སྡེ་དགེའི་དམངས་ཁྲོད་མགུར་མོའི་རིགས། སྨད་ཆ།
སྡེ་དགེ་ཡུལ་གྱི་དམངས་ཁྲོད་མགུར་མོའི་རིགས་ཕྱོགས་སྒྲིག་བྱས་པ། སྨད་ཆ།
༼མདོ་ཁམས་སྡེ་དགེའི་ཡུལ་དུ་དར་བའི་ཞབས་བྲོའི་རྣམ་པར་བཞག་པ་ལེགས་སྨོན་ནཱ་དའི་རོལ་མོ་ཞེས་པ་ལས་ཟུར་འདོན་བྱས།༽
བསྡུ་སྒྲིག་པ། སྡེ་དགེ་བ་རབ་བརྟན་དགེ་ལེགས་ཕུན་ཚོགས། ཡོང་ཁུངས། སྡེ་དགེ་དྲ་བ།
༈ ལྷ་སའི་བར་སྐོར་ནང་ནས། །གསེར་གྱི་རྔ་ཞིག་བརྡུང་བྱུང༌། །གསེར་རྔ་ཆུང་དུ་མ་བསམ། །ང་རང་བསམ་པ་དགའ་བྱུང༌། ༈ །ལྷ་སའི་སྐོར་ལམ་ནང་ནས། །མ་བསམ་ཕྲེང་བ་རྙེད་བྱུང༌། །ཕྲེང་བ་མ་ཟད་བར་དུ། །ཕྲེང་ལུང་བརྗེ་རྒྱུ་མ་བྱུང༌། ༈ །ལྷ་སའི་སྐོར་ལམ་ནང་ནས། །གོས་ཆེན་རྡོག་སྒྲིལ་རྙེད་བསམ། །ལྟ་ཡག་རྟོག་ཡག་བྱེད་དུས། །འབའ་ལ་རྡོག་སྒྲིལ་རེད་འདུག ༈ །ལྷ་སའི་སྐོར་བསམ་ནང་ནས། །འབའ་ལ་རྡོག་སྒྲིལ་རྙེད་བསམ། །ལྟ་ཡག་རྟོག་ཡག་བྱེད་དུས། །གོས་ཆེན་རྡོག་སྒྲིལ་རེད་འདུག །གཉིས་པ་མགུར་བྲོའི་སྐོར་ལ་གསུམ་ལས། དང་པོ་ནི། ༡ བཀྲ་ཤིས་ལུང་པའི་ཕུ་ལ། །བསྭོ་ཡ་ལ་བསྭོ། གསེར་གྱི་མེ་ཏོག་བཀྲ་བྱུང༌། །བཀྲ་ལ་ཤིས་པ། བཀྲ་ལ་ཤིས་པ་ཤོག་ཡ། ངེད་རིག་བྲོ་པ་ཚང་མས། །བསྭོ་ཡ་ལ་བསྭོ། གསེར་གྱི་མེ་ཏོག་འཐུ་འགྲོ། །བཀྲ་ལ་ཤིས་པ། བཀྲ་ལ་ཤིས་པ་ཤོག་ཡ། གསེར་གྱི་མེ་ཏོག་འཐུ་ནས། །བསྭོ་ཡ་ལ་བསྭོ། སྟེང་ཕྱོགས་ལྷ་ལ་མཆོད་འགྲོ། །བཀྲ་ལ་ཤིས་པ། བཀྲ་ལ་ཤིས་པ་ཤོག་ཡ། རིགས་འགྲེ། ༢ བཀྲ་ཤིས་ལུང་པའི་སྐེད་ལ། །དངུལ་གྱི་མེ་ཏོག་བཀྲ་བྱུང༌། །ངེད་རིག་བྲོ་པ་ཚང་མས། །དངུལ་གྱི་མེ་ཏོག་འཐུ་འགྲོ། །དངུལ་གྱི་མེ་ཏོག་འཐུ་ནས། །བར་ཕྱོགས་གཉན་ལ་མཆོད་འགྲོ། ༣ །བཀྲ་ཤིས་ལུང་པའི་འདབ་ལ། །དུང་གི་མེ་ཏོག་བཀྲ་བྱུང༌། །ངེད་རིག་བྲོ་པ་ཚང་མས། །དུང་གི་མེ་ཏོག་འཐུ་འགྲོ། །དུང་གི་མེ་ཏོག་འཐུ་ནས། །འོག་ཕྱོགས་ཀླུ་ལ་མཆོད་འགྲོ། །གཉིས་པ་ནི། ༡ ནམ་མཁའ་ཡེ་ན་ལྟོས་དང༌། །བསྭོ་ཡ་ལ་བསྭོ། ཆར་ཐིག་ཟིལ་པ་ཤིག་ཤིག །བཀྲ་ལ་ཤིས་པ། བཀྲ་ལ་ཤིས་པ་ཤོག །མར་འབབ་ས་ལ་འབབ་ན། །བསྭོ་ཡ་ལ་བསྭོ། བདུད་རྩི་ཡིན་པར་བསྒོམ་འགྲོ། །བཀྲ་ལ་ཤིས་པ། བཀྲ་ལ་ཤིས་པ་ཤོག །དབྱངས་འདི་ལྟར་འགྲེ། ༢ གནམ་དང་སྤྲིན་གཉིས་བར་ལ། །བྱུ་རུའི་མཆོད་རྟེན་བཞེངས་ཡོད། །ཉི་མ་ཟླ་བ་གཉིས་ལས། །མཇལ་ཁ་ཐོབ་ས་མ་རེད། ༣ །རི་འདི་གཡང་གི་རི་རེད། །རྩྭ་འདི་དུག་རྩྭ་མ་རེད། །རི་དྭགས་རྣམ་པ་སྣ་ཚོགས། །གཡང་ཅན་རི་ལ་འཁོར་བྱུང༌། །
གསུམ་པ་ནི། ༡ ང་ཚོ་ཡར་ཡར་འགྲོ་དུས། །ཕུ་ནས་དབྱར་ཀར་ཚེས་བྱུང༌། །ཕུ་ནས་དབྱར་ཀར་ཚེས་དུས། །དབྱར་ཤིང་འོམ་བུ་སྔོ་བྱུང༌། །དབྱར་ཤིང་འོམ་བུ་སྔོ་ན༑ །ལྷ་བྱ་ཁུ་བྱུག་འབབ་བྱུང༌། །ལྷ་བྱ་ཁུ་བྱུག་འབབ་ན། །རང་སེམས་བསམ་པ་དགའ་བྱུང༌། །རང་སེམས་བསམ་པ་དགའ་ན། །དགའ་བའི་གསུང་སྐད་རྒྱག་འགྲོ། ༢ །ང་ཚོ་མར་མར་འགྲོ་དུས། །མདའ་ནས་དགུན་ཁར་ཚེས་བྱུང༌། །མདའ་ནས་དགུན་ཁར་ཚེས་ན། །མཚོ་ལ་རྒྱ་དར་ཆགས་བྱུང༌། །མཚོ་ལ་རྒྱ་དར་ཆགས་དུས། །མཚོ་བྱ་ངང་པ་འབབ་བྱུང༌། །མཚོ་བྱ་ངང་པ་འབབ་ན། །རང་སེམས་བསམ་པ་དགའ་བྱུང༌། །རང་སེམས་བསམ་པ་དགའ་ན། །མཚོ་ལ་གཡས་བསྐོར་རྒྱག་འགྲོ། ། གཞན་ཡང༌། དཀར་ཡོལ་དཀར་དཀར་ནང་ལ། །འོ་མ་དཀར་དཀར་བླུགས་ཡོད། །བསམ་པ་ཨེ་དཀར་མི་དཀར། །དཀར་ཡོལ་ནང་ལ་ལྟོས་ཤོག ༈ །དཀར་ཡོལ་དཀར་དཀར་ནང་ལ། །འོ་མ་དཀར་དཀར་བླུགས་ཡོད། །བླུགས་མའི་བུ་མོ་དཀར་དཀར། །དཀར་དཀར་སུམ་སྒྲིག་དགུ་སྒྲིག ༈ །དཀར་ཡོལ་ཆག་ན་ཆག་དགོས། །རི་མོ་ཡལ་ན་ཡལ་དགོས། །དར་རྩེ་མདོ་ལ་འགྲོ་དུས། །དེ་ལས་དགའ་ཞིག་ཉོ་ཆོག ༈ །དཀར་ཡོལ་བཀྲ་ཤིས་རྟགས་བརྒྱད། །རི་མོ་རྒྱལ་སྲིད་སྣ་བདུན། །དཀར་ཡོལ་དེ་འདྲ་འཛོམ་ན༑ །རི་མོ་འཛོམ་ཐབས་དཀའ་འདུག ༈ །བཀྲ་ནི་རས་ཁྲ་བཀྲ་བྱུང༌། །འཇམ་ནི་འབུ་རས་འཇམ་བྱུང༌། །འབུ་རས་འཇམ་རྒྱུ་བྱས་ན། །རས་ཁྲ་དགོངས་པ་མ་འཚམས། ༈ །ཁང་པའི་སྟར་ཁ་གཅིག་གིས། །ནད་རིགས་ནད་དེ་གཤོག་བྱུང༌། །ད་ནི་ཁང་པའི་སྟར་ཁ། །མི་བཟའ་བློ་ཐག་བཅད་འགྲོ། ༈ །ཁྱོད་རང་ང་ལ་དགའ་ན༑ །སྒོ་ལ་ཀག་ཀག་བརྡུང་ཤོག །ང་རང་ཁྱོད་ལ་དགའ་ན། །སྒོ་ཡི་འདན་བུ་ཕྱེ་ཡོང༌། ༈ །ཁྱོད་ནི་ང་ལ་དགའ་ན། །ཆང་དང་ཨ་རག་བཙོས་ཤོག །ང་རང་ཁྱོད་ལ་དགའ་ན། །གོས་ཆེན་གོས་ཤིག་དྲུབ་ཡོང༌། ༈ །ཁྱོད་རང་རྒྱ་གར་འགྲོ་དུས། །རྨ་བྱའི་སྒྲོ་གཅིག་ཁུར་ཤོག །ང་རང་དངུལ་དཀར་བུམ་པ། །ཡོ་འགྱུར་མེད་པར་སྒུག་འདུག ༈ །ཁྱོད་ཀྱིས་ཇ་ཞིག་ཁུར་ཤོག །ང་ཡིས་མར་ཞིག་ཁུར་ཡོང༌། །བཀྲ་ཤིས་ལུང་པའི་ཕུ་ལ། །ཇ་སྲེག་མར་ཁུ་བསྐོལ་འགྲོ། ༈ །ཁྱོད་ནི་ལ་མོ་ཕར་རྒྱབ། །ང་ནི་ལ་མོ་ཚུར་རྒྱབ། །གཅིག་སེམས་གཅིག་ལ་ཡོད་ན། །བྲིས་པའི་ཡིག་ཆུང་བསྐུར་ཤོག ༈ །ཁྱོད་ནི་ཉི་མའི་དཀྱིལ་འཁོར། །ང་ནི་ཟླ་བའི་དཀྱིལ་འཁོར། །ངེད་རུའི་ཉི་ཟླ་སྤུན་གཉིས། །འཛམ་གླིང་གཡས་བསྐོར་རྒྱག་འགྲོ། ༈ །ཁྱོད་ནི་བཀའ་འགྱུར་དུམ་པ། །ང་ནི་བསྟན་འགྱུར་དུམ་པ། །ངེད་རུའི་བཀའ་འགྱུར་བསྟན་འགྱུར། །དགོན་ཆུང་ཕྱོགས་ལ་ལོག་འགྲོ། ༈ །ཁྱོད་ནི་རྒྱ་གར་སོང་ན། །རྨ་བྱའི་སྒྲོ་ཞིག་ཁུར་ཤོག །ང་ནི་དངུལ་དཀར་བུམ་པ། །ཡོ་འགྱུར་མེད་པ་སྒུག་འདུག ༈ །ཁྱོད་ནི་རྒྱ་གར་སོང་ན༑ །ང་ནི་རྒྱ་ནག་འགྲོ་འགྲོ། །གཅིག་སེམས་གཅིག་ལ་ཡོད་ན། །རྒྱ་མཚོའི་འགྲམ་ནས་ཐུག་ཡོང༌། ༈ །ཁྱོད་ལ་ཡོད་པའི་གསེར་འགུ། །ང་ལ་ཡོད་པའི་དངུལ་འགུ། །བརྡུང་མི་མཁར་བ་གཅིག་རེད། །གོན་རེས་བྱས་ན་ལོས་ཆོག ༈ །གངས་དཀར་ལྷུན་པོའི་རྩེ་ནས། །གངས་སེང་གཡུ་རལ་རྒྱས་སོང༌། །གངས་ཕྲུག་མང་པོས་བསྐོར་སོང༌། །གངས་རི་འོད་ཀྱིས་ཁྱབ་སོང༌། ༈ །གངས་རི་བསྐོར་ནས་འོང་ཡིན། །གངས་ཆུ་འཐུང་ནས་འོང་ཡིན། །གངས་སེང་དཀར་མོའི་མདུན་ནས། །དགོངས་པ་ཞུས་ནས་འོང་ཡིན། ༈ །གོས་ཆེན་ཕོར་ཁུག་ནང་དུ། །ཡུག་པོའི་རྩམ་པ་བླུགས་བྱུང༌། །བླུག་མི་ཧམ་པ་ཆེ་བྱུང༌། །བླུག་ས་བསམ་པ་ཕམ་བྱུང༌། ༈ །འགྲོ་ན་འགྲོ་ན་བསམ་བྱུང༌། །
རྟ་ལ་སྒ་གཅིག་རྒྱབ་བྱུང༌། །རྟ་ཕོ་སྒ་རྐྱང་སྟན་རྐྱང༌། །བློ་སེམས་བདེ་པོ་མ་བྱུང༌། ༈ །རྒྱ་རྒྱུ་རྒྱ་ནས་ཁུར་ཤོག །རྒྱ་ཟོག་སོ་མང་ཁུར་ཤོག །རྒྱ་ཟོག་སོ་མང་ཁུར་ནས། །ཆུང་འདྲིས་སྐྲ་ལོ་ཤད་འགྲོ། ༈ །རྒྱ་ལྕང་ལྕང་མའི་རྩེ་ལ། །སྤུ་ཤུད་ལྟག་བཀྲ་བབ་བྱུང༌། །ཁྲ་དང་རི་མོ་འདུག་སྟེ། །ང་རང་བསམ་པ་མ་དགའ། ༈ །རྒྱ་ལྕང་ལྕང་མའི་རྩེ་ལ། །བྱེའུ་ཆུང་ལྔ་བརྒྱ་བབ་བྱུང༌། །ལྕང་མ་ལྡེམ་ལྡེམ་མ་བྱེད། །བྱེའུ་ཆུང་ཀླད་ཡུར་འཁོར་འགྲོ། ༈ །རྒྱ་ནག་ཅོག་ཙེའི་སྟེང་ལ། །བལ་ཕོར་ཁ་ཆག་བཞག་བྱུང༌། །བཞག་མི་ཧམ་པ་མཐོན་པོ། །བཞག་ས་བསམ་པ་སྡུག་བྱུང༌། ༈ །རྒྱ་ནག་སྟོང་སྐུད་མདུད་པ། །སོ་དང་སེན་མོས་བཀྲོལ་ཆོག །ཆུང་འདྲིས་འུ་གཉིས་གཏམ་པ། །བཀྲོལ་རྒྱུ་ཡོད་པ་མ་རེད། ༈ །ང་ཚོ་ཡར་ཡར་འགྲོ་འགྲོ། །ཁ་བ་མར་མར་འབབ་བྱུང༌། །ལས་འབྲེལ་ཁ་བ་ཡོད་ན། །མགྲོན་པོའི་ཚུགས་ལམ་མ་དགག ༈ །ང་ཡིས་རྡོ་ཞིག་འཕངས་པས། །ཁམ་བུ་ཉི་ཤུ་ལྷུང་བྱུང༌། །ང་ཡིས་གཅིག་ནི་མ་བཟས། །རོགས་དགའ་ཁྱོད་ལ་བཞག་ཡོད། ༈ །ང་རང་རྒྱ་རའི་ནང་ལ། །བལ་པོའི་མེ་ཏོག་བཏབ་ཡོད། །མེ་ཏོག་ཡག་ཏུ་བསམ་ན། །ཆུང་འདྲིས་ཁྱོད་ལ་སྦྱིན་ཆོག ༈ །ལྕང་མ་བཙུགས་ཡོད་བཙུགས་ཡོད། །ཆུ་གཉིས་བར་ལ་བཙུགས་ཡོད། །ལས་འབྲས་མེད་པའི་ལྕང་མ། །ཆུ་གཉིས་བར་ལ་སྐམ་ཐལ། ༈ །ལྕང་མ་བཙུགས་ཡོད་བཙུགས་ཡོད། །རི་རྒྱལ་རྩེ་ལ་བཙུགས་ཡོད། །ལས་འབྲས་ཡོད་པའི་ལྕང་མ། །རི་རྒྱལ་རྩེ་ལ་སྐྱེས་སོང༌། ༈ །ལྕང་མ་བཙུགས་ཡོད་བཙུགས་ཡོད། །བྲག་དཀར་སྒང་ན་བཙུགས་ཡོད། །ལས་འབྲས་ཡོད་པའི་ལྕང་མ། །བྲག་དཀར་དགུང་དང་མཉམ་བྱུང༌། ༈ །ལྕང་མ་བཙུགས་ཡོད་བཙུགས་ཡོད། །རྡོ་རྗེའི་བྲག་ལ་བཙུགས་ཡོད། །ལས་འབྲས་ཅན་གྱི་ལྕང་མ། །རྡོ་རྗེའི་བྲག་ལས་སྐྱེས་བྱུང༌། ༈ །ལྕང་མ་ང་ཡིས་བཙུགས་ཡོད། །ལྕང་ཆུ་ང་ཡིས་བླུགས་ཡོད། །ལྕང་མ་འདབ་ལོ་རྒྱས་དུས། །བདག་པོ་ང་ཡིན་ཁོ་ཡིན། ༈ །ཆུ་བོ་མར་འབབ་ཤིག་ཤིག །ཉ་མོ་ཡར་འོང་ཤིག་ཤིག །ཉ་མོ་འགྱ་འགྱུར་མ་མང༌། །ཉ་མགོ་རྡོ་ལ་བརྡུང་འགྲོ། ༈ །ཆུ་བོ་མར་འགྲོ་ཤིག་ཤིག །ཉ་མོ་ཡར་འགྲོ་ཤིག་ཤིག །ཉ་མོ་འགྲོ་གྲངས་མ་མང༌། །ཉ་མགོ་རྡོ་ལ་བརྒྱག་ཡོང༌། ༈ །ཆུ་དང་བྱེ་མའི་ཁ་མཚམས། །རས་ཁ་གང་གི་དར་ལྕོག །དར་ལྕོག་ཆུང་དུ་མ་བསམ། །བཀྲ་ཤིས་རྟགས་བརྒྱད་འཛོམས་ཡོད། ༈ །ཆུང་འདྲིས་ཁྱོད་ལ་ཅི་དགོས། །ང་ལ་འདི་དགོས་ཟློས་དང༌། །ནམ་མཁའི་སྐར་མ་ཡིན་ཡང༌། །སྤྲིན་ལམ་བཙུགས་ནས་ལེན་ཡོང༌། ༈ །ཆུང་འདྲིས་འུ་གཉིས་གཏམ་པ། །རྡོ་ཐོག་རི་མོ་བྲིས་ཡོད། །ཆར་པ་ལོ་གསུམ་བབ་ན། །རི་མོ་ཡལ་ས་མ་རེད། ༈ །ཉ་མོ་ཡར་འགྲོ་གཅིག་ལ། །བྲིས་པའི་ཡིག་ཆུང་བསྐུར་ཡོད། །ཉ་མོ་མར་འགྲོ་གཅིག་ལ། །ཡིག་ལེན་མགྱོགས་ཀྱིས་བསྐུར་ཤོག ༈ །རྟ་གཅིག་ཡོད་ན་ཁྲིད་ཤོག །དྲེལ་གཅིག་ཡོད་ན་ཁྲིད་ཤོག །རྟ་དྲེལ་གཉིས་ཀ་མེད་ན། །ཁུར་སྒ་ལུང་ཐག་རྒྱོབ་ཤོག ༈ །རྟ་ཕོ་སེང་སེང་ཁྲོབ་ཁྲོབ། །ཁང་ལྟག་ཁང་ཞབས་སླེབས་བྱུང༌། །ཆུང་འདྲིས་ཡིན་ལེ་མ་ཤེས། །ཨ་ཡ་ཟེར་རྒྱུ་མ་རྙེད། ༈ །རྟ་ཕོ་སེང་སེང་ཁྲོབ་ཁྲོབ། །ཁང་ལྟག་ཁང་ཞབས་སླེབས་བྱུང༌། །ཕ་མ་ཁ་བཙན་ཆེ་ནས། །ཡར་ཤོག་ཟེར་རྒྱུ་མ་བྱུང༌། ༈ །རྟ་སྒ་རྟ་ལ་མཛེས་བྱུང༌། །ཏཱ་ལའི་ལོ་མ་མཛེས་བྱུང༌། །ལོ་འདབ་རེ་རེའི་རྩེ་ལ། །སངས་རྒྱས་རེ་རེ་འཁྲུངས་བྱུང༌། ༈ །དུ་བ་ཚགས་གང་འཐེན་སར། །མི་ཁ་དེ་འདྲ་ཡོད་དུས། །དུ་ཁུག་གློ་ལ་བཏགས་ན། །མི་ཁ་ཅི་འདྲ་ཡོད་ཡོང༌། ༈ །དྲོ་ནི་ཉི་མས་དྲོ་དུ། །བསིལ་ནི་ཟླ་བས་བསིལ་དུ། །དྲོ་རྒྱུ་ཉི་མ་བྱས་ན། །ཟླ་བ་དགོངས་པ་མ་འཚམས། ༈ །བདག་གི་དྲིན་ཆེན་ཕ་མ། །གསེར་སྲང་བརྒྱ་དང་མ་བརྗེས། །མཐའ་མར་གཤིན་རྗེའི་མདུན་ནས། །མི་བརྗེ་ཟེར་ས་མ་རྙེད། ༈ །མདའ་ལ་སྟོན་ཁ་
ཚེས་བྱུང༌། །སྟོན་ཁར་ལོ་ཐོག་སྨིན་བྱུང༌། །སྟོན་ཐོག་ལོ་ཐོག་སྨིན་ན། །རང་སེམས་བསམ་པ་དགའ་བྱུང༌། ༈ །མདའ་ནས་དགུན་ཁར་ཚེས་བྱུང༌། །མཚོ་མོ་དར་གྱིས་གཡོག་བྱུང༌། །མཚོ་ལ་རྒྱ་དར་ཆགས་ན། །རང་སེམས་བསམ་པ་དགའ་བྱུང༌། ༈ །མདའ་ནས་དགུན་ཟླ་ཚེས་བྱུང༌། །མཚོ་ལ་རྒྱ་དར་ཆགས་བྱུང༌། །མཚོ་བྱ་ངང་པ་ངེད་གཉིས། །རང་སེམས་བསམ་པ་དགའ་བྱུང༌། ༈ །མདའ་ལ་དགུན་ཟླ་ཚེས་བྱུང༌། །མཚོ་ལ་རྒྱ་དར་ཆགས་བྱུང༌། །ལྷ་བྱ་ཁྲུང་ཁྲུང་ངེད་གཉིས། །འགྲོ་བའི་དུས་ལ་བབ་བྱུང༌། ༈ །གནམ་དང་སྤྲིན་གཉིས་བར་ལ། །འབྲུག་གི་སྒོ་ང་བཞག་བྱུང༌། །སྒོ་ང་ཆག་ཆས་མེད་ན༑ །དཀོན་མཆོག་མཆོད་པ་འབུལ་འགྲོ། ༈ །གནམ་དང་སྤྲིན་གཉིས་བར་ནས། །
ཆར་པའི་སྤྲིན་པ་ཤིག་ཤིག །མར་འབབ་ས་ལ་བབ་དུས། །བདུད་རྩི་ཡིན་པར་བསྒོམ་འགྲོ། ༈ །ཕ་རིའི་རྡོ་རྗེའི་བྲག་ལ། །རི་བོང་མཚམས་ལ་བཞུགས་ཡོད། །གཞན་ལ་ཆོས་བཤད་བྱེད་མི། །རང་ལ་ཡར་མཆུ་མེད་འགི། ༈ །ཕ་རིའི་སྟར་ཁ་ཕུང་ཕུང༌། །ཚུར་རིའི་འོ་སེ་ཕུང་ཕུང༌། །མགུ་ན་ཕར་མགུ་ཚུར་མགུ། །མ་མགུ་ཁ་ཁ་སོ་སོར། ༈ །ཕ་རིའི་ལྕང་མ་ཚུར་འགུགས། །ཚུར་རིའི་ལྕང་མ་ཕར་འགུགས། །འགུག་ན་ཕར་འགུགས་ཚུར་འགུགས། །མ་འགུགས་ཁ་ཁ་སོ་སོར། ༈ །ཕ་རིའི་ལུང་ཆུང་ནང་ལ། །གཡུ་ཆུང་ཆར་པ་བབ་བྱུང༌། །གཡུ་ཆུང་མང་པོ་མི་དགོས། །དྲུག་དཀར་གཅིག་གིས་ཆོག་འགྲོ། ༈ །ཕ་རིའི་སྤང་དཀར་སྟེང་ན། །དཀར་པོའི་གུར་ཞིག་ཕུབ་བྱུང༌། །གུར་མཐའ་རླུང་གིས་བརྡེག་དུས། །ཆུང་འདྲིས་ཨེ་མིན་བསམ་བྱུང༌། ༈ །ཕ་རིའི་སྤང་དཀར་སྟེང་དུ། །དཀར་པོའི་གུར་གཅིག་ཕུབ་བྱུང༌། །གུར་དེ་ལྡིང་མ་ལྡིང་བསྐོར། །བློ་སེམས་བདེ་རྒྱུ་མ་བྱུང༌། ༈ །ཕ་རིའི་སྤང་དཀར་སྟེང་ལ། །མེ་ཏོག་དཀར་སེར་དམར་ལྗང༌། །རང་སེམས་དགའ་བའི་མེ་ཏོག །མཛུབ་མོའི་རྩེ་ལ་མཆོད་འགྲོ། ༈ །ཕ་རིའི་རྡོ་རྗེའི་བྲག་ལ། །གནམ་ལྕགས་ཕུར་པ་བརྡུང་ཡོད། །དེ་ལ་ཐུག་ཐུག་མ་བཟོ། །རིན་ཆེན་སྲོག་དང་བྲལ་འགྲོ། ༈ །ཕ་རིའི་སྤང་དཀར་སྟེང་ལ། །ར་མ་ལུག་གིས་གང་བྱུང༌། །སྤྱང་ཀི་གཅིག་རྒྱུགས་གཉིས་རྒྱུགས། །ར་མ་གཅིག་བསད་གཉིས་བསད། ༈ །ཕ་རིའི་སྤང་དཀར་སྟེང་ལ། །བ་རྒན་སོ་མེད་རྒྱབ་བྱུང༌། །དབྱར་རྩྭ་བཟའ་ལོང་མ་བྱུང༌། །སྤང་དཀར་རྙང་པས་བཙོག་ཐལ། ༈ །ཕར་བསམ་ཕར་ལ་མེད་ཀྱང༌། །ཚུར་བསམ་ལས་ཀྱིས་བསྐོས་སོང༌། །སྐྱིད་ན་བླ་མ་དཀོན་མཆོག །སྡུག་ན་ཚེ་སྔོན་ལས་རེད། ༈ །ཕུ་ནས་གངས་རི་དཀར་པོ། །མདའ་ནས་མཆོད་རྟེན་དཀར་པོ། །དཀར་པོ་འདྲ་གཉིས་ཐུག་དུས། །བྱམས་པ་ཐུག་སེམས་སྤྲོ་འགྲོ། ༈ །ཕྱི་ལ་དཀར་ཡོལ་དཀར་དཀར། །ནང་ལ་འོ་མ་དཀར་དཀར། །བསམ་པ་དཀར་དང་མི་དཀར། །དཀར་ཡོལ་ནང་ལ་ལྟ་ཆོག ༈ །ཕྱི་ལ་དམ་འབི་ནག་ནག །ནང་ལ་ཨ་རག་ནག་ནག །བསམ་པ་ནག་དང་མི་ནག །དམ་འབི་ནང་ལ་ལྟ་ཆོག ༈ །ཕྱི་ལ་ལྕགས་རིས་བསྐོར་ཡོད། །ནང་ལ་ལྕང་མ་བཙུགས་ཡོད། །ལྕགས་རི་ལྕང་མའི་རྩེ་ལ། །ཡིད་བཞིན་ནོར་བུ་བཞུགས་ཡོད། ༈ །བྱེ་རུ་དམར་པོའི་ཁོག་པ། །སྟོང་སྐུད་ལྗང་གུས་འཛེར་བྱུང༌། །ང་ནི་གཡུ་ཆུང་དྲུག་དཀར། །ཁོག་ཡང་གནང་རོགས་མཛད་ཤོག ༈ །དབུས་རྒྱུ་དབུས་ནས་ཁུར་ཤོག །ཤེལ་སྒོ་གྲུ་བཞི་ཁུར་ཤོག །ཤེལ་སྒོ་གྲུ་བཞི་ཁུར་ནས། །རོགས་དགའི་ཞལ་རས་ལྟ་འགྲོ། ༈ །དབྱར་ཀར་སྤང་ལ་སྐྱེས་བྱུང༌། །སྤང་ལ་མེ་ཏོག་འཁྲུངས་བྱུང༌། །སྤང་བྱ་འཇོལ་མོ་ངེད་གཉིས། །རང་སེམས་བསམ་པ་དགའ་བྱུང༌། ༈ །དབྱར་ཆུ་ཆེ་ན་ཆེ་ཤོག །དགུན་ཆུ་ཆུང་ན་ཆུང་ཤོག །རྟ་ཕོ་རྐྱང་ཕྲུག་ངེད་གཉིས། །ཆུ་མགོ་ཕུག་ནས་བསྐོར་འགྲོ། ༈ །འབྲས་སྤུངས་ཤེལ་དཀར་མདའ་ནས། །རྟ་ལས་བོང་བུ་
མགྱོགས་པ། །བོང་བུ་མགྱོགས་པ་མ་རེད། །སྒ་པ་བས་ཀྱང་མགྱོགས་སོང༌། ༈ །འབྲི་མར་སེར་པོ་གསེར་རེད། །དཀར་པོའི་འོ་ཞོ་དངུལ་རེད། །རིན་ཆེན་གསེར་གྱི་འབྱུང་གནས། །ཕ་མ་སྐྱིད་པའི་སྨན་ལྗོངས། ༈ །མི་སྐྱིད་མི་ཡི་ལུང་པ། །ཉི་མ་ལོ་བས་རིང་བྱུང༌། །ཉི་མ་རིང་ལེ་མ་རེད། །རང་སེམས་སྡུག་ལེ་ཡིན་འགྲོ། ༈ །རྫ་ཁོ་ཆག་ན་མི་སྡུག །རྫ་ལུང་ཡུས་ན་མི་སྡུག །ཟི་ལིང་ནང་དུ་འགྲོ་དུས། །རྫ་ཁོ་སིལ་མ་ཉོ་ཆོག ༈ །རྫ་མགོ་ཤེལ་གྱི་མཆོད་རྟེན། །རྫ་སྐེད་ནགས་རི་ཕྱུག་མོ། །རྫ་སྨད་སྤང་རི་སྔོན་མོ། །ཡུ་མོ་འཁོར་ས་ཨེ་རེད། ༈ །ཡག་ནི་རས་ཁྲ་ཡག་དུ། །འཇམ་ནི་འབུ་རས་འཇམ་དུ༑ །འཇམ་རྒྱུ་འབུ་རས་བྱས་ན། །རས་ཁྲ་དགོངས་པ་མ་འཚམས། ༈ །ཡར་འབྲོག་གཡུ་མཚོའི་ཁ་ནས། །ངང་པས་ངང་ཕྲུག་ཁྲིད་བྱུང༌། །ངང་པས་ངང་ཕྲུག་ཁྲིད་དུས། །ང་རང་ཆུང་འདྲིས་དྲན་བྱུང༌། ༈ །ཡར་ལུང་ཤེལ་གྱི་སྒྲུབ་ཕུག །མཚམས་པ་བརྒྱ་དང་བརྒྱད་ཅུ། །མཚམས་གཡོག་གཅིག་ཀྱང་མི་འདུག །མཚམས་པ་སྐུ་ཚེ་རིང་འགྲོ། ༈ །གཡུ་ཐོག་ཟམ་པའི་དཀྱིལ་ནས། །མ་བསམ་གཡུ་ཞིག་རྙེད་བྱུང༌། །ནམ་མཁའི་བླ་མ་དཀོན་མཆོག །དྲུག་དཀར་ཡིན་པར་བསྒོམ་འགྲོ། ༈ །གཡུ་ཐོག་ཟམ་པའི་དཀྱིལ་ནས། །མ་བསམ་གཡུ་ཞིག་རྙེད་བྱུང༌། །གཡུ་འདི་དྲུག་དཀར་ཡིན་ན། །ང་རང་བླ་མ་དཀོན་མཆོག ༈ །གཡུ་ཐོག་ཟམ་པའི་སྟེང་ནས། །མགྲོན་པོ་བརྒྱ་བཤར་སྟོང་བཤར། །རང་སེམས་དགའ་བའི་མགྲོན་པོ། །རིན་ཆེན་གསེར་ལས་དཀོན་འདུག ༈ །གཡུ་ཐོག་ཟམ་པའི་སྟེང་ནས། །རྒྱལ་བས་ཆིབས་རྒྱུགས་བླང་བྱུང༌། །ཟམ་པའི་འོག་གི་ཉ་མོ། །མཐོ་རིས་ཐར་ལམ་བཀོད་སོང༌། ༈ །གཡུ་མཚོའི་སྔོན་མོའི་ནང་ནས། །དཔག་བསམ་ལྗོན་ཤིང་འཁྲུངས་བྱུང༌། །དཔག་བསམ་ལྗོན་པའི་ཤིང་གི། །ལོ་མ་དགུང་དང་མཉམ་བྱུང༌། ༈ །ར་མ་རི་ལ་རྒྱུགས་ཐལ། །རེའུ་ཕྲུག་ཐང་ལ་ལུས་ཐལ། །རྫི་བོ་བྱང་ཆུབ་སེམས་དཔའ། །མ་བུ་ཐུག་ཐབས་བྱེད་རོགས། ༈ །རང་ཡུལ་ཕྱོགས་ནས་འོང་དུས། །སུ་གཅིག་སེམས་ལ་མ་དྲན། །ལ་མོ་གཅིག་རྒྱག་གཉིས་རྒྱག །བདག་གི་ཕ་མ་དྲན་བྱུང༌། ༈ །རི་བོ་མཐོན་པོའི་རྩེ་ནས། །འབོད་པ་ལན་གསུམ་བྱས་བྱུང༌། །ཆུང་འདྲིས་ཡིན་ལེ་མ་ཤེས། །ཨ་ཡ་ཟེར་རྒྱུ་མ་རྙེད། ༈ །རོགས་དགའ་རྒྱང་ལ་རྒྱུགས་སོང༌། །མ་འོང་བར་ལ་སྒུག་འདུག །མདའ་མོ་སྤང་ལ་ཟུག་སོང༌། །མ་ལོན་བར་ལ་འཐེན་འདུག ༈ །རོགས་དགའ་ཨ་གསར་ཆེ་བྱུང༌། །ཤོག་བུས་དོ་མ་དྲུབ་བྱུང༌། །
གོམ་གསུམ་སྤོ་ལོང་མ་རེད། །ཡར་ཧྲལ་ཕྱི་ཧྲལ་རེད་སོང༌། ༈ །རྭ་སྒྲེང་སྤྲུལ་པའི་ལྷ་ཁང༌། །སྐོར་ར་བསྐོར་བསམ་ཡོད་ཀྱང༌། །ཕུ་མདོ་ལྕགས་ཀྱི་ཟམ་པ། །བར་དོའི་འཕྲང་ལས་བཙན་བྱུང༌། ༈ །ཤར་ཕྱོགས་གངས་རིའི་རྩེ་ནས། །བཅྭོ་ལྔའི་དུང་ཟླ་ཤར་བྱུང༌། །རྗེ་བཙུན་སྒྲོལ་མ་དཀར་མོའི། །ཞལ་རས་ཡིན་ན་བསམ་བྱུང༌། ༈ །ཤར་རི་དམའ་ལེ་མ་རེད། །ནུབ་རི་མཐོ་ལེ་མ་རེད། །ཐང་དཀར་རྒོད་པོ་ངེད་གཉིས། །བསམ་པ་མེད་ལེ་མ་རེད། ༈ །ཤར་ཕྱོགས་རི་བོའི་རྩེ་ནས། །དཀར་གསལ་ཟླ་བ་ཤར་བྱུང༌། །མ་གཅིག་ཨ་མའི་ཞལ་རས། །ཡིད་ལ་ལྷག་པར་མཛེས་བྱུང༌། ༈ །ཤེལ་དཀར་པདྨའི་རི་ལ། །མཚམས་པ་བརྒྱ་དང་བརྒྱད་ཅུ། །མཚམས་གཡོག་གཅིག་ཀྱང་མི་དགོས། །
ལྷ་བྱ་གོང་མོས་གཡོག་འགྲོ། ༈ །ཤྭ་བ་རྭ་ཅོ་རིང་ཡང༌། །གནམ་གྱི་ཀ་བ་མི་ལོ། །རི་བོང་གཟུགས་པོ་ཆུང་ཡང༌། །ལ་མོ་གཅིག་རྒྱགས་གཉིས་རྒྱགས། ༈ །གསེར་བྱ་ངང་པ་ཆ་གཅིག །མཚོ་ལ་འཇུག་པ་མཐོང་བས། །ང་རང་ཆུང་འདྲིས་བྱམས་པ། །རྒྱུད་ལ་ཡང་ཡང་འཁོར་བྱུང༌། ༈ །བསམ་ནི་ལྷ་སར་བསམ་བྱུང༌། །བརྐོས་ནི་ཆབ་མདོ་བརྐོས་ཐལ། །བརྐོས་རྒྱུ་ཆབ་མདོ་བྱས་ན། །ལྷ་ས་དགོངས་པ་མ་འཚམས། ༈ །བསམ་བསམ་མཛོ་མོ་དཀར་མོ། །བསམ་ཚོད་འོ་མ་མི་གདའ། །མ་བསམ་སྟོ་ལེ་ཁྲ་བོ༑ །འོ་མའི་རྒྱ་མཚོ་འཁྱིལ་བྱུང༌། ༈ །བསིལ་ནི་ཟླ་བས་བསིལ་དུ། །དྲོ་ནི་ཉི་མས་དྲོ་དུ། །བསིལ་རྒྱུ་ཟླ་བ་བྱས་ན། །ཉི་མ་དགོངས་པ་མ་འཚམས། ༈ །སྲན་མ་བཟའ་
བསམ་འགི་ན། །རིབ་མའི་ཕག་ནས་གབ་ཤོག །རོགས་དགའ་འདྲིས་བསམ་འགི་ན༑ །རབ་གསལ་ནང་ནས་གབ་ཤོག ༈ །ལྷ་ཤིང་ཤུག་པའི་རྩེ་ལ། །ལྷ་བྱ་ཁུ་བྱུག་བབ་བྱུང༌། །ཁྲ་དང་རི་མོ་མེད་དེ། །ང་རང་བསམ་པ་དགའ་བྱུང༌། ༈ །ལྷ་སའི་གསེར་ཁང་སྟེང་ནས། །གསེར་གྱི་རྔ་ཞིག་བརྡུང་བྱུང༌། །བརྡུང་ན་སྐད་ཀྱང་འགི་དེ། །བཙོང་ན་གོང་ཡང་ཁུག་འདུག ༈ །ལྷ་སའི་ལྕགས་པོ་རི་ནས། །ལྕགས་ཀྱི་རྔ་ཞིག་བརྡུང་བྱུང༌། །བརྡུང་ན་སྐད་ནི་མི་འདུག །བཙོང་ཡང་གོང་ནི་མི་ཁུག ༈ །ལྷ་སའི་བར་སྐོར་ནང་ནས། །གསེར་གྱི་རྔ་ཞིག་བརྡུང་བྱུང༌། །གསེར་རྔ་ཆུང་དུ་མ་བསམ། །ང་རང་བསམ་པ་དགའ་བྱུང༌། ༈ །ལྷ་སའི་སྐོར་ལམ་ནང་ནས། །མ་བསམ་ཕྲེང་བ་རྙེད་བྱུང༌། །
ཕྲེང་བ་མ་ཟད་བར་དུ། །ཕྲེང་ལུང་བརྗེ་རྒྱུ་མ་བྱུང༌། ༈ །ལྷ་སའི་སྐོར་ལམ་ནང་ནས། །གོས་ཆེན་རྡོག་སྒྲིལ་རྙེད་བསམ། །ལྟ་ཡག་རྟོག་ཡག་བྱེད་དུས། །འབའ་ལ་རྡོག་སྒྲིལ་རེད་འདུག ༈ །ལྷ་སའི་སྐོར་བསམ་ནང་ནས། །འབའ་ལ་རྡོག་སྒྲིལ་རྙེད་བསམ། །ལྟ་ཡག་རྟོག་ཡག་བྱེད་དུས། །གོས་ཆེན་རྡོག་སྒྲིལ་རེད་འདུག །
བསམ་ཚུལ་འབྲི།
སྡེ་དགེ་ཚེས་བཅུ་སྒྲོལ་མ་ལ་ཨ་རིའི་གཟེངས་རྟགས་ཐོབ་པ།