྟེན་དང་བརྟེན་པར་བཅས་རིན་ཐང་གཞལ་དུ་མེད་ཅིང་བྱིན་རླབས་ཀྱི་གཟི་འོད་འབར་བ་བསམ་གྱིས་མི་ཁྱབ་པ་རྩ་རླག་ཏུ་གྱུར་པས་སེམས་ཕམ་མེ་ལྟར་འབར་བའི་གནས་སུ་གྱུར། སླར་ཡང་བླ་མ་མཆོག་གསུམ་གྱི་མཁྱེན་བརྩེ་ནུས་པའི་ཕྲིན་ལས་ཀྱི་འཇུག་པ་བསམ་གྱིས་མི་ཁྱབ་ཅིང་། སྐྱེ་རྒུའི་བསོད་ནམས་ཀྱི་འབྲས་བུ་ཟད་མཐར་མ་སོང་བའི་རྐྱེན་གྱིས་ས་ཕོ་རྟ་ཕྱི་ལོ་༡༩༧༨ལོའི་ཟླ་༡༢པའི་ཚེས་༡༨ནས་༢༢བར། རྒྱ་ནག་པེ་ཅིང་དུ་ཀྲུང་གོ་ཀྲུང་དབྱངས་སྐབས་བཅུ་གཅིག་པའི་ཚང་འཛོམ་གྲོས་ཚོགས་ཐེང་གསུམ་པ་འཚོགས་ཚུན་ཆོས་དད་རང་མོས་ཀྱི་སྒོ་ཡངས་པོར་གྱུར་པ་དང་འབྲེལ། དགོན་ཆེན་ལྷུན་གྲུབ་སྟེང་གི་ཆོས་གྲྭ་འདི་ཉིད་ཀྱང་ལྕགས་སྤྲེལ་ལོའི་མཇུག་ཕྱི་ལོ་༡༩༨༡ལོར་དགོན་པ་དར་སྤེལ་ཆོག་པའི་ཆོས་སྒོ་དངོས་སུ་ཕྱེས་ཏེ། བླ་མ་རིན་པོ་ཆེ་ངག་དབང་ཆོས་འཕེལ་བཟང་པོ་དང་། དཔེ་ཝར་མཆོག་སྤྲུལ་ཐམས་ཅད་མཁྱེན་པ་འཇམ་དབྱངས་བསོད་ནམས་དབང་པོ། བླ་མ་ངག་དབང་བསྟན་འཛིན་སོགས་ཀྱི་རྣམ་དཀར་གྱི་མཛད་ཕྲིན་བཟང་པོའི་བདག་རྐྱེན་ལ་བརྟེན་ནས་བཤད་སྒྲུབ་ལས་ཀྱི་འཁོར་ལོ་དར་ཞིང་རྒྱས་པ་དང་རྒྱས་བཞིན་པ་འདིའོ། འདི་ལའང་བསྟན་པ་སླར་ཡང་རྒྱས་ཚུལ། བསྟན་འཛིན་གཙོ་བོ་འགའ་ཞིག་གི་རྣམ་ཐར་དང་གཉིས་ལས། དང་པོ་ལ། བྱ་བ་ལས་ཀྱི་འཁོར་ལོའི་སྐོར། ཀློག་པ་ཐོས་བསམ་གྱི་འཁོར་ལོ་བཤད་གྲྭའི་སྐོར། སྤོང་བ་བསམ་གཏན་གྱི་འཁོར་ལོ་སྒྲུབ་གྲྭའི་སྐོར་དང་གསུམ་དུ་ཕྱེ་ཏེ་བཤད་པ་ལ། དང་པོ་ལ། ལྷ་ཁང་རྟེན་གསུམ་སོགས། ཚེས་དུས་སྒྲུབ་མཆོད་སོགས། བླ་གྲྭ་ལས་འཛིན་སོགས་ཀྱི་སྐོར་དང་གསུམ་ལས་དང་པོ་ནི། དེའང་ལྕགས་སྤྲེལ་ལོའི་མཇུག་ནས་དགོན་པའི་ཆོས་སྒོ་ཕྱེས་ནས་ལྷ་ཁང་རྟེན་གསུམ་སོགས་ཉམས་གསོ་གསར་བསྐྲུན་གྱི་རིགས་ད་ལྟའི་བར་དུ་བྱུང་ཚུལ་ལ། གྲུབ་ཆེན་ཐང་སྟོང་རྒྱལ་པོ་མཆོག་གིས་ཕྱག་བཏབ་ཅིང་བྱིན་རླབས་ཀྱི་གཟི་བྱིན་རབ་ཏུ་འབར་བའི་ཐང་རྒྱལ་ལྷ་ཁང་ཕྱི་རྟེན་གྱང་ལོགས་ལྡེབས་བྲིས་དང་བཅས་པ་སྔར་གྱི་རྙིང་པ་མ་ཉམས་པར་གནས་ཤིང་། ཕྱི་ནང་ཉམས་གསོ་ཅུང་ཟད་དང་འདག་སྐུ་གསར་བཞེངས་དུ་བསྐྱར་གསོ་བྱས་པ་ཡིན་ལ། ལྷ་ཁང་འདི་ནི་མཚོ་སྟེང་དུ་ཆགས་ཡོད་ཅིང་། ད་ལྟ་ཡང་ལྷ་ཁང་གི་མདུན་ཟུར་གཡོན་པར་མཚོ་བསྲུབས་མཚམས་ཀྱི་བུ་ག་ལ་རྣ་བ་གཏད་པས་ཆུ་སྒྲ་གྲགས་པ་ཡོད། བད་ཀན་གཙོ་བོའི་ནད་རིགས་ཅན་གྱིས་ལྷ་ཁང་འདི་བསྐོར་བར་བྱས་པས་ནད་ལས་གྲོལ་བ་མངོན་སུམ་དུ་མཐོང་ཞིང་། དུས་རྒྱུན་བསྐོར་མཁན་ཤིན་ཏུ་མང་ལ། བསྐོར་ཚད་གཅིག་ལ་ཁྲི་གཅིག་སྟོང་གཅིག་གཅིག་བརྒྱ་བཅུ་གཅིག་ཡིན་འདུག །ལྷ་ཁང་སྒོ་ཁུག་དང་བཅས་ཤིང་ལྷ་ཁང་དངོས་ལ་ཀ་བ་བཞི་ཡོད། རྩེ་མོར་གསེར་ཟངས་ལས་གྲུབ་པའི་ཏོག་དང་། མདུན་རྒྱབ་ཏུ་རྒྱལ་མཚན་གྱིས་མཛེས་པ། དྲིལ་བུ་གཡེར་ཀའི་ཕྲེང་བ་དང་བཅས་པ། ནང་ལོགས་སུ་དབུས་ལ་སྟོན་པ་གཙོ་འཁོར་གསུམ། མཐར་འོག་ཏུ་གནས་བརྟན་བཅུ་དྲུག །གཙོ་བོའི་གཡས་སུ་ཚེ་དཔག་མེད། གཡོན་དུ་རྣམ་སྣང་ལོངས་སྐུའི་ཆས་ཅན། ལྷ་ཁང་གི་གཡས་ཕུག་ནས་སྒོའི་བར་རིམ་པར་མི་བསྐྱོད་པ། སྣང་བ་མཐའ་ཡས། སོག་དམག་གི་སྐབས་ཐོད་ཁྲག་འཕྱུར་མྱོང་བར་གྲགས་པའི་བྱིན་ལྡན་གྱི་མགོན་པོ་སོགས་ཆོས་སྲུང་གི་སྐོར་མང་པོའི་བྲིས་སྐུ་བཞུགས། གཡོན་ཕུག་ནས་སྒོའི་བར་རིམ་པར་རིན་འབྱུང་། དོན་གྲུབ། ཕུར་པ། རྣམ་སྲས། གཡས་སུ་ཐང་རྒྱལ་ང་འདྲ་མ། གཡོན་དུ་ཐང་རྒྱལ་སྐུ་གཞན་ཞིག །བར་ཐམས་ཅད་དུ་རྒྱལ་བ་རིགས་ལྔའི་སྐུ་མང་པོ་བཞུགས། རྒྱ་མཐོང་ཁར་དབུས་སུ་ཚེ་དཔག་མེད། གཡས་སུ་སློབ་དཔོན་པདྨ གཡོན་དུ་ཐང་རྒྱལ་དང་གསུམ་གཙོ་བོར་བྱས་པ། མཁྱེན་བརྩེ་དབང་པོའི་སྐུ་ཞིག་དང་ཐུབ་སྐུ་མང་པོ་བཞུགས། འབུར་སྐུ་ལ་དབུས་སུ་ཐང་སྟོང་རྒྱལ་པོ། གཡས་སུ་སྟོན་པ་ཤཱཀྱ་ཐུབ་པ། གཡོན་དུ་སངས་རྒྱས་ཀླུ་དབང་རྒྱལ་པོ། སེངྒེ་སྒྲ། སྒྲོལ་མ་རྣམས་ཀྱི་འདག་སྐུ་བྱོན་ལེགས་པ་གཟུངས་གཞུག་རབ་གནས་སོགས་ཕུན་སུམ་ཚོགས་པ་ཅན་བཞུགས། གསུང་རྟེན་བཀའ་འགྱུར་སོགས་མང་པོ་མཆིས། གཡུ་འབྲུག་ལྷ་ཁང་ནི་དུས་འགྱུར་སྐབས་རྩ་མེད་དུ་སོང་བར་དཔེ་ཝར་མཆོག་སྤྲུལ་རིན་པོ་ཆེ་འཇམ་དབྱངས་བསོད་ནམས་དབང་པོའི་ཐུགས་བསྐྱེད་མཛད་ཕྲིན་གཞལ་དུ་མེད་པ་ལས་རྟེན་དང་བརྟེན་པར་བཅས་བསྐྱར་གསོ་བཀོད་ལེགས་རྒྱ་ཆེར་གྲུབ། སྒོ་དང་སྒོ་ཡབ་སྤེན་རྒྱན་དུང་ཕྲེང་རླུང་དྲིལ་རྩེ་མོར་ཏོག་སོགས་ཀྱིས་མཛེས་ཤིང་ཤིང་བརྐོས་དང་ཚོན་རྩི་རི་མོ་མཛེས་ཉམས་ཀྱིས་སྤྲས་སོ། །ནང་དུ་སློབ་དཔོན་སྣང་སྲིད་ཟིལ་གནོན་ཐོག་ཚད་ཅན་གཙོ་འཁོར་གསུམ་པ། མཁའ་སྤྱོད་དབང་མོའི་སྐུ་འདག་ལས་གྲུབ་པ་རིང་བསྲེལ་རྣམ་བཞིའི་གཟུངས་གཞུག་དང་རབ་གནས་ཀྱིས་བྱིན་ཆགས་པ། ཐུགས་རྗེ་ཆེན་པོ་བཅུ་གཅིག་ཞལ་བལ་ལི་ལས་གྲུབ་པ་མཐོ་ཚད་བརྒྱད་པ་སོགས་འབུར་དུ་དོད་པ་མང་པོ་དང་། ལོགས་སུ་བྲིས་པར་ལྷ་ཁང་ཕུག་ཏུ་དུས་གསུམ་སངས་རྒྱས་ཀྱིས་གཙོ་བོར་བྱས་པ་ལ་འཁོར་འཕགས་པའི་གནས་བརྟན་གྱི་ཚོགས། གཡས་ནས་རིམ་པར་དང་པོར་གུ་རུ་མཚན་བརྒྱད་གཙོ་འཁོར། དཀར་པོ་རྣམ་གསུ། མཁན་པོ་དང་ཆོས་རྒྱལ། རིགས་གསུམ་མགོན་པོ། སེང་གདོང་སོགས་ལྷ་ཉེར་གཉིས། གཉིས་པར་མཁྱེན་བརྩེ་གོང་མའི་སྐྱེས་རབས་ཀྱི་གྲས་དྭགས་པོ་ཟླ་འོད་གཞོན་ནུས་གཙོས་བླ་མ་དང་ལྷ་བཅུ་དགུ། གསུམ་པར་རྗེ་བཙུན་གྲགས་པ་རྒྱལ་མཚན་ཁ་ཊྭཱཾ་ཅན་གཙོས་བླ་མ་ལྷ་ཉེར་གསུམ། བཞི་པར་འཇིགས་བྱེད་གཙོས་ལྷ་ཉེར་གཉིས། ལྔ་པར་རྣམ་སྲས་རྟ་བདག་བརྒྱད་བཅས། ཛཾ་ལྷ་རིཊ་ལྔ་སོགས་ལྷ་ཉེར་བརྒྱད་ཅན། གཡོན་ནས་རིམ་པར་མཁྱེན་བརྩེའི་སྐྱེས་རབས་གྲས་དང་པོར་ཆོས་རྒྱལ་སྲོང་བཙན་སྒམ་པོ་གཙོས་ལྷ་དང་བླ་མ་ཉེར་གཉིས་ཙམ། གཉིས་པར་མཁྱེན་བརྩེ་དབང་པོ་གཙོས་ལྷ་དང་བླ་མ་བཅུ་དྲུག་ཙམ། གསུམ་པར་ཆོས་ཀྱི་བློ་གྲོས་གཙོ་བོར་བྱས་པའི་ཚེ་ལྷ་རྣམ་གསུམ། དམར་པོ་རྣམ་གསུམ་སོགས་ལྷ་དང་བླ་མ་བཅུ་དགུ། བཞི་པར་འབྲོམ་སྟོན་པ་རྒྱལ་བའི་འབྱུང་གནས་གཙོས་ལྷ་དང་བླ་མ་བཅུ་དགུ་ཙམ། ལྔ་པར་གུར་མགོན་གཙོ་བོར་བྱས་པའི་གུར་ཞལ་ལྕམ་གསུམ། ཨེཀཛཊཱི། པུཏྲ་ལྷ་ལྔ། དུར་བདག །བེར་དམག་སོགས་ཆོས་སྲུང་སྐོར་ལྷ་ཉེར་གསུམ། སྒོའི་གཡས་གཡོན་དུ་རྒྱལ་པོ་ཆེན་པོ་བཞི། རྒྱ་མཐོང་ངོས་ཀྱི་དབུས་སུ་རྡོ་རྗེ་འཆང་། གཡས་པར་སློབ་དཔོན་ཆེན་པོ། དེའི་གཡས་སུ་འཇམ་དབྱངས་ཆོས་ཀྱི་བློ་གྲོས་མཆོག་ཐུན་མིན་ལྟར་གྱི་པདྨཡེ་ཤེས་རྡོ་རྗེ། གཡོན་དུ་སྟོན་པ། དེའི་གཡོན་དུ་འཇམ་དབྱངས་རྣམས་གཙོ་བོར་བྱས་པའི་བར་མཚམས་སུ་གྲུབ་ཆེན་བརྒྱད་ཅུ་རྩ་བཞི་རྣམས་ཀྱི་སྐུ། འདི་ཐམས་ཅད་ཀྱི་སྐྱ་རིས་མཁས་མཆོག་བླ་མ་ཐང་ལྷ་ཚེ་དབང་མཆོག་གིས་མཛད་ཅིང་། ཚོན་རྒྱུ་གསེར། ཚོན་རྙིང་པ་འབའ་ཞིག་ལས་གྲུབ་པས་ཆག་ཚད་བཀོད་ལེགས་ཚོན་མདངས་མཛེས་ཉམས་སོགས་འགྲན་དུ་མེད། གསུང་རྟེན་བཀའ་བསྟན་རྙིང་རྒྱུད་སོགས་བཞུགས་ཤིང་མདོར་ན་རྟེན་གསུམ་མཆོད་ཆའི་རིགས་སོགས་མ་ཚང་བ་མེད་པར་བཞུགས། སྤར་ཁང་ཆོས་མཛོད་ཆེན་མོ་བཀྲ་ཤིས་སྒོ་མང་ནི་རྟེན་དང་བརྟེན་པར་བཅས་ལ་ཉམས་ཆག་ཆེར་སོང་མེད་ལ་སྤར་ཤིང་རྙིང་པ་དང་། གསར་པ་རིན་ཆེན་གཏེར་མཛོད་པོད་བདུན་ཅུ། འབུམ་པོད་བཅུ་གཉིས་སོགས་ཁྲི་བཞི་ལ་ཉེ་བ། གསར་རྙིང་བསྡོམས་པས་སྤར་ཤིང་ལྡེབ་ཁྲི་ཉེར་བདུན་ལྷག་བཞུགས་ཤིང་ཆོས་རྒྱུན་ཟད་མི་ཤེས་པ་འཇོ་བཞིན་ལ། ཆོས་མཛོད་དུ་སྟོན་པ། འོད་དཔག་མེད། ཕྱག་རྡོར། སློབ་དཔོན་ཆེན་པོ། ཐང་སྟོང་རྒྱལ་པོ། འཇམ་དབྱངས། སྒྲོལ་མ། ས་སྐྱ་པཎྜིཏ། ཀློང་ཆེན་པ། མི་ལ། རྗེ་རིན་པོ་ཆེ། ཆོས་རྒྱལ་བསྟན་པ་ཚེ་རིང་། སི་ཏུ་ཆོས་འབྱུང་། མགོན་ཁང་དུ་ཐུབ་པ་གཙོ་འཁོར་དང་གནས་བརྟན། གུར་ཞལ་ལྕམ་གསུམ་སོགས་འདག་སྐུ་གསར་བཞེངས་བྱས་པ་མང་། འདིའི་ལོ་རྒྱུས་རྒྱས་པ་སྤར་ཁང་དཀར་ཆག་ཟུར་དུ་གསལ་ལ། སྤར་ཁང་འདི་སྔོན་དགོན་འདི་ཉིད་ཀྱི་ལྷ་ཁང་གཙོ་གྲས་ཤིག་ཡིན་པ་ལ་ད་ལྟ་དགོན་པས་སྤྱོད་དབང་མ་ཐོབ། དབྱར་གནས་ལྷ་ཁང་ནི་རབ་བྱུང་བཅུ་བདུན་པའི་ས་འབྲུག་ཕྱི་ལོ་༡༩༨༨ལོ་ནས་སྒ་བླ་མ་རིན་པོ་ཆེ་ངག་དབང་བསྟན་འཛིན་མཆོག་གིས་འགྲོ་སོང་ཕུད་ནས་བཞེངས། ལྷ་ཁང་དངོས་ལ་ཀ་བ་ཉི་ཤུ་ཡོད་ཅིང་། ནང་གི་ལྷ་སྐུ་དབུས་སྟོན་པ་ཤཱཀྱ་ཐུབ་པ། གཡས་སུ་ཚེ་དཔག་མེད། གཡོན་དུ་རྣམ་རྒྱལ་མ་དང་། སྒྲོལ་དཀར་རྣམས་ཀྱི་འདག་སྐུ་ཐོག་ཚད་ཅན། ལྡེབས་རིས་ལྷ་ཁང་ཕུག་ཏུ་ཐུབ་པ་དུས་གསུམ་སངས་རྒྱས། འོད་དཔག་མེད། མི་འཁྲུགས་པ། གཡས་ནས་རིམ་པར་ཚེ་ལྷ་རྣམ་གསུམ། བདེ་གཤེགས་སོ་ལྔ། གུར་མགོན། ཞལ། ལྷ་མོ། པུ་ཏྲ་ལྷ་ལྔ་སོགས། གཡོན་ནས་རིམ་པར་མཁའ་སྤྱོད། སྨན་བླ་མཆེད་བརྒྱད། ཐུབ་དབང་གནས་བརྟན་བཅུ་དྲུག །དགེ་བསྙེན་ཆེན་པོ། ཧ་ཤང་། རྣམ་ཐོས་སྲས། ཛཾ་སེར་ནག། སྒོའི་གཡས་གཡོན་དུ་རྒྱལ་ཆེན་བཞི། སྒོ་ཁུག་ཏུ་ངོར་ཆེན་བསྟོད་པ་ཀུན་བཟང་འཁོར་ལོ། སྲིད་པ་འཁོར་ལོ་ཆ་ལྔ་པ། གཉན་ཐང་ལྷ། རྨ་སྤོམ་ར། ཟིལ་ཁྲོམ། གཉན་འདོང་། རྡོ་རྗེ་ཐོག་སྲས། ཨ་མྱེ་གཅོད་དིལ་རྣམས་བཀོད་ཡོད། རྒྱ་མཐོངས་ལ་དབུས་སུ་རྡོ་རྗེ་འཆང་། གཡས་སུ་ཀྱེ་རྡོར་ལྷ་དགུ། གཡོན་དུ་འཇིགས་བྱེད་རྣམས་གཙོ་འཁོར། གཞན་ཡང་འཇམ་དབྱངས། ཕྱག་རྡོར། སྤྱན་རས་གཟིགས། སྒྲོལ་མ། གོང་མ་རྣམ་ལྔ། མཁྱེན་བརྩེའི་འཁྲུངས་རབས་རྣམས་བཞུགས། ལྷ་ཁང་འདི་ལྕགས་ལུག་ཕྱི་ལོ་༡༩༩༡ལོར་རྟེན་དང་བརྟེན་པར་བཅས་དང་། གཉེར་ཁང་ཚོགས་ཐབ་རྡོ་བཅལ་བཅས་ལེགས་གྲུབ་སྐབས་མཁྱེན་བརྩེའི་ཡང་སྲིད་རིན་པོ་ཆེ་འཇམ་དབྱངས་ཐུབ་བསྟན་ཆོས་ཀྱི་རྒྱ་མཚོ་མཆོག་ལྗོངས་འདིར་ཞབས་སོར་བཀོད་པ་དང་འགྲིགས་ནས་ཡང་སྲིད་རིན་པོ་ཆེ་དང་། དཔེ་ཝར་མཆོག་སྤྲུལ་སོགས་ཞལ་རྒྱས་པས་རབ་གནས་ཀྱི་ཆོ་ག་རྒྱས་པར་མཛད། མཁྱེན་བརྩེའི་ཡང་སྲིད་རིན་པོ་ཆེས་སྐལ་ལྡན་ཚེ་རིང་དབྱར་གནས་མཁན་པོར་བརྐོས་བཞག་དང་འབྲེལ་ལོ་དེར་དབྱར་གནས་ཚོགས་པ་བརྒྱ་ལྷ་ཁང་འདིར་དབྱར་གནས་བཞུགས། དབྱར་གནས་ཀྱི་ཀུན་དགའ་ར་བ་ནི་སྒ་བླ་རིན་པོ་ཆེ་མཆོག་གིས་གསར་བཞེངས་མཛད་ཅིང་། དབུས་སུ་ཐང་ཆེ་བར་ལྗོན་ཤིང་མེ་ཏོག་སྤང་ལྗང་མཛེས་པར་ལྡན་ལ། མཐར་ཐོག་ཁེབ་ཀྱིས་བསྐོར་བ། ཕྱོགས་གཅིག་ལྷ་ཁང་དུ་བྱས་པར་ཐུབ་པ་གཙོ་འཁོར་གནས་བརྟན་གྱི་ཚོགས། འཕགས་ཡུལ་གྱི་རྒྱན་དྲུག་མཆོག་གཉིས། བོད་ཀྱི་སྒྲུབ་བརྒྱུད་ཤིང་རྟ་བརྒྱད་ཀྱི་སློབ་དཔོན་རྣམས། མཁན་བསམ་བློ། མཁན་ཡེ་ཤེས་བློ་གྲོས་སོགས་ཀྱི་འདྲ་སྐུ་བཀོད་ཡོད། ངོས་གཞན་གསུམ་དུ་རྒྱལ་སྲིད་བདུན། བཀྲ་ཤིས་རྫས་རྟགས་སོགས་བྲིས་ཡོད། མཛེས་ཕུ་ལྷ་ཁང་ནི་ཕྱི་ཁོག་གྱང་ལྷ་བཅས་རྙིང་པ་ལ་ཉམས་གསོ་ཅུང་ཟད་བྱས་པ་སྟེ་འདི་ནི་འོག་ཏུ་བཤད་གྲྭའི་སྐབས་སུ་བཤད་པར་བྱའོ། ཆོས་གྲྭ་འདི་ཉིད་ཀྱི་འདུ་ཁང་ཆེན་པོ་བསམ་གྲུབ་མཐོང་གྲོལ་ཆེན་མོ་ནི། རབ་བྱུང་བཅུ་བདུན་པའི་མེ་ཡོས་ལོ་ནས་བཞེངས་པ་སྟེ། དེའང་སྔོན་བསྒྱུར་བཅོས་སྐབས་གཙུག་ལག་ཁང་ཆེན་འདི་ལ་གནོད་ཚེ་མ་བྱུང་བར་ཟི་ཁྲོན་ཞིང་ཆེན་གྱི་རིག་དངོས་སྲུང་སྐྱོང་གི་གྲས་སུ་བཞག་ཅིང་། ཕྱིས་རིག་གནས་གསར་བརྗེའི་སྐབས་རྟེན་དང་བརྟེན་པར་བཅས་རྩ་བརླག་ཏུ་གྱུར། དེ་ནས་ཆོས་ལུགས་རང་མོས་སྐབས་དགོན་པ་དར་སྤེལ་གྱི་ཆོག་མཆན་ཐོབ་ཀྱང་སྔོན་གྱི་སྡེ་དགེའི་བླ་བྲང་དང་གཙུག་ལག་ཁང་ཆེན་གྱི་ས་མལ་སྡེ་དགེ་རྫོང་སློབ་འབྲིང་དང་ཆུ་མཛོད་ལས་ཁུང་གིས་བཟུང་བས་རེ་ཞིག་འགྱངས། བོད་མེ་སྟག་ཕྱི་ལོ་༡༩༨༦ལོར་པན་ཆེན་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་ཁམས་སུ་གཟིགས་ཞིབ་སྐབས་སྡེ་དགེར་ཕེབས་ནས་རང་རིགས་ཀྱི་ཆོས་དང་རིགས་གཞུང་དར་སྤེལ་གཏོང་དགོས་ཚུལ་དང་། ཡུལ་དགོན་མ་འདྲེས་པར་དགོན་པ་གཙང་མ་དགོས་པའི་བཀའ་ནན་ཆེར་གནང་ཞིང་། ད་ལྟའི་གཙུག་ལག་ཁང་ཆེན་ཡན་གྱི་ས་དགོན་པར་དབང་བའི་ཆོག་མཆན་སྤྲད། དེ་མཚུངས་སུ་ལོ་དེར་ངོར་ཁང་གསར་མཁན་རིན་པོ་ཆེ་ངག་དབང་མཁྱེན་བརྩེ་ཐུབ་བསྟན་སྙིང་པོ་མཆོག་རྒྱ་གར་འཕགས་ཡུལ་ནས་བོད་ཁམས་སུ་ཕེབས། ཝ་ར་དགོན་དུ་ལམ་འབྲས་ཚོགས་བཤད་ཀྱི་སྨིན་གྲོལ་བསྩལ་ནས་ཆོས་གྲྭ་ཆེན་པོ་འདི་ཉིད་དུ་ཕེབས་ཏེ་སྔོན་དབྱར་གནས་ལྷ་ཁང་གི་ས་མལ་དུ་ཕུར་པ་རྡོ་རྗེ་གཞོན་ནུའི་ཆོ་ག་དང་ཕུར་ཆུང་རྩ་འཆམ་ཉིན་གཉིས་ཙམ་མཛད་ནས་གཙུག་ལག་ཁང་གི་ས་འདུལ་ལེགས་པར་མཛད། དེ་ནས་བླ་མ་ངག་དབང་བསྟན་འཛིན་གྱིས་དབུ་འཛིན་མཛད། བླ་མ་འཇམ་དབྱངས་སེངྒེ་དང་། སྤར་དཔོན་བཀྲ་ཤིས་རྡོ་རྗེ་སོགས་ཀྱིས་རམ་འདེགས་བྱས། ཁང་དཔོན་སྤྱང་སྤྱང་ལ་བཅོལ་ཏེ། བོད་རབ་བྱུང་བཅུ་བདུན་པའི་ཐོག་མ་མེ་ཡོས་ལོའི་ཧོར་ཟླ་དང་པོ་ཆོ་འཕྲུལ་ཟླ་བའི་ཚེས་བཅུ་གཉིས་རྒྱལ་ཕུར་འགྲུབ་སྦྱོར་འཛོམ་པ། ཕྱི་ལོ་༡༩༨༧ཟླ་བ་༣ཚེས་༡༢བཀྲ་ཤིས་པའི་དུས་ཚེས་ཉིན་ཤིས་བརྗོད་བདེན་པར་བརྡར་བའི་མེ་ཏོག་གི་ཆར་སིལ་མར་བསྙིལ་ཏེ་གཙུག་ལག་ཁང་ཆེན་པོའི་ཐིག་ལེགས་པར་བཏབས་ཏེ་སྐར་འཛིན་མཛད། དེ་ནས་བརྩམ་སྟེ་དགོན་པ་རང་ཉིད་ཀྱིས་རེ་འདུན་དང་། རྫོང་ཆོས་ལུགས་དོན་གཅོད་ཁང་ནས་བརྡ་ཡིག་གཏོང་སྟེ་ཟིལ་བརྒྱུད། དབོན་པོ་སྟོད། སྨན་ཤོད་སོགས་ཀྱི་ལས་གྲ་མང་འཛོམ་བྱུང་ནས། གྱང་རྨང་ལེགས་བཞག་ཐོག་གྱང་པ་ལྔ་བརྒྱ་ལྷག །དེ་མཚུངས་ཀྱི་ས་བླུགས། གྱང་དཔོན། ཤིང་གཞོགས་པ་ཤིང་བརྐོས་པ་སོགས་ལས་བྱེད་པ་སྟོང་ཕྲག་ལྷག་ཙམ་གྱིས་འབད་པར་བྱས་ཤིང་། སྔོན་སྡེ་དགེ་ཁྲི་ཆེན་བླ་མས་བསྐྱར་བཞེངས་སྐབས་བྱུང་བ་ལྟར་མཚན་མོ་མི་མིན་གྱིས་བསྐྲུན་པའི་འུར་ཟིང་ཆེན་པོ་མངོན་གསལ་དུ་བྱུང་བ་དང་བཅས། དེ་ལྟར་ལས་རིགས་མི་འདྲ་བའི་ལས་གྲ་བ་སེར་སྐྱ་མང་དུས་སྟོང་ལྷག་དང་ཉུང་སྐབས་བརྒྱ་ལྷག་གིས་འབད་པ་ཆེན་པོས་གཙུག་ལག་ཁང་ཕྱི་ཁོག་ཤིང་ཚོན་རི་མོ་བཅས་ས་འབྲུག་ཕྱི་ལོ༡༩༨༨ལོར་ལེགས་གྲུབ་བྱུང་། ཨར་ལས་ཕལ་ཆེར་གྲུབ་ནས་ས་འབྲུག་ལོའི་ཆོ་འཕྲུལ་ཟླ་བའི་ཚེས་བཅོ་བརྒྱད་ཉི་མ་མེ་བཞིའི་འགྲུབ་སྦྱོར་འཛོམ་པ། ཕྱི་ལོ་༡༩༨༨ཟླ་༣ཚེས་༡༨ཉིན་དཔེ་ཝར་མཆོག་སྤྲུལ་རིན་པོ་ཆེ་འཇམ་དབྱངས་བསོད་ནམས་དབང་པོས་རིགས་གནས་གསར་བརྗེའི་སྐབས་སྐུ་ངལ་ཆེན་པོས་ལག་ཏུ་ཐོབ་པའི་རྩ་འགང་ཆེ་བའི་དངོས་པོའི་རྣམ་གྲངས་བདུན་བརྒྱ་ལ་ཉེ་བ་གཏན་འཇོག་མཛད་ཅིང་དགོན་འདི་ཉིད་ཀྱི་ཁོངས་གཏོགས་སེར་སྐྱ་མང་ཚོགས་ཀྱིས་འདུ་ཁང་ཆེན་མོར་རྟེན་འབྲེལ་མཛད་སྒོ་ཟབ་རྒྱས་སྤེལ། འདུ་ཁང་ཁོར་ཡུག་ཏུ་སྔོན་ལས་ཁྲུ་གང་ཆེ་ཞིང་ལྷ་ཁང་དངོས་ལ་ཀ་བ་བརྒྱ་དང་བརྒྱད། དེ་ལས་ཀ་རིང་བཅོ་བརྒྱད། གཙོ་ཁང་གཡས་གཡོན་དབུས་གསུམ་ལ་ཀ་བ་བཞི་རེ་སྟེ་བཅུ་གཉིས། སྒོ་ཁང་དབུས་མར་ཀ་བ་གཉིས་གཡས་གཡོན་གཉིས་ལ་ཀ་བ་བཞི་རེ་སྟེ་བཅུ། ཐམས་ཅད་བསྡོམས་པས་ཀ་བ་དངོས་བརྒྱ་དང་སུམ་ཅུ་ཐམས་ཅད་ཀྱང་ཀ་ཞུ་རིང་ཐུང་གཉིས་རེ་དང་བཅས་ཤིང་། འདུ་ཁང་དངོས་ལ་བཞི་མིག་གྲུ་བཞི་པ་བརྒྱ་དང་སུམ་ཅུ། གཙང་ཁང་སྒོ་ཁང་བཅས་ཐམས་ཅད་ལ་བཞི་མིག་བརྒྱ་དང་བརྒྱད་ཅུ་གྱ་དྲུག་གྱང་ཞིང་རྩ་བར་མཐོ་བཅུ་གཉིས། རྩེ་མོར་མཐོ་དགུ། ལྷ་ཁང་མདུན་ནས་རྒྱབ་བར་ཕོ་འདོམ་སུམ་ཅུ་རྩ་ལྔ། གཡས་གཡོན་བར་ཕོ་འདོམ་སུམ་ཅུ་རྩ་གཉིས། ལྷ་ཁང་ཐོག་བརྩེགས་གཉིས་པ་སྤེན་རྒྱན་དང་བཅས་པ་གཙོ་ཁང་ཐོག་ཚད་གསུམ་པ་ཡིན། སྒོ་དང་ཀ་གདུང་སོགས་ལ་ཤིང་བརྐོས་དང་རྒྱན་རིས་མཛེས་པས་བརྒྱན་ཅིང་། རྩེ་མོར་གསེར་བྱ་ཆོས་འཁོར་དང་ཟུར་བཞིར་རྒྱལ་མཚན། གཙོ་ཁང་སྟེང་གསེར་ཏོག་དང་མདུན་ངོས་སུ་སྤེན་རྒྱན་ཆེ་ཆུང་གསུམ་གྱིས་མཛེས། གྱང་ངོས་ལྡེབས་རིས་རྒྱུད་སྡེའི་ལྷ་མང་པོ་སོགས་ཕྱི་ནང་རྟེན་དང་བརྟེན་པར་བཅས་ལེཊ་པར་གྲུབ་ནས་སྔ་ཕྱིར་སྐྱེས་ཆེན་དུ་མས་རབ་ཏུ་གནས་པའི་བྱིན་དབབ་ཅིང་། ཕྱོགས་འདིའི་བླ་གྲྭ་ཇི་སྙེད་པས་དཔལ་ཀྱེ་རྡོ་རྗེའི་དཀྱིལ་འཁོར་ལ་བརྟེན་པའི་རབ་གནས་ཀྱི་ཆོ་ག་རྒྱས་པར་མཛད། ངོར་མཁན་ཆེན་འཇམ་དབྱངས་བསྟན་པའི་ཉི་མ། ཞབས་དྲུང་རྣམ་གཉིས་བཅས་ཆོས་གྲྭ་འདིར་ཞབས་པད་བཀོད་དེ་འདུ་ཁང་ཆེན་མོ་འདིར་ཕྱོགས་ཀྱི་བླ་སྤྲུལ་འདུས་པ་བཞི་སྟོང་ལྷག་ལ་སྨིན་གྲོལ་གྱི་ཆོས་འཁོར་རྒྱ་ཆེར་བསྐོར་ཅིང་རབ་ཏུ་གནས་པར་མཛད། དཔེ་ཝར་མཆོག་སྤྲུལ་རིན་པོ་ཆེས་གསུང་ངག་རིན་པོ་ཆེ་ལམ་འབྲས་སློབ་བཤད་ཀྱི་སྨིན་གྲོལ་བསྩལ། དཀྱིལ་འཁོར་སྒྲུབ་ཅིང་མཆོད་པ་སོགས་དུས་མཆོད་མང་པོ་འཚོགས་པས་མཚོན་འོག་མིན་གྱི་གཞལ་ཡས་ཁང་དང་མི་གཉིས་པར་གྱུར་པས་བསམ་གྲུབ་མཐོང་གྲོལ་ཆེན་མོ་ཞེས་པའི་མཚན་དོན་ལྡན་གྱི་གཟི་བྱིན་རབ་ཏུ་འབར་བར་གྱུར། ནང་བཞུགས་རྟེན་གསུམ་ལ་རྟེན་གྱི་གཙོ་བོ་ཐུབ་སྐུ་རྒྱབ་ལུང་མའི་སྐུ་ཚབ་གཙོ་ཁང་དུ་ཟངས་གསེར་ལས་གྲུབ་པའི་ཐུབ་དབང་ལོངས་སྐུའི་རྣམ་པ་ཐོག་ཚད་གསུམ་པ་གསར་བཞེངས་བྱས་པའི་ནང་བཞུགས་ཐུབ་ཆེན་རྒྱབ་ལུང་མའི་དབུའི་གཙུག་ཏོར་དང་སྐུ་རྟེན་བྱིན་ཅན་བཞི་བཅུ་ལྷག་གིས་གཙོས་རིང་བསྲེལ་རྣམ་བཞིས་ཕྱུར་བུར་གཏམས་པར་བཞུགས་ལ། འདིའི་སྦྱིན་བདག་ཕལ་ཆེར་དིལ་མཁྱེན་རྡོ་རྗེ་འཆང་རབ་གསལ་ཟླ་བས་མཛད་ཅིང་། བར་དུ་དིལ་མཁྱེན་རིན་པོ་ཆེ་ཉིད་དགོངས་པ་རྫོགས་ནས་མཇུག་འཕྲོ་དགོན་ཉིད་ཀྱིས་བསྐྲུན་པར་བྱས། གཡས་གཡོན་དུ་ཤེས་རབ་ཅན་གྱི་མཆོག་དང་། རྫུ་འཕྲུལ་ཅན་གྱི་མཆོག་གཉིས་ཐོག་ཚད་ཅན། གནས་བརྟན་བཅུ་དྲུག །དགེ་བསྙེན་དྷཏཱ། རྒྱ་ནག་ཧ་ཤང་། རྒྱལ་ཆེན་སྡེ་བཞི་རྣམས་ཀྱི་སྦྱིན་བདག་བླ་ཆེན་པདྨརྡོ་རྗེས་གནང་། གཙང་ཁང་གཡས་སུ་སློབ་དཔོན་པདྨའབྱུང་གནས་ཐོག་ཚད་གསུམ་པ་གཙོ་འཁོར་གསུམ། གུ་རུ་མཚན་བརྒྱད། བླ་མ་ངག་དབང་ཆོས་འཕེལ་བཟང་པོའི་འདྲ་སྐུ་རྣམས་ཐོག་ཚད་འདག་ལས་གྲུབ་པ། གཙང་ཁང་གཡོན་པར་བྱམས་པ་ཐོག་ཚད་གསུམ་པ་བཅས་ཉེར་སྲས་བརྒྱད་རྣམས་བཞུགས་ལ། གཙང་ཁང་གསུམ་ཀའི་གྱང་ལོགས་སུ་སངས་རྒྱས་སྟོང་སྐུ། བྱམས་ཁང་དུ་ཀུན་མཁྱེན་གོ་རམས་པ་བསོད་ནམས་སེངྒེའི་འདྲ་སྐུ་ཞལ་ཐང་ཐོག་ཚད་ཅན་རྣམས་བཞུགས། ལྷ་ཁང་དངོས་ཀྱི་ཕུག་ཏུ་དུས་གསུམ་སངས་རྒྱས་སོགས་ཀྱིས་གཙོ་བོར་བྱས་པའི་སངས་རྒྱས་སྟོང་སྐུ་བྲིས་མ། གཡས་ཕྱོགས་ནས་སྒོའི་བར་རིམ་བཞིན་དང་པོ་ས་སྐྱ་གོང་མ་རྣམ་ལྔ་རིགས་བདག་རྡོ་རྗེ་འཆང་ཅན་ལྷ་དང་བླ་མ་བརྒྱད། གཉིས་པ་དཔལ་དུས་ཀྱི་འཁོར་ལོ་གཙོ་འཁོར་ལྷ་ཉི་ཤུ། གསུམ་པ་ཕུར་པ་རྡོ་རྗེ་གཞོན་ནུ་ཁྲོ་བཅུ་སོགས་ལྷ་ཉེར་གཉིས། བཞི་པ་ཀྱེ་རྡོ་རྗེ་ལྷ་མོ་བརྒྱད་ཁྲོ་བོ་བཅུ་སོགས་ལྷ་ཞེ་གསུམ། ལྔ་པ་དཔལ་སམྤུུཊ་ལྷ་སོ་བདུན། དྲུག་པ་གསང་འདུས་འཇམ་རྡོར་ལྷ་བཅུ་དགུ། བདུན་པ་གསང་འདུས་མི་བསྐྱོད་པ་ལྷ་སོ་གཉིས་ཅན། བརྒྱད་པ་དཀོན་མཆོག་སྤྱི་འདུས་ལྷ་བཅོ་ལྔ་ཅན། དགུ་པ་གསུང་གི་དབང་ཕྱུག་མ་སོགས། བཅུ་པ་ལྷ་མོ་རིག་བྱེད་མ་གཙོས་ལྷ་ཉེར་གཉིས། བཅུ་གཅིག་པ་སྤྱན་རས་གཟིགས་ཕྱག་སྟོང་སྤྱན་སྟོང་གཙོས་ལྷ་བཅུ་གསུམ། བཅུ་གཉིས་པ་བདེ་ཆེན་ཞིང་བཀོད། བཅུ་གསུམ་པ་དཔལ་མགོན་ཞལ་བྲམ་གཟུགས་གཙོས་ཆོས་སྲུང་སྐོར། བཅུ་བཞི་པ་གུར་གྱི་མགོན་པོ་གཙོས་ཆོས་སྲུང་གི་སྐོར་བཅས་སོ། །གཡོན་ཕྱོགས་ནས་རིམ་པར་སྒོའི་བར་དུ་དང་པོར་ཀྱེ་རྡོར་རིགས་ལྔ་སོགས་ལྷ་དང་བླ་མ་ཞེ་ལྔ། གཉིས་པ་རྡོ་རྗེ་འཇིགས་བྱེད་ལྷ་སུམ་ཅུ། གསུམ་པ་དགྲ་ནག་ལྷ་བཅོ་བརྒྱད། བཞི་པ་གཤེད་དམར་ལྷ་བཅོ་ལྔ། ལྔ་པ་རྡོ་རྗེ་གུར་རིགས་ལྔ་ལྷ་ཞེ་དགུ། དྲུག་པ་བདེ་མཆོག་ནག་པོ་ལུགས་ལྷ་སོ་བདུན། བདུན་པ་བདེ་མཆོག་ལཱུ་ཧིའི་ལུགས་གཙོས་ལྷ་སོ་བདུན། བརྒྱད་པ་ཀུན་རིག་རྩ་ལྷ་སོ་བདུན་སོགས་ལྷ་ཞེ་བཞི། དགུ་པ་སྨན་བླ་མཆེད་བརྒྱད་སོགས་ལྷ་སོ་གསུམ། བཅུ་པ་སློབ་དཔོན་སོགས་རྩ་གསུམ་ལྷ་ཉེར་གཅིག །བཅུ་གཅིག་པ་སྒྲོལ་མ་ཉེར་གཅིག་སོགས་ལྷ་ཉེར་བཞི། བཅུ་གཉིས་པ་སྨན་བླའི་ཞིང་བཀོད། བཅུ་གསུམ་པ་སྟོན་པ་གཙོས་བདེ་གཤེགས་སོ་ལྔ་སོགས་ལྷ་བཞི་བཅུ། བཅུ་བཞི་པ་མི་འཁྲུགས་ལྷ་དགུ་སོགས་ལྷ་བཅུ་བཞི། བཅོ་ལྔ་པ་མགོན་པོ་མ་ནིང་ནག་པོ་གཙོས་ལྷ་བརྒྱད། བཅུ་དྲུག་པ་རྣམ་སྲས་རྟ་བདག་བརྒྱད་སོགས་ལྷ་བཅུ་དགུ་བཅས་སོ། །ལྷ་ཁང་རྒྱ་མཐོངས་ཁར་རྡོ་རྗེ་འཆང་ནས་ལམ་འབྲས་བླ་མ་བརྒྱུད་པའི་འདྲ་སྐུ་བཞུགས། སྒོ་ཁུག་ཏུ་སྟག་མོ་ལུས་སྦྱིན་དང་ཁྱེའུ་ཆུ་འབེབས་སོགས་ཐུབ་པའི་སྐྱེས་རབས་དང་མཛད་པ། རྒྱལ་ཆེན་སྡེ་བཞི། རྨ་སྤོམ་ར། གཉན་ཐང་ལྷ། དགེ་བསྙེན་མཆེད་གསུམ། གཅོད་དིལ། དཀར་མགོན། དཀར་རྒྱལ་ཞི་ར་རྣམས་བཀོད་ཡོད་ཅིང་། གྱང་ལྷ་ཞལ་ཐང་འདི་དག་ཀྱང་ཆག་ཚད་རི་མོ་ཚོན་མདངས་སོགས་སྤུས་ལེགས་ཡོད། ལྷ་ཁང་གི་དབུས་སུ་ངོར་མཁན་ཆེན་རིམ་པར་བྱོན་པའི་བཞུགས་ཁྲི་ཁྲི་དམར་མ་བཞུགས་ཤིང་། འདིའི་མདུན་ཅོག་སྔ་མའི་རྙིང་པ་བྱིན་ལྡན་ཡིན་ལ་གཞན་གསར་བཟོ་བྱས། ཁྲི་འདིར་སྔོན་ངོར་མཁན་ཆེན་ལས་གཞན་སུའང་བཞུགས་སྲོལ་མེད། དེའི་གཡས་ནས་རིམ་པར་ངོར་ཆེན་ཀུན་དགའ་བཟང་པོའི་འདྲ་སྐུ། སྒིས་བླ་མ་རིན་པོ་ཆེ་ངག་དབང་ཆོས་འཕེལ་བཟང་པོའི་གདུང་རྟེན་གསེར་དངུལ་ལས་གྲུབ་པ། མགོན་པོ་ཚེ་དཔག་མེད་ཀྱི་སྐུ། འཇམ་དབྱངས་མཁྱེན་བརྩེ་དབང་པོའི་སྐུ་གདུང་མཆོད་རྟེན་རྗེ་དེ་ཉིད་ཀྱི་གདུང་རུས་སོགས་བཞུགས་པ། ཙནྡ་ལས་གྲུབ་པའི་ཇོ་བོ་ལོངས་སྐུ་རིན་ཐང་བྱིན་རླབས་ཤིན་ཏུ་ཆེ་བ། སྤྱན་རས་གཟིགས་ཕྱག་སྟོང་སྤྱན་སྟོང་གི་སྐུ་རྣམས་ལྷ་ཁང་ཐོག་ཚད་ཅན་རྣམས་དང་། ཁྲི་དམར་མའི་གཡོན་ནས་རིམ་པར་སྡེ་སྲས་ཨུ་དགའི་གདུང་རྟེན་ཟངས་གསེར་ལས་གྲུབ་པ། སྒྲོལ་མ། ཆོས་རྗེ་ས་པཎ། ངོར་མཁན་ཆེན་དཔལ་ལྡན་ཆོས་སྐྱོང་གི་སྐུ་གདུང་མཆོད་རྟེན་རྗེ་དེའི་དབུ་ཐོད་སོགས་བཞུགས་པ་དང་། མཁའ་སྤྱོད། ཕྱག་རྡོར་འབྱུང་པོ་འདུལ་བྱེད་རྣམས་ཐོག་ཚད་ཅན་བཞུགས། འདི་དག་ཀྱང་གཟུངས་རབ་གནས་སོགས་མཚན་ཉིད་ཡོངས་སུ་རྫོགས་པ་སྐྱེ་འགྲོའི་བསོད་ནམས་ཀྱི་རྟེན་གཅིག་པུར་བཞུགས། འདི་རྣམས་ཀྱི་སྟེང་རྒྱབ་ཏུ་དཔེ་ཁྲི་དྲྭ་མིག་བརྒྱ་ཕྲག་མང་པོ་བཀོད་ལེགས་པའི་ནང་དག་ཏུ་རྒྱལ་བའི་བཀའ་འགྱུར་རིན་པོ་ཆེ་དང་བསྟན་འགྱུར། ས་སྐྱ་དང་ངོར་ཆེན་བཀའ་འབུམ་སོགས་གླེགས་བམ་ཤིན་ཏུ་མང་པོ་གླེགས་ཤིང་གླེགས་ཐག་གདོང་དར་སོགས་ཕུན་སུམ་ཚོགས་པ་དང་། རྟེན་གསུམ་རབ་འབྱམས་དེ་དག་གི་མདུན་དུ་མཆོད་ཁྲི་མཛེས་པར་རྣམ་གྲངས་མཐའ་ཡས་པའི་མཆོད་སྤྲིན་གྱི་ཕུང་པོ། གདུགས། རྒྱལ་མཚན། འཕན། བླ་བྲེ། བཞུགས་ཁྲི། གྲལ་གདན་གྱི་བཀོད་པ་སོགས་ཉེར་སྤྱོད་མཐའ་ཡས་པས་བརྒྱན་ཅིང་མཛེས་པར་བཞུགས། སྒོ་ཁུག་གཡོན་པའི་སྟེང་གི་སྒོ་ཁང་དུ་ས་ཡོས་ཕྱི་ལོ་༡༩༩༩ལོར་བཞེངས་པའི་མགོན་ཁང་ཆེན་པོ་བཞུགས་ཏེ། དབུས་སུ་གུར་གྱི་མགོན་པོ་ཐོག་ཚད་ཅན་སྤྲུལ་པའི་ཕོ་ཉ་ལྔ་དང་བཅས་པ། དེའི་གཡས་ནས་རིམ་པར་དཔལ་མགོན་ཞལ་བྲམ་གཟུཊ། དུར་བདག་ཡབ་ཡུམ། ནག་པོ་གནོད་སྦྱིན། པུཏྲ། བྷ། ལས་གཤིན། བེཀྩེ། དཀར་མོ་བདུད་རྒྱལ་བཅས་བཞུགས། གཡོན་ནས་རིམ་པར་ཡུམ་ཆེན་ཨེཀཛཊཱི། དཔལ་ལྡན་ལྷ་མོ། ནག་མོ་གནོད་སྦྱིན། སྲིན་མོ་རལ་གཅིག་མ། དམག་ཟོར་རྒྱལ་མོ་རྣམས་བཞུགས། འདི་དག་ཀྱང་རྒྱུད་དང་གྲུབ་པའི་མན་ངག་ཞལ་ཤེས་ལས་འབྱུང་བ་ལྟར་ཕྱི་ནང་རྒྱུ་ཆ་ལེགས་བསྒྲུབས་དང་། གྲི་སྙིང་འཁོར་ལོ་ཐུན་མིན་ཞག་བདུན་མ་བསྒྲུབས་པས་མཚོན་ཏེ་ཆོས་སྲུང་སྤྲིན་ལྟར་འདུ་བའི་བསྟི་གནས་ཆེན་པོར་གྱུར། ལྡེབས་སུའང་བསྐང་རྫས་མཆོད་གཏོར་སྤྱན་གཟིགས་གྲངས་མང་བཀོད་ཡོད། འདུ་ཁང་ཆེན་པོའི་སྒོ་ཁུག་གཡས་གཡོན་དུ་དུང་འཁོར་ཆེན་པོ་བཞི་དང་འཁོར་ཆུང་མང་པོ་བཞུགས། འདུ་ཁང་གི་མདུན་ངོས་ཉེ་འཁྲིས་སུ་གཉེར་མཛོད་ཁང་ཆེན་འཚོགས་ཐབ་བཅས་ངོས་གསུམ་དུ་ཐོག་བརྩེགས་གཉིས་པ་ཅན། ངོར་ཀླུ་ལྡིང་མཁན་ཆེན་རྡོ་རྗེ་འཆང་ཞབས་དྲུང་རྣམ་གཉིས་བཅས་བཞུགས་ཤིང་། དཔེ་ཝར་མཆོག་སྤྲུལ་རིན་པོ་ཆེ་ལམ་འབྲས་སྐབས་བཞུགས་པའི་གཟིམ་ཁང་རྟེན་གསུམ་མཆོད་སྤྲིན་མང་པོས་གཏམས་པ་གཙོས་ཁང་ཚན་མང་པོ་དང་། དབུས་རྡོ་བཅལ་ཡངས་པ་དང་བཅས་པ་མཆིས། དེ་ལྟར་ན་ཆོས་གྲྭ་ཆེན་པོ་ལྷུན་གྲུབ་སྟེང་ཞེས་བྱ་བ་འདི་ཉིད་དུ་ཐང་རྒྱལ་ལྷ་ཁང་། བསམ་གྲུབ་མཐོང་གྲོལ་ཆེན་མོ། མཛེས་ཕུ་ལྷ་ཁང་གསར་རྙིང་གཉིས། སྤར་ཁང་ཆོས་མཛོད་དང་མགོན་ཁང་གཉིས། གཡུ་འབྲུག་ལྷ་ཁང་། དབྱར་གནས་ལྷ་ཁང་བཅས་ལྷ་ཁང་གསར་རྙིང་བརྒྱད་ཙམ་ཡོད་ལ། བསྐང་གསོ་རྟག་འདོན་ཡོད་པའི་ལྷ་ཁང་ཐང་རྒྱལ་ལྷ་ཁང་། གཙུག་ལག་ཁང་ཆེན་སྟེང་གི་མགོན་ཁང་། མཛེས་ཕུ་ཁང་། སྤར་ཁང་མགོན་ཁང་། གཡུ་འབྲུག་ལྷ་ཁང་། དབྱར་གནས་ལྷ་ཁང་བཅས་དྲུག་ཡོད། ཐང་རྒྱལ་ལྷ་ཁང་། གཙུག་ལག་ཁང་ཆེན་སྤར་ཁང་ཆོས་མཛོད་ཁང་བཅས་གསུམ་དུ་སྒྲོལ་མ་མཎྜལ་བཞི་ཆོག་ཆག་མེད་ཡོད། དགོན་འདབས་སུ་དཔེ་ཝར་མཆོག་སྤྲུལ་རིན་པོ་ཆེས་བཞེངས་པའི་བདུད་འདུལ་མཆོད་རྟེན་ཐོག་ཚད་གསུམ་པ། བྱང་རྡོ་ཁོ་མར་སྒ་བླ་མ་ངག་དབང་བསྟན་འཛིན་གྱིས་བཞེངས་པའི་རྣམ་རྒྱལ་མཆོད་རྟེན་ཐོག་ཚད་བདུན་པ། འདུ་ཁང་ཆེན་པོའི་མདུན་ལོགས་དངུལ་ཆུའི་འགྲམ་དུ་བདེ་གཤེགས་མཆོད་རྟེན་ཆེན་པོ་བརྒྱད། བདུད་འདུལ་དང་སྲི་བཟློག་མཆོད་རྟེན་བཅས་ཐོག་ཚད་གསུམ་པ་རྣམས་དང་། ཁང་བརྩེགས་མཆོད་རྟེན་གཉིས། དུང་འཁོར་གཅིག་བཅས་ཕྱི་ནང་སྒྲིག་ལེགས་ཚར་དུ་དངར་བ་བཅས་དད་པ་ཅན་བསོད་ནམས་སྤེལ་བའི་རྟེན་དུ་བཞུགས། གྲྭ་ཁང་སྐོར་གཡུ་འབྲུག་ལྷ་ཁང་གི་ཉེ་འཁྲིས་སུ་མཆོག་སྤྲུལ་འཇམ་དབྱངས་བསོད་ནམས་དབང་པོའི་གཟིམས་བསྐྱིལ། གཞན་ཡང་བླ་མ་རིན་པོ་ཆེ་ངག་དབང་ཆོས་འཕེལ་མཆོག་གི་གཟིམས་ཁང་སོགས་བླ་གྲྭའི་ཁང་པ་ཉིས་བརྒྱ་ལ་ཉེ་བར་མཆིས་ཤིང་། ཐམས་ཅད་ཀྱང་ཆོས་གྲྭ་ཆེན་པོ་འདི་ཉིད་དཔལ་ས་སྐྱའི་རིང་ལུགས་སྐྱོང་བའི་ཆོས་སྡེར་མཚོན་ཕྱིར་གཡས་དཀར་གཡོན་དམར་དབུས་སྔོ་བའི་ས་རྩི་དང་ལྡན་པ་ཡིན། རྟེན་གསུམ་མཆོད་ཆའི་རིགས་སྨོས་པ་རྣམས་དང་། མཆོག་སྤྲུལ་འཇམ་དབྱངས་བསོད་ནམས་དབང་པོས་འདུ་ཁང་ཆེན་པོའི་མཛད་སྒོ་དང་འབྲེལ་གཏན་འཇོག་གནང་བ་སྐུ་གཟུགས་ལི་སྐུ་གྲས་བརྒྱ་དང་དྲུག་ཅུ་རེ་གཉིས། གསེར་སྐུ་སུམ་ཅུ་སོ་ལྔ། ཙནྡ་སྐུ་བཅུ། སྨན་འདག་སྐུ་གཅིག །འཁར་སྐུ་བརྒྱད། ཞལ་འབག་བཞི། ཞལ་ཐང་བརྒྱ་དང་གསུམ། དཀྱིལ་ཐང་བརྒྱ་དང་ཉེར་དགུ། བཀའ་གདམས་མཆོད་རྟེན་བརྒྱད། ཕུར་དཀྱིལ་གཙོ་ཕུར་གཙོས་ཕུར་པ་བདུན། བླ་མ་གོང་མའི་དབུ་ཞྭ་ན་བཟའི་རིགས་བཞི་བཅུ་ཞེ་གཅིག །ཀ་འཕེན་བཅོ་བརྒྱད། རོལ་མོ་ཆ་བདུན། སིལ་སྙན་ཆ་གཉིས། བདུན་ཚར་ཆེ་ཆུང་དགུ་བཅུ་གོ་དགུ། འཁར་རྔ་གཉིས། གཟི་སྟག་ལོག་ཚེ་བུམ་ཅན་གཅིག །རྟའི་རྭ་ཅོ་གཅིག །རྡོར་དྲིལ་ཆ་གཉིས། གཎྜི་གཅིག །དངུལ་གྱི་ཕུད་ཕོར་གཅིག །གཟའ་ཕྲ་མན་གཉིས། མུ་མེན་གཉིས། སྤོས་ཤེལ་གཅིག །དུང་ཤྭ་གཅིག །ཤེལ་དཀར་ཟུར་བརྒྱད་གཅིག །སྐུ་རྟེན་བཞུཊ་སྒྲོམ་ཤེལ་ཁྲ་ཅན་གཅིག །མིག་ཐུར་གཅིག །མེ་ལོང་གཅིག །ཐུབ་སྐུ་རྒྱབ་ལུང་མའི་དབུའི་གཙུག་ཏོར། དཔལ་ལྡན་ཆོས་སྐྱོང་གི་དབུ་ཐོད་བུམ་རིལ། ཆིབས་སྒ་གཅིག །ཁྲབ་བྱང་ཡུག་གཅིག །ཟངས་དཀར་ཆེ་གཅིག །བླ་བྲེ་གཅིག །གྲུམ་རྩེའི་གྲལ་གདན་གཉིས་སོགས་རྩ་འགང་ཆེ་བའི་དངོས་པོའི་རྣམ་གྲངས་ཤིན་ཏུ་མང་པོ་ལ་གཙོར་བྱས། གསེར་སྐུ་ལི་མའི་གྲས་སུམ་བརྒྱ་བཅུ་སྐོར། ཞལ་ཐང་ཐང་ནག་ཆེན་པོ་གསུམ། བདེ་གཤེགས་སོ་ལྔའི་ཞལ་ཐང་ལྷན་དྲུབ་བཅུ་གསུམ། ངོར་དཀྱིལ་བདུན་གྱི་ཞལ་ཐང་བདུན་སོགས་ཞལ་ཐང་ཉིས་བརྒྱ་བཞི་བཅུའི་སྐོར། རྒྱུད་སྡེ་ཀུན་བཏུས་དཀྱིལ་འཁོར་རབ་འབྱམས་ཀྱི་དཀྱིལ་ཐང་། བཀའ་གདམས་མཆོད་རྟེན་ཉེར་གཅིག །གནམ་ལྕགས་ཀྱི་ཕུར་པ་དང་རྡོ་རྗེ། ཙནྡ་གྱི་ཕུར་དཀྱིལ་གཙོ་ཕུར། ཕུར་དཀྱིལ་ལྷ་བཀོད་ཀྱི་ཕུར་པ་ཡོངས་རྫོགས་ས་སྐྱ་སྒྲོལ་མ་ཕོ་བྲང་གིས་གནང་བ་རྒྱ་གར་ནས་གདན་དྲངས་པ། རོལ་མོ་སྦུབས་ཆེ་ཆུང་བཞི་བཅུ། གསེར་དངུལ་བཀྲ་མའི་དུང་ཆ་གཉིས་སོགས་དུང་དམར་ཆ་བཅུ། གསེར་དངུལ་གྱི་རྒྱ་གླིང་ཆ་ལྔ་གཙོས་རྒྱ་གླིང་ཆ་བརྒྱད་སྐོར། དུང་དཀར་གཡས་འཁྱིལ་ཆ་གཅིག །དུང་དཀར་དཀར་མོ་རྒྱང་གྲགས་སོགས་དུང་དཀར་མང་པོ། འཁར་རྔ་ཉི་མ་འབྲུག་གྲགས་སོགས་དུ་མ། རྐང་གླིང་རྫོང་དགའ་མ་ཡ་གཅིག་སོགས་ཆ་དུ་མ། གསེར་དངུལ་བཀྲ་མའི་ཆབ་བུམ་ཆ་གཅིག་དང་བཟའ་བཏུང་བུམ་པ། རྔ་ཆེན་དྲུག །ཀ་འཕེན་བརྒྱ་དང་བཅུ། བ་སོ་ལས་གྲུབ་པའི་ཌཱམརུ་དང་རྡོར་དྲིལ། གསེར་དངུལ་གྱི་བུམ་པ། གདུགས། རྒྱལ་མཚན། འཕན། བ་དན། ལྡ་ལྡི། གར་གྱི་འཆམ་གོས། ལྷ་ཆེན་སོཊ་ཞལ་འབག་རིགས། གསེར་ཞྭ། ཅོད་པན། ཁྲི། ཁྲི་རྒྱན། གྲལ་གདན། དངུལ་ཟངས་སོགས་ལས་གྲུབ་པའི་མར་མེའི་ཀོང་བུ་སྟོང་ཕྲག་ལྷག །མཆོད་རྫས་ཀྱི་སྣོད། དཀར་མོ་ལུང་བརྒྱད་སོཊ་ཐབ་ཟངས་ཀྱི་རིགས་མང་པོ། གཞན་ཡང་ཉེར་སྤྱོད་མཐའ་ཡས་པས་རྣམ་མང་ཐོས་པའི་བུའི་ཕོ་བྲང་ཆེན་པོར་རིན་ཆེན་མཁོ་དགུས་གཏམས་པ་དང་མཚུངས་པ་དེ་རེ་རེ་ནས་བགྲང་ག་ལ་ལངས། གསུང་རབ་སྐོར་རྒྱལ་བའི་བཀའ་འགྱུར་རོ་འཚལ་ཚར་ལྔ། བསྟན་བཅོས་འགྱུར་རོ་འཚལ་ཚར་བཞི། གཞན་ཡང་ལམ་འབྲས། རྒྱུད་སྡེ་ཀུན་བཏུས། སྒྲུབ་ཐབས་ཀུན་བཏུས། རྙིང་མ་རྒྱུད་འབུམ། ས་སྐྱ་བཀའ་འབུམ། ངོར་ཆེན་བཀའ་འབུམ། ཨ་མྱེས་བཀའ་འབུམ། ཀུན་མཁྱེན་བཀའ་འབུམ། ཞུ་ཆེན་བཀའ་འབུམ། ཀློང་ཆེན་མཛོད་བདུན། རྗེ་བཀའ་འབུམ་སོགས་ཆོས་དང་རིག་གཞུང་ཆོ་ག་ཆོས་སྤྱོད་ཀྱི་གསུང་རབ་གླེགས་བམ་སྟོང་ཕྲག་དུ་མར་ལོངས་པ་ཐམས་ཅད་ཀྱང་ན་བཟའ། གླེགས་ཤིང་། གླེགས་ཐག་སོགས་བཟང་ལེཊ་བཞུགས། ༈ གཉིས་པ་ཚེས་དུས་སྒྲུབ་མཆོད་སོགས་ནི། ལོ་ཟླ་ཚེས་དུས་སྒྲུབ་མཆོད་སྔར་དུས་སུ་ཇི་ཙམ་བྱུང་བ་ཐམས་ཅད་བསྐྱར་གསོ་མ་ཐུབ་ཀྱང་། བླ་མ་ངག་དབང་བསྟན་འཛིན་དང་། དབུ་ཟུར་མཁས་ཆེན་ཤེས་རབ་ཉི་མ་སོགས་ཀྱིས་ཆོ་གའི་ཆིངས། ཕྱག་ལེན། འདོན་རྟ་དབྱངས། ཐིག་རྡུལ་ཚོན། འབུད་རྡུང་དཀྲོལ་གསུམ། གར། ཕྱག་རྒྱ། གཏོར་བཅའ་ཆོག་སོགས་ལག་ཁྲིད་ལེགས་པར་མཛད་དེ་སྔར་སྲོལ་མ་འཁྲུལ་བའི་དུས་མཆོད་ཀྱི་རྒྱུན་ཆོས་སྒོ་ཕྱེས་ནས་ད་ལྟའི་བར་ཉམས་གསོ་བྱུང་བ་ནི། ཧོར་ལུགས་ཟླ་བ་བཅུ་གཉིས་པའི་ཚེས་ཉེར་ལྔ་ནས་གཙུག་ལག་ཁང་ཆེན་དུ་དཔལ་རྡོ་རྗེ་འཇིགས་བྱེད་དྲུག་ཅུ་པའི་གཏོར་བཟློག་འཚོགས་ཤིང་། ཚེས་ཉེར་དགུར་ལྷ་ཆེན་བཅས་གཏོར་འཆམ་གཏོར་བོག་འཕེན་སོགས་གཟབ་རྒྱས་ཀྱིས་གཏོར་རྒྱག །ཟླ་བ་དང་པོའི་ཚེས་བཞི་ལ་རྩ་གསུམ་དང་གྲུབ་ཐོབ་ཐུགས་ཏིག་སྦྲགས་པའི་ཚོགས་འཁོར་རྒྱས་པ། ཚེས་བརྒྱད་ནས་བཅུ་དྲུག་གི་བར་དུ་ངོར་ལུཊ་དཀྱིལ་འཁོར་བདུན་གྱི་སྒྲུབ་མཆོད་རྡུལ་ཚོན་གྱི་དཀྱིལ་འཁོར་ལ་བརྟེན་པ་འཚོཊ། ཚེས་བཅོ་བརྒྱད་ནས་གནམ་སྟོང་གི་བར་དུ་ཕུར་པ་རྡོ་རྗེ་གཞོན་ནུའི་དཀྱིལ་འཁོར་རྡུལ་ཚོན་ལ་བརྟེན་པའི་སྒྲུབ་མཆོད་ཕུར་པ་རྩ་འཆམ་བསྒྲལ་འཆམ་དང་བཅས་པ་ཡོད་དེ། ཚེས་བཅོ་བརྒྱད་དང་བཅུ་དགུ་ལ་ཕུར་ཆུང་། ཚེས་ཉེར་བརྒྱད་དང་ཉེར་དགུ་ལ་ཕུར་ཆེན་འཆམ་པ་ཞེ་གཅིག་གིས་འཆམ། ཟླ་བ་གཉིས་པའི་ཚེས་ཉེར་གསུམ་ནས་གནམ་སྟོང་བར་མགོན་པོའི་གཏོར་བཟློག་ཚར་ལུགས་ལྟར་གྱི་ཆོས་ཉིད་མར་གྲགས་པ་འཚོགས་ཤིང་། ཚེས་ཉེར་དགུའི་ཉིན་གཏོར་འཆམ་བཅས་གཏོར་རྒྱག །ཟླ་བ་གསུམ་པའི་ཚེས་མགོར་དུས་འཁོར་གར་བསྐྱར་སྦྱང་བྱེད་ཅིང། ཚེས་དགུ་ནས་ཉི་ཤུའི་བར་རྭ་འབྲོ་ཆུ་བོ་གཉིས་འདྲེས་བུ་ལུགས་དུས་འཁོར་གྱི་སྒྲུབ་མཆོད་རྡུལ་ཚོན་གྱི་དཀྱིལ་འཁོར་ལ་བརྟེན་པ་འཚོགས་ཤིང་། ཚེས་བཅུར་དུས་འཁོར་ས་གར། ཚེས་བཅོ་ལྔར་དངོས་གཞི་དང་པོ་དང་སྦྱིན་སྲེག་མཆོད་གར་བཅས་པ་དང་ཟློས་གར་གྱི་རིགས་མང་པོ་འཁྲབ། ཚེས་ཉེར་གསུམ་ཙམ་ནས་ཟླ་བ་བཞི་པའི་ཚེས་བདུན་ཡར་མར་བར་ཀུན་རིག་སྒྲུབ་མཆོད་རྡུལ་ཚོན་གྱི་དཀྱིལ་འཁོར་ལ་བརྟེན་པ། འབྲི་ཤར་ནུབ་ཟིལ་བརྒྱུད་སོགས་ཀྱི་སེར་སྐྱ་བརྒྱ་ཕྲག་མང་པོ་ལ་ཉིན་ལྟར་ཀུན་རིག་དབང་བསྐུར་བ། མཇུག་ཏུ་ལས་བཞིའི་སྦྱིན་སྲེག་དང་བཅས་པ། དེ་ནས་ཉིན་གསུམ་ལ་བླ་མ་ངག་དབང་ཆོས་འཕེལ་བཟང་པོའི་གདུང་མཆོད་མཁའ་སྤྱོད་སིནྡྷུརའི་དཀྱིལ་འཁོར་ལ་བརྟེན་པའི་སྒྲུབ་མཆོད། དེ་ནས་འཕགས་མཆོག་ཐུགས་རྗེ་ཆེན་པོའི་མ་ཎི་བུམ་སྒྲུབ་དུང་རེ་འགྲོ་ངེས་གསུངས། ཟླ་ཚེས་དགེ་བ་ཞིག་ལ་ལྷ་ཁག་ཐམས་ཅད་དུ་བསྐང་གསོ་རྒྱས་པ་ཉིན་གཅིག །ལྷ་བསང་བརྒྱག་བརྔན་ཆ་ལག་བཅས་རྒྱས་པ་འདུ་ཁང་ཆེན་མོར་གསུངས། ཟླ་བ་ལྔ་པའི་ཚེས་བཅུ་བཞིར་བཀྲ་ཤིས་གསོ་སྦྱོང་། ཚེས་བཅོ་ལྔར་མཐུན་པའི་གསོ་སྦྱོང་དང་བསྟན་པ་རྒྱས་ཆོག །ཚེས་བཅུ་དྲུག་ནས་ཟླ་བ་ཕྱེད་གཉིས་བར་དབྱར་ཁས་ལེན་མཛད་ཅིང་། བོད་ཟླ་དྲུག་པའི་གནམ་སྟོང་ཉིན་དགག་དབྱེ། ཟླ་བ་བདུན་པའི་ཚེས་གཅིག་ནས་ཆུ་ནག་མར་ལྗོངས་རྒྱུ་ཉིན་གཉིས་ཕེབས། དབྱར་གནས་སྐབས་ནང་དུས་རྒྱུན་ཆགས་གསུམ་པ། ཉིན་གུང་གཟུངས་སྔགས་སྐོར་དང་བཟང་སྤྱོད། དོ་ནུབ་བཟང་སྤྱོད་སྨོན་ལམ་རྣམ་ལྔ་དང་བཅས་པ་ནི་ཉིན་རྟག་པར་གསུངས་དགོས་ཤིང་། གསོ་སྦྱོང་སྐབས་བསྟན་པ་རྒྱས་ཆོག་དང་བཅས། ཡར་མར་གྱི་ཚེས་བཅུ་ལ་ལམ་འབྲས་བླ་མཆོད། བསྐང་གསོ་དུས་བཞིར་གཏོང་ཞིང་། ཟླ་བ་དྲུག་པའི་ཚེས་གཅིག་ནས་ཚེ་སྒྲུབ་རིལ་བུ་བསྒྲུབ་པ་ཉིན་གསུམ། ཚེས་བཞིར་ཆོས་འཁོར་དུས་ཆེན་སྔ་དྲོར་བསྟན་པ་རྒྱས་ཆོག །ཕྱི་དྲོར་ཆོས་བཤད་ཉན། ཚེས་ཉེར་དགུར་མཚན་ཐོག་ཐག་ཆོས་བཤད་ཉན་རྣམས་རྒྱུན་འཇགས་ལ། གཞན་ཆོ་ག་ཆོས་སྤྱོད་སྣ་ཚོགས་པ་ཡོད། ཟླ་བ་དགུ་པའི་ཚེས་བཅུ་བཞི་ཉིན་བཤད་གྲྭ་བ་དང་ལྷན་དུ་ས་བསྐོར་ཆེན་པོ་འཚོགས་ཤིང་སེར་ཕྲེང་རྒྱས་སྤྲོས་དང་དུས་འཁོར་མཆོད་གར། བླ་མ་རིན་འབྱུང་གི་རྣལ་འབྱོར་དང་འབྲེལ་བའི་ལམ་འབྲས་བླ་མཆོད། ཚེས་བཅོ་ལྔར་བསྐང་གསོ་རྒྱས་པ་གསུངས། དེ་ནས་དབྱར་གནས་པའི་དགེ་འདུན་སྙུང་ཆོག་མཛད། ཚེས་ཉེར་ལྔ་ནས་དམར་ཆེན་གཏོར་བཟློག་འཚོགས་ཤིང་། ཚེས་ཉེར་བརྒྱད་དང་ཉེར་དགུའི་ཉིན་ལྷ་ཆེན་དང་རུ་འདྲེན་སྡེ་བཞི་སོགས་འཆམ་དང་གཏོར་བོག་འཕེན་སོཊ་རྔམ་བརྗིད་དང་ལྡན་པའི་སྒོ་ནས་ཚེས་ཉེར་དགུའི་ཉིན་གཏོར་རྒྱག །དེ་ནས་དགུན་ཉི་ལྡོག་ས་རིས་ཀྱི་ངེས་པ་དང་བསྟུན་ཏེ་འཇིགས་བྱེད་དྲུག་ཅུ་ཆེན་མོ། སེང་གདོང་གཏོར་བཟློག །སྒྲོལ་མ་གཡུལ་མདོས་ཆེན་མོ་རྣམས་ཅི་རིགས་པར་ཉིན་གསུམ་ནས་ལྔ་བར་གསུངས། གཡང་སྐྱབས་ནོར་བུ་མཆོག་རྒྱལ་ཉིན་གསུམ་འཚོགས། ཐང་རྒྱལ་ལྷ་ཁང་། སྤར་ཁང་མགོན་ཁང་། གཙུག་ལག་ཁང་ཆེན་སྟེང་གི་མགོན་ཁང་། མཛེས་ཕུ་ཁང་། གཡུ་འབྲུག་ལྷ་ཁང་། དབྱར་གནས་ལྷ་ཁང་རྣམས་སུ་བསྐང་གསོ་ཉིན་བཞིན་ཆག་མེད། ཐང་རྒྱལ་ལྷ་ཁང་། སྤར་ཁང་ཆོས་མཛོད། གཙུག་ལག་ཁང་ཆེན་རྣམས་སུ་སྒྲོལ་མ་མཎྜལ་བཞི་ཆོག་ཉིན་ལྟར་གསུངས་རྒྱུ་ཡོད་ལ། གསོན་པོའི་རིམ་གྲོ་དང་གཤིན་པོའི་བདུན་ཚིགས་སོགས་ཀྱི་ཆེད་དུ་ཀུན་རིག །སྨན་ཆོག །ཚེ་ཆོག །བརྒྱ་བཞི། བདུད་བཟློག་སོགས་མང་ཚོགས་ཀྱིས་ནམ་རྒྱུན་གསུང་དགོས་པའང་མང་པོ་ཡོད། དུས་མཆོད་ཆེན་པོ་དེ་དག་གི་དབུར་བཞུགས་གཅིག་ཏུ་མ་ངེས་པར་བྱུང་ལ། དབྱར་གནས་ནི་ཐོག་མར་མཁན་རིན་པོ་ཆེ་པདྨདམ་ཆོས་མཆོག་གིས་མཁན་པོ་ལོ་གཉིས་མཛད། དེ་ནས་བློ་གྲོས་བསྟན་འཕེལ་གྱིས་ལོ་བདུན། དེ་ནས་མཁན་པོ་སྐལ་ལྡན་ཚེ་རིང་གིས་ལོ་ལྔ་བྱས། མེ་བྱི་ལོར་མཛེས་ཕུ་བཤད་གྲྭ་བཙུགས་ནས་མཁན་འཇམ་དབྱངས་བཟང་པོ་བཞུགས་བཞིན་པའོ། ཆོས་གྲྭ་ཆེན་པོ་འདི་ཉིད་དུ་སྨིན་གྲོལ་དབང་ཁྲིད་རྒྱབ་བརྟེན་བཅས་བསྩལ་བ་ནི་གཙོ་བོར་བླ་མ་རྡོ་རྗེ་འཆང་ཆེན་པོ་ངག་དབང་ཆོས་འཕེལ་བཟང་པོ་མཆོག་གིས་མཛད་དེ། རབ་བྱུང་བསྙེན་རྫོགས་ཀྱི་སྡོམ་པ། སྨིན་བྱེད་ཀྱི་དབང་། གྲོལ་བྱེད་ཀྱི་ཁྲིད། ལག་ལེན་གྱི་རིམ་པ་སོགས་ཟབ་རྒྱས་ཀྱི་ཆོས་སྦྱིན་བསམ་གྱིས་མི་ཁྱབ་པ་ཆོས་གྲྭ་ཆེན་པོ་འདི་དང་ཕྱོཊ་གཞན་ནས་འདུས་པའི་དོན་གཉེར་ཅན་མཐའ་ཡས་པ་ལ་དུས་རྟག་པར་མཛད་པ་དང་། གཞན་ཡང་རབ་བྱུང་བཅུ་དྲུག་པའི་མེ་སྟག་ལོར་ངོར་མཁན་རབས་དོན་གཉིས་པ་ཁང་སར་མཁན་རིན་པོ་ཆེ་ངག་དབང་མཁྱེན་བརྩེ་ཐུབ་བསྟན་སྙིང་པོ་ལྗོངས་འདིར་ཕེབས་ནས་གཙུག་ལག་ཁང་གི་ས་འདུལ་དང་ཆོས་བཀའ་ཁ་ཤས་བསྩལ། རབ་བྱུང་བཅུ་བདུན་པའི་ཤིང་ཁྱི་ཕྱི་ལོ་༡༩༩༤ལོར་ངོར་མཁན་རབས་དོན་བཞི་པོ་ཀླུ་ལྡིང་འཇམ་དབྱངས་བསྟན་པའི་ཉི་མ་ཞབས་དྲུང་རྣམ་གཉིས་དང་བཅས་པ་ཞབས་པད་གསེར་གྱི་འཁོར་ལོ་ཆོས་གྲྭ་འདི་ཉིད་ཀྱི་ཆོས་ཁྲིར་བཀོད་ཅིང་། དེ་སྐབས་མཁན་སྤྲུལ་བླ་གྲྭ་བཞི་སྟོང་ལྷག་འདུས་པ་དང་བཅས་པས་བསུ་བ་སེར་ཕྲེང་ཟབ་རྒྱས་བྱས་ཤིང་མཁན་པོ་སྐལ་ལྡན་ཚེ་རིང་གིས་ཕུན་སུམ་ཚོགས་པ་ལྔ་ལྡན་གྱི་བཤད་པ། མཁན་འཇམ་དབྱངས་བཟང་པོས་མཎྜལ་གྱི་བཤད་པ་ཞུས། མཁན་ཆེན་རྡོ་རྗེ་འཆང་དེ་ཉིད་ཀྱིས་གཙུག་ཏོར་རྣམ་པར་རྒྱལ་མ་དང་། འཕགས་མཆོག་ཐུགས་རྗེ་ཆེན་པོའི་རྗེས་གནང་སྔོན་དུ་འགྲོ་བས་ངོར་ལུགས་དཀྱིལ་འཁོར་བདུན་གྱི་དབང་ཆེན། ཀྱེ་རྡོར་ལམ་དབང་། ངན་སོང་སྦྱོང་རྒྱུད་དཀྱིལ་འཁོར་བཅུ་གཉིས་ཀྱི་དབང་། འཇིགས་བྱེད་ལྷ་བཅུ་གསུམ་པ་དང་ལྷ་དགུ་མའི་དབང་། གོ་དོན་བདུད་རྩི་ཉིང་ཁུ་དང་རྭ་རྩེར་སེམས་འཛིན་ཀྱི་ཁྲིད། ནཱ་རོ་མཁའ་སྤྱོད་ཀྱི་བྱིན་རླབས་དང་དཔལ་སྡོམ་དང་གསང་ལམ་ཁྲིད། མཎྜལ་ལ་བརྟེན་པའི་ཆོས་ཉིད་དངོས་བསྟན། ལུས་དཀྱིལ་སྙན་བརྒྱུད་སོཊ་ཀྱི་ཁྲིད། དཔལ་དུས་ཀྱི་འཁོར་ལོའི་རྡུལ་ཚོན་གྱི་དཀྱིལ་འཁོར་ལ་བརྟེན་པའི་དབང་ཆེན་བྱིས་པ་འཇུག་པའི་དབང་བདུན་གོང་མ་གོང་ཆེན་གྱི་དབང་དང་བཅས་པ། ཕུར་པ་རྡོ་རྗེ་གཞོན་ནུའི་སྟོད་ལས་དབང་ཆེན་སྨད་ལས་དང་བཅས་པ། མགོན་པོ་ཁྲོ་བཅུའི་དབང་སོགས་སྨིན་གྲོལ་མང་པོ་དང་། རབ་བྱུང་བསྙེན་རྫོགས་ཀྱི་སྡོམ་པ་རྒྱ་ཆེར་བསྩལ། ཀླུ་ལྡིང་འཇམ་དབྱངས་ཆོས་ཀྱི་རྒྱལ་མཚན་ཞབས་དྲུང་སྐབས་སྒྲུབ་ཐབས་རྒྱ་མཚོ། སྒྲུབ་བཏུས་ལས་གནད་ཆེའི་རྗེས་གནང་ཕལ་ཆེ་བའི་རིགས། ཨེཝཾ་བཀའ་འབུམ་ཨ་དུམ་པའི་ལྗགས་ལུང་སོགས་དང་། ཐར་རྩེ་ངག་དབང་བསོད་ནམས་མཆོག་ལྡན་ཞབས་དྲུང་སྐབས་ཨེཝཾ་བཀའ་འབུམ་པོད་གསུམ་གྱི་ལྗགས་ལུང་སོགས་མཁན་ཞབས་རིན་པོ་ཆེ་རྣམ་པ་གསུམ་གྱིས་ཟབ་རྒྱས་ཀྱི་ཆོས་འཁོར་བསམ་གྱིས་མི་ཁྱབ་པ་བསྐོར། དཔེ་ཝར་མཆོག་སྤྲུལ་འཇམ་དབྱངས་བསོད་ནམས་དབང་པོ་མཆོག་གིས་རྟག་པར་དོན་གཉེར་སོ་སོའི་ངོར་སྨིན་གྲོལ་མང་དུ་བསྩལ་ཅིང་། ཁྱད་པར་ས་སྟག་ཕྱི་ལོ་༡༩༩༨ལོར་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་སློབ་བཤད་ལྟར་གྱི་སྨིན་གྲོལ་རྒྱས་པ། དྲི་མེད་རྣམ་གཉིས་ཀྱི་སྨིན་བྱེད་སོགས་ཟབ་ཆོས་དཔག་མེད་བསྩལ། གཞན་ཡང་སྔ་འགྱུར་བསྟན་པའི་སྲོག་ཤིང་དིལ་མཁྱེན་རབ་གསལ་ཟླ་བ། བསྟན་འགྲོའི་དཔལ་མགོན་མཁྱེན་བརྩེ་ཐུབ་བསྟན་ཆོས་ཀྱི་རྒྱ་མཚོ་སོགས་སངས་རྒྱས་མིའི་ཤ་ཚུགས་ཅན་གྱི་མཁས་གྲུབ་མང་པོ་ཞིག་བྱོན་ཏེ་མདོ་སྔགས་ཀྱི་ཆོས་འཁོར་མཐའ་ཡས་པ་བསྐོར། དེ་ལྟར་ན་ཆོས་གྲྭ་ཆེན་པོ་འདི་ན་སྔོན་སྟོབས་ཀྱིས་འཁོར་ལོས་སྒྱུར་བའི་ཆོས་རྒྱལ་རིམ་པར་བྱོན་པས་དཔལ་ལྡན་ས་ངོར་ཚར་གསུམ་སོགས་རིས་བྲལ་གྱི་སྐྱེས་ཆེན་བགྲང་བ་ལས་འདས་པས་བཤད་སྒྲུབ་ལས་ཀྱི་ཆོས་འཁོར་མཛད་པ་ལྟར་བསྟན་པ་ཉམས་གསོའི་སྐབས་འདི་ལའང་དེ་ལྟ་བུའི་ཚུལ་དུ་གྱུར་ཏོ། །དུས་མཆོད་ཆེན་པོ་རྣམས་ཀྱི་སྐབས་སུ་ཕུ་དུང་ཅན་གྱི་གོས་དང་བོད་ལྷམ་མིན་པ་སོགས་གོས་ལྷམ་འདྲ་མིན་གྱོན་མི་ཆོག་པ་སོགས་ཀྱི་སྒྲིགས་སྲོལ་དང་། ཀུན་རིག་སྒྲུབ་མཆོད་སྐབས་ཆོས་གོས་བླ་གོས། དབྱར་གནས་སྐབས་ཆོས་གོས་རྣམ་གསུམ་ལྷུང་བཟེད་གདིང་བ་སོགས་ཡོ་བྱད་དང་ལྡན་དགོས་པ་དང་ཚོགས་པའི་སྒྲིགས་ཁྲིམས་ཤིན་ཏུ་དམ་པོ་ཡོད། དུས་མཆོད་ཕལ་ཆེ་བའི་སྐབས་དང་དགུན་དུས་སུ་གྲྭ་ཆུང་རྣམས་ཡིག་ཀློག་དང་ཆོས་སྤྱོད་བློ་འཛིན་གྱི་སྦྱོང་གྲལ་འཛུགས་པ། སྐབས་སུ་བླ་གྲྭ་རྣམས་ཀྱིས་དབྱངས་གདངས་རོལ་མོ། ཐིག་རྡུལ་ཚོན། གར་ཕྱག་རྒྱ་གཏོར་རྒྱན་རི་མོ་སོགས་ཆོ་ག་ཕྱག་ལེན་སྦྱོང་སྩོལ་མཛད། ༈ གསུམ་པ་བླ་གྲྭ་ལས་འཛིན་སོགས་ཀྱི་སྐོར་ནི། དེའང་དཔལ་ལྷུན་གྲུབ་སྟེང་གི་ཆོས་གྲྭ་ཆེན་པོ་འདི་ཉིད་དུ་སྔར་རྒྱུན་ལྟར་རྒྱལ་མཚན་བླ་མ། ཤར་ནུབ་དབྱར་མཁན། བཤད་གྲྭའི་མཁན་ཆེན། དྲྭ་སྒང་སྒྲུབ་དཔོན་སོཊ་ཀྱི་ཕྲིན་ལས་ཀྱི་རྒྱུན་སྐྱོང་བའི་བླ་ཆེན་མང་པོ་བྱོན་དང་འབྱོན་བཞིན་ལ། འོན་ཀྱང་ཤར་ནུབ་རྒྱལ་མཚན་གསུམ་ཁྲི་སྟོན་མིང་ཐོགས་གསལ་པོ་ད་ལྟར་བྱུང་ཐུབ་མེད། དབུ་མཛད་བཞི། ཟུར་བླ་དྲུག །ལས་ཚན་ལས་གཡོགས། ཆོས་ཁྲིམས་རྣམས་ནི་སྔར་རྒྱུན་ལྟར་ལ། བླ་གྲྭའི་གྲངས་སུམ་བརྒྱ་ཡས་མས་ཡོད། དགོན་པའི་ལས་འཛིན་པ་ཐོག་མར་བླ་གྲྭ་བདུན་དང་དེང་སང་དགོན་པའི་བདག་གཉེར་ཚོགས་པ་བླ་གྲྭ་བཅོ་ལྔ་ཡོད་ལ། དེ་དག་ལས་གཙོ་འཛིན་རྒན་གཞོན་བཞིས་དབུ་འཛིན་མཛད་དེ་ཆོས་གྲྭའི་བཤད་སྒྲུབ་དང་རྟེན་བཞེངས། བླ་མ་ལས་ཚན་བསྐོས་བཞག་སོགས་ཀྱི་ལས་ཁུར་ཡོངས་རྫོཊ་བཞེས་ཏེ་འཁོར་ལོ་གསུམ་གྱི་ཆོས་སྤྱོད་སྤེལ་བཞིན་པ་འདིའོ།། ༈ གཉིས་པ་ཀློག་པ་ཐོས་བསམ་གྱི་འཁོར་ལོ་བཤད་གྲྭའི་སྐོར་ནི། དེའང་ཆོས་གྲྭ་ཆེན་པོ་འདིའི་མཛེས་ཕུ་བཀྲ་ཤིས་རབ་བརྟན་གླིང་གི་བཤད་གྲྭ་ཆེན་པོ་བྱུང་ཚུལ་ལ། ཐོག་མར་མཛེས་ཕུ་བཤད་གྲྭའི་ལྷ་ཁང་རྙིང་པ་ཉམས་གསོ་ཅུང་ཟད་དགོས་པ་དང་ནང་གི་འདག་སྐུ་མང་པོ་གསར་གསོ་གྲུབ། དེ་ནས་ཀུན་གཟིགས་པཎ་ཆེན་རིན་པོ་ཆེ་ལྗོངས་འདིར་ཕེབས་སྐབས་བཤད་གྲྭ་ཉམས་གསོའི་ཆོག་མཆན་ཐོབ་ཅིང་། ཤིང་ཕག་ཕྱི་ལོ་༡༩༩༥ལོ་ནས་བླ་མ་ངག་དབང་ལེགས་གྲུབ་ཀྱིས་མཛེས་ཕུ་བཤད་གྲྭའི་ལྷ་ཁང་ཞིག་གསོ་དང་། གྲྭ་ཤག་བདུན་ཅུ་ཙམ་ཕྱ་ིཁོག་ཙམ་རྙིང་པ་ཡིན་པ་ལས་གཞན་ཉམས་གསོ་གསར་བསྐྲུན་ལེགས་པར་མཛད། མེ་བྱི་ལོ་ནས་བཤད་གྲྭ་དངོས་སུ་བཙུགས་ཏེ། མེ་གླང་ཕྱི་ལོ་༡༩༩༧ལོར་བཤད་གྲྭ་རྒྱ་བསྐྱེད་ཀྱིས་ལྷ་ཁང་གསར་པ་སྟེང་དུ་གྲྭ་ཤག་བཅས་པ་དང་། འཚོགས་ཐབ་གསར་བསྐྲུན་དགོན་གཞུང་གིས་འགྲོ་གྲོན་གཏོང་ནས་མཛད། དེ་ལྟར་ན་ལྷ་ཁང་རྙིང་པར་ཀ་བ་དྲུག་ཡོད་ཅིང་ཐོག་བརྩེགས་གཉིས་པ་སྤེན་རྒྱན་དང་བཅས་པ། ནང་དུ་དབུས་སུ་སྟོན་པ་ཤཱཀྱ་ཐུབ་པ། གཡས་ནས་རིམ་པར་ས་ཆེན་ཀུན་དགའ་སྙིང་པོ། ངོར་ཆེན་ཀུན་དགའ་བཟང་པོ། ཚར་ཆེན་བློ་གསལ་རྒྱ་མཚོ། འཇམ་དབྱངས་ཆོས་ཀྱི་བློ་གྲོས་ཀྱི་འདྲ་སྐུ། གཡོན་ནས་རིམ་པར་ཨོ་རྒྱན་གྱི་སློབ་དཔོན་ཆེན་པོ། ས་པཎ་ཀུན་དགའ་རྒྱལ་མཚན། སྒྲོལ་མ་བཅས་ཀྱི་འདག་སྐུ་རྣམས་གསར་བཞེངས། གྱང་ལོགས་ལྡེབས་བྲིས་དབུས་སུ་སངས་རྒྱས་རྡོ་རྗེ་འཆང་། གཡས་ནས་རིམ་པར་ཤིན་ཏུ་བྱིན་ལྡན་དུ་གྲགས་པའི་ཀྱེ་རྡོར་ལྷ་དགུ། གུར་དང་སཾཊ། གསང་འདུས་མི་བསྐྱོད་པ། འཇིགས་བྱེད། གཤེད་དམར་སོགས། གཡོན་ནས་རིམ་པར་དུས་ཀྱི་འཁོར་ལོ། བདེ་མཆོག །མཁའ་འགྲོ་རྒྱ་མཚོ་སོགས་ཀྱིས་གཙོ་བོར་བྱས་པའི་གྱང་ལྷ་རྙིང་པ་ཧ་ཅང་སྤུས་ལེགས་མང་པོ་བཞུགས། རྒྱ་མཐོངས་ཁར་དབུས་སུ་ཐུབ་པ་གཙོ་འཁོར་གནས་བརྟན་དང་བཅས་པ། གཡས་སུ་འཇམ་དབྱངས་གཙོ་བོ་བྱས་པའི་རིགས་གསུམ་མགོན་པོ། རོང་སྟོན། ཀུན་མཁྱེན། ངོར་མཁས་གྲུབ་རྒྱ་མཚོ། འོད་དཔག་མེད་བཅས། གཡོན་དུ་ས་པཎ་གཙོ་བོར་བྱས་པའི་གོང་མ་ལྔ། ཚེ་ལྷ་རྣམ་གསུམ། སྒྲོལ་ལྗང་། ཡེ་ཤེས་བློ་གྲོས་བཅས་བཞུགས། ནང་དུ་མཆོད་ཁྲི་དང་མཆོད་པའི་བྱེ་བྲག་འཕན། བླ་བྲེ་སོགས་ཀྱིས་མཛེས་པ་ཡོད། ལྷ་ཁང་གསར་པ་ཀ་བ་སུམ་ཅུ་ཡོད་ལ་ཤིང་ཚོན་རི་མོ་མཛེས་པ་ཡོད་ཅིང་། གྱང་ལྷ་དང་ལྡེར་སྐུ་བཞེངས་ཐུབ་མེད། གྲྭ་ཤག་སྔར་རྗེས་གྲུབ་པ་དགུ་བཅུ་གོ་དྲུག་ཡོད་ཅིང་ཐམས་ཅད་ཀྱང་ས་བཅལ་དང་ཤེལ་གྱི་རབ་གསལ་ཚོན་རྩི་སོགས་ཕུན་སུམ་ཚོཊ་པ་མཆིས། ཁང་མིག་རེར་ཕལ་ཆེར་གྲྭ་པ་རེ་རེ་བཞུགས་ཤིང་འགའ་ཞིག་ཏུ་གཉིས་རེ་ཙམ་བཞུགས་ཡོད། མེ་བྱི་ཕྱི་ལོ་༡༩༩༦ཧོར་ཟླ་དང་པོ་ཆོ་འཕྲུལ་ཟླ་བའི་ཚེས་ལྔ་ཉིན་ནས་བཤད་གྲྭ་དངོས་སུ་དབུ་བརྩམ་སྟེ། ཐོག་མ་ལུང་དང་རིགས་པའི་མཛོད་ཆེན་རིས་མེད་བསྟན་པའི་སྲོག་ཤིང་མཁན་ཆེན་རྡོ་རྗེ་འཆང་པདྨདམ་ཆོས་ཆེད་དུ་གདན་ཞུས་ལྟར་ཕེབས་ཏེ། ཆོས་གྲྭ་ཆེན་པོ་འདི་ཉིད་ཀྱི་གྲྭ་པ་བཅུ་དགུ་ཙམ་དང་། དགོན་སྡེ་གཞན་ནས་ཕེབས་པ་བཅས་སྤྲུལ་སྐུ་དང་གྲྭ་པ་དྲུག་ཅུའི་སྐོར་ལ་འཇམ་དཔལ་བསྟོད་པ་གང་བློ་མའི་བཤད་པ་དང་། ས་འཇམ་སྦགས་སྒྲུབ་ཀྱི་བྱིན་རླབས་སྔོན་དུ་འགྲོ་བས་ཟླ་བ་གཉིས་ཙམ་ལ་ཀླུ་སྒྲུབ་ཀྱི་བཤེས་སྤྲིངས། སོ་སོར་ཐར་པའི་མདོ། རྒྱལ་སྲས་ལག་ལེན་སོ་བདུན་མ་བཅས་བཤད་ཁྲིད་མཛད་ཅིང་། དེ་སྐབས་མཁན་པོ་སྐལ་ལྡན་ཚེ་རིང་གིས་བསྐྱར་སྦྱངས་བྱས་ལ། དེ་ནས་མཁན་པོ་སྐལ་ལྡན་ཚེ་རིང་གིས་བཤད་གྲྭའི་མཁན་པོའི་ཁུལ་ཡོངས་རྫོགས་བཞེས་ནས་ད་ལྟའི་ལྕགས་སྦྲུལ་ཕྱི་ལོ་༢༠༠༡ལོའི་བར་དགོན་སྡེ་ཁག་ནས་འདུས་པའི་སློབ་གཉེར་བ་མང་དུས་བརྒྱ་ལྷག་དང་ཉུང་སྐབས་དྲུག་ཅུའི་སྐོར་འདུས། དེ་དག་ལ་གཞུང་བཤད་བྱས་པ་དགེ་ཚུལ་གྱི་ཚིག་ལེར་བྱས་པ་ལྔ་བཅུ་པ་དང་། སུམ་བརྒྱ་པ། སོར་མདོ། འདུལ་བ་མདོ་རྩ་རྣམས་ཐེངས་གཉིས་རེ། འདུལ་བ་མེ་ཏོག་ཕྲེང་རྒྱུད་ལན་གཅིག །སྤྱོད་འཇུག་ལན་གཉིས། བྱམས་ཆོས་དབུས་མཐའ་རྣམ་འབྱེད། ཆོས་ཉིད་རྣམ་འབྱེད། མདོ་སྡེ་རྒྱན། རྒྱུད་བླ་མ་རྣམས་ལན་རེ། ཤེར་ཕྱིན་མངོན་རྟོགས་རྒྱན་རྩ་བའི་ཐོག་ནས་ལན་གཅིག །སློབ་དཔོན་སེངྒེ་བཟང་པོའི་འགྲེལ་བ་དོན་གསལ་སྟེང་ནས་ལན་གཅིག་སྟེ་ལན་གཉིས། ཀུན་མཁྱེན་ཆེན་པོའི་སྦས་དོན་ཟབ་མོའི་གཏེར་གྱི་ཁ་འབྱེད་དང་གསལ་བྱེད་གསུམ་དང་བཅས་པ། དབུ་མ་བཞི་བརྒྱ་པ། རྩ་ཤེར། རྩོད་བཟློག །སྟོང་ཉིད་བདུན་ཅུ་པ། ཞིབ་མོ་རྣམ་འཐག །དབུ་མ་འཇུག་པའི་རྩ་བ་ཀུན་མཁྱེན་གྱི་ལྟ་བ་ངན་སེལ་དང་བཅས་པ། ལྟ་བའི་ཤན་འབྱེད་རྣམས་བཤད་པ་ཐེངས་རེ། འཇུག་པ་རང་འགྲེལ་བཤད་ལུང་། མངོན་པ་མཛོད་དང་། ཀུན་ལས་བཏུས་པ་གཉིས་ལན་རེ། ཚད་མ་རིགས་གཏེར་རྩ་བའི་སྟེང་ནས་ལན་གཅིག །རང་འགྲེལ་བཤད་པ་ཀུན་མཁྱེན་རིགས་གཏེར་གསལ་བྱེད་དང་བཅས་པ། ཚད་མ་རྣམ་འགྲེལ། རྣམ་ངེས། ཚད་མ་མདོ་ཀུན་ལས་བཏུས་པ་རྣམས་ལན་རེ། ས་པཎ་སྡོམ་གསུམ་རབ་དབྱེ། ཀུན་མཁྱེན་གྱི་སྡོམ་གསུམ་ཁ་སྐོང་གཉིས་བཤད་པ་ལན་རེ། རྒྱལ་སྲས་ལག་ལེན། བཤེས་སྤྲིངས། གཏམ་བྱ་རིན་ཆེན་ཕྲེང་བ་རྣམས་བཤད་པ་ལན་རེ། སྔགས་སྐོར་ཀུན་རིག་ཆོ་ག་བསྙེན་རྒྱས་དང་བཅས་པའི་བཤད་པ་ལན་གཉིས། སློབ་དཔོན་རིན་པོ་ཆེའི་རྒྱུད་སྡེ་སྤྱིའི་རྣམ་བཞག །རྗེ་བཙུན་རིན་པོ་ཆེའི་རྒྱུད་ཀྱི་མངོན་པར་རྟོགས་པ་རིན་པོ་ཆེའི་ལྗོན་ཤིང་། ཀྱེ་རྡོ་རྗེའི་རྩ་བའི་རྒྱུད་བརྟག་པ་གཉིས་པ་སྟེ་སྤྱི་ལྗོན་བརྟག་གསུམ་དུ་གྲགས་པའི་བཤད་པ། ཀྱེ་རྡོ་རྗེ་བཤད་རྒྱུད་ཐུན་མོང་མ་ཡིན་པ་རྡོ་རྗེ་གུར་གྱི་རྒྱུད། བཤད་རྒྱུད་ཐུན་མོང་བ་སམྤུཊ་རྒྱུད་ཕྱི་མ་དང་བཅས་པ། མཁའ་འགྲོ་མ་བདེ་མཆོག་རྩ་བའི་རྒྱུད་ཉུང་ངུ་ཞེས་གྲགས་པ་དང་། དཔལ་རྡོ་རྗེ་འཇིགས་བྱེད་ཀྱི་རྒྱུད་རྟོག་པ་བདུན་པ་རྣམས་ཀྱི་བཤད་པ། ཀྱེ་རྡོར་ལམ་དུས་ཡན་ལག་དྲུག་པའི་མཛེས་རྒྱན་གྱི་བཤད་ཁྲིད་ཐེངས་མང་། འཇམ་མགོན་བླ་མའི་ཞལ་ལུང་བདུད་རྩིའི་ཐིགས་པ། ཀུན་གཞི་ངོས་འཛིན་རྣམ་ཤེས་ཡེ་ཤེས་འབྱེད་པ་དང་བཅས་པ་ལེགས་བཤད་ལྷའི་རྔ་ཆེན། འབྱུང་འདུལ་སྒྲུབ་ཐབས། སྒྲོལ་བསྟོད། མཁན་བསམ་གཏན་བློ་གྲོས་ཀྱི་གཏོར་མའི་རྣམ་བཤད། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་རྣམས་ཀྱི་བཤད་པ། བསྒོམ་རིམ་ཐོག་མཐའ་བར་གསུམ་གྱི་བཤད་ལུང་སོགས་ཆོས་ཚན་མང་པོ། སུམ་རྟགས་དག་གསུམ་རྩིས་རིག་སོགས་རིག་གནས་སྐོར་མང་པོ་བཤད་པ་མཛད། དེ་ལྟར་ན་བཤད་གྲྭ་ཆེན་པོ་འདིར་གཞུང་ལུགས་ཆེན་པོ་བཞི་བཅུ་ཞེ་ལྔ་ཙམ་གྱི་བཤད་རྒྱུན་དེ་སྔར་བྱུང་ཞིང་ད་ལྟར་མཁན་ངག་དབང་མཁས་གྲུབ་ཀྱིས་བཤད་རྒྱུན་དེ་དག་སྤེལ་བཞིན་ལ། བསྟན་པ་ཇི་སྲིད་གནས་ཀྱི་བར་འབྱུང་ངེས་པའོ། དེས་ན། །སོ་ཐར་མདོ་དང་མདོ་རྩ་འདུལ་བའི་སྐོར། །རྩ་འཇུག་བཞི་གསུམ་ཆེས་ཟབ་དབུ་མའི་སྐོར། །བྱམས་ཆོས་ལྔ་དང་སྤྱོད་འཇུག་ཕར་ཕྱིན་སྐོར། །ཀུན་ལས་བཏུས་དང་མཛོད་གཉིས་མངོན་པའི་སྐོར། །མདོ་དང་རྣམ་འགྲེལ་རྣམ་ངེས་ཚད་མའི་སྐོར། །སྡེ་བདུན་མདོ་བཅས་དགོངས་འགྲེལ་རིགས་གཏེར་སྐོར། །སྡེ་སྣོད་སྤྱི་ཡི་དགོངས་འགྲེལ་སྡོམ་གསུམ་སྟེ། །འདི་དག་གྲགས་ཆེན་བཅོ་བརྒྱད་ཅེས་སུ་གྲགས། ཞེས་པའི་གྲགས་ཆེན་བཅོ་བརྒྱད་དང་། དབུ་ཕར་འདུལ་མཛོད། ཚད་མ་སྡོམ་གསུམ་གྱི་གཞུང་བཀའ་པོད་དྲུག་སྔགས་སྐོར་དང་བཅས་པའི་བཤད་རྒྱུན་ཡོངས་སུ་རྫོགས་པའི་རྒྱུན་རྣམ་དག་ཚང་བས་བསྟན་འགྲོ་ལ་ཕན་ངེས། བཤད་གྲྭ་ཉིན་ལྟར་སྔ་དྲོར་ཆོས་ཐུན་འཚོགས་ཤིང་མཁན་པོས་དཔེ་ཁྲིད་མཛད། དུས་རྒྱུན་ཕལ་ཆེར་གཞུང་འདྲ་མིན་གཉིས་རེའི་བཤད་ཁྲིད་ཡོད་ལ་སྐབས་འགར་གཞུང་གསུམ་རེའི་བཤད་ཁྲིད་ཀྱང་བྱས། ཆོས་ཐུན་སོ་སོར་རྒྱུག་ཡིག་ཤོག་དྲིལ་གཉིས་གསུམ་ཙམ་བླངས་པས་སུ་བབས་པ་དེས་ཁ་སང་གི་གཞུང་བཤད་པ་བཅས་རྒྱུག་སྤྲོད་དགོས། ཕྱི་དྲོར་སྐྱོར་དཔོན་རྣམས་ཀྱིས་སླར་ཡང་བསྐྱར་ཟློས་བྱེད་པ་དང་། ཆོས་རྩོད་ལ་གོམས་འདྲིས་ཡང་ཡང་བྱེད། ས་ཟླའི་དུས་ཆེན་སྐབས་གླིང་མཆོད་དང་། ས་སྐོར་ཉིན་གཉིས། ས་པཎ་དུས་ཆེན་ཉིན་གཅིག་གཞི་གྲྭ་དང་ལྷན་དུ་འདུ་ཁང་ཆེན་པོར་འཚོགས་པ་གླིང་མཆོད་བཅས་པ་ཙམ་ལས་དུས་མཆོད་ཀྱི་རིགས་ཆེར་མེད། ཉིན་གུང་ཐུན་དང་དགོང་ཐུན་དང་མཚན་ཐུན་བཅས་གྲྭ་ཤག་སོ་སོར་ཉིན་རེ་ཐུན་གསུམ་རེ་བཅད་ཅིང་དཔེ་གཞུང་བལྟ་ཀློག་བྱེད་དགོས། དེ་ལྟར་ན་སྔ་དྲོར་ཆོས་ཐུན་དཔེ་ཁྲིད། ཉིན་གུང་ལ་ཐུན་རང་སྦྱངས། ཕྱི་དྲོར་བསྐྱར་སྦྱངས་དང་། ཆོས་སྒྲོགས་གཟུངས་སྔགས་བསྔོ་སྨོན་སོགས་གསུངས་པ་དང་། སྐབས་རེར་ཆོས་རྩོད་བྱེད། དགོངས་ཐུན་རང་སྦྱངས། མཚན་མོ་སང་ནམ་མ་ལངས་བར་ཐུན་རང་སྦྱངས་བཅས་པས་ཉིན་ལྟར་རིམ་པ་འདི་ཉིད་འབྱུང་། དབྱར་ཀར་ཟླ་བ་ལྔ་པའི་གཞུང་ནས་ཟླ་བ་གཅིག་ལྷག་ཆོས་མཚམས་དང་། སྟོན་ཀ་དང་ལོ་གསར་སྐབས་ཉིན་ཁ་ཤས་ཆོས་མཚམས་འཇོགས་པས་ལོ་རེར་ཟླ་བ་བཅུ་ལྷག་འཆད་ཉན་བྱེད་རྒྱུ་ཡོད། འཚོ་བའི་ཟས་གོས་རང་རང་གིས་འབྱོར་དགོས་ཤིང་དགོན་པ་གཞུང་ནས་ཆུ་གློག་དང་ཇ་ཚྭ་བུད་ཤིང་བཅས་ཀྱི་རིན་གནང་ནས་ཉིན་རེར་ཇ་དུས་གཉིས་ལེན་རྒྱུ་ཡོད་པ་དང་། མཁན་པོ་ལ་གསོལ་ཕོགས་དང་མ་ཆེན་ལ་གླ་ཆ་བཅས་ཡོད། ཨ་མཆོད་དང་གཟུངས་སྔགས་བསྔོ་སྨོན་གྱི་ཆེད་དུ་ཕུལ་བའི་སྐོར་རྫས་རྣམས་བཤད་གྲྭའི་དགེ་འདུན་ཉིད་ཀྱིས་བགོ་ཞིང་སྤྱོད། བཤད་གྲྭ་ཆེན་པོ་འདིར་རྩ་བཞི་ཆང་ལྔ་ལ་སྤྱོད་པ་དང་། དུད་འགྲོ་གསོད་པ། ཁ་སྣའི་དུད་པ་འཐེན་པ་རྣམས་གནས་དབྱུང་དང་། གཞན་དབྱེན་འབྱེད་འཁྲུགས་རྩོད་རིགས། ཤྭ་རྒྱན་སོགས་ཆོས་དང་འདུལ་ཁྲིམས་དང་འགལ་བའི་རིགས་ཉེས་པ་ཆེ་ཆུང་ལྟར་གྱི་ཆད་པ་ཡོད་དེ་མཐའ་གཉིས་སུ་མ་ལྷུང་བའི་ཆོས་གྲྭའི་སྒྲིགས་ཁྲིམས་ཤིན་ཏུ་ལེགས་པ་མཆིས། རིགས་གཞུང་གི་བཤད་པ་བྱས་པས་སློབ་མའང་། ལྕགས་སྦྲུལ་ལོ་འདི་ནས་སྔར་གྱི་སྐྱོར་དཔོན་དགོན་ཆེན་ངག་དབང་མཁས་གྲུབ་དང་། ཝ་ར་དགོན་ཀུན་དགའ་ཆོས་གྲགས་གཉིས་ཆོས་གྲྭ་འདིའི་མཁན་པོ་དང་། ཛཾ་ཐོག་བསོད་ནམས་གྲགས་པ་དང་། ཆོས་སྡེ་ཚེ་དགའ་མཐར་ཕྱིན་གཉིས་སྐྱོར་དཔོན་བསྐོས་བཞག་བྱས་ཤིང་། རྒྱུད་བཤད་སྐབས་གདོང་ཚང་མཁན་པོ་ཡར་འཕེལ། ཁྲོམ་ཐར་མཁན་པོ་ཤེས་རབ་སེངྒེ། ལི་ཐང་མི་འགྱུར་མཁན་པོ་སོགས་ཀྱིས་གསན་བཞེས་མཛད་དེ། དེ་ལྟར་ན་བཤད་གྲྭ་འདི་ནས་སྔར་སྨོས་ཀྱི་གཞུང་ཡོངས་རྫོགས་བཤད་མཁྱེན་པ་མཁན་པོ་ལྔ། སྐྱོར་དཔོན་གཉིས། ཞུ་ཆེན་པའི་ཡང་སྲིད་འཇམ་དབྱངས་རིན་ཆེན་རྒྱལ་མཚན་རྣམས་དང་། ད་ལྟར་ཡང་གཞུང་བཤད་མང་པོ་མཁྱེན་ཅིང་ཤེས་རབ་དང་བརྩོན་འགྲུས་ཆེ་བས་བཤད་རྒྱུན་སྤེལ་དུ་རེ་བའི་རབ་བརྟན་དགེ་ལེགས། སྤོ་ལུ་ཐུབ་བསྟན་བཟོད་པ། རྣམ་རྒྱལ་དགོན་དབང་ཆེན་སེངྒེ་སོགས་མང་པོ། སྤྲུལ་པའི་སྐུ་མགོན་གཟིགས། ཁང་སར་ཞབས་དྲུང་རིན་པོ་ཆེ་འཇམ་དབྱངས་གཞན་ཕན་ཕྲིན་ལས། གདན་རྒན་མཆོག་སྤྲུལ་ཐེག་མཆོག་ཆོས་ཀྱི་ཉི་མ། སྔར་སྨོས་ས་དཀར་དགོན་ཞུ་ཆེན་ཚུལ་ཁྲིམས་རིན་ཆེན་གྱི་མཆོག་སྤྲུལ་འཇམ་དབྱངས་རིན་ཆེན་རྒྱལ་མཚན། ཝ་ར་མཆོག་སྤྲུལ་ངག་དབང་ཀུན་དགའ་བསོད་ནམས། འཇམ་དབྱངས་ཀུན་བཟང་བསྟན་འཛིན། གསེར་ལྗོངས་སྤྲུལ་སྐུ་ཐུབ་བསྟན་ཆོས་ཀྱི་ཉི་མ། བྲག་དཀར་ངག་དབང་བསྟན་པའི་རྒྱལ་མཚན། བཀྲ་ཤིས་དགོན་སྤྲུལ་སྐུ་ངག་དབང་བཀྲ་ཤིས། སྤོ་ལི་སྤྲུལ་སྐུ་འཆི་མེད་ཐུབ་བསྟན། དཔེ་ཝར་སྤྲུལ་སྐུ་བསྟན་པ་ལེགས་གྲུབ། ཡེ་ན་ཆོས་འཕེལ་རབ་རྒྱས་ཀྱི་ཡང་སྲིད་རྣམས་ཀྱིས་གསན་བསམ་མཛད། དགོན་པ་ཁག་ལས་འདུས་པ་ས་སྐྱའི་ཆོས་རྒྱུད་འཛིན་པ་ས་སྐྱ་དགོན། དགོན་ཆེན་དགོན། མཎྜལ་དགོན། འཁོར་མདོ་དགོན། སྒ་ལེན་སྟེང་དགོན། ལྕགས་ར་དགོན། ལྷ་རྒྱལ་དགོན། དྲྭ་མ་དགོན། ཡེ་ན་དགོན། རབ་བརྟན་དགོན། མཁར་མདོ་དགོན། རྔད་ཛཾ་ཐོག་དགོན། དབོན་སྟོད་དགོན། བཀྲ་ཤིས་དགོན། དཔེ་ཝར་དགོན། ཝ་ར་དགོན། ཝ་ར་རི་ཁྲོད་དགོན། གསེར་ལྗོངས་དགོན། སྤོ་ལུ་དགོན། ཐང་སྐྱ་དགོན། གླིང་འདའ་དགོན། གདོང་ཚང་དགོན། ཤངས་མཐོ་དགོན། འདན་ཤུགས་ར་དགོན། ཆོས་སྡེ་དགོན། ས་དཀར་དགོན། སྐྱེ་སྐུ་དགོན། སྒ་དགོན་སར་དགོན། གླིང་མགོན་གཟི་དགོན། ཁྲོམ་ཐར་དགོན། ཧོར་གླང་ནག་དགོན། ལི་ཐང་མི་འགྱུར་དགོན་པ་རྣམས་དང་། རྙིང་མ་མགུ་ལོག་བྲག་དཀར་དགོན། གནམ་བྲག་དགོན། མགྲོན་བསྐང་དགོན། བཀའ་བརྒྱུད་འདན་རྣམ་རྒྱལ་དགོན། རྫ་པད་ཉིན་དགོན། འདན་བཀྲ་ཤིས་དགོན། དགེ་ལུགས་འདན་དགོན་སར་དགོན་བཅས་པ་རྣམས་ལས་འདུས་པ་རྣམས་ཀྱིས་ཉན་སེམས་བསྒོམས་པས་རྒྱལ་བསྟན་རིན་པོ་ཆེ་དར་ཞིང་རྒྱས་པར་མཛད་པ་འདིའོ།། མུ་འགོད།་་་་་་་
' རྩོམ་འོག་མ།
སྡེ་དགེའི་རྒྱལ་རབས་མུ་ཏིག་ཕྲེང་བ། ༼བཅུ་གཅིག་པ་རྫོགས་སོ།།༽