སྡེ་དགེའི་བྲོ་ཆེན་གྱི་ལོ་རྒྱུས།
༄།།སྡེ་དགེའི་བྲོ་ཆེན་གྱི་ལོ་རྒྱུས།
རྩོམ་པ་པོ།རབ་བརྟན་དགེ་ལེགས་ཕུན་ཚོགས།ཡོང་ཁུངས།སྡེ་དགེ་དྲ་བ།
དེ་ལ་སྡེ་དགེའི་བྲོ་ཆེན་ཞེས་གྲགས་པ་འདིའི་བྱུང་ཁུངས་ནི།སྔོན་དུས་སུ་མདོ་ཁམས་སྡེ་དགེའི་ཡུལ་འདིར་གྱིམ་ཤོད་གླིང་གི་མངའ་སྡེ་ཡིན་པ་རྒྱལ་རབས་ལོ་རྒྱུས་རྣམས་གཅིག་མཚུངས་ཡིན་ཞིང༌།དེ་ནས་སྡེ་དགེའི་རྒྱལ་རབས་ཀྱི་ཐོག་མ་བོ་ཐར་བཀྲ་ཤིས་སེངྒེའི་རྣམ་དཔྱོད་ཀྱི་ཐབས་ལས་བུ་མོ་སྐྱེ་གཟུགས་མཚར་བ་ཞིག་སྐྱེས་པ་ལྕང་ར་གླིང་ཆེན་པོ་བདག་དྲུང་གི་བཙུན་མོར་བཞེས་པའི་མོ་རིན་དུ་ཟིལ་རྒྱུད་ས་སྡེ་ཁག་ཅིག་སྡེ་དགེས་བདག་ཏུ་བཟུང་བ་དང༌།དེ་ནས་སྡེ་དགེའི་ཁྲི་རབས་ཀྱི་ཐོག་མ་བླ་ཆེན་བྱམས་པ་ཕུན་ཚོགས་ཀྱིས་དྲག་པོའི་དམག་གི་གཡུལ་བཤམས་པ་ལས་སྔོན་གླིང་གི་ཆབ་འབངས་རྫོང་ཆེན་བཅོ་བརྒྱད་པོ་མངའ་འོག་ཏུ་བསྡུས་པ་ལས་རྟེན་ལ་བརྟེན་པའི་ཐ་སྙད་ཁྱབ་བརྡལ་དུ་སོང་སྟེ་ཡུལ་འདིར་སྡེ་དགེ་ཞེས་པའི་གྲགས་པ་བླ་ན་མཐོ་ཡང༌།ཡུལ་སྲོལ་གོམས་གཤིས་དང་།བྲོ་གླུ་གར་གསུམ་སོགས་དམངས་སྲོལ་གྱི་རིགས་རྣམས་ནི་སྔོན་གླིང་གི་དུས་ལྟར་ལས་འགྱུར་བ་ཆེར་མ་བྱུང་བས་སྡེ་དགེའི་བྲོ་ཆེན་གྱི་ཁུངས་ནི་གླིང་བྲོ་ལ་ཐུག་པ་ཡིན་ཞིང༌།གླིང་སྒྲུང་དུ་གླིང་གི་བྲོ་ར་ཡིད་འཕྲོག་པད་དཀར་ཕྲེང་མཛེས་ཞེས་གྲགས་པའི་ལྷ་ཡི་གར་ཆས་ཀྱིས་བརྒྱན་པའི་འཁྲབ་གཞུང་སོགས་བཞུགས་ཤིང༌།སྡེ་དགེའི་གཉེར་ཕྱག་མདུན་ཧོར་རྣམས་ཀྱིས་ལོ་ལྟར་ཆས་འགྲིགས་ཀྱིས་མངའ་བདག་རྒྱལ་པོ་དབུ་བཞུགས་པའི་སྔོན་དུ་སྡེ་དགེའི་བྲོ་ཆེན་ནམ་མདུན་བྲོར་གྲགས་པ་མཆོད་སྤྲིན་དུ་སྤྲོ་དགོས་པ་དང༌།སྡེ་དགེའི་མངའ་ཁོངས་སུ་བྲོ་ཁྲལ་སྤྲོད་མི་སྡེ་དུད་ལོགས་སུ་བཀོད་སྒྲིག་བྱས་ཡོད་པ་དེ་དག་གིས་ལོ་ལྟར་བྲོ་ཁྲལ་སྤྲོད་དགོས་ཤིང་།དེ་དག་གི་ནང་དུ་གླུ་གར་སོགས་དམངས་རྩོམ་རིག་པའི་ཤེས་བྱ་ལ་ཕུལ་དུ་བྱུང་བའི་མཁས་པ་ཡང་མང་པོ་བྱུང་སྟེ་དེ་རྣམས་ཀྱིས་བརྩམས་པའི་བྲོ་གཞས་ཀྱང་ཡོད་པ་སྟེ།དཔེར་ན་གནམ་ཨ་སྔོན་ཡག་ལེ་བསང་ཆེན་བསང་ར་དང༌།ལྷ་ས་དག་པའི་ཞིང་ཁམས་ལྟ་བུ་དྲྭ་སྒང་མཆོག་སྤྲུལ་འཇམ་དབྱངས་ཀུན་དགའ་རྣམ་རྒྱལ་གྱིས་མཛད་པ་དང༌།རྟ་ཕོ་རྐྱང་ཕྲུག་ཁ་སྐྱ་ལྟ་བུ་འབྲི་ཆུ་ནུབ་རྒྱུད་ཀྱི་བཀའ་ཡི་མདུན་ན་འདོན་ཆེན་པོ་ར་རུ་ཚེ་མཁྱེན་གྱིས་མཛད་པ་དང༌།མགོ་རྨོག་དཀར་གཅིག་ལ་དར་འཕྲུ་བརྒྱད་ཅེས་པ་དང༌།མར་གྱི་རྒྱ་ཤོད་གཤིས་པ་ལྟ་བུ་ར་རུ་བསྟན་འཛིན་རྣམ་རྒྱལ་དུ་གྲགས་པས་མཛད་པ་ཡིན་ཞིང༌།མར་གྱི་རྒྱ་ཤོད་གཤིས་པའང་མདུན་ར་རུ་ཚང་གི་ཁྱིམ་གཞིས་ཀྱི་མདུན་ཕྱོགས་སུ་ཡོད་པའི་ས་མིང་ཞིག་ཡིན་ལ།མི་རྗེ་འདི་ཉིད་དགྲ་ལ་ཆས་སྐབས།བོའུ་དཔའ་མི་ལུང་བཞི་ཐོག་ཡིན་གོ།ང་ར་རུ་བསྟན་རྣམ་འབྲུག་ཡིན་གོ།རྟ་ཨ་རྒོད་གྲ་འཛི་གློག་ཡིན་གོ།ངེད་ཐོག་འབྲུག་གློག་གསུམ་འཛོམ་ས་ལ།།དགྲ་མི་ཐུབ་བསམ་པ་སེམས་ལ་མེད།།ཅེས་གླུ་རྒྱངས་མཛད་པས་མཚོན་རྣམ་དཔྱོད་རིག་འཕྲུལ་སྟོབས་རྩལ་སོགས་གང་གིས་ཀྱང་གཞན་འགྲན་མེད་པ་ཞིག་ཏུ་བཞུགས་པའོ།།
གཉིས་པ་ཁྱད་པར་གྱི་ཆོས་ཀྱི་རྣམ་པར་བཞག་པ་ནི།སྤྱིར་བྲོ་ཞེས་པ་ནི་རྐང་གཡུག་ལག་གཡུག་ཙམ་དང༌།ངག་གི་གདངས་དབྱངས་ཙམ་མིན་པར་སྟངས་སྟབས་དང༌།འགྲོས་སྟབས་སོགས་ཀྱི་ཐོག་ནས་ནང་གི་འགྱུར་བ་མཚོན་པའི་ལུས་ངག་རོལ་སྒེག་གི་རྣམ་འགྱུར་ལ་འཇུག་པའི་ཐ་སྙད་ཅིག་ཡིན་ཞིང༌།སྡེ་དགེའི་ཆོས་རྒྱལ་ཆེན་པོ་དབུར་བཞུགས་ཏེ་ནང་བློན་གཉེར་ཕྱག་རྣམས་དང༌།མདུན་སྐོར་སོགས་སྐུ་ངོ་དངོས་ཀྱིས་གླིང་བྲོ་ལྟར་སོ་སོའི་ཐོབ་ཐང་བཞིན་བརྡུང་བ་ལ་སྡེ་དགེའི་མདུན་བྲོ་དང༌།གཉེར་ཕྱག་དང༌།མདུན་སྐོར་ཁག་དབུར་བཞུགས་ཏེ་རྫོང་ཁག་སོ་སོའི་མགོ་དཔོན་རྣམས་ཀྱིས་བརྡུང་བ་དང༌།གཞན་ཡང་བླ་དཔོན་ཆེ་ཁག་རྣམས་ཁྲིར་ཕེབས་སྐབས་ཀྱི་ཁྲི་སྟོན་དང༌༑མི་ཆེ་ཁག་ཚོའི་འཁྲུངས་སྐར་དུས་སྟོན།མི་དཔོན་བླ་ཆེན་རྣམས་ཀྱིས་ཐུགས་སྤྲོ་བཏང་བ།བྱ་བ་ཆེན་པོའི་དབུ་འཛུགས་པ་དང་མཇུག་སྒྲིལ་བ།ལོ་དུས་རྒྱུན་ཆགས་སུ་དར་བའི་ཡུལ་ལུང་གི་དགའ་སྟོན།གནམ་ལོ་གསར་ཚེས་ཀྱི་དུས་སྟོན།མག་པ་དང་བག་མའི་གཉེན་སྟོན་སོགས་ཀྱི་སྐབས་སུ་བརྡུང་བ་ལ་ཡུལ་བྲོ་དང༌།དམག་འཁྲུགས་སྐབས་གཡུལ་ལས་རྒྱལ་བའི་དགའ་སྟོན་དུ་བརྡུང་བ་ལ་རྒྱལ་བྲོ་ཞེས་གྲགས་ཤིང༌།སྨན་ཤོད་བྲོ་ཆེན་དང༌།དཔེ་ཝར་གསེར་བྲོ།འབྲི་རྒྱུད་སྐོར་བྲོ།སྐུ་ཚེའི་བྲོ་སར་སོགས་ཡུལ་སྡེ་སོ་སོའི་མིང་སྦྱར་ནས་ཁག་འདྲ་མིན་དུ་མ་གྲུབ།བྲོ་བརྡུང་སྐབས་བྲོ་པ་རྣམས་ཀྱིས་བྲོ་རར་བསྐོར་བ་བྱས་ནས་བརྡུང་བའི་ཆ་ནས་བསྐོར་བྲོ་ཞེས་པའྀ་ཐ་སྙད་ཀྱང་བྱུང༌།བྲོ་ལ་ཡང་ལྷ་བླ་ལུ་དང༌།གོང་དཔོན་ལུ།མ་སྲུ་ལུ་ལྟ་བུ་ལེའུ་ཚན་གསུམ་རེ་དང༌།གནམ་ལ་ཉི་ཟླ་དང༌།གངས་ལ་སེང་ལྕང༌།བྲག་ལ་ཐང་དཀར།ནགས་ལ་སྟག་མོ་ལྟ་བུ་ལེའུ་ཚན་བཞི་རེ་དང༌།རྒྱལ་སྲས་དགོན་པའི་བྲོ་མཆོད་དང༌།རྒྱལ་བ་རིགས་ལྔའི་ཤིས་བྲོ་ལྟ་བུ་ལེའུ་ཚན་ལྔ་རེ་དང༌།དང་པོ་བྲོ་ཞིག་མ་བརྡུང་ལྟ་བུ་ལེའུ་ཚན་དྲུག་རེ་དང༌།སྐྱིད་པ་ལ་ཨེ་ཤེས་རྒྱ་གར་ལུང་པ་ལྟ་བུ་ལེའུ་ཚན་བདུན་རེ་དང༌།མགོ་རས་རྒྱ་རས་ཡག་མོ་དང༌།ལྷ་སའི་བུ་མོ་ལྷ་སའི་ཕྱོགས་ལ་ལྟ་བུ་ལེའུ་ཚན་བཅུ་ཁ་ལོངས་པའང་ཡོད་ཅིང༌།བྲོ་ཐམས་ཅད་རིང་ཡང་མགོ་ལུས་འཚམས་པ།ཐུང་ཡང་ཡན་ལག་ཚང་བ།བརྗིད་ཅིང་ཡིད་དབང་འཕྲོག་པ།མགྱོགས་ཀྱང་གོ་རིམ་གསལ་བ།མཉམ་དུ་སྡེབ་ཀྱང་རྡོག་སྒྲ་གཅྀག་ལྟ་བུར་གནས་པ་སོགས་ཁྱད་ཆོས་དུ་མས་ཁྱད་པར་དུ་བྱས་ཤིང༌།ཡུལ་ལུང་གང་གི་བྲོ་གར་འཁྲབ་པར་བྱས་ན་ཡུལ་དེའི་སྐད་དང་གར་གྱི་ཁྱད་ཆོས་རང་ཤུགས་ཀྱིས་མངོན་ཐུབ་པ་སྨྲོས་སུ་མེད་པ་ཞིག་ཡིན།བྲོ་པ་མང་ཉུང་ཇི་ལྟར་ཡང་བྲོ་དཔོན་སོ་སོས་མགོ་ཁྲིད་པའི་བྲོ་པ་རྣམས་ཕྱོགས་གཉིས་སུ་བཅད་ནས་བརྡུང་དགོས་ཤིང༌།ཁ་ཅིག་གིས་སྔོན་མར་སྡེ་དགེའི་སྐུ་ངོ་ཁག་གིས་མདུན་བྲོ་བརྡུང་དུས་ཕོ་བྲོ་དང་མོ་བྲོ་སོ་སོར་བྱེད་པ་ལས།ཕོ་མོ་མཉམ་དུ་བརྡུང་བའི་སྲོལ་ཞིག་མ་བྱུང་ཟེར་ཡང༌།གནའ་ནས་དར་ཞིང་ཡོངས་སུ་གྲགས་པ་ལྟར་སྐྱེས་པ་དང་བུད་མེད་ཚོ་གཉིས་བྱས་ནས་ཕོ་མོ་མཉམ་དུ་བརྡུང་ནའང་མི་ཆོག་པ་མེད་ཅིང༌།སྐྱེས་པ་ཚོས་བྲོ་དཔོན་དང་དབྱངས་དང་རྡོག་བྲོའྀ་མགོ་ཁྲིད་ནས་བརྡུང་ཚེ་དབྱངས་དང་ཚིག་རེ་སོང་བའི་རྗེས་ལན་བུ་མོ་ཚོས་ཟེར་ཞིང༌།ཡང་བུ་མོ་ཚོས་བྲོ་དཔོན་དང་དབྱངས་དང་རྡོག་བྲོའི་སྣ་ཁྲིད་ནས་བརྡུང་དུས་རྗེས་ལན་སྐྱེས་པ་རྣམས་ཀྱིས་ཟེར་དགོས།སྐྱེས་པ་ཚོས་དབྱངས་དང་ཚིག་བརྗོད་དུས་བུད་མེད་རྣམས་ཀྱིས་སྐྱེས་པ་རྣམས་དང་གར་སྟབས་མཉམ་གཅིག་ཏུ་སྦྲགས་ནས་རྡོག་བྲོ་རྒྱག་པ་ལས་སྐད་ངལ་གསོས་ཏེ་ཚིག་མི་བརྗོད་ཅིང༌༑ཡང་སྐྱེས་པ་ཚོས་དབྱངས་ཚིག་རྫོགས་ནས་བུ་མོ་རྣམས་ཀྱིས་རྗེས་ལན་བརྗོད་དུས་སྐྱེས་པ་རྣམས་ཀྱིས་བུ་མོ་ཚོ་དང་རྡོག་བྲོ་མཉམ་རྒྱག་བྱེད་པ་ལས་ཚིག་བརྗོད་མི་དགོས་པ་ནི་བྲོ་ཐམས་ཅད་ལ་གཅིག་མཚུངས་ཡིན།བྲོ་གང་ཡིན་ཡང་ཐོག་མར་བྲོ་ཚིག་དང་གོམ་སྟབས་དལ་མོར་བྱས་ནས་བརྡུང་བ་ལ་དལ་བྲོའམ་ཡུན་རིང་རྒྱངས་ཏེ་བརྡུང་བའི་ཆ་ནས་རྒྱངས་བྲོ་ཟེར།དེ་ནས་བྲོ་སྣ་རེ་ཕྱེད་བགོས་སུ་བྱས་པའི་ཕྱེད་ཙམ་ལ་སླེབས་པ་ན་གདངས་དང་བྲོ་ཚིག་ཇེ་མགྱོགས་སུ་སོང་བ་དང་ཆབས་ཅིག་ཏུ་རྐང་ལག་གི་གོམས་སྟབས་ཇེ་མྱུར་དུ་བཏང་སྟེ་ལྟད་མོ་བ་རྣམས་ཀྱིས་བསྟོད་བསྔགས་དང༌༑དགའ་འབོད་བྱེད་པའི་སྐད་ཅིག་དེ་ཉིད་དུ་བྲོ་སྣ་རེའི་མཇུག་བསྡུ་བ་ཡིན་ཞིང༌།དེ་ལ་ཡུལ་སྐད་དུ་མགྱོགས་བྲོའམ་འཁྲུགས་བྲོ་ཞེས་གྲགས།དམིགས་བསལ་མཆོད་བྲོ་རྣམས་བརྡུང་དུས་ཐོག་མར་དལ་བྲོའི་སྐབས་སུའང་ལེའུ་ཚན་དག་གི་དབྱངས་དང་ཚིག་ཐ་མ་དེ་བརྡུང་ཚེ་བྲོ་ཚིག་དང་གོམ་སྟབས་བྲེལ་ཏེ་མགྱོགས་བྲོ་ལྟར་བརྡུང་དགོས་ཤིང༌༑ཡང་མགྱོགས་བྲོ་ལ་མ་ཐུག་བར་སྔར་ལྟར་དལ་མོར་བྱེད་ནས་བརྡུང་བ་ནི་མི་འདྲ་བའི་ཁྱད་ཆོས་ཤིག་སྟེ།དཔེར་ན་མཆོད་བྲོ།ཨ་སྔོན་མཐོན་པོ་རི་ལ་སྤང་དཀར་ཆགས་ཡོད་ལྟ་བུ་ལ།ལེའུ་ཚན་དང་པོའི་ཚིག་ཐ་མ།འདབ་བརྒྱད་ཡག་ལེ་སྟེང་ཕྱོགས་ལྷ་ལ་མཆོད་འགྲོ་ཟེར་དུས་མགྱོགས་ཤིང༌།ཡང་ལེའུ་ཚན་གཉིས་པའི།གངས་སྟོད་མཐོན་པོ་རི་ལ་སྤང་དཀར་ཆགས་ཡོད་ཟེར་དུས་སྔར་ལྟར་དལ་འགྲོ་བ་ལྟ་བུའོ།།
བྲོ་ཆེན་ཁ་ཤས་ཤིག་ལ་དབྱངས་རྟ་དང་རྡོག་བྲོ་གཅིག་མཚུངས་སུ་བྱུང་བ་ལས།ཕལ་ཆེར་ལ་དབྱངས་རྟ་དང་རྡོག་བྲོ་མི་འདྲ་བ་རེ་རེ་ཡོད་ཅིང༌།དབྱངས་ནི་འོག་ཏུ་བྲོ་སྣ་ཕལ་ཆེར་གྱི་ལེའུ་ཚན་དང་པོ་ལ་དབྱངས་དང་ཚིག་བཅས་ཚང་བར་བཀོད་ཡོད་པ་དེས་ཤེས་པར་ནུས་ལ།རྡོག་བྲོ་ནི་འོག་ཏུ་བྲོ་སྣ་འགའ་ཞིག་ལ་བྲིས་ཡོད་པ་ལྟར་ཁེར་ལེན་དང༌།སུམ་ལེན།རྡོག་ལེན།ཤར་འགྲོས།མཐིང་འགྲོས།འཁྱུག་འགྲོས།གཡས་རྒྱུགས།གཡོན་རྒྱུགས།གཡས་བསྐོར།གཡོན་བསྐོར།ཕྱིར་ནུད།གནམ་བཏེགས་སོགས་ཀྱི་ཁྱད་པར་མང་དུ་ཡོད་ལ།ཞིབ་པར་བྲོ་པ་མཁས་ཅན་རྣམས་ལ་ཚུལ་བཞིན་དུ་བརྟེན་ཏེ་བསླབ་སྦྱོང་བགྱིས་ན་རྟོགས་པར་འགྱུར་རོ།།
བྲོ་རའི་རྣམ་པ་ནི་གཙོ་བོར་ཞི་བའི་དབྱིབས་ཉ་གང་ཟླ་བའི་རྣམ་པ་ལྟར་ཟླུམ་ཞིང་འཁྱིལ་པའམ་གོར་གོར་མོར་བྱས་ནས་བརྡུང་ཞིང༌།སྐབས་འགའ་ཞིག་ཏུ་ནོར་བུ་དགའ་འཁྱིལ་དང༌།ཉི་ཟླ་ཁ་སྤྲོད།དུང་དཀར་གཡས་འཁྱིལ།གཡུང་དྲུང་གཡས་འཁྱིལ།རྡོ་རྗེ་རྒྱ་གྲམ་སོགས་ཀྱི་རྣམ་པ་ཅི་མཛེས་སུ་བསྟར་ནས་བརྡུང་དགོས་པ་ཡང་ཡོད་དོ།།
ཡང་བྲོའི་བསྟར་ལ་གདོད་མའི་ཆོས་ལུགས་དང་འབྲེལ་པ་ཡོད་པའི་རྒྱས་དབྱིབས་གྲུ་བཞི་དང༌།དབང་དབྱིབས་ཟླ་གམ།དྲག་དབྱིབས་གྲུ་གསུམ་སྟེ་ལས་སོ་སོའི་དབྱིབས་ལྟར་བརྡུང་བ་ཡང་ཡོད་ཅེས་བཤད་དོ།།
བྲོ་ཡི་གོ་རིམ་ལ་བྲོ་མགོ་དང༌།བྲོ་གཞུང༌།བྲོ་མཇུག་སྟེ་གསུམ་གྱིས་བསྡུས་པ་ཡིན་ཞིང༌།བྲོ་མགོ་ལ་འཛོམས་བྲོ་དང༌།བཞུགས་བྲོ།མཆོད་བྲོ་སྟེ་རིགས་གསུམ་དང༌༑བྲོ་གཞུང་ལའང་གཞུང་བྲོ་དངོས་དང༌།གླུ་ཚིག་དང་རོགས་འཐེན་ནམ་མགུར་ཚིག་གིས་ཁྱད་པར་དུ་བྱས་པའི་གླུ་བྲོ་དང་མགུར་བྲོ་དང༌།གཞས་བྲོའི་རིགས་སོགས་རིགས་དུ་མ་དབྱེར་ཡོད་ཀྱང༌།གཞས་བྲོ་དང༌།གླུ་བྲོ་དང་མགུར་བྲོ་འདི་རྣམས་ནི་བྲོ་ཡིན་ཀྱང་བྲོ་ཆེན་གྱི་ཁོངས་སུ་མི་གཏོགས།བྲོ་མཇུག་ལ་གྱེས་བྲོ་དང༌།སྨོན་བྲོ།ཤིས་བྲོ་སྟེ་གོ་རིམ་ངེས་ཅན་དུ་ཡོད་འདུག།གཟུགས་དང་ལང་ཚོའི་དཔལ་ཡོན་ཕུན་སུམ་ཚོགས་ཤིང༌།གླུ་བྲོ་གར་གྱི་སྒྱུ་རྩལ་ལ་བྱང་ཆུབ་པའི་གཞོན་སྐྱེས་ཕོ་མོ་རྣམས་ཀྱིས་ངོ་མཚར་བྲོ་ཡི་འཁྲབ་སྟོན་བགྱིད་པའི་དུས་སུ་བྲོ་པ་རྣམས་ལ་མཚམས་སུ་གསོལ་ཇ་དང་བུར་ཆུ་སོགས་ཀྱི་སྐོམ་སྐྱེམས་དང༌།མཇུག་བཀྲ་ཤིས་བྲོ་བརྡུང་སྐབས་བྲོ་པ་རྣམས་ལ་བཀྲ་ཤིས་པའི་རྟགས་ཀྱིས་མངོན་པར་མཛེས་པའི་ཁ་བཏགས་དྲི་མ་མེད་པས་མགུལ་དར་བསྒྲོན་པ་དང༌།ཇ་འཁོར་དང་དངུལ་སོགས་ཀྱི་ལེགས་སྐྱེས་བཞག་སྒོ་གང་འཚམས་བཏང་སྟེ་བདེ་སྐྱིད་ཕུན་སུམ་ཚོགས་པའི་ངང་དགའ་སྟོན་གྱི་མཇུག་བསྡུ་བར་བྱེད་པའོ།།
(སྡེ་དགེའི་བྲོ་ཆེན་གྱི་བྲོ་ཚིག་ ༢༠༠ ལྷག་བསམ་བསྡུ་རུབ་བྱས་ཏེ། སྡེ་དགེ་རྒྱལ་ཡོངས་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་༢༠༡༤ ལོར་པར་སྐྲུན་འགྲེམ་སྤེལ་ཞུས་ཡོདལ)
བསམ་ཚུལ་འབྲི།
སྡེ་དགེའི་རྫ་བཟོའི་ལག་ཤེས་དང་རྫ་མ་རིགས།