སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼བཞི་པ་༽
སྡེ་དགེ་རྒྱལ་རབས་རིན་ཆེན་ཕྲེང་མཛེས། (ཚན་པ་བཞི་པ།) མཛད་པ་པོ་བར་མ་མཁན་པོ་ངེས་དོན།
རྒྱལ་རབས་བཅུ་བཞི་པ་ཁྲི་རབས་བརྒྱད་པ་བླ་ཆེན་བློ་གྲོས་རྒྱ་མཚོ་ནི། དེ་ཉིད་ལས། བླ་མ་ཆེན་པོ་བློ་གྲོས་རྒྱ་མཚོ་ནི། །བླ་ཆེན་ཕུན་ཚོགས་བསྟན་པ་དབུས་གཙང་དུ། །ཕེབས་ཚེ་གདན་སའི་ཁུར་བཞེས་རྒྱལ་ཚབ་གནང་། །ཕྱིར་ཕེབས་གྲུབ་ནས་བཀྲ་ཤིས་ཆོས་རྫོང་དང་། །ཛཾ་ཐོག་ཕོ་བྲང་ཆེན་པོ་ཟུར་བཞུགས་མཛད། །དབུ་བླ་གོང་སྨོས་དག་དང་ཨེཝཾ་པ། །དཔལ་ལྡན་ཆོས་སྐྱོང་མཁས་བཙུན་ཆོས་ཀྱི་རྗེ། །བསྟན་འཛིན་རྡོ་རྗེ་ལ་སོགས་བླ་མར་བཀུར། །གཞན་ཡང་དབུས་གཙང་གྲྭ་ས་མཆོག་ཏུ་ཕེབས། །གོང་ས་མཆོག་དང་དཔལ་ལྡན་ས་སྐྱ་པ། །ངོར་ཀྱི་བསྟན་འཛིན་དམ་པ་མཆོག་རྣམས་ལ། །ཟབ་ཆོས་འགའ་ཞིག་གསན་ཅིང་ཁྱད་པར་དུ། །ཤར་ཆེན་རིན་ཆེན་མི་འགྱུར་རྒྱལ་མཚན་པར། །ཡོངས་རྫོགས་དགེ་སློང་སྡོམ་པ་བྱང་སྡོམ་དང་། །དབང་བསྐུར་རྗེས་གནང་བྱིན་རླབས་མདོ་སྔགས་བཅུད། །གསུང་ངག་ལམ་འབྲས་ཟབ་ཁྲིད་ལེགས་པར་གསན། །སྟོན་པའི་ཞལ་སྐྱིན་ཇོ་བོ་རྣམ་གཉིས་གཙོས། །དབུས་གཙང་གནས་རྟེན་རྣམས་དང་རིས་བྲལ་གྱི། །མཁན་སློབ་སྡེ་ལ་མཆོད་འབུལ་བསྙེན་བཀུར་སོགས། །གཅེན་པོ་ཁྲི་ཆེན་བླ་མ་ཕེབས་སྐབས་བཞིན། །རྣམ་དཀར་མཛད་པ་རྒྱ་ཆེན་གནང་བར་མཛད། །དེ་བཞིན་ཕྱིས་སུ་རྫོགས་སྤྲུལ་ཉི་སྤྲུལ་སོགས། །དབུ་བླར་བཀུར་ཞིང་ཆོས་འབྲེལ་གསན་པར་གནང་། །གཅེན་པོ་ཕུན་ཚོགས་མཚན་ཅན་གང་གཤེགས་ནས། །ལྷུན་གྲུབ་སྟེང་ཕེབས་གདན་སའི་ཁུར་བཞེས་སྐྱོང་། །བསྟན་དང་བསྟན་འཛིན་བསྙེན་བཀུར་མཆོད་འབུལ་དང་། །རྒྱུན་དང་དུས་ཀྱི་དུས་མཆོད་བསྟན་རྒྱུན་རིགས། །མངའ་རིས་སྣོད་བཅུད་འཕེལ་རྒྱས་བདེ་ཐབས་སོགས། །ལུགས་གཉིས་བཀའ་ཁྲིམས་མཛད་སྒོ་ཡབ་མེས་མཆོག །གོང་མ་དག་གིས་སྲོལ་བཏོད་རྒྱུན་ཇི་བཞིན། །མ་ནོར་ཚུལ་བཞིན་ལེགས་པར་སྐྱོང་མཛད་ཅིང་། །རྟེན་བཞེངས་གསར་བསྐྲུན་གནང་བ་འདི་ལྟ་སྟེ། །འཛོམ་ཐོག་ཕོ་བྲང་ཆེན་པོར་སྟོན་པ་མཆོག །གནས་བརྟན་བཅུ་དྲུག་སྐུ་གདུང་ཆ་བརྒྱད་དང་། །གྲུབ་ཆེན་བརྒྱད་ཅུ་ལ་སོགས་བླ་མའི་སྐུ། །གཞན་ཡང་ལྷག་པའི་ལྷ་མཆོག་དུ་མ་ཡི། །སྐུ་བརྙན་གསེར་ཟངས་བ་སོ་ཙནྡ་སོགས། །ལེགས་གྲུབ་ཁྱད་མཚར་བརྒྱ་ཕྲག་ཙམ་དང་ནི། །དེ་བཞིན་གསུང་རྟེན་བཀའ་དང་དགོངས་འགྲེལ་པོད། །ཁྱད་པར་ཡབ་རྗེ་ཆོས་ཀྱི་རྒྱལ་པོ་ཡིས། །བཞེངས་གནང་ཇི་བཞིན་ཐུན་མོང་མ་ཡིན་པའི། །མགོན་ཁང་གུར་ཞལ་བཀའ་བསྟོད་བཅས་པ་ཡི། །རྟེན་དང་རྟེན་གཏོར་ཚད་དང་མཚན་ཉིད་ལྡན། །གསར་བསྐྲུན་དེ་དག་རབ་གནས་ཐུན་མོང་དང་། །ཐུན་མོང་མིན་སོགས་གནས་གསར་རྡོ་རྗེ་འཆང་། །ངག་དབང་ཀུན་དགའ་ལེགས་པའི་འབྱུང་གནས་ཀྱིས། །སྨིན་རྒྱས་མཛད་ཅིང་གཞན་ཡང་རྣམ་འདྲེན་མཆོག །སི་ཏུ་པ་དང་མཁན་ཆེན་དཔལ་ཆོས་པ། །སངས་རྒྱས་ཡེ་ཤེས་སོགས་ཀྱིས་རབ་གནས་མཛད། །ལྷུན་གྲུབ་སྟེང་དུ་གཟིམ་ཁང་གསར་པའི་ནང་། །གསེར་ཟངས་ལས་གྲུབ་རྡོ་རྗེ་འཆང་དབང་ལ། །གྲུབ་ཆེན་བརྒྱད་ཅུས་བསྐོར་དང་གནས་བཅུ་དང་། །གཞན་ཡང་བླ་མ་སངས་རྒྱས་ཆོས་སྲུང་གི། །སྐུ་བརྙན་ངོ་མཚར་ཅན་སོགས་སྐུ་རྟེན་རིགས། །བྲིས་འབུར་སྔ་ཕྱིར་བསྡོམས་པ་སྟོང་རྩ་སྟེ། །ཐུབ་མཆོག་གསུང་རབ་བཀའ་འགྱུར་རིན་པོ་ཆེ། །གསེར་བྲིས་ན་བཟའ་ལ་སོགས་ཁྱད་ནོར་ཅན། །བརྒྱ་ལས་གསུམ་ལྷག་བསྟན་བཅོས་རིག་གནས་སྐོར། །པུསྟི་ཀ་ལྔ་བཅུ་ཉེ་བར་པར་དུ་བཀོད། །ཆོས་སྦྱིན་སྒོ་ཕྱེས་མཁན་ཆེན་དཔལ་ཆོས་ཀྱི། །སྐུ་གདུང་ལ་སོགས་ཐུགས་རྟེན་མང་དག་གི། །གསར་བསྐྲུན་མཐུན་རྐྱེན་བཀའ་དྲིན་སྐྱོང་བར་མཛད། །ཤར་ཆེན་བཞེད་སྐོང་ཡིད་ལྷུང་ལྷ་རྒྱལ་སྲང་། །ཆོས་སྡེ་ལ་སོགས་དགོན་གནས་གསོ་སྤེལ་གནང་། །ཐུགས་རྗེ་ཆེན་པོའི་སྙིང་པོ་དུང་ཕྱུར་གཅིག །ཞལ་གསུང་ལ་སོགས་རྣམ་དཀར་གྱི་མཛད་པ། །རླབས་ཆེན་ངོ་མཚར་ཆེས་ཆེར་ཆེ་བར་མཛད། །ཧོར་ཁག་ནང་མ་གཤིན་པར་ལེགས་འདུམ་གྱི། །བཀའ་སྩལ་གནང་བར་བསྟན་དགྲ་མ་ཟུར་གྱིས། །མ་ཉན་མཐའ་མི་རྒྱལ་ཁག་དཔུང་བཀུག་སྟེ། །རྒྱལ་ཁབ་ཆོས་སྡེ་འདིར་ཡང་ཞབས་འདྲེན་གྱི། །ངན་སྦྱོར་རྩོམ་ཚེ་དེ་ལ་དཔུང་གི་ཚོགས། །ཡན་ལག་བཞི་ལྡན་གཡུལ་ཆེན་བཏེགས་མཛད་ནས། །གོང་གི་ལས་དབང་བསོད་ནམས་སྟོབས་ཤུགས་དང་། །ཡབ་མེས་བླ་མ་ལྷ་སྲུང་མཐུ་རྩལ་གྱིས། །མ་ཟུར་རྒྱབ་བརྟེན་མཐའ་མི་དཔུང་དང་བཅས། །རྩ་སྦུར་མེ་ལ་བསྲེགས་བཞིན་ཐལ་བར་བཏང་། །རྔམ་བརྗིད་དྲག་ཤུལ་ཆེ་འབར་ཕྲིན་ལས་ཀྱིས། །ལོག་ལྟའི་སྡེ་ཚོགས་དོན་སྙིང་ལྐོག་མར་འཕོས། །སུས་ཀྱང་གླགས་ལྟ་བྲལ་བའི་དབུ་རྨོག་བཙན། །དེ་བཞིན་རྒྱ་ཡིས་ལེགས་གསོལ་ཧོར་སེར་གྱིས། །གཏང་རག་ཕུལ་སོགས་ཕྱོགས་ལས་རྣམ་པར་རྒྱལ། །ཞེས་སོགས་གསུངས་པ་ལྟར། སྲས་གསུམ་པ་བླ་མ་བློ་གྲོས་རྒྱ་མཚོ་ནི། ཐོག་མ་ཉིད་ནས་དབང་པོ་དུལ་ཞིང་ངང་ཚུལ་བཟང་བ། ཐོས་བསམ་སྒོམ་པ་ལྷུར་བྱེད་པ། ལུགས་གཉིས་ཀྱི་གཙུག་ལག་ལ་མཁས་པ། བླ་ཆེན་ཕུན་ཚོགས་བསྟན་པ་དབུས་སུ་ཕེབས་སྐབས་གདན་སའི་རྒྱལ་ཚབ་མཛད། མཁན་ཆེན་དཔལ་ལྡན་ཆོས་སྐྱོང་། སི་ཏུ་ཆོས་ཀྱི་འབྱུང་གནས། ཞུ་ཆེན་ཚུལ་ཁྲིམས་རིན་ཆེན་སོགས་བསྟེན་ནས་རིག་པའི་གནས་སྤྱི་དང་ཁྱད་པར་དུ་གསོ་བ་རིག་པའི་རྒྱུད་བཞི་སོགས་ལ་སྦྱངས་པ་མཐར་ཕྱིན་ནས་གཡུ་ཐོག་ཡོན་ཏན་མགོན་པོའི་དཔལ་ལ་འགྲན་པར་གྱུར་ཏེ། ནད་སྣ་ཚོགས་ཀྱིས་ཉེན་པའི་སྐྱེ་བོ་གྲངས་མེད་པ་དུཿཁ་ལས་གྲོལ་བར་མཛད། ནང་རིག་པ་མདོ་སྔགས་གཞུང་ལུགས་རྒྱ་མཚོ་ལྟ་བུའི་ཚིག་དོན་ཐུགས་ལ་ཆུད་པར་མཛད་དེ་ངོར་པའི་ཆག་མེད་རྣམ་བཞི་སོགས་ཡི་དམ་གྱི་ལྷ་མང་པོའི་བསྒོམ་བཟླས་ཀྱི་ཉམས་ལེན་དང་། ཆོས་གྲྭ་འདི་ཉིད་ཀྱི་ཚོགས་འདོན་གྱི་རིགས་སུ་གཏོགས་པའི་ཆོས་སྤྱོད་དང་སྒྲུབ་དཀྱིལ་མང་པོའི་ཕྱག་ལེན་ཕྲ་མོ་ཚུན་ཆད་ལའང་གཞན་དྲིན་མི་འཇོག་པར་མཛད་ཅིང་ཚོགས་ཀྱི་དབུ་བཞུགས་སུ་ཕེབས། དབུས་གཙང་ཕྱོགས་སུ་ཕེབས་ནས་རྒྱལ་མཆོག་བདུན་པ་དང་ས་ངོར་གྱི་བསྟན་འཛིན་དུ་མ། ཁྱད་པར་དུ་ཤར་ཆེན་ཀླུ་ལྡིང་མི་འགྱུར་རྒྱལ་མཚན་ལས་བསྙེན་རྫོགས་ཀྱི་སྡོམ་པ། བྱང་ཆུབ་སེམས་ཀྱི་སྡོམ་པ། གསུང་ངག་ལམ་འབྲས་སོགས་གདམས་ཟབ་རྒྱ་མཚོ་ལྟ་བུ་གསན། སྟོན་པའི་ཞལ་སྐྱིན་ཇོ་བོ་རྣམ་གཉིས་གཙོས་དབུས་གཙང་གནས་བརྟེན་རྣམས་དང་། རིས་བྲལ་གྱི་མཁན་སློབ་དགེ་འདུན་གྱི་སྡེ་དང་བཅས་པ་ལ་མཆོད་འབུལ་བསྙེན་བཀུར་སོགས་གཅེན་པོ་ཁྲི་ཆེན་བླ་མ་ཕེབས་སྐབས་བཞིན་རྣམ་དཀར་གྱི་མཛད་པ་རྒྱ་ཆེན་པོ་གནང་བར་མཛད། གཅེན་པོ་གཤེགས་རྗེས་གདན་སའི་ཁྲི་རབས་བརྒྱད་པའི་ཁུར་བཞེས། རྫོགས་ཆེན་འགྱུར་མེད་ཐེག་མཆོག་བསྟན་འཛིན། ཀཿཐོག་དྲི་མེད་ཞིང་སྐྱོང་མགོན་པོ། ཉི་སྤྲུལ་པདྨཐེག་མཆོག་སོགས་དབུ་བླར་བཀུར། མཁན་ཆེན་དཔལ་ལྡན་ཆོས་སྐྱོང་སྐུ་གཤེགས་པ་ལ་ཤར་ཆེན་མི་འགྱུར་རྒྱལ་མཚན་སྤྱན་དྲངས་ཏེ་ལུགས་ཟུང་གི་ཕྲིན་ལས་ཡབ་མེས་གོང་མའི་སྲོལ་བཞིན་སྐྱོང་། རྟེན་བཞེངས་གསར་བསྐྲུན་གནང་བའང་ཛཾ་ཐོག་ཕོ་བྲང་དུ་ལྷ་ཁང་དང་མགོན་ཁང་རྟེན་དང་བརྟེན་པར་བཅས་གསར་དུ་བཞེངས་ཏེ། དེར་སངས་རྒྱས་བྱང་སེམས་ཀྱི་སྐུ་བརྙན་གསེར་ཟངས་ལས་བྱས་པ་དང་། ཙནྡ་དཀར་དམར་ལས་བྱས་པ་མང་པོ་བཞེངས། རྒྱལ་བའི་བཀའ་འགྱུར་རོ་འཚལ་དང་ས་སྐྱ་བཀའ་འབུམ་སོགས་ཀྱི་གླེགས་བམ་མང་པོ་གླེགས་ཤིང་གླེགས་ཐག་ན་བཟའ་སོགས་ཕུན་སུམ་ཚོགས་པ་ལ་མཆོད་པའི་བྱེ་བྲག་བསམ་གྱིས་མི་ཁྱབ་པའི་བཀུར་སྟི་དང་བཅས་ཏེ་བཞུགས་སུ་གསོལ་བ་ལ་མཁན་ཆེན་དཔལ་ལྡན་ཆོས་སྐྱོང་དང་། ཡར་ཀླུང་མཁན་ཆེན་ངག་དབང་ཀུན་དགའ་ལེགས་པའི་འབྱུང་གནས། སློབ་དཔོན་སངས་རྒྱས་ཡེ་ཤེས་སོགས་ཀྱིས་རབ་ཏུ་གནས་པར་མཛད་དོ། ཛཾ་ཐོག་དགོན་དུ་དགེ་འདུན་གྱི་ཀུན་དགའ་ར་བ་རྟེན་དང་བརྟེན་པར་བཅས་པ་གསར་དུ་བསྐྲུན་ཏེ། དེར་དགེ་འདུན་གྱི་ཚོགས་ཆེན་པོ་བསྡུས་ནས་ངོར་པའི་དཀྱིལ་འཁོར་ཆེན་པོ་ལྔའི་སྒྲུབ་མཆོད་ཡོད་པ་ལ་བཅའ་སྒྲིགས་ཆོས་དང་མཐུན་པར་བསྡམས་ཤིང་། གསར་དུ་རྗེ་བཙུན་རྡོ་རྗེ་རྣལ་འབྱོར་མའི་དཀྱིལ་འཁོར་གྱི་སྒྲུབ་མཆོད་ཟླ་རེའི་ཚེས་བཅུ་ལ་རྒྱུན་མི་ཆད་པར་འཛུགས་པ། ས་ངོར་དང་ལྗོངས་འདིའི་དགོན་སྡེ་རིས་སུ་མེད་པར་མཆོད་འབུལ་རྒྱ་ཆེན་པོ་བྱེད་པ། ཤར་ཆེན་གྱི་བཞེད་སྐོང་ཆེད་དུ་ཡིད་ལྷུང་ལྷ་རྒྱལ་སྲང་གི་ཆོས་སྡེ་དང་། གཞན་ཡང་ཁྲོམ་རྡོ་ཁོ་དགོན། འཛིང་སྟག་མོ་དགོན། རྫོགས་ཆེན་དགོན། རྡོ་བྲག་དགོན་སོགས་གསོ་སྤེལ་ལ་མཐུན་རྐྱེན་གནང་བ། ལྷུན་གྲུབ་སྟེང་འདི་ཉིད་དུ་གཟིམ་ཁང་གསར་པའི་ནང་དུ་སྐུ་རྟེན་གསེར་ཟངས་ལས་གྲུབ་པའི་རྡོ་རྗེ་འཆང་གི་སྐུ་ལ་གྲུབ་ཆེན་བརྒྱད་ཅུའི་བསྐོར་བ། ཐུབ་པ་གནས་བརྟན་གཙོ་འཁོར། གཞན་ཡང་སངས་རྒྱས་བྱང་སེམས་ཆོས་སྲུང་སོགས་ཀྱི་སྐུ་བརྙན་ངོ་མཚར་ཅན་སྟོང་རྩ་ལོངས་པ། གསུང་རྟེན་གསེར་བྲིས་བཀའ་འགྱུར་པུསྟཀ་བརྒྱ་དང་གསུམ། བསྟན་བཅོས་ཀྱི་སྐོར་པུསྟཀ་ལྔ་བཅུ་ཙམ་པར་དུ་བཀོད་པ་དང་། ཐུགས་རྟེན་མཁན་ཆེན་དཔལ་ལྡན་ཆོས་སྐྱོང་གི་སྐུ་གདུང་ཁྱད་འཕགས་བྱིན་རླབས་ཀྱི་གཟི་འོད་འབར་བ་བསྐྲུན་ནས་བསམ་གྲུབ་མཐོང་གྲོལ་ཆེན་མོའི་ནང་དུ་བཞུགས་སུ་གསོལ་བ་སོགས་བསམ་གྱིས་མི་ཁྱབ་པའི་བཀའ་དྲིན་བསྐྱངས། ཐུགས་རྗེ་ཆེན་པོའི་སྙིང་པོ་དུང་ཕྱུར་ཞལ་ནས་གསུངས་བ་སོགས་རྣམ་དཀར་གྱི་མཛད་ཕྲིན་ཆེས་ཆེར་འཕེལ། དགུང་ལོ་བཞི་བཅུ་ཞེ་གསུམ་མ་བརྒལ་གྱི་བར་དུ་རབ་བྱུང་གི་བརྟུལ་ཞུགས་གནང་བ་ལ་དབོན་པོ་ཆོས་སྐྱོང་མགོན་པོ་ལས་འཕེལ་བའི་གདུང་རིགས་ཁྱད་གཙང་འོང་དཀའ་བར་དགོངས་ནས་ཤར་ཆེན་དང་སི་ཏུ་ཟུང་གིས་གདུང་སྤེལ་དགོས་ཚུལ་གསུངས་ཡང་ཞལ་གསར་ཅུང་མ་གནང་། སླར་ཡང་ས་སྐྱ་གོང་ལ་ཞུས་ནས་གདུང་སྤེལ་དགོས་ཚུལ་བཀའ་ནན་པོ་ཕེབས་པ་ལ་རབ་བྱུང་གི་སྡོམ་པ་ཕུལ་ནས་རྒྱལ་མཆོག་བདུན་པའི་སྐུ་དབོན་བཀྲ་ཤིས་དབང་མོ་ཁབ་ཏུ་བཞེས་སྲས་ས་དབང་བདེ་དགའ་བཟང་པོ་འཁྲུངས་། གདུང་སྤེལ་མཛད་ནས་ལོ་དགུ་ཟིན་ཙམ་དགུང་གྲངས་ང་གཉིས་པ་ཤིང་རྟ་ཕྱི་ལོ་༡༧༧༤་ལོར་སྐུ་གཤེགས་པ་ལ་ས་དབང་བཟང་པོ་སྐུ་ནར་མ་སོན་གྱི་བར་དུ། རྒྱལ་རབས་བཅོ་ལྔ་པ་རྗེ་བཙུན་དབྱངས་ཅན་སྒྲོལ་མས་རྒྱལ་ཚབ་མཛད། རྗེ་བཙུན་མ་འདི་ནི་གཞོན་ནུ་ནས་ངོར་ཨེཝྂ་པའི་རིང་ལུགས་ལ་རབ་ཏུ་བྱུང་། སྐུ་དབོན་རྣམས་ཀྱི་དབུ་བླ་ཁག་དང་། ངོར་ནས་ཁང་སར་མཁན་ཆེན་ཆོས་སྐྱོང་བཟང་པོ་གདན་དྲངས་པ་དང་། ངག་དབང་ཤེས་རབ། ཤར་པ་ཞབས་དྲུང་། ཞུ་ཆེན་དགེ་ལེགས་ལྷུན་གྲུབ། སི་ཏུ་པའི་མཆོག་སྤྲུལ་དབོན་བཅས། ཀཿཐོག་ཞིང་སྐྱོང་སོགས་རིས་སུ་མ་ཆད་པའི་བླ་མ་མང་པོ་བསྟེན་ནས་ཐུགས་དམ་ཉམས་བཞེས་འགྲན་ཟླ་མེད། གཅེན་བླ་མ་བློ་གྲོས་རྒྱ་མཚོའི་དགོངས་རྫོགས་ཚུལ་བཞིན་དུ་བསྒྲུབས། ལུགས་ཀྱི་གཙུག་ལག་ལ་བློ་གྲོས་རྒྱས་པས་ཆབ་འབངས་ཆོས་ཀྱིས་བསྐྱངས། ལེགས་སྤེལ་ཉེས་འགོག་གི་ཚུལ་ལ་ཐུགས་གཟུར་བོར་གནས་ཤིང་། རང་སྡེ་བྱམས་པས་སྐྱོང་བ་དང་། གཞན་སྡེ་ཐབས་ཀྱིས་མནན་པར་བློ་སྟོབས་ཆེ། སྦྲ་ཐོ་དགོན། རྫོང་སར་དགོན། འཁོར་མདོ་དགོན་རྣམས་ཀྱི་ལྷ་ཁང་རྟེན་བརྟེན་པ་བཅས་དང་། ཆོས་གྲྭ་འདི་ཉིད་དུ་ཐུབ་བསྟན་ནོར་བུ་གླིང་གི་དགོན་པ་གསར་དུ་བརྒྱབས་ཏེ། དེར་གསེར་ཟངས་ལས་གྲུབ་པའི་ངན་སོང་སྦྱོང་རྒྱུད་ནས་བསྟན་པའི་བཅོམ་ལྡན་འདས་ཀུན་རིག་རྩ་ལྷ་སོ་བདུན་མགྲོན་ཐབས་ཀྱི་ལྷ་དང་བཅས་པ་རྟེན་དང་བརྟེན་པར་བཅས་པའི་དཀྱིལ་འཁོར་བློས་སློང་གི་ཚུལ་དུ་བཞེངས་པ་སོགས་རྟེན་བཞེངས་གནང་། ལྕང་རར་བཞུགས་སྒར་ཕེབས་བསྟུན་བུམ་སྒྲུབ་ཆེན་མོ་ལོ་ལྟར་རྒྱུན་འཛུགས་སོགས་ཕྱག་རྗེས་ཆེ། རབ་བྱུང་བཅུ་གསུམ་པའི་མེ་རྟ་ཕྱི་ལོ་༡༧༨༦་ལོའི་ཟླ་བ་བཞི་པར་དགོངས་པ་རྫོགས་སོ། །རྒྱལ་རབས་བཅུ་དྲུག་པ་ཁྲི་རབས་དགུ་པ་ས་དབང་བདེ་དགའ་བཟང་པོ་ནི། དེ་ཉིད་ལས། དེ་ནས་ས་ཕོ་བྱི་ལོའི་ཆོ་འཕྲུལ་གྱི། །ཟླ་བའི་ཚེས་ལྔ་འཛོམ་ཐོག་ཕོ་བྲང་དུ། །སྐུ་འཁྲུངས་དེ་ཡང་ལྟེ་ཐག་ག་ཤལ་གྱི། །རྣམ་པར་དཀྲིས་དང་མཐོང་བས་ཡིད་སྤྲོ་སོགས། །སྐྱེས་བུ་དམ་པའི་རྟགས་མཚན་མཆོག་དང་ལྡན། །དེ་འཕྲལ་ལྔ་རིག་སི་ཏུ་རིན་པོ་ཆེས། །གེགས་སེལ་བྱིན་རླབས་ལ་སོགས་སྐབས་ཐོབ་སྩལ། །མཚན་དུ་ཆོས་སྲིད་དཔལ་འབྱོར་ལྷུན་གྲུབ་གསོལ། །དེ་ནས་ནུ་འཚོའི་མ་མ་སོགས་ཀྱིས་གཙོས། །ཞབས་འབྲིང་དུ་མས་ཉིན་མཚན་ཡེངས་མེད་པར། །སྲི་ཞུར་བརྩོན་ཞིང་གེགས་སེལ་རིམ་གྲོ་པ། །གཙོ་བོར་ཤར་ཆེན་བྱང་ཆུབ་སེམས་དཔའ་ཆེ། །རིན་ཆེན་མི་འགྱུར་རྒྱལ་མཚན་མཆོག་གིས་མཛད། །གང་དེས་མཚན་ལ་དཔལ་ལྡན་རྒྱལ་པོ་གསོལ། །དེ་བཞིན་ལྡན་ལོ་ཚུམས་ཁྲིམས་རིན་ཆེན་དང་། །བླ་མ་ལྷུན་གྲུབ་བསྟན་འཛིན་ལ་སོགས་པས། །ཁྲུས་གསོལ་ཚེ་བཀའ་ལ་སོགས་རྐྱེན་སེལ་རིགས། །ཚད་ལྡན་གཟབ་གཏད་རིགས་སོགས་རྒྱུན་ཆགས་མཛད། །ཐམས་ཅད་མཁྱེན་ཅིང་གཟིགས་པ་ས་སྐྱ་པ། །ངག་དབང་ཀུན་དགའ་བློ་གྲོས་ཞལ་སྔ་ནས། །གོང་གི་ལུགས་ཟུང་མཛད་ཕྲིན་འདི་འདྲ་ཞིག །གནང་ན་དགེ་བར་འགྱུར་རོ་ཞེས་པ་ཡི། །ལུང་གསལ་བསྟན་པའི་མཚན་འདི་འདོགས་པར་མཛད། །གཞན་ཡང་ས་དབང་གང་གི་སྐུ་ཚེའི་ཚད། །ཉི་ཤུ་རྩ་གྲངས་ཙམ་ལས་མི་བཞུགས་དང་། །དེ་ལས་གྲོལ་བའི་ཐབས་ཚུལ་འཕགས་ཡུལ་གྱི། །སློབ་དཔོན་ཀླུ་སྒྲུབ་མཆོག་གི་ལོ་རྒྱུས་ལས། །དྲངས་ནས་ཁྱད་པར་དགོས་དོན་ཤུགས་བསྟན་དུ། །གསལ་བར་གྱུར་པའི་བཀའ་ཡི་ཕབས་སྒོ་སྩལ། །ཆུ་སྦྲུལ་ཡབ་སྲས་སེར་སྐྱའི་འཁོར་ཚོགས་བཅས། །ལྷན་ཅིག་ཕོ་བྲང་བཀྲ་ཤིས་ཆོས་རྫོང་ཕེབས། །ཤིང་ལུག་རྒྱལ་སའི་ལྟེ་བ་ཆོས་གྲྭ་ཆེ། །ལྷུན་གྲུབ་སྟེང་ཕེབས་དེ་སྐབས་ཆིབས་བསུ་སོགས། །གཟབ་རྒྱས་གནང་ཤིང་ཕྱོགས་འགྲུལ་འགྲིམས་བསྡམས་བཅས། །གཟིམས་ཆུང་བཞི་ཁྲེ་མ་རུ་བཞུགས་གདན་འཇགས། །ས་ཕོ་ཁྱི་ལ་ཕྱོགས་སུ་ཕེབས་འགྲུལ་མཛད། །ས་སྤྲེལ་དབུས་གཙང་ཕྱོགས་སུ་ཆིབས་བསྒྱུར་གནང་། །རིས་བྲལ་སྐྱེས་ཆེན་རྣམས་ལ་བསྙེན་བཀུར་དང་། །ངོ་མཚར་རྟེན་མཆོག་རྣམས་ལ་མཆོད་འབུལ་མཛད། །དགེ་འདུན་འདུས་པ་རྒྱ་མཚོར་འབུལ་འགྱེད་སོགས། །གོང་མའི་ཕྱག་སྲོལ་ཇི་བཞིན་གཟབས་སྒྲུབ་མཛད། །གང་གིས་སྔ་ཕྱིར་བསྟེན་པའི་དབུ་བླ་ནི། །བདག་ཆེན་དཔལ་ལྡན་ཆོས་སྐྱོང་རྗེ་བཙུན་དྲུང་། །དག་དང་ཤར་ཆེན་མཁན་ཆེན་རཏྣི་མཚན། །ངག་དབང་ཆོས་སྐྱོང་བཟང་པོ་ཤར་ཆེན་དབོན། །ཐར་རྩེ་རྗེ་དང་ཡར་ཀླུངས་མཆོག་སྤྲུལ་རྗེ། །བཅོ་བརྒྱད་ཞབས་དྲུང་ཞུ་ཆེན་ལོ་ཙཱ་བ། །དེ་དབོན་ངག་དབང་དགེ་ལེགས་ལྷུན་གྲུབ་སོགས། །ས་ལུགས་འདྲེན་པ་དམ་པ་དུ་མ་དང་། །ཀཿཐོག་ཞིང་སྐྱོང་ཀུན་མཁྱེན་རིག་པ་འཛིན། །འཇིགས་མེད་གླིང་པ་ཁྱེ་བོ་གཏེར་བཏོན་སོགས། །རྙིང་ལུགས་འགྲོ་འདྲེན་ཀརྨ་པ་མཁན་སློབ། །སི་ཏུ་པཎྜིཏ་དང་དེའི་མཆོག་སྤྲུལ། །སྐྱབས་མཆོག་མཚུངས་མེད་པདྨཉིན་བྱེད་དབང་། །དབོན་སོགས་བླ་མ་མང་བསྟེན་ཟབ་ཆོས་བཞེས། །འཚོ་བྱེད་དམ་པ་གུ་རུ་ཝ༑་ལས། །འབྲི་ཀློག་རྩིས་སྐར་སྐོར་ཡང་ཕྲན་ཚེགས་གསན། །ཆོས་གྲྭ་འདིར་བཞུགས་སྒྲུབ་མཆོད་འཆམས་ཀྱི་རིགས། །རོལ་མོའི་བྱེ་བྲག་སོགས་ལ་སྔོན་གོམས་ཀྱི། །ཤུགས་ལ་དགྱེས་ཤིང་ཇི་བཞིན་ཐུགས་སུ་ཆུད། །གསར་རྙིང་ལྷག་པ་ལྷ་ཡི་བསྒོམ་བཟླས་དང་། །བཅད་མཚམས་ཚུལ་ཡང་ཅུང་ཟད་གནང་ཞེས་ཐོས། །ཞེས་སོགས་གསུངས་པ་ལྟར། ས་དབང་བདེ་དགའ་བཟང་པོ་ནི་རབ་བྱུང་བཅུ་གསུམ་པའི་ས་བྱི་ཕྱི་ལོ་༡༧༦༨ལོར་སྐུ་འཁྲུངས་དེའི་ཚེ་ལྟེ་ཐག་ག་ཤལ་གྱི་རྣམ་པར་དཀྲིས་པ་དང་མཐོང་བས་ཡིད་སྤྲོ་བ་སོགས་སྐྱེས་བུ་དམ་པའི་རྟགས་དང་ལྡན་ཞིང་། དེ་འཕྲལ་སི་ཏུ་པཎ་ཆེན་གྱིས་གེགས་སེལ་བྱིན་བརླབས་སོགས་མཛད་ནས་མཚན་ཆོས་སྲིད་དཔལ་འབྱོར་ལྷུན་གྲུབ་ཅེས་གསོལ། རྒྱུན་གྱི་རིམ་གྲོ་པ་གཙོ་བོ་ཤར་ཆེན་མི་འགྱུར་རྒྱལ་མཚན་གྱིས་མཛད་དེ་མཚན་དཔལ་ལྡན་རྒྱལ་པོར་གསོལ། ས་སྐྱ་པ་འཇམ་མགོན་ཀུན་དགའ་བློ་གྲོས་ཀྱིས་ལུགས་ཟུང་མཛད་ཕྲིན་གསལ་བར་ལུང་བསྟན་པའི་མཚན་སྲིད་ཞིའི་དབང་ཕྱུག་ཀུན་འགྲུབ་བདེ་དགའ་བཟང་པོ་ཁམས་གསུམ་དབང་སྡུད་འཇིགས་བྲལ་བསྟན་པའི་རྒྱལ་མཚན་ཞེས་གསོལ་བ་དང་། ངོར་ཆེན་རྡོ་རྗེ་འཆང་ཀུན་དགའ་བཟང་པོའི་རྣམ་འཕྲུལ་ཡིན་པར་གསུངས། ཡང་དེ་ཉིད་ལས། འཇམ་མགོན་ཀུན་བློས་ལུང་བསྟན་མཚན་གནང་བའི། །དོན་ཡང་འདི་དང་མཐུན་པར་མངོན་གྱུར་ཏེ། །སྲིད་ཞིའི་དབང་ཕྱུག་ཅེས་སུ་གསུངས་པ་ནི། །སྲིད་ནི་མི་བདག་ཆེན་པོ་ཞི་བ་ནི། །འགྲོ་འདྲེན་བླ་མ་ཆེ་དེ་གཉིས་ཀ་ཡི། །ཕྲིན་ལས་དབང་ཕྱུག་མཆོག་ཅེས་སྟོན་པ་དང་། །ཀུན་འགྲུབ་ཅེས་པ་རྒྱལ་ཁབ་སྲིད་སྐྱོང་དང་། །ཆོས་ཀྱི་འཆད་ཉན་སྤེལ་གསུམ་ལུགས་ཟུང་གི། །མཛད་པ་ཅིག་ཅར་འགྲུབ་ཅེས་སྟོན་པ་དང་། །བདེ་དགའ་ཞེས་པ་དེ་ལྟར་གནང་གྱུར་ན། །བསྟན་འགྲོ་རྒྱལ་ཁབ་སྣོད་བཅུད་རབ་བདེ་དགའ། །བཟང་པོ་ཞེས་པའི་དོན་ནི་དེ་བཞིན་དུ། །ལེགས་ཚོགས་བཟང་པོ་གོང་འཕེལ་འབྱུང་ཞེས་སྟོན། །ཁམས་གསུམ་སྣོད་བཅུད་དབང་སྡུད་ཅེས་པ་ནི། །དེ་འདྲ་མཛད་ན་སྐུ་བསོད་དབང་ཐང་སོགས། །རྒྱས་ཞེས་སྟོན་དང་འཇིགས་བྲལ་ཞེས་པ་ནི། །དེ་ལྟར་མཛད་ན་སྐུ་ཚེའི་བར་ཆད་ལས། །ངེས་པར་གྲོལ་ཞེས་སྟོན་པར་མཛད་པ་དང་། །བསྟན་པའི་རྒྱལ་མཚན་དཔལ་བཟང་པོ་ཞེས་ནི། །བསྟན་པའི་སྤྱི་ནོར་ཆེན་པོ་འབྱུང་ཞེས་དང་། །དེ་ལྟར་མཚན་སྒྲ་རེ་རེའི་དོན་ཚན་རེ། །མ་འོངས་འབྱུང་འགྱུར་དངོས་སུ་སྟོན་པར་མཛད། །ལུང་དོན་དེ་བཞིན་མཛད་པ་ཕྱག་ཁེལ་ཞིག །བྱུང་ན་མདོ་སྨད་ཁམས་ཀྱི་བསྟན་འགྲོ་ཡི། །ཕན་བདེའི་ཉི་མ་མི་ནུབ་རྟག་འཆར་ཞིང་། །རྫོགས་ལྡན་སྐལ་བཟང་ཐོབ་པ་གདོན་མི་ཟ། །འོན་ཀྱང་སེམས་ཅན་ཉོན་མོངས་འདོད་པ་ཡིས། །རབ་མྱོས་གཞན་དབང་བཙན་པས་གེགས་ཆེན་སྡང་། །ཞེས་སོགས་གསུངས་ཏེ། ཡི་གེ་འབྲི་ཀློག་ནས་ལྷུན་གྲུབ་སྟེང་གི་ཆོས་གྲྭའི་ཆོ་ག་ཆོས་སྤྱོད། དབྱངས་གདངས་རོལ་མོ་འཆམ་སོགས་ཐུགས་ལ་ཆུད་པར་མཛད། ས་སྐྱ་པ་བདག་ཆེན་དབང་སྡུད་སྙིང་པོ། ངོར་མཁན་ཆེན་དཔལ་ལྡན་ཆོས་སྐྱོང་། རྗེ་བཙུན་དྲུང་། ཤར་ཆེན་རིན་ཆེན་མི་འགྱུར་རྒྱལ་མཚན། ངག་དབང་ཆོས་སྐྱོང་བཟང་པོ། ཤར་ཆེན་དབོན། ཐར་རྩེ་ནམ་མཁའ་འཆི་མེད། ཡར་ཀླུང་མཆོག་སྤྲུལ། བཅོ་བརྒྱད་ཞབས་དྲུང་། ཞུ་ཆེན་ལོ་ཙ་བ། དེ་དབོན་ངག་དབང་དགེ་ལེགས་ལྷུན་གྲུབ་སོགས་དང་། ཀཿཐོག་ཞིང་སྐྱོང་། སི་ཏུ་པདྨཉིན་བྱེད་སོགས་ལས་ཟབ་རྒྱས་གདམས་པའི་བདུད་རྩི་བཞེས། ཡི་དམ་ལྷ་མང་པོའི་བསྙེན་སྒྲུབ་དང་ཐུགས་ཉམས་བཞེས། ས་སྤྲེལ་ལོ་དབུས་གཙང་ཕྱོགས་སུ་ཕེབས་ནས་སྔར་རྒྱུན་ལྟར་མཆོད་འབུལ་སོགས་རྒྱ་ཆེར་གནང་། གདན་སའི་ཁྲི་རབས་དགུ་པའི་ཁུར་བཞེས་ཏེ་ཆབ་འབངས་ལུགས་གཉིས་ཀྱིས་བྱམས་པས་བསྐྱངས་སྟེ། ཉེས་ཆད་སོགས་ཡེ་མ་མཛད་པས་ཅུང་འཇམ་ཆེས་སྐད། ཁྱད་པར་དུ་ཡུལ་ལྗོངས་ཕལ་མོ་ཆེ་རྣམས་སུ་རི་དྭགས་དང་འདབ་ཆགས་ཀྱི་རིགས་ལ་གནོད་འཚེ་མི་ཆོག་པའི་ཁྲིམས་བཅས། གཙུག་ལག་ཁང་བསམ་གྲུབ་མཐོང་གྲོལ་ཆེན་མོའི་ནང་དུ་ཚེ་དཔག་མེད་སྐུ་གསེར་ཟངས་ལས་གྲུབ་པ་ཐོག་ཚད་ཅན། དངུལ་དཀར་ལས་གྲུབ་པའི་སྤྱན་རས་གཟིགས་བཅུ་གཅིག་ཞལ་གྱི་སྐུ་སོགས་རྟེན་གསུམ་མང་པོ་བཞེངས། སྒ་རྗེ་དཔོན་མོ་ཚེ་དབང་ལྷ་མོ་ཁབ་ཏུ་བཞེས་པས་སྲས་ལྕམ་སྲིང་བཞི་འཁྲུངས་པ་ལས་ལྕམ་སྲིང་གཉིས་འཁྲུངས་འཕྲལ་གཤེགས། རང་ཉིད་རབ་བྱུང་བཅུ་གསུམ་པའི་ལྕགས་ཁྱི་ཕྱི་ལོ་༡༧༩༠་ལོའི་དབོ་ཟླའི་ཚེས་བཅུ་ལ་ཕྱི་ལྟས་འཇའ་སྤྲིན་སོགས་ངོ་མཚར་དུ་མ་དང་བཅས་གཟུགས་སྐུའི་བཀོད་པ་དབྱིངས་སུ་བསྡུས་སོ། །རྒྱལ་རབས་བཅུ་བདུན་པ་བཙུན་མོ་སྒ་རྗེ་ཚེ་དབང་ལྷ་མོ་ནི། ས་སྐྱོང་ཆེན་པོ་འདི་གཤེགས་ནས་ལྷ་སྲས་སྐུ་ན་ཕྲ་བས་གདན་སའི་ཁུར་དཔོན་མོ་ཚེ་དབང་ལྷ་མོས་བཞེས་ཏེ་ས་སྐྱོང་གོང་མའི་སྲོལ་བཞིན་བསྐྱངས། ས་སྐྱོང་དབང་མོ་འདི་ཉིད་སྒ་རྗེ་དཔོན་གྱི་སྲས་མོར་འཁྲུངས། ཀརྨ་པ་བདུད་འདུལ་རྡོ་རྗེས་སྒྲོལ་མ་བཀྲ་ཤིས་དོན་གྲུབ་མའི་སྤྲུལ་པར་ལུང་བསྟན། ཀུན་མཁྱེན་འཇིགས་མེད་གླིང་པས་ཁྲི་སྲོང་ལྡེའུ་བཙན་གྱི་བཙུན་མོ་ལྷ་ལྕམ་ངང་ཚུལ་རྒྱལ་མོའི་རྣམ་འཕྲུལ་ཡིན་པར་གསུངས། ས་སྐྱ་བདག་ཆེན་རིན་པོ་ཆེའི་བཀའ་ལུང་བཞིན་སྡེ་དགེའི་དཔོན་སར་ཕེབས། ཆབ་འབངས་མངའ་རིས་ཐམས་ཅད་ས་སྐྱོང་གོང་མ་རྣམས་ཀྱི་མཛད་སྲོལ་བཞིན་ལེགས་པར་བསྐྱངས། རྒྱ་ནག་གོང་མ་ཆེན་པོས་ཀྱང་མིང་དང་ལས་ཀའི་ཐམ་ག་གནང་སྟེ་ཆེན་པོའི་གོ་སར་དབང་བསྐུར། གསར་རྙིང་གི་བླ་མ་དུ་མ་བསྟེན་ནས་བཀའ་ཆོས་གསན་ཞིང་བསྙེན་བཀུར་ཕུལ། རྙིང་མ་རྒྱུད་འབུམ་པོད་ཉེར་དྲུག །འཇིགས་གླིང་བཀའ་བུམ་པོད་དགུ། ཀློང་ཆེན་པའི་ཡང་ཏིག་རྣམ་གཉིས། ངོར་ཆེན་ཀུན་དགའ་བཟང་པོ་དང་། དཀོན་མཆོག་ལྷུན་གྲུབ་བཀའ་འབུམ་སོགས་པུསྟཀ་ལྔ་བཅུ་ལ་ཉེ་བར་པར་དུ་བསྐྲུན། སྙིང་ཐིག་ཡ་བཞི་གསེར་བྲིས་སོགས་གླེགས་བམ་མང་པོ། ཆོས་གྲྭ་འདིའི་གཡུ་འབྲུག་ལྷ་ཁང་། དེའི་ནང་བཞུགས་སློབ་དཔོན་པདྨགཙོ་འཁོར་གསུམ་པའི་སྐུ་གསེར་ཟངས་ལས་གྲུབ་པ་ཁྱད་འཕགས་ཐོག་ཚད་ཅན་གསར་དུ་བཞེངས་པ། རྫ་སྟོད་ལུང་དགོན་རྟེན་དང་བརྟེན་པར་བཅས་གསར་བཞེངས་མཛད། གཞན་ཡང་བསམ་ཡས་གཙུག་ལག་ཁང་དུ་མར་མེའི་མཆོད་རྒྱུན་ཆེད་དུ་འབྲི་མ་སྟོང་ཕྲག་ལྷག་གི་རྒྱུན་འཇོག་པ་སོགས་རྣམ་དཀར་གྱི་ཕྲིན་ལས་འཕེལ། རྒྱལ་རབས་བཅོ་བརྒྱད་པ་ཁྲི་རབས་བཅུ་པ་ས་སྐྱོང་བཟང་པོའི་སྲས་ཚེ་དབང་རྡོ་རྗེ་རིག་འཛིན་ནམ། སྡེ་དགེའི་ཡབ་ཆེན་བྱམས་པ་ཀུན་དགའ་སངས་རྒྱས་བསྟན་པའི་རྒྱལ་མཚན་ནི་རབ་བྱུང་བཅུ་གསུམ་པའི་མེ་རྟ་ཕྱི་ལོ་༡༧༨༦ལོར་འཁྲུངས། ཆུང་ངུ་ནས་དམ་པའི་རིགས་སད། འབྲི་ཀློག་ནས་བརྩམས་ཏེ་ཐུན་མོང་གི་རིག་གནས་ལ་མཁས་པར་མཛད། ཐར་རྩེ་མཁན་ཆེན་བྱམས་པ་ནམ་མཁའ་འཆི་མེད། བྱམས་པ་ཀུན་དགའ་བསྟན་འཛིན། འཇམ་མགོན་དབང་སྡུད་སྙིང་པོ་ཡབ་སྲས། ཡར་ཀླུང་མཆོག་སྤྲུལ་ནམ་མཁའ་ལེགས་པ། གྲུབ་ཆེན་ངག་དབང་རིན་ཆེན་སོགས་བླ་མ་མང་པོ་བསྟེན་ནས་མདོ་སྔགས་གཞུང་ལུགས་རྒྱ་མཚོ་ལྟ་བུ་དང་། ཁྱད་པར་དུ་སྙན་བརྒྱུད་ཚད་མ་བཞི་ལྡན་གྱི་གདམས་ཟབ་གསུང་ངག་རིན་པོ་ཆེ་ལམ་འབྲས་བུ་དང་བཅས་པ། མཁའ་སྤྱོད། མགོན་པོ་ཕྱི་ནང་། དམར་པོ་སྐོར་གསུམ་སོགས་ཐུན་མིན་སྙན་བརྒྱུད་ཀྱི་སྨིན་གྲོལ་དཔག་ཏུ་མེད་པ་གསན་ནས་ཐུགས་ཉམས་སུ་བཞེས་པ་དང་། ལྷག་ལྷ་མང་པོའི་དུས་གྲངས་མཚན་མའི་བསྙེན་པ་ལས་སུ་རུང་བར་མཛད། ཆོས་གྲྭ་འདི་ཉིད་ཀྱི་ཆོ་ག་ཆོས་སྤྱོད་ཕྱག་ལེན་ཤིན་ཏུ་ཕྲ་བའང་ཐུགས་སུ་ཆུད་པར་མཛད་དེ་ཚར་ལུགས་ལྟར་གྱི་མགོན་པོའི་གཏོར་བཟློག་དང་། ས་བྱི་ཕྱི་ལོ་༡༨༢༨ལོར་དཔལ་ས་སྐྱོང་སྡེ་དགེ་ཆོས་ཀྱི་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་འདོད་རྒུ་རབ་འཕེལ་ཞེས་པ་དང་། དུས་འཁོར་སོགས་ཀྱི་དན་ཡིག་ཁ་གསར་ཅན། སྙན་རྒྱུད་སྐོར་སོགས་བསྟན་བཅོས་མང་དུ་མཛད། ས་རྟ་ཕྱི་ལོ་༡༧༩༨ལོར་ལྷུན་གྲུབ་སྟེང་གི་གདན་སའི་ཁྲི་རབས་བཅུ་པ་ལ་ཐར་རྩེ་བྱམས་པ་ནམ་མཁའ་འཆི་མེད་ནས་མངའ་གསོལ་བྱས་ནས་གཙུག་ལག་ཟུང་གིས་རྒྱལ་སྲིད་ཆོས་བཞིན་བསྐྱངས། ཤིང་བྱི་ཕྱི་ལོ་༡༨༠༤ལོར་རྒྱ་ནག་གོང་མ་ཆེན་པོས་སྔར་རྒྱུན་བཞིན་མིང་དང་ལས་ཀའི་ཐམ་ག་གནང་སྟེ་ཆེན་པོའི་གོ་སར་དབང་བསྐུར། མེ་གླང་ཕྱི་ལོ་༡༨༡༧ལོར་དབུས་གཙང་ཕྱོགས་སུ་ཕེབས་ནས་སྟོན་པའི་ཞལ་སྐྱིན་ཇག་ཤཱཀ་ཡིད་བཞིན་ནོར་བུ་སོགས་རྟེན་གསུམ་ལ་མཆོད་འབུལ། དགེ་འདུན་གྱི་སྡེ་ལ་བསྙེན་བཀུར་རྒྱ་ཆེར་མཛད། གདུང་སྤེལ་མཛད་པས་རིགས་ཀྱི་སྲས་གསུམ་དང་ལྕམ་མོ་གཅིག་འཁྲུངས། གདུང་སྤེལ་གྲུབ་ནས་ཡབ་མེས་གོང་མའི་བཀས་བཅད་ལྟར། མེ་ཁྱི་ཕྱི་ལོ་༡༨༢༦ལོའི་ཐ་སྐར་ཟླ་བར། ཐར་རྩེ་མཁན་ཆེན་བྱམས་པ་ཀུན་དགའ་བསྟན་འཛིན་གྱིས་མཁན་པོ་མཛད་དེ། དད་པའི་དགེ་འདུན་གྲངས་ཚང་བའི་དབུས་སུ་ཚིགས་གསུམ་རིམ་ནོད་ཀྱིས་བསྙེན་པར་རྫོགས་པའི་སྡོམ་པ་བཞེས་ཏེ་སྡོམ་བརྩོན་རྒྱལ་པོའི་ཚུལ་གྱིས་དྲྭ་མ་སྒང་དུ་སྙན་བརྒྱུད་འཛིན་པའི་སྒྲུབ་གྲྭ་གསར་དུ་འཛུགས་པ། ལྷུན་གྲུབ་སྟེང་འདིར་ཕྱི་ནང་རིག་པའི་གནས་ཡན་ལག་དང་བཅས་པའི་བཤད་གྲྭ་བཙུགས་པ་སོགས་རྒྱལ་བསྟན་རིན་པོ་ཆེ་སྤྱི་དང་། ཁྱད་པར་དཔལ་ས་སྐྱ་པའི་རིང་ལུགས་དྲི་མ་མེད་པ་ལ་བཀའ་དྲིན་ཆེན་པོས་བསྐྱངས། ས་བྱི་ཕྱི་ལོ་༡༨༢༨ལོར་དཔལ་ས་སྐྱོང་སྡེ་དགེ་ཆོས་ཀྱི་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་འདོད་རྒུ་རབ་འཕེལ་ཞེས་པ་དང་། དུས་འཁོར་སོགས་ཀྱི་དན་ཡིག་ཁ་གསར་ཅན། སྙན་རྒྱུད་སྐོར་སོགས་བསྟན་བཅོས་མང་དུ་མཛད། ས་སྐྱོང་ཆེན་པོ་འདི་ལ་སྲས་དམ་ཚིག་རྡོ་རྗེ། ཚེ་རིང་རྣམ་རྒྱལ། ཚེ་དབང་ཕུན་ཚོགས་གསུམ་འཁྲུངས། སྡེ་དགེའི་རྒྱལ་རབས་དངུལ་དཀར་མེ་ལོང་ལས། རབ་བྱུང་བཅུ་བཞི་པའི་མེ་སྟག་ཕྱི་ལོ་༡༨༠༦དང་ས་འབྲུག་ལོར་སྔོན་རྗེས་ས་སྐྱ་བདག་ཆེན་དབང་སྡུད་སྙིང་པོའི་ལུང་དོན་བཞིན་སྡེ་པ་རང་བྱོན་པའི་བུ་མོ་དང་། ལྕགས་ལ་རྒྱལ་པོའི་སྲས་མོ་ཁབ་ཏུ་བཞེས་པའི་སྔ་མར་རིགས་སྲས་དང་པོ་དམ་ཚིག་རྡོ་རྗེ་ལྕགས་ལུག་ལོ་འཁྲུངས་པ་དང་། གཉིས་པ་ལྕམ་མོ་ཤིང་ཕག་ལོ་བ། གསུམ་པ་ཚེ་དབང་ཕུན་ཚོགས་བསྟན་སྐྱོང་ཆུ་རྟ་ལོ་བ། བཞི་པ་ཚེ་དབང་རྡོ་རྗེ་དགྲ་འདུལ་ཆུ་ལུག་ལོར་བལྟམས་པ་བཅས་སྲས་ལྕམ་སྲིང་བཞི་བྱུང་། ཞེས་བཀོད་ཡོད།རྒྱལ་རབས་བཅུ་དགུ་པ་ཁྲི་རབས་བཅུ་གཅིག་པ་ཆེ་བ་དམ་ཚིག་རྡོ་རྗེ་ནི་རབ་བྱུང་བཅུ་བཞི་པའི་ལྕགས་ལུག་ཕྱི་ལོ་༡༨༡༡ལོར་འཁྲུངས། རང་བཞིན་ཞི་ཞིང་སྤྱོད་ཚུལ་མཛེས་པ། གཙུག་ལག་རབ་འབྱམས་ལ་བློ་གསལ་ཞིང་ཁྱད་པར་དུ་ཐུགས་དམ་སྙིང་པོ་ལ་རྒྱུན་དུ་བརྩོན་པ་ཞིག་སྟེ། བྱང་སེམས་སྒྲིབ་པ་རྣམ་སེལ་གྱི་སྤྲུལ་པར་གྲགས། ཡབ་གཤེགས་ནས་གདན་སའི་ཁྲི་རབས་བཅུ་གཅིག་པ་ལ་དབང་བསྒྱུར་ཏེ་ཡབ་མེས་གོང་མའི་ལུགས་གཉིས་ཀྱི་རིང་ལུགས་མ་ཉམས་པར་བསྐྱངས། ཆུ་ལུག་ཕྱི་ལོ་༡༨༢༣ལོར་ལྕགས་ལ་རྒྱལ་པོའི་སྲས་མོ་ཁབ་ཏུ་བཞེས་པར་སྲས་གཉིས་བྱུང་བའི་ལོ་རྒྱུས་འོག་ཏུ་འཆད། ཆུ་སྟག་ཕྱི་ལོ་༡༨༤༢ལོར་འདན་ཁོག་གཙོས་སྡེ་དགེའི་ཕྱོགས་ས་གཡོ་ཆེན་པོ་བྱུང་ནས་མི་ཕྱུགས་ལ་གནོད་ཚེ་ཕོག་པར་བོད་གཞུང་ནས་འབྲུ་དངུལ་གྱིས་རོགས་རམ་གནང་ཚུལ་འདུག །མཐར་དགུང་གྲངས་ཞེ་གསུམ་པ་ཆུ་གླང་ཕྱི་ལོ་༡༨༥༣ལོར་གཤེགས། དེའི་སྐུ་མཆེད་ལྕམ་སྲིང་གསུམ་པོས་ཀྱང་ལུགས་གཉིས་ཀྱི་སྲིད་སྐྱོང་རྡོག་རྩ་གཅིག་སྒྲིལ་དང་། མཆོད་འོས་ལ་བསྙེན་བཀུར་སོགས་སྐྱེ་རྒུ་ཐམས་ཅད་ཡིད་འཕྲོག་པའི་མཛད་པ་ཕུན་སུམ་ཚོགས། རྒྱལ་རབས་ཉི་ཤུ་པ་ཁྲི་རབས་བཅུ་གཉིས་པ་དམ་ཚིག་རྡོ་རྗེའི་སྲས་ཆེ་བ་དཔལ་ལྡན་འཆི་མེད་རྟག་པའི་རྡོ་རྗེའམ་ཡོངས་གྲགས་སྡེ་དགེ་རྒྱལ་རྒན་མ་ཞེས་པ་ནི། རབ་བྱུང་བཅུ་བཞི་པའི་ལྕགས་བྱི་ཕྱི་ལོ་༡༨༤༠ལོར་འཁྲུངས། དམ་པ་འདི་ཉིད་ཨོ་རྒྱན་སངས་རྒྱས་གཉིས་པའི་གཏེར་ལུང་ལས། མུ་ཏིག་ཁམས་ཀྱི་ཤར་དུ་དཔལ་གྱི་མིང་། །ཕག་གམ་བྱི་བའི་ལོ་ཡི་རྒྱལ་པོར་སྐྱོང་། །དེ་དུས་གཏེར་འདི་ས་སྟེང་ཉིད་དུ་འབྱུང་། །ཞེས་ལྷ་སྲས་མུ་ཏིག་བཙུན་པོའི་རྣམ་རོལ་དུ་ལུང་བསྟན་བརྙེས། ཐར་རྩེ་ཁུ་དབོན། འཇམ་དབྱངས་མཁྱེན་བརྩེའི་དབང་པོ། འཇམ་མགོན་བློ་གྲོས་མཐའ་ཡས། གཏེར་ཆེན་མཆོག་གྱུར་གླིང་པ། དཔལ་སྤུངས་དང་ཀཿཐོག་སི་ཏུ་གོང་འོག །རྫོགས་ཆེན་སྐུ་གོང་འོག་སོགས་ཀྱི་དབུ་བླ་ཁག་སྔར་རྒྱུན་བཞིན་བསྟེན་ཅིང་གུས་པས་མཆོད། ལུགས་ཟུང་གི་གཙུག་ལག་ལ་ཤིན་ཏུ་མཁས་པས་འཇམ་མགོན་ཀོང་སྤྲུལ་པས་ས་སྐྱོང་མཧཱཔཎྜིཏ་ཞེས་པའི་མཚན་གསོལ། འཇམ་དབྱངས་ས་པཎ་ལ་བསྟོད་པ་འདྲ་མིན་བརྒྱ་རྩ་བརྒྱད་མཛད། ཆུ་གླང་ཕྱི་ལོ་༡༨༥༣ལོ་ངོར་ནས་དཔོན་སློབ་ངག་དབང་ལེགས་གྲུབ་སྤྱན་དྲངས། ལོ་དེར་ཡབ་གཤེགས་ནས་གདན་སའི་ཁྲི་རབས་བཅུ་གཉིས་པའི་ཁུར་བཞེས་ཏེ་ཆབ་འབངས་ཆོས་ཀྱིས་བསྐྱངས། ར་ག་ཤག་གི་སྲས་མོ་ཚེ་བརྟན་སྒྲོལ་དཀར་ཁབ་ཏུ་བཞེས་པར་རིགས་ཀྱི་སྲས་གཉིས་འཁྲུངས། ཆུ་ཁྱི་ཕྱི་ལོ་༡༨༦༢ལོར་ཉག་སྐེད་མགོན་པོ་རྣམ་རྒྱལ་གྱིས་སྡེ་དགེར་བཙན་འཛུལ་བྱས་པ་སྟེ། དེའང་སྐབས་དེའི་ལོ་ཤས་ཀྱི་སྔོན་ནས་ཉག་སྐེད་མགོན་པོ་རྣམ་རྒྱལ་དང་། མགོན་པོ་ཚེ་བརྟན་ཕ་བུ་ནས་དཔུང་ཤེད་ཀྱིས་ཉག་རོང་སྡེ་ཁག་དྲུག་དང་། རིམ་པར་ཧོར་སྡེ་ཁག །སྡེ་དགེ། འབའ་ལི་རྒྱ་རོང་སོགས་ཀྱི་ས་ཁུལ་ལ་དགྲ་རྒྱག་བཅོམ་འཕྲོག་ཚད་མེད་བྱས་པར་མ་ཚད། བོད་གཞུང་དང་གདན་ས་ཁག་གི་རྒྱ་བོད་ཚོང་འབྲེལ་གྱི་སྒར་གཞིས་བཅོམ་འཕྲོག་གིས་རྒྱ་བོད་ཚོང་འབྲེལ་བཀག་འགོག་བྱས་པ་དང་། ཁམས་ཕྱོགས་ཀྱི་ས་སྡེ་ཁག་གཅིག་བཙན་བཟུང་བྱེད་སྐབས། སྡེ་དགེའི་རྒྱལ་རྒན་མས་ཉག་དཔོན་མགོན་པོ་རྣམ་རྒྱལ་འདི་སྟོབས་ཤུགས་མ་རྫོགས་སྔོན་རྩ་མེད་མ་བཏང་ན་རང་རེའི་ཆུས་སྲིད་ལ་ཉམས་ཉེན་ཡོད་པས། རང་རེ་དཔུང་སྡེབ་བྱེད་ནས་ཚར་དུ་གཅོད་དགོས་ཚུལ་ལི་ཐང་གཡོན་རུ་དཔོན་ལ་ཡི་གེ་བཏང་བར་ཉག་དཔོན་གྱི་ལག་ཏུ་ཤོར་བ་སོགས་ཀྱི་རྐྱེན་ལ་བརྟེན། ཆུ་ཁྱི་ལོ་ནས་ཉག་དམག་དཔུང་གིས་སྡེ་དགེར་བཙན་འཛུལ་བྱས། ཆོས་རྒྱལ་འདི་ཉིད་དགུང་ལོ་ཉེར་བཞི་པ་ཆུ་ཕག་ཕྱི་ལོ་༡༨༦༣ལོར་སྡེ་དགེའི་རྒྱལ་ས་ལྷུན་གྲུབ་སྟེང་དུ་ཕེབས། སྡེ་དགེ་རྒྱལ་པོ་ཡུམ་སྲས། དཔལ་སྤུངས་དབོན་རྒན། ཀཿཐོག་ཞིང་སྐྱོང་། རྫོགས་ཆེན་དཔོན་སློབ་སོགས་བླ་དཔོན་དུ་མ་ཉག་དམག་གིས་མི་གཏའ་འཛིན་བཟུང་བྱས་ཏེ་ཉག་རོང་ས་ཁུལ་དུ་བཀག་ཉར་བྱས། སྐབས་དེར་སྡེ་དགེའི་བླ་དཔོན་ཁ་ཤས་ཀོ་ཐུམ་བྱས་ཏེ་ཉག་ཆུར་འཕངས་པ་དང་། སྡེ་དགེའི་ཡུལ་མི་ཆོས་སྡེ་ཁག་གི་མི་བསད་ཁྲག་སྦྱོར། རྒྱུ་ནོར་བཅོམ་འཕྲོག་ཚད་མེད་བཟོས་པ་མ་ཚད། དགོན་སྡེ་ཁག་དང་། ཡུལ་མིའི་ཁང་ཁྱིམ། རྩྭ་ར། ནགས་ཚལ་ཕལ་ཆེར་མེར་བསྲེག་བཏང་། དེ་སྐབས་བློན་ཆེན་བྱ་རྒོད་པདྨལས་གྲུབ་ཀྱི་ཐབས་ཀྱིས་བོད་དམག་བསྐུལ་ཏེ། བོད་དམག་དོན་སྤྱི་ཁྱབ་ཞབས་པད་ཕུ་ལུང་པ་ཚེ་དབང་རྡོ་རྗེ་དང་། དབུས་མདའ་དཔོན་ཁྲི་སྨོན་པ་འཆི་མེད་རྡོ་རྗེ་དང་། མདོ་མཁར་བ་ཚེ་དབང་ནོར་བུའི་རང་ཤོག་དཔུང་དམག་བཅས་ཆུ་ཕག་ཕྱི་ལོ་༡༨༦༣ལོའི་ཟླ་བ་གཉིས་པའི་ཚེས་དགུ་ཉིན་ལྷ་ས་ནས་ཐོན། ལམ་བར་ཤོ་སྟར་ལྷོ་གསུམ། རི་ཆབ་དཔའ་གསུམ་སོགས་ནས་རྒྱབ་དཔུང་ཡུལ་དམག་བཅས་ལོ་དེའི་བོད་ཟླ་དགུ་པར་སྡེ་དགེར་འབྱོར། དེ་ནས་ཉག་དམག་དང་འཐབ་རིམ་བཞིན་དགྲ་རྫོང་ཁག་བླངས་ནས་ཤིང་གླང་ཕྱི་ལོ་༡༨༦༥ལོའི་ཟླ་བ་བརྒྱད་པའི་ཚེས་གཅིག་ཉིན། མགོན་པོ་རྣམ་རྒྱལ་ལམ་ཉག་སྐེད་བུ་ལོང་མ་ཕ་བུ། བློན་པོ་དྲག་ཤོས་བཞི་བཅུ་སྐོར། མཁར་རྫོང་དང་བཅས་དུས་གཅིག་ལ་གསོན་བསྲེགས་བྱས། ལྷག་འཕྲོས་སྡེ་དཔོན་འབངས་དང་བཅས་པ་མགོ་བཏགས་ཞུས་ཏེ་གཡུལ་ལས་རྣམ་པར་རྒྱལ། སྐབས་དེར་ཉག་སྐེད་བཙན་འཛུལ་སྐབས་མི་བསད་རྒྱུ་འཕྲོག །ཁང་ཁྱིམ་དང་རྩྭ་ཤིང་ནགས་ཚལ་མེར་བསྲེག་པ་སོགས་ཀྱིས་མནར་བས་བོད་དམག་ཐོག་མར་སླེབས་སྐབས་བོད་ཀྱི་ལྷ་དམག་ཅེས་གུས་ཞབས་ཆེན་པོ་བྱས་སྐད། མེ་སྟག་ཕྱི་ལོ་༡༨༦༦ལོར་ཉག་ཟིང་བདེ་འཇགས་བཏང་བར་ལེགས་སྐྱེས་དང་གཟིགས་ཞིབ་ཏུ་རྒྱ་དཔོན་རྨ་ཏ་ལོ་ཡོན་སོགས་འབྱོར། ཆོས་རྒྱལ་འདི་ཉིད་ཀྱིས་ཆོས་སྲིད་སྔར་བཞིན་བསྐྱངས་ཤིང་དགོན་གཞིས་ཉམས་པ་རྣམས་ཀྱི་ལྷ་ཁང་དང་རྟེན་གསུམ་སོགས་ཉམས་གསོ་རྒྱ་ཆེར་མཛད་པ་དང་། རྒྱལ་ཁྲིམས་ཆོས་ཁྲིམས་བསྡམས་ནས་དགེ་བཅུའི་བཀའ་ཁྲིམས་སྤེལ། མི་དགེའི་རྒྱུ་ལམ་བཅད་དེ་ཡབ་མེས་གོང་མའི་སྲོལ་རྒྱུན་དྲི་མ་མེད་པར་བསྐྱངས། ཤིང་ཁྱི་ཕྱི་ལོ་༡༨༧༤ལོར་ངོར་ཨེཝྂ་ཆོས་ལྡན་ནས་ཐར་རྩེ་ཞབས་དྲུང་འཇམ་དབྱངས་བློ་གཏེར་དབང་པོ་དགུང་གྲངས་ཉེར་བརྒྱད་སྟེང་ལྗོངས་འདིར་སྤྱན་དྲངས་ནས་དབུ་བླར་བཀུར། དམ་པ་འདི་ཉིད་དང་འཇམ་དབྱངས་མཁྱེན་བརྩེ་དབང་པོ་ཟུང་གིས་རྒྱུད་སྡེ་ཀུན་བཏུས་པོད་སོ་གཉིས་ལམ་འབྲས་པོད་བཅུ་བདུན་བསྡུ་བསྒྲིགས་མཛད་དེ་པར་དུ་བསྐྲུན་པ་དང་། གཞན་ཡང་སྐབས་དེར་གཞུང་འགྲེལ་སྐོར་མང་པོ་པར་བསྐྲུན་མཛད། ས་བྱི་ཕྱི་ལོ་༡༨༨༨ལོར་ཆོས་རྒྱལ་ཆེན་པོ་མདུན་སྐོར་སུམ་བཅུ་དང་བཅས་ལྷ་ལྡན་དུ་ཕེབས། ས་གླང་ལོར་རྒྱལ་མཆོག་བཅུ་གསུམ་པ་ཆེན་པོ་སྨོན་ལམ་ཆེན་མོའི་ཚོགས་དབུར་གདན་ཞུས་དང་ཕྱག་འགྱེད་ཕོན་ཆེར་གནང་ཚུལ་གོང་ས་བཅུ་གསུམ་པའི་རྣམ་ཐར་ལས་འབྱུང་བས་མཚོན། ཕྱོགས་དེའི་བླ་ཆོས་ཁག་དང་ཆོས་སྡེ་རྣམས་ལ་མཆོད་འབུལ་བསྙེན་བཀུར་རྒྱ་ཆེར་མཛད། ཤིང་ལུག་ཕྱི་ལོ་༡༨༩༥ལོར་བོད་གཞུང་ཉག་ཁོག་སྤྱི་ཁྱབ་དང་ལྕགས་ལ་དཔོན་མི་དྲིན་ཐུ་སིའི་བར་འགལ་ཟླ་བྱུང་། མི་དྲིན་ཐུ་སིའི་རྒྱབ་རྩ་ཟི་ཁྲོན་ཙུང་ཐུས་ཀྱིས་བྱས་ཏེ། མེ་སྤྲེལ་ཕྱི་ལོ་༡༨༩༦ལོར་རྒྱ་དཔོན་ཀྲང་གྱིའི་དམག་དཔུང་བཅས་བཏང་སྟེ་ཉག་རོང་ཕྱོགས་དགྲ་འཐབ་བཅོམ་འཕྲོག་ཚད་མེད་བྱས། དེར་སྡེ་དགེ་རྒྱལ་བཙུན་སྲས་བཅས་ངོས་འཕྲད་དུ་འོང་དགོས་མགོ་སྐོར་བཏང་སྟེ་འཆི་མེད་རྟག་པའི་རྡོ་རྗེ་ཡུམ་སྲས་བཅས་འཛིན་བཟུང་བྱས་ཏེ་རྒྱ་ནག་ཁྲིན་ཏུའུ་ལ་དེད། མེ་བྱ་ཕྱི་ལོ་༡༩༩༧ལོར་བོད་གཞུང་གིས་ཕྱོགས་གཅིག་ནས་བླ་ཕྱག་མཁན་ཆུང་མཁྱེན་རབ་ཕུན་ཚོགས་དང་། ཆབ་མདོ་ནས་མདའ་དཔོན་བསོད་ནམས་སྟོབས་རྒྱལ་དཔུང་བཅས་བཏང་། ཕྱོགས་གཅིག་ནས་གོང་མ་ཆེན་པོའི་མདུན་ཟི་ཁྲོན་ཙུང་ཐུས་ཇུས་མེད་ཇུས་འཁྲི་བྱས་ཚུལ་སྙན་ཞུ་འབུལ་བར་རྩེ་མགྲོན་བློ་བཟང་ཕྲིན་ལས་དང་། གདན་འཐུས་བཅས་རྒྱ་གར་བརྒྱུད་མཚོ་ཐོག་ནས་པེ་ཅིང་དུ་བཏང་བ་བཅས་ལ་བརྟེན། རྒྱ་དཔོན་ཀྲང་གྱིའི་དམག་འཕྲལ་དུ་ཕྱིར་འཐེན་དང་ཆབས་ཅིག་ཉེས་ཆད་དྲག་པོ་བཅད། སྡེ་དགེ་ཆོས་རྒྱལ་འཆི་མེད་རྟག་པའི་རྡོ་རྗེ་ཡུམ་བཅས་ཁྲིན་ཏུར་གཤེགས། སྲས་གཉིས་བོད་གཞུང་གི་དབུ་འདྲེན་ལ་བརྟེན་རང་ཡུལ་དུ་ལོག་ཐུབ་པ་བྱུང་། རྒྱལ་རབས་ཉེར་གཅིག་པ་ཁྲི་རབས་བཅུ་གསུམ་པ་འཆི་མེད་རྟག་པའི་རྡོ་རྗེ་དེ་ལ་སྲས་གཉིས་འཁྲུངས་པའི་ཆེ་བ་རྡོ་རྗེ་སེངྒེའམ་གཅེས་མིང་དུ་ཨ་ཇ་ནི་རབ་བྱུང་བཅུ་བཞི་པའི་ཤིང་གླང་ཕྱི་ལོ་༡༨༦༥ལོར་འཁྲུངས། ཆུང་བ་ངག་དབང་འཇམ་དཔལ་རིན་ཆེན་ནམ་གཅེས་མིང་དུ་བ་བ་ཞེས་པ་སྟེ། སྐུ་མཆེད་འདི་གཉིས་ཀྱིས་ཡབ་རྗེ་ཞལ་བཞུགས་སྐབས་ཀྱི་གོང་སྨོས་དབུ་བླ་དེ་རྣམས་བསྟེན་ནས་རིག་པའི་གནས་སྤྱི་དང་བྱེ་བྲག་ལ་མཁས་པར་མཛད། ཁྱད་པར་ངག་དབང་འཇམ་དཔལ་རིན་ཆེན་གྱིས་རྒྱ་དཀར་ནག་སོགས་ཀྱི་སྐད་ཡིག་མང་དུ་མཁྱེན། ཡབ་གཤེགས་ནས་རྡོ་རྗེ་སེངྒེས་གདན་སའི་ཁྲི་རབས་བཅུ་གསུམ་པའི་ཁུར་བཞེས། འོན་ཀྱང་སྐུ་མཆེད་གཉིས་ཇུས་གཞི་ནང་མ་མཐུན་ནས་རྡོ་རྗེ་སེངྒེའི་ཕྱོགས་སུ་གྱང་ཁང་བདེ་ཆེན་དང་། མདུན་སྐོར་ལྕགས་རྟ་སེང་གེ་གཉིས་ཡོད་པར་ཨ་ལྕགས་གྱང་གསུམ་ཞེས་པ་དང་། འཇམ་དཔལ་རིན་ཆེན་ཕྱོགས་སུ་བྱ་རྒོད་དང་། བྲེ་འབོད་ཚང་གཉིས་ཡོད་པར་བ་བྱ་བྲེ་གསུམ་ཞེས་ཕྱོགས་ཁག་གཉིས་བཟུང་། དེ་མཚུངས་ཀྱིས་མདུན་སྐོར་ཧོར་འདྲ་དང་བཅས་པའང་ཕྱོགས་གཉིས་སུ་གྱེས་ཏེ་འུར་ཟིང་ཆེར་གྱུར། སྡེ་དགེའི་བསྟན་སྲིད་སྡེ་དང་བཅས་པ་ཉམས་དམའ་བར་གྱུར། རྡོ་རྗེ་སེངྒེའི་བཙུན་མོ་བསོད་ནམས་མཚོ་མོ་ལ་རིགས་སྲས་མ་བྱུང་བས། སྙེ་ཐང་ནོར་བུ་སྒང་ཚང་གི་སྲས་མོ་རྣམ་རྒྱལ་དཔལ་འཛོམས་ཁབ་ཏུ་བཞེས་པས་སྲས་མིང་སྲིང་དྲུག་བྱུང་བ་ལས་གཉིས་ཆུང་ངུ་ནས་གཤེགས། སྲས་མོ་སྐལ་བཟང་ཆོས་སྒྲོན་ཆུ་གླང་ལོ་པ་གླིང་ཚང་བཙུན་མོར་བཏང་། ཚེ་རིང་གཡུ་སྒྲོན་ཤིང་ཡོས་ལོ་པ་ནང་ཆེན་བཙུན་མོར་བཏང་། བདེ་ཆེན་དཔལ་སྒྲོན་ལྕགས་བྱ་ལོ་པ་ཆབ་མདོ་ཡབ་ཚང་གི་བཙུན་མོར་བཏང་། རྒྱལ་རབས་ཉེར་གཉིས་པ་ཁྲི་རབས་བཅུ་བཞི་པ་ལྷ་སྲས་འཇིགས་མེད་ཚེ་དབང་བདུད་འདུལ་ནི་རབ་བྱུང་བཅོ་ལྔ་པའི་མེ་འབྲུག་ཕྱི་ལོ་༡༩༡༦ལོར་སྐུ་བལྟམས། རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་རྗེས་མི་ཕམ་རྣམ་རྒྱལ་རྒྱ་མཚོའི་རྣམ་འཕྲུལ་དུ་གསུངས། གདན་སའི་ཁྲི་རབས་བཅུ་བཞི་པའི་ཁུར་བཞེས། རྒྱ་རབས་དངུལ་དཀར་མེ་ལོང་ལས། ས་སྟག་ཕྱི་ལོ་༡༩༣༨དང་། སྲིད་དོན་ལོ་རྒྱུས་ལས་༡༩༣༧ལོར་ནང་ཆེན་སྲས་མོ་འཇམ་དབྱངས་དཔལ་མོ་ཁབ་ཏུ་བཞེས། ལྕགས་འབྲུག་ཕྱི་ལོ་༡༩༤༠ལོར་ལྷ་སྲས་ཨུ་དགའ་འཁྲུངས། ཡབ་ཡུམ་སྲས་བཅས་འདི་དག་གིས་རྫོང་སར་འཇམ་དབྱངས་ཆོས་ཀྱི་བློ་གྲོས། དགོན་ཆེན་མཁན་རྒན་བསམ་གཏན་བློ་གྲོས། དཔལ་སྤུངས་སི་ཏུ་པདྨདབང་མཆོག་རྒྱལ་པོ། སྒ་ངག་དབང་ལེགས་པ། བླ་མ་འཇམ་དབྱངས་རྒྱལ་མཚན་སོགས་དབུ་བླར་བཀུར་ནས་ལུགས་གཉིས་བསྐྱངས། རབ་བྱུང་བཅུ་དྲུག་པའི་ལྕགས་ལུག་ཕྱི་ལོ་༡༩༣༡ལོ་ནས་ཁྲོན་ཁམས་མཐའ་སྲུང་དམག་གིས་དཀར་མཛེས་ནས་འཐབ་རིམ་བཞིན་བོད་དམག་ཡར་དེད་ནས་ཆུ་སྤྲེལ་ཕྱི་ལོ་༡༩༣༢ལོའི་བོད་ཟླ་དྲུག་པར་ཀམ་ཐོག་བར་དེད། ལོ་དེར་ཀམ་ཐོག་གྲོས་མཐུན་ཞེས་པའི་ཆིངས་ཡིག་དོན་ཚན་དྲུག་བཞག་པ་སྟེ། གནས་སྐབས་འབྲི་ཆུས་བཅད་མཚམས་བྱས་པའི་འབྲི་ཆུའི་ནུབ་རྒྱུད་བོད་གཞུང་དང་། འབྲི་ཆུའི་ཤར་རྒྱུད་ཤིས་ཁམས་སྲིད་དོན་ཨུ་ཡོན་ལྷན་ཁང་གི་ཁོངས་གཏོགས་བྱས། དེ་སྐབས་འབྲི་ཆུ་ཤར་ནུབ་གཉིས་ཆར་ཡོད་པའི་སྡེ་དགེའི་མངའ་ཁོངས་སྡེ་དགེ་རྒྱལ་པོའི་ལམ་ལུགས་ཀྱང་སོར་འཇགས་ཡོད་རྒྱུ་བྱས་པས། འབྲི་ཆུ་ཤར་རྒྱུད་དུ་ཤིས་ཁམས་སྲིད་དོན་སྐུ་ཚབ་ས་སྒོ་བཞག །འབྲི་ཆུ་ནུབ་རྒྱུད་ཕྱོགས་ཆབ་མདོ་ས་དབང་ཁོངས་གཏོགས་བྱས། འབྲི་ཆུ་ཤར་ནུབ་གཉིས་ཆར་གྱི་མི་སེར་ནས་སྡེ་དགེར་སྔར་སྲོལ་སྒོ་ཁྲལ་འུ་ལག་ཅི་ཡོད་དགོས་ཐོག །འབྲི་ཆུ་ཤར་ནུབ་ཕྱོགས་སོ་སོས་རྒྱ་བོད་ལ་སྒོ་ཁྲལ་འུ་ལག་སྤྲོད་དགོས་པས། མཛེ་ནད་སྟེང་ཕོལ་མིག་བྱུང་བ་བཞིན་སྡུག་བསྔལ་བཟོད་མེད་མྱངས། དེ་ཡང་བོད་ཕྱོགས་ནས་རྟ་མོག་རོའི་སྤུ་ལྟར་དཔྱ་ཁྲལ་ཇེ་མང་དུ་བཏང་བ་དང་། ཐ་ན་ཨམ་ཁྲལ་ཟེར་བ་དང་། སུག་ཁྲལ་ཟེར་བའང་གཏན་འབེབས་བྱས་པས། མི་ཕྱུགས་དང་རྒན་གཞོན་གྱི་དབྱེ་བ་མེད་པར་ཨམ་ཅོག་དང་། སུག་ལག་ཡོད་པ་ཞིག་ཡིན་ཕྱིན་ཁ་གྲངས་ལྟར་ཁྲལ་འཇལ་དགོས་ཀྱི་ཡོད་པ་དང་། ལྟོ་སློང་མི་ལ་ཡང་སྤྲང་ཁྲལ་ཞེས་པ་སྤྲད་དགོས་བྱུང་ཡོད་པའི་ལོ་རྒྱུས་འདུག །ཤིང་ཕག་ཕྱི་ལོ་༡༩༣༥ལོར་དམར་དམག་ཨང་གཉིས་པ་དང་བཞི་པ་དཀར་མཛེས་སུ་སླེབས། སྐབས་དེར་སྡེ་དགེ་རྒྱལ་བློན་ཁག་གཅིག་འབྲི་ནུབ་རི་མདའ་ཕྱོགས་སུ་བསྐྱོད་དེ་བཞུགས། མེ་བྱི་ཕྱི་ལོ་༡༩༣༦ལོར་གཉེར་ཆེན་བྱ་རྒོད་སྟོབས་ལྡན་དང་། ལུག་ར་གཉེར་པ་འཇམ་དབྱངས། འོག་མ་ཕྱག་མཛོད་བསོད་ནམས་ཚེ་རིང་གསུམ་གྱིས་དམག་དཔོན་སྤྱི་ཁྱབ་དང་འབྲི་ཆུའི་ཤར་རྒྱུད་ཀྱི་དཔུང་དམག་དཀར་མཛེས་དམར་དམག་ཐོག་དྲངས་། ཚོ་ཁག་བཞི་ནས་བརྒྱབས་ཏེ། ལ་དཀར་ནས་བྱ་རྒོད་སྟོབས་ལྡན་དང་། དགོན་ཆེན་དགོན་གྱི་དཔའ་ཟན་བརྒྱད་ཅུའི་དམག་དཔོན་ཁྲོ་ངེ་བུ་ཀྲུག་ཀྲུག །ས་དཀར་བློ་གྲོས་ཆོས་འཕེལ་སོགས་ཀྱིས་བརྒྱབས། སྒེ་ཐོག་མགོ་ནས་འོག་མ་བསོད་ནམས་ཚེ་རིང་དང་། ལུག་ར་འཇམ་དབྱངས། ཆུ་རྡོ་ཐུབ་བསྟན་སོགས་ཀྱིས་དྲངས། རྟ་ཁོག་ནས་གྲུ་མོ་ཐུབ་བསྟན་དང་། འདིས་ཁ་འགྱུར་མེད་སོགས་བསྐྱོད། རྫ་ཁོག་ནས་གནའ་རོང་དབང་རྒྱལ་སོགས་ཡིད་ལྷུང་གྱད་རུ་རྣམས་ཆས་ཏེ། ཕྱོགས་བཞི་ནས་འཐབ་ཀྱང་དམར་དམག་རྗེས་སྣོན་འབྱོར་ནས་སྡེ་དགེ་ཕམ། བྱ་རྒོད་སྟོབས་ལྡན་དང་ཆུ་རྡོ་ཐུབ་བསྟན་རྨས་ནས་དམར་དམག་གིས་བཟུང་། སྡེ་དགེའི་དམག་དཔུང་དཀར་མཛེས་སུ་སོང་ཤུལ་དུ་མཚོ་སྔོན་རྨ་པུའུ་སྤྱང་གི་དཔུང་དམག་སྡེ་དགེར་དགོན་ཆེན་དང་། ཡིད་ལྷུང་། འདན་ཁོག་སོགས་སུ་སླེབས། སྡེ་དགེའི་རྒྱབ་གཉེར་ཕྱི་དཔུང་ཡིན་པར་གླེང་ཡང་། དོན་དུ་སྡེ་དགེ་དབང་བསྒྱུར་བྱེད་རྩིས་བྱས་པར། སྡེ་དགེས་བོད་གཞུང་དམག་དཔུང་བཀུག་ནས་ཕྱིར་བསྐྲད། ས་སྟག་ཕྱི་ལོ་༡༩༣༨ལོར་ས་ངན་གྱིས་སྒ་རྗེ། དཔལ་ཡུལ་སོགས་སུ་རྐུ་ཇག་ཚད་མེད་ཐོག་སྡོད་ཁང་མེར་བསྲེག་པ་སོགས་བྱས་པས། བྱ་རྒོད་སྟོབས་ལྡན་དང་འཇུ་ཆུང་གཉེར་པ་ཚེ་སྟོབས་གཉིས་ཀྱིས་དམག་དཔོན་བྱས་པའི་སྡེ་དགེ་ས་སྨད་ཕྱོགས་ཀྱི་དམག་དྲངས། འགོ་པ་དྲུག་གཡོ་ཐབས་ཀྱིས་བཟུང་སྟེ་བསད། མགོ་བཅད་དེ་ནུབ་མགོན་ཁང་འོག་ཏུ་མནན་པ་བྱས། ལྷ་སྲས་ཚེ་དབང་བདུད་འདུལ་འདི་ཡབ་རྗེ་གོང་མ་རྣམས་ཀྱི་རྣམ་ཐར་འཛིན་མཁན་བློ་གྲོས་ཀྱི་དཀྱེལ་ཆེ་ཞིང་གཞུང་དྲང་པ་ཞིག་བྱུང་བས་སྔར་ཡབ་རྒན་སྐབས་ཀྱི་འཁོན་གཞི་རྣམས་ཀྱང་ཆེར་མ་ལང་། མཐར་དགུང་གྲངས་ཉེར་བདུན་པ་ཆུ་རྟ་ཕྱི་ལོ་༡༩༤༢ལོར་དགོངས་པ་རྫོགས། རིང་བསྲེལ་ཁ་དོག་སེར་དམར་ལྗང་གསུམ་ཡོད་པ་གྲེ་གང་ཙམ་འཁྲུངས་སོ། །རྒྱལ་རབས་ཉེར་གསུམ་པ་འཇམ་དབྱངས་དཔལ་མོའམ་ཚེ་དབང་དཔལ་མོ་ནི། རབ་བྱུང་བཅོ་ལྔ་པའི་ཆུ་གླང་ཕྱི་ལོ་༡༩༡༣ལོའི་ཟླ་བ་༡༡་ཚེས་ཉེར་ལྔ་ཉིན་ནང་ཆེན་རྒྱལ་པོའི་སྲས་མོར་སྐུ་འཁྲུངས། ཕྱི་ལོ་༡༩༣༧༼༡༩༣༨༽ལོར་སྡེ་དགེ་ས་སྐྱོང་ཚེ་དབང་བདུད་འདུལ་གྱི་བཙུན་མོར་ཕེབས། འདི་ཉིད་ཐུགས་རྒྱུད་ཡངས་ཤིང་གཤིས་རྒྱུད་བཟང་བ། སྐྱིད་སྡུག་ཡག་ཉེས་ཇི་ལྟར་བྱུང་ཡང་དཀོན་མཆོག་ལ་བློ་བཀལ་བ་ཞིག་ཡོད། སྡེ་དགེར་ཕེབས་ནས་ཡུན་མི་རིང་བར་ཚེ་དབང་བདུད་འདུལ་སྐུ་གཤེགས་ནས་སྲས་སྐུ་ན་ཕྲ་བས། ཕྱི་ལོ་༡༩༤༢ལོར་སྡེ་དགེའི་རྒྱལ་སྲིད་བསྐྱངས་ཤིང་ལུགས་གཉིས་ཀྱི་བྱ་བ་ཚུལ་བཞིན་མཛད་ནའང་། རྗེས་སུ་སྡེ་དགེའི་བློན་ཆེན་བྱ་རྒོད་སྟོབས་ལྡན་དང་ནང་མི་མཐུན་པར་གྱུར་ནས་ཁག་གཉིས་གདོང་ཐུག་ཏུ་འཐབ་ལ་ཉེ་སྐབས། ཕྱི་ལོ་༡༩༥༠ལོར་ཀྲུང་གོ་མི་དམངས་བཅིངས་འགྲོལ་དམག་ཅུན་བཅོ་བརྒྱད་པའི་དཔུང་དམག་སྤྱི་ཟླ་ལྔ་པར་སྡེ་དགེ་རྫོགས་ཆེན་དུ་སླེབས། ཕྱི་ཟླ་དྲུག་པའི་ཚེས་དགུར་སྡེ་དགེ་དགོན་ཆེན་དུ་སླེབས། ལོ་དེའི་ཕྱི་ཟླ་གསུམ་པའི་ཚེས་ཉེར་བཞི་ཉིན་ཁམས་ཁུལ་བཅིངས་འགྲོལ་བཏང་ཚར་ནས། ཚེས་ཉེར་བདུན་ཉིན་དར་མདོ་ལ་དར་མདོ་དམག་དོན་ཨུ་ཡོན་ལྷན་ཁང་བཙུགས་ཏེ། ཁམས་ཁུལ་གསར་པ་འཛུགས་བསྐྲུན་བྱ་རྒྱུའི་སྤྱིའི་བྱེད་ཕྱོགས་ལག་བསྟར་བྱེད་ཐབས་དོན་ཚན་དྲུག་གཏན་འབེབས་བྱས། སྡེ་དགེ་རྫོང་སྲིད་གཞུང་རྙིང་པ་དམག་དོན་ཨུ་ཡོན་ལྷན་ཁང་གི་འགོ་ཁྲིད་བྱེད་རྒྱུ་བཀའ་འབེབས་དང་འབྲེལ། དམག་དོན་སྐུ་ཚབ་ལི་སེན་ཞེས་པ་བཏང་། དེས་སྲིད་གཞུང་ལས་དོན་ལ་རྟོག་ཞིབ་དང་ཐད་ཀར་འགོ་ཁྲིད་བྱས། ཟླ་བ་བཅུ་གཅིག་པའི་ཚེས་ཉེར་བཞི་ཉིན་ནུབ་ཁམས་ཞིང་ཆེན་བོད་རིགས་རང་སྐྱོང་ལྗོངས་མི་དམངས་སྲིད་གཞུང་དངོས་སུ་བཙུགས། དེ་སྐབས་བྱ་རྒོད་སྟོབས་ལྡན་མི་དམངས་སྲིད་གཞུང་གི་ཀྲུའུ་ཞི་གཞོན་པ་དང་། ལྗོངས་ནོར་སྲིད་ཁང་གི་ཁྲུའུ་ཀྲང་གི་འགན་འཛིན་གནང་། འཇམ་དབྱངས་དཔལ་མོས་ཁུལ་མི་དམངས་སྲིད་གཞུང་གི་ཨུ་ཡོན་བྱས། ཕྱི་ལོ་༡༩༥༡ལོའི་ཟླ་བ་ལྔ་པའི་ཚེས་ཉེར་བདུན་ཉིན་སྡེ་དགེ་རྫོང་མི་དམངས་སྲིད་གཞུང་དངོས་སུ་བཙུགས་ནས། རོང་རྒྱབ་བསོད་དགའ་རྫོང་དཔོན། བྲག་ཡབ་ཀུན་དགའ་རྒྱལ་མཚན་དང་། ཇ་ར་ཨ་བློན་གཉིས་ཀྱིས་རྫོང་དཔོན་གཞོན་པ་བྱས་ཏེ། སྡེ་དགེའི་ལུགས་ཟུང་གི་སྲོལ་བཟང་པོ་ཡོངས་སུ་མེད་པ་བཏང་ནས་སྤྱི་ཚོགས་རིང་ལུགས་ཞེས་པའི་ལམ་ལུགས་བཙུགས། ཕྱི་ལོ་༡༩༥༡ལོར་ཁང་གིས་ཆབ་མདོ་ས་ཁུལ་གྱི་བཅིངས་འགྲོལ་ཨུ་ཡོན་ལྷན་ཁང་གི་ཀྲུའུ་རེན་གཞོན་པའི་འགན་འཁུར་གནང་། ཕྱི་ལོ་༡༩༥༢ལོར་ནུབ་ཁམས་ཞིང་ཆེན་བོད་རིགས་རང་སྐྱོང་ལྗོངས་ཐེངས་དང་པོའི་ལྟ་སྐོར་ཚོགས་པ་རྩ་འཛུགས་བྱས་ཏེ། པེ་ཅིང་ལ་རྒྱལ་སྟོན་དུས་ཆེན་མཛད་གཟིགས་བྱེད་སར་ཕེབས་པའི་སྐབས་སུ་བཙུན་མོས་ཐོན་ཀྲང་གཞོན་པའི་འགན་བཞེས། དེ་ནས་པེ་ཅིང་ལ་སླེབས་རྗེས་ཁོང་གིས་ལྟ་སྐོར་ཚོགས་པའི་སྐུ་ཚབ་མཛད་ནས་མའོ་ཀྲུའུ་ཞིར་གོས་ཆེན་གྱི་དར་ཆ་དང་། ཁ་བཏགས་ཕུལ། དེའི་སྐབས་སུ་བོད་ལྗོངས་གུས་བཀུར་ཚོགས་པ་དང་། ཁོང་ཚོའི་མཛད་གཟིགས་ཚོགས་པ་ལྷན་དུ་མཇལ་འཕྲད་གནང་། མཇལ་འཕྲད་གནང་ཚར་རྗེས། མའོ་ཀྲུའུ་ཞིས་ཁོང་ལ་གོས་ཆེན་རྒྱ་སྨུག་གི་བོད་གོས་ཤིག་གནང་། དེའི་ཕྱི་ཉིན་ཀྲུང་དབྱང་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་ལི་ཝེ་ཧན་གྱིས་ཁང་ལ་མཇལ་འཕྲད་གནང་། ཕྱི་ལོ་༡༩༥༥ལོའི་ལོ་འཇུག་དཀར་མཛེས་བོད་རིགས་རང་སྐྱོང་ཁུལ་གྱི་ས་ཁོངས་སུ་དང་པོར་ཚོད་ལྟའི་སྒོ་ནས་རིམ་བཞིན་དམངས་གཙོ་བཅོས་བསྒྱུར་བྱས། ཕྱི་ལོ་༡༩༥༦ལོར་ཁོང་སྐབས་དང་པོའི་རྒྱལ་ཡོངས་མི་དམངས་འཐུས་མི་ཚོགས་ཆེན་ཐེངས་གཉིས་པའི་གྲོས་ཚོགས་ནང་ཞུགས། ཚོགས་འདུ་གྲོལ་རྗེས། ཏང་ཀྲུང་དབྱང་གིས་བོད་ལྗོངས་དང་། ཁམས་ཕྱོགས་ཀྱི་སྐུ་ཚབ་པ་རྣམས་ལ་དམངས་གཙོ་བཅོས་བསྒྱུར་གྱི་འབྲེལ་ཡོད་གནད་དོན་ལ་ཆེད་དུ་གྲོས་མོལ་བྱེད་བཅུག །སྲས་ལྷ་སར་ཆོས་ཞུ་འགྲོ་རྒྱུའི་མིང་ཐོག་ནས་ཕ་ཡུལ་གྱི་གྲལ་རིམ་འཐབ་རྩོད་གཡོལ་ཐབས་བྱས། ཀྲུང་དབྱང་འཚམས་འདྲི་ཚོགས་པའི་ཐོན་ཀྲང་ཐིའུ་གོ་ཕིང་དང་། ཀྲུང་གུང་དཀར་མཛེས་ཁུལ་ཨུའི་ཧྲུ་ཅི་ལི་ཁྲུན་སྤྱང་གིས་ཆོག་མཆན་ཐོབ་རྗེས། མྱུར་དུ་བོད་ལྗོངས་ལ་བསྐྱལ། བོད་དུ་སྐྱེལ་བའི་ལམ་བར་ཁོང་གི་མངའ་འོག་འཇོ་མདའ་གཞིས་གཉེར་གཅིག་གི་སྲས་ཀྱིས་ཁྲིད་སོང་བར། ཁོང་གིས་དེའི་སྐབས་སུ་ཐེ་གཏོགས་དང་བཀག་འགོག་ཀྱང་བྱེད་རྒྱུ་མ་བྱུང་ནས་ཆུ་བཞི་སྒང་དྲུག་གི་དམག་དུ་ཞུགས། ཀྲུང་གོ་མི་དམངས་བཅིངས་འགྲོལ་དམག་དང་། ཡར་ལངས་ཞིང་བྲན་གྱིས་རྩ་འཛུགས་བྱས་པའི་ཡུལ་དམག་དཔུང་སྡེས་ལོ་གཅིག་གི་རིང་དུ། ཁམས་པའི་ས་ཁུལ་གྱི་གསར་བརྗེར་ངོ་ལོག་དྲག་ཆས་དཔུང་སྡེ་ཡོངས་སུ་ཞི་འཇགས་སུ་བཏང་། ཁོང་གི་སྲས་ཀྱང་གཡུལ་ཐོག་ནས་བཟུང་། དེའི་སྐབས་སུ་ཧོ་ལུང་སི་ལིང་ཡོན་གྱིས་ཆེད་དུ་དམག་དཔུང་ལ་ཐབས་བརྒྱ་ཇུས་སྟོང་གི་སྒོ་ནས། ཁོང་གི་སྲས་བུའི་སྲོག་སྐྱོབ་ཐུབ་པ་དགོས་པའི་བཀའ་གནང་ཡོད་པར་རྗེས་སུ་ཉིད་ཀྱིས་ཤེས་བྱུང་ཞེས་གསུངས། དེར་མ་ཟད་བོད་རྒྱ་གཉིས་ཀྱི་དགེ་རྒན་བཀོད་སྒྲིག་བྱས་ཤིང་རྒྱ་བོད་ཡིག་གཉིས་ཀྱི་ཆུ་ཚད་མཐོ་རུ་སོང་ཐུབ་འདུག །ཕྱི་ལོ་༡༩༦༠ལོར་སྐབས་གཉིས་པའི་རྒྱལ་ཡོངས་མི་དམངས་འཐུས་མི་ཚོགས་ཆེན་ཐེངས་གསུམ་པའི་གྲོས་ཚོགས་ཐོག །བོད་ལྗོངས་ཏང་ཨུའི་ཧྲུའུ་ཅི་ཀྲང་ཅིང་ཝུའུ་ནས་ཀྱང་ཁོང་ལ་གོ་སྐབས་ཡོད་དུས་ཁྱོད་རང་བུ་ལ་བལྟ་སར་འགྲོ་ཆོག་ཟེར་བ་དང་། དེ་ནས་ཡུན་མ་རིང་བའི་རྗེས་སུ་ཁོང་གི་སྲས་ཀྱི་སྐུ་གཟུགས་བདེ་ཐང་ཡིན་པ་དང་། ད་རུང་རྒྱ་ཡིག་རག་ཙམ་དང་རྒྱ་སྐད་ཤེས་པ། བོད་ཡིག་ཆུ་ཚད་ཀྱང་སྔར་ལས་ཡར་ཐོན་བྱུང་ཡོད་པ་མཐོང་དུས་དགའ་བ་དཔག་མེད་བྱུང་གསུངས། དེ་རྗེས་སྲས་ཨོ་དགའ་ཡང་གུ་ཡངས་བཙོན་ལས་གྲོལ་ནས་མ་བུ་ལྷན་འཛོམས་ཐོབ། རིག་གནས་གསར་བརྗེ་ཆེན་པོའི་ནང་ཁོང་ལྷ་འདྲེ་གདོན་བགེགས་སུ་བརྩིས་ནས། སྲིད་དབང་སྒེར་འཛིན་བྱེད་ཡུལ་བྱས་ཏེ་འོ་བརྒྱལ་ཆེན་པོ་མྱངས་ཡོད། ཕྱི་ལོ་༡༩༧༦ལོའི་ཟླ་བ་༡༠་ཚེས་༦་ཏང་ཀྲུང་དབྱང་གིས་མི་བཞི་ཤོག་ཁག་རྡུལ་དུ་བརླགས། ལྷག་པར་དུ་ཏང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་རྗེས། ཏང་གི་མི་རིགས་ཆོས་ལུགས་དང་། འཐབ་ཕྱོགས་གཅིག་གྱུར། ལས་བྱེད་པ་བཅས་ཀྱི་སྲིད་ཇུས་ལ་འགྱུར་ལྡོག་ཆེན་པོ་བྱུང་། དེ་ནས་ཁོང་རྒྱལ་གཅེས་མི་སྣ་གཞན་དང་འདྲ་བར་མཐོང་ཆེན་ཐོབ་ནས། རྒྱུན་དུ་པེ་ཅིན་དང་ཁྲིན་ཏུའུ་བཅས་ཕེབས་ཏེ་རྒྱལ་ཡོངས་དང་ཞིང་ཆེན་གྱི་ཚོགས་འདུ་གལ་ཆེན་ནང་ཞུགས་ཤིང་། ཁོང་གིས་སྔོན་རྗེས་སུ་ནུབ་ཁམས་ཞིང་ཆེན་བོད་རིགས་རང་སྐྱོང་ལྗོངས་མི་དམངས་སྲིད་གཞུང་གི་ཨུ་ཡོན་དང་། ཆབ་མདོ་བཅིངས་འགྲོལ་ཨུ་ཡོན་ལྷན་ཁང་གི་ཀྲུའུ་རིན་གཞོན་པ། དར་མདོ་ས་ཁུལ་མི་རིགས་གྲོས་མོལ་ཨུ་ཡོན་ལྷན་ཁང་གི་ཀྲུའུ་རིན་གཞོན་པ། ལྷོ་ནུབ་དམངས་གཙོའི་བུད་མེད་མཉམ་འབྲེལ་ལྷན་ཚོགས་ཀྱི་ཨུ་ཡོན། རྒྱལ་ཡོངས་དམངས་གཙོའི་བུད་མེད་མཉམ་འབྲེལ་ལྷན་ཚོགས་ཀྱི་ལག་བསྟར་གྱི་ཨུ་ཡོན། ལྷོ་ནུབ་ཞིང་ཆེན་གྲོས་མོལ་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ། དཀར་མཛེས་ཁུལ་དམངས་ཆེན་རྒྱུན་ཨུའི་ཀྲུའུ་ཞི་གཞོན་པ། ཁུལ་དཔོན་གཞོན་པ། ལྷོ་ནུབ་ཞིང་ཆེན་བུད་མེད་མཉམ་འབྲེལ་ལྷན་ཚོགས་ཀྱི་ཀྲུའུ་རིན་གཞོན་པ། སྲིད་གྲོས་སི་ཁྲོན་ཞིང་ཆེན་སྐབས་དང་པོ་དང་། བཞི་པ། ལྔ་པ། དྲུག་པ་བཅས་ཀྱི་ཨུ་ཡོན་ལྷན་ཁང་གི་ཀྲུའུ་ཞི་གཞོན་པ། སྐབས་རིམ་བྱུང་གི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མི་བཅས་ཀྱི་གོ་གནས་བཞེས་མྱོང་། ཁོང་སྙུང་བའི་རྣམ་པ་བསྟན་ནས་ཁྲིན་ཏུའུ་ཞིང་ཆེན་མི་དམངས་སྨན་ཁང་དུ་བཞུགས། ཕྱི་ལོ་༡༩༨༨ལོའི་ཟླ་བ་༩་པའི་ཚེས་༢༧་ཉིན་སྨན་ཁང་དུ་དགོངས་པ་རྫོགས། དགུང་ལོ་དོན་ལྔ་ཡིན། ཁོང་གི་མྱ་ངན་ཚོགས་འདུ་ལོ་དེའི་ཟླ་བ་༡༠་ཚེས་༥་ཉིན་གྱི་སྔ་གྲོའི་ཆུ་ཚོད་དགུ་པར་ཁྲིན་ཏུའུ་གྲོང་ཁྱེར་གྱི་པུར་ཁང་དུ་གཟབ་རྒྱས་ངང་འཚོགས་པ་དང་། མཛད་སྒོ་དེའི་ནང་ཞིང་ཆེན་ཏང་སྲིད་ལས་ཁུངས་དང་། ཞིང་ཆེན་རིམ་པའི་དམངས་གཙོ་ཏང་ཤོག་ཁག །པུའུ་ཨུ་ཁག །ཐིང་ཅུས་བཅས་ཀྱི་དབུ་ཁྲིད་རྣམ་པ་དང་། ཁོང་གི་ཁྱིམ་མི་དང་འཚོ་བཞུགས་སྐབས་ཀྱི་མཛའ་གྲོགས་སོགས་མི་སུམ་བརྒྱ་ལྷག་ཙམ་ཞུགས་ཡོད། གདུང་རབས་ང་དྲུག་པ་ལྷ་སྲས་ཨོ་དགའ་ནི་ལྕགས་འབྲུག་ཕྱི་ལོ་༡༩༤༠ལོར་སྐུ་བལྟམས། ཨོ་རྒྱན་རིག་འཛིན་འཇིགས་མེད་གར་དབང་རྡོ་རྗེ་ཞེས་རྡོ་རྗེ་འཆང་འཇམ་དབྱངས་ཆོས་ཀྱི་བློ་གྲོས་ནས་མཚན་གསོལ། དེ་ནས་རིམ་བཞིན་སྡེ་དགེའི་རྒྱལ་ས་ལྷུན་གྲུབ་སྟེང་དང་། རྫོང་སར་བཀྲ་ཤིས་ལྷ་རྩེ་སོགས་སུ་ཕེབས་ཏེ་གོང་སྨོས་དབུ་བླ་ཁག་ལས་ཟབ་ཆོས་ཞུ་བ་དང་གསན་སྦྱོང་ལ་བརྩོན། སྡེ་དགེའི་སྲིད་ཁྲིར་ཕེབས་འོས་ཡིན་ཀྱང་སྤྱི་ཚོགས་རིང་ལུགས་ཀྱི་ལམ་ལུགས་དངོས་སུ་བཙུགས་ནས་སྡེ་དགེ་ཚང་གི་སྲིད་དབང་འཇུག་བསྒྲིལ་བས་ལུགས་མཐུན་གྱི་མཛད་སྒོ་མ་གྲུབ། དེ་ནས་མེ་སྤྲེལ་ཕྱི་ལོ་༡༩༥༦ལོར་མ་ཡུམ་ནས་ཆོས་ཞུར་ཁ་གཡར་སྟེ་གོང་རིམ་ལ་ཆོག་མཆན་ཞུས་ཏེ་ལྷ་ལྡན་ཕྱོགས་སུ་བཏང་བའི་ལམ་བར་དུ་ཆུ་བཞི་སྒང་དྲུག་གི་དམག་ཏུ་ཞུགས། རྗེས་སུ་བཅིངས་འགྲོལ་དམག་གིས་གཡུལ་ས་ནས་བཟུང་སྟེ་ལོ་ཤས་བཀག་ཉར་བྱས། དེ་ནས་རིམ་བཞིན་གུ་ཡངས་ཐོབ་སྟེ་སྔ་རྗེས་སུ་དཀར་མཛེས་ཁུལ་སྲིད་གྲོས་ཀྱི་ཨུ་ཡོན་དང་། རྒྱུན་ལས་ཨུ་ཡོན། དཀར་མཛེས་ཁུལ་གཞོན་ནུ་མཉམ་འབྲེལ་ལྷན་ཚོགས་ཀྱི་རྒྱུན་ཨུ། ཟི་ཁྲོན་ཞིང་ཆེན་སྲིད་གྲོས་ཀྱི་ཨུ་ཡོན། ཞིང་ཆེན་སྲིད་གྲོས་སྤྱི་ཚོགས་ཁྲིམས་ལུགས་ཁྲུའུ་ཡི་ཁྲུའུ་ཀྲང་གཞོན་པ་བཅས་ཀྱི་འགན་འཛིན་གནང་། ཕྱི་ལོ་༡༩༧༥ལོར་ཁྲོ་ངེ་ཚང་གི་རིགས་རྒྱུད་བུ་མོ་བཀྲ་ཤིས་ལྷ་སྒྲོན་བཙུན་མོར་བཞེས་ཏེ། སྲས་མོ་ཚེ་རིང་གཡང་འཛོམས་ཕྱི་ལོ་༡༩༧༧ལོར་འཁྲུངས་ནས་ཁྲིན་ཏུའུ་ལ་བཞུགས། ཕྱི་ལོ་༡༩༩༢ལོའི་ཟླ་བ་དྲུག་པར་ལྷ་སར་ཕེབས་ཏེ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་ཕྲིན་ལས་རྡོ་རྗེ་མཆོག་ཁྲི་སྟོན་གྱི་མཛད་སྒོར་ཞུགས། ལོ་དེའི་ཟླ་༡༠་ཚེས་༣༡་ཉིན་དགུང་གྲངས་ང་གཉིས་ཐོག་གློ་བུར་དུ་སྙུང་གཞི་བཞེས་ཏེ་ལྷ་སར་གཤེགས། ཟླ་༡༡་ཚེས་གསུམ་ཉིན་གདུང་བཞུས། བཙུན་མོ་བཀྲ་ཤིས་ལྷ་སྒྲོན་ནས་དགོངས་རྫོགས་བསྒྲུབས་པ་དང་། སྔར་སྲོལ་བཞིན་སྡེ་དགེ་དགོན་ཆེན་གཙུག་ལག་ཁང་བསམ་གྲུབ་མཐོང་གྲོལ་ཆེན་མོར་གསེར་ཟངས་ལས་གྲུབ་པའི་གདུང་རྟེན་བཞེངས་ཡོད། ཇི་སྐད་དུ། །དེ་ལྟར་གཙང་མ་འཆི་མེད་ལྷ་ལས་བབས། །སྡེ་བཞིའི་དཔལ་མངའ་སྟོབས་ཀྱི་དབང་ཕྱུག་གྱུར། །ཆོས་ལྡན་ཆོས་སྤྱོད་གྲུབ་པའི་རྩེར་སོན་ཏེ། །ཁྱད་ཆོས་གསུམ་ལྡན་རྒྱུད་པ་རིན་ཆེན་ཕྲེང་། ཞེས་གསུངས་པ་ནི་དོན་གྱི་སྙིང་པོས་ལྕི་བའི་གསུང་ངོ་།། ༈ དེ་དག་གི་མཚན་ཐོ་ཟུར་དུ་བཀོད་པ་ནི། དེ་ལྟར་ན་སྡེ་དགེའི་ཆོས་རྒྱལ་ཆེན་པོ་རིམ་པར་བྱོན་པ་འདི་ལ་གདུང་རབས་རིམ་བྱོན་དང་། རྒྱལ་རབས་རིམ་བྱོན། ཁྲི་རབས་རིམ་བྱོན་གྱི་སྐོར་གསུམ་དུ་ཕྱེ་ནས། གདུང་རབས་ཀྱི་ཐོག་མ་ཆོས་རྒྱལ་སྲོང་བཙན་སྒམ་པོའི་བློན་ཆེན་འགར་བློན་རིག་པ་ཅན་སྙན་གྲགས་ཤིན་ཏུ་ཆེ་བས་དེ་ནས་བགྲང་སྲོལ་བྱུང་བ་ལྟར་ན་འགར་བློན་ཆེན་པོ་ནས་ལྷ་སྲས་ཨུ་དགའི་བར་གདུང་རབས་ལྔ་བཅུ་ང་གསུམ་བྱོན། དོན་དུ་ཐོག་མར་ལྷ་ལས་བབས་པའི་འགར་གནམ་ཚ་འབྲུག་ནས་བགྲང་དགོས་པས་གདུང་རབས་ལྔ་བཅུ་ང་དྲུག་སྟེ། དེའང་དང་པོ་འགར་གནམ་ཚ་འབྲུག །གཉིས་པ་འགར་བླ་མཆན་ཆེན་པོ། གསུམ་པ་འགར་སྟོང་མེས་ཁྲི་ཆགས། བཞི་པ་འགར་སྟོང་བཙན་ཡུལ་བཟུང་། ལྔ་པ་འགར་ཡོན་ཏན་རྒྱལ། དྲུག་པ་འགར་ལྷ་གཅིག་སྙན་ལྡེམ་བུ། བདུན་པ་འགར་ཁྲི་བཟང་དུམ་བུ། བརྒྱད་པ་འགར་ཨ་མྱེ་དགེ་བ་དཔལ། དགུ་པ་འགར་ལྷ་རྗེ་བྱམས་པའི་དཔལ། བཅུ་པ་འགར་དཔལ་གྱི་ཡོན་ཏན། བཅུ་གཅིག་པ་འགར་དཔལ་གྱི་ཕུར་བུ། བཅུ་གཉིས་པ་འགར་དཔལ་གྱི་འབྱུང་གནས། བཅུ་གསུམ་པ་འགར་དཔལ་གྱི་ཤེས་རབ། བཅུ་བཞི་པ་འགར་དཔལ་གྱི་བཀྲ་ཤིས། བཅོ་ལྔ་པ་འགར་དཔལ་གྱི་བླ་མ། བཅུ་དྲུག་པ་འགར་དཔལ་གྱི་བཀྲ་ཤིས་བླ་མ། བཅུ་བདུན་པ་འགར་ཡོན་ཏན་བླ་མ། བཅོ་བརྒྱད་པ་འགར་ཤེས་རབ་བླ་མ། བཅུ་དགུ་པ་འགར་བྱང་ཆུབ་བླ་མ། ཉི་ཤུ་པ་འགར་གྲགས་པ་རྒྱལ་མཚན། ཉེར་གཅིག་པ་འགར་དཀོན་མཆོག་རྒྱལ་མཚན། ཉེར་གཉིས་པ་འགར་དགེ་འདུན་རྒྱལ་མཚན། ཉེར་གསུམ་པ་འགར་བྱམས་པ་རྒྱལ་མཚན། ཉེར་བཞི་པ་འགར་ཡེ་ཤེས་རྒྱལ་མཚན། ཉེར་ལྔ་པ་འགར་དཔལ་གྱི་བྱམས་པ་ཕྱི་མ། ཉེར་དྲུག་པ་འགར་དཔལ་གྱི་འབུམ་པ། ཉེར་བདུན་པ་འགར་དཔལ་གྱི་གྲགས་པ། ཉེར་བརྒྱད་པ་འགར་དཔལ་གྱི་རྡོ་རྗེ། ཉེར་དགུ་པ་འགར་དཔལ་གྱི་བསོད་ནམས། སུམ་ཅུ་པ་འགར་དཔལ་གྱི་རྩེ་མོ། སོ་གཅིག་པ་འགར་སྒོམ་སྟོན་གཙུག་ཏོར་འབུམ། སོ་གཉིས་པ་འགར་སྟོན་སྒོམ་དཔལ་གྱི་རྒྱལ་མཚན། སོ་གསུམ་པ་འགར་རྔུ་པ་གུ་རུ། སོ་བཞི་པ་འགར་སྟོང་དཔོན་ཟླ་བ་བཟང་པོ། སོ་ལྔ་པ་འགར་རྒྱལ་བ་བཟང་པོ། སོ་དྲུག་པ་འགར་པདྨབསྟན་སྲུང་། སོ་བདུན་པ་འགར་དཀར་ཆེན་བྱང་ཆུབ་འབུམ། སོ་བརྒྱད་པ་འགར་བདེ་ཆེན་བསོད་ནམས་བཟང་པོ། སོ་དགུ་པ་འགར་བོ་ཐར་བཀྲ་ཤིས་སེང་གེ། བཞི་བཅུ་པ་རྒྱལ་མཚན་འབུམ། ཞེ་གཅིག་པ་དཔོན་ཆེན་ཨ་སྔ་། ཞེ་གཉིས་པ་རྒྱལ་འཕེལ། ཞེ་གསུམ་པ་ནམ་མཁའ། ཞེ་བཞི་པ་ལྷུན་གྲུབ། ཞེ་ལྔ་པ་ཀླུ་འཕེལ། ཞེ་དྲུག་པ་ཨོ་རྒྱན་བཀྲ་ཤིས། ཞེ་བདུན་པ་དབང་ཆེན་མགོན་པོ། ཞེ་བརྒྱད་པ་ཆོས་རྒྱལ་བསྟན་པ་ཚེ་རིང་། ཞེ་དགུ་པ་བླ་ཆེན་བློ་གྲོས་རྒྱ་མཚོ། ལྔ་བཅུ་པ་ས་དབང་སྡེ་དགའ་བཟང་པོ། ང་གཅིག་པ་ཚེ་དབང་རྡོ་རྗེ་རིག་འཛིན། ང་གཉིས་པ་དམ་ཚིག་རྡོ་རྗེ། ང་གསུམ་པ་དཔལ་ལྡན་འཆི་མེད་རྟག་པའི་རྡོ་རྗེ། ང་བཞི་པ་རྡོ་རྗེ་སེང་གེའམ་ཨ་ཇ། ང་ལྔ་པ་ཚེ་དབང་བདུད་འདུལ། ང་དྲུག་པ་ཨོ་རྒྱན་རིག་འཛིན་འཇིགས་མེད་གར་དབང་རྡོ་རྗེའམ་ཨུ་དགའ་ཞེས་པའི་བར་གདུང་རབས་ལྔ་བཅུ་ང་དྲུག་ཙམ་བྱུང་། ༈ རྒྱལ་རབས་རིམ་བྱོན་ལ་རྒྱལ་རབས་ཀྱི་ཐོག་མ་ཟིལ་རྒྱུད་ཀྱི་མི་སྡེ་དབང་དུ་གྱུར་པས་བོ་ཐར་བཀྲ་ཤིས་སེངྒེ་ནས་བགྲང་པས། དང་པོ་བོ་ཐར་བཀྲ་ཤིས་སེང་གེ གཉིས་པ་རྒྱལ་མཚན་འབུམ། གསུམ་པ་དཔོན་ཆེན་ཨ་སྔ། བཞི་པ་རྒྱལ་འཕེལ། ལྔ་པ་བླ་ཆེན་ཀུན་དགའ་རིན་ཆེན། དྲུག་པ་དཔོན་ཆེན་ལྷུན་གྲུབ། བདུན་པ་བླ་ཆེན་བྱམས་པ་ཕུན་ཚོགས། བརྒྱད་པ་བླ་ཆེན་ཀུན་དགའ་ཕུན་ཚོགས། དགུ་པ་བླ་མ་ཆེ་མཆོག །བཅུ་པ་ཁྲི་ཆེན་སངས་རྒྱས་བསྟན་པ། བཅུ་གཅིག་པ་ཁྲི་ཆེན་བླ་མ་བསོད་ནམས་ཕུན་ཚོགས། བཅུ་གཉིས་པ་ཆོས་རྒྱལ་བསྟན་པ་ཚེ་རིང་། བཅུ་གསུམ་པ་ཁྲི་ཆེན་བླ་མ་ཕུན་ཚོགས་བསྟན་པ། བཅུ་བཞི་པ་བླ་ཆེན་བློ་གྲོས་རྒྱ་མཚོ། བཅོ་ལྔ་པ་རྗེ་བཙུན་དབྱངས་ཅན་སྒྲོལ་མ། བཅུ་དྲུག་པ་ས་དབང་བདེ་དགའ་བཟང་པོ། བཅུ་བདུན་པ་སྒ་རྗེ་ཚེ་དབང་ལྷ་མོ། བཅོ་བརྒྱད་པ་ཚེ་དབང་རྡོ་རྗེ་རིག་འཛིན། བཅུ་དགུ་པ་དམ་ཚིག་རྡོ་རྗེ། ཉི་ཤུ་པ་འཆི་མེད་རྟག་པའི་རྡོ་རྗེ། ཉེར་གཅིག་པ་རྡོ་རྗེ་སེངྒེ། ཉེར་གཉིས་པ་ཚེ་དབང་བདུད་འདུལ། ཉེར་གསུམ་པ་འཇམ་དབྱངས་དཔལ་མོ་བཅས་རྒྱལ་རབས་ཉེར་གསུམ་བྱུང་། ༈ ཁྲི་རབས་རིམ་བྱོན་ལ་ཁྲི་རབས་ཀྱི་ཐོག་མ་ནི་བླ་ཆེན་བྱམས་པ་ཕུན་ཚོགས་ཀྱིས་སྡེ་དགེའི་ཆོས་སྲིད་དར་རྒྱས་སུ་མཛད་པས་བླ་ཆེན་ཉིད་གསེར་ཁྲིར་མངའ་གསོལ་བྱས་པ་ནས་བགྲང་སྟེ། དང་པོ་བླ་ཆེན་བྱམས་པ་ཕུན་ཚོགས། གཉིས་པ་བླ་ཆེན་ཀུན་དགའ་ཕུན་ཚོགས། གསུམ་པ་བླ་མ་ཆེ་མཆོག །བཞི་པ་ཁྲི་ཆེན་སངས་རྒྱས་བསྟན་པ། ལྔ་པ་ཁྲི་ཆེན་བླ་མ་བསོད་ནམས་ཕུན་ཚོགས། དྲུག་པ་ཆོས་རྒྱལ་བསྟན་པ་ཚེ་རིང་། བདུན་པ་ཁྲི་ཆེན་བླ་མ་ཕུན་ཚོགས་བསྟན་པ། བརྒྱད་པ་བླ་ཆེན་བློ་གྲོས་རྒྱ་མཚོ། དགུ་པ་ས་དབང་བདེ་དགའ་བཟང་པོ། བཅུ་པ་ཚེ་དབང་རྡོ་རྗེ་རིག་འཛིན། བཅུ་གཅིག་པ་དམ་ཚིག་རྡོ་རྗེ། བཅུ་གཉིས་པ་འཆི་མེད་རྟག་པའི་རྡོ་རྗེ། བཅུ་གསུམ་པ་རྡོ་རྗེ་སེངྒེ། བཅུ་བཞི་པ་ལྷ་སྲས་ཚེ་དབང་བདུད་འདུལ་བཅས་ཁྲི་རབས་བཅུ་བཞི་བྱོན། དེ་དག་ཀྱང་མི་རིགས་ལྷ་ལས་བབས་པས་འོད་གསལ་ལྷའི་གདུང་བརྒྱུད། ཆོས་རྒྱལ་སྲོང་བཙན་སྒམ་པོའི་ནང་བློན་འགར་སྟོང་བཙན་དང་། ཆོས་རྒྱལ་འཕགས་པ་དང་ཧོར་སེ་ཆེན་རྒྱལ་པོ་མཆོད་ཡོན་གྱིས་མདོ་སྨད་སྟོང་དཔོན་དུ་བསྐོས་པ་སོགས་འཇིག་རྟེན་སྟོབས་ཀྱི་ཆེ་བརྒྱུད། ལྷ་རྗེ་བྱམས་པའི་དཔལ་ནས་བཟུང་གྲུབ་ཐོབ་མང་དུ་བྱུང་བས་གྲུབ་པ་ཐོབ་པའི་ཆོས་བརྒྱུད། འགར་བློན་རིག་པ་ཅན་ནས་གདུང་བརྒྱུད་རིག་རྩལ་ཆེ་བ་དུ་མ་བྱུང་བས་རིག་པ་འཕྲུལ་གྱི་མཁས་བརྒྱུད་དང་བཞིས་གཞན་ལས་ཁྱད་པར་འཕགས་སོ། །དེ་དག་ལས་བོ་ཐར་བཀྲ་ཤིས་སེངྒེའི་སྐབས་སྡེ་དགེ་ཆོས་རྒྱལ་གྱི་དབུ་བརྙེས། བླ་ཆེན་བྱམས་པ་ཕུན་ཚོགས་སྐབས་ཆབ་སྲིད་ཀྱི་དབུ་འཕང་གྱེན་དུ་འཛེག །ཆོས་རྒྱལ་བསྟན་པ་ཚེ་རིང་གིས་འཛམ་གླིང་ན་གྲགས་པའི་པར་ཁང་བཞེངས། ཁྲི་ཆེན་ཕུན་ཚོགས་བསྟན་པའི་སྐབས་མངའ་ཐང་དགུང་དང་མཉམ་པ་བྱུང་བས་སྡེ་དགེའི་རྒྱལ་རབས་ཀྱི་ནང་ནས་འདི་དག་བཀའ་དྲིན་ཆེ་ཞིང་གྲགས་ཅན་གྱི་མི་སྣ་ཡིན་པར་མངོན་ནོ། །གཉིས་པ་ལ་བཅུ་བཞི་ལས་དང་པོ་སྲིད་འཛིན་གྱི་གོ་རིམ་ནི། རིམ་པ་དང་པོ་སྡེ་དགེ་རྒྱལ་པོ། རིམ་པ་གཉིས་པ་གཉེར་ཕྱག་ལྷན་རྒྱས་ཁང་། རིམ་པ་གསུམ་པ་རྫོང་སྒོ་ཁག །རིམ་པ་བཞི་པ་ཞིང་པའི་ས་ཁུལ་དུ་སྡེ་ཤོག་དང་། འབྲོག་ཁུལ་དུ་གྱད་རུ་སོགས། རིམ་པ་ལྔ་པ་གཙོ་ཤོག་དང་། འབྲོག་ཁུལ་དུ་རུ་དཔོན་སོགས་ཡིན། རིམ་པ་དང་པོ་སྡེ་དགེའི་རྒྱལ་པོ་ནི། འགར་གྱི་གདུང་བརྒྱུད་ཁོ་ནས་འཛིན་དགོས། རྒྱལ་རབས་བཅུ་བདུན་པ་སྒ་རྗེ་ཚེ་དབང་ལྷ་མོ་དང་། རྒྱལ་རབས་ཉེར་གསུམ་པ་འཇམ་དབྱངས་དཔལ་མོ་གཉིས་འགར་གྱི་གདུང་བརྒྱུད་མིན། དེའང་གྲུབ་ཆེན་བརྩོན་འགྲུས་བཟང་པོའི་ལུང་དོན་བཞིན་གདུང་རབས་རེའི་གདུང་འཛིན་གཅིག་པུར་སོང་སྐབས་མིན་ན། ཁྲི་འཛིན་རབ་བྱུང་རྟེན་ཅན་ཁོ་ནས་མཛད་དགོས་རྒྱུ་བླ་ཆེན་བྱམས་པ་ཕུན་ཚོགས་ནས་བཀས་བཅད་པ་བཞིན་སྲོལ་འཇགས། དེར་མངའ་གསོལ་ཇི་ལྟར་བྱས་པའི་ལོ་རྒྱུས་ཁྲི་ཆེན་བློ་གྲོས་རྒྱ་མཚོའི་སྐབས་སྡེ་དགེའི་བསྟན་འགྱུར་དཀར་ཆག་ཏུ་ཅུང་རྒྱས་ཙམ་ཡོད་པ་དཔེར་མཚོན་ཙམ་ཚིག་སྣ་བསྡུས་ཏེ་ངོ་བཤུས་བྱས་པ་འདི་ལྟར། དེ་ལྟར་ཁམས་གསུམ་ཆོས་ཀྱི་རྒྱལ་པོ་ཆེན་པོར་གྱུར་པའི་སྐྱེས་བུ་དམ་པ་ཇི་སྐད་སྨོས་པ་དེ་དག་གི་དྲིན་གྱིས་ལྷ་དང་བཅས་པའི་སྐྱེ་དགུ་མ་ལུས་པའི་ཕྱག་བགྱི་འོས་པའི་བླ་མ། སྡོམ་པ་གསུམ་གྱི་འབྱོར་པ་བླ་ན་མེད་པ་དང་ལྡན་པ། ཆོས་ཀྱི་རྒྱལ་པོའི་རྒྱལ་ཚབ་དམ་པ་ཉིད་དུ་ཆོ་ག་ཡང་དག་པའི་སྒོ་ནས་མངའ་གསོལ་དུ་ཟིན་ཀྱང་སླར་ཡང་སྙིགས་མའི་དུས་ཀྱི་སྐྱེ་བོ་མི་སྲུན་པ་ཤིན་ཏུ་གདུལ་དཀའ་བ་དག །དངོས་སུ་ཆོས་དང་མཐུན་པའི་བཀའ་ཁྲིམས་རྡོ་རྗེ་བརྩེགས་པའི་ར་བ་ལ་ལེགས་པར་བཅུག་སྟེ། བརྒྱུད་ནས་ཚུལ་བཞིན་མ་ཡིན་པའི་སྤྱོད་པ་ལས་བཟློག་པར་བྱ་བའི་ཕྱིར་དང་། སངས་རྒྱས་བཅོམ་ལྡན་འདས་ཀྱི་བསྟན་པ་རིན་པོ་ཆེའི་དབུ་འཕང་མངོན་པར་འདེགས་པའི་ཕྱིར། བསྐལ་པ་དཔག་ཏུ་མེད་པའི་བསོད་ནམས་ཀྱི་འབྲས་བུ་སྨིན་པ་སྙམ་བྱེད་པའི་ཛམྦུ་གསེར་གྱི་ཕུང་པོ་མཐའ་དག་གཅིག་ཏུ་བརྩེགས་པ་དཔལ་སྡེ་དགེ་རྒྱལ་པོ་ཞེས་བྱ་བའི་བསྟན་སྲིད་ཉི་ཟླ་ཟུང་དུ་འབྲེལ་བ་ལྟ་བུའི་གདན་སའི་ཁྲི་འཕང་མཐོན་པོ། ཕྱོགས་ཀྱི་དཀྱིལ་འཁོར་ཀུན་ཏུ་འཁོད་པའི་རྒྱལ་རིགས་དང་། བློན་པོ། མི་དཔོན། ཆེ་བཙན་གྱི་སྐྱེ་འགྲོ་ཕལ་ཆེར་བ་དག་གི་རལ་པའི་དོ་ཀེར་སྣུམ་པོ་མཛེས་པར་བྱེད་པ་ནོར་བུའི་རྒྱན་དང་བཅས་པས་ལན་གཅིག་མིན་པར་བཏུད་པར་བྱས་པའི་གནས་ག་ལ་བ་དེར། སྡོམ་བརྩོན་བླ་མ་ཆེན་པོ་གང་གི་ཞབས་ཀྱི་ཆུ་སྐྱེས་དམར་པོ་སེན་མོ་མུ་ཏིག་གི་དུད་པ་འཛིན་པ་དག་ཉེ་བར་བཀོད་དེ་སྐྱེ་དགུའི་བདག་པོ་དམ་པ་ཉིད་དུ་དབང་བསྐུར་རོ། དེའང་ཁྲི་ལ་ཇི་ལྟར་མངའ་གསོལ་བའི་ཚུལ་ནི། སྡོམ་བརྩོན་བླ་མ་སྐྱེ་དགུའི་བདག་པོར་གྱུར་པ་རང་གི་སྐུའི་མཆེད་ཟླར་གྱུར་པ་ཆེ་ཞིང་རིགས་ཤིང་སཱལ་ཆེན་པོ་ལྟ་བུ་སྡེ་དགེ་བླ་མ་བློ་གྲོས་རྒྱ་མཚོ་དང་། དཔོན་ཆེན་བསོད་ནམས་མགོན་པོ་ཞེས་པ་གོང་དུ་སྨོས་པའི་ཡ་རབས་དམ་པའི་སྤྱོད་ཚུལ་དང་། ཕྱི་དང་ནང་གི་རིག་པའི་གཙུག་ལག་རྒྱ་མཚོའི་མངའ་བདག་ཅན་ཏེ་རྣམ་པ་གཉིས་དང་། མཁྱེན་དཔྱོད་ཀྱི་དཀྱིལ་འཁོར་རྣམ་པར་ཡངས་པའི་དགེ་ཚུལ་མ་ཚེ་དབང་ལྷ་མོ་ཞེས་པ་སྲིད་ཞིའི་ཡོན་ཏན་མང་པོ་དང་ལྡན་པར་གྱུར་ཀྱང་རྒྱགས་པ་དང་གཡེང་བ་མ་མཆིས་པར་སྒོ་གསུམ་ཚུལ་དམ་པ་ལ་རྟག་ཏུ་གནས་པ། བདོག་པའི་རྫས་ཕལ་ཆེ་བ་དག་ཀྱང་དཀོན་མཆོག་ལ་མཆོད་པ་འབུལ་བ་དང་། སེམས་ཅན་ལ་སྦྱིན་པ་གཏོང་བའི་ཕྱག་ཐུང་ངུར་མ་གྱུར་པ་དེ་ཉིད་དང་། སྡོམ་བརྩོན་བླ་མ་སྐྱེ་དགུའི་བདག་པོའི་བཀའ་ལུང་གི་ནོར་བུས་འགྲོ་བའི་སེམས་ཀྱི་རྙོག་པ་མ་ལུས་པ་བགྲུང་བར་བྱེད་ཅིང་། གཅིག་ཏུ་འཕྲིན་ལས་ཀྱི་འཁོར་ལོ་རིན་པོ་ཆེ་ལག་ཏུ་ཐོགས་ནས་འཛིན་མའི་ཁྱོན་གྱི་དཀྱིལ་འཁོར་ཡངས་པ་མཐའ་དག་རང་དབང་དུ་བགྱིད་པ་ལ་བསྙེང་པ་མི་མངའ་བའི་བློ་གྲོས་ཀྱི་རྩལ་རབ་ཏུ་རྫོགས་པའི་འཕྲུལ་གྱི་མདུན་ན་འདོན་དང་། ནང་བློན། སྐུ་སྲུང་བ། ཡི་གེ་པ། ཚོང་དཔོན། སྡེ་དཔོན་ལ་སོགས་པ་རྒྱལ་པོའི་འཁོར་གྱི་སྐྱེ་བོའི་ཚོགས་དབང་ཆེ་ཞིང་མཐོ་བར་གྱུར་པ་རྣམས་ཀྱང་གུས་པའི་ཞེ་ས་དང་བཅས་ཏེ། རྐང་རྟེན་དང་ལྡན་པའི་ཁྲི་མཐོན་པོ་གང་ཡིན་པ་དེ་ལ་གཙུག་གིས་ཉེ་བར་བཏུད་ནས་མདུན་དུ་འཁོད་པ་དག་ནི་འདི་ལྟ་སྟེ། མདུན་ན་འདོན་ཐམས་ཅད་ཀྱི་མེས་པོར་གྱུར་པའི་བློན་ཆེན་ཆོས་སྐྱོང་བློ་གྲོས་དང་། རྒྱལ་བའི་མྱུ་གུའི་སྤྱོད་ཚུལ་ལ་གོམས་པ་སྡོམ་བརྩོན་བསོད་ནམས་བཀྲ་ཤིས། ངོ་མཚར་ཚིག་གི་བང་མཛོད་འཛིན་པ་དགེ་སློང་བསྟན་འཛིན་བཟང་པོ། རིག་པའི་གནས་ཀྱི་བང་མཛོད་འཛིན་པ་དྲུང་ཡིག་རྣམ་པ་གཉིས། མང་དུ་ཐོས་པའི་དབང་ཕྱུག་དགེ་སློང་བཟང་པོ། ངང་ཚུལ་ཆོས་དང་མཐུན་པ་དགེ་སློང་མགོན་སྲུང་། དྲན་འཛིན་གྱི་མེ་ལོང་རབ་ཏུ་གསལ་བ་དབོན་པོ་ལྷ་དགྱེས། བསྟན་སྲིད་ཟུང་གི་ཕྲིན་ལས་ཀྱི་འཁོར་ལོས་སྒྱུར་བ་ལྷ་བུ་ཚེ་རིང་། བགྱི་བ་ཀུན་ལ་རྨོངས་པ་མེད་པའི་བློ་ལྡན་དར་རྒྱས། བློ་དང་ཐབས་ཀྱི་རྩལ་རབ་ཏུ་རྫོགས་པ་ཕྱག་མཛོད་གུ་རུ་བཀྲ་ཤིས། གཙུག་ལག་ཟུང་གི་མཁྱེན་པ་རབ་ཏུ་རྒྱས་པ་བོ་དགྱེས། སྡེབ་ལེགས་གཏམ་གྱི་འབྱུང་གནས་ཚོང་དཔོན་འབུམ་སྐྱབས། ཤེས་རབ་དང་གཟུངས་ཀྱི་མེ་ལྕེ་རབ་ཏུ་འབར་བ་བཀྲ་ཤིས་རྒྱ་མཚོ། བརྟན་ཅིང་ཟབ་མོའི་བློ་དང་ལྡན་པ་གྲོག་མ། རྣམ་པར་དཔྱོད་པའི་མིག་དཀྱུས་རིང་པོར་གྱུར་པ་ཨ་ཟློས་ལ་སོགས་པ་སྟེ། ཐམས་ཅད་ཀྱང་ཇི་སྐད་དུ། མསུརཀྵའི་ལུགས་ཀྱི་བསྟན་བཅོས་ལས། ཚིག་གསལ་བློ་ནི་ཕུན་སུམ་ཚོགས། །ལུགས་ཀྱི་བསྟན་བཅོས་དག་ལ་མཁས། །ངང་འཇམ་དཔྱོད་པར་བྱེད་པ་སྟེ། །རྒྱལ་པོའི་བློན་པོ་དེ་འདྲས་བྱ། །ཞེས་དང་། རིགས་དང་ངང་ཚུལ་ཡོན་ཏན་ལྡན། །བདེན་དང་ཆོས་ལ་མཆོག་ཏུ་གཞོལ། །གཟུགས་བྱད་ཤིན་ཏུ་བཟང་བ་ནི། །རྒྱལ་པོའི་སྤྱན་མི་ཡིན་པར་བཤད། །ཅེས་གསུངས་པ་ལྟར་ཕྱི་ནང་གི་རིག་པའི་གཙུག་ལག་མང་པོའི་བརྗོད་པར་བྱ་བ་ཐམས་ཅད་འདྲེན་པ་ལ་ཐོགས་པ་མེད་པའི་རྗོད་བྱེད་ཀྱི་ཚིག་གསལ་བ། བརྗོད་ཚུལ་གྱི་སྡེབ་ལེགས་པ། དགོས་པའི་གཙོ་བོ་གང་དང་གང་ཡིན་པ་དེ་དཔེ་དང་གཏན་ཚིགས་ཀྱི་སྒོ་ནས་བདེ་བླག་ཏུ་སྟོན་ནུས་པ། འཇིག་རྟེན་ལུགས་ཀྱི་བསྟན་བཅོས་ཤེས་རབ་སྡོང་བུ་དང་། སྐྱེ་བོ་གསོ་བའི་ཐིགས་པ། ཙནཀའི་རྒྱལ་པོའི་ལུགས་ཀྱི་བསྟན་བཅོས། ཚིགས་སུ་བཅད་པ་བརྒྱ་པ། ལེགས་པར་བཤད་པ་རིན་པོ་ཆེའི་གཏེར་ལ་སོགས་པ་ལུགས་ཀྱི་བསྟན་བཅོས་ཐམས་ཅད་རིག་ཅིང་དེ་དག་གི་རྗེས་སུ་བྱེད་པ། གཏུམ་པ་དང་རྩུབ་པའི་ཚེར་མའི་མེ་དབལ་བཏུལ་ནས། སྙིང་རྗེ་ཆེན་པོའི་སེམས་བཞིན་དུ་འཇམ་ཞིང་མཉེན་པའི་ངང་ཚུལ་དང་ལྡན་པ། བརྩམ་པར་བྱ་བ་དང་བརྩམ་པར་བྱ་བ་མ་ཡིན་པ། བསྐྱབ་པར་བྱ་བ་དང་བསྐྱབ་པར་བྱ་བ་མ་ཡིན་པ། གཞོམ་པར་བྱ་བ་དང་གཞོམ་པར་བྱ་བ་མ་ཡིན་པ། བཀུར་བར་བྱ་བ་དང་བཀུར་བར་བྱ་བ་མ་ཡིན་པ་ལེགས་པར་དཔྱོད་ཅིང་བླང་དོར་ཚུལ་བཞིན་དུ་བྱེད་པ། བདེན་པའི་ལམ་དུ་རྒྱུ་ཞིང་བདེན་པའི་ཚིག་གསོང་པོར་སྨྲ་བ། བགྱི་བ་ཐམས་ཅད་ཀྱང་མཐར་དམ་པའི་ཆོས་སུ་འགྱུར་བ་དང་བསྟན་པའི་ཞབས་ཏོག་ཏུ་འགྱུར་བའི་ལས་ལ་གཞོལ་བ། བཟོད་པ་བསྒོམ་པ་བཞིན་དུ་བཞིན་འཛུམ་ཞིང་གཟུགས་བྱད་ཕུན་སུམ་ཚོགས་པ་དང་ལྡན་པས་ཀུན་གྱི་མཉེས་གཤིན་དམ་པར་གྱུར་པ། གཞན་ཡང་རྒྱལ་པོའི་འཁོར་དུ་འོས་པ་དཔའ་ཞིང་བརྟན་པ། བཟོའི་ལས། མཚོན་གྱི་ལས། བཞོན་པ་དག་ལ་ཡང་འདབ་ཆགས་བཞིན་དུ་ཤིན་ཏུ་གོམས་པར་བྱས་པ་སྟེ། དེ་ལྟ་བུའི་ཡོན་ཏན་དང་ལྡན་པའི་འཁོར་གྱི་ཚོགས་ཆེན་པོ་རྣམས་ཀྱིས་མདུན་གྱིས་བལྟས་ཏེ་ཀུན་ནས་བསྐོར་བའི་དབུས་ག་ལ་བ་དེ་ཉིད་དུ། གསེར་གྱི་རི་དབང་ཉི་མའི་འོད་ཀྱིས་འཁྱུད་པའམ་ཀནཀའི་མཆོད་སྡོང་ལ་མར་མེའི་འོད་ཀྱིས་ཕོག་པ་ལྟར་བཞུགས་སུ་གསོལ་ལོ། དུས་དེ་ཉིད་དུ་ཡར་ཀླུངས་བཀྲ་ཤིས་ཆོས་སྡེའིེ་མཁན་པོ་ངག་དབང་ཀུན་དགའ་ལེགས་པའི་འབྱུང་གནས་རྒྱལ་མཚན་དཔལ་བཟང་པོ་ཞེས་པ་དཔལ་ལྡན་སྟོབས་བཅུ་མངའ་བའི་བསྟན་པ་རིན་པོ་འཆད་པ་དང་། རྩོད་པ། རྩོམ་པའི་ཕྲིན་ལས་ཀྱི་སྒོ་ནས་རིང་དུ་གནས་པར་བྱེད་པའི་མཁྱེན་བརྩེ་ནུས་པའི་བདག་ཉིད་ཅན་དེ་ཉིད་གཙོ་བོར་བྱས་པའི་གསང་སྔགས་གྲུབ་པའི་རྡོ་རྗེ་སློབ་དཔོན་ཆེན་པོ་རྣམས་དང་ལྷན་ཅིག་པས། སྡོམ་བརྩོན་ས་གཞི་སྐྱོང་བའི་བརྟུལ་ཞུགས་བཟུང་བའི་བླ་མ་ཆེན་པོ་གང་དེ། བསྐལ་པ་བཟང་པོ་འདི་ཉིད་ཇི་སྲིད་གནས་པ་དེ་སྲིད་དུ། སྐུ་གསུང་ཐུགས་མི་ཤིག་རྡོ་རྗེ་གསུམ་གྱི་རང་བཞིན་དུ་སྒྲུབ་པར་བྱེད་པའི་ཆོ་ག་ཟབ་མོའི་རྟེན་འབྲེལ་ལ་བརྟེན་ནས། རྣམ་པར་དཀར་བའི་ཕྲིན་ལས་ཀྱི་འཁོར་ལོ་གང་དེ་རིང་པོའི་ལམ་དུ་རྒྱུ་བས་སྙིགས་མའི་དུས་ཀྱི་སེམས་ཅན་ཐམས་ཅད་དགེ་བ་བཅུའི་ཁྲིམས་ཀྱི་ར་བ་ལ་ཡང་དག་པར་གཟུད་པར་བྱ་བའི་ཕྱིར་དང་། བསྒྲུན་དུ་མེད་པའི་སྙིང་སྟོབས་ཀྱི་ཕྲག་པ་བརྟན་པོས་ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཀུན་ཏུ་མི་ཉམས་པ་བགྱི་བའི་ཁུར་ཆེན་པོ་གོང་ནས་གོང་དུ་འདེགས་པར་བྱ་བའི་ཕྱིར་དང་། ཕྱོགས་སུ་ལྷུང་བ་མེད་པའི་སྙིང་རྗེ་ཡོངས་སུ་རྒྱས་པའི་གདུགས་དཀར་གཅིག་གི་གྲིབ་ཏུ་ཡངས་པའི་རྒྱལ་ཁམས་ཀྱི་འགྲོ་བ་ཐམས་ཅད་རྫོགས་ལྡན་བསྐལ་པའི་དུས་ཀྱི་བདེ་སྐྱིད་གསར་པའི་རོ་ལ་ལོངས་སུ་སྤྱད་པར་བྱ་བའི་ཕྱིར་དང་། མཐའ་གཉིས་ལ་མི་གནས་པ་སངས་རྒྱས་བཅོམ་ལྡན་འདས་ཀྱི་གོ་འཕང་མངོན་དུ་བྱ་བའི་ཐབས་ཀྱི་གཙོ་བོ་གཞན་ལ་ཕན་པ་ཉེ་བར་ཞུགས་པའི་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་མཐར་ཕྱིན་པར་བྱ་བའི་ཕྱིར་དུ་ཞབས་བརྟན་གྱི་ཆོ་ག་ཡང་དག་པར་བསྒྲུབ་པར་བརྩམས་སོ། །དེ་ཡང་སྔོན་གྱི་མཁས་པ་ཆེན་པོ་རྣམས་ཀྱི་བཞེད་སྲོལ་གྱི་ཆོ་ག་མི་འདྲ་བ་ཚུལ་འགའ་ཞིག་མཆིས་པ་ལས། ཕྱོགས་བཅུ་རྒྱལ་བ་ཀུན་གྱི་ཕྲིན་ལས་མ་ལུས་པ་གཅིག་ཏུ་བསྡུས་པའི་རང་གཟུགས་རྗེ་བཙུན་སྒྲོལ་མ་དཀར་མོ་ཡིད་བཞིན་འཁོར་ལོའི་ཆོ་ག་རྣམ་པར་དག་པའི་སྒོ་ནས། འཆི་བདག་བདུད་ཀྱི་དཔུང་གིས་མི་ཕྱེད་པའི་འཆི་བ་མེད་པ་རྡོ་རྗེའི་སྲོག་གི་ཀ་རིང་ཤིན་ཏུ་བརྟན་པར་བཙུགས་སོ། ། མུ་འགོད། ་་་་་
' རྩོམ་འོག་མ།
སྡེ་དགེའི་རྒྱལ་རབས་རིན་ཆེན་ཕྲེང་མཛེས། ༼ལྔ་པ།༽