སྡེ་དགེའི་རྒྱལ་རབས་མུ་ཏིག་ཕྲེང་བ། ༼བརྒྱད་པ།༽
སྡེ་དགེའི་རྒྱལ་རབས་མུ་ཏིག་ཕྲེང་བ། ༼ཚན་པ་བརྒྱད་པ།༽མཛད་པ་པོ་བར་མ་མཁན་པོ་ངེས་དོན།
༈ ངོར་མཁན་རབས་ཉེར་གཅིག་པའམ་ཉེར་གཉིས་པ་སྒྲུབ་ཁང་དཔལ་མཆོག་རྒྱལ་མཚན་ནི། རབ་བྱུང་བཅུ་པའི་ས་ཕག་ཕྱི་ལོ་༡༥༩༩ལོར་སྐུ་འཁྲུངས། སྐུ་ན་གཞོན་ནུ་ནས་ཁུ་བོ་དཔལ་ལྡན་དོན་གྲུབ་ཀྱི་དྲུང་དུ་བསྙེན། ཨེཝཾ་པའི་འདོན་ཆོས་སྤྱོད་གཞུང་ལུགས་ཆེན་པོ་རྣམས་བྱང་ཆུབ་པར་མཛད། ས་སྐྱ་པ་རྩེ་གདོང་ཁྲི་ཆེན་འཇམ་དབྱངས་ཀུན་དགའ་བསོད་ནམས་ཀྱིས་མཁན་པོ་དང་། མཁས་གྲུབ་དཔལ་ལྡན་དོན་གྲུབ་ཀྱིས་སློབ་དཔོན་མཛད་དེ་བསྙེན་པར་རྫོགས། མཁན་སློབ་དེ་དག་དང་། བྲང་ཏི་ནམ་མཁའ་སངས་རྒྱས། ཤར་ཆེན་ཤེས་རབ་འབྱུང་གནས་སོགས་ལས་ལམ་འབྲས་སོགས་ཟབ་རྒྱས་གདམས་པ་རྒྱ་མཚོ་ལྟ་བུ་གསན་། ལྷག་པའི་ལྷ་མང་པོའི་བསྙེན་སྒྲུབ་མཐར་ཕྱིན་པར་མཛད་ཅིང་བླ་མ་དང་ཆོས་སྲུང་ནོར་ལྷ་རྣམས་ཀྱིས་རྗེས་སུ་བཟུང་། མདོ་ཁམས་སུ་ཕེབས་ཚེ་ཁྲི་ཆེན་བླ་མ་བྱམས་པ་ཕུན་ཚོགས་ཀྱིས་ཚོགས་པ་མང་དུ་བསྡུས་ནས། མ་ཎ་ྀདུང་ཕྱུར་མང་པོ་བསགས་ནས་འདུག་པ་ལ་དེའི་ཚོགས་དབུར་ཕེབས། ལྷུན་གྲུབ་སྟེང་གི་ཆོས་གྲྭ་ཆེན་པོ་འདི་ཉིད་དུ་ངོར་ལུགས་དཀྱིལ་འཁོར་ལྔའམ་བདུན་དུ་གྲགས་པའི་སྒྲུབ་མཆོད་གསར་དུ་འཛུགས་པ་ལ་དབང་བཀའ་དང་ཕྱག་ལེན་དྲི་མ་མེད་པར་བསྐྱངས། བླ་ཆེན་བྱམས་པ་ཕུན་ཚོགས་ལ་མཁའ་འགྲོ་རྒྱ་མཚོའི་དབང་བཞི་བསྐུར་དུས་དཀྱིལ་འཁོར་ལ་འཇའ་ཚོན་ཟུག་པས་ངོ་མཚར་དུ་གྱུར། ཆོས་གྲྭ་ཆེན་པོ་འདི་ཉིད་དུ་ལམ་འབྲས་དང་། གཞན་རྒྱུད་སྡེའི་དབང་ཁྲིད་རྗེས་གནང་། ས་སྐྱ་བཀའ་འབུམ་ལུང་སོགས་ཀྱི་ཆོས་བཀའ་རྒྱ་ཆེར་སྤེལ། རབ་བྱུང་བསྙེན་རྫོགས་ཀྱི་སྡོམ་པ་ཚན་ཆེ་གནང་། གཙུག་ལག་བསམ་གྲུབ་མཐོང་གྲོལ་ཆེན་མོ་བཞེང་པ་ལ་ཐོག་མའི་ས་འདུལ་མཛད། ཟང་ཟིང་གི་དངོས་པོ་ཆར་ལྟར་བབས་པ་རྣམས་ཀྱང་ཆུད་ཟོས་སུ་མ་སོང་བར་ས་ངོར་དུ་རྗེ་གོང་མའི་དུས་ཇའི་རྒྱུན་དང་། ཕྱོགས་འདིའི་དགོན་སྡེ་ཆེ་ཕྲ་མང་པོ་ལ་དུས་ཇའི་རྒྱུན་བཙུགས། དགོན་འདི་ཉིད་དུ་བྱང་ཆུབ་ཆེན་པོའི་མཆོད་རྟེན་གསེར་ཁེབས་དང་བཅས་ཤིང་ཁྱོན་ཐོག་དཔང་བཅུ་གསུམ་ཙམ་ཁྱམས་ལྷ་ཁང་གིས་ཁོར་ཡུག་ཏུ་བསྐོར་བ་ཞིག་བཞེངས་ཏེ། རབ་ཏུ་གནས་པས་བྱིན་རླབས་ཀྱི་གཟི་འོད་འབར་བར་གྱུར། ཕྱིས་ས་གཡོས་ཆེན་པོ་བྱུང་སྟེ་རི་བྲག་ཕལ་ཆེར་ཡང་འཇིག་པ་བྱུང་སྐབས། རྗེ་འདིས་བཞེངས་པའི་མཆོད་རྟེན་དང་གཟིམས་ཆུང་སོགས་དང་། ཕྱག་ནས་ཡོད་པའི་གཙུག་ལག་ཁང་ལྷ་ཁང་བླ་བྲང་པའི་གཟིམས་ཁང་རྣམས་དང་བཅས་པ་ལ་སྐྱོན་མ་བྱུང་ཞེས་གྲགས། མདོ་ཁམས་སུ་བསྟན་འགྲོའི་དོན་རྒྱ་ཆེན་གྲུབ་ནས་སླར་ངོར་ཨེཝཾ་ཆོས་ལྡན་དུ་ཕེབས། དགུང་ལོ་རེ་དགུ་པར་ངོར་ཆེན་རྡོ་རྗེ་འཆང་གི་ཆོས་ཁྲི་ལ་ཞབས་པད་བཀོད་དེ། ལམ་འབྲས་ཚར་བཞི་སོགས་ཟབ་རྒྱས་ཆོས་སྒོ་བསམ་གྱིས་མི་ཁྱབ་པ་ཕྱེས། དགུང་ལོ་དོན་ལྔ་པ་ཆུ་གླང་ཕྱི་ལོ་༡༦༧༣ལོར་གཟུགས་སྐུའི་བཀོད་པ་བསྡུས། ༈ ངོར་མཁན་རབས་ཉེར་བཞི་པའམ་ཉེར་ལྔ་པ་འཇམ་མགོན་སངས་རྒྱས་ཕུན་ཚོགས་ནི། རབ་བྱུང་བཅུ་གཅིག་པའི་ས་གླང་ཕྱི་ལོ་༡༦༤༩ལོར་སྐུ་འཁྲུངས། ཆུང་ངུ་ནས་བྱིས་པའི་སྤྱོད་པ་ལས་འདས་ཏེ་དབང་བསྐུར་ཆོས་འཆད་སོགས་ཀྱི་སྤྱོད་པ་སྟོན། མཁས་བཙུན་ཀུན་དགའ་ལེགས་པ་ལས་རབ་ཏུ་བྱུང་། འཇམ་མགོན་དཔལ་མཆོག་རྒྱལ་མཚན་མཁན་པོ་དང་། འཇམ་དབྱངས་ནམ་མཁའ་དཔལ་བཟང་སློབ་དཔོན་མཛད་དེ་དགེ་འདུན་གྲངས་ཚང་བ་ལས་བསྙེན་པར་རྫོགས། མཁན་སློབ་དེ་དག་དང་། ངག་དབང་བསོད་ནམས་རྒྱལ་མཚན། མཚུངས་མེད་དམ་ཆོས་བསམ་གྲུབ་སོགས་མཁས་གྲུབ་དུ་མ་བསྟེན་ནས་མདོ་སྔགས་རྒྱ་མཚོ་ལྟ་བུ་དང་། སྒྲ་སྙན་ངག་སྡེབ་སྦྱོར། མངོན་བརྗོད་ཟློས་གར་སོགས་རིག་པའི་གནས་མཐའ་དག་ལ་སྦྱངས་པ་མཐར་ཕྱིན་པས་འགྲན་ཟླ་མེད་པའི་མཁས་པ་ཆེན་པོར་གྱུར། ཡི་དམ་ཆོས་སྐྱོང་དུ་མའི་བསྙེན་སྒྲུབ་མཐར་ཕྱིན་པར་མཛད། དགུང་ལོ་ཉེར་དྲུག་པར་ངོར་ཆེན་རྡོ་རྗེ་འཆང་གི་གདན་སའི་ཆོས་ཁྲི་ལ་ཞབས་པད་བཀོད་དེ། གསུང་ངག་ལམ་འབྲས་སོགས་ཟབ་རྒྱས་དམ་པའི་ཆོས་ཆར་ཕབས། སྐལ་ལྡན་དཔག་ཏུ་མེད་པ་རྗེས་སུ་བཟུང་བར་མཛད། སྔ་སོར་སྡེ་དགེ་བླ་མ་ཁུ་དབོན་རྣམས་ཀྱིས་ལོ་དགུ་ཙམ་ནས། འབོད་མི་དང་ཡོ་བྱད་ཡང་ཡང་བྱུང་ཀྱང་། སྦྱིན་བདག་གལ་ཆེ་རུང་དེ་སྐབས་རང་སེམས་ཀྱི་འཆར་སྒོར། ལོ་ཞེ་བདུན་ཚུན་ལ་འཆི་སྙམ་པའི་བློ་རྒོད་ཅིག་སྐྱེས་ནས་དེ་མཐུན་གྱི་གནས་ཚུལ་ཕུལ། དེ་ལྟར་བསམ་ནས་ལོ་དུ་མར་འཆི་བས་འཇིགས་པས་དགེ་སྦྱོར་གང་འོང་བྱས། སླར་ཡང་བླ་མ་ཚེ་དབང་རྡོ་རྗེ་རབ་ཏུ་བྱུང་བའི་མཚན་སངས་རྒྱས་དཔལ་བཟང་དུ་གྲགས་པས། འབྲས་སྤུངས་ནས་རྒྱལ་དབང་ཐམས་ཅད་མཁྱེན་པའི་བཀའ་ཤོག་ཞུས། གསེར་ལ་སོགས་པའི་དངོས་པོའི་བདོག་པ་གཏོས་ཆེ་བ་དང་བཅས། ཁྱོད་ཁམས་སུ་མི་འགྲོ་ན། ངེད་ཁམས་སུ་ལོག་རི་གསུངས། ནན་སྐྱེད་ཆེ་བར་བྱུང་བར། དཀོན་མཆོག་གི་དྲུང་དུ་བརྟག་བསྒྲིལ་བྱེད་ཞུས་པར། ཐོན་ན་ངེད་ཀྱི་བསམ་པ་འགྲུབ་ཀྱང་། གལ་ཏེ་མ་ཐོན་ན་ང་ནི་ཁམས་ལ་མི་འགྲོ་གསུངས། དེས་ན་ཁམས་པ་ཨུ་ཚུགས་ཆེ་ཟེར་བ་དེ་བདེན་པར་གདའོ་གསུངས། ཁམས་ཕྱོགས་སུ་ཕེབས་པར་ནན་ཆེར་ཞུས་པས་ཞལ་གྱིས་བཞེས་ཏེ་མདོ་ཁམས་སུ་ཆིབས་སྒྱུར་གནང་། སྡེ་དགེ་ནས་བསུ་བའི་བཀོད་པ་གཉེར་པ་རྣམ་རྒྱལ་གཙོས་རྐྱ་པ་བདུན་ཅུ་སྐོར་གྱིས་རྟ་དྲེལ་སོགས་ཡོ་བྱད་གྱ་ནོམ་པ་དང་བཅས་སླེབས། རྨ་རོང་བརྒྱུད་དེ་ཟིས་ཕུ་ལྷ་ལུང་དུ་ས་སྐྱོང་བླ་མ་བསོད་ནམས་ཕུན་ཚོགས་དང་མཇལ་ཞིང་ཤངས་ལེན་ཕུན་སུམ་ཚོགས་པ་སྩལ། རི་ཁྲོད་སྨིན་གྲོལ་གླིང་ནས་དར་མ་མདོར་ཐབ་བསུ་བྱུང་། ཆོས་ཁྲིར་ཟེར་བ་དེར་དངུལ་མདའ་དགོན་པའི་བླ་ཁག་རྣམས་དང་། ལྷ་ཁང་གྲྭ་ཚང་རྣམས་དང་བཅས་ཏེ་རྟ་བསུར་བྱོན། སྨིན་གྲོལ་གླིང་ནས་བསུ་བའི་བཀོད་པ་རྒྱ་ཆེན་པོ་དང་བཅས་ཏེ་སླེབས། གྲལ་ཚེས་བཅུ་དགུའི་རྒྱལ་ཕུར་འཛོམས་པའི་འགྲུབ་སྦྱོར་ཐོག །གྲུབ་པའི་དབང་ཕྱུག་བརྩོན་འགྲུས་བཟང་པོས་བཏབ་པའི་ཆོས་གྲྭ་ཆེན་པོ་ལྷུན་གྲུབ་སྟེང་གི་འདུས་པ་རྒྱ་མཚོའི་ཚོགས་ཀྱིས་སེར་ཕྲེང་གདུགས་དང་རྒྱལ་མཚན་ལ་སོགས་པ་རོལ་མོ་སྣ་ཚོགས་དང་། ཆོས་སྐྱོང་ལྕམ་དྲལ་གྱི་འཆམ་སྐུ་དང་བཅས་པས་བསུས་ཏེ་གཙུག་ལག་ཁང་ཆེན་མོར་ཁྲི་ཆེན་སངས་རྒྱས་བསྟན་པ་དང་མཇལ། ཐུགས་ཡིད་གཅིག་ཏུ་འདྲེས། ས་སྐྱོང་བླ་མས་གཙོས་ཆོས་གྲྭ་འདི་ཉིད་ཀྱི་དགེ་འདུན་འདུས་ཚོགས་ལ་ཀྱེ་རྡོར་བཀའ་བབས་བཞི། གསང་འདུས་མི་བསྐྱོད་པ་དང་འཇམ་རྡོར། བདེ་མཆོག་ལཱུ་ནག་དྲིལ་གསུམ། འཇིགས་བྱེད་དབང་ཁྲིད། མཁའ་སྤྱོད། དམར་པོ་སྐོར་གསུམ་སོགས་ཟབ་རྒྱས་དམ་པའི་ཆོས་ཀྱི་འཁོར་ལོ་བསྐོར། བདེ་མཆོག་མཁའ་འགྲོ་རྒྱ་མཚོའི་སྒྲུབ་མཆོད་དང་། མགོན་པོའི་དམར་ཆེན་གཏོར་བཟློག་གསར་དུ་འཛུགས་པ་ལ་ཕྱག་ལེན་གྱིས་གཏན་ལ་ཕབས། སྒྲིག་གཞི་ཕྱག་ལེན་ཤིན་ཏུ་དག་པར་བགྱིས། བརྒྱད་སྟོང་སུམ་འབིད་པར་དུ་བཀོད་པ་ལ་དཀར་ཆག་བསྔགས་བརྗོད་རྩོམ་པར་མཛད། དབོན་སྟོད། ཡེ་ན། ལྕགས་ར། དཔེ་ཝར། རྫོང་གསར། ཟིལ་ཕུ་རྣམས་སུ་ཕེབས་འགྲོ་དོན་རྒྱ་ཆེར་མཛད། ས་སྐྱོང་སྡེ་དགེའི་བླ་མ་ཁུ་དབོན་རྣམས་ཀྱིས་བརྒྱ་འབུལ་མང་པོ་དང་། གཞན་རྫོང་གཞིས་སོ་སོའི་གཉེར་པ་ལས་འཛིན་སོགས་སེར་སྐྱ་ཐམས་ཅད་ཀྱིས་འབུལ་བ་ཇི་སྙེད་བྱུང་བ་རྣམས་ཀྱང་སྐུ་གསུང་ཐུགས་རྟེན་བཞེངས་པ། ཆོས་སྡེ་རིས་མེད་ལ་མང་འགྱེད་བསྙེན་བཀུར་བ། ས་ངོར་སོགས་སུ་འབུལ་སྐྱེལ་མཛད་ཅིང་ཆུད་མ་ཟོས་པར་མཛད། ཕྱོགས་འདིའི་མངའ་ཞབས་ཀྱི་དགོན་སྡེ་རྣམས་སུ་སྔར་དགེ་འདུན་བཅུ་ཕྲག་ཙམ་འཚོགས་པ་ལའང་ལྔ་བརྒྱ་དང་། སྟོང་ཕྲག །ཉུང་བ་རྣམས་སུའང་བརྒྱ་ཕྲག་ལྷག་ཙམ་རེ་འཚོགས་པ་དང་། དེ་དག་སོ་སོར་ཆོས་གཞི་དང་འབུལ་བ་སོགས་རྒྱ་ཆེ་བའི་བསྙེན་བཀུར་མཛད། སྐབས་སུ་དབང་ལུང་ཁྲིད་རྒྱ་ཆེར་གནང་བས་སོ་སོར་རེ་འདོད་བསྐང་བ་དང་། རབ་བྱུང་སྟོང་ལ་ཉེ་བར་བསྒྲུབས། དགོན་པ་རྣམས་སུ་སྒྲུབ་མཆོད་དང་ཆོས་སྤྱོད་ཀྱི་རིགས་དུ་མ་གསར་དུ་བཙུགས། ས་སྐྱོང་བླ་མ་བསོད་ནམས་ཕུན་ཚོགས་ཀྱིས་ཐུབ་བསྟན་མཁན་ཆེན་བཟང་པོ་རྒྱལ་མཚན་གདན་དྲངས་པ་དང་ཐུགས་ཡིད་གཅིག་འདྲེས་སུ་གྱུར། ཕན་ཚུན་ཆོས་བཀའ་ཕར་ཕུལ་ཚུར་ཕུལ་མཛད། བཅའ་ཡིག་ལྷག་བསམ་རབ་དཀར་བཀོད་དེ་སྨིན་བྱེད་མ་ཐོབ་པར་ཆོ་ག་ལ་མི་འཇུག་པ་སོགས་ཕྱག་ལེན་རྣམ་པར་དག་པར་མཛད་དེ། དགོན་སྡེ་རྣམས་སུ་དགེ་འདུན་གྱི་ཚོགས་ལ་ཆང་འགྲིམས་པ་སོགས་རྒྱུན་བཅད་དེ་གཙང་ཁྲིམས་ཡང་དག་པ་ལ་གནས་པར་མཛད། མདོར་ན་ཁམས་སྡེ་དགེའི་ཕྱོགས་སུ་སངས་རྒྱས་ཀྱི་བསྟན་པ་དར་ཞིང་རྒྱས་པ་གྱུར་ཏོ་ཞེས་གྲགས་པ་ནི་རྗེ་འདི་ཡབ་སྲས་ཀྱི་བཀའ་དྲིན་ལས་བྱུང་བའོ། དེ་ལྟར་བསྟན་འགྲོའི་དོན་རྒྱ་ཆེར་མཛད་ནས་དགུང་ལོ་ང་དྲུག་པར་ཅུང་ཟད་བསྙུང་བའི་ཚུལ་གྱིས་དྲྭ་མ་སྒང་དུ་ལོ་གཅིག་ཙམ་བཞུགས། སླར་ལྷུན་གྲུབ་སྟེང་དུ་ཕེབས་ནས་དགུང་ལོ་ང་བདུན་པ་ཤིང་བྱ་ཕྱི་ལོ་༡༧༠༥ལོར་སྐུ་དངོས་ཀྱི་གདུལ་བྱ་རེ་ཞིག་རྫོགས་པར་གྱུར་ཏོ།། ༈ ངོར་མཁན་རབས་སུམ་ཅུ་པའམ་སོ་གཅིག་པ་མཁན་ཆེན་བཀྲ་ཤིས་ལྷུན་གྲུབ་ནི། རབ་བྱུང་བཅུ་གཅིག་པའི་ཆུ་བྱི་ཕྱི་ལོ༡༦༧༢ལོར་སྐུ་འཁྲུངས། ཡི་གེ་འབྲི་ཀློག་དང་ཆོས་སྤྱོད་ཀྱི་རིགས་སོགས་ཚེགས་མེད་དུ་མཁྱེན། དགུང་ལོ་ཉར་གསུམ་པ་ཤར་ཆེན་ཡེ་ཤེས་བཟང་པོས་མཁན་པོ་དང་། མཁས་གྲུབ་སངས་རྒྱས་ཕུན་ཚོགས་ཀྱིས་ལས་སློབ་མཛད་པའི་དགེ་འདུན་གྱི་དབུས་སུ་བསྙེན་པར་རྫོགས། དེ་ཕྱིན་ཆད་ཉེས་ལྟུང་ཕྲ་མོས་ཀྱང་མ་གོས་པར་མཛད། མཁན་སློབ་དེ་དག་དང་། ཤར་ཆེན་སངས་རྒྱས་བསྟན་འཛིན། བྱམས་པ་བསོད་ནམས་བཟང་པོ་སོགས་ཡོངས་འཛིན་དུ་མ་ལས་ཟབ་རྒྱས་དམ་པའི་ཆོས་ཀྱི་བདུད་རྩི་བཞེས། ཡི་དམ་མང་པོའི་བསྙེན་སྒྲུབ་དང་ཉམས་བཞེས་མཛད། དགུང་ལོ་ང་གཅིག་པར་ངོར་ཨེཝཾ་པའི་ཆོས་ཀྱི་ཁྲི་ལ་བཞུགས། ལམ་འབྲས་གཙོས་རྒྱུད་སྡེ་དུ་མའི་དབང་ཁྲིད་མན་ངག་དང་། རབ་བྱུང་བསྙེན་རྫོགས་ཀྱི་སྡོམ་པ་སྩལ་བ་བགྲང་ལས་འདས། གདན་ས་ལོ་བཞིར་བསྐྱངས་ནས་འཇམ་མགོན་ཚུལ་ཁྲིམས་ལྷུན་གྲུབ་ལ་གདན་རྩིས་སྤྲད་གནང་ནས་སྒྲུབ་ཁང་བླ་བྲང་དུ་ཟུར་དུ་བཞུགས་ནས་ཐུགས་དམ་ཆིག་སྒྲིལ་མཛད་བཞིན་ལ། ལུག་ལོའི་སྟོན་དེར་སྡེ་དགེའི་ས་སྐྱོང་བསྟན་པ་ཚེ་རིང་མཆོག་གིས་ལྗོངས་འདིར་འབྱོན་པའི་སྤྱན་འདྲེན་ལ་ཕྱག་ཚ་གཉེར་ཆེན་གུ་རུ་བཀྲ་ཤིས་དཔོན་གཡོག་རྣམས་འབྱོར་བྱུང་བ། ས་སྐྱོང་ཆེན་པོ་ཉིད་ནས་ཞུ་ཤོག་ནན་ཆེན་དང་། དངོས་པོའི་སྐྱེས་བཟང་བཅས་རྗེའི་དྲུང་དུ་སླེབས་པ་དང་། ལར་སྡེ་དགེ་ན་རང་རེ་ཆོས་སྡེ་ཡང་སྟོབས་ཆེ་བར་ཡོད། ཆོས་རྒྱུན་ཡང་གཙང་། དེ་དག་ན་མཁས་གྲུབ་ཀྱི་བླ་མ་ཡང་མང་དུ་བཞུགས་ཀྱང་། ས་སྐྱོང་རང་གི་ཐུགས་ཀྱི་གཏད་སོར་རྒྱལ་བ་རྡོ་རྗེ་འཆང་གི་བཞུགས་ཁྲིར་ཕེབས་པའི་མཁན་པོ་ཞིག་བླའི་མཆོད་གནས་སུ་བྱུང་ན་ཅི་མ་རུང་སྙམ་པའི་ཐུགས་བསམ་ཆུང་ངུ་ནས་ཡོད་པ་དང་། ད་ལམ་ཡོངས་འཛིན་དམ་པ་ཉིད་བསྟན་འགྲོ་སྤྱི་དང་ཁྱད་པར་ཡུལ་ཕྱོགས་དེའི་བསོད་ནམས་ཀྱི་ཞིང་ས་ཆེན་པོར་ཕེབས་ཐུབ་པ་ཞིག་ཅིས་ཀྱང་གནང་དགོས་ཞེས་གསོལ་བ་བཏབ་ཀྱང་ཞལ་བཞེས་མ་གནང་། དགུང་ལོ་ང་བདུན་ཕེབས་པ་ས་སྤྲེལ་ཕྱི་ལོ་༡༧༢༨ལོར་ཁམས་སུ་ཆིབས་ཁ་བསྒྱུར་ནས་བྱང་ལམ་བརྒྱུད་དེ་ཕེབས། ལམ་བར་རྣམས་སུ་བླ་དཔོན་དགོན་སྡེ་མི་དམངས་ཆེས་མང་བས་གུས་པས་བཏུད་ཅིང་འབུལ་ནོད་རྒྱ་ཆེན་ཕུལ། ཆིབས་བསུ་ལ་ལྷ་སྲས་བྱང་ཆུབ་སེམས་དཔའ་བསོད་ནམས་མགོན་པོ་ཉིད་འཁོར་ཉི་རྡུལ་གྱི་གྲངས་དང་ལྡན་པ། ས་ལ་སྤྱོད་པ་ཆེན་པོའི་ཆོས་དང་སྲིད་ཀྱི་ཕྲིན་ལས་ཀྱི་ཁ་ལོ་སྒྱུར་བ་ཆེན་པོ་འཕྲུལ་བློན་ཆེན་པོ་ཕུན་ཚོགས་རབ་བརྟན་གྱིས་གཙོས་དཔའ་མཛངས་བཀའི་ལས་བྱེད་རབ་འབྲིང་ཐ་གསུམ། སྐུ་ཞབས་གྲྭ་ཚང་། དཔལ་ས་སྐྱ་པའི་སྒར་པ་མདོ་སྔགས་རབ་འབྱམས་སྨྲ་བ་བཀྲ་ཤིས་ཡར་འཕེལ་དང་། བསམ་གཏན་རིན་པོ་ཆེ་རྣམ་གཉིས། གྲུབ་མཆོག་སངས་རྒྱས་བསྟན་པས་མཚོན་ངོར་པའི་བླ་མ་སྒར་ཁག་བཅས་ཀྱིས་ཕེབས་བསུ། མཇལ་དར། གདུགས། རྒྱལ་མཚན། རྒྱ་གླིང་བཅས་ཀྱི་སྔུན་བསུས་ཏེ་ཕེབས། ཕོ་བྲང་གི་སྟེང་ན་མཆོད་པའི་ཡོ་བྱད་བསམ་གྱིས་མི་ཁྱབ་པ་སྒྲེང་སྟེ། དགོན་དེའི་བླ་མ་དབུ་ཆོས་ཀྱི་གཙོ་མཛད། དགེ་འདུན་འདུས་པ་རྒྱ་མཚོ་དང་བཅས་པ་རྣམས་ཀྱིས་ཆོས་གོས་རྣམ་གསུམ་གསོལ་ནས་བསུ་བ་སེར་ཕྲེང་། བཀའ་སྲུང་རྣམས་ཀྱི་འཆམ་སྐུ་སྤྱན་དྲངས་པ། གདུགས་རྒྱལ་མཚན་བ་དན་འཕན་ཕྱེ་འཕུར་ལྡ་ལྡི་དར་ཆེན་རྟེན་ཁེབས་བདུག་སྤོས་དུང་དཀར་དུང་ཆེན་རྒྱ་གླིང་རྒྱ་རྔ་སྦུབས་ཆལ་ཕེག་རྡོབ་སིལ་སྙན་ལ་སོགས་མཆོད་པའི་ཡོ་བྱད་དང་། རོལ་མོའི་བྱེ་བྲག་གི་བཀོད་པ་བསམ་གྱིས་མི་ཁྱབ་པའི་མཆོད་སྤྲིན་རྒྱ་མཚོ་དང་བཅས་པས་བསུས་ཏེ། རྒྱལ་བ་ཀུན་གྱི་ཕྲིན་ལས་པ་ཆེན་པོ་གྲུབ་ཆེན་ཐང་སྟོང་རྒྱལ་པོས་བྱིན་གྱིས་བརླབས་པའི་གནས། སྡེ་བཞི་དགེ་བཅུའི་མངོན་པར་མཐོ་བའི་རྒྱལ་ཁབ་ཆེན་པོ། དཔལ་འབྱོར་དང་ལོངས་སྤྱོད་ཟད་མི་ཤེས་པའི་འབྱུང་ཁུངས། མཁས་ཤིང་གྲུབ་པ་བརྙེས་པའི་སྐྱེས་ཆེན་དམ་པ་རྣམས་ཀྱི་བསྟི་གནས། དཔལ་སྡེ་དགེ་ལྷུན་གྲུབ་སྟེང་གི་ཆོས་གྲྭ་ཆེན་པོ་ཕྱོགས་ཐམས་ཅད་ལས་རྣམ་པར་རྒྱལ་བའི་ཕོ་བྲང་ག་ལ་བ་དེར། ཟླ་བ་རྒྱུ་སྐར་གྱི་དབུས་ན་གསལ་བ་ལྟར་འཁོར་སློབས་འབངས་སའི་རྡུལ་དང་མཉམ་པ་ཙམ་གྱིས་ཡོངས་སུ་བསྐོར་ཏེ། སྤངས་རྟོགས་ཡོན་ཏན་གྱིས་མངོན་པར་མཐོ་བའི་འདྲེན་པ་དམ་པ་འདི་ཉིད་ལམ་བར་དུ་སྐུ་གསུང་ཐུགས་ལ་ཉེ་ཞོའི་དྲི་མས་མ་གོས་པར་གཟི་བརྗིད་དང་ལྡན་པར་ཕེབས་པ་ན། ཡང་སྲིད་དུ་མ་ནས་མཆོད་ཡོན་དུ་གྱུར་པའི་ལས་སྨོན་གྱི་མཐུ་དབང་བཙན་པོ་དང་ལྡན་པ། དཔལ་སྟོབས་ཀྱི་འཁོར་ལོས་སྒྱུར་བ་རྒྱལ་བ་ཉིད་ཀྱི་ལུང་གིས་དངོས་སུ་ཟིན་པ་སྤྲུལ་པའི་ཆོས་རྒྱལ་ཆེན་པོ་བསྟན་པ་ཚེ་རིང་ཞེས། སྙན་པའི་གྲགས་པས་ཕྱོགས་ཀུན་ཏུ་ཁྱབ་པའི་རོལ་མོ་མཁན་དེ་ཉིད་བློན་འབངས་ཀྱིས་བསྐོར་ནས། རྗེ་བཙུན་དམ་པ་འདི་ཉིད་དང་མཇལ་མ་ཁད་མོས་གུས་ཀྱི་ཤུགས་དྲག་པོ་རང་དབང་མེད་པར་འཁྲུངས་པས་སྐུ་གཟུགས་ཀྱིས་ཚུགས་མི་ཐུབ་པ་ལྟ་བུ་བྱུང་འདུག །ཆོས་རྒྱལ་དེའི་གསུངས་ལས་ངའི་ཉིན་མཚན་ཀུན་ཏུ་བསམས་པ་དེ་རིང་ནས་འགྲུབ་བྱུང་། དོ་ནུབ་ནས་བརྩམས་ཏེ་གཉིད་ཀྱང་ཁུགས་པར་ཡོད་ཅེས་དགྱེས་ཚོར་དཔག་ཏུ་མེད་པ་མཛད། ཟླ་བ་དགུ་པའི་ཡར་ཚེས་བཟང་པོ་ཉིན་གཙུག་ལག་ཁང་ཆེན་པོ་དེར་སྤྱན་དྲངས་ཏེ། སྤྲུལ་པའི་ཆོས་རྒྱལ་ཆེན་པོ་ཡབ་སྲས་ཀྱི་གཙོ་བོར་མཛད། རྫོང་སྒོ་ཁག་ས་ོསོའི་དཔོན་གཉེར་ལས་འཛིན། གྲུབ་མཐའ་རིས་སུ་མ་ཆད་པའི་དགོན་སྡེ་མངའ་འོག་ཏུ་གཏོགས་ཚད། དེ་དག་གི་བླ་མ། དབུ་ཆོས། སྤྱིའི་ལས་སྣ་འཛིན་ཚད། མི་སྡེ་སོགས་ལྷ་མི་འགྲོ་བ་ཡོངས་ཀྱི་མཆོད་སྡོང་ཆེན་པོར་མངའ་གསོལ་བའི་དགའ་སྟོན་གཏང་རག་ཞབས་བརྟན་ལེགས་འབུལ་དུ་ཆོས་རྒྱལ་ཆེན་པོ་ནས། སྐུ་གསུང་ཐུགས་ཀྱི་རྟེན་ངོ་མཚར་བ་རྣམས་ཀྱི་གཙོས། དངོས་པོ་ཟང་ཟིང་གི་འབུལ་བ་རི་ལྟར་སྤུངས་ནས། སྒོ་གསུམ་མི་ཕྱེད་པའི་མོས་གུས་ཀྱི་གདུང་ཤུགས་དྲག་པོ་གཡོས་པར་གྱུར་པ། སྔོན་ཆོས་ཀྱི་རྒྱལ་པོ་འཕགས་པ་རིན་པོ་ཆེ་དང་། གནམ་སའི་དཀྱིལ་འཁོར་ཡོངས་ལ་དབང་གིས་སྒྱུར་བའི་སྟོབས་ཀྱི་རྒྱལ་པོ་གོ་པེ་ལའི་སྣང་བརྙན་ས་འདིར་འཕོས་པ་ལྟ་བུའི་མཛད་པ་དང་ཕྲིན་ལས་ཀྱི་དཔེར་མཚོན་པ་ཞིག་གོ། ཆོས་རྒྱལ་ཡབ་སྲས་གཙོས་འདི་ཉིད་ཀྱི་བླ་གྲྭ་མང་ཚོགས་དང་ཕྱོགས་ཀྱི་དགོན་སྡེའི་གྲྭ་མང་ལ་ངོར་དཀྱིལ་བདུན་དང་། འཇིགས་བྱེད། སྦྱོང་དཀྱིལ་བཅུ་གཉིས། བདག་མེད་ལྷ་མོ་བཅོ་ལྔའི་དབང་བྱིན་རླབས་སོགས་བསམ་གྱིས་མི་ཁྱབ་པར་སྩལ། དགོན་སྡེ་འདི་ཉིད་ཀྱི་འཇིགས་བྱེད་དྲུག་ཅུ་པའི་གཏོར་བཟློག་དང་། ངོར་དཀྱིལ་བདུན་གྱི་སྒྲུབ་མཆོད་ཀྱི་ཚོགས་པའི་དབུར་བཞུགས་ཕེབས་ཏེ་མཆོག་གི་རྡོ་རྗེ་སློབ་དཔོན་ལོ་མང་དུ་མཛད། འདི་ནས་བརྩམ་སྟེ་ཚོགས་པ་བྱིན་ཆགས་ལ་ཐུགས་དམ་གྱི་སྒྲིགས་མཚམས་ལེགས་པ། རྡུལ་ཚོན་གྱི་རི་མོའི་བཅད་མཚམས་ལེགས་པ་བཀྲག་མདངས་ཕུན་སུམ་ཚོགས་པ་སོགས་ཕྱག་ལེན་གཙང་བདར་གྱི་ཞལ་ལུང་གིས་ཁྱབ་པས་བསྟན་རྒྱུན་རྣམ་དག་དང་མཐུན་པ་བྱུང་། གཙུག་ལག་ཁང་ཆེན་མོས་མཚོན་ལྷུན་སྒྲུབ་སྟེང་གི་སྐུ་གསུང་ཐུགས་རྟེན་བཞུགས་པའི་ལྷ་ཁང་ཡོད་དོ་ཅོག་ལ་ཟླ་བ་གཅིག་གི་བར་དུ་ཀྱེ་རྡོ་རྗེ་ལ་བརྟེན་བའི་རབ་གནས་ཀྱི་ཆོ་ག་རྒྱས་པར་མཛད་པས་ནམ་མཁའ་ནས་མེ་ཏོག་གི་ཆར་བབས་པ་སོགས་དགེ་ལེགས་ཀྱི་མཚན་མ་རབ་ཏུ་བརྙེས། རྒྱུན་གྱི་དུས་ཕལ་ཆེར་སྒྲུབ་ཁང་དཔལ་མཆོག་དང་། མཁན་ཆེན་སངས་རྒྱས་ཕུན་ཚོགས་ཀྱི་བཞུགས་གནས་ཕན་བདེ་བླ་བྲང་ཁང་དུ་སྐུ་མཚམས་བཅད་རྒྱ་གནང་སྟེ་ཐུགས་དམ་ཁོ་ན་ལ་གཅིག་སྒྲིལ་མཛད། སྐུ་ལས་ཚུལ་ཁྲིམས་ཀྱི་དྲི་བཟང་གིས་དགོན་པའི་གླིང་ཕྲག་ཐམས་ཅད་དུ་ཁྱབ་པ་བྱུང་། ལྷུན་གྲུབ་སྟེང་དགོན་པ་འདི་ཉིད་ཀྱི་བཅའ་ཡིག་ལྷག་བསམ་མཛེས་རྒྱན་བཀོད་དེ་བཅའ་ཁྲིམས་དམ་པར་མཛད། བདག་འཇམ་དགོན་སངས་རྒྱས་ཕུན་ཚོགས་ཀྱི་སློབ་མའི་ཐ་ཆུང་ཙམ་ལགས་པས་རང་རེ་མཆོད་ཡོན་རྣམས་ཀྱང་དམ་པ་དེའི་མཛད་ཕྲིན་གྱི་རྒྱུན་ཅི་ནུས་བསྐྱང་དགོས་ཞེས་གསུངས་པ་ལ་བརྟེན་ནས་ཆོས་རྒྱལ་ཆེན་པོས་ཀྱང་བཀའ་བཞིན་སྒྲུབ་པར་ཞལ་གྱིས་བཞེས་ཏེ། གཙུག་ལག་ཁང་གསར་དུ་བཞེངས་པ། དགེ་འདུན་གྱི་སྡེ་སྤེལ་བ། སྐུ་གསུང་ཐུགས་རྟེན་དཔག་ཏུ་མེད་པ་བཞེངས་པར་མཛད། ཁྱད་པར་ས་སྐྱོང་ཡབ་སྲས་ལ་ས་སྐྱ་གོང་མ་རྣམ་ལྔའི་བཀའ་འབུམ་དང་། བསྟན་བཅོས་འགྱུར་རོ་ཅོག་གི་སྤར་དུ་སྒྲུབ་པར་བསྐུལ་བ་ལ་བརྟེན་ནས་ཆོས་རྒྱལ་ཆེན་པོ་ཡབ་སྲས་ཀྱིས་དེ་བཞིན་བསྒྲུབས་པ་སོགས་བཀའ་དྲིན་བླ་ན་མ་མཆིས། སྐབས་འགར་ཆོས་སྡེ་དང་རྫོང་འགོ་སོ་སོ་ནས་སྤྱན་དྲངས་ཏེ་ཡུལ་དགོན་ཕལ་ཆེར་ཞབས་ཀྱིས་བཅགས་ཤིང་སེར་སྐྱ་རྣམས་ཆོས་ཀྱིས་ཚིམ་པར་མཛད། ཕྱག་ཏུ་བྱུང་བའི་དངོས་རྫས་ཕལ་ཆེར་འདི་ཕྱོགས་ཀྱི་དགོན་སྡེ་རིས་སུ་མ་ཆད་པ་རྣམས་ལ་ཆོས་གཞི་དང་འབུལ་འགྱེད་མཛད། ས་ངོར་རྩེ་སོགས་དབུས་གཙང་གི་དགོན་སྡེ་རྣམས་ལའང་མང་འགྱེད་དང་སྐུ་གསུང་ཐུགས་ཀྱི་རྟེན་བཞེངས་རྒྱ་ཆེར་གནང་། དེ་ལྟར་རྨད་དུ་བྱུང་བའི་མཛད་པ་དཔག་ཏུ་མེད་པས་རྒྱལ་བསྟན་རིན་པོ་ཆེ་ཕྱོགས་ཀུན་ཏུ་དར་ཞིང་རྒྱས་པར་མཛད་ནས་དགུང་ལོ་དྲུག་ཅུ་རེ་བརྒྱད་པ་ས་ལུག་ཕྱི་ལོ་༡༧༣༩ལོར་སྐུ་མྱ་ངན་ལས་འདས་པའི་ཚུལ་བསྟན། ༈ ཡར་ཀླུང་བཀྲ་ཤིས་ཆོས་སྡེའི་མཁན་ཆེན་གནས་གསར་བ་ངག་དབང་ཀུན་དགའ་ལེགས་པའི་འབྱུང་གནས་ནི། རབ་བྱུང་བཅུ་གཉིས་པའི་ཤིང་སྤྲེལ་ཕྱི་ལོ༡༧༠༤ལོར་ལྷ་རིགས་འ་ཞྭའི་རྒྱུད་དུ་སྐུ་འཁྲུངས། ལྗགས་ལ་ཨ་ཡིག་གི་རི་མོ་གསལ་བ་གཟུགས་མཛེས་ཤིང་སྤྱོད་ལམ་ཞི་བ། བློ་གསལ་ཞིང་སྙིང་རྗེ་ཆེ་བ་སོགས་དམ་པའི་སྤྱོད་ཚུལ་ལ་གནས་པ་ཞིག་ཡོད་ཅིང། ཡི་གེ་འབྲི་ཀློག་སོགས་བརྡ་བསྟན་པ་ཙམ་གྱིས་མཁྱེན་ཅིང་ཆོས་སྤྱོད་ཀྱི་རིགས་རྣམས་དཀའ་ཚེགས་མེད་པར་མཁྱེན། དགུང་ལོ་བརྒྱད་པར་གསང་ཆེན་སྨྲ་བའི་ཆོས་གྲྭ་ཆེན་པོ་བཀྲ་ཤིས་ཆོས་སྡེའི་གཙུག་ལག་ཁང་དུ་རྨོར་ཆེན་རྡོ་རྗེ་འཆང་ངག་དབང་ཀུན་དགའ་ལྷུན་གྲུབ་ཀྱི་དྲུང་དུ་དགེ་བསྙེན་གྱི་སྡོམ་པ་བཞེས། མཚན་ངག་དབང་ཀུན་དགའ་ལེགས་པའི་འབྱུང་གནས་ཞེས་གསོལ། ཕྱིས་སུའང་རྗེ་དེ་ལས་དགེ་ཚུལ་གྱི་སྡོམ་པ། ཁ་ཆེ་པཎ་ཆེན་གྱི་སྡོམ་རྒྱུན་ཆོས་རྗེ་ས་པཎ་ལས་བརྒྱུད་པའི་བསྙེན་རྫོགས་ཀྱི་སྡོམ་པ་བཞེས། སྔ་ཕྱིར་རྨོར་ཆེན་ཆོས་རྗེ་དེ་ཉིད་ལས་མདོ་རྒྱུད་རྒྱ་མཚོའི་དོན་གྱི་བཅུད་ཕྱུང་བ་གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་སྙན་བརྒྱུད་སློབ་བཤད་ཐུན་མོང་མ་ཡིན་པའི་སྨིན་གྲོལ་དང་། ཁའུ་བྲག་རྫོང་པའི་ཟབ་ཆོས་སྲུང་འཁོར་རྡ་ོརྗེ་བྲག་རྫོང་མ་ཕྱི་ནང་གསང་གསུམ། རྡོ་རྗེ་ཕྲེང་བའི་དབང་སོགས་ཟབ་རྒྱས་ཀྱི་གདམས་པ་རྒྱ་མཚོ་ལྟ་བུ་གསན། གཞན་ཡང་ས་སྐྱ་ངག་དབང་ཀུན་དགའ་བསོད་ནམས་དང་། མཁན་ཆེན་བཀྲ་ཤིས་ལྷུན་གྲུབ་སོགས་དམ་པ་དུ་མ་བསྟེན་ནས་གཞུང་ལུགས་གདམས་པའི་མཛོད་ཆེན་པོར་གྱུར། ལྷག་པའི་ལྷ་མང་པོའི་བསྙེན་སྒྲུབ་དང་ཉམས་ལེན་མཛད། བཀྲ་ཤིས་ཆོས་སྡེ་ན་བཞུགས་པའི་དབྱངས་གདངས་རོལ་མོ་གར་འཆམ་སོགས་ཀྱི་ཕྱག་ལེན་རྣམས་ཀྱང་བྱང་ཆུབ་པར་མཛད། སྙན་བརྒྱུད་རྒྱ་མཚོའི་གསང་བའི་མཛོད་འཛིན་མཁན་ཆེན་རྡོ་རྗེ་འཆང་གཞོན་ནུ་བློ་གྲོས་ཀྱི་གདན་སའི་ཁྲི་ལ་ཞབས་པད་བཀོད་དེ་འཁོར་ལོ་གསུམ་གྱི་སྒོ་ནས་ཕྲིན་ལས་ནམ་མཁའ་དང་མཉམ་པར་གྱུར། དགུང་ལོ་ཉེར་དྲུག་པ་ས་བྱ་ལོར་ཆོས་རྒྱལ་བསྟན་པ་ཚེ་རིང་མཆོག་གིས་ལྗོངས་འདིར་གདན་དྲངས་ཏེ། དེའང་ཞི་བ་ཞེས་པ་ས་བྱ་ལོར་སླར་ཡང་མདོ་ཁམས་ནས་སྡེ་དགེ་ས་སྐྱོང་བསྟན་པ་ཚེ་རིང་གིས། འདི་ཁར་སྒྲུབ་མཆོད་རྒྱས་པ་ཞིག་འཛུགས་རྩིས་ལ་ས་ལུགས་ཀྱི་བླ་མ་དུས་ཀྱི་འཁོར་ལོའི་དབང་ལུང་། ཆོ་ག་ཕྱག་ལེན། གར་ཐིག་དབྱངས་གསུམ་གྱི་རྒྱུན་ཁུངས་གཙང་ཡོད་ངེས་ཤིག་ཅིས་ཀྱང་དགོས་ཚུལ་རྒྱལ་ཡབ་སྐུ་ཞབས་སུ་ཞུ་བར་མཛད་པ་བཞིན། དེས་ཀྱང་ས་སྐྱོང་མི་དབང་ཆེན་པོར་སྙན་ཞུ་མཛད་པ་དང་ཕྱོགས་མཚུངས་སུ། གྲུབ་དབང་དམ་པ་སངས་རྒྱས་རྒྱ་མཚོའང་ཆེད་གཏད་ཀྱིས་དབུས་སུ་ཕེབས་ཏེ་ནན་ཏན་ཞུ་བར་མཛད་པས་ཧ་ལམ་ཞལ་གྱིས་བཞེས་ཤིང་ཕེབ་ལམ་ལམ་རྒྱུས་པ་ཁམས་པ་ཕྱུག་རྒྱལ་ཟེར་བ་ཞིག་ཀྱང་འཇོག་པར་མཛད། ཟླ་བ་དྲུག་པའི་ནང་དུ་མདོ་ཁམས་དགེ་བའི་ཡུལ་གྱི་རིས་གསུམ་གདུལ་བྱའི་ཚོགས་རྣམས་སྨིན་གྲོལ་ལ་འགོད་པའི་ཐུགས་བསྐྱེད་ཟླ་བ་གསར་པ་ལ་འགྲན་པ་བཞིན་དུ་ཆིབས་ཀྱི་ཁ་ལོ་བསྒྱུར་ཏེ། རིམ་བཞིན་དཔལ་འབར་དགོན་ནས་གདན་འདྲེན་དང་བསྙེན་བཀུར། ཆབ་མདོ་ནས་མགྲོན་གཉེར་ངོ་མ་མཇལ་ཁར་འབྱོར་ཏེ་དཀར་སྤྲོ་དང་ཟུར་གསོས་ཀྱང་རྒྱས་པར་ཕུལ། ལྷ་ཐོག་གཞུང་དུ་སྡེ་དགེའི་གཉེར་པ་དར་རྒྱས་དཔོན་གཡོག་ཉི་ཤུ་སྐོར་ཆིབས་སྔོན་པོ་བརྟན་བརླིང་འཛོམས་པ་གཅིག་དང་བཅས་ཕེབས་བསུར་འབྱོར། རི་མཐའ་རྫོང་ནས་དཔོན་གུ་རུས་ཆིབས་བསུ་དང་ཐབ་བསུ་རིང་ཐུང་སོགས་བཀུར་སྟི་ཕུན་སུམ་ཚོགས་པ་དང་བཅས་ཏེ་རྫོང་དུ་གདན་དྲངས་ཤིང་བསྙེན་བཀུར་འབུལ་ནོད་ཀྱང་རྒྱ་ཆེར་བསྟར། ཡེ་ན་རྫོང་དུ་དཔོན་དཔལ་ལྡན་གྱིས་ཀྱང་བསུ་བ་བསྙེན་བཀུར་སོགས་གོང་མཚུངས་བཅས་རིམ་བཞིན་ཕོ་བྲང་ཆེན་པོ་ལྷུན་གྲུབ་སྟེང་དུ་ཕྱག་ཕེབས། གཟའ་ཚེས་དུས་སྦྱོར་བཟང་པོར་ཕན་ཚུན་གཏོང་བའི་སྒོ་བརྒྱ་རྣམ་པར་ཕྱེ་བའི་ཟང་ཟིང་གི་ཚོགས་དང་། གསུང་གསང་གི་ནོར་བུ་རེ་རེ་ལས་ཀྱང་ལེགས་པར་བཤད་པའི་འདོད་རྒུ་འབུམ་དུ་འཛག་པའི་སྔོན་རབས་དམ་པའི་རྗེས་སུ་འབྲངས་བའི་ལེགས་བཤད་ཀྱི་སྐྱེས་བཟང་པོ་ཕུན་སུམ་ཚོགས་པ་དང་བཅས་ཏེ་ཕོ་བྲང་ཆེན་པོ་དངུལ་མདའ་སྟེང་དུ་མཆོད་ཡོན་མཇལ་འཕྲད་ཐོག་མར་མཛད་པས་སྔར་འདྲས་ཀྱི་མཛའ་བོ་འཕྲད་པ་བཞིན་དུ་དགྱེས་པ་རབ་ཀྱི་རྩེར་སོན་པས་གནས་སྐབས་དང་མཐར་ཐུག་གི་རྟེན་འབྲེལ་མཐའ་དག་རང་འགྲིགས་པས། རྒྱ་ཆེན་ཐུགས་བསྐྱེད་ཀྱི་མཐུ་ལས་ཉེ་བར་གྲུབ་པའི་འབྲས་བུ་གཟུགས་ཅན་བཞིན་དུ་གྱུར་ཏོ། །རྗེའི་བཀའ་ལས། ཆོས་རྒྱལ་འདི་རྗེ་བཙུན་གཡུ་ཐོག་པའི་སྤྲུལ་པ་ཡིན་ཟེར་བ་འདྲ་མོའང་ཡོད་དེ། ཟླ་བ་བཞི་པའི་ནང་མངའ་ཞབས་ཀྱི་འཚོ་བྱེད་མཁས་པ་རྣམས་བསྡུས་པའི་མགོར་ས་སྐྱོང་རང་ཡང་བྱོན་ནས་སྨན་སྦྱོར་ཕོན་ཤིན་ཏུ་ཆེ་བ་མཛད་དེ། སྨན་སྦྱིན་གནང་བསམ༼བས་སོ༽གསུངས། མཁན་ཆེན་བསོད་ནམས་བཟང་པོའི་བཀའ་ལས། ཀུན་གྱིས་འདི་ལ་བུ་རིན་པོ་ཆེ་དང་བུ་ཚང་སོགས་ཟེར་བས། འཇམ་དཔལ་རྩ་རྒྱུད་ལས། ཆུ་བོ་གསེར་ལྡན་འགྲམ་ལོགས་སུ། །རྒྱལ་པོ་གཞོན་ནུའི་མིང་ཅན་འབྱུང་། །ཞེས་པ་དེ་ཡིན་འདུག་གསུངས། ས་སྐྱོང་ཆོས་རྒྱལ་ཆེན་པོ་དཔོན་སློབ་རྣམས་ལ་ཐོག་མར་རྗེ་བཙུན་མ་ཡིད་བཞིན་འཁོར་ལོའི་རྗེས་སུ་གནང་བ་སྔོན་དུ་འགྲོ་བའི་ཟབ་ཆོས་རིགས་མང་པོ་དང་། དཔལ་དུས་ཀྱི་འཁོར་ལོ་རྭ་འབྲོ་གཉིས་ཀྱི་བརྒྱུད་པའི་ཆུ་བོ་གཉིས་འདྲེས་སུ་གྱུར་པ་མཁས་པའི་དབང་པོ་བུ་སྟོན་རིན་ཆེན་གྲུབ་ཀྱི་བཞེད་པ་ཕྱིན་ཅི་མ་ལོག་པའི་མངོན་རྟོགས་དང་། དཀྱིལ་མཆོག་ནག་འགྲོས་བཀླགས་ཆོག་གི་ཡི་གེ་དང་། བརྒྱུད་འདེབས་ཁ་སྐོང་སོགས་གསར་བསྒྲིགས་མཛད། དགོན་འདི་ཉིད་ཀྱི་གྲྭ་པ་རྣམས་ལ་དཔེ་ཆ་བློ་འཛིན་བྱེད་དགོས་ཀྱི་བཀའ་ཁྱབ་གནང་ནས། ཟླ་བ་གཉིས་ལྷག་ཙམ་ལ་བརྒྱུད་འདེབས་མངོན་དཀྱིལ་དང་བཅས་པ་བློ་ཐོག་ནས་ཕེར་བ་བདུན་ཅུ་ལྷག་བྱུང་བ་རྣམས་ལ་གདངས་དང་གར་ཐིག་རྣམས་སྦྱོང་བདར་མཛད། ས་སྐྱོང་ཆེན་པོས་ཀྱང་གར་གོས། པང་ཁེབས། རུས་རྒྱན། སྐྲ་ཞྭ། རྩེ་ཕྲན། ཕུར་པ། བུམ་པ་སོགས་ཉེར་མཁོའི་ཡོ་བྱད་ཚང་མ་རྒྱུད་དང་མཁས་པའི་དགོངས་པ་བཞིན་གསར་བསྒྲིགས་མཛད། ས་སྐྱོང་དཔོན་བློན་དང་། དགོན་པའི་དགེ་འདུན་རྣམས་ལ་དཔལ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་རྫོགས་ཀྱི་རྡུལ་ཚོན་གྱི་དཀྱིལ་འཁོར་དུ་བྱིས་པ་འཇུག་པའི་དབང་བདུན། གོང་མ་གོང་ཆེན་བདག་པོ་ཆེན་པོའི་དབང་དང་བཅས་རྒྱས་པར་མཛད། ལྕགས་ཁྱི་ལོའི་སྟོན་པས་དུས་ཀྱི་འཁོར་ལོ་འི་རྩ་རྒྱུད་སྟོང་ཕྲག་བཅུ་གཉིས་པ་གསུངས་པའི་དུས་ཆེན་ནག་པ་ཟླ་བའི་གཟའ་སྐར་དུས་ཚེས་བཟང་པོར་འཇམ་མགོན་གནས་གསར་བ་ཉིད་ལོངས་སྤྱོད་རྫོགས་སྐུའི་ཆས་ཀྱིས་བཀླུབས་ཏེ་གར་དཔོན་དུ་ཕེབས། ས་ཆོག་གི་གར་ཉམས་དགུའི་རོལ་པས་མཐོང་ཐོས་ཀྱི་སྐྱེ་བོ་རྣམས་དད་འདུན་ཆེས་ཆེར་འཕེལ། ཕུར་གདབ། སྟ་གོན། སྦྱིན་སྲེག་མཆོད་གར་དང་བཅས་སྒྲུབ་མཆོད་བདག་འཇུག་ཕྱག་ལེན་ཕྲ་མོ་ཚུན་ཆད་ཀྱང་མ་འཕྱུག་པར་འཛུགས་པར་མཛད། ས་སྐྱོང་ཆེན་པོས་ཀྱང་འཛུགས་སྟོན་དང་། རྒྱུན་གྱི་མང་འགྱེད་སོགས་ཀྱང་ཕལ་གྱི་བློར་མི་ཤོང་བ་ལྟ་བུའི་བསྙེན་བཀུར་རྒྱ་ཆེ་ལ་དངོས་གཙང་བར་བསྒྲུབས་པར་མཛད་དོ། ས་སྐྱོང་ཆོས་རྒྱལ་ཆེན་པོ་དེ་ཉིད་དབྱར་དབྱར་མཐོང་དང་། སྟོན་ཐོག་བསྡུ་བ་སོགས་ལ་རྫོང་འོག་ཉེ་སྐོར་རྣམས་སུ་ཕེབ་སྲོལ་ཡོད་པར། དེ་སྐབས་ཀྱང་འབྲལ་མེད་དུ་ཕེབས་ཏེ། སྒྲུབ་ཐབས་རྒྱ་མཚོ་སོགས་སྤྱི་བཀའ་དང་། ཟུར་བཀའི་དབང་བྱིན་རླབས་རྗེས་གནང་གི་རིགས་རྒྱུན་དུ་ཆག་མེད་ལྟ་བུར་འབུལ་བར་མཛད། ལོ་འདིའི་སྟོན་འཇུག་སྔ་ཕྱིར་འབུལ་ནོད་བྱུང་བ་རྣམས་ཡར་ཀླུང་བཀྲ་ཤིས་ཆོས་སྡེར་རྒྱུན་ཇའི་ཐེབས་སུ་གསེར་རྐྱང་མགུར་ཞོ་བརྒྱ། བཟང་ཇ་སྣ་ཚོགས་འཁོར་དྲུག་བརྒྱ་དང་བདུན་ཅུ། ཝ་ལྤགས་ལྔ་བཅུ་ང་བདུན། གླ་འཁོར་བཅུ་བདུན་སྐོར། རྩིས་རྟ་མི་ཐེ་བའི་རྟ་རྐྱང་ཉི་ཤུ་རྩ་ལྔ། མཛོ་བཞི་བཅུ་ཞེ་བཞི། དྲེའུ་བཅོ་ལྔ། ཁ་བཏགས། སྨན་ཚེ། ལིང་ཟམ་སོགས་སྣ་ཚོགས་ཕོན་ཆེ་བ་བཅས་རྩིས་སྤྲོད་གནང་སྟེ། ཕྱག་མཛོད་ལྷུན་གྲུབ་ཀུན་དགའ་དབུས་སུ་རྫོང་བདའ་མཛད། ཆུ་བྱི་ལོ་ལྷུན་གྲུབ་སྟེང་གི་ཇ་མཛོད་དུ་རྒྱལ་ཆེན་རྣམ་ཐོས་སྲས་ཀྱི་སྐུ་གསུངས་ཐུགས་དང་། ཕྱི་ནང་གསང་བའི་རྟེན་འཛུགས་ཀྱི་རིམ་པ་གཟབ་རྒྱས་སུ་མཛད། ས་སྐྱོང་དཔོན་སློབ་སོགས་ལ་རྣམ་སྲས་ལྔ་ཕྲག་གསུམ་པའི་རྗེས་གནང་རྒྱབ་རྟེན་གྱི་ལུང་དང་བཅས་པ། གསེར་ཆོས་དམར་པོ་སྐོར་གསུམ་གྱི་ཐུན་མོང་དང་ཐུན་མོང་མ་ཡིན་པའི་རྗེས་གནང་། རྗེ་བཙུན་རིག་བྱེད་དབང་མོའི་ཟབ་ཁྲིད་སྙན་བརྒྱུད་ཀྱིས་བརྒྱན་པ། དེ་གསུམ་ཀའི་བེའུ་བུམ་གྱི་ལུང་དང་བཅས་པ་སྩལ། སྐབས་འདིར་གནམ་བསྐོས་གོང་མ་བདག་པོ་ཆེན་པོ་ནས་སྡེ་དགེ་ཆོས་རྒྱལ་ལ་གསོལ་རས་སུ་མཛོད་དངུལ་རྟ་རྨིག་མ་ཉི་ཤུ། གོས་ཡུག་ཉི་ཤུ་སོགས་སྩལ་བ། དེའི་ཕུད་ལྟ་བུར་རྟ་རྨིག་མ་གཅིག་རྗེས་གནང་ཞིག་གི་སྐབས་འབུལ་བར་མཛད་དེ། རྣམ་སྲས་ཀྱི་རྟེན་འཛུགས་དང་། དམར་པོ་སྐོར་གསུམ་གྱི་ཆོས་སྐོར་སོགས་མཛད་པའི་མཐུ་ལས་ཁོ་བོ་ལ་རྒྱུས་མེད་དུ་གོང་མ་ཆེན་པོའི་གསོལ་རས་འདི་བཞིན་བྱུང་བས་དེའི་ཕུད་ཡིན་ཞེས་ཞུ་བར་མཛད། ཡང་ཕོ་བྲང་བཀྲ་ཤིས་ལྟེམས་སུ་ས་སྐྱོང་མཆོད་ཡོན་ལྷན་རྒྱས་ལ་རྣམ་ཐོས་སྲས་ལྔ་ཕྲག་གསུམ་གྱི་རྗེས་གནང་ལུང་བཅས་དང་། དམར་པོ་སྐོར་གསུམ་གྱི་སྐོར་ཡོངས་རྫོགས་ཀྱིས་མཚོན་པའི་ཟབ་ཆོས་བསམ་གྱི་མི་ཁྱབ་པ་ཞིག་འབུལ་བར་མཛད། ཆོས་ཀྱི་རྒྱལ་པོ་བསྟན་པ་ཚེ་རིང་དེ་ནི་དེང་སང་གི་དཔོན་སྐྱ་འགའ་ཞིག་ལྟར་བླ་མ་དང་ཟབ་ཆོས་ཁྱད་དུ་བསད་པའི་སྙན་བརྒྱུད་ཟབ་མོའི་ཆོས་ལ་འཕྲོག་ཐབས་ཀྱི་རྣམ་པ་ཡེ་མི་མཛད་པར་ཡུན་རིང་པོ་ནས་གསོལ་བ་འདེབས་པ་དང་། བླ་མས་ཞལ་གྱིས་བཞེས་ནས་ཀྱང་དགོངས་པ་དང་སྦྱར་བའི་ཚུལ་དུ་ཞུ་བ་དང་། ཕྱག་རྟེན་གྱི་དངོས་པོ་ཚུན་ཀྱང་མཆོག་གི་དངོས་གྲུབ་སྒྲུབ་བྱེད་དང་། གསེར་ཆོས་ཀྱི་རིགས་ལ་དངོས་པོ་གསེར་གྱིས་མཚོན་པའི་རིན་ཐང་ཅན་དང་། ཐུན་མོང་གི་རིགས་ལ་ལས་བཞིའི་དགོངས་པ་མཐུན་པའི་ཁ་དོག་དང་དབྱིབས་ཅན་གྱི་དངོས་པོ་འབུལ་བར་མཛད་པ་སོགས་རྟེན་འབྲེལ་གྱི་གནད་མཁྱེན་ཅིང་རྣམ་དབྱེ་ཕྱེད་པས་སྟོན་པ་དང་བསྟན་པ་ལ་ཐུགས་གཏིང་ནས་དད་པས་གནས་སྐབས་དང་མཐར་ཐུག་གི་རྟེན་འབྲེལ་ལ་རས་ཆོད་མི་མཛད་པའི་ཆོས་ཀྱི་རྒྱལ་པོ་མཚན་དང་དོན་མཐུན་པ་ཞིག་ཡོད་ཅེས་གསུངས། སྡེ་དགེ་ཆོས་ཀྱི་རྒྱལ་པོ་དེའང་ལུགས་གཉིས་གང་ལའང་ཐུགས་མཁྱེན་དཔྱོད་མཆོག་ཏུ་ཡངས་པར་མ་ཟད། འཁྲུལ་བྲལ་བསྟན་པའི་མངའ་བདག་རྗེ་བཙུན་ས་སྐྱ་པ་ཡབ་སྲས་བརྒྱུད་པ་དང་བཅས་པ་ལ་སྟོན་པ་དང་བསྟན་པ་གཞན་ནས་མི་འཚོལ་བའི་ཡིད་ཆེས་དང་། ལྷག་པར་སྐྱབས་མཆོག་རྡོ་རྗེ་འཆང་ཆེན་པོ་འདི་ཉིད་གསང་ཆེན་ཁའུ་བྲག་རྫོང་པའི་ཟབ་ཆོས་སྤྱི་དང་། ཁྱད་པར་ཆོས་སྐྱོང་ཆེ་ཆུང་གི་སྐོར་སོགས་དབང་ལུང་མན་ངག་དང་བཅས་པ་རང་གཞན་གྱི་གྲུབ་མཐའ་སྤྱི་དང་། བྱེ་བྲག་བླ་ཆེན་དྲེགས་ལྡན་དག་གིས་སྤྱོད་ཡུལ་དུ་མ་གྱུར་པའི་ཟབ་མོ་སྙན་བརྒྱུད་ཀྱི་སྐོར་ལ་གཞན་དྲིང་མི་འཇོག་པའི་བསྟན་པའི་མངའ་བདག་ཆེན་པོར་ཐུགས་ངེས་འདྲོངས་པའི་ཡིད་ཆེས་བཟློག་ཏུ་མེད་པར་བརྟེན། ཤར་མགོན་ཁང་བདུད་དཔུང་ཟིལ་གནོན་རྟེན་དང་བརྟེན་པར་བཅས་གསར་བསྐྲུན་སྐབས་མི་དབང་ཆེན་པོས་བཀས་བསྐུལ་བ་བཞིན་ཞལ་གྱིས་བཞེས་ཏེ། ཐུན་མོང་དང་ཐུན་མོང་མ་ཡིན་པའི་གཟུངས་སྔགས་སོགས་རིང་བསྲེལ་རྣམ་བཞི། རྟེན་གྱི་འཁོར་ལོ། ཐུགས་རྟེན་གནམ་ལྕགས་རྡོ་རྗེ། གསང་རྟེན་གྲི་ལྕགས་ཀྱི་གྭའུ་སོགས་ཉེར་མཁོའི་ཡོ་བྱད་རྣམས་ཀྱང་སྟ་གོན་གྱིས་ལྗགས་བསྙེན་ཁ་གསོ་གནང་བ་དང་། བཟོ་བོ་རྣམས་ལ་རྒྱུ་དབང་། མགོན་པོ་ཆེ་ཆུང་གི་རྗེས་གནང་སོགས་གནང་། ཕྲིན་བཅོལ་བསྐང་བ་ནན་ཏན་མཛད། རྒྱ་བོད་ཀྱི་གནས་ཆེན་དུ་མའི་ས་སྣ། རྡོ་སྣ། རིན་པོ་ཆེ། འབྲུ་སྣ། སྨན་སྣ། དམ་རྫས་ཁྱད་པར་ཅན་དུ་མ་འདྲེས་པའི་འཇིམ་པ་ལ་བྱིན་རླབས་དང་། བཟོ་བོ་རྣམས་ལ་སྦྱོང་ཁྲུས། ལས་ཐམས་ཅད་པའི་ཁྲོ་བོ་བསྐྱེད་བསྟིམ་གྱིས་རྒྱུན་བསྙེན་དང་། ལག་ཆ་བྱིན་གྱིས་རླབས་པ་སོགས་སྔོན་དུ་འགྲོ་བས། ཆུ་གླང་ལོའི་གླང་ཟླའི་མིག་དབྱུག་གི་གཟའ་སྐར་བྱེད་སྦྱོར་ཕུན་སུམ་ཚོགས་པའི་ཉིན་རུ་ཤིང་འཛུགས་པར་མཛད་དེ། རྡོ་རྗེ་ནག་པོ་ཆེན་པོ་གུར་གྱི་མགོན་པོ་ལྷ་བརྒྱད། དཔལ་མགོན་བྲམ་གཟུགས། བེཀྩེ་ལྕམ་སྲིང་གསུམ། ནོར་སྐྱོང་དུར་ཁྲོད་ཡབ་ཡུམ། འཆི་བདག་ལས་ཀྱི་གཤིན་རྗེ། ཕུར་སྲུང་དཀར་བདུད་ལྕམ་བྲལ། རུ་འདྲེན་སྡེ་བཞི་རྣམས་ཀྱི་ལྡེར་སྐུ་ཁྱད་དུ་འཕགས་པར་བསྒྲུབ་པའི་བཀའ་བཀོད་དང་། སྦྱོང་བ་བགེགས་སྐྲོད་ཀྱང་ཡང་ཡང་མཛད་ཅིང་། གཟུངས་གཞུག་གི་རིམ་པ་ཐུན་མོང་དང་ཐུན་མོང་མ་ཡིན་པ་ཞབས་འོག་གི་ལིངྒས་མཐའ་བརྟེན་པ་རྣམས་གོང་མའི་ཡི་གེ་དང་། བདག་ཆེན་རྡོ་རྗེ་འཆང་ཡབ་སྲས་བརྒྱུད་པ་དང་བཅས་པའི་གསུང་སྒྲོས་ལས་ཇི་ལྟར་བྱུང་བ་བཞིན་ནན་ཏན་མཛད། ཚར་ཆེན་རྡོ་རྗེ་འཆང་གིས། དྲུག་ལྡན་རྟེན་གྱི་ཚོགས་རྣམས་ལེགས་བཤམས་ཏེ། །རྣམ་གསུམ་དམར་ཆེན་གཏོར་མས་ཕྱུར་བུ་གཏམས། ཞེས་གསུངས་པ་ལྟར། ཆོས་སྐྱོང་བའི་སྲུང་མའི་དབང་པོ་རྣམས་འགོ་ཞིང་ཆགས་པར་བྱེད་པའི་ཐབས་མཆོག་སྐུ་གསུང་ཐུགས་དང་། ཕྱི་ནང་གསང་གསུམ་སོགས་ཀྱི་རྟེན་ཡོངས་སུ་རྫོགས་པ་རྒྱུ་ཚད་ཚང་ཞིང་ཕུན་སུམ་ཚོགས་པ་རྣམས་ལ་སྒྲུབ་པ་དང་། རྣམ་གསུམ་གཏོར་མའི་ཚོགས་ཀྱང་གོང་མའི་ཡི་གེ་དང་། མན་ངག་ལས་བྱུང་བ་བཞིན་གཏོར་སྒྲུབ་དང་བཅས་རྒྱས་པར་མཛད། རྟེན་དང་བརྟེན་པར་བཅས་ལ་ཐུན་མོང་བ་བཟང་པོ་དྲུག་ལྡན་གྱི་རབ་གནས་དང་། ཐུན་མོང་མ་ཡིན་པ་རབ་གནས་ཞག་བདུན་མའི་ཕྱག་ལེན་འཁྲུལ་མེད་མཛད་ཅིང་། རྡོ་རྗེ་ནག་པོ་ཆེན་པོ་གུར་གྱི་མགོན་པོ་བཀའ་སྡོད་དང་བཅས་པའི་གཏོར་བསྔོ་བསྐང་བཤགས་དྲག་པོའི་གཏོར་བཟློག་ཆོས་ཉིད་མ་ཞེས་གྲགས་པ་ཚར་ལུགས་ཐུན་མོང་མ་ཡིན་པའི་ཕྱག་ལེན་གྱི་རྒྱུན་བཙུགས། ས་སྐྱོང་ཡབ་སྲས་སོགས་སྐལ་ལྡན་འདུས་པའི་ཚོགས་ལ་རྡོ་རྗེ་ཕྲེང་བའི་དབང་། སྒྲུབ་ཐབས་རྒྱ་མཚོ་སོགས་ཟབ་ཆོས་དཔག་ཏུ་མེད་པ་བསྩལ་ཏེ་བཀའ་དྲིན་ཆེན་པོས་ཁྱབ་པར་མཛད། འདི་ལོ་ཡོན་བདག་ཆེན་པོ་དཔོན་བློན་གྱི་དགོངས་བཞེད་ལྟར་བུམ་གཏེར་མང་དུ་བསྒྲུབས་པར་མཛད་དེ། རྫོང་སྒོ་ཁག་ལ་འགྱེད་པར་མཛད་པས་ལོ་ཏོག་ཕུན་སུམ་ཚོགས་པར་བྱུང་བས། དཔོན་འབངས་ཀུན་དགའ་འགུ་ཡི་རང་གི་ས་ལ་འགོད་པར་མཛད། དེ་ནས་རེ་ཞིག་ས་སྐྱོང་ཆོས་ཀྱི་རྒྱལ་པོ་བློན་འབངས་དང་བཅས་པའི་ཐུགས་དགོངས་དེ་ཙམ་གྱིས་རྫོགས་པར་མཛད་ནས། དབུས་ལྗོངས་ཆོལ་ཁའི་ཕྱོགས་སུ་ཆིབས་ཀྱི་ཁ་ལོ་བསྒྱུར་བ་ན། མཆོད་ཡོན་ལྷན་རྒྱས་ཕོ་བྲང་ཆེན་པོ་ལྷུན་གྲུབ་སྟེང་ནས་ཆིབས་བསྐྱོད་དེ། ས་སྐྱོང་ཆེན་པོ་དེ་ནི་ཡང་སྲིད་མང་པོར་ཡོན་གྱི་གནས་དམ་པ་རྣམས་བསུ་བ་དང་བསྐྱེལ་བ་སོགས་ལ་མངོན་པར་གོམས་པའི་ཤུགས་ལས། རྒྱལ་ཐབས་ཀྱི་སྙེམས་པ་ཡོངས་སུ་བཏང་སྟེ། རྒྱལ་བློན་འབངས་དང་བཅས་པ་རྣམས་ཀྱིས་སྲི་ཞུ་ཆེན་པོས་འབྲི་ཆུའི་བར་སྐྱེལ་ཐུང་མཛད། ས་སྐྱོང་མཆོག་ནས་སླར་ཡང་ཧ་ཅང་མི་རིང་བ་ཉིད་དུ་ལྗོངས་འདིའི་སྐྱེ་རྒུ་རྣམས་ཀྱི་བསོད་ནམས་ཀྱི་མགྲོན་དུ་འབྱོན་པར་མཛོད་ཅིག་ཅེས་ཞུ་བར་མཛད་པས། ཡུལ་དུས་ཀྱི་སྐལ་བར་མ་གྱུར་ན་དེ་བཞིན་དུ་བྱའོ་ཞེས་ཞལ་གྱིས་འཆེས་ནས་བསྲུང་བ་དང་ཤིས་པ་བརྗོད་པར་མཛད་དེ་ཡུལ་དབུས་ཕྱོགས་སུ་ཕེབས་སོ། །སླར་ཡང་སྡེ་དགེ་ནས་མི་དབང་ཆེན་པོར་ཡང་སྐྱབས་མགོན་འདི་ཉིད་ཁམས་སུ་ཕེབ་དགོས་ཀྱི་བཀའ་ཁྱབ་དང་། མགོ་འདྲེན་རྣམས་ཀྱང་བརྩེ་གཟིགས་དགོས་ཚུལ་ནན་ཏན་ཞུ་བར་མཛད་པས། མི་དབང་ཆེན་པོ་ནས་ཀྱང་ཅིས་ཀྱང་མདོ་ཁམས་སུ་ཕེབ་དགོས་ཀྱི་བཀའ་གནང་བ་ལྟར་ཟླ་བ་དྲུག་པའི་ཉེར་དགུ་གཟའ་ཚེས་ཕུན་སུམ་ཚོགས་པའི་ཉིན་སེར་སྐྱ་མཆོག་དམན་མང་པོས་མདུན་བདར་ཏེ། སླར་ཡང་མདོ་སྨད་ཕྱོགས་ཀྱི་བསྟན་འགྲོའི་དོན་ཆེན་སྒྲུབ་པའི་ཐུགས་བསྐྱེད་རྨད་དུ་བྱུང་བས་ཆིབས་ཀྱི་ཁ་ལོ་བསྒྱུར། གོང་ས་མཆོད་ཡོན་གྱི་མཇལ་ཕྱག་སོགས་མཛད། མི་དབང་ནས་སྡེ་དགེ་བསྟན་པ་ཚེ་རིང་དང་ངེད་གཉིས་མ་མཐོང་བའི་གྲོགས་པོ་བྱས་ཤིང་། ངེད་ཕོ་ལྷ་ཐའི་ཇིའི་བྱ་བ་ལ་ཡིན་པར་འཛིན་པ་བསྟན་པ་ཚེ་རིང་མ་གཏོགས་མ་བྱུང་བས་སྙིང་ཉེ་གཤིས་བླ་མ་ཁམས་ནས་ཕེབས་འཕྲལ་ལ་ཡང་བསྐྱར་ཕེབས་དགོས་ཨུ་ཚུགས་ཞུས་པས་ཐུགས་མི་མཉེས་པ་བྱུང་མེད་དམ་ཞེས་གསུངས་པར། དམ་པ་དེ་ཉིད་ཀྱི་ཁོ་བོ་ལ་བསམ་རྒྱུ་བསྟན་འགྲོའི་དོན་ལས་མེད་གཤིས་སྡེ་དགོན་འདི་ཚོ་ཉམས་ཉེས་ཀྱི་དོགས་པ་ཙམ་ལས། གཞན་མ་འགྲོ་དོན་འཕྲིན་ལས་སྐྱོང་བར་འགྲོ་རྒྱུར་མི་དགའ་བ་ག་ལ་འོང་ཞེས་ཞུ་བར་གནང་བར། དགོན་པ་རྣམས་ནས་གནས་ཚུལ་རྒྱུ་མཚན་བྱུང་ཕྱིན་མགོ་འདྲེན་ཡང་དག་བྱེད་ཅེས་ཞལ་གྱིས་བཞེས་ཤིང་། ད་ལམ་བཀའ་ཤོག་ཀྱང་ཤེལ་བམ་རང་འབུལ་གསུངས་ནས་གནང་ཞིང་། མཇུག་ཏུའང་མགོ་འདྲེན་ཡང་དག་གནང་འདུག །ཁྲོ་བོ་ཐང་དུ་ཕེབས་བསུ་བ་གཉེར་ཆེན་ལྷ་བུ་ཚེ་རིང་དཔོན་གཡོག་ཆིབས་རྐྱང་པོ་ཤིན་ཏུ་བཟང་བ་དང་བཅས་པར་འབྱོར། དེ་ནས་སྡེ་དགེའི་བཀའ་བཞིན་འབྲི་ཆུ་རྒྱུད་དུ་དུང་མཐའ་དགོན་གྱི་ལྷ་ཁང་གསར་བཞེངས་ལ་རབ་ཏུ་གནས་པ་རྒྱས་པར་མཛད་དེ། ས་སྐྱོང་ཆེན་པོས་བསུ་བའི་བཀོད་པ་ཕུན་སུམ་ཚོགས་པ་དང་བཅས་ཏེ་ལུགས་གཉིས་མདུན་ས་ཕོ་བྲང་ཆེན་པོ་དངུལ་མདའ་ལྷུན་གྲུབ་སྟེང་དུ་ཕྱག་ཕེབས། དེ་ཉིན་རང་ཆོས་རྒྱལ་ཆེན་པོ་དེ་ཉིད་དང་མཇལ་འཕྲད་མཛད་དེ། རྒྱལ་ཡུམ་རྡོ་རྗེ་བཙུན་མོའི་སྣང་བརྙན་ལི་མ་ཁྱད་འཕགས་དང་། ཞལ་དཀར། ཁྲི་རྡོ། ཡུལ་བབས་དང་མཐུན་པའི་སྣམ་ཐེར་སོགས་ལེགས་མཇལ་འབུལ་ནོད་རྒྱས་པར་མཛད་དེ། ཆོས་རྒྱལ་དེ་ཉིད་ཐུགས་དགྱེས་པའི་རྩེར་སོན་ནོ། །ས་སྐྱོང་མཆོག་ནས་ཀྱང་ཕེབས་ལམ་དུ་བདེ་བར་ཕེབས་པའི་ལེགས་འབུལ་རྒྱས་ཤིང་སྤུས་དག་པར་མཛད། སྡེ་དགེ་ཆོས་རྒྱལ་དེ་ཉིད་སྔོན་གྱི་བག་ཆགས་སད་པ་ལྟ་བུའི་རྡོ་རྗེ་འཇིགས་བྱེད་རྭ་ལུགས་ཐུན་མོང་མ་ཡིན་པ་འདིའི་སྙན་པས་ཐུགས་འཕྲོགས་ཏེ་གྲྭ་ཚང་ལ་ཆོག་གྲྭ་འཛུགས་པ་དང་། སྡེ་དགེ་ཉིད་ནས་ཀྱང་བཀའ་དབང་གསན་པའི་སྟ་གོན་གྱི་ནུབ་ས་སྐྱོང་ཆེན་པོའི་མནལ་ལམ་དུ་མ་ཧེ་འདྲ་བའི་སེམས་ཅན་ཞིག་གིས་རྒྱབ་ཏུ་ཁྱེར་ནས་འདམ་རྫབ་མང་པོ་བརྒལ་ཏེ་ནེའུ་གསེང་མེ་ཏོག་དང་བཅས་པའི་གནས་ཤིག་ཏུ་ཕེབས་པའི་མནལ་ལྟས་ཀྱིས་ཐུགས་དད་ཆེར་གཡོས་ཏེ་དབང་བརྒྱ་གསན་བཞེད་བཅས་ལ་དེ་ཁའི་སྙན་གསན་གནང་བ་བཞིན་ཞལ་གྱིས་བཞེས་ཤིང་། འཇིགས་བྱེད་དབང་བརྒྱ་འཛུགས་པ་གནང་སྟེ། འདི་ལོ་ལྔ་བཅུ་ཙམ་རྫོགས་མཚམས་སུ། སྦྲུལ་ལོའི་མགོ་ནས་བཟུང་ས་སྐྱོང་ཆེན་པོས་ཙནྡ་དཀར་དམར་ལས་གྲུབ་པའི་བདེ་བར་གཤེགས་པའི་མཆོད་རྟེན་བརྒྱད་དཔངས་ཚད་ཐོག་སོ་ཕྱེད་གཉིས་ཙམ་ཤིན་ཏུ་སྤུས་གཙང་བ་བཞེངས་པར་མཛད་པའི་གཟུངས་དང་བཟོ་བཀོད་སོགས་དང་། བར་རྣམས་སུ་དཔོན་བློན་སོ་སོའི་དགོངས་བཞེད་ལྟར་ཆོས་བཀའ་ཡང་མང་དུ་འབུལ་བར་མཛད། བཟོ་རྣམས་ཕལ་ཆེར་གྲུབ་ནས་ཟླ་བ་དྲུག་པའི་ཚེས་བཞི་ལ་ས་ཆོག་དང་། བདུན་ནས་གཟུངས་འབུལ་གྱི་དབུ་འཛུགས་པ་གནང་སྟེ། དྲི་མེད་རྣམ་གཉིས་ཀྱི་སྒྲུབ་མཆོད་ཤིན་ཏུ་རྒྱས་པ་དང་། གཟུངས་འབུལ་གྱི་རིམ་པ་རྣམས་སྐྱབས་མགོན་མཆོག་ཁོ་ནས་སྐུ་ངལ་དུབ་ཁྱད་དུ་བསད་དེ་འབུལ་ཚུལ་གོ་རིམ་མ་འཁྲུགས་ཤིང་ཕྱག་འཚགས་དམ་པ་སོགས་དང་། རྡོ་དཀར་སོགས་བརྒྱུད་ལྡན་གོང་མའི་ཕྱག་བཞེས་ཕྲ་མོ་ཚུན་ཆད་ཀྱང་མ་ཉམས་པར་ཕྱིས་ཀྱི་མིག་ལྟོས་ལ་ཕན་ངེས་ཤེས་པ་མཛད་པས། ཆོས་ཀྱི་རྒྱལ་པོ་དེ་ཉིད་ནི་དབང་རྣོན་ཆོས་རྗེས་འབྲང་བ་ལས་ཅལ་སྒྲོག་གི་བརྟུལ་ཞུགས་མི་འཛིན་པས་བྱས་པ་དོན་ལྡན་དུ་སོང་ཞེས་ཐུགས་ཤིན་ཏུ་ཚིམ་པར་གྱུར་ཏོ། །སྟོན་འཇུག་ནས་བཟུང་འཇིགས་བྱེད་དབང་བརྒྱའི་འཕྲོས་དང་། ཚེ་དཔག་དབང་བརྒྱ་སོགས་འབུལ་བ་མཛད་དོ། དེ་ནས་དབུས་ཕྱོགས་སུ་ཕེབས་ནས་བསྟན་འགྲོའི་དོན་བསམ་གྱིས་མི་ཁྱབ་པར་མཛད་དེ། དགུང་ལོ་ང་བདུན་བཞེས་པ་ལྕགས་འབྲུག་ཕྱི་ལོ༡༧༦༠ལོར་དགོངས་པ་ཆོས་ཀྱི་དབྱིངས་སུ་སྙོམས་པར་ཞུགས་པའི་ཚུལ་བསྟན་ཏོ།། ༈ ངོར་མཁན་རབས་སུམ་ཅུ་སོ་གསུམ་པའམ་སོ་བཞི་པ་མཁན་ཆེན་དཔལ་ལྡན་ཆོས་སྐྱོང་ནི། རབ་བྱུང་བཅུ་གཉིས་པའི་ཆུ་རྟ་ཕྱི་ལོ་༡༧༠༢ལོར་སྐུ་འཁྲུངས། དགུང་ལོ་བདུན་པར་མཁན་པོ་བྱམས་པ་ཚུལ་ཁྲིམས་དཔལ་བཟང་ལས་དགེ་ཚུལ་གྱི་སྡོམ་པ་བཞེས། ཀྱེ་རྡོ་རྗེའི་རྒྱུ་ལམ་གྱི་དབང་སོགས་ཆོས་མང་དུ་གསན། དགུང་ལོ་བཅུ་པར་ཨེཝཾ་པའི་ཚོགས་སྒྲིག་ཏུ་ཕེབས་ནས་ཚོགས་འདོན་ཆོས་སྤྱོད་ཀྱི་རིམ་པ་ལ་བསླབས། དགུང་ལོ་བཅུ་དགུ་པར་མཁན་ཆེན་བསོད་ནམས་བཟང་པོ་གཙོས་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། སྔ་ཕྱིར་དམ་པ་བཅུ་ཕྲག་གཉིས་ཙམ་བསྟེན་ནས་ཟབ་རྒྱས་ཀྱི་ཆོས་བསམ་གྱིས་མི་ཁྱབ་པ་གསན། ཡི་དམ་གྱི་ལྷ་དུ་མའི་བསྙེན་སྒྲུབ་མཐར་ཕྱིན་པར་མཛད། དགུང་ལོ་སོ་གཉིས་པ་ཆུ་གླང་ཕྱི་ལོ༡༧༣༣ལོར་ངོར་ཨེཝཾ་ཆོས་ལྡན་གྱི་གདན་སའི་ཁྲི་ལ་བཞུགས། ལོ་བརྒྱད་ཀྱི་རིང་ལ་སྐལ་ལྡན་གྱི་སློབ་མ་དཔག་ཏུ་མེད་པ་ལ་སྨིན་གྲོལ་གྱི་དགའ་སྟོན་སྤེལ། དགུང་ལོ་སོ་དགུ་པ་ལྕགས་སྤྲེལ་ཕྱི་ལོ༡༧༤༠ལོར་སྡེ་དགེར་མཁན་ཆེན་བཀྲ་ཤིས་ལྷུན་གྲུབ་དག་ཞིང་དུ་གཤེགས་པའི་གདན་ཚབ་ཏུ་སྡེ་དགེའི་ས་སྐྱོང་བླ་མ་ཕུན་ཚོགས་བསྟན་པས་ནན་ཞུས་ཀྱིས་ངོར་གདན་ཚབ་ཏུ་བྱམས་པ་བསོད་ནམས་བཟང་པོ་མངའ་གསོལ་ནས། ཁམས་སྡེ་དགེ་ལྷུན་གྲུབ་སྟེང་གི་རྒྱལ་ཁབ་ཆེན་པོར་ཕེབས། ལོ་གྲངས་བཅོ་ལྔའི་བར་དུ་བཞུགས་ནས་ས་སྐྱོང་མིའི་དབང་པོ་དཔོན་འཁོར་དང་། ཆོས་གྲྭ་འདི་ཉིད་ཀྱིས་མཚོན་པའི་ཕྱོགས་ཀྱི་དགེ་འདུན་རྒྱ་མཚོའི་ཚོགས་ལ་ཟབ་རྒྱས་ཆོས་ཀྱི་བདུད་རྩི་བསྩལ། དགོན་འདིའི་དྲུག་འདུ་ཆེན་པོའི་དབུར་བཞུགས་སུ་ཕེབས་འཁོར་ལོ་གསུམ་གྱི་ཕྲིན་ལས་བསམ་གྱིས་མི་ཁྱབ་པར་བསྐྱངས། དགུང་ལོ་ང་གསུམ་པར་དབུས་ཕྱོགས་ཕེབས་ནས་བསྟན་འགྲོའི་དོན་རྒྱ་ཆེར་མཛད་དོ། ༈ ངོར་མཁན་རབས་སོ་བཞི་པམ་སོ་ལྔ་པ་མཁས་གྲུབ་སངས་རྒྱས་དཔལ་བཟང་ནི། མདོ་ཁམས་གོ་འཇོའི་ཡུལ་དུ་འཁྲུངས། ཆུང་ངུ་ནས་དམ་པའི་རིགས་སད་ཅིང་། ཨེཝཾ་ཆོས་ལྡན་གྲྭ་སར་ཞུགས། བྱམས་པ་བསོད་ནམས་བཟང་པོ། མཁན་ཆེན་བཀྲ་ཤིས་ལྷུན་གྲུབ་སོགས་བསྟེན་ནས། སྡོམ་པ་གསུམ་གྱིས་གཙོས་ཟབ་རྒྱས་གདམས་པ་རྒྱ་མཚོ་ལྟ་བུར་གསན། ཞུ་ཆེན་ཚུལ་ཁྲིམས་རིན་ཆེན་ལས་སྒྲ་སྙན་སོགས་རིག་གནས་དུ་མར་བསླབ་སྦྱངས་མཛད། ལྷག་པའི་ལྷ་དུ་མའི་བསྙེན་སྒྲུབ་མཐར་ཕྱིན། ངོར་ཨེཝཾ་ཆོས་ལྡན་གྱི་གདན་སའི་ཁྲི་ལ་བཞུགས་ནས་ཟབ་རྒྱས་ཆོས་ཀྱི་འཁོར་ལོ་བསྐོར་ཏེ་སྐལ་ལྡན་གྱི་སློབ་ཚོགས་མཐའ་ཡས་པ་བསྐྲུན། ཁམས་སྡེ་དགེའི་ཕྱོགས་སུ་ཕེབས། ཆོས་རྒྱལ་བསྟན་པ་ཚེ་རིང་དང་མཆོད་ཡོན་དུ་འབྲེལ། འཁོར་ལོ་གསུམ་གྱི་སྒོ་ནས་འཕྲིན་ལས་རྒྱ་ཆེར་འཕེལ། འཁོར་མདོ་དགོན་དང་། རྫོགས་ཆེན་དགོན་གསར་བཞེངས་ཀྱི་བདག་རྐྱེན་མཛད་པ་སོགས་རྣམ་དཀར་གྱི་མཛད་པ་བསམ་གྱིས་མི་ཁྱབ་པ་མངའོ།། ༈ ངོར་མཁན་རབས་སོ་དྲུག་པའམ་སོ་བདུན་པ་ཤར་ཆེན་ཀླུ་ལྡིང་མི་འགྱུར་རྒྱལ་མཚན་ནི། རབ་བྱུང་བཅུ་གཉིས་པའི་མེ་བྱ་ཕྱི་ལོ་༡༧༡༧ལོར་ཤར་ཆེན་དམ་པའི་རིགས་སུ་སྐུ་འཁྲུགས། དགུང་ལོ་བརྒྱད་པར་ངོར་དུ་ཕེབས། ཡི་གེ་འབྲི་ཀློག་སོགས་ལ་བསླབས། ས་སྐྱ་པ་ངག་དབང་ཀུན་དགའ་བསོད་ནམས་རིན་ཆེན་ལ་གཙུག་ཕུད་ཕུལ་མཚན་རིན་ཆེན་མི་འགྱུར་རྒྱལ་མཚན་ཞེས་གསོལ། མཁན་ཆེན་བཀྲ་ཤིས་ལྷུན་གྲུབ་ལས་རབ་ཏུ་བྱུང་། རྗེ་དེ་ཉིད་དང་། འཇམ་དགོན་ཚུལ་ཁྲིམས་ལྷུན་གྲུབ། མཁན་ཆེན་དཔལ་ལྡན་ཆོས་སྐྱོང་སོགས་མཁས་གྲུབ་མང་པོ་བསྟེན་ནས་ཆོས་ཀྱི་བདུད་རྩི་བཞེས། མདོ་སྔགས་རབ་འབྱམས་དང་། སྒྲ་སྙན་ངག་སྐར་རྩིས་སོགས་རིག་གནས་མཐའ་དག་ལ་མཁས་པར་གྱུར། ཡི་དམ་གྱི་ལྷ་དུ་མའི་བསྙེན་སྒྲུབ་དང་ཉམས་བཞེས་མཛད། མེ་སྟག་ཕྱི་ལོ་༡༧༤༦ལོར་ངོར་གྱི་གདན་སའི་ཁྲི་ལ་ཞབས་པད་བཀོད་དེ་བསྟན་འགྲོའི་དོན་མཛད། དེ་ནས་དཔལ་ལྡན་ཆོས་སྐྱོང་གཤེགས་ནས་ས་སྐྱོང་སྡེ་དགེ་ཆོས་རྒྱལ་ཆེན་པོས་དབུའི་མཆོད་གནས་སུ་གདན་དྲངས། ཆོས་རྒྱལ་ཆེན་པོ་དང་། ལྷུན་གྲུབ་སྟེང་དགོན་པའི་དགེ་འདུན་ཚོགས་པས་གཙོས་པ་རྣམས་ལ་གསུང་ངག་ལམ་འབྲས་དང་། གསེར་ཆོས་རིགས་ཀྱི་ཆོས་སྐོར་སོགས་རྒྱ་ཆེར་བསྩལ། དྲུག་འདུ་ཆེན་པོའི་དབུར་བཞུགས་ལོ་མང་ཕེབས། ཡིད་ལྷུན་ལྷ་རྒྱལ་དགོན་གསར་བཞེངས་ལ་མཐུན་རྐྱེན་མཛད་པ་སོགས་ཕྲིན་ལས་ནམ་མཁའ་དང་མཉམ་པར་གྱུར་ཏོ།། ༈ ངོར་མཁན་རབས་སོ་དགུ་པའམ་བཞི་བཅུ་པ་ངག་དབང་ཆོས་སྐྱོང་བཟང་པོ་ནི། གཙང་རོང་གླིང་མ་མཁར་དུ་སྐུ་འཁྲུངས། རིགས་རུས་ཀྱི་ཡོན་ཏན་ཕུན་སུམ་ཚོགས་ཤིང་། ངོར་ཨེཝཾ་ཆོས་ལྡན་དུ་ཕེབས། མཁན་ཆེན་དཔལ་ལྡན་ཆོས་སྐྱོང་། མཁས་གྲུབ་སངས་རྒྱས་དཔལ་བཟང་། རིན་ཆེན་མི་འགྱུར་རྒྱལ་མཚན་སོགས་དམ་པ་མང་པོ་ལས་སྡོམ་པ་གསུམ། གསུང་ངག་ལམ་འབྲས། གཞན་ཡང་དབང་ལུང་ཁྲིད། སྒྲུབ་ཐབས་རྗེས་གནང་སོགས་བསམ་གྱིས་མི་ཁྱབ་པ་གསན་ཅིང་སྒྲོ་འདོགས་ཆོད་པར་མཛད། ཡི་དམ་གྱི་ལྷ་མང་པོའི་བསྙེན་སྒྲུབ་ཚུལ་བཞིན་བགྱིས། ངོར་ཆེན་རྡོ་རྗེ་འཆང་གི་གདན་སའི་ཁྲི་ལ་བཞུགས་ནས་ལམ་འབྲས་སོགས་ཟབ་ཆོས་མཐའ་ཡས་པའི་ཆོས་འཁོར་བསྐོར་བས་བསྟན་འགྲོའི་དཔལ་དུ་གྱུར། སྐུ་ཚེའི་མཇུག་ཏུ་བོད་ཆེན་པོའི་ལྗོངས་ནས་བསྟན་པའི་སྦྱིན་བདག་ཆེན་པོ་སྡེ་དགེ་རྒྱལ་པོའི་བང་མི་གསུམ་འབྱོར་གདོང་། སྡེ་དགེའི་ཞུ་ཤོག་ཏུ། འདི་ལོ་ཀླུ་ལྡིང་མཁན་ཆེན་ཡར་ཕེབས་ཐག་ཆོད་པར། འདིར་བསྐལ་པ་སྔར་ནས་ངོར་མཁན་ཐོག་རེ་གཙུག་གི་མཆོད་གནས་སུ་རྒྱུན་ཆད་མེད་ལྟར་རྗེ་ཉིད་ཕེབས་དགོས་ཚུལ་ནན་ཅན་འདུག་ཅིང་། བང་མི་རྣམས་ས་སྐྱར་ཞུ་ཡིག་འབུལ་ལ་འགྲོ་དགོས་གདོང་། ས་སྐྱ་བདག་ཆེན་རིན་པོ་ཆེ་ནས་ཀྱང་གསུང་བརྟགས་ལེགས་ཤིང་སྡེ་དགེ་རང་ཕྱོགས་ཀྱི་བསྟན་པའི་སྦྱིན་བདག་ཆེན་པོར་གྱུར་པས་མ་ཕེབས་ཐབས་མེད་ཀྱི་བཀའ་རྒྱ་ཕེབས། སྡེ་དགེའི་གདན་འདྲེན་གྱི་སྐུ་ཚབ་དངོས་གཞི་འབྱོར། ཆིབས་ཁ་རིམ་གྱིས་བསྒྱུར་ལམ་བར་རྣམས་སུ་བསྟན་འགྲོའི་དོན་རྒྱ་ཆེར་མཛད། ལྕང་དཀར་སུམ་མདོར་གཉེར་ཆེན་གུ་རུ་དོན་གྲུབ་དཔོན་གཡོག་ཆིབས་བསུ་འབྱོར། སྙེ་མདར་སྡེ་དགེའི་ཐབས་བསུ་དཔོན་གཡོན་སུམ་ཅུ་སྐོར། དགོན་ཆེན་ས་ཕུར་གཉིས། ཆོས་རྗེ་ཁག །མཁར་ནང་བླ་མ་ཆོས་སྐྱོང་བསམ་གྲུབ། དབུ་ཆོས་སོགས་བཞི་བཅུ་སྐོར་དང་། ཟམ་ཆེན་ཁར་ས་སྐྱོང་ཆེན་པོའི་སྤོས་སྣ་བ་མགོན་པོ་རབ་བརྟན་དང་། ཆོས་སྡེ་ཆེན་པོ་ལྷུན་གྲུབ་སྟེང་གི་སེར་སྦྲེང་སིནྡྷུརའི་ཆུ་གཏེར་འཕྱུར་བ་ལྟ་བུས་འཕན་གདུགས་རྒྱལ་མཚན་ཡོ་བྱད་བར་སྣང་ཁེངས་པ་དང་། རྡོ་རྗེ་འཇིགས་བྱེད། གུར་ཞལ་ལྷ་བརྒྱད། ཆོས་རྒྱལ་ཡབ་ཡུམ་བཅས་ཀྱི་འཆམ་སྐུ་གསོབ་ཆེན་གཟི་བྱིན་འབར་བ་བཅས་ཀྱི་བསུ་བ་ཕེབས། དུས་ཚེས་བཟང་བསྒྲིག་ཐོག་གཙུག་ལག་ཁང་བསམ་གྲུབ་མཐོང་གྲོལ་ཆེན་མོར་འདུས་པ་རྒྱ་མཚོའི་དབུས་སུ་གསེར་ཁྲི་མངའ་གསོལ་བའི་ལེགས་འབུལ་གྱི་ཐོག་མར། ཞུ་དབོན་ངག་དབང་དགེ་ལེགས་ལྷུན་གྲུབ་ནས་བཀྲ་ཤིས་པའི་རྫས་བརྒྱད་འབུལ་བ་དང་། ཞེ་ཆེན་དྲུང་ཡིག་པས་སྙན་ཚིག་གི་ལམ་ནས་འབུལ་ཐོ་ལ་ཐོག་མར་བཀྲ་ཤིས་པའི་ལྷ་གོས་དཀར་པོས་ཐོག་དྲངས། སྐུ་རྟེན་ལེ་ཚན། གསུང་རྟེན་རྒྱལ་བའི་བཀའ་འགྱུར་རིན་པོ་ཆེ། འཕགས་པ་བརྒྱད་སྟོང་པ་སུམ་འབིད། ཐུགས་རྟེན་བཀའ་གདམས་མཆོད་རྟེན་ལྕགས་རྩེ་མ། དམ་ཚིག་རྟེན་རྡོ་དྲིལ་སོགས་ཀྱིས་སྣ་དྲངས་ཏེ། གཉིས་པ་སྐུ་ཆས་སྐོར། གསུམ་པ་མཆོད་ཆས་སྐོར། བཞི་པ་དངོས་རྫས་ལ་གསེར་ཞོ་བརྒྱ། དངུལ་སྲང་སུམ་བརྒྱ་གཙོས་པ། ལྔ་པ་སྒར་ཆས། གདན་ཆས་ཐབ་ཆས་སྐོར། དྲུག་པ་ཆིབས་ཆེན་སྒ་འཁོར་ཚང་མ། ཡང་ཆིབས་ཆེན་གཅིག་གཙོས་རྟ་ཕོ་སུམ་ཅུ་སོགས་རྐང་འགྲོས་སྐོར། བདུན་པ་མཐའ་རྟེན་ཀ་རས་དཀར་པོ་བཅས་རྣམ་གྲངས་སྟོང་ཕྲག་གཅིག་ལ་ལྔ་བརྒྱས་ལྷག་པ་ཕུལ་བ་དང་། ལྷུན་གྲུབ་སྟེང་འདུས་ཚོགས་སྤྱི། དཔལ་སྤུངས་པ། སྡེ་དགེའི་གཉེར་མདུན་བསྐོར། རྫོང་སྒོ་སོ་སོའི་རྫོང་དཔོན་རྣམས་ཀྱིས་མཚོན་ལྷ་སྡེ་མི་སྡེ་རྣམས་ནས་ཁྲི་འབུལ་སྔོན་སྲོལ་བཞིན་རྒྱས་པར་ཕུལ། སྡེ་དགེ་ཆོས་རྒྱལ་ཆེན་པོ་དང་། གླིང་གདུང་བརྒྱུད་སོགས་མི་ཆེན་མང་པོའི་མཆོད་གནས་མཛད། དཔལ་ལྷུན་གྲུབ་སྟེང་གི་ཆོས་གྲྭ་སོགས་ཆོས་སྡེ་མང་པོར་བཤད་སྒྲུབ་སྤེལ་བར་མཛད་པ་སོགས་འབྲེལ་ཚད་དོན་ལྡན་གྱི་སྐྱེས་བུ་དམ་པ་ཞིག་གོ། ༈ ངོར་མཁན་རབས་ཞེ་གསུམ་པའམ་ཞེ་བཞི་པ་བྱམས་པ་ནམ་མཁའ་འཆི་མེད་ནི། རབ་བྱུང་བཅུ་གསུམ་པའི་ཤིང་བྱ་ཕྱི་ལོ་༡༧༦༥ལོར་བྲང་ཏིའི་རིགས་སུ་སྐུ་འཁྲུངས། སྔོན་གནས་རྗེས་དྲན་སོགས་ཡོན་ཏན་བསམ་གྱིས་མི་ཁྱབ་པ་མངའ། ཤྲཱིཨེཝཾ་ཐར་པ་རྩེར་ཕེབས་ནས་ཕྱི་ནང་གི་རིག་གནས་དང་། ཀུན་ཏུ་དགོས་པའི་གཞུང་བདུན་སོགས་མདོ་སྔགས་ཀྱི་གཞུང་དུ་མ་ཐུགས་ལ་བཟུང་། ཁང་སར་མཁན་ཆེན་ངག་དབང་ཆོས་སྐྱོང་བཟང་པོ་ལས་ལམ་འབྲས་ཚོགས་བཤད་གསན། ས་སྐྱ་མཁན་ཆེན་སྦྱིན་པ་བཀྲ་ཤིས་ལས་བསྙེན་པར་རྫོགས། འཇམ་དགོན་ཀུན་དགའ་བློ་གྲོས་ལས་ལམ་འབྲས་ཚོགས་སློབ་གཉིས་སོགས་སྔ་ཕྱིར་ཡོངས་འཛིན་དམ་པ་བཅུ་ཕྲག་ལྷག་པ་ལས་ཟབ་རྒྱས་གདམས་པ་རྒྱ་མཚོ་ལྟ་བུར་གསན་ཅིང་ཐོས་བསམ་སྒོམ་གསུམ་གྱིས་གཏན་ལ་ཕབ། ཕྱག་ལེན་ཕྲ་མོ་ཙམ་ལའང་མ་འདྲེས་པར་སོ་སོའི་ལུགས་བཞིན་མཛད། དགུང་ལོ་ཉེར་ལྔ་པར་ངོར་ཆེན་རྡོ་རྗེ་འཆང་གི་ཁྲི་ལ་ཞབས་པད་བཀོད་དེ་ལོ་གྲངས་ལྔའི་རིང་ལ་ལམ་འབྲས་སོགས་ཟབ་རྒྱས་དམ་པའི་ཆོས་ཀྱིས་སྣོད་ལྡན་དཔག་ཏུ་མེད་པ་སྨིན་གྲོལ་ལ་བཀོད། དགུང་ལོ་སུམ་ཅུ་པར་མདོ་ཁམས་སྡེ་དགེའི་རྒྱལ་ཁབ་ནས་སྟོབས་ཀྱི་འཁོར་ལོས་སྒྱུར་བ་ཡུམ་ཚེ་དབང་ལྷ་མོ་དང་། ལྷ་སྲས་ཚེ་དབང་རྡོ་རྗེ་རིག་འཛིན་རྣམ་གཉིས་ཀྱིས་དབུའི་མཆོད་གནས་ཞིག་གདན་འདྲེན་མ་ཞུས་ཐབས་མེད་དུ་དགོངས་ཤིང་། དེའང་སྔོན་གྱི་དུས་ན་སྡེ་དགེའི་རྒྱལ་རབས་གོང་མ་སྒོམ་སྟོན་བསོད་ནམས་རིན་ཆེན་གྱིས་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་གསོལ་དཔོན་གི་ཁུར་བཞེས་པ་ནས་བཟུང་ས་སྐྱ་པའི་བསྟན་པའི་སྦྱིན་བདག་ཏུ་གྱུར་པ་དང་། དེ་རྗེས་མཚུངས་པ་མེད་པའི་བསོད་ནམས་དང་སྟོབས་ཀྱི་བདག་ཉིད་སྡེ་དགེ་བོ་ཐར་གྱི་དུས་སུ། ངོར་ཆེན་རྡོ་རྗེ་འཆང་གི་ཞལ་སློབ་ཏུ་གཏོགས་པའི་གྲུབ་ཆེན་ཐང་སྟོང་རྒྱལ་པོ་ཉིད་བླའི་མཆོད་གནས་སུ་བཀུར་ཞིང་། གྲུབ་ཆེན་དེས་ལྷུན་གྲུབ་སྟེང་སྲིབ་དགོན་གྱི་ལྷ་ཁང་བཞེངས་པ་སོགས་ཐོག་མའི་རྟེན་འབྲེལ་དང་། ཁྱད་པར་གནོད་སྦྱིན་གྱི་སྡེ་དཔོན་ལག་ན་རྡོ་རྗེའི་རྣམ་འཕྲུལ་དུ་ལུང་གིས་ཟིན་པའི་མི་བདག་སའི་ཚངས་པ་ཆེན་པོ་སྡེ་དགེ་བླ་ཆེན་བྱམས་པ་ཕུན་ཚོགས་པའི་སྐུ་རིང་ལ། ངོར་ནས་མཁན་ཆེན་ཐམས་ཅད་མཁྱེན་པ་དཔལ་མཆོག་རྒྱལ་མཚན་པ་སྤྱན་དྲངས་ཏེ་རིགས་ཀྱི་ཅོད་པན་གཅིག་པུར་མངའ་གསོལ་བ་ནས་བརྩམས། སྡེ་དགེའི་རྒྱལ་རབས་རིམ་ཅན་གྱི་དབུའི་མཆོད་གནས་སུ་ངོར་ནས་མཁན་རབས་རེ་གདན་དྲངས་ཏེ་ཆོས་དང་སྲིད་ཀྱི་འཕྲིན་ལས་ཀྱི་གདུགས་དཀར་པོས་ཡངས་པའི་རྒྱལ་ཁམས་ཐམས་ཅད་ཁྱབ་པར་མཛད་པ་ཡིན་གཤིས། ད་ལན་ཀྱང་དབུའི་མཆོད་གནས་དེ་ངོར་ནས་གདན་འདྲེན་ཞུ་བའི་ཐུགས་འདུན་ཆེས་ཆེར་རྒྱས་ཤིང་། རྗེ་འདི་གདན་འདྲེན་ཞུ་བར་ནང་བློན་ཆེན་པོ་ཕྱག་ཚའི་བསོད་ནམས་དབང་རྒྱལ་དང་། མདུན་སྐོར་ཀར་སྐྱབས་དཔོན་འཁོར་རྣམས་བརྫོང་བདའ་མཛད་ཅིང་། ཤིང་ཕོ་སྟག་གི་ལོའི་ཆུ་སྟོད་ཟླ་བའི་ནང་ཨེཝཾ་པའི་བླ་ཁག་ཁང་ཚན་རྣམས་ཀྱི་ཕེབས་སྐྱེལ་གྱི་ཚོགས་རྒྱ་ཆེན་པོ་དང་བཅས་ཏེ་ཆིབས་ཀྱི་གདོང་བསྒྱུར་ཞིང་། ལམ་བར་དུ་འཁོད་པའི་འགྲོ་བ་འགའ་ཞིག་གིའང་རེ་བའི་ཤིང་རྟ་ཡོངས་སུ་བཀང་སྟེ་བྱོན་པས། སྡེ་དགེ་ཆོས་རྒྱལ་ཆེན་པོའི་སྔ་ཕྱིར་ཕེབས་བསུའི་བཀོད་པ་ཉི་ཟེར་གྱི་རྡུལ་ལྟར་ལྷགས་པ་རྣམས་དང་ལྷན་ཅིག་ཏུ་སྡེ་བཞི་དགེ་བཅུའི་དཔལ་འབྱོར་ཕུན་སུམ་ཚོགས་པས་མངོན་པར་མཐོ་བའི་སའི་ཐིག་ལེ། དཔལ་ལྡན་ལྷུན་གྲུབ་སྟེང་གི་རྒྱལ་ཁབ་ཆེན་པོ་ཕྱོགས་ཐམས་ཅད་ལས་རྣམ་པར་རྒྱལ་བ་དང་ཉེ་བར་ཕེབས་པ་ན། དེར་བཞུགས་པའི་བླ་མ་སློབ་དཔོན། དབུ་ཆོས་སོགས་ཀྱི་གཙོ་བྱས་པའི་དགེ་འདུན་འདུས་པ་རྒྱ་མཚོའི་ཚོགས་དང་བཅས་པ། དཔེར་ན་སིནྡྷུརའི་ཆུ་གཏེར་ཆེན་པོ་དལ་གྱིས་རྒྱུ་བར་བྱེད་པ་ལ། ཁ་དོག་སྣ་ཚོགས་པའི་འཇའ་རིས་ཀྱིས་མཛེས་པར་སྤུད་པ་བཞིན་དུ་སེར་ཕྲེང་གི་བཀོད་པ་བསམ་གྱིས་མི་ཁྱབ་པ་ས་དང་ནམ་མཁའི་ཁ་དོག་ཀྱང་བསྒྱུར་བ་སྙམ་བྱེད་པའི་བསུ་བའི་ཚོགས་དང་བཅས་ཏེ། ཧོར་ཟླ་བཅུ་པའི་ཚེས་བརྒྱད་ཀྱི་ཉིན་རྒྱལ་ཁབ་ཆེན་པོ་ག་ལ་བ་དེར་ཕེབས་སོ། །དེའི་ཚེ་ནམ་མཁའི་ངོས་ཐམས་ཅད་ཀྱང་འཇའ་ཁ་དོག་སྣ་ཚོགས་པའི་རི་མོས་མཛེས་པར་འཁྱུད་པ་སོགས་ངོ་མཚར་བའི་ལྟས་མང་དུ་བྱུང་ངོ་། །ཟླ་བ་དེའི་ཚེས་བཅོ་ལྔའི་ཉིན་མདོ་སྨད་ཀྱི་སྐྱེ་འགྲོ་སྤྱིའི་བསོད་ནམས་ཀྱི་ཞིང་དམ་པར་རྗེ་འདི་ཇི་ལྟར་སྤྱན་དྲངས་པ་བཞིན་ཕེབས་པའི་གཏང་རག་དང་། ཆོས་རྒྱལ་རང་གི་བླའི་མཆོད་གནས་རྣམས་ཀྱི་མཆོག་ཏུ་བཀུར་བ་དང་། བོད་ཆེན་པོའི་ལྗོངས་ཀྱི་བསྟན་པ་སྤྱི་དང་བྱེ་བྲག་ཡོངས་ཀྱི་བདག་པོ་ཆེན་པོར་མངའ་གསོལ་བའི་ཆེད་དུ་རྗེ་འདི་སྐུ་འཁོར་གྱི་ཚོགས་དང་བཅས་པ། དཔལ་ལྡན་ལྷུན་གྲུབ་སྟེང་གི་གནྡྷལ་ཆེན་པོར་སྤྱན་དྲངས་ཏེ། མི་འཇིགས་སེངྒེས་བཏེགས་པའི་ཆོས་ཀྱི་ཁྲི་འཕང་མཐོན་པོར་ཞབས་ཀྱི་ཆུ་སྐྱེས་དམར་པོ་མངོན་པར་བཀོད་དེ་བཞུགས་སུ་གསོལ་ཞིང་། དེ་ནས་ཐོག་མར་མདོ་སྨད་སྐྱེ་དགུའི་བདག་པོ་ཆོས་རྒྱལ་སྲས་ཡུམ་རྣམས་ཀྱི་བཞིན་གྱི་དཀྱིལ་འཁོར་སྟོན་ཟླ་ཚེས་པ་ལྟ་བུའི་སྒོ་ནས། བཀྲ་ཤིས་པའི་ལྷ་རྫས་གངས་རིའི་མདངས་ལྡན་དང་། བཀྲ་ཤིས་པའི་རྫས་བརྒྱད་ལ་སོགས་པ་སྔོན་དུ་འགྲོ་བའི་སྐུ་རྟེན་དུ་རྒྱལ་བ་ཚེ་དཔག་ཏུ་མེད་པའི་སྐུ་བརྙན་སོགས་དང་། གསུང་རྟེན་དུ་དེ་བཞིན་གཤེགས་པའི་བཀའ་བོད་དུ་འགྱུ་རོ་འཚལ་གྱི་པུསྟཀ་བརྒྱ་དང་གསུམ། ཐུགས་རྟེན་དུ་བཀའ་གདམས་མཆོད་རྟེན་སོགས་དང་། ན་བཟའ་ཆ་ཚང་སྤུས་ཤིན་ཏུ་དག་པ། དངུལ་གྱི་འདྲེན་ཆས་ཆ་ཚང་། དངུལ་གྱི་གསོལ་ལྟིར་ལེགས་པ། དངུལ་ལས་གྲུབ་པའི་མཆོད་ཆ་སྣ་ཚོགས། རྡོ་དྲིལ། ཌམརུ། རྔ་དང་རོལ་སིལ་སོགས་མཆོད་ཆ་མང་པོ། ཁྱད་པར་དུ་འཕགས་པའི་གོས་ཆེན་རིགས་མང་པོ། དར་རས་ལིང་སོགས་ཤིན་ཏུ་མང་པོ། དཀར་ཡོལ་དང་ཤེལ་གྱི་རིགས་སྣ་ཚོགས། གསེར་ཞོ་བརྒྱ། རིན་ཆེན་གཉིས་པ་ཐུར་སྲང་བཞི་བརྒྱ། རྟ་དྲེལ་ལྔ་བཅུ། མཛོ་གཡག་བརྒྱ། མཧཱ་ཙི་ནའི་ཡུལ་གྱི་ལྗོན་འདབ་འཁོར་བརྒྱ། མར་ཁལ་བརྒྱ། ནས་ཁལ་བརྒྱ་ཕྲག །གཅན་གཟན་པགས་པ་མང་པོ། གཟིམ་གུར་ཡོལ་བ་བཅས་ཀྱི་གཙོས་གུར་གཡབ་ཁ་ཤས། ཉེར་མཁོའི་ཐབ་གདན་ཆས་ཚང་འགྲིག །ཆིབས་སྒ། དྲེལ་སྒ། མཛོ་སྒ་སོགས་རྣམ་གྲངས་སྟོང་ཕྲག་བརྒལ་བ་འབུལ་བར་མཛད་ཅིང་། དེའི་རྗེས་སུ་ཆོས་རྒྱལ་མཆོག་གི་སྐུའི་འགལ་རྐྱེན་སེལ་ཞིང་མཐུན་རྐྱེན་སྒྲུབ་པའི་བླ་མ་རྣམས་དང་། བཀའི་འཁོར་ལོས་སྒྱུར་བའི་མདུན་ན་འདོན་ཆེན་པོ་རྣམས་དང་། ཕྱག་མཛོད། མདུན་སྐོར་རྣམས། ཚོང་དཔོན། དཔོན་སྐྱ། ཧོར་འདྲ་ལ་སོགས་པ་རྣམས་དང་། ལྷུན་གྲུབ་སྟེང་རང་དུ་གཉུག་མར་བཞུགས་པའི་བླ་མ། སློབ་དཔོན། ཆོས་ཁྲིམས། སྤྱི་བའི་དུས་ཇ་ཁག་རྣམས། དགེ་སློང་། དགེ་ཚུལ་སོགས་ཇི་སྙེད་ཅིག་བཞུགས་པ་རྣམས་དང་། གཞན་ཡང་རྫོང་ཁག་ཉི་ཤུ་རྩ་ལྔའི་མངའ་འོག་ཏུ་གཏོགས་སོ་འཚལ་གྱི་བླ་མ། མི་དཔོན། དགོན་པ། ཁྱིམ་བདག་འབྱོར་ལྡན་རྣམས་ཏེ། དེ་དག་སོ་སོ་ནས་ཀྱང་དད་པ་དང་སྤྲོ་བ་ཕུན་སུམ་ཚོགས་པའི་ལྡེ་མིག་གིས་རང་རང་གི་འབྱོར་པའི་བང་མཛོད་ཀྱི་སྒོ་འཕར་ཡངས་པོར་ཕྱེས། གཏོང་ཕོད་ཀྱི་ལག་པ་རིང་དུ་བརྐྱངས། འབུལ་བའི་དངོས་པོ་གྱ་ནོམ་པ་རི་ལྟར་སྤུངས་ཏེ། བྱང་ཆུབ་སེམས་དཔའ་ནམ་མཁའ་མཛོད་ཀྱི་རྣམ་ཐར་ལ་ཅོ་འདྲི་བ་ལྟ་བུའི་སྒོ་ནས་བསྟན་པ་དང་འགྲོ་བ་ཐམས་ཅད་ཀྱི་མགོན་སྐྱབས་དཔུང་གཉེན་དམ་པར་ཡོངས་སུ་མངའ་གསོལ་ཏོ། །དེ་ལྟར་བགྱིས་པའི་དགེ་བ་ཐམས་ཅད་བྱང་ཆུབ་ཀྱི་སྙིང་པོར་ཡོངས་སུ་བསྔོ་བའི་རྒྱས་འདེབས་པ་དང་། དེར་འདུས་པའི་སྐྱེ་བོ་རྣམས་ཀྱང་ཆོས་ཀྱི་བདུད་རྩི་བླ་ན་མེད་པས་ཚིམ་པར་མཛད་དོ། དེ་ནས་བཟུང་སྟེ་དགུང་ལོ་ཞེ་གཅིག་པ་ཤིང་གླང་ཕྱི་ལོ༡༨༠༥ལོའི་བར་ལོ་བཅུ་གཅིག་བར་དུ་ལྷུན་གྲུབ་སྟེང་ཕན་བདེ་ཀུན་ཁྱབ་གླིང་གི་བླ་བྲང་རང་དུ་བཞུགས་ནས་ཆོས་རྒྱལ་ཆེན་པོ་སྲས་ཡུམ་བློན་འབངས། ཕྱོགས་ཀྱི་བླ་གྲྭ་འདུས་ཚོགས་ལ་སོ་སོའི་མོས་པ་དང་མཐུན་པའི་ཟབ་ཆོས་བསམ་གྱིས་མི་ཁྱབ་པ་བསྩལ། ལོ་བསྟར་བཞིན་དགོན་པའི་དྲུག་ཅུ་དང་། འདུ་བ་ཆེན་པོ་ཞེས་ངོར་ལུགས་དཀྱིལ་འཁོར་བདུན་གྱི་སྒྲུབ་མཆོད་ཚོགས་པའི་དབུར་བཞུགས་སུ་ཕེབས། དགོན་སྡེ་འདི་གཙོས་ཆོས་རྒྱལ་ཆེན་པོའི་མངའ་འོག་ཏུ་གཏོགས་པའི་ས་དགོན་ཡོད་རིགས་ཕལ་ཆེ་བར་རིམ་གཉིས་ཉམས་ལེན། ཆོ་གའི་ཕྱག་ལེན། གདངས་དབྱངས། ཐིག་རྡུལ་ཚོན། འབུད་རྡུང་དཀྲོལ་གསུམ་ཚུན་ཆད་མེད་པ་རྣམས་སྲོལ་བཏོད། མ་དག་པ་རྣམས་དག་པ་བྱས་དག་པ་རྣམས་གོང་འཕེལ་དུ་མཛད་པ་སོགས་དཔལ་ས་སྐྱའི་བསྟན་པ་ཉིན་མོ་ལྟར་གསལ་བར་མཛད། དགུང་ལོ་ཞེ་གཅིག་པར་དབུས་གཙང་ཕྱོགས་སུ་ཕེབས་ནས་བསྟན་འགྲོའི་དོན་རྒྱ་ཆེར་མཛད། དགུང་ལོ་ང་བཞི་པ་སླར་ཡང་ཆོས་རྒྱལ་ཆེན་པོ་ཚེ་དབང་རྡོ་རྗེ་རིག་འཛིན་གྱིས་གསོལ་བ་ནན་ཆེར་བཏབ་པ་བཞིན་མདོ་ཁམས་སྡེ་དགེ་ལྷུན་གྲུབ་སྟེང་གི་རྒྱལ་ཁབ་ཆེན་པོར་ཕེབས། ཕལ་ཆེར་ཕན་བདེ་ཀུན་ཁྱབ་བླ་བྲང་དུ་རྒྱུན་བཞུགས་མཛད། དྲུག་འདུ་ཆེན་པོའི་དབུར་བཞུགས་སུ་ཕེབས། སྔ་ཕྱིར་ལམ་འབྲས་སློབ་བཤད་ཚར་གཉིས། སྦྱོང་དཀྱིལ་བཅུ་གཉིས་སོགས་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་ཞིག་གསུངས། བྲག་ལ་ཕུར་པ་བཏབ་པ། ཁྲོམ་ཐར་ལ་ཕེབས་སྐབས་ཁྲོམ་ཆུ་གྱེན་ལ་བཟློག་པ་སོགས་གྲུབ་པའི་མཚན་རྟགས་མངོན་སུམ་དུ་བསྟན། འབུལ་ནོད་བྱུང་བ་རྣམས་ཆུད་ཟོས་སུ་མི་འགྲོར་བ་རྟེན་གསུམ་བཞེངས་པ་མང་འགྱེད་བསྙེན་བཀུར་སོགས་བསྟན་འགྲོ་ཁོ་ནའི་ཆེད་དུ་བཏང་། སྔ་ཕྱིར་ལམ་འབྲས་ཚར་བརྒྱད་ཀྱིས་མཚོན་ཆོས་ཀྱི་གདམས་པ་དུ་མ་བསྩལ་བའི་བསྟན་འཛིན་སྐྱེས་བུ་མང་དུ་བསྐྲུན། དགུང་ལོ་ལྔ་བཅུ་རྩ་དྲུག་པ་ལྕགས་འབྲུག་ཕྱི་ལོ་༡༨༢༠ལོར་སྐུ་དབོན་རྣལ་འབྱོར་འཇམ་དཔལ་བཟང་པོ་དང་། སྡེ་དགེ་ས་སྐྱོང་ཆེན་པོ་སོགས་ལ་ཞལ་ཆེམས་ལྷུག་པར་བསྩལ་ཅིང་། ངོ་མཚར་བའི་ལྟས་དང་བཅས་གཟུགས་སྐུའི་བཀོད་པ་དབྱིངས་སུ་བསྡུ་པའི་ཚུལ་བསྟན་ཏོ།། ༈ ངོར་མཁན་རབས་ཞེ་དྲུག་པའམ་ཞེ་བདུན་པ་བྱམས་པ་ཀུན་དགའ་བསྟན་འཛིན་ནི། རབ་བྱུང་བཅུ་གསུམ་པའི་མེ་སྤྲེལ་ཕྱི་ལོ་༡༧༧༦ལོར་བྲང་ཏི་མཁས་པའི་རིགས་སུ་སྐུ་འཁྲུངས། གཞོན་ནུ་འི་དུས་ནས་ཡོན་ཏན་དུ་མས་བརྒྱན་ཅིང་། བྱིས་པའི་སྤྱོད་པ་ལས་འདས། ཨེ་ཝཾ་ཆོས་ལྡན་ཐར་པ་རྩེའི་བླ་བྲང་དུ་ཕེབས། རྒྱུན་གྱི་བྱ་བ་ཆོས་སྤྱོད་ནས་བརྩམས་ཏེ་ཀུན་ཏུ་དགོས་པའི་གཞུང་བདུན་སོགས་མདོ་སྔགས་ཀྱི་གཞུང་ལུགས་ཆེན་པོ་རྣམས་དཀའ་ཚེགས་མེད་པར་ཐུགས་སུ་ཆུད། རྡོ་རྗེ་འཆང་བྱམས་པ་ནམ་མཁའ་འཆི་མེད་ལས་སྡོམ་གསུམ་གྱི་བཀའ་དྲིན་ནོས་ཏེ་ཐུབ་བསྟན་ཡོངས་རྫོགས་ཀྱི་བདག་པོར་གྱུར། སྐྱེ་བ་དུ་མ་ཉེས་ལྟུང་དྲི་མས་མ་གོས་པས་ཚུལ་ཁྲིམས་ཀྱི་དྲི་ཞིམ་པོས་གར་བཞུགས་ཀྱི་ཕྱོགས་ཐམས་ཅད་ཁྱབ་པ་ཀུན་གྱིས་མངོན་སུམ་དུ་གྱུར། ཡོངས་འཛིན་དམ་པ་ཉི་ཤུ་རྩ་ལྔ་ལས་རྗེ་བཙུན་ས་སྐྱ་པའི་སྙན་རྒྱུད་ཀྱི་གདམས་པ་རྒྱ་མཚོ་ལྟ་བུར་གསན་ཅིང་། དེ་དག་གི་ཚིག་དོན་དང་ཕྱག་ལེན་ཕྲ་མོ་དག་ཀྱང་འཁྲུལ་མེད་དུ་མཁྱེན། ཡི་དམ་ཆོས་སྲུང་དུ་མའི་བསྙེན་པ་མཐར་ཕྱིན་པས་ཡི་དམ་གྱི་ལྷས་གནང་བ་དང་། ཆོས་སྐྱོང་སྲུང་མས་ཕྲིན་ལས་སྒྲུབ་པའི་མཚན་མ་མང་པོས་གཏམས། ཐུབ་དབང་གནས་བརྟན་བཅུ་དྲུག་དང་། སློབ་དཔོན་སངས་རྒྱས་གཉིས་པ་སོགས་ཀྱིས་དགྱེས་པའི་འཛུམ་ཞལ་བསྟན། དགུང་ལོ་སོ་དྲུག་པ་ཕྱི་ལོ༡༨༡༡ལོར་ངོར་ཆེན་རྡོ་རྗེ་འཆང་གི་ཆོས་ཁྲི་ལ་བཞུགས་ནས་ལོ་གྲངས་བཅུའི་བར་དུ་འཆད་རྩོད་རྩོམ་གསུམ་དང་། མཁྱེན་བརྩེ་ནུས་པའི་ཕྲིན་ལས་ཀྱིས་རྒྱལ་བ་གཉིས་པའི་བསྟན་པ་སྔར་ལས་ཀྱང་རྒྱས་པར་མཛད་དོ། འཇམ་པའི་དབྱངས་མཁྱེན་བརྩེའི་དབང་པོའི་ཞལ་སྔ་ནས། སླར་ཡང་བོད་ཆེན་ལྗོངས་ཀྱི་འཁོར་ལོས་སྒྱུར། །སྡེ་བཞི་དགེ་བཅུའི་ནོར་བུའི་ཅོད་པན་རྩེར། །ཞབས་སེན་བཀྲ་ཤིས་རེཁཱ་བཀོད་མཛད་ནས། །བསྟན་འགྲོ་ཕན་བདེ་སྤེལ་ལ་གསོལ་བ་འདེབས། །ཁྱད་པར་རྣལ་འབྱོར་དབང་ཕྱུག་ས་སྐྱ་པའི། །སྙན་བརྒྱུད་ཚད་མ་བཞི་ལྡན་གདམས་པས་མཚོན། །ཟབ་རྒྱས་དམ་པའི་ཆོས་ཀྱིས་རིགས་ཅན་གསུམ། །རྣམ་གྲོལ་གོ་འཕང་བཀོད་ལ་གསོལ་བ་འདེབས། ཞེས་གསུངས་པ་ལྟར། དགུང་ལོ་ཞེ་བདུན་པ་ཆུ་ཕོ་རྟ་ཕྱི་ལོ༡༨༢༢ལོར་སྡེ་དགེ་ཆོས་རྒྱལ་ཆེན་པོ་ཚེ་དབང་རྡོ་རྗེ་རིག་འཛིན་གྱིས་གདན་ཞུས་ལྟར་མདོ་ཁམས་སུ་ཆིབས་ཁ་བསྒྱུར་ཏེ་རིམ་གྱིས་ཕེབས་པ་ན། རྗེ་འདིའི་མནལ་ལམ་ཕལ་ཆེར་བར་མི་དཀར་པོ་ཞིག་གིས་གུས་པའི་རྣམ་འགྱུར་དང་བཅས། རེས་ཕྱག་ནས་བརྟེན། རེས་ཆིབས་པ་ཁྲིད་དེ་ཆོས་གྲྭ་འདིའི་ནུབ་ཕྱོགས་ཀ་ོཀོ་ལ་ནས་མར་བྱོན་པའི་སྣང་བར་བྱུང་ཞིང་། དེ་ན་ིསྡེ་དགེའི་གཞི་བདག་འབྲི་གཉན་འདོང་གིས་ཐོག་མའི་བསུ་བ་དང་། སླད་ནས་ཕྲིན་ལས་སྒྲུབ་པའི་ལྟས་སུ་གསུངས། དེ་ནས་རིམ་གྱིས་སྡེ་དགེ་ལྷུན་གྲུབ་སྟེང་གི་རྒྱལ་ཁབ་ཆེན་པོའི་གཙུག་ལག་ཁང་དུ་སྤྱན་དྲངས་ཏེ། སྔོན་ཨེཝཾ་པའི་མཁན་པོ་རིམ་བྱོན་ཐམས་ཅད་ཀྱིས་ཞབས་བཀོད་པའི་ཆོས་ཁྲི་ཆེན་པོར་བཞུགས་སུ་གསོལ་ཞིང་། རྡོ་རྗེ་འཛིན་པ་འདུས་པ་དང་བཅས་པས་ཚེ་དཔག་མེད་ལྷ་དགུའི་དཀྱིལ་འཁོར་གྱི་ཆོ་ག་དང་འབྲེལ་བར། ལུང་རིགས་སྨྲ་བའི་སྡེ་སྣོད་འཛིན་པ་དག་གིས་ཕུན་སུམ་ཚོགས་པ་ལྔ་དང་། མཎྜལ་རྒྱས་བཤད་ཚིག་གི་མཆོད་སྤྲིན་སྤྲོ་བ་སྔོན་དུ་འགྲོ་བས། སྟོབས་ཀྱི་འཁོར་ལོས་སྒྱུར་བ་ཆོས་རྒྱལ་ཆེན་པོ་ཚེ་དབང་རྡོ་རྗེ་རིག་འཛིན་གྱི་ཕྱག་གིས་བཀྲ་ཤིས་པའི་ལྷ་རེག་དཀར་པོ་འབུལ་བ་དང་། སྐུ་རྟེན་ཚེ་དཔག་མེད་སོགས་ཀྱི་སྐུ་བརྙན་གསེར་ཟངས་ལས་གྲུབ་པ་ཁ་ཤས་དང་། གསུང་རྟེན་རྒྱལ་བའི་བཀའ་འགྱུར་རིན་པོ་ཆེ། ཐུགས་རྟེན་བཀའ་གདམས་མཆོད་རྟེན་ཁ་ཤས། ཟངས་གསེར་ལས་གྲུབ་པའི་རྒྱལ་སྲིད་སྣ་བདུན། བཀྲ་ཤིས་རྫས་བརྒྱད་སོགས། གླང་པོ་ཆེའི་མཆེ་བ། གདུགས་དཀར་པོ་ཏོག་དང་བཅས་པ་སོགས་ཆེན་པོ་ལ་འོས་པའི་ཡོ་བྱད་མང་པོ་དང་། གོས་ཆེན་གྱི་བླ་བྲེ་དང་། ཡོལ་བ་ལ་སོགས་པ་གོས་ཆེན་ལས་གྲུབ་པའི་ཡོ་བྱད་མང་པོ། རྡོ་དྲིལ། ཌམརུ། ཏིང་ཤགས། རོལ་སིལ། རྔ། དུང་དཀར། དུང་ཆེན། རྒྱ་གླིང་སོགས་མཆོད་ཆ་རབ་ཏུ་མང་པོ། དངུལ་གྱི་བུམ་པ། མཎྜལ། དངུལ་ཏིང་བདུན་ཚར་སོགས་དངུལ་ལས་གྲུབ་པའི་མཆོད་ཆ་མང་པོ། དངུལ་གྱི་འདྲེན་ཆས་ཆ་ཚང་། དངུལ་གྱི་གསོལ་ལྟིར། ཤིན་ཏུ་རིན་ཐང་ཆེ་བའི་གོས་ཆེན་གྱི་རིགས་མང་པོ། དར་རས་ལིང་ཤུག་ཚང་སོགས་ཤིན་ཏུ་མང་པོ། ཤེལ་དང་དཀར་ཡོལ་གྱི་རིགས་སྣ་ཚོགས་པ། གསེར་ཞོ་ལྔ་བཅུ། རིན་ཆེན་གཉིས་པ་འདེགས་སྲང་སུམ་བརྒྱ་ལྔ་བཅུ། གཅན་གཟན་གྱི་པགས་རིགས་རབ་ཏུ་མང་པོ། གཟིམ་གུར་ཡོལ་བ་བཅས་གུར་གཡབ་ཁ་ཤས། ཉེར་མཁོའི་ཐབ་ཆ་དང་བཞུགས་གདན་གྱི་སྐོར་མང་པོ། ནས་ཁལ་བརྒྱ་དང་ལྔ་བཅུ། མར་ཁལ་བརྒྱ་དང་ལྔ་བཅུ། བཟང་ཇ་འཁོར་དྲུག་བརྒྱ་ཐམ་པ། འབྲི་བཅུ། ཁལ་ཉི་ཤུ་སྒ་འཁོར་དང་བཅས་པ། མཛོ་མོ་བཅུ། ཕོ་མཛོ་སྒ་སྟན་འབྱར་བ་སུམ་བཅུ། ཆིབས་སྒ་འཁོར་འཛོམ་པ་གཅིག །ཆིབས་པ་གསུམ་གཙོས་རྟ་ཕོ་སུམ་ཅུ། དྲེའུ་སྒ་འཁོར་འཛོམ་པ་བཅུ། སྟན་དཀར་བརྒྱ་ཐམ་པ་བཅས་ཁྱོན་རྣམ་གྲངས་ཆིག་སྟོང་ལྔ་བརྒྱ་དང་ལྔ་བཅུ་འབུལ་བར་མཛད་ཅིང་། འདུན་ན་འདོན་ཆེན་པོས་ཚིག་དོན་ཕུན་སུམ་ཚོགས་པའི་ལེགས་འབུལ་གྱི་ཡི་གེ་གསལ་ཞིང་བརྗོད་པ་དག་པས་གསངས་མཐོར་སྒྲོགས་པ་དང་། དེའི་རྗེས་སུ་ཆོས་རྒྱལ་ཆེན་པོའི་སྐུའི་བར་ཆད་སྲུང་བའི་བླ་མ། ཆོས་ཁྲིམས། གྲྭ་ཚང་། འདུན་ན་འདོན་ཆེན་པོ་རྣམས། ཕྱག་མཛོད། མདུན་སྐོར། ཚོང་དཔོན། དཔོན་སྐྱ། ཧོར་འདྲ་རྣམས། ལྷུན་གྲུབ་སྟེང་དུ་གཉུག་མར་བཞུགས་པའི་བླ་མ། སློབ་དཔོན། ཆོས་ཁྲིམས། སྤྱི་པའི་དུས་ཇ་ཁག་རྣམས། གཞན་ཡང་དགེ་ཚུལ་སློང་རབ་ཏུ་མང་པོ། རྫོང་ཁག་ཆེན་པོ་རྣམས་ཀྱི་མངའ་འོག་ཏུ་གཏོགས་སོ་འཚལ་གྱི་བླ་མ། མི་དཔོན། དགོན་པ། ཁྱིམ་བདག་འབྱོར་ལྡན་རྣམས་ཏེ། དེ་དག་སོ་སོ་ནས་ཀྱང་སྔ་ན་མེད་པའི་དད་སྤྲོ་ཕུན་སུམ་ཚོགས་པའི་སྒོ་ནས་དངོས་འབྱོར་གྱི་འབུལ་བ་གྱ་ནོམ་པ་དང་བཅས་ཏེ་བོད་ཆེན་པོའི་ལྗོངས་ཀྱི་བསྟན་འགྲོ་ཡོངས་ཀྱི་མགོན་དུ་ལེགས་པར་མངའ་གསོལ་ཏོ། །དེ་ལྟ་བུའི་དགེ་ཚོགས་ཐམས་ཅད་ཀྱང་ཡོངས་སུ་བསྔོ་བས་རྒྱས་གདབ་པ་དང་། དེར་འདུས་སྐྱེ་བོ་རྣམས་ཀྱང་གཙུག་ཏོར་རྣམ་པར་རྒྱལ་མའི་རྗེས་སུ་གནང་བ་སོགས་ཆོས་ཀྱི་བདུད་རྩིས་ཚིམ་པར་མཛད་དོ། དེ་ནས་ཕལ་ཆེར་ཕན་བདེ་གླིང་གི་བླ་བྲང་རང་དུ་བཞུགས་ཤིང་། དྲུག་འདུ་ཆེན་པོའི་དབུར་བཞུགས་ལོ་བསྟར་མཛད། ལམ་འབྲས་སློབ་བཤད་ཀྱི་སྨིན་གྲོལ་གྱིས་གཙོས་པའི་ཆོས་འཁོར་རྒྱ་ཆེན་བསྐོར་བ་དང་། ས་སྐྱོང་ཚེ་དབང་རྡོ་རྗེ་རིག་འཛིན་ལ་རབ་བྱུང་བསྙེན་རྫོགས་ཀྱི་སྡོམ་པ་བསྩལ་ཏེ། མཚན་བྱམས་པ་ཀུན་དགའ་སངས་རྒྱས་བསྟན་པའི་རྒྱལ་མཚན་དཔལ་བཟང་པོ་ཞེས་གསོལ། ཆོས་རྒྱལ་ཆེན་པོའི་དགོངས་བཞེད་ལྟར། རྗེ་ཉིད་ཀྱིས་ཀྱང་ཐུགས་བསྐྱེད་ཀྱིས་ཁྱབ་པས་སྔོན་མཁན་ཆེན་སངས་རྒྱས་ཕུན་ཚོགས་དང་། རྗེས་སུ་གྲུབ་དབང་ཀུན་དགའ་བློ་ལྡན་སོགས་དམ་པ་དུ་མའི་བཞུགས་གནས་རི་ཁྲོད་དྲྭ་མ་སྒང་དུ། རྒྱུད་སྡོམ་པ་གསུམ་གྱིས་བསྡམས་ཤིང་། དཔལ་ས་སྐྱ་པའི་སྙན་བརྒྱུད་ཟབ་མོའི་ཉམས་ལེན་ཐུན་བཞིའི་རྣལ་འབྱོར་ལ་ཁོར་ཡུག་ཏུ་བརྩོན་པའི་རིག་པ་འཛིན་པའི་སྒྲུབ་གྲྭ་གསར་དུ་འདེབས་པ་དང་། ལྷུན་གྲུབ་སྟེང་གི་ཆོས་གྲྭ་འདིས་གཙོས་པའི་དགོན་སྡེ་རྣམས་སུ་བསྟན་རྒྱུན་རྣམ་དག་སྤེལ་བར་མཛད། མདོར་ན་དགུང་ལོ་ང་བདུན་པ་ཆུ་ཕོ་འབྲུག་གི་ལོའི་བར་དུ་ཕྱོགས་འདིར་བཞུགས་ནས་འཁོར་ལོ་གསུམ་གྱི་འཕྲིན་ལས་བསམ་གྱིས་མི་ཁྱབ་པར་བསྐྱངས། དགུང་ལོ་ང་བདུན་པར་སྡེ་དགེ་ས་སྐྱོང་ཆོས་རྒྱལ་ཆེན་པོ་དབུས་སུ་ཕེབས་པའི་ལྷན་དུ་སྐུ་རིམ་པ་རྗེ་འདི་ཕེབས། དགུང་ལོ་ང་བརྒྱད་པ་ཕྱི་ལོ་༡༨༣༣ལོར་སླར་ཡང་དཔལ་ལྷུན་གྲུབ་སྟེང་གི་རྒྱལ་ཁབ་ཆེན་པོར་མཆོད་ཡོན་ཐམས་ཅད་བདེ་བར་ཕེབས། དེ་ནས་བཟུང་དགུང་ལོ་རེ་གཉིས་པའི་བར་དུ་ལྷུན་གྲུབ་སྟེང་འདིར་བཞུགས། ཉེ་སྐོར་གྱི་སྦྱིན་བདག་དད་པ་ཅན་རྣམས་ཀྱིས་གདན་དྲངས་པའི་ངོར་ལན་ཁ་ཤས་མ་གཏོགས་ཕྱོགས་གང་དུའང་མ་ཕེབས་པར་ཕན་བདེ་བླ་བྲང་དུ་རྟག་ཏུ་བཞུགས་ནས། ལོ་རེ་བཞིན་དྲུག་འདུའི་དབུར་བཞུགས་མཛད། སླར་ཡང་ལམ་འབྲས་སློབ་བཤད་ཀྱིས་གཙོས་སྨིན་གྲོལ་དཔག་ཏུ་མེད་པ་དང་། ཆོས་རྒྱལ་ཡབ་སྲས་ཀྱི་སྐུ་རིམ་གསར་འཕར་རིགས་དང་། ཡུལ་ཕྱོགས་དགེ་བའི་སླད་དུ་ས་བུམ། ནོར་བུམ། ཀླུ་བུམ་སོགས་མང་དུ་བསྒྲུབས་ནས་མདོར་ན་ཞི་རྒྱས་དབང་དྲག་གི་འཕྲིན་ལས་གཞལ་དུ་མེད་པ་མཛད། དགོན་སྡེ་རྣམས་སུ་མོ་ཁྲིམས་དང་། ཆང་ཁྲིམས་བསྡམས་པས་མཚོན་དགེ་འདུན་གྱི་སྒྲིག་ལམ་སྔ་ལས་དམ་པར་མཛད། ཆོས་རྒྱལ་ཆེན་པོ་དང་བཀའ་མོལ་མཛད་དེ། ཟེ་ཆེན་དགོན་ནས་མཧཔཎྜིཏ་འཇམ་དབྱངས་དགྱེས་པའི་བློ་གྲོས་དང་། དཔལ་ས་སྐྱ་ནས་དགའ་ལྡན་སློབ་དཔོན་རིན་པོ་ཆེ་བྱམས་པ་སྨོན་ལམ་གྲགས་པ་དག་ཆོས་གྲྭ་ཆེན་པོ་ལྷུན་གྲུབ་སྟེང་དུ་གདན་དྲངས་ཏེ། ཕྱི་ནང་རིག་པའི་གནས་ཡན་ལག་དང་བཅས་པའི་བཤད་གྲྭ་བཙུགས་པ་དང་། ངག་ཆོས་པའི་སྡོམ་གསུམ་སྤྱི་དོན་དང་འགྲེལ་པ་པར་དུ་བཞེངས། གཞན་ཡང་རྟེན་བཞེངས་མཆོད་འབུལ་མང་འགྱེད་སོགས་བསམ་གྱིས་མི་ཁྱབ། དགུང་ལོ་རེ་གཉིས་པར་དབུས་གཙང་ཕྱོགས་སུ་བྱོན་བསྟན་འགྲོའི་དོན་རྒྱ་ཆེར་མཛོད། སྔ་ཕྱིར་ལམ་འབྲས་ཚོགས་བཤད་ཚར་བཅུ། སློབ་བཤད་ཚར་བཞི། རྡོར་ཕྲེང་ཚར་གཉིས་སོགས་ཆོས་འཁོར་བར་མེད་དུ་བསྐོར་ནས་བསྟན་འཛིན་གྱི་སྐྱེས་བུ་ཤིན་ཏུ་མང་པོ་བསྐྲུན། དགུང་ལོ་གྱ་བདུན་པ་ཆུ་ཁྱི་ཕྱི་ལོ་༡༨༦༢ལོར་སྐུ་གཤེགས་པའི་ཚུལ་བསྟན་ཏོ།། ༈ ངོར་མཁན་རབས་ལྔ་བཅུ་པའམ་ང་གཅིག་པ་རྣལ་འབྱོར་འཇམ་དཔལ་བཟང་པོ་ནི། རབ་བྱུང་བཅུ་གསུམ་པའི་ས་བྱ་ཕྱི་ལོ་༡༧༨༩ལོར་བྲང་ཏི་མཁས་པའི་རིགས་སུ་སྐུ་འཁྲུངས། སྐུ་ཆུང་ངུ་ནས་ཐེག་ཆེན་གྱི་རིགས་སད་པས་བསྐུལ་ཏེ་ངོར་ཨེཝཾ་ཐར་པ་རྩེར་ཕེབས། འདོན་ཆོག་དང་རྒྱུད་ཆུང་བཞི་སོགས་ཐུགས་འཛིན་མཛད། བྱམས་པ་བསོད་ནམས་བཟང་པོས་མཁན་པོ་དང་། དཔལ་ལྡན་ཆོས་ཀྱི་རྒྱལ་མཚན་གྱིས་ལས་སློབ་སོགས་དགེ་འདུན་གྲངས་ཚང་བའི་དབུས་སུ་ཚིགས་གསུམ་རིམ་ནོས་ཀྱིས་བསྙེན་པར་རྫོགས། གཅེན་བྱམས་པ་ཀུན་དགའ་བསྟན་འཛིན་སོགས་ཡོངས་འཛིན་དུ་མ་ལས་ལམ་འབྲས་གཙོས་གཞུང་ལུགས་གདམས་པ་རྒྱ་མཚོ་ལྟ་བུར་གསན། ཀྱེ་རྡོར་གཞི་བསྙེན་སོགས་སྒྲུབ་པའི་རྒྱལ་མཚན་མཐོན་པོར་བསྒྲེངས། མདོ་ཁམས་སྡེ་དགེར་ཕེབས། ཁུ་བོ་བྱམས་པ་ནམ་མཁའ་འཆི་མེད་ལས་ལམ་འབྲས་སློབ་བཤད་སོགས་གསན། དྲུག་འདུ་ཆེན་པོར་དབུར་བཞུགས་ལོ་མང་པོར་མཛད། སྡེ་དགེ་ལྷ་སྲས་སྐུ་མཆེད་ལ་རྒྱུན་གྱི་རིམ་གྲོ་དང་གསར་འཕར་ཡང་དག་པར་བསྒྲུབས་པར་མཛད། དགུང་ལོ་སོ་གཉིས་པར་ཁུ་བོའི་དགོངས་རྫོགས་ཀྱི་ཆེད་དུ་དབུས་གཙང་ཕྱོགས་སུ་ཕེབས་མཆོད་འབུལ་རྒྱ་ཆེར་མཛད། དགུང་གྲངས་ཞེ་བདུན་པ་ས་བྱི་ཕྱི་ལོ་༡༨༣༥ལོར་ངོར་ཆེན་རྡོ་རྗེ་འཆང་གི་ཁྲི་ལ་ཞབས་པད་བཀོད་དེ། སྡོམ་པ་གསུམ་དང་གསུང་ངག་ལམ་འབྲས་གཙོས་ཟབ་ཡངས་ཆོས་ཀྱི་འཁོར་ལོ་བསྐོར་ནས་སྐལ་ལྡན་དཔག་ཏུ་མེད་པ་སྨིན་གྲོལ་ལ་བཀོད། ཀུན་གཟིགས་མཁྱེན་བརྩེའི་དབང་པོས་མཛད་པའི་རྣམ་ཐར་གསོལ་འདེབས་ལས། སླར་ཡང་སྡེ་བཞི་དགེ་བཅུའི་ནོར་འཛིན་ལྗོངས། །གང་ཞབས་བསོད་ནམས་མགྲོན་དུ་ཐོབ་པའི་མོད། །བསྡུ་བའི་དངོས་པོ་རྣམ་བཞིས་བསྟན་དང་འགྲོར། །ཕན་བདེའི་དགའ་སྟོན་སྤེལ་ལ་གསོལ་བ་འདེབས། ཞེས་གསུངས་པ་བཞིན། སྡེ་དགེ་ཆོས་རྒྱལ་ཆེན་པོ་དམ་ཚིག་རྡོ་རྗེ་མཆོག་གིས་གདན་ཞུས་ལྟར། དགུང་ལོ་ང་ལྔ་པ་ཆུ་ཡོས་ཕྱི་ལོ༡༨༤༣ལོར་འཇམ་དབྱངས་མཁྱེན་བརྩེའི་དབང་པོ་དང་བཅས་སྟོན་འཁོར་ལྷན་ཅིག་ཏུ་སྔོན་བཅོམ་ལྡན་འདས་ལ་འཁོར་དགྲ་བཅོམ་པ་རྣམས་ཀྱིས་བསྐོར་ཏེ་ལྗོངས་རྒྱུ་བ་བཞིན་དུ་སྤྱི་དང་བྱེ་བྲག་གི་ཆིབས་སྐྱེལ་གྱི་ཚོགས་ཤིན་ཏུ་རྒྱ་ཆེ་བ་དང་བཅས་ཨེཝཾ་ནས་ཆིབས་བཏེག་སྟེ། མདོ་སྨད་སྡེ་བཞི་དགེ་བཅུའི་དཔལ་གྱིས་མངོན་པར་སྒེག་པའི་རྒྱལ་ཁབ་ནས་མི་བདག་སའི་ཚངས་པ་ཆེན་པོའི་སྔ་ཕྱིར་ཆིབས་བསུའི་ཚོགས་དབྱར་གྱི་ཆུ་འཛིན་འཁྲིགས་པ་བཞིན་དུ་ལྷག་པ་རྣམས་དང་ལྷན་ཅིག་ཏུ་བྱོན། ཁྲུམས་ཟླའི་དཀར་ཕྱོགས་ཀྱི་རྒྱལ་བ་གསུམ་པའི་ཉིན་མདོ་ཁམས་ཟལ་མོ་སྒང་གི་སའི་ཐིག་ལེ་ལྷུན་གྲུབ་སྟེང་གི་རྒྱལ་ཁབ་ཆེན་པོར་ཕེབས། ཟླ་བ་དེའི་ཚེས་བཅོ་ལྔའི་ཉིན་མདོ་སྨད་བསྟན་འགྲོ་ཡོངས་ཀྱི་མགོན་དང་སྐྱབས་དང་དཔུང་གཉེན་དམ་པར་ཡོངས་སུ་མངའ་གསོལ་བའི་སླད་དུ། གཙུག་ལག་ཁང་བསམ་གྲུབ་མཐོང་གྲོལ་ཆེན་པོར་སྔོན་ངོར་མཁན་ཆེན་རིམ་བྱོན་གྱིས་ཞབས་ཀྱི་ཆུ་སྐྱེས་རྣམ་པར་བཀོད་པའི་སེང་གེས་བཏེགས་པའི་ཁྲི་འཕང་མཐོན་པོར་བཞུགས་སུ་གསོལ་ནས་ལེགས་འབུལ་རྒྱ་ཆེར་བསྟབས། དེ་དག་གི་སྐབས་སུ་མཁས་པའི་དབང་པོ་ཤར་བླ་མ་ཀུན་དགའ་དཔལ་ལྡན་པས་ཕུན་སུམ་ཚོགས་པ་ལྔ་དང་། མཎྜལ་གྱི་བཤད་པ་རྒྱ་ཆེར་སྤྲོས། གཉེར་ཆེན་རྒྱ་མཁར་དགེ་ལེགས་ཀྱིས་ཚིག་དོན་རྨད་དུ་བྱུང་བའི་ལེགས་འབུལ་གྱི་ཡི་གེ་བརྗོད་པ་དག་ཅིང་གསངས་མཐོ་བར་བསྒྲགས་པ་སོགས་སྔར་བཞིན་མཛད་དོ། གཙོ་བོར་ཕན་བདེ་གླིང་བླ་བྲང་དུ་བཞུགས་ནས་ལོ་རེ་བཞིན་དྲུག་འདུ་ཆེན་པོའི་དབུར་བཞུགས་མཛད། རྒྱུན་དུ་ཆོས་རྒྱལ་ཆེན་པོ་སྐུ་མཆེད་རྣམས་བཞེད་པ་ལྟར་གྱི་བཀའ་ཆོས་རྣམས་འབུལ་བ་དང་། སྐུ་རིམ་བསྒྲུབས་པ། དད་པ་ཅན་སོ་སོའི་ངོར་ཟབ་རྒྱས་ཀྱི་ཆོས་རྒྱ་ཆེན་པོ་གསུངས་ནས་རྣམ་གྲོལ་ལ་བཀོད་པར་མཛད། སྨན་ཤོད་དུ་བྱོན་སྐམས་ཧག་ལར་རྡོ་ལ་མ་ཎི་འཇིམ་པ་ལ་བྲིས་པ་ལྟར་ཕྱག་མཛུབ་ཀྱིས་བྲིས་པ་སོགས་གྲུབ་པའི་རྣམ་ཐར་བློ་འདས་སུ་སྟོན། དགུང་ལོ་དྲུག་ཅུ་པར་སླར་དབུས་གཙང་དུ་ཕེབས། ཐུགས་དམ་ལ་རྩེ་གཅིག་ཏུ་བརྩོན་པས་སྐུ་ཚེ་དང་སྒྲུབ་པ་མཉམ། དགུང་གྲངས་དོན་དྲུག་པ་ཤིང་བྱི་ཕྱི་ལོ་༡༨༦༤ལོར་རྡོ་རྗེ་རྣམ་འབྱོར་མའི་འཕོ་བའི་སྒོ་ནས་གཟུགས་སྐུའི་བཀོད་པ་དབྱིངས་སུ་བསྡུས་སོ།། ༈ ངོར་མཁན་རབས་ང་གཉིས་པའམ་ང་གསུམ་པ་ཕན་ཁང་ཀུན་དགའ་བསྟན་པའི་བློ་གྲོས་ནི། རབ་བྱུང་བཅུ་བཞི་པའི་ཆུ་རྟ་ཕྱི་ལོ་༡༨༢༢ལོར་སྐུ་འཁྲུངས། འཆི་མེད་བསྟན་པའི་ཉི་མས་དཔལ་ལྡན་ཆོས་སྐྱོང་གི་དབོན་རིན་ཆེན་ཆོས་མཛད་ཀྱི་སྐུ་སྐྱེ་ཡིན་ཚུལ་ལུང་བསྟན། རང་ཉིད་ཀྱིས་ཀྱང་སྔོན་གནས་རྗེས་དྲན་གྱི་ཞལ་བཞེས་མཛད། དགུང་ལོ་དགུ་པར་ངོར་ཕན་བདེ་བླ་བྲང་དུ་བྱམས་པ་དཔལ་ལྡན་བཟང་པོ་ལས་ཟབ་ཆོས་འགའ་ཞིག་གསན། ཆོས་སྤྱོད་ཆོ་ག་སོགས་སློབ་སྦྱང་བགྱིས་པས་རིག་པའི་ཕུལ་ཕྱིན། རྣལ་འབྱོར་འཇམ་དཔལ་བཟང་པོ་ལས་སྡོམ་པ་གསུམ་དང་ལམ་འབྲས་ཀྱི་ཆོས་སྐོར་རྣམས་གསན་ནས་རྩ་བའི་རིགས་བདག་ཏུ་འཛིན། བྱམས་པ་ཀུན་དགའ་བསྟན་འཛིན། འཇམ་མགོན་ངག་དབང་ལེགས་གྲུབ་སོགས་ལས་ཟབ་ཆོས་མང་དུ་བཞེས། དགུང་ལོ་ཉེར་བདུན་ནས་སོ་གཅིག་བར་ངོར་མཁན་པོའི་ལས་ཁུར་བཞེས། དེ་ནས་ཁམས་སུ་བྱོན། སྡེ་དགེ་ཆོས་རྒྱལ་དཔལ་ལྡན་འཆི་མེད་རྟག་པའི་རྡོ་རྗེ་སོགས་སྐྱེ་རྒུ་ཆེ་ཕྲ་རྣམས་ཀྱིས་མཆོད་གནས་མཛད། ཉག་རོང་དམག་ཟིང་སྐབས་བསམ་གཏན་གྱི་ཚེར་མ་ཆེན་པོ་བྱུང་ཡང་ཏིང་ངེ་འཛིན་གྱི་སྟོབས་ཀྱིས་བར་ཆད་ཀྱི་གཡུལ་ལས་རྒྱལ། འཇམ་དབྱངས་མཁྱེན་བརྩེའི་དབང་པོ་ལས་མཁའ་སྤྱོད་དང་། ཀྱེ་རྡོར་རྒྱུད་བཤད་སོགས་གསན། མཁས་གྲུབ་ཀུན་དགའ་དཔལ་ལྡན་ལས་གསུང་ངག་སློབ་བཤད། རྭ་ཁྲིད། མགོན་པོ་ཆེ་ཆུང་གི་པོད་སོགས་སྙན་བརྒྱུད་ཡོད་དོ་ཅོག་བུམ་པ་གང་བྱོའི་ཚུལ་དུ་གསན། སྐུ་ཚེའི་སྨད་དུ་སྒ་ཐག་ལུང་དགོན་དང་ཉེ་བའི་བཀའ་འགྱུར་སྒར་ཞེས་པའི་དབེན་གནས་སུ་སྒྲུབ་པ་ཁོ་ན་ལ་བཞུགས་པས་ཉམས་རྟོགས་ཀྱི་ཀློང་རྡོལ། དགུང་ལོ་རེ་གསུམ་པ་ཤིང་སྤྲེལ་ཕྱི་ལོ་༡༨༨༤ལོར་ཞི་བར་གཤེགས་པའི་ཚུལ་བསྟན་ཏོ།། ༈ ངོར་མཁན་རབས་ང་བཞི་པའམ་ང་ལྔ་པ་ཁང་གསར་ངག་དབང་བསོད་ནམས་རྒྱལ་མཚན་ནི། གཙང་རོང་རྒྱ་སྟོན་ཞེས་པའི་ཡུལ་དུ་སྐུ་འཁྲུངས། ཆུང་ངུ་ནས་དམ་པའི་རིགས་སད་ངོར་ཁང་སར་དུ་བཞུགས། མཁན་ཆེན་ཀུན་དགའ་བསྟན་པའི་བློ་གྲོས་ལས་སྡོམ་པ་གསུམ་དང་ལམ་འབྲས་སོགས་ཀྱི་བདུད་རྩི་གསོལ། གནང་བཀག་གི་བསླབ་གཞི་ཐམས་ཅད་གཅེས་སྤྲས་ཀྱིས་བསྲུངས། ངོར་གྱི་འདོན་ཆོས་སྤྱོད་སོགས་མཁྱེན་པ་ལ་ཐུགས་རབ་ཤིན་ཏུ་ཆེ། བྱམས་པ་ཀུན་དགའ་བསྟན་འཛིན། རྣལ་འབྱོར་འཇམ་དཔལ་བཟང་པོ། བྱམས་པ་ཀུན་དགའ་བསྟན་པའི་རྒྱལ་མཚན་སོགས་ཡོངས་འཛིན་དུ་མ་ལས་མདོ་སྔགས་རིག་གནས་དང་བཅས་པའི་གཞུང་ལུགས་རྒྱ་མཚོ་ལྟ་བུ་གསན་ཅིང་མཁས་པར་གྱུར། ཁྱད་པར་དུ་དབྱངས་ཅན་མ་དཀར་མོ་བསྒྲུབས་པས་མཁྱེན་རབ་ཀྱི་རྩལ་རྫོགས། ལྷག་པའི་ལྷ་དུ་མའི་བསྙེན་སྒྲུབ་མཐར་ཕྱིན་པར་མཛད། ངོར་ཆེན་རྡོ་རྗེ་འཆང་གི་ཁྲི་ལ་ཞབས་པད་བཀོད་དེ་ལོ་བརྒྱད་ཀྱི་བར་དུ་ཟབ་རྒྱས་ཆོས་འཁོར་དཔག་མེད་བསྐོར། དེ་ནས་སྡེ་དགེ་ཆོས་རྒྱལ་ཆེན་པོའི་མཆོད་གནས་སུ་མདོ་ཁམས་སུ་བྱོན། ལྷུན་གྲུབ་སྟེང་གི་ཕན་བདེ་ཀུན་ཁྱབ་གླིང་གི་བླ་བྲང་དུ་བཞུགས། ཆོས་རྒྱལ་ཆེན་པོས་གཙོས་པ་རྣམས་ལ་སྡོམ་གསུམ་རབ་དབྱེའི་བཤད་པ་མཐའ་དཔྱོད་དང་བཅས་པ་དང་། གསུང་ངག་རིན་པོ་ཆེ་ལམ་འབྲས་བུ་དང་བཅས་པ་སློབ་བཤད་ཀྱི་སྨིན་གྲོལ་ལྷུག་པར་བསྩལ། འཇམ་དབྱངས་མཁྱེན་བརྩེའི་དབང་པོ་ལས་དུས་ཀྱི་འཁོར་ལོའི་དབང་བཀའ་ཡོངས་རྫོགས་དང་། གསར་རྙིང་གི་ཆོས་བཀའ་ཤིན་ཏུ་མང་པོ་གསན། འཇམ་མགོན་བློ་གྲོས་མཐའ་ཡས་ལས་ཤེས་བྱ་ཀུན་ཁྱབ་སོགས་གཞུང་བཤད་རིགས་དུ་མ་གསན། ལྷུན་གྲུབ་སྟེང་གི་དབྱར་གནས་ཚོགས་དབུར་ཕེབས་ནས་སྡོམ་གསུམ་འཇམ་དབྱངས་བླ་མའི་དགོངས་རྒྱན་གསུངས་བཤད་དཔྱིས་ཕྱིན་པར་མཛད། གཞན་ཡང་ས་དགོན་ཁག་རྣམས་ལ་ཟབ་རྒྱས་ཀྱི་ཆོས་མང་པོ་གསུངས། གསུང་རྩོམ་གྱི་རིགས་འཁོར་འདས་དབྱེར་མེད་ཀྱི་ལྟ་བ་ཉམས་མགུར་དུ་བཞེས་པ་དང་། སྡོམ་གསུམ་འཇམ་དབྱངས་བླ་མའི་དགོངས་རྒྱན་རྩོམ་འཕྲོར་ལུས་པའི་ཁ་སྐོང་བ་སོགས་པོད་གཉིས་ཙམ་མཆིས། ཉག་དགྲས་བརླག་ཤུལ་གྱི་དགོན་སྡེ་མང་པོ་ཉམས་གསོ་མཛད་དེ་བསྟན་པའི་སྲོག་མཐུད་པས་ཕྱིས་སུ་ས་ལུགས་ཀྱི་དགོན་སྡེ་རྣམས་ཀྱི་མཚན་ཆགས་པའང་རྗེ་འདིའི་བཀའ་དྲིན་དུ་གསལ། ཁྲོམ་རྡོ་ཁོ་དགོན་དུ་བདེ་མཆོག་ནག་པོ་ལུགས་ཀྱི་སྒྲུབ་མཆོད་གསར་དུ་འཛུགས་པ་ལ་སྨིན་གྲོལ་དང་རྟེན་ཐེབས་རྒྱ་ཆེར་བསྩལ། ལྷུན་གྲུབ་སྟེང་སོགས་སུ་བསྟན་པའི་རྩ་བ་འདུལ་ཁྲིམས་དང་འགལ་བའི་དྲི་མ་དྲུང་ནས་འབྱིན་ཅིང་དག་ཐེར་བསྐྱངས། དཔལ་དུས་ཀྱི་འཁོར་ལོའི་དབང་མོ་ཆེ་རྗེ་མཁྱེན་བརྩེའི་ཕྱག་བཞེས་ཇི་བཞིན་བསྩལ། འཁོར་ལོ་གསུམ་གྱི་ཕྲིན་ལས་རྒྱ་ཆེར་མཛད་ཅིང་། སླར་ངོར་དུ་ཕེབས་ཏེ་དགུང་ལོ་ང་དགུ་པར་གཟུགས་སྐུའི་བཀོད་པ་བསྡུ་བའི་ཚུལ་བསྟན་ཏོ།། ༈ ངོར་མཁན་རབས་ང་དྲུག་པའམ་ང་བདུན་པ་དཔལ་ལྡན་བློ་གྲོས་རྒྱལ་མཚན་ནི། རབ་བྱུང་བཅུ་བཞི་པའི་ལྕགས་བྱི་ཕྱི་ལོ་༡༨༤༠ལོར་སྐུ་འཁྲུངས། ཆུང་ངུ་ནས་ངོར་ཕན་བདེ་བླ་བྲང་དུ་སྤྱན་དྲངས། ངོར་པའི་ཚོགས་འདོན་སྐོར། ཀུན་ཏུ་དགོས་པའི་གཞུང་བདུན་སོགས་ཐུགས་ལ་བཟུང་། བྱམས་པ་ཀུན་དགའ་བསྟན་འཛིན་ལས་རྡོ་རྗེ་འཇིགས་བྱེད་ལྷ་དགུའི་དབང་བཞི་བཞེས། བྱམས་པ་ཀུན་དགའ་བསྟན་པའི་རྒྱལ་མཚན་གྱི་དྲུང་ནས་རབ་བྱུང་བསྙེན་རྫོགས་སོགས་སྡོམ་པ་གསུམ་དང་། གསུང་ངག་ལམ་འབྲས་སོགས་སྨིན་གྲོལ་རྒྱ་ཆེར་གསན། མདོ་ཁམས་ཕྱོགས་སུ་བྱོན་ཏེ་ཀུན་དགའ་བསྟན་པའི་བློ་གྲོས། འཇམ་མགོན་ངག་དབང་ལེགས་གྲུབ། ཆོས་རྗེ་ཀུན་དགའ་དཔལ་ལྡན་རྣམས་ལས་ཟབ་ཆོས་བཞེས། ཁྱད་པར་འཇམ་དབྱངས་མཁྱེན་བརྩེའི་དབང་པོ་ལས་སྒྲུབ་ཐབས་ཀུན་བཏུས། ཀྱེ་རྡོ་རྗེའི་བཤད་བཀའ་ཡོངས་རྫོགས། མཁའ་སྤྱོད་ཁྲིད་སོགས་ལོ་ཤས་གསན། འདི་སྐབས་ཉག་དགྲས་བསྟན་འགྲོ་ལ་སྡུག་སྦྱོར་གྱི་བྱ་བ་བྱུང་ཡང་རྗེ་འདི་ཆོས་སྲུང་གི་ཕྲིན་ལས་ཀྱིས་བར་ཆད་མ་བྱུང་། ལོ་བཅུ་ཕྲག་སྐོར་ལྷུན་གྲུབ་སྟེང་སོགས་ཁམས་ཕྱོགས་སུ་བཞུགས། སླར་ངོར་དུ་ཕེབས། ངོར་ཆེན་རྡོ་རྗེ་འཆང་གི་ཁྲི་ལ་ཞབས་པད་བཀོད་དེ། ལོ་བདུན་གྱི་རིང་ལ་སོར་བྱང་སྔགས་གསུམ་ལམ་འབྲས་སོགས་ཆོས་ཀྱི་དགའ་སྟོན་སྤེལ། དེ་ནས་སླར་ཡང་ཁམས་སུ་ཕེབས། སྐྱེ་རྒུ་དོན་གྲུབ་གླིང་དུ་རྡོར་ཕྲེང་སོགས་ཆོས་འཁོར་བསྐོར། རིམ་བཞིན་སྡེ་དགེ་ལྷུན་གྲུབ་སྟེང་དུ་ཕེབས་ཕན་བདེ་བླ་བྲང་དུ་བཞུགས་ཁྲིར་འཇགས། ཤར་ནུབ་ཆོས་རྗེ་སོགས་འདུས་ཚོགས་ལ་སྒྲུབ་ཐབས་ཀུན་བཏུས་ཁ་སྐོང་དང་བཅས་པ་སོགས་སྨིན་གྲོལ་རྒྱ་ཆེར་བསྩལ། འཇམ་མགོན་ཡོན་ཏན་རྒྱ་མཚོ་སོགས་དམ་པ་དུ་མ་ལས་དབང་ལུང་ཁྲིད་སོགས་བསམ་གྱིས་མི་ཁྱབ་པ་གསན། སྡེ་དགེ་མཆོད་ཡོན་ཤིན་ཏུ་ཐུགས་གཤིན་པས་མཆོད་ཡོན་གཉིས་ཀ་དབུས་གཙང་དག་པའི་ཞིང་དུ་ཕེབས། ས་ངོར་སོགས་ལ་དངོས་པོ་གྱ་ནོམ་པའི་མཆོད་སྤྲིན་སྤྲོས། སླར་ཡང་མཆོད་ཡོན་ལྷན་ཅིག་སྡེ་དགེ་ལྷུན་གྲུབ་སྟེང་དུ་ཕེབས་ཏེ་བཞུགས་ཁྲིར་འཇགས། དྲི་མེད་རྣམ་གཉིས་ཀྱི་མཆོད་རྟེན་ཁྱད་འཕགས་འགྲོ་བའི་བསོད་ནམས་ཀྱི་མཆོད་ལྡོང་དུ་བཞེངས། མཉམ་རྗེས་ཀུན་ཏུ་ལྟ་བ་ཟབ་མོ་ལས་ནམ་ཡང་གཡོ་བ་མེད་པས་ཐུགས་དམ་ཏིང་ངེ་འཛིན་ལ་ཉིན་མཚན་ཁོར་ཡུག་ཏུ་བཞུགས་པས་ཉམས་རྟོགས་རྒྱས། དགུང་ལོ་རེ་གཅིག་པ་ལྕགས་བྱི་ཕྱི་ལོ་༡༩༠༠ལོར་འདའ་ཁ་མའི་རྣལ་འབྱོར་ལ་བརྟེན་ཏེ་ཞི་དབྱིངས་སུ་མཉམ་པར་བཞག་པའི་ཚུལ་བསྟན་ཏོ།། ༈ ངོར་མཁན་རབས་ང་བདུན་པའམ་ང་བརྒྱད་པ་འཇམ་དབྱངས་རིན་ཆེན་རྡོ་རྗེ་ནི། རབ་བྱུང་བཅུ་བཞི་པའི་མེ་བྱ་ཕྱི་ལོ་༡༨༣༧ལོར་སྐུ་འཁྲུངས། ཨེཝཾ་ཐར་རྩེར་ཕེབས་ནས་ཡི་གེ་འབྲི་ཀློག་སོགས་ལ་བསླབ། བྱམས་པ་ཀུན་དགའ་བསྟན་འཛིན་ལས་དགེ་བསྙེན་གྱི་སྡོམ་པ་དང་། འཇམ་དབྱངས་དཀར་པོ། དབྱངས་ཅན་མའི་རྗེས་གནང་བཅས་གསན་པས་མཁྱེན་རབ་ཕུལ་དུ་ཕྱིན། རྗེ་དེ་ཉིད་ལས་སྡོམ་གསུམ་ཡོངས་སུ་རྫོགས་པའི་ཆོས་བཀའ་གསན་ཏེ་སུམ་ལྡན་རྡོ་རྗེ་འཛིན་པ་ཆེན་པོར་གྱུར། སྡོམ་གསུམ་གྱི་བསྲུང་བྱ་མཐའ་དག་མིག་འབྲས་བཞིན་དུ་གཅེས་པས་བསྐྱངས། བྱམས་པ་ཀུན་དགའ་བསྟན་པའི་རྒྱལ་མཚན། ཞྭ་ལུ་བློ་གསལ་བསྟན་སྐྱོང་སོགས་ཡོངས་འཛིན་དམ་པ་དུ་མ་བསྟེན་ནས་མདོ་སྔགས་གཞུང་ལུགས་རྒྱ་མཚོ་ལྟ་བུར་གསན། ཡི་དམ་དུ་མའི་བསྙེན་སྒྲུབ་མཐར་ཕྱིན་པར་མཛད། ཨེཝཾ་ཆོས་ལྡན་གྱི་གདན་སའི་ཁྲི་ལ་བཞུགས་ནས་ལོ་བརྒྱད་ཀྱི་རིང་ལ་ཆོས་འཁོར་རྒྱ་ཆེར་བསྐོར། དེ་ནས་ཁམས་ཕྱོགས་སུ་ཆིབས་བསྒྱུར་གནང་། བསོད་ནམས་སྟོབས་ཀྱི་འཁོར་ལོས་མདོ་སྨད་ས་གཞི་ཆོས་བཞིན་བསྐྱངས་པ་ལ་བསྙེངས་པ་དང་བྲལ་ཞིང་། སྡེ་བཞིའི་དཔལ་གྱི་གཡུ་རལ་སྟུག་པོས་བརྗིད་པ། དགེ་བཅུའི་ཁྲིམས་ཀྱི་ང་རོ་མངོན་མཐོར་སྒྲོགས་པས་སྐྱེ་རྒུ་མཐའ་དག་ཟིལ་གྱིས་གནོན་པའི་གདོང་ལྔ་པ། རྒྱལ་བའི་བསྟན་པ་སྤྱི་དང་བྱེ་བྲག་དཔལ་ལྡན་ས་ངོར་ཚར་གསུམ་གྱི་རིང་ལུགས་དྲི་མ་མེད་པ་དེ་འཛིན་དང་བཅས་པར་སྟོབས་ཀྱི་བཏེག་པ་ལ་མཚུངས་ཟླ་ཐམས་ཅད་དང་བྲལ་བ་སྡེ་དགེ་ཆོས་རྒྱལ་ཆེན་པོ་མཚོ་སྐྱེས་རྒྱལ་བའི་ལུང་གིས་བསྔགས་པ་དཔལ་ལྡན་འཆི་མེད་རྟག་པའི་རྡོ་རྗེ། བརྒྱ་བྱིན་ཉེ་དབང་གིས་བསྐོར་བ་བཞིན་དུ་མདུན་ན་འདོན་ཆེན་པོ་རྣམས་གཙོས་ལས་ཚན་བཅུ་གསུམ་ལ་སོགས་པ་ཆེན་པོའི་གོ་ས་ལ་དབང་ཞིང་རྒྱལ་པོའི་འཁོར་དུ་འོས་པའི་ཚོགས་རྣམས་དང་། ཆོས་གྲྭ་ཆེན་པོ་ལྷུན་གྲུབ་སྟེང་གི་བླ་མ་ལས་ཚན་རྣམས་དང་བཅས། རང་རང་ལ་འོས་པའི་ཆས་གོས་རྒྱན་གྱི་བྱེ་བྲག་གཟབ་པར་བསྟར་བས། མགྱོགས་འགྲོ་གསེར་གྱི་སྒ་སྲབ་སྤྲས་པ་དག་ལ་ཞོན་ནས་ཉེ་བར་ལྷགས་ཏེ་བསྟི་སྟངས་ཆེན་པོས་བསུ་བ་དང་། གུར་ལྷ་བརྒྱད། བྲམ་ཟེའི་གཟུགས་ཅན་སོགས་ཀྱི་ཞལ་འབག་སཱ་ལའི་ལྗོན་པ་འགྲོ་བ་ལྟ་བུ་རྣམས་བསུ་བར་ཕེབས། ཆོས་སྡེ་ཆེན་པོའི་དགེ་སློང་གི་དགེ་འདུན་གྲངས་ཀྱི་མཐའ་དཔོག་པར་དཀའ་བ་ལི་ཁྲིའི་རྒྱ་མཚོ་ཕྱུར་བུ་ལྟ་བུས་སྣ་ཚོགས་པའི་རོལ་མོ་དང་། མཆོད་རྫས་རྣམས་ཐོགས་ཏེ། དྲི་ཞིམ་པོའི་སྤོས་ཀྱི་ཕྲེང་བ་དང་། དྲི་ཟའི་གླིང་བུ་འཕྲོགས་པ་བཞིན་དུ་བྱས་པའི་སྒྲ་སྙན་པོས་མདུན་བསུས་དང་བཅས་གདན་ས་ལྷུན་གྲུབ་སྟེང་གི་རྒྱལ་ཁབ་ཆེན་པོར་ཕེབས་ཏེ་མཛེས་ཕུ་བཀྲ་ཤིས་རབ་བརྟན་ཞེས་བྱ་བར་ཞབས་སོར་བཀོད། དེ་ནས་ས་སྐྱོང་ཆེན་པོ་དཔལ་ལྡན་འཆི་མེད་རྟག་པའི་རྡོ་རྗེས་དབུའི་མཆོད་གནས་སུ་བཀུར་ཏེ་སྨིན་གྲོལ་གྱི་རིམ་པ་མང་དུ་བསྩལ། ལྷུན་གྲུབ་སྟེང་གི་ཆོས་གྲྭ་འདི་ཉིད་ཀྱི་དྲུག་འདུ་ཆེན་མོའི་ཚོགས་དབུར་ཕེབས། འཇམ་དབྱངས་མཁྱེན་བརྩེའི་དབང་པོ། ཞབས་དྲུང་ནམ་མཁའ་རྒྱལ་མཚན། ཀརྨ་ཡོན་ཏན་རྒྱ་མཚོ་རྣམས་ལས་སྒྲུབ་ཐབས་ཀུན་བཏུས་སོགས་ཟབ་ཆོས་མང་དུ་གསན། ལྷུན་གྲུབ་སྟེང་དུ་ཆོས་རྒྱལ་ཡབ་སྲས་རྣམས་ལ་འདོན་ཆོས་དང་། བླ་མ་ཆོས་རྗེའི་རིགས། དགེ་འདུན་གྱི་སྡེ་རྣམས་ལ་ངོར་དཀྱིལ་བདུན་སོགས་དབང་བྱིན་རླབས་རྗེས་གནང་སོགས་མང་པོ་བསྩལ། ཁྱད་པར་རྒྱུད་སྡེ་གསུམ་པ་རྣལ་འབྱོར་རྩ་བཤད་ཆ་མཐུན་རྒྱུད་ལས་བསྟན་པའི་དཔལ་རྩེ་དབྱིངས་གསུམ་སོགས་ཀྱི་དབང་སུམ་བཅུ་ཙམ་གྱི་རྒྱུན་ཆད་ལ་ཉེ་བ་ལུང་དང་བཅས་འཇམ་དབྱངས་བློ་གཏེར་དབང་པོ་ལ་བསྩལ་ཏེ་རྒྱུད་སྡེ་ཀུན་བཏུས་སུ་བཞུགས་པས་བསྟན་པའི་སྲོག་མཐུད་བཀའ་དྲིན་རི་ལྟར་ལྕི་བར་གྱུར། སྐྱེ་རྒུ་དོན་གླིང་དུ་ལམ་འབྲས་སློབ་བཤད་ཀྱི་དགའ་སྟོན་སྤེལ། སླར་དབུས་གཙང་དུ་བྱོན་ནས་བསྟན་འགྲོའི་དོན་མཛད། དགུང་ལོ་དྲུག་ཅུ་རྩ་ལྔ་པ་ལྕགས་གླང་ཕྱི་ལོ་༡༩༠༡ལོར་ངོ་མཚར་བའི་ལྟས་དང་བཅས་སྐུ་གཤེགས། ༈ ངོར་མཁན་རབས་ང་བརྒྱད་པའམ་ང་དགུ་པ་ངག་དབང་བློ་གྲོས་སྙིང་པོ་ནི། ལོ་ཙ་བ་ལྕེ་ཁྱི་འབྲུག་སོགས་བྱོན་པའི་རིགས་བརྒྱུད་དུ་སྐུ་འཁྲུངས། ངག་དབང་བློ་གྲོས་བསྟན་འཛིན་གྱི་སྤྲུལ་པའི་རྣམ་རོལ་དུ་གསུངས། ངོར་ཕུན་ཚོགས་ཁང་གསར་བླ་བྲང་དུ་གདན་དྲངས། བྱམས་པ་ཀུན་དགའ་བསྟན་འཛིན་ལ་གཙུག་ཕུད་ཕུལ། འབྲི་ཀློག་ཆོས་སྤྱོད་ཆོ་གའི་རིགས་སོགས་ཐུགས་འཛིན་མཛད། བྱམས་པ་ཀུན་དགའ་བསྟན་པའི་རྒྱལ་མཚན་ལས་སྡོམ་གསུམ་བཞེས། རྗེ་དེ་དང་། ངག་དབང་བསོད་ནམས་རྒྱལ་མཚན། འཇམ་དབྱངས་ཤེས་རབ་རྒྱ་མཚོ་སོགས་དམ་པ་དུ་མ་ལས་ལམ་འབྲས་སོགས་དབང་ལུང་ཁྲིད་རྗེས་གནང་བྱིན་རླབས་སྐོར་མང་དུ་གསན། ཀྱེ་རྡོར་སོགས་ཀྱི་བསྙེན་སྒྲུབ་མཐར་ཕྱིན། ཞབས་དྲུང་སྐབས་ཁམས་སུ་བྱོན་འགྲོ་དོན་མཛད། སླར་དབུས་གཙང་དུ་ཕེབས་སྟོད་མངའ་རིས་སྐོར་གསུམ་དུ་བྱོན་གདུལ་བྱ་ཕྲིན་ལས་རྒྱས། དེ་ནས་ངོར་ཆེན་རྡོ་རྗེ་འཆང་གི་ཁྲི་ལ་ལོ་བཅུ་ཙམ་བཞུགས་ནས་གསུང་ངག་སོགས་ཆོས་འཁོར་རྒྱ་ཆེར་བསྐོར། དེ་ནས་སོག་ཡུལ་དུ་བྱོན། རྡོ་རྗེ་ཕུར་པའི་སྒོ་ནས་ཕྲིན་ལས་མཛད། སྡེ་དགེ་ལྷུན་གྲུབ་སྟེང་དུ་ཕེབས་ཆོས་རྒྱལ་ཆེན་པོ། ཤར་ནུབ་ཆོས་རྗེ། དབྱར་གནས་མཁན་པོ་སོགས་ལ་ཟབ་ཆོས་མང་དུ་བསྩལ། མདོ་ཁམས་སྟོད་སྨད་དུ་ཕེབས་ཏེ་ཕྲིན་ལས་ཤིན་ཏུ་རྒྱས། མཐར་ངོ་མཚར་བའི་ལྟས་དང་བཅས་གཟུགས་སྐུའི་བཀོད་པ་བསྡུས། ༈ ངོར་མཁན་རབས་ང་དགུ་པའམ་དྲུག་ཅུ་པ་མཁྱེན་རབ་འཇམ་དཔལ་སྙིང་པོ་ནི། ངག་དབང་བློ་གྲོས་སྙིང་པོའི་དབོན་རིགས་སུ་འཁྲུངས། དམ་པ་དེ་ཉིད་ལས་སྡོམ་པ་གསུམ་ལམ་འབྲས་ཚོགས་སློབ་སོགས་བུམ་པ་གང་བྱོའི་ཚུལ་དུ་གསན། ཁྲི་ཆེན་འཇིགས་མེད་དབང་རྒྱལ་སོགས་ལས་ཟབ་ཆོས་མང་དུ་བཞེས། ཀྱེ་རྡོར་སོགས་བསྙེན་སྒྲུབ་མཐར་ཕྱིན། ངོར་ཨེཝཾ་པའི་ཆོས་ཁྲིར་ཕེབས་ནས་བསྟན་འགྲོའི་དོན་ཆེན་མཛད། ཁམས་སུ་བྱོན་སྡེ་དགེ་ཆོས་རྒྱལ་ཆེན་པོའི་མཆོད་གནས་མཛད་ཅིང་ཕྲིན་ལས་ཤིན་ཏུ་འཕེལ། ཁྲོམ་རྡོ་ཁོ་དགོན་དུ་ཕུར་པའི་སྒྲུབ་མཆོད་བཙུགས་པ་སོགས་ཕུར་པའི་སྒོ་ནས་འགྲོ་དོན་མཛད། གསོ་བ་རིག་པ་རང་བབས་སུ་མཁྱེན་པ་ལྟ་བུར་མངའ། དེ་ལྟར་བསྟན་འགྲོའི་དོན་བསམ་གྱིས་མི་ཁྱབ་པར་མཛད་དེ་ཞི་བར་གཤེགས་སོ།། ༈ ངོར་མཁན་རབས་དྲུག་ཅུ་པའམ་རེ་གཅིག་པ་ངག་དབང་ཀུན་དགའ་བསྟན་པའི་རྒྱལ་མཚན་ནི། རབ་བྱུང་བཅུ་བཞི་པའི་ཆུ་ཕག་ཕྱི་ལོ་༡༨༦༣ལོར་སྐུ་འཁྲུངས། དགུང་ལོ་བཅུ་གཉིས་པར་ངོར་ཕན་བདེ་བླ་བྲང་དུ་ཕེབས་ཏེ་ཞབས་དྲུང་གི་གོ་སར་འཁོད། འདོན་ཆོས་སྐོར། རྒྱུད་ཆུང་བཞི་སོགས་ཐུགས་འཛིན་རྩེར་སོན། མཁན་ཆེན་འཇམ་དབྱངས་རིན་ཆེན་རྡོ་རྗེ་ལས་སྡོམ་པ་གསུམ་དང་གསུང་ངག་ལམ་འབྲས་སོགས་ཀྱི་བདུད་རྩི་བཞེས། སྡོམ་གསུམ་གྱི་གནང་བཀག་ཚུལ་བཞིན་བསྲུངས། བསྙེན་སྒྲུབ་ཀྱི་རིགས་ཡང་དག་པར་བསྒྲུབས། དགུང་ལོ་བཅོ་ལྔ་པར་ཁམས་སུ་ཕེབས་སྒ་ཁོག་ཏུ་ཀུན་དགའ་བསྟན་པའི་བློ་གྲོས་ལས་སྔ་ཕྱིར་ཆོས་བཀའ་མང་ཙམ་གསན། ལྷུན་གྲུབ་སྟེང་དུ་བཞུགས་གདན་འཇགས། སྡེ་དགེ་ཆོས་རྒྱལ་ཡབ་སྲས་ཀྱི་དབུའི་མཆོད་གནས་མཛད། འཇམ་དབྱངས་མཁྱེན་བརྩེའི་དབང་པོ་ལས་ལམ་འབྲས་སློབ་བཤད་ཆ་ལག་དུ་མ་དང་སྒྲུབ་ཐབས་ཀུན་བཏུས་གསན། མཁན་དཔལ་ལྡན་བློ་གྲོས་རྒྱལ་མཚན་ལས་བདེ་གསང་འཇིགས་བྱེད་སོགས་དང་། འཇམ་དབྱངས་བློ་གཏེར་དབང་པོ་ལས་གུར་རིགས་བསྡུས། གཤེད་དམར་ལྷ་ལྔའི་དབང་ཁྲིད་སོགས་གསན། ནུབ་བླ་མ་འཇམ་དབྱངས་མཁྱེན་རབ་མཐའ་ཡས་ལས་སྡོམ་གསུམ་སྐོར་དང་། སྤྱོད་འཇུག་དབུ་མ་རྒྱན་སོགས་གསན། གཞན་ཡང་ཡོན་ཏན་རྒྱ་མཚོ། འཇམ་དབྱངས་མི་ཕམ་རྣམ་རྒྱལ་སོགས་ལས་ཟབ་ཆོས་མང་དུ་བཞེས། ལྷུན་གྲུབ་སྟེང་དུ་དྲུག་འདུ་ཆེན་མོའི་དབུར་བཞུགས་ལོ་མང་མཛད། ཀྱེ་རྡོར་རྒྱུ་ལམ་གྱི་དབང་སོགས་ངོར་དཀྱིལ་བདུན། གཤིན་རྗེ་གཤེད་དམར་ནག་འཇིགས་གསུམ། མགོན་པོ་ཆེ་ཆུང་སོགས་བཀའ་ཆོས་དཔག་མེད་གསུངས། དགུང་ལོ་སོ་གསུམ་པར་དབུས་གཙང་དུ་ཕེབས། ལོ་དེར་ངོར་ཆེན་རྡོ་རྗེ་འཆང་གི་ཁྲི་ལ་ཞབས་པད་བཀོད་དེ། ལོ་ལྔའི་བར་དུ་ལམ་འབྲས་སོགས་ཆོས་འཁོར་རྒྱ་ཆེར་བསྐོར། དགུང་ལོ་སོ་བདུན་པ་ས་ཕག་ཕྱི་ལོ་༡༨༩༩ལོར་སྐུ་མྱ་ངན་ལས་འདས་པའི་ཚུལ་བསྟན་ཏོ།། ༈ ངོར་དཔོན་སློབ་འཇམ་དབྱངས་བློ་གཏེར་དབང་པོ་ནི། གཙང་ཉང་སྨད་བསམ་གྲུབ་རྩེར་རབ་བྱུང་བཅུ་བཞི་པའི་མེ་ལུག་ཕྱི་ལོ་༡༨༤༧ལོར་སྐུ་འཁྲུངས། ཆུང་ངུ་ནས་བྱིས་པའི་སྤྱོད་པ་ལས་འདས་ཤིང་སྐྱེས་བུ་དམ་པའི་སྤྱོད་ཚུལ་དང་ལྡན་པས་ཀུན་གྱིས་ངོ་མཚར་དུ་འཛིན། དགུང་ལོ་དྲུག་པ་ནས་ཡི་གེ་འབྲི་ཀློག་ལ་བསླབ་པས་ཚེགས་མེད་དུ་མཁྱེན། དགུ་པར་ངོར་ཨེཝཾ་ཆོས་ལྡན་དུ་ཕེབས། བྱམས་པ་ཀུན་དགའ་བསྟན་འཛིན་ལས་ཡོངས་རྫོགས་དགེ་བསྙེན་གྱི་སྡོམ་པ་བཞེས། མཚན་ཚུལ་ཁྲིམས་རྒྱ་མཚོ་ཞེས་གསོལ། ངོར་པའི་ཚོགས་འདོན་གྱི་རིགས། རྒྱུད་ཆུང་བཞི། ཀུན་ཏུ་དགོས་པའི་གཞུང་བདུན་སོགས་ཐུགས་ལ་བཟུང་ཞིང་ཚིག་དོན་ལ་མཐའ་དཔྱོད་བཅས་དཔྱིས་ཕྱིན་པར་མཛད། ཁྱད་པར་དུ་ལྗོན་ཤིང་ཆེན་པོ་ཐུགས་འཛིན་གྱི་སྐབས་སུ་ཐོ་རངས་ཀྱི་དུས་ཞིག་ཏུ་གཟིམས་ཁང་གི་ནང་ཐམས་ཅད་ཉིན་མོ་བཞིན་དུ་འོད་ཀྱིས་གསལ་ལམ་མེར་གྱུར་པའི་མདུན་མཁར་དར་ཟབ་འབོལ་བརྩེགས་ཀྱི་སྟེང་དུ་བླ་མ་དགྱེས་འཛུམ་ཉམས་ཅན། དབུ་ཟླུམ་སྐྲ་དང་ན་བཟའ་དཀར་བ། གཟི་མདངས་རྒྱས་ཤིང་ཟིལ་ཆེན་པོ་དང་ལྡན་པ་ཞིག་གི་ཞལ་རས་མངོན་སུམ་དུ་མཇལ། དེ་མ་ཐག་ཏུ་བཟོད་མེད་ཀྱི་མོས་གུས་དྲག་པོ་སྐྱེས་པ་དང་། དེའི་ཞལ་ནས་རིགས་ཀྱི་བུ་ཁྱོད་ཀྱི་སྐྱེ་བ་སྔ་མ་རྣམས་ཀྱི་དགེ་བའི་བཤེས་གཉེན་ང་ཡིན། མ་འོངས་པའི་དུས་ན་ངའི་དྲུང་དུ་མངོན་པར་འོང་བར་འགྱུར་གྱི། རིང་པོར་མི་ཐོགས་པར་ཤར་གྱི་ཕྱོགས་སུ་སོང་ཤིག་དང་། དོན་ཆེན་པོ་འགྲུབ་པར་འགྱུར་རོ། དེ་ལ་བར་ཆད་ཀྱི་ཆོས་གང་ཡང་མེད་དོ་ཞེས་གསུངས་ལྷང་ལྷང་བྱུང་བའི་སྐད་ཅིག་ལ་གཟུང་འཛིན་གྱི་སྣང་ཞེན་དབྱིངས་སུ་ཡལ་ནས་འོད་གསལ་གྱི་ཉམས་སྐྱེས། མཁྱེན་རབ་ཀྱི་པདྨ་གྲོལ། འཇམ་དབྱངས་མཁྱེན་བརྩེའི་དབང་པོ་དེ་ད་ལྟ་རང་མཇལ་རྒྱུ་བྱུང་ན་དགའ་བ་ལ་སྙམ་པའི་དད་བློ་འགྱུར་བ་མེད་པ་ཞིག་སྐྱེས། སྐུ་དེ་ནི་བོད་ཡུལ་རྡོ་རྗེ་འཛིན་པའི་རྒྱལ་པོ་རྗེ་བཙུན་གྲགས་པ་རྒྱལ་མཚན་ཡིན་འདུག་གསུངས། བྱམས་པ་ཀུན་དགའ་བསྟན་པའི་རྒྱལ་མཚན་ལས་བསྙེན་པར་རྫོགས་མཚན་འཇམ་དབྱངས་བློ་གཏེར་དབང་པོར་གསོལ། རྗེ་དེ་ཉིད་རྩ་བའི་རིགས་བདག་ཏུ་འཛིན་ཅིང་སྡོམ་པ་གསུམ་དང་གསུང་ངག་རིན་པོ་ཆེ་ལམ་འབྲས་བུ་དང་བཅས་པས་གཙོས་གདམས་པ་རྒྱ་ཆེར་གསན། གཞན་ཡང་དམ་པ་དུ་མ་བསྟེན་ནས་མདོ་སྔགས་རིགས་གནས་དང་བཅས་པའི་གཞུང་ལུགས་རྒྱ་མཚོ་ལྟ་བུར་གསན་ཅིང་ཐུགས་ལ་བྱང་བར་མཛད། ལྷག་པའི་ལྷ་དུ་མའི་བསྙེན་སྒྲུབ་དང་ཉམས་ལེན་མཛད། དགུང་ལོ་ཉེར་གསུམ་པ་ནས་ལོ་ལྔའི་བར་ངོར་ཨེཝཾ་དུ་ཚོགས་ཀྱི་རྡོ་རྗེ་སློབ་དཔོན་དང་། ལོ་བསྟར་དགེ་སློང་བརྒྱ་ཕྲག་མང་པོའི་ལས་སློབ་མཛད། དགུང་ལོ་ཉེར་བརྒྱད་པར་ཐར་རྩེ་ཞབས་དྲུང་དུ་མངའ་གསོལ། སྡེ་དགེ་ཆོས་རྒྱལ་ཆེན་པོས་གདན་ཞུས་ལྟར་སྡེ་དགེ་ལྷུན་གྲུབ་སྟེང་གི་རྒྱལ་ཁབ་ཆོས་སྡེ་ཟུང་འབྲེལ་དུ་ཞབས་ཀྱི་པདྨ་བཀོད་དེ། ལུང་ཟིན་ཆོས་རྒྱལ་ཆེན་པོ་དང་མཇལ་འཕྲད་མཛད།་ ལྷུན་གྲུབ་སྟེང་འདི་ཉིད་དུ་དགོན་སྡེ་མ་ལག་བདུན་གྱི་དགེ་འདུན་འདུས་པའི་དབུ་ལ་བཞུགས་ཏེ། དྲུག་ཅུ་དང་ངོར་དཀྱིལ་བདུན་གྱི་སྒྲུབ་མཆོད་འདུ་བ་ཆེན་མོར་གྲགས་པའི་རྡོ་རྗེ་སློབ་དཔོན་མཛད་པ་དང་། རྗེ་བཙུན་གོང་མ་ལྔའི་གསུང་པོད་ཀྱི་ལྗགས་ལུང་གནང་། རྫོང་གསར་བཀྲ་ཤིས་ལྷ་རྩེར་ཕེབས། རྗེ་བླ་མ་འཇམ་དབྱངས་མཁྱེན་བརྩེའི་དབང་པོའི་ཞལ་མཇལ་ཐུགས་ཡིད་གཅིག་འདྲེས་སུ་གྱུར། རྗེ་དེ་དང་འཇམ་མགོན་བློ་གྲོས་མཐའ་ཡས་སོགས་དམ་པ་དུ་མ་ལས་སྨིན་གྲོལ་དཔག་མེད་གསན། མདོར་ན་ཡོངས་འཛིན་བཅུ་ཕྲག་བཞི་ལྷག་ཙམ་གྱི་ཞལ་ནས་གསང་སྔགས་གསར་མའི་ཕྱོགས་སུ་ཁྱབ་ཆེ་བའི་སྤྱི་བཀའ་དང་ཟུར་བཀའ་བསྡོམས་པའི་དབང་ཆེན་བརྒྱ་ཕྲག་གསུམ་ལ་བཅུ་ཕྲག་ཁ་ཡར་གྱིས་ལྷག་པ་དང་། ཁྲིད་བཀའ་བརྒྱ་ཕྲག་གཅིག་ལ་བཅུ་ཕྲག་བདུན་གྱིས་ལྷག་པ་དང་། སྤྱི་ཟུར་ཕྱོགས་བསྡོམས་ཀྱི་རྗེས་གནང་སྟོང་ཕྲག་ལྷག་ཙམ་དང་། རྒྱལ་བའི་བཀའ་འགྱུར་རོ་འཚལ་དང་། བསྟན་བཅོས་འགྱུར་རོ་འཚལ་གྱི་ལུང་རྒྱུན་གང་བཞུགས་དང་། བོད་ཡུལ་གྱི་མཁས་གྲུབ་རྣམས་ཀྱིས་བཀའ་བསྡུ་དང་། གསལ་བྱེད། ཆོག་ཁྲིགས་གང་དང་གང་གནང་བ་རྣམས་ཀྱི་བཀའ་པོད། བེའུ་བུམ། ཐོར་བུའི་རིགས་ལུང་རྒྱུན་གང་བཞུགས་ཐམས་ཅད་ཀྱི་པུསྟཀ་བརྒྱ་ཕྲག་མང་པོ་གསན་ཅིང་ཟབ་རྒྱས་ཆོས་ཚུལ་རྒྱ་མཚོ་ལྟ་བུ་དེ་དག་ལ་མཁྱེན་རབ་ཀྱི་ཀློང་རྡོལ། སྔོན་ཐར་རྩེ་མཁན་ཆེན་བྱམས་པ་ཀུན་དགའ་བསྟན་པའི་རྒྱལ་མཚན་གྱིས་དགོངས་པ་གཏད་པ་བཞིན། རྗེ་འཇམ་དབྱངས་མཁྱེན་བརྩེའི་དབང་པོས་ཀྱང་ཐར་རྩེ་མཁན་ཆེན་གྱི་དཀར་ཆག་ནོར་བུ་ཕྲེང་མཛེས་གཞིར་བཞག་ནས་རྒྱུད་སྡེའི་བཀའ་བསྡུ་དགོས་ཚུལ་བསྐུལ་བ་ལྟར། དགུང་གྲངས་སོ་དྲུག་པ་ཆུ་རྟ་ལོར་ཆོག་སྒྲིག་གི་དབུ་བཙུགས་ནས། རྒྱུད་སྡེ་སོ་སོའི་བཀའ་བབས་བརྒྱུད་ལྡན་བླ་མ་རྣམས་ཀྱི་ཡིག་ཆ་ཁུང་བཙུན་ལ་གཞི་དང་རྩ་བའི་སྲོག་ཏུ་བཟུང་། སྒྲུབ་དཀྱིལ་དབང་ཆོག་དང་བཅས་པ་ལ་གསལ་བྱེད་ཞུ་དགོས་པ་དང་། སོགས་ཁོང་ཕུད་དགོས་པ། གོ་རིམ་སྡེབ་དགོས་པ་བཅས་ཀྱི་དཔེ་ཚན་སུམ་བརྒྱ་དང་གསུམ་ཙམ་གསར་དུ་སྤེལ། སྤྱི་བཀའ་རྡོ་རྗེ་ཕྲེང་བ་ཐར་པཎ་གྱི་ཡིག་ཆ་ཉིད་བཞག་ནས་རྒྱུད་སྡེ་རིན་པོ་ཆེ་ཀུན་ལས་བཏུས་པའི་མཛོད་ཆེན་པོར་གྲུབ། དེ་རྣམས་ཀྱང་གཅིག་ལས་མང་པོའི་རྒྱུན་འབྱུང་བའི་སྤར་གྱི་འཕྲུལ་འཁོར་གྱི་ཡོན་སྦྱོར་རྗེ་ཉིད་ཀྱིས་མཛད་དེ་རྒྱུད་སྡེའི་པོད་ཆེན་སུམ་ཅུ་དང་། མཆན་འགྲེལ་སྐོར་དང་། སྐྱེས་རབས་བརྒྱ་ལྔ་བཅུ་པ། ཐོར་བུའི་སྐོར་འགའ་ཞིག་དང་བཅས་པ་སྤར་དུ་བསྐྲུན། རྒྱུད་སྡེའི་དཀྱིལ་འཁོར་གྱི་ཞལ་ཐང་སུམ་བརྒྱ་དང་བཅུ་ཕྲག་ལྷག་ལ་བཟང་གོས་སྤུས་ལེགས་ཀྱི་ཤན་དང་ལྡན་པ་དང་། དཀྱིལ་འཁོར་གྱི་བྱ་བ་ལ་ཉེ་བར་མཁོ་བའི་ཡོ་བྱད་དང་བཅས་པ་ལེགས་པར་བསྒྲུབས། དུས་ཕྱིས་ཕལ་ཆེར་ལྷུན་གྲུབ་སྟེང་གི་ཆོས་གྲྭ་འདི་ཉིད་དང་། ལ་གླ་སྟེང་ལྷུན་གྲུབ་ཡང་རྩེའི་དབེན་གནས་སུ་བཞུགས་ནས། ལྷུན་གྲུབ་སྟེང་འདིར་གསོ་སྦྱོང་། དབྱར་གནས། དགག་དབྱེ་སྟེ་འདུལ་བ་གཞི་གསུམ་གྱི་ཕྱག་ལེན་གསར་དམ་དང་། སྙུང་གནས་དང་། ཐར་ཆོག་ལན་མང་དུ་མཛད་ནས་འབྲེལ་ཚད་དོན་ལྡན་དུ་གནང་། གསུང་ངག་ལམ་འབྲས་སོགས་ཀྱི་ཆོས་འཁོར་རྒྱ་ཆེར་བསྐོར་། ལྷུན་གྲུབ་ཡང་རྩེའི་དབེན་གནས་སུ་ཐུགས་དམ་ཉམས་བཞེས་དང་། ཆོས་འཆད་སྤེལ་སོགས་ཀྱི་ཕྲིན་ལས་ཤིན་ཏུ་འཕེལ། འཇམ་དབྱངས་མཁྱེན་བརྩེའི་དབང་པོས་གསར་བསྒྲིགས་གནང་བའི་སྒྲུབ་ཐབས་ཀུན་བཏུས་ཀྱི་ཞལ་སྐོང་དང་། གསུང་ངག་རིན་པོ་ཆེ་ལམ་འབྲས་བུ་དང་བཅས་པ་སློབ་བཤད་ཟབ་མོའི་བཀའ་བསྡུ་མཛད་དེ། ལམ་འབྲས་ཁྲིད་ཀྱི་ཤིང་རྟ་རྣམ་གཉིས་ཀྱི་དགོངས་པ་འགལ་མེད་དུ་བསྒྲུབས་པ་སོམ་ཉིའི་མུན་སེལ་དང་། ཁྲིད་འཆད་ཐབས་ཀྱི་ཡི་གེ་གསར་སྤེལ་བཅས་པོད་ཆེན་བཅུ་བདུན་བསྡུས་ནས་ཤིང་སྤར་དུ་བསྐྲུན། ཚད་མ་རིགས་གཏེར། མངོན་པ་མཛོད། མངོན་རྟོགས་རྒྱན་། དབུ་མ་འཇུག་པའི་འགྲེལ་པ་སོགས་བསྟན་བཅོས་མང་དུ་སྤེལ། སྡེ་དགེ་རྒྱལ་བློན་ནང་འཁྲུགས་དང་། མཆོད་ཡོན་ནང་འཁོན་གྱི་བཅད་མཚམས་དཔོན་ཆེན་དྲག་རྩལ་ཅན་གྱིས་བཏང་སྐབས་ཉེས་ཆེན་སྲོག་སྐྱོབ་གནང་ཞིང་། རིང་མིན་རྒྱལ་ཁབ་ལྷུན་གྲུབ་སྟེང་དུ་ཕེབས་ཏེ། ལྷ་ཁང་མགོན་ཁང་ཐམས་ཅད་དུ་ཆེད་དམིགས་ཀྱིས་གྲིབ་སེལ་སྨེ་བརྩེགས་ཀྱི་སྦྱིན་སྲེག་འབུམ་ཕྲག་མང་པོ་གནང་བ་དང་། བླ་གྲྭ་ཡོད་རིགས་ཕྱོགས་གཅིག་ཏུ་བསགས་ཏེ་རྡོ་རྗེ་སེམས་དཔའི་ཡི་གེ་བརྒྱ་པ་བྱེ་བ་མང་པོ་ཞིག་རྗེ་ཉིད་དབུར་བཞུགས་ཤིང་བཟླ་བར་མཛད་པ་ལ་བརྟེན་ནས། ཉམས་ཆག་གང་ཆེ་བྱུང་བའི་རྒྱུས་འདི་ཕྱི་གཉིས་ཀའི་བདེ་ལེགས་ཐམས་ཅད་འགྲིབ་པར་འགྱུར་བའི་གསོས་སྨན་བླ་ན་མེད་པ་དུས་ལས་མི་ཡོལ་བར་གནད་ཐོག་ཏུ་སྨིན་པར་མཛད་པ་འདི་ལྟ་བུའི་གཞན་ཕན་རླབས་ཆེན་ཀྱི་སྤྱོད་པ་ཡང་ཆེར་རློམ་གཞན་ལ་མངོན་མཐོང་མ་བྱུང་ངོ་། །དགུང་ལོ་རེ་བཞི་པར་སྒ་སྟོད་དུ་ཕེབས་ཏེ་བསྟན་འགྲོའི་དོན་ཆེན་མཛད། སྔ་ཕྱིར་ངོར་ཨེཝཾ་དང་། ལྷུན་གྲུབ་སྟེང་། ལྷུན་གྲུབ་ཡང་རྩེ། རྫོང་སར་བཀྲ་ཤིས་ལྷ་རྩེ། སྐྱེ་རྒུ་དོན་གྲུབ་གླིང་སོགས་སུ་རྒྱུད་སྡེ་ཀུན་བཏུས་ཚར་ལྔ། ལམ་འབྲས་སློབ་བཤད་ཚར་བཞི། སྒྲུབ་ཐབས་ཀུན་བཏུས་ཚར་བཞི། རྡོ་རྗེ་ཕྲེང་བ་ཚར་གཅིག །རྒྱལ་བཀའ་རིན་པོ་ཆེའི་ལྗགས་ལུང་གཙོས་ཟབ་རྒྱས་གདམས་པ་རྒྱ་མཚོའི་ཆོས་འཁོར་བར་མེད་དུ་བསྐོར་བས་བསྟན་འཛིན་གྱི་སྐྱེས་བུ་དཔག་ཏུ་མེད་པ་ཞིག་བསྐྲུན་ཏེ་ཕྲིན་ལས་ནམ་མཁའ་དང་མཉམ་པར་གྱུར། འབུལ་ནོད་བྱུང་རིགས་ཐམས་ཅད་ཀྱང་ཆུད་ཟོས་སུ་མི་འགྲོ་བར་བསྟན་འགྲོའི་དོན་ཁོ་ནར་གཏོང་བར་མཛད། མཐར་དགུང་ལོ་རེ་བརྒྱད་པ་ཤིང་སྟག་ཕྱི་ལོ་༡༩༡༤ལོར་ངོ་མཚར་བའི་ལྟས་དང་བཅས་ཏེ་གཟུགས་སྐུའི་བཀོད་པ་བསྡུས་པའི་ཚུལ་བསྟན་ཏོ།།
མུ་འགོད།་་་་་་་
' རྩོམ་འོག་མ།
སྡེ་དགེའི་རྒྱལ་རབས་མུ་ཏིག་ཕྲེང་བ། ༼དགུ་པ་༽