སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼གསུམ་པ།༽
སྡེ་དགེ་རྒྱལ་རབས་རིན་ཆེན་ཕྲེང་མཛེས། (ཚན་པ་གསུམ་པ།)མཛད་པ་པོ་བར་མ་མཁན་པོ་ངེས་དོན།
ལྷ་ཁང་བསམ་གྲུབ་མཐོང་གྲོལ་ཆེན་པོའི་གསེར་འཕྲུ་རྒྱ་ཕིབས་གསེར་བྱ་སྤེན་རྒྱན་གསེར་གྱི་རྒྱལ་མཚན་སོགས་ལྷ་ཁང་དང་མཆོད་རྟེན་རྣམས་ཀྱི་གན་ཇི་ར་དང་རྒྱལ་མཚན་མང་པོ་ཡང་གསེར་ཟངས་ལས་བགྱིས་པ། ཁྱད་པར་དུ་རྒྱལ་བའི་བཀའ་འགྱུར་རིན་པོ་ཆེ་པུསྟི་ཀ་བརྒྱ་དང་གསུམ། བསྟན་འགྱུར་དབུ་འཛུགས་ནས་པུསྟི་ཀ་ཉི་ཤུ་ཙམ་དང་། ས་སྐྱ་གོང་མ་རྣམ་ལྔའི་བཀའ་འབུམ་པུསྟི་ཀ་བཅོ་ལྔ། གཞན་ཡང་ཉེར་མཁོའི་ཆོ་གའི་རིགས། རིག་གནས་ཀྱི་སྐོར་མང་པོའི་ཆོས་སྦྱིན་མི་ཟད་པར་གྱི་སྒོ་འཕར་ཕྱེས་ཤིང་དེ་དག་གི་ཞུས་དག་དང་འབྲུ་གཟུགས་སོགས་ངོ་མཚར་བར་སི་ཏུ་ཆོས་ཀྱི་འབྱུང་གནས་དང་། ཞུ་ཆེན་ཚུལ་ཁྲིམས་རིན་ཆེན་སོགས་ཀྱིས་མཛད། རབ་བྱུང་བཅུ་གཉིས་པའི་ས་བྱ་ཕྱི་ལོ་༡༧༢༩ལོ་ནམ་མཁའ་དཔལ་བཟང་སོགས་ཀྱིས་ས་འདུལ་སོགས་སྔོན་དུ་འགྲོ་བས་པར་ཁང་ཆོས་མཛད་ཆེན་པོ་བཀྲ་ཤིས་སྒོ་མང་གི་བཀའ་འགྱུར་རིན་པོ་ཆེའི་བཞུགས་ཁང་རྟེན་དང་བརྟེན་པར་བཅས་གསར་བསྐྲུན་མཛད། ཆོས་གྲྭ་འདི་ཉིད་དུ་རྭ་འབྲོ་ཆུ་བོ་གཉིས་འདྲེས་ཀྱི་བརྒྱུད་ལྡན་ཀུན་མཁྱེན་བུ་སྟོན་རིན་པོ་ཆེའི་ཕྱག་ལེན་ཇི་ལྟ་བ་བཞིན་གྱི་དཔལ་དུས་ཀྱི་འཁོར་ལོ་ལྷ་དྲུག་བརྒྱ་སུམ་ཅུ་རྩ་དྲུག་གི་སྐུ་གསུང་ཐུགས་དཀྱིལ་འཁོར་ཡོངས་རྫོགས་ཀྱི་སྒྲུབ་མཆོད་དང་། བསྟན་སྲུང་དབང་པོ་དཔལ་རྡོ་རྗེ་ནག་པོ་ཆེན་པོ་གུར་གྱི་མགོན་པོ་བཀའ་སྡོད་དང་བཅས་པའི་གཏོར་བསྔོ་བསྐང་བཤགས། དྲག་པོའི་གཏོར་བཟློག་ཆོས་ཉིད་མ་ཞེས་ཚར་ལུགས་ཐུན་མོང་མ་ཡིན་པའི་ཕྱག་ལེན་ལྟར་གྱི་རྒྱུན་བཙུགས། ལོ་ལྟར་དུ་གསང་སྔགས་ཟབ་མོའི་རྣལ་འབྱོར་དང་ལྡན་པའི་དགེ་སྦྱོང་རྣམས་ལ་ཆོས་དང་མཐུན་པའི་ཡོན་འབུལ་རྒྱ་ཆེན་པོ་སྟོབ་པ་དང་བཅས་ཏེ། ཡི་དམ་གྱི་ལྷ་མང་པོའི་རྩ་སྔགས། སྙིང་པོ། ཉེ་སྙིང་རྣམས་ཀྱི་བཟླས་པ་དུང་ཕྱུར་ཕྲག་མང་པོ་བསགས། སྔོན་གྱི་གོང་མ་རྣམས་ཀྱིས་ཇི་ལྟར་བཞག་པ་དང་། བར་སྐབས་རྣམས་སུ་ཡང་དགོན་སྡེ་རིས་སུ་མེད་པ་ལ་སྐུ་རིམ་གསར་བསྐྲུན་གྱི་ཆོ་གའི་རིགས་དང་། མདོ་སྣ་མང་པོ་ཁྲི་འདོན་དང་འབུམ་མང་པོ་འདོན་པ་སོགས་སྟེ། བསགས་པའི་དངོས་པོ་ཐམས་ཅད་ཀྱང་དགེ་བའི་རྩ་བ་ཁོ་ནའི་རྒྱུར་འགྲོ་བར་མཛད་དོ། སྐུ་ཚེའི་མཐར་ཡང་བསྟན་བཅོས་འགྱུར་རོ་འཚལ་གྱི་ཆོས་སྦྱིན་པར་དུ་བསྒྲུབ་པའི་དབུ་འཛུགས་པ་སོགས་མདོར་ན་དུས་ཕྱིས་སངས་རྒྱས་ཀྱི་བསྟན་པ་ལ་ལྷག་པར་བྱ་བ་བྱས་པའི་བཀའ་དྲིན་འདི་དང་མཚུངས་པ་འགའ་ཡང་མ་བྱུང་ངོ་ཞེས་གཏམ་དུ་གླིང་བར་ཡང་བྱེད་དོ། དེ་ཉིད་ལས། དེ་སོགས་འགྲོ་ལ་བདེ་སྐྱིད་འབྱུང་བ་ཡི། །རྩ་ལག་གཅིག་པུ་ཐུབ་པའི་བསྟན་པ་ལ། །དངོས་དང་བརྒྱུད་ནས་ཕན་ཞིང་ཕན་གྱུར་པའི། །མཛད་པ་མཛད་ཕྲིན་ཀུན་གྱི་གཙོ་བོ་རུ། །མཛད་འདི་ངོ་མཚར་མཛད་འཕྲིན་གསུམ་པ་ཡིན། ཞེས་གསུངས་སོ། །དེ་ལྟར་ས་ལ་སྤྱོད་པའི་དབང་པོ་བསྟན་པ་ཚེ་རིང་ཞེས་ཡོངས་སུ་གྲགས་པ་དེ་ལ་སྔོན་གྱི་བསོད་ནམས་དཔག་ཏུ་མེད་པའི་བྱེད་པོས་ཡོངས་སུ་བྱིན་པའི་སྡེ་བཞིའི་འབྱོར་པ་ཤིན་ཏུ་ཡངས་ཤིང་རྒྱ་ཆེ་ལ་གཞར་ཡང་འཛད་དུ་མེད་པའི་ལོངས་སྤྱོད་ཀྱི་གཏེར་ཆེན་པོ་དང་ལྡན་པར་གྱུར་ཏེ། དཔེར་ན་རྣམ་མང་ཐོས་ཀྱི་བུའི་དཔལ་དང་འབྱོར་པ་ཇི་ལྟ་བ་བཞིན་ནོ། །དེ་ལྟ་ནའང་ཐོག་མར་རིགས་སྲས་ཀྱི་ཕྲེང་བ་ཅུང་ཟད་འབྱོན་དཀའ་བ་ལྟར་གྱུར་པར་བརྟེན། བདོག་པའི་དངོས་པོ་ཕལ་ཆེ་བ་དག་དཀོན་མཆོག་གི་ཕྱོགས་སུ་གཏོང་ཕོད་རྒྱ་ཆེན་པོའི་འབུལ་བ་དང་ཆབས་ཅིག་ཏུ། མཐར་ཐུག་གི་འབྲས་བུ་བླ་ན་མེད་པའི་བྱང་ཆུབ་ཉིད་གཙོ་བོར་དམིགས་ཏེ། གནས་སྐབས་སུའང་མིའི་ལྷ་གང་གི་རིགས་སྲས་ཆུ་བོའི་རྒྱུན་ལྟར་འབྱོན་པའི་གསོལ་བ་འདེབས་པ་ལ་བརྩོན་པ་ལྟ་བུས། འཛམ་གླིང་བསྟན་པའི་མངའ་བདག་དཔལ་ས་སྐྱ་པ་ངག་དབང་ཀུན་དགའ་བཀྲ་ཤིས་སོགས་བསྟན་འཛིན་གྱི་སྐྱེས་བུ་ཆེན་པོ་གསང་སྔགས་དང་རིག་སྔགས་ཀྱི་ནུས་མཐུ་གྲུབ་པ་མང་པོའི་བཀའ་ལུང་བཙན་པོས་སྲུང་མའི་དབང་པོ་གུར་མགོན་ལྕམ་དྲལ་དང་། གདོང་བཞི་མགོན་པོ་སོགས་སྲུང་མ་རྒྱ་མཚོའི་ཚོགས་རྣམས་ལ། མིའི་ལྷ་གང་གི་རིགས་སྲས་གངྒཱའི་རྒྱུན་ལྟར་ཆད་པ་མི་མངའ་ཞིང་མྱུར་དུ་འབྱོན་པའི་ཕྲིན་ལས་བསྐུལ་བར་བརྩམས་སོ། །དེའང་ས་གཞི་ཐམས་ཅད་ཆོས་བཞིན་དུ་སྐྱོང་བའི་རྒྱལ་པོ་དེ་ལ་རིགས་སྲས་ཀྱི་མཆོག་ཏུ་གྱུར་པ་ཤིང་སཱལ་ཆེན་པོ་ལྟ་བུ་གསུམ་དང་སྲས་མོ་རྗེ་བཙུན་འཇམ་དབྱངས་སྒྲོལ་མ་བཞི་འཁྲུངས་སོ། །ཡང་དེ་ཉིད་ལས། རྒྱལ་ཁྲིམས་ཆོས་བཞིན་སྐྱོང་ལ་མེས་དབོན་གསུམ། །བསྟན་སྤེལ་གྲུབ་པ་བརྙེས་ལ་དཀར་པོ་གསུམ། །དངོས་མཚུངས་ངོ་མཚར་རྒྱ་མཚོའི་མཛད་པ་གསུམ། །སུམ་ལྡན་བསྟན་པ་ཚེ་རིང་བསྟན་འགྲོའི་མགོན། །ཁྱིམ་པའི་ཚུལ་འཛིན་ཁྱིམ་པའི་སྐྱོན་དང་བྲལ། །ཆོས་ལྡན་བསྟན་སྐྱོང་ཆོས་ཚུགས་གཙོ་བོར་མཛད། །བསྟན་པ་ཚེ་རིང་དངོས་བརྒྱུད་རྒྱལ་བསྟན་ལ། །ཕན་ཐོགས་ཕན་བདེའི་འབྱུང་གནས་ཉིད་དུ་ངེས། །དེ་ལྟར་ལྗོངས་འདིའི་མཛད་འཕྲིན་ཕལ་ཆེར་ཞིག །རྫོགས་ནས་དྲུག་ཅུ་རྩ་གཅིག་བཞེས་པའི་དུས། །ཐུགས་དམ་ཉམས་བཞེས་ལ་སོགས་གོང་འཕེལ་དང་། །རྗེ་བཙུན་ས་སྐྱའི་གོང་མ་ལྔ་ལ་སོགས། །ཞལ་གཟིགས་ཕྱི་ནང་ངོ་མཚར་ལྟས་དང་བཅས། །གཟུགས་སྐུའི་བཀོད་པ་དབྱིངས་སུ་བསྡུ་ཚུལ་བསྟན། །ཞེས་གསུངས་སོ། །མི་དབང་བསོད་ནམས་མགོན་པོ་ནི། རྒྱལ་རབས་ཚིགས་བཅད་མ་དེ་ཉིད་ལས། མི་བདག་ཆེན་པོ་བསོད་ནམས་མགོན་པོ་ནི། །ལོངས་སྤྱོད་གདེངས་ཅན་དབང་པོའི་གཏེར་དང་མཉམ། །རྒྱལ་མཆོག་ལྕམ་སྲིང་ཁབ་བཞེས་ལྷ་ཡི་སྲས། །ཆོས་སྐྱོང་མགོན་པོ་ལྕམ་མོ་འགའ་ཤས་འཁྲུངས། །རྒྱལ་མཆོག་ཆེན་པོ་དབང་ཕྱོགས་རྒྱལ་པོའི་སྲས། །ལྷན་རྒྱས་འགའ་ཐར་ཕེབས་སྐབས་ཞུ་མཇལ་བྱོན། །མཇལ་ཕྱག་ལེགས་ཤིང་ཀུན་གྱིས་འགྲན་བྲལ་གྱི། །སྙན་པས་ས་ཁྱབ་དབུ་ཡི་མཆོད་གནས་ཀྱང་། །གོང་སྨྲོས་རྣམས་དང་ཨེ་ཝཾ་མཁན་ཆེན་པ། །དཔལ་ལྡན་ཆོས་སྐྱོང་མི་འགྱུར་རྒྱལ་མཚན་དང་། །ཀཿཐོག་སྤྲུལ་སྐུ་དྲི་མེད་ཞིང་སྐྱོང་མགོན། །སངས་རྒྱས་རྡོ་རྗེ་ལ་སོགས་མཆོད་གནས་བཀུར། །ཁྱད་པར་ཆུ་ཁྱིར་དབུས་གཙང་ཕྱོགས་ཕེབས་ནས། །རྒྱལ་མཆོག་ས་སྐྱ་བདག་ཆེན་རིན་པོ་ཆེ། །ཨེ་ཝཾ་མཁན་ཆེན་རྣམས་སོགས་སྐྱེས་ཆེན་ལ་། །བསྙེན་བཀུར་ཆོས་འབྲེལ་གནས་རྟེན་དགེ་འདུན་སྡེར། །མཆོད་འབུལ་ལ་སོགས་དགེ་སྒྲུབ་རྒྱ་ཆེར་མཛད། །སྟོབས་ཤུགས་བཙན་པོས་ལྡན་མ་ཆོས་འཁོར་བ། །ངན་ཤེད་ཡོངས་སུ་བཅོམ་བྱས་དབོན་སྟོད་ཀྱི། །བཀྲ་ཤིས་ལྟེམ་དང་བང་སེར་བང་ལྗང་དང་། །དཔལ་འབྱོར་གླིང་སོགས་ཉམས་གསོ་གསར་བསྐྲུན་མཛད། །ཡབ་སྲས་རིམ་གྱིས་བདེ་ནས་བདེ་བར་གཤེགས། །ཞེས་སོགས་གསུངས་པ་ལྟར། དེའི་སྲས་དང་པོ་དཔལ་མིའི་དབང་ཕྱུག་བསོད་ནམས་མགོན་པོ་ཞེས་བྱ་བ་ཕྱོགས་རྣམས་ཀུན་ཏུ་རབ་ཏུ་གྲགས་པ་སྟེ། དེའི་རང་བཞིན་ནི་ཕལ་དང་ཐུན་མོང་དུ་མ་གྱུར་པ་ཞིག་སྟེ། དེའང་ཐོག་མ་ཉིད་ནས་ཆོས་སྐྱོང་བའི་སྲུང་མ་རྣམས་ཀྱི་གཟི་བརྗིད་ཀྱི་ཐིག་ལེ་གཅིག་ཏུ་བསྡུས་ནས་ལེགས་པར་བསྐྱེད་ཅིང་ཀུན་ཏུ་ཡོངས་སུ་བསྐྱབས་པའི་སྐྱེས་བུ་ཉིད་དུ་གདོན་མི་ཟ་བའི་བདེན་དཔང་དུ། རྣམ་པར་དཔའ་ཞིང་རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ས་ཆེན་པོ་སྐྱོང་བ་ལ་གནོད་པ་དང་བསྡོ་བ་མེད་པ། གཟི་བརྗིད་ཆེ་ཞིང་མཐུ་ཕུན་སུམ་ཚོགས་པ་དང་ལྡན་པས་གཞན་སྡེ་མི་སྲུན་པའི་ཕྱོགས་ཐམས་ཅད་ལས་རྣམ་པར་རྒྱལ་བ། སྒྱུ་རྩལ་གྱི་རིགས་ཐམས་ཅད་ལ་མཁས་པ། སྐྱེས་བུ་དམ་པ་ལ་འོས་པའི་ཡོན་ཏན་གྱི་ཚོགས་མ་ལུས་པ་རབ་ཏུ་རྫོགས་པར་གྱུར་ཏོ། །ལས་འབྲས་སྟོན་པའི་མདོ་དང་བསྟན་བཅོས་ཀྱི་རིགས་ལ་ཤིན་ཏུ་འདྲིས་པས་དགེ་མི་དགེའི་བླང་དོར་གྱི་གནས་རྣམས་ལ་འཛོལ་མེད་དུ་དཔྱད་ཅིང་། གཞན་ལ་ཡང་རྒྱ་ཆེར་འདོམས་པ་ལ་མཁྱེན་རབ་ཀྱི་འཇུག་པ་ཤིན་ཏུ་གཡེར་པོར་གྱུར་ཏེ་དབོན་པོ་སྟོད་ཀྱི་གདན་སའི་ཁུར་བཞེས་སོ། །དེར་ཆབ་འབངས་སུ་གཏོགས་པ་ཐམས་ཅད་ཀྱང་ཕན་པའི་སེམས་དང་རྗེས་སུ་འབྲེལ་བའི་བཀའ་ཁྲིམས་བཟང་པོས་བདེ་བ་ལ་སྦྱོར་བའི་ཐབས་ལ་ཤིན་ཏུ་མཁས་ཤིང་། སྐྱེ་བོ་མ་ལུས་པ་ཕྱོགས་སུ་ལྷུང་བ་མེད་པའི་ཐུགས་བརྩེས་གཏིང་ནས་མི་འདོར་ཞིང་། ཉེས་པ་སྤྱོད་པ་རྣམས་ཀྱང་འཕྲལ་ལ་བསྡིགས་པའི་ཚུལ་གྱིས་ལེགས་པའི་ལམ་དུ་འཆོས་པ་དང་། ལེགས་པར་སྤྱོད་པ་རྣམས་ནི་གོང་ནས་གོང་དུ་བཀུར་བའི་སྒོ་ནས་བོགས་འབྱིན་པའི་ཚུལ་གྱིས་བདེ་བར་སྐྱོང་བའི་མཛད་པ་བཟང་པོ་ནམ་ཡང་མི་བསྐྱུད་པར་ལྷག་པའི་བསམ་པ་ལ་ཡང་དག་པར་གནས་པ་ཉིད་དོ། གཞན་ཡང་རྟག་ཏུ་སྒོ་གསུམ་བག་དང་བཅས་པ་ལ་ལེགས་པར་གནས་ནས་བགྱི་བ་དང་བགྱི་བར་བྱ་བ་མ་ཡིན་པ། བཀུར་བྱ་དང་བཀུར་བྱ་མ་ཡིན་པ། གཞོམ་བྱ་དང་གཞོམ་བྱ་མ་ཡིན་པའི་གནས་ཐམས་ཅད་ཡང་དང་ཡང་དུ་ལེགས་པར་བརྟགས་ནས་ཉམ་ང་བ་མེད་པའི་ཚུལ་གྱིས་སྤྱོད་པ་སྟེ། འཕགས་མཆོག་ནཱགཱརྫུ་ནས། །ཕན་སེམས་ཆེ་བ་སྒྲིན་པའི་ཚུལ། །དྲང་པོའི་ཚུལ་ནི་མི་བསླུ་བ། །བག་ཡོད་ཉམ་ང་མེད་པ་ནི། །དེ་ནི་རྒྱལ་པོའི་ཚུལ་དུ་གནས། ཞེས་བཤད་པ་ལྟ་བུའི་ཡོན་ཏན་རིན་པོ་ཆེའི་བང་མཛོད་ལེགས་པར་བཟུང་ནས། རང་གཞན་གྱི་འདོད་པའི་དངོས་པོ་མ་ལུས་པ་སྒྲུབ་པའི་རང་བཞིན་ཅན་ནོ། །ཁྱད་པར་ཆོས་ཐམས་ཅད་ཀྱི་རྒྱལ་པོའི་མདོ་ལས། ལྷ་དང་བཅས་པའི་འཇིག་རྟེན་ན། །དཀོན་མཆོག་གསུམ་པོ་མ་གཏོགས་པ། །ཡོན་གྱི་གནས་འགའ་ཡོད་མ་ཡིན། །ཞེས་གསུངས་པའི་ལུང་དོན་དང་མཐུན་པར་དཀོན་མཆོག་གསུམ་ལ་དད་པ་གསུམ་གྱི་རྩ་བ་རབ་ཏུ་བརྟན་པའི་སྒོ་ནས་བདོག་པའི་དངོས་པོ་ཕལ་ཆེ་བ་དག་གིས་བསྙེན་བཀུར་བ་སོགས་དགེ་བའི་རྩ་བ་ལྷུར་བྱེད་པ་གཞན་དང་ཐུན་མོང་དུ་མ་གྱུར་པ་ཞིག་སྟེ། རང་གི་བདོག་དགུ་ཐམས་ཅད་ཀྱི་ཕུལ་དུ་བྱུང་བའམ་མཆོག་ཏུ་གྱུར་པའམ། ཆེས་དཀོན་པའམ། གཅེས་པར་བཟུང་བ་གང་ཡིན་པ་དེ་དག་ནི་དཀོན་མཆོག་གི་ཕྱོགས་སུ་བཏང་བ་གཙོ་བོར་བྱེད་ཅིང་། ཁྱད་པར་འཛམ་གླིང་བསྟན་པའི་མངའ་བདག་དཔལ་ས་སྐྱ་པ་ངག་དབང་ཀུན་དགའ་བསོད་ནམས་རིན་ཆེན་པ་ཡབ་སྲས་རྣམས་དང་། མཁན་ཆེན་ཐམས་ཅད་མཁྱེན་པ་བཀྲ་ཤིས་ལྷུན་གྲུབ། མཁན་ཆེན་དཔལ་ལྡན་ཆོས་སྐྱོང་། ཡར་ཀླུང་མཁན་པོ་ངག་དབང་ཀུན་དགའ་ལེགས་པའི་འབྱུང་གནས། སངས་རྒྱས་ཡེ་ཤེས། སངས་རྒྱས་རྒྱ་མཚོ། ཤར་ཆེན་མི་འགྱུར་རྒྱལ་མཚན། སི་ཏུ་ཆོས་ཀྱི་འབྱུང་གནས། ཀཿཐོག་དྲི་མེད་ཞིང་སྐྱོང་སོགས་མཁས་བཙུན་གྲུབ་པའི་ཡོན་ཏན་མི་ཟད་ནམ་མཁའི་མཛོད་དུ་གྱུར་པ་མང་པོ་བསྟེན་ནས་མདོ་རྒྱུད་དང་འབྲེལ་བའི་གདམས་པ་ཟབ་མོའི་བདུད་རྩིའི་བཅུད་ལེན་མཐའ་དག་ཡང་དང་ཡང་དུ་བཏུང་བས། མངོན་མཐོ་ངེས་ལེགས་ཀྱ་ིགྲོང་ཁྱེར་མཆོག་ཏུ་འཇུག་པར་བྱེད་པའི་ལམ་གྱི་ལུས་སྟོབས་ཡོངས་སུ་བརྟས་པར་བྱེད་པའི་ཐབས་སུ། རྗེ་བཙུན་རྡོ་རྗེ་རྣལ་འབྱོར་མ་སོགས་མཆོག་དང་ཐུན་མོང་གི་དངོས་གྲུབ་སྒྲུབ་པར་བྱེད་པའི་ལྷག་ལྷ་མང་པོའི་བསྒོམ་བཟླས་ཀྱི་རིམ་པ་རྒྱུན་པར་ཉིད་དུ་མ་ཆག་པར་ཐུགས་ཉམས་སུ་བསྟར་བ་དང་། མདོ་སོགས་ཆོས་ཚན་གྱི་རིགས་མང་པོ་ཞལ་འདོན་དུ་མཛད་དོ། ཁྱད་པར་རང་གི་ཡབ་རྗེ་ས་སྐྱོང་བསྟན་པ་ཚེ་རིང་གི་དགོངས་རྫོགས་བསྒྲུབ་པ་དང་། ས་བདག་རང་གི་དལ་འབྱོར་གྱི་རྟེན་བཟང་པོ་བརྙེས་པ་ཆོས་ཚུལ་དགེ་བ་བཅུ་དང་ལྡན་པར་བྱ་བ་དང་། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་བསྒྲུབ་པར་བྱ་བའི་ཕྱིར། ཆུ་ཕོ་ཁྱི་ཕྱི་ལོ་༡༧༤༢་ལོར་གཙང་དབུས་ཀྱི་ཕྱོགས་སུ་ཆིབས་ཀྱི་ཁ་ལོ་བསྒྱུར་ཏེ་དེར་འཁོད་པའི་དགོན་སྡེ་རིས་སུ་མ་ཆད་པ་རྣམས་སུ། བསྟན་པ་རིན་པོ་ཆེའི་རྩ་ལག་ཏུ་བཞུགས་ཤིང་རྣམ་པར་དཀར་བའི་ཕྲིན་ལས་མུ་མེད་པར་སྤྲོ་བ་ལ་བཀའ་དྲིན་གཞལ་དུ་མེད་པར་གྱུར་པའི་བླ་མ། མཁན་པོ། ཟུར་འཆད་པ་མཐའ་དག་ལ་དངོས་པོ་བཟང་ཞིང་རྒྱ་དཔངས་མི་དམན་པའི་མཆོད་འབུལ་དང་། དགེ་སློང་གི་དགེ་འདུན་རྒྱ་མཚོ་ལྟ་བུ་ཇི་སྙེད་ཅིག་མཆིས་པ་རྣམས་ལ་འབུལ་བ་དང་བསྙེན་བཀུར་གྱ་ནོམ་པ་དག་གིས་མཉེས་པར་བགྱིས་སོ། །དེ་དག་ཏུ་བཞུགས་པའི་རྟེན་གསུམ་བྱིན་རླབས་ཀྱི་གཟི་འོད་མངོན་པར་འབར་བ་མཐའ་དག་ལ་ཡང་མཆོད་པའི་རྣམ་གྲངས་བསམ་གྱིས་མི་ཁྱབ་པ་དངོས་པོ་བཟང་ཞིང་རྒྱ་ཆེ་བ་དག་གིས་མངོན་པར་མཆོད་དེ། ས་བདག་ཆེན་པོ་རང་གི་ཡབ་མེས་གོང་མ་ཆོས་ཀྱི་དབྱིངས་སུ་ཐིམ་པ་རྣམས་ཀྱི་ཐུགས་ཀྱི་བཞེད་པ་མ་ལུས་པ་ཡོངས་སུ་བསྐང་བ་དང་། ལྟོས་བཅས་ཀྱི་སྐྱེ་བོ་སངས་རྒྱས་ཀྱི་ཞིང་གི་རྡུལ་ཕྲ་རབ་ཀྱི་གྲངས་དང་བཅས་པ་རྣམས་ཀྱི་རྒྱུད་ལ་བསོད་ནམས་ཀྱི་ཚོགས་དཔག་ཏུ་མེད་པའི་རྒྱ་མཚོ་རྒྱ་ཆེ་ཞིང་གཏིང་མི་དཔོག་པར་བསྐྱིལ་ཏེ། མདོར་ན་གཙུག་ལག་ཟུང་གི་ཕྲིན་ལས་ཀྱི་སྣང་བ་དཀར་པོས་ཕྱོགས་ཀྱི་ཁོ་ར་ཁོར་ཡུག་མ་ལུས་པ་ཡོངས་སུ་བཀང་བའི་ངོ་མཚར་གཏམ་གྱི་ཟླ་འོད་གཞོན་ནུ་ཕྱོགས་ཀྱི་ལུས་ཕྲའི་རྣ་རྒྱན་དུ་འགོད་པར་གྱུར་ཏོ། །རབ་བྱུང་བཅུ་གཉིས་པའི་ཆུ་གླང་ཕྱི་ལོ་༡༧༣༣ལོར་རྒྱལ་མཆོག་བདུན་པའི་གཅུང་མོ་ཚེ་རིང་ཞེས་པ་ཁབ་ཏུ་བཞེས་ཏེ་དབོན་སྟོད་ཀྱི་གདན་ས་བསྐྱངས། སྲས་མོ་ཁ་ཤས་དང་སྲས་ཆོས་སྐྱོང་༼བཟང་པོ་༽མགོན་པོ་འཁྲུངས་ཀྱང་གདུང་བརྒྱུད་ནི་མ་འཕེལ། རྒྱལ་དབང་བདུན་པའི་རྣམ་ཐར་ལས། སྡེ་དགེ་དཔོན་གྱི་སྲས་ལ་གོང་མ་ཆེན་པོ་ནས་གནང་སྦྱིན་དངུལ་སྲང་སུམ་སྟོང་ལྔ་བརྒྱ། གོས་ཡུག་བརྒྱ་ཕྲག་དུ་མ་བཅས་གནང་ཞིང་། སྡེ་དགེ་དཔོན་ལ་ཕྱིན་ཆད་བསྟན་སྲིད་ལས་དོན་ལ་ཞབས་འདེགས་ལེགས་པར་སྒྲུབ་དགོས་ཞེས་པའི་བཀའ་དང་བཅས་སྐྱེལ་མི་བྱུང་འདུག །སྡེ་དགེའི་སྲས་བསོད་ནམས་མགོན་པོ་ངོ་གཡོག་བརྒྱ་དང་བདུན་ཅུ་སྐོར་གོང་མའི་གནང་སྦྱིན་ཞུ་བ་དང་། རྗེ་འདིའི་མཇལ་ཁ་བཅས་ལ་བྱུང་བས་ཕྱག་དབང་ཇ་གྲལ་སོགས་རྒྱས་པ་དང་། གདན་གཟོས་ཀྱང་ཆེ་བ་གནང་། ཞེས་འཁོད་ཡོད། རྒྱལ་རབས་བཅུ་གསུམ་པ་ཁྲི་རབས་བདུན་པ་ཁྲི་ཆེན་བླ་མ་ཕུན་ཚོགས་བསྟན་པ་ནི། དེ་ཉིད་ལས། བླ་ཆེན་ཕུན་ཚོགས་བསྟན་པ་གང་དེ་ནི། །འཇམ་མགོན་བཀྲ་ཤིས་ལྷུན་གྲུབ་མཁན་སློབ་དྲུང་། །རབ་བྱུང་བསྒྲུབ་ཅིང་མཁན་པོ་ཆེན་པོ་དེས། །ཕུན་ཚོགས་བསྟན་པ་ཞེས་པའི་མཚན་ཡང་གསོལ། །ས་ལུག་ཡབ་རྗེ་དམ་པའི་དགོངས་རྫོགས་སུ། །དབུས་གཙང་ཕྱོགས་ཕེབས་རྒྱལ་དབང་ཐམས་ཅད་མཁྱེན། །སྐལ་བཟང་རྒྱ་མཚོ་བོད་ལྗོངས་སྐྱེ་དགུའི་སྐྱབས། །འཇམ་དཔལ་རྡོ་རྗེ་བསོད་ནམས་རིན་ཆེན་སོགས། །ཞབས་པད་གཙུག་བསྟེན་གསུང་ཆོས་བཀའ་དྲིན་ཞུས། །ཁྱད་པར་ཨེཝཾ་གདན་རབས་སོ་གསུམ་པ། །འཇམ་མགོན་དཔལ་ལྡན་ཆོས་སྐྱོང་གང་དེའི་དྲུང་། །ཡོངས་རྫོགས་དགེ་སློང་བསྒྲུབ་ཅིང་ཐེག་ཆེན་གྱི། །སེམས་བསྐྱེད་སྨིན་བྱེད་དབང་དང་བྱིན་རླབས་སོགས། །གྲོལ་བྱེད་ཁྲིད་ཀྱི་ཡང་རྩེ་བིརཱུ་པའི། །མན་ངག་ལམ་འབྲས་ཚོགས་བཤད་ཡོངས་རྫོགས་གསན། །ཆོས་འཁོར་རྣམ་གསུམ་དཔལ་ལྡན་ས་སྐྱ་དང་། །ཨེཝཾ་ཆོས་ལྡན་གནས་རྟེན་མཆོག་རྣམས་ལ། །མཆོད་འབུལ་སུམ་ལྡན་འདུས་པ་རྒྱ་མཚོ་ལ། །གསེར་དངུལ་ཇ་དང་གོས་དར་ལ་སོགས་ཀྱིས། །བསྙེན་བཀུར་འབུལ་ནོད་བསམ་ལས་འདས་པ་མཛད། །ཡབ་རྗེ་ཆོས་ཀྱི་རྒྱལ་པོའི་ལུགས་ཟུང་གི། །ཕྲིན་ལས་མཆོག་ཏུ་སྐྱོང་བའི་རྒྱལ་ཚབ་ཏུ། །མངའ་གསོལ་ཞབས་བརྟན་ཆོ་གའི་རིམ་པ་རྣམས། །ཡར་ཀླུང་ཞབས་དྲུང་ཐམས་ཅད་མཁྱེན་པ་ཡིས། །མངའ་གསོལ་བཀྲ་ཤིས་མེ་ཏོག་འཐོར་བར་མཛད། །དེ་བཞིན་དབང་ཕྱོགས་འཇམ་དབྱངས་རྒྱལ་པོ་ཡིས། །མདོ་སྨད་འཁོར་ལོས་བསྒྱུར་བར་ཆེད་བསྔགས་ཀྱི། །བཀའ་ལུང་འཇའ་ས་གསེར་ཐམ་ཆེན་པོ་བསྩལ། །ས་གསུམ་ཟླ་བྲལ་སྟོབས་ཀྱི་དབང་ཕྱུག་ཏུ། །གྱུར་ནས་ཡབ་རྗེ་ཆོས་ཀྱི་རྒྱལ་པོ་ཡི། །ཕྱག་རྒྱུན་ཇི་བཞིན་ལུགས་གཉིས་སྲོལ་མཐའ་དག །མ་ཉམས་ལེགས་པར་སྐྱོང་བར་མཛད་པ་དང་། །ཁྱད་པར་དམ་ཆོས་དགོངས་འགྲེལ་རིན་པོ་ཆེ། །པར་བཀོད་གནང་བའི་འཕྲོ་ཀུན་མཐར་ཕྱིན་མཛད། །གཞན་ཡང་རིག་གནས་སྐོར་སོགས་ཐུབ་བསྟན་གྱི། །བཙས་སུ་གྱུར་པའི་ཆོས་སྦྱིན་རྒྱ་ཆེར་སྤེལ། །སྙན་བརྒྱུད་རྭ་ཚར་ཐུན་མོང་མ་ཡིན་པའི། །ལུགས་སྲོལ་རྡོ་རྗེ་འཇིགས་བྱེད་བཅུ་གསུམ་པའི། །སྒྲུབ་མཆོད་རྒྱུན་བཙུགས་དེ་ཡི་དབང་ལུང་དང་། །ཕྱག་ལེན་ཞིབ་ཁྲིད་ལྷ་རིགས་འཇམ་དཔལ་དབྱངས། །ཡར་ཀླུང་ཀུན་མཁྱེན་བླ་མ་མཆོག་གིས་མཛད། །བསྟན་འགྱུར་བཞུགས་ཁང་དང་འབྲེལ་འདུ་ཁང་ཆེ། །སྲིད་ཞིའི་ཕུན་ཚོགས་ཉམས་གསོ་རྒྱ་བསྐྱེད་གནང་། །སྐྱེ་འགྲོར་རྟག་ཏུ་འཚེ་བའི་ཉག་རོང་གི། །དཔུང་ལ་གཡུལ་ཆེན་འཇུག་ནས་སྤ་བཀོང་མཛད། །གོང་གིས་བཀས་མངགས་གཙང་ཐུ་དབའ་ཐང་དུ། །ཕེབས་ལ་བོད་དཔོན་མཐའ་དག་མཇལ་ཞུ་ལ། །འཛོམ་སྐབས་རྒྱལ་མཆོག་འདི་ཉིད་ཀྱང་ཕེབས་ཚེ། །ཏཱ་ཞིང་ཆེན་པོས་གུས་འདུད་གཟེངས་བསྟོད་གནང་། །རྣམ་དཔྱོད་དགེ་སྟོབས་ཀུན་གྱིས་འགྲན་ཟླ་བྲལ། །ས་གསུམ་ཟིལ་གནོན་སྙན་པས་ཕྱོགས་ཀུན་ཁྱབ། །སྡིག་ཅན་རྒྱལ་པོས་གཙེས་པའི་ལྕང་ལོ་ཅན། །ཞུམ་པ་མེད་པའི་སྟོབས་ཀྱིས་སྐྱབས་སྦྱིན་པས། །སྟོབས་ཤུགས་སྙན་གྲགས་རབ་འབར་ཧོར་ཆེན་གྱི། །རྒྱུད་པ་ནང་འཁྲུགས་འཁྱར་བ་མགོ་བླངས་ཤིང་། །ཆབ་འབངས་བྱས་པ་ཁྲོ་ཚང་ཕོ་བྲང་ཡིན། །ས་སྐྱོང་བླ་མའི་བསོད་ནམས་སྟོབས་ཆེན་པོའི། །རྩལ་ལས་གཅེན་པོ་མི་བདག་དཔུང་གཡོས་ཏེ། །ལྡན་ཕྱོགས་ཡུལ་གྲུ་དབང་བྱས་ཕོ་བྲང་བཏབ། །ད་ལྟ་ཆོས་སྡེ་ཕོ་བྲང་ཞེས་འདི་འོ། །དེ་བཞིན་བྱང་འབྲོག་ཕྱོགས་ཀྱི་ཚོ་ཕྲན་འགའ། །སྡོམ་བརྩོན་བླ་མ་མཆོག་གི་ཞབས་པད་ལ། །སྤྱི་བོས་གཙུག་བཏུད་འབངས་སུ་གྱུར་ཞེས་ཐོས། །ལྷུན་གྲུབ་སྟེང་གི་བླ་བྲང་ཆེན་པོ་ལ། །ཉམས་གསོ་བཀོད་ལེགས་རྒྱ་བསྐྱེད་གསར་བསྐྲུན་སོགས། །ཡབ་མེས་གོང་མའི་ཐུགས་བསྐྱེད་མཛད་པའི་རྒྱུན། །རྒྱལ་བསྟན་སྤེལ་སྐྱོང་བསྟན་འཛིན་སྡེ་བཅས་ཀྱི། །ཕྲིན་ལས་གྱེན་འདེགས་སྟོབས་ཀྱིས་རྒྱལ་བསྟན་འཛིན། །ཕྱོགས་ལྷུང་བྲལ་བའི་རྒྱལ་ཁྲིམས་དྲང་པོ་ཡིས། །མངའ་རིས་ཁོད་འཇགས་བདེ་ལ་རྟག་སྤྱོད་པའི། །མཛད་དགོངས་ལྷུར་བཞེས་ངང་ནས་བདེ་བར་གཤེགས། །ཞེས་གསུངས་པ་ལྟར། མཚུངས་པ་མེད་པའི་བསོད་ནམས་དང་སྟོབས་ཀྱིས་མངོན་པར་མཐོ་བའི་ལྷ་སྲས་ཀྱི་རིགས་ཤིང་སཱལ་ཆེན་པོ་ལྟ་བུ་གཉིས་པ་ཕུན་ཚོགས་བསྟན་པའམ་ཀུན་དགའ་འཕྲིན་ལས་རྒྱ་མཚོ་ནི། ཐ་གྲུ་རྣམ་པར་ཡངས་པའི་ས་ཆེན་པོ་ལ་འཁོད་པའི་སྐྱེ་བོ་ཕལ་མོ་ཆེ་གཞལ་དུ་མེད་པའི་བྱམས་བརྩེ་དང་ཕྲིན་ལས་ཀྱི་གདུང་སྐྱོབ་དཀར་པོ་གཅིག་གིས་ཡོངས་སུ་ཁྱབ་པར་བདེ་བར་སྐྱོང་བ་ལ་བརྫི་བ་མི་མངའ་ཞིང་། ཆིང་གོང་མ་ཆོན་ལང་ཁྲི་ལོ་བཞི་པ་པས། རབ་བྱུང་བཅུ་གཉིས་པའི་ལྕགས་སྤྲེལ་ཕྱི་ལོ་༡༧༤༠ལོར་ཡབ་རྗེ་ལྟར་མདོ་སྨད་འཁོར་ལོས་བསྒྱུར་བའི་གསན་ཡུལ་སའི་ཆོ་ལོས་དབང་བསྐུར་ཞིང་གསེར་ཐམ་ཆེན་པོ་བསྩལ། བླ་ཆེན་འདི་ཉིད་སྲིད་ཀྱི་བྱ་བ་མཛད་པར། འཕྲལ་གྱི་བློ་རྒྱ། སྙིང་ཤེད། གསུང་བརྗོད་སྒྱུ་རྩལ་མཐའ་དག་ལ་འགར་བློན་རིག་པ་ཅན་སླར་ཡང་བྱོན་པ་ལྟ་བུའི་མཚན་སྙན་གྱི་གྲགས་ཟིལ་ཆེ། སྐྱེ་འགྲོར་རྟག་ཏུ་འཚེ་བའི་ཉག་རོང་གི་དཔུང་འཛུགས་ཏེ་ས་མཚམས་བརྒལ་བྱུང་བར་ཁྲི་ཆེན་བླ་མའི་དཔུང་གིས་གཡུལ་བཀྱེས་ཏེ་སྤ་བཀོང་བར་མཛད་པ་དང་། ཧོར་ཆེན་གྱི་བརྒྱུད་པ་ནང་འཁྲུགས་འཁྱར་བར་མགོ་བླངས་ཤིང་ཆབ་འབངས་སུ་བཅུག་སྟེ་དེར་ཁྲོ་ཚང་ཕོ་བྲང་ཞེས་པ་བཏབ། གཞན་ཡང་བྱང་འབྲོག་ཕྱོགས་ཀྱི་ཚོ་ཕྲན་འགའ་ཡིས་ཀྱང་བླ་ཆེན་ལ་མགོ་བཏགས་ནས་ཆབ་འབངས་སུ་གྱུར། བོད་གཞུང་གི་སྲིད་སྐྱོང་དཱ་ལི་བ་ཐུར་གྱིས་མདའ་དཔོན་ལྕང་ལོ་ཅན་ལ་དགོངས་ཕོག་བྱུང་སྐབས་བླ་ཆེན་གྱིས་སྐྱབས་སྦྱིན་མཛད་དོ། གཅིག་ཏུ་གངས་ལྡན་རི་བོའི་ར་བས་ཡོངས་སུ་བསྐོར་བའི་སྨན་ལྗོངས་ཆེན་པོ་འདི་ཉིད་དུ་བཞུགས་པའི་བསྟན་པ་རིན་པོ་ཆེ་རིས་སུ་མ་ཆད་པའི་དབུ་འཕང་བླ་ནས་བླར་འདེགས་པ་ལ་བསྙེངས་པ་མེད་པའི་སྙིང་སྟོབས་ཀྱི་ཕྲག་པ་བརྟན་པ། བསྐལ་པ་དཔག་ཏུ་མེད་པའི་ལེགས་བྱས་ཀྱི་མཐུ་ཆེན་པོ་དག་གིས་ཀུན་ཏུ་རབ་ཏུ་བརླིང་བར་བྱས་པའི་མིའི་དབང་ཕྱུག་ཆེན་པོ་འདི་ནི། སྐྱེ་བ་ནས་སྐྱེ་བར་སྙིང་སྟོབས་དམན་པ་མིན་པའི་ཐུགས་བསྐྱེད་ཀྱི་ཁུར་ཆེན་པོ་ཡོངས་སུ་ཁྱེར་བས་། དུས་སྙིགས་མ་ལྔའི་མུན་ཀློང་སྟུག་པོའི་ཁྲོད་དུ་རང་དབང་མེད་པར་ཆུད་པའི་འགྲོ་བ་རྣམས་གནས་སྐབས་དང་མཐར་ཐུག་གི་བདེ་བ་ལ་ཅི་ནུས་སུ་དགོད་པའི་ཕྱིར་དང་། དགེ་ལེགས་ཐམས་ཅད་ཀྱི་འབྱུང་གནས་སུ་གྱུར་པ་དམ་ཆོས་རིན་པོ་ཆེ་འཇིག་རྟེན་གྱི་ཁམས་སུ་ཡུན་རིང་པོར་གནས་པའི་ཐབས་མཐའ་དག་སྒྲུབ་པའི་གཡར་དམ་དང་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱ་བའི་ཕྱིར། ས་གཞི་ཡངས་པ་ཆོས་བཞིན་དུ་སྐྱོང་བ་ལ་བསྙེངས་པ་དང་བྲལ་བའི་སྟོབས་དང་འབྱོར་པ་དང་གྲགས་པ་དཀར་པོས་མངོན་པར་མཐོ་བའི་མིའི་རྒྱལ་པོ་ཆེན་པོར་སྐྱེ་བའི་སྤྲུལ་སྐུ་ཡོངས་སུ་བཟུང་ནས། འགྲོ་བ་ཀུན་གྱི་ཉེར་འཚོའི་གཞིར་བྱེད་པ་གདོན་མི་ཟ་བ་ཞིག་གོ །དེ་ལྟར་རིང་ནས་དགེ་ཚོགས་དཔག་ཏུ་མེད་པ་མངོན་པར་འདུ་བྱས་པའི་མཐུ་ལས་ལེགས་པར་འཁྲུངས་པའི་བསོད་ནམས་ཀྱི་སྐལ་པ་ཆེན་པོ་དང་ལྡན་པ། བསམ་པ་དགེ་བ། རང་དང་གཞན་ལ་ཕན་པར་ཞུགས་པ། སྙིང་རྗེ་དང་ལྡན་པ། བདག་ཉིད་ཆེན་པོ་དམ་པའི་ཆོས་འདོད་པ། འགྲོ་བ་ཐམས་ཅད་ལ་མཉེས་གཤིན་པ་སོགས་ཡ་རབས་དམ་པའི་ཁྱད་པར་དང་ལྡན་པ། གཞོན་ནུའི་དུས་ནས་རང་གི་བླ་མར་གྱུར་པ་དང་། སློབ་དཔོན། མཁས་པ་ཡོན་ཏན་ཅན། ཕ་མ་སོགས་ཞེ་ས་བགྱི་བའི་འོས་སུ་གྱུར་པ་གང་ཡིན་པ་དག་ལ་ཞེ་སར་མཁས་པའི་སྲི་ཞུའི་སྒོ་ནས་མངོན་པར་མཆོད་ཅིང་། རང་ཉིད་ནི་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལང་ཚོར་ལྡན་པ། འགྲོ་བ་ཐམས་ཅད་ཀྱི་མིག་ཏུ་སྡུག་ཅིང་ཡིད་འཕྲོག་པར་བཟོད་པ། པདྨི་རྫིང་བུར་འཁྲུངས་པའི་ཆུ་སྐྱེས་གཞོན་ནུ་ཁ་བྱེ་མ་ཐག་པ་ཇི་ལྟ་བ་བཞིན་དུ་ཁ་དོག་རྒྱས་ཤིང་། གཏམ་གྱི་སྒོ་ནས་ལི་ཤི་གསར་པའི་དྲི་འབྱུང་བ་སོགས་གཞོན་ནུ་དམ་པའི་ཡོན་ཏན་གྱི་ཚོགས་མང་པོས་ལེགས་པར་བཟུང་བའོ། དེར་མ་ཟད་བསླད་པ་མེད་པའི་རིགས། བརྫི་བ་མེད་པའི་སྟོབས། གཞོམ་པ་མེད་པའི་དཔུང་། བྲི་བ་མེད་པའི་མངའ་ཐང་དང་དཔལ་འབྱོར་ཕུན་སུམ་ཚོགས་པ་དག་གིས་ཕྱུར་བུར་གཏམས་པར་གྱུར་མོད་ཀྱི། བདག་ནི་འདི་ལྟར་བསོད་ནམས་ཀྱི་མཐུ་ཆེན་པོ་དང་ལྡན་ནོ་སྙམ་དུ་གཞན་ལ་ཇི་མི་སྙམ་བྱེད་པའི་མངོན་པར་ཁེངས་པ་ཡོངས་སུ་སྤངས་པ། རང་གི་བདོག་པའི་དངོས་པོ་གང་ཅི་ཡང་རུང་བ་རྣམས་ལ་མངོན་པར་ཞེན་པའི་སེར་སྣའི་འཆིང་བ་ཐམས་ཅད་ལས་རང་བཞིན་གྱིས་གྲོལ་བ། སློང་བ་ཐམས་ཅད་ཀྱི་དཔག་བསམ་ལྗོན་པ་ལྟ་བུའི་གཏོང་ཕོད་ཆེན་པོའི་ཕྱག་རིང་རབ་ཏུ་བརྐྱངས་པ། དགེ་བའི་རྩ་བ་ལ་གཅིག་ཏུ་འདུན་ཅིང་སྤྲོ་བ་མཆོག་གི་རྩེར་འཛེགས་པ་ཞིག་གོ །དེར་མ་ཟད་གནས་སྐབས་སུ་སྐྱོན་ཡོན་གྱི་ཁྱད་པར་མ་འཁྲུལ་བར་རྣམ་པར་འབྱེད་ཅིང་བླང་དོར་གྱི་གནད་ལ་མཁས་པར་གྱུར་བ། དེ་ལ་བརྟེན་ནས་མཛའ་བ་དང་མཛའ་བ་མ་ཡིན་པའི་སྐྱེ་བོ་ཐམས་ཅད་མ་བསྡུས་པར་ཡང་རང་དབང་དུ་འདུ་བར་འགྱུར་བ། སྲིད་པ་ནས་སྲིད་པ་ཐམས་ཅད་དུ་ཡོན་ཏན་གྱི་གྲགས་པའི་ཟླ་འོད་དཀར་པོ་ཕྱོགས་བཅུའི་ཁོ་ར་ཁོར་ཡུག་ཐམས་ཅད་དུ་ཉུལ་བ་ཡང་ཡོན་ཏན་གྱི་དབང་ལས་བྱུང་བར་རྗེས་སུ་རྟོགས་ནས་ཐོག་མར་འཇིག་རྟེན་པའི་བཟོའི་གནས། ལས་ཀྱི་གནས། ཡི་གེ གྲངས་དང་རྩིས། ལག་རྩིས། རལ་གྲིའི་ཐབས། འཕོང་། སྟོབས། གྱད་ཀྱི་འཛིན་སྟངས་རྣམས་ལ་སེམས་ཅན་གཞན་ལས་ཁྱད་པར་དུ་གྱུར་པའི་རིག་པ་མང་པོ་ལ་འདྲིས་པར་མཛད་དོ། གཞན་ཡང་ས་གཞི་བརྟག་པ། གོས་བརྟག་པ། རིན་པོ་ཆེ་བརྟག་པ། ཤིང་བརྟག་པ། རྟ་དང་གླང་པོ་ཆེ་བརྟག་པ་ལ་སོགས་པ་དང་། འབྱེད་པ། ཀློག་པ་རྣམས་ལ་གཡེར་པོར་གྱུར་ཏོ། །མདོ་ལས། ཤིན་ཏུ་ལེགས་པའི་ཚུལ་ཁྲིམས་གང་། །བསྡོམས་པའི་མི་དེ་མཛེས་པའི་གཟུགས། །འདུལ་བ་ལ་ནི་ཉེར་བར་གནས། །ཚུལ་ཁྲིམས་བསླབ་པ་རང་ཡིད་ཆེས། །མི་དེ་ཉི་མ་གཅིག་ལ་ཡང་། །བསོད་ནམས་ཕུང་པོ་དཔག་ཏུ་མེད། །གསོག་ཅིང་སངས་རྒྱས་འབྲས་བུ་འགྲུབ་། །ཅེས་བྱ་བ་ལ་སོགས་པ་རབ་ཏུ་བྱུང་ཞིང་ཚུལ་ཁྲིམས་ཀྱི་བསླབ་པ་ཚུལ་བཞིན་དུ་བསྲུངས་པའི་ཕན་ཡོན་དཔག་ཏུ་མེད་ཅིང་བསམ་གྱིས་མི་ཁྱབ་པས་ཡིད་ཡོངས་སུ་འཕྲོགས་པར་གྱུར་ཏོ། །དེའང་སྡུད་པ་ལས། བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །ཞེས་བྱ་བ་ལ་སོགས་པས་དེ་དག་ཀྱང་དགེ་བའི་བཤེས་གཉེན་ལ་རག་ལས་པར་རྗེས་སུ་རྟོགས་ནས་རྒྱལ་བ་གཉིས་པ་རྗེ་བཙུན་ཀུན་དགའ་བཟང་པོའི་ཆོས་ཀྱི་རྒྱལ་སྲིད་ཆེན་པོ་ལ་མཁས་པའི་ཕྲིན་ལས་རྣམ་པ་གསུམ་གྱིས་འཁོར་ལོས་སྒྱུར་བའི་གདན་རབས་སུམ་ཅུ་པ། མཁན་ཆེན་ཐམས་ཅད་མཁྱེན་པ་བཀྲ་ཤིས་ལྷུན་གྲུབ་གྲགས་པའི་རྒྱལ་མཚན་དཔལ་བཟང་པོའི་ཞལ་ནས་ཀྱི་མཁན་པོ། སངས་རྒྱས་བསྟན་པ་སློབ་དཔོན། བཀྲ་ཤིས་བཟང་པོ་དུས་བསྒོ་བ་སོགས་མཁས་ཤིང་བཙུན་པའི་དགེ་སློང་གི་དགེ་འདུན་གྲངས་ཚང་བའི་དབུས་སུ་ཚིགས་དང་པོ་གཉིས་རིམ་ནོས་ཀྱིས་རབ་ཏུ་བྱུང་བ་དགེ་ཚུལ་གྱི་དངོས་པོར་བསྒྲུབས་ཏེ། མཚན་ལ་ཕུན་ཚོགས་བསྟན་པ་ཞེས་བྱ་བར་གསོལ་ཏོ། །དེ་ལྟར་ངེས་པར་འབྱུང་བའི་ཚུལ་ཁྲིམས་རྣམ་པར་དག་པའི་གཞི་གཙང་མ་ལ་གནས་པ་དེས། མངོན་པ་མཛོད་ལས། ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །ཞེས་གསུངས་པའི་དོན་དང་རྗེས་སུ་མཐུན་པར་སྡེ་སྣོད་གསུམ་གྱི་དོན་ལ་རྗེས་སུ་སློབ་པའི་ཕྱིར་དང་། བྱེ་བྲག་ཏུ་བརྟུན་པ་རབ་འབྲིང་གི་དབང་ལས་ཚེ་འདིའམ། བར་དོའམ། སྐྱེ་བ་བདུན་ནམ་བཅུ་དྲུག་ཏུ་ཟུང་འཇུག་རྡོ་རྗེ་འཆང་གི་གོ་འཕང་གདོན་མི་ཟ་བར་འགྲུབ་པའི་ལམ་ཟབ་མོ་གསང་སྔགས་རྡོ་རྗེ་ཐེག་པ་སྟེ། གོང་དུ་སྨོས་པའི་བླ་མ་དེ་ཉིད་ཀྱི་དྲུང་ནས་དཔལ་ཀྱེ་རྡོ་རྗེའི་རྡུལ་ཚོན་གྱི་དཀྱིལ་འཁོར་དུ་དབང་བཞི་ཡོངས་སུ་རྫོགས་པར་མནོས་ཏེ། ཕུང་ཁམས་སྐྱེ་མཆེད་ཀྱི་ཞིང་ས་གཤིན་པར་སྐུ་བཞིའི་བདག་ཉིད་ཅན་གྱི་ས་བོན་ལེགས་པར་བཏབ་ནས། རིག་འཛིན་སྔགས་ཀྱི་སྡོམ་པའི་མྱུ་གུ་རྨ་མེད་པ་ཉིད་དུ་ཡོངས་སུ་འཛིན་པའི་སྐལ་པ་ཅན་དུ་བགྱིས་སོ། །དེ་ནས་བརྩམས་ཏེ་ངོར་ལུགས་དཀྱིལ་འཁོར་ཆེན་པོ་བདུན་དུ་གྲགས་པའི་དབང་། རྡོ་རྗེ་འཇིགས་བྱེད་རོ་ལངས་བརྒྱད་སྐོར་གྱི་དབང་། ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ནས་བསྟན་པའི་དཀྱིལ་འཁོར་བཅུ་གཉིས་ཀྱི་དབང་རྣམས་དང་། གཞན་ཡང་ཀུན་རིག་རྩ་བའི་དཀྱིལ་འཁོར། འཆི་བདག་འཇོམས་པ་ལྷ་བཅུ་གསུམ། ཚེ་དཔག་མེད་ལྷ་དགུ མི་འཁྲུགས་པ་ལྷ་དགུ མགོན་པོའི་བཀའ་བབ་བཞིར་གྲགས་པའི་དབང་། མགོན་པོ་གྲི་གུག་ལྷ་ལྔ་སྙན་བརྒྱུད་ལུགས་སིནྡྷུ་རའི་དཀྱིལ་འཁོར་ལ་བརྟེན་པ་རྣམས་ཀྱི་དབང་སོགས་དབང་བསྐུར་གྱི་རིགས་མང་པོ་མནོས་སོ། །གཞན་ཡང་མཆོག་ཐུན་གྱི་དངོས་གྲུབ་སྒྲུབ་པའི་ཡི་དམ་གྱི་ལྷ་བསམ་གྱིས་མི་ཁྱབ་པའི་དབང་། བྱིན་རླབས། རྗེས་གནང་། རྗེས་སུ་གདམས་པ་མང་པོ་བུམ་པ་གང་བྱོའི་ཚུལ་དུ་གསན་ནོ། །ཡར་ཀླུང་མཁན་ཆེན་ངག་དབང་ཀུན་དགའ་ལེགས་པའི་འབྱུང་གནས་པའི་དྲུང་ནས། རྡོ་རྗེ་ཕྲེང་བ་དང་ཀྲཱྀཡསམུཙྪ་གཉིས་ཀའི་དཀྱིལ་འཁོར་ཆེན་པོ་བཞི་བཅུ་རྩ་ལྔ་རས་བྲིས་ལ་བརྟེན་པའི་དབང་སོགས་དང་། དཔལ་གསང་བ་འདུས་པ་འཇམ་དཔལ་རྡོ་རྗེ་ལྷ་དགུ། གསང་འདུས་མི་བསྐྱོད་རྡོ་རྗེ་ལྷ་སོ་གཉིས། རྣམ་སྣང་སྒྱུ་དྲྭའི་འཇམ་དཔལ་རྡོ་རྗེ་ལྷ་ཞེ་གསུམ། རྩ་རྒྱུད་གཤིན་རྗེ་དགྲ་ནག་ལ་བརྟེན་པའི་རྣམ་སྣང་རིགས་གཤིན་རྗེ་གཤེད་ལྷ་བཅུ་གསུམ་སྟེ་ཕ་རྒྱུད་བཞི། བརྟག་པ་གཉིས་པ་ནས་གསུངས་པའི་ཧེརུཀའི་རིགས་ཀྱི་དཔལ་དགྱེས་པ་རྡོ་རྗེ་ཐོད་པ་ཅན་ཞལ་བརྒྱད་ཕྱག་བཅུ་དྲུག་པ་ལྷ་དགུ། ཐུགས་རྡོ་རྗེ་ཞལ་གསུམ་ཕྱག་དྲུག་པ་ལྷ་དགུ། གསུང་རྡོ་རྗེ་ཞལ་གཅིག་ཕྱག་བཞི་པ་ལྷ་དགུ། སྐུ་རྡོ་རྗེ་ཞལ་གཅིག་ཕྱག་གཉིས་པ་ལྷ་དགུ། མཁའ་འགྲོ་མ་རྡོ་རྗེ་གུར་གྱི་རྒྱུད་ལས་གསུངས་པའི་མཁའ་འགྲོ་ལྔ་རིགས་བསྡུས་པ་ལྷ་ལྔ་བཅུ་རྩ་གསུམ། སམྤུཊའི་རྒྱུད་ལས་གསུངས་པའི་བདག་མེད་ལྷ་མོ་ཉེར་གསུམ། བརྟག་གཉིས་ནས་གསུངས་པའི་བདག་མེད་ལྷ་མོ་བཅོ་ལྔ་སོགས་དང་། གཞན་ཡང་བྱིན་རླབས་རྗེས་གནང་ཁྲིད་སྐོར་སོགས་གདམས་པ་དཔག་ཏུ་མེད་པ་གསན་ནོ། །སངས་རྒྱས་རྒྱ་མཚོའི་དྲུང་དུ་སྔ་ཕྱིར་གདམས་པའི་བདུད་རྩི་དཔག་ཏུ་མེད་པ་གསན། གཞན་ཡང་གསང་སྔགས་གསར་རྙིང་གི་བླ་མ་མཁས་གྲུབ་ཀྱི་ཡོན་ཏན་མངའ་བ་མང་པོ་ལས་ཀྱང་སྔ་ཕྱིར་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་གསན་པའི་རྣམ་གྲངས་མང་དུ་ཡོད་དོ། དེ་ནས་བརྩམས་ཏེ་དཔལ་ཨེཝྂ་ཆོས་ལྡན་གྱི་གཙུག་ལག་ཁང་ཆེན་པོའི་ཚོགས་འདོན་གྱི་རིམ་པ་ཇི་ལྟར་སྲིད་པ་རྣམས་དང་། ཀྱེ་རྡོར་དང་ཕུར་པའི་དཀྱིལ་འཁོར་ཆེན་པོ་རྣམས་ཀྱི་སྒྲུབ་ཐབས། དཀྱིལ་ཆོག་ཡན་ལག་དང་བཅས་པའི་ཐུགས་འཛིན་བྱང་ཆུབ་པར་མཛད་ནས། དེ་དག་ལག་ཏུ་བླང་བའི་རིམ་པ་ཆོ་གའི་ཆིངས། འདོན་འགྲིགས། གདངས་དབྱངས། གར་འཆམ། རོལ་མོའི་རིགས་ཀྱི་འབུད་དཀྲོལ་སོགས་ལ་ཤིན་ཏུ་འདྲིས་པར་མཛད་དེ། ལོ་གྲངས་ཁ་ཡར་དགེ་འདུན་གྱི་ཚོགས་ཆེན་པོའི་དབུར་བཞུགས་ནས་དཀྱིལ་འཁོར་ཆེན་པོ་སྒྲུབ་ཅིང་མཆོད་པ། འཇུག་ཅིང་དབང་བླང་བ་རྣམས་ལ་བྱང་ཆུབ་པར་སོགས་མཛད་དོ། དེ་ནས་རབ་བྱུང་བཅུ་གཉིས་པའི་ས་ལུག་ཕྱི་ལོ་༡༧༣༩་ལོར་ཡབ་རྗེའི་དགོངས་རྫོགས་དང་། བསྟན་པའི་གཞི་མ་ཡོངས་སུ་རྫོགས་པ་དགེ་སློང་གི་དངོས་པོ་བསྒྲུབ་པའི་ཕྱིར་དང་། དབུས་གཙང་ཕྱོགས་ཀྱི་དགོན་སྡེ་རིས་སུ་མ་ཆད་པ་རྣམས་སུ་ཀུན་མཁྱེན་ཉི་མའི་གཉེན་གྱི་བསྟན་པའི་རྩ་ལག་ཏུ་བཞུགས་པའི་བླ་མ་དམ་པ་རྣམས་དང་། དགེ་སློང་གི་དགེ་འདུན་གྱི་ཚོགས་ཇི་སྙེད་ཅིག་བཞུགས་པ་དག་ལ་འབུལ་འགྱེད་དང་བསྙེན་བཀུར་སྟོབ་པའི་ཕྱིར་དང་། དེ་དག་གི་གཙུག་ལག་ཁང་ཆེན་པོ་རྣམས་སུ་རྟེན་གསུམ་ངོ་མཚར་ཅན་ཇི་སྙེད་བཞུགས་པ་རྣམས་ཀྱི་ཞལ་མཇལ་མཆོད་འབུལ་གྱི་སྒོ་ནས་བསོད་ནམས་ཀྱི་ཚོགས་གསོག་པའི་ཕྱིར་དབུས་གཙང་ཕྱོགས་སུ་ཆིབས་ཀྱི་གདོང་བསྒྱུར་བར་གྱུར་ཏོ། །དེ་ནས་རིམ་གྱིས་བཏེགས་ཏེ་ལམ་བར་དུ་འཁོད་པའི་དགོན་སྡེ་རྣམས་ལ་ཡང་དགེ་གཏོང་གི་མཆོད་སྦྱིན་རྒྱ་ཆེན་པོ་བསྟར་བ་དང་བཅས་ཏེ། ཡུལ་དབུས་འགྱུར་འཆང་གི་ལྟེ་བ་ལྷ་ལྡན་དུ་ཕེབས། དེའི་ཚེ་གཞུང་ས་ཆེན་པོ་མཆོད་ཡོན་ཉི་ཟླ་ཟུང་དུ་འབྲེལ་བ་ལྟ་བུ་དག་ནས་ཐུགས་ཤིན་ཏུ་དགེས་པའི་མདུན་བསུའི་བཀོད་པ་སྔ་ཕྱིའི་རིམ་པ་མང་པོ་བསྩལ་བ་སོགས་གཞན་ལས་ཁྱད་པར་དུ་འཕགས་པའི་བསྔགས་བཀུར་རྒྱ་ཆེན་པོ་དང་བཅས་ཏེ་དེར་ཕེབས་པ་དང་ཐོག་མར་སྡེ་སྲིད་མིའི་དབང་པོ་ཕོ་ལྷ་ཐཱ་ཇི་མཇལ་ཞུའི་རྟེན་དང་། འབུལ་ཚན་བརྒྱ་ཕྲག་གཅིག་དང་གསུམ་གྱིས་ལྷག་པ་ཕུལ། དེ་ཉིད་ནས་མཚམས་སྦྱར་ཏེ་རྒྱལ་བའི་དབང་པོ་ཐམས་ཅད་མཁྱེན་པ་སྐལ་བཟང་རྒྱ་མཚོ་དེ་ཉིད་ཀྱི་སྤྱན་ལམ་དུ་བཀྲ་ཤིས་པའི་ཁ་དར། དེ་བཞིན་གཤེགས་པའི་རྟེན་གསུམ་ངོ་མཚར་ཅན་གྱིས་ཐོག་དྲངས་པའི་འབུལ་བ་དངོས་པོ་བཟང་ཞིང་གཏོས་ཆེ་བ་ཚན་གྲངས་སྟོང་ཕྲག་ལས་ཀྱང་ལྷག་པའི་ཚོགས་རྫོགས་རྒྱ་དཔངས་མི་ཆུང་ཙམ་ཕུལ་ཏེ། ཞལ་གྱི་དཀྱིལ་འཁོར་དངོས་སུ་མཇལ་བའི་དགའ་བ་གྱ་ནོམ་པ་བརྙེས་སོ། །དེ་ནས་རིམ་གྱིས་འབྲས་སེ་སོགས་དེ་ཕྱོགས་ཀྱི་དགོན་སྡེ་ཆེ་ཕྲ་རྣམས་སུ་དགེ་སློང་གི་དགེ་འདུན་ཇི་སྙེད་བཞུགས་པ་དག་ལའང་གྲལ་འགྱེད་དང་བསྙེན་བཀུར་གཟབ་པར་བསྟབས་སོ། །དེ་ནས་བཅོམ་ལྡན་འདས་ཤཱཀྱའི་རྒྱལ་པོའི་སྐུ་བརྙན་རྣམ་པ་གཉིས་སོགས་རྟེན་གསུམ་གྱི་རྣམ་པ་ཇི་སྙེད་བཞུགས་པ་རྣམས་ཏེ། དེ་དག་ལ་ཞལ་གསེར་གསོལ་བ། བདུག་པ། མར་མེ། ཞལ་ཟས་སོགས་ཉེ་བར་སྤྱོད་པ། དར་གོས་ཀྱི་ཁྱད་པར་སྣ་ཚོགས་པ་ལས་གྲུབ་པའི་སྙན་ཤལ། འཕན། གསེར་ལས་བརྡུངས་པའི་མཆོད་ཀོང་ལ་སོགས་པ་མཆོད་པའི་ཡོ་བྱད་གྱ་ནོམ་པ་རྣམས་ཀྱིས་མཆོད་པ་འབུལ་པ་དང་བཅས་ཏེ། མདོར་ན་བསགས་པའི་དངོས་པོ་སྙིང་པོས་དབེན་པ་རྣམས་ཀྱང་འདིའི་ངོ་ན་མཐར་ཐུག་བླ་ན་མེད་པའི་བྱང་ཆུབ་ཀྱི་རྒྱུར་འགྲོ་བའི་སྙིང་པོ་ཤིན་ཏུ་ལྕི་བའི་རང་བཞིན་ཅན་དུ་མཛད་དོ། དེ་ནས་མཐར་གྱིས་གཙང་ཕྱོགས་སུ་བཏེགས་ཏེ་ལམ་བར་གྱི་དགོན་སྡེ་རིས་སུ་མ་ཆད་པ་རྣམས་སུ་བཞུགས་པའི་དགེ་འདུན་རྣམས་ལ་བསྙེན་བཀུར་རྒྱ་ཆེན་པོ་བསྲིངས་བ་དང་བཅས་ཏེ། རིམ་གྱིས་ལྷ་དང་བཅས་པའི་འཇིག་རྟེན་གྱི་ཁམས་སུ་ཕན་བདེ་མ་ལུས་པའི་འབྱུང་གནས་གཅིག་པུར་གྱུར་པའི་དཔལ་སྟོབས་བཅུ་མངའ་བའི་ལུང་རྟོགས་ཀྱི་བསྟན་པ་དྲི་མ་མེད་པའི་ཆུ་ཀླུང་བྱེ་བ་ཕྲག་བརྒྱ་ཡོངས་སུ་བཟུང་བ། བཤད་པ་དང་སྒྲུབ་པའི་ཕྲིན་ལས་ཀྱི་རྒྱུན་ཆེན་པོས་ཕྱོགས་དང་ཕྱོགས་བྲལ་གྱི་ཁོ་ར་ཁོར་ཡུག་མ་ལུས་པ་ཁྱབ་པར་རྟག་ཏུ་འབེབས་པའི་གནས། དཔལ་ཨེཝྃ་ཆོས་ལྡན་གྱི་ཆོས་གྲྭ་ཆེན་པོ་ཞེས་པ་འོག་མིན་སྟུག་པོ་བཀོད་པའི་ཞིང་ཁམས་ཆེན་པོ་ཉིད་སའི་སྟེང་ན་འཕོས་པ་སྙམ་བྱེད་པ་སྟེ། གནས་དེའི་ཡོན་ཏན་གྱི་ཁྱད་པར་ཡང་ཇི་ལྟ་བུ་ཞེ་ན། འདིར་མདོ་ཙམ་ཞིག་བརྗོད་ན། རྗེ་བཙུན་མཁས་པའི་དབང་པོ་དཀོན་མཆོག་ལྷུན་གྲུབ་ཀྱི་དངོས་སློབ་ཤར་དྭགས་པོའི་པཎྜིཏ་རྗེ་བཙུན་ཕྲིན་ལས་པ་ཞེས་བྱ་བའི་མཁས་པ་ཆེན་པོ་དེས་མཛད་པའི་བསྟོད་པ་ལས། ཀུན་དཀྲིས་ཉེས་བརྒྱས་གཟིངས་པའི་གྲོང་ཁྱིམ་ལས། །ལམ་རིང་བགྲོད་དཀས་ཕྱིན་པ་ཉེར་ཞིའི་གནས། །ངན་འགྲོའི་འཇིགས་ལས་རྒྱལ་བྱེད་ཚལ་དང་ནི། །མྱང་འདས་ཐར་པ་མཆོག་གི་གཞལ་མེད་ཁང་། །འདུ་འཛིའི་ཀླུང་བརྒྱ་བརྒལ་བ་རི་བོའི་ཕང་། །བྱ་དང་རི་དྭགས་རྩེ་བའི་དོ་ར་མཆོག །གྲུབ་པ་རིག་འཛིན་དྲང་སྲོང་དགའ་བའི་ཚལ། །འབྲོག་དགོན་ཤིན་ཏུ་དབེན་པའི་སྟི་གནས་གང་། །ཏིང་འཛིན་ངང་གིས་འཕེལ་བ་སྲིད་ཉོན་གྱི། །གདུང་སྐྱོབ་དཔལ་གྱི་དུམ་བུའི་ལྡིང་ཁང་ཉིད། །ལྷོ་ཕྱོགས་མལཡ་ཡི་ནགས་ཀླུང་ལས། །བྱང་ཕྱོགས་དཔལ་མོའི་རྒྱན་དུ་འཕོས་པ་སྙམ། །སྲིད་པའི་འདམ་རྫབ་ནཱརིའི་བགྲོད་པ་དང་། །མཚན་རྒྱུ་སྲེད་བྱེད་ཁ་ཟས་མཾསའི་དུམ། །མྱོས་འགྱུར་དུག་གི་ཁུ་བའི་ཐིགས་པ་སྟེ། །ཉེས་བརྒྱའི་བསྐྱེད་རྩ་བདུད་ཀྱི་ལོངས་སྤྱོད་དག །རྟག་པར་རིང་དུ་སྤངས་བ་བཅའ་ཁྲིམས་ཀྱི། །ར་བ་བརྩེགས་པའི་གོ་སྐབས་མི་ཕྱེད་པ། །ཞོ་འཐུང་རུས་པའི་དུམ་བུ་གོབིནྡི། །མཚོན་གྱི་འཁོར་ལོ་ཡིས་ཀྱང་གཞིག་ནུས་མིན། །དཀར་གསུམ་མངར་གསུམ་འཕགས་པ་དགེས་པའི་ཟས། །ཟླ་བའི་དུམ་བུ་བདུད་རྩིའི་ཟིལ་མངར་དང་། །བཟའ་ཤིང་འཕུར་མ་མང་པོ་བགྲུངས་པའི་ཆབ། །ལྷ་ཡི་ཞལ་སྐྱེམས་བཏུང་བས་ཉེར་འཚོ་བའི། །གཙང་སྤྱོད་སཧཀརའི་སྙེ་མ་དག །ཡོངས་སུ་སྨིན་པའི་ཚུལ་ཁྲིམས་དྲི་བཟང་པོ། །ཕྱོགས་བརྒྱར་འཐུལ་བས་ལྷ་རྫས་སྤོས་ངད་ཀྱིས། །སྲིད་ལམ་དུབ་པའི་མགྲོན་པོ་དབུགས་འབྱིན་བཞིན། །གུས་པའི་ཕོ་ཉས་མགྲོན་གཉེར་ལམ་རིང་གིས། །ངལ་བརྒྱའི་ཁུར་བཅས་ལམ་དུ་བགྲོད་མ་ཐག། །ཐོས་བསམ་སྒོམ་པའི་བྱ་བ་ལྷུར་བྱེད་ལས། །ཚེ་འདིའི་ཟང་ཟིང་གཡེང་བ་ངང་གིས་སྤོང་། བུད་ཤིང་ལ་སོགས་ཉེར་སྤྱོད་བཙལ་དཀའ་བས། །བཟའ་བཏུང་རྙེད་བཀུར་ལྷུར་བྱེད་མི་འདུ་ཞིང་། །དབང་ལུང་མན་ངག་ཆོས་ཀྱི་ཆར་འབབ་པས། །ཐར་འདོད་སྐལ་ལྡན་སྐྱེ་བོ་ངང་གིས་འདུ། །ཞེས་སོགས་ཀྱི་ཡོན་ཏན་གྱི་རྣམ་པ་མང་པོ་དང་ལྡན་པའི་གནས་དེ་ཉིད་དང་ཉེ་བའི་ས་ཕྱོགས་སུ་བདེ་བར་སོན་ནོ། །དེའི་ཚེ་ངོར་གྱི་བླ་བྲང་ཁག་རྣམས་དང་ཁང་ཚན་རྣམས་ཀྱིས་བསུ་བ་སྔ་ཕྱི་མང་པོས་རིམ་པར་སོན་ཅིང་། ཁྱད་པར་དུ་དགེ་སློང་གི་དགེ་འདུན་གྱི་ཚོགས་ཆེན་པོ་ཕྲེང་དུ་བསྟར་བའི་སེར་སྦྲེང་གི་བཀོད་པ་སྐྱེ་བོ་ཀུན་གྱི་མིག་གི་ལོངས་སྤྱོད་དུ་བསྐྲུན་པའི་ངོ་མཚར་གྱི་ལྟད་མོ་མཐོང་བ་ནི་འདི་ལྟ་སྟེ། ཐོག་མར་དགེ་ཞིང་བཀྲ་ཤིས་པར་བྱ་བ་དང་སྙན་པའི་གྲགས་པས་ཕྱོགས་ཀྱི་དཀྱིལ་འཁོར་ཀུན་ཏུ་དགང་བར་བྱ་བའི་རྟེན་འབྲེལ་གྱི་དང་པོར་སྐྱེ་བ་ལྔ་པའི་ཆོས་དུང་དཀར་པོ་གཡས་སུ་འཁྱིལ་བ་འབུད་པའི་སྒྲ། དེ་ནས་རིམ་བཞིན་གླིང་བུའི་སྒྲ། སིལ་སྙན་གྱི་སྒྲ། རྔ་བོ་ཆེའི་སྒྲ། རྔ་ཟླུམ་གྱི་སྒྲ། རྫ་རྔའི་སྒྲ། པི་ཝང་གི་སྒྲ་སྟེ་རོལ་མོའི་བྱེ་བྲག་བསམ་གྱིས་མི་ཁྱབ་པ། གཞན་ཡང་ཕྱོགས་ལས་རྣམ་པར་རྒྱལ་བའི་རྒྱལ་མཚན། གདུགས། བ་དན། ཕྱེ་མ་ཕུར་མ། འཕན་རྩེ་གསུམ་པ། རིན་པོ་ཆེའི་རྔ་ཡབ། བསིལ་ཡབ་སོགས་མཆོད་པའི་བྱེ་བྲག་བསམ་གྱིས་མི་ཁྱབ་པ་དང་བསུ་བའི་དགའ་སྟོན་རྒྱ་ཆེན་པོ་དང་བཅས་ཏེ་རིང་ནས་བསམ་པའི་ཡུལ་དུ་ལན་བརྒྱར་བྱས་པའི་ཆོས་གྲྭ་ཆེན་པོ་དེ་ཉིད་དུ་སྐུ་གསུང་ཐུགས་ལ་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བའི་ངོ་མཚར་གཏམ་གྱི་གླིང་བུ་བྱེ་བ་ཕྲག་བརྒྱས་མདུན་བདར་བ་དང་བཅས་ཏེ་ཉེ་བར་བྱོན་ཏོ། །གནས་ཀྱི་དམ་པ་ག་ལ་བ་དེར་བསོད་ནམས་ཀྱི་མཐུ་ཆེན་པོས་མངོན་པར་མཐོ་བར་བྱས་པའི་ལྷ་སྲས་མིའི་དབང་ཕྱུག་ཆེན་པོ་དེ་ཉིད་དང་། བཀའི་ལས་བྱེད་ཀྱི་གཙོ་བོ་འཕྲུལ་བློན་ཆེན་པོ་བསོད་ནམས་བཀྲ་ཤིས། མདུན་ན་འདོན་གྱི་གཙོ་བོ་འཕྲུལ་བློན་ཆེན་པོ་ལྷ་བུ་ཚེ་རིང་། གཞན་ཡང་ཕྱི་བློན། ནང་བློན། དཀོར་གཉེར། མགོ་དཔོན་སོགས་འཁོར་གྱི་སྐྱེ་བོའི་ཚོགས་དང་ལྷན་ཅིག་འདྲེན་མཆོག་མཚུངས་པ་མེད་པའི་ཞལ་གྱི་དཀྱིལ་འཁོར་ལེགས་པར་མཇལ་བའི་ཕྱིར། ཐམས་ཅད་ཀྱང་སྔ་ན་མེད་པའི་དགའ་བ། སྤྲོ་བ། གུས་པ་མཆོག་གིས་མངོན་པར་ཆས་ཏེ་གསང་ཆེན་ཆོས་ཀྱི་གནས་མཆོག་དམ་པ་དེ་ཉིད་དུ་ཉེ་བར་ཕྱིན་ཏོ། །ཇི་ཙམ་ཞིག་ན་རྒྱལ་བས་ལུང་བསྟན་པའི་སྐྱེས་བུ་ཆེན་པོ་རྗེ་བཙུན་ཀུན་དགའ་བཟང་པོའི་ཆོས་ཀྱི་རྒྱལ་སྲིད་ཆེན་པོ་ལ་མངའ་བསྒྱུར་བའི་གདན་རབས་སོ་གསུམ་པ། མཁན་ཆེན་ཐམས་ཅད་མཁྱེན་པ་ཆེན་པོ་དཔལ་ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་བཀའ་དྲིན་མཚུངས་པ་མེད་པའི་བདག་ཉིད་ཅན་གྱི་ཞལ་གྱི་དཀྱིལ་འཁོར་སེམས་ཅན་ཐམས་ཅད་ལ་ཁྱབ་པའི་སྙིང་རྗེ་ཆེན་པོ་དང་ལྡན་པ་གང་ཡིན་པ་དེ་ཉིད། ལྷ་སྲས་མིའི་དབང་ཕྱུག་དམ་པ་དེ་ཉིད་སྐུ་འཁོར་གྱི་ཚོགས་དང་བཅས་པའི་འདྲེན་བྱེད་ཀྱི་དབང་པོའི་དགའ་སྟོན་བླ་ན་མེད་པ་ཉིད་དུ་མཐོང་བར་གྱུར་ཏོ། །དེ་ནས་མི་རིང་བར་གཟའ་སྐར་སྦྱོར་བྱེད་བཟང་པོ་འཛོམས་པའི་ཟླ་ཚེས་དགེ་བའི་ཉིན་འབུལ་ཆེན་གྱི་བཀོད་པ་ལེགས་པར་བཤམས་ཏེ། ཡན་ལག་བདུན་པའི་དབྱངས་ཀྱིས་མདུན་བསུས་ནས། ཐོག་མར་བཀྲ་ཤིས་པའི་ལྷ་དར་དང་། རྒྱལ་བའི་སྐུ་གསུང་ཐུགས་ཀྱི་རྟེན་ངོ་མཚར་ཆེ་བ་རྣམས་ཀྱིས་ཐོག་དྲངས་འབུལ་དངོས་བཟང་ཞིང་རྒྱ་དཔངས་མི་དམན་པ་ཚན་གྲངས་བརྒྱ་ཕྲག་བདུན་བརྩེགས་པ་མཎྜལ་དུ་ཕུལ་ལོ། ཐར་རྩེ་མཁན་ཆེན་རྡོ་རྗེ་འཆང་ནམ་མཁའ་བསམ་གྲུབ་ཀྱི་མདུན་དུ་རྣམ་གྲངས་བརྒྱ་དང་ལྔ་བཅུ་ཕུལ་ལོ། ཀླུ་ལྡིང་ཤར་པ་རིན་ཆེན་རྒྱལ་མཚན་དེ་ཉིད་ལ་འབུལ་བ་རྣམ་གྲངས་བརྒྱ་དང་ལྔ་བཅུ། མཁན་ཆེན་འཇམ་པའི་དབྱངས་བསོད་ནམས་བཟང་པོ་དེ་ཉིད་ལ་འབུལ་བ་རྣམ་གྲངས་བརྒྱ་དང་ལྔ་བཅུ། དེ་སྐབས་ཟུར་འཆད་པ་རྗེས་སུ་ཁྲིར་ཕེབས་པའི་མཁན་ཆེན་འཇམ་པའི་དབྱངས་སངས་རྒྱས་དཔལ་བཟང་དེར་ཡང་འབུལ་བ་དཔངས་མཐོར་བརྩེགས། དཔོན་སློབ་སངས་རྒྱས་ཚུལ་ཁྲིམས་དེ་ཉིད་ལ་ཡང་འབུལ་བ་གཟབ་པར་བརྩེགས། གཞན་ཡང་ཁང་ཚན་བཅོ་བརྒྱད་ཀྱི་དགེ་འདུན་རྣམས་ལ་མང་ཇའི་རྟེན་བཞག་པ་སོགས་མཛད། སངས་རྒྱས་བཅོམ་ལྡན་འདས་ཀྱི་བསྟན་པའི་རྩ་ལག་ཏུ་གྱུར་པ་སུམ་ལྡན་རྡོ་རྗེ་འཛིན་པའི་དགེ་སློང་གི་དགེ་འདུན་ངུར་སྨྲིག་གི་གོས་ཀྱིས་མཛེས་པར་བྱས་པའི་ཚོགས་སྟོང་ཕྲག་ཕྱེད་གཉིས་སུ་ལྡང་བ་ཐམས་ཅད་ཟླ་བ་གཅིག་དང་ཞག་བཞིའི་བར་དུ་བསྙེན་བཀུར་ཡང་དག་པར་བགྱིས་ཏེ། ཀུན་རིག་རྩ་བའི་དཀྱིལ་འཁོར་གྱི་ཆོ་ག་རྒྱས་པའི་སྒྲུབ་མཆོད་བཙུགས་ཏེ། གྲྭ་པ་རེ་ལ་གསེར་ཞོ་རེ་འགྱེད་པ་ཉིན་གཅིག་གོ། གྲྭ་པ་བཞི་རེ་ལ་དངུལ་ཞོ་ཕྱེད་དང་གཉིས་རེ་འགྱེད་པ་ཉིན་ཉི་ཤུ་རྩ་བཞིའོ། གྲྭ་པ་བཞི་རེ་ལ་གཞུང་ཇ་བར་ཁག་རེ་འགྱེད་པ་ཉིན་གསུམ་མོ། གྲྭ་པ་བཅུ་རེ་ལ་ཇ་ནག་པོ་བར་ཁག་རེ་འགྱེད་པ་ཉིན་གཅིག་གོ། གྲྭ་པ་བཞི་རེ་ལ་མན་ཙི་ཡུག་རེ་འགྱེད་པ་ཉིན་བཞིའོ། གྲྭ་པ་རེ་ལ་མཛོད་དར་ལེགས་པ་རེ་འགྱེད་པ་ཉིན་གཅིག་སྟེ། དེ་ལྟར་ཉིན་སུམ་ཅུ་རྩ་བཞི་རྫོགས་པ་དང་། དེའི་མཚམས་ནས་སྐུ་འཁོར་དུ་གཏོགས་པ་རྣམས་ཀྱིས་རིམ་པར་བཙུགས་པ་ལ་ཟླ་བ་གཅིག་སྟེ། ཟླ་བ་གཉིས་ཀྱི་བར་དུ་དགེ་འདུན་ཇི་སྙེད་མཆིས་པ་རྣམས་ལ་བསྙེན་བཀུར་དང་ཡོན་འབུལ་གཟབ་པར་བསྟབས་པ་སོགས་དང་། རྟེན་གསུམ་རྣམས་ལ་སྤོས། མར་མེ། ཞལ་ཟས། ཁ་དོག་སྣ་ཚོགས་པའི་དར་གྱི་སྙན་ཤལ། གོས་བཟང་ཁྱད་པར་དུ་འཕགས་པ་མང་པོའི་རྒྱུ་ལས་བསྐྲུན་པའི་བླ་རེ། རྒྱལ་མཚན། འཕན། ལྡ་ལྡི་ལ་སོགས་པ་མཆོད་པའི་ཡོ་བྱད་ཕུལ་བའི་གཏོང་ཕོད་མི་དམན་པ་ངོ་མཚར་རྣ་བའི་དགའ་སྟོན་བླ་ན་མེད་པ་ཉིད་དུ་མཛད་དོ། དེ་ནས་དཔལ་ལྡན་ས་སྐྱ་ཉིད་དུ་འབྱོན་པའི་ཕྱིར་མཐུན་པའི་ཡོ་བྱད་སྣ་ཚོགས་པའི་འབྱོར་པ་བསྣམས་པའི་འཁོར་གྱི་ཚོགས་མང་པོ་དང་བཅས་པ་གདན་བཏེགས་ཏེ་བྱོན་པ་ན། བསྐལ་པ་བཟང་པོའི་རྣམ་འདྲེན་ཐམས་ཅད་མངོན་པར་བྱང་ཆུབ་པའི་ཚུལ་བསྟན་པའི་གནས། འཕགས་ཡུལ་རྡོ་རྗེ་གདན་ཆེན་པོའི་གནྡྷ་ལ་དང་། རིག་པའི་གནས་ལྔ་ལ་མཁས་པ་དང་གྲུབ་པའི་དབང་ཕྱུག་གི་འབྱུང་གནས་སུ་གྱུར་པ་ལ་ནི་ཁྱད་པར་ཅུང་ཟད་ཀྱང་དམིགས་སུ་མེད་པ། འཕགས་པ་རིགས་གསུམ་མགོན་པོས་དགོངས་བཞིན་དུ་སྐྱེ་བའི་ཟློས་གར་གྲངས་མེད་པ་དེང་ནས་བཟུང་སྟེ་མ་འོངས་བསྐལ་པའི་བར་དུ་ཡང་འབྱོན་པར་འགྱུར་བར་མངོན་པར་ཤེས་པ་དྲུག་གི་མིག་གྲུང་པོར་གྱུར་པ་རྣམས་ཀྱིས་ལེགས་པར་གཟིགས་ཤིང་ལུང་བསྟན་གྱི་བདུད་རྩིའི་ཆུ་གཙང་མས་ལེགས་པར་ཆག་ཆག་བཏབ་པ། ཇི་ལྟར་ལུང་དུ་བསྟན་པ་དེ་ལྟར་བདེན་པའི་མཐས་ཀྱང་ཤིན་ཏུ་གསལ་བར་བྱས་པའི་གདན་ས་ཆེན་པོ་དཔལ་ས་སྐྱའི་ཆོས་གྲྭ་ཆེན་པོ་ཞེས་བྱ་བ་དེའི་ཉེ་འདབས་སུ་བྱོན་པ་དང་གདན་ས་དེ་ཉིད་ནས་ཀྱང་བསུ་བ་སྔ་ཕྱི་མང་པོས་སོན་པ་རྣམས་ཀྱིས་མདུན་བསུ་བ་དང་། ལྷ་བསངས་ཀྱི་དུད་པ་གནམ་སའི་དཀྱིལ་འཁོར་མ་ལུས་པར་ཁྱབ་པར་གཏུལ་བ། རྒྱལ་མཚན། བ་དན། འཕན། གདུགས་སོགས་ཡོ་བྱད་བསམ་གྱིས་མི་ཁྱབ་པ་བསྒྲེངས་བ་དང་བཅས་ཏེ། རིང་ནས་མངོན་པར་འདུན་པའི་གནས་ག་ལ་བ་དེར་བདེ་བར་ཕེབས་སོ། །དེར་ཅུང་ཟད་ཅིག་ནས་སྐྱབས་གཅིག་རིན་པོ་ཆེའི་བསྟན་སྲིད་ཟུང་གི་ཕྲིན་ལས་ཀྱི་འཁོར་ལོས་སྒྱུར་བའི་ཕྱག་མཛོད་རིན་པོ་ཆེའི་སྐུ་ཞབས་སུ་འཛམ་གླིང་བསྟན་པའི་བདག་པོའི་ཞལ་གྱི་དཀྱིལ་འཁོར་མཇལ་བའི་སྐབས་དབྱེ་བར་གསོལ་ཏོ། །དེས་ཀྱང་ལེགས་པར་སྐབས་ཕྱེད་པ་དང་། ཇི་ཙམ་ཞིག་ན་ཛམྦུ་རྐང་འཐུང་གི་རྒྱལ་མཚན་གྱིས་ཉེ་བར་སྤུད་པའི་གླིང་དམ་པ་འདི་ཉིད་རྣམ་པ་ཐམས་ཅད་དུ་མཛེས་པར་བྱེད་པའི་རྒྱན་གྱི་མཆོག་ཏུ་གྱུར་པ་སྐྱབས་གཅིག་མཚུངས་ཟླ་མེད་པ། དཔལ་ས་སྐྱ་པ་སྔགས་འཆང་བླ་མ་ངག་དབང་ཀུན་དགའ་བསོད་ནམས་རིན་ཆེན་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོ་ཞེས་མཚན་གྱི་རྔ་བོ་ཆེ་སྲིད་པ་གསུམ་གྱི་ཁོངས་སུ་ལྡིར་བ། དེ་ཉིད་སུ་ཞིག་གིས་ཐོས་པ་འཛིན་པའི་བཅུད་དུ་ལེན་པར་བྱེད་པ་ཁོ་ནས་ཀྱང་སྲིད་ཞིའི་རྒུད་པ་ཐམས་ཅད་ལས་སྐྱོབ་པའི་ཐུགས་རྗེ་ཆེན་པོ་དང་ཡོན་ཏན་དཔག་ཏུ་མེད་པས་བཟུང་བའི་བདག་ཉིད་ཅན། བསྟན་པའི་རྒྱལ་མཚན་དམ་པ་གོང་ནས་གོང་དུ་བསླང་བ་ལ་འཇིགས་པ་དང་བག་ཚ་བ་མེད་པའི་མཁྱེན་རབ་ཀྱི་དབང་ཕྱུག་ཆེན་པོ་དེ་ནི། སེངྒེ་ཆེན་པོ་བརྒྱད་ཀྱིས་མངོན་པར་བཏེགས་པའི་ཆོས་ཀྱི་ཁྲི་མཐོན་པོ་ཞིག་ཏུ་སྲིད་པ་གསུམ་གྱི་གཟི་བརྗིད་ཀྱི་ཕུང་པོ་མ་ལུས་པ་གཅིག་ཏུ་སྤུངས་པ་ལས་ལྷག་པའི་རང་བཞིན་ཉིད་དུ་འོད་དང་འོད་ཟེར་གྱི་སྣང་བ་ལྷམ་མེ་འབར་བ་དང་བཅས་ཏེ་བཞུགས་པ་དངོས་སུ་མཐོང་བར་གྱུར་ནས། ཡན་ལག་བདུན་པ་ཚིགས་སུ་བཅད་པར་བསྡེབས་པའི་དབྱངས་དང་མེ་ཏོག་གི་སིལ་མས་མངོན་པར་གཏོར་ཞིང་རབ་ཏུ་གཏོར་རོ། དེ་ནས་བཀྲ་ཤིས་པའི་རྟགས་ཀྱི་དགེ་མཚན་རྣམ་པར་བཀྲ་བའི་ལྷ་དར་དཀར་པོ་དང་། བདེ་ལྡན་ཞིང་གི་མགོན་པོ་ཚེ་དཔག་ཏུ་མེད་པའི་སྐུ་བརྙན་གྱིས་ཐོག་དྲངས་པའི་འབུལ་བ་དངོས་པོ་བཟང་ཞིང་གཏོས་ཆེ་བ་རྣམ་གྲངས་སྟོང་ཕྲག་གཅིག་དང་བརྒྱ་ཕྲག་གསུམ་གྱིས་ཉེ་བར་ལྷག་པའི་འབུལ་བ་ཕུལ་ལོ། དེ་ནས་རིམ་པར་ཟབ་པ་དང་རྒྱ་ཆེ་བའི་ཆོས་ཀྱི་དགའ་སྟོན་ཐོབ་པ་ལ། ཐོག་མར་གྲུབ་པའི་དབང་ཕྱུག་ཛེཏཱརི་ལས་བརྒྱུད་དེ་དཔལ་ས་སྐྱ་པ་ལ་བཀའ་བབས་པའི་འཇམ་དཔལ་ཨརཔཙནའི་རྗེས་གནང་། ཐང་རྒྱལ་ལས་བརྒྱུད་པའི་བླ་མ་ཞི་ཁྲོའི་ཚེ་དབང་། དཔལ་ཀྱེ་རྡོ་རྗེ་མན་ངག་ལུགས་ཀྱི་རས་བྲིས་ལ་བརྟེན་པའི་རྒྱུ་དུས་ཀྱི་དབང་ཡོངས་སུ་རྫོགས་པ། རྡུལ་མཚོན་གྱི་དཀྱིལ་འཁོར་ལ་བརྟེན་པའི་རྡོ་རྗེ་ཕུར་པ་ས་ལུགས་སྟོད་ལས་བྱང་ཆུབ་སྒྲུབ་པའི་དབང་བཞི་ཡོངས་སུ་རྫོགས་པ། རྡོ་རྗེ་གུར་ལས་བསྟན་པའི་རྡོ་རྗེ་ནག་པོ་ཆེན་པོ་གུར་མགོན་ལྕམ་དྲལ་ལྷ་བརྒྱད་ཀྱི་རྗེས་གནང་། གཞན་ཡང་རྗེས་སུ་གནང་བ་དང་རྗེས་སུ་གདམས་པ་དཔག་ཏུ་མེད་པ་བསྩལ་ཏོ། །དེ་དག་གི་བར་སྐབས་རྣམས་སུ། སྐྱེ་དགུ་མ་ལུས་པའི་ཕན་བདེ་འབྱུང་བའི་རྩ་ལག་ཏུ་བཞུགས་པའི་རྟེན་མཇལ་མཆོད་འབུལ་མཛད་པ་ནི། གདན་ས་ཆེན་པོ་དེ་ཉིད་ཀྱི་གདགས་སྲིབ་ཏུ་བཞུགས་སོ་འཚལ་གྱི་ལྷ་ཁང་། གཙུག་ལག་ཁང་། མགོན་ཁང་། སྒྲུབ་ཁང་ཁྱད་པར་དུ་འཕགས་པ་རྣམས་དང་། སྤྲུལ་པའི་ལྷ་ཁང་ཆེན་པོ་ཞེས་བྱ་བ་ངོ་མཚར་རྨད་དུ་བྱུང་བའི་གཞལ་མེད་ཁང་ཆེན་པོ་དེ་དང་བཅས་པ་སྟེ། རྟེན་དེ་དག་ཏུ་བཞུགས་པའི་བརྟེན་པ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་རྟེན་གསུམ་ཕན་བདེ་ཐམས་ཅད་ཀྱི་འབྱུང་གནས་སུ་གྱུར་པ་སྤྱི་ལ་སྤོས། མར་མེ། ཞལ་ཟས་ཕུལ་ལོ། བྱེ་བྲག་པ་རྣམས་ལ་ལྷག་པར་འཕན། བླ་རེ། རྒྱལ་མཚན་འབུལ་བ་སོགས་དགེ་བའི་རྩ་བ་རྒྱ་ཆེན་པོ་བསྐྲུན་པའི་ངོ་མཚར་བརྗོད་ཀྱིས་མི་ལྡང་བ་ཉིད་དོ། དེ་ལྟར་གདན་ས་ཆེན་པོ་དེར་ཇི་ལྟར་བཞེད་པའི་དོན་ཐམས་ཅད་ལེགས་པར་གྲུབ་ནས། དཔལ་ཞྭ་ལུའི་ཆོས་སྡེར་བྱོན་ནས། དེར་བཞུགས་པའི་དགེ་འདུན་རྣམས་ལ་མང་ཇ་དང་གྲལ་འགྱེད། གྲྭ་པ་རེར་དངུལ་དཀར་བལ་པོའི་དོང་ཙེ་རེའི་འགྱེད། གདན་ས་དེའི་བླ་མ་དང་ལས་ཚན་རྣམས་ལ་འབུལ་བ་ཚན་གྲངས། རྟེན་གསུམ་རྣམས་ཀྱི་ཞལ་མཇལ་མཆོད་འབུལ་མཛད་དོ། སྐབས་དེར་ཆོས་གྲྭ་ཆེན་པོ་བཀྲ་ཤིས་ལྷུན་པོའི་དགོན་པར་གདན་འདྲེན་ཞུ་བའི་བསུ་བར། བླ་བྲང་རྒྱལ་མཚན་མཐོན་པོའི་མགྲོན་གཉེར། གཞིས་རྩེ་རྫོང་གི་དཔོན་པོ། ཧགས་གདོང་གྲྭ་ཚང་། རྒྱ་ཁང་ཚན་གྱི་དགེ་བསྐོས་རྣམས་ཀྱིས་སོན་ནས་བསུས་ཏེ། དེ་ཕྱོགས་སུ་ཆིབས་ཀྱི་གདོང་བསྒྱུར་བར་མཛད་དོ། འོན་ཀྱང་སྐབས་དེར་པཎ་ཆེན་ཐམས་ཅད་གཟིགས་པ་བློ་བཟང་ཡེ་ཤེས་ཞིང་ཁམས་གཞན་དུ་གཤེགས་པའི་ཚུལ་བསྟན་དེའི་སྐྱེ་བའི་ཟློས་གར་སྤྲུལ་པའི་སྐུ་ཡང་བྱོན་མ་ཟིན་པའི་སྐབས་སུ་མཆིས་མོད། དམ་པ་དེའི་སེང་གེའི་ཁྲི་མཐོན་པོ་དང་སྐུ་བརྙན་གྱི་མདུན་ལ་རྣམ་གྲངས་བརྒྱ་ཕྲག་གཅིག་ལ་བརྒྱད་ཀྱིས་ཉེ་བར་ལྷག་པའི་མཆོད་འབུལ་མཛད་དོ། ཆོས་གྲྭ་དེའི་དགེ་འདུན་ཡོན་གནས་དམ་པ་སྟོང་ཕྲག་བཞིར་ལྡང་བར་བཞུགས་པ་རྣམས་ལ་མང་ཇ་གཉིས་དང་། གྲྭ་པ་རེ་ལ་དངུལ་དཀར་བལ་པོའི་དོང་ཙེ་རེ་རེ་གྲྭལ་འགྱེད་དུ་ཕུལ་ལོ། སྐུ་གསུང་ཐུགས་རྟེན་གྲངས་མང་བར་བཞུགས་པ་རྣམས་ལའང་ཞལ་གསེར་གསོལ་བ། སྤོས། མར་མེ། སྙན་ཤལ། འཕན་ཚར་འདོགས་པ་སོགས་ཀྱིས་མཆོད་ཅིང་རྗེད་པར་མཛད་དོ། དེ་ནས་དཔལ་སྣར་ཐང་ནས་ཀྱང་མདུན་བསུའི་ཕྲེང་བ་སྔ་ཕྱིའི་རིམ་པར་བསྟར་བ་ནི་སྔ་མ་བཞིན་དུ་བྱུང་སྟེ་དཔལ་སྣར་ཐང་གི་ཆོས་གྲྭར་བྱོན་ཏོ། །དེ་ན་བསྟན་པའི་རྩ་ལག་ཏུ་བཞུགས་པའི་བླ་མ་དང་མཁན་པོ་ཕྱི་ནང་གི་ཡོན་ཏན་གྱི་ཚོགས་མང་པོས་འབྱོར་པ་རྣམས་ལ་འབུལ་ཚན་གྲངས་བསྔོ་རྟེན་དང་བཅས་པ་ཕུལ་ལོ། ཡོན་གནས་དམ་པ་དགེ་འདུན་གྱི་ཚོགས་ཇི་སྙེད་མཆིས་པ་རྣམས་ལའང་མང་ཇའི་བསྙེན་བཀུར་དང་དངུལ་དཀར་གྱི་དོང་ཙེ་རེ་རེ་འགྱེད་དུ་བསྟབས་སོ། །རྟེན་གསུམ་གྱི་སྤྱན་སྔར་ཉེ་བར་སྤྱོད་པ་རྣམས་དང་ཡོ་བྱད་འབུལ་བ་རྣམས་ནི་སྔ་མ་ཇི་ལྟ་བ་བཞིན་དུ་བཟབས་སོ། །ཇི་སྐད་བཤད་པ་རྣམས་ཀྱང་གཙོར་གྱུར་པའམ་རགས་པ་ཁོ་ན་བཏུས་ནས་སྨོས་པ་ཡིན་གྱི་ཞིབ་ཏུ་ནི་མ་ཡིན་ནོ། །དུས་གཞན་དང་གནས་སྐབས་གཞན་དག་ཏུ་དགེ་རྩ་བསྒྲུབས་པའི་ཚུལ་བརྗོད་པ་ལྟ་ཞོག །དེང་གི་དུས་ཁོ་ནར་ཡང་དབུས་གཙང་ཕྱོགས་ཀྱི་དགོན་སྡེ་རིས་སུ་མེད་པ་ལ་མཆོད་ཅིང་བསྙེན་བཀུར་བགྱིས་པའི་ངོ་མཚར་གཏམ་གྱི་ཕུང་པོ་ཁོ་ན་བརྗོད་ཀྱང་འཛད་དུ་མེད་པའི་རང་བཞིན་དུ་འགྱུར་བ་ནི་ངེས་པའོ། མདོར་བསྡུ་ན། ཡུལ་སྟག་ལུང་གི་དགོན་པ་ནས་བཟུང་སྟེ། དབུས་ཕྱོགས་ཀྱི་འཛིན་མའི་དཀྱིལ་འཁོར་མ་ལུས་པ། གཙང་ཕྱོགས་ཀྱི་འཛིན་མའི་དཀྱིལ་འཁོར་མ་ལུས་པ། སྟོད་ཀྱི་གཉའ་ནམ་གྲོད་པ་ཕུག་མན་ཆད་ཀྱི་འཛིན་མའི་དཀྱིལ་འཁོར་མ་ལུས་པ་སྟེ། དེ་དག་ཏུ་གནས་པའི་གདན་ས། གཙུག་ལག་ཁང་། དགོན་སྡེ། སྒྲུབ་གནས། རི་ཁྲོད་དབེན་པའི་བསྟི་གནས་ཇི་སྙེད་མཆིས་པ་སྟེ། དེ་དག་ལ་བརྟེན་པའི་ཤཱཀྱ་སེངྒེའི་བསྟན་པའི་རྗེས་སུ་ཞུགས་པའི་འཁོར་རྣམ་བཞི་སོགས་སྦྱིན་གནས་སུ་གྱུར་པ་ཇི་སྙེད་མཆིས་པ་རྣམས་ཏེ། དེ་དག་ཐམས་ཅད་དུ་མ་ཁྱབ་པ་མེད་པའི་མང་ཇའི་བསྙེན་བཀུར། གྲྭ་འགྱེད་ཀྱི་འབུལ་བ་ཡང་དག་པར་བགྱིས་སོ། །དེ་དག་ན་བཞུགས་པའི་རྟེན་གསུམ་གྲགས་ཆེན་རྣམས་ལ་བརྒྱ་ཕྲག་བརྩེགས་པའི་མཆོད་པ། སྟོང་ཕྲག་བརྩེགས་པའི་མཆོད་པ་འབུལ་བ། གཞན་རྣམས་ལ་ཡང་དྲི་ཞིམ་པོའི་སྤོས། མར་མེའི་མཆོད་པ་འབུལ་བ་སོགས་ཀྱིས་རྒྱལ་བ་སྲས་དང་བཅས་པ་མ་ལུས་པ་མཉེས་པར་མཛད་དོ། མཁན་ཆེན་དཔལ་ལྡན་ཆོས་སྐྱོང་རྣམ་ཐར་ཝཾ་རྟགས་ཅན་ནང་། དགུང་ལོ་ང་གསུམ་པ་ཤིང་ཁྱི་ཕྱི་ལོ་༡༧༥༤་ལོའི་ཟླ་བ་ལྔ་པའི་ཚེས་ཉེར་གསུམ་ཉིན་བོད་དུ་ཕེབས་སྐབས་ལག་དོ་བརྒྱད་བརྒྱ་ཉི་ཤུ། མཛོ་ཁལ་ཆིག་སྟོང་ཉིས་བརྒྱ་སུམ་ཅུ་སྐོར། རྟ་ཉིས་སྟོང་ལྷག །དྲེལ་ཆིག་སྟོང་བརྒྱ་མེད་ལྔ་བཅུ་སྐོར་ཡོད་པར་གསུངས་ཡོད། དེའང་ཐོག་མར་རྒྱལ་བའི་བསྟན་པ་ཐམས་ཅད་ཀྱི་གཞི་མ་སོ་སོར་ཐར་པའི་སྡོམ་པ་སྟེ། དེ་རང་གི་རྒྱུད་ལ་ཡོངས་སུ་རྫོགས་པ་དགེ་སློང་གི་དངོས་པོར་བསྒྲུབ་པའི་ཕྱིར། མཁན་པོ་ནི་ཐམས་ཅད་མཁྱེན་པ་ཆེན་པོ་དཔལ་ལྡན་ཆོས་སྐྱོང་བཀྲ་ཤིས་གྲགས་པའི་རྒྱལ་མཚན་དཔལ་བཟང་པོའི་ཞལ་སྔ་ནས་དང་། ལས་ཀྱི་སློབ་དཔོན་དཔོན་སློབ་སངས་རྒྱས་ཚུལ་ཁྲིམས་པ། གསང་སྟོན་སློབ་དཔོན་ཆོས་རྗེ་ཀུན་དགའ་རྒྱ་མཚོ། གཞན་ཡང་དུས་བསྒོ་བ། ཁ་སྐོང་གི་དགེ་འདུན་གྲངས་ཚང་བ་དང་བཅས་པའི་དབུས་སུ། ཡོངས་སུ་རྫོགས་པ་དགེ་སློང་གི་སྡོམ་ལྡན་ཉིད་དུ་བསྒྲུབས་སོ། །དེ་ནས་བརྩམས་ཏེ་བཅས་པའི་ཉེས་པ་ཕྲ་རགས་རྣམས་ཀྱིས་ནམ་ཡང་ནོངས་པ་མེད་པའི་བསླབ་པ་རིན་པོ་ཆེ་ལ་ཤིན་ཏུ་གུས་པའི་སྒོ་ནས་སྒོ་གསུམ་བག་ཡོད་ཀྱི་སྤྱོད་པ་ལས་ནམ་ཡང་མ་གཡོས་པར་མཛད་དོ། སླར་ཡང་རང་གཞན་སེམས་ཅན་ཐམས་ཅད་སྡུག་བསྔལ་མཐའ་དག་ལས་སྒྲོལ་བ་དང་། གནས་སྐབས་དང་མཐར་ཐུག་གི་བདེ་བ་ཐམས་ཅད་འཐོབ་པར་བྱེད་པའི་རྒྱུའི་གཙོ་བོ་ནི་ཐེག་པ་ཆེན་པོའི་ལམ་དང་། དེའི་རྩ་བ་ཡང་བྱང་ཆུབ་ཀྱི་མཆོག་ཏུ་སེམས་བསྐྱེད་པ་སྟེ། སྔར་སྨོས་པའི་བླ་མ་དེ་ཉིད་ལ་གསུང་ངག་རིན་པོ་ཆེའི་སྣང་བ་གསུམ་གྱི་ཁྲིད་དང་བཅས་པའི་སེམས་བསྐྱེད་ཀྱི་སྡོམ་པ་རིན་པོ་ཆེ་འབོགས་པའི་སྟོན་པར་གསོལ་བ་བཏབ་པ་བཞིན་དུ་ཞལ་གྱིས་བཞེས་ཏེ། མདོ་སྡེ་དང་རྒྱུད་སྡེ་ཟབ་མོ་ཐམས་ཅད་ཀྱི་དོན་གྱི་བཅུད་ཕྱུང་བ། འཇིགས་བྲལ་དཔལ་ལྡན་བི༦་པའི་བཞེད་གཞུང་། མཁས་པ་ཐམས་ཅད་ཀྱིས་བགྲོད་པར་བྱ་བའི་འཇུག་ངོགས། བསོད་ནམས་དང་མི་ལྡན་པ་རྣམས་ཀྱིས་རྟོགས་པར་དཀའ་བ། མྱ་ངན་ལས་འདས་པའི་གྲོང་ཁྱེར་དུ་འགྲོ་བ་རྣམས་ཀྱི་ཐེམ་སྐས། རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་སྟོན་པར་བྱེད་པའི་ཏིང་ངེ་འཛིན་གྱི་རང་བཞིན། གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་གི་ཉམས་ཁྲིད་ཟབ་མོ་སྨིན་རྒྱས་སུ་ལེགས་པར་སྩལ་བའི་ཐོག་མར། སྣང་བ་གསུམ་གྱི་ཉམས་ཁྲིད་རྒྱས་པར་བསྩལ་བ་སྔོན་དུ་བཏང་ནས། རྗེ་བཙུན་དམིགས་པ་མེད་པའི་ཐུགས་རྗེའི་བདག་ཉིད་ཅན་དེ་ཉིད་ལ། ཐེག་པ་ཆེན་པོའི་རིགས་སུ་སྐྱེས་པའི་སློབ་མའི་ཚོགས་ཀྱིས་ཀུན་ནས་བསྐོར་ཅིང་མདུན་གྱིས་བལྟས་ཏེ་གནས་པའི་དབུས་སུ། ཐུན་མོང་མ་ཡིན་པ་བརྒྱུད་པའི་ཁྱད་པར་གཉིས་ལྡན་གྱི་ལམ་སྲོལ་ཆེན་པོ་ལ་བརྟེན་ནས། བྱང་ཆུབ་སེམས་དཔའི་སྡོམ་པ་ཡང་དག་པ་ལེན་པར་མཛད་དོ། དེ་ཕྱིན་ཆད་ནས་རྒྱལ་བའི་སྲས་ཞེས་མིང་དོན་གཉིས་ཀ་འཕོས་པའི་བྱང་ཆུབ་སེམས་དཔའ་ཉིད་དུ་ལེགས་པར་བསྒྲུབས་སོ། །སླར་ཡང་དེའི་སྟེང་དུ་རྗེ་བཙུན་དམ་པ་དེ་ཉིད་སྡོམ་པ་གསུམ་ལྡན་གྱི་བླ་མར་གསོལ་བའི་ཕྱིར། དཔལ་མཐུ་སྟོབས་ཀྱི་མགོན་པོ་བི༦་པ་ཉིད་དང་གཉིས་སུ་མེད་པའི་བདག་ཉིད་ཆེན་པོ་དེ་ལ་གསོལ་བ་བཏབ་པ་དེ་བཞིན་དུ། རྡུལ་མཚོན་གྱི་དཀྱིལ་འཁོར་དུ་དཔལ་ལྡན་དགེས་པའི་རྡོ་རྗེའི་དཀྱིལ་འཁོར་ཆེན་པོར་དབང་བཞི་རྫོགས་པར་བསྐུར་ཏེ་སློབ་མའི་རྟེན་དཀྱིལ་འཁོར་བཞི་སྐུ་བཞི་ཡེ་ཤེས་ལྔ་ལྡན་གྱི་འབྲས་བུ་མྱུར་དུ་འགྲུབ་པའི་སྐལ་པ་ཅན་དུ་སྨིན་པར་མཛད་དོ། སླར་ཡང་རྡོ་རྗེ་སློབ་དཔོན་གྱི་ཟབ་མོ་ལུས་ཀྱི་དཀྱིལ་འཁོར་དུ་ལམ་དུས་ཀྱི་དབང་གི་ཆུ་བོ་ཆེན་པོ་མ་ནུབ་པར་བསྐུར་བ་སོགས་དབང་བྱིན་རླབས་ཁྲིད་ལུང་དང་བཅས་པ་འདིའི་ཆོས་སྐོར་ཡོངས་སུ་རྫོགས་པ་དང་། ཆོས་སྤྱོད་ཀྱི་རིམ་པ་ཤིན་ཏུ་མང་པོ། གཞན་ཡང་དེ་ཉིད་ཀྱི་དྲུང་ནས་སྐབས་འདི་དག་དང་གཞན་དུའང་རུང་སྟེ། དབང་བསྐུར་བྱིན་རླབས་རྗེས་གནང་ཇི་ལྟར་གསན་པའི་རྣམ་གྲངས་བསམ་གྱིས་མི་ཁྱབ། མཁན་ཆེན་འཇམ་པའི་དབྱངས་བསོད་ནམས་བཟང་པོ་དང་། མཁན་ཆེན་ཐམས་ཅད་གཟིགས་པ་ནམ་མཁའ་བསམ་གྲུབ་རྣམ་གཉིས་ལས་ཆོས་སྐོར་འགའ་ཞིག་གསན་ནོ། །དེ་ལྟར་ལེགས་པར་ཐོས་པའི་ཆོས་དོན་མངོན་དུ་བྱ་བའི་ཕྱིར། ཉིན་ཞག་ཕྲུགས་རེར་ངོར་པའི་ལུགས་ཀྱི་རྣམ་འབྱོར་རྣམ་པ་བཞི་གཏོར་མ་དང་བཅས་པས་མཚོན་ཏེ། དངོས་གྲུབ་ཟུང་གི་འབྱུང་གནས་ལྷག་ལྷའི་བསྒོམ་བཟླས་མ་ཆག་པར་ཉམས་སུ་བསྟར་བ་མཛད་དོ། དེ་ལྟར་ན་སྡོམ་བརྩོན་བླ་མ་ཆེན་པོ་འདིའི་དགོངས་བཞེད་ཀྱི་སྙིང་པོ་མ་ལུས་པ་ལེགས་པར་གྲུབ་ནས། སླར་ཡང་ཁམས་ཕྱོགས་སུ་འབྱོན་པའི་དགོངས་པ་གཏད་དེ། སྐུ་འཁོར་གྱི་ཚོགས་ཆེན་པོ་རྣམས་དང་བཅས་པའི་ཆིབས་ཀྱི་གདོང་བསྒྱུར་ཏེ། རང་གི་རྒྱལ་ཁབ་དེ་ཉིད་དུ་ལེགས་པར་བྱོན་ཏེ། དཔལ་སྡེ་དགེ་རྒྱལ་པོ་ཞེས་བྱ་བའི་བསྟན་སྲིད་ཉི་ཟླ་ཟུང་དུ་འབྲེལ་བ་ལྟ་བུའི་གདན་སའི་ཁྲི་འཕང་མཐོན་པོར། སྡོམ་བརྩོན་བླ་མ་ཆེན་པོ་གང་གི་ཞབས་ཀྱི་ཆུ་སྐྱེས་དག་ཉེ་བར་བཀོད་དེ་སྐྱེ་དགུའི་བདག་པོ་དམ་པ་གདན་སའི་ཁྲི་རབས་བདུན་པ་ཉིད་དུ་དབང་བསྐུར་ཏེ་ཆབ་འབངས་ཆོས་ཀྱིས་བསྐྱངས་སོ། བོད་ཆེན་པོའི་ལྗོངས་ན་སྡོམ་བརྩོན་བླ་མ་འདི་ཉིད་ཀྱི་ཡབ་མེས་གོང་མར་གྱུར་པ་བསྟན་པ་ལ་ལྷག་པའི་བསམ་པ་མཆོག་ཏུ་དཀར་བ་རྣམས་ཀྱི་སྐུ་རིང་ནས་གསང་སྔགས་གསར་རྙིང་བོན་གསུམ་གྱི་གྲུབ་པའི་མཐའ་ཕྱོགས་རིས་མེད་པའི་དབུ་འཕང་བླ་ནས་བླར་འདེགས་པའི་འཛིན་སྐྱོང་དང་ཞབས་ཏོག་ཡང་དག་པ་མཛད་ཅིང་། དེ་དག་གི་ནང་ནས་ཀྱང་མཆོག་གམ། གཙོ་བོའམ། ཕུལ་ལམ། གཙུག་གི་ནོར་བུ་བཞིན་དུ་གཅེས་པར་བཟུང་བ་ནི་འཛམ་གླིང་བསྟན་པའི་བདག་པོ་དཔལ་ས་སྐྱ་པའི་ལུགས་བཟང་དྲི་མ་མེད་པ་འདི་ཉིད་དང་། རྒྱལ་བ་ཉི་མའི་གཉེན་གྱི་རྒྱལ་ཚབ་ཆེན་པོ་རྡོ་རྗེ་འཆང་ཀུན་དགའ་བཟང་པོའི་བསྟན་པ་རྩོད་པ་ཀུན་གྱི་ཕྱོགས་ལས་རྣམ་པར་རྒྱལ་བའི་རྒྱལ་མཚན་དམ་པ་འདི་གཉིས་གང་གི་སྙིང་སྟོབས་ཀྱི་ཕྲག་པ་རབ་ཏུ་བརྟན་པའི་རྩེ་ན་བཟུང་ངོ་། །ཇི་ལྟར་བཟུང་བ་དེ་དག་ཀྱང་བསྐལ་པ་ནས་བསྐལ་པའི་ཕྲེང་བར་བརྟན་པར་བྱེད་པའི་ཆོ་ག་རྨད་དུ་བྱུང་བ་ནི་མཁས་པའི་ཕྲིན་ལས་རྣམ་པ་གསུམ་སྟེ། དེ་དག་ལ་ཤིན་ཏུ་དབང་འབྱོར་བའི་བསྟན་འཛིན་གྱི་སྐྱེས་བུ་ཆེན་པོ། ས་གསུམ་གྱི་ཁོངས་ནས་གྲགས་པའི་ཟླ་འོད་རྣམ་པར་གསལ་བ་མང་པོ་སྤྱན་དྲངས་ཏེ། བསྟན་པའི་རྒྱུན་ཆེན་པོ་མི་ནུབ་པར་བཙུགས་སོ། །ཇི་སྐད་དུ། ཆོས་ཀྱི་སྦྱིན་པ་ཟང་ཟིང་མེད། ཅེས་གསུངས་པ་ལྟར་སྦྱིན་པ་ཐམས་ཅད་ཀྱི་ནང་ནས་སྙིང་པོའམ་གཙོ་བོར་གྱུར་པ་ནི་ཆོས་ཀྱི་སྦྱིན་པ་ཡིན་ཞིང་། དེ་ཡང་རྒྱལ་བའི་བཀའ་འགྱུར་རོ་འཚལ་གྱི་ཕྱི་མོ་པར་དུ་བསྒྲུབས་པ་ཆུ་གླང་ཕྱི་ལོ་༡༧༣༣་ལོར་ཡོངས་སུ་གྲུབ་པ་ནས་བརྩམས་ཏེ་ཤིང་ཕོ་བྱི་བ་ཕྱི་ལོ་༡༧༤༤་ལོ་འདི་ཡན་ཆད་དུ་འདུལ་བའམ་ཤེར་ཕྱིན་ནམ་མདོ་སྣ་ལ་སོགས་པ་ཆོས་ཚན་ཕྱོགས་རེ་ཙམ་གྱི་ཚར་གྲངས་ནི་བགྲང་དུ་ཅི་ཞིག །བཀའ་འགྱུར་རོ་འཚལ་ཡོངས་སུ་ཚང་བ་ཚར་གྲངས་བརྒྱ་ཕྲག་བཅོ་ལྔ་ཙམ་དང་། བསྟན་འགྱུར་ཡོངས་སུ་ཚང་བ་བརྒྱ་ཕྲག་དུ་མ། དཔལ་ས་སྐྱའི་རྗེ་བཙུན་གོང་མ་ལྔའི་གསུང་རབ་རིན་པོ་ཆེ་གླེགས་བམ་བཅོ་ལྔ་ཡོངས་སུ་ཚང་བ་ཚར་གྲངས་བརྒྱ་ཕྲག་གསུམ་ཙམ་ཆོས་ཀྱི་སྦྱིན་པ་བཏང་ངོ་། །གཞན་ཡང་ངོར་ལུགས་གཙོ་བོར་བཏོན་པའི་ཆོས་སྤྱོད་ཀྱི་རིགས། སྒྲུབ་ཐབས། དཀྱིལ་ཆོག །མཆོད་པ། གཏོར་མ་ལ་སོགས་པ་ཉེ་བར་མཁོ་བའི་རིགས་སུ་གཏོགས་པ། གསོ་བ་རིག་པའི་རྒྱུད་བཞི། མན་ངག་རྒྱུད་ཀྱི་ལྷན་ཐབས་སོགས་བསྡོམས་པ་གླེགས་བམ་བཅུ་གཅིག་ཙམ་པར་དུ་བསྒྲུབས་ཏེ་ཆོས་ཀྱི་སྦྱིན་པ་བཏང་ངོ་། །བཀའ་འགྱུར་རིན་པོ་ཆེ་གླེགས་བམ་བརྒྱ་དང་གསུམ་དང་། མཐར་བསྔོ་སྨོན་ཤིས་བརྗོད་ཀྱི་སྐོར་རྣམས་བསྡོམས་པར་གླེགས་བམ་གྱི་གྲངས་བརྒྱ་དང་བརྒྱད་ཡོད་པར་ཞུ་ཆེན་གྱིས་གསུངས་ཡོད། དགོན་ཆེན་དགོན་པའི་ལོ་རྒྱུས་སོགས་ལས་ཆོས་རྒྱལ་བསྟན་པ་ཚེ་རིང་གིས་བསྟན་འགྱུར་པར་བརྐོ་བའི་དབུ་འཛུགས་ནས་པུསྟཀ་ཉི་ཤུ་ཙམ་བཞེངས་གྲུབ་པར་གསུངས་ལ། བསྟན་འགྱུར་དཔེ་བསྡུར་མའི་གསལ་བཤད་ལས། བོད་རབ་བྱུང་བཅུ་གཉིས་པའི་མེ་མོ་སྦྲུལ་ཕྱི་ལོ་༡༧༣༧ལོར་ཁམས་སྡེ་དགེའི་རྒྱལ་པོ་ཆོས་རྒྱལ་བསྟན་པ་ཚེ་རིང་གིས་སྦྱིན་བདག་བགྱིས་ཏེ་པར་དུ་བརྐོ་བའི་དབུ་བརྩམས་གླེགས་བམ་བདུན་ཙམ་ཚར་མཚམས་ཆོས་རྒྱལ་དགོངས་པ་རྫོགས་ཀྱང་། དེའི་སྲས་སྡོམ་བརྩོན་རྒྱལ་པོའི་ཚུལ་ཅན་བླ་མ་ཀུན་དགའ་ཕྲིན་ལས་རྒྱ་མཚོས་པར་བརྐོའི་ལས་མཇུག་མཐར་ཕྱིན་པར་བསྐྱངས་ནས་ཤིང་བྱི་ཕྱི་ལོ་༡༧༤༤ལོ་སྟེ་བགྲང་བྱ་བདུན་གྱི་རིང་ལ་ཞུས་དག་དང་བཅས་གྲུབ་པར་མཛད་དོ། ཞེས་གསུངས་ཡོད། ཁྱད་པར་དུ་ཐམས་ཅད་མཁྱེན་པ་ཆེན་པོ་ཉི་མའི་གཉེན་གྱི་བཀའ་ལུང་སྤྱི་དང་བྱེ་བྲག་གི་དགོངས་དོན་མ་ལུས་པ་རྣམ་པར་འགྲེལ་བའི་བསྟན་བཅོས་གངས་ཅན་པའི་བརྡའི་ལམ་དུ་འགྱུར་རོ་འཚལ་པུསྟཀ་ཉིས་བརྒྱ་དང་བཅུ་གསུམ་གྱི་ཆོས་སྦྱིན་རྒྱུན་མི་ཆད་པའི་ངོ་མཚར་འཕྲུལ་གྱི་ཕྱི་མོ་རྫོགས་ལྡན་བསྐལ་པའི་བསོད་ནམས་ཀྱི་སྤྲིན་ཕུང་རྒྱས་པར་དཀྲིགས་པ་ཞེས་བྱ་བ། སྲིད་པ་གསུམ་གྱི་མཆོད་སྡོང་སྔ་ན་མེད་པའི་ཆོས་སྦྱིན་གྱི་ཕྱི་མོ་འདི་ཉིད་གསར་དུ་བསྐྲུན་པར་བརྩམས་ཤིང་ཤིང་ཕོ་བྱི་བའི་ལོར་ཡོངས་སུ་གྲུབ་པར་བགྱིས་ཏེ། དེའི་འཕྲལ་ལའང་དགོངས་འགྲེལ་ཡོངས་སུ་ཚང་བ་ཚར་ཉི་ཤུ་རྩ་གཅིག་ཙམ་ཆོས་ཀྱི་སྦྱིན་པར་བསྩལ་བ་དང་། དེ་ནས་བཟུང་ཏེ་མ་འོངས་དུས་ཀྱི་བསྐལ་པ་ནས་བསྐལ་པའི་ཕྲེང་བ་ཀུན་ཏུ་ཡང་དམ་པའི་ཆོས་ཀྱི་སྦྱིན་པ་རྒྱ་ཆེ་ཞིང་རྒྱུན་མི་ཆད་པར་བསྩལ་བའི་དམ་བཅའ་བརྟན་པའི་ར་བ་ནི་ནམ་ཡང་གཞིག་ཏུ་མེད་པའི་རང་བཞིན་ཅན་ནོ། །ཡང་ལམ་འབྲས་ཁོག་ཕུབ་སོགས་པོད་བཅུ་དགུའི་སྐོར་པར་གྱི་ཕྱི་མོ་གསར་བསྐྲུན་མཛད། སྔར་བཞེངས་པའི་བཀའ་འགྱུར་ལྷ་ཁང་དང་འབྲེལ་བའི་པར་ཁང་ཆོས་མཛོད་བཀྲ་ཤིས་སྒོ་མང་གི་གཙུག་ལག་ཁང་རྟེན་དང་བརྟེན་པར་བཅས་གསར་དུ་བཞེངས་པ་དང་། ལྷུན་གྲུབ་སྟེང་གི་བླ་བྲང་ཆེན་པོ་ཉམས་གསོ་བཀོད་ལེགས་རྒྱ་བསྐྱེད་གསར་བསྐྲུན་སོགས་ཡབ་མེས་གོང་མའི་ཕྲིན་ལས་ཀྱི་རྒྱུན་སྤེལ། གཞན་ཡང་དཔལ་ལྡན་ས་སྐྱ་པ་དང་ངོར་ཆེན་རྡོ་རྗེ་འཆང་དག་གི་ཕྲིན་ལས་ལྷུན་གྱིས་གྲུབ་པ་དང་རྒྱུན་མི་འཆད་པའི་རྣམ་པར་འཕྲུལ་པ་ལས་བྱུང་བའི་ཆོས་ཀྱི་རྗེ་རིན་པོ་ཆེ། ཕྱོགས་བཅུ་ཀུན་ཏུ་ཆོས་ཀྱི་དགའ་སྟོན་འགྱེད་པ་པོ་ཇི་སྙེད་བྱོན་པ་རྣམས་དང་། ཆོས་གྲྭ་ཆེན་པོ་འདི་ཉིད་ན་གཉུག་མར་གནས་ཤིང་བཤད་སྒྲུབ་ཕྲིན་ལས་ཟུང་གིས་བསྟན་པ་སྐྱོང་བར་བྱེད་པའི་ཟུར་ཆོས་པ་ཡང་། མཁྱེན་རབ་ཀྱི་དབང་ཕྱུག་བསོད་ནམས་རྒྱལ་མཚན། རྡོ་རྗེ་འཛིན་པའི་དབང་ཕྱུག་བཀྲ་ཤིས་བཟང་པོ། གསང་སྔགས་གྲུབ་པའི་རྩེ་མོར་སོན་པ་རྗེ་བཙུན་ནམ་མཁའ་དཔལ་བཟང། གཞན་ཡང་བསྟན་པའི་རྩ་ལག་དམ་པར་གྱུར་པ་ཡང་དག་པའི་དགེ་བའི་བཤེས་གཉེན་གཞུང་ལུགས་མང་པོའི་དོན་ལ་སྦྱངས་པ་མཐར་ཕྱིན་པས་མགྲིན་པ་ཆོས་ཀྱི་བང་མཛོད་དུ་གྱུར་པ་གང་དག་བཞུགས་པ་རྣམས་ཏེ། དེ་དག་ཐམས་ཅད་ལ་ཡང་འགྲོ་བ་རིས་སུ་མེད་པའི་ངོར་རང་རང་གི་བློ་མོས་དང་རྗེས་སུ་མཐུན་པའི་དབང་བསྐུར་བ། ལུང་འབོགས་པ། མན་ངག་གི་ཚོགས་སྦྱིན་པའི་ཆོས་ཀྱི་གྲུ་ཆར་རྒྱུན་མི་འཆད་པར་བསྙིལ་དུ་འཇུག་པ་སོགས་ཀྱིས་ཆོས་ཀྱི་སྦྱིན་པའི་སྒོ་མོ་བྱེ་བ་བརྒྱ་སྟོང་ཕྲག་མང་པོ་ཕྱོགས་མཐའ་དག་ནས་ཕྱེ་ཞིང་། དེ་ལ་བརྟེན་ནས་སྲོག་ཆགས་བྱེ་བ་བརྒྱ་སྟོང་ཕྲག་དཔག་ཏུ་མེད་པ་དག །ཕལ་ཆེ་བ་ནི་ལས་འབྲས་དང་དཀོན་མཆོག་ལ་དད་པའི་གཞི་འཛིན་པ་ལ་བཀོད། འགའ་ཞིག་ནི་མཆོག་གསུམ་ལ་སྐྱབས་སུ་འགྲོ་ཞིང་བསླབ་པའི་གཞི་འཛིན་པ་ལ་བཀོད། ཕལ་ཆེར་ནི་ཡང་དག་པར་རྫོགས་པའི་སངས་རྒྱས་ཀྱི་གདུང་འཛིན་པའི་སྐལ་པ་ཅན་ལ་བཀོད། ཁ་ཅིག་ནི་རྡོ་རྗེ་འཆང་གི་གསང་སྔགས་དང་རིག་སྔགས་འཆང་བའི་སྐལ་པ་བཟང་པོ་ཅན་ལ་བཀོད་དེ། མདོར་ན་འགྲོ་བ་ཕལ་མོ་ཆེ་སངས་རྒྱས་ལ་གཞོལ་བ། ཆོས་ལ་འབབ་པ། དགེ་འདུན་ལ་བཞག་པར་བགྱིས་ཏེ། དེ་དག་ཐམས་ཅད་ཀྱང་སྡོམ་བརྩོན་ཆོས་ལྡན་གྱི་རྒྱལ་པོ་འདི་ཉིད་ཀྱི་སྐུ་དྲིན་ལས་བྱུང་བ་ཉིད་དུ་ངེས་པར་ཤེས་དགོས་སོ། །ལྷུན་གྲུབ་སྟེང་འདི་ཉིད་དུ་བདག་མེད་ལྷ་མོ་བཅོ་ལྔའི་སྒྲུབ་མཆོད། འཇིགས་བྱེད་རོ་ལངས་བརྒྱད་སྐོར། ཚེ་དཔག་མེད། འཇིགས་བྱེད་རྭ་ལུགས་ཐུན་མིན་ལྷ་བཅུ་གསུམ། ཀུན་རིག་དང་བཅས་པའི་སྒྲུབ་མཆོད་རྣམས་རྡུལ་ཚོན་ལ་བརྟེན་པ་དང་། ཀྱེ་རྡོ་རྗེའི་དཀྱིལ་འཁོར་ལ་བརྟེན་པའི་རབ་གནས། འཇིགས་བྱེད་ཕུར་པ་མགོན་པོ་རྣམས་ཀྱི་གཏོར་བཟློག་སྐོར། རྣམ་རྒྱལ་སྟོང་མཆོད། རྣམ་འཇོམས་བུམ་སྒྲུབ། ཉི་བཟློག་དུས་ཀྱི་གཏོར་བཟློག་སོགས་ཀྱི་རྒྱུན་གསར་དུ་བཙུགས་པར་མཛད་དེ་ལུགས་གཉིས་ཀྱི་ཕྲིན་ལས་དཔག་པར་དཀའ་བར་བསྐྱངས། དེ་ལྟ་བས་ན་ཤར་ཕྱོགས་གོང་མ་ཆེན་པོའི་བཀའ་ལུང་གི་བཀོད་པ་བཙན་པོ་སྔ་ཕྱི་མང་པོར་བསྩལ་ཏེ། བོད་ཆེན་པོའི་ལྗོངས་ཀྱི་བདེ་སྐྱིད་ཐམས་ཅད་གང་ལ་ཤེས་སུ་བཅུག་སྟེ། འགྲོ་ཁམས་སྤྱིའི་མེས་པོ་ཉིད་དུ་བསྐོས་སོ། །དེའི་དབང་གིས་སྔོན་གྱི་བསྐལ་པར་བྱུང་བའི་འཁོར་ལོས་སྒྱུར་བའི་རྒྱལ་པོ་རྣམས་ལྟར། ཡུལ་རིས་དང་སྐྱེ་བོ་མང་པོ་རང་དབང་དུ་འདུ་བར་གྱུར་པ་ཁོ་ན་ལས། གཞན་གྱི་མངའ་རིས་ལས་འཕྲོག་བཅད་ལ་སོགས་པ་ཆོས་མིན་གྱི་བགྱི་བ་ནམ་ཡང་མི་མཛད་ཅིང་། གཞན་ཡང་སྙིང་རྗེའི་བདག་ཉིད་ཅན་འདི་ནི་སློང་བའི་སྐྱེ་བོ་རྣམས་ཀྱི་དཔག་བསམ་གྱི་ལྗོན་པའི་མཆོག་ཏུ་གྱུར་ཏོ། ། མུ་འགོད། ་་་་་་་་་་་་་་་་་་
' རྩོམ་འོག་མ།
སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼བཞི་པ་༽