སྡེ་དགེའི་རང་བྱུང་ཁོར་ཡུག་གི་ཁྱད་ཆོས།
སྡེ་དགེའི་རང་བྱུང་འཁོར་ཡུག་གི་ཁྱད་ཆོས།
སྡེ་དགེའི་ལོ་རྒྱུས་སྤྱི་དོན་ཟླ་ཤེལ་གསར་པའི་མེ་ལོང་ལས་ཚན་བཤུས་བྱས། རྩོམ་པ་པོ། སྡེ་དགེ་བ་མཁས་དབང་ཐུབ་བསྟན་ཕུན་ཚོགས།
སྡེ་དགེའི་ཡུལ་གྲུའི་གནས་ཡུལ་ནི་བོད་གངས་ཅན་ལྗོངས་ཀྱི་ཤར་ཕྱོགས་འབྲི་ཆུའི་ཤར་ནུབ་གཉིས་སུ་གནས་ཡོད་ཅིང༌། གཙོ་བོ་རོང་འབྲོག་གི་ས་ཁུལ་གཉིས་སུ་དབྱེ་ཆོག ས་གཤིས་གནས་སྟངས་ཀྱི་སྒོ་ནས་དབྱེ་ན་ལྷོ་རོང་དང༌། བྱང་འབྲོག་ཅེས་དབྱེ་ཆོག་པ་ཞིག་རེད། ཡུལ་འདིར་རྒྱ་མཚོའི་ངོས་ལས་རྨི་ཁྲེ་ 5།000ཡན་ཆད་ཅན་གངས་རི་དང༌། རྫ་རི་མཐོན་པོ་གྲགས་ཅན་མང་པོ་ཡོད་པ་ནི། ཚ་བའི་རྡོ་རྗེ་དྲིལ་དཀར། འབྲུ་གཉན་ལྡོང༌། ཁྲོ་ཟིལ་ཁྲོམ། རྡོ་རྒྱལ་མུ་ནེ། རོང་མའི་ང་འདྲ་སོགས་ཡོད་པ་དང༌། ཆུ་ཀླུང་དང་ཆུ་ཕྲན་མང་པོ་དྲ་བ་བྲེས་པ་ལྟ་བུའི་འབབ་པའི་ནང་ལས་འབྲི་ཆུ་དང་ཟླ་ཆུ་གཉིས་ནི་སྡེ་དགེའི་ཕོ་བྲང་གི་མདུན་རྒྱབ་ཀྱི་ལྕགས་རི་ལྟར་བསྐོར་ནས་འབབ་ཅིང་ཡོད་པ་རེད། ཡུལ་འདིའི་རྒྱ་ཁྱོན་ཕྱེད་ཙམ་དེ་གདོད་མའི་ནགས་ཀླུང་ཆེན་པོས་ཁྱབ་ཡོད་པའི་ནང་ཐང་ཤིང་གཙོ་བོར་བྱས་པའི་ཤུག་པ། བེ་ཤིང༌། ཚ་རུ། སྟབ་པ། འཁྲིས་པ་སོགས་ཤིང་རིགས་ཧ་ཅང་མང་པོ་ཡོད་པ་དང༌། རྫ་རི་དང་བྲག་རི་ཐམས་ཅད་ལ་གསེར་དང༌། དངུལ། ཟངས། ལྕགས་ལ་སོགས་པའི་གཏེར་ཁ་རིགས་འབེལ་པོ་ཡོད་པ་རེད། ལྷག་པར་དུ་སྡེ་དགེའི་རོང་འབྲོག་གཉིས་ཀྱི་ས་ཁུལ་དུ་བོད་ཀྱི་གསོ་རིག་གཞུང་དུ་བསྟན་པའི་རྩྭ་ཤིང་གི་སྨན་རྫས་ཕལ་ཆེར་སྐྱེས་ཡོད་པས་ཡུལ་འདིར་གནའ་དུས་ནས་དེང་དུས་བར་སྨན་ལས་དར་ཁྱབ་ཆེན་པོ་བྱུང་ཡོད། རྡོ་སྨན་དང༌། ཚྭ་སྨན། ས་སྨན་རྣམས་ལས་ཅོང་ཞི་དང༌། འབྲུག་རུས། སྡོང་རོས། བ་ལ། མུ་ཟི། བ་ཚྭ། བྲག་ཞུན་སོགས་ཡུལ་འདི་རང་ནས་ཐོན་ཞིང་ཡོད་པ་དང༌། རི་དྭགས་ཀྱི་སྨན་རྫས་རྩ་ཆེ་ཤོས་གླ་རྩི་དང༌། དོམ་མཁྲིས་སོགས་ཀྱི་ཐོན་ཁུངས་གཙོ་བོ་ཞིག་ཡིན། ལྷག་པར་དུ་དབྱར་རྩ་དགུན་འབུ་དང༌། ཨུཏྤལ་མེ་ཏོག་སོགས་བོད་ཡུལ་གཞན་ན་དཀོན་པའི་སྨན་རྫས་རྩ་ཆེན་མང་པོ་ཞིག་ཡུལ་འདི་ནས་ཐོན་ཞིང་ཡོད་པ་རེད།
' རྩོམ་འོག་མ།
སྡེ་དགེའི་འབྲོག་ཁུལ་གྱི་ཐོན་ཁུངས་དང་ལག་རྩལ།