སྡེ་དགེའི་རྒྱལ་རབས་རིན་ཆེན་ཕྲེང་མཛེས། ༼ལྔ་པ།༽
སྡེ་དགེའི་རྒྱལ་རབས་རིན་ཆེན་ཕྲེང་མཛེས། ༼ཚན་པ་ལྔ་པ།༽ མཛད་པ་པོ་བར་མ་མཁན་པོ་ངེས་དོན།
སླར་ཡང་དེ་ཉིད་རྒྱུན་དུ་བརྟན་པར་བྱེད་པའི་ཆོ་ག་ལ་བཀྲ་ཤིས་པའི་རྫས་རྟགས་རྣམ་པ་བརྒྱད་ཀྱི་མངའ་དབུལ་དང་བཅས་པའི་བཀྲ་ཤིས་ཀྱི་ཚིགས་སུ་བཅད་པ་བརྗོད་པའི་ཆེད་དུ། ཕྱོགས་བཅུ་རབ་འབྱམས་ཀྱི་ཞིང་མུར་ཐུག་པ་མེད་པ་རྣམས་སུ་བཞུགས་པའི་རྒྱལ་བ་སྲས་དང་སློབ་མར་བཅས་པའི་ཚོགས་དང་། གཞན་ཡང་འཆི་མེད་ཚེའི་དངོས་གྲུབ་བརྙེས་པའི་ལྷ་དང་། ཀླུ། དྲང་སྲོང་། གྲུབ་པ། རིག་པ་འཛིན་པའི་ཚོགས་བསམ་གྱིས་མི་ཁྱབ་པས་ནམ་མཁའི་གཏོས་ཐམས་ཅད་དུ་ཁྱབ་པར་མངོན་པར་བལྟས་ཏེ། དེ་དག་དང་མཆོག་གི་རྡོ་རྗེ་སློབ་དཔོན་ཆེན་པོ་རྣམས་མགྲིན་བསྒྲིགས་ཏེ་བཀྲ་ཤིས་ཀྱི་ཀླུ་དང་རོལ་མོའི་བྱེ་བྲག་བསམ་གྱིས་མི་ཁྱབ་པའི་སྒྲ་ཤིན་ཏུ་སྙན་པར་འབྱིན་ཅིང་། ལྷའི་མེ་ཏོག་མནྡར་བ་དང་། པུཎྜརཱིཀ ཨུཏྤ་ལ་སོགས་པའི་མེ་ཏོག་རྣམ་པ་སྣ་ཚོགས་པ་དག་གིས་སིལ་མ་གཏོར་བ་ནི། བསྐལ་པ་ཆགས་པའི་དུས་ཀྱི་ཆར་གྱི་རྒྱུན་ཆེན་པོ་བཞིན་དུ་བསྙིལ་བས། མི་དང་མི་མ་ཡིན་པའི་འགྲོ་བ་རྒྱ་མཚོའི་དབང་པོ་ལྔའི་སྤྱོད་ཡུལ་དུ་སྔོན་ཆད་མཐོང་བ་དང་། ཐོས་པ་དང་མྱོང་བར་མ་ནུས་པའི་ངོ་མཚར་གྱི་ལྟད་མོ་མཚར་དུ་དངར་བ་དག་ཏུ་བསྐྲུན་ཏོ། །དེ་ནས་བརྩམས་ཏེ། ཇི་སྐད་དུ། ནོར་དང་འདོད་པ་ཐར་པ་ཆོས། ཞེས་པ་ལྟར་སྡེ་བཞི་སྟེ། དེ་ཡང་ཆོས་ནི་གནས་སྐབས་སུ་མངོན་པར་མཐོ་བ་དང་། མཐར་ཐུག་ངེས་པར་ལེགས་པའི་གོ་འཕང་ཐོབ་པར་བྱེད་པའི་རྒྱུའོ། ནོར་ནི་རིག་བྱེད་མང་དུ་ཐོས་པ་དང་། ས་གཞི་དང་། རིན་པོ་ཆེ་ལ་སོགས་པ་སོག་པ་དང་། བསྲུང་བར་བྱ་བའི་རིགས་སོ། །འདོད་པ་ནི་ལྷ་དང་མིའི་དབང་པོའི་ཡུལ་དུ་གྱུར་པའི་འདོད་པའི་ལོངས་སྤྱོད་རྣམས་སོ། །ཐར་པ་ནི་གཏན་གྱི་བདེ་བ་བྱང་ཆུབ་ཀྱི་སྙིང་པོ་བསྒྲུབས་པའི་འབྲས་བུ་ཉིད་དུ་བཤད་དོ། དགེ་བ་ནི་མ་ཆགས་པ་དང་། ཞེ་སྡང་མེད་པ་དང་། གཏི་མུག་མེད་པས་ཀུན་ནས་བསླངས་པའི་ལས་ཏེ། དེ་ལ་དབྱེ་ན་ལུས་ངག་ཡིད་ཀྱི་སྤང་བ་བཅུ་སྟེ་འབྲས་བུ་སྡུག་བསྔལ་མེད་པ་ཉིད་དུ་སྐྱེད་པར་བྱེད་པའི་རྒྱུ་གང་ཡིན་པའོ། མདོར་ན་འཁོར་བ་དང་མྱ་ངན་ལས་འདས་པའི་དཔལ་འབྱོར་གྱི་རྒྱུ་དང་འབྲས་བུ་ཐམས་ཅད་སྡེ་བཞི་པོ་འདིར་མ་འདུས་པ་མེད་ཅིང་། ཕྱི་མ་ནི་སྐྱེ་བ་ནས་སྐྱེ་བར་བདེ་བ་ཕུན་སུམ་ཚོགས་པ་འཐོབ་པར་བྱེད་པའི་རྒྱུའམ་ལམ་ཁོ་ན་ཉིད་དོ། དེས་ན་མིང་དོན་དེ་དང་ལྡན་པའི་བསྟན་སྲིད་ཟུང་འབྲེལ་གྱི་བགྱི་བ་ཤིན་ཏུ་ལྕི་བའི་ཁུར་ཆེན་པོ་ཡོངས་སུ་བཞེས་པར་མཛད་དོ། དུས་དེ་ཉིད་ནས་བརྩམས་ཏེ་མངའ་འོག་ཏུ་འཁོད་པས་མཚོན་ཏེ། ཕྱོགས་བཅུའི་འཛིན་མའི་དཀྱིལ་འཁོར་ཀུན་ཏུ་ཆེ་བའི་ཡོན་ཏན་དང་། རིགས། སྟོབས་། དཔུང་གི་སྡེ་ཆེན་པོས་མངོན་པར་ཁེངས་པ་དང་ལྡན་པའི་རྒྱལ་ཕྲན་དང་། བློན་པོ། མི་དཔོན། རྫོང་དཔོན། སྡེ་དཔོན། ཆེ་བཙན། འབྱོར་ལྡན་གྱི་སྐྱེ་བོ་རྣམས་ཏེ། ཐམས་ཅད་ཀྱང་ལེགས་བྲིས་ཀྱི་ཡུལ་ནས་འོངས་པ་ལྟ་བུའི་གོས་བཟང་དང་རྒྱན་གྱི་རྣམ་པ་མང་པོས་ལུས་ལ་སྒེག་པར་བྱས་པ་བགྲང་གི་མི་ལྡང་བ་རྣམས་ཀྱིས་ལྷག་སྟེ། རང་རང་གི་མངོན་པར་རྒྱགས་པ་ཐམས་ཅད་ཆོག་ཤེས་ལྡན་པའི་ནོར་བཞིན་དུ་བཏང་ནས། གང་གི་ཞབས་སྟེགས་ཀྱི་ཁྲི་མཐོན་པོ་རིན་ཐང་ཆེ་བའི་ནོར་བུ་རིན་པོ་ཆེའི་ཕྲ་ཚོམ་མཚར་དུ་དངར་བ་བཀོད་པ་དག་ནི། བཙོ་མ་གསེར་གྱི་པ་ཏྲ་རིས་འཁྱུག་པས་ལེགས་པར་བཟུང་བའི་ངོ་མཚར་མིག་གི་དགའ་སྟོན་དུ་གྱུར་པ་ག་ལ་བ་དེ་ན། ལུས་ཐམས་ཅད་ནས་གུས་པའི་ཞེ་ས་དང་བཀུར་སྟི་སྔོན་དུ་འགྲོ་བས། སྡོམ་བརྩོན་བླ་མ་ཆེན་པོའི་ཐུགས་ལ་ཇི་ལྟར་བཞེད་པའི་དགེ་བའི་རྩ་བ་ཐམས་ཅད་ལེགས་པར་གྲུབ་ནས། དེང་གི་དུས་སུ་བོད་ཆེན་པོའི་ལྗོངས་ཀྱི་འགྲོ་བ་སྤྱིའི་བསོད་ནམས་ཀྱི་ཁང་པ་བརྩེགས་པའི་ནང་དུ་བདེ་བར་བྱོན་པའི་དགའ་སྟོན་དང་། གཅིག་ཏུ་བསྟན་སྲིད་ཟུང་འབྲེལ་གྱི་ཁྲི་ལ་མངའ་གསོལ་བའི་ལེགས་སོའི་གཏང་རག་ཏུ། རང་རང་གི་བདོག་པའི་དངོས་པོ་གྱ་ནོམ་པ་དག་སྟོབ་པར་བྱེད་དོ། དེ་དག་ལ་ཡང་སྔ་ན་མེད་པའི་གཏམ་སྙན་གྱི་བཀའ་སྩལ་དང་། གནང་སྐྱེས་ཀྱི་རྣམ་པ་མང་པོ་དག་གིས་ཡིད་ཀྱི་རེ་བ་དག་ཀྱང་ཚིམ་པར་བྱེད་དོ། དེ་ལྟ་བུའི་ལྷག་པའི་བསམ་པ་དང་བསོད་ནམས་ཀྱི་མཐུ་ཆེན་པོས་ཆབ་སྲིད་ཀྱི་ཐ་གྲུ་རྣམ་པར་ཡངས་པའི་ས་ཆེན་པོ་ཆོས་བཞིན་དུ་སྐྱོང་བ་ལ་ནི་གནོད་པ་དང་སྡོ་བ་མི་མངའ་བའི་ཁར། སླར་ཡང་ཛམྦུའི་གླིང་གི་རྒྱལ་ཁབ་ཆེན་པོ་བཞིའི་ཡ་གྱལ་དུ་གྱུར་པ་གནམ་གྱི་མཐོངས་ནས་བསྐོས་པའི་ཤར་ཕྱོགས་གོང་མ་རྒྱལ་པོ་ཞེས་བྱ་བ། སའི་སྟེང་ན་མཚུངས་པའི་ཟླ་བ་ཐམས་ཅད་དང་བྲལ་བའི་སྟོབས་དང་ལས་དབང་གི་འཁོར་ལོས་སྒྱུར་བ་ཆེན་པོ་དེས། བཀའ་ལུང་ཛམྦུའི་ཆུ་བོའི་གསེར་ལས་བསྒྲུབས་པའི་ཅོད་པན་དམ་པ་བས་ཀྱང་རབ་ཏུ་ལྕི་ཞིང་རིན་ཐང་ཆེ་བ་གང་ཞིག །དེང་གི་སྡོམ་བརྩོན་བླ་མ་ཆེན་པོའི་སྤྱི་བོར་བཅིངས་ཏེ། དེ་ནས་བརྩམས་ཏེ་བོད་ཆེན་པོར་གཏོགས་པའི་ས་གཞིའི་དཀྱིལ་འཁོར་ཆེན་པོ་ཀུན་ཏུ་འཁོད་པའི་སྐྱེ་འགྲོ་མཐའ་དག་དང་། མི་བདག་སྤྱིའི་མེས་པོར་དགོས་པའི་འཇའ་ས་དང་གསེར་ཐམ་ཆེན་པོ་ཡང་དང་ཡང་དུ་བསྩལ་ཏེ། ཤིན་ཏུ་བརླིང་བར་བྱས་པའི་སྒོ་ནས་ཀྱང་མཚུངས་པ་མེད་པའི་སྟོབས་ལྡན་གྱི་རྒྱལ་པོའི་གོ་ས་རུ་དབང་བསྐུར་བ་ལེགས་པར་ཐོབ། ཞེས་གསུངས་པ་བཞིན་ཁྲི་སྟོན་གྱི་མཛད་སྒོ་རྒྱས་པར་བྱེད་སྲོལ་དང་། སླར་གོང་མ་ཆེན་པོའི་ལུང་གིས་རྒྱབ་སྐྱོར་གནང་སྲོལ་ཡོད། སྲིད་ཁྲིར་འཁོད་ནས་དཔལ་ས་ངོར་ནས་ཕེབས་པའི་དབུ་བླ་ཁག་དང་། སྐུ་རྒྱབ་མཁན་པོ་སོགས་བློ་འབྲི་ཡུལ། སྐུ་སྒེར་དྲུང་ཆེན་སོགས་ཕྱག་ལས་གནང་མཁན་ཡོད། རྒྱལ་ས་ལྟེ་བ་དཔལ་ལྡན་ལྷུན་གྲུབ་སྟེང་དང་། སྐབས་འགར་ལྕགས་ར་བསམ་གྲུབ་རྩེའི་ཕོ་བྲང་། དབོན་སྟོད་ལྷུན་པོ་རྩེའི་ཕོ་བྲང་། སྨན་ཤོད་བཀྲ་ཤིས་ཕོ་བྲང་། ཛཾ་ཐོག་ནོར་བུ་རྩེའི་ཕོ་བྲང་སོགས་ལའང་བཞུགས། དགོས་གལ་བྱུང་ཚེ་ས་གནས་སོ་སོར་མདུན་ཧོར་སོགས་མི་གོ་ཆོད་རྒྱལ་པོའི་སྐུ་ཚབ་མངགས་གཏོང་བྱེད་དགོས། རིམ་པ་གཉིས་པ་གཉེར་པའམ་མདུན་ན་འདོན་རྒན་གཞོན་གསུམ། ཕྱག་མཛོད་དམ་ནང་བློན་གཅིག །དྲུང་སྐྱ་སེར་གཉིས་བཅས་རྒྱུན་བཞུགས་ཡིན་ལ། དགོས་གལ་བྱུང་ཚེ་དབུ་བླ་ཁག་ལྔ་ཡང་འདུ་ཚོགས་དགོས། དེ་རྣམས་ཇི་ལྟར་འདེམ་པའི་ཚུལ་ལ། གཉེར་ཕྱག་བཞི་ནི། མདུན་སྐོར་གྱི་ཁྱིམ་རྒྱུད་ནང་གཉེར་ཤུལ་ཡོད་པའི་མདུན་ཁག་རྣམས་ལས་འདེམ་དགོས། དེའང་གཉེར་ཕྱག་ལྷན་རྒྱས་ཁང་དུ་དབུ་བླ་ཁག་ལྔ་དང་། མདུན་སྐོར་ཡོངས་རྫོགས་རྒྱས་འཛོམས་ཐོག་འོས་ཤོག་འཕེན། སླར་འོས་ཤོག་གང་མང་སྐུ་ངོ་གཉིས་རེ་ཤར་ནུབ་མགོན་ཁང་གང་རུང་དུ་བརྟགས་སྒྲིལ་འཕེན་ནས་ཐག་གཅོད་གནང་སྟེ་རྒྱལ་པོས་མཚན་གནས་སྤྲོད་རྒྱུ་ཡིན། དྲུང་སྐྱ་སེར། མདུན་ཧོར་ཁག་རྣམས་ལས་སྐུ་ཡོན་གང་ཆེ་གདམ་རྒྱུ་ཡིན། གཉེར་ཆེན་རྒན་གཞོན་གསུམ་ནི་རྒྱལ་ཆུས་གཉེར་མཁན་ཡིན་སྟབས། གཙོ་ཆེར་སྲིད་དོན་ལ་གཟིགས་དགོས། ཕྱག་མཛོད་ཀྱིས་དཔལ་འབྱོར་ཐོག་གཙོ་ཆེར་གཟིགས་དགོས། རིམ་པ་གསུམ་པ་རྫོང་སྒོ་ཁག་ནི། དཔོན་འགོ་བཞི། རྫོང་གཞི་སོ་གསུམ། ཁྲོམ་རྒན་ཆེན་བཞི། འབྲོག་སྡེ་དཔོན་སོ་དྲུག །ཕྱིའི་དཔོན་འགོ་གསུམ་བཅས་ཡོད་པ་ལས། དཔོན་འགོ་བཞི་ནི། ༡ཤར་ཡིད་ལྷུང་དཔོན། ༢ལྷོ་སྒ་རྗེ་དཔོན། ༣ནུབ་འབྲང་པ་དཔོན། ༤བྱང་སེར་ཤུལ་དཔོན་བཅས་སོ། །རྫོང་གཞི་སོ་གསུམ་ནི། ༡ཟིལ་རྒྱུད་རྫོང་། ༢ལྕགས་ར་རྫོང་། ༣རྨེ་ཤོད་རྫོང་། ༤གཏེར་ལྷུང་རྫོང་། ༥འཛིང་པ་རྫོང་། ༦དཔེ་ཝར་ཤར་རྒྱུད་རྫོང་། ༧ཧོར་པོ་རྫོང་། ༨རག་ཆབ་རྫོང་། ༩སྤོ་ལི་རྫོང་། ༡༠དཔེ་ཝར་ནུབ་རྒྱུད་རྫོང་། ༡༡སྐུ་ཚེ་རྫོང་། ༡༢ཛཾ་ཐོག་རྫོང་། ༡༣ཝ་ར་རྫོང་། ༡༤ཉག་གཤིས་རྫོང་། ༡༥རབ་བརྟན་རྫོང་། ༡༦ཡེ་ན་རྫོང་། ༡༧རི་མདའ་རྫོང་། ༡༨འབྲི་ནུབ་དབོན་སྟོད་རྫོང་། ༡༩འབྲི་ཤར་དབོན་སྟོད་རྫོང་། ༢༠མཁར་མདོ་ནུབ་རྒྱུད་རྫོང་། ༢༡མཁར་མདོ་ཤར་རྒྱུད་རྫོང་། ༢༢རྨ་རོང་རྫོང་། ༢༣འཁོར་མདོ་རྫོང་། ༢༤འདན་ཆོས་སྡེ་རྫོང་། ༢༥འདན་རྩེ་བ་དཔོན། ༢༦འབྲུ་བསེ་རུ་དཔོན། ༢༧འདན་ཆོས་འཁོར་དཔོན། ༢༨རྫོགས་ཆེན་འབྲོག་རུ་རྫོང་། ༢༩རྫ་པ་རྫོང་། ༣༠དཔལ་ཡུལ་རྫོང་། ༣༡ཙམ་མདོ་རྫོང་། ༣༢ས་དམར་རྫོང་། ༣༣འབའ་རོང་རྫོང་བཅས་སོ། །ཁྲོམ་རྒན་ཆེ་བཞི་ནི། ༡ཨ་འཛི་ཤོག་ཆེན། ༢འབར་ཆུང་ཤོག་ཆེན། ༣རྒྱ་ཤོད་ཤོག་ཆེན། ༤ནག་ཐར་ཤོག་ཆེན་བཅས་སོ། །འབྲོག་སྡེ་དཔོན་ཁག་སོ་དྲུག་ནི། ༡ཤུ་གུ་འབའ་ཆུང་། ༢འཛི་སྒར། ༣སྡུག་གྲྭ། ༤སྐྱབས་ཀྱེ། ༥འབྲང་བ། ༦མདོ་གཞུང་། ༧པདྨ ༨གོ་སྟོད། ༩བདུད་མོ། ༡༠ཁྱེའུ། ༡༡ཐར་ཤུལ། ༡༢སང་ཀ ༡༣ཁྲི་འདུ། ༡༤འབུམ་རྙིང་། ༡༥ཀ་བཞི། ༡༦བ་རོད། ༡༧མང་དགེ ༡༨འབུམ་གསར། ༡༩དགེ་རྩེ་གོང་མ། ༢༠དགེ་རྩེ་འགབ་མ། ༢༡དཔོན་རི། ༢༢ཁྲོམ་རྫ་གོང་མ། ༢༣ཁྲོམ་རྫ་འགབ་མ། ༢༤དབོན་པོ་རྫ་ཉིན། ༢༥དབོན་པོ་རྫ་སྲིབ། ༢༦དགེ་མང་། ༢༧ཁྲོ་ཤུལ་གོང་མ། ༢༨ཁྲོ་ཤུལ་འགབ་མ། ༢༩ཨ་རིག་རྫ་པ། ༣༠འཇུ་མང་། ༣༡འཇུ་ཉུང་། ༣༢ཕྱག་ཚ། ༣༣ཨ་བསེ། ༣༤གད་ཐོག །༣༥ཝ་ཤུལ། ༣༦སེར་ཤུལ་བཅས་སོ། །ཕྱིའི་དཔོན་འགོ་གསུམ་ནི། ༡རྔ་མོང་སྣ་སོག་མོ་ཚང་། ༢ཉག་གཤིས་སེ་ཚ་ཚང་། ༣གོ་འཇོ་བསམ་གྲུབ་ཚང་བཅས་སོ། །དེ་རྣམས་སྡེ་དཔོན་རང་འཇག་ཡིན་པ་ལ་བརྗེ་སྐོར་མེད་ཅིང་། རྫོང་དཔོན་དང་གཞིས་གཉེར་རྣམས་བརྗེ་སྐོར་གྱིས་མདུན་སྐོར་དང་ཧོར་འདྲ་རེས་མཛད་པ་ཡིན། རིམ་པ་བཞི་པ་ནི། ཞིང་པའི་ས་ཁུལ་དུ་ཤོག་ཁག་སོ་སོའི་ཤོག་དཔོན་རྟ་ཁྲལ་གྱི་ས་ཞིང་ཡོད་པའི་ཁྱིམ་རྒྱུད་ལས་གདམ་རྒྱུ་ཡིན། ས་གནས་ཁ་ཤས་ལ་འདིའི་རིམ་པ་མེད། འབྲོག་ཁུལ་དུ་གྱད་རུ་སོགས་ཡིན། རིམ་པ་ལྔ་པ་ནི། ཞིང་པའི་ས་ཁུལ་དུ་གཙོ་ཤོག་དང་། འབྲོག་ཁུལ་དུ་རུ་དཔོན་སོགས་ཡིན་ལ། གཙོ་ཤོག་རེ་ལ་བསམ་གནས་ཞེས་གྲོང་ཚོ་དེའི་ནང་ཡུལ་མིའི་བརྩི་འཇོག་གང་ཆེ་རེ་གདམ་རྒྱུ་དང་། གཙོ་བོ་ཞེས་རྐང་ཁྲལ་གྱི་ས་ཞིང་ཡོད་པ་ལས་མི་རེ་གདམ་སྟེ་དེས་རིམ་པ་གོང་མའི་བཀའ་ཅི་ཡོད་གྲོང་ཚོ་ནང་བརྡ་ཆ་རྒྱག་དགོས། གཉིས་པ་ཁྱིམ་རྒྱུད་ཀྱི་རིམ་པ་ལ། རིམ་པ་དང་པོ་རྒྱལ་པོའི་རིགས་རྒྱུད། རིམ་པ་གཉིས་པ་མདུན་སྐོར་དང་དཔོན་ཁག་གི་རིགས། རིམ་པ་གསུམ་པ་ཧོར་འདྲའི་རིགས། རིམ་པ་བཞི་པ་མི་སེར་གྱི་རིགས་དང་བཞིར་དབྱེ། དེ་ལ་རིམ་པ་དང་པོ་རྒྱལ་པོའི་རིགས་ནི་གོང་སྨོས་བཞིན་འགར་གྱི་གདུང་རྒྱུད་ཁོ་ན་ཡིན། རིམ་པ་གཉིས་པ་དཔོན་ཁག་དང་མདུན་སྐོར་རྣམས་ལས། དཔོན་ཁག་རྣམས་ནི་གོང་དུ་སྨོས་པ་བཞིན་ཡིན་ལ། མདུན་སྐོར་རྣམས་ཀྱི་མཚན་ཐོ་ནི་མདུན་སྐོར་སུམ་ཅུར་གྲགས་ཤིང་ཕྱིས་ཁྱིམ་གཞིས་གྱེས་པས་མདུན་ཁྱིམ་དུད་བཞི་བཅུ་ཞེ་གསུམ་ཙམ་ཡོད་དེ། ༡མདུན་དིས་མགོ་གཉེར་ཤུལ། ༢ཨ་ཐུབ་གཉེར་ཤུལ། ༣དྲན་འཁོར་གཉེར་ཤུལ། ༤ཆུ་རྡོ་གཉེར་ཤུལ། ༥གཟིམ་དཔོན། ༦དབོན་ཐོག་གཉེར་ཤུལ། ༧ལྟོ་རུ་གཉེར་ཤུལ། ༨བྱ་རྒོད་གཉེར་ཤུལ། ༩ས་དཀར་གཉེར་ཤུལ། ༡༠ནིས་མདའ། ༡༡ལྕགས་རྟ་གཉེར་ཤུལ། ༡༢ཧོ་ཆོ་གཉེར་ཤུལ། ༡༣ཇ་ར་གཉེར་ཤུལ། ༡༤ལུག་ར་གཉེར་ཤུལ། ༡༥ཕུ་མ་གཉེར་ཤུལ། ༡༦བྱེ་ཐམ། ༡༧གནས་ར། ༡༨འཇུ་ཆེན། ༡༩འཇུ་ཆུང་གཉེར་ཤུལ། ༢༠ཞིང་མོ། ༢༡གྲུ་མོ་གཉེར་ཤུལ། ༢༢དབུ་རྩ་གཉེར་ཤུལ། ༢༣བྲེ་འབོད་གཉེར་ཤུལ། ༢༤ཨ་ཁྲི། ༢༥གནས་གཞི་གཉེར་ཤུལ། ༢༦འོག་མ་གཉེར་ཤུལ། ༢༧རྒྱ་མཁར་གཉེར་ཤུལ། ༢༨ཕྱག་ཚ། ༢༩གཅེས་པ་གཉེར་ཤུལ། ༣༠གྱང་ཁང་གཉེར་ཤུལ། ༣༡རྣམ་སྲས་གཉེར་ཤུལ། ༣༢ཡ་མགོ་གཉེར་ཤུལ། ༣༣ངན་ཕྲད། ༣༤ངན་ཆུང་། ༣༥རི་ཕུག །༣༦ཡ་ཐང་གཉེར་ཤུལ། ༣༧གེ་འཇའ་གཉེར་ཤུལ། ༣༨བྲག་ཡབ། ༣༩རྣམ་ཆུང་། ༤༠ར་རུ་གཉེར་ཤུལ། ༤༡རང་རྒྱབ་གཉེར་ཤུལ། ༤༢འདིས་ཁ། ༤༣བཤེས་གཉེན་བཅས་སོ། །རིམ་པ་གསུམ་པ་ཧོར་འདྲ་ཁག་ནི། ཧོར་འདྲ་བརྒྱད་ཅུར་གྲགས་ཤིང་གཞིས་ཁྱིམ་གྱ་དྲུག་ཙམ་ཡོད་དེ། དེའང་། ༡ཧོར་ཕྱུག་པོ། ༢ཐམ་ག །༣སྤོམ་ཁ་དཔོན་སྐྱ་གཡོག་ཁྲིད་ཅེས་བཅའ་འགྲིག་ཏུ་གཡོག་པོ་རེ་ཁྲིད་ཆོག །༤བ་ཤར། ༥བྱ་མོ། ༦ཨ་ཐོག །༧གསོ་ཚེ། ༨སྣ་ཡོ། ༩གེ་མོ། ༡༠ལི་ཁེ། ༡༡མཁར་སྒང་། ༡༢ཀོ་རྡོག །༡༣ཧོར་དཀར། ༡༤མེ་ཐོག །༡༥གླང་དམག །༡༦ཕྱག་ཚ། ༡༧མཁར་ཀེ ༡༨རྗེས་ཚ་དཔོན་སྐྱ་གཡོག་ཁྲིད། ༡༩བྱིས་ཚུག །༢༠ཨ་ཀྲུང་། ༢༡འབུ་སྐྱིད། ༢༢དགེ་ལུ། ༢༣བྱ་ཆུང་། ༢༤ཨ་ཐོབ། ༢༥མ་མ། ༢༦བཞི་ནང་། ༢༧ཡང་སྟེང་། ༢༨ཉིན་མོ། ༢༩བུ་ཞིང་། ༣༠འེར་མ་འདི་བྲག་དམར་དཔོན་རྒྱུན་འཇགས། ༣༡རྟ་ཇོ། ༣༢བྲོ་འགུ། ༣༣གླུ་ར། ༣༤དིས་ཚོགས། ༣༥ཕྱི་ཚ། ༣༦རྒྱ་སུག །༣༧གཟའ་དགེ ༣༨ཉག་རོང་། ༣༩སྔོ་རྣ། ༤༠སྔོ་ཆུང་། ༤༡གསོལ་དཔོན། ༤༢རེ་འཛིན། ༤༣སྒོ་རུ། ༤༤བར་མ་ཕའི་ཧོར་མིང་ལ་དཀོན་མཆོག་ལྷ་དབང་ཟེར་ཆུ་ཁྱི་ཕྱི་ལོ་༡༩༢༢་༢༠༠༦དཔོན་སྐྱ་ཡིན་ཟེར་བ་ཐོས་ཞྭ་གྱ་ལ་ཞིག་ཀྱང་སྔར་བར་མ་ཚང་གི་མཆོད་ཁང་ནང་དུ་བཞུགས་ཡོད་པ་མཐོང་མཁན་ད་ལྟ་ཡོད། ཕྱི་འབྲོག་ཁག་ལྔ། བྱང་སྡེ་རྫ་ཆུ་ཁ། འཁོར་ལོ་མདོ། མཁར་གསུམ་མདོ་རྣམས་སུ་ཁྲལ་བསྡུ་ཆེད་སྡེ་དགེའི་སྐུ་ཚབ་འགྲོ་མྱོང་། ད་ལྟ་བོད་ན་ཞལ་བཞུགས་བཞིན་པའི་རྒན་པོ་ཞིག་གི་ངག་ལས། བྱང་སྡེ་གཟའ་གླིང་ཁྲི་སྐོར་བཅུ་གཉིས་ཞེས་སྡེ་དགེ་རྒྱལ་པོའི་ཁ་འོག་ཏུ་ཡོད་པ། དེ་ནི་སྡེ་རྒྱ་ཆེ་ཤིང་གྲངས་མང་ལ། མགོ་ལོག་རྨ་ཆུ་ཚུན་ཆད་མཚོ་སྔོན་གྱི་སྡེ་མཚམས་ཡིན་ལ། དེ་ལ་སྡེ་དགེ་ཚང་གི་ཧོར་འདྲ་དང་མདུན་སྐོར་དུས་རྒྱུན་འགྲོ་དགོས་ཀྱི་ཡོད་ཀྱང་། སྤྱིར་བྱང་སྡེ་ཕྱོགས་ལ་ཁྲམ་པ་དང་དགྲ་ཇག་ཕྱོགས་ཁག་མང་བ་དང་ཟིང་ཆ་ཆེ་བའི་རྐྱེན་གྱིས་ཁྲལ་ཆུས་འུ་ལག་དང་བཅའ་ཁྲིམས་བཅས་ཞི་བདེ་བྱུང་མ་ཐུབ། དེ་རྗེས་འབྲི་ཆུ་ནུབ་རྒྱུད་ཀྱི་སྐུ་ཚེ་བར་མ་ཚང་དཀོན་མཆོག་ལྷ་དབང་ཆེད་དུ་བཏང་བ་ཡིན། དེ་སྐབས་ལྷ་སྲས་བདུད་འདུལ་གྱི་སྐབས་ཡིན། དེ་ནས་ལོ་ཤས་རིང་བྱང་ས་ཁག་ལ་ཞིབ་རྟོག་བྱས་ནས། ཞི་དྲག་གཉིས་ཀྱི་སྒོ་ནས་སྔར་ལུགས་ལྟར་སྡེ་དཔོན་རང་འཇག་དང་ཁྲལ་ཆུས་འུ་ལག་ཆ་ཚང་ལེན་ཐུབ་པ་བཅས་བྱུང་ནས། སྡེ་དགེ་རྒྱལ་པོས་ཐུགས་དགྱེས་པའི་སྒོ་ནས་ད་ལན་ཁྱེད་རང་ནས་གོ་ཆད་བྱུང་ཞེས་དངུལ་སྒོར་རྡིལ་ཚད་གཅིག་དང་གཟིག་ལྤགས་བཅས་གསོལ་རས་གནང་། དེ་སྐབས་འོག་མ་རིན་རྣམ་ནས་ཀྱང་ཁྱེད་འཕངས་པའི་མདའ་མོ་འབེན་ལ་ཕོག །མངགས་པའི་མིའི་གོ་ཆད་བྱུང་ཟེར་བསྔགས་བརྗོད་ཐོབ། ཅེས་གསུངས་ཀྱི་འདུག །༤༥ཀྲུ་ཚ། ༤༦གཉའ་ཚ། ༤༧གླུ་ཐོག །༤༨ག་མགོ། ༤༩་ཧོར་ཀྲུག །༥༠ཧེ་མོ། ༥༡རྡོ་ཚེ། ༥༢བྲག་ནག །༥༣རག་སྒང་། ༥༤འབིག་ཀྲུག །༥༥རོ་ཀོ། ༥༦འདྲེའུ། ༥༧ཞང་བུ། ༥༨འབྲི་ར། ༥༩ཨ་སྔོ། ༦༠བདུན་པ། ༦༡ཝ་རྩུབ། ༦༢རྟ་པ། ༦༣རྟ་གྲགས། ༦༤བདུད་མོ་འདི་བདུད་མོ་དཔོན་རྒྱུན་འཇགས་། ༦༥ཕག་རིང་། ༦༦སྟག་ཞིག །༦༧ཨ་བྲན། ༦༨རྨ་རེ། ༦༩ཁྲམ་བཟང་། ༧༠ཧོར་ཚ། ༧༡ཨ་ཉག །༧༢མ་གྲོང་། ༧༣སྲོག་རྟ། ༧༤ཨ་ཕྱུག །༧༥དིས་ཁ། ༧༦སྒོ་ཚ། ༧༧སྲིབ་ཁང་། ༧༨རྨ་ཡག །༧༩གླང་ཞིང་དུས་མ་འགྱུར་བའི་སྔོན་དུ་རྣམ་རྒྱལ་བཀྲ་ཤིས་སྡེ་དགེ་རྒྱལ་པོའི་དྲུང་ཡིག་ཡིན། ༨༠རྟ་རྒྱུག །༨༡ལུང་དམར། ༨༢ཁྲེས་ཚོ། ༨༣ནང་ཡོ། ༨༤གོ་སུག །༨༥རྡོ་རོ། ༨༦འགགས་པ་བཅས་སོ། །རིམ་པ་བཞི་པ་མི་སེར་ཡིན་ལ། དེ་ལའང་ནང་གསེས་ལྷ་སྡེ། མི་སྡེ་གཉིས་ཀྱི་དང་པོ་ལྷ་སྡེ་ལ་དགོན་སྡེ་ཁག་གི་མཆོད་གཞིས་དང་ཁོལ་པ་འབོར་ཆེན་ཡོད། མི་སྡེ་ལ་གཞུང་སྡེ་ཁྲལ་བ་དང་། དཔོན་ཁག་རྣམས་ཀྱི་སྒེར་དུད་དང་ཁོལ་པ་སྟེ་རིགས་གཉིས་ཡོད། གཞུང་སྡེ་ཁྲལ་པ་ལ་རྟ་ཆུས་དང་། ཁལ་ཆུས། རྐང་ཆུས་ཏེ་རིགས་གསུམ་ཡོད། དེའང་རྟ་ཆུས་ཡོད་མཁན་ནས་འུ་ལག་རྟ་ཁྲལ་དགོས་པ་དང་། ཁལ་ཆུས་ཡོད་མཁན་གྱིས་འུ་ལག་མཛོ་ཁལ། རྐང་ཆུས་ཡོད་མཁན་གྱིས་འུ་ལག་མི་རྐྱང་གི་ཁྲལ་སྤྲོད་དགོས། དེ་ལྟར་མི་སེར་གྱིས་ཧོར་འདྲའི་རིགས་རྒྱུད་ལ་བརྩི་བཀུར་བྱེད་དགོས་ལ། ཧོར་འདྲས་མདུན་སྐོར་ལ་གུས་ཞབས་དང་བརྩི་འཇོག་བྱེད་དགོས། མདུན་སྐོར་གྱིས་རྒྱལ་པོའི་ཁྱིམ་རྒྱུད་ལ་གུས་ཞབས་དང་བརྩི་འཇོག་བྱེད་དགོས། མདུན་སྐོར་དང་ཧོར་འདྲ་ཁག་གིས་རང་རང་གི་ཡུལ་ཤོག་དེའི་འགོ་དཔོན་ཡང་ཕལ་ཆེར་བྱེད་ཆོག་འདུག་གོ། གསུམ་པ་སྡེ་དགེའི་མངའ་ཁོངས་སུ་ཐེམ་དུད་དང་མི་གྲངས་རྒྱ་བསྐྱེད་ཇི་ལྟར་བྱུང་ཚུལ་ནི། སྔོན་ཆད་ལོ་རྒྱུས་རྙིང་པར་གསལ་ཆ་ཆེར་མ་མངོན་ཀྱང་། བོ་ཐར་བཀྲ་ཤིས་སེངྒེའི་སྐབས་ཟིལ་རྒྱུད་ཡུལ་སྡེ་མངའ་དབང་བསྒྱུར་བ་ནས་བཟུང་རིམ་བཞིན་། བླ་ཆེན་བྱམས་པ་ཕུན་ཚོགས་སྐབས་རྫོང་སྒོ་བཅོ་བརྒྱད་ཙམ་དང་། འབངས་མི་ཁྱིམ་སུམ་ཁྲི་དྲུག་སྟོང་ཡོད་པར་བཤད་ཅིང་། ཁྲི་ཆེན་ཕུན་ཚོགས་བསྟན་པའི་སྐུ་རིང་ལ་རྫོང་སྒོ་ཉེར་ལྔ་དང་། དཔོན་ཆུང་མང་པོ། འབྲོག་སྡེ་ཁྲི་གསུམ་དུ་ལངས་པ་དང་། ཤིན་ཏུ་དར་ཁྱབ་ཆེ་སྐབས་སུ་རྫོང་སྒོ་ཆེ་ཆུང་བདུན་ཅུ་དོན་དགུ་དང་། ཁྱིམ་དུད་བདུན་ཁྲི་བདུན་སྟོང་ཡོད་པར་བཤད། ཕྱིས་ཀྱི་གནས་སྐབས་ཕལ་ཆེར་ལ་སྡེ་དཔོན་རྫོང་སྒོ་ཁག་གོང་སྨོས་ལྟར་ཡིན་ལ། དུད་ཁག་རེ་ལ་ཆ་སྙོམས་མི་གྲངས་བཞི་རེ་བརྩིས་ན་མི་གྲངས་སུམ་འབུམ་ལྷག་ཙམ་ཕྱིས་སུ་ཡོད་དགོས་པ་ཚོད་རྩིས་ཡིན། གསུངས་ཀྱང་སོག་པོའི་སྐབས་ཀྱི་བརྩི་ཚུལ་ལ་དུད་ཚང་རེར་མི་གྲངས་དྲུག་རེ་ཆ་སྙོམས་བརྩིས་ཡོད། དེང་སྐབས་མི་གྲངས་དང་། ཕྱིས་སུ་མི་གྲངས་ཀྱི་འཕེལ་རྒྱས་ལ་བརྟག་ན་དོ་མ་སྙོམས་པ་ལྟ་བུ་སྣང་ནའང་། དེང་སྐབས་ཡུལ་སྡེ་མ་ཆགས་པའི་སར་སྔ་མོ་ཡུལ་སྡེ་ཆགས་ཤུལ་ཡོད་པ་དང་། སྡེ་དགེའི་མི་ཐོག་གཉིས་གསུམ་ཚུན་དམག་འཁྲུགས་དང་། ཡུལ་གྱར་སོང་བ་མང་དུ་ཡོད་འདུག་པས་སྔ་མོའི་མ་དེབ་ཚད་ལྡན་མ་ཐོབ་ཚེ་མཐའ་གཅིག་ཏུ་མི་གྲངས་ཐད་ཁ་མཚོན་གཅོད་ཐབས་མི་འདུག་གསུངས། སྡེ་དགེ་རྒྱལ་པོའི་སྲིད་དོན་ལོ་རྒྱུས་ལས། ཟིལ་རྒྱུད་ཀྱི་ཡུལ་སྡེ་མངའ་དབང་དུ་བསྒྱུར་བའི་རྒྱལ་པོ་བོ་ཐར་བཀྲ་ཤིས་སེངྒེ་ནས་རྒྱལ་རབས་རིམ་བྱོན་གྱི་སྲིད་དབང་སྲ་བརྟན་དུ་ཡོང་ཆེད། རྒྱལ་པོ་དབུ་གཙོ་མཛད་པའི་འོག་ཏུ་གཉེར་ཕྱག་ལྷན་རྒྱས་ཁང་དང་། རྫོང་སྒོ་ཁག །ཞིང་པའི་ས་ཁུལ་དུ་སྡེ་ཤོག །འབྲོག་པའི་ས་ཁུལ་དུ་གྱད་རུ། གཙོ་ཤོག །རུ་དཔོན་བཅས་སྲིད་འཛིན་གྱི་གོ་རིམ་དང་། རྒྱལ་པོའི་གདུང་བརྒྱུད་གཙོ་བོར་གྱུར་པའི་འོག་ཏུ་དཔོན་རིགས་དང་། མདུན་སྐོར། ཧོར་འདྲ། མི་སེར་སོགས་ཁྱིམ་རྒྱུད་ཀྱི་རིམ་པ་གཉིས་སུ་ཕྱེས་ནས་སྲིད་འཛིན་གྱི་སྒྲིག་གཞི་ཡང་དག་པ་ཞིག་ཚུགས་ཡོད། སྡེ་དགེའི་ཁྲི་རབས་དང་པོ་ཆོས་རྒྱལ་བྱམས་པ་ཕུན་ཆོགས་ཀྱིས་ལུགས་གཉིས་ཟུང་འབྲེལ་གྱི་རང་སྡེ་སྟོབས་འབྱོར་རྒྱ་སྐྱེད་བཏང་བ་དང་གཞན་སྡེ་དབང་དུ་བཀུག་ནས། མངའ་ཞབས་ཀྱི་ཆབ་འབངས་སྔོན་ཡོད་དུད་ཚང་སུམ་སྟོང་ཡན་མན་ནས་གློ་བུར་དུ་སུམ་ཁྲི་དྲུག་སྟོང་ལྷག་ཙམ་དུ་གྱུར། མངའ་འོག་གི་སྟོབས་འབྱོར་རྒྱ་སྐྱེད་ཆེད། ཞིང་སྡེ་ས་ཁུལ་དུ་རྨེ་ཤོད་དང་། རྫ་ཁོག །འཁོར་ལོ་མདོ། དགོན་མདའ། དཔེ་ཝར། ལྕགས་ར། མཁར་གསུམ་མདོ། དབོན་པོ་སྟོད། འདི་དག་ད་ལྟ་སྡེ་དགེའི་ཁོངས་སུ་གཏོགས། ཧོར་པོ། རག་ཆབ། གཏེར་ལྷུང་། འཛིན་ཁོག །འདི་དག་ད་ལྟ་དཔལ་ཡུལ་རྫོང་ཁོངས་སུ་གཏོག །འཇོ་མདའ། སྐམ་ཐོག །ཀུ་སེ། སྤོ་ལུ། བསམ་གྲུབ་གཞུང་། འདི་དག་ད་ལྟ་འཇོ་མདའི་ཁོངས་སུ་གཏོགས། བཅས་ཀྱི་ས་གནས་རྫོང་ཆེན་བཅོ་བརྒྱད་དུ་བགོས། འབྲོག་པའི་ས་ཁུལ་དུ་འབྲོག་སྡེ་དཔོན་ཤོག་ལྔ་རུ་ཕྱེས། ཁྲི་རབས་དྲུག་པ་ཆོས་རྒྱལ་བསྟན་པ་ཚེ་རིང་གི་སྐབས་སུ། སེར་ཤུལ་བཅས་འབྲོག་སྡེ་དཔོན་ཤོག་སོ་བདུན་སྔོན་རྗེས་སུ་སྐྱབས་བཅོལ་ཞུས་ནས་མངའ་ཁྱོན་རྒྱ་ཆེ་རུ་སོང་། ཁྲི་རབས་བདུན་པ་ཆོས་རྒྱལ་ཕུན་ཚོགས་བསྟན་པས་ཀྱང་འདན་ཁོག་བཅས་ཀྱི་ས་ཆ་དབང་དུ་བསྡུས་ཏེ་མངའ་ཁོངས་རྒྱ་སྐྱེད་བཏང་། ཆབ་འོག་དུད་ཚང་ཡང་བདུན་ཁྲི་ལྷག་ཙམ་དུ་སླེབས། དེའི་སྐབས་སུ་མངའ་འོག་གི་ཞིང་པ་ས་ཁུལ་ཡང་རོང་སངས་དང་། ཆུ་སྡེ། རྨོག་རྩ། འདི་དག་ད་ལྟ་འཇོ་མདའི་ཁོངས་སུ་གཏོགས། ས་དམར། མགར་ཡུལ། འཛམ་དོ། འབའ་རོང་། འདི་དག་ད་ལྟ་དཔལ་ཡུལ་ཁོངས་སུ་གཏོགས། བཅས་རྫོང་སྒོ་བདུན་འཕར་སྣོན་བྱུང་ནས་ཁྱོན་བསྡོམས་རྫོང་སྒོ་ཉེར་ལྔ་ཡོད་པ་དང་། འབྲོག་ཁུལ་ཡང་དཔོན་ཤོག་སོ་བརྒྱད་འཕར་སྣོན་བྱུང་ནས་ཁྱོན་བསྡོམས་འབྲོག་སྡེ་དཔོན་ཤོག་ཞེ་གསུམ་དུ་སླེབས། གོང་གི་རྫོང་སྒོ་དང་སྡེ་ཤོག་སོ་སོ་ཕྱི་ལོ་༡༩༠༨ལོར་རྒྱ་ཨམ་བན་ཀྲའོ་ཨེར་སྤྱོང་གིས་ཁམས་ཕྱོགས་སུ་དཔོན་པོ་རྒྱ་ཡིས་འཛིན་པའམ་སྡེ་དཔོན་འཐེན་ནས་གཞུང་དཔོན་གཏོང་བའི་ལམ་ལུགས་ལག་ལེན་བྱས་རྗེས། དེའི་བྱང་རྒྱུད་སེར་ཤུལ་རྫོང་དང་། འདན་ཁོག་རྫོང་དུ་བསྒྱུར། དཀྱིལ་རྒྱུད་སྡེ་དགེ་རྫོང་དུ་བསྒྱུར། ལྷོ་རྒྱུད་དཔལ་ཡུལ་རྫོང་དུ་བསྒྱུར། ནུབ་རྒྱུད་ཐང་ཕུག་རྫོང་དུ་བསྒྱུར་བར་མ་ཟད། རྫོང་ཁག་རེར་རྒྱ་རིགས་དཔོན་རེ་བཞག་ནས་དབང་བསྒྱུར་བྱེད་དུ་བཅུག །ཆོས་རྒྱལ་ཁྲི་རབས་དང་པོ་ནས་བཟུང་ཆོས་རྒྱལ་གྱི་མངའ་ཞབས་སུ་སྲིད་དོན་དོ་དམ་བྱེད་མཁན་གྱི་གཉེར་ཆེན་དང་། ནོར་དོན་དོ་དམ་བྱེད་མཁན་གྱི་ཕྱག་མཛོད། མངའ་འོག་གི་རྫོང་ཁག་སོ་སོའི་རྫོང་ཆེན་རེར་དུད་ཚང་སུམ་བརྒྱ་ཡན་མན་རྫོང་དཔོན་རེ་དང་། རྫོང་ཆུང་རེར་དུད་ཚང་ཉིས་བརྒྱ་མན་ཆད་གཞིས་གཉེར་རེ། གྲོང་པ་རེར་དུད་ཚང་བཅུ་ཕྲག་ཁ་ཤས་གཙོ་བོ་རེ། ལུང་ཁུག་ཏུ་སྡོད་པའི་དུད་ཚང་འགའ་རེ་ལ་བཅུ་དཔོན་རེ་བཅས་བཞག་ཡོད། གཉེར་ཆེན་གྱིས་རྒྱུན་དུ་ཆོས་རྒྱལ་ཕོ་བྲང་ནས་ནམ་རྒྱུན་གྱི་བྱ་བ་ཐག་གཅོད་བྱེད་རྒྱུའི་འགན་ཡོད་པར་མ་ཚད། ཆོས་རྒྱལ་གྱི་བཀའ་མངགས་ལྟར་མཐའ་མཚམས་སྲུང་སྐྱོང་བྱེད་ཅིང་། སེར་ཤུལ་དཔོན་སེར་ཤུལ་ས་མཚམས་དང་། ལྷ་རི་དཔོན་ཡིད་ལྷུང་ས་མཚམས། འབྲོང་པ་དཔོན་འཇོ་མདའི་ས་མཚམས། སྒ་རྗེ་དཔོན་དཔལ་ཡུལ་ས་མཚམས་བཅས་ཀྱི་ཟུར་འགན་ཡང་ཁུར་དགོས། གཉེར་ཆེན་གྱིས་མཐའ་མཚམས་སྲུང་རིང་ཆོས་རྒྱལ་གྱི་འདུ་ཚོགས་ནང་གི་འབྲེལ་ཡོད་དོན་ཆེན་ལ་གྲོས་མོལ་བྱེད་ཆོག་ལ་མཐའ་མཚམས་སུ་ཆོས་རྒྱལ་གྱི་སྐུ་ཚབ་བྱེད་ནས་གནད་དོན་ཐག་གཅོད་ཀྱང་བྱེད་ཆོག །འགོ་པ་དུད་ཚང་གི་དཔོན་རིགས་རྣམས་བསྐོ་བཞག་རྗེས། ལྷག་བློ་དཀར་ཞིང་ཆོས་སྲིད་ཟུང་འབྲེལ་གྱི་བྱ་གཞག་ལ་བྱས་རྗེས་ཆེན་པོ་ཡོད་མཁན་གྱི་རིགས་རྒྱུད་རྣམས་མི་རབས་ནས་མི་རབས་བར་ཐོབ་ཐང་རྒྱུན་འཛིན་བྱེད་དབང་ཡོད། རྒྱལ་རབས་རིམ་བྱུང་ནས་ཁྲི་རབས་བཅུ་བཞིའི་ཆོས་རྒྱལ་རིང་བར། ཁྱོན་བསྡོམས་མདུན་སྐོར་བཞི་བཅུ་ལྷག་ཡོད་ལ། མདུན་ཁྱིམ་སོ་སོའི་ཁོངས་གཏོགས་རྫོང་སྒོ་ཉེར་ལྔའི་ནང་རེས་མོས་ཀྱིས་རྫོང་དཔོན་བྱེད་ཆོག་པ་དང་། རྫོང་དཔོན་གྱིས་རྫོང་གི་སྲིད་དབང་བདག་སྐྱོང་བྱེད་རིང་འཇོན་ཐང་དང་བྱས་རྗེས་ཕུལ་བྱུང་ཅན་དག་གཉེར་ཆེན་ནམ་ཕྱག་མཛོད་ཀྱི་གོ་གནས་སུ་འཕར་ཆོག །རྫོང་སོ་སོར་རྫོང་དཔོན་མ་ཚད་ད་རུང་ཆོས་རྒྱལ་གྱིས་མངགས་པའི་ཧོར་འདྲའང་ཡོད། དེ་དག་གིས་ཆོས་རྒྱལ་གྱི་བཀའ་མངགས་ལྟར་དཔྱ་ཁྲལ་བསྡུ་ལེན་དང་བཀའ་ཤོག་ཁྱབ་བསྒྲགས། ཉེས་ཅན་འཇུ་བཟུང་བཅས་ཀྱི་འབྲེལ་ཡོད་ལས་དོན་བསྒྲུབ་རྒྱུའི་འགན་ཁུར་བྱེད་ཅིང་། དེའང་དུད་གྲངས་མང་ཉུང་ལ་བལྟས་ནས་གོ་ས་སྤྲད་ཀྱིན་ཡོད། སྡེ་དགེ་ཆོས་རྒྱལ་གྱི་མངའ་འོག་ཏུ་བསྡོམས་པའི་ཧོར་འདྲ་བརྒྱད་ཅུ་ལྷག་ཡོད། དེ་དག་གི་ཐོབ་ཐང་མི་རབས་ནས་མི་རབས་བར་རྒྱུན་འཛིན་བྱེད་ཆོག་ཅིང་། དེ་དག་ལས་ཆོས་རྒྱལ་གྱི་མཐོང་ཆེན་ཐོབ་པའི་ཕུལ་བྱུང་བྱས་རྗེས་ཅན་ལ་གཞིས་གཉེར་གྱི་གོ་གནས་འཕར་བའང་ཡོད། དཔོན་རིགས་ཚང་མར་གནང་བའི་མངའ་འབངས་དང་ས་ཞིང་སྒེར་དབང་བྱེད་རྒྱུའི་དབང་ཆ་ཡོད་པ་དང་། མངའ་འབངས་བྲན་དུ་བཀོལ་ནས་རང་ཉིད་ཀྱི་འབྱོར་པ་ཇེ་རྒྱས་སུ་གཏོང་ཆོག །སྤྱིར་བཏང་གཉེར་ཆེན་ལ་འབངས་སྡེ་དུད་ཚང་བཅུ་ཡན་ནས་ཉིས་བརྒྱ་མན་ཆད་ཡོད། ཧོར་འདྲ་ལ་སྤྱིར་བཏང་འབངས་སྡེ་དུད་ཚང་གཉིས་ནས་བཞི་བར་ཡོད་ཅིང་བྲན་དུ་བཀོལ། གཉེར་ཕྱག་ལྷན་རྒྱས་ཁང་དུ་གཉེར་ཆེན་གསུམ་དང་། ཕྱག་མཛོད་དམ་ནང་བློན་གཅིག །དྲུང་སྐྱ་སེར་གཉིས་བཅས་རྒྱུན་བཞུགས་ཡིན་ལ། དགོས་གལ་བྱུང་ཚེ་དབུ་བླ་ཁག་ལྔ་ཡང་འདུ་ཚོགས་དགོས། གཉེར་ཕྱག་བཞི་ནི་མདུན་སྐོར་གྱི་ཁྱིམ་རྒྱུད་ནང་ལས་འདེམས་དགོས། དབུ་བླ་ཁག་ལྔ་དང་། མདུན་སྐོར་ལྷན་རྒྱས་ཀྱི་འདུ་ཚོགས་ཐོག་འོས་ཤོག་འཕངས་རྗེས། སླར་ཡང་ཤར་ནུབ་མགོན་ཁང་གང་རུང་དུ་བརྟགས་སྒྲིལ་འཕངས་ནས་རྒྱལ་པོས་ངོས་འཛིན་གནང་དགོས། དྲུང་སྐྱ་སེར་གཉིས་ནི་མདུན་སྐོར་དང་ཧོར་འདྲ་ཁག་རྣམས་ལས་ཡོན་ཏན་གང་ཆེ་བ་འདེམས་དགོས། གཉེར་ཆེན་གསུམ་གྱིས་གཙོ་བོ་སྲིད་དོན་ལ་གཟིགས་པ་དང་། ཕྱག་མཛོད་ཀྱིས་གཙོ་བོ་དཔལ་འབྱོར་ལ་གཟིགས་དགོས། དཔོན་འགོ་བཞི་ནི། ཤར་ཡིད་ལྷུང་དཔོན་དང་། ལྷོ་སྒ་རྗེ་དཔོན། ནུབ་འབྲོང་པ་དཔོན། བྱང་སེར་ཤུལ་དཔོན་བཅས་ཡིན། སྡེ་དགེ་ཚང་གི་ཕྱོགས་བཞིའི་མཐའ་མཚམས་སུ་ཕྱི་དགྲ་ནང་ལ་མི་གཏོང་། ནང་སྡེ་ཕྱི་རུ་མི་གཏོང་བའི་རྒྱལ་ཐབས་ཀྱི་ལྕགས་རི་དང་། དགྲ་རྡུང་གི་ཐོ་བ་ནི་མཐའ་བཞིའི་བློན་ཆེན་ཡིན། དཔོན་ཁག་དེ་དག་རང་འཇགས་ཡིན་པས་བརྗེ་བསྐོ་བྱེད་རྒྱུ་མེད། བཞི་པ་ལ་གཉིས་ལས་དང་པོ་ནི། དེ་ལྟར་གོང་དུ་སྨོས་པའི་གཞི་རིམ་གྱི་རིམ་པ་གཉིས་པའི་ནང་བློན་གྲགས་ཅན་འགའི་ལོ་རྒྱུས་ཅུང་ཟད་བཤད་ན། ཁྲི་ཆེན་བླ་མ་བྱམས་པ་ཕུན་ཚོགས་ཀྱི་སྐབས་གོང་དུ་སྨོས་པའི་ཆོས་བློན་ཀུན་དགའ་རྒྱལ་མཚན་དེ་ནི་རྒྱལ་ཁབ་འདི་ཉིད་ཀྱི་བསྟན་འགྲོ་དང་སྲིད་ལ་ཐོག་མཐའ་བར་གསུམ་དུ་བླ་ཆེན་ལས་ཀྱང་འདི་ཉིད་སྐུ་དྲིན་ཆེ་བ་ལྟར་སྣང་ལ། འདིའི་སྐུ་ཚེའི་སྨད་ལ་བླ་ཆེན་ལ་ཆུས་ཆེན་གྱི་གང་བ་དེ་སྔོན་མ་བླངས་པ་དེ་ལས་ད་ནི་གསར་དུ་བླང་དགོས་མེད། ཁྱེད་ལ་ནང་ཆག་གི་ཞབས་ཕྱི་ནི་ཚེ་རིང་ཐར་དང་། ཉ་རྒྱས་གཉིས་ཡོད། ངས་ཕྱི་མའི་ཆོས་གཅིག་མ་འགྲུབ་ན་མི་ཕན་པས། ཤིན་ཏུ་གལ་ཆེ་བྱུང་ན་མ་གཏོགས་ང་ལ་འདྲི་རྟོགས་མ་བྱེད་གསུངས་ནས། ལྷ་འབྲོང་མགོར་ཚེ་མཚམས་སྒོ་བཅད་བསྒྲུབ་པ་ལ་རྩེ་གཅིག་བཞུགས་དུས། ལྷ་འདྲེའི་ཆོ་འཕྲུལ་གྱིས་དབུ་ལ་ཐོག་བརྒྱབས་ཀྱང་བ་སྤུ་ཙམ་གཡོ་བར་མི་ནུས་པའི་ཏིང་ངེ་འཛིན་ཐོབ་ཅིང་། མ་ཎི་དུང་ཕྱུར་མང་པོར་སོང་མཚམས་སྤྱན་རས་གཟིགས་ཀྱིས་མངོན་ཞལ་གཟིགས། མཁྱེན་པ་ཐོགས་མེད་ཀྱི་གྲུབ་པ་བརྙེས་ནས་འདས་དུས་འཇའ་འོད་དང་། མེ་ཏོག་གི་ཆར་འབབ་པ་སོགས་མི་རྒོད་ཆོས་ལའང་རྒོད་ཟེར་བའི་དཔེ་བཞིན་བྱུང་། འོན་ཀྱང་འདིའི་མི་རྒྱུད་དེང་སང་གྲགས་ཆེན་མེད། དེ་དང་མཉམ་དུ་གཉེར་ཆེན་དམ་པ་དགེ་བཤེས་ཉ་རྒྱལ་དང་། གཉེར་པ་ཚེ་རིང་ཐར་ཡང་དཔའ་མཛངས་འཕྲུལ་གྱི་བློ་གྲོས་ཀྱིས་གཞན་སྡེ་ཐམས་ཅད་ཀྱི་གཉའ་བ་རང་ཞབས་སུ་བསྡུ་བ་ལ་སྒྱུ་ཐབས་མཁས་ཤིང་། སོག་གུ་ཤྲི་བསྟན་འཛིན་ཆོས་རྒྱལ་གྱི་མདུན་ལ་བེ་རི་ཐལ་བར་བརླགས་པའི་ཚུལ་གྱི་ཞུ་འབུལ་སོང་དུས་རྒྱལ་པོ་ཐུགས་མཉེས་ནས། ཨུ་ཇའི་སང་གི་ཆོ་ལོ་གནང་བས་བློན་ཆེན་འདིས་ངེད་མཐའ་འཁོབ་ཀྱི་ས་ཆ་ཡིན་པས་རྒྱལ་པོའི་སྡེ་ཇུས་ཀྱི་གསོལ་རས་ཅི་གནང་ཟེར་བ་མ་གཏོགས་ཆོ་ལོ་ཅི་བཏགས་ཟེར་སྲོལ་མེད་པས། ངེད་ཀྱིས་རང་ཡུལ་ན་ངོམ་རྒྱུའི་བདག་རྐྱེན་མི་འདུག་ཞུས་པས། དེ་བདེན་གསུངས་ནས་བེ་སྡེ་སྟག་རང་རུ་བ་བརྒྱ་སྐོར་འོ་ཇའི་རྟེན་གྱིས་གསུངས་ནས་ཡིད་ལྷུང་ཕྱོགས་སུ་ཆགས་ཤིང་། ཕྱིས་སུ་སྤ་འོག་ནས་ལྷ་རི་མི་བདུན་རྐྱ་བདུན་དུ་གྲགས་པས་ཡིད་ལྷུང་བཟུང་བས་སྡེ་ལྷ་སྟག་གཉིས་སུ་གྲགས་པ་འདི་ཡིན། བླ་ཆེན་སྐུ་ཚེའི་སྨད་ལ་འདན་ཁོག་མགོན་གཟིགས་དགོན་ལ་བླ་མ་ཚེ་མཚམས་པ་ཟེར་བའི་ནུ་བོ་མགོན་པོ་ཟེར་བ་ཞིག །དང་པོ་གླིང་གི་ཇའི་སང་མི་བརྒྱ་ཁ་གཅིག་ལྟ་བུ་ཡོད་པར། བར་སྐབས་ཞིག་ནས་གཞན་གྱིས་མཐོ་གནོན་གྱི་དབྱེན་སེལ་ལྟ་བུས་དཔོན་གཡོག་སེལ་འགལ་བྱུང་ཚེ། མགོན་པོས་བླ་ཆེན་ལ་མགོ་བཏགས་པས་དགྲ་ཁ་ནས་གྲོགས་རྙེད་པ་ལྟར་མགོ་བླངས། བདག་རྐྱེན་ཆེན་པོ་མགོན་པོའི་བུ་གཉེར་ཆེན་ཀུན་དགའ་དོན་གྲུབ་ནི། ཕྱི་དགྲ་ལ་གནམ་ལྕགས་ཐོག་ཟེར་ལྟ་བུ། ནང་མི་ལ་རྒྱ་དར་ལིང་ཚེ་ལྟ་བུ། དགྲ་འདུལ་བ་ལ་ཞེ་སྡང་མི་དགོས་པ་ཐབས་ཀྱིས་འདུལ་བ། གཉེན་སྐྱོང་བ་ལ་བདག་རྐྱེན་མི་དགོས་ལ་རྒྱས་ཁེབས་པ། དེ་ཉིད་ཀྱི་བློ་འཕྲུལ་གྱིས་ཟུལ་དབེན་ཨ་བཀྲས་ངོ་བལྟས་ནས། འཁོར་ལོ་མདོའི་རྫོང་ཞབས་ཀྱི་ཐོག་ཡིག་སྡེ་དགེ་བླ་ཆེན་དང་། ཀུན་དགའ་དོན་གྲུབ་བླ་གཉེར་ལ་སྤྲད་པས་ཁ་སྟོང་པ་རང་དབང་དུ་བླངས། དམེ་ཤོད་དུ་སིའི་ནང་བློན་གཉེར་རྒན་འདིའི་ཕུ་ནུ་ཨ་འུག་མ་ཐབས་ཀྱིས་བཀུག་སྟེ་འཛིང་རྩེ་འདྲེ་ཟམ་ཁ་ཡན་ཆད་དང་། ཟིལ་ལ་ག་མ་མན་ཆད་མངའ་ཞབས་སུ་བསྡུས་པ་སོགས་བསྟན་སྲིད་འདི་ལ་ཞབས་ཕྱི་ཤིན་ཏུ་བསྒྲུབས་པ་བཤད། དེ་རྗེས་ཁྲི་ཆེན་སངས་རྒྱས་བསྟན་པའི་དུས་གཉེར་ཆེན་གད་ཐོག་བླ་མ་ལྷ་ལུ་དང་། གད་ཐོག་ཚེ་རིང་མགོན་སྤུན་གཉིས་བྱུང་བ་ལྷ་ལུ་ནི་མཁས་བཙུན་བཟང་གསུམ་གྱིས་ཇུས་སྲིད་བཟུང་ཞིང་། མཁས་པ་གཞན་གྱིས་ལོ་ཟླ་ལ་མ་འགྲིགས་པའི་ཁ་མཆུ་སོགས་འདིས་ཚིག་གསུམ་བཞི་ཙམ་གྱིས་གོ་བརྡ་བྱས་ནས་དགྲ་ཟུན་གཉིས་ཀས་ཕྱག་འཚལ་བར་གྱུར་ཅིང་། ཕྱིས་གཉེར་རྒན་འདི་དགུང་ལོ་བགྲེས་སྐབས་ཤིག་སྡེ་དགེ་དང་གླིང་ཚང་གཉིས་ཁ་མཆུ་ཆེན་པོ་ཞིག་བྱུང་བ། འདི་གའི་སྒར་པ་བྱ་ཁྲ་སྟོང་ཡོད་དུས་གཉེར་པ་གཞན་གྱིས་ཉི་མ་བཅོ་ལྔ་ལ་གཏམ་ཡང་མ་འགྲིགས་ནས་འཁྲུགས་པ་འོང་ཐག་ཆོད་བྱུང་ཚེ། གཉེར་རྒན་འདི་བྱོན་ནས་སྡེ་དགེ་ལ་དགྲ་བྱས་པ་ཡར་མ་སོང་། གཉེན་བྱས་པ་མར་མ་སོང་། ལས་དབང་ཅན་གྱི་རྒྱལ་པོ་ཡིན་པས་ཁྱོད་རང་ཚང་ཕམ་ལུགས་འདི་ལྟར་དུ་ཕམ་རྒྱུ་ཡིན། ཕམ་པའི་རྗེས་ལ་འདི་ལྟར་དུ་འོང་རྒྱུ་ཡིན་པས་ཁྱོད་རང་ཆུས་ཆུང་འབེན་ལ་བཞག་ན་ངེད་སྡེ་དགེ་ལ་སྡིག་པ་ཆེན་པོ་ཞིག་ལས་གཞན་མེད་ཚུལ་གསུངས་པས། གླིང་ཚང་གིས་ལགས་སོ་རྩ་བའི་བླ་མའི་བཀའ་ཡིན་ཟེར་བ་བྱུང་བ་སོགས་བརྗོད་ཀྱིས་མི་ལངས་ཤིང་། མཁར་གསུམ་མདོའི་གླིང་དྲུང་རྒོད་མ་བྱ་སྤྱོད་མ་མཁས་པ་གཉེར་ཆེན་འདིས་དབང་དུ་བསྡུས་ཏེ། རེ་ཞིག་མཁར་མདོའི་རྫོང་ཞབས་གད་ཐོག་པས་བདག་འཛིན་མཛད་པས་ཕྱིས་སུ་ཐོག་ཆེན་གྱི་ཁ་ན་གད་ཐོག་པ་ལ་འཇགས་པ་འདི་ཡིན། ཚེ་རིང་མགོན་གྱི་བུ་གད་ཐོག་གཉེར་པ་ཞང་སྐྱབས་ནི་དཔའ་མཛངས་འཕྲུལ་གྱི་བློ་གྲོས་གང་ལ་ཡང་གད་ཐོག་མི་རྒྱུད་སྔོན་མ་རྣམས་ཀྱི་མུ་བཞིན་བསྟན་སྲིད་འདི་ཉིད་ཀྱི་ཕྱི་རྒྱ་ནང་ཚགས་ལ་ཐུགས་བློ་ཁེལ་བ་བྱུང་ཞིང་། བར་སྐབས་མཚོ་སྔོན་རྒྱལ་པོས་ཝ་ཤུལ་འབུམ་སྐྱབས་ཡག་ཟེར་བ་དཔའ་རྒོད་སྐྱེན་གསུམ་གླིང་ཞལ་ལུའི་སྐྱེ་བར་གྲགས་པ་དེ་ལ་དགོངས་ཕོག་གཅིག་བྱུང་སྟེ་སོག་དམག་ཚན་གཅིག་འོང་ནས་མགོ་གཡོགས་ཀྱིས་ཟིན་ཐབས་བསམ་ནས། རྫ་གདན། ཆེ་ཡེ། ལྷོ་འབྲོག་ཟུར་རྒྱུད་བཅས་ཀྱི་མི་རྣམས་བསྡུས་ནས་སོག་པོ་མི་དཔྱད་མཁན་ཞིག་གིས་བལྟས་ཚེ། དཔའ་རྒོད་བློ་ཤེད་ཁ་རྗེ་བསོད་ནམས་གང་ཡང་འབུམ་སྐྱབས་ཡག་ལྟ་བུ་བཟུང་ཐུབ་པའི་མཚན་ཉིད་ཚང་བ་གད་ཐོག་ཞང་སྐྱབས་དང་། གླིང་བིང་ཐི་ནོ་ཡོན་གཉིས་མ་གཏོགས་མི་འདུག་པས་བཟུང་རོགས་དགོས་ཞེས་བྱས་པ་བཞིན་ལག་ཞབས་སུ་ཆུད་པས་བོད་སོག་གཉིས་ལ་གྲགས་པ་བྱུང་། དེ་རྗེས་བླ་མ་བསོད་ནམས་ཕུན་ཚོགས་ཀྱི་སྐུ་ཚེའི་འཇུག་དང་། ཆོས་རྒྱལ་བསྟན་པ་ཚེ་རིང་གི་སྐུ་རིང་ལ་གད་ཐོག་ཞང་སྐྱབས་ཀྱི་བུ་གཉེར་ཆེན་གཟུངས་རྒྱལ། ཆོས་སྐྱོང་བློ་གྲོས། དགེ་རབ་འབིར་ལུགས། གཉེར་པ་ཀུན་དགའ་སོགས་བྱུང་ཞིང་། དེའི་ནང་ནས་གད་ཐོག་གཟུངས་རྒྱལ་ནི་རྒྱ་དང་སོག་པོ། བོད་དབུས་གཙང་སོགས་སུ་ཕྱིན་ལ། བློ་ཐབས་རིག་པ། གཏམ་གླེང་ལ་ཚིག་གསུམ་གྱིས་ལན་ཐུབ་མཁན་བྱུང་བས་སྤྲུལ་པ་ཅན་གྱི་མི་ལྟ་བུར་གྲགས་པས། བསྟན་སྲིད་འདི་སྔོན་སོག་པོའི་དུས་ལས་རྒྱ་ཆེ་རྒྱང་རིང་། རྒྱ་ནག་གོང་མའི་བཀའ་དམ་ཁ། ཅིའུ་ཏ་ལོ་ཡེས་ས་མཚམས་རང་གིས་གང་བསམ་ཐོག་ནས་བསྐལ་པའི་བར་དུ་འགྱུར་བ་མེད་པར་བཅད་པ་འདི་རྣམས་གཉེར་ཆེན་འདི་དྲིན་ཆེ་བར་བྱུང་བའི་ལོ་རྒྱུས་ནི་མཆོག་དམན་ཐམས་ཅད་ཀྱི་ཁ་ནས་སྲིད་པའི་སྒྲུང་ལྟར་ཡོད་པ་ཡིན། གཉེར་ཆེན་ཆོས་སྐྱོང་བློ་གྲོས་ཀྱང་བྱ་བ་ཞི་དྲག་ཐམས་ཅད་འཛོམས་ཀྱང་གཙོ་ཆེར་སྔོན་གྱི་ཆོས་རྒྱལ་མེས་དབོན་རྣམས་ལྟར་ཁྲིམས་ཀྱི་ཁོག་ཤིང་ལ་ཚངས་པའི་ཐིག་ཤིང་ལྟར་དུ་དྲངས་པས་ཕྱི་ནང་གཉིས་ཀར་ཚད་ཐུབ་ཏུ་གྱུར་ཅིང་། སྐུ་ཚེའི་ཐུགས་དམ་བཟླས་བརྗོད་ཆག་མེད་རིགས་དང་། ཕྱིས་སུ་རྗེ་བཙུན་རྡོ་རྗེ་རྣལ་འབྱོར་མའི་ཕྱི་ནང་གི་ཉམས་ལེན་གཙོ་བོར་བཏོན་པས། འབྱུང་ཁུངས་གང་ཡིན་མེད་པར་གཞི་རྡོ་ནག་པོ་ལ་སྐུ་འབྲས་དཀར་པོའི་མཁའ་སྤྱོད་མའི་སྐུ་སོགས་སྐྱེས་བུ་དམ་པའི་ཡོན་ཏན་ཆེན་པོ་མངའ་བ་བྱུང་ཞིང་། རྒྱལ་དབང་བདུན་པ་རྒྱ་དང་སོག་པོའི་མཆོད་གནས་སུ་ཞུས་པ་ཡིན་ཅིང་། དེ་སྐབས་ཀྱི་གཉེར་ཆེན་དགེ་རབ་འབིར་ལུགས་ནི་ཁྱབ་འཇུག་གི་སྟོབས་དང་། ཚངས་པའི་བློ། གཞོན་ནུ་གདོང་དྲུག་གི་རྩལ་ཐམས་ཅད་འཛོམས་པས་རང་གཞན་གྱི་བློན་ཆེན་སུས་ཀྱང་འདིའི་ཚིག་དོན་གྱི་མཐའ་མི་ཆོད་པའི་སྒྱུ་ཐབས་ཅན་བྱུང་སྟེ། སྔོན་ཁྲི་ཆེན་བསོད་ནམས་ཕུན་ཚོགས་ལ་གད་ཐོག་ལྷ་ལུ་ཁྱེད་རང་གིས་འབིར་ལུགས་འདི་ལ་བདག་རྐྱེན་ཞིག་མཛད་དང་། འདིའི་ཚེ་ཐུབ་ན་ཇུས་སྲིད་ལ་ཕན་པ་ཞིག་འོང་བ་ལུང་བསྟན་དང་འདྲ་བ། ཕྱིས་ཆོས་རྒྱལ་བསྟན་པ་ཚེ་རིང་གི་སྐུ་དུས་སུ་ཧོར་མ་ཟུར་སོགས་དགྲ་མགོ་ཆམ་ལ་ཕབ་པའི་དུས། མཚོ་སྔོན་པོ་ཕྱིན་ཆད། རྒྱ་ནག་པོ་ཡན་ཆད། བོད་བར་ལམ་འདིར་དགྲ་བཏུལ་ལུགས། གནང་བླངས་ལུགས། ས་བཟུང་ལུགས། ཐ་ན་མདོ་མགྲོན་གྱི་རྫ་ལམ་བཏོད་ལུགས་ཡན་ཆད། མི་དེ་སྐྱེས་རིང་ལ་དེ་བྱུང་གིས་མི་རབས་མ་ཆད་པའི་བཞག་པ་གཞུང་གནས་ཀྱི་སྲིད་པའི་རྟེན་མཁར་ཚུགས་པ་བྱུང་། དེ་རྗེས་གད་ཐོག་གཉེར་ཆེན་བསོད་ནམས་བཀྲ་ཤིས། དགེ་རབ་བོ་རྒྱལ། ཕྱག་མཛོད་གུ་རུ་བཀྲ་ཤིས། གཉེར་པ་དར་རྒྱས། ལྷ་བུ་ཚེ་རིང་། ལྕགས་ར་བསྟན་པ་བཟང་པོ། ཨ་སྲུང་སོགས་ཕལ་ཆེར་དུས་མཉམ་དང་། ཁྲི་ཆེན་བློ་གྲོས་རྒྱ་མཚོའི་སྐབས་གཉེར་ཆེན་ཕྱུག་པོའི་བུ་དོན་གྲུབ། ཡིད་ལྷུང་དཔོན་ཨ་དཀར། ཕྱིས་སུ་མཁར་མདོ་བསོད་ནམས་ཉི་མ་སོགས་བསྐོས་ཀྱང་ཕྱི་མ་འདི་གཉིས་ཡུན་རིང་མ་བཞུགས་ཤིང་། དེ་རྗེས་གད་ཐོག་གཉེར་ཆེན་ནོར་བུ་དགྲ་འདུལ་དང་། དགེ་རབ་མགོན་པོ་ཚེ་རིང་། རྒྱ་དཔོན་གུ་རུ་ཚེ་རིང་༼དོན་གྲུབ༽། དགེ་རབ་བོ་རྒྱལ་གྱིས་ཧོར་མག་ཟུར་གྱིས་རྒྱལ་རོང་དམག་ཁྲིད་འོང་དུས་གཉེར་པ་འདི་དམག་དཔོན་དུ་ཕེབས་ནས་མཚན་གཅིག་གིས་མག་ཟུར་སྡེ་གཞུང་དུ་དམག་སྒར་རྒྱབ་ནས་སྟོབས་ཤུགས་ངོམས་པས་མག་ཟུར་དགྲ་ལྷ་ཆག་ནས་མི་ལ་མེད་དགོས། རང་ལ་ཡོད་དགོས་རྒྱུའི་དཔའ་བརྗིད་ཅན་གྱི་དམག་དཔོན་འདིའི་བློ་ཤེད་ལ་བལྟས་ན་རང་མགོ་ཐོན་དུས་རང་སྲོག་ཁེབ་དགོས་ཟེར་ནས་བྲོས་འགྲོ་དགོས་པ་བྱུང་བ་སོགས་བློ་རྩལ་ཅན་བྱོན། གཉེར་ཆེན་རབ་རྒྱས་ཀྱང་གཏམ་དང་བྱ་བ་རི་གཟར་གྱི་རྦབ་དང་འདྲ་བ་ཡོད་པས། ལན་ཅིག་རྒྱ་དཔོན་ཀོང་ཡོ་ཤུ་ཧོར་དཀར་མཛེས་ལ་ཕེབས་ནས་བེ་རི་དར་རྒྱས་ཀྱི་དབྱེན་ཞུས་བྱས་རྐྱེན་སྡེ་དགེ་འོང་དགོས་བཀའ་ཕེབ་ནས་ཧུ་ཡོ་ཞིག་དེད་པ་བཏང་དུས། གཉེར་ཆེན་འདིས་ངེད་སྡེ་དགེ་འདི་སྔར་སྲིད་ད་འབྱུང་སྲིད་པའི་གངས་རི་ལྟ་བུ་ཡིན་པས་ཤོག་ཟེར་བ་དང་འོང་མ་རག་ཅི་མེད། ཐ་ན་དཔོན་གཡོག་སྟོང་ཕྲག་གཅིག་ལས་ཉུང་མི་ལོ། དེ་ཡང་ཟླ་བ་གཅིག་བར་གྲ་མི་འགྲིགས། དེ་མཚམས་གཅིག་འོང་དུས་རི་ཆེན་མགྲོན་དུ་འབོད་དུས་ཐང་ཆེན་གདན་དུ་མི་གཏིང་ཀ་མེད་ཡིན་པས་བེ་རི་དར་རྒྱས་སོགས་བདེ་མོ་ཨི་འོང་མི་ཤེས། ད་ལྟ་སྔར་ཞུས་ཡིན་གསུངས་པས་རྒྱ་དཔོན་ནས་འཁྲུགས་པ་འོང་དོགས་ཀྱིས་སྡེ་དགེ་བྱོན་མི་དགོས་གསུངས་པ་སོགས་མི་རེ་རེའི་བློ་རྩལ་སྟོབས་ཤུགས་སྐད་ཆ་རྣམས་ལ་ངོ་མཚར་བ་མང་པོ་ཡོད། དེ་རྗེས་ས་དབང་བཟང་པོ་རྒྱལ་བཙུན་དང་། ཚེ་དབང་རྡོ་རྗེ་བཅས་ཀྱི་དུས་གཉེར་ཆེན་བཤེན་རབ་སྟག་རྒྱལ་འདི་ཉིད་བསྟན་སྲིད་ལ་བཀའ་དྲིན་ཆེ་ཞིང་། བར་སྐབས་ཞིག་གླིང་ཚང་དང་ཟེར་བརྗོད་ཆེན་པོ་དུས་གླིང་ཚང་ནས་རྒྱ་དཔོན་ཆེན་པོ་ཞིག་བཀུག་ནས་ས་སྟོང་ཞིག་ཏུ་གྱོད་སྒར་བཏབ། སྡེ་དགེའི་གཉེར་པ་སྟག་རྒྱལ་སོགས་སོང་བས་གླིང་ཚང་པའི་ཞུ་ལོག་གིས་ཞལ་མཇལ་མ་ཐོབ་པས་རྒྱ་དཔོན་དེའི་ཞབས་ཕྱི་རྣམས་ལ་བརྔན་པ་བྱིན་ནས་ང་ལ་གུར་གྱི་སྒོ་འཇོག་ཏུ་རྒྱ་ཟས་ཞིག་བསྒྲིགས་ནས་ང་རང་སྡོད་སར་བསྐྱེལ་རོགས་ཞུས་པས་དེ་ལྟར་བྱས། གཉེར་པ་རང་ནས་མཛོད་དར་གྱིས་དངུལ་རྡོ་ཚད་གཅིག་ལྕིབ་ཏེ་སྐེ་ལ་བཀོན་ནས་སེམས་མི་བདེ་བའི་རྣམ་པས། ཚུར་འོང་ནས་འགྱོད་པ་ཆེན་པོ་ཡོད་མདོག་གི་ཤུག་རིང་འདོན་ཅིང་བྲང་བརྡུང་ནས་བཞུགས། དེ་ནུབ་གླིང་ཚང་པ་སེམས་མ་བདེ་ནས་ཕག་ཉན་འོང་དུས་གཡོག་རྣམས་ནས་གཉེར་པའི་སེམས་ནད་དེ་ཅི་རེད་ཞུས་པས། ངས་བསམ་རྒྱུ་ཆོས་ཡིན་ཀྱང་བསྐོས་རྒྱུ་སྡིག་ལས་མི་འདུག །སོང་ཉིན་གླིང་ཚང་དཔོན་གཡོན་བདུན་ང་ལ་སྐེ་ཆོད་ཟེར་བའི་རྒྱ་དཔོན་ཆེན་པོ་ནས་བཀའ་ཕེབ། དར་དང་དངུལ་གྱི་གསོལ་རས། རྒྱ་ཟས་ཀྱི་སྟོན་མོ་བཅས་བསྒྲིགས་རེད་གསུངས་པས་གླིང་ཚང་ནས་དེ་ཐོས་པ་དང་མཚན་དེར་ཡུལ་བུད། ཕྱིར་ནང་རྒྱ་དཔོན་མདུན་སྐུ་བཅར་ཞུས་ནས་གླིང་ཚང་ཡུལ་བུད་དུས་ཉེས་པ་ཨི་ཡོད་དེ་ཡིས་ཤེས། ད་དགྲ་རི་ལ་ཤོར་དུས་ཁྱེད་རྒྱ་དཔོན་ཡིན་ཀྱང་བག་ཟོན་མ་བྱས་ན་མི་ཕན་པས་ས་སྟོང་དུ་བཞུགས་མི་ཉན། སྡེ་དགེར་ཕེབས་དགོས་ཞུས་པས་དེ་ལྟར་བྱས་ནས་རྒྱལ་ཁབ་འདིར་གྱོད་བཤད་པས་ཕྱོགས་ལས་རྣམ་པར་རྒྱལ་བའི་གྲགས་པ་ཐོབ་པ་བྱུང་། ཡང་ས་དབང་བཟང་པོ་སྐུ་ན་ཕྲ་སྐབས་བློན་ཆེན་མཁར་ནང་པའི་སྙིང་ལ་འདྲེ་ཞུགས་ནས་ཆོས་རྒྱལ་ལྷ་སྲས་དམ་པ་ལ་ཟས་ངན་གྱི་སྦྱོར་བ་གཤམ་སྐད་ཐོས་དུས་གཉེར་ཆེན་འདིས་ང་ལ་བཀྱོན་པ་ཆེན་པོ་རྒྱོབ། རིགས་ལྔ་མཆོད་རྟེན་བསྐོར་དགོས་པའི་ཉེས་ཆད་སྦྱོར་དང་། བདེན་མིན་ངས་ཤེས་པ་བྱེད་གསུངས་པ་དེ་ལྟར་བྱས་པས། མཁར་ནང་པའི་བློ་ངན་དངོས་གསལ་རིག་ནས་དུག་ཕུང་གཏིང་རྫོགས་བྱས་པ་སོགས་བྱ་བ་ཆེ་ལོང་རེ་རེ་ལ་ཡང་གྲགས་པ་ཅན་གྱི་བློ་འཕྲུལ་བཀོད་པ་སོགས་བསྟན་སྲིད་ལ་བཀའ་དྲིན་ཆེན་པོ་བྱུང་བ་ཡིན། ཆོས་རྒྱལ་དམ་ཚིག་རྡོ་རྗེའི་དུས་བསྟན་སྲིད་ལ་ཞབས་ཕྱི་ཆེ་བ་གཉེར་ཆེན་འཇུ་ཚ་ཀུན་དགའ་རྣམ་རྒྱལ། གཉེར་པ་སོག་མོ་ངག་དབང་བཀྲ་ཤིས། གཉེར་པ་རྒྱ་མཁར་དགེ་ལེགས་རྒྱལ་པོ་སོགས་བྱུང་བ་དེ་རྣམས་ཀྱང་ནང་གི་བསྟན་ཆུས་ལ་རང་སྲོག་འདོར་ནུས་པའི་བསམ་པ་གཅིག་ཏུ་མཐུན་ཅིང་ཕྱི་དགྲ་ལ་གནམ་ལྕགས་ཀྱི་ཐོག་ཟེར་ལྟ་བུ། ནང་མི་ལ་རྒྱ་དར་གྱི་ལིང་ཚེ་ལྟ་བུའི་གཏམ་བློ་འཕྲུལ་གསུམ། དཔའ་རྩལ་སྟོབས་གསུམ། མཁས་མཛངས་བཟང་གསུམ་སོགས་ཀྱིས་བྱ་བ་རེ་རེ་ལ་ཡང་གྲགས་པ་ཐོན་པའི་ཆོས་བློན་ངོ་མཚར་ཅན་བྱུང་བ་ཡིན། ཆོས་རྒྱལ་འཆི་མེད་རྟག་པའི་རྡོ་རྗེའི་དུས་གཉེར་ཆེན་དམ་པ་བྱ་རྒོད་པདྨལས་གྲུབ། གཉེར་ལུག་ར་ཡེ་ཤེས་དར་རྒྱས། གཉེར་ཡར་མགོའི་བཀྲ་ཤིས་དོན་གྲུབ། གཉེར་དྲུང་གྱང་ཁང་ཚེ་དོན་སོགས་ཡིན་ལ་ཐམས་ཅད་བསྟན་སྲིད་འདི་ལ་སྒེར་དོན་རྒྱབ་ཏུ་བཞག །སྤྱི་དོན་དང་དུ་ལེན་ནས་ཉག་དགྲའི་དུས་འགྱུར་སྐབས་སོགས་རང་སྲོག་འབེན་དུ་བཞག་ནུས་པ་ཅན་ཡོད་ལ། ཁྱད་པར་གཉེར་ཆེན་པདྨལས་གྲུབ་ནི་འཇམ་དབྱངས་མཁྱེན་བརྩེའི་དབང་པོས་ཆོས་བློན་འགོས་པདྨགུང་བཙན་གྱི་སྐྱེ་བར་ལུང་བསྟན། བསྟན་དགྲ་ཉག་རོང་གིས་རྒྱལ་ཁབ་བདེ་གཟར་བསླང་བའི་དུས་སོགས་ལ་བློ་བསྐོར་ཡུལ། དཔའ་སྙིང་སྟོབས། གཏམ་ཚིག་བཤད། འཕྲུལ་བཀོད་འདོམ་སོགས་རེ་རེ་ནས་འགྲན་ཟླ་མེད་པའི་མི་མངོན་ཤེས་ཅན་དུ་གྲགས། གཞུང་སའི་ལས་དམག་བཀུག་ནས་བསྟན་དགྲ་རྩ་བརླག་བཏང་། ཆོས་རྒྱལ་བློན་འཁོར་བཅས་པའི་སྐུ་སྲོག་གི་རྫིའུ་མཛད་ནས་གདན་སར་འཁོད་ཅིང་ཆོས་སྲིད་རང་དབང་སྤྱོད་ཆོག་པ་ཆོས་བློན་འདི་ཡི་བཀའ་དྲིན་ལས་བྱུང་བ་ཡིན། ཕྱིས་སུ་མི་དབང་དམ་པ་རྡོ་རྗེ་སེངྒེའི་དུས་དཔའ་མཛངས་འཕྲུལ་དང་ལྡན་པའི་བཀའི་བློན་ཆེན་མང་དུ་ཡོད་པ་ལས། འཇམ་མགོན་རྣམ་གསུམ་གྱི་སློབ་མར་གྱུར་ཅིང་། མཧཱཔཎྜིཏའི་མཚན་འཆང་བ་རིག་པའི་གནས་ལྔ་ལ་མཁས་པས་སྐར་རྩིས་ཀྱི་གཞུང་ཟླ་བའི་མེ་ལོང་རྩོམ་པ་པོ་རྒྱ་མཁར་གཉེར་པ་བསོད་ནམས་དཔལ་གྲུབ་སོགས་ཀྱང་བྱོན། ཐམས་ཅད་ཀྱང་མསུརཀྵའི་བསྟན་བཅོས་ལས། ཚིག་གསལ་བློ་ནི་ཕུན་སུམ་ཚོགས། །ལུགས་ཀྱི་བསྟན་བཅོས་དག་ལ་མཁས། །ངང་འཇམ་དཔྱོད་པ་བྱེད་པ་དེར། །རྒྱལ་པོའི་བློན་པོ་དེ་འདྲས་བྱེད། །ཅེས་པ་ལྟར་ལུགས་ཀྱི་བསྟན་བཅོས་རྣམས་ལས་ཇི་ལྟར་བྱུང་བའི་ཡ་རབས་དཔའ་མཛངས་འཕྲུལ་བློན་གྱི་བློ་གྲོས་ཕུན་སུམ་ཚོགས་པ་ཤ་སྟག་བྱུང་ངོ་། །གཉིས་པ་ནི། ཞར་བྱུང་བྱ་རྒོད་སྟོབས་ལྡན་དང་དེའི་ཁྱིམ་རྒྱུད་ཀྱི་ལོ་རྒྱུས་རགས་རིམ་ནི། ཐོག་མར་བྱ་རྒོད་ཁྱིམ་རྒྱུད་ཇི་ལྟར་བྱུང་ཚུལ་ནི་ངག་རྒྱུན་ལྟར་ན། སྡེ་དགེ་ཆོས་རྒྱལ་ཚེ་དབང་རྡོ་རྗེ་རིག་འཛིན་ཕྱི་ལོ་༡༧༨༦ ༡༨༤༧ གྱི་སྐབས་ཙམ་ན། སྡེ་དགེ་རྒྱལ་པོའི་སྲིད་དོན་ལོ་རྒྱུས་ལས། དམ་ཚིག་རྡོ་རྗེ་རྣམ་རྒྱལ་༡༨༡༡ ༡༨༥༣གྱིས་སྲིད་དབང་འཛིན་པའི་སྐབས། ཆོས་རྒྱལ་དེ་ཉིད་ཀྱི་མངའ་ཁོངས་མདུན་སྐོར་རྣ་ཕུ་ས་དཀར་ཚང་གི་བུ་མོ་དང་སྲིད་དོན་རྒྱལ་རབས་ལས་ཚ་མོ་ཨ་སྡིས་མ་ཞེས་པ་དང་རྒྱལ་པོའི་རྟ་རྫི་སྙིང་རླུང་ཅན་ཞིག་དང་ལྐོག་འབྲེལ་བྱས་པའི་མི་ཁ་ཕོག་ནས་རྡོ་འཇམ་ཚང་སར་བསྡད། ཉིན་ཞིག་ཕྱུགས་རྫི་སོང་སྟེ་རི་མགོར་གཉིད་སྐབས་རྨི་ལམ་དུ་མི་དཀར་རྟ་དཀར་ཅན་ཞིག་དང་ལུས་འབྲེལ་བྱས་པ་རྨིས། བུ་ཞིག་སྐྱེས་པར་མིང་པདྨལས་གྲུབ་བཏགས། སྐབས་དེར་རིགས་རུས་ཀྱི་འདུ་ཤེས་ཆེ་སྟབས་ཨ་སྡིས་མ་མི་ཁ་ཇེ་ཆེར་སོང་ནས་ས་དཀར་ཚང་གིས་མ་བུ་གཉིས་ཁྱིམ་ནས་ཕུད། འཁོར་ལོ་མདོའི་འགོ་བ་རུ་དཔོན་བསྟན་འཛིན་ཕུན་ཚོགས་ཀྱི་བྲན་གཡོག་བྱས། བསྟན་འཛིན་ཕུན་ཚོགས་ཀྱིས་པདྨལས་གྲུབ་ཆུང་ནས་འཇོན་ཐང་ཅན་ཞིག་ཡིན་པར་ཤེས་ཏེ་གསོས་ཕྲུག་ལྟར་སྐྱོང་ཞིང་ནར་སོན་སྐབས་རང་གི་བུ་མོ་དང་མཉམ་འདུག་བཅོལ། བསྟན་འཛིན་ཕུན་ཚོགས་གྲོངས་རྗེས་པདྨལས་གྲུབ་ནས་རུ་དཔོན་འགོ་པའི་ཁྱིམ་རྒྱུད་སྐྱོང་། དེ་ནས་དེང་སང་སྨྱ་ཁོག་ཏུ་གྲགས་པར་བྲག་རི་བྱ་རྒོད་པོའི་དབྱིབས་ཅན་ཞིག་ཡོད་པ་དེའི་འོག་ཏུ་གཞིས་ཀ་གསར་དུ་རྒྱག་པ། སྔར་རུ་དཔོན་འགོ་པ་ཞེས་པའི་དུད་མིང་བྱ་རྒོད་ཚང་ཞེས་པར་བསྒྱུར། བྱ་རྒོད་པདྨལས་གྲུབ་ནི་སྙིང་ཤེད་དང་འཇོན་ཐང་ཆེ། སྡེ་དགེ་ཆོས་རྒྱལ་འཆི་མེད་རྟག་པའི་རྡོ་རྗེའི་སྐབས། རབ་བྱུང་བཅུ་བཞི་པའི་ཆུ་ཁྱི་སྤྱི་ལོ་༡༨༦༢་ལོར་ཉག་སྐེད་མགོན་པོ་རྣམ་རྒྱལ་དཔུང་གིས་སྡེ་དགེར་བཙན་འཛུལ་བྱས། དེའི་ཕྱི་ལོ་སྡེ་དགེའི་རྒྱལ་ས་ལྷུན་གྲུབ་སྟེང་བར་སླེབས། བྱ་རྒོད་པདྨལས་གྲུབ་ཀྱིས་དང་ཐོག་ཉག་དམག་དང་འཐབ་སྟེ་མཚོན་ཆ་གང་ཡང་མེད་པར་ལག་སྟོང་པས་སྦར་འཛིན་བྱས་ཏེ་ཉག་དམག་གཉིས་མགོ་ཐད་བརྡུང་བྱས་ཏེ་བསད་པ་སོགས་བྱས་ལ། མཐར་གཡོ་ཐབས་ཀྱིས་ཉག་རོང་དམག་དཔོན་ཨ་མཆོག་ལུ་གུ་མ་དང་མནའ་ཤག་བྱེད་ཁུལ་བྱས་པས་ཉག་རོང་གི་སྲུང་དམག་གྲས་སུ་བཞག་སྟེ་མཐོང་ཆེན་བྱས། དེ་ནས་ཡུན་མ་རིང་བར་ལུ་གུ་མས་རྒྱལ་པོ་སྐུ་འཁོར་ཐམས་ཅད་བགྲོངས་གྲབས་བྱེད་པའི་གཏམ་དེ་པདྨལས་གྲུབ་ཀྱིས་ཐོས། ཁོས་དངོས་གནས་ལུ་གུ་མ་ལ་བློ་ཕུད་ཁུལ་བྱས་ཏེ་རྒྱལ་པོ་སྐུ་འཁོར་ཉག་རོང་ལ་དེད་སོང་ན་ཁྱོད་ཀྱི་སྙན་གྲགས་དེ་བས་ཆེ་རུ་འགྲོ་ཞེས་བཤད། ལུ་གུ་མས་པདྨལས་གྲུབ་ཀྱི་གཏམ་ལ་རྒྱུ་མཚན་འདུག་སྙམ་ནས། སྡེ་དགེ་རྒྱལ་པོ་ཡུམ་སྲས། དཔལ་སྤུངས་དབོན་རྒན། ཀཿཐོག་ཞིང་སྐྱོང་། རྫོགས་ཆེན་དཔོན་སློབ་སོགས་ཉག་རོང་དུ་དེད་ནས་མི་གཏའ་བཀག་ཉར་བྱས་པ་སོགས་ཀྱི་ཟིང་འཁྲུགས་ཆེན་པོ་བྱུང་སྐབས། པདྨལས་གྲུབ་ཀྱིས་བློ་ཕུག་སྡེ་དགེ་ཆོས་རྒྱལ་ལ་གཏད་ཀྱང་། ཕྱི་ཚུལ་ཉག་སྐེད་ཀྱི་ཕྱོགས་སུ་བྱས་ཏེ། སྐབས་འགར་སྡེ་དགེའི་མཚན་ཐོག་ནས་བོད་གཞུང་ལ་གནས་ཚུལ་སྙན་ཞུ་དང་འབྲེལ་འཕྲལ་དུ་དམག་བཏང་དགོས་པའི་ཞུ་ནན་ཕུལ་བ་དང་། སྐབས་འགར་ཉག་དཔོན་ཡིན་ཁུལ་གྱིས་བོད་ལ་འཇིགས་བསྐུལ་གྱི་ཡིག་བརྫུན་ཀྱང་བཏང་བས། བོད་དམག་ཕྱི་ལོ་༡༨༦༣ལོའི་བོད་ཟླ་དྲུ་པར་སྡེ་དགེར་སླེབས་ཏེ་ཉག་དམག་དང་འཐབ་པས་ཉག་དམག་ཕམ་ཉེར་སྐབས་ཨ་མཆོག་ལུ་གུ་མས་སྡེ་དགེའི་ཕོ་བྲང་དང་སྡེ་དགེ་པར་ཁང་མེར་བསྲེག་འཆར་ཡོད་པ་བྱ་རྒོད་པདྨལས་གྲུབ་ནས་ཤེས་ཏེ། ཨ་མཆོག་ལུ་གུ་མས་མ་སྨོས་སྔོན་པདྨལས་གྲུབ་ནས་ཕོ་བྲང་དང་པར་ཁང་མེར་བསྲེག་དགོས་སྨྲས། ལུ་གུ་མས་ངས་དེ་ལྟར་འཆར་གཞི་སྔོན་ནས་བཞག་ཟིན། ཁྱེད་ཕོ་རབ་རེད་ཅེས་བཤད། པདྨལས་གྲུབ་ཀྱིས་ཁྱེད་ཀྱིས་ཕོ་བྲང་མེར་རྒྱོབ་དང་། ངས་པར་ཁང་མེར་བསྲེག་བྱེད་ཅེས་པར་ཁང་དུ་ཕུར་སོག་དུད་པ་གཏོང་བྱེད་དང་མེ་བསད་མཁན་སྔར་ནས་གྲ་སྒྲིག་ཟིན་སྟབས་ཕུར་སོག་ལ་མེ་བཏང་ནས་ཕྱིར་བུད་སྐབས། ལུ་གུ་མས་ཕོ་བྲང་མེར་བསྲེགས་ནས་ཕྱིར་འོང་པ་ཁེལ་བས་པར་ཁང་ནང་དུད་པ་མཐོང་བས་ཕོ་རབ་ད་བྱ་བ་འགྲུབ་སོང་ཞེས་ལབ་སྐད། དེ་ནས་ལུ་གུ་མ་དང་པདྨལས་གྲུབ་གཉིས་མཉམ་དུ་བྲོས་སོང་བ་འཕྲང་རོང་འགག་ཏུ་སླེབས་པར་པདྨལས་གྲུབ་ཀྱིས་གཟི་མགུལ་ལུ་གུ་མར་བཅོལ་ཏེ་མགུལ་གབ་དང་སྡེ་དགེའི་སྲིད་དོན་རྒྱལ་རབས་ལས། ཐམ་ཀ་ལྷག་སོང་བའི་ཟོལ་གྱིས་ཕྱིར་འོང་ནས་བོད་དམག་དང་མཉམ་དུ་འཐབ་སོང་བས་རིམ་བཞིན་ཉག་སྐེད་དུ་སླེབས་ནས་ཉག་བོད་བར་འདུམ་བྱེད་ཁུལ་གྱིས་སྡེ་དགེ་རྒྱལ་པོ་ཡུམ་སྲས་སྐུ་འཁོར་བཅས་ཉེས་སྐྱོབ་བྱས། ཤིང་གླང་ཕྱི་ལོ་༡༨༦༥ལོའི་ཟླ་བ་བརྒྱད་པའི་ཚེས་གཅིག་ཉིན་མགོན་པོ་རྣམ་རྒྱལ་ཕ་བུ་མཁར་རྫོང་བཅས་མེར་བསྲེགས་ཏེ་སྡེ་དགེ་རྒྱལ་པོ་སྐུ་འཁོར་བཅས་དབུ་ཐོན་ངེས་སྡེ་དགེར་སླེབས་པའི་མཐུན་རྐྱེན་སྦྱར་བས། པདྨལས་གྲུབ་ལ་གཟེངས་བསྟོད་དང་བཅས་སྡེ་དགེའི་གཉེར་ཆེན་གྱི་གོ་ས་ཐོབ། རྗེས་སུ་ཆོས་དབྱིངས་བཟང་མོ་དབལ་ཤུལ་བཀྲ་བསམ་དང་འགབ་འབྲེལ་བྱས་པར། པདྨལས་གྲུབ་ཐུགས་མ་དགྱེས་ནས་ཐེངས་མང་ཐེ་གཏོགས་བྱས་མཐར། ཆོས་དབྱིངས་བཟང་མོས་པདྨལས་གྲུབ་དགྲ་བོར་བཟུང་ནས་དུག་གིས་དཀྲོངས། དེ་ལ་རིགས་རྒྱུད་བྱ་རྒོད་བཀྲ་ཤིས་རྣམ་རྒྱལ་ཞེས་པ་དང་བུ་མོ་གཅིག་སྐྱེས་། པདྨལས་གྲུབ་གཤེགས་རྗེས་བཀྲ་ཤིས་རྣམ་རྒྱལ་ཕ་རྒན་སྐུ་ཚབ་ཏུ་སྡེ་དགེའི་གཉེར་ཆེན་བསྐོས་། སྡེ་དགེ་རྒྱལ་པོ་འཆི་མེད་རྟག་པའི་རྡོ་རྗེ་ཡུམ་སྲས་བཅས་རྒྱ་ནག་ཁྲིན་ཏུར་དེད་སྐབས་དང་། རྒྱལ་པོ་ཡབ་ཡུམ་ཁྲིན་ཏུར་གཤེགས་ནས་རྒྱལ་སྲས་ཨ་ཇ་དང་བ་བ་གཉིས་གདན་འདྲེན་ཞུ་སྐབས་ཞབས་གྲས་ཡིན། དེ་ནས་སྡེ་དགེའི་སྲས་རྒན་གཞོན་རྒྱལ་ས་རྩོད་དེ་ནང་འགལ་བྱུང་སྐབས། བྱ་རྒོད་བཀྲ་ཤིས་རྣམ་རྒྱལ་གྱིས་བ་བའམ་ངག་དབང་འཇམ་དཔལ་རིན་ཆེན་གྱི་རྒྱབ་གཉེར་བྱས། དེའི་ཕྱོགས་སུ་བྲེ་འབོད། འོག་མ། རྒྱ་མཁར། ས་དཀར་བཅས་ཡོད། བཀྲ་ཤིས་རྣམ་རྒྱལ་གྱི་ཁྱིམ་ཐབ་ཚེ་དབང་སྒྲོལ་མ་བསུས་པའི་བུ་བྱ་རྒོད་རྒྱལ་མཚན། བློ་བཟང་ཆོས་རྒྱལ། བྱ་རྒོད་ཚེ་རྣམ། བྱ་རྒོད་སྟོབས་ལྡན། བུ་མོ་འགྱུར་མེད། བདེ་དགའ། དབྱངས་ཅན་བཅས་མིང་སྲིང་བདུན་སྐྱེས། བུ་ཆུང་བ་ནུ་ཞོ་འཐུང་སྐབས་དང་། སྟོབས་ལྡན་ལོ་བཅུ་ལྷག་སོན་སྐབས། ཨ་ཇའི་ཤོག་ཁག་གྱང་ཁང་བདེ་ཆེད་གྱིས་དུག་དྲངས་ཏེ་བཀྲ་ཤིས་རྣམ་རྒྱལ་བསད། ཤུལ་དུ་བུ་གཉིས་ཆུང་དུས་ནས་ཤི་སོང་བའི་ལྷག་མ་མིང་སྲིང་ལྔ་ལུས་པ་སྟེ་བྱ་རྒོད་ཁྱིམ་རྒྱུད་ཀྱི་ལོ་རྒྱུས་བསྟན་ཟིན། ད་ནི་བྱ་རྒོད་སྟོབས་ལྡན་གྱི་ལོ་རྒྱུས་དངོས་བཤད་པ་ལ་སྟོབས་ལྡན་ནི་མིང་སྲིང་བདུན་གྱི་དྲུག་པ་རབ་ཚེས་ས་ཁྱི་ཕྱི་ལོ་༡༨༩༨ལོར་འཁྲུངས་། སྟོབས་ལྡན་མིང་སྲིང་ནར་མ་སོན་ཅིང་། ཕ་ཡབ་བསད་ཤུལ་དུ་བྱ་རྒོད་ཁྱིམ་གཞིས་ཀྱི་འགན་ཡོངས་རྫོགས་མ་ཡུམ་བྱ་རྒོད་ཚེ་དབང་སྒྲོལ་མའི་ཐོག་ཏུ་བབས། འདི་ཉིད་དབང་ཟིལ་ཆེ་བས་སྐབས་དེར་བྱ་རྒོད་ཚེ་དབང་སྒྲོལ་མ་དང་། དཀར་མཛེས་ཁང་གསར་དབྱངས་ཅན་མཁའ་འགྲོ། ཉག་རོང་རྒྱ་རུ་འཆི་མེད་སྒྲོལ་མ་གསུམ་ལ་ཁམས་པའི་བདུད་མོ་གསུམ་འབོད་སྲོལ་ཡོད་ཟེར། ཚེ་དབང་སྒྲོལ་མས་ཁྱོ་ག་གཤེགས་པའི་གོ་གནས་དང་ལ་རྒྱ་བརྒྱུད་འཛིན་བྱས་ཏེ་བ་བའི་ཕྱོགས་ལ་རྒྱབ་སྐྱོར་མཐའ་གཅིག་ཏུ་བྱས། མཐར་ཨ་ཇ་ནས་ཆིང་དམག་བཀུག་སྟེ་བ་བའི་ཕྱོགས་ཕམ་ནས་བྲོས་བྱོལ་སོང་སྐབས་ཚེ་དབང་སྒྲོལ་མ་མ་བུ་ཡོངས་རྫོགས་བ་བ་དང་ལྷན་དུ་ཟི་ལིང་བརྒྱུད་བླ་བྲང་དུ་ཨ་མདོ་འཇམ་དབྱངས་བཞད་པར་སྐྱབས་ཞུ་བྱས། སྐབས་དེར་ཏཱ་ལའི་སྐུ་ཕྲེང་བཅུ་གསུམ་པ་པེ་ཅིང་ནས་བོད་དུ་ཕེབས་སྐབས་ཁེལ་བས་འཇམ་བཞད་ཀྱིས་ཞུ་སྣ་མཛད་དེ་བ་བ་དང་བྱ་རྒོད་བོད་གཞུང་ལ་མགོ་བཏགས། བ་བར་ཐའི་ཇི་གོ་ཐོབ་དང་བྱ་རྒོད་ཚང་བྱང་རྒྱབ་ཀྱི་འགོ་པ་ཞིག་བསྐོ་བཞག་མཛད་དེ་བོད་གཞུང་གི་ཞལ་གྲས་སུ་གྱུར། ཆིང་རྒྱལ་རབས་ཀྱི་ཞོན་ཐང་ཁྲི་ལོ་གཉིས་པར་བོད་ལྕགས་ཁྱི་ཕྱི་ལོ་༡༩༡༠་ལོའི་ཟླ་བ་གཉིས་པར་ཆིང་དམག་ཆབ་མདོའི་ནུབ་ཕྱོགས་ནས་བོད་དུ་སླེབས། རྒྱལ་དབང་སྐུ་ཕྲེང་བཅུ་གསུམ་པ་ཐུབ་བསྟན་རྒྱ་མཚོའི་ཕྱོགས་ཀྱིས་དམག་བསྡུ་རུག་བྱས་ཏེ་རྒྱལ་རྩེ་ཕྱོགས་ནས་འགོག་རྒོལ་བྱས། ནག་ཆུ་ས་ཆར་བཀོད་སྒྲིག་བྱས་ཡོད་པའི་བ་བྱ་བྲེ་གསུམ་གྱིས། སྔར་ཁས་ལེན་པ་མི་བརྒྱད་ཅུ་ལྷག་ཙམ་རྩ་འཛུགས་བྱས་ཡོད་པ་དེ་དག །བྲེ་འབོད་ཨ་བདེའི་བུ་བྲེ་འབོད་ཕུར་པས་སྣེ་ཁྲིད་ནས་རྒྱལ་རྩེའི་གཡུལ་འགྱེད་ནང་ཞུགས། རྗེས་སུ་ལྷ་སའི་གཡུ་ཐོག་ཟམ་པའི་གཡུལ་འགྱེད་ནང་བྲེ་འབོད་ཕུར་པ་བསད། དེའི་སྐབས་ལྕགས་ཕག་ལོའི་གསར་བརྗེ་བྱུང་། བོད་དུ་གཡུལ་འགྱེད་བྱེད་མཁན་གྱི་ཆིང་དམག་ཕྱོགས་ནས་ཁྲིམས་མེད་ལུགས་མེད་ཀྱིས་བསད་འཕྲོག་བཅོམ་གསུམ་བྱས་པས། དབྱིན་ཇི་དང་ཨུ་རུ་སུ་སོགས་ཀྱི་རྒྱལ་ཁབ་ཀྱིས་རྒྱབ་སྐྱོར་བྱས། མཐར་ཆིང་དམག་ཕམ་ཉེས་ཚབས་ཆེན་ཐེབས། ཆིང་དམག་དང་གཡུལ་འགྱེད་བྱེད་པའི་སྐབས་སུ་སྡེ་དགེའི་དམག་གིས་དཔའ་ཐོན། བོད་དམག་ནང་སྙན་གྲགས་ཆེན་པོ་བཞག་ཡོད་པས། ཏཱ་ལའི་བླ་མ་སྐུ་ཕྲེང་བཅུ་གསུམ་པས་གཟེངས་བསྟོད་གནང་བ་དང་། བྱ་རྒོད་དང་བྲེ་འབོད་ཁྱིམ་ཁག་གཉིས་ལ་སེ་ར་དགོན་པའི་ཉེ་འདབས་དང་། ལྷ་སའི་ལྷོ་རྒྱུད་ཀྱི་ཡར་འབྲོག་གཡུ་མཚོའི་ཉེ་འགྲམ་གྱི་ས་ཆ་སོ་སོར་གཞིས་ཀ་གཅིག་དང་ཁོལ་དུད་བཅུ་ལྷག་གི་བདག་རྐྱེན་དང་འབྲེལ་གཞུང་སའི་སྐུ་དྲག་གི་རིམ་པའི་གྲས་སུ་བཞག །མེ་འབྲུག་ཕྱི་ལོ་༡༩༡༨ལོའི་ཟླ་བ་བཞི་པར། བྱ་རྒོད་ཚང་གིས་ཏཱ་ལའི་བླ་མར་ཞུས་པ་བཞིན། ཏཱ་ལའི་བླ་མས་ཆབ་མདོར་བཅའ་སྡོད་བོད་གཞུང་བཀའ་བློན་ལ། བོད་དམག་གིས་བྱ་རྒོད་ཚང་ལ་སྔོན་སྡེ་དགེའི་དབང་ཆའི་ཐོབ་ཐང་སྐྱར་གསོ་བྱ་རྒྱུར་རོགས་སྐྱོར་དང་། ཁྲལ་འུལ་ཐམས་ཅད་སྤྲོད་མི་དགོས་པའི་བཀའ་རྒྱ་གནང་། བྱ་རྒོད་ཚང་འཇོ་མདའ་ལ་སླེབས་རྗེས། ཨ་ཇས་ཁྲི་འཛིན་བཞིན་ཡོད་པས་འབྲི་ཆུ་ཚུར་ཁར་འོང་མ་ཕོད་ནས་གནས་སྐབས་དབོན་པོ་སྟོད་ལེབ་མར་ཁྱིམ་གཞིས་རྒྱག །དེ་ནས་བྱ་རྒོད་སྟོབས་ལྡན་དང་བྱ་རྒོད་ཚེ་རྣམ་སྤུན་གཉིས་སླར་བོད་དུ་ལོག་སྟེ་ལྷ་ས་སྐུ་དྲག་སློབ་གྲྭ་ནང་སློབ་གཉེར་བྱས། བྱ་རྒོད་ཚེ་རྣམ་གྱིས་སློབ་གྲོགས་ལ་གྲི་རྒྱབ་པ་སོགས་ཀྱི་རྐྱེན་པས་ཕྱིར་ཕུད། སྟོབས་ལྡན་ནས་ལོ་གསུམ་རིང་བྲིས་དང་དག་ཡིག་སུམ་རྟགས། སྙན་ངག །སྤྱོད་འཇུག་བཅས་སློབ་གཉེར་སྦྱོང་པ་ཕུལ་དུ་བྱུང་སྟེ་སློབ་མཐར་ཕྱིན། བྱ་རྒོད་སྟོབས་ལྡན་ལྷ་སར་སྐུ་དྲག་སློབ་གྲྭ་ལས་སློབ་མཐར་ཕྱིན་རྗེས། འགོ་པའི་ཐོབ་ཐང་གི་ཚུལ་དུ་ཕྱིར་སྡེ་དགེར་ལོག །བོད་དམག་གིས་ཨ་ཇ་འཇུ་བཟུང་བྱས་ཏེ་ལྷ་སར་ཁྲིད། སྡེ་དགེ་ཚང་བོད་དམག་གིས་དབང་དུ་བསྡུས། རྒྱལ་རབས་ཉེར་གཅིག་པ་འཇིགས་མེད་ཚེ་དབང་བདུད་འདུལ་སོགས་མི་རེར་ཟླ་རེར་ཤིན་ཏུ་དམའ་བའི་འཚོ་བའི་འགྲོ་གྲོན་མ་གཏོགས་གཞན་མངའ་འོག་གི་འགོ་པ་སོ་སོའི་ལོ་རེའི་འབུལ་བའང་ཚང་མ་བོད་དམག་གིས་བླངས། བོད་དམག་སྡེ་དགེར་བཅའ་སྡོད་བྱས་ཏེ་སྡེ་དགེའི་མངའ་འོག་གི་ས་ཞིང་དང་། མི་གྲངས། དགོན་པ། སློབ་གྲྭ། འགོ་པ་སོགས་ཞིབ་གཤེར་ནན་པོ་བྱས། བྱ་རྒོད་སྟོབས་ལྡན་ཕྱིར་སྡེ་དགེར་སླེབས་རྗེས། སྡེ་སྤྱི་ཁྱུང་རམ་མདའ་དཔོན་ཡོད་སྐབས་ཁེལ་ནས་སྟོབས་ལྡན་དང་ཅུང་འཕྲོད་མིན་གྱིས་མདུན་སྐོར་དཀྱུས་མའི་གོ་ཐོབ་ལས་མ་བྱུང་། དེའི་སྐབས་སུ་སྡེ་དགེའི་གཉེར་ཕྱག་ལྷན་རྒྱས་ཁོང་གི་ཁོངས་མི་ཞིག་གི་འགན་བཞེས། གཉེར་ཕྱག་ལྷན་རྒྱས་ཁང་ནང་དུ་གཙོ་བོར་གྱང་ཁང་སྤྲུལ་སྐུ་དང་། ཧོ་ཆོ་པད་རྡོར། ར་རུ་མི་རྒོད། ཕྱག་མཛད་རྣམ་སྲས་ཚེ་དགའ། འོག་མ་བསོད་ནམས་ཚེ་རིང་སོགས་ཡོད། དེ་རྗེས་ཕྱག་མཛོད་རྣམ་སྲས་ཚེ་དགས་རྒྱུ་ནོར་ལྐོག་ཟ་བྱས་པས་ཁྱུང་རམ་གྱིས་ཁོ་གོ་ས་ནས་ཕུད། འོག་མ་བསོད་ནམས་ཚེ་རིང་ཁོའི་ཚབ་ཏུ་བཞག །རབ་བྱུང་བཅུ་དྲུག་པའི་ས་སྦྲུལ་ཕྱི་ལོ་༡༩༢༩་ལོར་སྡེ་དགེར་བོད་གཞུང་སྐུ་ཚབ་སྡེ་སྤྱི་བཀྲས་ཐང་མདའ་དཔོན་ནམ་སྡེ་དགེའི་སྲིད་དོན་རྒྱལ་རབས་ལས། མཁས་མེས་གཙོ་འགན་བཞེས་སྐབས་སྟོབས་ལྡན་བོད་དུ་བཞུགས་དུས་གྲོགས་པོར་སོང་གཤིས་འཕྲལ་དུ་སྟོབས་ལྡན་སྡེ་དགེའི་གཉེར་ཆེན་གྱི་གོ་ཐོབ་སྤྲད། སྐབས་དེར་སྟོབས་ལྡན་རང་ལོ་སོ་གཉིས་ཡིན། དེ་ནས་སྐུ་ཞབས་དེ་ཉིད་ཆབ་སྲིད་ཀྱི་བྱ་བར་མཁས་མཛངས་ལྡན་པས་སྡེ་དགེ་དང་བོད་ས་གནས་སྲིད་གཞུང་བར་རམ། ནུབ་ཁམས་ལའུ་ཝན་ཧུའུ་མཚོ་སྔོན་མཱ་པུའུ་སྤྱང་སོགས་ཀྱི་བར་འགལ་བ་ཐག་གཅོད་བྱེད་པར་འབྲེལ་གཏུག་མཁས་ཤིང་དོན་གོ་ཆོད་པ་མང་དུ་བྱུང་བས། བྱ་རྒོད་སྟོབས་ལྡན་ཞེས་འཇོན་ཐང་ཆེ་བའི་ཚད་དུ་བྱེད་ཅིང་སྐབས་དེར་ཁམས་ཕྱོགས་ཁ་དྲག་དབང་ཤེད་ཅན་གྱི་གྲགས་ཅན་མི་སྣར་གྱུར། དེའི་སྐབས་གཉེར་ཆེན་གྱང་ཁང་སྤྲུལ་སྐུས་ར་རུ་འཇམ་དབྱངས་བློ་གྲོས་དང་། མགོས་གཟའ་དབང་རྒྱལ་གཉིས་དུག་གིས་བཀྲོང་བསམ་པ་བྱ་རྒོད་སྟོབས་ལྡན་གྱིས་ཤེས་ཏེ། གཉེར་ཆེན་གྱང་ཁང་སྤྲུལ་སྐུ་ཆབ་མདོར་ཁྲིད་དེ་ཆབ་མདོ་བོད་ཀྱི་རྒྱུན་བཞུགས་སྤྱི་དཔོན་གྱིས་ཞིབ་གཅོད་བྱེད་རྒྱུ་བསྒུག །ཆུ་སྤྲེལ་ཕྱི་ལོ་༡༩༣༢་ལོར་ཁྲོན་ཁམས་མཐའ་སྲུང་དམག་གིས་བོད་དམག་དཀར་མཛེས་ནས་ཛཾ་ཐོག་བར་ཡར་དེད་ནས། ལོ་དེར་ཀམ་ཐོག་གྲོས་ཆིངས་བཞག་དོན་ལྟར་རྒྱ་བོད་འབྲི་ཆུ་ཤར་ནུབ་བྱེད་སྐབས། སྡེ་དགེ་རྒྱལ་པོ་ལྷ་སྲས་ཚེ་དབང་བདུད་འདུལ་གྱིས་ཁེ་ཕན་སྲུང་འཛིན་དང་ཡིད་ཆེས་ཐོབ་ཕྱིར། འབྲི་ནུབ་བོད་ཕྱོགས་ལ་དམག་དྲངས་ཏེ་སྔར་སྡེ་དགེའི་མངའ་ཁོངས་སུ་བོད་གཞུང་ནས་འབྲུ་དངུལ་དཔྱ་ཁྲལ་བསྡུ་རྒྱུ་གཏན་འགོག་བྱས་པ་དང་། དེ་རྗེས་འབྲི་ནུབ་ཐང་ཕུག་རྫོང་ཁོངས་སུ་འབྲུ་ཁྲལ་བསྡུ་རྒྱུ་འགོག་ཐུབ་པ་བྱུང་བས་མང་ཚོགས་ཀྱིས་བརྩི་བཀུར་ཐོབ། ཆུ་བྱ་ཕྱི་ལོ་༡༩༣༣་ལོར་བྱ་རྒོད་སྟོབས་ལྡན་གྱིས་རང་ཉིད་ཀྱི་དབང་ཤུགས་རྒྱ་ཆེར་འགྲོ་ཆེད། སྡེ་དགེའི་མངའ་འོག་ཏུ་ཁོལ་པ་སྟོང་ལྷག་ཙམ་ཡོད་ལ་དབང་ཤུགས་ཆེ་བའི་ཡིད་ལྷུང་ལྷ་རི་དཔོན་རྒན་གྱི་བུ་མོ་བསོད་ནམས་ཆོས་མཚོ་ཞེས་པ་ཁྱིམ་ཐབ་བསུས། དེ་ནས་དུས་ཡུན་མ་འགྱངས་བར་ལྷ་རི་དཔོན་རྒན་གྱིས་བྱ་རྒོད་སྟོབས་ལྡན་སྐུ་འཁོར་ཡིད་ལྷུང་དུ་བསུས་ནས་བྱ་རྒོད་ལྷ་རི་གཉིས་གཞིས་སྡོང་བྱས། ལྷ་རི་དཔོན་སྐལ་བཟང་ཕུན་ཚོགས་ལ་བུ་གཅིག་ཡོད་པ་དེ་གེ་མཛོ་བསང་གསོལ་སྐབས་རྟ་ལས་ལྷུང་སྟེ་གཤེགས་པ་དང་། དཔོན་རྒན་འདས་རྗེས་བྱ་རྒོད་སྟོབས་ལྡན་ཡིད་ལྷུང་ལྷ་རི་དཔོན་གྱི་གོ་ས་ཐོབ། ཡིད་ལྷུང་ཕྱོགས་ཀྱི། ༡གནའ་རོང་དང་ཆུ་སྐྱེད། ༢ཨོ་གུར་དང་གེ་སྒང་། ༣ཁྲོ་ཐང་། ༤ཧོ་ར་དང་ཚེམས་ཁོག །༥དུང་འབྲུག་དང་ཁྲོ་བ། ༦འཛིན་ནང་དང་ཤེལ་ཁོག་རོང་ཆེན། ༧རྨ་ཟླ། ༨རོང་ཚ་བཅས་ཤོག་ཆེན་བརྒྱད་ཀྱི་དབང་ཆ་ཚང་མ་བཟུང་། དེའི་མངའ་འབངས་སྟོང་སྡེ་ལྷག་ཡོད། དེ་ལ་གྱད་རུ་བརྒྱད་དང་། དམག་དཔོན་བརྒྱད། བསམ་གནས་བརྒྱད་ཡོད། དམག་ཤོག་བརྒྱད་ཀྱི་སྤྱི་ཁྱབ་དམག་དཔོན་བྱ་རྒོད་ཚང་གི་མག་པ་སྤོམ་ཁ་རྣམ་རྒྱལ་རྡོ་རྗེས་བྱས། བསམ་གནས་ནི་བློ་ཕུད་པ་དང་གྲོས་འགོ་འདོན་པ་ལས་ཐག་གཅོད་དབང་མེད། དེ་ནི་ས་གནས་ཀྱིས་བརྩི་བཀུར་བྱེད་སའི་མི་བསམ་ཤེས་ཅན་ཞིག་ཡིན་དགོས། གྱད་རུ་ནི་ཡུལ་ཕྱོགས་དཔོན་པོ་ལ་གོ། དུས་མཚུངས་སུ་སྟོབས་ལྡན་གྱིས་མདུན་སྐོར་ལྟོ་རུ་ཚང་གི་ཚུལ་ཁྲིམས་དཔལ་ལྡན་གྱི་བུ་མོ་བཀྲ་གཡང་དང་། བྲེ་འབོད་ཨ་དགེའི་བུ་ལྷ་རྒྱལ་གཉིས་གཉེན་གཏུགས་བྱས་པས། དབང་ཤུགས་ཆེ་བའི་འགོ་པ་འགའ་དང་འབྲེལ་བ་དེ་བས་དམ་པོར་གྱུར། དེ་ནས་ཡུན་རིང་མ་སོང་རྗེས་གཉེར་ཕྱག་ལྷན་རྒྱས་ཁང་ནང་གི་ར་རུ་འཇམ་དབྱངས་བློ་གྲོས་དང་། མཁར་མདོ་གཉེར་པ་སོགས་ཕྱག་ལས་ཐོག་ནས་ངལ་གསོ་བྱས་རྗེས། ཡང་སྡེ་དགེ་ཚང་གི་དབང་ཆ་རིམ་བཞིན་བྱ་རྒོད་སྟོབས་ལྡན་དང་། འོག་མ་ཕྱག་མཛོད་གཉིས་ཀྱི་ལག་ཏུ་སོང་། བྱ་རྒོད་སྟོབས་ལྡན་གྱིས་ཡུལ་གཞན་གྱི་དབང་ཤུགས་ལྡན་པའི་མི་དང་མཐུན་འབྲེལ་ལེགས་པོ་བྱས། ཁོས་སྐུལ་མ་བཏང་ནས་འཇུ་ཆུང་བུ་འཇུ་ཆུང་ཚེ་རྡོར་དཀར་མཛེས་ཁང་སར་རྒྱལ་པོར་མག་པ་བཏང་། དིས་མགོའི་བུ་དིས་མགོ་འཇམ་དགའ་དཀར་མཛེས་ཨ་ཐུབ་རྙ་དཀར་ཚང་གི་མག་པ་བྱས། ཞིང་མོའི་བུ་རབ་དགའ་དཀར་མཛེས་མ་ཟུར་དཔོན་དང་གཉེན་སྒྲིག་བྱས་ཏེ་གཉེན་ཚན་གྱི་འབྲེལ་བ་དང་སྟོབས་ཤུགས་ཇེ་ཆེར་བཏང་། ཕྱི་ལོ་༡༩༣༢ལོའི་ཟླ་བ་བདུན་པར། མཚོ་སྔོན་མཱ་པུའུ་སྤྱང་གིས་སྔོན་རྗེས་སུ་མཱ་བྱུས་དང་། མཱ་ལུའུ་ཟེར་བའི་མི་གཉིས་ལ་ཉུས་དམག་གཉིས་ཁྲིད་བཅུག་སྟེ་མཚོ་སྔོན་ས་ཁོངས་སུ་ཡོད་པའི་བོད་དམག་དེ་དག་ཕྱིར་མཐར་སྐྲོད་བཅུག །བོད་དམག་ལ་ཕམ་ཉེས་བྱུང་ནས་མཱ་དམག་གིས་རྗེས་བཅད་ཅིང་། ཁམས་ནུབ་ཕྱོགས་ཀྱི་སེར་ཤུལ་དང་། འདན་ཁོག་སོགས་ཀྱི་རྫོང་ས་བཟུང་། ལིའུ་ཝིན་ཧུའུ་ཕྱོགས་ཀྱིས་གོ་སྐབས་དང་བསྟུན་ནས་ཉུས་དམག་གཅིག་གིས་མཚོ་སྔོན་དམག་དཔུང་ལ་གཞོགས་འདེགས་ཀྱིས་དཀར་མཛེས་དང་། ཉག་རོང་ཕྱོགས་སུ་དམག་འཐབ་བྱས་ནས་དཀར་མཛེས་དང་། ཉག་རོང་། སྡེ་དགེ་སོགས་ཀྱི་རྫོང་ས་བླངས། དེ་ནས་འབྲི་ཆུ་ཤར་རྒྱུད་བོད་དམག་གིས་བཟུང་ཡོད་པའི་ས་ཁུལ་ཐམས་ཅད་བླངས། འབྲི་ཆུ་ཤར་ནུབ་གཉིས་སུ་ཤོག་ཁག་གཉིས་ཀྱི་དམག་གིས་སོ་སོར་བཟུང་། ཕྱི་ཟླ་བཅུ་པའི་ཚེས་བརྒྱད་ཉིན་པར། ཏཱ་ལའི་བླ་མ་དང་། ལིའུ་ཝིན་ཧུའུའི་ཕྱོགས་གཉིས་ཀྱི་ཕྱི་འབྲེལ་ཆེད་བཏང་མི་སྣ་དང་། ཕྱི་འབྲེལ་ཨུ་ཡོན་སོགས་མངགས། སྐམ་ཐོག་ལ་གྲོས་མོལ་ཚོགས་འདུ་འཚོགས་ཏེ་སྐམ་ཐོག་གྲོས་མཐུན་ཞེས་པའི་ཆིངས་ཡིག་དོན་ཚན་དྲུག་བཞག །གནས་སྐབས་འབྲི་ཆུས་བཅད་མཚམས་བྱས་པའི་འབྲི་ཆུའི་ཤར་རྒྱུད་ཤིས་ཁམས་ཞིང་ཆེན་གྱི་ཁོངས་གཏོགས་དང་། འབྲི་ཆུ་ནུབ་རྒྱུད་བོད་གཞུང་གི་ཁོངས་གཏོགས་བྱས། འོན་ཀྱང་འབྲི་ཆུའི་ཤར་ནུབ་གཉིས་སུ་ཡོད་པའི་སྡེ་དགེའི་མངའ་སྡེ་རྣམས་སྔར་སོར་རང་འཇགས་སྡེ་དགེ་རྒྱལ་པོའི་མངའ་ཁོངས་བྱས་ཐོག་སྡེ་དགེའི་ཤར་རྒྱུད་དུ་ཤིས་ཁམས་སྲིད་དོན་སྐུ་ཚབ་ཀྱི་ས་སྒོ་བཞག །སྡེ་དགེའི་ནུབ་རྒྱུད་ས་ཁུལ་དུ་མདོ་སྤྱི་ས་དབང་གི་ཁོངས་གཏོགས་བྱས། དེ་ནས་དུས་ཡུན་མི་རིང་བ་ལིའུ་ཝིན་ཧུའུ་ཡིས་སྡེ་དགེ་རྫོང་སྲིད་གཞུང་བཙུགས་རྗེས། དམག་དཔུང་ཆེ་བ་སྡེ་དགེ་ནས་ཕྱིར་འཐེན་བྱས། བྱ་རྒོད་སྟོབས་ལྡན་དང་། འོག་མ་ཕྱག་མཛོད་སོགས་འགོ་པ་རྣམས་ཀྱིས་རོགས་སྐྱོར་འོག་སྡེ་དགེ་རྒྱལ་པོ་ཚེ་དབང་བདུད་འདུལ་གྱིས་སྲིད་དབང་གསར་དུ་བཙུགས། བྱ་རྒོད་སྟོབས་ལྡན་སོགས་ཀྱིས་ཚེ་དབང་བདུད་འདུལ་ལ་ནང་ཆེན་རྒྱལ་པོའི་སྲས་མོ་འཇམ་དབྱངས་དཔལ་མོ་བཙུན་མོ་བླངས་པ་དང་། དཔལ་ཡུལ། ཧོར་པོ་སོགས་ཀྱི་ས་གནས་འགོ་པ་རྣམས་ཀྱིས་སྡེ་དགེ་རྒྱལ་པོར་ངོ་རྒོལ་བྱེད་པ་དེ་ཞི་འཇགས་སུ་བཏང་བ་བཅས་ཀྱིས། སྡེ་དགེ་རྒྱལ་པོས་རིམ་བཞིན་བྱ་རྒོད་སྟོབས་ལྡན་ལ་ཡིད་ཆེས་དང་མཐོང་ཆེན་བྱས་ནས་ཁོའི་དབང་ཤུགས་དང་སྙན་གྲགས་ཀྱང་ཉིན་བཞིན་ཇེ་མཐོར་སོང་། སྐབས་དེར་སྤྱི་ཚོགས་དང་ཆབ་སྲིད་རྙོག་འཛིན་ཆེ་བའི་དུས་སུ་ཁེལ་བས་ཁམས་ཕྱོགས་ས་ཁུལ་གྱི་བོད་རིགས་གོང་གྲས་འགའ་ཤས་ལ་ཁམས་པས་ཁམས་པ་སྐྱོང་བའི་མི་རིགས་ཀྱི་འདུ་ཤེས་ཞིག་སྐྱེས། ཕྱི་ལོ་༡༩༣༥་ལོའི་སྤྱི་ཟླ་བརྒྱད་པར་མགར་བླ་མས་གོ་མིན་ཏང་གི་བཀའ་དང་ལེན་ཞུས་ཏེ་ནུབ་ཁམས་ཞོན་ཝན་ཧྲའི་སྤྱི་ཁྱབ་ཁང་བཙུགས་ནས་ཁམས་ཀྱི་སྟོབས་ཤུགས་ཟླ་སྒྲིལ་བྱས་ཏེ་དམར་དམག་འགོག་རྒོལ་ལ་ཕན་ཚུན་གཞོགས་འདེགས་བྱས་པར། བྱ་རྒོད་སྟོབས་ལྡན་སྡེ་དགེ་རྒྱལ་པོས་བཀའ་མངགས་བཞིན་དར་མདོ་མགར་བླ་མས་འཚོགས་པའི་ཞོན་ཝན་ཚོགས་ཆེན་དུ་ཞུགས་ནས་མགར་བླ་མས་སྟོན་པའི་དམར་དམག་འགོག་རྒོལ་དང་ཁམས་པས་ཁམས་པ་སྐྱོང་བ་ཞེས་པའི་སྲིད་ཇུས་ཉན་འཇོག་བྱས། དེ་ནས་མགར་བླ་མ་དང་འབྲེལ་ཟབ་བྱས་ཤིང་རང་སྡེ་རང་སྲུང་དགོས་པར་བཤད་དེ། ལུའུ་ཝན་ཧུའུ་ཡིས་བསྐོ་མངགས་སྡེ་དགེ་རྫོང་དཔོན་ཁྲེང་ཡུ་ཀམ་དང་འདན་ཁོག་རྫོང་དཔོན་ཀྲམ་ཙི་ཡུས་སོགས་དམར་བསད་བཏང་། ཕྱི་ལོ་༡༩༣༦་ལོའི་དཔྱིད་ཀར། ཀྲུང་གོའི་བཟོ་ཞིང་དམར་དམག་རྒྱང་སྐྱོད་བྱས་ཏེ་རྟའུ་དང་། བྲག་འགོ། དཀར་མཛེས་སོགས་སུ་སླེབས་དུས། སྡེ་དགེ་རྒྱལ་པོ་ལྷ་སྲས་ཚེ་དབང་བདུད་འདུལ་གྱིས་བྱ་རྒོད་སྟོབས་ལྡན་དང་། འོག་མ་ཕྱག་མཛོད་བསོད་ནམས་ཚེ་རིང་། གཉེར་ཆེན་བློ་གྲོས་འཇམ་དབྱངས། གྲུ་མོ་ཐུབ་བསྟན། འདིས་ཁ་འཆི་མེད་སོགས་དམག་དཔོན་བསྐོ་བཞག་མཛད་དེ་སྡེ་དགེའི་དམག་དཀར་མཛེས་སུ་དམར་དམག་འགོག་རྒོལ་བྱེད་པར་བཏང་། བྱ་རྒོད་སྟོབས་ལྡན་ཕྱོགས་ཀྱིས་དཀར་མཛེས་ས་མཚམས་རོང་པ་ཚ་ཨ་ཐུབ་རི་ཕུག་ཏུ་དམག་སྒར་བརྒྱབ། འོག་མ་ཕྱག་མཛོད་དང་བློ་གྲོས་འཇམ་དབྱངས་སོགས་ཀྱི་ལས་དམག་གད་ཐོག་ལ་དམག་སྒར་བརྒྱབ། དཀར་མཛེས་ལ་དམར་དམག་དང་འཐབ་པས་དམར་དམག་གིས་མཚན་མོར་འཇབ་རྒོལ་བྱས་ཏེ་བྱ་རྒོད་སྟོབས་ལྡན་རྨས་ནས་བཟུང་། འོག་མ་ཕྱག་མཛོད་སོགས་དཔུང་དམག་ཕྱིར་ལོག །དེའི་དུས་སུ་མཱ་པུའུ་སྤྱང་གིས་ཀྱང་མདའ་དཔོན་གཅིག་གི་དམག་བཏང་ནས་སྡེ་དགེ་ལྷུན་གྲུབ་སྟེང་དུ་དམག་སྒར་བརྒྱབ། སྡེ་དགེ་རྒྱལ་པོ་སྐུ་འཁོར་ཐམས་ཅད་འབྲི་ཆུ་ནུབ་རྒྱུད་ཀྱི་འཇོ་མདའ་ལ་བྲོས། འོག་མ་ཕྱག་མཛོད་སོགས་སྡེ་དགེར་བྲོས་རྗེས། འཁོར་ལོ་མདོར་སྒར་བབས། བྱ་རྒོད་སྟོབས་ལྡན་ཤི་གསོན་གང་ཡིན་མ་ཤེས་ནས་འཇོ་མདའ་ཕྱོགས་ཀྱི་འགོ་པ་ཨོ་རྒྱན་ཚེ་བརྟན་དཀར་མཛེས་ལ་འཇབ་ཉན་དུ་བཏང་། ཨོ་རྒྱན་ཚེ་བརྟན་དཀར་མཛེས་ཡེ་རྣམ་དགེ་ལེགས་ཀྱི་ཁྱིམ་ནས་བྱ་རྒོད་སྟོབས་ལྡན་དང་ཐུག །བྱ་རྒོད་སྟོབས་ལྡན་དམར་དམག་གིས་ལག་ཟིན་ཐེབས་རྗེས་དམིགས་བསལ་གྱི་གཟིགས་སྐྱོང་ཐོབ། སྐབས་དེར་དམར་དམག་དཔུང་ཁག་སུམ་ཅུའི་ཀྲེན་ཨུད་ཀྱི་འགན་བཞེས་པ་ལིའི་ཞན་ཉན་སོགས་འགོ་ཁྲིད་རྣམས་སྐུ་ངོ་མས་ཁོང་དང་བཀའ་མོལ་གནང་སྟེ། ཏང་གི་མི་རིགས་དང་ཆོས་ལུགས་སྲིད་ཇུས། དམར་དམག་རྒྱང་སྐྱོད་བྱེད་པའི་དམིགས་ཡུལ་བཅས་དང་གྲངས་ཉུང་མི་རིགས་རང་གི་སྲིད་དབང་འཛུགས་ཏེ། གོ་མིན་ཏང་གི་དབང་བསྒྱུར་དང་གཉའ་གནོན་བཤུ་གཞོག་ལ་ངོ་རྒོལ་བྱེད་དགོས་ཚུལ་སོགས་ཞིབ་ཏུ་བཤད་ཅིང་། ཙུང་སི་ལིང་ཀྲུའུ་ཏེས་ཀྱང་མཇལ་འཕྲད་གནང་བ་མ་ཟད་རྨ་བཅོས་ཡག་པོ་གྱིས་ཞེས་གསུངས་པས་བྱ་རྒོད་སྟོབས་ལྡན་སེམས་འགུལ་ཆེན་པོ་ཐེབས་སྐབས་དེར། སྡེ་དགེ་རྒྱལ་བློན་རྣམས་འབྲི་ནུབ་རི་མདའ་ལ་བྲོས་ཡིབ་བཞུགས་པར། ཨུ་རྒྱན་ཚེ་བརྟན་བང་མི་ཆེད་བཏང་བརྒྱུད་ཞུ་ཤོག་ཕུལ་དོན། སྟོབས་ལྡན་རང་རྨས་ནས་འཇུ་བཟུང་བྱས་ཀྱང་། དམར་དམག་གིས་རྨ་བཅོས་དང་གཟིགས་སྐྱོང་ཡག་པོ་ཐེབས་ཚུལ། རྨ་དྲག་ནས་སྡེ་དགེར་ཕྱིར་ཕེབས་རྒྱུ་ཡིན་ཚུལ། དམར་དམག་རྒྱང་སྐྱོད་བྱེད་པ་ནི། རི་པི་འདྲེ་དམག་བཏུལ་ནས་མི་དམངས་དབུལ་པོའི་ཆེད་གསར་བརྗེ་སློང་བ་དང་། མི་རིགས་དང་ཆོས་ལུགས་ཀྱི་སྲིད་ཇུས་ཡང་དག་ཁྱབ་བསྒྲགས་གཏོང་ཆེད་མངགས་པའི་ཕོ་ཉ་ལྟ་བུ་ཡིན་ཚུལ། དམར་དམག་ནི་བོད་རིགས་མི་དམངས་ཀྱི་གྲོགས་པོ་ཡིན་པ་ལས་གོ་མིན་ཏང་གིས་སྙོན་འཛུགས་བྱེད་པའི་དགྲ་ཇག་མིན་ངེས་པས། ད་ནས་དམར་དམག་དང་འཐབ་རྩོད་བཟོ་མི་ཉན་པ་བློ་བདེ་མོ་གྱིས་ཞེས་པ་དང་། འབྱུང་འགྱུར་ལོ་བཅུ་ནས་བཅོ་ལྔའ་ིམཚམས་ཁོང་ཚོ་ད་རུང་ཕྱིར་ལོག་ནས་མཉམ་དུ་མཛེས་སྡུག་ལྡན་པའི་ཁམས་པ་ས་ཁུལ་འཛུགས་བསྐྲུན་གནང་རྒྱུའི་བཀའ་མོལ་ཡོད་འདུག་པས་དེ་དོན་ཡུལ་མི་སྤུན་ཟླ་ཚོར་བརྒྱུད་བཤད་གནང་རོགས་ཞེས་པའི་དོན་ཙ་ཅན་གྱི་ཞུ་ཤོག་ཕུལ་སྐད། དེ་ནས་སྡེ་དགེ་རྒྱལ་པོའི་བཀའ་མངགས་བྱ་རྒོད་སྟོབས་ལྡན་དང་། དམར་དམག་འཐུས་ཚབ་ལིའི་ཞན་ཉན་གྱི་བཀའ་བཀོད་འོག་ལྦམ་ལྦུའུ་ཀྲུའུ་གཉིས་ཀྱིས་ཕན་ཚུན་འཁྲུག་རྩོད་མི་བྱེད་པའི་ཆིངས་ཡིག་འཇོག་པ་རེད། ཕྱི་ལོ་༡༩༣༦་ལོའི་སྤྱི་ཟླ་ལྔ་པའི་འགོར་ཀྲུང་ཧ་སུའུ་ལྦེ་ཨེད་བོད་པ་སྲིད་གཞུག་འཛུགས་སྐབས་བྱ་རྒོད་སྟོབས་ལྡན་ནས་བོད་པ་སྲིད་གཞུང་གི་ཀྲུའུ་ཞི་གཞོན་པ་འགན་གཞེས་པ་ནས། དམར་དམག་རྨས་མ་ལ་རོགས་སྐྱོར་སོགས་ཞབས་ཞུ་མི་ཉུང་བ་བསྒྲུབས་ཅིང་། ད་རུང་ཡིད་ལྷུང་དང་རྔ་སྣ་ཕྱོགས་ནས་ཁལ་བཞི་བརྒྱ་དང་རྟ་གཅིག་བརྒྱ་ལྷག་བཅས་བསྡུས་ནས་དམར་དམག་རྒྱང་སྐྱོད་བྱེད་པར་རོགས་སྐྱོར་བྱས་པ་དང་། ལམ་སྣེ་ཁྲིད་མཁན་དང་སྐད་སྒྱུར་སོགས་ཀྱི་མཐུན་རྐྱེན་སྦྱར་བས་ཀྲུའུ་ཙུང་སི་ལིང་གྱིས་གཟེངས་བསྟོད་ཐོབ། དམར་དམག་རྒྱང་སྐྱོད་ཟིན་རྗེས་གོ་མིན་ཏང་གི་དམག་ཤོག་ཨང་ཉེར་བཞི་པ་སླར་ཕྱིར་ལོག་པས། ཕྱི་ལོ་༡༩༣༧ལོར་བྱ་རྒོད་སྟོབས་ལྡན་བོད་དུ་བྲོས་བྱོལ་འགྲོ་རྩིས་བྱེད་སྐབས། ལུའུ་ལྦེན་ཧུའུ་ཡིས་དཔལ་ཡུལ་གྱི་རྫོང་དཔོན་སྤྱན་ཙམ་ཡོན་སྡེ་དགེར་ཆེད་བཏང་གིས་སྡེ་དགེ་རྒྱལ་བློན་གྱི་དབང་ཆ་སྔར་ལུགས་བཞིན་སོར་གནས་འགན་ལེན་བྱེད་རྒྱུ་དང་། སྡེ་དགེ་རྒྱལ་པོ་དང་བྱ་རྒོད་སྟོབས་ལྡན་རྒྱལ་བློན་སོགས་ཀྱིས་མགར་བླ་མའི་རྗེས་སུ་འབྲངས་བའི་བྱ་སྤྱོད་ལ་རྩད་གཅོད་མི་བྱེད་པའི་དྲིལ་བསྒྲགས་བྱས་པས། དེ་དོན་ལ་ཡིད་ཆེས་བྱས་ཏེ་སྡེ་དགེ་རྒྱལ་པོས་བྱ་རྒོད་སྟོབས་ལྡན་ལུའུ་ལྦེན་ཧུའུ་མདུན་དར་མདོར་ཆེད་དུ་དགོངས་སེལ་ཞུ་བར་བཏང་ཞིང་། མགར་བླ་མ་དང་ངན་འབྲེལ་བཅད་རྒྱུ་བྱས་པས་སྡེ་དགེ་དང་འདན་ཁོག་གི་རྫོང་དཔོན་བཀྲོངས་པའི་ཉེས་འགན་ཚང་མ་མགར་བླ་མར་དཀྲིས། ཕྱི་ལོ་༡༩༣༨ལོར་བྱ་རྒོད་སྟོབས་ལྡན་ཉིད་ནུབ་ཁམས་དབུ་འཛིན་ལུའུ་ལྦེན་ཧུའུ་ཡིས། ས་གནས་ཀྱི་རྒྱལ་པོའམ་འགོ་པའི་སྟོབས་ཤུགས་བསླུ་ཁྲིད་བྱ་ཕྱིར་ཆེད་གཉེར་བྱས་པའི་ནུབ་ཁམས་བདེ་འཇགས་སྲུང་སྐྱོབ་ཀྱི་སྲིད་འཛིན་ཁྲིད་སྦྱང་ཚོགས་འདུར་ཞུགས་ཤིང་། དེ་ནས་ནུབ་ཁམས་ཆེད་ལས་བདེ་འཇགས་སྲུང་སྐྱོབ་ཀྱི་ཏུའུ་ཀྲང་ཆེ་བ་དང་། ནུབ་ཁམས་ཞིང་ཆེན་གྱི་སྤྱི་གྲོས་པ་སྡེ་དགེ་རྫོང་གི་སྤྱི་གྲོས་པ་ཆེན་མོ་སོགས་ཀྱི་མཚན་གནས་བསྐོས། ལྦན་ཐིངས་ཅའོ་དང་མའ་ཆུན་དབང་གིས་ངོ་སྤྲོད་བྱས་ཏེ་གོ་མིན་ཏང་ནང་ཞུགས་ཤིང་། གོ་མིན་ཏང་ཀྲུང་དབྱང་དང་འབྲེལ་ཟབ་མི་སྣ་སྤོམ་མདའ་རྡོ་རྗེ་དང་སྐལ་བཟང་ཚེ་རིང་སོགས་དང་འབྲེལ་འདྲིས་དམ་པོར་བཟོས། ཕྱི་ལོ་༡༩༣༩ལོར་ཁང་གསར་ཕྱོགས་པཎ་ཆེན་མཁན་པོ་གྲོས་ཚོགས་ཁང་གི་དཔུང་དམག་དང་། དཀར་མཛེས་བཅའ་སྡོད་དམག་དཔུང་བར་ནང་འགལ་ཟིང་འཁྲུགས་བྱུང་སྐབས་པཎ་ཆེན་མཁན་པོ་གྲོས་ཚོགས་ཁང་ནས་བྱ་རྒོད་སྟོབས་ལྡན་དང་སྡེ་དགེ་ལྷ་སྲས་ཚེ་དབང་བདུད་འདུལ་བསླུ་ཁྲིད་བྱས་ཀྱང་རང་སར་བཞུགས་པས། པཎ་ཆེན་མཁན་པོ་གྲོས་ཚོགས་ཁང་གི་ཕྱོགས་རྒྱལ་ཁ་ཐོབ་རྗེས། ཁམས་པས་ཁམས་ཁུལ་གཅེས་སྐྱོང་བྱེད་རྒྱུའི་ཁྱབ་བསྒྲགས་དང་འབྲེལ་དཀར་མཛེས། ཉག་རོང་། བྲག་འགོ་སོགས་སུ་པཎ་ཆེན་མཁན་པོ་གྲོས་ཚོགས་ཁང་ནས་ཐད་ཀར་རྫོང་དཔོན་བསྐོས་ཀྱང་སྡེ་དགེར་ཇུས་གཏོགས་མ་ཐུབ། སྐབས་དེར་བྱ་རྒོད་སྟོབས་ལྡན་གོ་མིན་ཏང་གི་ལས་ཚན་པ་རྒྱུན་འཛིན་གནང་སྟེ་མཐའ་གཅིག་ཏུ་ནུབ་ཁམས་ཞིང་ཆེན་སྲིད་གཞུང་ལ་བློ་སེམས་དཀར། ཕྱི་ལོ༡༩༤༠ལོར། མཱ་པུའུ་སྤྱང་གིས་ཡང་སྟོང་དམག་གཅིག་སྡེ་དགེ་ཡིད་ལྷུང་དུ་བརྒྱབ། བྱ་རྒོད་སྟོབས་ལྡན་གྱིས་ཡར་ཞུ་བྱས་ནས་དཀར་མཛེས་ལ་བྲོས། མཱ་པུའུ་སྤྱང་ཕྱོགས་ཀྱིས་རྒྱུ་རྫས་བཅོམ་འཕྲོག་བྱས་ནས་ཕྱིར་ལོག །དེ་ནས་ཡུན་རིང་མ་སོང་བར་སྡེ་དགེ་རྒྱལ་པོས་བོད་དམག་དྲངས་ཏེ། མཱ་པུའུ་སྤྱང་གི་སྡེ་དགེར་སྡོད་དམག་དང་དམག་འཐབ་བྱས་མཐར། མཱའི་ཕྱོགས་ཀྱི་དམག་ཕམ། སྡེ་དགེ་རྒྱལ་པོའི་ཕོ་བྲང་ཚུར་ལོན་ནས་སྡེ་དགེ་རྒྱལ་པོ་སྐུ་འཁོར་བཅས་ཚུར་ཕེབས། བོད་དམག་དང་སྡེ་དགེའི་དམག་གཉིས་ཀྱིས་མཱའི་ཕྱོགས་ཀྱི་དམག་རྗེས་འདེད་དེ་འདན་ཁོག་ནས་ལོ་ཤུལ་ས་ཆར་གཡུལ་ངོ་བཀྱེས། མཱ་ཕྱོགས་ཀྱི་མདའ་དཔོན་གཅིག་བསད། ཕམ་ཉེས་འཁུར་ནས་ཕྱིར་མཚོ་སྔོན་དུ་ལོག །སྐམ་ཐོག་གྲོས་མཐུན་ཞེས་པའི་ཆིངས་ཡིག་ནང་ལྟར་བོད་དམག་ཕྱིར་འབྲི་ཆུ་ནུབ་རྒྱུད་དུ་ཆས། སྡེ་དགེ་རྒྱལ་པོས་མངའ་འོག་ཏུ་དབང་སྒྱུར་བྱེད་རྒྱུ་སླར་གསོ་བྱུང་བ་ན། བྱ་རྒོད་སྟོབས་ལྡན་ལ་དེ་བས་ཀྱང་སྡེ་དགེ་རྒྱལ་པོས་ཡིད་ཆེས་དང་བརྩི་མཐོང་ཆེན་པོ་བྱས། ཕྱི་ལོ་༡༩༤༤ལོར་བྱ་རྒོད་སྟོབས་ལྡན་སྐུ་སྒེར་དང་ཞེ་འཁོན་ཡོད་པའི་དཀར་མཛེས་ཨ་ཐུབ་ཐུའུ་སི་དང་ལུའུ་ལྦན་ཧུའུ་ཡུལ་དམག་གིས་ཡིང་ཀྲང་དབང་དགའ་བསད། ལུའུ་ལྦན་ཧུའུ་ཡིས་སྔོན་ཆུས་དྲུག་པའི་བདེ་འཇགས་སྲུང་སྐྱོབ་ཀྱི་སི་ལིང་ཅོང་ཀན་ཡུའུ་ལ་བྱ་རྒོད་སྟོབས་ལྡན་གསོད་དགོས་པའི་བཀའ་ཕབས་ཀྱང་སྡེ་དགེ་རྫོང་དཔོན་སྤྱན་ཁྲང་ཡོན་གྱིས་གསང་འཕྲིན་དང་སྲུང་སྐྱོབ་ཐོབ་པས་དོན་མ་འགྲུབ། དེ་ནས་བྱ་རྒོད་སྟོབས་ལྡན་སྤྱན་ཁྲང་ཡོན་གཉིས་འབྲེལ་ཟབ་ཐོག་ལུའུ་ཧུའུ་དང་མངོན་ལྐོག་ཏུ་འཐབ་རྩོད་དྲག་པོ་བྱས་ལ། ཕྱི་ལོ་༡༩༤༠ལོའི་ཟླ་བ་དང་པོར་སྡེ་དགེ་ཆོས་རྒྱལ་ཚེ་དབང་བདུད་འདུལ་སྐུ་གཤེགས། སྲས་ཨུ་དགའ་དགུང་ལོ་བཞི་ལས་མ་ལོན་པས་རྒྱལ་སྲིད་སྐྱོང་ཐབས་བྲལ་སྐབས། བྱ་རྒོད་སྟོབས་ལྡན་དང་། འོག་མ་ཕྱག་མཛོད་སོགས་ཀྱིས་སྡེ་དགེ་རྒྱལ་པོའི་མངའ་འོག་གི་དབུ་བླ་ཁག་ལྔའི་བསྟན་བདག་བླ་སྤྲུལ་དང་། མདུན་སྐོར་སུམ་ཅུ། ཧོར་འདྲ་བརྒྱད་ཅུ་བཅས་མི་གྲངས་བརྒྱ་ལྷག་ཙམ་གྱི་ཐ་ཚིག་ལྡན་པའི་དམ་བཅའི་ཚོགས་འདུ་འཚོགས། བྱ་རྒོད་སྟོབས་ལྡན་གྱིས་སྔོན་རང་ཕྱོགས་སུ་གཏོགས་པའི་བ་བའི་སྲས་སྐལ་བཟང་དབང་འདུས་ལྷ་ལྡན་དུ་ཡོད་པ་སྤྱན་དྲངས་ནས་རྒྱལ་སར་སྟོན་རྒྱུའི་གྲོས་འགོ་སྟོན་པར། རྒྱལ་པོའི་ཕྱོགས་དང་ལུའུ་ལྦན་ཧུའུ་ཡིས་ངོ་རྒོལ་བྱས། རྒྱལ་པོའི་ཕྱོགས་ཀྱིས་དཔལ་སྤུངས་སི་ཏུ་ཡིས་གནས་སྐབས་སྡེ་དགེའི་དབུ་འཛིན་གནང་རྒྱུའི་འདུན་པ་སྟོན་པར་བྱ་རྒོད་སྟོབས་ལྡན་ཕྱོགས་ཀྱིས་ངོ་རྒོལ་བྱས། མཐར་བཙུན་མོ་འཇམ་དབྱངས་དཔལ་མོས་རྒྱལ་པོའི་སྲིད་དབང་གནས་སྐབས་བཞེས་རྒྱུ་ཐག་བཅད་མཛད་དེ། ཚང་མས་འཇམ་དབྱངས་དཔལ་མོའི་བཀའ་ལ་ཉན་རྒྱུ་དང་། སྡེ་དགེ་རྒྱལ་པོར་བློ་དཀར་སེམས་དཀར་ཞུ་རྒྱུའི་དམ་བཅའ་བྱས་ནའང་། དབང་ཆ་དངོས་གཉེར་ཆེན་ཧོ་ཆོ་པད་རྡོར་དང་། འོག་མ་ཕྱག་མཛོད་སོགས་ཀྱིས་བཟུང་ནས་བྱ་རྒོད་སྟོབས་ལྡན་ཟུར་ཕུད་བྱས་པར་བརྟེན་ཕྱོགས་ཁག་གཉིས་ཀྱི་བར་གྱི་འགལ་བ་ཇེ་ཆེར་སོང་། མུ་འགོད།་་་་་་་
' རྩོམ་འོག་མ།
དཔལ་སྤུངས་དགོན་གྱི་ལོ་རྒྱུས།