སྡེ་དགེའི་རྒྱལ་རབས་མུ་ཏིག་ཕྲེང་བ། ༼དྲུག་པ།༽
སྡེ་དགེའི་རྒྱལ་རབས་མུ་ཏིག་ཕྲེང་བ། ༼ཚན་པ་དྲུག་པ།༽མཛད་པ་པོ་བར་མ་མཁན་པོ་ངེས་དོན།
ཕྱི་ལོ་༡༩༤༥ལོར་རྨེ་ཤོད་སོག་མོ་ཚང་དང་། འཛིན་ཁོག་བྲེ་འབོད་ཚང་གཉིས་རྔ་མོང་སྣ་འབྲོག་སར་རྩོད་གཞི་བྱུང་ནས་ཁག་གཉིས་ཞི་འཇགས་མ་ཐུབ་པར་སྡེ་དགེ་ཆོས་རྒྱལ་ལ་གྱོད་གཏུགས། འཇམ་དབྱངས་དཔལ་མོས་ཕན་ཚུན་མཐུན་འགྲིག་ཐག་གཅོད་བྱེད་རྒྱུའི་འགན་དེ་གཉེར་ཕྱག་ལྷན་རྒྱས་ཁང་ལ་གནང་། འོག་མ་ཕྱག་མཛོད་ཀྱིས་རྒྱལ་མོའི་བཀའ་གསུང་བཞིན། ཁག་གཉིས་ལ་ལོ་རྒྱུས་བདེན་དཔང་འཁུར་ཤོག་ཅེས་བཤད། བྲེ་འབོད་ཚང་གིས་བསམ་རྒྱུར། སོག་མོ་ཚང་གི་རྩྭ་རའི་ས་མཚམས་ཀྱི་བཀའ་ཤོག་ནང་གི་ཡི་གེ་ནི་རྙིང་པ་དང་ཐམ་ཀ་ནི་གསར་པ་ཡིན་པས་སྡེ་དགེ་རྒྱལ་པོའི་གཞུང་ཐམ་རྙིང་པ་དེ་ཁྲི་རབས་བཅུ་གཉིས་པའི་ཆོས་རྒྱལ་གྱིས་སྲིད་དབང་བཞེས་རྗེས། ཆིངས་དམག་གིས་སྡེ་དགེ་ས་དབང་བཙན་བཟུང་གི་སྐབས་སུ་ཐམ་ཀ་བོར། དེ་རྗེས་གསར་རྐོས་བྱས། ཐམ་ཀ་རྙིང་པ་དང་རི་མོ་ཅུང་མི་འདྲ་གཞི་འཛིན་སར་བྱེད་རྒྱུ་མེད། སོག་མོ་ཚང་གིས་བྲེ་འབོད་ཚང་གི་ས་མཚམས་བཀའ་ཤོག་དེ་རྫུན་བཟོས་བྱས་འདུག་བསམ། སྡེ་དགེ་དགོན་ཆེན་ལ་ཁག་གཉིས་ཀྱིས་ལོ་གཅིག་ལྷག་གི་རིང་བརྩད་ཀྱང་མཐའ་འབྲས་མ་བྱུང་། དེ་ནས་ཕུ་མ་རིག་རྣམ་དང་། ལྟོ་རུ་ཨ་རྣམ། འཇུ་ཆུང་ཚེ་རྡོར། མཁར་མདོ་སྐལ་སྟོབས་སོགས་ཀྱིས་བར་པ་བྱས་ཏེ་ཁག་གཉིས་ཀྱི་མི་ཁ་ཤས་ཁྲིད་ནས་ས་རྩོད་ཐུག་སའི་རྔ་ཁམ་རྡོ་ལ་ཕྱོགས་སུ་ལྟ་སར་སོང་ཡང་དོན་མ་གྲུབ། བྲེ་འབོད་ལྷ་རྒྱལ་གྱིས་ཁོ་རང་ཕྱོགས་ཀྱི་མི་རྣམས་ཁྲིད་དེ་བར་པ་བྱེད་སའི་གནས་ལས་ཕྱིར་ལོག །སོག་མོ་ཚེ་སྟོབས་ཀྱིས་གནད་དོན་དེ་སྡེ་དགེ་རྒྱལ་པོ་དང་། སྡེ་དགེ་སྲིད་གཞུང་སོ་སོར་གྱོད་གཞི་ཕུལ། སྡེ་དགེ་རྫོང་དཔོན་ཀམ་ལུའི་སི་དང་། འཇམ་དབྱངས་དཔལ་མོ་གཉིས་ཀྱིས་ལྷན་དུ་གྱོད་གཞི་ཐག་གཅོད་བྱེད་རྒྱུ་ཡིན་པས་བྲེ་འབོད་ལྷ་རྒྱལ་སྡེ་དགེར་འོང་དགོས་ཞེས་བརྡ་ཡིག་བཏང་། དུས་མཉམ་དུ་འཇམ་དབྱངས་དཔལ་མོས་ཧོར་འདྲ་མེ་ཏོག་ཞེས་པ་ཡིད་ལྷུང་བྱ་རྒོད་སྟོབས་ལྡན་ལ་འཕྲིན་ཡིག་སྐྱེལ་སར་བཏང་སྟེ། བྲེ་འབོད་ལྷ་རྒྱལ་དང་། སོག་མོ་བསོད་སྟོབས་གཉིས་བར་རྩོད་པ་བྱུང་བར་འདུམ་འགྲིག་བྱས་ཀྱང་འབྲས་བུ་མ་བྱུང་བའི་གནས་ཚུལ་དང་། བྱ་རྒོད་སྟོབས་ལྡན་གྱིས་བྲེ་འབོད་ལྷ་རྒྱལ་སྡེ་དགེར་འོང་རྒྱུ་ཁ་ཏ་བྱེད་དགོས་པ་སོགས་གསུངས། བྱ་རྒོད་སྟོབས་ལྡན་གྱིས་འཕྲིན་ཡིག་འབྱོར་རྗེས། བྱ་རྒོད་མག་པ་སྤོམ་ཁ་རྣམ་རྒྱལ་རྡོ་རྗེ་དཔལ་ཡུལ་བྲེ་འབོད་ལྷ་རྒྱལ་སར་བཏང་ནས་སྡེ་དགེར་བར་འདུམ་བྱེད་སར་འགྲོ་དགོས་པར་ཁ་ཏ་བྱས། སོག་མོའི་རྒྱབ་གཉེར་འཇུ་ཆུང་གཉེར་པ་དང་། བྱེ་ཐམ་མག་པ་འཇིགས་མེད་ཕྲིན་ལས་སོགས་ཀྱིས་བྱས་ཏེ། མཐར་ཕྱི་ལོ་༡༩༤༦ལོའི་ཟླ་བ་དགུ་པར། བྲེ་འབོད་ལྷ་རྒྱལ་དཔོན་གཡོག་བཅུ་གཉིས་སྨན་ཤོད་དགྲ་འདྲེན་འགག་ཏུ་ལམ་སྒུག་བཅས་ཏེ་བསད། སྐབས་དེར་བྲེ་འབོད་ལྷ་རྒྱལ་ས་ལ་ལྷུང་བ་དང་སོག་མོ་ཨུ་བརྟན་འཐབ་ར་ནས་ལངས་ཏེ་སྐད་བཏང་བར། འཛིང་བ་བཀྲ་དབང་རྒྱལ་གྱིས་མེ་མདའ་བརྒྱབས་ཏེ་བསད། དངུལ་དཀར་མེ་ལོང་ལས། བྲེ་འབོད་ལྷ་རྒྱལ་ནི་བྲེ་འབོད་ཨ་བདེའི་བུ་གསུམ་པ་ཡིན། ཕྱི་ལོ་༡༩༠༩ལོར་བྲེ་འབོད་ཚང་དང་། བྱ་རྒོད་ཁག་གཉིས་བ་བ་དང་ལྷན་དུ་ལྷ་སར་ཆས། བྱ་རྒོད་སྟོབས་ལྡན་དང་ཕན་ཚུན་ཁྱིམ་ཚང་གཅིག་ལྟ་བུའི་བརྩེ་དུང་ཟབ་མོར་ཆགས། ཕྱི་ལོ་༡༩༣༠ལོར་ཕྱིར་རང་ཡུལ་དུ་ལོག །སྡེ་དགེ་རྒྱལ་པོའི་མངའ་ཞབས་ཀྱི་དཔལ་ཡུལ་དྲན་འཁོར་ཕྱོགས་ཀྱི་འགོ་པའི་འགན་བཞེས། འོག་ཏུ་ཁོལ་པ་ཁྱིམ་དུད་ལྔ་བརྒྱ་ལྷག་ཡོད། སྡེ་དགེ་རྒྱལ་པོའི་སྲིད་དོན་ལོ་རྒྱུས་ལས། དེ་ནས་བྲེ་འབོད་ལྷ་རྒྱལ་དཔོན་གཡོག་བཅུ་ལྷག་གོ་མཚོན་དང་བཅས་སྡེ་དགེར་ཆས། འོན་ཏེ་རྨེ་ཤོད་དགྲ་འདྲེན་འགག་ཏུ་སོག་མོ་ཨུ་བརྟན་དང་། བྱེ་ཐམ་མག་པ་འཇིགས་མེད་འཕྲིན་ལས་སོགས་ཀྱིས་འཇབ་སྒུག་བྱས་ཏེ་བྲེ་འབོད་ལྷ་རྒྱལ་དང་། ཞབས་འབྲིང་པ་མི་དྲུག །ལོ་བརྒྱད་ཅུ་ལྷག་ཟིན་པའི་གྱོད་པ་གྲགས་ཅན་གཅིག་བཅས་བསད། བྲེ་འབོད་ལྷ་རྒྱལ་གྱི་ཞབས་འབྲིང་པ་ཞིག་གིས་སོག་མོ་བསོད་སྟོབས་ཀྱི་བུ་སོག་མོ་ཨུ་བརྟན་དང་། ཞབས་འབྲིང་པ་གཉིས་བཅས་བསད། སོག་མོ་སྐོར་པས་ཡང་ཁོ་ཚོའི་ཕོ་བྲང་མདུན་ནས་བྲེ་འབོད་ལྷ་རྒྱལ་གྱི་སྔོན་མངགས་སྐྱེལ་འདྲེན་ལག་དོའི་ཅ་ལག་ཚང་མ་བཅོམ་འཕྲོག་བྱས། འཇོན་ཐང་ཆེ་བའི་ལག་དོ་ཞི་ཆུང་མ་ཕོ་བྲང་གི་ཉེ་སར་བསད། བྲེ་འབོད་ལྷ་རྒྱལ་བཀྲོངས་རྗེས། སོག་མོ་དང་འཇུ་ཆུང་སྐོར་པ་གཉིས་ཀྱིས་ཕར་ཕྱོགས་ནས་དགྲ་ཤ་ལེན་སར་འོང་བར་བསམ་ནས། སྔོན་དུ་ས་ཆ་བཙན་པོ་ཡོད་པའི་རྨེ་ཤོད་རོང་མེ་ཕུག་ཏུ་སྤོས། བྲེ་འབོད་ལྷ་རྒྱལ་བཀྲོངས་པ་འཇམ་དབྱངས་དཔལ་མོས་ཤེས་རྗེས། ཧོར་འདྲ་མེ་ཏོག་ཡང་ཡིད་ལྷུང་བྱ་རྒོད་སྟོབས་ལྡན་སར་མངགས་ནས་བྲེ་འབོད་ལྷ་རྒྱལ་བཀྲོངས་པའི་ཆགས་སྒོ་ཆེན་པོ་བྱུང་བ་དང་ཐུགས་ནད་ཡོད་ཚུལ། གཉེར་ཕྱག་ལྷན་རྒྱས་ཁང་གི་གཉེར་ཆེན་འཆི་མེད་མགོན་པོ་དང་། རང་རྒྱབ་བསོད་དགའ། འོག་མ་རིག་རྣམ། གནས་གཞི་ཚེ་དབང་རིག་འཛིན། རྨེ་ཤོད་བློ་གྲོས་བུ་དགའ། ཇ་ར་ཨ་ལེགས། ལྕགས་རྟ་པདྨབདུད་འདུལ་སོགས་བཏང་སྟེ་ཁོ་ཚོར་ནུབ་ཀྱི་ཕྱོགས་ནས་རོང་མེ་ཕུག་མཐའ་སྐོར་བྱེད་བཅུག །བྱ་རྒོད་སྟོབས་ལྡན་ཤོག་གིས་རོང་མེ་ཕུག་ཤར་གྱི་ཕྱོགས་སུ་བཀག་སྡོམ་བྱ་རྒྱུ་དང་། ལྷན་དུ་ལག་དམར་འཇུ་བཟུང་བྱས་ཏེ་ཁྲིམས་གཅོད་བྱེད་རྒྱུ་བཀའ་གནང་། བྱ་རྒོད་སྟོབས་ལྡན་གྱིས་འཇམ་དབྱངས་དཔལ་མོའི་བཀའ་བཞིན་རྣམ་རྒྱལ་རྡོ་རྗེ་མངགས། རྣམ་རྒྱལ་རྡོ་རྗེ་ཡིད་ལྷུང་དང་འཁོར་ལོ་མདོ་ནས་མི་བཞི་བརྒྱ་ལྷག་གོ་མཚོན་ཧྲག་བསྡུ་བྱས་ནས་སོག་མོ་དང་འཇུ་ཆུང་གཉིས་ཀྱི་ས་ཁོངས་བསྐོར། འཆི་མེད་མགོན་པོ་སོགས་ས་ཆ་དེ་ན་སླེབས་ནས། རྨེ་ཤོད་རོང་མེ་འགོ་པ་རྗེ་རོང་ཚེ་བཟང་ལ་སོག་མོ་བསོད་སྟོབས་དང་། འཇུ་ཆུང་ཚེ་རྡོར་གཉིས་ལ་ལག་དམར་སྤྲད་དགོས་པའི་ངག་ཆ་བསྐུར། སོག་མོ་དང་འཇུ་ཆུང་གཉིས་ཀྱིས་ཁས་མ་བླངས་པས་མ་ཚད། གནས་ཚུལ་འདི་འཇུ་ཆུང་ཚེ་རྡོར་གྱི་མ་སྐུ་གཤེགས་པའི་ཞག་གསུམ་ཉིན། བྲེ་འབོད་ལྷ་རྒྱལ་གྱིས་དམག་རྒྱག་རྒྱུ་གྲ་སྒྲིག་ཡོད་པའི་གཏམ་གོ་བས་ཕུང་། ད་གནས་ཚུལ་འདི་འདྲ་བུད་རྗེས། སྡེ་དགེ་ཚང་གི་ཁྲིམས་ལྟར་མི་སྟོང་འཇལ་ཆོག །ལག་དམར་སྤྲད་རྒྱུ་བློ་ལ་མི་བབ་ཅེས་བཤད། འཇུ་ཆུང་ཚེ་རྡོར་ནུབ་ཀྱི་ཕྱོགས་སུ་མཐའ་སྐོར་བྱས་པའི་ནང་ལས་ཕྱིར་ཐར་ནས་སྡེ་དགེ་དགོན་ཆེན་དུ་སླེབས། འཇམ་དབྱངས་དཔལ་མོ་དང་། འོག་མ་ཕྱག་མཛོད་གཉིས་ལ་མཇལ་རྒྱུའི་སྐྱབས་ཞུས། ཁོས་དོན་དག་བུད་ཚུལ་ཞུ་འབུལ་བྱེད་བསམ་ན་ཡང་། འཇམ་དབྱངས་དཔལ་མོ་དང་། འོག་མ་ཕྱག་མཛོད་གཉིས་དོགས་ནས་མཇལ་ཁ་མ་གནང་བ་མ་ཟད། ཁོ་ཐད་ཀར་གོ་མིན་ཏང་སྡེ་དགེ་རྫོང་སྲིད་གཞུང་ལ་སྤྲད་ནས་གནས་སྐབས་བཙོན་དུ་བཅུག །དུས་མཉམ་དུ་ཡང་རོང་མེ་ཕུག་ཁོ་ཚོའི་སྐོར་པ་མཐའ་བསྐོར་ཡག་པོ་རྒྱག་དགོས་པ་དང་། བྲེ་འབོད་ལྷ་རྒྱལ་གྱི་ལག་དམར་དེ་ངེས་པར་འཛིན་ཐུབ་པ་བྱེད་དགོས་པའི་བཀའ་གནང་། དེའི་སྐབས་སུ་མཐའ་སྐོར་བྱས་ཡོད་པའི་རྨེ་ཤོད་རོང་མེ་ཕུག་གི་འཇུ་ཆུང་ཚང་དང་། སོག་མོ་ཚང་གཉིས་ཀྱི་མི་རྣམས་གློ་བུར་དུ་སྡེ་དགེ་རྒྱལ་པོའི་ཕྱོགས་ཁག་གིས་བཀག་པའི་ས་ཆ་ནས་བྲོས་ཤོར། བྱ་རྒོད་རྣམ་རྒྱལ་རྡོ་རྗེས་ཐོས་དུས་བྲོས་ནས་ཉིན་གཉིས་སོང་བ་དང་། རྣམ་རྒྱལ་རྡོ་རྗེས་མྱུར་དུ་རྟ་དམག་བརྒྱ་ལྷག་རྩ་འཛུགས་བྱས་ནས་ར་མདའ་ལ་སོང་། སྡེ་དགེ་རྒྱལ་པོའི་ཕྱོགས་ཀྱང་རྗེས་སུ་སོང་། དཔལ་ཡུལ་འཛིན་ཁོག་ས་ཆ་བར་རྗེས་འདེད་དུས། འཇུ་ཆུང་ཚང་དང་སོག་མོ་ཚང་གཉིས་མི་བརྒྱད་ཅུ་ལྷག་ཙམ་ཁྲོམ་ཐར་ནས་ལི་ཐང་ཕྱོགས་སུ་བྲོས། རྣམ་རྒྱལ་རྡོ་རྗེ་སོགས་ཀྱིས་རྗེས་འདེད་རྒྱུ་བཞག་ནས་སོ་སོར་རང་གནས་སུ་ལོག །སོག་མོ་ཚང་གི་རྔ་མོང་སྣ་པའི་འབྲོག་པ་ཁྱིམ་དུད་བདུན་ཅུ་ལྷག་སྲུང་མཁན་པདྨབདུད་འདུལ་དང་། རོང་རྒྱབ་བསོད་དགའ་གཉིས་དམག་སུམ་ཅུ་ལྷག་བཅས་བཞག །འཇུ་ཆུང་ཚང་དང་སོག་མོ་ཚང་གཉིས་བསྐོར་བའི་ལམ་ནས་ཐར་བར་བྱ་རྒོད་སྟོབས་ལྡན་བློ་མ་བདེ་ཞིང་། དེ་ནི་འཇམ་དབྱངས་དཔལ་མོ་དང་། འོག་མ་ཕྱག་མཛོད་གཉིས་ཀྱི་རྒྱབ་སྐྱོར་ཡོད་ངེས་སྙམ། དེ་ནས་བྱ་རྒོད་ཚང་དང་སྡེ་དགེ་རྒྱལ་པོའི་བར་འགལ་བ་ཇེ་ཆེར་སོང་། ཟླ་བ་གཉིས་ཀྱི་རྗེས་སུ། བྲེ་འབོད་ཚང་གིས་འབའ་གླིང་ཁ་གཤིས་ཀྱི་བརྒྱ་དཔོན་དང་འབའ་རིལ་སྐོར་མའི་འགོ་པ་སོགས་མི་སུམ་ཅུ་ལྷག་རྩ་འཛུགས་བྱས་ནས། བྲེ་འབོད་ཚང་ཕྱོགས་ཀྱི་མི་སུམ་བརྒྱ་ལྷག་མཉམ་དུ་སོག་མོ་ཚང་གི་རྔ་མོང་སྣར་ཡོད་པའི་འབྲོག་པར་འཇབ་རྒོལ་བྱས། རང་སར་འབྲོག་པ་བུ་དགའ་དང་། རྣམ་བཟང་། མར་བསོད་རྡོ་རྗེ་སོགས་དང་དེ་མིན་དེའི་དགོང་མོ་འབྲོག་ཐོག་བསྡད་ཡོད་པའི་ལི་ཐང་ཚང་པ་བཞི་བཅས་བསད། ཟོག་སུམ་བརྒྱ་ལྷག་དང་། རྟ་བཅུ་ལྷག །ལུག་ལྔ་བཅུ་ལྷག་སོགས་བཅོམ་འཕྲོག་བྱས། ད་རུང་ཟོག་ལུག་ཁ་ཤས་བསད། དོན་དེ་དག་བུད་རྗེས། པདྨབདུད་འདུལ་དང་རོང་རྒྱབ་བསོད་དགའ་གཉིས་ཀྱིས་ཞབས་འབྲིང་པ་བཀྲ་རྒྱལ་དང་ཚེ་དབང་ནོར་བུ་གཉིས་སྔོན་དུ་སྡེ་དགེ་ལྷུན་གྲུབ་སྟེང་ལ་མངགས། དེ་གཉིས་ཀྱིས་སྡེ་དགེ་རྒྱལ་པོར་གནས་ཚུལ་སྙན་སེང་ཞིབ་འབུལ་བྱས། དེ་རྗེས་སུ་པདྨབདུད་འདུལ་ཡང་སྡེ་དགེར་སོང་ནས་གཉེར་ཕྱག་ལྷན་རྒྱས་ཁང་ལ་གནས་ཚུལ་ཞིབ་ཏུ་ཞུས། འཇམ་དབྱངས་དཔལ་མོ་སོགས་ཀྱིས་རྔ་མོང་སྣ་པའི་འབྲོག་པར་བྲེ་འབོད་ཚང་གིས་འཇབ་རྒོལ་མི་ཡོང་བའི་ཆེད་དུ། རོང་རྒྱབ་བསོད་དགའ་ལ་རྔ་མོང་སྣ་པར་ཤུལ་ལྷག་འབྲོག་མི་དང་། ཟོག་སེམས་ཅན་ཚང་མ་དཔལ་སྤུངས་ཕྱོགས་སུ་སྤོ་དགོས་པའི་བཀའ་གནང་། ཉེན་ཁ་རྒྱ་ཆེ་མི་འགྲོ་བའི་ཆེད་དུ་ཡང་བྱ་རྒོད་སྟོབས་ལྡན་དང་། དབུ་བླ་ཁག་ལྔ། མདུན་སྐོར་སུམ་ཅུ་འཛོམས་ནས་དོན་རྐྱེན་ཐག་གཅོད་བྱེད་ཐབས་བཀའ་གྲོས་གནང་། དཔལ་ཡུལ་དགོན་གྱི་ཀརྨ་ཟླ་བ་དང་། དེ་མིན་དགོན་པ་བཞིའི་སྐུ་ཚབ། གཉེར་ཕྱག་ལྷན་རྒྱས་ཁང་གི་ཁོངས་མི་ཐམས་ཅད། མདུན་སྐོར་ནང་སྙན་གྲགས་ཡོད་པའི་ས་དཀར་བློ་ཆོས་དང་། འོག་མ་རིག་རྣམ། རྒྱ་མཁར་མགོན་རྣམ། གནས་གཞི་ཚེ་དབང་རིག་འཛིན། གླིང་ཁ་གཤིས་འཆི་མེད་རྡོ་རྗེ། ཆུ་རྡོ་ཐུབ་བསྟན། ལུག་ར་བུ་དགའ་སོགས་བདམས་སེལ་བྱས་ནས་བར་མི་ལྷན་རྒྱས་བཙུགས་ཏེ་ཐག་གཅོད་བྱེད་རྒྱུ་བྱས། བྲེ་འབོད་ལྷ་རྒྱལ་གྱི་ཆུང་མ་བཀྲ་གཡང་སོག་མོ་བསོད་སྟོབས་ཀྱི་ཚ་མོས་བདེ་ཆེན་ཆོས་འཕེལ་སོགས་མི་ཉི་ཤུ་ལྷག་ཕྱོགས་གཅིག་དང་། སྡེ་དགེ་རྫོང་སྲིད་གཞུང་གི་བཙོན་ལས་བཏང་བའི་འཇུ་ཆུང་ཚེ་རྡོར་གྱིས་ཁྲིད་པའི་རྔ་མོང་སྣ་པའི་ཨ་ཟླ་དང་ཨ་ངག་སོགས་མི་དྲུག་བདུན་ཕྱོགས་གཅིག་བྱས་པའི་ཁག་གཉིས་ཀྱིས་གྱོད་བཤད། ཟླ་བ་དྲུག་ལྷག་གི་རིང་ལ་བར་པ་བྱས་ཀྱང་དོན་དག་སྤུ་ཙམ་ཐག་གཅོད་མ་ཐུབ། སྐབས་དེར་བྱ་རྒོད་སྟོབས་ལྡན་གྱིས་སོག་མོ་ཚང་དང་འཇུ་ཆུང་ཚང་གཉིས་དང་། དེ་མིན་ཁོ་ཚོའི་ཞབས་འབྲིང་པ་མཁར་མདོ་ཚང་། བྱེ་ཐམ་ཚང་གཉིས་སོགས་མདུན་སྐོར་རུས་རྒྱུད་འཛིན་པ་དེ་མེད་པར་བྱས་ནས་ཁྲལ་པ་བྱེད་པ་མ་ཚད། མི་སྟོང་འཇལ་རྒྱུ་བྱེད་འཇུག་དགོས་ཞེས་བཤད། འོག་མ་ཕྱག་མཛོད་ཀྱིས་ཁོའི་བསམ་འཆར་ལ་ངོ་རྒོལ་བྱས་ཏེ། ཕྱོགས་གཉིས་ལ་བསད་པའི་མི་དེ། ཆོས་རྒྱལ་གྱི་ཁྲིམས་སྲོལ་ལྟར་ཐོད་གཏུགས་བྱས་རྗེས། བསད་གྲངས་མང་བའི་ཕྱོགས་སུ་མི་སྟོང་འཇལ་བའི་ལུགས་བཞིན་འཇལ་དགོས་ཞེས་བཤད། ཕྱོགས་གཉིས་ཀྱིས་དེར་རྩོད་པ་ཧ་ཅང་ཆེན་པོ་བྱས། དེ་མིན་སྤྲུལ་སྐུ་དང་མདུན་སྐོར་སོགས་ཀྱིས་རྣམ་འགྱུར་མ་བསྟན། འགའ་ཞིག་གིས་བར་འདུམ་བྱེད་པའི་ས་ཆ་མ་སྤོས་ན་འགྲིག་རྒྱུ་ཡོང་རྒྱུ་མ་རེད་ཅེས་བཤད། ཁག་གཉིས་ཀྱི་གྱོད་གཞི་མ་འགྲིགས། བྱ་རྒོད་སྟོབས་ལྡན་ཕྱིར་ཡིད་ལྷུང་དུ་ལོག །སྔར་སྡེ་དགེར་བཙོན་དུ་བཅུག་པའི་འཇུ་ཆུང་ཚེ་རྡོར་སོགས་ཀྱང་དཔལ་སྤུངས་ཕྱོགས་ཀྱི་འབྲོག་མི་ཁྱིམ་དུད་བདུན་ཅུ་ལྷག་གིས་བཙན་ཁྲིད་བྱས་ནས་བྲོས་སོང་བ། བྱ་རྒོད་སྟོབས་ལྡན་གྱིས་གཏམ་དེ་ཐོས་རྗེས། སླར་རྣམ་རྒྱལ་རྡོ་རྗེ་དང་ནང་མི་རྩ་ཤུལ་ཨུ་རྒྱན་ཚེ་འཕེལ་གཉིས་མངགས་ནས་དམག་གིས་དཔལ་ཡུལ་ནས་བཀག་བཅུག །འཇུ་ཆུང་ཚེ་རྡོར་རྨེ་ཤོད་དུ་སླེབས་དུས་སྔོན་དུ་དམག་གིས་བཀག་ཡོད་པར་ཤེས་ཏེ། ལི་ཐང་ཕྱོགས་སུ་མ་བྲོས་ནས་ནང་མི་ལྔ་ཁྲིད་ནས་སྐྱེ་རྒུ་ལ་ཆས་ཏེ་མཱ་པུའུ་སྤྱང་དང་ས་གནས་ཀྱི་འགོ་པ་སོགས་ལ་སྐྱབས་བཅོལ་ཞུས། དེ་མིན་འབྲོག་མི་དུད་ཚང་བདུན་ཅུ་ལྷག་དེ་རྣམ་རྒྱལ་རྡོ་རྗེས་འཇུ་བཟུང་བྱས་ནས་ཡིད་ལྷུང་དུ་དེད། གོ་མཚོན་ཚང་མ་བསྡུས་ཏེ་ཉེ་བའི་འབྲོག་ཁག་བརྒྱད་ལ་སོ་སོར་བསྒོས། དེ་ནས་བྱ་རྒོད་ཚང་གི་ཁྲལ་པར་གྱུར། གོང་དུ་བརྗོད་པའི་བྱ་བ་མང་པོ་ཞིག་ལ་འཇམ་དབྱངས་དཔལ་མོས་དོན་དག་མ་བུད་སྔོན་དུ་འཆར་གཞི་ཡོད་པ་དང་། གནད་དོན་བུད་རྗེས་གསང་འགེབས་བྱེད་རོགས་མཛད་འདུག་སྙམ་ནས། བྱ་རྒོད་སྟོབས་ལྡན་འཇམ་དབྱངས་དཔལ་མོ་མི་མཐུན་པར་གྱུར། འཇུ་ཆུང་ཚང་དང་སོག་མོ་ཚང་གཉིས་བྲོས་བྱོལ་རྗེས། དཔལ་ཡུལ་འཇུ་སོག་གཉིས་ཀྱི་ས་ཁོངས་བྱ་རྒོད་ཚང་གི་དབང་དུ་གྱུར་ནས་དབང་ཤུགས་དེ་བས་ཇེ་ཆེར་སོང་། བྱ་རྒོད་སྟོབས་ལྡན་གྱིས་ཡིད་ལྷུང་ནས་སྡེ་དགེ་རྒྱལ་པོར་ངོ་རྒོལ་བྱེད་དགོས་པའི་གཏམ་ཁྲོམ་བསྒྲགས་བྱས། རྒྱལ་པོའི་ལམ་ལུགས་དང་ཁྲལ་འུ་ལག་མེད་པར་བཏང་ནས་མི་སེར་རྒྱལ་ཁབ་ཅེས་པ་བཙུགས་ཏེ་ཁམས་པས་ཁམས་པ་སྐྱོང་རྒྱུ་ལག་ལེན་བསྟར་བ་དང་། རྩ་ཤུལ་ཨུ་རྒྱན་ཚེ་འཕེལ་སོགས་སྨན་ཤོད་དུ་མངགས་ཏེ་བྲེ་འབོད་ལྷ་རྒྱལ་སྐུ་འཁོར་བཀྲོངས་མཁན་འཇུ་ཆུང་ཚང་། སོག་མོ་ཚང་། བྱེ་ཐམ་ཚང་གསུམ་བྲོས་བྱོལ་དུ་སོང་ཤུལ་གྱི་ཁྱིམ་ཚང་གསུམ་པོའི་ས་ཞིང་དང་ཁང་པ། རྒྱུ་ནོར་བཅས་རྩ་འཕྲོག་གིས་སྔར་ཁོ་ཚོའི་ཁོལ་པའི་ཁྲལ་པ་རྣམས་ལ་བགོས་ཏེ་བྱ་རྒོད་ཚང་གི་ཁྲལ་པར་བསྒྱུར་བརྩི་བཀུར་དང་དགའ་བསུ་ཆེན་པོ་ཐོབ། དེ་ནས་བྱ་རྒོད་སྟོབས་ལྡན་གྱིས་དཔལ་ཡུལ་ཕྱོགས་ཀྱི་ཁྲལ་པ་རྣམས་གྱེན་ལོག་བྱེད་རྒྱུའི་ཇུས་བསྐུལ་བྱས་ནས་སྡེ་དགེ་རྒྱལ་པོས་བཀའ་མངགས་ཀྱི་རྫོང་དཔོན་ཕྱིར་བསྐྲད་ནས། འབངས་མི་ཚོས་ཁྲལ་པ་པདྨཆོས་འཕེལ་ཞེས་པ་རྫོང་དཔོན་དུ་བསྐོས་པ་དེ་བྱ་རྒོད་སྟོབས་ལྡན་གྱིས་དང་ལེན་བྱས། བྱ་རྒོད་སྟོབས་ལྡན་གྱིས་ད་རུང་ནང་མི་ཉག་ཕྲུག་རིན་ཆེན་བཏང་སྟེ་ཧོར་པོ་ཕྱོགས་ཀྱི་གཞིས་གཉེར་དུ་བཞག །ས་གནས་དེ་གའི་སྨེ་རི་བསོད་ནམས་དང་སྨེ་ལེ་ཚེ་དཔལ་གཉིས་བྱ་བ་བདག་གཉེར་སྒྲུབ་མཁན་བསྐོ་མངགས་བྱས། རྫ་ཁོག་སྤྲུལ་སྐུ་པདྨངེས་རྣམ་དཔལ་ཡུལ་ར་ཁ་ས་ཆའི་རྫོང་དཔོན་དུ་བསྐོས། ས་གནས་དེ་གའི་འགོ་པ་ཉག་ཕྲུག་ལྷ་རྒྱལ་འཛིན་ཁོག་ས་ཆའི་རྫོང་དཔོན་དུ་བསྐོས། ཁྲལ་པ་འོ་ལ་དབང་འཛིན་བར་རོང་ས་ཆའི་གཞིས་གཉེར་ལ་བཞག །ཁྲལ་པ་ནོར་རྒྱལ་པད་བཀྲ་ཙག་མདོ་ས་ཆའི་གཞིས་གཉེར་དུ་བཞག །དེ་འདྲ་བྱས་ནས་དཔལ་ཡུལ་ས་ཆ་ཐམས་ཅད་བྱ་རྒོད་སྟོབས་ལྡན་གྱི་ནང་མིས་དབང་འཛིན་བྱས། དེར་མ་ཟད་སེར་ཤུལ་དང་། འདན་ཁོག །སྡེ་དགེ་སོགས་ཀྱི་ས་ཁུལ་དུ་སྡེ་དགེ་རྒྱལ་པོའི་སྟོབས་ཤུགས་ཉམས་དམས་སུ་བཏང་། དེ་ལྟར་ཕྱོགས་ཁག་བར་གྱི་འཐབ་རྩོད་ལོ་ཤས་རིང་བྱས་པས། ཕྱི་ལོ་༡༩༤༩་ལོར་སྡེ་དགེ་དབུ་བླ་ཁག་ལྔས་དཔལ་སྤུངས་ཕུད་གཞན་བཞི་པོས་བྱ་རྒོད་སྟོབས་ལྡན་ལ་རྒྱབ་སྐྱོར་ཐོབ་པར་བཤད། མདུན་སྐོར་ཁག་ལས་བྱ་རྒོད་སྟོབས་ལྡན་ཤོག་བཅོ་ལྔ་ཙམ་བྱུང་བ་དང་། དེ་མིན་མདུན་སྐོར་རྣམས་གནས་ཚུལ་འགྱུར་ལྡོག་ལ་བལྟས་ནས་ཕྱོགས་གང་ལ་རྒྱབ་སྐྱོར་བྱེད་རྒྱུའི་རྣམ་འགྱུར་མ་བསྟན། དཔལ་ཡུལ་དང་། སེར་ཤུལ། འདན་ཁོག་བཅས་ཀྱི་ཕྱོགས་སུ་བྱ་རྒོད་སྟོབས་ལྡན་གྱི་དབང་ཤུགས་ཆེན་པོ་ཡོད་པ་དང་། ཐ་ན་འཇོ་མདའ་དང་། སྡེ་དགེའི་ལྕགས་ར། འཁོར་ལོ་མདོ་སོགས་ས་གནས་ཀྱི་མདུན་ཧོར་མང་ཆེ་ཤོས་ཀྱི་བྱ་རྒོད་སྟོབས་ལྡན་ལ་རྒྱབ་སྐྱོར་བྱས། ཁྲལ་པ་དང་དབུལ་ཕོངས་ཀྱི་འཚོ་བ་སྐྱེལ་དགོས་པའི་མང་ཚོགས་མི་ཉུང་བ་ཞིག་གིས་བྱ་རྒོད་སྟོབས་ལྡན་གྱིས་སྡེ་དགེ་རྒྱལ་པོའི་ཁྲལ་དང་འུ་ལག་མི་རུག་པའི་བཀོད་པ་བཞིན་འགོག་རྒོལ་བྱས། དེ་རྣམས་བྱ་རྒོད་སྟོབས་ལྡན་གྱིས་སྲུང་སྐྱོབ་བྱས། ཕྱི་ལོ་༡༩༤༩ལོར་འཇུ་ཆུང་ཚེ་རྡོར་སྐྱེ་རྒུར་ནད་ཀྱིས་ཤི་རྗེས། ཁོའི་ཚ་བོ་བྱེ་དམག་འགྱུར་མེད་འཕྲིན་ལས་སོགས་མི་བཅོ་བརྒྱད་ཀྱིས་དམག་བསྡུས་ནས་སྡེ་དགེ་ཡིད་ལྷུང་བྱ་རྒོད་སྟོབས་ལྡན་ལ་དམག་བརྒྱབ། དེའི་སྐབས་སུ་བྱ་རྒོད་སྟོབས་ལྡན་མངའ་འོག་ལྷ་བྱ་དགོན་པས་དར་མདོ་ནས་མ་ཎི་གད་མགོར་སྐྱེལ་འདྲེན་ཡོང་བའི་ཅ་ལག་དེ་བྱེ་དམག་ཕྱོགས་ཀྱིས་བཅོམ་འཕྲོག་བྱས་པ་དང་། བྱ་རྒོད་ཚང་གི་ཚོང་པ་གཅིག་བསད། དེའི་རྣ་བ་བཅད་ནས་འཕྲིན་ཡིག་བཅས་པ་བྱ་རྒོད་སྟོབས་ལྡན་ལ་བསྐུར། བྱ་རྒོད་སྟོབ་ལྡན་གྱིས་འོག་གི་འགོ་པ་ལ་དམག་བརྒྱ་དང་ཉི་ཤུ་བསྐུར་ནས་སྐྱེ་རྒུ་ཕྱོགས་སུ་ཆས། སྐྱེ་རྒུར་བཅའ་སྡོད་ཡོད་པའི་མཚོ་སྔོན་མཱ་པུའུ་སྤྱང་གིས་ཆེད་གཏོང་པ་ལུའོ་དང་། ས་གནས་ཀྱི་མགོ་པ་རྣམས་ལ་ལག་དམར་བཟུང་རྒྱུར་རོགས་སྐྱོར་བྱེད་རོགས་ཞུས། ཆེད་གཏོང་པ་ལུའོས་ཕྱོགས་གཅིག་ནས་བར་པའི་སྒོ་ནས་ཐག་གཅོད་བྱེད་ཆོག་ཟེར་ཞིང་། ཕྱོགས་གཞན་ཞིག་ནས་ཡང་ས་གནས་ཀྱི་དཔོན་པོ་དང་འབྲེལ་བ་བྱས་ཏེ་དམག་དཔུང་ཤུགས་སྣོན་བརྒྱབ། དེ་རྗེས་ཆེད་གཏོང་པ་ལུའོས་མགྲོན་འབོད་ཚུལ་ནུ་སྐྱེ་རྒུར་ཡོད་པའི་བྱ་རྒོད་སྟོབས་ལྡན་གྱི་དམག་དཔོན་འཇུ་བཟུང་བྱས་ནས་བྱ་རྒོད་སྟོབས་ལྡན་གྱི་དམག་སྡེ་ལ་དམག་བརྒྱབ། བྱ་རྒོད་ཚང་གི་དམག་སྡེ་ཤི་རྨས་ཆེན་པོར་བྱས་མཐར་ཕྱིར་ཡིད་ལྷུང་དུ་ལོག །རྒྱལ་རབས་དངུལ་དཀར་མེ་ལོང་ལས། བྱེ་དམག་གིས་བྱ་རྒོད་ཕྱོགས་ཀྱི་ཚོང་པ་བཅོམ་པས་བྱེ་དམག་སྐྱེ་མདོར་ཕྱོགས་སུ་ཡོད་པ་ཤེས་ནས་བཀྲོང་པར་འབའ་ཆུང་མཐུ་སྟོབས་སོགས་རྟ་དམག་སུམ་བརྒྱ་ལྷག་བཏང་། བྱེ་དམག་གིས་སྐྱེ་རྒུ་གྲའུ་དཔོན་ཚང་ལ་མགོ་བཏགས། གྲའུ་དཔོན་ཚང་གིས་གཡོ་ཐབས་ཀྱིས་ཐོག་མར་བྱ་རྒོད་དཔུང་དམག་འགོ་པ་རྣམས་འཇུས། དེ་ནས་བྱེ་དམག་དང་ཟླ་སྒྲིལ་གྱིས་བྱ་རྒོད་དཔུང་དམག་དང་འཐབ་པས་བ་བཀྲ་དབང་རྒྱལ་གཙོས་བྱ་རྒོད་དམག་སུམ་ཅུ་སྐོར་བསད། གཡུལ་འགྱེད་དེའི་ནང་བྱ་རྒོད་སྟོབས་ལྡན་ལ་ཕམ་ཁ་ཆེན་པོ་བྱུང་། བྱ་རྒོད་སྟོབས་ལྡན་དང་། འཇམ་དབྱངས་དཔལ་མོའི་བར་གྱི་འབྲེལ་བ་དེ་བས་ཇེ་ངན་དུ་སོང་སྟེ། སྡེ་དགེ་དང་། བྱ་རྒོད་བར་གཞི་རྒྱ་ཆེ་བའི་ནང་འཁྲུག་བྱེད་གྲབས་སྐབས་སུ། ཀྲུང་གོའི་མི་དམངས་བཅིངས་འགྲོལ་དམག་གིས་སྡེ་དགེའི་ས་ཁུལ་བཅིངས་འགྲོལ་བཏང་བར། བྱ་རྒོད་སྟོབས་ལྡན་དང་། འཇམ་དབྱངས་དཔལ་མོ་གཉིས་ཀྱིས་མི་སྣ་མངགས་ནས་བཅིངས་འགྲོལ་དམག་ལ་དགའ་བསུ་ཞུས། དེ་རྗེས་བྱ་རྒོད་སྟོབས་ལྡན་ལྷོ་ནུབ་དམག་སྲིད་ཨུ་ཡོན་ལྷན་ཚོགས་ཀྱི་ཨུ་ཡོན་དང་། ཤིས་ཁམས་ཞིང་ཆེན་གྱི་ཧྲིན་ཀྲང་གཞོན་པར་བསྐོ་བཞག་བྱས། འཇམ་དབྱངས་དཔལ་མོ་ཆབ་མདོ་ས་ཁུལ་བཅིངས་འགྲོལ་ཨུ་ཡོན་ལྷན་ཚོགས་ཀྱི་ཀྲུའུ་རིན་གཞོན་པར་བསྐོ་བཞག་བྱས། སྡེ་དགེ་རྫོང་མི་དམངས་སྲིད་གཞུང་འཛུགས་རྒྱུར་གྲོས་མོལ་བྱེད་པའི་སྐབས་སུ་སྡེ་དགེའི་རྒྱལ་པོས་མངགས་པའི་ཕྱག་མཛོད་རང་རྒྱབ་བསོད་དགའ་རྫོང་དཔོན་བཞག། བྱ་རྒོད་སྟོབས་ལྡན་གྱིས་མངགས་པའི་དཀར་གཡང་ཀུན་དགའ་རྒྱལ་མཚན་དང་། རྒྱ་ལྷ་ཨ་ལེགས་གཉིས་རྫོང་དཔོན་གཞོན་པར་བསྐོ་བཞག་བྱས། རྫོང་མི་དམངས་སྲིད་གཞུང་དབུ་བརྙེས་པའི་ཚོགས་ཆེན་ཐོག་འཇམ་དབྱངས་དཔལ་མོ་དང་། བྱ་རྒོད་སྟོབས་ལྡན་གཉིས་ཕན་ཚུན་དར་དཀར་འབུལ་རེས་མཛད་པ་མ་ཟད། དམག་གི་སྐུ་ཚབ་སྤྱང་ཀོང་ལ་ཀྲུང་གོ་གུང་ཁྲན་ཏང་གི་འགོ་ཁྲིད་འོག་རྡོག་རྩ་གཅིག་སྒྲིལ་དང་མཐུན་སྦྱོར་མཉམ་གནས་བྱེད་འདོད་ཡོད་པའི་བསམ་བློ་བསྟན། དེ་ནས་སྡེ་དགེ་ཕྱོགས་ཁག་གཉིས་ཀྱི་འགལ་ཟླ་རྩ་བ་ནས་ཐག་ཆོད་དོ། ཕྱི་ལོ་༡༩༤༩ལོའི་སྟོན་ཁར་མི་དམངས་བཅིངས་འགྲོལ་དམག་གིས་ནུབ་བྱང་ས་ཁུལ་བཅིངས་འགྲོལ་བཏང་ཟིན་ནས། ཟི་ཁྲོན། ཤིས་ཁམས། བོད་ལྗོངས་ཕྱོགས་སུ་བསྐྱོད་པ་གོ་ཐོས་བྱུང་ནས། བེ་རི་དགེ་སྟག་སྤྲུལ་སྐུ་དང་། བྱ་རྒོད་སྟོབས་ལྡན། སྤོམ་མདའ་སྟོབས་རྒྱལ་གསུམ་ནས་མི་དམངས་བཅིངས་འགྲོལ་དམག་ཕེབས་བསུའི་ཆེད་ཙུང་སི་ལིང་ཀྲུང་ཏེའི་མདུན་ཞུ་ཤོག་དང་འབྲེལ་བང་མི་ཆེད་དུ་བཏང་བ་ནི། དགེ་སྟག་སྐུ་ཚབ་འབའ་བ་པད་ཀྲི་དང་། བྱ་རྒོད་སྟོབས་ལྡན་ངོ་ཚབ་དབང་རྒྱལ། སྤོམ་མདའ་སྟོབས་རྒྱལ་འཐུས་ཚབ་ཕྱག་ཕྲེང་གསུམ་བཏང་བ་ལན་ཀྲུའུ་འབྱོར་སྐབས་ཙུང་སི་ལིང་གཞོན་པ་ཕིང་ཏའི་ཧེའེ་དང་མཇལ་འཕྲད་བྱུང་། དེ་འཕྲལ་དུ་གནམ་གྲུར་བརྒྱུད་པེ་ཅིང་དུ་བཏང་། ཙུང་སི་ལིང་ཀྲུའུ་ཏེ་དང་མཇལ་འཕྲད་བྱུང་། དགེ་སྟག་སྤྲུལ་སྐུ་དང་། བྱ་རྒོད་སྟོབས་ལྡན་སོགས་མི་རིགས་དང་ཆོས་ལུགས་ཀྱི་གོང་གྲས་མི་སྣར་གཟེངས་བསྟོད་དང་འབྲེལ། སྐུ་ཚབ་རྣམ་པ་ཕྱིར་ཕེབས་སྐབས་སྔོན་དམར་དམག་རྒྱང་སྐྱོད་སྐབས་ཀྱི་ཁ་ཆད་ཇི་བཞིན་ད་ལམ་ཕྱིར་འོང་རྒྱུ་ཡིན། དམར་དམག་རྒྱང་སྐྱོད་སྐབས་ཀྱི་གྲོགས་པོ་རྒན་པ་བརྗེད་མེད་ཅེས་དང་། ཁམས་ཁུལ་དང་བོད་ལྗོངས་བཅིངས་འགྲོལ་བཏང་བ་ལ་ལས་ཀ་མང་པོ་བསྒྲུབ་དགོས་པའི་རེ་བ་སྟོན་འདུག་ཅེས་དང་། ད་རུང་སི་ཁྲོན་དང་ནུབ་ཁམས་བཅིངས་འགྲོལ་བཏང་མེད་པས་གཟབ་ནན་བྱེད་དགོས་སོགས་ཀྱི་གསུང་ཆ་བསྐུར་གནང་མཛད་ཚུལ་འདུག།ཕྱི་ལོ་༡༩༥༠་ལོའི་འགོར་ཁམས་ཕྱོགས་བཅིངས་འགྲོལ་ཐོབ་ནས་བྱ་རྒོད་སྟོབས་ལྡན་དར་མདོར་བཅིངས་འགྲོལ་ཐོབ་པ་མདུན་བསུ་ཞུ་བའི་རྟེན་འབྲེལ་མཛད་སྒོའི་ཚོགས་ཆེན་དུ་ཞུགས། ལོ་དེའི་སྤྱི་ཟླ་གསུམ་པའི་ཚེས་ཉེར་བདུན་ཉིན་གསར་དུ་དབུ་བརྙེས་པའི་དར་མདོ་དམག་དོན་ཨུ་ཡོན་ལྷན་ཁང་གི་ཀྲུའུ་རིང་གཞོན་པ་བསྐོ་བཞག་བྱས་ནས་ཡུན་རིང་མ་སོང་བར་ལུའུ་བེ་ཁྲེང་དང་། ཞོ་ལང་། ཏིང་ཞའོ་ཕིང་སོགས་ལྷོ་ནུབ་དམག་སྲིད་ཨུ་ཡོན་ལྷན་ཁང་གི་འགོ་ཁྲིད་ཚོས་བྱ་རྒོད་སྟོབས་ལྡན་དང་། དགེ་སྟག་སྤྲུལ་སྐུ་སོགས་ཁམས་ཕྱོགས་ཡར་ཐོན་གོང་རིམ་མི་སྣ་ཁྲང་ཆིང་དུ་ཁམས་ཕྱོགས་འཛུགས་བསྐྲུན་དང་། བོད་ལྗོངས་བཅིངས་འགྲོལ་ཡོང་བར་རྒྱབ་སྐྱོར་མཛད་པ་སོགས་ཀྱི་ཐད་བསམ་འཆར་ཉན་སར་གདན་ཞུས་དང་འབྲེལ། སྟོབས་ལྡན་ལྷོ་ནུབ་དམག་སྲིད་ཨུ་ཡོན་ལྷན་ཁང་གི་ཨུ་ཡོན་བསྐོ་བཞག་བྱས། ཕྱི་ལོ་༡༩༥༠་ལོའི་ཟླ་བ་བདུན་པར་བྱ་རྒོད་སྟོབས་ལྡན་ནུབ་ཁམས་ཞིང་ཆེན་བོད་རིགས་རང་སྐྱོང་ཁུལ་མི་དམངས་འཐུས་མི་ཚོགས་འདུ་གྲོས་མོལ་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ་བདམ་ཐོན་བྱུང་། ལོ་དེའི་ཕྱི་ཟླ་བཅུ་གཅིག་པར་སྐབས་དང་པོའི་མི་རིགས་ཁག་དང་། ལས་རིགས་ཁག་གི་མི་དམངས་འཐུས་མི་ཚོགས་འདུའི་ཐོག །སྟོབས་ལྡན་ནུབ་ཁམས་ཞིང་ཆེན་བོད་རིགས་རང་སྐྱོང་ཁུལ་གྱི་ཀྲུའུ་ཞི་གཞོན་པ་འདེམ་བསྐོས་བྱས། ཏང་དང་མི་དམངས་ཚོས་ཡིད་ཆེས་དང་བཀའ་མངགས་གལ་ཆེན་མཛད་དོན་བཞིན། བྱ་རྒོད་སྟོབས་ལྡན་གྱི་ཆབ་སྲིད་འདུ་ཤེས་རྦད་དེ་འཕོ་འགྱུར་བྱུང་ནས་ལས་དོན་ལ་སྤྲོ་སེམས་ཆེན་པོས་ནུས་ཤུགས་ཡོད་རྒུ་རྩལ་སྟོན་གྱིས་ཁམས་ཕྱོགས་བརྟན་བརླིང་འཚོ་སྲུང་དང་། མི་དམངས་བཅིངས་འགྲོལ་དམག་ཨང་བཅོ་བརྒྱད་པ་བོད་ལྗོངས་བཅིངས་འགྲོལ་བཏང་བར་སྐྱོད་སྐབས། མ་ཎི་གད་མགོ་ནས་ཆབ་མདོ་བར་ཁལ་ཕྱུགས་གོ་སྒྲིག་བྱས་ཏེ་སྐྱེལ་འདྲེན་འགན་ལེན་བྱས། ཕྱི་ལོ་༡༩༥༡ལོའི་ལོ་འཇུག་ཏུ། བྱ་རྒོད་སྟོབས་ལྡན་གྱིས་ཡིད་ལྷུང་དང་སེར་ཤུལ་འདན་ཁོག་སོགས་ནས་འགེལ་ཁལ་ཁྲི་གཅིག་ལྷག་གོ་སྒྲིག་བྱས་ཏེ། གནས་ར་དགེ་ལེགས་དོས་དཔོན་སྲུང་དམག་བཅས་ལྷ་སར་བར་མྱུར་འདྲེན་བྱས་ཏེ། ལྷ་སར་སླེབས་མ་ཐག་པའི་དཔུང་དམག་གི་དཀའ་ངལ་སེལ་ཐབས་བྱས་ཏེ་བོད་ལྗོངས་བཅིངས་འགྲོལ་བཏང་བར་མཐུན་རྐྱེན་སྦྱར། མི་རིགས་མཐུན་སྒྲིལ་ལ་ཤུགས་སྣོན་དང་སྤྱི་ཚོགས་བདེ་འཇགས་ལ་སྲུང་སྐྱོབས། ཐོན་སྐྱེད་འཕེལ་རྒྱས་བཏང་བ་བཅས་ལ་དགེ་མཚན་ལྡན་པའི་བྱས་རྗེས་མང་དུ་བཞག །དེ་ནས་བྱ་རྒོད་སྟོབས་ལྡན་གྱིས་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མི་དང་། སི་ཁྲོན་ཞིང་ཆེན་ཆབ་སྲིད་གྲོས་ཚོགས་ཀྱི་ཀྲུའུ་ཞི་གཞོན་པ། དཀར་མཛེས་བོད་རིགས་རང་སྐྱོང་ཁུལ་གྱི་ཁུལ་གཙོ་གཞོན་པ་དང་། སྲིད་གྲོས་ཀྱི་ཀྲུའུ་ཞི་གཞོན་པ་སོགས་ཀྱི་འགན་འཛིན་གནང་། ཕྱི་ལོ་༡༩༦༠་ལོའི་ལོ་འགོ་ནས་སྐུ་ཞབས་སྟོབས་ལྡན་མཆོག་གློ་བུར་དུ་མཆིན་པ་འཁུན་བུའི་སྐྲན་ནད་ཕོག་སྟེ་སྲིད་གཞུང་གིས་རྒྱབ་སྐྱོར་འོག་ཞིང་ཆེན་མི་དམངས་སྨན་ཁང་གིས་སྨན་བཅོས་བྱས་ཀྱང་། སྐུ་ཚེ་མ་ཟིན་པ་ལོ་དེའི་ཕྱི་ཟླ་བཞི་པའི་ཚེས་གཉིས་ཉིན་གྱི་ཕྱི་དྲོའི་ཆུ་ཚོད་བདུན་དང་སྐར་མ་ལྔའི་ཐོག་ཁྲིན་ཏུར་མི་དམངས་སྨན་ཁང་དུ་གཤེགས། སྐབས་དེར་དགུང་གྲངས་རེ་གསུམ་ཡིན་ཅིང་། སྐུ་ཞབས་འདི་ཉིད་ནི་ཏང་དང་རྒྱལ་ཁབ་ཀྱི་དོན་ཆེན་ལ་བྱས་རྗེས་ཅན་གྱི་མི་སྣ་གྲགས་ཅན་ཞིག་ཡིན་ནོ། །ལྔ་པ་དཔལ་འབྱོར་དང་ཁྲལ་འུ་ལག་སྐོར་ལ། སྡེ་དགེའི་ས་ཁོངས་སུ་ཡུལ་གྱི་ཐོན་རྫས་གཙོ་ཆེར་ཞིང་འབྲོག་གི་ཐོན་རྫས་ཡིན། དེའང་ཞིང་ལས་ཐོག་ནས་དང་། གྲོ། སྲན་མ། བྲ་འོ་སོགས་འབྲུ་རིགས། ལ་ཕུག །ཞོག་ཁོག །ཡུངས་མ། པད་ཚལ་སོགས་སྔོ་རིགས་སྣ་ཚོགས་དང་། འབྲོག་ཁུལ་དུ་མར། ཕྱུར་བ། ཤ། སྤུ་རིགས་སྣ་ཚོགས་དང་། ནགས་ལས་སུ་ཤིང་ཆ་དང་། ཤིང་ཐོག་སྣ་ཚོགས། སྟག །གཟིག །དྲེད། དབྱི། རྐྱང་། ཝ། སྦྲེ། སྲམ་སོགས་གཅན་ཟན་གྱི་ཤ་སྤགས་རུས་པ། ཤ་རྭ། གླ་རྩི། དོམ་མཁྲིས། གི་ཝཾ་སོགས་སྲོག་ཆགས་ལས་བྱུང་བའི་སྨན་རྫས་ནམ་ཆེན། བྱང་རྒྱུད་འབྲོག་ཁུལ་དུ་འབྲོང་དང་། གནའ་བ། རྒོ་བ། ཁ་ཤ་སོགས་ཡོད། སྔར་ནགས་རི་དང་རི་དྭགས་ཀྱི་རིགས་ལ་བཀག་རྒྱ་ཤིན་ཏུ་དམ་པས། ནགས་རི་རྒྱ་ཆེ་ཞིང་། རི་དྭགས་དང་གཅན་གཟན་གྱི་རིགས་དེང་སྐབས་དང་མི་འདྲ་བ་ཤིན་ཏུ་འབེལ་པོ་ཡོད། གཏེར་རྫས་ཀྱི་རིགས་ཤིན་ཏུ་མང་བ་ཡོད་ཀྱང་། དེ་སྐབས་གསེར་དང་ཞ་ཉེ་ཙམ་ལས་སྔོག་འདོན་མ་ཤེས། རི་སྐྱེས་སྨན་རིགས་དབྱར་རྩྭ་དགུན་འབུ་དང་། ཨ་བི་ཥ་སོགས་རིགས་མི་འདྲ་བ་སྟོང་རྩ་བརྒལ་བ་རྒྱུན་དུ་སྤྱོད་རྒྱུ་ཡོད། ལག་ཤེས་བཟོ་ལས་གསེར་དངུལ་ཟངས་ལྕགས་ཀྱི་བཟོ་བ། ལྷ་བཟོ། རྫ་བཟོ། ཤིང་བཟོ། འཁེལ་ཐག་བཟོ་ལས། པར་རྐོ། ཤོག་བུ་བཟོ་བ། ཀོ་བཟོ། ཚེམས་བྲུབ་མཁན་སོགས་དང་། དེ་དག་རྒྱ་དཀར་ནག་སོགས་སུ་ཕྱིར་འཚོང་ནང་འདྲེན་བྱེད་པ་བཅས་སྡེ་དགེའི་ཕྱོགས་ཀྱི་དཔལ་འབྱོར་ཐོན་ཁུངས་ཡིན། ཐོན་ཁུངས་དེ་དག་ལ་བརྟེན་ནས་ལོ་ངོ་བརྒྱ་ཕྲག་མང་པོར་གསོག་འཇོག་བྱས་པའི་དངོས་རྫས། སྡེ་དགེའི་རྒྱལ་ས་ལྟེ་བ་ལྷུན་གྲུབ་སྟེང་གིས་གཙོས། དགོན་སྡེ་ཁག་ལ་ལོ་ངོ་སྟོང་ཕྲག་མང་པོའི་ལོ་རྒྱུས་དང་ལྡན་པའི་དངོས་པོ་རྩ་ཆེན། ཆོས་ཕྱོགས་ནས་ཐོབ་པ་དཀོན་པའི་ནང་རྟེན་གྱི་རིགས་ནམ་ཆེན། སྒྱུ་རྩལ་གྱི་ཁྱད་ཆོས་ཕུལ་བྱུང་དང་ལྡན་པའི་སྐུ་གསུང་ཐུགས་རྟེན་དང་མཆོད་པའི་ཡོ་བྱད་སོགས་མཐོང་ཆེན། རྡོ་རྗེ་ཕ་ལམ་དང་། ཨིནྡྲིལ། པདྨག །ཀེཏཀ བེཌཱུ གཟི་དང་། བྱི་རུ། གསེར་དངུལ་ལ་སོགས་པ་རིན་པོ་ཆེའི་རིགས་སྣ་ཚོགས། དེ་དག་གིས་བཟོ་བསྐྲུན་བྱས་པའི་ཕྲ་རྒྱན་དང་མགུལ་རྒྱན་སོགས་རིན་ཐང་ཆེ་བ། གཙུག་ལག་ཁང་དང་། ཕོ་བྲང་། ཀུན་དགའ་ར་བ་སོགས་བཟོ་དབྱིབས་མཛེས་རྩལ་དེ་དུས་སྤྱི་ཚོགས་ཀྱི་ཁྱད་ཆོས་དང་ལྡན་པ། མདོར་ན་ཆོས་སྡེ་ཆེ་ཁག་རེ་རེ་ལའང་། དེང་སྐབས་སྤྱི་ཚོགས་ཀྱི་གོང་ཚད་ལྟར་ན། ཨ་སྒོར་ཐེར་འབུམ་མང་པོའི་རྒྱུ་རྩ་དང་། མདུན་ཧོར། དཔོན་ཁག །ཚོང་དཔོན་ཆེ་ཁག་བཅས་ལའང་ནང་གི་མཆོད་ཁང་དང་། གོས་རྒྱན་གྱི་རིགས་སོགས་ཤིན་ཏུ་རྩ་ཆེན་ཉར་ཡོད་པ་རེ་རེ་བཞིན་འཆད་ནུས་པ་མིན། ཀྲུང་ཧྭ་མི་སེར་རྒྱལ་ཁབ་ཀྱི་དུས་སུ་སྡེ་དགེ་རྒྱལ་པོའི་ལོ་རེའི་དཔལ་འབྱོར་ཡོང་སོང་སྡོམ་ཐོ་ཞིག་འདུག་པ་འདི་ལྟར། རྒྱལ་པོའི་སྐུ་སྒེར་ས་ཞིང་མུའུ་༦༦༦་ཡོད་པར་འབྲུ་རིགས་ཡར་བུད་རྒྱ་མ་༡༧༥༠༠༠། འབྲོག་རར་ནོར་ཟོག་༡༧༠༠། རྟ་༢༡༠། དྲེལ་༡༢༠་ཡོད་པར། ཐོན་རྫས་མར་རྒྱ་མ་༢༤༠༠༠། འཚོང་ལས་མ་དངུལ་སྒོར་༨༣༢༠༠་ཡོད་པར། ཁེ་སྤོགས་སྒོར་༢༧༧༠། དངུལ་སྐྱེད་མ་རྩ་སྒོར་༦༥༠༠༠་ཡོད་པར། དངུལ་སྐྱེད་སྒོར་༡༦༡༠༠། དཔྱ་ཁྲལ་བསྡུས་པའི་ནས་རྒྱ་མ་༢༤༦༤༠༠། གྲོ་རྒྱ་མ་༢༨༠༠༠། བུད་ཤིང་རྒྱ་མ་༦༠༠༠༠༠། གཟན་ཆག་རྒྱ་མ་༡༦༠༠༠། གཞན་སྣ་ཚོགས་རྒྱ་མ་༡༡༨༠༠། བཅས་ཡོང་སྒོ་ཁག་དང་། ལོ་རེའི་འགྲོ་སོང་ནི། རྒྱལ་བློན་སྐུ་འཁོར་གཞུང་གི་གསོལ་འབྲུ་ནས་རྒྱ་མ་༧༤༧༥༠། གྲོ་རྒྱ་མ་༡༠༨༠༠། ཆོས་སྡེ་ཁག་གི་གྲྭ་འབུལ་ནས་རྒྱ་མ་༢༠༦༤༠༠། གཞུང་གི་གསོལ་མར་རྒྱ་མ་༡༤༠༠༠། གྲྭ་འབུལ་མར་རྒྱ་མ་༦༠༠༠། རྒྱ་བོད་སྲིད་གཞུང་ཁག་ལ་ལོ་འབུལ་སྒོར་༡༠༨༠༠། གཞུང་གི་བུད་ཤིང་རྒྱ་མ་༤༠༠༠༠། གཞུང་གི་གཟན་ཆག་རྒྱ་མ་༡༥༠༠༠་འགྲོ་སོང་སྡོམ་ཐོ་བཅས་བཀོད་འདུག་པ་ཁུངས་དག་མིན་མ་ངེས། དཔྱ་ཁྲལ་དང་འུ་ལག་སྐོར་ནི། རྐང་ཁྲལ་རེ་ལ་ས་ཞིང་ནས་སྒྲོ་གསུམ་རེ་ཙམ་གྱི་མར་འདེབས་ས་མལ་ཡོད་པས་དེང་དུས་མུའུ་བཅུ་རེ་ཙམ། ཁལ་ཁྲལ་རེ་ལ་ནས་སྒྲོ་དྲུག་རེ་ཙམ་གྱི་ས་མལ་ཡོད་པས་མུའུ་ཉི་ཤུ་རེ་ཙམ། རྟ་ཁྲལ་རེ་ལ་ནས་སྒྲོ་བཅུ་རེ་ཙམ་གྱི་ས་མལ་ཡོད་པས་མུའུ་སུམ་ཅུ་རེ་ཙམ། ཧོར་ཆུས་རེ་ལ་ནས་སྒྲོ་ཉི་ཤུ་རེ་ཙམ་གྱི་ས་མལ་ཡོད། མདུན་སྐོར་རེ་ལ་ནས་སྒྲོ་བཞི་བཅུ་ཙམ་གྱི་ས་མལ་ཡོད། དེ་དག་ས་གནས་སོ་སོའི་ས་ཞིང་རྒྱ་ཆེ་ཆུང་ལྟར་ཁྱིམ་རྒྱུད་ཁག་ས་ཞིང་ཆེ་ཆུང་ཡོད་པས་གཅིག་མཚུངས་མིན། ཁྱིམ་ཚང་རེ་རེས་ས་ཆུས་ཆེ་ཆུང་གཉིས་གསུམ་བཟུང་མཁན་ཀྱང་ཡོད་ལ། མདུན་ཧོར་ཁག་གིས་དེ་ལས་ས་ཞིང་མང་བ་བདག་བཟུང་བྱས་ཡོད། དེ་བཞིན་དགོན་སྡེ་ཁག་ལའང་ས་ཞིང་རྒྱ་ཆེར་ཡོད། གྲྭ་པ་རྣམས་ལ་གྲྭ་ཞིང་ཞེས་མི་རེ་ལ་ཕལ་ཆེར་ནས་སྒྲོ་གང་ནས་ཕྱེད་བར་གྱི་ས་ཞིང་ཡོད། དེ་དག་ལ་དྲུག་ཆའི་དཔྱ་ཐང་ཐོག་རྩེ་ཞེས་ས་བོན་གྱི་དྲུག་ཆ་གཅིག་སྡེ་དགེ་རྒྱལ་པོའི་སྲིད་གཞུང་ལ་སྤྲོད་དགོས་པས། རྐང་ཆུས་རེས་ནས་སྒྲོ་ཕྱེད་ཙམ། ཁལ་ཆུས་རེས་ནས་སྒྲོ་གང་རེ་ཙམ། རྟ་ཆུས་རེས་ནས་སྒྲོ་ཕྱེད་དོ་ཙམ། ཧོར་ཆུས་རེས་ནས་སྒྲོ་གསུམ་རེ་ཙམ། མདུན་ཆུས་རེས་ནས་སྒྲོ་ཕྱེད་དང་བདུན་རེ་ཙམ་སྤྲོད་དགོས། རྐང་ཆུས་རེས་མར་བོད་རྒྱ་གང་། ཁལ་ཆུས་རེས་མར་རྒྱ་དོ། རྟ་ཆུས་རེས་མར་རྒྱ་གསུམ། ཧོར་ཆུས་རེས་མར་རྒྱ་དྲུག །མདུན་ཆུས་རེས་མར་རྒྱ་བཅུ་གཉིས་རེ་ཙམ། དེའང་ས་སྨད་ཕྱོགས་སུ་མར་ཁྲལ་མི་དགོས། འབྲོག་པའི་ས་ཁུལ་དུ། སེར་ཤུལ་ཕྱོགས་ལ་སོ་ཟུག་གི་གྲངས་ཀ་ཡིན་པས་ནོར་ཕྱུགས་སོ་གཉིས་ཡན་ཆད་སོ་ཟུག་རེ་རེ་བགྲང་དགོས། ལྷོ་སྡེ་ཕྱིར་འབྲོག་ཁག་ལ། ར་བཅུ་ལ་ཟོག་གཅིག་བརྩི། ལུང་ལྔ་ལ་ཟོག་གཅིག །རྟ་གཅིག་ལ་ཟོག་ཕྱེད་གསུམ་རེ་བརྩིས་པའི་ཟོག་ནི་མགོ་གྲངས་རེ་ལ་མར་སྲང་ཕྱེད་དོ་རེ་ཙམ་སྤྲོད་དགོས། དེ་ལྟར་ཞིང་འབྲོག་ཁུལ་གྱི་དཔྱ་ཁྲལ་དེ་དག་བསྡུ་མཁན་སྡེ་དགེའི་སྐུ་ཚབ་ཐད་ཀར་འགྲོ་དགོས་པ་དང་། རྫོང་དཔོན་དང་གཞིས་གཉེར། དཔོན་འགོ་ཁག་ནས་བསྡུ་དགོས་རྒྱུ་སོགས་ས་ཁུལ་ས་ོསོའི་ལམ་ལུགས་འདྲ་མིན་གཏན་འབེབས་བྱས་ཡོད། གང་ལྟར་ཡང་དཔྱ་ཁྲལ་ཚང་མ་སྡེ་དགེ་ཕྱག་མཛོད་ལས་ཁུངས་ནས་རྩིས་ལེན་བྱེད་དགོས། ཁོལ་པ་ལའང་རིགས་གཉིས་ཡོད་པ་དགོན་སྡེ། བླ་དཔོན། མདུན་ཧོར་ཁག་བཅས་ཀྱི་ས་ོསོའི་སྒེར་དུད་ཅེས་པ་ཞིང་ཁ་ཡོད་པ་དང་། ཁོལ་པ་དཀྱུས་མར་ས་ཞིང་རང་ལ་དབང་བ་མེད་པས། རང་རང་གི་དཔོན་དེའི་ས་ཞིང་ཕྱེད་མ་རྨོ་དགོས། སྒེར་དུད་རྣམས་ཀྱིས་རང་རང་གི་དཔོན་ལ་དཔྱ་ཁྲལ་སྤྲོད་དགོས་ལ། འགའ་ཞིག་མི་དགོས་མཁན་ཡང་ཡོད། ས་ཞིང་ཕྱེད་མ་རྨོ་དགོས་ན་ས་བོན་རང་གིས་འདེབས་པ་དང་སོ་ནམ་ཡོངས་རྫོགས་རང་གིས་བྱེད་དགོས། ལོ་འཇུག་སྟོན་ཐོག་གི་ཡར་བུད་ཕྱེད་ཀ་ཞིང་བདག་ལ་སྤྲོད་དགོས། ལམ་ལུགས་འདི་དག་སྡེ་དགེའི་ཁྲི་རབས་དང་པོ་བླ་ཆེན་བྱམས་པ་ཕུན་ཚོགས་ནས་གཏན་འབེབས་གནང་ཞིང་། ཁྲི་རབས་བཅུ་གཉིས་པ་འཆི་མེད་རྟག་པའི་རྡོ་རྗེའི་བར་ལ་སོར་གནས་བྱུང་། དེ་ནས་རིམ་བཞིན་འགྱུར་ཏེ་ཞིང་པའི་ས་ཁུལ་ལ། ས་བོན་གྱི་བཞི་ཆ་ཐོག་རྩེ་དང་། ས་བོན་གྱི་ཕྱེད་ཆ་བོད་གཞུང་གིས་ས་བཟུང་སྐབས་བོད་གཞུང་ལ་མདུན་འབྲུ། ཀྲུང་ཧྭ་མི་སེར་རྒྱལ་ཁབ་སྐབས་གཞུང་འབྲུ། ས་བོན་གྱི་བརྒྱད་ཆ་གཅིག་དགོན་སྡེ་ཁག་གི་དུས་མཆོད་ཐེབས་རྩ་སྤྲོད་དགོས་ལ། དེ་བཞིན་འབྲོག་ཁུལ་དུ་སྡེ་དགེ་གཞུང་ལ་སྔར་རྒྱུན་དཀར་ཕྱག་སྤྲོད་དགོས་ཐོག །ནོར་ཟོག་འགོ་གྲངས་རེ་ལ་མར་སྲང་ཕྱེད་དོ་རེ་ཙམ་རྒྱ་བོད་སོ་སོའི་སྐབས་སྤྲོད་དགོས་བྱུང་བ་མ་ཟད། ཞིང་འབྲོག་ས་ཁུལ་དུ་རྣམ་གཞག་དང་། གཟན་ཆས་སོགས་རིགས་མི་འདྲ་བའི་རྣམ་གྲངས་མང་པོ་སྤྲོད་དགོས་པ་བྱུང་བས་མི་སེར་ཁ་ཤས་ཡུལ་འཁྱར་དགོས་པའང་བྱུང་འདུག །འུ་ལག་ཞེས་མི་རྐྱང་དང་རྟ་ཟོག་གི་ཁྲལ་དགོས་པ་ལ་ཟེར། རྒྱལ་པོའི་སྐུ་སྒེར་གྱི་ཆུས་གཞིས་དང་། འབྲོག་ཁུལ་རྟ་ཕྱུགས་ཚང་མ་མངའ་ཁོངས་ཀྱི་གཞུང་སྡེ་ཁྲལ་བ་རྣམས་ཀྱིས་ས་ཞིང་རྨོ་འདེབས་སོགས་སོ་ནམ་གང་དགོས་དང་། ནོར་ཟོག་འཚོ་རྫི། རྩྭ་གཟན་སོགས་ཅི་དགོས་སྡེ་དགེའི་ཐོག་དཔོན་དང་། འབྲོག་པའི་ཤེ་དཔོན་སོ་སོའི་བཀོད་པ་བཞིན་གཡོག་ཁྲལ་དགོས་པ་དང་། རྒྱལ་པོའི་སྐུ་ངོ་ནང་འཁོར་གཉེར་ཕྱག །རྫོང་དཔོན། གཞིས་གཉེར། སྐུ་ཚབ་སོགས་བསུ་སྐྱེལ་གང་དགོས། རྫོང་སྒོ་རེར་རྒྱུན་སྡོད་གཡོག་པོ་མི་ལྔ་རེ་ཙམ་རེས་བསྐོར་བཅས་གང་དགོས་དེ་དག་རྐང་ཆུས་རྣམས་ཀྱིས་མི་རྐྱང་དང་། ཁལ་ཆུས་རྣམས་ཀྱིས་མཛོ་ཁལ། རྟ་ཆུས་རྣམས་ཀྱིས་རྟ་ཁྲལ་རྒྱུག་དགོས་པ་མ་ཟད། སྡེ་དགེའི་དབུ་བླ་ཁག་སོགས་མི་ཆེན་བླ་དཔོན་ཆེ་གྲས་འགའ་ལ་སྡེ་དགེ་རྒྱལ་བློན་ནས་བསུ་སྐྱེལ་དགོས་པའི་ལམ་ཡིག་སྤྲོད་ཕྱིན། ཁྲལ་བ་རྣམས་ཀྱིས་བསུ་སྐྱེལ་ཐབ་གཡོག་བྱེད་དགོས། དེ་དག་ཚང་མ་གླ་ཕོག་གང་ཡང་མེད་པར་མ་ཟད་གྲོ་ཁ་ཡང་རང་རང་ནས་ཁྱེར་དགོས། ཁོལ་བ་རྣམས་ལས་དགོན་སྡེ། མི་དཔོན། བླ་དཔོན་ཁག་སོ་སོའི་སྒེར་དུད་རྣམས་ཀྱིས་སྐུ་ངོའི་ངོ་ཚབ་དང་། བདག་པོའི་ཚང་དཔོན་སོགས་འཇོན་ཐང་ཆེ་ཆུང་བཞིན་འགྲོ་དགོས་ལ། ཁོལ་པ་དཀྱུས་མ་རྣམས་ཀྱིས་རང་རང་གི་དཔོན་འགོ་གང་ཡིན་དེའི་ས་ཞིང་རྨོ་འདེབས་སོགས་སོ་ནམ། འབྲོག་པའི་ནོར་ཕྱུགས་འཚོ་རྫི་སོགས་ནང་གི་གཡོག་པོ་གང་དགོས་ཉིན་བཞིན་འགྲོ་དགོས། དེ་ལ་ཉིན་རེར་གླ་ཆ་འབྲུ་ཕོར་དོ་ནས་བཞི་བར་དང་། ལྟོ་ཆས་ཐབས་ཆག་རེ་སྤྲོད་སྲོལ་ཡོད། རང་ལ་ས་ཞིང་མེད་པས་ཞིང་བདག་གི་ས་ཞིང་ཕྱེད་མ་དང་། ཉིན་གླ་ཕྲན་བུ་དེས་མི་ཚེའི་འཚོ་རྟེན་བྱེད་དགོས་པས་ཁྲལ་བ་ལས་ཁོལ་བ་རྣམས་ཀྱི་འཚོ་བ་ཞན་ཆེའོ། དྲུག་པ་དམག་དོན་སྒྲིག་སྲོལ་དང་དམག་འཁྲུག་བྱུང་རིམ་ནི། སྡེ་དགེ་བླ་ཆེན་བྱམས་པ་ཕུན་ཚོགས་མ་ཕེབས་སྔོན་དུ་དམག་རུ་ནམ་དགོས་ཡུལ་དམག་བསྡུ་རུག་བྱེད་པ་ལས་ནམ་རྒྱུན་དམག་གི་གོ་སྒྲིག་དམིགས་བསལ་མེད་ཚོད། གོ་མཚོན་ཀྱང་ཁྲབ་རྨོག་མདའ་གྲི་མདུང་གསུམ། མེ་མདའ་རྒྱུས་བོག་སོགས་ཡིན་སྐད། བླ་ཆེན་བྱམས་པ་ཕུན་ཚོགས་སྐབས། རྫོང་སྒོ་སོ་སོར་དམག་ཁྲལ་བཀོད་དེ་གོ་རྩིས་ལེན་རྒྱུ་བྱས། དེའང་རྐང་ཆུས་དང་ཁལ་ཆུས་རིམ་པ་ལ་རྐང་དམག་གྲི་མདུང་། རྟ་ཆུས་རིམ་པ་ཡན་དང་འབྲོག་ཁུལ་ལ་རྟ་དམག་གྲི་བོག །དེའང་དམག་མི་རེ་རེ་བཞིན་བརྒྱ་རྫས། བརྒྱ་རྡེལ་ལོ་རེ་བཞིན་གོ་རྩིས་སྤྲོད་དགོས་པའི་སྲོལ་བཏོད། རྫོང་སྒོ་ཆེ་ཁག་ལ་སྟོང་དམག་སྐོར་ནས་ཆུང་ཁག་ལ་ཉིས་བརྒྱ་སྐོར་ཡོད། དོ་གལ་ཆེ་ན་བཅོ་བརྒྱད་དྲུག་ཅུའི་ཡུལ་དམག་འགྲོ་དགོས་པའི་སྲོལ་བཏོད། ཕྱིས་སུ་ལྷ་སྲས་ཚེ་དབང་བདུད་འདུལ་སྐབས་ཙམ་ནས་རྐང་དམག་གིས་གྲི་མདུང་དང་རྒྱུས་བོག །རྟ་དམག་གིས་འཕྲུལ་མདའ་དང་། རྒྱུས་བོག་སོགས་ཁྱིམ་ཚང་རེ་རེ་བཞིན་འབྱོར་པ་ཆེ་ཆུང་གི་འོས་བབས་ལྟར་དམག་ཁྲལ་བཀོད། ལོ་རེ་རེ་བཞིན་རྫོང་སྒོ་ཁག་ནས་གོ་རྩིས་ལེན་དགོས་འདུག་པ་དང་། གཞུང་ལ་མེ་སྒྱོགས་ཁ་ཤས་ཀྱང་ཡོད་སྐད། རྒྱུན་སྤྱོད་གོ་ཧྲག་སྟོང་དམག་ལྔ་ནས། དམག་ཆེན་ཁྲི་དམག་བདུན་གྱི་བར་གོ་སྒྲིག་བྱས་ཡོད། དེའི་ནང་ཕྱོགས་ཀྱི་དཔོན་འགོ་བཞི་དང་། ཕྱིའི་དཔོན་འགོ་གསུམ་གྱི་དཔུང་དམག་ནི་དུས་རྒྱུན་མཐའ་སྲུང་དམག་གི་དོད་པོ་ཡིན། དམག་དཔོན་ནི། དམག་འཁྲུག་གི་གཞི་རྒྱ་ཆེ་ཆུང་ལྟར་རྫོང་སྒོ་ཁག་དང་། དཔོན་འགོ་ཁག །མདུན་ཧོར་ཁག་བཅས་ལ་རྒྱལ་པོས་ཐད་ཀར་བཀའ་ཕབས་པའམ་གཉེར་ཕྱག་ལྷན་རྒྱས་ཁང་ནས་བཀོད་སྒྲིག་བྱེད་སྲོལ་ཡོད། དམག་རྩེད་སྦྱང་བརྡར་ཆེད་དུ་བྱེད་སྲོལ་མེད་ཀྱང་། ཡུལ་འདིའི་སྔོན་མའི་གོམས་གཤིས་གྲི་བོག་ལ་དགའ་ཞིང་དུས་རྒྱུན་མི་རྣམས་ཀྱིས་གྲི་དབྱུག་དང་། བོག་འབེན་ཁོ་ནར་རྩེ་བས་གྲི་བོག་རྟ་རྩལ་བྱང་ཆུབ་པ་ཡོད། ལུང་ཚན་སོ་སོའམ་རྫོང་སྒོ་དཔོན་ཁག་སོ་སོ་ནས་ལོ་རེར་གོ་རྩིས་ལེན་པ་དང་ཆབས་ཅིག །རྟ་རྒྱུག་བོག་འཕེན་གྱི་རྩེད་ར་ཐེངས་རེ་ཕལ་ཆེར་འཛུགས་སྲོལ་ཡོད། དམག་འཁྲུག་སྐབས་དམིགས་བསལ་བྱས་རྗེས་འཇོག་མཁན་གྱི་དཔའ་བོ་ལ་དཔའ་དར་དང་། ཁྱིམ་དེར་ཁྲལ་དང་འུ་ལག་གཏན་འཆག་སོགས་གཟིགས་བཟོས་བདག་རྐྱེན་ཆེན་པོ་གནང་སྲོལ་ཡོད། དམག་དར་ནི། དར་མདུང་དམར་ནག་གཉིས་ཡོད་པ་སྟེ། གཞི་ནག་པོ་ལ་མུ་ཁྱུད་དང་དར་ལྕེ་དམར་པོ། དབྱིབས་གྲུ་གསུམ། དངུལ་འདུལ་གྱིས་རྡོ་རྗེ་རྒྱ་གྲམ་གྱི་རྟགས་ཅན། མདུང་རྩེའི་མགུལ་དུ་རྔ་ཐུག་དམར་པོ་ཅན་དང་། དར་མདུང་གཞི་དམར་པོ་ལ་དར་ལྕེ་གསུམ་དང་མུ་ཁྱུད་ནག་པོ། དབྱིབས་གྲུ་བཞི། གསེར་འདུལ་གྱིས་ལཉྫ་བྲིས་པ་ཡོད་ཟེར་བ་ལས་ལཉྫ་འབྲུ་ཅི་ཡིན་མི་གསལ་ཡང་། བེཀྩེའི་རྟེན་མདུང་པྲཱཾ་ཡིག་བྲིས་པ་ཨེ་ཡིན་སྙམ། མགུལ་དུ་རྔ་ཐུག་དམར་པོ་གོང་མཚུངས། དམག་དར་གཉིས་པོ་དུས་རྒྱུན་རྣམ་རྒྱལ་མགོན་ཁང་ནང་མའི་མགོན་པོའི་གཡས་གཡོན་ཀ་བ་གཉིས་ལ་ཐུམ་འབྱར་བཅིངས་ཡོད། སྡེ་དགེའི་ལས་དམག་འགྲོ་ནམ་དགོས་དམག་དར་གཉིས་པོ་ཁྱེར་དགོས། ཁུར་མཁན་འཛིང་ཁོག་ཤེས་རབ་ཕུར་པ་ཞེས་པའི་སྔོན་མ་དཔའ་ལེན་དུད་ཁག་བཅུ་གཅིག་ཡོད་པ་དེས། དམག་རུ་དགོས་སྐབས་དམག་དར་ཁྱེར་བའི་རུ་འདྲེན་དགོས་པ་ལས་གཞན་ཁྲ་འུ་ལག་གཏན་འཆག་ཡིན་འདུག །སྡེ་དགེ་ཆགས་ནས་དམག་འཁྲུག་བྱུང་རིམ་ནི། སྡེ་དགེའི་རྒྱལ་རབས་བདུན་པ་ཁྲི་རབས་དང་པོ་བླ་ཆེན་བྱམས་པ་ཕུན་ཚོགས་ཀྱི་སྐབས་སུ། རབ་བྱུང་བཅུ་གཅིག་པའི་ལྕགས་འབྲུག་ཕྱི་ལོ་༡༦༤༠ལོར་སོག་གུ་ཤྲི་བསྟན་འཛིན་ཆོས་རྒྱལ་གྱི་དཔུང་གྲོགས་བྱས་ཏེ་བེ་རི་དོན་ཡོད་རྒྱལ་དང་འཐབ། བླ་ཆེན་དཔུང་གིས་བེ་རི་དོན་ཡོད་རྒྱལ་གསོན་བཟུང་བྱས་པའི་ལོ་རྒྱུས་དང་། དེ་སྐབས་ཡུལ་སྡེ་མང་པོ་ཐོབ་ཚུལ། གཞན་ཡང་དེ་སྐབས་རྨེ་ཤོད་གླིང་དཔོན་དུ་སི་དང་འཐབ་སྟེ་བྲན་དུ་བྱས། དཔེ་ཝར་དང་མཁར་མདོ་ཚུ་རི་རྣམས་དཔུང་གིས་བླངས། དེ་བཞིན་དབོན་སྟོད། ལྕགས་ར། ཧོར་པོ་སོགས་སུ་གཡུལ་བཀྱེས་པའི་ལོ་རྒྱུས་ཡོད། གོང་སྨྲས་དཔོན་ཆེན་ཀརྨའི་སྲས་གཉིས་པ་རྡོར་ལེགས་ཀྱིས་ལྕགས་རའི་གླིང་དཔོན་དང་འཐབ་སྐབས་རྒོད་ཚང་འབུར་ཐོག་ནས་མདའ་འཕངས་པ་ལྕགས་ར་གླིང་དཔོན་གྱི་གསེར་འཕྲུར་ཕོག་པའི་ལོ་རྒྱུས་ལྟར་ན། དེ་སྐབས་མདའ་གཞུ་སྤྱོད་ཡོད་པ་དང་དེ་སྐབས་ལྕགས་ར་གླིང་དཔོན་དང་འཐབ་པར་མངོན། ཁྲི་རབས་བཞི་པ་ཁྲི་ཆེན་སངས་རྒྱས་བསྟན་པའི་སྐབས། སྔར་སྡེ་དགེའི་ཆབ་འོག་ཏུ་ཡོད་པ་སྒ་རྗེ་དང་དཔལ་ཡུལ་སོགས་འབངས་གྱེན་ལོག་བྱུང་བར་དྲག་ཤུགས་ཀྱིས་མངའ་ཞབས་སུ་བསྡུས། ཁྲི་རབས་ལྔ་པ་བསོད་ནམས་ཕུན་ཚོགས་སྐབས། རྒྱལ་བ་སྐལ་བཟང་རྒྱལ་མཚོ་ལི་ཐང་དུ་འཁྲུངས་པ། རྒྱལ་པོ་ལྷ་བཟང་གིས་དགྲོང་རྩིས་བྱས་ཏེ་ཨེར་གེ་ཇུ་ནང་དཔོན་གཡོག་མང་པོ་གཏོང་སྐབས། སྡེ་དགེའི་གཉེར་ཆེན་འབིར་ལུགས་དཔུང་དང་བཅས་བཏང་ནས་སྐལ་བཟང་རྒྱལ་མཚོ་ལི་ཐང་ནས་སྡེ་དགེ་རྫོང་སར་དགོན་དུ་སྤྱན་དྲངས། ཁྲི་རབས་བདུན་པ་ཁྲི་ཆེན་བླ་མ་ཕུན་ཚོགས་བསྟན་པའི་སྐབས། ཉག་རོང་གི་དཔུང་དམག་ས་མཚམས་ལས་བརྒལ་བར་གཡུལ་བཀྱེས་ཏེ་ཕམ་པར་བྱས་ཚུལ་དང་། ཧོར་ཆེན་གྱི་རྒྱུད་པ་ནང་འཁྲུག་འཁྱར་སྐབས་མགོ་བླངས་ཚུལ་ཡོད། ཁྲི་རབས་བརྒྱད་པ་བླ་ཆེན་བློ་གྲོས་རྒྱ་མཚོའི་སྐབས། རབ་བྱུང་བཅུ་གསུམ་པའི་ཤིང་ཕག་ཕྱི་ལོ་༡༧༥༥ལོར་ཧོར་ཁང་སར་དང་མ་ཟུར་གཉིས་ས་རྩོད་སྐབས་ཕན་ཚུན་ཉེ་ལྟོས་རྒྱབ་ལངས་བྱས་ཏེ། མ་ཟུར་གྱི་རྒྱབ་རྩ་རྒྱ་རོང་ཁྲོ་སྐྱབས་དཔོན་གྱིས་བྱས། ཁང་སར་གྱི་རྒྱབ་གཉེར་སྡེ་དགེས་བྱས་ཏེ་གཡུལ་བཀྱེས་པས་མ་ཟུར་རྒྱབ་གཉེར་བཅས་ཕམ་པར་བྱས། སྒ་རྗེ་ཚེ་དབང་ལྷ་མོས་སྲིད་སྐྱོང་གནང་སྐབས། མཁར་ནང་དཔོན་གྱིས་གྱེན་ལོག་བྱས་པར་དྲག་ཤུལ་གྱི་དཔུང་གིས་རྩ་མེད་བྱས། ཁྲི་རབས་བཅུ་པ་ཚེ་དབང་རྡོ་རྗེ་རིག་འཛིན་སྐབས། ས་འབྲུག་ཕྱི་ལོ་༡༨༠༨ལོར་འགུ་ལོག་ཁང་སར་དང་ཁང་རྒན་གཉིས་དང་བོད་གཞུང་བར་འཁྲུག་རྩོད་བྱུང་སྐབས། བོད་གཞུང་རྒྱབ་གཉེར་སྡེ་དགེའི་ལས་དམག་དྲངས་ཏེ་འགུ་ལོག་ཕམ་པར་བྱས། ཁྲི་རབས་བཅུ་གཉིས་པ་འཆི་མེད་རྟག་པའི་རྡོ་རྗེའི་སྐབས། ཤིང་ཡོས་ཕྱི་ལོ་༡༨༥༥ལོར་གོར་བོད་འཁྲུག་སྐབས་བོད་གཞུང་རྒྱབ་གཉེར་སྡེ་དགེའི་ལས་དམག་སོང་ཡང་ཆིངས་འགྲིགས་ནས་དངོས་སུ་འཐབ་དགོས་མ་བྱུང་། ཆུ་ཁྱི་ཕྱི་ལོ་༡༨༦༢ལོར་ཉག་སྐེད་མགོན་པོ་རྣམ་རྒྱལ་དམག་གིས་སྡེ་དགེར་བཙན་འཛུལ་བྱས་ཏེ་ཐོག་མར་སྡེ་དགེ་ཕམ་ནས་རྒྱལ་ས་ལྟེ་བ་ལྷུན་གྲུབ་སྟེང་ཡང་ཉག་དམག་གིས་བཟུང་བས་མ་ཚད། སྡེ་དགེ་རྒྱལ་པོ་ཡུམ་སྲས་དང་། དཔལ་སྤུངས་དབོན་རྒན། ཀཿཐོག་ཞིང་སྐྱོང་། རྫོགས་ཆེན་དཔོན་སློབ་སོགས་ཉག་རོང་ས་ཁུལ་དུ་མི་གཏའ་བཀག་ཉར་བྱས། ཆུ་ཕག་ལོར་སྡེ་དགེའི་རྒྱབ་གཉེར་བོད་དམག་སླེབས་ཏེ་སྡེ་དགེའི་དམག་བཅས་ཟླ་སྒྲིལ་གྱིས་འཐབ་པས་ཤིང་གླང་ཕྱི་ལོ་༡༨༦༥ལོའི་ཟླ་བ་བརྒྱད་པའི་ཚེས་གཅིག་ཉིན་མགོན་པོ་རྣམ་རྒྱལ་ཕ་བུ། བློན་པོ་དྲག་ཤོས་བཞི་བཅུ་སྐོར་དང་མཁར་རྫོང་བཅས་དུས་གཅིག་ལ་གསོན་བསྲེག་བྱས། ལྷག་འཕྲོས་སྡེ་དཔོན་དམངས་དང་བཅས་པས་ལུགས་མཐུན་མགོ་འབུལ་ཞུས་ཏེ་གཡུལ་ལས་རྣམ་པར་རྒྱལ། ཁྲི་རབས་བཅུ་གསུམ་པ་རྡོ་རྗེ་སེངྒེའི་སྐབས། སྲས་སྐུ་མཆེད་ངག་དབང་འཇམ་དཔལ་རིན་ཆེན་དང་ནང་འཁྲུག་ཡང་ཡང་བྱུང་ཞིང་། མཐར་སྲས་སྐུ་བགྲེས་རྡོ་རྗེ་སེངྒེའི་རྒྱབ་རྩ་ཆིང་གོང་མའི་བློན་ཆེན་ཀྲོའི་ཨེར་སྤྱང་གིས་བྱས་ཏེ། ས་སྤྲེལ་ཕྱི་ལོ་༡༩༠༨ལོར་སྲས་སྐུ་གཞོན་ངག་དབང་འཇམ་དཔལ་རིན་ཆེན་ཕྱོགས་དང་འཐབ་པས། ངག་དབང་འཇམ་དཔལ་རིན་ཆེན་ཕྱོགས་ཕམ་ནས་བོད་གཞུང་ལ་མགོ་བཏགས། མེ་འབྲུག་ཕྱི་ལོ་༡༩༡༦ལོར་བོད་དམག་གིས་རྒྱ་དམག་ཆབ་མདོ་ནས་ཕྱིར་དེད་དེ། མེ་སྤྲེལ་ཕྱི་ལོ་༡༩༡༧ལོར་དཀར་མཛེས་རོང་པ་ཚ་བར་བོད་དམག་སླེབས་པའི་དམག་འཁྲུག་བྱུང་། ཁྲི་རབས་བཅུ་བཞི་པ་ལྷ་སྲས་འཇིགས་མེད་ཚེ་དབང་བདུད་འདུལ་སྐབས། ལྕགས་ལུག་ཕྱི་ལོ་༡༩༣༡ལོ་ནས་ཁྲོན་ཁམས་མཐའ་སྲུང་དམག་གིས་བོད་དམག་ཕྱིར་དེད་ནས། ཆུ་སྤྲེལ་ཕྱི་ལོ་༡༩༣༢ལོར་ཛཾ་ཐོག་ཞི་ཆིངས་བཞག་པའི་བར་གྱི་དམག་འཁྲུངས་བྱུང་། མེ་བྱི་ཕྱི་ལོ་༡༩༣༦ལོར་དམར་དམག་དཀར་མཛེས་སུ་སླེབས་པར་འགོག་ཆེད་སྡེ་དགེའི་ལས་དམག་དཀར་མཛེས་སུ་འགྲོ་སྐབས་ཕམ་ཁ་བླངས། དེ་དང་དུས་མཚུངས་ཟི་ལིང་རྨ་པུའུ་སྤྱང་དཔུང་དམག་སྡེ་དགེར་སླེབས་པ་དང་འཐབ་པས་སྡེ་དགེ་རྒྱལ། ས་སྟག་ཕྱི་ལོ་༡༩༣༨ལོར་ས་ངན་ཐོག་སྡེ་དགེའི་དམག་དྲངས་ནས་ས་ངན་དཔོན་འགོ་ཁ་ཤས་གཡོ་བཟུང་བྱས་ཏེ་བསད་པའི་ལོ་རྒྱུས་བཅས་དེ་སྔར་སྡེ་དགེའི་ས་ཁུལ་དུ་དམག་འཁྲུག་བྱུང་རིམ་ཡིག་ཐོག་འཁོད་པ་དེ་ཙམ་ལས་མ་མཐོང་ཡང་། ད་རུང་སྐྱེ་རྒུ་ལབ་དགོན་དུ་དམག་དྲངས་པའི་ལོ་རྒྱུས་དང་གླིང་ཚང་དང་འཁྲུག་རྩོད་བྱུང་བའི་ལོ་རྒྱུས་སོགས་ཁ་སྒྲོས་ཡོད་ཀྱང་ཞིབ་པར་འབྲི་མ་ཤེས། བདུན་པ་ཁྲིམས་སྲོལ་ལམ་ལུགས་སྐོར་ནི། སྡེ་དགེའི་ཁྲི་རབས་དང་པོ་བླ་ཆེན་བྱམས་པ་ཕུན་ཚོགས་སྐབས་ལྷ་ཆོས་དགེ་བ་བཅུ་དང་། མི་ཆོས་གཙང་མ་བཅུ་དྲུག་གི་ཁྲིམས་བཅས་པའི་རྩ་ཐོ། སྡེ་དགེའི་རྒྱལ་རབས་ཚིགས་བཅད་མ་ལས་འདི་ལྟར། དང་པོ་ལྷ་ཆོས་དགེ་བ་བཅུ་ནི། །༡སྲོག་ཆགས་གསོད་ཅིང་༢མ་བྱིན་གཞན་ནོར་ལེན། །༣གཞན་གྱི་བུད་མེད་བསྟེན་ཅིང་༤རྫུན་གྱི་ཚིག་ །༥ཕྲ་མ་༦ཚིག་རྩུབ༧་ངག་འཁྱལ་༨བརྣབ་སེམས་དང་། །༩གནོད་སེམས་༡༠ལོག་ལྟ་མི་དགེའི་ལས་ལམ་སྤང་། ཞེས་དང་། གཉིས་པ་མི་ཆོས་གཙང་མ་བཅུ་དྲུག་ནི། །༡་རིན་ཆེན་གསུམ་ལ་གུས་ཤིང་༢དམ་ཆོས་སྒྲུབ། །༣ཕ་མར་བཀུར་སྟི་བྱེད་ཅིང་༤ཡོན་ཏན་ཅན། །གོང་དུ་ཁུར་ཞིང་༥རིགས་མཐོ་ཡ་རབས་དང་། །རྒན་པར་ཞེ་ས་བྱེད་ཅིང་༦མཛའ་བཤེས་ལ། །གནའ་གཞུང་བསྲང་ཞིང་༧ཡུལ་མིར་ཀུན་ཕན་འདོགས། །༨རང་བློ་དྲང་ཞིང་༩མིག་ལྟོས་ཡ་རབས་ལ། །བལྟ་ཞིང་༡༠ཟས་དང་ནོར་ལ་ཚུལ་བཞིན་སྤྱོད། །༡༡དྲིན་ཆེན་དག་ལ་དྲིན་ལེན་སྤྲོད་པ་དང་། །༡༢བྲེ་སྲང་གཡོ་སྒྱུ་མེད་ཅིང་༡༣ཐམས་ཅད་པ། །སྤྱི་ལ་སྙོམས་ཤིང་༡༤ཕྲག་དོག་མེད་པ་དང་། །༡༥བུད་མེད་ཁ་ལ་མི་ཉན་༡༦ངག་འཇམ་ཞིང་། །སྨྲ་མཁས་བཟང་ངན་གང་ཡང་ལྕོགས་པ་ཡི། །བློ་ཁོག་ཡངས་པར་བྱེད་སོགས་མི་ཡི་ཆོས། །གཙང་མ་བཅུ་དྲུག་པོ་ཡི་ཁྲིམས་བཅས་ནས། ཞེས་པ་ལྟར། དང་པོ་དཀོན་མཆོག་གསུམ་ལ་མོས་གུས་བསྐྱེད་པ། གཉིས་པ་དམ་པའི་ཆོས་བཙལ་ཞིང་སྒྲུབ་པ། གསུམ་པ་ཕ་མ་ལ་བཀུར་བསྟི་བྱེད་པ། བཞི་པ་ཡོན་ཏན་ཅན་གོང་དུ་ཁུར་བ། ལྔ་པ་རིགས་མཐོ་ཡ་རབས་དང་རྒན་པར་ཞེ་ས་བྱེད་པ། དྲུག་པ་མཛའ་བཤེས་ལ་གནའ་གཞུང་བསྲང་བ། བདུན་པ་ཡུལ་མིར་ཕན་འདོགས་པ། བརྒྱད་པ་རང་བློ་དྲང་བ། དགུ་པ་མིག་ལྟོས་ཡ་རབས་ལ་བལྟ་བ། བཅུ་པ་ཟས་ནོར་ལ་ཚུལ་བཞིན་སྤྱོད་པ། བཅུ་གཅིག་པ་དྲིན་ཆེན་ལ་དྲིན་ལེན་སྤྲོད་པ། བཅུ་གཉིས་པ་བུ་ལོན་དུས་སུ་འཇལ་ཞིང་བྲེ་སྲང་ལ་གཡོ་སྒྱུ་མེད་པ། བཅུ་གསུམ་པ་ཐམས་ཅད་སྤྱི་ལ་སྙོམས་པ། བཅུ་བཞི་པ་ཀུན་ལ་ཕྲག་དོག་མེད་པ། བཅོ་ལྔ་པ་བུད་མེད་ཁ་ལ་མི་ཉན་པ། བཅུ་དྲུག་པ་སྨྲ་མཁས་ཤིང་བཟང་ངན་གང་ཡང་ལྕོགས་པའི་བློ་ཁོག་ཡངས་པ་བཅས་བཅུ་དྲུག་དང་། གཞན་ཡང་དབུས་གཙང་གི་ཁྲིམས་ཡིག་ཞལ་ལྕེ་བཅོ་ལྔ་ནི། དང་པོ་དཔའ་བོ་སྟག་གི་ཞལ་ལྕེ། གཉིས་པ་སྡར་མ་ཝ་ཡི་ཞལ་ལྕེ། གསུམ་པ་སྣེ་མོ་ལས་འཛིན་གྱི་ཞལ་ལྕེ། བཞི་པ་ཞུ་བཞེས་བདེན་རྫུན་གྱི་ཞལ་ལྕེ། ལྔ་པ་བཟུང་བཀྱིགས་ཁྲིམས་རའི་ཞལ་ལྕེ། དྲུག་པ་ནག་ཆེན་ཁྲག་སྦྱོར་གྱི་ཞལ་ལྕེ། བདུན་པ་དྲན་འཛིན་ཆད་ལས་ཀྱི་ཞལ་ལྕེ། བརྒྱད་པ་ཧོར་འདྲ་ཟ་རྐང་གི་ཞལ་ལྕེ། དགུ་པ་བསད་པ་སྟོང་གི་ཞལ་ལྕེ། བཅུ་པ་རྨས་པ་ཁྲག་གི་ཞལ་ལྕེ། བཅུ་གཅིག་པ་བསྙོན་ཧམ་མནའ་དག་གི་ཞལ་ལྕེ། བཅུ་གཉིས་པ་བརྐུས་པ་འཇལ་གྱི་ཞལ་ལྕེ། བཅུ་གསུམ་པ་ཉེ་འབྲེལ་འབྲལ་འདུམ་གྱི་ཞལ་ལྕེ། བཅུ་བཞི་པ་བྱི་བྱས་བྱི་རིན་གྱི་ཞལ་ལྕེ། བཅོ་ལྔ་པ་ནམ་ཕར་ཚུར་གྱི་ཞལ་ལྕེ་སྟེ་ཁྲིམས་ཡིག་ཞལ་ལྕེ་བཅོ་ལྔ་སྟེ། གཙང་པ་རྒྱལ་པོ་ཀརྨ་བསྟན་སྐྱོང་དབང་པོས་བོད་ལ་དབང་བསྒྱུར་བྱས་པའི་སྐབས་གཏན་འབེབས་བྱས་པའི་ཁྲིམས་ཡིག་དོན་ཚན་བཅུ་དྲུག་ཡོད་པ་ལས། ཐ་མ་བཅུ་དྲུག་པ་ཀླ་ཀློ་མཐའ་འཁོབ་ཀྱི་ཞལ་ལྕེ་ཕུད་པའི་ལྷག་མ་བཅོ་ལྔ་པོ་རྣམས་དང་གོ་རིམ་དང་ངོ་བོ་གཅིག་མཐུན་ཡིན་འདུག །གོང་གསལ་ཞལ་ལྕེ་དེ་དག་གཏན་ཁྲིམས་ལྔ་ལ་བསྡུས་པ་སྟེ། དང་པོ་སྲོག་མི་གཅོད་པའི་ཁྲིམས། གཤིན་སྟོང་དང་གསོན་སྟོང་། རྨས་སྟོང་དང་ཁྲག་སྟོང་འཇལ་རྒྱུ། གཉིས་པ་མ་བྱིན་པ་མི་ལེན་པའི་ཁྲིམས། དཀོན་མཆོག་གི་ནོར་བརྐུས་ན་བཅུ་འཇལ། རྒྱལ་པོའི་ནོར་བརྐུས་ན་དགུ་འཇལ། འབངས་ཀྱི་ནོར་བརྐུས་ན་སུམ་འཇལ། གསུམ་པ་ལོག་པར་མི་གཡེམ་པའི་ཁྲིམས་ལ། སྨད་འཇལ་དང་བྱི་ཆད། བཞི་པ་རྫུན་སྤོང་བའི་ཁྲིམས་ལ། ལྷ་སྲུང་དཔང་དུ་བྱས་ནས་མནའ་བོར་བ། ལྔ་པ་ཆང་མི་འཐུང་བའི་ཁྲིམས་ལ། ཆང་ཚོད་ཟིན་དགོས་པ་སོགས་ཀྱིས་རྩ་འཛིན་བྱས་པའི་ཁྲིམས་ཡིག་སེར་འབལ་མའམ། སྡེ་དགེའི་ཁྲིམས་རྒན་མ་ཞེས་དུས་དེ་ཙམ་ན་ཀུན་གྱིས་ཚད་འཇོག་བྱེད་པའི་ཁྲིམས་ཡིག་ཡོད་འདུག་ཀྱང་དཔེ་མ་ཐོབ། བླ་ཆེན་བྱམས་པ་ཕུན་ཚོགས་ནས་འཆི་མེད་རྟག་པའི་རྡོ་རྗེའི་བར་ཆོས་རྒྱལ་ཆེན་པོའི་གཅིག་གྱུར་གྱི་བཀའ་འོག་ཆུན་པས་ཁྲིམས་ཆད་དངོས་སུ་ལག་ལེན་བྱས་པ། ༡རྐང་ལག་ལྕགས་སྒྲོག་གིས་བསྡོམས་ནས་བཙོན་དུ་བཅུག་པ། ༢ཡུལ་གཞན་དུ་གནས་དབྱུང་བཏང་བ། ༣གནམ་ཐག་དཔྱོང་བ། ༤ལྕགས་ཚན་གཞུ་བ། ༥རྒྱུ་དངུལ་གྱི་ཉེས་ཆད་སྣ་ཚོགས་བཅས་བཅད་ཡོད་ལ། རྡོ་རྗེ་སེངྒེས་སྲིད་དབང་བཟུང་སྐབས་ནས་ཆོས་རྒྱལ་ཆེན་པོའི་གཅིག་གྱུར་གྱི་དབང་ཤུགས་ཉམས་དམས་སུ་གྱུར་ནས། དཔོན་འགོ་སོ་སོས་གང་བྱུང་དུ་ཁྲིམས་ཐག་བཅད་པ་མང་དུ་བྱུང་བས་ཡུལ་གཞན་གྱི་སྲོལ་ལྟར། ༡ཉེས་པ་སྲོག་ཐོག་བཏང་བ། ༢མིག་བརྐོ་བ། ༣རྐང་པའི་འཕོང་ལོ་ལེན་པ། ༤ལག་མགོ་བཅད་པ་སོགས་ཉུང་ཤས་བྱུང་འདུག །འདི་དག་གི་ཁྲིམས་དཔོན་ནི། ༡ཆོས་རྒྱལ་རིམ་པ། ༢གཉེར་ཕྱག་ལྷན་རྒྱས། ༣རྫོང་དཔོན་དང་གཞིས་གཉེར་ཁག །༤སྡེ་དགེའི་སྐུ་ཚབ་ཆེད་བཏང་། ༥དགོན་སྡེ་ཁག་གི་འགོ་གཙོ། ༦ཡུལ་རང་ཕྱོགས་ཀྱི་མདུན་ཧོར་ཁག་བཅས་གྱོད་དོན་གཞི་རྒྱ་ཆེ་ཆུང་ལྟར་ཁྲིམས་དཔོན་བྱེད་ཆོག །གྱོད་གཏུག་འགྲོ་སྐབས་རིམ་པ་གོང་འོག་གི་འོས་ཐོབ་བཞིན་མཇལ་དར་ཞུ་རྟེན་སོགས་ཚུལ་བཞིན་དགོས་སྲོལ་འདུག་གོ། བརྒྱད་པ་རིག་གནས་སྐོར་ལ། སྡེ་དགེ་ནི་མདོ་ཁམས་ཕྱོགས་འདིའི་རིག་གནས་ཀྱི་ལྟེ་བ་ཡིན་ཏེ། ཆོས་རྒྱལ་སྲོང་བཙན་སྒམ་པོའི་སྐུ་དུས་སུ་འདན་ཁོག་ལ་ཁམས་ཀྱི་གླང་ཐང་སྒྲོལ་མ་ལྷ་ཁང་དང་། སྨན་ཤོད་དུ་ཁམས་ཀྱི་རྨེ་འདོར་བྱ་ཁྱི་ལྷ་ཁང་བཞེངས། ཁམས་ཀྱི་གླང་ཐང་དུ་ནཱ་རོའི་སློབ་མ་སྨྲྀཏིས་མཛོད་ཀྱི་བཤད་པ་མཛད་པས་མཁས་བཙུན་མང་དུ་འདུས་པའི་ལོ་རྒྱུས་དང་། བྱ་ཁྱི་ལྷ་ཁང་དུ་བདེ་གཤེགས་ཕག་མོ་གྲུབ་པས་སྤྱོད་འཇུག་སོགས་ཐོས་བསམ་མཛད་པའི་ལོ་རྒྱུས་བྱུང་བ་དང་། གསང་བདག་སྒྲོ་ཕུག་པའི་སློབ་མ་ཤཱཀྱ་སེངྒེའི་ཡང་སློབ་ཀཿ་ཐོག་པ་བདེ་གཤེགས་སྤོབས་པ་མཐའ་ཡས་ཀྱིས་རབ་བྱུང་གསུམ་པའི་ས་ཡོས་ལོར་ཀཿ་ཐོག་རྡོ་རྗེ་གདན་གྱི་ཆོས་གྲྭ་བཏབ། ཀཿ་ཐོག་པ་ཡེ་ཤེས་འབུམ་དགེ་འདུན་ཁྲི་བཅོ་བརྒྱད་ལྷག་ཙམ་དང་ལྷན་དུ་གསོ་སྦྱོང་མཛད་པའི་ལོ་རྒྱུས་འདུག་པས། ཡུལ་འདིར་སྔ་མོ་ནས་རིག་གནས་འཕེལ་རྒྱས་བྱུང་ཡོད་པ་མངོན། ཕྱིས་སུ་སྡེ་དགེ་ཆགས་ནས་རིམ་བཞིན་རིག་པའི་གནས་ཀྱི་འབྱུང་གནས་དགེ་འདུན་གྱི་སྡེ་དབྱར་ཚོ་རྒྱས་པ་ལྟར་བྱུང་ནས་རིམ་བཞིན་གཞི་རྒྱ་ཆེ་བའི་བཤད་གྲྭ་ཁག་མང་དུ་ཡོད་པ་སྟེ། དཔེར་ན། རྫོགས་ཆེན་ཤྲཱི་སེང་སློབ་གྲྭ། རྫོང་སར་ཁམས་བྱེ་སློབ་གྲྭ། ཀཿཐོག་རྒྱུད་སྡེ་སློབ་གྲྭ། དཔལ་ཡུལ་རྒྱུད་སྡེ་སློབ་གྲྭ། དཔལ་སྤུངས་དབྱར་གནས་སློབ་གྲྭ། ཞེ་ཆེན་སློབ་གྲྭ། དབོན་སྟོད་ལྷུན་པོ་རྩེའི་སློབ་གྲྭ། སྐུ་ཚེའི་གསེར་ལྗང་སློབ་གྲྭ། ཝ་ར་དགོན་གྱི་སློབ་གྲྭ། ཁྲོམ་རྡོ་ཁོ་དགོན་གྱི་སློབ་གྲྭ། ཡིད་ལྷུང་ལྷ་བྱ་དགོན་གྱི་སློབ་གྲྭ། སེར་ཤུལ་དགོན་གྱི་སློབ་གྲྭ། ལྕང་མ་རི་ཁྲོད་ཀྱི་ཆོས་སྒར། དགེ་མང་དགོན་གྱི་སློབ་གྲྭ། སྡེ་དགེ་ལྷུན་གྲུབ་སྟེང་གི་སློབ་གྲྭ། ཨ་འཛམ་ཆོས་སྒར། སྨྱོ་ཤུལ་ཆོས་སྒར། སེང་གྲུ་ཆོས་སྒར་སོགས་མང་དུ་བྱུང་ཞིང་། དེ་དག་ཏུ་ཐུན་མོང་རིག་གནས་སྐོར་ནས་གསང་སྔགས་རྡོ་རྗེ་ཐེག་པའི་བར་གངས་ཅན་བོད་ཀྱི་ཤེས་བྱ་རིག་པའི་གནས་ཆེན་ལྔའམ། བཅུ་ཕྲག་རིག་པའི་གནས་མཐའ་དག་དགོས་རྒུ་ཚང་མ་སློབ་གཉེར་བྱེད་ཆོག །གཞན་ཡང་དགོན་སྡེ་སོ་སོར་སློབ་གྲྭ་ཆུང་འབྲིང་ཁག་མང་དུ་ཡོད་ལ། ཆོས་རྒྱལ་ཆེན་པོ་ཞལ་ངོ་ནང་མར་དམིགས་འཛུགས་སྐུ་རྒྱབ་མཁན་ཆེན་དང་། དབུ་བླ་ཁག་ཆེད་དུ་གདན་འདྲེན་ཞུ་སྲོལ་དང་། དེ་བཞིན་མདུན་ཧོར་དཔོན་ཁག་རྣམས་ལའང་ཁྱིམ་གྱི་དགེ་རྒན་བཀུག་སྲོལ་ཡོད། ཀྲུ་ཧྭ་མི་སེར་རྒྱལ་ཁབ་དུས། སྡེ་དགེར་སྐུ་དྲག་སློབ་གྲྭ་ཆེད་འཛུགས་བྱས་པ་སོགས་ལ་བརྟེན། མཁས་ཅན་གྱི་མི་སྣ་ཡང་མང་དུ་བྱུང་བ་མཚན་ཐོ་ཙམ་བཀོད་ན། དགོན་ཆེན་དུ་ཞུ་ཆེན་ཚུལ་ཁྲིམས་རིན་ཆེན། བསམ་གཏན་བློ་གྲོས་སོགས། རྫོགས་ཆེན་དུ་པདྨརིག་འཛིན་དང་། ཨོ་རྒྱན་བསྟན་འཛིན་ནོར་བུ། རྫ་དཔལ་དགེ་སྤྲུལ་སྐུ་སོགས། ཞེ་ཆེན་དུ་མཐུ་སྟོབས་རྣམ་རྒྱལ་དང་། འཇུ་མི་ཕམ། ཞེ་ཆེན་རྒྱལ་ཚབ་པདྨརྣམ་རྒྱལ་སོགས། དཔལ་སྤུངས་སུ་སི་ཏུ་ཆོས་ཀྱི་འབྱུང་གནས་དང་། འཇམ་མགོན་བློ་གྲོས་མཐའ་ཡས་སོགས། ཀཿཐོག་ཏུ་སི་ཏུ་པཎ་ཆེན་དང་། དགེ་རྩེ་པཎ་ཆེན་སོགས། དཔལ་ཡུལ་དུ་ཀུན་བཟང་ཤེས་རབ་དང་། རྒྱ་སྤྲུལ་མདོ་སྔགས་བསྟན་འཛིན་སོགས། རྫོང་སར་དུ་འཇམ་དབྱངས་མཁྱེན་བརྩེའི་དབང་པོ་དང་། ཆོས་ཀྱི་བློ་གྲོས་སོགས་དང་། གོང་དུ་སྨོས་པའི་དགོན་སྡེ་སོ་སོའི་སློབ་གྲྭ་ཁག་གི་མཁན་རབས་རིམ་བྱོན་བཅས། སྡེ་དགེ་ཆགས་ནས་མཁས་པའི་གྲགས་ཅན་མི་སྣ་གཙོ་གྲས་ཤེས་རྟོགས་བྱུང་བ་མཚན་ཐོ་བཀོད་པ་ཡིན། དེ་དག་གིས་ཞིབ་འཇུག་གནང་བའི་སྡེ་དགེའི་ཐུན་མིན་གྱི་ཤེས་རིག་ལ། སི་ཏུ་ཆོས་འབྱུང་གི་བྲིས་རྒྱུན་སྡེབ་བྲིས་སྲོལ་གསར་གཏོད། གདོང་ཚེ་དོན་གྲུབ་ཀྱི་སྡེ་དགེའི་ལི་མ་དང་། སྡེ་དྲིལ་སོགས། ཀཿ་ཐོག་ཕྱོགས་ཀྱི་ཤིང་བརྐོས། ཀུ་སེ་བའི་བྲིས་གསར་དང་། ཤིང་པར་ཤིང་ཕོར་སོགས། ཨ་ལོ་བའི་ཤོག་བུའི་བཟོ་ལས། མཁར་མདོ་དང་སྨན་ཤོད་བའི་རྫ་བཟོ། དཔེ་ཝར་ཆུ་སྲིབ་དང་། ཧོར་པོ་སྨན་ཤོད་སོགས་ཀྱི་གསེར་དངུལ་བཟོ་བ་ཤིན་ཏུ་ཕུལ་བྱུང་ཅན། སྡེ་དགེའི་ཤིང་ཚོན་རི་མོ་སོགས་ལུགས་གཞན་དང་མ་འདྲེས་པའི་ཁྱད་ཆོས་དང་ལྡན་པའི་ཤེས་རིག་ཡོད། སྒྱུ་རྩལ་ཐོག །དགོན་ཆེན་རྒྱལ་པོ་ནོར་བཟང་གི་རྣམ་ཐར། རྫོགས་ཆེན་གླིང་གི་ཕུ་ནུའི་ཟློས་གར། ཁྱད་པར་སྡེ་དགེའི་བྲོ་ཆེན་ཞེས་ཡུལ་སྲོལ་གྱི་ཁྱད་ཆོས་འབུར་དུ་དོད་པ། དེ་ལའང་མདུན་བྲོ་དང་། ཡུལ་བྲོ། ཡུལ་བྲོ་ལའང་ཆས་བྲོ་དང་། རྒྱུན་བྲོ་སོགས་འཁྲབ་ཚན་དང་གོས་རྒྱན་སོགས་ཁྱད་པར་དང་ལྡན་པ་ཡོད། སྡེ་དགེའི་ཕྱོགས་སུ་རིག་གནས་ཀྱི་དངོས་པོ་གལ་འགངས་ཆེ་བ་ཡང་མི་ཉུང་བ་ཡོད་དེ། ཆོས་རྒྱལ་བསྟན་པ་ཚེ་རིང་ནས་དབུ་འཙུགས་པའི་སྡེ་དགེ་པར་ཁང་ཆོས་མཛོད་བཀྲ་ཤིས་སྒོ་མང་རྟེན་དང་བརྟེན་པར། རྒྱ་གར་འཕགས་ཡུལ་ནས་བསྒྱུར་བའི་རྒྱལ་བའི་བཀའ་འགྱུར་རིན་པོ་ཆེ་པོད་བརྒྱ་ཕྲག་བརྒལ་བ། བསྟན་འགྱུར་པུསྟཀ་ཉིས་བརྒྱ་ལྷག །རྙིང་མ་རྒྱུད་འབུམ་པོད་ཆེན་ཉེར་ལྔ་ལངས་པ་ཡོད་ལ། བོད་རྩོམ། ཕྱི་རིག་གནས་ཀྱི་སྐོར་མང་པོ་དང་། ནང་དོན་རིག་པའི་སྐོར་ལ་ཐུབ་པའི་དབང་པོའི་བཀའི་དགོངས་འགྲེལ། དབུ་མ་ཕར་ཕྱིན་འདུལ་བ་མངོན་པ་བཅས་ཀྱི་གཞུང་འགྲེལ་སོགས་རྒྱུ་ཕར་ཕྱིན་ཐེག་པའི་སྐོར། བྱ་རྒྱུད་སྤྱོད་རྒྱུད་རྣལ་འབྱོར་རྒྱུད་རྣལ་འབྱོར་བླ་ན་མེད་པའི་རྒྱུད་དེ་རྒྱུད་སྡེ་བཞིས་བསྡུས་པའི་གསང་སྔགས་གསར་རྙིང་གི་རྒྱུད་ཀྱི་བཤད་པ། སྒྲུབ་ཐབས། དཀྱིལ་ཆོག །ཟབ་ཁྲིད་སྐོར་སོགས་ཡོད་པའི་རྒྱ་གར་འཕགས་པའི་ཡུལ་གྱི་མཁས་གྲུབ་དང་མཚུངས་པའི་ས་སྐྱ་གོང་མ་རྣམ་ལྔ་ལྟ་བུ་སྐྱེས་ཆེན་དམ་པ་མང་པོའི་བཀའ་འབུམ་དང་། གསུང་ཐོར་བུའི་རིགས། རྒྱུད་སྡེ་ཀུན་བཏུས་དང་། སྒྲུབ་ཐབས་ཀུན་བཏུས་སོགས་ཕྱོགས་སྒྲིག་མཛད་པ་བཅས་ཤིན་ཏུ་འབོར་ཆེན་ཡོད་པ་དང་། གཞན་ཡང་བླ་མ་ཡི་དམ། སངས་རྒྱས་བྱང་སེམས་སོགས་ཀྱི་སྐུ་པར། དཀྱིལ་འཁོར། ཙཀླི། སྲུང་འཁོར། མཆོད་རྫས་སོགས་ཀྱི་ཤིང་པར་སྟེ། ཁྱོན་བསྡོམས་པར་ཁང་ཆོས་མཛོད་ཆེན་མོ་འདིར་པར་ཤིང་ཁྲི་ཕྲག་ཉེར་བདུན་ལོངས་བར་ཡོད་པས། བོད་ཆེན་པོའི་ཡུལ་ལྗོངས་ན་པར་ཤིང་མང་ཤོས་ཀྱི་པར་ཁང་རིག་དངོས་ནོར་བུའི་མཛོད་ཆེན་པོ་འདི་ད་ལྟའི་བར་དུ་ལྷག་པ་ནི་བོད་མི་རིགས་སྤྱིའི་བསོད་ནམས་ཀྱི་བགོ་སྐལ་མི་དམན་པ་ཙམ་མོ། གཞན་ཡང་ཡུལ་ཕྱོགས་འདིའི་ཤེས་ལྡན་མི་སྣ་རྣམས་ཀྱིས་གསར་བཏོད་དང་བཟོ་བསྐྲུན་བྱས་པའི་བླུགས་སྐུ། ལྡེར་སྐུ། ཤིང་བརྐོས། ལྡེབས་བྲིས། ཚོན་རྩི། མཆོད་ཆ། གསེར་དངུལ་ལས་བྱས་པའི་ཕོ་མོའི་རྒྱན་ཆ་རིགས་མི་འདྲ་བ་སོགས་བཟོ་རྩལ་ཕུལ་དུ་བྱུང་ཞིང་། ལོ་རྒྱུས་ཀྱི་རིན་ཐང་དང་ལྡན་པ། ཡུལ་འདིའི་ཁྱད་ཆོས་མཚོན་པའི་དངོས་རྫས་ཤིང་ཏུ་མང་པོ་སྡེ་དགེའི་མངའ་ཁོངས་ཀྱི་དགོན་སྡེ་ཁག་དང་། མདུན་ཧོར། དཔོན་ཁག་རྣམས་ཀྱིས་ཉར་ཡོད་ཀྱང་ད་ལམ་མང་ཆེ་བ་ལོ་རྒྱུས་ཀྱི་གཏམ་རྒྱུད་ཙམ་དུ་གྱུར་ཏོ། །དགུ་པ་ཡུལ་སྲོལ་གོམས་གཤིས་སྐོར་ནི། སྔ་མའི་བག་ཆགས་དགེ་མིན་གྱིས་མི་ཐམས་ཅད་གཅིག་མཚུངས་ལྟར་མིན་ཀྱང་། སྤྱིར་མདོ་ཁམས་ཀྱི་མི་རྣམས་གནའ་རབས་ནས་གོམས་པས་ཆོས་ལ་དད་པ་དང་དགའ་ཞེན་ཚད་མེད་བྱེད་ཅིང་། ཆོས་ལུགས་དང་ཡུལ་སྲོལ་གོམས་གཤིས་གཉིས་ཆུ་དང་འོ་མ་བཞིན་དུ་འདྲེས་ནས་ཡོད། བླ་མ་དང་དགེ་འདུན། ཕ་མ་དང་རྒན་རབས་ཆེ་རྒྱུད་རྣམས་ལ་གུས་ཞབས་དང་བརྩི་བཀུར་བྱེད། མི་དང་འདྲིས་དཀའ་ལ། བཤེས་ན་གཡོ་སྒྱུ་ཆུང་ཞིང་ཕུགས་བློ་བརྟན། མནའ་ལ་འཛེམ་པས་གྲོགས་པོ་བློ་ཐུབ་ཡོད། དཔའ་སྙིང་ཆེ་ཞིང་སྐྱེས་པ་རྣམས་གྲི་བོག་ལ་རྩེ་དགའ་ཆེ། འགྲས་ན་ཞེ་འཁོན་ཆེ་བས་ཕ་བསད་པའི་ཤ་ལན་བུས་མ་ལོན་ན་མི་གྲལ་དུ་མི་ཚུད་པ་བྱེད། ཡུལ་འགའ་ཤས་སུ་དགྲ་ཞབས་ཤི་ན་དགའ་ཚོར་དང་། ནད་ཀྱིས་ཤི་ན་སྡུག་སྣང་བྱེད། ཕྱིས་སུ་དམ་པའི་ཆོས་དར་ཁྱབ་ཆེ་བས་དམ་པ་གོང་མ་རྣམས་ཀྱིས་ལས་རྒྱུ་འབྲས་དང་། བྱམས། སྙིང་རྗེ། བྱང་ཆུབ་ཀྱི་སེམས་བསྐྱེད་སྐོར་དྲིལ་བསྒྲགས་ཤུགས་ཆེར་བྱས་པའི་བཀའ་དྲིན་ལ་བརྟེན། སྡེ་དགེའི་ཡུལ་དབུས་རྣམས་སུ་ཤ་ལན་སོགས་ཀྱི་རྩོད་རྙོག་མེད་པ་མི་གཤིས་སྔར་ལས་འཇམ་དུ་སོང་འདུག །བུད་མེད་དང་ལོ་ཆུང་རྣམས་གླུ་བྲོ་ལ་དགའ་ཞེན་ཆེ། ལོ་ཆུང་རྣམས་གཉེན་འདུན་ཕལ་ཆེར་གླུ་ལེན་གླུ་སྐོར་གྱིས་སྒྲིག་སྲོལ་མཆིས། ཡུལ་མི་མང་ཆེ་བ་གྲོང་གསེབ་དང་འབྲོག་ཁུལ་དུ་སོང་བས་གསར་བྱུང་གི་རིགས་ལ་དགག་པ་བྱེད་འདུག་པ་བཅས། སྤྱིར་བཏང་མི་གཤིས་སྐོར་རགས་ཙམ་མོ། བཅུ་པ་བྱེ་བྲག་རྒྱལ་བློན་སོགས་ཆེ་རྒྱུད་རྣམས་ཀྱི་ཆས་གོས་དང་འཚོ་བའི་སྐོར་ཅུང་ཟད་གླེང་ན། སྡེ་དགེ་ཆོས་རྒྱལ་ཆེན་པོ་བླ་ཆེན་བྱམས་པ་ཕུན་ཚོགས་ནས་དགེ་སློང་རྡོ་རྗེ་འཛིན་པའི་ཚུལ་དུ་ཕེབས་པ་རྣམས་ནི་ཆོས་གོས་རྣམ་གསུམ་སོགས་དགེ་སློང་གི་ཆས་སྤྱི་ལྟར་ལ། བོད་དུ་བླ་ཆེན་གྱི་ཆས་གོས་དམིགས་བསལ་དབུ་ཞྭ་ཐང་ཞུ་དང་། རྐྱ་བེར། ཁྲི་བེར། ཆིབས་ལ་རིན་ཆེན་རྒྱན་སྤྲས་སོགས་སྤྱི་ལྟར། ཁྲིར་བཞུགས་སྐབས་ས་ཞུ་མནབས་སྲོལ་དང་། ཆོས་རྒྱལ་ཆེན་པོ་རྟེན་སྐྱ་བོར་གྱུར་པ་རྣམས་ནི། དབུ་ཞྭ་པདྨགའི་ཏོག་ཅན། གཟབ་སྤྲོས་སྐབས་མཛོད་གོས་སེར་སྐྱའམ་གོས་ཆེན་རྒྱན་གཞི་སེར་སྐྱ། གཟབ་སྤྲོས་འབྲིང་དུ་མཛོད་གོས་སེར་སྨུག་གམ་གོས་ཆེན་གསེར་མ་སེར་སྐྱ། དུས་རྒྱུན་འཇམ་རིས་ཅན་སེར་སྐྱའི་ན་བཟའ་ལོང་བུ་ཁེབས་ཙམ་ཤུར་བུ་བཅིངས། འཁྱིལ་ལྷམ་འཇའ་རིས་ཅན་སེར་པོ། མགུལ་རྒྱན་གཟི་ཞག་དང་། མགུལ་གབ་ནང་འགེལ་ཙམ་ལས་གཞན་རྒྱན་སྤྲས་མེད། ཆིབས་པ་ལ་རིན་ཆེན་རྒྱན་སྤྲས་སོགས་སྤྱི་ལྟར། ཕྱིས་སུ་ཐ་ཇའི་ཞྭ་མོ་ལྕགས་འདབ་མ་བྱེ་རུའི་ཏོག་ཅན་སྤྱི་ལྟར་མནབས། ནང་བློན་གཉེར་ཕྱག་རྣམས་ཞྭ་གྱ་ལ་ཞེས་སྟོང་སྐུད་དམར་པོའི་ཛར་ལོ་ཞྭ་འདབས་མཚམས་བར་སླེབས་པ་གྱོན། གཟབ་སྤྲོས་སྐབས་སྲམ་སྐོར་ལ་རྒྱན་གཞི་དམར་པོའི་ཁ་གདན་ཅན། གཟབ་སྤྲོས་འབྲིང་ལ་ཁ་གདན་གསེར་མ། གཟབ་སྤྲོས་བསྡུས་སྐབས་ཁ་གདན་འཇམ་རིས་ཅན། ཤུར་ཚང་སྐེད་ཆིངས་ཁ་དོག་སྣ་ཚོགས་པས་པུས་མོ་ཁེབས་ཙམ་བཅིངས། ནང་འཇམ་དགུན་འབུ་རས་དང་དབྱར་དར་ཁྲུའུ་དམར་པོ་ལས་བྱས་པའི་རྒྱ་གསེར་གྱི་སྒྲིལ་ལེབ་ཤན་ཅན། སྐྱེས་པ་རྣམས་ཕུ་དུང་གཡས་པ་ཕུད་ཅིང་གུས་ཞབས་དགོས་ཚེ་ཕུ་དུང་ཕྲག་ཐོག་ནས་མདུན་དུ་ལེན་སྲོལ་དང་། རྐང་དོར་འབུ་རས་དཀར་པོ་ལ་གདོང་དར་དམར་པོ་ཅན་གྱི་དོར་ཁྲ་ཆེན་པོ་ལྷམ་སྣ་བར་ལྷུག་རྒྱུ་ཡོད་པ། མགུལ་དུ་གཟི་ཞག་སྐེད་ཁ་ཡན་འཁོར་བ། གསེར་གྱི་རྣ་ལོང་གཡུ་ཕྲ་བྱེར་རྩབ་ཚེ་བུམ་མ་ཡ་རེ། གསེར་དངུལ་བཀྲ་མའི་གློ་ཟུང་ལ། གཡས་སུ་ཕོར་ཤུབ་དང་གཡོན་དུ་པོ་ལྡི་དཔྱངས། སྐེད་དུ་གྲི་རིང་དཀར་ཤང་ཐོག་བྱང་ཅན། གསེར་དངུལ་གྱི་མཆན་གབ་མཛོད་དར་གྱིས་མཆན་ཁུང་གཡོན་དུ་འགེལ། འགག་ལྷམ་སྣ་མ་རྡོག་བརྩེགས་ཅན་བཅས་གྱོན་སྲོལ་དང་། མདུན་སྐོར་དང་དཔོན་ཁག་རྣམས་ཞྭ་གྱ་ལ་སོགས་གོང་མཚུངས་ལ། གཟབ་སྤྲོས་རྒྱས་སྐབས་སྲམ་གདན་གོས་ཆེན་གསེར་མ། འབྲིང་སྐབས་འཇམ་རིས་ཅན། བསྡུས་སྐབས་སྲམ་ཁ་ཡི་ཙམ་ལས་གཞན་ཁྱད་པར་མེད། ཧོར་འདྲ་དང་གཉེར་ཕྱག་མདུན་སྐོར་དཔོན་ཁག་བཅས་ཀྱི་སྒེར་གཡོག་རྣམས། འབུ་རས་ཁ་ཕྲ་ཡི་མགོ་དཀྲིས། གཟབ་སྤྲོས་རྒྱས་སྐབས་སྲམ་ཁ་གདན་འཇམ་རིས་ཅན། འབྲིང་སྐབས་སྲམ་ཁ་ཡི། བསྡུས་སྐབས་དབྱར་ཕྲུག་གོས་དང་དགུན་གོས་ཆེན་འཇམ་མའི་ཚ་རུ་གྱོན། གཞན་སྐེད་གྲི་དང་། མཆན་གབ། གློ་ཟུང་། དོར་ཁྲ་ལྷམ་སོགས་འདྲ། དམག་དཔོན་དང་དཔའ་ཟན་རྣམས་སྟག་ཤན་དང་གཟིག་ཤན་གྱོན་སྲོལ་ཡོད། རྒྱལ་པོ་དང་གཉེར་ཕྱག་མདུན་སྐོར་དཔོན་ཁག་བཅས་ནས་སྐྲ་ཉི་ལེ་བ་ཐད་ཀར་སྐྲ་སྒོ་ཕྱེས་པ། ནང་རེ་བཞིན་སྐྲ་ཤད་རྒྱག་དགོས། ཧོར་འདྲ་མན་ཆད་དཔྲལ་བ་ཐད་སྒོ་ཕྱེས་པ་ལྟག་པའི་མཚམས་ནས་སུམ་ལྷས། སྟོང་སྐུད་ནག་པོའི་སྐྲ་ཚར་ཆུང་ངུ་རེ་ཡོད། ཆེ་ཁག་རིགས་ཀྱི་བུད་མེད་རྣམས་གཟབ་སྤྲོས་སྐབས་སྐྲ་ལྷས་ཞིབ་ལ། སྐྲ་མཐུད་སྟོང་སྐུད་ནག་པོ། སྐུད་ཁའི་ཐད་ཙམ་ནས་ཅོ་རྔ་ཞེས་སྣེ་གཉིས་སུ་བགོས་ཏེ་སྟོང་སྐུད་ཁ་དོག་སྣ་ཚོགས་དང་ལྷས་པ། མགོ་རྒྱན་དཔྲལ་བར་སྤོས་ཤེལ་བྱེར་ཏོག་ཅན་ཅི་ཆེ། སྤྱི་གཙུག་ཏུ་གཙུག་གཡུ་ཞེས་གཡུ་བྱེར་སུམ་རྩབ་ཅན། ལྟག་པར་གསེར་མེ་གཡུ་ཕྲ་ཅན། རྒྱབ་ཏུ་སྐྲ་མཐུད་ཐད་སྐྲ་སྲུང་ཞེས་གཟི་བྱེར་རྩབ་མ་སྐེ་འཁོར་ཙམ་གཉིས་གསུམ་གང་འཛོམ། སྐྲ་མཐུད་དང་ཅོ་རྔའི་མཚམས་ནས་སྐྲ་འཐེན་ཞེས་བྱེར་ཞིབ་དང་གཡུ་ཆུང་སོགས་གཡས་གཡོན་ཕྱོགས་རེར་ཞག་པ་བཞི་ལྟེབ་ཅན། དེ་རྒྱབ་ཀྱི་སྐེ་རགས་འོག་ཡར་བཏགས་བྱེད་གསེར་དངུལ་བཀྲ་མའི་ཡར་འཐེན་ལ་གཡུ་བྱེར་གཟི་སོགས་ཀྱི་ཞགས་པའི་སྣེར་དོ་ལྷས་ཀྱི་ཛར་ལོ་འཕྱངས་བ། ཅོ་རྔ་གཡས་གཡོན་ལ་གཟི་བྱེར་སུམ་རྩབ་རེ་དང་གཡུ་གང་ཤོང་བརྒྱུས་མཛེར་བྱས་པ། གཟི་མགུལ་དཀྱིལ་དུ་གསེར་གབ་དྲུག་ཕྲ་ཅན། གྱོན་གོས་སྲམ་ཁ་གདན། ནང་འཇམ་རྒྱ་གསེར་ལེབ་ཤན་ཅན། དེའང་ཕྱི་གོས་ཕུ་དུང་གཉིས་ཀ་འདུང་པ་ལས་ཕུད་སྲོལ་མེད། ལྷམ་རྡོག་རྐྱང་ཤས་ཆེར་གྱོན། གསེར་དངུལ་བཀྲ་མའི་གློ་ཟུང་ལ་གཡས་སུ་མཚུར་ཁུག་དང་། གཡོན་དུ་གྲི་ཆུང་དཔྱངས་པ། མདུན་དུ་གསེར་དངུལ་བཀྲ་མའི་སྦ་ཁུག་གམ། དངུལ་ཐག་གི་སྤང་རྒྱན་དང་ཁྲོབ་ཁྲོབ་དྲ་བ་དྲ་ཕྱེད། རྒྱབ་དར་འབུ་རས་སམ་དར་དམར་ཆེན་གྱིས་རྒྱབ་སྟོད་ནས་དཀྲིས་ཏེ་མདུན་དུ་ཁུག་མདུད་བྱས་པའི་སྣེ་གཉིས་མདུན་ནས་དཔྱངས་སྲོལ་མཆིས། དེས་འགྲེས་ཏེ་རིམ་པ་འོག་མ་རྣམས་ལའང་ཕྱོགས་མཚུངས་ཡིན། དེ་ལྟར་ཕོ་མོའི་གོས་རྒྱན་འདི་དག་སྡེ་དགེ་གཞུང་གི་མཛད་སྒོ་ཁག་དང་མདུན་བྲོ་སོགས་ཀྱི་སྐབས་སུ་དེ་ལྟར་ཡིན་པ་ལས། གཞན་ཡུལ་ཕྱོགས་སོ་སོའི་ཆས་གོས་རྒྱན་ཆ་སོགས་ཅུང་མི་མཚུངས་པ་ཡོད། སྡེ་དགེ་རྒྱལ་བློན་སོགས་སྒར་ཆེན་བཏེག་སྟེ་བྱེས་སུ་འགྲོ་སྐབས་ཆས་གོས་གོང་མཚུངས། སྔོན་དུ་རྐྱ་དར་ཞེས་དར་མདུང་བ་དན་དབྱིབས་ཅན་གཞི་དཀར་པོ་ལ་གསེར་འདུལ་གྱི་འཁོར་ལོ་རྩིབས་བརྒྱད་ཀྱིས་མཚན་པ་ལ་མུ་ཁྱུད་དང་དར་ལྕེ་གསུམ་དམར་པོ། རྔ་ཐུག་དམར་པོ་ཅན་གཅིག །དེ་མཚུངས་འཁོར་ལོའི་རི་མོ་མེད་པ་བཅུ་གཉིས་བཅས་རྐྱ་དར་བཅུ་གསུམ་སྔོན་དུ་འགྲོ་བའི་རིམ་པར། ཧོར་འདྲ། མདུན་སྐོར། དཔོན་ཁག་གཉེར་ཕྱག་སོགས། ཆོས་རྒྱལ་ཆེན་པོ་ནང་འཁོར་བཅས། དབུ་བླ་ཁག་སོགས། རྗེས་མོ་སྨན་རྣམས་དང་བཅས་རྐྱ་འགྲིག་གཅིག་རྗེས་གཅིག་གིས་ཟིན་ཙམ་ལས་རྟ་རྒྱུག་སོགས་ཡེ་ནས་མི་ཆོག་སྐད། གཉེར་ཕྱག་རྣམས་དང་ཕྱོགས་ཀྱི་དཔོན་འགོ་བཞི་ལ་རྐྱ་འགྲིག་ཏུ་སྒེར་གཡོག་བདུན་རེ། གཉེར་ཤུལ་ཡོད་པའི་མདུན་སྐོར་རྣམས་སྒེར་གཡོག་ལྔ་རེ། མདུན་སྐོར་དང་དཔོན་ཁག་དཀྱུས་མ་རྣམས་སྒེར་གཡོག་གསུམ་རེ། ཧོར་འདྲ་དུད་ཁག་རེ་ཟུང་དཔོན་སྐྱ་གཡོག་ཁྲིད་ཀྱི་ཐོབ་ཁུངས་ཅན་རྣམས་སྒེར་གཡོག་རེ་བཅས་ཁྲིད་ཆོག །ཧོར་འདྲ་དཀྱུས་མ་རྣམས་ཀྱིས་གཡོག་པོ་ཁྲིད་མི་ཆོག །གཞན་དཔོན་ཁག་སོགས་སུ་གང་གིས་ཀྱང་རྐྱ་འགྲིག་ཏུ་གཡོག་པོ་དང་། དྲེལ་བོན་སོགས་ཁྲིད་མི་ཆོག་པར་སྔོན་དུ་དྲེལ་བ་བཏང་དགོས་འདུག །མི་སེར་རྣམས་ཡུལ་བྲོ་འཁྲབ་པ་དང་གཏོ་བོག་འཕེན་པ། བླ་ཆེན་སོགས་ཆིབས་བསུ་སྐྱེལ་སོགས་སུ་གཟབ་སྤྲོས་དགོས་སྐབས། མགོ་དཀྲིས། དོར་ཁྲ། སྲམ་ཁ་ཡི་ཙམ་ལས་ཞྭ་གྱ་ལ་དང་། སྲམ་ཁ་གདན་སོགས་གྱོན་མི་ཆོག །མི་སེར་གྱི་བུད་མེད་རྣམས་སྤང་རྒྱན་དང་ཁྲོབ་ཁྲོབ་ཚབ་དངུལ་ཐག་གཉིས་སྦྲེལ་ཙམ་ལས་གཞན་ཕྱོགས་མཚུངས་ཡིན། དུས་རྒྱུན་སྐུ་དྲག་རྣམས་ཀྱིས་ཞྭ་གྱ་ལ་དང་དོར་ཁྲ་སོགས་མི་གྱོན་ལ། མི་སེར་རྣམས་དབྱར་རྙ་བ་དང་དགུན་ལྤགས་ཙག་སོགས་འཚོ་བ་བཟང་ཞན་ལྟར་གྱོན་ཅིང་། འགའ་ཤས་འཁྱགས་གྲིར་ཤི་ལ་ཉེ་བའང་ཡོད། ཟས་ཀྱི་རྣམ་གྲངས་ནི། སྤྱིར་ཡུལ་འདིར་ཤ། མར། རྩམ་པ། གྲོ་ཞིབ། ཞོ། འོ་མ། ཆང་སོགས་རྩ་བའི་ཟ་མ་ཡིན་ལ། དཔོན་ཆེན་དང་། ཕྱུག་ཁག་རྣམས་གྲོ་དང་གྲོ་མ་སོགས་རྟེན་འབྲེལ་བཟང་བའི་ཟས་སྣས་ཐོག་དྲངས། གཞན་ཡང་ཁུར་བ་དང་ཕྱུར་བ་ཐུད་སོགས་སྐམ་ཟས་ཀྱི་རིགས་གཡོས་སུ་སྦྱར་བའི་ཟས་སྣ་མང་པོའི་སྡེར་ཁ་བསྒྲིགས་སྲོལ་ཡོད། དམངས་ཕལ་པ་རྣམས་ཡུངས་མ་དང་ལ་ཕུག་སོགས་ཀྱིས་འཚོ་བ་སྐྱེལ་དགོས་པའང་ཡོད། བཅུ་གཅིག་པ་བག་མ་བཏང་ལེན་གྱི་ཚུལ་ནི། རྒྱལ་པོའི་རིགས་དང་། མདུན་སྐོར་དཔོན་ཁག་གི་རིགས། ཧོར་འདྲའི་རིགས། མི་སེར་གྱི་རིགས། ཤན་པའི་རིགས། ཕྱི་མཁན་གྱི་རིགས་སོགས་རིམ་པ་གོང་མས་འོག་མ་དང་གཉེན་སྒྲིག་བྱེད་སྲོལ་མེད། གལ་ཏེ་བྱས་ན་གོང་མས་འོག་མ་དང་འབྲེལ་ན་སྨད་པའི་གནས་བྱེད་ཅིང་། འོག་མས་གོང་མའི་རིགས་ཐོབ་ན་དགའ་ཚོར་བྱེད། མང་ཆེ་བ་ཕ་མ་དང་ཉེ་འབྲེལ་ཁག་གིས་རིགས་རུས་འོས་མིན་ལ་དཔྱད་དེ་མོ་རྩིས་དང་བསྟུན་ནས་མནའ་མ་དང་མག་པ་བསུ་བཏང་བྱེད་སྲོལ་འདུག །དངོས་སུ་བག་མ་ལེན་པའི་མཛད་སྒོ་སྤྱིར་བཏང་ཙམ་ལ། བླ་མཆོད་བཀུག་ནས་བག་མ་ལ་དགེ་བའི་ལས་ཕྲན་བདུན་གྱི་ཆོ་ག་དང་འབྲེལ། སྣ་འདྲེ་བསྐྲད་པ། མནོལ་གྲིབ་བཀྲུ་བ། བག་གདན་བཏིང་བ། དཀར་གསུམ་གྱིས་ངོ་གསོ་བ། མིང་འདོགས་པ། ལྷ་ལ་འདོགས་པ། གཡང་འགུགས་པ། མཐར་རྟེན་ཤིས་པར་བརྗོད་པ་དང་འབྲེལ་སྟོན་མོ་དང་། བྲོ་གཞས་སོགས་ཀྱི་རྟེན་འབྲེལ་མཛད་སྒོ་འོས་བསྟུན་བྱེད་སྲོལ་དང་། མི་ཆེན་ཁག་གིས་རྒྱས་སྤྲོས་སྐབས། མདའ་བཤད། འབེབས་བཤད། སྒོ་བཤད། གཡུ་བཤད་སོགས་སྙན་བརྗིད་དང་ལྡན་པའི་བཤད་པ་སོགས་མཛད་སྒོ་རྒྱས་པ་ཡོད་ཀྱང་རེ་རེ་བཞིན་བྲི་བར་མ་ལོང་། བཅུ་གཉིས་པ་དུར་འདེབས་སྲོལ་ལ་འབྱུང་རྩིས་དང་། འཆི་ནད་ལ་བརྟགས་ཏེ་མེ་དུར་ཞེས་སྦྱིན་སྲེག་གི་ཆོ་ག་དང་འབྲེལ། ཆུ་དུར་དང་། ལྕགས་དུར་ཞེས་བྱ་རྒོད་ལ་སྦྱིན་པ་ཕལ་ཆེར་དུར་གཅོད་དང་འབྲེལ། ས་དུར་ཞེས་སར་སྦ་དང་། ཤིང་དུར་ཞེས་ཤིང་ལ་དཔྱང་སྲོལ་བཅས་ཐམས་ཅད་བླ་མཆོད་ཀྱི་ཆོ་ག་དང་མ་འབྲེལ་ཐབས་མེད་བྱེད། བླ་སྤྲུལ་དང་། ཆོས་རྒྱལ་ཆེན་པོ་སོགས་བསྟན་འཛིན་དམ་པ་རྣམས་ཀྱི་སྐུ་པུར་དམར་གདུང་ངམ། ཞུགས་སུ་ཕུལ་བའི་གདུང་ཐལ་མཆོད་རྟེན་དུ་འཇོག་སྟེ་དུས་དང་རྒྱུན་དུ་མཆོད་པ་བྱེད། མི་ཤི་ནས་ཞག་ཞེ་དགུའི་བར་རང་རང་གི་ཡུལ་ལུང་ལ་ཆོས་བརྒྱུད་གང་ཡིན་གྱི་གཤིན་ཆོག་ནར་མའམ། མ་མཐའ་བདུན་ཚིགས་ནམ་ཁེལ་བླ་མཆོད་མེད་ན་ཐབས་མེད་ཀྱི་སྲོལ་འཇགས་འདུག །འདི་དག་ཞིབ་པར་བརྗོད་ཀྱིས་མི་ལོང་། བཅུ་གསུམ་པ་ཡུལ་འདིའི་རྩེད་འཁྲབ་སོགས་ཀྱི་སྲོལ་ནི། སྡེ་དགེ་ལྷུན་གྲུབ་སྟེང་དུ་རྒྱལ་པོ་ནོར་བཟང་གི་རྣམ་ཐར་སོགས་དང་། རྫོགས་ཆེན་དགོན་དུ་གླིང་གི་ཕུ་ནུའི་ཟློས་གར། སྡེ་དགེའི་བྲོ་ཆེན་ནམ་མདུན་བྲོ་དང་ཡུལ་བྲོ། དེའང་མདུན་བྲོའི་གོས་རྒྱན་གོང་དུ་སྨོས་པ་བཞིན་དང་། ཡུལ་བྲོ་ལའང་ཆས་བྲོ་དང་རྒྱུན་བྲོ་སོགས་གོས་རྒྱན་དང་བྲོ་ཚིག་གི་ཁྱད་པར་ཡོད་ཅིང་། དེ་རེ་རེ་ལའང་ཐོག་མར་འཛོམ་བྲོ། བྲོ་མཆོད། གཞུང་བྲོ། བཀྲ་གདན། བཀྲ་ཤིས་སོགས་གོ་རིམ་ངེས་པ་ཅན་ཡོད། དེང་སྐབས་སྡེ་དགེའི་བྲོ་ཆེན་ཞེས་སྐྱེས་པ་རྣམས་ཀྱིས་སྲམ་གཟིག་སྟག་ལྤགས་སོགས་བརྩེགས་མ། མཆན་གབ་གསུམ་བཞི་འགེལ་བ་དང་། བུད་མེད་རྣམས་སྐྲ་མགོ་བོར་དཀྲི་ཞིང་། ཕུ་དུང་ཕུད་ནས་འཁྲབ་འདུག་པ་འདི་དག་དེང་སྐབས་ཀྱི་སྡེ་དགེའི་བྲོ་ཆེན་ཡིན་པ་ལས་གནའ་རབས་ཀྱི་སྡེ་དགེའི་བྲོ་ཆེན་མིན། གཞན་ཡང་གཞས་བྲོ། གླུ་བྲོ། ལ་གཞས། མགུར་མ། མགུར་མོ། གླུ་ཤགས་བཀྱེ་བ། རྟ་རྩེད། བོག་རྩེད། མདའ་རྩེད། ཤོ་བག །མིག་མང་། རྩལ་འདྲེན། རྐང་རྒྱུག །ཐག་རྩེད་སོགས་རྩེད་མོའི་རིགས་ཤིན་ཏུ་མང་པོ་དུས་རྒྱུན་ལུང་ཚན་སོ་སོར་རྩེ་ར་འཛུགས་སྲོལ་མཆིས། བཅུ་བཞི་པ་ཡུལ་འདིའི་སྡོད་ཁང་གནའ་རབས་ཇོ་ཁང་ཡིན་ཚུལ་ཡུལ་བཀོད་རྙིང་པ་སོགས་ལ་ཡོད་ཀྱང་། སོག་པོའི་དགྲ་ཐེངས་གསུམ་དུ་བྱུང་ནས་གནས་ཁང་ཚང་མ་མེར་བསྲེགས། ཤེས་ལྡན་གྱི་སྐྱེས་བུ་ཐམས་ཅད་མཚོན་གྱིས་བསད་པས། ཕྱིས་སུ་ས་ཁང་ལེབ་མོ་འདི་བྱུང་བའི་ལོ་རྒྱུས་ཡོད་ཅེས་དཔལ་སྤུངས་ལྷ་བྲིས་མཁས་དབང་ཐང་བླ་ཚེ་དབང་ནས་གསུང་སྒྲོས་འདུག །ཕྱོགས་འདིའི་ས་ཆ་ཕལ་ཆེར་ཇོ་མོ་དང་སོ་ཕག་རྙིང་པ་ཕོན་ཆེར་དོན་འདུག་པར་དཔྱད་འོས་པ་འདུག། གསུམ་པ་ལ་དོན་གཉིས་ལས་དང་པོ་ཆོས་རྒྱལ་ཆེན་པོ་འདིའི་མངའ་ཁོངས་སུ་ཆོས་བརྒྱུད་ཆེན་པོ་བཞི་བོན་དང་བཅས་པའི་དགོན་སྡེ་ཆེ་ཕྲ་བརྒྱ་དང་བདུན་ཅུའི་སྐོར་ཡོད་དེ། དེའང་ས་སྐྱའི་དགོན་པ་གདན་སའི་གཙོ་བོ་དགོན་ཆེན་ལྷུན་གྲུབ་སྟེང་གི་ཆོས་གྲྭ་དང་། རྫོང་གསར་དགོན་མཁྱེན་བརྩེའི་དབང་པོས། རྫོང་སར་དགོན་འདི། བདག་པོའི་མངའ་འོག་ས་དགོན་སུམ་ཅུ་སོ་དགུའི་ནང་ནས་ཨངྒི་གཉིས་པ། དགེ་འདུན་ཞལ་གྲངས་ཉིས་བརྒྱ་ཡོད་རྒྱུའི་བཀའ་དེབ་ཅན་ཡིན་གསུངས་ཡོད། ལྷ་རྒྱལ་དགོན། ཝ་ར་དགོན། ཁྲོམ་རྡོ་ཁོ་དགོན། དྲྭ་མ་དགོན། མཎྜལ་དགོན། སྒ་ལེན་དགོན། འཁོར་མདོ་དགོན། ལྕགས་ར་དགོན། དབོན་སྟོད་དགོན། ཡེ་ན་དགོན། དཔེ་ཝར་དགོན། མཁར་མདོ་དགོན། སེང་འགྱིང་དགོན། འབར་ཆུང་དགོན། གསེར་ལྗང་དགོན། འཛིང་ཁྲ་བོ་རི་ཁྲོད། དགོན་གསར་དགོན། ས་དཀར་དགོན། སྟག་ཚང་དགོན། སྤོ་ལུ་དགོན། འུག་འགོ་དགོན། དམར་ཡོན་དགོན། དུང་མདོ་དགོན། དམ་ཆོས་དགོན། ཝཾ་དགོན། རབ་བརྟན་དགོན། བཀྲ་ཤིས་དགོན། མདོ་སྲིབ་དགོན། ཤང་ཐོ་དགོན། ཛཾ་ཐོག་དགོན། འགིས་ཐོག་དགོན། སྦྲ་མཐོ་དགོན། ཁྲི་ཚོ་དགོན། དཔལ་རྫོང་དགོན། བཀྲ་ཚེ་དགོན། རྣམ་རྒྱལ་དགོན། གླང་ནག་དགོན། ཁྱེའུ་དགོན། རྭ་ཅོ་དགོན། འབམ་ལེ་དགོན། ཤུགས་ར་དགོན། ཁྲི་འདུ་སྐལ་བཟང་དགོན་སོགས་ཡིན། རྙིང་མའི་དགོན་པ་ནི། ཀཿཐོག་དགོན། དཔལ་ཡུལ་དགོན། རྫོགས་ཆེན་དགོན། ཞེ་ཆེན་དགོན། རྡོ་བྲག་དགོན། ལྷ་འབྲོང་དགོན། ཨེཝྂ་དགོན། གཡག་ཟེ་དགོན། འཚོ་བ་རི་ཁྲོད་དགོན། རྒྱ་རོང་དགོན། ཨོ་གུར་དགོན། རྩ་ཤུལ་དགོན། ར་སྐོར་དགོན། རྨོག་རྩ་དགོན། རྨུགས་སངས་དགོན། བསམ་གྲུབ་དགོན། སི་མདའ་དགོན། གནམ་བྲག་དགོན། མཉམ་སྐྱིད་དགོན། ཁྲམ་དགེ་དགོན། རྒྱ་ཤོད་དགོན། ཛཿཀ་དགོན། སོག་མོ་དགོན། འོ་ཐང་དགོན། ཁམས་དབང་དགོན། ཉིན་དགོན། བྲག་དམར་དགོན། ཁང་དམར་དགོན། སྟག་མོ་དགོན། ཨ་འཛོམས་དགོན། མདའ་ཁོ་དགོན། ཡིད་ལེགས་དགོན། ཀི་འགུ་དགོན། རག་ཆབ་དགོན། ཡང་ལེ་དགོན། དགོན་ཕུག་དགོན། དྲུང་ཡིག་དགོན། བར་ཁྱིམ་དགོན། ཇོ་མོ་དགོན། བདེ་ཆེན་དགོན། ཟླ་ཡི་དགོན། སྨྱོ་ཤུལ་དགོན། བྲག་དཀར་དགོན། དུང་དཀར་དགོན། བ་རོད་དགོན། འབུམ་རྙིང་དགོན། གུ་ལུང་དགོན། ཕྱ་ཚ་དགོན། འགོ་ཚ་དགོན། དྲོད་ཆེན་དགོན། དགེ་མང་དགོན། མང་དགེ་དགོན། རྫ་རྒྱལ་དགོན། དཔོན་རུ་དགོན། ཁྲ་སྐྱབས་དགོན། ཨ་སེན་དགོན། ཕུག་ཁུང་དགོན། དྲེལ་དཀར་དགོན། ཐལ་ཤུལ་དགོན། འཇུ་ཉུང་དགོན། ལྕང་མ་དགོན། དགེ་གུང་དགོན། བ་ཐུལ་དགོན། འཇུ་མང་དགོན། ཁྲོ་ཤུལ་འགབ་མ། འབར་ཆུང་དགོན། འགུ་རེ་དགོན། བྲོ་རྡུང་དགོན་སོགས་ཡིན། བཀའ་བརྒྱུད་པའི་དགོན་པ་ནི། དཔལ་སྤུངས་དགོན། དཔལ་འབྱོར་དགོན། གཏེར་སྟོན་དགོན། ཚེ་སྒྲུབ་དགོན། འཛི་སྒར་དགོན། སྡིས་པུ་དགོན། རྒྱུ་ནེ་དགོན། དྲུང་རམ་དགོན། སྐྱབས་ཀྱེ་དགོན། དགོན་ཕུ་དགོན། ཆོས་ཉིད་དགོན། གུར་ཕུ་དགོན། རི་མགོ་དགོན། འཇོ་ཕུ་དགོན། བན་ཆེན་དགོན། སྟག་ལུང་དགོན། གནས་མདོ་དགོན། དགོན་གསར་དགོན། འབྲུ་ཚེ་འགྲང་དགོན། ཁྲོ་རུ་དགོན། རྫོང་ཤོད་དགོན། རྩེ་རེ་དགོན། དམར་དྲིས་དགོན། དྲན་ཐང་དགོན། རྣམ་རྒྱལ་གླིང་དགོན། ཆོས་དཔལ་དགོན། གླིང་གྱིང་དགོན། བདེ་ཆེན་དགོན་སོགས་ཡིན། དགེ་ལུགས་པའི་དགོན་པ་ནི། དགོན་གསར་དགོན། དུར་ས་དགོན། ཆོས་འཁོར་དགོན། སྤང་གདོང་ཇོ་དགོན། ཇོ་བོ་དགོན། སེར་ཤུལ་དགོན། ཀ་བཞི་དགོན། བོ་དྲོད་དགོན། འཇུ་མང་དགོན། འབུམ་གསར་དགོན། དབོན་པོ་དགོན། རྡོ་དགོན་དགོན། སྒྲོལ་མ་ལྷ་ཁང་། འབབ་དར་དགོན། དཀར་འོད་དགོན། བྱང་ཆུབ་དགོན་སོགས་ཡིན། གཡུང་དྲུང་བོན་གྱི་དགོན་པ་ནི། སྟེང་ཆེན་དགོན། དགོན་ཆུང་དགོན། གྱེར་རྫ་རི་ཁྲོད། རི་སྤུན་དགོན། ཐར་སྡེ་དགོན། རང་རྒྱབ་དགོན། རྡིས་བོན་དགོན། སྟག་ཞིག་དགོན། ཞེ་ཞལ་དགོན། བླ་ཁྲི་དགོན། སྤང་རྒན་དགོན། མང་རམས་དགོན། ལྕང་ལུང་དགོན། བརྡ་དབོན་དགོན། ཁ་རག་དགོན་སོགས་ཡིན། དེ་ལྟར་དགོན་སྡེ་ཆེ་ཕྲ་མང་དུ་ཡོད་པ་ལས་ཆོས་རྒྱལ་ཆེན་པོ་ཉིད་ཀྱི་རྩ་བའི་གདན་ས་ནི་ཆོས་གྲྭ་ཆེན་པོ་དགོན་ཆེན་ལྷུན་གྲུབ་སྟེང་འདི་ཉིད་ལ་མཛད་ཅིང་། དབུ་བླའི་གཙོ་བོ་ས་ངོར་ནས་བར་མ་ཆད་པར་ཆེད་དུ་གདན་དྲངས་ཏེ། ཆོས་གྲྭ་འདི་ཉིད་དུ་མདོ་སྔགས་ཀྱི་བཤད་སྲོལ་སྒོམ་སྒྲུབ་ཀྱི་ཉམས་ལེན། ཆོ་གའི་ཕྱག་ལེན་ཚུན་དཔལ་ས་ངོར་ཚར་གསུམ་གྱི་རིང་ལུགས་དྲི་མ་མེད་པའི་རྒྱུན་བཙུགས། དགོན་པའི་ཚོགས་ཆེན་རྣམས་དང་གཏོར་འཆམ་རྣམས་སོགས་ཀྱི་སྐབས་སུ་ཆོས་རྒྱལ་ཆེན་པོ་འདི་ཉིད་ཚོགས་པའི་དབུར་བཞུགས་སུ་ཕེབས་ནས་ཆོ་གའི་ཆིངས་དང་ཕྱག་ལེན། དབྱངས་གདངས་རོལ་མོ། ཕྱག་རྒྱ་འཆིང་ཚུལ་གར་ཐིག་སོགས་གྲྭ་ས་ཆེན་པོའི་སྲོལ་རྒྱུན་འཁྲུལ་མེད་དང་། རྒྱུན་གྱི་ཀུན་སྤྱོད་ཆོས་ཁྲིམས་དང་འདུལ་ཁྲིམས་གཙང་བའི་བཅའ་ཁྲིམས་རྡོ་རྗེའི་ར་བ་ལྟར་བརྟན་པར་མཛད། མཁན་ངག་དབང་བསམ་གཏན་བློ་གྲོས་སོགས་དགོན་འདི་ཉིད་དུ་བྱོན་པའི་བླ་མ་མཁས་གྲུབ་མང་པོ་དབུའི་མཆོད་གནས་སུ་བཀུར་ནས་ཟབ་ཆོས་ཀྱི་བདུད་རྩི་བཞེས། མདོར་ན་ཆོས་གྲྭ་འདི་ཉིད་སྡེ་དགེ་ཆོས་རྒྱལ་ཆེན་པོའི་རྩ་བའི་གདན་ས་ཡིན་པའི་དབང་གིས་སྔར་སྨོས་པའི་མདུན་སྐོར་ཡོངས་ནས་ལྷུན་གྲུབ་སྟེང་གི་དགོན་འདི་ཉིད་དུ་གྲྭ་ཁང་ཡོད་དགོས་པ། མདུན་སྐོར་ཁག་གི་སྐུ་ངོ་རེ་རེ་དགོན་འདི་ཉིད་དུ་གྲྭ་པ་བྱེད་དགོས་པ། གར་འཆམ་དང་གཏོར་བོག་འཕེན་སྐབས་མདུན་སྐོར་ཁག་ཚང་མ་ལུགས་མཐུན་གྱི་མཛད་སྒོར་ཞུགས་དགོས་པ། གཏོར་བོག་དངོས་མདུན་སྐོར་ཁག་རྣམས་སྐུ་ངོ་དངོས་ཀྱིས་འཕེན་དགོས་པ། དུས་མཆོད་ཁག་མང་པོའི་སྤྱི་བ་མདུན་སྐོར་ཁག་གིས་འཁུར་དགོས་པ་སོགས་དགོན་འདི་ཉིད་ཀྱིས་སྡེ་དགེའི་མངའ་ཁོངས་ཡོངས་ལ་དབང་བསྒྱུར་བ་ཡིན། ༈ གཉིས་པ་དབུ་བླ་ཁག་ལྔའི་ལོ་རྒྱུས་ནི་རྩ་བའི་གདན་ས་ཆོས་གྲྭ་ཆེན་པོ་འདི་ཉིད་གོང་དུ་ཕུད་མངའ་རིས་སུ་གཏོགས་པའི་དགོན་སྡེ་ཁག་ལས་ཡོངས་གྲགས་དབུ་བླ་ཁག་ལྔ་སྟེ། དེའང་ཀཿཐོག་མི་འགྱུར་རྡོ་རྗེ་གདན་གྱི་ཆོས་གྲྭ་ནི། དམ་པ་བདེ་གཤེགས་ཤེས་རབ་སེང་གེས་རབ་བྱུང་གསུམ་པའི་ས་ཡོས་ཕྱི་ལོ་༡༡༥༩ལོར་ཕྱག་བཏབ། དེ་ནས་རིམ་བཞིན་བླ་རབས་བཅུ་གསུམ། དྲུང་རབས་བཅུ་གསུམ། མཁན་རབས་བཅུ་གསུམ་སོགས་ཀྱིས་གདན་ས་མཛད། རང་ལུགས་ཐུན་མིན་རྙིང་མ་བཀའ་མ་མདོ་སྒྱུ་སེམས་གསུམ་གྱི་ཕྲིན་ལས་ཁོར་ཡུག་ཏུ་བསྐྱངས། ཕྱིས་རིག་འཛིན་ཀློང་གསལ་སྙིང་པོས་སྡེ་དགེ་ཆོས་རྒྱལ་ཆེན་པོའི་བཀས་བསྐུལ་བ་བཞིན་ཉམས་གསོ་རྒྱ་ཆེར་མཛད། ཞིང་སྐྱོང་སྐུ་སྐྱེ་རིམ་བྱོན། དགེ་རྩེ་ན་རིམ། རྨོག་རྩ་སྐྱེ་རིམ། སི་ཏུ་སྐྱེ་ཕྲེང་བཅས་ནས་འཁོར་ལོ་གསུམ་གྱི་ཕྲིན་ལས་བསྐྱངས། ཀློང་གསལ་སྙིང་པོ། དྲི་མེད་ཞིང་སྐྱོང་། སི་ཏུ་ཆོས་ཀྱི་རྒྱལ་མཚན་སོགས་སྡེ་དགེའི་དབུ་བླར་གྱུར། དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་ནི། རིག་འཛིན་ཀུན་བཟང་ཤེས་རབ་ཀྱིས་རབ་བྱུང་བཅུ་གཅིག་པའི་ཤིང་འབྲུག་ཕྱི་ལོ་༡༦༦༤ལོར་ས་སྐྱོང་སྡེ་དགེའི་བཀའ་ལུང་བཞིན་ཕྱག་བཏབ་ནས་ཕྲིན་ལས་ནམ་མཁའ་དང་མཉམ་པའི་གདན་རབས་བཅུ་གཅིག་བྱོན། གསང་ཆེན་རྙིང་མའི་བཤད་སྒྲུབ་ལས་ཀྱི་འཁོར་ལོ་འགྲན་ཟླ་བྲལ། རུ་དམ་རྫོགས་ཆེན་ཨོ་རྒྱན་བསམ་གཏན་ཆོས་གླིང་ནི། གྲུབ་དབང་པདྨརིག་འཛིན་དང་སྡེ་དགེའི་ཆོས་རྒྱལ་ཆེན་པོ་མཆོད་ཡོན་དུ་འབྲེལ་ཏེ་རབ་བྱུང་བཅུ་གཉིས་པའི་ཤིང་གླང་ཕྱི་ལོ་༡༦༨༥ལོར་བཏབ། རྫོགས་པ་ཆེན་པོའི་བཀའ་སྲོལ་སྤྱི་དང་བྱེ་བྲག་ཏུ་ཟབ་གསང་མཁའ་འགྲོ་སྙིང་ཐིག་གི་བཀའ་སྲོལ་འཛིན། ཕྲིན་ལས་ནམ་མཁའ་དང་མཉམ་པའི་སྐྱེས་བུ་བགྲང་གིས་མི་ལངས། དཔལ་སྤུངས་ཐུབ་བསྟན་ཆོས་འཁོར་གླིང་ནི། སྔར་འབྲི་གུང་སྐྱོབ་པ་འཇིག་རྟེན་མགོན་པོའི་ཐུགས་སྲས་དཔལ་ལྡན་བྱང་ཆུབ་གླིང་པས་འབྲི་གུང་ཆོས་བརྒྱུད་འཛིན་པའི་དགོན་པ་བཏབ། འབྲི་གུང་གླིང་ལོག་བྱུང་སྟེ་ས་ལུགས་སུ་བསྒྱུར་ནས་ས་སྐྱའི་བསྟན་པ་ཤིན་ཏུ་དར་ཁྱབ་ཆེ་བར་བྱུང་མཐར་མེས་འཇིག་སྟེ་རིང་ཞིག་སོང་བ་ན། སི་ཏུ་རིན་པོ་ཆེ་ཆོས་ཀྱི་འབྱུང་གནས་བསྟན་པའི་ཉིན་བྱེད་ཀྱིས་རབ་བྱུང་བཅུ་གཉིས་པའི་མེ་ལུག་ཕྱི་ལོ་༡༧༢༧ལོར་ཆོས་རྒྱལ་བསྟན་པ་ཚེ་རིང་གིས་མཐུན་རྐྱེན་སྦྱར་ཏེ་དགོན་ས་བཏབ། སི་ཏུ་སྐུ་ཕྲེང་རིམ་བྱོན། དབོན་རྒན་དང་མཁྱེན་བརྩེ་སྐུ་རིམ། འཇམ་མགོན་ཀོང་སྤྲུལ་སྐུ་རབས་རིམ་བྱུང་གིས་གདན་ས་མཛད། བཤད་སྒྲུབ་སྡེ་བཅས་དར་ཁྱབ་ཆེ་ཞིང་ཀརྨ་བཀའ་བརྒྱུད་ཀྱི་དགོན་གནས་ཐམས་ཅད་ཀྱི་མ་མོར་གྱུར། ཞེ་ཆེན་བསྟན་གཉིས་དར་རྒྱས་གླིང་ནི། ཞྭ་ལམ་རབ་འབྱམས་པ་འགྱུར་མེད་ཀུན་བཟང་རྣམ་རྒྱལ་གྱིས་རབ་བྱུང་བཅུ་གཉིས་པའི་ཤིང་སྟག་ཕྱི་ལོ་༡༧༣༤ལོར་ཕྱག་བཏབ། རབ་འབྱམས་ན་རིམ་བདུན། རྒྱལ་ཚབ་སྐུ་ཐོག་དྲུག །འགྱུར་མེད་མཐུ་སྟོབས་རྣམ་རྒྱལ། མི་ཕམ་ཕྱོགས་ལས་རྣམ་རྒྱལ་སོགས་ཀྱིས་གདན་ས་མཛད། སྔ་འགྱུར་རྙིང་མའི་གྲྭ་ས་ཆེན་པོ་དྲུག་གི་ཡ་གྱལ་ཡིན་ལ་བཤད་སྒྲུབ་སྡེ་བཅས་ཤིན་ཏུ་དར་ཁྱབ་ཆེའོ། དེ་ལྟར་སྡེ་དགེའི་ཆོས་རྒྱལ་ཆེན་པོ་ཚད་མེད་པའི་ཐུགས་རྗེ་དང་ཕྲིན་ལས་ཅན་རིམ་པར་བྱོན་པ་རྣམས་ཀྱིས་ཆབ་འབངས་ལུགས་གཉིས་ཟུང་གིས་ཇི་ལྟར་སྐྱོང་ཞིང་དར་རྒྱས་སུ་མཛད་པའི་ཚུལ་ལས་བརྩམས་ཏེ་རྫོང་སྒོ་ཁག་དང་། མདུན་ཧོར་དགོན་སྡེ་ཁག་གི་མཚན་ཐོ་ཙམ་ཞིག་བྲིས་པ་ཡིན་ལ་རྒྱས་པར་གཞན་དུ་ཤེས་པར་བྱའོ། །བཞི་པ་སྡེ་དགེ་ཆོས་རྒྱལ་ཆེན་པོ་རིམ་བྱོན་གྱི་རྩ་བའི་གདན་ས་ཆེན་པོ་དཔལ་ལྡན་ལྷུན་གྲུབ་སྟེང་འདི་ཉིད་དུ་བཤད་སྒྲུབ་ལས་གསུམ་གྱི་སྒོ་ནས་བསྟན་པ་དར་རྒྱས་སུ་མཛད་པ་པོའི་མཁས་གྲུབ་རིམ་བྱོན་གྱི་མཚན་ཐོ་རགས་རིམ་ཞིག་འགོད་པ་ལ། ཐོག་མར་དགོན་པ་འདི་ཉིད་ཕྱག་འདེབས་པ་པོ་གྲུབ་པའི་དབང་ཕྱུག་བརྩོན་འགྲུས་བཟང་པོའམ་ཐང་སྟོང་རྒྱལ་པོ་དང་བོ་ཐར་བཀྲ་ཤིས་སེངྒེ་མཆོད་ཡོན་གྱིས་རབ་བྱུང་བདུན་པའི་མེ་སྟག་ཕྱི་ལོ་༡༤༤༦ལོར་གདན་ས་བཏབ། བོ་ཐར་གྱི་སྲས་རྒན་པ་བླ་མ་དཔལ་ལྡན་སེངྒེས་རྒྱལ་བས་ལུང་བསྟན་ངོར་ཆེན་རྡོ་རྗེ་འཆང་གི་མཁན་རབས་བརྒྱད་པ་མཁན་ཆེན་རྒྱལ་བ་ལྷ་མཆོག་སེངྒེ་ལས་སྡོམ་པ་གསུམ་དང་འབྲེལ་བའི་ཟབ་ཆོས་ཀྱི་བདུད་རྩི་མང་དུ་བཞེས་ཏེ། ལྷུན་གྲུབ་སྟེང་གི་བསྟན་བདག་མཛད་པ་སོགས་ཀྱིས་དཔལ་ལྡན་ས་སྐྱ་པའི་ཆོས་བརྒྱུད་འཛིན། གོང་དུ་སྨྲོས་པ་བཞིན་བོ་ཐར་བཀྲ་ཤིས་སེངྒེ་ནས་སྡེ་དགེའི་རྒྱལ་རབས་ཉེར་གསུམ་མམ། བླ་ཆེན་བྱམས་པ་ཕུན་ཚོགས་ནས་ལྷ་སྲས་ཚེ་དབང་བདུད་འདུལ་བར་ཁྲི་རབས་བཅུ་བཞི་བཅས་ཀྱིས་བསྟན་པའི་བདག་པོར་མཛད། ངོར་ཨེ་ཝཾ་ཆོས་ལྡན་སོགས་ནས་དབུ་ཡི་མཆོད་གནས་མང་དུ་སྤྱན་དྲངས་པ་སྟེ། བླ་མ་ཀུན་དགའ་རིན་ཆེན་གྱིས་ཤར་ཆེན་ཀུན་དགའ་བཀྲ་ཤིས་གདན་དྲངས། བླ་ཆེན་བྱམས་པ་ཕུན་ཚོགས་ཀྱིས་ངོར་མཁན་རབས་ཉེར་གཅིག་པ་སྒྲུབ་ཁང་དཔལ་མཆོག་རྒྱལ་མཚན་སྤྱན་དྲངས། ཁྲི་ཆེན་སངས་རྒྱས་བསྟན་པས་ངོར་ཨེཝཾ་ནས་འཇམ་མགོན་བཀྲ་ཤིས་དཔལ་ལྡན་དང་། རྟ་ནག་མཁན་ཆེན་བཟང་པོ་རྒྱལ་མཚན། ངོར་མཁན་རབས་ཉེར་བཞི་པ་འཇམ་མགོན་སངས་རྒྱས་ཕུན་ཚོགས་གསུམ་སྤྱན་དྲངས། ཆོས་རྒྱལ་བསྟན་པ་ཚེ་རིང་གིས་ངོར་མཁན་རབས་སུམ་ཅུ་པ་མཁན་ཆེན་བཀྲ་ཤིས་ལྷུན་གྲུབ་དང་། ཡར་ཀླུང་མཁན་ཆེན་གནས་གསར་ཀུན་དགའ་ལེགས་པའི་འབྱུང་གནས་གཉིས་སྤྱན་དྲངས། ཁྲི་ཆེན་ཕུན་ཚོགས་བསྟན་པས་ངོར་མཁན་རབས་སུམ་ཅུ་སོ་གསུམ་པ་མཁན་ཆེན་དཔལ་ལྡན་ཆོས་སྐྱོང་སྤྱན་དྲངས། བླ་མ་བློ་གྲོས་རྒྱ་མཚོས་ངོར་མཁན་རབས་སོ་དྲུག་པ་ཀླུ་ལྡིང་མི་འགྱུར་རྒྱལ་མཚན་སྤྱན་དྲངས། རྗེ་བཙུན་དབྱངས་ཅན་སྒྲོལ་མས་ངོར་མཁན་རབས་སོ་དགུ་པ་ཁང་སར་ངག་དབང་ཆོས་སྐྱོང་བཟང་པོ་སྤྱན་དྲངས། ཁྲི་ཆེན་བླ་མ་སངས་རྒྱས་བསྟན་པས་ངོར་མཁན་རབས་ཞེ་གསུམ་པ་བྱམས་པ་ནམ་མཁའ་འཆི་མེད་དང་། ངོར་མཁན་རབས་ཞེ་དྲུག་པ་བྱམས་པ་ཀུན་དགའ་བསྟན་འཛིན། ཡར་ཀླུངས་ཆོས་སྡེ་ནས་ནམ་མཁའ་ལེགས་པ་ལྷུན་གྲུབ་གསུམ་སྤྱན་དྲངས། དམ་ཚིག་བརྟན་པའི་རྡོ་རྗེའི་སྐབས་ངོར་མཁན་རབས་ལྔ་བཅུ་པ་རྣལ་འབྱོར་འཇམ་དཔལ་བཟང་པོ་སྤྱན་དྲངས། འཆི་མེད་རྟག་པའི་རྡོ་རྗེས་ངོར་དཔོན་སློབ་ངག་དབང་ལེགས་གྲུབ་དང་། ངོར་དཔོན་སློབ་འཇམ་དབྱངས་བློ་གཏེར་དབང་པོ་སྤྱན་དྲངས་པའི་བར་དུ། སྡེ་དགེའི་རྒྱལ་རབས་རིམ་བྱོན་ནས་ངོར་པའི་མཁན་རབས་རྣམས་གདན་ཞུས་མཛད་པ་དང་། སྤྱིར་ས་ངོར་ཚར་གསུམ་ནས་དབུ་ཡི་མཆོད་གནས་བསྟེན་ཚུལ་རྒྱལ་རབས་དག་ཏུ་འཁོད་པའི་མཚན་ཐོ་རགས་ཙམ་བཀོད་ན། སྒོམ་སྟོན་བསོད་ནམས་རིན་ཆེན་སྐབས་འགྲོ་བའི་མགོན་པོ་ཆོས་རྒྱལ་འཕགས་པ། བོ་ཐར་བཀྲ་ཤིས་སེངྒེས་གྲུབ་ཆེན་ཐང་སྟོང་རྒྱལ་པོ། བླ་མ་དཔལ་ལྡན་སེངྒེས་རྒྱལ་བ་ལྷ་མཆོག་སེངྒེ། བླ་མ་ཀུན་དགའ་རིན་ཆེན་གྱིས་ཤར་ཆེན་བྱམས་པ་ཀུན་དགའ་བཀྲ་ཤིས། སྡེ་དགེ་བླ་མ་ཀུན་དགའ་རྒྱ་མཚོས་ས་སྐྱ་པ་འཇམ་དབྱངས་བསོད་ནམས་དབང་པོ། རྩེ་གདོང་གི་བདག་ཆེན་ཀུན་དགའ་བསོད་ནམས། ཨེཝཾ་པ་ཤར་ཆེན་ཀུན་དགའ་བཀྲ་ཤི། སྤྱན་སྔ་ཀུན་དགའ་དོན་གྲུབ། བླ་ཆེན་བྱམས་པ་ཕུན་ཚོགས་ཀྱིས་ཤར་ཆེན་ཆོས་ཀྱི་རྒྱལ་པོ་ཤེས་རབ་འབྱུང་གནས། མཁན་ཆེན་དཔལ་མཆོག་རྒྱལ་མཚན། ཁྲི་ཆེན་སངས་རྒྱས་བསྟན་པས་མཁན་ཆེན་ལྷུན་གྲུབ་དཔལ་ལྡན། ས་སྐྱ་པ་འཇམ་དབྱངས་བསོད་ནམས་དབང་ཕྱུག །སྔགས་འཆང་ཀུན་དགའ་བཀྲ་ཤིས། མཁས་གྲུབ་སངས་རྒྱས་ཕུན་ཚོགས། རྟ་ནག་མཁན་ཆེན་བཟང་པོ་རྒྱལ་མཚན། མི་ཉག་པ་བཀྲ་ཤིས་དཔལ་ལྡན། ཀུན་དགའ་ཆོས་འཕེལ། དོན་གྲུབ་རྒྱལ་མཚན། ཁྲི་ཆེན་བླ་མ་བསོད་ནམས་ཕུན་ཚོགས་སྐབས་མཁན་ཆེན་སངས་རྒྱས་ཕུན་ཚོགས། བཟང་པོ་རྒྱལ་མཚན། ཀུན་དགའ་ཆོས་འཕེལ། དོན་གྲུབ་རྒྱལ་མཚན། ཆོས་རྒྱལ་བསྟན་པ་ཚེ་རིང་སྐབས་མཁན་ཆེན་སངས་རྒྱས་ཕུན་ཚོགས། འཇམ་མགོན་བཀྲ་ཤིས་དཔལ་ལྡན། མཁན་ཆེན་བཟང་པོ་རྒྱལ་མཚན། ངོར་མཁན་རབས་སོ་བཞི་པ་མཁས་གྲུབ་སངས་རྒྱས་དཔལ་བཟང་། ཀུན་དགའ་ཆོས་འཕེལ། གྲུབ་དབང་སངས་རྒྱས་རྒྱ་མཚོ། གདན་རབས་སུམ་ཅུ་པ་བཀྲ་ཤིས་ལྷུན་གྲུབ། གནས་གསར་ངག་དབང་ཀུན་དགའ་ལེགས་པའི་འབྱུང་གནས། མི་དབང་བསོད་ནམས་མགོན་པོ་སྐབས་མཁན་ཆེན་དཔལ་ལྡན་ཆོས་སྐྱོང་། ཤར་ཆེན་མི་འགྱུར་རྒྱལ་མཚན། ས་སྐྱ་པ་ངག་དབང་ཀུན་དགའ་བཀྲ་ཤིས། གནས་གསར་བ་ངག་དབང་ཀུན་དགའ་ལེགས་པའི་འབྱུང་གནས། ཁྲི་ཆེན་བླ་མ་ཕུན་ཚོགས་བསྟན་པའི་སྐབས་འཇམ་མགོན་བཀྲ་ཤིས་ལྷུན་གྲུབ། སངས་རྒྱས་རྒྱ་མཚོ། གནས་གསར་ངག་དབང་ཀུན་དགའ་ལེགས་པའི་འབྱུང་གནས། ངོར་དབོན་སངས་རྒྱས་ཡེ་ཤེས། ས་སྐྱ་ཁྲི་ཆེན་བསོད་ནམས་རིན་ཆེན། དཔལ་ལྡན་ཆོས་སྐྱོང་། ཁྲི་ཆེན་བློ་གྲོས་རྒྱ་མཚོའི་སྐབས་ཐར་བརྩེ་མཁན་ཆེན་ནམ་མཁའ་བསམ་གྲུབ། ས་སྐྱ་པ་འཇམ་མགོན་ཀུན་དགའ་བློ་གྲོས། མཁན་ཆེན་དཔལ་ལྡན་ཆོས་སྐྱོང་། ཤར་ཆེན་མི་འགྱུར་རྒྱལ་མཚན། ཞུ་ཆེན་ཚུལ་ཁྲིམས་རིན་ཆེན། རྗེ་བཙུན་དབྱངས་ཅན་སྒྲོལ་མའི་སྐབས་ངོར་ཁང་སར་མཁན་ཆེན་ཆོས་སྐྱོང་བཟང་པོ། ངག་དབང་ཤེས་རབ། ཤར་པ་ཞབས་དྲུང་། ཞུ་ཆེན་དགེ་ལེགས་ལྷུན་གྲུབ། ས་དབང་བདེ་དགའ་བཟང་པོའི་སྐབས་ས་སྐྱ་བདག་ཆེན་དབང་སྡུད་སྙིང་པོ། ངོར་མཁན་ཆེན་དཔལ་ལྡན་ཆོས་སྐྱོང་། ངག་དབང་ཆོས་སྐྱོང་བཟང་པོ། ཤར་ཆེན་མི་འགྱུར་རྒྱལ་མཚན། ཐར་རྩེ་ནམ་མཁའ་འཆི་མེད། ཡར་ཀླུངས་མཆོག་སྤྲུལ། བཅོ་བརྒྱད་མཁྱེན་བརྩེ་རབ་བརྟན། ཞུ་ཆེན་ཚུལ་ཁྲིམས་རིན་ཆེན་གྱི་དབོན། ཚེ་དབང་རྡོ་རྗེ་རིག་འཛིན་ནམ། ཁྲི་ཆེན་བླ་མ་ཀུན་དགའ་སངས་རྒྱས་བསྟན་པའི་རྒྱལ་མཚན་སྐབས་ཐར་རྩེ་བྱམས་པ་ནམ་མཁའ་འཆི་མེད། བྱམས་པ་ཀུན་དགའ་བསྟན་འཛིན། ཡར་ཀླུངས་མཆོག་སྤྲུལ་ནམ་མཁའ་ལེགས་པ་ལྷུན་གྲུབ། ས་སྐྱ་བདག་ཆེན་དབང་སྡུད་སྙིང་པོ་ཡབ་སྲས། གྲུབ་ཆེན་ངག་དབང་རིན་ཆེན། ཤར་ཆེན་ཡེ་ཤེས་དབང་ཕྱུག །དམ་ཚིག་བརྟན་པའི་རྡོ་རྗེའི་སྐབས་བླ་མ་སྔ་མ་རྣམས་དང་། མཁན་རབས་ལྔ་བཅུ་པ་རྣལ་འབྱོར་འཇམ་དཔལ་བཟང་པོ། དཔལ་ལྡན་འཆི་མེད་རྟག་པའི་རྡོ་རྗེའི་སྐབས་ཐར་རྩེ་ཁུ་དབོན་རྣམས་དང་། འཇམ་དབྱངས་མཁྱེན་བརྩེའི་དབང་པོ། ངག་དབང་ལེགས་གྲུབ། འཇམ་དབྱངས་བློ་གཏེར་དབང་པོ། ཚེ་དབང་བདུད་འདུལ་གྱི་སྐབས་འཇམ་དབྱངས་ཆོས་ཀྱི་བློ་གྲོས། བླ་མ་འཇམ་དབྱངས་རྒྱལ་མཚན། བསམ་གཏན་བློ་གྲོས། སྒ་ངག་དབང་ལེགས་པ། ཨོ་རྒྱན་རིག་འཛིན་འཇིགས་མེད་གར་དབང་རྡོ་རྗེའམ། ལྷ་སྲས་ཨུ་དགའི་སྐབས་ཆོས་ཀྱི་བློ་གྲོས་། མཁན་རྒན་བསམ་གཏན་བློ་གྲོས། སྒ་ངག་དབང་ལེགས་པ། བླ་མ་འཇམ་དབྱངས་རྒྱལ་མཚན་སོགས་དབུའི་མཆོད་གནས་བསྟེན། གཞན་ཡང་དཔལ་ལྷུན་གྲུབ་སྟེང་གི་བསྟན་པར་བཀའ་དྲིན་ཅན་མཁས་གྲུབ་སངས་རྒྱས་དཔལ་བཟང་། འཇམ་དབྱངས་སངས་རྒྱས་ཡེ་ཤེས། མཁས་བཙུན་ཀུན་དགའ་ཆོས་འཕེལ། བླ་མ་བཀྲ་ཤིས་དབང་ཕྱུག །སློབ་དཔོན་འཇམ་དཔལ་གྲགས་པ། ཞུ་ཆེན་ཚུལ་ཁྲིམས་རིན་ཆེན། མཁན་ཆེན་ངག་དབང་བསམ་གཏན་བློ་གྲོས། འཇམ་དབྱངས་མཁྱེན་བརྩེ་དབང་པོ། ཆོས་ཀྱི་བློ་གྲོས། བླ་མ་ངག་དབང་ཆོས་འཕེལ། སོགས་ས་ངོར་ཚར་པའི་སྐྱེས་ཆེན་བགྲང་ལས་འདས་པ་དང་། དགོན་འདི་ཉིད་ཀྱི་ཆོས་རྗེ་རྒྱལ་མཚན་བླ་མ། ཤར་བླ་མ། ནུབ་བླ་མ། དབྱར་གནས་མཁན་པོ། གྲྭ་སྒང་སྒྲུབ་དཔོན། འཛི་ཕུ་བཤད་གྲྭའི་མཁན་ཆེན་སོགས་མཁས་གྲུབ་ཀྱི་སྐྱེས་ཆེན་བསམ་གྱིས་མི་ཁྱབ་པ་ཞིག་བྱོན་ཏེ་མདོ་སྔགས་རིག་གནས་དང་བཅས་པའི་བཤད་སྲོལ། བསྒོམ་སྒྲུབ་ཀྱི་ཉམས་ལེན། ཆོ་གའི་ཕྱག་ལེན་ཐམས་ཅད་ཀྱང་དཔལ་ལྡན་ས་ངོར་ཚར་གསུམ་གྱི་བཞེད་སྲོལ་དྲི་མ་མེད་པ་བསྐྱངས་ཤིང་བསྟན་པ་སྡེ་དང་བཅས་པ་ཤིན་ཏུ་དར་ཞིང་རྒྱས་པས། ཆོས་གྲྭ་ཆེན་པོ་ལྷུན་གྲུབ་སྟེང་ཞེས་བྱ་བའི་སྙན་གྲགས་ས་ཆེན་པོའི་དཀྱིལ་འཁོར་ཀུན་ཏུ་ཁྱབ་པར་གྱུར་ཏོ། །
མུ་འགོད།་་་་་་་
' རྩོམ་འོག་མ།
སྡེ་དགེའི་རྒྱལ་རབས་མུ་ཏིག་ཕྲེང་བ། ༼བདུན་པ།༽