སྡེ་དགེའི་རྒྱལ་རབས་མུ་ཏིག་ཕྲེང་བ། ༼བདུན་པ།༽
སྡེ་དགེའི་རྒྱལ་རབས་མུ་ཏིག་ཕྲེང་བ། ༼ཚན་པ་བདུན་པ།༽མཛད་པ་པོ་བར་མ་མཁན་པོ་ངེས་དོན།
བསྟན་འཛིན་སྐྱེས་བུ་ཇི་སྙེད་བྱོན་པས་བསྟན་པ་འཛིན་སྐྱོང་སྤེལ་གསུམ་མཛད་ཚུལ་རྒྱས་པ་ནི་ས་ངོར་གྱི་གདུང་རབས་གདན་རབས། ལམ་འབྲས་བླ་མ་བརྒྱུད་པའི་རྣམ་ཐར། སོ་སོའི་རྣམ་ཐར། ཆོས་འབྱུང་རྣམས་སུ་བལྟ་བར་བྱའོ། །སྐབས་དོན་བསྡུ་བ་ལ་དངོས་དང་། ཞར་བྱུང་གཉིས་ལས་དང་པོ་ནི། དཔལ་ས་སྐྱོང་སྡེ་དགེ་ཆོས་ཀྱི་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་འདོད་དགུ་རབ་འཕེལ་ཞེས་བྱ་བ། སྡེ་དགེ་རྒྱལ་པོ་ཚེ་དབང་རྡོ་རྗེ་རིག་འཛིན་གྱིས་མཛད་པ་ལས། བླ་ཡི་མཆོད་གནས་སོ་སོའི་སྐབས་སྨོས་བཞིན། །ཁྱད་པར་ལོ་རྒྱུས་མདོ་ཙམ་བསྡོམས་བརྗོད་ན། །གངས་རིའི་ལྗོངས་འདིར་ས་དགེ་རྙིང་དཀར་འབྲུག །གྲགས་ཆེ་དེ་ལ་ནང་གསེས་མང་བྱུང་བའི། །སྲོལ་འཛིན་སྐྱེས་ཆེན་དམ་པ་མང་དུ་བྱོན། །སྡེ་དགེའི་བརྒྱུད་པ་རིམ་པར་བྱུང་དག་གིས། །ཆོས་ཕྱོགས་གཙོ་བོར་སྟོན་པས་རང་སྐབས་ཀྱི། །རིས་བྲལ་བླ་མ་སོ་སོ་བསྟེན་མོད་ཀྱི། །དེ་དག་ནང་ནས་འགར་སྟོན་དག་གི་སྐབས། །འབྲི་གུང་པ་དང་འཇམ་དབྱངས་མི་ཡི་གཟུགས། །ས་སྐྱ་པཎ་ཆེན་བསྟེན་པར་གྲགས་ཆེ་ཞིང་། །ཁྱད་པར་ཆོས་སྲིད་དཔལ་གྱིས་མངོན་མཐོ་ཞིང་། །ལུགས་ཟུང་བགྱི་བས་བསྟན་འགྲོའི་ཕན་བདེའི་དཔལ། །རྒྱ་མི་ཆུང་ཙམ་སྤེལ་གྱུར་འདིའི་དང་ཐོག །དགེ་སློང་བསོད་ནམས་རིན་ཆེན་ཞེས་པ་མཆེད། །མཚན་མཆོག་གསུམ་ལྡན་འཇམ་དཔལ་དབྱངས་ཀྱི་གདུང་། །གངས་ལྗོངས་བསྟན་པའི་མངའ་བདག་ས་སྐྱ་པ། །ཆོས་ཀྱི་རྒྱལ་པོ་འཕགས་པ་རིན་པོ་ཆེས། །ལུགས་ཟུང་གོ་ས་ཆེན་པོར་དབང་བསྐུར་ཞིང་། །དེ་རྗེས་སྡེ་དགེ་བཀྲ་ཤིས་སེང་གེའི་དུས། །དུས་གསུམ་སྒྲིབ་མེད་གཟིགས་པའི་ལྕགས་ཟམ་པ། །མཆོད་ཡོན་ཟུང་གིས་ལྷུན་གྲུབ་སྟེང་ཆོས་གྲྭ། །བཙུགས་ཚེ་ཐང་སྟོང་རྒྱལ་པོས་གནས་སྲུང་དུ། །དཔལ་ལྡན་ས་སྐྱའི་བསྟན་སྲུང་ཡིད་བཞིན་ནོར། །ཞིང་སྐྱོང་ཙཏུརམུཁ་སྒྲུབས་ཤིག་བསྒོས། །དེ་བཞིན་ནམ་ལྷུན་གྲགས་པ་ལྷུན་གྲུབ་དང་། །དཔལ་ལྡན་སེང་གེ་ཨཱནནྡཏྣ །སོགས་ཀྱིས་དཔལ་ལྡན་ས་སྐྱའི་བསྟན་འཛིན་མཆོག །རྒྱལ་བས་ལུང་བསྟན་ངོར་ཆེན་རྡོ་རྗེ་འཆང་། །གོང་གི་བརྒྱུད་འཛིན་རྣམས་བསྟེན་བཞེད་སྲོལ་སྐྱོང་། །དེ་ནས་རིམ་པར་ཆོས་སྲིད་བསྟན་པའི་རྒྱུན། །མཆོག་རྒྱས་གྱུར་ནས་ཀུན་དགའ་རྒྱ་མཚོ་དང་། །བྱམས་པ་ཕུན་ཚོགས་མཆེད་སོགས་རིམ་བྱོན་གྱིས། །རྒྱལ་བ་གཉིས་པ་ངོར་ཆེན་བླ་མ་ཡི། །གདན་ས་ཨེཝྂ་ཆོས་ལྡན་གྲྭ་སར་ཞུགས། །གདུང་བརྒྱུད་བློན་འབངས་མངའ་རིས་གཏོགས་སོ་ཅོག །ཡོངས་རྫོགས་གྲྭ་རྒྱུན་ཨེཝྂ་ཆོས་ལྡན་དུ། །ཞུགས་པའི་སྲོལ་བཏོད་བཀའ་ཡིས་ལེགས་པར་འདོམས། །དཔལ་ལྡན་ངོར་པའི་གྲུབ་མཐའ་འཛིན་པར་མཛད། །དེ་ནས་ས་སྐྱའི་འཇམ་མགོན་རིམ་བྱོན་དང་། །བླ་སློབ་མཆོད་ཡོན་འབྲེལ་ཟབ་རབ་འཕེལ་ཞིང་། །ཨེཝྂ་ཁྲིར་བཞུགས་མཁན་སློབ་དམ་པ་རྣམས། །ས་ངོར་སྙིང་པོའི་བསྟན་པའི་སྲོལ་འཛིན་མཆོག། །ཚར་ཆེན་བླ་མའི་ལུགས་འཛིན་དམ་པའི་མགོན། །གནས་གསར་འཇམ་མགོན་ལ་སོགས་ལྗོངས་འདི་རུ། །སྤྱན་དྲངས་ཆོས་འཁོར་བསྐོར་ཞིང་བསྟན་པའི་རྒྱུན། །བཙུགས་སྤེལ་རྒྱལ་སའི་ལྟེ་བ་ས་ངོར་གྱི། །ལུགས་འཛིན་ཆོས་སྡེ་ལྷུན་གྲུབ་སྟེང་གཙོས་སུ། །བསྟན་སྲིད་སྐྱོང་བའི་སྲུང་མ་ཕོ་བྲང་རེར། །ས་ལུགས་གུར་ཞལ་མགོན་ཁང་རེ་རེ་དང་། །ཞལ་ངོ་གོང་མའི་ཐུགས་དམ་རྒྱུན་ལ་བསྟེན། །གཟིམ་ཆུང་རྣམས་སུ་མགོན་སྐུ་གཏོར་སྒམ་བཅས། །ཤས་ཆེར་བཞུགས་དང་ས་ངོར་འདྲེན་པ་མཆོག། །དག་གི་ཐུགས་རྗེ་བྱིན་རླབས་མངོན་གྱུར་གྱི། །དགེ་མཚན་བྱུང་ཚུལ་གོང་དུ་སྨོས་ལྟར་དང་། །ས་ངོར་བསྟན་སྤེལ་ཁོ་ནར་ཐུགས་འདུན་མཐིལ། །གཏད་པའི་མཆོད་ཡོན་རྣམས་དུས་སྐུ་ཚེ་དང་། །གདུང་བརྒྱུད་མངའ་ཐང་མཆོག་ཏུ་རྒྱས་བརྟན་སོགས། །ཐོག་མཐའ་བར་གྱི་རྒྱུ་མཚན་དུ་མ་ཡིས། །རྩ་བའི་གྲུབ་མཐར་བཀའ་བབས་དགེ་མཚན་གྱི། །དོན་རྟགས་ཚད་མས་གྲུབ་བཞིན་ས་སྐྱ་པའི། །གདུང་བརྒྱུད་རྣམས་དང་བུ་སློབ་སྤྱི་ཁྱད་པར། །ཨེཝྂ་པ་དང་ཚར་ལུགས་ཡར་ཀླུང་པ། །མཆོད་གནས་རིགས་བདག་མཆོག་ཏུ་བཟུང་བར་འོས། །དེ་བཞིན་ཐོག་མར་སྨད་ནས་སྟོད་ཕྱོགས་སུ། །བྱོན་དུས་ཀརྨ་པ་ཡིས་ལུང་བསྟན་པར། །ཁ་ཅིག་འཆད་དང་ཞལ་ངོ་སྔ་མ་འགའ། །བཀའ་བརྒྱུད་གྲུབ་མཐའ་ཞུགས་དང་སི་ཏུ་པས། །བསྟན་པའི་མཛད་པ་གཙོ་བོ་བཀའ་འགྱུར་གྱི། །ཞུས་དག་གནང་སོགས་ལ་བརྟེན་ཀརྨ་པ། །ལྔ་རིག་སི་ཏུ་རིན་པོ་ཆེ་སོགས་དང་། །དེ་བཞིན་གྲུབ་པའི་དབང་ཕྱུག་ཨཱནནྡ། །རྙིང་ལུགས་ཉམས་བཞེས་སྐྱོང་ཞིང་ཕྱག་ལེན་སྐྱོང་། །རིག་འཛིན་འཇའ་ཚོན་སྙིང་པོའི་གཏེར་ཆེན་མཆོག །ཀློང་གསལ་སྙིང་པོས་རྟེན་འབྱུང་ལེགས་བསྒྲིགས་དང་། །ཕོ་བྲང་རེ་འགར་རྙིང་ལུགས་གསོལ་ཀ་ཁང་། །ཡོད་སོགས་སྔ་འགྱུར་གྲུབ་དབང་ནུས་ལྡན་པ། །དག་གིས་རྐྱེན་སེལ་ཕན་སླེབས་བྱུང་བ་སོགས། །དེ་དག་རྣམས་ཀྱི་བརྒྱུད་འཛིན་བསླད་མེད་ཀྱང་། །བཀུར་སྟི་དབུ་བླར་བཞེས་པའི་འོས་སུ་ཆེ། །དེ་བཞིན་ཐུབ་བསྟན་གཞི་ཆེར་གྱུར་པ་དང་། །བདུན་པ་ཆེ་སོགས་རྒྱལ་མཆོག་མཆོད་ཡོན་གྱིས། །སྤྱན་སྐྱོང་དགེ་བས་རི་བོ་དགེ་ལྡན་དང་། །འཇིག་རྟེན་ལྷ་ཀླུའི་དགྱེས་བསྐང་སྣོད་བཅུད་ལ། །ཕྱ་གཡང་འབེབས་དང་འཚེ་བ་བཟློག་སོགས་ལ། །ཡེ་ནས་ཡོད་པའི་གཡུང་དྲུང་བོན་ལ་སོགས། །མདོར་ན་རྒྱལ་ཀུན་ཐབས་མཁས་ཐུགས་རྗེ་ཡིས། །གདུལ་བྱ་གང་ལ་གང་འདུལ་དམ་པའི་ཆོས། །ས་དགེ་དཀར་རྙིང་བོན་དུ་གྲགས་ལ་སོགས། །རིས་སུ་མ་ཆད་གྲུབ་པའི་མཐའ་ཐམས་ཅད། །ཕན་བདེའི་འབྱུང་གནས་ཉིད་དུ་ངེས་པ་ན། །རིས་སུ་མི་བཅད་དག་སྣང་ཕྱོགས་བྲལ་སྦྱོང་། །གུས་པས་ལེགས་མཆོད་སྐྱོང་སྤེལ་མཐུན་རྐྱེན་འོག །དེ་དག་ཁྲོད་ན་གནའ་ནས་རྒྱུན་མཆིས་དང་། །ལྡན་གྲོལ་ཡོན་ཏན་མཆོག་གིས་གང་ལྡན་པ། །དབུ་བླར་མངའ་གསོལ་གནང་བར་རིགས་ལགས་སོ། །ཞེས་གསུངས་སོ། །ཡང་སྡེ་དགེ་རྒྱལ་པོས་མཛད་པའི་གྲུབ་མཐའི་རྣམ་བཞག་ལས། མདོར་ན་གངས་རིའི་ཁྲོད་འདི་ཡི། །རྣམ་དག་གྲུབ་མཐའ་ཕལ་མོ་ཆེ། །རྩ་བ་དཔལ་ལྡན་ས་སྐྱ་པའི། །སློབ་རྒྱུད་འཕྲིན་ལས་ལས་བྱུང་ངོ་། །ཞེས་དང་། འགྲོ་མགོན་རྒྱལ་དབང་རྡོ་རྗེ་འཆང་། །ཐམས་ཅད་མཁྱེན་གཟིགས་ལྔ་པ་ཡིས། །བསྟོད་ཅིང་བསྔགས་པར་མཛད་པ་ལྟར། །སྙན་པ་དོན་ལྡན་འཇམ་པའི་དབྱངས། །དཔལ་ལྡན་ས་སྐྱ་པའི་རིང་ལུགས། །རིས་བྲལ་ཡོངས་ཀྱི་གཙུག་ན་མཐོ། །དེས་ན་སུ་ཞིག་མཁས་བཙུན་བཟང་། །འདོད་ན་ས་སྐྱའི་བཀའ་སྲོལ་ཟུངས། །ཐུན་མོང་དངོས་གྲུབ་འབད་མེད་འགྲུབ། །གྲུབ་པའི་གཙུག་རྒྱན་མཆོག་གི་ས། །སངས་རྒྱས་རྡོ་རྗེ་འཆང་འདོད་ན། །ས་སྐྱའི་བཀའ་སྲོལ་གུས་པས་ལོངས། །ཞེས་གསུངས།
གཉིས་པ་ཞར་བྱུང་ནི། བོད་ཀྱི་དུས་དེབ་ཞིག་ཏུ།
སྡེ་དགེ་རྒྱལ་པོ་དང་སྡེ་དགེ་པར་ཁང་།
སྡེ་དགེ་ནི་ད་ལྟའི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་ཁོངས་སུ་ཡོད་ཅིང་། སྐད་གྲགས་ཆེ་བའི་སྡེ་དགེ་རྒྱལ་པོའི་རྒྱལ་མཁར་ཡོད་ས་དེར་སྡེ་དགེ་པར་ཁང་བཏབ་ཡོད། སྡེ་དགེ་རྒྱལ་པོའི་གདུང་རབས་ལོ་རྒྱུས་སུ་འཁོད་པ་ལྟར་ན། ཡོན་གོང་མའི་དབུ་བླ་འགྲོ་མགོན་འཕགས་པ་སྡེ་དགེ་བརྒྱུད་ནས་ཕེབས་དུས། སྡེ་དགེའི་རྒྱལ་པོའི་མི་རབས་སོ་གཉིས་པ་༼འདི་ལ་འདོད་ཚུལ་མི་འདྲ་བ་ཡོད་༽བསོད་ནམས་རིན་ཆེན་ལ་ཡུལ་འདི་སྡེ་བཞི་དགེ་བཅུའི་ཡོན་ཏན་གྱིས་ཕྱུག་ཚུལ་གྱི་བསྔགས་པ་བརྗོད་ཅིང་། སྡེ་བཞི་དགེ་བཅུའི་རྗེ་དཔོན་ཞེས་མཚན་གསོལ་གནང་། ཕྱིས་སུ་དེའི་ལུང་གིས་བསྒྱུར་བའི་མངའ་རིས་ལ་སྡེ་དགེ་ཞེས་མིང་དུ་ཐོགས། གནམ་སྡེ་དགེ། ས་སྡེ་དགེ ཞེས་པའི་ཁམས་ཁུལ་གྱི་གཏམ་དཔེ་འདིས་སྡེ་དགེའི་དཔོན་ཚང་གི་དབང་ཤུགས་དང་མངའ་རིས་ཀྱི་ཁྱོན་གནམ་སའི་དོ་ཟླར་འོས་པ་སྟོན་གྱི་ཡོད། སྡེ་དགེ་རྒྱལ་པོའི་ཁྱིམ་རྒྱུད་དར་བའི་རྩེར་སོན་སྐབས་དེའི་མངའ་ཁོངས་ད་ལྟའི་སི་ཁྲོན་དང་། མཚོ་སྔོན། བོད་རང་སྐྱོང་ལྗོངས་བཅས་འབྲེལ་མཚམས་སུ་རྒྱ་བསྐྱེད་དེ་རྒྱ་ཁྱོན་སྤྱི་ལེ་གྲུ་བཞི་མ་བཞི་ཁྲི་ལྔ་སྟོང་ལྷག་ལ་སླེབས། སྡེ་དགེའི་མངའ་ཁོངས་ལས་ཀྱང་ཡངས་པ་ནི་སྡེ་དགེ་རྒྱལ་པོའི་ཐུགས་རྒྱ་རེད། སྡེ་དགེ་རྒྱལ་པོ་སྐུ་ཐོག་དང་པོ་བཀྲ་ཤིས་སེངྒེས་༡༤༤༨༼༦༽ལོར་གྲུབ་ཐོབ་ཆེན་པོ་ཐང་སྟོང་རྒྱལ་པོ་དང་མཉམ་དུ་ཐང་རྒྱལ་ལྷ་ཁང་བཞེངས། ༡༧༢༩ལོར་སྡེ་དགེ་རྒྱལ་པོ་བཅུ་གཉིས་པ་ཆོས་རྒྱལ་བསྟན་པ་ཚེ་རིང་གིས་ལྷ་ཁང་དེ་རྨང་དུ་བྱས་ནས་སྡེ་དགེ་པར་ཁང་བཞེངས་པ་རེད། སྡེ་དགེ་རྒྱལ་པོ་ནི་དྲག་པོའི་དཔུང་གི་སྦྱོར་བར་བརྟེན་ནས་སྲིད་སྐྱོང་མཁན་ཞིག་མ་ཡིན་པར་ཞི་བའི་ལས་ལ་བརྟེན་ནས་མཛད་རྗེས་ཆེན་པོ་སྐྱོང་མཁན་ཞིག་རེད། སྡེ་དགེའི་ཡུལ་འདི་བོད་ཀྱི་ཤར་མཐའ་རུ་ཁེལ་ཡོད་མོད། སྡེ་དགེ་རྒྱལ་པོ་རིམ་བྱོན་གྱིས་ཕྱོགས་དང་རིས་སུ་མ་ཆད་པའི་སྒོ་ནས་ཆོས་ལུགས་གྲུབ་མཐའ་ཁག་བླ་རུ་བཀུར་སྟབས། ས་དགེ་ཀར་རྙིང་དང་བཅས་པའི་གྲུབ་མཐའ་ཁག་ཙམ་དུ་མ་ཟད། གཡུང་དྲུང་བོན་གྱི་ཆོས་རྒྱུད་ཀྱང་ད་ལྟའི་བར་སྡེ་དགེར་འཛིན་སྐྱོང་སྤེལ་གསུམ་བྱེད་བཞིན་ཡོད། ཀྲུང་ཧྭ་མིང་གོའི་སྐབས་སུ་སྡེ་དགེར་གྲུབ་མཐའ་ཁག་གི་དགོན་སྡེ་༢༠༠ལྷག་དང་རབ་བྱུང་བ་ཁྲི་གསུམ་ལྷག་ཡོད། དེ་ལས་དགོན་སྡེ་ལྔ་ནི་སྡེ་དགེ་རྒྱལ་པོ་ཚང་གི་རེད། གནས་བབ་དེ་ལྟ་བུའི་དབང་གིས་སྡེ་དགེའི་ཆོས་ལུགས་དང་སྒྱུ་རྩལ་ལ་སྔ་ན་མེད་པའི་འཕེལ་རྒྱས་བྱུང་བ་རེད། སྡེ་དགེ་པར་ཁང་ནི་སྡེ་དགེའི་བོད་ཀྱི་རིག་གནས་ཀྱི་ཉིང་བཅུད་ཡིན་པ་སུ་ཡིས་སྙོན། བོད་ཁུལ་གྱི་པར་ཁང་གཞན་དག་ཏུ་གཙོ་བོ་དགེ་ལུགས་པའི་བསྟན་བཅོས་པར་དུ་འདེབས་པ་ཡིན་མོད། སྡེ་དགེ་པར་ཁང་དུ་ནི་གྲུབ་མཐའ་དང་ས་གནས་རིས་སུ་མ་ཆད་པའི་གླེགས་བམ་སྣ་ཚོགས་པར་འདེབས་དང་། ཉར་ཚགས། སྲུང་སྐྱོང་། ཁྱབ་སྤེལ་བཅས་བྱེད་ཀྱི་ཡོད། དུས་རབས་གཉིས་ལྷག་འདས་རྗེས་ཀྱི་དུས་རབས་༢༠པའི་ལོ་རབས་༦༠པའི་དུས་སྟོད་དུ། སྡེ་དགེ་པར་ཁང་དུ་ཁྱོན་བསྡོམས་པར་ཤིང་འབུམ་གསུམ་ལྷག་ཡོད། རིག་གནས་གསར་བརྗེའི་ཆག་ཆེ་ཉམ་ང་བརྒྱུད། ད་ལྟ་ད་དུང་སྔོན་གྱི་པར་ཤིང་གི་སུམ་ཆ་གཉིས་ཉར་ཚགས་བྱས་ཡོད། ༡༩༩༦ལོར་སྡེ་དགེ་པར་ཁང་རྒྱལ་ཁབ་རིམ་པའི་རིག་དངོས་སྲུང་སྐྱོང་སྡེ་ཚན་དུ་བདམས། པར་ཁང་གི་ཕྱི་རུ་དད་ལྡན་པ་མང་པོས་ཉིན་རེ་བཞིན་ཕྱག་དང་སྐོར་བ་བྱེད་ཀྱི་ཡོད། དེ་གའི་དམངས་སྲོལ་རིག་གནས་ཀྱི་ཆེས་མཁས་གྲགས་ཅན་ཚེ་རིང་རྡོ་རྗེ་ལགས་ཀྱིས་གསུངས་པ་ལྟར་ན། སྡེ་དགེ་པར་ཁང་འདི་དཔེ་དེབ་པར་དུ་གདབ་ཡུལ་ཁོ་ན་ཙམ་ཞིག་མ་ཡིན་པར་དཔེ་གཞུང་ཉར་ཚགས་བྱེད་ས་དང་གཙུག་ལག་རིག་གནས་ཀྱི་གན་མཛོད་ཅིག་ཡིན་ལ། དགོན་སྡེ་གཞན་དང་བསྡུར་ན་སྡེ་དགེ་པར་ཁང་གི་གོ་གནས་བླ་ལྷག་ཏུ་མཐོ་བས། ལོ་ངོ་བརྒྱ་ཕྲག་དུ་མའི་རིང་ལ་སྐྱེ་བོ་རྣམས་ཀྱིས་དད་པ་རྣམ་པར་དག་པས་ཕྱག་དང་སྐོར་བ་བྱེད་པའི་རྒྱུ་མཚན་ཡང་དེ་ག་ལགས། རྒྱ་གར་ཆོས་འབྱུང་དང་། རྒྱ་ནག་ཆོས་འབྱུང་། འཕགས་པ་བརྒྱད་སྟོང་པ་སོགས་ཀྱི་པར་གཞི་ནི་སྡེ་དགེ་པར་ཁང་ཁོ་ནར་མ་གཏོགས་མེད། དེ་ལས་ཆིང་རྒྱལ་རབས་ཀྱི་ཁང་ཞི་ཁྲི་ལོ་༤༢པར་༡༧༠༣ལོར་པར་དུ་བརྐོས་པའི་འཕགས་པ་བརྒྱད་སྟོང་པ་ལ་པར་ཤིང་༡༥༠༠ལྷག་ཡོད་ཅིང་། ལན་ཝར་དང་བོད་ཡིག་སྦྲགས་མར་བརྐོས་ཡོད་པར་མ་ཟད་དཔེ་རིས་ཀྱང་བརྐོས་ཡོད་པས་འཛམ་གླིང་དུ་པར་གཞི་དེ་གཅིག་པུ་མ་གཏོགས་མེད། སྡེ་དགེའི་མཚལ་བྲིས་བཀའ་འགྱུར་ནི་བོད་ཀྱི་རིག་དངོས་རིན་ཐང་ཆེ་ཤོས་གྲས་ཀྱི་གཅིག་ཡིན་པ་དང་། བོད་ཁུལ་གྱི་པར་ཁང་ཆེན་མོ་གསུམ་གྱི་ཁྲོད་པར་གཞི་ལེགས་ཤོས་དང་ཆ་ཚང་ཤོས་ཤིག་རེད། རང་གི་གཟི་བརྗིད་དུ་རློམ་ཆོག་པའི་ཁྱད་ནོར་རྨད་བྱུང་དེ་དག་ལ་བརྟེན་ནས་སྡེ་དགེ་པར་ཁང་གི་སྙན་པའི་གྲགས་པ་འཛམ་གླིང་འཛིན་མའི་ཁྱོན་ལ་ཁྱབ་པ་རེད། སྡེ་དགེ་པར་ཁང་གི་མཐོ་སར་འགྲེངས་ཏེ་སྡོད་པའི་ཚེ་ན་འདས་ཟིན་པའི་བྱུང་བ་དག་ཡིད་ངོར་དབང་མེད་དུ་ཤར་འོངས། གལ་ཏེ་ཐུགས་དཀྱེལ་ཡངས་ཤིང་མཁྱེན་དཔྱོད་རྒྱས་པའི་སྡེ་དགེ་རྒྱལ་པོས་སྡེ་དགེའི་ལོ་རྒྱུས་ཀྱི་གཟི་འོད་བཀྲ་བའི་སྒོ་འཕར་ཡངས་པོར་མ་ཕྱེ་ཚེ། སྡེ་དགེ་པར་ཁང་སྐོར་གྱི་ངག་རྒྱུན་སྙན་མོ་དག་ཡོད་མི་སྲིད་ལ། པར་སྐྲུན་བྱ་གཞག་འདིའི་ཤུལ་རྒྱུན་ཡང་ཡོད་མི་སྲིད། ད་ལྟ་སྡེ་དགེ་པར་ཁང་གི་ལག་རྩལ་དངོས་པོ་མིན་པའི་རིག་གནས་རྗེས་ཤུལ་གྱི་གྲས་སུ་བཞག་ནས་གཙིགས་ཆེན་དང་སྲུང་སྐྱོང་བྱེད་པ་འདི་ཡང་ཡོད་མི་སྲིད། ཅེས་བསྔགས་བརྗོད་ཆེན་པོ་བྱས་ཡོད། ༈ སྨྲས་པ། རིས་མེད་སྐྱེས་བུ་བསྟེན་དང་དེའི་ཆོས་བརྒྱུད། །འཛིན་པ་ས་སྐྱོང་ཆོས་རྒྱལ་རིམ་བྱོན་གྱིས། །བསྟན་པ་སྡེ་བཅས་རིས་སུ་མ་བཅད་པར། །བསྐྱངས་པས་བསྟན་པ་རྒྱས་དང་བདེ་སྐྱིད་འཕེལ། །དེ་དག་ཡོངས་འཛིན་བཟང་པོའི་བཀའ་དྲིན་ཡིན། །གངས་ཅན་བོད་ཀྱི་བདེ་སྐྱིད་བསྟན་པ་བཅས། ༼འགྲོ་བའི་མགོན་པོ་ཆོས་རྒྱལ་འཕགས་པ༽།ཁྱེད་ཀྱི་ཕྱག་ན་བཞེས་ཚེ་བློ་གྲོས་དང་། །དྲག་པོའི་སྟོབས་ཀྱིས་ཆོས་བརྒྱུད་གཅིག་ཉིད་དུ། །བསྒྱུར་དུ་ཐུབ་ཀྱང་བཅོ་བརྒྱད་སྡེ་པ་དག །བསྟན་པ་རྣམ་དག་བསྒྲུབས་བཞིན་ཆོས་བརྒྱུད་རྣམས། །རང་འདོད་བསྐྱངས་མཛད་ཀུན་གྱི་མིག་དཔེར་སོང་། །དེ་ལྟར་སྔ་རྗེས་ཆེན་པོ་སུ་ཡིས་ཀྱང་། །མ་མཛད་མཛད་པ་ཕལ་ཆེར་དེ་ལས་བཟློག །དེ་ཕྱིར་དཔལ་ལྡན་ས་སྐྱའི་ཁྱད་ཆོས་ལགས། །དེ་ཙམ་མ་ཟད་འཛམ་གླིང་ཕྱེད་དབང་བསྒྱུར། །སྟོབས་ཀྱི་འཁོར་སྒྱུར་ཇིང་གིར་རྒྱལ་སོགས་དང་། །མངའ་རིས་གློ་བོའི་ཆོས་རྒྱལ་སྔོན་རབས་སོགས། །གཟུར་གནས་རྣམས་ཀྱིས་གཟིགས་དང་ཤེས་པར་འགྱུར། །དཔལ་ལྡན་ས་སྐྱ་པ་ཡིས་རྒྱ་ཧོར་དུ། །སངས་རྒྱས་བསྟན་པ་དབུ་བརྙེས་སྲོལ་བཏོད་རྒྱས། །རྗེས་ནས་བཀའ་དགེ་འཕྲིན་ལས་འཕེལ་བ་ཡིན། །རྒྱལ་བསྟན་གསར་དུ་སྤེལ་བ་བྱ་སླ་མིན། །མཁན་སློབ་ཆོས་གསུམ་རྣམ་ཐར་ལེགས་པར་གཟིགས། །བོད་འབངས་བས་ཀྱང་ཧོར་སོག་གདུག་རྩུབ་ཆེ། །དེ་དག་དཔང་པོར་རྒྱལ་རབས་ལོ་རྒྱུས་གཟིགས། །ལྷག་པར་རྒྱལ་བ་བསོད་ནམས་རྒྱ་མཚོ་ཡིས། །ང་ནི་ཆོས་ཀྱི་རྒྱལ་པོ་འཕགས་པ་དང་། །ཁྱོད་ནི་སེ་ཆེན་རྒྱལ་པོ་ཡིན་སོགས་དང་། །གཙང་གི་པཎ་ཆེན་བླ་མ་རིན་པོ་ཆེས། །ང་ནི་ས་སྐྱ་པཎ་ཆེན་སྤྲུལ་པ་ཡིན། །ཞེས་སོགས་ཆེན་པོ་དེ་དག་རྣམས་ལ་ཡང་། །དཔལ་ལྡན་ས་སྐྱའི་མཚན་གྱིས་དོན་ཆེན་བྱས། །འདི་སྐོར་ཞིབ་པར་རྣམ་ཐར་རྒྱལ་རབས་གཟིགས། །གཟུར་གནས་བློ་ཡིས་ལེགས་པར་བརྟགས་བྱས་ན། །དེ་ཡང་དཔལ་ལྡན་ས་སྐྱའི་ཆེ་བ་ལགས། །དེ་ཕྱིར་བཀའ་དྲིན་བསམ་སྟེ་སོར་བཅུ་ཡི། །འདབ་མ་སྤྱི་བོར་བཀོད་ན་ཅིས་མི་མཛེས། །སྔོན་བྱོན་སྐྱེས་བུ་དམ་པར་མིག་ལྟོས་ཀྱིས། །ཕྱོགས་རེ་མ་ཡིན་ཆོས་སྲིད་ལུགས་གཉིས་ཀྱིས། །འདི་ལྟར་སྐྱོང་ན་འདི་ལྟར་འབྱུང་བར་ངེས། །གང་ཕྱིར་རྒྱུ་འབྲས་སླུ་བ་མེད་པས་སོ། །མི་སེམས་སླུ་བའི་ཁ་བཤད་ཙམ་མིན་པ། །རྒྱུ་འབྲས་དོན་གྱི་ཉམས་ལེན་ལག་ཐོག་ལོངས། །བྱམས་སྙིང་བྱང་སེམས་ངེས་འབྱུང་རྣམ་དག་གིས། །རྩིས་ཟིན་དགེ་བ་ཐར་པའི་ལམ་ཡིན་ན། །ཚོང་ལས་འགྲོ་སྤྱོད་སོགས་ཕྱིར་སྒྲོལ་མ་དང་། །འཕྲིན་བཅོལ་བྱེད་སོགས་དམ་ཆོས་ཉམས་ལེན་མིན། །ཕྲག་དོག་འགྲན་སེམས་དམ་ཆོས་བྱེད་པ་སོགས། །དེ་བས་མིན་པས་རིང་དུ་སྤང་བར་གྱིས། །གལ་ཏེ་དམ་པའི་ལྷ་ཆོས་བྱེད་འདོད་ན། །ཞེན་པ་བཞི་དང་བྲལ་བའི་ཆོས་ཞིག་གྱིས། །སྟོན་པའི་དམ་ཆོས་ལུང་དང་རྟོགས་པ་ཡིན། །དེ་འཛིན་བཤད་སྒྲུབ་རྣམ་དག་གིས་བྱེད་ཀྱི། །དེ་ཡི་སྔོན་དུ་རང་ཉིད་ཚུལ་ལྡན་གྱི། །ཚུལ་གནས་ཐོས་བསམ་བསྒོམ་ལ་འབད་དགོས་ཀྱི། །ཆོས་བརྒྱད་དབང་པོ་གསལ་བས་དེ་ལྟར་མིན། །དམ་པའི་མིང་གིས་དམ་པའི་སྤྱོད་པ་བྱོས། །དེ་ལྟར་མིན་ན་འཇིག་རྟེན་བསླུ་བར་འགྱུར། །མི་སླུ་དམ་བཅའ་བརྟན་པོས་བསྟན་པ་སྐྱོངས། །དེ་འདྲ་བྱེད་ན་བསྟན་འཛིན་སྐྱེས་བུ་ཡིན། །རྣམ་དག་བསྟན་པ་ཡུན་གནས་རྒྱུ་རུ་འགྱུར། ༈ འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །ཅེས་སྨོན་ནོ། །འགྲོ་ལ་བདེ་སྐྱིད་འབྱུང་བའི་སྒོ་གཅིག་པུ། །ཀུན་མཁྱེན་རྒྱལ་བའི་བསྟན་པ་རིན་པོ་ཆེ། །ཡུལ་དུས་གནས་སྐབས་ཀུན་ཏུ་མི་ཉམས་ཤིང་། །ཕྱོགས་མཐར་དར་ཞིང་རྒྱས་པ་མཛད་དུ་གསོལ། །ཞེས་བསྟན་འཛིན་སྐྱེས་བུ་རྣམས་ལ་ཞུ་བ་ཡིན། དཔལ་ས་སྐྱོང་སྡེ་དགེའི་ཆོས་རྒྱལ་ཆེན་པོ་རིམ་བྱོན་གྱི་བྱུང་བ་བརྗོད་པ་རྒྱལ་རབས་དང་། བཀའ་བསྟན་བཅོས་པར་དུ་བརྐོས་པའི་དཀར་ཆག་སོགས་མཐོང་ཡུལ་དུ་གྱུར་མ་གྱུར་མི་ཉུང་བ་ཞིག་ཡོད་མོད་ཀྱང་། རང་ཉིད་ཆོས་རྒྱལ་གང་ཉིད་ཀྱི་འབངས་སུ་གཏོགས་པ་དང་། ལོ་རྒྱུས་འདི་ལྟ་བུ་ལ་གོམས་པར་བྱ་བ་དང་། དེང་དུས་སྔོན་རབས་ཁྱད་འཕགས་ལོ་རྒྱུས་དང་། ལོ་རྒྱུས་ཅན་གྱི་མི་སྣ་གྲགས་ཅན་སོགས་ཕྱོགས་འགའ་ནས་ཉམས་དམས་སུ་གྱུར་པ་དང་། དེ་ལ་ཉམས་པ་སླར་གསོ་དང་མ་ཉམས་གོང་སྤེལ་མཛད་མཁན་གཞུང་སྒེར་རམ་སྤྱི་སྒེར་སུ་ལ་ཡང་ཉུང་བ་དང་། ལྷག་པར་དུ་ཆོས་རྒྱལ་ཆེན་པོ་འདི་ཉིད་དཔལ་ལྡན་ས་སྐྱ་པའི་བསྟན་པའི་སྦྱིན་བདག་ཆེན་པོ་ཡིན་པ་དང་། བོད་ཆེན་པོའི་ལྗོངས་འདིར་བཤད་སྒྲུབ་ཡང་དག་པས་སངས་རྒྱས་ཀྱི་བསྟན་པ་སྤྱི་དང་། ཁྱད་པར་དཔལ་ལྡན་ས་སྐྱ་པའི་རིང་ལུགས་དྲི་མ་མེད་པ་དར་རྒྱས་སུ་མཛད་པ་པོ་ཡིན་པ་བཅས། རྒྱུ་མཚན་དེ་དག་ལ་བརྟེན་འདི་ལྟར་རགས་ཙམ་ཕྱོགས་བསྡུས་བྱས་ཤིང་པར་དུ་བསྐྲུན་པ་ལས་ཞིབ་འཇུག་ཡང་དག་བྱེད་པར་ཤེས་འབྱོན་གནས་སྐབས་གསུམ་གྱིས་མ་ལྕོགས་པར་བཟོད་གསོལ་ཞུ། །སརྦམངྒལཾ།
༄༅། ལེའུ་གཉིས་པ་ནི། སྲིད་དང་ཞི་མཐའ་རིང་ནས་སྤངས་ཟིན་ཀྱང་། །སྲིད་ཞིའི་ཕུན་ཚོགས་མ་ལུས་སྩོལ་མཛད་པའི། །སྲིད་གསུམ་འདྲེན་པ་ས་ངོར་ཚར་གསུམ་གྱི། །སྲིད་ཞིའི་གཙུག་རྒྱན་རྣམས་ལ་ཕྱག་འཚལ་ནས། །སྡེ་བཞི་དགེ་བཅུས་ཕྱུག་པའི་རྒྱལ་ཁབ་ཀྱི། །སྟོབས་ཀྱི་འཁོར་སྒྱུར་ཆོས་རྒྱལ་རིམ་བྱོན་གྱི། །མཆོད་གནས་དམ་པའི་ཚོགས་འགའི་རྣམ་ཐར་གྱི། །ཆ་ཤས་ཕྱོགས་སྒྲིག་བགྱི་ལ་དགེ་ལེགས་སྩོལ། །ཞེས་མཆོད་པར་བརྗོད་པ་སྔོན་དུ་བཏང་ནས། ཐོག་མར་ཁམས་གསུམ་འགྲོ་བའི་མགོན་པོ་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་རྣམ་པར་ཐར་པ་སྐབས་འདིར་འབྲེལ་ཆེ་བ་ནི། དཔལ་ས་སྐྱོང་སྡེ་དགེ་ཆོས་ཀྱི་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་འདོད་དགུ་རབ་འཕེལ་ལས། གང་དེས་བོད་ཀྱི་ཤཱཀྱ་ཐུབ་པ་ཆེ། །ཁམས་གསུམ་ཆོས་ཀྱི་རྒྱལ་པོ་ས་སྐྱ་པ། །འགྲོ་མགོན་ཆོས་རྒྱལ་འཕགས་པའི་ཞབས་པད་དུ། །བཅར་ཚེ་འཕགས་མཆོག་ཆོས་ཀྱི་རྒྱལ་པོ་ཡི། །ཞལ་ནས་སྡེ་བཞི་དགེ་བཅུའི་ཡོན་ཏན་གྱིས། །ཕྱུག་པའི་སྐྱེས་བུ་ཕེབས་ཞེས་བཀའ་བསྩལ་བས། །སྡེ་དགེ་ཞེས་པའི་མཚན་ཡང་དེ་ནས་ཐོགས། །ལས་ཚན་བཅུ་གསུམ་ཐོག་མར་གསོལ་དཔོན་གྱི། །ཁུར་བླངས་ཞབས་པད་ཡུན་བསྟེན་འཕགས་མཆོག་དེའི། །ཆོས་ཀྱི་སྲས་གྱུར་འཕགས་པ་དབང་ཕྱོགས་ཀྱི། །རྒྱལ་པོ་སེ་ཆེན་ཁཱན་གྱི་མཆོད་གནས་སུ། །ཕེབས་ནས་བོད་ཁམས་མ་ལུས་དབང་མཛད་སྐབས། །འཇའ་ས་ཤེལ་ཐམ་ལེ་ཚེ་དགུ་པ་དང་། །སྟག་མགོ་ནོར་བུ་གསུམ་པ་སོགས་བསྩལ་ནས། །མདོ་སྨད་སྟོང་དཔོན་རྒྱལ་པོར་དབང་བསྐུར་རོ། །ཞེས་དང་། བསྟན་པ་ཕྱི་དར་སྐབས་ཀྱི་གངས་རིའི་བདག །རབ་བྱུང་འབུམ་སྡེའི་གཙུག་རྒྱན་འཕགས་མཆོག་དེས། །རབ་བྱུང་རྟེན་ཅན་བསོད་ནམས་རིན་ཆེན་ལ། །རབ་མཐོའི་གོ་སར་དབང་བསྐུར་ལུང་རྟགས་བསྩལ། །རབ་ཏུ་བསྔགས་འོས་ལེགས་ཚོགས་དེ་ནས་འཕེལ། །སྡེ་དགེའི་ལུགས་ཟུང་སྐྱོང་ལ་ཆོས་ཚུགས་ཀྱིས། །དགེ་བའི་བསྟན་ཚིགས་དང་པོ་འདི་ཡིན་ནོ། །ཞེས་གསུངས་པ་ལྟར། ཐོག་མར་ཚད་མེད་པའི་ཐུགས་རྗེ་དང་ཕྲིན་ལས་ཀྱི་སྣང་བ་ཆེན་པོས་ཕྱོགས་ཐམས་ཅད་དུ་ཁྱབ་པས་ཐུབ་དབང་གཉིས་པར་གྱུར་ཅིང་། གནོད་འཚེ་དང་བྲལ་ཞིང་གཞན་ཕན་གྱི་མཐུ་ཆེན་པོའི་སྒོ་ནས་བོད་སོག་རྒྱ་ལ་སོགས་པའི་སྐྱེ་འགྲོ་མཐའ་དག་མ་ཡི་བུ་སྡུག་པ་ལྟར་ཕྱོགས་ཐམས་ཅད་ནས་བསྐྱངས་ཤིང་། སྡེ་པ་བཅོ་བརྒྱད་པོ་རྣམས་སངས་རྒྱས་ཀྱི་བསྟན་པར་བསྡུས་པ་ལྟར་སྟོན་པ་གཅིག་པའི་བསྟན་པ་གང་ན་དར་ཡང་རང་གི་འདོད་མོས་བཞིན་སྒྲུབ་ཏུ་འཇུག་པ་དང་། ལྷག་པར་དུ་བོད་ཆོལ་ཁ་གསུམ་གྱི་ཁྱོན་ཡོངས་སུ་སྔོན་ཕྱིས་དར་བའི་ནང་པའི་ཆོས་རྒྱུད་ཆེན་པོ་རྣམས་དང་། བོན་བཅས་པར་རང་འདོད་ལྟར་བཤད་སྒྲུབ་ལས་གསུམ་གྱི་སྒོ་ནས་ད་ལྟའི་བར་རྒྱུན་གནས་བྱུང་བ་ནི་དམ་པ་འདིའི་ཚད་མེད་པའི་ཐུགས་རྗེའི་བཀའ་དྲིན་ཁོ་ནར་ངེས་སོ། །ཁྱད་པར་དུ་གོང་འཁོད་ལྟར་ས་སྐྱོང་ཆེན་པོ་སྡེ་དགེའི་གདུང་རབས་འདི་ལ་ཆོས་སྲིད་ལུགས་གཉིས་ཀྱི་ཕྱོགས་ཐམས་ཅད་ནས་བཀའ་དྲིན་ཆེ་བའི་ཕྱིར། ཁོང་གི་རྣམ་པར་ཐར་པ་མདོ་ཙམ་འཆད་པ་ལ། འཇམ་དཔལ་རྩ་རྒྱུད་ལས། ང་ནི་འཇིག་རྟེན་མྱ་ངན་འདས། །ས་སྟེང་སྟོངས་པར་གྱུར་པ་ན། །དེ་ནས་འཇམ་དཔལ་སེམས་ཅན་ལ། །སངས་རྒྱས་མཛད་པ་བྱེད་པར་འགྱུར། །ཐུབ་དབང་ཡོངས་སུ་མྱ་ངན་འདས། །དམ་པའི་ཆོས་ནི་སྲུང་བའི་ཕྱིར། །དེ་ཚེ་རྟག་ཏུ་སྲུང་བར་ནི། །འཇམ་པའི་དབྱངས་ནི་འགྱུར་བ་ཡིན། ཞེས་དང་། སྟོན་པའི་གསུང་རབ་ས་སྟེང་དུ། །དུས་མཐར་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བ་ཐེ་ཚོམ་མེད། །ཅེས་དང་། ཡི་གེ་དྷ༄༅ིཿཞེས་སྡོམ་བརྩོན་ཉིད། །སྟོན་པའི་བསྟན་པ་གསལ་བར་བྱེད། །ཅེས་རྒྱལ་བ་ཉིད་ཀྱིས་ཡང་ཡང་ལུང་བསྟན་པ་བཞིན། འགྲོ་བའི་མགོན་པོ་ཆོས་རྒྱལ་འཕགས་པ་བློ་གྲོས་རྒྱལ་མཚན་མཆོག་ནི་རབ་བྱུང་བཞི་པའི་ཤིང་ལུག་ཕྱི་ལོ་༡༢༣༥ལོར་ས་ཆེན་པོ་འདི་ཡང་དལ་བུས་གཡོ་ཞིང་། ནམ་མཁའ་ལས་རོལ་མོའི་སྒྲ་སྙན་ཅིང་འཇམ་པ་དག་འབྱིན་ལ། མེ་ཏོག་དང་སྤོས་ཆུ་དྲི་ཞིམ་པོ་འདྲེས་པའི་ཆར་དག་ཀྱང་འབབ་པར་བྱེད། འོད་ཟེར་ཁ་དོག་དུ་མའི་དྲྭ་བ་དག་གིས་ཀྱང་ཕྱོགས་ཀྱི་ཐ་གྲུར་གསལ་བར་བྱེད་པ་ལ་སོགས་པ་འཕགས་པ་རྣམས་ཇི་ལྟར་བལྟམས་པའི་ལུགས་དང་མཐུན་པར་བདག་ཉིད་ཆེན་པོ་འདི་ཡང་ཡབ་ཟངས་ཚ་བསོད་ནམས་རྒྱལ་མཚན་ལ་ཇོ་མོ་ལྔ་བྱུང་ཞིང་སྲས་ལྕམ་སྲིང་བརྒྱད་འཁྲུངས་པ་ལས་ཡབ་དགུང་ལོ་ང་གཉིས་བཞེས་པར་ཡུམ་མ་གཅིག་ཀུན་སྐྱིད་ལ་འཁྲུངས་པས་ན་མཚན་ཡང་དེ་སྐད་ཅེས་བྱའོ་གསུངས། ཆུང་ངུ་ན་འབྲི་ཀློག་ལ་སོགས་པའི་རིག་པའི་གནས་འགའ་ཞིག་ལ་མ་བསླབ་པར་མཁྱེན་པ་དང་། སྤྱན་རས་གཟིགས་དང་གསུང་གླེང་མཛད་པར་གྲགས་པའི་ས་སྟོན་རི་བ་དང་། གླང་རི་བ་ལ་སོགས་པའི་སྐྱེ་བ་སྔ་མ་དུ་མ་དྲན་ཅིང་། དགུང་ལོ་གསུམ་པ་ལ་སྒྲུབ་ཐབས་མཚོ་སྐྱེས་གསུངས། བརྒྱད་པ་ལ་སྐྱེས་རབས་ཐུགས་ལ་གསུངས། དགུ་པ་ལ་ཆོས་རྗེ་པའི་སྔོན་འགྲོའི་ཆོས་འཁོར་མཛད་དུས་བརྟག་གཉིས་གསུངས། ཚོགས་ཀྱི་གཏམ་བཤད་མཛད་པས་ཐམས་ཅད་ངོ་མཚར་ཏེ། མཁས་པ་ཐམས་ཅད་ཀྱི་ང་རྒྱལ་ཆག་ཅིང་སོ་སོའི་སྐྱེ་བོ་ལ་འདི་ལྟ་བུའི་བློ་གྲོས་འབྱུང་མི་སྲིད་འདི་ནི་ངེས་པར་འཕགས་པའོ། ཞེས་ཀུན་གྱིས་བསྒྲགས་པས་འཕགས་པར་གྲགས་སོ། །ཤིང་འབྲུག་ཕྱི་ལོ་༡༢༤༤དགུང་ལོ་བཅུ་པར་ཆོས་རྗེ་ས་སྐྱ་པཎྜིཏ་རྒྱལ་པོ་གོ་དན་གྱིས་གདན་དྲངས་པ་ན་ཕྱག་ཕྱིར་བྱོན་ནས་དབུས་སུ་ཆོས་རྗེ་པས་མཁན་པོ། ཟུལ་ཕུ་མཁན་པོ་ནམ་བཟའ་འཕྲེད་གསོལ་གྱིས་སློབ་དཔོན་མཛད་དེ་རབ་ཏུ་བྱུང་། སྐྱོར་མོ་ལུང་དུ་ཤེས་རབ་དཔལ་ལས་དགེ་ཚུལ་གྱི་བསླབ་བྱ་རྣམས་གསན་ནོ། །དེ་ནས་རིམ་གྱིས་ཆོས་རྗེ་པའི་དྲུང་དུ་སྡེ་སྣོད་དང་རྒྱུད་སྡེའི་ཆོས་སྐོར་མཐའ་དག་གསན་ཅིང་ཐུགས་སུ་ཆུད་དོ། དགུང་ལོ་བཅུ་བདུན་པ་ལྕགས་ཕག་ཕྱི་ལོ་༡༢༥༡ལོར་ཆོས་རྗེ་པ་ལ་མངའ་བའི་ཡོན་ཏན་ཐམས་ཅད་རྫོགས་པས་ཐུགས་ཤིན་ཏུ་མཉེས་ཏེ། ཆོས་ཀྱི་དུང་དང་ལྷུང་བཟེད་ལ་སོགས་པ་གནང་། སློབ་མའི་ཚོགས་རྣམས་གཏད་ནས་བསྟན་པའི་བྱ་བ་དང་སེམས་ཅན་མང་པོའི་དོན་བྱ་བའི་དུས་ལ་བབ་པས་སྔོན་གྱི་དམ་བཅའ་དྲན་པར་གྱིས་ཤིག །ཅེས་པའི་སྒོ་ནས་བསྟན་པ་གཏད་དོ། དགུང་ལོ་བཅུ་དགུ་པ་ཆུ་གླང་ཕྱི་ལོ་༡༢༥༣ལོར་ཧུ་པི་ལི་སེ་ཆེན་གྱིས་མཆོད་གནས་སུ་གདན་དྲངས། བརྟག་པ་དང་དྲི་བ་ལ་སོགས་པའི་སྒོ་ནས་ཡིད་ཆེས་ཤིང་། ལོ་དེར་རྒྱལ་པོས་ཞུས་པ་ལྟར་རྒྱལ་པོ་ཡབ་ཡུམ་གྱིས་ཐོག་དྲངས་མི་ཉི་ཤུ་རྩ་ལྔ་ལ་དཔལ་ཀྱེ་རྡོ་རྗེའི་དབང་ཐེངས་དང་པོ་བསྐུར་ནས། ཧོར་གྱི་རྒྱལ་ཁམས་སུ་རྡོ་རྗེ་ཐེག་པའི་དབུ་བརྙེས་སོ། །དེའི་དབང་ཡོན་དུ་གཙོ་བོ་བོད་ཁྲི་སྐོར་བཅུ་གསུམ། སྒོས་སུ་གཙང་ཆུ་མིག་གི་ཁྲི་སྐོར་དུ་གང་གཏོགས་ཕུལ་བ་དང་། ཏི་ཤྲིའི་གོ་གནས་དང་། གཡང་ཊི་ལས་བྱས་པ་ཡི་གེ་ས་ཡོད་པའི་ཐམ་ཀ གསེར་དང་མུ་ཏིག་གིས་བརྒྱན་པའི་སྣམ་སྦྱར། རིན་པོ་ཆེས་སྤྲས་པའི་ཕྱམ་རྩེ། རིན་པོ་ཆེའི་དབུ་ཞྭ། ཆགས་ལྷམ། བཞུགས་གདན། གསེར་གྱི་ཁྲི། གསེར་གྱི་གདུགས། གསོལ་ཞལ། གསོལ་སྡེར་སོགས་བཀོད་པས་ཁྱད་པར་དུ་འཕགས་པའི་དངོས་པོ་དུ་མ་དང་། རྔ་མོ་དང་། ཆིབས་དྲེལ་གསེར་གྱི་སྒ་འཁོར་ཚང་མ། གསེར་བྲེ་དངུལ་བྲེ། ཇ་སིག་གོས་དར་སོགས་དངོས་པོ་དུ་མ་ཕུལ་ལོ། དེའི་ཕྱི་ལོར་བནྡ་ཤེད་སྐྱེད་ཀྱི་འཇའ་ས་བོད་ཡིག་མ་དང་། དངུལ་བྲེ་ཆེན་ལྔ་བཅུ་ང་དྲུག །ཇ་སིག་ཉིས་བརྒྱ། གོས་ཡུག་བརྒྱད་ཅུ། དར་ཡུག་སྟོང་དང་བརྒྱ་བཅས་ཕུལ། སྐབས་དེར་འགྲོ་མགོན་འཕགས་པས་རྒྱལ་པོར་ཞུས་པ་བཞིན་གྲྭ་པའི་ཁང་པར་གསེར་ཡིག་པས་མཚེར་མི་འབབ་པ་དང་། འུ་ལག་དང་། ཁྲལ་མི་བསྐུལ་བའི་བཀའ་ཡིག་གནང་། རྒྱལ་པོས་བོད་ས་གནས་སུ་ས་སྐྱ་པའི་ཆོས་ལུགས་མ་གཏོགས་གཞན་བྱེད་དུ་མི་འཇུག་པའི་བཀའ་གནང་རྒྱུ་ཡིན་ཞེས་པའི་གསུང་སྔ་ཕྱིར་བྱོན་པ་ན། འགྲོ་མགོན་འཕགས་པས་དེ་ལྟར་བྱས་ན་ཁྱེད་རྒྱལ་པོའི་ཆབ་སྲིད་དང་། ངེད་ས་སྐྱ་པའི་ཆོས་ལུགས་གཉིས་ཀར་ཕན་ཐོག་མེད། དེ་བས་ཆོས་ལུགས་རྣམས་རང་རང་གི་འདོད་མོས་ལྟར་སྐྱོང་དུ་བཅུག་ན་ལེགས་ཞེས་ཞུས་པས་རྒྱལ་པོ་ཡང་དགའ་ནས་དེ་ལྟར་བཀའ་ཕབ། དུང་དཀར་ཚིག་མཛོད་ལས། གལ་ཏེ་འགྲོ་མགོན་འཕགས་པ་དེ་ཆོས་ལུགས་ཀྱི་ཕྱོགས་ཞེན་ཆེ་བའི་བླ་མ་ཞིག་ཡིན་ཚེ་རྒྱལ་པོས་དེ་ལྟར་དྲིས་སྐབས་བཀག་འགོག་བྱེད་རྒྱུ་ལྟ་ཞོག་དེ་ལས་ལྡོག་ཏེ་ཐབས་ཤེས་གང་ཡོད་ཀྱིས་རྒྱལ་པོ་ལ་བསྐུལ་ནས་ཆོས་ལུགས་གཞན་དག་རྩ་མེད་གཏོང་བའི་གོ་སྐབས་ཡག་པོ་ཞིག་ཐོབ་པ་རེད། འོན་ཀྱང་འགྲོ་མགོན་འཕགས་པ་སྐབས་དེར་དགུང་ལོ་ཉི་ཤུ་ལས་ལོན་མེད་པའི་སྐུ་གཞོན་ནུ་ཞིག་ཡིན་ཀྱང་། ཆོས་ལུགས་ཐོག་མཁས་པའི་ཕུལ་དུ་ཕྱིན་པ་མ་ཟད། ཆབ་སྲིད་ཐོག་ནས་གཟིགས་རྒྱ་ཡངས་པའི་གྲོས་འགོ་དེ་འདྲ་འདོན་པ་གནང་བ་དེས་ཡོན་རྒྱལ་རབས་ཀྱི་ཆབ་སྲིད་དང་། ས་སྐྱ་པའི་ཆོས་ལུགས་གཉིས་ཀའི་སྙན་གྲགས་གོང་མཐོར་སོང་བ་དང་བརྟན་པོར་གནས་ཐུབ་པ་བྱུང་ཡོད། སླར་ཡང་གོང་མས་དཔལ་ཀྱེ་རྡོ་རྗེའི་དབང་ཐེངས་གཉིས་པ་ཞུས་པའི་དབང་ཡོན་དུ་བོད་ཆོལ་ཁ་གསུམ་གྱི་སྲིད་དབང་ཡོངས་རྫོངས་ཀྱང་ཕུལ་ནས་བོད་ས་གནས་ཀྱི་ཆོས་སྲིད་གཉིས་ཀའི་དབང་གི་བདག་པོར་བསྐོས། དབང་ཐེངས་གསུམ་པ་ཞུས་པའི་དབང་ཡོན་དུ། ཆོས་དུང་དཀར་པོ་རྒྱང་གྲགས་དང་རྒྱ་ཡི་མི་ཡུར་ཆེན་མོ་སོགས་ཕུལ་བས། ཐུགས་ཤིན་ཏུ་མཉེས་ནས་བླ་མ་འཕགས་པས་བསྔོ་བ་འདི་ལྟར་མཛད་དེ། །ནམ་མཁའི་ཁམས་ནི་ཁྲག་གི་མདོག་ལྟར་དམར། །རྐང་ལེབ་རོ་ཡིས་ཕྱི་ཡི་རྒྱ་མཚོ་ཁེངས། །འདི་འདྲ་བཅད་པའི་དགེ་བ་གང་དེ་ཡིས། །མཁྱེན་རབ་དབང་ཕྱུག་ཐུགས་དགོངས་རྫོགས་ཕྱིར་དང་། །ཕན་བདེའི་བསྟན་པ་རབ་ཏུ་རྒྱས་པ་དང་། །མི་དབང་སྐུ་ཚེ་ཡུན་དུ་བརྟན་ཕྱིར་བསྔོ། ཞེས་གསུངས་པ་ཡིན་ནོ། །དེ་རྗེས་དགུང་ལོ་ཉེར་གཅིག་པ་རབ་བྱུང་བཞི་པའི་ཤིང་མོ་ཡོས་ཕྱི་ལོ་༡༢༥༥བོད་ཟླ་བ་ལྔ་པའི་ཚེས་བཅུ་བཞིའི་ཉིན་རྒྱ་བོད་ཀྱི་མཚམས་ཧེ་ཅེའུ་དང་ཉེ་བའི་སར་ཕེབས་ནས་མཁན་ཆེན་གྲགས་པ་སེངྒེ་དང་། ལས་སློབ་ཇོ་གདན་བྱང་ཐང་པ་བསོད་ནམས་རྒྱལ་མཚན། གསང་སྟེ་སྟོན་པ་ཡར་ཀླུང་པ་བྱང་ཆུབ་རྒྱལ་མཚན། དད་དགེ་ཆོས་རྗེ་པའི་བུ་སློབ་མང་པོ་སྟེ། ཉི་ཤུའི་དབུས་སུ་བསྙེན་པར་རྫོགས་ནས་མཁན་པོ་ལས་ཕར་ཕྱིན་ལ་སོགས་པ་དང་། སློབ་དཔོན་ལས་འདུལ་བ་གསན་ཏེ་དཔྱིས་ཕྱིན་པར་མཛད་དོ། དགུང་ལོ་ཉེར་གསུམ་པ་ལ་ལྡོང་སྟོན་གདན་དྲངས་ནས་རི་བོ་རྩེ་ལྔར་བྱོན་ཏེ། གཤིན་རྗེ་ལ་སོགས་པའི་ཆོས་སྐོར་མང་དུ་གསན། དེའི་ཚེ་ཆོས་རྗེ་པ་གསལ་བར་བྱོན་ནས་ཆོས་ཀྱི་གནད་མང་དུ་གསུངས། ཁྱོད་འདི་ནས་བཟུང་སྟེ་ལོ་འབུམ་ཕྲག་གཅིག་དང་སྟོང་འདས་པའི་རྗེས་སུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ཅེས་ལུང་བསྟན་ཅིང་། དབུགས་ཕྱུང་བའི་ངང་ཉིད་ནས། །སྲིད་པའི་དུཿཁ་དུ་མ་ཡིས། །ཡུན་རིང་དུས་སུ་དུབ་པ་བདག །ལེགས་པར་གསུངས་པས་དབུགས་ཕྱིན་པ། །ཐུགས་རྗེའི་དབང་ཕྱུག་མཁྱེན་པའི་གཙོ། ཆོས་ཀྱི་རྗེ་ལ་ཕྱག་འཚལ་ལོ། ཞེས་བསྟོད་པ་མཛད། དེ་ནས་སླར་ཡང་གོང་མའི་ཕོ་བྲང་དུ་ཕྱིར་ཕེབས། ཕྱི་ལོ་༡༢༥༨ལོར་རྒྱལ་པོས་བཀས་བསྐུལ་ནས་ཟིན་ཤིང་པ་རང་རང་གི་གཞུང་ལུགས་ལ་སྦྱངས་པ་མཐར་ཕྱིན་པའི་མཁས་པ་ཧུན་ཀྲི་ཡུན་དང་བཅས་པའི་མི་བཅུ་བདུན་རྩོད་པས་ཕམ་པར་བྱས་ཏེ་ལུང་ཀོང་དགོན་དུ་རབ་ཏུ་དབྱུང་། ཟིན་ཤིང་གིས་བཟུང་བའི་ནང་པའི་དགོན་སྡེ་ཉིས་བརྒྱ་དང་སུམ་ཅུ་སོ་བདུན་ཕྱིར་ནང་པར་བཅུག །དགུང་ལོ་ཉེར་བརྒྱད་པ་རབ་བྱུང་བཞི་པའི་ཆུ་ཕོ་ཁྱི་ཕྱི་ལོ་༡༢༦༢ལོར་ཆ་རྐྱེན་མང་དུ་བསྐུར་བ་མཛད་པ་རྣམས་ལ་བརྟེན་ནས། དཔོན་ཆེན་ཤཱཀྱ་བཟང་པོས་དབུ་རྩེ་སྒོ་རུམ་གསེར་ཐོག་ཆེན་པོ་དང་བཅས། གསེར་འབུམ་ཆེན་མོ་གཡུ་ཐོག་དང་བཅས་པ་དང་། ཐུབ་པ་ཆེན་པོའི་གསེར་སྐུ་ལ་སོགས་པ་བཞེངས། དེའི་ཕྱི་ལོ་ཆུ་མིག་ཆོས་འཁོར་སྔོན་མ་ལ་དགེ་འདུན་བརྒྱད་ཁྲི་ཙམ་ལ་འབུལ་འགྱེད་གྱ་ནོམ་པ་གནང་། དེ་ནས་རབ་བྱུང་བཞི་པའི་ཤིང་བྱི་ཕྱི་ལོ་༡༢༦༤་ལོར་བོད་དུ་ཕེབས་ཁར་གོང་མས་སླར་ཡང་འགྲོ་མགོན་འཕགས་པ་ལ་བོད་ཀྱི་ཆོས་སྲིད་གཉིས་ཀའི་བདག་པོར་བསྐོས་པའི་འཇའ་ས་མུ་ཏི་མ་ཕུལ། ཤིང་གླང་ཕྱི་ལོ་༡༢༦༥ལ་ཧོར་ཡུལ་ནས་ཡར་བྱོན་པའི་ལམ་ཁར་མདོ་ཁམས་གཙོ་མདོ་གནས་གསར་དུ་ཉེ་གནས་ཆེན་པོ་རིན་ཆེན་བསྟན་ཚུལ་གྱི་དོ་དམ་བྱས་ནས་གསེར་གྱི་གླེགས་བམ་ཕྱེད་ཉིས་སྟོང་ལ་སོགས་པ། རྟེན་གསུམ་སྡེ་དགོན། མི་ནོར་གྱི་འབུལ་བ་གྲངས་མེད་པ་བཞེས་ནས་དགུང་ལོ་སོ་གཅིག་པ་ལ་ས་སྐྱར་ཕེབས། གསེར་ཐོག་ཆེན་པོའི་བཞུགས་ཚགས། གསེར་འབུམ་བཀྲ་ཤིས་སྒོ་མང་ལ་ནང་དུ་རྡོར་དབྱིངས་ཀྱི་ལྷ་ཚོགས་བཞུགས་པ་དང་། རྗེ་གོང་མ་རྣམས་ཀྱི་ཕྱི་རྟེན་སྐུ་འབུམ་བདུན་ལ་གསེར་གྱི་གདུགས་དང་ཆོས་འཁོར། སྒོས་སུ་ཆོས་རྗེའི་གསེར་འབུམ་ལ་གསེར་ཐོག །གསེར་བྲིས་གྱི་བཀའ་འགྱུར་པོད་ཉིས་བརྒྱ་ལྷག་ཙམ་སོགས་གསར་བཞེངས་གནང་། དགུང་ལོ་སོ་གསུམ་པ་མེ་མོ་ཡོས་ཕྱི་ལོ་༡༢༦༧་ལོར་འགྲོ་མགོན་ཕྱག་ན་སྐུ་གཤེགས་པའི་ཆོས་འཁོར་ཆུ་མིག་ཏུ་མཛད་པ་ལ་དགེ་འདུན་དགུ་ཁྲི་ལ་འབུལ་འགྱེད་བགྲངས་ལས་འདས་སོ། །བོད་དུ་ལོ་ངོ་གསུམ་བཞུགས་རིང་ལ་གཉན་འོད་སྲུང་། གྲུབ་ཐོབ་ཡོན་ཏན་དཔལ། མཆིམས་ནམ་མཁའ་གྲགས། ཚོགས་སྒོམ་ཀུན་དགའ་དཔལ། ཁ་ཆེའི་པཎྜིཏཏཐཱགཏབྷ། ཞང་ཞུང་རྡོ་རྗེ་འོད་ཟེར། གློ་བོ་ལོཙཱ་བ། རིན་པོ་ཆེ་སྐྱོབ་པ་དཔལ། སྟག་སྟོན་འོད་ཟེར་ཤེས་རབ། མངོན་པ་རིན་ཆེན་རྡོ་རྗེ། འབུམ་པ་འོད་ཟེར་ཤེས་རབ། ཐང་དཔེ་བ་གྲགས་བཟང་། མདོག་གློ་བ་ཤཱཀྱ་བྱང་ཆུབ། མཁན་སེངྒེ་ཟིལ་ནོན། སྤྱི་བོ་ལྷས་པ་ཇོ་སྲས། མངོན་པ་དབང་ཕྱུག་བརྩོན་འགྲུས། རི་ལུང་ཕུག་པ་ཆོས་མགོན། སློབ་དཔོན་ལྷ་བཙུན། ལྷ་རྗེ་དར་མ་སེངྒེ། དབུས་པ་སངས་རྒྱས་འབུམ། རྒ་ལོ་སོགས་ལས། ཕྱི་ནང་གི་རིག་པའི་གནས་རྣམས་དང་། བཀའ་ལུང་མན་ངག་རྒྱ་མཚོ་ལྟ་བུ་གསན་ནས་ཆོས་ཀྱི་མངའ་བདག་ཆེན་པོར་གྱུར་ཏོ། །སླར་ཡང་གོང་མས་གདན་འདྲེན་གྱི་གསེར་ཡིག་ནན་ཆེན་མངགས་པ་ལ་བརྟེན། དགུང་ལོ་སུམ་ཅུ་སོ་གསུམ་པ་མེ་ཡོས་ཕྱི་ལོ་༡༢༦༧ལོ་ལས་ཚན་བཅུ་གསུམ་གྱི་རྒྱས་སྤྲོས་དང་བཅས་ཏེ་ཧོར་གྱི་ཡུལ་དུ་བྱོན། དེའི་ཚེ་རྒྱལ་པོ་ཆེན་པོ་དང་། དེའི་སྲས་ཀྱི་ཐུ་བོ་རྒྱལ་ཚབ་དམ་པ་བྱང་ཆུབ་སེམས་དཔའ་ཇིམ་གྱིམ་དང་། བཙུན་མོ་དང་། བློན་པོའི་ཚོགས་ཆེན་པོ་དང་བཅས་པ་ཐམས་ཅད་ཀྱིས་རྒྱ་གར་གྱི་གླང་པོ་ཆེ་ལ་རིན་པོ་ཆེའི་དྲྭ་བས་སྤྲས་པའི་ཁྲི་དང་། རིན་པོ་ཆེའི་ཟ་ར་ཚགས་མངོན་པར་འཕྱང་བའི་གདུགས་དང་། རྒྱལ་མཚན་དང་། བ་དན་དང་། རོལ་མོའི་ཚོགས་རྒྱ་ཆེན་པོ་དུ་མ་དང་བཅས་པ་རྒྱལ་པོའི་འབྱོར་པ་ཆེན་པོས་བསུ་བ་དང་། མཆོད་པའི་ཁྱད་པར་དཔག་ཏུ་མེད་པ་མཛད་ཅིང་ཕོ་བྲང་ཆེན་པོར་གདན་དྲངས་ནས། ཟབ་པ་དང་རྒྱ་ཆེ་བའི་ཆོས་ཀྱི་ཚུལ་དུ་མ་ཞུས་ཤིང་། སངས་རྒྱས་ཀྱི་བསྟན་པ་མེ་ཏོག་ཀུམུདའི་ཚལ་ལ་ཟླ་བའི་འོད་ཟེར་ཤར་བ་ལྟར་ཆེས་ཆེར་གསལ་བ་མཛད་དོ། དེའི་ཚེ་རྒྱ་བན་ལ་སོགས་པ་གོས་ནག་པོ་གྱོན་པ་རྣམས་ནི། རྒྱ་གར་གྱི་སྡོམ་པ་རྣམ་པར་དག་པ་ཕོག་ནས་ཆོས་གོས་ངུར་སྨྲིག་འཛིན་པར་བསྒྱུར་ཞིང་། སའི་སྟེང་ཐམས་ཅད་མཆོད་རྟེན་དང་། གཙུག་ལག་ཁང་དང་། ངུར་སྨྲིག་གི་རྒྱལ་མཚན་འཛིན་པས་ཁྱབ་པར་གྱུར་ཏེ། དེ་ལྟར་ཡོན་མཆོད་ཆེན་པོ་གཉིས་ཀྱིས་སངས་རྒྱས་ཀྱི་བསྟན་པ་ནི། དེ་བཞིན་གཤེགས་པ་བཞུགས་པའི་དུས་ལ་འགྲན་པ་བཞིན་གསལ་བར་བྱས་པར་གྱུར་ཏོ། །རབ་བྱུང་ལྔ་པའི་ས་ཕོ་འབྲུག་ཕྱི་ལོ་༡༢༦༨ལོར་དཔོན་ཆེན་ཤཱཀྱ་བཟང་པོས་ལྷ་ཁང་ཆེན་མོ་བཞེངས། ཁྲི་སྐོར་བཅུ་གསུམ་བསྐུལ། དཔོན་ཆེན་ཀུན་དགའ་བཟང་པོ་དང་སྦྲེལ་ནས་རྫོགས་པར་གྲུབ། རིན་ཆེན་སྒང་། ལྷ་ཁང་བླ་བྲང་། དུས་མཆོད་བླ་བྲང་རྣམས་ཀྱང་བཞེངས་སོ། །དུང་དཀར་ཚིག་མཛོད་ལས། རྒྱལ་པོ་འཁོར་བཅས་ལ་སྔ་ཕྱིར་དབང་ཐེངས་བཞི་བསྐུར་གསུངས། དགུང་ལོ་སོ་དྲུག་པ་རབ་བྱུང་ལྔ་པའི་ལྕགས་རྟ་ཕྱི་ལོ་༡༢༧༠ལོར་སླར་ཡང་རྒྱལ་པོས་ཀྱེ་རྡོ་རྗེའི་དབང་ཞུས་པའི་ཡོན་དུ། མི་ཉག་རྒྱལ་རྒོད་རྒྱལ་པོའི་ཤེལ་དམ་ལ་བཅོས་བྱས་ནས་ཤེལ་དམ་གླིང་དྲུག་མ་དང་། གནམ་གྱི་འོག །ས་ཡི་སྟེང་ན་རྒྱ་གར་ལྷ་ཡི་སྲས་པོ། སྤྲུལ་པའི་སངས་རྒྱས། ཡི་གེ་རྩོམ་མི། རྒྱལ་ཁམས་འཇགས་སུ་འཇུག་པ་པོ། སྙན་ངག་གི་རྒྱུ། པཎྜིཏ་འཕགས་པ་ཏི་ཤྲི་ཞེས་པའི་མཚན་དང་འཇའ་ས། དངུལ་བྲེ་ཆེན་སྟོང་རྭ་ཅན་དང་། གོས་དར་ལྔ་ཁྲི་དགུ་སྟོང་སོགས་ཕུལ། མཇལ་རེས་ཀྱིས་མཐོང་ཕྱག་དང་མཇལ་དར་དངུལ་བྲེ་ཆགས་མེད་སོགས་མཛད་པས། རྒྱལ་པོའི་འཕྲལ་གྱི་འབུལ་བ་ཀུན་གྲིལ་བས་གསེར་བྲེ་བརྒྱ་ལྷག །དངུལ་བྲེ་སྟོང་རྭ་ཅན། གོས་དར་བཞི་ཁྲི་ལ་སོགས་པ་བྱུང་བར་བཤད་དོ། དེ་ནས་བོད་དུ་ཕེབས་ཁར་གོང་མ་སེ་ཆེན་ཧན་གྱིས་དངོས་འབུལ་རྒྱ་ཆེན་པོ་དང་བཅས་བཞུགས་པར་ཞུས་ཀྱང་མ་གསན་པར་ཕྱིར་བོད་དུ་ཕེབས། རྒྱལ་པོས་དཔོན་དམག་ཁྲི་ཕྲག་མང་པོའི་དཔུང་དང་བཅས་ཏེ་ཟླ་བ་མང་པོའི་ལམ་བར་དུ་སྲུང་སྐྱེལ་ཞུས་ཤིང་། རབ་བྱུང་ལྔ་པའི་མེ་བྱི་ཕྱི་ལོ་༡༢༧༦ལོར་ས་སྐྱར་ཕྱག་ཕེབས་ནས་ལོ་ལྔའི་བར་གདན་ས་གནང་། ལོ་དེར་གཙང་ཆུ་མིག་རི་མོར་ཞག་བཅོ་ལྔའི་བར་དུ་དགེ་འདུན་འབུམ་ཕྲག་གཅིག་ལ་ཆོས་དང་ཟང་ཟིང་གི་སྦྱིན་པ་མཛད་ཚུལ་བསམ་གྱིས་མི་ཁྱབ་པ་ཆུ་མིག་ཆོས་འཁོར་དུ་གྲགས་པ་མཛད་པ་དང་། བོད་ཀྱི་དགེ་བཤེས་སྐྱ་བཙུན་ཐམས་ཅད་ལ། བོད་ཀྱི་དབང་བཤད་ལུང་མན་ངག་ཐམས་ཅད་ང་ལ་ཡོད་པས་ཉན་དུ་ཤོག་ཅེས་བཀའ་གནང་ནས་དགུང་ལོ་ཞེ་དྲུག་གི་བར་དུ་ཆོས་དང་ཟང་ཟིང་གི་ཆར་ཕབ། ཆོས་གྲྭ་རྣམས་ཀྱི་གཞི་རྐྱེན་འཛུགས་པ། སྐུ་གསུང་ཐུགས་ཀྱི་རྟེན་བཞེངས་པ། ཕོངས་པ་རྣམས་ལ་སྦྱིན་པ་གཏོང་བ་ལ་སོགས་པ་བསྟན་པ་དང་སེམས་ཅན་ལ་ཕན་པ་འབའ་ཞིག་མཛད་དོ། རྒྱ་ཧོར་བོད་ལ་སོགས་པའི་གདུལ་བྱ་དཔག་ཏུ་མེད་པ་ལ་ཆོས་ཀྱི་སྦྱིན་པ་རྒྱ་ཆེན་པོ་མཛད། རང་ཉིད་ཀྱིས་དགེ་སློང་དང་དགེ་ཚུལ་སྟོང་བཞི་བརྒྱ་ལྔ་བཅུའི་མཁན་པོ་མཛད། འདི་ཉིད་ཀྱི་སློབ་མ་འདུལ་འཛིན་ཆོས་ཀྱི་མགོན་པོ་ཞེས་བྱ་བས་ལོ་གཅིག་གི་ནང་དུ་རྒྱ་ཡི་དགེ་སློང་དང་དགེ་ཚུལ་སྟོང་བཞི་བརྒྱ་དང་བཞི་བཅུ་རྩ་བདུན་གྱི་མཁན་པོ་བྱས་ཏེ། ཚུལ་ཁྲིམས་ཀྱི་བསླབ་པ་ལ་བཀོད་དེ་རྒྱ་ནག་གི་རྒྱལ་ཁམས་རབ་བྱུང་གིས་གང་བར་མཛད་དོ། སྟག་ལོས་སྔ་རྟིང་གྲིལ་བ་ལ་བཞི་སྟོང་བཞི་བརྒྱ་ཉེར་ལྔ་མཛད་གསུངས། རྡོ་རྗེ་ཐེག་པའི་དབང་བསྐུར་ཡང་སྐད་རིགས་མི་གཅིག་པ་བཅུ་བཞི་ཙམ་ལ་མཛད་ཅིང་། གཞན་ཡང་ལུང་མན་ངག་བྱིན་རླབས་ལ་སོགས་པའི་སྒོ་ནས་གདུལ་བྱ་དཔག་ཏུ་མེད་པ་སྨིན་གྲོལ་ལ་བཀོད་དོ། དེ་ལྟར་དགུང་ལོ་ཞེ་དྲུག་གི་བར་དུ་གཞན་དོན་མཛད་ནས་རབ་བྱུང་ལྔ་པའི་ལྕགས་འབྲུག་ཟླ་བ་བཅུ་པའི་ཚེས་གཅིག་ནས་ཆོས་རྗེ་པའི་དུས་མཆོད་སྔར་བསུས་ཏེ་མཆོད་པ་རྒྱ་ཆེན་པོ་དང་ཐུགས་དམ་ལ་བརྩོན་པ་ན། ཚེས་གསུམ་གྱི་མཚན་མོ་དཔལ་གྱི་རི་ལ་འཕགས་པ་ཀླུ་སྒྲུབ་བྱང་ཆུབ་ཀྱི་ཤིང་རྒྱས་པའི་དྲུང་ན་བཞུགས་པ་ལ་དབུ་མ་རིགས་ཚོགས་ལ་སོགས་པ་ཐེག་ཆེན་གྱི་ཆོས་དུ་མ་གསན། ལྷའི་ཚོགས་ཀྱིས་མཆོད་པ་རྒྱ་ཆེན་པོ་གསལ་བར་གཟིགས་པའི་སྣང་བ་བྱུང་། ཚེས་བཅོ་བརྒྱད་ཀྱི་བར་ཚོགས་སུ་བྱོན་ནས་ཆོས་ཀྱང་གསུངས། དེ་ནས་ཞག་བཞི་གཟིམས་ཁང་དུ་བཞུགས་ནས། ཉི་ཤུ་གཉིས་ཀྱི་སྔ་དྲོ་སྐྱིལ་མོ་ཀྲུང་མཛད་རྡོ་རྗེ་དྲིལ་བུ་བསྣམས་ཏེ། སྒྲ་འོད་དང་དྲི་ཁྱད་པར་ཅན་དང་མེ་ཏོག་གི་ཆར་པ་ལ་སོགས་པ་ངོ་མཚར་བའི་ལྟས་དུ་མ་དང་བཅས་ཏེ། རབ་བྱུང་ལྔ་པའི་ལྕགས་འབྲུག་ཕྱི་ལོ་༡༢༨༠ལོ་ལྷ་ཁང་ཆེན་མོའི་བླ་བྲང་དུ་སྐུ་ཞི་བར་གཤེགས་སོ།། ༈ ཧོར་རམ། ཡོན་གྱི་རྒྱལ་རབས་དང་། ཧོར་བོད་འབྲེལ་བར་དཔྱད་པའི་གཏམ་བདེན་དོན་རབ་གསལ་ཞེས་པ་ལས། ༡༢༥༣ལོར་གུབ་ལའི་ཁཱན་གྱི་རྡ་ལི་དབང་དུ་བསྡུས་ནས་ཕྱིར་ལོག་སྐབས་ས་པཎ་གཤེགས་ཟིན་པས། འཕགས་པ་བློ་གྲོས་རྒྱལ་མཚན་དགུང་གྲངས་བཅུ་དགུ་ལ་ཕེབས་པ་ལང་ཆུ་ནས་ཧྲང་ཏུའུ་ལ་གདན་དྲངས་ཏེ་གསུང་གླེང་མང་པོ་གནང་བ་ལ། རྒྱལ་པོས་ཁྱེད་བོད་ཀྱི་ཡུལ་ན་མི་ཆེ་བ་སུ་འདྲ་བྱུང་གསུངས་པ་ལ། འཕགས་པ་རིན་པོ་ཆེས། ངེད་ཀྱི་ཡུལ་དུ་མི་ཆེ་བ་ཆོས་རྒྱལ་མེས་དབོན་རྣམ་གསུམ་བྱོན་པ་ལགས་གསུངས་པས། དེ་གསུམ་མི་ཆེ་བའི་རྒྱུ་མཚན་ཅི་ཡིན་གསུངས་པ་ལ། སྲོང་བཙན་སྒམ་པོ་ཐུགས་རྗེ་ཆེན་པོའི་སྤྲུལ་པ། ཁྲི་སྲོང་ལྡེའུ་བཙན་འཇམ་དབྱངས་ཀྱི་སྤྲུལ་པ། ཁྲི་རལ་པ་ཅན་ཕྱག་ན་རྡོ་རྗེའི་སྤྲུལ་པ་ལགས་ཞུས། ཁྱེད་བོད་ཀྱི་ཡུལ་ན་ཕོ་རྒོད་པོ་སུ་བྱུང་གསུངས་པ་ལ། ཕོ་རྒོད་པོ་མི་ལ་རས་པ་བྱ་བ་བྱུང་གསུངས་པས། དེ་ཅི་ཡིན་གསུངས། ཚེ་སྟོད་ལ་དགྲ་བཏུལ། ཚེ་གཞུག་ལ་ཆོས་བྱས་གྲུབ་པ་ཐོབ་པ་ལགས་ཞུས། ཁྱེད་ཀྱི་ཡུལ་དུ་མི་ཡོན་ཏན་ཆེ་བ་སུ་བྱུང་གསུངས་པ་ལ། ཡོན་ཏན་ཅན་བདག་གི་བླ་མ་ཆོས་རྗེ་ས་སྐྱ་པ་ལྟ་བུ་བྱུང་ཞུས་པས། བླ་མ་ཆོས་རྗེ་པའི་མཁྱེན་པ་དེ་ཅི་ཙམ་ཡིན། དེ་ལ་ཁྱེད་རང་གིས་ཅི་ཙམ་བསླབ་གསུངས་པར། བླ་མ་ཆོས་རྗེ་པའི་མཁྱེན་པ་དེ་རྒྱ་མཚོ་དང་འདྲ། དེ་ནས་བདག་གིས་ཆུ་ཕུལ་གང་བླངས་པ་ཙམ་བསླབ་ཞུས། ཡང་རྒྱལ་པོས་བོད་ལ་དམག་ཁྲལ་འགེལ་བ་དང་། ནོར་སྡུད་ལ་གཏོང་གསུངས་པ་ལ། འཕགས་པས། བོད་མཐའ་འཁོབ་ཡུལ་ཆུང་། འབྱོར་པ་མེད་པས་དམག་ཁྲལ་མི་ཐེག་པའི་ཞུ་བ་ཞུས་པས་རྒྱལ་པོས་མ་གནང་བར། དེ་ལྟར་ན་བོད་ཀྱི་བནྡ་འདིར་འོངས་ནས་བསྡད་པ་ལ་དགོས་པ་མི་འདུག་པས་རང་ཡུལ་ལ་འགྲོ་བར་ཞུ་ཞུས་པས། རྒྱལ་པོས་བྱོན་པས་ཆོག་གསུངས་པ་ལ། དཔོན་མོ་ཆ་བུས་རྒྱལ་པོ་ལ། འདི་འདྲའི་བནྡ་དཀོན། སྔར་གྱི་ཚལ་པ་ལ་སོགས་པའི་བནྡ་རྒན་པོ་དེ་རྣམས་ལ་འདིའི་ཡོན་ཏན་གྱི་ཆ་ཤས་སྔོན་གྱི་གཏམ་རྒྱུས་ཙམ་ཡང་མི་འདུག་པས་བོད་ལ་མ་བཏང་བར། ད་དུང་ཡོན་མཆོད་གསུང་གླེང་དང་། ཆོས་ཀྱི་དྲི་བ་འདྲ་མཛད་ན་ཞུས་པར། རྒྱལ་པོས་གསན་ཏེ་ཡོན་མཆོད་གསུང་གླེང་མང་དུ་མཛད་པའི་དུས་སུ། འཕགས་པས་ཐུགས་རྒྱལ་ཆེ་བ་ལྟར་མཛད་པ་ལས། རྒྱལ་པོས་ཁྱེད་དེ་ཙམ་དུ་ང་རྒྱལ་ཆེ་བ་ཅི་ཡིན། ཁྱེད་ལ་གོང་ཅི་ཡོད་གསུངས་པ་ལ། འཕགས་པས། ངེད་ལ་ཤེད་ཅི་ཡང་མེད། ངེད་སྔོན་ནས་རྒྱ། མི་ཉག །རྒྱ་གར། མོན། བོད་ལ་སོགས་པའི་རྒྱལ་པོ་དང་། བླ་མཆོད་བྱས་པས་ཞུ་བ་དཔངས་མཐོ་ཙམ་བྱུང་བ་ཡིན་ཞུས་པས། རྒྱལ་པོ་ན་རེ། བོད་ཀྱི་རྒྱལ་པོ་ནམ་བྱས། རྒྱལ་པོ་སུ་ཡིས་བཀུར་ཞིང་དབང་སུ་ཡིས་ཞུས། བནྡ་བོངས་དང་མི་མཐུན་པའི་རྫུན་ཟེར་བ་ཅིག་འདུག་གསུངས་པ་ལ། འཕགས་པས། བོད་ཀྱི་རྒྱལ་པོ་བྱས། རྒྱ་དང་དམག་འཐབ་པས་བོད་རྒྱལ། དེ་རྗེས་རྒྱ་བོད་གཉེན་བྱས། ཀོང་ཇོ་དང་ཡི་དམ་ཇོ་བོ་བྱོན་ཚུལ་རྣམས་ཞུས་པས། དེ་བཞིན་བདེན་ན་ཡི་གེར་བྲིས་ཡོད་པས་ལྟོས་གསུངས་པས། རྒྱའི་སྔོན་གྱི་ཡིག་ཚང་རྣམས་ལ་བལྟས་པས། དེ་བཞིན་བྱུང་བས་རྒྱལ་པོ་ཐུགས་དགྱེས་ཞེས་དང་། དེ་ནས་དཔོན་མོས་རྒྱལ་པོ་ལ། འཕགས་པ་བོད་ལ་མ་བཏང་བ་ལེགས་འདུག །ས་སྐྱ་པ་ལ་གསང་སྔགས་ཟབ་མོའི་དབང་སྐུར་གཞན་ལ་མེད་པའི་ཁྱད་ཆོས་ཤིག་ཡོད་པར་འདུག །དེ་ཞུས་པ་འཐད་ཞུས་པས། རྒྱལ་པོ་ན་རེ། སྔོན་ལ་ཁྱོད་ཀྱིས་ཞུས། ཨའུ་ཙ་འདུག་ན་ང་ཡང་ཞུ་གསུངས། དཔོན་མོས་ཀྱེ་རྡོ་རྗེའི་དབང་ཞུས་ཤིན་ཏུ་མོས་པར་གྱུར། དེ་ནས་དཔོན་མོས་རྒྱལ་པོ་ལ། ཆོས་གཞན་ལས་ཁྱད་པར་འཕགས་པ་ཞིག་འདུག་པས་གསན་པར་དྲག་ཞུས་པས། རྒྱལ་པོས་དེ་བཞིན་བྱེད་གསུངས་ནས་བླ་མ་ལ་ཞུས་པར། སྤྱིར་ཡང་ཁྱེད་ཀྱིས་ཆོས་ཞུ་བའི་དམ་ཚིག་མི་ཐུབ་ཅིང་། ད་རེས་ལོ་ཙ་བ་མཁས་པའང་མེད་པས་ཕྱིས་བྱེད་པར་ཞུ་གསུངས་པས། རྒྱལ་པོས་དམ་ཚིག་ཅི་སྲུང་དགོས་གསུངས་པར། དབང་སྐུར་ཞུས་ནས་བླ་མ་གྲལ་འགོར་བཞུགས། ལུས་ཀྱིས་ཕྱག་འཚལ། ངག་གིས་ཅི་གསུང་ཉན། ཡིད་ཀྱིས་ཐུགས་དང་མ་འགལ་བ་བྱ་དགོས་པ་ཡིན། དེ་མི་ཡོང་གསུངས་པས། དཔོན་མོས་འཚམས་པ་ཞུས་པ་ལ། ཆོས་ཞུ་བ་དང་། མི་ཉུང་དུས་བླ་མ་གུང་ལ་བཞུགས། རྒྱལ་རྒྱུད། མག་པ། མི་དཔོན། མི་དམངས་ཚོགས་དུས་མི་གནོན་དགོས་པས་རྒྱལ་པོ་གུང་ལ་བཞུགས། བོད་ཕྱོགས་ཀྱི་བྱ་བ་ལ་བླ་མ་ཅི་གསུང་དང་དུ་ལོངས། བླ་མ་ལ་མ་ཞུས་པར་རྒྱལ་པོས་ལུང་མི་གནང་། བྱ་བ་ཆེ་ཆུང་གཞན་ལ་བླ་མ་སྙིང་རྗེ་ཆེ་བས་ཞུ་ངོ་འཚོལ་དུ་འོང་ན་རྒྱལ་ཁམས་མི་ནོན་པས། བླ་མའི་གསུང་དང་ཞལ་འཇུག་མ་མཛད་ཅེས་ཞུས་པ་ལྟར། རྒྱལ་པོས་དབུ་མཛད་པའི་དབང་པ་ཉི་ཤུ་རྩ་ལྔ་ལ་ལན་གསུམ་གྱི་བར་དུ་ས་སྐྱ་པའི་ཁྱད་ཆོས་དཔལ་ཀྱེ་རྡོ་རྗེའི་དབང་ཡོངས་སུ་རྫོགས་པར་བསྐུར། ཞེས་སོགས་དང་། ༡༢༦༡ལོར་གུབ་ལའི་ཁཱན་གྱིས་ས་སྐྱའི་བླ་མ་འགྲོ་མགོན་ཆོས་རྒྱལ་འཕགས་པ་ནང་པའི་ཆོས་ཀྱི་དབུ་འཁྲིད་དང་། ཧོར་གོང་མའི་དབུ་བླར་བཀུར། ཏཱ་པའོ་ཕ་ཝང་སྟེ། ཆོས་རྒྱལ་ནོར་བུ་ཆེན་པོ་ཞེས་པའི་མཚན་གྱིས་བསྟོད། འཕགས་པར་ཧོར་ལ་ཡི་གེ་གསར་དུ་བཟོ་དགོས་ཞུས་པ་ལྟར། འཕགས་པས་ཧོར་ཡིག་གསར་བཟོ་གནང་། ༡༢༦༩ལོར་ཧོར་གོང་མ་གུབ་ལའི་ཁཱན་གྱིས། ཧོར་རྒྱལ་ཡོངས་སུ་ཧོར་ཡིག་དེ་རྒྱུན་སྤྱོད་བྱེད་དགོས་པའི་ཁྱབ་བསྒྲགས་བྱས།་ ཧོར་དང་བོད་ཀྱི་འབྲེལ་བའི་གནས་སྟངས་ནི། ཧོར་ཁོངས་རྒྱལ་ཁབ་གཞན་དག་གི་གནས་སྟངས་དང་གཏན་ནས་མི་འདྲ་སྟེ། རྒྱལ་ཁབ་གཞན་དག་ལ་ཧོར་གྱི་གོང་མའམ། རྒྱལ་སྲས་སམ། དེ་མིན་བློན་པོ་དང་། དམག་དཔོན་སོགས་གཏན་སྡོད་ཀྱིས་སྲིད་དབང་འཛིན་སྐྱོང་བྱེད་ཀྱི་ཡོད་ན་ཡང་། བོད་ཀྱི་ཆབ་སྲིད་འཛིན་སྐྱོང་མཐའ་དག་ས་སྐྱས་ཐག་གཅོད་གཙང་མར་བྱེད་པ་ལས། ས་སྐྱར་ཧོར་གྱི་དཔོན་རིགས་མི་སྣ་གཏན་སྡོད་བྱེད་མཁན་ནམ་ཡང་མེད། ཞེས་དང་། གཤམ་དུ་འཇའ་ས་བནྡ་ཤེད་བསྐྱེད་མ་དང་། མུ་ཏིག་མ་གཉིས་ཀྱི་བརྗོད་དོན་ལྟར། བོད་ནང་གི་དགེ་འདུན་གྱི་སྡེ་རྣམས་ལ། ༡༢༥༤ནས་བཟུང་ཁྲལ་དམག་ལས་གསུམ་འཁྲི་སྒྲུབ་ཅི་ཡང་མ་དགོས་པའི་དམིགས་བསལ་ཡོད། དེས་མ་ཚད། ༡༢༦༠ལོ་གུབ་ལའི་ཁཱན་ཧོར་གོང་མའི་རྒྱལ་ཁྲིར་འཁོད་རྗེས་བླ་མ་འཕགས་པའི་གསུང་ངོར་། བོད་ཀྱི་མི་སྡེ་རྣམས་ནས་ཀྱང་ཁྲལ་དང་། འདབ་ནོར་སོགས་འབུལ་མ་དགོས་པ་བྱུང་བ་ནི། རྒྱ་བོད་ཡིག་ཚང་ལས། བླ་མ་དེ་ཡི་འཕྲིན་ལས་ཀྱིས། །བོད་ཁམས་གངས་རིས་བསྐོར་འདི་ལ། །རྒྱལ་པོའི་མཛོད་དུ་འདབ་ནོར་དང་། །ཁྲལ་དམག་ལས་གསུམ་ལེན་པ་མེད། །ཅེས་གསལ་བ་ལྟར་ཡིན། ཧོར་བོད་འབྲེལ་བ་དམིགས་བསལ་ཅན་འབྱུང་བའི་རྒྱུ་མཚན་གཙོ་བོ་ནི་དམ་པའི་ཆོས་ཀྱི་ནུས་པ་ལ་བརྟེན་ནས་བྱུང་བ་ཡིན་ལ། དེ་ཡང་ཧོར་རྒྱལ་པོ་གོ་དན་དང་། ཧོར་གོང་མ་སེ་ཆེན་རྒྱལ་པོ་གཉིས་ཀ་སངས་རྒྱས་ཀྱི་ཆོས་དང་མཇལ་བའི་བསོད་ནམས་ཀྱི་རྒྱབ་རྟེན་བཟང་ཞིང་། རྣམ་པར་དཔྱོད་པའི་བློ་གྲོས་དང་ལྡན་པའི་དབང་གིས་ཆོས་རྗེ་ས་པཎ་དང་། འགྲོ་མགོན་ཆོས་འཕགས་ཀྱི་ཡོན་ཏན་ཁྱད་པར་ཅན་མང་པོ་དངོས་སུ་མཐོང་སྟེ་བཅོས་མིན་གྱི་དད་གུས་ཚད་མེད་སྐྱེས་པ་དང་། ཆོས་རྗེ་ས་པཎ་དང་། འགྲོ་མགོན་ཆོས་འཕགས་རྣམ་གཉིས་ཀྱིས་ཧོར་བོད་ཀྱི་གདུལ་བྱ་བདེ་བར་འགོད་པའི་ཐུགས་བསྐྱེད་དུས་སུ་བབས་པའི་རྒྱུ་རྐྱེན་རྟེན་འབྲེལ་འཛོམས་པ་ལ་བརྟེན་ནས་ཧོར་དུས་བོད་ཀྱི་གནས་སྟངས་དམིགས་བསལ་གཞན་དང་མི་འདྲ་བ་ཞིག་བྱུང་བ་ཡིན་ནོ། །༡༢༥༣ལོར་སེ་ཆེན་རྒྱལ་པོས་འགྲོ་མགོན་ཆོས་འཕགས་ཀྱི་དྲུང་ནས་ཀྱེ་རྡོར་གྱི་དབང་ཞུས་ཏེ་ཆོས་འཕགས་རྒྱལ་པོའི་བླ་མར་བཀུར། བོད་ཀྱི་ཆབ་སྲིད་འཛིན་སྐྱོང་གི་དབང་ཆ་འགྲོ་མགོན་ཆོས་འཕགས་ལ་ཕུལ་རྗེས་གོ་དན་གྱི་སྲས་མོ་ཇོ་མོར་སྦྱིན་ཟིན་པའི་འཕགས་པའི་གཅུང་ཕྱག་ན་རྡོ་རྗེ་ལ། པའི་ལེན་དབང་གི་ཆོ་ལོ་དང་། གསེར་ཐམ། ཐོང་ཇི་གཡས་གཡོན་གྱི་ཁྲིམས་ར་བཅས་གནང་སྟེ་བོད་ཀྱི་ཆབ་སྲིད་འཛིན་སྐྱོང་བྱེད་པོར་དབང་བསྐུར། ཕྱག་རྡོར་གྱི་སྲས་དྷཔཱལ་དང་། ས་སྐྱ་པ་བསོད་ནམས་བཟང་པོ་དང་། ཀུན་དགའ་ལེགས་པ་བཅས་ལ་ཡང་ཧོར་རྒྱལ་རྒྱུད་ཀྱི་ཇོ་མོ་སྦྱིན། བསོད་བཟང་དང་། ཀུན་ལེགས། གྲགས་པ་རྒྱལ་མཚན་སོ་སོར་པའི་ལེན་དབང་གི་གོ་མིང་དང་། གསེར་ཐམ། ས་སྐྱ་པ་རྣམ་སྲས་རྒྱལ་མཚན་ལ་རི་ཙིང་དབང་གི་གོ་མིང་དང་། གསེར་ཐམ་བཅས་སྦྱིན། ས་སྐྱའི་འཁོན་གདུང་ལ་ཧོར་རྒྱལ་རྒྱུད་ཀྱི་བཙུན་མོ་སྦྱིན་པ་བཞི་དང་། པའི་ལེན་དབང་གི་ཆོ་ལོ་སྦྱར་བ་བཞི། རི་ཙིང་དབང་གི་ཆོ་ལོ་སྦྱར་བ་གཅིག་བཅས་བྱུང་བ་ནི་འགྲོ་མགོན་ཆོས་འཕགས་ཀྱི་སྐུ་ཚ་རྣམས་ལ་ཡང་ཧོར་གྱི་གོང་མ་ཚོས་ཧོར་གྱི་རྒྱལ་སྲས་གཙོ་བོ་ཞིག་དང་འདྲ་བའི་གོ་ཐོབ་ཆེས་མཐོའི་བཀུར་བཟོས་ཕུལ་བ་ཡིན་འདུག །དཔེར་ན་རྒྱ་མི་རིགས་ལ་ཧོར་རྒྱལ་རྒྱུད་ཀྱི་ཇོ་མོ་སྦྱིན་པ་དང་། པའི་ལེན་དབང་གི་ཆོ་ལོ་སྦྱིན་པ་གཅིག་ཀྱང་བྱུང་མྱོང་མེད། ༡༢༦༠ལོར་སེ་ཆེན་རྒྱལ་པོས་མི་ཆེན་དས་སྨན་བོད་དུ་འཇའ་མོ་འཛུགས་པར་མངགས་པའི་སྐབས་སུ་རྒྱལ་པོས་དས་སྨན་ལ། བོད་འདི་མི་ཐུ་མོ་ཡིན་པར་འདུག །སྔོན་བོད་རྒྱལ་པོ་ཡོད་དུས་ཐང་ཐའི་ཛུང་རྒྱལ་པོའི་རིང་ལ་རི་བོ་རྩེ་ལྔ་བར་བོད་དམག་མང་པོ་ཡོང་། བ་ཧུ་དིང་ཧུའི་སར་བཀའ་མ་ལོག་ཟེར་བའི་དམག་ཚན་ཆེན་བསྡད། ད་ལྟ་བོད་ལ་རྒྱལ་པོ་མེད། ཇིང་གེར་རྒྱལ་པོའི་སྐུ་བསོད་ལས་རྒྱལ་ཁམས་ཆེན་པོ་དབང་དུ་བསྡུས། ས་སྐྱ་བླ་མའང་རང་རེའི་བླ་མཆོད་དུ་ཁུག་པ་འདི་ཡིན། བླ་མ་འཕགས་པ་ཁུ་དབོན་འདི་ཡུལ་གྱི་རྒྱལ་པོ་ཡིན་ན་ཁོང་ཤེས་རབ་ཆེ་བས་རང་རེས་མི་ཐུབ། ད་ལྟ་རང་རེའི་འོག་ཏུ་ཆུག་པ་འདི་ཡིན། དས་སྨན་ཁྱོད་སྤྱོད་པ་བཟང་པོ་ཡོད་པས་ས་སྐྱ་བར་ཐེངས་གཅིག་སོང་། བོད་བྱིངས་པོ་སེ་ཆེན་གུབ་ལའི་འོག་ཏུ་ཆུག་ནས་མི་ཆེན་དས་སྨན་ཡང་ས་སྐྱ་ན་སླེབས་ཡོད་པར་འདུག་ཟེར་གཏམ་སྙན་པོ་ཐོས་པ་ཡིན་གསུངས། དས་སྨན་གྱིས་ཞུས་པ། རྒྱལ་པོའི་ལུང་བཞིན་འགྲོ་བར་བྱ། དེ་ལྟ་ན་ཡང་། བོད་བྱ་བ་མི་ཐུ་མོར་འདུག་པ་དང་། ཁོང་རང་གི་རྒྱལ་ཁྲིམས་ཞིག །རྒྱ་ཧོར་གྱི་ཁྲིམས་ཇི་བཞིན་མ་འཇགས། སོ་ཁ་རྣམས་ཀྱང་མ་ཚུགས་པར་ཡོད་འདུག་པས། ཕར་ཕྱིར་གྱི་མཐུན་རྐྱེན་སྦྱོར་བ་དང་། བྱ་བ་ཆེན་པོ་འགྲུབ་པ་ཇི་ལྟར་ཡོང་ཟེར། རྒྱལ་པོའི་ལུང་གིས། རང་ལ་བོད་བྱིངས་པོ་འོག་ཏུ་ཆུག་ཡོད་པ་འདུག་ཟེར་བའི་གཏམ་སྙན་ཐོས་པ་དེས་ཆོག །ཆས་ཁ་ཆ་རྐྱེན་གང་དགོས་མ་ཐུངས་པ་གན་པས་བསྐུར། ས་སྐྱ་མན་ལ་འཇའ་མོ་ཆེ་ཆུང་དུ་འོས། ས་འཇམ་རྩུབ། མི་སྡེ་དར་རྒུད། རྒྱ་འཇམ་ལ་དཔེ་ལོངས་ལ་ཚུགས། བླ་མ་འཕགས་པ་ཡར་ཕེབས་དུས་འབྱོན་ལམ་བདེ་དགོས་པ་ཡིན་གསུངས། ལེ་ཚན་དུམ་བུ་འདིས་གང་བསྟན་སྙམ་ན། སེ་ཆེན་རྒྱལ་པོས་འཕགས་པ་ཁུ་དབོན་གྱི་མཁྱེན་རབ་ལ་ཚད་མཐོའི་ཆེ་བརྗོད་ཞུས་པ་དང་། དེ་ལྟ་བུའི་བླ་མ་བླ་མཆོད་དུ་ཁུག་པ་ལ་དགའ་སྤོབས་སྐྱེས་པ། བོད་གུབ་ལའི་འོག་ཏུ་ཆུག་ནས་མི་ཆེན་དས་སྨན་ས་སྐྱ་ན་སླེབས་འདུག་ཅེས་པའི་གཏམ་སྙན་ཐོས་པ་ཙམ་གྱིས་ཆོག་པ་དངོས་སུ་བརྗོད་པ་འདིས། དོན་ལ་བོད་ས་སྐྱའི་འོག་ཏུ་བཞག་པ་ལས་ཧོར་གྱིས་དངོས་སུ་དབང་སྒྱུར་བྱས་མེད་པ་ཤིན་ཏུ་གསལ་པོར་མཐོང་ཐུབ། འདིར་བོད་བྱིངས་པོ་གུབ་ལའི་འོག་ཏུ་ཆུག་པའི་གཏམ་ལ་དོན་གཉེར་བྱེད་པ་འདིའི་དོན་ནི། སྐབས་དེར་ཧོར་གྱི་རྒྱལ་སྲས་ནང་ཁུལ་དུ་རང་རང་གི་མངའ་ཁོངས་རྒྱ་བསྐྱེད་བྱེད་པའི་འགྲན་བསྡུར་ཡོད་པ་དང་། བོད་ལ་མཚོན་ན་ཡང་། རླངས་ཀྱི་པོ་ཏི་བསེ་རུར། འབྲི་གུང་པས་མོང་ཀོ་ཧན་དང་། ཚལ་པས་སེ་ཆེན། ཕག་གྲུས་ཧུ་ལ་ཧུ། སྟག་ལུང་པས་ཨ་རི་བྷ་ཁ་ལ་བརྟེན། རྒྱལ་རྒྱུད་བཞི་པོས་ཁྲི་སྐོར་སོ་སོར་སྒོས་བདག་བྱས། དེ་རྟིང་མོན་ཀོ་རྒྱལ་པོ་གཤེགས་རྗེས། སེ་ཆེན་རྒྱལ་པོས་བོད་ཀྱི་ཡུལ་སྲུང་ཐམས་ཅད་ཕྱིར་བསྡུས། ཞེས་གསལ་བ་ལྟར་རྒྱལ་སྲས་གཞན་དག་ཚོས་རང་རང་གི་བླ་མཆོད་སར་བཞག་པའི་ཡུལ་སྲུང་རྣམས་ཕྱིར་བསྡུས་ཏེ་བོད་ཡོངས་རྫོགས་གུབ་ལའི་རང་ཉིད་ཀྱི་ཁྱབ་ཁོངས་སུ་ཆུག་པའི་གཏམ་བྱུང་ན་ཆོག་པར་འཛིན་པའི་དོན་ཡིན་གྱི། གུབ་ལའི་རང་ཉིད་ཀྱིས་དངོས་སུ་བོད་བདག་སྐྱོང་བྱས་པར་གོ་རྒྱུ་མ་ཡིན་ནོ། །གུབ་ལའི་ཁཱན་གྱིས། ༡༢༦༠ལོར་ཧོར་གོང་མའི་སྲིད་ཁྲིར་འཛེགས་རྗེས་འགྲོ་མགོན་ཆོས་འཕགས་ནང་པ་ཡོངས་ཀྱི་དབུ་ཁྲིད་དུ་ཡོངས་བསྒྲགས་བཀུར་བཟོས་ཕུལ་བས་ན། ཆོས་ཕྱོགས་ནས་ས་སྐྱས་བོད་ཙམ་མིན་པར་རྒྱ་ནག་ཐེ་བས་ཧོར་གྱི་ཁྱབ་ཁོངས་ནང་པ་ཚང་མར་ཆོས་ཕྱོགས་ཀྱི་བཀའ་ལུང་སྒྱུར་བཞིན་གནས། དེ་ལྟར་ཡོན་གོང་མ་གུབ་ལའི་ཁཱན་གྱི་དུས་སུ་འགྲོ་མགོན་ཆོས་རྒྱལ་འཕགས་པར་ཆེ་མཐོང་གུས་བཀུར་ད་ེ་ལྟ་བུ་ཞུས་པས་མ་ཚད། ཡོན་གོང་མ་མི་ཐོག་རྗེས་མ་ཚོའི་དུས་སྐབས་སུ་ཡང་འཕགས་པར་གུས་འདུད་ཧ་ཅང་ཆེན་པོ་རྒྱུན་མཐུད་དུ་ཞུས་པ་དཔེར་ན། ཡོན་གོང་མ་ཁྲི་རབས་བཅུ་གཉིས་པའི་བཀའ་ཁྱབ་དོན་བཞིན། ཡོན་གྱི་མངའ་ཁོངས་སྲིད་འཛིན་ས་ཁུལ་ཆེ་ཁག་ས་ོསོར་འགྲོ་མགོན་འཕགས་པའི་རྗེས་དྲན་ལྷ་ཁང་གསར་བཞེངས་བྱས་པ་དང་། ཡོན་གྱི་ཁྲི་རབས་བཅུ་གསུམ་པས་ལྷ་ཁང་སོ་སོར་འཕགས་པའི་སྐུ་བརྙན་རེ་དང་། འཕགས་པའི་འདྲ་ཐང་བཅུ་གཅིག་གསར་བཞེངས་ཀྱིས་ཁུངས་སོ་སོར་རྩིས་སྤྲད་བྱས་ཏེ་འཕགས་པའི་བཀའ་དྲིན་རྗེས་དྲན་མཆོད་འབུལ་ཞུ་དགོས་པའི་བཀའ་ཁྱབ་སྤེལ་བ་བཅས་བྱས་ཡོད། ཧོར་གོང་མ་སེ་ཆེན་རྒྱལ་པོས་རང་གི་བླ་མ་འགྲོ་མགོན་ཆོས་འཕགས་ལ་ཆོས་སྲིད་གང་ཅི་ནས་ཤིན་ཏུ་ཚད་མཐོའི་བཀུར་བཟོས་གཞན་དང་མི་འདྲ་བ་ཞུས་པ་ལ་བརྟེན་ནས། ཧོར་གོང་མ་ཕྱི་མ་ཚོས་ཀྱང་ས་སྐྱའི་འཁོན་གདུང་བཅུ་བཞི་རིམ་བཞིན་རང་རང་གི་བླ་མར་བཟུང་ཏེ་བཀུར་བཟོས་ཆེ་མཐོང་བདག་རྐྱེན་ཆེན་པོ་ཕུལ་ཡོད། ཡང་སྐབས་ཤིག་ཏུ་ཧོར་གོང་མ་སེ་ཆེན་རྒྱལ་པོས་བླ་མ་འཕགས་པ་ལ། དང་པོ་ཇིང་གེར་རྒྱལ་པོས་རྒྱལ་ཁམས་ཆེན་པོ་དབང་དུ་བསྡུས་པའི་དུས་དང་། ངེད་ཀྱིས་རྒྱལ་ཁམས་འཆོས་པ་དང་། འཇགས་སུ་འཇུག་པའི་དུས་སུ་ཡང་ཤེ་མོང་ལེགས་པར་འདབ་པའི་ཧོར་གྱི་དམག་མི་རྣམས་ལ་ད་ལྟ་ནོར་གྱི་ཤེ་མོང་ཞན་པས་ཤེ་མོང་སྣོན་པའི་ཐབས་དང་། འཆོས་ཕྱོགས་ཇི་ལྟར་བྱས་ན་འཐད་གསུང་བར། བླ་མས། ཁྱེད་རང་ལ་ཡོད་པའི་མཛོད་ཀྱི་ཆ་རྐྱེན་དང་། དམག་མིའི་གྲངས་ལོངས་ལ་ལོ་འགའི་བར་གཞི་བཅས་ཀྱི་ལྟོ་གོས་འཚོ་བའི་གནང་སྦྱིན་བྱེད་པར་འོས་གསུངས་པ་བཞིན་བྱས་པས། རྩ་བའི་ཧོར་དམག་ཁྲི་ཚོ་ལྔ་བཅུ་དང་། རེས་པ་༼རེས་མོས་ཀྱི་དོན༽ཡང་ཚན་ཆེ་བར་བྱུང་བས་གནང་སྦྱིན་ཆ་རྐྱེན་མ་ལྡངས་པར། ཡང་རྒྱལ་པོས་ད་ལྟ་ཆ་རྐྱེན་མི་ལྡངས་པས། ཧོར་གྱི་ལྷོ་ཕྱོགས་ན་སྨན་ཚེ་བྱ་བའི་རྒྱལ་པོ་དང་། དེའི་འོག་ན་མི་སྡེ་ཕྱུག་པོ་ཡོད་པར་འདུག །དེ་རང་རེའི་དམག་གིས་བླངས་ཏེ་བུ་རྟའི་ཤེ་མོང་བཅོས་ན་ཨེ་འཐད་གསུངས་བར། བླ་མས། ད་ལྟ་ཁྱེད་ལ་དོན་འདི་སྒྲུབ་པའི་མི་མི་སྣང་བས་མ་རིངས། ངེད་ཀྱིས་བརྟག་པ་བྱེད་གསུངས། དེའི་ཕྱི་ལོ་རྒྱལ་པོའི་གཅུང་པོ་ཧུ་ལ་ཧུས་གོང་མ་ལ་འདབ་ནོར་དང་། ལོ་གསར་སྐྱེལ་བར་དཔོན་བ་ཡན་ཟེར་བས་འགོ་བྱས་འུ་ལག་ལྔ་བརྒྱ་ཙམ་ཡོང་བ་ཏའི་ཏུར་སླེབས་ནས་རྒྱལ་པོ་དང་མཇལ་འཕྲད་བྱེད་པའི་དུས་སུ་བླ་མ་དམ་པའང་གདན་དྲངས་པར། བ་ཡན་གྱི་སྤྱོད་ལམ་དང་། འགྲོ་ལུགས། གཏམ་བརྗོད་མཁས་པ། ཡོན་ཏན་ཆེ་བར་འདུག་པ་བླ་མས་མཁྱེན་ནས། རྒྱལ་པོ་ལ། མི་བཟང་པོ་ཁོང་པ་ལ་འདུག་གསུངས་པས། རྒྱལ་པོས་དགོངས་ནས། བ་ཡན་གྱི་ཚབ་ཏུ་གོང་མའི་རེས་དཔོན་གཅིག་བཏང་། བ་ཡན་སྡོད་གསུངས། དེ་རྗེས་རྒྱལ་པོས་བླ་མ་ལ། བ་ཡན་འདི་སྨན་ཚེའི་ཕྱོགས་སུ་བཏང་ན་གསུངས་པར། བླ་མས་དེས་འཕེར་བ་འདུག །ངེད་ཀྱིས་དོན་འགྲུབ་པའི་ཐབས་དང་། རྟེན་འབྲེལ་བྱེད་གསུངས་ནས། ཛུ་ཆུར་ལྷ་ཁང་དང་། ཆོས་སྐྱོང་མཧཱཀཱལ་འཁོར་བཅས་བཞེངས། རབ་གནས་བླ་མ་རང་གིས་མཛད། མགོན་པོའི་ཞལ་སྨན་ཚེའི་ཕྱོགས་ལ་གཟིགས་པར་མཛད། སློབ་དཔོན་དམ་པ་ཀུན་དགའ་ཆོས་སྐྱོང་སྒྲུབ་པ་མཛད་པ་ལ་བཀོད། བ་ཡན་ལ་ཆིང་སང་གི་མིང་དང་། ཐམ་ག་སྦྱིན་ཏེ་བཏང་བས། བ་ཡན་ཆིང་སང་དམག་ལེགས་ནས་སྨན་ཚེའི་རྒྱལ་པོའི་ཕོ་བྲང་ཡང་ཐོབ། རྒྱལ་ཁམས་བླངས། ལོ་རྒྱུས་དུམ་བུ་འདི་ཤིན་ཏུ་གནད་ཆེ་སྟེ། འགྲོ་མགོན་ཆོས་འཕགས་ལ་བོད་ཀྱི་ཆབ་སྲིད་སྐྱོང་བའི་བདག་དབང་ཡོད་པས་མ་ཚད། ཧོར་གོང་མའི་ཆབ་སྲིད་ཀྱི་བྱ་བར་བཀོད་བྱུས་སློབ་སྟོན་གནང་བའི་དབང་ཚད་དང་ལྡན་པ་ཤིན་ཏུ་གསལ་པོར་མཐོང་། ཧོར་གོང་མ་སེ་ཆེན་རྒྱལ་པོས་ཅི་བཤད་བླ་མ་འཕགས་པས་དང་ལེན་མི་མཛད་པར་སྣང་སྟེ། དཔེར་ན། ༡༢༥༣ལོར་སེ་ཆེན་རྒྱལ་པོ་དང་། འཕགས་པ་རིན་པོ་ཆེ་ཐོག་མར་མཇལ་སྐབས་རྒྱལ་པོས་བོད་ལ་དམག་ཁྲལ་འགེལ་བ་དང་། ནོར་སྡུད་ལ་གཏོང་གསུངས་པ་ལ་འཕགས་པས། བོད་མཐའ་འཁོབ་ཡུལ་ཆུང་། འབྱོར་པ་མེད་པས་དམག་ཁྲལ་མི་ཐེག་ཅེས་བཀག་པ་དང་། དེའི་འཇུག་ཏུ་རྒྱལ་པོས་འཕགས་པའི་དྲུང་ནས་ཆོས་ཞུས་རྗེས་ཉི་མ་ནུབ་ཕྱོགས་ཀྱི་བནྡ་རྣམས་ཇི་ལྟར་བྱ་བའི་མགོ་ལུང་ས་སྐྱ་པ་ཤེས་སུ་ཆུག་བྱ་བའི་ལུང་གནང་ཞིང་། བོད་ཐམས་ཅད་ལ་ས་སྐྱ་པའི་ཆོས་ལུགས་ལས་གཞན་བྱེད་དབང་མེད་པའི་ལུང་འབུད་གསུངས་པ་ལ། ཆོས་རྒྱལ་འཕགས་པས་རང་རང་གི་ཆོས་ལུགས་གང་ཡོད་སྐྱོང་དུ་འཇུག་པ་ཅིས་ཀྱང་དགོས་གསུངས་ནས་མཆོད་ཡོན་གཉིས་ཀའི་འཇའ་ས་ཐམས་ཅད་ལ་རང་རང་གི་ཆོས་ལུགས་ལ་འབད་པ་ཐོན་གསུངས་པ་ཤ་སྟག་ཡོད། ཡང་སངྒྷ་བྱ་བ་བརྒྱུད་པ་བཀའ་མ་ལོག་ཡིན་པའི་མི་གཞོན་སྐད་རིགས་སྣ་ཚོགས་ལ་མཁས་པ་ཞིག་ཡོད་པ་འཕགས་པས་རྒྱལ་པོའི་སར་ཡང་ཡང་གཏོང་གནང་ལ་རྒྱལ་པོས་མི་གོ་ཆོད་དུ་མཐོང་ནས་ཉར། ཕྱིས་རྒྱལ་པོས་སོན་ཇིང་དབོན་གྱི་མི་དཔོན་ལ་བསྐོས། སངྒྷས་བླ་མ་ལ་ཆོས་ཞུ་བའི་ཆེད་སྒོས་ཀྱི་འཚལ་ཁང་གཅིག་བྱས་པ་ལ་ཐའི་སས་སྐྱོན་བཟུང་ནས་སངྒྷ་བཙོན་དུ་འཁྱེར། དེ་སྐབས་ཀ་ལེ་ཧུ་ན། སངས་རྒྱས་ཀྱི་མཛད་པ་བཅུ་གཉིས་ཀྱི་སྐུ་བཞུགས་པ་སྤྱན་དྲངས་ནས་རོལ་མོ་དང་ལྟད་མོ་ཡོད་པ་ལ་རྒྱལ་པོའང་བྱོན་ནས་བསྐོར་བ་དང་གཟིགས་མོ་མཛད་པའི་སར། བླ་མ་གདན་འདྲེན་དུ་བཏང་བར། བླ་མའི་གསུངས་ནས། ངེད་བོད་ཡུལ་ན། བུ་བཙོན་དུ་འཁྱེར་བའི་ཕ་དེ་སྲང་ལ་འགྲོ་བ་ལའང་ངོ་ཚ་བྱེད། ངའི་སངྒྷ་ཆོས་ཞུ་བ་ལ་དམིགས་པའི་ཁང་ཆུང་གཅིག་བྱས་པ་ལ་ཐའི་སས་སྐྱོན་བཟུང་ནས་བཙོན་དུ་འཁྱེར་འདུག་པས་ང་མི་ཡོང་གསུང་བ་གོང་མ་ལ་ཞུས་པས། ཁོ་ལ་སྐྱོན་མ་བཟུང་བར་ཐོངས། བླ་མ་ལྟད་མོ་ལ་བྱོན་གྱིས་གསུངས་པའི་ལུང་བྱུང་བས་སངྒྷ་ཉེས་པ་ལས་གྲོལ། མཆོད་ཡོན་ཞལ་འཛོམས། ༡༢༧༦ལོར་བླ་མ་འཕགས་པ་བོད་དུ་ཕེབས་པར་བརྩམས་པ་ནས་བཟུང་། ཕྱིས་མཆོད་ཡོན་མི་མཇལ་བའི་རྟེན་འབྲེལ་དབང་གིས་གོང་མའི་ཐུགས་ལ་འབྲལ་མི་ཕོད་པ་ལྟ་བུའི་ཉམས་འཁྲུངས་ནས་སྐྱེལ་ཐུང་ཞག་ནས་ཟླ་བར་སྤར། ཟླ་བ་ནས་ལོར་སྤར། བོད་ཀྱི་ཡུལ་སྤོམ་ར་ལྷའི་བྱ་འདབ། རྨ་གུ་རའི་ལྷ་ཞོལ་རྨ་ཆུ་ཁུག་པའི་ས་ཆ་བར་ཕེབས། ཉི་ཟླ་དང་མཚུངས་པའི་མཆོད་ཡོན་གདན་འཛོམས་པ་ལ་མཐའི་རྒྱལ་པོ་ཡན་ལག་བཞིའི་དཔུང་ཚོགས་ལ་དབང་ཐོབ་པ་བཅུ་གཅིག་འཁོར་འབུམ་ཕྲག་མང་པོས་བསྐོར་ཏེ་མཆོད་སྤྲིན་བསྙེན་བཀུར་གྱ་ནོམ་པ་ཕུལ། འགྲོ་མགོན་ཆོས་འཕགས་ཕེབས་སྐྱེལ་དུ་ཧོར་གོང་མ་སེ་ཆེན་རྒྱལ་པོ་རང་ཉིད་འཁོར་འབུམ་ཕྲག་གིས་བསྐོར་ཏེ་རྒྱལ་ས་པེ་ཅིང་ནས་བོད་ས་རྨ་ཆུ་ཁུག་པའི་བར་བཅར་བ་འདིས། འགྲོ་མགོན་ཆོས་འཕགས་ལ་ཧོར་གོང་མས་གཞན་དག་སུ་དང་མི་འདྲ་བའི་ཆེ་བསྟོད་གུས་བཀུར་བླ་ན་མེད་པ་ཞུས་པ་གསལ་པོར་བསྟན་པ་ཡིན། ༡༢༧༧ལོར་ཧོར་གོང་མས་འཕགས་པ་རིན་པོ་ཆེའི་ཕེབས་སྐྱེལ་ཞབས་ཕྱིར་མངགས་པ་རྒྱལ་སྲས་ཇིམ་གྱིམ་བྱ་བས་སྦྱིན་བདག་བྱས་ནས་གཙང་གི་ཆུ་མིག་རིང་མོར་དགེ་འདུན་ཁྲི་བདུན་ལྷག་པར་བསྙེན་བཀུར། ཆོས་འཁོར་ཆེན་པོ་ཞག་བཅུ་བཞིའི་བར་དུ་གནང་བའི་ཚེ་ནམ་མཁར་འཇའ་འོད་དང་། མཆོད་པའི་བྱེ་བྲག་མང་པོ། སངས་རྒྱས་སྲས་བཅས་བཞུགས་པ་ཡོངས་འཛིན་བཅུ་གཅིག་དང་། ཆིང་སང་བཅུ་གཉིས་སོགས་ལས་དག་པ་རྣམས་ཀྱིས་མཐོང་། སྣར་ཐང་གི་མཁས་པ་བཅོམ་ལྡན་རིག་རལ་གྱིས་ཀྱང་བླ་མ་འཕགས་པས་གནས་བརྟན་བཅུ་དྲུག་ལ་དངོས་སུ་མཆོད་པ་འབུལ་བ་གཟིགས། འདི་ལྟ་བུའི་འགྲོ་མགོན་ཆོས་འཕགས་ཀྱི་མཁྱེན་རླབས་དང་། མཛད་པ་ངོ་མཚར་ཅན་མང་པོ་ལ་བརྟེན་ནས། ཡོན་གོང་མས་གཙུག་ཏུ་བཀུར་ཏེ་བོད་ས་སྐྱའི་ལག་ཏུ་ཅི་དགར་བཞག་པ་ཡིན་ནོ། །དེ་ལྟར་ཧོར་གོང་མ་སེ་ཆེན་རྒྱལ་པོས་༡༢༥༣ལོར་འགྲོ་མགོན་ཆོས་འཕགས་ཀྱི་དྲུང་ནས་ཀྱེ་རྡོར་གྱི་དབང་ཞུ་ཁར། སློབ་མས་དམ་ཚིག་སྲུང་སྟངས་སྐོར་བཙུན་མོ་ཆ་བུས་གྲོས་སྟོན་པ་ལྟར། བོད་ཕྱོགས་ཀྱི་བྱ་བ་ལ་བླ་མས་ཅི་གསུང་དྭང་དུ་ལེན་རྒྱུ་དང་། བླ་མ་ལ་མ་ཞུས་པར་རྒྱལ་པོས་ལུང་མི་གནང་བར་ཁས་བླངས་པ། ཀྱེ་རྡོར་གྱི་དབང་ཞུས་རྗེས་རང་གི་རྩ་བའི་བླ་མ་ས་སྐྱའི་འགྲོ་མགོན་ཆོས་འཕགས་ལ་ཆོས་སྲིད་གང་ཅིའི་ཆ་ནས་གཞན་དང་མི་འདྲ་བའི་གུས་བཀུར་ཞབས་འདེགས་རྒྱ་ཆེ་ཞུས་ལུགས། དེ་གོང་ཧོར་གྱི་རྒྱལ་སྲས་གཞན་དག་ཚོས་བོད་ནང་སོ་སོའི་བླ་མཆོད་སར་ཡུལ་སྲུང་བཞག་པ་རྣམས་ ༡༢༦༠ལོར་སེ་ཆེན་རྒྱལ་པོས་ཕྱིར་བསྡུ་བྱས་པ། འགྲོ་མགོན་ཆོས་འཕགས་སེ་ཆེན་གྱི་བླ་མར་བཀུར་བས་མ་ཚད་ཆབ་སྲིད་གལ་ཆེའི་བཀའ་སློབ་ཞུ་ཡུལ་ཡིན་པ། ས་སྐྱའི་འཁོན་གདུང་བཞི་ལ་ཧོར་རྒྱལ་རྒྱུད་ཀྱི་བཙུན་མོ་སྦྱིན་ཏེ་ས་སྐྱ་པ་རྣམས་ཧོར་རྒྱལ་སྲས་ངོ་མ་དང་འདྲ་བའི་ཐོབ་བཟོས་སྤྲད་པ་སོགས་ཧོར་བོད་འབྲེལ་བ་ཐུན་མོང་མ་ཡིན་པ་ཇི་སྙེད་བྱུང་བའི་གནས་ལུགས་འདི་དག་ལེགས་པར་ཁོང་དུ་ཆུད་ན། ཡོན་དུས་སུ་བོད་ཡོན་གོང་མའི་འཛིན་སྐྱོང་འོག་མ་བཅུག་པར་བོད་ཀྱི་འཛིན་སྐྱོང་ས་སྐྱས་རང་དབང་དུ་བྱས་ཏེ་བསྡད་པའི་གནད་དོན་བདེ་བླག་ཏུ་རྟོགས་པར་འགྱུར་རོ། གོང་གསལ་དེ་དག་ནི་ཧོར་བོད་འབྲེལ་བའི་གནས་ཚུལ་དངོས་བྱུང་ལ་དཔྱད་ཞིབ་བགྱིས་པའི་བསྡོམས་ཚིག་ཡིན། ཞེས་གསུངས་ཡོད། ༈ གདོང་ཐོག་བསྟན་པའི་རྒྱལ་མཚན་གྱིས། བོད་རྒྱལ་གཉའ་ཁྲི་ནས་རྒྱལ་དབང་བཅུ་བཞི་པ་མཆོག་གི་བར་བོད་ཀྱི་དབང་ཤུགས་ཁྱབ་ཚད་ནི། གཉའ་ཁྲི་སོགས་ཀྱི་དུས་སུ་ཡར་ཀླུང་ཁུལ་ཙམ་ལ་དབང་བ་ནས་སྲོང་བཙན་དུས་ནས་རྒྱ་བསྐྱེད་དེ། ཁྲི་སྲོང་དུས་འཛམ་གླིང་སུམ་གཉིས་དང་། ཁྲི་རལ་དུས་འཛམ་གླིང་སུམ་གཉིས་ལྷག་ལ་དབང་ཞིང་། གླང་དར་དུས་ནས་བོད་ཉམས་པའི་མགོ་ཚུགས་ཏེ་སྲས་ཀྱི་རིང་ལ་བོད་སིལ་བུར་འཐོར། མཐར་བོད་ཡོངས་རྫོགས་ཧོར་གྱིས་བཟུང་། འགྲོ་མགོན་ཆོས་རྒྱལ་འཕགས་པས་ཧོར་རྒྱལ་གྱི་འོག་ནས་བོད་ཆོལ་ཁ་གསུམ་རང་བཙན་བཞེས་ཏེ་ས་སྐྱས་ཆོལ་གསུམ་ཡོངས་ལ་དབང་བསྒྱུར། དེ་ནས་ཕག་གྲུ། རིན་སྤུངས་པ། སྡེ་པ་གཙང་པ་བཅས་ཀྱིས་བོད་དབུས་གཙང་ཁྲི་སྐོར་བཅུ་གསུམ་ཙམ་ལ་དབང་བསྒྱུར། དགའ་ལྡན་ཕོ་བྲང་པས་དང་ཐོག་དབུས་གཙང་། མངའ་རིས། མདོ་སྟོད་ས་ཁུལ་མང་ཙམ་དབང་ཡང་རྒྱལ་དབང་དྲུག་པའི་རྗེས་ནས་ཁམས་ཕྱོགས་ས་སྡེ་མང་པོ་རིམ་པས་རྒྱ་ལ་ཤོར། ༡༩༥༠ལོ་ནས་རྒྱ་དམར་གྱིས་ཆབ་མདོ་བླངས་ཏེ་ལྷ་སར་འབྱོར་ནས་བོད་གཞུང་གི་སྲིད་དབང་རིམ་པས་ཤོར་མཐར། ༡༩༥༩ལོར་བོད་ཡོངས་རྫོགས་རྒྱ་དམར་གྱིས་ཕྲོགས། མདོ་སྨད་ཨ་མདོ་ནི། ས་སྐྱའི་སྲིད་དབང་ཕག་གྲུས་ཕྲོགས་རྗེས་ནས་ཨ་མདོའི་ས་ཁུལ་མང་བ་ཞིག་ཟི་ལི་རྒྱའི་འོག་ཏུ་ཚུད། བླ་བྲང་བཀྲ་ཤིས་འཁྱིལ་གྱིས་ས་སྡེ་ཁ་ཤས་དབང་། ས་སྡེ་ཁ་ཤས་དཔོན་མགོ་རང་བཙན་དུ་གནས། ཡུལ་མིས་ཟི་རྒྱར་ངོ་རྒོལ་འཁྲུག་འཛིང་ཡང་ཡང་བྱས། ཞེས་དང་། དེ་ལྟར་བོད་རྒྱལ་ཁབ་ཧོར་རྒྱལ་རྒྱུད་ཀྱིས་ལོ་བཞི་བཅུ་ཞེ་དགུའི་རིང་བཙན་བཟུང་བྱས་མཐར། ས་སྐྱའི་འགྲོ་མགོན་ཆོས་རྒྱལ་འཕགས་པས་འགྲོ་བ་མི་གཅིག་གི་ཚེ་སྲོག་ལའང་གནོད་འཚེ་མ་ཕོག་པར་འཚེ་མེད་ཞི་བའི་ལམ་ནས་བོད་ཡུལ་ཆོལ་ཁ་གསུམ་ཕྱི་རྒྱལ་གྱི་བཙན་གནོན་འོག་ནས་ཐར་ཏེ་ཆོས་སྲིད་གཉིས་ལྡན་རང་བཙན་གཙང་མའི་གནས་ལ་བཀོད་མཛད་པ་ནི། སྔ་རྗེས་བོད་ཀྱི་དབང་འཛིན་པ་སུས་ཀྱང་འགྲན་ཟླ་བྱར་མེད་པའི་རླབས་ཆེན་གཟི་བརྗིད་ཅན་གྱི་མཛད་བཟང་ཞིག་ཡིན་ནའང་། ཕྱིས་ནས་བློ་ཆུང་དཔོན་རིགས་རྣམས་ཀྱིས་ཁོང་གིས་བྱིན་པའི་བདེ་སྐྱིད་ལ་བག་ཕེབས་སུ་ལོངས་སྤྱོད་མ་ཤེས་པར་ནང་འཁྲུག་ཁོ་ན་བསླངས་ཏེ་རང་གཞན་གཉིས་ཕུང་སོང་འདུག་པ་ནི་ཀྱེ་མ་ཀྱི་ཧུད། ཞེས་གསུངས། སྨྲས་པ། ཆོས་རྒྱལ་འཕགས་པས་ཆོས་སྲིད་ཟུང་འབྲེལ་བཙུགས། །ཆོས་ལུགས་ཐམས་ཅད་རང་རང་ཅི་བདེར་སྤྱད། །སྐྱེ་འགྲོ་རྣམས་ཀྱང་བདེ་སྐྱིད་ཉི་མ་ཤར། །སྙན་པའི་གྲགས་པས་འཇིག་རྟེན་ཁམས་ན་ཁྱབ། །ཕྲག་དོག་སྡུག་པའི་སེམས་འཆང་སྐྱེ་བོ་རྣམས། །ཕལ་ཆེར་རང་རྒྱལ་གཞན་ཕམ་ཁོ་ན་ཡི། །བསམ་སྦྱོར་ངན་པས་རང་གཞན་སྡུག་ལ་སྦྱར། །དེ་ཕྱིར་རིམ་གྱིས་ཆོས་སྲིད་ཟུང་འབྲེལ་ཉམས། །རང་རང་ནུས་པས་རང་ཕྱོགས་ཁོ་ན་བསྐྱངས། །རང་ཆུས་རང་གིས་བཤིག་པར་མི་ཤེས་པར། །རང་སྐྱོན་གཞན་གྱི་སྟེང་དུ་འབད་པ་བརྒྱས། །འདོར་བར་བྱེད་འདི་ཅི་ཡི་ཚུལ་སོམས་ཤིག །འདི་འདྲ་སྐྱེ་བོ་ངན་པའི་རང་གཤིས་ཡིན། །ཐོག་མར་འཛམ་གླིང་སུམ་གཉིས་དབང་དུ་བསྡུས། །བར་དུ་ཆོས་སྲིད་ཟུང་འབྲེལ་དབུ་འཕང་མཐོ། ༼བཀའ་ཐང་བསྡུས་པ་གཟིགས༽།ཐ་མ་བོད་འདི་རྒྱ་ཡི་འོག་ཏུ་འཇུག །ཆོས་སྲིད་ཟུང་འབྲེལ་ནམ་མཁའི་པདྨ་གྱུར། །
༡༽ཆོས་ཀྱི་རྒྱལ་པོ་འཕགས་པ་རིན་པོ་ཆེ་རབ་བྱུང་བཞི་པའི་ཤིང་ལུག་ཕྱི་ལོ་༡༢༣༥ལོར་སྐུ་འཁྲུངས། ༢༽ཤིང་འབྲུག་ཕྱི་ལོ་༡༢༤༤དགུང་ལོ་བཅུར་ཕེབས་དུས་ཆོས་རྗེ་ས་སྐྱ་པཎྜིཏ་རྒྱལ་པོ་གོ་དན་གྱིས་གདན་དྲངས་སྐབས་ལྷན་དུ་བྱོན། དེ་སྐབས་ལྷ་ས་གཙུག་ལག་ཁང་དུ་ཆོས་རྗེ་པ་ལས་རབ་ཏུ་བྱུང་། ༣༽དགུང་ལོ་བཅུ་བདུན་པ་ལྕགས་ཕག་ཕྱི་ལོ་༡༢༥༡ལོར་ཆོས་རྗེ་ས་སྐྱ་པཎྜིཏ་སྐུ་གཤེགས་ཁར་བསྟན་པའི་བདག་པོར་མངའ་གསོལ། ༤༽དགུང་ལོ་བཅུ་དགུ་པ་ཆུ་མོ་གླང་ཕྱི་ལོ་༡༢༥༣ལོར་ཧུ་པི་ལི་སེ་ཆེན་ཁཱན་གྱིས་གདན་དྲངས། ལོ་དེར་རྒྱལ་པོས་ཞུས་པ་ལྟར་རྒྱལ་པོ་རང་ཉིད་ཀྱིས་གཙོ་བོ་བྱས་པའི་མི་ཉི་ཤུ་རྩ་ལྔ་ལ་དཔལ་ཀྱེ་རྡོ་རྗེའི་དབང་བསྐུར་ཐེངས་དང་པོ་གནང་། ཏི་ཤྲི་ཞེས་པའི་མཚན་གནས་དང་། གཡང་ཊི་ལ་ཡི་གེ་༼ས༽དང་། རིན་པོ་ཆེ་ཡོད་པའི་ཐམ་ག་ཕུལ། ༥༽ཤིང་སྟག་ཕྱི་ལོ་༡༢༥༤ལོར་བནྡ་ཤེད་བསྐྱེད་ཀྱི་འཇའ་ས་བོད་ཡིག་མ་བསྩལ། འགྲོ་མགོན་འཕགས་པས་རྒྱལ་པོར་ཞུས་པ་བཞིན། གྲཱ་པའི་ཁང་པར་གསེར་ཡིག་པས་མཚེར་མི་འབབ་པ་དང་། འུ་ལག་དང་། ཁྲལ་མི་བསྐུལ་བའི་བཀའ་ཡིག་གནང་། ༦༽ཤིང་ཡོས་ཕྱི་ལོ་༡༢༥༥ལོར་སྣར་ཐང་མཁན་ཆེན་གྲགས་པ་སེངྒེ་ལས་བསྙེན་པར་རྫོགས། ༧༽ལྕགས་བྱ་ཕྱི་ལོ་༡༢༦༡ལོར་འགྲོ་མགོན་ཆོས་འཕགས་ནང་པ་ཡོངས་ཀྱི་དབུ་ཁྲིད་དང་། གོང་མའི་དབུ་བླར་བཀུར། ཏཱ་པའོ་ཕ་ཝང་ཆོས་རྒྱལ་ནོར་བུ་ཆེན་པོ་ཞེས་པའི་མཚན་གྱིས་བསྟོད། ༨༽ཤིང་བྱི་ཕྱི་ལོ་༡༢༦༤ལོར་བོད་དུ་ཕེབས་ཁར་གོང་མས་སླར་ཡང་འགྲོ་མགོན་ཆོས་རྒྱལ་འཕགས་པ་ལ་བོད་ཀྱི་ཆོས་སྲིད་གཉིས་ཀའི་བདག་པོར་བསྐོས་པའི་འཇའ་ས་མུ་ཏིག་མ་ཕུལ། ༩༽ཤིང་གླང་ཕྱི་ལོ་༡༢༦༥ལོར་ས་སྐྱར་ཕེབས། ༡༠༽རབ་བྱུང་ལྔ་པའི་མེ་ཡོས་ཕྱི་ལོ་༡༢༦༧ལོར་སླར་ཡང་གོང་མས་གདན་འདྲེན་གྱི་བཀའ་ཡིག་ནན་ཆེ་འབྱོར་བ་ལྟར་ལས་ཚན་བཅུ་གསུམ་གྱི་རྒྱས་སྤྲོས་དང་བཅས་ཧོར་གྱི་ཡུལ་དུ་བྱོན། ༡༡༽ས་འབྲུག་ཕྱི་ལོ་༡༢༦༨་ལོར་གོང་མས་ཞུས་པ་བཞིན་ཧོར་ཡིག་གསར་མ་བརྩམས། དཔོན་ཆེན་ཤཱཀྱ་བཟང་པོར་བཀའ་གནང་ནས་སྤྲུལ་པའི་ལྷ་ཁང་ཆེན་མོ་ཏུང་ཧོང་གཉིས་པར་གྲགས་པ་གསར་དུ་བཞེངས། ༡༢༽ས་སྦྲུལ་ཕྱི་ལོ་༡༢༦༩ལོར་ཧོར་གོང་མ་ཀུབ་ལའི་ཁཱན་གྱིས་ཧོར་རྒྱལ་ཡོངས་སུ་ཧོར་ཡིག་དེ་རྒྱུན་སྤྱོད་བྱེད་དགོས་པའི་ཁྱབ་བསྒྲགས་བྱས། ༡༣༽དགུང་ལོ་སོ་དྲུག་པ་ལྕགས་རྟ་ཕྱི་ལོ་༡༢༧༠ལོར་སླར་ཡང་རྒྱལ་པོས་ཀྱེ་རྡོ་རྗེའི་དབང་ཞུས། ཤེལ་དམ་གླིང་དྲུག་མ་དང་འཇའ་ས་ཁྱད་པར་ཅན་ཕུལ་ཏེ་གནམ་གྱི་འོག་སའི་སྟེང་ན་རྒྱ་གར་ལྷའི་སྲས་པོ། སྤྲུལ་པའི་སངས་རྒྱས། ཡི་གེ་རྩོམ་མི། རྒྱལ་ཁམས་འཇགས་སུ་འཇུག་པ་པོ། གནས་ལྔ་རིག་པའི་པཎྜིཏ། འཕགས་པ་ཏི་ཤྲི་ཞེས་པའི་མཚན་བསྟོད་ཕུལ། ༡༤༽མེ་བྱི་ཕྱི་ལོ་༡༢༧༦ལོར་ས་སྐྱར་ཕྱག་ཕེབས། གཙང་ཆུ་མིག་རིང་མོར་སེར་སྐྱ་འབུམ་ཙམ་ལ་ཉིན་བཅོ་ལྔའི་རིང་ཆོས་ཀྱི་འཁོར་ལོ་རྒྱ་ཆེར་བསྐོར། ༡༥༽རབ་བྱུང་ལྔ་པའི་ལྕགས་འབྲུག་ཕྱི་ལོ་༡༢༨༠་ལོར་ལྷ་ཁང་བླ་བྲང་དུ་རེ་ཞིག་སྐུའི་བཀོད་པ་བསྡུས་པའི་ཚུལ་བསྟན་ཏོ།། ༡༦༽རླངས་ཀྱི་པོ་ཏི་བསེ་རུ་ལས་ཏཱ་སི་བྱང་ཆུབ་རྒྱལ་མཚན་གྱིས། ས་སྐྱ་པས། རྒྱལ་པོའི་བླ་མ་འཛམ་བུ་གླིང་གི་བདག་བྱས་ནས་ལོ་བརྒྱ་ལྷག་སོང་འདུག །རྒྱལ་པོས་ལུང་གར་ཐེངས་སུ་ས་སྐྱ་པས་ལུང་ཐེངས། རྒྱ་མཚོའི་མཐར་ཐུག་གི་བར་དུ། སྡེ་ལྷ་ཁང་བྱ་ལས་བསྐོས་པ་ལ་འཚམས་པ་ཅི་ཡོད། ཅེས་གསུངས། ༈ ཐོག་མར་དགོན་པ་འདི་ཉིད་ཕྱག་འདེབས་པ་པོ་གྲུབ་པའི་དབང་ཕྱུག་བརྩོན་འགྲུས་བཟང་པོའམ། ཡེ་ཤེས་ཀྱི་མཁའ་འགྲོ་སྡེ་ལྔས་མཚན་རེ་རེ་ཕུལ་བ་ལས། ཁྱབ་བརྡལ་ཆེན་པོའི་ཐང་ཆེན་ན། །སྟོང་ཉིད་རྟོགས་པའི་རྣལ་འབྱོར་པ། །འཇིགས་མེད་རྒྱལ་པོ་ལྟ་བུར་བཞུགས། །དེ་ཕྱིར་ཐང་སྟོང་རྒྱལ་པོ་ཐོགས། ཞེས་པ་ལྟར་གྲུབ་ཆེན་ཐང་སྟོང་རྒྱལ་པོ་ཞེས་མཚན་ཉི་ཟླ་ལྟར་གྲགས་པ་དེ་ཉིད་ནི། །འོལ་བ་ཞེས་བྱའི་ཤར་མདུན་དུ། །བརྩོན་འགྲུས་ཞེས་པའི་མིང་ཅན་འབྱུང་། །དེ་ནི་ང་ཡི་ཐུགས་སྤྲུལ་ཡིན། ཅེས་དང་། །ཞི་བ་ཐུགས་རྗེ་ཆེན་པ་ོ་དང། །དྲག་པོ་ཁྲོ་རྒྱལ་རྟ་མགྲིན་གཉིས་། དབྱེར་མེད་གཅིག་ཏུ་སྤྲུལ་པ་ལས་། །སྐུ་ཡི་ཆ་ལུགས་ཞི་མ་ཁྲོ། །མདོག་སྨུག་དྲི་ཞིམ་སྨེ་བས་བརྒྱན། །ངང་རྒྱུད་དལ་ཞིང་རིག་རྩལ་ཆེ། །མ་ངེས་སྤྱོད་པ་སྣ་ཚོགས་སྐྱོང། །ཞེས་སོགས་གཏེར་ཁ་དུ་མ་ནས་ལུང་བསྟན་བརྙེས་ཤིང་། སྐུ་ཡི་སྐྱེ་བ་བཞེས་པའི་ཚེ། དཔལ་གཡས་རུ་བྱང་པའི་ཆབ་འོག་རིན་ཆེན་སྡིངས་ཀྱི་སྡེ་འདབ་འོལ་བའི་གྲོང་དུ་ཡབ་སྤྱི་འབྲས་ལུང་པ་དཔོན་པོ་རྡོ་རྗེ་རྒྱལ་མཚན་དང་། ཡུམ་རྒྱ་གར་ལྷ་མོ་གཉིས་ཀྱི་སྲས་སུ་རབ་བྱུང་དྲུག་པའི་ལྕགས་གླང་ལོ་ཆོ་འཕྲུལ་ཟླ་བའི་ཚེས་བཅུའི་ཉིན་ཞལ་ནས་ཡིག་དྲུག་འདྲེན་བཞིན་དང་། མགོ་འཇུག་མ་ལོག་པ་སོགས་ངོ་མཚར་བའི་ལྟས་བསམ་གྱིས་མི་ཁྱབ་པ་དང་བཅས་སྐུ་འཁྲུངས། ཆུང་ངུའི་དུས་ནས་ལཉྫ། ཝརྟུ། མཁའ་འགྲོའི་བརྡ་ཡིག །བོད་ཡིག་རིགས་མི་འདྲ་བ་བྲི་བ་དང་། གཙང་ཆུའི་ཕ་རོལ་ཏུ་ཆུ་ལ་མི་བྱིངས་པར་བགྲོད་པ་སོགས་ཐ་མལ་པའི་རང་བཞིན་ལས་འདས་པའི་སྤྱོད་པ་དུ་མ་བསྟན། བྱང་སྡིངས་སུ་བླ་མ་ཉི་མ་སེངྒེ་ལས་རབ་ཏུ་བྱུང་ནས་མཚན་བརྩོན་འགྲུས་སེངྒེ་ཞེས་བཏགས། བཀའ་ལྔ་པ་དཔལ་འབྱོར་ཤེས་རབ་ལས་བསྙེན་རྫོགས་ཀྱི་སྡོམ་པ་བཞེས། མཚན་བརྩོན་འགྲུས་བཟང་པོ་ཞེས་གསོལ། ཕྱག་རྒྱ་ཆེན་པོ་ལྔ་ལྡན་གངྒཱམ། ནཱརོ། ནིགུ། སྦྱོར་དྲུག་སོགས་གདམས་ཟབ་མང་དུ་གསན། ཆོས་རྗེ་ལྷ་གདོང་པ་བསོད་ནམས་མཆོག་དཔལ་ལས་རི་ཆོས། གཅོད་སྐོར་། རྫོགས་ཆེན་སྐོར་སོགས་དང་། ཀུན་སྤངས་དོན་ཡོད་རྒྱལ་མཚན་ལས་བཀའ་མའི་སྒྱུ་འཕྲུལ། རིག་འཛིན་རྒོད་ལྡེམ་ཅན་གྱི་གཏེར་ཆོས་སོགས་གསན། རྫུ་འཕྲུལ་གྱིས་འཕགས་བལ་གྱི་ཡུལ་རྣམས་སུ་བྱོན་ནས་པཎྜིཏམཧཱབོདྷ། དྷརཏྣ ཀུན་དགའ་སྙིང་པོ། ཤབརི། ཀུཀུརི་སོགས་ཀྱི་པཎ་གྲུབ་དང་། ལྷག་པའི་ལྷ་མང་པོ་དངོས་ཉམས་ཅི་རིགས་པས་མཇལ་ནས་དབང་དང་གདམས་ཟབ་མཐའ་ཡས་གསན། ཁྱད་པར་མཁའ་འགྲོ་མ་སེངྒེའི་གདོང་མས་ལུང་བསྟན་པ་བཞིན། རྒྱ་གར་གྱི་དུར་ཁྲོད་ཀེང་རུས་མེ་འབར་ན་རྫུ་འཕྲུལ་གྱིས་སྐད་ཅིག་གིས་བྱོན་པས་རི་དྭགས་ཀྲྀརའི་པགས་པའི་སྟེང་ན་རྣལ་འབྱོར་དབང་ཕྱུག་བིཔ་སྐུ་གཟི་བརྗིད་ཤིན་ཏུ་ཆེ་བ་སྣོད་བཅུད་ཐམས་ཅད་ཐོད་པ་གཅིག་ཏུ་བསྡུས་ནས་བཞུགས་པ་དང་མཇལ། ཤིན་ཏུ་དད་དེ་ཕྱག་མཆོད་གསོལ་བ་བཏབ་པས་སྤྲུལ་པའི་དཀྱིལ་འཁོར་དུ་དབང་བསྐུར་ནས། ཐོད་པ་བདུད་རྩིས་གང་བ་གནང་བ་ལྷག་མ་མ་ལུས་པ་བཞེས་པས་ཏིང་ངེ་འཛིན་བརྒྱ་ཕྲག་དུ་མ་ལ་མཉམ་པར་འཇོག་པ་དང་། རྫུ་འཕྲུལ་གྱི་བཀོད་པ་ཕྲག་བརྒྱར་སྤྲུལ་ནུས་པ་བྱུང་ཞིང་། རྒྱུད་སྡེ་མཐའ་ཡས་པ་མཐའ་དྲུག་དང་ཚུལ་བཞིས་རྣམ་པར་ཕྱེས་ཏེ། གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་ཡོངས་སུ་རྫོགས་པར་གསན། འཇིགས་བྱེད་མུན་པ་ཚལ་གྱི་དུར་ཁྲོད་དུ་བྱོན་པས་སློབ་དཔོན་བྲམ་ཟེ་མཆོག་སྲེད་དང་མཇལ། གུར་གྱི་མགོན་པོའི་དབང་བྱིན་རླབས་བཀའ་གཏད་གནང་ནས། སྲོད་ཀྱི་ཆར་ཚོགས་འཁོར་མཛད་པའི་དུས་སུ་ནམ་མཁའི་ཀློང་དུ་སྤྲིན་ཕུང་དུ་བའི་མདོག་ཅན་མེ་དཔུང་འབར་བའི་དབུས་ན་གུར་ལྷ་བརྒྱད་སྣང་སྲིད་ལྷ་སྲིན་སྡེ་བརྒྱད་ཀྱིས་སྐོར་བ་གཟིགས། བླ་མ་བྲམ་ཟེ་ཆེན་པོས་གུར་གྱི་མགོན་པོ་དམ་ཅན་རྒྱ་མཚོས་བསྐོར་བ་ཁྱོད་ཀྱིས་རིག་པ་འཛིན་པ་འདིའི་ཕྲིན་ལས་སྒྲུབས་ཤིག་ཅེས་བཀའ་བསྒོ་བར་མཛད། ཨོ་རྒྱན་མཁའ་འགྲོའི་གླིང་དཔལ་རི་པདྨའོད་ཀྱི་གཞལ་ཡས་སུ་བྱོན། ཨོ་རྒྱན་ཆེན་པོ་རྒྱལ་པོའི་ཆ་ལུགས་སུ་བཞུགས་པ་དང་མཇལ། ཕྱག་འཚལ་མཆོད་འབུལ་བསམ་གྱིས་མི་ཁྱབ་པར་མཛད་གསོལ་བ་བཏབ་པས། སྒྲུབ་པ་ཆེན་པོ་བཀའ་བརྒྱད་ཀྱི་སྤྲུལ་པའི་དཀྱིལ་འཁོར་དུ་ཨོ་རྒྱན་ཆེན་པོ་ཧེརུཀའི་རྣམ་པར་བཞུགས་ནས་དབང་བསྐུར་བས་སོ་སོའི་ཞལ་མངོན་སུམ་དུ་གཟིགས། སླར་པདྨདམར་པོ་འདབ་མ་བརྒྱད་པའི་སྟེང་ན་ཨོ་རྒྱན་ཆེན་པོ་རབ་བྱུང་གི་ཆ་ལུགས་སུ་བཞུགས་པ་ལ་འཇའ་ཚོན་སྣ་ལྔས་བསྐོར་བ། དེའི་གཡོན་དུ་པདྨདམར་པོ་འདབ་མ་སྟོང་ལྡན་ལ་བསྐལ་བཟང་སངས་རྒྱས་སྟོང་བཞུགས་པའི་ཡལ་ག་ལྔ་པའི་དབུས་སུ་རྡོ་རྗེ་ཕག་མོ། གཞན་བཞི་ལ་རིགས་བཞིའི་མཁའ་འགྲོ་བཞུགས་པའི་མདུན་གྱི་ནམ་མཁར་སྟོན་པ་རྡོ་རྗེ་སེམས་དཔའ་བཞུགས་པ་ལ་ཨོ་རྒྱན་ཆེན་པོས་ཞུ་བ་པོའི་ཚུལ་མཛད་ནས། བླ་ན་མེད་པ་རྫོགས་པ་ཆེན་པོའི་ཆོས་ཚུལ་མཐའ་ཡས་གསན། ཨོ་རྒྱན་གྱི་ཡུལ་གྱི་གདུལ་བྱ་རྣམས་ཀྱི་ཆེད་དུ་རེ་ཞིག་འགྱངས་པ་ལ་ཨོ་རྒྱན་ཆེན་པོས་སླར་ཡང་བོད་ཡུལ་དུ་འགྲོ་བའི་དོན་ལ་འབྱོན་དགོས་པར་བཀས་བསྐུལ་བའི་ཕྱིར། །ས་འབྲུག་དབྱར་ཟླ་དང་པོའི་ཚེས་བཅུ་ལ། །ས་ཡི་མེ་བཙའ་རྟེན་བཞུགས་གྲུབ་དགོས་སོ། །འགྱངས་ན་ཆུ་ཤོར་ཟིན་པའི་རགས་དང་འདྲ་། །སྔ་ན་རི་དྭགས་མི་འགྲོ་རྒྱ་བཙུགས་འདྲ། །རིག་པ་འཛིན་པའི་སྐྱེས་བུ་ཕན་སེམས་ཅན། །སླར་ཡང་བོད་ཡུལ་ཁ་བ་ཅན་དུ་སོང་། །སྙིགས་མ་ལྔ་བདོ་བོད་ཀྱི་སེམས་ཅན་ལ། །གང་ལ་གང་འདུལ་སྤྲུལ་པས་འགྲོ་དོན་མཛོད། ཅེས་དང་། །རིགས་འཛིན་བོད་ཀྱི་སྐྱེས་བུ་ཁྱོད། །རྫུ་འཕྲུལ་སྟོབས་ཀྱིས་འདིར་འོངས་ཀྱང་། །ཆོས་སྐལ་གཏར་ལྔ་བོད་ན་ཡོད། །ལུང་བསྟན་རྣམ་ཐར་བོད་དུ་བཞག །དུས་གསུམ་མཁྱེན་པ་པད་འབྱུང་གི། །ཐུགས་སྤྲུལ་ད་ནི་ལྕགས་ཟམ་ཚུགས། །རྟེན་འབྲེལ་འགྲོ་བ་འདུལ་བའི་ཕྱིར། །མྱུར་དུ་ཁ་བ་ཅན་དུ་བཞུད། ཅེས་ཡང་ཡང་བསྐུལ་བས་བོད་ཡུལ་དུ་བྱོན་འགྲོ་དོན་མཐའ་ཡས་པ་མཛད། ཁྱད་པར་དུ་ངོར་ཨེཝཾ་ཆོས་ལྡན་དུ་ཕེབས། དགོན་པའི་མ་ཚད་དུ་ཤིང་ཕུང་ཞིག་ལ་རྟེན་བཅས་པའི་བཙན། དགོན་པ་དར་བ་ལ་ཤིན་ཏུ་མི་དགའ་བ་ཞིག་ཡོད་པ་དེ་བརྟུལ་བས་དེ་ཕྱིན་ཆད་དགེ་འདུན་ཐུགས་མཐུན་ཁྲིམས་གཙང་ལ་གནས་ཏེ་དགོན་པ་ཤིན་ཏུ་དར་རྒྱས་སུ་གྱུར། ངོར་ཆེན་རྡོ་རྗེ་འཆང་ཀུན་དགའ་བཟང་པོ་ལས་དཔལ་ཀྱེ་རྡོ་རྗེའི་དབང་སོགས་སྨིན་གྲོལ་གྱི་གདམས་པ་མང་དུ་གསན། ཐུགས་ཡིད་གཅིག་འདྲེས་སུ་གྱུར། གྲུབ་ཆེན་ཉིད་དགུང་ལོ་གྱ་དྲུག་པ་རབ་བྱུང་བདུན་པའི་མེ་སྟག་ཕྱི་ལོ་༡༤༤༦ལོར་སྡེ་དགེའི་རྒྱལ་རབས་དང་པོ་བོ་ཐར་བཀྲ་ཤིས་སེངྒེ་དང་མཆོད་ཡོན་དུ་འབྲེལ་ཏེ་ཆོས་གྲྭ་ཆེན་པོ་འདི་ཉིད་ཕྱག་བཏབ། མདོ་དབུས་ཁམས་གསུམ་དང་། རྒྱ་ནག་སོགས་སུ་སྐུ་དངོས་དང་རྫུ་འཕྲུལ་གྱི་བཀོད་པ་མཐའ་ཡས་པས་གྲུ་ཤན་ལྕགས་ཟམ་འཛུགས་པ། གཏེར་འདོན་པ། གནས་སྒོ་འབྱེད་པ། ཀློ་ཁ་ཁྲ་འདུལ་བ། སྐུ་གསུང་ཐུགས་རྟེན་བཞེངས་པ་སོགས་ཀྱིས་ཕྲིན་ལས་ནམ་མཁའ་དང་མཉམ་པར་གྱུར་ཏེ། རིན་ཆེན་ལྕགས་ཀྱི་ཟམ་པ་ལྔ་བཅུ་ང་བརྒྱད། ཤན་ཆེན་དང་གྲུ་འདྲེས་པ་བརྒྱ་དང་བཅོ་བརྒྱད། ཤིང་ཟམ་དྲུག་ཅུ། སྐུའི་རྟེན་ཆེ་ཚད་ཐོ་སོ་བདུན་ནས། ཆུང་ཚད་མཁྱིད་གང་ཡན་གསེར་དངུལ་སོགས་རིན་པོ་ཆེ་ལས་གྲུབ་པ་བརྒྱ་ཕྲག་དུ་མ། འཇིམ་པ་ལས་ཆེ་ཚད་མཐོ་ལྔ་བཅུ་རྩ་ལྔ་ནས་ཆུང་ཚད་མཐོ་གསུམ་གྱི་བར་སྟོང་ཕྲག་ལྔ། གྱང་བྲིས་རས་བྲིས་བསམ་གྱིས་མི་ཁྱབ་པ། འདུ་ཁང་དང་གཙུག་ལག་ཁང་བརྒྱ་དང་ཉི་ཤུ། གསུང་རྟེན་གསེར་བྲིས་ཀྱི་བཀའ་འགྱུར་ཞག་གིས་གཙོས་བཀའ་འགྱུར་བཅོ་བརྒྱད། བསྟན་འགྱུར་བཅོ་ལྔ། ཐུགས་རྟེན་དཔལ་རི་བོ་ཆེའི་མཆོད་རྟེན་ཆེན་པོ་ཕྱོགས་རེ་ལ་ཕོ་འདོམ་བཞི་བཅུ་ཡོད་པ་ཆེ་ཚད་དང་། ཕྱོགས་རེ་ལ་འདོམ་བརྒྱད་ཡོད་པ་ཆུང་ཚད་བྱས་པའི་མཆོད་རྟེན་བརྒྱ་དང་བཅུ་གཅིག །སེམས་ཅན་གྱི་སྲོག་སྐྱོབ་པ། གནས་སྒོ་འབྱེད་པ་སོགས་བསམ་གྱིས་མི་ཁྱབ། ད་ལྟའང་སྐུ་དངོས་སུ་བཞུགས་པར་གསུངས་ཤིང་། གདུལ་བྱ་ཐུན་མོང་ངོར་དགུང་ལོ་བརྒྱ་དང་ཉི་ཤུ་རྩ་ལྔའི་བར་དུ་བཞུགས་ནས་རབ་བྱུང་བརྒྱད་པའི་ཤིང་སྦྲུལ་ལོ་ཆོ་འཕྲུལ་ཟླ་བའི་ཚེས་བཞིའི་ཉིན། །སྐྱེ་མེད་ངང་ལ་འགག་མེད་རྩལ་རྫོགས་ཧེ། །བརྗོད་མེད་སེམས་དེ་མ་རིག་སངས་པ་ཡིན། །སྤྲོས་པ་ཐམས་ཆད་སྤྲོས་མེད་ངང་དུ་ཐལ། །བློ་འདས་ཡིན་ན་འཁོར་བ་དགོད་རེ་བྲོ། ཞེས་གསུངས་པའི་མོད་ལ། འོད་ཀྱི་གློག་འཁྱུག། མཁའ་འགྲོ་བརྡ་སྐད་འུར་འུར། སཾསྐྲྀཏའི་སྐད་ལྷང་ལྷང་བའི་སྐབས་དེར། གྲུབ་ཐོབ་ཆེན་པོའི་སྐུ་ལུས་འོད་ཀྱི་ཕུང་པོ་འོད་ཟེར་ཕྱོགས་བརྒྱད་དུ་འཕྲོ་བ་ཞིག་ཏུ་སོང་སྟེ་ནམ་མཁར་འཕགས། དཔའ་བོ་དང་མཁའ་འགྲོ་མང་པོའི་བསུ་བ་དང་བཅས་ཏེ་ཇེ་མཐོ་ཇེ་མཐོར་སོང་སྟེ་མཁའ་སྤྱོད་དུ་གཤེགས་སོ།།
མུ་འགོད།་་་་་་་
' རྩོམ་འོག་མ།
སྡེ་དགེའི་རྒྱལ་རབས་མུ་ཏིག་ཕྲེང་བ། ༼བརྒྱད་པ།༽