སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼གཉིས་པ་༽
སྡེ་དགེ་རྒྱལ་རབས་རིན་ཆེན་ཕྲེང་མཛེས། (ཚན་པ་གཉིས་པ།) མཛད་པ་པོ་བར་མ་མཁན་པོ་ངེས་དོན།
དེ་ཡང་སྡེ་དགེའི་རྒྱལ་རབས་ཚིགས་བཅད་མ་ལས། དེ་ཚེ་གང་ལ་གང་འདུལ་ཐབས་ཆེན་གྱིས། །སྐྱེ་རྒུ་ཐར་པའི་ལམ་དུ་འཛུད་པ་ལ། །ཆོས་ཀྱི་མིག་ལྡན་ཆོས་བཞིན་འདོམས་མཁས་ཤིང་། །དབང་བསྒྱུར་ནུས་སྟོབས་ལྡན་ལ་ཆོས་སྲིད་ཅེས། །དེ་བཞིན་འཇིག་རྟེན་འདི་ན་གཙོ་བོས་གང་། །སྤྱོད་ན་འཁོར་ཡང་དེ་ཡི་རྗེས་སུ་འབྲངས། །གུས་དང་མཐོངས་སུ་དེ་ཉིད་ཆེ་བས་ན། །སྡོམ་ལྡན་རྒྱལ་པོའི་ཚུལ་འཆང་གང་ཡིན་པ། །བསྟན་ལ་ཞུགས་ཤིང་ཆོས་ལ་སྦྱངས་པ་ཡི། །ཆོས་སྤྱན་ལྡན་པས་ཆོས་སྤྱོད་བླང་དོར་གནས། །སྟོན་ལ་མཁས་ཤིང་སྤྱོད་ཚུལ་མཐུན་པ་དང་། །དད་པ་བཞི་ལྡན་མཆོག་གསུམ་དབུ་འཕང་ཡང་། །ཤུགས་ཀྱིས་མཐོ་ཞིང་བསྟན་དང་དེ་འཛིན་སྡེ། །བཤད་སྒྲུབ་འཁྲུལ་མེད་རྒྱུན་གཙང་རྣམ་དག་རྒྱུན། །འཕེལ་བརྟན་ཆ་རྐྱེན་འབད་མེད་རང་གྲུབ་ཏུ། །འགྱུར་བའི་དགོས་པ་དེ་གཟིགས་སངས་རྒྱས་ཀྱི། །བཀའ་དངོས་འཇམ་དཔལ་རྩ་བའི་རྒྱུད་ལས་ཀྱང་། །དུས་མཐར་སྡོམ་བརྩོན་རྒྱལ་པོའི་ཚུལ་ཅན་གྱིས། །བསྟན་འགྲོའི་ཕན་བདེ་སྤེལ་བར་ལུང་བསྟན་པ། །དེ་བཞིན་ཆོས་ཀྱི་རྒྱལ་པོ་འཕགས་པ་དང་། །ཀུན་མཁྱེན་ངག་དབང་བློ་བཟང་རྒྱ་མཚོ་སོགས། །དེ་ལྟར་གནང་བས་འགྲོ་ལ་ཕན་པ་དང་། །བསྟན་རྒྱུན་གཙང་ཞིང་བསྟན་པ་དར་བ་སོགས། །སྔར་བྱོན་སྒོས་སུ་རང་རིགས་གོང་མའི་དུས། །རྟེན་འབྱུང་གསལ་བར་དེ་དག་དོན་ཇི་བཞིན། །རྒྱལ་ས་གདན་སའི་ལྟེ་བ་ས་སྟེང་གི། །མཛེས་རྒྱན་ལྷུན་གྲུབ་སྟེང་གི་ཆོས་གྲྭ་ཆེ། །ཕོ་བྲང་གཙོ་བོར་མཛད་ཅིང་གདན་ས་པ། །རབ་བྱུང་ཁོ་ནས་གནང་བའི་སྲོལ་རྒྱུན་བཙུགས། །འདི་སོགས་རིམ་གྱིས་ཡབ་མེས་སྔ་མ་ཡི། །ཚུལ་སྤྱོད་རིམ་པར་སྨོས་རྣམས་སྡེ་དགེ་ལ། །ཆོས་ཚུགས་དགེ་བའི་གཏན་ཚིགས་གསུམ་པ་ཡིན། །དེ་ལྟར་ས་སྐྱོང་བློན་འཁོར་རབ་བྱུང་གིས། །གཙོར་མཛད་དཀོན་མཆོག་གསུམ་གྱི་རྟེན་སྡེ་དག །ཡོངས་ཀྱི་བླར་འཕགས་རྩོད་པ་ལས་གྲོལ་བ། །དཔལ་ལྡན་ས་ངོར་མདོ་སྔགས་གྲུབ་མཐའ་འཛིན། །རྒྱལ་བས་ལུང་ཟིན་བླ་མའི་རྒྱལ་ཚབ་ཆེ། །སེམས་པ་ཆེན་པོ་སེམས་ཅན་ཡོངས་ཀྱི་སྐྱབས། །ཆོས་ཀྱི་མཛོད་འཛིན་ཆོས་སྨྲ་མཆོག་གྱུར་པ། །དཔལ་ལྡན་བླ་མ་དཔལ་མཆོག་རྒྱལ་མཚན་གྱིས། །ཟབ་རྒྱས་སྨིན་གྲོལ་ཆོས་སྒོ་འདི་ལྟར་ཕྱེས། །རྒྱུད་སྡེའི་སྙིང་པོ་ཀྱེ་རྡོར་མན་ངག་ལུགས། །བཤད་རྒྱུད་གུར་དང་རྡོར་དབྱིངས་སམྤུཊ། །གསང་འདུས་འཕགས་ལུགས་བདེ་མཆོག་ལུ་ཧིའི་ལུགས། །མཁའ་འགྲོ་རྒྱ་མཚོ་དམར་ནག་འཇིགས་གསུམ་སོགས། །བླ་མེད་སྐོར་དང་ཀུན་རིག་མི་འཁྲུགས་པ། །རྣམ་རྒྱལ་རྣམ་འཇོམས་འཆི་མེད་མགོན་པོ་སོགས། །རྒྱུད་སྡེ་བཞི་ཡི་སྨིན་བྱེད་དབང་བྱིན་རླབས། །རྗེས་གནང་དུ་མ་ཡོངས་རྫོགས་བསྟན་པ་ཡི། །ཉམས་ལེན་གསུང་ངག་ལམ་འབྲས་ཟབ་ཁྲིད་དང་། །རྭ་རྩེ་སེམས་འཛིན་གཤེད་དམར་སྤྲོས་མེད་སོགས། །གྲོལ་བྱེད་ཁྲིད་ཀྱི་རིམ་པ་དཔག་མེད་བསྩལ། །སྡོམ་གསུམ་བསླབ་བྱ་སྤྲོས་བཅས་ཆོ་ག་ཡི། །ལག་ལེན་ཕྲ་ཞིབ་སྤྲོས་མེད་བསྐྱེད་རྫོགས་ཀྱི། །ཟབ་གནད་ལ་སོགས་ཚུལ་བཞིན་བཀའ་དྲིན་བསྩལ། །ཀུན་གྱིས་ཐོས་བསམས་བསྒོམས་པས་གཏན་ཕབ་ནས། །མདོ་སྨད་ལྗོངས་འདིར་ལྡན་གྲོལ་ཡོན་ཏན་གྱིས། །ཕྱུག་པའི་དགེ་འདུན་སྡེ་ཡིས་ཕྱུར་བུར་གཏམས། །ས་སྐྱོང་བླ་མ་མངའ་རིས་ལྟོས་སོ་ཅོག །ཕལ་ཆེར་སུམ་ལྡན་རྡོ་རྗེ་འཛིན་པ་ཡི། །མཆོག་ཏུ་གྱུར་ཅིང་རྣམ་གྲོལ་ཐར་པ་ཡི། །ས་བོན་རྒྱུད་ལ་མ་བཞག་གཅིག་ཀྱང་མེད། །ཐུབ་བསྟན་ཉིན་མོ་ལྟ་བུར་གསལ་བར་མཛད། །དགེས་པ་རྡོ་རྗེ་གུར་དང་སམྤུཊ། །བདེ་མཆོག་གསང་བ་འདུས་སོགས་ངོར་ལུགས་ཀྱི། །དཀྱིལ་འཁོར་ལྔར་གྲགས་རྡོ་རྗེ་འཇིགས་བྱེད་ཀྱི། །གཏོར་བཟློག་ཆོས་སྡེ་བྱིངས་ལ་རྒྱུན་འཇགས་སོགས། །ཚད་ལྡན་ཁུངས་ཐུབ་སྒྲུབ་མཆོད་དུ་མ་དང་། །མཆོག་གསུམ་རྟེན་བཞེངས་མཆོད་སྤྲིན་རྒྱུན་སྤེལ་སོགས། །དགེ་རྒྱུན་བསམ་གྱིས་མི་ཁྱབ་སྲོལ་བཏོད་ནས། །ཆབ་འབངས་དཔྱ་ཁྲལ་ཟང་ཟིང་དངོས་པོའི་ཚོགས། །ཇི་མཆིས་ཕྱེད་ཀ་དགེ་རྒྱུན་ཐེབས་སུ་སྦྱར། །གང་གི་ཆབ་འབངས་མངའ་རིས་ལྟོས་སོ་ཅོག །འབྲེལ་ཚད་ཚོགས་གཉིས་རབ་རྫོགས་གཏན་གྱི་བདེ། །བྱང་ཆུབ་དམ་པར་འགྱུར་བའི་ས་བོན་ཡང་། །ལེགས་པར་བཏབ་པའི་ངོ་མཚར་མཛད་འཕྲིན་ནི། །མ་ཉམས་ད་ལྟའི་བར་དུ་གནས་འདི་འོ། ཞེས་དང་། །མ་རུང་ཚར་བཅད་མ་དག་མུན་པའི་གླིང་། །ཡང་དག་དགེ་བསྒྱུར་ཡང་དག་ལམ་ལ་བཀོད། །བསྟན་པའི་གཞི་བཙུགས་བསྟན་འཛིན་སྤྱན་དྲངས་ཤིང་། །ཆོས་ཀྱི་ཆར་ཕབ་ཆོས་སྤྱོད་མ་ནོར་སྤེལ། །བསྟན་འཛིན་འདུས་པར་འཚོ་བ་སྦྱིན་མཁན་ཙམ། །མ་ཡིན་བསྟན་པའི་མཐུན་རྐྱེན་མ་ལུས་ཀུན། །བདག་རྐྱེན་བྱེད་ནུས་ས་བདག་སྡོམ་བརྩོན་གྱིས། །མཛད་པའི་སྲོལ་བཏོད་ལུགས་གཉིས་མཛད་བཟང་གི། །ངོ་མཚར་བསམ་གྱིས་མི་ཁྱབ་ངོ་མཚར་གཏམ། །བརྗོད་ཀྱིས་མི་ལངས་མདོར་བསྡུས་ཙམ་འདིར་བརྗོད། །དེ་ལྟར་ས་སྐྱོང་བླ་མ་གསང་བདག་དངོས། །བྱམས་པ་ཕུན་ཚོགས་ཞེས་པ་གང་དེ་ནི། །ཕྱོགས་འདིའི་བསྟན་འགྲོ་གང་གི་རིགས་སྐྱེས་པ། །ཀུན་ལ་བཀའ་དྲིན་གཞལ་དུ་མེད་པ་འོ། །དེས་ན་གོང་གི་བརྒྱུད་འཛིན་རིམ་ཕེབས་ཀུན། །བླ་ཆེན་གང་དེའི་ཐུགས་བསྐྱེད་མཛད་བཟང་སྒོ། །མ་ནོར་སྲོལ་རྒྱུན་སྐྱོང་ན་བསྟན་འགྲོ་དང་། །རང་གཞན་གཏན་བདེ་ཐོབ་པར་གདོན་མི་ཟ། །ཞེས་སོགས་གསུངས་སོ། །ལྷུན་ཐུབ་ཀྱི་སྲས་བཞི་པ་དཔོན་ཆེན་ཀརྨ་འོག་ཏུ་འཆད། ལྔ་པ་བླ་མ་ལྷ་སྲུང་བསྒོམ་བཟླས་ལ། རྟག་འགྲུས་བླ་ཆེན་ཕུན་ཚོགས་ཞབས་འདེགས་བརྩོན། །ཞེས་པ་ལྟར། འདི་ནི་ཡི་དམ་གྱི་ལྷའི་བསྒོམ་བཟླས་ཁོ་ནས་ཉིན་མཚན་འདའ་བར་མཛད་དོ། །དྲུག་པ་བླ་མ་ཀརྨ་བསམ་གྲུབ་ནི་ཀརྨ་ཀཾ་ཚང་གི་གྲུབ་མཐའ་ལ་ཞུགས་ཤིང་དབོན་པོ་སྟོད་ཀྱི་གདན་སར་རྟག་བཞུགས་གནང་། དེ་ལྟར་དཔོན་ཆེན་ལྷུན་ཐུབ་ཀྱི་སྲས་དྲུག་པོ་འདི་ལ་སྟག་མོ་བུ་དྲུག་ཅེས་གླེང་བ་བྱུང་། ཀརྨ་སྲུང་ཁྱིམ་ཐབས་ལ་བཞུགས་པའི་སྲས་གཉིས་ཏེ་མགོན་པོ་དང་། ལྷུན་གྲུབ་བོ། མགོན་པོའི་སྲས་བླ་མ་བསོད་ནམས་རྒྱལ་མཚན་དང་། སྐལ་བཟང་འབུམ། པདྨབསམ་གྲུབ། ཀུན་དགའ་ཚེ་བརྟན་བཞི་ལས། ཕྱི་མ་འདིས་ཡོངས་འཛིན་མང་པོ་བསྟེན་ཅིང་མདོ་རྒྱུད་ཀྱི་ལུང་དང་མན་ངག་གི་གསན་པ་རྒྱ་མཚོ་ལྟ་བུའི་ཕ་རོལ་ཏུ་སོན་ནས་རིམ་གཉིས་ཀྱི་ཏིང་ངེ་འཛིན་ཟབ་མོ་ལ་རྩེ་གཅིག་ཏུ་བརྩོན་པས་ཡོན་ཏན་དཔག་ཏུ་མེད་པ་མངའ་ཞིང་། ལྷག་ལྷ་རྗེ་བཙུན་རྡོ་རྗེ་རྣལ་འབྱོར་མའི་ཞལ་མངོན་སུམ་དུ་མཐོང་བར་གྲགས་སོ། །སྐལ་བཟང་འབུམ་གྱི་སྲས་བླ་མ་བཀྲ་ཤིས་རྒྱ་མཚོ་ལ་སོགས་པ་རྣམས་ཏེ་འདི་ནི་གསང་ཆེན་རྒྱུད་སྡེ་མང་པོའི་ལག་ལེན་ཆེ་ཕྲ་ཀུན་ལ་ཤིན་ཏུ་མཁས་པར་གྱུར་ཏེ། དགེ་འདུན་སྟོང་ཕྲག་ཕྱེད་དང་གཉིས་ཙམ་གྱི་མགོ་འཛིན་དང་སྒྲིག་སྲོལ་མ་འཕྱུགས་པར་བསྐྱངས་པ་ལ་སོགས་པ་བསྟན་པའི་བྱ་བ་ལྷག་པར་བགྱིས་སོ། །སྐུ་ཚེའི་སྨད་དུ་ལོ་གྲངས་བཅུ་གསུམ་ཙམ་ལ་ཡི་དམ་གྱི་ལྷ་མང་པོའི་བསྙེན་སྒྲུབ་ལ་རྩེ་གཅིག་ཏུ་གཞོལ་བའི་རིང་ནས་མཁའ་སྤྱོད་དུ་གཤེགས་སོ། །དཔོན་ཆེན་ཀླུ་འཕེལ་གྱིས་ལྕམ་མོ་གཉིས་བཞེས་པའི་སྔ་མར་སྲས་གསུམ་འཁྲུངས་པ་ལས་དང་པོ་ཨོ་རྒྱན་བཀྲ་ཤིས་ཁྱིམ་ཐབས་ལ་བཞུགས་པ་རྩ་བའི་གདུང་རབས་འོག་ཏུ་འཆད། རྒྱལ་རབས་བརྒྱད་པ་ཁྲི་རབས་གཉིས་པ། སྲས་གཉིས་པ་བླ་མ་ཀུན་དགའ་ཕུན་ཚོགས་ནི་ཐུགས་སྒམ་ཞིང་ངང་རིང་བ་དང་། མངའ་འབངས་ཐམས་ཅད་ཆོས་དང་མཐུན་པའི་བྱ་བས་བསྐྱངས་བ་ལ་སོགས་པ་ཡ་རབས་ཀྱི་སྤྱོད་ཚུལ་ཕུན་སུམ་ཚོགས་པ་ནམ་ཡང་མི་གཏོང་བ་དང་། ཕྱི་བཟོ་དང་། གསོ་བ་རིག་པ་སོགས་ལ་མཁས་པར་གྱུར། ནང་གསང་སྔགས་གསར་རྙིང་གི་ཉམས་ལེན་ཟབ་མོ་ལ་བརྩོན་པ་དང་དཀྱིལ་འཁོར་གྱི་རིགས་མང་པོའི་ཆོ་གའི་ཕྱག་ལེན་དང་། གར་འཆམ་དབྱངས་རོལ་སོགས་གཙུག་ལག་རྒྱ་མཚོའི་དོན་ལ་མཁྱེན་རབ་ཕུལ་བྱུང་མངའ་ཞིང་། ས་སྐྱོང་བླ་མ་བྱམས་པ་ཕུན་ཚོགས་སྐུ་གཤེགས་ནས་དེའི་གདན་སའི་ཁྲི་ལ་བཞུགས་ནས་རྣམ་དཀར་གྱི་ཕྲིན་ལས་སྤེལ་བར་མཛད་དོ། སྲས་གསུམ་པ་དབོན་པོ་རྒྱ་བོ་ནི་དབོན་སྟོད་ཕོ་བྲང་དུ་བཞུགས་སོ། །རྒྱལ་རབས་དགུ་པ་ཁྲི་རབས་གསུམ་པ། ལྷུན་ཐུབ་ཀྱི་སྲས་བཞི་པ་ཀརྨ་ལ་སྲས་གསུམ་བྱུང་བའི་དང་པོ་བླ་མ་ཆེ་མཆོག་ནི་ཆོས་སྲིད་ཀྱི་གཙུག་ལག་རབ་འབྱམས་ལ་མི་འཇིགས་པའི་བློ་གྲོས་རྡོལ་བས་གདན་སའི་ཁྲི་རབས་གསུམ་པ་ལ་བཞུགས་ནས་ཆབ་འབངས་ཐམས་ཅད་ཆོས་དང་བྱམས་པས་བསྐྱངས། སྲས་གཉིས་པ་རྡོར་ལེགས་ནི་དཔའ་རྩལ་ཐོགས་པ་མེད་ཅིང་དམ་ཅན་གྱི་སྤྲུལ་པར་གྲགས། ལྕགས་རའི་གླིང་དཔོན་ལ་དམག་དཔུང་འདེགས་སྐབས། རྒོད་ཚང་འབུར་ཐོག་ནས་མདའ་འཕངས་པ་ལྕགས་རའི་གླིང་དཔོན་གྱི་གསེར་འཕྲུར་ཕོག་པ་སོགས་ངོ་མཚར་ཅན་ཞིག་བྱུང་སྐད། གསུམ་པ་གཡུལ་རྒྱལ་ཞེས་པ་དཔའ་རྩལ་སྐྱེ་གཟུགས་སོགས་གླིང་གེ་སར་ལ་འགྲན་ནུས་པ་ཙམ་བྱུང་ཞེས་གྲགས། འདི་ལ་སྲས་ངག་དབང་བཀྲ་ཤིས་ཞེས་པ་མཁྱེན་རབ་ཕུན་སུམ་ཚོགས་ཤིང་གཅིག་ཏུ་གཞན་ལ་ཕན་པ་ལྷུར་བྱེད་པ་ཞིག་འཁྲུངས། རྒྱལ་རབས་བཅུ་བ་ཁྲི་རབས་བཞི་པ། དཔོན་པོ་ཀླུ་འཕེལ་གྱི་ལྕམ་གཉིས་པའི་སྲས་འགྲན་ཟླ་མེད་པའི་བསོད་ནམས་ཀྱི་འབྲས་བུ་མཐའ་དག་གཅིག་ཏུ་འཁྱིལ་བའི་ཁྲི་ཆེན་བླ་མ་སངས་རྒྱས་བསྟན་པ་ཞེས་པ་དེ་ནི། གཏེར་གཞུང་འགའ་ཞིག་ཏུ་ཅོག་རོ་ཀླུའི་རྒྱལ་མཚན་པའི་སྤྲུལ་པའི་རོལ་རྩེད་ཉིད་དུ་གདོན་མི་ཟ་བར་ལུང་གིས་བསྟན་པའི་སྐྱེ་བུ་ཆེན་པོ་ཞིག་སྟེ། དང་པོ་ནས་རང་བཞིན་བཟང་ཞིང་བསམ་པ་དགེ་བ། ཡིད་གཞུངས་ཤིང་ཕྱི་ནང་གི་རིག་པའི་གཞུང་ལུགས་རབ་འབྱམས་ལ་བློ་གྲོས་ཀྱི་འཇུག་པ་ཤིན་ཏུ་གསལ་པོར་གྱུར། ངོར་ཨེཝཾ་ཆོས་ལྡན་དུ་ཕེབས། ངོར་པའི་ཁྲི་པ་ལས་སོ་བྱང་སྔགས་གསུམ་གྱི་སྡོམ་པ་དང་ལམ་འབྲས་ཀྱི་ཟབ་ཁྲིད་སོགས་ཚུལ་བཞིན་དུ་གསན་བསམ་མཛད་པ་ཡིན་ཏེ། དེ་ཉིད་ལས། དཔལ་ལྡན་མི་ཡི་ནོར་བུ་བསྟན་འགྲོའི་དཔལ། །ཆོས་རྒྱལ་སྡོམ་བརྩོན་བླ་མ་མདོ་སྔགས་ཆོས། །ཀུན་མཁྱེན་འགྲོ་ཀུན་གཏན་བདེར་འགོད་པ་དང་། །རྒྱལ་བསྟན་ཉི་ལྟར་གསལ་མཛད་རྒྱལ་བའི་སྲས། །སངས་རྒྱས་བསྟན་འཛིན་སངས་རྒྱས་བསྟན་པ་ཞེས། །གང་དེ་རང་བཞིན་བཟང་ཞིང་བསམ་པ་དགེ། །ཡིད་གཞུངས་གཙུག་ལག་ཟུང་ལ་བློ་གྲོས་གསལ། །གང་དེ་ཐུབ་བསྟན་རྩ་ལག་ཡོན་ཏན་གྱི། །འབྱུང་གནས་ཨེཝཾ་ཆོས་ལྡན་ཆོས་གྲྭར་ཕེབས། །རྒྱལ་བ་ཀུན་གྱི་འཕྲིན་ལས་སྐྱོང་བ་པོ། །ཁྲི་འཛིན་མཁན་ཆེན་༼འཇམ་མགོན་ལྷུན་གྲུབ་དཔལ་ལྡན་ཡིན་སྙམ༽ཆོས་ཀྱི་རྒྱལ་པོ་ལས། །ཡོངས་རྫོགས་སོ་སོར་ཐར་དང་བྱང་སེམས་ཀྱི། །སྡོམ་པ་གསང་སྔགས་སྨིན་བྱེད་དབང་རྗེས་གནང་། །བྱིན་རླབས་དུ་མ་གསུང་ངག་ལམ་འབྲས་ཀྱི། །ཟབ་ཁྲིད་གསན་ཅིང་ཉམས་ཁྲིད་ཚུལ་བཞིན་བསྐྱངས། །དམིགས་རྐང་སོ་སོའི་སྐབས་ཀྱི་ཉམས་གང་སྐྱེས། །གོང་ལ་ཞུ་འབུལ་སྨིན་ཁྲིད་དཔྱིས་ཕྱིན་མཛད། །དེ་བཞིན་དཔལ་ལྡན་ས་སྐྱ་འཇམ་པའི་དབྱངས། །བརྟན་པའི་འཁོར་ལོ་བསོད་ནམས་དབང་ཕྱུག་དང་། །སྔགས་འཆང་ཀུན་དགའ་བཀྲ་ཤིས་ཞབས་པད་དུ། །བསྟེན་ནས་སྨིན་གྲོལ་གདམས་པ་རྒྱ་ཆེར་གསན། །དེ་བཞིན་མཁས་གྲུབ་སངས་རྒྱས་ཕུན་ཚོགས་དང་། །མཁན་ཆེན་བཟང་པོ་རྒྱལ་མཚན་མི་ཉག་པ། །བཀྲ་ཤིས་དཔལ་ལྡན་ཀུན་དགའ་ཆོས་འཕེལ་དང་། །དོན་གྲུབ་རྒྱལ་མཚན་ལ་སོགས་རིས་བྲལ་གྱི། །དམ་པ་མང་བསྟེན་མང་དུ་ཐོས་པའི་མཆོག །དེ་ལྟར་ཐོས་པའི་མདོ་སྔགས་གཞུང་བཟང་ལ་། །བསམ་པས་སྒྲོ་འདོགས་ལེགས་ཆོད་ཐེག་གསུམ་གྱི། །དོན་ཀུན་ཐུགས་སུ་ཆུད་ཅིང་ས་ངོར་གྱི། །བླ་མ་གོང་མའི་ཕྱག་ལེན་གར་འཆམ་དབྱངས། །གདངས་དང་རོལ་མོ་འབུད་དཀྲོལ་དཀྱིལ་འཁོར་གྱི། །བྲི་ཐིག་ཕྱག་རྒྱ་འཆིང་ཚུལ་ལ་སོགས་པ། །སྦྱངས་པ་མཐར་ཕྱིན་བསྐྱེད་རྫོགས་ཟབ་མོ་ཡི། །ཉམས་ལེན་དྲོད་རྟགས་མངོན་དུ་གྱུར་པ་སོགས། །སུམ་ལྡན་རྡོ་རྗེ་འཛིན་པའི་རྩེ་མོར་གྱུར། །བླ་མ་ཆེ་མཆོག་གཤེགས་ནས་གདན་ས་ཡི། །ལུགས་གཉིས་འགན་བཞེས་བཀའ་དྲིན་བསྐྱངས་བར་མཛད། །ཅེས་སོགས་གསུངས་པ་ལྟར། བླ་མ་ཆེ་མཆོག་གཤེགས་ནས་གདན་རབས་བཞི་པའི་ཁྲི་ལ་མངའ་གསོལ། མངའ་འབངས་ལུགས་གཉིས་ཀྱི་ཁྲིམས་སྲོལ་དྲང་པོས་སྐྱོང་། ཡུལ་སྡེ་སྟོབས་འབྱོར་སྔར་ལས་ཆེ་བ་བྱུང་བས་དམ་པ་འདི་ཉིད་ལ་གུས་ཞབས་ཆེ། སྔར་བླ་ཆེན་བྱམས་པ་ཕུན་ཚོགས་ཀྱིས་ཆབ་འོག་ཏུ་བཅུག་པ་སྒ་རྗེ། དཔལ་ཡུལ། སྤོ་ལུ་སོགས་བར་ལམ་ཆབ་སྲིད་ཀྱི་འཛིན་སྐྱོང་ཐད་བར་གསེང་ཅུང་ཟད་ཀྱིས་ཕྱིར་གྱེས་པ་ལྟ་བུ་བྱུང་རུང་སླར་མངའ་ཞབས་སུ་ཚུར་འདུས་ཤིང་ཕྱོགས་ཐམས་ཅད་མངའ་ཐང་གྲུ་བཞི་ལམ་མེ་བ་བྱུང་། དགོན་ཆེན་དགོན་པའི་ལོ་རྒྱུས་ལས། སྔར་མངའ་ཞབས་སུ་མ་འདུས་པའི་ས་སྨད་སྒ་དཔལ་སྤོ་ལི་ཀཿཐོག་སོགས་མང་པོ་རང་དབང་དུ་བསྡུས་ཏེ། ཞེས་གསུངས། དེ་ནས་བཟུང་སྟེ་རྒྱལ་ཁམས་ཀྱི་འགྲོ་བ་རིས་སུ་མེད་པ་བདེ་བར་སྐྱོང་ཞིང་། དེ་བཞིན་གཤེགས་པའི་བསྟན་པ་ལ་ཕན་པའི་ལེགས་བྱས་ཀྱི་སྒོ་འཕར་བྱེ་བ་ཁྲག་ཁྲིག་དུས་ཅིག་ཅར་དུ་ཕྱེ་བ་ལ་སྔོན་རབས་བོད་ཀྱི་ཆོས་རྒྱལ་ཆེན་པོ་རྣམས་ཀྱི་མཛད་པ་བཟང་པོ་རྗེས་སུ་དྲན་པའི་རང་བཞིན་དུ་གྱུར་ཅིང་། མངའ་འོག་ཏུ་མཆིས་སོ་འཚལ་གྱི་དགེ་འདུན་གྱི་སྡེ་རིས་སུ་མ་ཆད་པ་རྣམས་ལ་བཤད་སྒྲུབ་ཀྱི་རྒྱུན་ཉམས་པ་སླར་གསོ་བ། སྔ་ན་མེད་པའི་དཀྱིལ་འཁོར་གྱི་སྒྲུབ་མཆོད་མང་པོ་ལོ་རེ་བཞིན་འཛུགས་པའི་སྲོལ་བཏོད་པ། ཆོ་ག་དེ་དང་དེ་དག་གི་ཆིངས། མཐོང་བ་བརྒྱུད་པའི་ལག་ལེན་དུ་དར་བའི་གྱེར་གདངས། ཕྱག་རྒྱ། ཐིག་རྡུལ་ཚོན་ལ་སོགས་པ་རྣམས་ཀྱང་གྲྭ་ས་ཆེན་པོ་རྣམས་དང་། ལྗོངས་འདིར་སྔ་རབས་བྱོན་པའི་མཁས་གྲུབ་གོང་མ་རྣམས་ཀྱིས་ཇི་ལྟར་བཞག་པའི་ལག་ལེན་ཐམས་ཅད་མ་འཕྱུགས་པའི་བཅའ་ཁྲིམས་རྡོ་རྗེའི་ར་བ་ལྟར་བརྟན་པར་བཅས་ཏེ། བསྟན་དོན་རྒྱ་ཆེ་ཞིང་བསྐལ་པའི་བར་དུ་ཡང་ཆེས་ཆེར་བརླིང་བར་མཛད་དོ། རང་ལུགས་ཀྱི་གྲྭ་ས་གཙོར་བཏོན་པའི་དབུས་གཙང་ཁམས་གསུམ་དུ་གཏོགས་པའི་དགེ་འདུན་གྱི་ཚོགས་ཚད་མེད་ཅིང་གྲངས་མེད་པ་ལ་བསྙེན་བཀུར་གྱ་ནོམ་པ་སྦྱར་རོ། ཁྱད་པར་ལྷུན་གྲུབ་སྟེང་གི་ཆོས་གྲྭ་ཆེན་པོས་མཚོན་པའི་མདོ་སྨད་༼དེ་སྐབས་ཀྱི་ཐ་སྙད་ཡིན་དེང་སྐབས་མདོ་སྟོད༽ཀྱི་སའི་ཆ་ལ་འཁོད་པའི་འགྲོ་བའི་བདེ་སྐྱིད་དང་བསྟན་པའི་བཤད་སྒྲུབ་ལ་ཕན་པའི་ཐུགས་བསྐྱེད་རྨ་མེད་པ་ཉེ་བར་བཞག་སྟེ། ངོར་ཨེཝཾ་ནས་འཇམ་མགོན་བཀྲ་ཤིས་དཔལ་ལྡན་ཞེས་པ་མདོ་རྒྱུད་མ་ལུས་པའི་གསན་སྦྱངས་རྒྱ་མཚོ་ལྟ་བུའི་ཕ་རོལ་ཏུ་སོན་པ་དེ་ཉིད་སྤྱན་དྲངས་ཏེ། དཔལ་དགེས་པ་རྡོ་རྗེ་སོགས་རྒྱུད་སྡེ་ཆེན་པོ་རྣམས་དང་རྗེས་སུ་འབྲེལ་བའི་དབང་བསྐུར་བ་དང་། བྱིན་གྱིས་བརླབས་པ་སོགས་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བར་བསྐུལ་ཏེ་བསྟན་པའི་རྒྱལ་མཚན་ཆེན་པོ་མི་ནུབ་པར་བྱས་སོ། །ཐུབ་བསྟན་རྣམ་པར་རྒྱལ་བའི་ཆོས་གྲྭ་ནས་ཀུན་མཁྱེན་གོ་བོ་རབ་འབྱམས་པ་བསོད་ནམས་སེངྒེ་ཞེས་ས་སྟེང་གི་དཀྱིལ་འཁོར་ལུས་པ་མེད་པར་ཉིན་མོར་བྱེད་པ་ལྟར་གྲགས་པ་གང་དེའི་སེངྒེའི་ཁྲི་ལ་མངའ་གསོལ་བའི་མཁན་ཆེན་བཟང་པོ་རྒྱལ་མཚན་ཞེས་པ། གཞུང་ལུགས་རབ་འབྱམས་སྨྲ་བའི་དབང་ཕྱུག་དེ་ཉིད་སྤྱན་དྲངས་ནས་བླའི་མཆོད་གནས་སུ་བཀུར་ཏེ། གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་གདམས་ངག་གི་ཉམས་ཁྲིད་རྒྱས་པ། དེའི་ཡན་ལག་དང་བཅས་པ་ཡོངས་སུ་རྫོགས་པ། འཕགས་ཡུལ་གྱི་གྲུབ་པའི་དབང་ཕྱུག་འཇིགས་མེད་འབྱུང་གནས་སྦས་པའི་ཞབས་ཀྱིས་ལེགས་པར་བཀྲལ་བའི་རྡོ་རྗེ་ཕྲེང་བ་དང་ཀྲཱྀཡསམུཙྪ་དཀྱིལ་འཁོར་ཆེན་པོ་བཞི་བཅུ་རྩ་ལྔ་སོགས་དབང་བསྐུར་གྱི་རིགས། རྗེས་གནང་། ཉམས་ཁྲིད་སོགས་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཏེ། དེ་དག་གི་རྒྱུན་དེང་སང་གི་བར་དུ་ཡང་དར་རྒྱས་སུ་བཞུགས་སོ། །སླར་ཡང་དཔལ་ཨེཝྂ་ཆོས་ལྡན་གྱི་དགོན་པ་ནས། ཤཱཀྱའི་རྒྱལ་པོའི་རྒྱལ་ཚབ་ཀྱི་སྐྱེས་བུ་ཆེན་པོ་རྡོ་རྗེ་འཆང་ཀུན་དགའ་བཟང་པོའི་ཞབས་སྟེགས་མི་འཇིགས་གདོང་ལྔའི་ཁྲི་ལ་མངའ་གསོལ་བའི་མཁན་རབས་ཉེར་བཞི་པ་མཁས་གྲུབ་སངས་རྒྱས་ཕུན་ཚོགས་དང་། འཛམ་གླིང་བསྟན་པའི་རྒྱན་གཅིག་པུ་དཔལ་ས་སྐྱ་པ་ཀུན་དགའ་བཀྲ་ཤིས་པ་གཙོ་བོར་སྨོས་པའི་གཙང་དབུས་ཁམས་གསུམ་གྱི་མཁས་པ་དང་གྲུབ་པའི་དབང་པོ་མ་ལུས་པའི་གཙུག་གི་ནོར་བུར་གྱུར་པ་དེ་དག་མདོ་ཁམས་ཕྱོགས་ཀྱི་སྐྱེ་འགྲོ་དཔག་ཏུ་མེད་པའི་ཐར་པ་བགྲོད་པའི་ལམ་མཁན་ཉིད་དུ་སྤྱན་དྲངས་ཏེ། ཇི་སྐད་དུ། མདོ་སྨད་ལྗོངས་འདིར་སྤྱན་དྲངས་ཟབ་རྒྱས་ཀྱི། །དམ་པ་ཆོས་ཀྱི་འཁོར་ལོ་བསྐོར་བསྐུལ་བར། །མཛད་པའི་བཀའ་དྲིན་བྱུང་བ་འདི་ལྟ་སྟེ། །དཔལ་ལྡན་དགེས་པ་རྡོ་རྗེ་བཀའ་བབས་བཞི། །གསང་འདུས་འཕགས་ལུགས་མི་བསྐྱོད་རྡོ་རྗེ་དང་། །ཡེ་ཤེས་ཞབས་ལུགས་འཇམ་དཔལ་རྡོ་རྗེའི་དབང་། །བདེ་མཆོག་ལུ་ཧི་པ་དང་ནག་པོ་པའི། །དབང་དང་དྲིལ་བུ་ལུས་དཀྱིལ་བྱིན་རླབས་དང་། །ནཱ་རོ་མཁའ་སྤྱོད་བྱིན་རླབས་ཁྲིད་དང་བཅས། །དམར་མོ་སྐོར་གསུམ་དམར་ཆུང་སྐོར་གསུམ་དང་། །དཔྱལ་ལུགས་ཕག་སྐོར་གསུམ་དང་གསེར་ཆོས་མཆོག །དམར་པོ་སྐོར་གསུམ་ལ་སོགས་ཐུན་མིན་གྱི། །བྱིན་རླབས་ལས་ཚོགས་དུ་མ་སྒྲུབ་པའི་ཐབས། །རྒྱ་མཚོ་བརྒྱ་རྩ་སྒྲོལ་མ་ཉེར་གཅིག་སོགས། །བཀའ་གདམས་ལྷ་བཞི་ཐིག་ལེ་བཅུ་དྲུག་དང་། །དབུ་སེམས་སྲོལ་གཉིས་སེམས་བསྐྱེད་ལེགས་པར་གནང་། །གཤེད་དམར་དབང་དང་སྤྲོས་མེད་ཁྲིད་ཟབ་མོ། །འཇིགས་བྱེད་ས་ལུགས་རྭ་ལུགས་ལྷ་དགུ་དང་། །རྡོ་རྗེ་འཇིགས་བྱེད་བཅུ་གསུམ་མ་ཡི་དབང་། །རྭ་རྩེ་སེམས་འཛིན་རྫོགས་རིམ་ཁྲིད་སོགས་དང་། །རྭ་པོད་དཔྱལ་པོད་སོགས་ཀྱི་ལུང་དང་བཅས། །སམྤུཊ་དང་མཁའ་འགྲོ་རྒྱ་མཚོའི་དབང་། །འཇམ་མགོན་བླ་མ་བཟང་པོ་རྒྱལ་མཚན་གྱིས། །གསུང་ངག་ལམ་འབྲས་གཟབ་ཁྲིད་གཙོར་གྱུར་པའི། །རྡོ་རྗེ་ཕྲེང་བ་ལ་སོགས་སྤྱི་བཀའ་དང་། །ཟུར་བཀའ་སྙན་བརྒྱུད་ཆོས་བཀའ་གཟབ་རྒྱས་བསྩལ། །དེ་བཞིན་མི་ཉག་བཀྲ་ཤིས་དཔལ་ལྡན་དང་། །ཆོས་རྗེ་དོན་གྲུབ་རྒྱལ་མཚན་རྣམ་འདྲེན་རྗེ། །ཀུན་དགའ་ཆོས་འཕེལ་ལ་སོགས་དེ་དག་གིས། །རྒྱུད་སྡེ་བཞི་དང་འབྲེལ་བའི་དབང་རྗེས་གནང་། །བྱིན་རླབས་སྨིན་ཁྲིད་བཀླག་ལུང་ལ་སོགས་པ། །རྒྱ་ཆེར་སྤེལ་བའི་བདག་པོའི་རྐྱེན་དུ་གྱུར། ཞེས་སོགས་སྡེ་དགེའི་རྒྱལ་རབས་ཚིགས་བཅད་མ་ལས་གསུངས་སོ། །ཆོས་གྲྭ་ལྷུན་གྲུབ་སྟེང་འདིར་རྒྱུན་ཆགས་བཞུགས་ནས། གདན་ས་གཉིས་པ་ལྕགས་ར་བསམ་གྲུབ་རྩེ། ཡེ་ན་བཀྲ་ཤིས་རྩེ། དབོན་པོ་སྟོད་ལྷུན་པོ་རྩེ། ཟུལ་སྟོད། སྤེ་བར་རྟག་བརྟན་རྩེ། སྨད་ཤོད་རྫོང་སར་བཀྲ་ཤིས་ལྷ་རྩེ་རྣམས་སུ་ཞབས་ཀྱིས་བཅགས་པར་གསོལ་བ་བཏབ་སྟེ། དེ་དག་ཏུ་སྤྱན་དྲངས་ནས་སྡོམ་པ་གསུམ་གྱི་བདུད་རྩིའི་སྒོ་འཕར་བསམ་གྱིས་མི་ཁྱབ་པ་ཕྱེ་བས་སྐལ་པ་ལྡན་པ་ཀུན་གྱི་རེ་བ་ཡོངས་སུ་རྫོགས་པར་མཛད། ཆོས་གྲྭ་ཆེན་པོ་འདི་ཉིད་དུ་བདེ་མཆོག་མཁའ་འགྲོ་རྒྱ་མཚོ་སོགས་སྒྲུབ་མཆོད་ཀྱི་རིགས་མང་པོ་གསར་དུ་བཙུགས་པ། ཕུར་པའི་སྒྲུབ་མཆོད་རྩ་འཆམ་བསྒྲལ་འཆམ་དང་བཅས་པ་དཔལ་ས་སྐྱའི་ཕྱག་སྲོལ་ཇི་ལྟ་བ་དང་། སྲུང་མའི་དབང་པོ་གུར་གྱི་མགོན་པོའི་དམར་ཆེན་གཏོར་བཟློག་སྐུ་འཆམ་དང་བཅས་པའི་ཕྱག་ལེན་རྣམ་པར་དག་པ་བཙུགས། གྲྭ་པའི་སྒྲིག་དང་ཀུན་སྤྱོད་སྡོམ་གསུམ་གྱི་སྒོ་འཕར་བསམ་གྱིས་མི་ཁྱབ་པ་ཕྱེས། སྔར་ཡོད་པ་རྣམས་ཀྱང་དག་ཐེར་མཛད་པའི་སྒོ་ནས། བསྟན་པ་རིན་པོ་ཆེའི་དྲི་མ་ཕྲ་མོ་རྣམས་ཀྱང་ལུང་རིགས་མན་ངག་གི་དག་བྱེད་བཟང་པོས་ལེགས་པར་བཀྲུས་ཏེ། སྔོན་དུས་འཕགས་པའི་ཡུལ་གྱི་བསྟན་པ་དར་རྒྱས་ལ་འགྲན་པར་ནུས་པའི་ཕྲིན་ལས་ཀྱི་རྒྱུན་ཆེན་པོ་བཙུགས་པས། མདོ་ཁམས་སྡེ་དགེའི་གྲྭ་ཚང་ཞེས་སྐབས་དེར་སྡེ་དགེའི་ཕྱོགས་འདིར་དཔེ་ཚད་དུ་བྱེད། ཡང་དེ་ཉིད་ལས། དེ་ལས་གཞན་ཡང་མཆོད་གནས་རིམ་གྲོ་པ། །ཨོ་རྒྱན་གཉིས་པ་ཀློང་གསལ་སྙིང་པོ་དང་། །རྫོགས་ཆེན་པདྨརིག་འཛིན་དེའི་སློབ་མ། །གཏེར་སྟོན་ཉི་གྲགས་སོགས་ལ་བསྙེན་བཀུར་གནང་། །རྫོགས་ཆེན་དགོན་དང་འཛིང་གི་སྟག་མོ་དགོན། །དཔལ་ཡུལ་དགོན་སོགས་འདེབས་གནང་བདག་རྐྱེན་མཛད། །ཅེས་སོགས་གསུངས་ཏེ། རིག་འཛིན་ཀློང་གསལ་སྙིང་པོ། རྫོགས་ཆེན་པདྨརིག་འཛིན། གཏེར་སྟོན་ཉི་མ་གྲགས་པ་སོགས་ལ་བསྙེན་བཀུར་ནས། བོད་རབ་བྱུང་བཅུ་གཅིག་པ་ཤིང་གླང་ཕྱི་ལོ་༡༦༨༥ལོར་རྫོགས་ཆེན་ཨོ་རྒྱན་བསམ་གཏན་གླིང་དང་། ཕྱི་ལོ་༡༦༧༥ལོར་དཔལ་ཡུལ་བྱང་ཆུབ་གླིང་། འཛིང་སྟག་མོ་དགོན་སོགས་གསར་དུ་འདེབས་པའི་བདག་རྐྱེན་གནང་པ་སོགས་ས་སྐྱོང་བླ་མ་ཆེན་པོ་འདི་ཉིད་ཀྱི་བཀའ་དྲིན་མཐའ་དག་གཟུགས་སུ་རུང་ན་གནམ་སའི་དཀྱིལ་འཁོར་ཀུན་ཀྱང་དོག་པར་འགྱུར་བའི་རང་བཞིན་ཁོ་ནའོ། ཨེཝྂ་པའི་བླ་མ་གོང་མའི་ཐུགས་དམ་གྱི་རྟེན་བརྒྱད་སྟོང་པ་སྐད་གཉིས་ཤན་སྦྱར་ཅན་རྗེ་འདི་ལ་ཕུལ་བར་པར་དུ་བརྐོས་པས་ལྗོངས་འདིར་བཀའ་དགོངས་འགྲེལ་དང་བཅས་པའི་ཆོས་སྦྱིན་མི་ཟད་པར་གྱི་འཕྲུལ་འཁོར་འབྱུང་བའི་རྟེན་འབྲེལ་འགྲིགས། བླ་ཆེན་གྱིས་བཞེངས་པའི་གཙུག་ལག་ཁང་བསམ་གྲུབ་མཐོང་གྲོལ་ཆེན་མོ་ཉམས་གསོའི་བཀའ་དྲིན་སྐྱོང་ཚེ། ཉིན་མོ་མི་ལས་མཚན་མོ་གཟུགས་མེད་ཀྱིས་ཞབས་འདེགས་ཞུ་བའི་འུར་ཟིང་ཆེས་ཆེ་བ་ཀུན་གྱིས་མཐུན་སྣང་དུ་བྱུང་བ་བཅས། གཙུག་ལག་ཁང་གི་ཕྱི་ཁོག་ལེགས་པར་གྲུབ་ནས་ནང་བཀོད་ཕལ་ཆེར་ལྗགས་བཀོད་གནང་ནས་སྐུ་ལ་སྙུན་མེད་པར་ངོ་མཚར་བའི་ལྟས་དང་བཅས་སྐུ་གཤེགས། སྐུ་གདུང་དྲྭ་མ་སྒང་དུ་མེ་མཆོད་འབུལ་ཤུལ་དུ་ལྗོན་ཤིང་རྩེ་མོ་བཅུ་གསུམ་ཡོད་པ་ཞིག་སྐྱེས་པ་ནི་ས་བཅུ་གསུམ་པ་མངོན་དུ་གྱུར་པའི་རྟགས་སོ། །རྒྱལ་རབས་བཅུ་གཅིག་པ་ཁྲི་རབས་ལྔ་པ་སྡེ་དགེ་ཁྲི་ཆེན་བླ་མ་བསོད་ནམས་ཕུན་ཚོགས་ནི། རྒྱལ་རབས་ཚིགས་སུ་བཅད་པ་ལས། ཨོ་རྒྱན་བཀྲ་ཤིས་སྲས་བཞི་འཁྲུངས་པ་ཡི། །དང་པོ་བླ་མ་བསོད་ནམས་ཕུན་ཚོགས་ཞེས། །ཤིན་ཏུ་མཐོ་བའི་རིགས་སུ་གྱུར་མོད་ཀྱང་། །དྲེགས་དང་ཁེངས་པ་མི་མངའ་རང་བཞིན་བཟང་། །བདག་བས་གཞན་གཅེས་བྱང་ཆུབ་སེམས་དང་ལྡན། །གང་དེས་འཇམ་དབྱངས་སངས་རྒྱས་ཕུན་ཚོགས་དང་། །མཁན་ཆེན་བཟང་པོ་རྒྱལ་མཚན་ཆོས་ཀྱི་རྗེ། །ཀུན་དགའ་ཆོས་འཕེལ་དོན་གྲུབ་རྒྱལ་མཚན་སོགས། །དམ་པ་མང་བསྟེན་བསྟན་པའི་སྒོར་ཞུགས་ནས། །སྡོམ་གསུམ་ཡོན་ཏན་དུ་མས་ཐུགས་རྒྱུད་གཏམ། །དྲི་མེད་གཞུང་ལུགས་མང་ཐོས་མདོ་རྒྱུད་གནད། །ལེགས་པར་བསམ་པས་ཁོང་ཆུད་རིམ་གཉིས་ཀྱི། །བསྒོམ་པ་མཐར་ཕྱིན་ལ་སོགས་དམ་པ་ཡི། །ཡོན་ཏན་དུ་མའི་བདག་ཉིད་ཆེན་པོར་གྱུར། །ས་སྐྱོང་སངས་རྒྱས་བསྟན་པའི་ལུགས་ཟུང་གི། །ཕྲིན་ལས་ཞབས་འདེགས་ལྷུར་ལེན་ཆོས་སྤྱོད་ཀྱི། །མཛད་པས་དུས་འདའ་ཁྱད་པར་གསོ་རིག་གི། །སྨན་སྦྱིན་སྒོ་ནས་སྐྱེ་དགུ་འཆི་བ་ལས། །མི་འཇིགས་སྐྱབས་སྦྱིན་གཙོར་མཛད་རིན་པོ་ཆེ། །རིལ་ནག་ཕྱག་ལེན་གནང་ནས་སྨན་སྦྱིན་དང་། །བསྟན་སྲུང་ཞང་བློན་བརྟེན་སྒྲུབ་ཁྱད་ཐོན་མཛད། །རྗེ་མཆོག་བསྟན་པ་གཤེགས་ནས་གདན་ས་ཡི། །ཁུར་བཞེས་གནང་དུས་ཡངས་པའི་རྒྱལ་ཁབ་ཀུན། །བདེ་སྐྱིད་བདེ་བའི་རྒྱུ་ལ་སྦྱོར་བ་ཡི། །ཐབས་ཚུལ་དུ་མས་ཡིད་བཞིན་དབང་རྒྱལ་བཞིན། །སྐྱེ་དགུའི་རེ་སྐོང་མི་བདག་མཆོག་ཏུ་གྱུར། །ཞེས་སོགས་གསུངས་པ་ལྟར། དཔོན་ཆེན་ཀླུ་འཕེལ་གྱི་རིགས་སྲས་ཨོ་རྒྱན་བཀྲ་ཤིས་དེ་ཉིད་ལ་སྲས་བཞི་འཁྲུངས་པའི་དང་པོ་སྡེ་དགེ་ཁྲི་ཆེན་བླ་མ་བསོད་ནམས་ཕུན་ཚོགས་ཞེས་ཡོངས་སུ་གྲགས་པ་ལས་དབང་གི་འཁོར་ལོས་སྒྱུར་བ་ཆེན་པོ་སྟེ། དེ་ནི་ཐོག་མ་ཉིད་ནས་སངས་རྒྱས་བཅོམ་ལྡན་འདས་ཀྱི་བསྟན་པ་ལ་བརྩམས་པ་བླ་ན་མེད་པའི་སྒོ་ནས་ཕན་འདོགས་པར་འདོད་པའི་དམ་བཅའི་ཁུར་ཆེན་པོ་བླངས་པ་ཞིག་སྟེ། ཤིན་ཏུ་མཐོ་བའི་རིགས་སུ་གྱུར་ཀྱང་དྲེགས་པ་དང་ཁེངས་པ་མི་མངའ་བར་རང་བཞིན་གྱིས་བཟང་ཞིང་། བདག་དང་གཞན་ལ་ཕན་པའི་བསམ་པ་དང་སྦྱོར་བ་ཕུན་སུམ་ཚོགས་པ་ལ་ཞུགས་པ། བཟོ་གསོ་སོགས་ཕྱི་རིག་པའི་གནས་ཕལ་ཆེ་བ་དག་ལ་མ་རྨོངས་པའི་མཁྱེན་རབ་དང་ལྡན་པ། ནང་གསང་སྔགས་གསར་རྙིང་གི་བསྟན་པ་ལ་ལྷག་པར་མོས་པས། མཁས་གྲུབ་ཡོངས་ཀྱི་གཙུག་གི་ནོར་བུ་ལྟར་གྱུར་པ་མཁན་ཆེན་སངས་རྒྱས་ཕུན་ཚོགས་སོགས་གསར་རྙིང་གི་བླ་མ་མང་པོ་ལས་ཟབ་ཆོས་ཀྱི་གདམས་པ་རྒྱ་མཚོ་ལྟ་བུའི་གསན་སྦྱངས་དཔྱིས་ཕྱིན་པར་མཛད་དེ། བསླབ་པ་རིན་པོ་ཆེ་རྣམ་པ་གསུམ་གྱི་འབྱོར་པས་ཐུགས་ཀྱི་བང་མཛོད་རྨ་མེད་པའི་རང་བཞིན་དུ་ཡོངས་སུ་བཀང་བར་གྱུར་ཅིང་། གཙུག་ལག་གཉིས་ཀ་ཟུང་དུ་འབྲེལ་བའི་ཕྲིན་ལས་ཀྱི་དབང་ཕྱུག་དམ་པའི་གོ་འཕང་ཉིད་དུ་མངའ་བསྒྱུར་བའི་ཕྱིར། སྡེ་དགེའི་གདན་རབས་ལྔ་པའི་ཁྲི་འཕང་མཐོན་པོ་ལ་ཞབས་ཀྱི་པདྨདམར་པོ་རྣམ་པར་བཀོད་དེ་ཆོས་དང་སྲིད་པའི་གཞུང་ལུགས་ཐམས་ཅད་སྨྲ་བའི་རྒྱལ་པོར་གྱུར་ཏོ། །དེ་ནས་བརྩམས་ཏེ་ཆོས་དང་མཐུན་པའི་ཕྲིན་ལས་ཀྱི་འཁོར་ལོ་སྔོན་དུ་རྒྱུ་བས། ཡངས་པའི་རྒྱལ་ཁམས་ཀྱི་འགྲོ་བ་ཕལ་ཆེ་བ་གཞལ་དུ་མེད་པའི་མཁྱེན་རབ་དང་བརྩེ་བའི་གདུགས་དཀར་གྱི་གྲིབ་མ་བསིལ་པོའི་ར་བར་ལེགས་པར་བཅུག་ནས་རྣམ་པར་འཚེ་བ་མེད་པའི་བདེ་བ་ལ་ངལ་བསོ་བའི་སྐལ་བ་བཟང་པོ་ཅི་ཡང་བྱིན་ནོ། །གཞན་ཡང་བསགས་པའི་དངོས་པོ་གྱ་ནོམ་པ་དག་ཀྱང་བོད་ཁམས་ཀྱི་ཆོས་སྡེ་རིས་སུ་མེད་པའི་དགེ་འདུན་རྣམས་ལ་མཆོད་ཅིང་རྗེད་པར་བྱེད་པ་དང་། བླ་མ་སངས་རྒྱས་བསྟན་པས་ལྷ་ཁང་བསམ་གྲུབ་མཐོང་གྲོལ་ཆེན་མོ་ཉམས་གསོ་རྒྱས་སྤྲོས་གནང་བའི་འཇུག་སྐྱོང་ནས་ལོགས་བྲིས་ཀྱི་བཀོད་པ་ངོ་མཚར་རྨད་དུ་བྱུང་བ་སོགས་མཛད་སྒོ་མཐའ་དག་གྲུབ་པར་མཛད། ཁྱད་པར་དུ་རྟེན་གྱི་གཙོ་བོ་ཐུབ་ཆེན་འཛམ་གླིང་རྒྱན་གཅིག་གམ། ཐུབ་སྐུ་རྒྱབ་ལུང་མ་ཞེས་གྲགས་པ་ལྷ་ལྡན་ཇོ་བོ་ཤཱཀྱ་མུ་ནི་དང་སྐུ་རྒྱུ་རིན་ཆེན་གཅིག་ལས་གྲུབ་པ། དང་པོར་ཧོར་གྱི་རྒྱལ་ཁབ་ཏུ་བཞུགས་པ་ཕྱིས་རིམ་གྱིས་འབྲི་གུང་གཙུག་ལག་ཁང་དང་། དེ་ནས་ཚངས་པ་བཞིར་གྲགས་པའི་ཡ་གྱལ་གླིང་ཨཱ་ཡུ་ཤག་རྒྱལ་ཞེས་པས་འཛིང་རྣམ་རྒྱལ་དགོན་དུ་གདན་དྲངས་པ་དེ་ཉིད་བླ་ཆེན་འདིས་ལྷུན་གྲུབ་སྟེང་འདིར་སྤྱན་དྲངས་ནས། གཙང་ཁང་དབུས་མར་བཞུགས་སུ་གསོལ་ནས་འཁོར་གནས་བརྟན་བཅུ་དྲུག་གིས་བསྐོར་བ་། གཙང་ཁང་གཡོན་པར་བྱམས་པ་ཐོག་ཚད་གསུམ་པར་ཉེ་སྲས་ཀྱིས་བསྐོར་བ། གཙང་ཁང་གཡས་པར་ལི་ཐང་ཐུབ་སྐུ་ལ་ཨོ་རྒྱན་སངས་རྒྱས་གཉིས་པ་གུ་རུ་མཚན་བརྒྱད་ཀྱི་སྐུ་བཞེངས་པས་བསྐོར་བ། བླ་མ་དང་རྒྱུད་སྡེ་བཞིའི་ལྷ་ཆོས་སྲུང་ནོར་ལྷ་སོགས་ཀྱི་སྐུ་གཟུགས་ལོགས་བྲིས་སོགས་རྟེན་དང་བརྟེན་པར་བཅས་ལེགས་བསྒྲུབས་གནང་ནས། མཁྱེན་བརྩེ་ནུས་པའི་དབང་ཕྱུག་འཇམ་དབྱངས་དོན་གྲུབ་རྒྱལ་མཚན་སུམ་ལྡན་འདུས་པ་རྒྱ་མཚོའི་ཚོགས་དང་བཅས་པས། ཀྱེ་རྡོ་རྗེའི་དཀྱིལ་འཁོར་དང་འབྲེལ་བའི་རབ་ཏུ་གནས་པའི་ཆོ་གའི་སྒོ་ནས་གསང་གསུམ་ཡེ་ཤེས་འཁོར་ལོ་རྟེན་དང་དབྱེར་མེད་དུ་བྱིན་གྱིས་བརླབས་པས་དགེ་ལེགས་ཀྱི་མཚན་མ་ལྷུན་གྱིས་གྲུབ། གངས་ལྗོངས་འགྲོ་བའི་མགོན་པོ་རྒྱལ་དབང་ཐམས་ཅད་མཁྱེན་པ་བདུན་པ། མདོ་སྨད་ལི་ཐང་ཕྱོགས་སུ་འཁྲུངས་པའི་ཚེ་སོག་པོ་ལྷ་བཟང་གིས་རང་གི་བུ་རྒྱལ་དབང་སྐལ་བཟང་རྒྱ་མཚོ་ཡིན་རྒྱུ་བྱས་ནས་མིང་ཡེ་ཤེས་རྒྱ་མཚོར་བཏགས་ཏེ་གསེར་ཁྲི་ལ་མངའ་གསོལ་བྱས། དེའི་ཚེ་རྒྱལ་མཆོག་དྲུག་པ་ལི་ཐང་དུ་འཁྲུངས་པ་ཐོས་ནས། ལྷ་བཟང་གིས་དེ་བཀྲོང་བར་ཨེར་ཁེ་ཇུ་ནང་དཔོན་གཡོག་མང་པོ་བཏང་བ། སྡེ་དགེ་བླ་ཆེན་གྱིས་གསན་ཏེ་གཉེར་ཆེན་འབིར་ལུག་དཔུང་དང་བཅས་པ་བཏང་ནས། རྒྱལ་དབང་བདུན་པ་དཔོན་གཡོག་ལི་ཐང་ནས་སྡེ་དགེའི་རྒྱལ་ཁབ་ཏུ་རབ་བྱུང་བཅུ་གཉིས་པའི་ཤིང་རྟ་ཕྱི་ལོ༡༧༡༤་ལོར་སྤྱན་དྲངས་ཏེ་རྫོང་སར་དགོན་དང་། ལྕགས་ར་དགོན་སོགས་ཞབས་པད་འཁོད། བསྙེན་བཀུར་ཞབས་ཏོག་ཡང་དག་པར་ཞུས་ནས་དཔལ་ལྷ་སའི་ཆོས་སྲིད་ཀྱི་གསེར་ཁྲི་ལ་ཞབས་པད་བཀོད་ཐུབ་པར་མཛད་པས། ཏཱ་ལའི་བདུན་པའི་རྣམ་ཐར་ལས། ཧོར་ཏྲེ་བོ་དཔོན་དར་ཧན་ནོ་ཡོན་དང་། སྡེ་དགེ་ནས་གདན་འདྲེན་གྱི་ཕོ་ཉ་བ་བཅས་སྔ་ཕྱིར་བྱུང་བར་སྡེ་དགེའི་མངའ་ཁུལ་བརྒྱུད་ཧོར་ཟླ་གསུམ་པའི་ཚེས་བཅུ་བཞིར་རྫོང་གསར་དུ་ཕེབས། སྡེ་དགེ་དཔོན་བསྟན་པ་ཚེ་རིང་གིས་ཀྱང་ཕེབས་བསུའི་བཀོད་པ་མང་པོ་དང་བཅས་ལྷ་ལུང་ཁུད་དུ་སྤྱན་དྲངས། བསྙེན་བཀུར་བ་དང་། འབུལ་བ་གཟབ་རྒྱས་ཞུས། སྡེ་དགེ་བླ་མ་གཙོས་སེར་སྐྱ་སྟོང་ཕྲག་བརྒལ་བ་བཅས་རིམ་གྱིས་ཕྱག་བཏེག །དེ་ནས་རིམ་གྱིས་ཕེབས་ཏེ་རྨ་ཆེན་སྤོམ་ར་སྔར་གསོལ་ས་དེའི་འོག་ཙམ་དུ་ལ་བཙས་གསར་དུ་བརྩིགས་ཤིང་། གསོལ་མཆོད་སོགས་རྒྱས་པར་གནང་། ཞེས་གསུངས། གཞུང་ས་དགའ་ལྡན་ཕོ་བྲང་དང་འབྲེལ་ཟབ་ཆེ་བ་འདི་ནས་བྱུང་། རྒྱལ་དབང་བདུན་པའི་བཀའ་ཤོག་ཤེལ་བམ་ཆེན་མོ་གནང་བ་ལའང་། སྡེ་དགེ་བླ་དཔོན་པ་འདི་ངེད་ན་ཚོད་ཆུང་དུས་བྱས་པ་ཆེ་བས་ཁོང་རང་ཚང་མ་ཚད་སྡེ་དགེའི་མི་སེར་ཡིན་ངེས་བྱུང་ཕྱིན་ཇ་ཁྲལ་གཙང་ཆག་དགོས་ཚུལ་སོགས་བདག་རྐྱེན་ཆེན་པོ་གནང་བ་དང་། ཁམས་དང་། དབུས། གཙང་གསུམ་ལ་འཐོར་ཡོད་པའི་སྡེ་དགེའི་མི་སེར་རྣམས་རང་ཡུལ་དུ་ཕྱིར་བསྡུ་བྱེད་ཆོག་པའི་དབང་ཆ་སྤྲད་ཡོད། དེ་ལྟར་ཡང་རྒྱལ་རབས་ཚིགས་བཅད་མ་ལས། གཞན་ཡང་འདི་སྐབས་གངས་ལྗོངས་སྐྱེ་རྒུའི་སྐྱབས། །རྒྱལ་དབང་ཐམས་ཅད་མཁྱེན་པ་བདུན་པ་ཆེ། །མདོ་སྨད་ལི་ཐང་ཕྱོགས་སུ་སྐུ་འཁྲུངས་ཚེ། །སོག་པོ་ལྷ་བཟང་ངན་བློའི་སྒྱུ་ཐབས་ཀྱིས། །བར་གཅོད་འོ་རྒྱལ་བྱུང་ཚེ་རྗེ་འདི་ཡིས། །བློ་གྲོས་ཐབས་ཀྱིས་རྒྱལ་མཆོག་ཐམས་ཅད་མཁྱེན། །ལྗོངས་འདིར་སྤྱན་དྲངས་དབུ་འདོན་ཡང་དག་པར། །ཞུས་པ་ལ་བརྟེན་ཆོས་འཁོར་དཔལ་ལྷ་སའི། །གྲུ་འཛིན་གཞལ་མེད་ཁང་གི་གསེར་ཁྲི་ལ། །ཞབས་པད་བཀོད་ཐུབ་ས་གསུམ་སྐྱེ་རྒུ་ཡི། །གཙུག་རྒྱན་རིས་བྲལ་བསྟན་འགྲོའི་བདག་པོ་རུ། །གྱུར་པའི་ཞབས་འདེགས་ཞུས་པས་རྒྱལ་བའི་དབང་། །མཆོག་ཏུ་དགེས་པས་བཀའ་ཤོག་ཤེལ་བམ་ཆེ། །ལེགས་བསྩལ་གོང་གི་གསུང་ལས་སྡེ་དགེ་ཡི། །བླ་དཔོན་སྐུ་ན་ཕྲ་སྐབས་དྲིན་ཆེ་ཞེས། །གསུངས་ཞིང་དེ་ནས་བརྩམས་ཏེ་གངས་ལྗོངས་ཀྱི། །བསྟན་པའི་བདག་པོ་གོང་ས་རིམ་བྱོན་དང་། །མཆོད་ཡོན་འབྲེལ་ཟབ་སྤྱན་སྐྱོང་ཟླ་མེད་ཀྱི། །རྒྱུན་ཚུགས་བླ་ཆེན་འདི་ཡི་བཀའ་དྲིན་ནོ། །ཞེས་སོ། །བྱེ་བྲག་ཏུ་མངའ་འོག་ཏུ་གཏོགས་པའི་དགོན་སྡེ་རྣམས་སུ་གཙུག་ལག་ཁང་སྔར་ཡོད་ཉམས་པ་རྣམས་ཀྱི་ཉམས་གསོ་དང་། མེད་པ་རྣམས་གསར་དུ་བཞེངས་པ། བསྟན་པའི་རྩ་ལག་དགེ་སློང་གི་དགེ་འདུན་གྲངས་མེད་པ་ལ་བསྙེན་བཀུར་སྟོབ་པ། དེ་དག་གི་བཅའ་ཁྲིམས་དང་ཀུན་སྤྱོད་ཀྱི་སྒྲིག་ལམ་གོང་མ་རྣམས་ཀྱིས་བཞག་པའི་རྒྱུན་བཟང་པོ་སྐྱོང་བ། གྲྭ་ས་ཆེན་པོ་རྣམས་ལ་ཇི་ལྟར་ཡོངས་སུ་དར་བའི་ལུགས་བཟང་པོ་སྔོན་ཆད་འདིར་མ་བྱུང་བ་རྣམས་ཀྱང་གསར་བསྒྲུབས་ཀྱི་སྲོལ་བཏོད་པ་སོགས་སྟོབས་བཅུ་མངའ་བའི་བསྟན་པ་རིན་པོ་ཆེ་རིང་འཚོར་འགྱུར་བའི་བཀའ་དྲིན་ཟླ་མེད་པ་མཛད་དོ། ཨོ་རྒྱན་བཀྲ་ཤིས་ཀྱི་སྲས་གཉིས་པ་དབང་ཆེན་མགོན་པོས་ཁྱིམ་ཐབས་བསྐྱངས་ཤིང་། གསུམ་པ་བླ་མ་སངས་རྒྱས་དཔལ་བཟང་པོ་སྟེ། དེ་ཉིད་ལས། བླ་མ་སངས་རྒྱས་དཔལ་བཟང་ཞེས་པ་ཡིས། །རི་ཁྲོད་སྨིན་གྲོལ་གླིང་དང་དབོན་སྟོད་ཀྱི། །གདན་ས་དེ་གཉིས་སོགས་ལ་ངོར་ལུགས་ཀྱི། །དཀྱིལ་འཁོར་སྒྲུབ་མཆོད་གཞུང་དོན་དུས་མཆོད་རྒྱུན། །མང་བཞག་བླ་མ་གོང་མའི་བཀའ་འབུམ་དང་། །རྣམ་ཐར་གླེགས་བམ་མང་བསྐྲུན་མཆོད་རྒྱུན་བཙུགས། །བྱང་ཆུབ་སེམས་དཔའ་བུདྡྷལཀྵི་པ།༼སངས་རྒྱས་ཕུན་ཚོགས།༽ །བོད་ཆེན་བསོད་ནམས་ཞིང་དུ་སྤྱན་འདྲེན་པའི། །འགན་བཞེས་ཚད་མེད་བཀའ་དྲིན་སྐྱོང་ཞེས་ཐོས། ཞེས་པ་ལྟར། འདིས་རྣམ་པ་ཐམས་ཅད་དུ་བསྒྲུབ་པར་བྱ་བའི་གཙོ་བོ་ནི། སྤྱིར་བདེ་བར་གཤེགས་པའི་བསྟན་པ་ཐམས་ཅད་དང་། སྒོས་སུ་རྗེ་བཙུན་ས་སྐྱ་པ་ཞེས་ཁམས་གསུམ་ཆོས་ཀྱི་སྒྲོན་མེ་ཆེན་པོར་གྱུར་པ་དེ་དང་། རྒྱལ་བ་གཉིས་པ་རྗེ་བཙུན་ཀུན་དགའ་བཟང་པོ་ཡབ་སྲས་བརྒྱུད་པ་དང་བཅས་པའི་ལུགས་བཟང་རྩོད་པ་ཀུན་ལས་གྲོལ་བ་གང་དེ། གངས་ཀྱི་ར་བས་མཛེས་པར་བསྐོར་བའི་ལྗོངས་འདིར་ཇི་ལྟར་སྤྲིན་སྔོན་དུས་ཀྱི་ཆུ་གཏེར་ཆེན་པོ་བཞིན་དུ་མི་ཉམས་ཤིང་གོང་ནས་གོང་དུ་སྤེལ་བའི་ཐུགས་བསྐྱེད་ནམ་ཡང་བྲི་བ་མེད་པ་ནས། གྲུབ་པའི་དབང་པོའི་གདན་ས་རི་ཁྲོད་སྨིན་གྲོལ་གླིང་དང་། དབོན་པོ་སྟོད་ཀྱི་གདན་ས་གཉིས་ཆར་སྐྱོང་བར་མཛད་དོ། གདན་ས་དེ་གཉིས་དང་དགོན་སྡེ་གཞན་དང་གཞན་དག་ལ་ཡང་ངོར་ལུགས་དཀྱིལ་འཁོར་༼གཉིས་མེད་ཀྱི་རྒྱུད་ཀྱེ་རྡོར་མན་ངག་ལུགས། གུར། སཾཊ། མ་རྒྱུད་བདེ་མཆོག་ལཱུ་ནག་གཉིས། ཕ་རྒྱུད་གསང་འདུས་མི་བསྐྱོད་པ་དང་། འཇམ་རྡོར་༽བདུན་དུ་གྲགས་པ་ལ་སོགས་པའི་དཀྱིལ་འཁོར་གྱི་རྣམ་པ་མང་པོའི་སྒྲུབ་མཆོད་དང་གཞུང་འདོན་པའི་དུས་མཆོད་ཀྱི་རྒྱུན་མང་པོ་གསར་དུ་བཞག་སྟེ། ངུར་སྨྲིག་འཆང་བའི་དགེ་འདུན་བགྲང་ལས་འདས་པ་ལ་བསྙེན་བཀུར་རྒྱ་ཆེན་པོ་སྦྱོར་བའི་སྲོལ་བཏོད་དོ། རྗེ་བཙུན་ཨེ་ཝྂ་པ་ཆེན་པོ་བརྒྱུད་པ་དང་བཅས་པ་འགའ་ཞིག་གི་བཀའ་འབུམ་དང་རྣམ་པར་ཐར་པ་ལ་སོགས་པའི་གླེགས་བམ་དག་ཅིང་དངོས་བཟང་བ་མང་པོ་བཞེངས་ཏེ། དེ་དག་གི་མདུན་དུ་ཡང་སྤོས་དང་མར་མེ་སོགས་ཉེ་བར་སྤྱོད་པ་རྒྱ་དཔངས་མི་ཆུང་བའི་རྒྱུན་མཆོད་ཀྱི་རྒྱུན་བཙུགས། ཁྱད་པར་ཕྱོགས་བཅུའི་རྒྱལ་བ་ཐམས་ཅད་ཀྱི་ཡོན་ཏན་དང་ཕྲིན་ལས་མངའ་བ་འཇམ་དབྱངས་སངས་རྒྱས་ཕུན་ཚོགས་པ་དེ་ཉིད་བོད་ཆེན་གྱི་ལྗོངས་འདིར་སྤྱན་འདྲེན་པའི་སླད་དུ། འཕགས་པའི་ཡུལ་གྱི་པཎ་ཆེན་ནཱ་རོ་ཏ་པའི་རྣམ་པར་ཐར་པའི་རྗེས་སུ་འགྲོ་བའི་དཀའ་བ་དཔག་ཏུ་མེད་པ་དང་དུ་བླངས་ཏེ། ལྗོངས་འདིའི་འགྲོ་བའི་ལེགས་བྱས་ཀྱི་མགྲོན་དུ་སྤྱན་དྲངས་ནས། འཆད་རྩོད་རྩོམ་པའི་ཕྲིན་ལས་གཞལ་དུ་མེད་པས། བསྟན་པ་མཐའ་དག་ནམ་ལངས་པ་ལ་ཉི་མ་ཤར་བ་ལྟར་མཛད་པའང་འདི་པ་སྐུ་མཆེད་ཀྱི་དྲིན་ཁོ་ན་ལས་བྱུང་བ་ཡིན་ནོ། །བསྟན་འཛིན་གྱི་སྐྱེས་བུ་ཆེན་པོ་དེ་སོགས་ཡོངས་རྫོགས་བསྟན་པའི་མངའ་བདག་མང་པོ་གཙུག་ན་མཆོད་ཅིང་། དེ་དག་ལས་འོངས་པའི་གདམས་པ་ཟབ་པ་དང་རྒྱ་ཆེ་བ་བསམ་གྱིས་མི་ཁྱབ་པ་རྣམས་ཐུགས་ཉམས་སུ་བཞེས་ཏེ། མདོར་ན་མཁས་བཙུན་གྲུབ་པའི་ཡོན་ཏན་ཟད་མི་ཤེས་པའི་ངང་ཚུལ་བཟང་པོ་ཡོངས་སུ་འཛིན་པ་ཉིད་དོ། ཡང་དེ་ཉིད་ལས། དེའི་གཅུང་གསུམ་པ་ཀུན་དགའ་རབ་བརྟན་ཞེས། །བློ་ལྡན་དགའ་བ་བསྐྱེད་ནུས་མཁས་ཚུལ་ཅན། །དབོན་སྟོད་གདན་སར་བཞུགས་ཤིང་ས་སྐྱ་པ། །གོང་མ་ལྔ་ཡི་བཀའ་འབུམ་གསར་བཞེངས་སོགས། །རྣམ་དཀར་ཕྲིན་ལས་རྒྱ་ཆེར་སྐྱོང་ཞེས་གྲགས། །ཞེས་པ་ལྟར། གཅུང་གསུམ་པ་སྲས་བཞི་པ་བྱམས་པ་ཀུན་དགའ་རབ་བརྟན་པ་སྟེ། འདི་ནི་སྐྱེས་སྦྱངས་སྟོབས་ཀྱི་རྣམ་པར་འབྱེད་པའི་མིག་དཀྱུས་རིང་པོས། ཕྱི་ནང་གི་གྲུབ་པའི་གཞུང་ལུགས་རབ་འབྱམས་ཐམས་ཅད་དོག་པ་མེད་པའི་ཚུལ་གྱིས་ཆུད་པས། གྲུབ་མཐའ་སོ་སོའི་ལྟ་གྲུབ་ཀྱི་ཁྱད་པར་རྣམ་པར་དབྱེ་བ་ལ་བསྙེངས་པ་མི་མངའ་བའི་གདེངས་ཐོབ་སྟེ། དབོན་སྟོད་ཀྱི་གདན་སར་བཞུགས་ཏེ་བསྟན་སྲིད་ཟུང་དུ་འབྲེལ་བའི་ཕྲིན་ལས་དཔག་ཏུ་མེད་པས་བསྟན་པ་དང་སེམས་ཅན་གྱི་དོན་རྒྱ་ཆེན་པོ་བསྒྲུབས་ཤིང་། རྒྱུ་དང་དཀའ་ཚེགས་ཀྱི་གཏིང་མཐའ་གཞལ་དུ་མེད་པས་དཔལ་ས་སྐྱའི་རྗེ་བཙུན་གོང་མ་ལྔའི་བཀའ་འབུམ་སྐྱ་ཆོས་པུསྟི་ཀ་བཅུ་དྲུག་ན་བཟའ་དང་གླེགས་ཤིང་གླེགས་ཐག་དང་བཅས་པ་སྤུས་བཟང་བར་བསྒྲུབས་པ། དཀོན་མཆོག་གསུམ་ལ་མཆོད་པ་ཕུལ་བ། དགེ་འདུན་ལ་བསྙེན་བཀུར་བགྱིས་པ་སོགས་རྣམ་པར་དཀར་བའི་ལེགས་མཛད་ཀྱི་ཕུང་པོ་གང་ལ་བློ་ལྡན་རྣམས་ཀྱི་བསྔགས་པར་བརྗོད་པའི་ཚིག་གི་གླིང་བུ་ཅི་ཡང་བསྒྱུར་བའི་གནས་སོ། །དཔོན་དབང་ཆེན་མགོན་པོ་ལ་སྲས་གཉིས་འཁྲུངས་པའི་སྔ་མ་མགོན་པོ་ཚེ་རིང་གཞོན་ནུ་ནས་སྐུ་གཤེགས་སོ། །ཡང་དེ་ཉིད་ལས། མདོར་ན་གོང་དུ་སྨོས་པའི་སྲིད་སྐྱོང་པ། །དེ་དག་མི་རྒྱུད་ལྷ་ལས་ཆད་པ་ཡི། །རང་རྟགས་མཐོ་རིས་ཡོན་ཏན་བདུན་དང་ལྡན། །མི་ཡི་ཆོས་ལུགས་གཙང་མ་བཅུ་དྲུག་ལ། །རྒྱུན་སྤྱོད་བསྔགས་འོས་ཤ་སྟག་བྱུང་ཞེས་ཐོས། །ཞེས་གསུངས་སོ། །རྒྱལ་རབས་བཅུ་གཉིས་པ་ཁྲི་རབས་དྲུག་པ་དཔོན་དབང་ཆེན་མགོན་པོའི་སྲས་ཕྱི་མ་ཆོས་རྒྱལ་བསྟན་པ་ཚེ་རིང་ནི། འཇམ་དཔལ་རྩ་རྒྱུད་ལས། ཆུ་བོ་གསེར་ལྡན་འགྲམ་ངོགས་སུ། །རྒྱལ་པོ་བྱིས་པའི་མིང་ཅན་འབྱུང་། །ཞེས་རྡོ་རྗེའི་ལུང་གིས་ཟིན་པའི་སྐྱེས་བུ་ཆེན་པོ། སྟོབས་ཀྱི་འཁོར་ལོས་སྒྱུར་བའི་ཆོས་ལྡན་གྱི་རྒྱལ་པོ་བསྟན་པ་ཚེ་རིང་ཞེས་ཡོངས་སུ་གྲགས་པ་སྟེ། དེ་ཉིད་ལས། མི་བདག་དབང་ཆེན་མགོན་པོའི་སྲས་གཉིས་པ། །ས་སྐྱོང་མི་ཡི་རྗེ་བོ་བསྟན་སྦྱིན་མཆོག །བསྟན་འཛིན་སྔགས་འཆང་རྡོ་རྗེ་འཛིན་པ་ཆེ། །བསྟན་པ་ཚེ་རིང་སྙིགས་དུས་བསྟན་འགྲོ་ཡི། །ཕན་བདེའི་འབྱུང་གནས་རྒྱལ་བའི་རྣམ་སྤྲུལ་དངོས། །བསོད་ནམས་མངའ་ཐང་གྲུབ་ལ་ང་ལས་ནུ། །དཔལ་འབྱོར་ལོངས་སྤྱོད་རྒྱས་ལ་རྣམ་ཐོས་སྲས། །བསྟན་དང་འགྲོ་བའི་མགོན་མཛད་སྲོང་བཙན་རྗེ། །གཞོན་ནུའི་མཚན་ལྡན་རྒྱལ་མཆོག་སྐྱེ་དགུའི་མགོན། །དགེ་ཁྲིམས་ཐབས་མཁས་སྤྱོད་པ་མེ་ལོང་གདོང་། །དགེ་བཅུ་རྟེན་གསུམ་བཞེངས་ལ་ཁྲི་སྲོང་དངོས། །མཆོག་གསུམ་སྲི་ཞུ་མགོན་མེད་ཟས་སྦྱིན་ཉིད། །ཆོས་རྒྱལ་མི་ཡི་བསམ་འཕེལ་རིན་པོ་ཆེ། །གཏོང་ཕོད་སྒོ་འཕར་འབྱེད་ལ་ཐབས་ཅད་སྒྲོལ། །བསྟན་ལ་ལྷག་བསམ་ཐུགས་མངའ་ཡེ་ཤེས་འོད། །ཟབ་བཞེས་ཐུགས་དམ་བརྩོན་ལ་ཚུལ་ཁྲིམས་འབར། །སྲིད་ཞིའི་ཡོན་ཏན་བདག་ཉིད་བསྟན་པའི་མཚན། །ཞེས་སོགས་གསུངས་ཏེ། དེ་ནི་སྔ་ན་མེད་པའི་ལེགས་བྱས་ཀྱི་གཞི་ཆེན་པོར་གྱུར་པའི་ཆོས་ཀྱི་སྦྱིན་པའི་མ་མོ་བཀའ་འགྱུར་རོ་ཅོག་འདི་ཉིད་ཀྱི་དབུ་འཛུགས་པའི་བདག་པོའི་རྐྱེན་བྱེད་པ་པོ་སྟེ། ངེས་པར་ས་ལ་གནས་པའི་བྱང་ཆུབ་སེམས་དཔའ་ཉིད་མིའི་བདག་པོའི་མིག་འཕྲུལ་གྱི་རྫུ་ལ་ཞུགས་པ་ཞིག་སྟེ། ཐོག་མ་ཉིད་ནས་འཇིག་རྟེན་ཐམས་ཅད་ལ་ཡིད་བརྩེ་བའི་རླན་གྱིས་བརླན་པ། སྡུག་བསྔལ་གྱི་ཁུར་ཆེན་པོ་དག་གིས་ཡོངས་སུ་གཟིར་བའི་སྐྱེ་བོ་མགོན་དང་བྲལ་བ། སྐྱབས་དང་བྲལ་བ། དཔུང་གཉེན་དང་བྲལ་བ་དག་མཐོང་ན། སྙིང་རྗེའི་ཕྱག་རིང་ཡངས་པར་བརྐྱང་སྟེ། འཇིགས་པ་དང་། ཉམ་ང་བ་གང་དང་གང་ཡིན་པ་དེ་ལས་བསྐྱབ་པ་ལ་སྤྲོ་བ་མཆོག་ཏུ་བརྟས་པ། སྔོན་གྱི་བསོད་ནམས་ཀྱི་མཐུ་ཆེན་པོ་ཐོབ་པ་ལ། སླར་ཡང་དཀོན་མཆོག་གསུམ་ལ་མཆོག་ཏུ་དད་པས། ཡོན་ཏན་གྱི་ཆོས་གང་དག་ཕྱིར་ཕྱིར་རབ་ཏུ་བརྟན་པར་བྱས་པ། ཕྱོགས་ཀྱི་རྒྱལ་ཕྲན་ཐམས་ཅད་ཀྱང་ཕྱག་འཚལ་ཞིང་རང་གི་ངང་གིས་བཏུད་པར་བྱས་པ། དེ་ལྟ་ནའང་དགེ་བའི་སེམས་དང་ཆོས་ལས་འབྱུང་བའི་སྤྱོད་པའི་ཆུ་ཀླུང་བསིལ་པོར་འབེབས་པ་ལ་རབ་ཏུ་མཁས་པས། ང་རྒྱལ་གྱི་མེ་དཔུང་ཡོངས་སུ་བཅིལ་བ། ཐུགས་དུལ་བར་གྱུར་པ། གཏོང་བ་ལ་མཆོག་ཏུ་དཔའ་བ། ཡིད་གཞུངས་ཤིང་མང་དུ་ཐོས་པ། ཤེས་རབ་ཀྱི་ནོར་དང་ལྡན་པ། ཡི་གེ གྲངས། རྩིས། མིག་འཕྲུལ། སྔོན་རབས། སྙན་དངགས། ཟློས་གར། རོལ་མོའི་བྱེ་བྲག །འཕོང་། སྒྱུ་རྩལ་གྱི་རིག་པ་ཐམས་ཅད་ལེགས་པར་སྦྱངས་པ། ཁྱད་པར་གསོ་བ་རིག་པའི་གཞུང་ལུགས་སྨན་འཚོ་བའི་མདོ། ཡན་ལག་བརྒྱད་པ། དེའི་མན་ངག་རྒྱུད་བཞི་འགྲེལ་པ་དང་བཅས་པ་ལ་སྦྱངས་པའི་ཕ་རོལ་ཏུ་སོན་ནས། མཆོག་དམན་གྱི་འགྲོ་བ་ཐམས་ཅད་དུས་མ་ཡིན་པར་འཆི་བ་དང་ནད་ཀྱི་ཟུག་རྔུས་གདུངས་པར་གྱུར་པའི་འཇིགས་པ་ལས་སྐྱོབ་ཅིང་། གནས་སྐབས་ཀྱི་བདེ་བ་དང་འཆི་བ་མེད་པའི་གོ་འཕང་སྦྱིན་པ་ལ་མ་རྨོངས་པ་ནི་སྨན་པའི་རྒྱལ་པོ་གཉིས་པ་ལྟ་བུར་གྱུར་ཏེ་སེམས་ཅན་ཐམས་ཅད་ཀྱི་ཉེར་འཚོའི་གཞི་ཆེན་པོ་ཉིད་དོ། དེ་ལྟར་ཡང་སྐྱེས་པ་རབས་ཀྱི་རྒྱུད་ལས། རིག་བྱེད་ཤེས་ལ་དེ་ནི་ཚངས་པ་བཞིན། །རྒྱལ་པོ་རྣམས་ཀྱིས་བཀུར་བ་རྒྱལ་པོ་བཞིན། །སྐྱེ་དགུ་རྣམས་ལ་བརྒྱ་བྱིན་མངོན་སུམ་བཞིན། །ཤེས་འདོད་རྣམས་ལ་དྲན་སྤྱོད་ཕ་དང་འདྲ། །ཞེས་པ་ལྟར་སྐྱེ་བོ་ཐམས་ཅད་ལ་ཕ་དང་འདྲ་བར་ཐབས་ཀྱི་བྱེ་བྲག་ཅི་རིགས་པའི་སྒོ་ནས་ཕན་འདོགས་པ་ཞིག་གོ །དེར་མ་ཟད་ཚེ་རབས་དུ་མ་ནས་བསོད་ནམས་ཀྱི་ཚོགས་དཔག་ཏུ་མེད་པ་མངོན་པར་འདུ་བྱ་བ་ལ་ཀུན་ནས་ཡོངས་སུ་གོམས་པའི་བག་ཆགས་བཟང་པོ་སད་པས། རྒྱལ་སྲིད་ཀྱི་ཁྲི་ལ་མ་བཞུགས་པའི་དུས་ནས། ཇི་ལྟར་མངའ་བའི་བདོག་པ་རྣམས་ལ་ཕོངས་སེམས་མེད་པར་བླ་མ་དང་དཀོན་མཆོག་མཆོད་པའི་ཆེད་དུ་གཏོང་བ། དེ་བཞིན་གཤེགས་པ་སྲས་དང་བཅས་པའི་སྐུ་གསུང་ཐུགས་ཀྱི་རྟེན་གསུམ་བཞེངས་པ་སོགས་རྣམ་པར་དཀར་བའི་ལེགས་བྱས་ཀྱི་རྒྱུན་ཁོ་ནའི་ཆེད་དུ་གཏོང་ཞིང་། ཇི་ལྟར་བཞེང་བར་བྱ་བའི་རྟེན་གསུམ་རྣམས་ཀྱང་བློ་དམན་ཀུན་གྱིས་ཡིད་ལ་མི་ཤོང་ཞིང་། སྔོན་གྱི་སྐྱེས་བུ་བློ་སྟོབས་དང་ལྡན་པ་མང་པོས་ཀྱང་བརྩམ་པར་མ་ནུས་པའི་ལས་གང་ཡིན་པ་དེར་འཇུག་པ་ལ་མི་སྤོབས་པ་མེད་པ་ཞིག་སྟེ། དཔེར་ན་རྒྱལ་བའི་བཀའ་འགྱུར་རོ་འཚལ་གྱི་ཆོས་སྦྱིན་པར་གྱི་བྱ་བ་མཐར་ཕྱིན་པ་དང་། བསྟན་བཅོས་འགྱུར་རོ་འཚལ་གྱི་ཆོས་སྦྱིན་གྱི་ཕྱི་མོ་བསྒྲུབ་པའི་མགོ་བརྩམས་པ་འདི་ལྟ་བུའི་རང་བཞིན་ཁོ་ན་ལས། སྐྱེ་བོ་ཕལ་གྱི་བསམ་སྦྱོར་དང་རྗེས་སུ་མཐུན་པར་འདི་དང་འདི་ལྟ་བུའི་འབྱོར་པ་དག་ནི་རེ་ཞིག་བསགས་ན་བདག་གི་དཀོར་ཁང་མངོན་པར་གཏམས་པའི་རྒྱུར་འགྱུར་རོ་སྙམ་པ་དང་། བདག་གིས་དཔལ་འབྱོར་འདི་དང་འདི་ཞེས་བྱ་བ་རྣམ་པར་འཕེལ་བར་བྱས་ཏེ། དགྲ་ཟླར་གྱུར་པ་ཐམས་ཅད་ཀྱང་ཟིལ་གྱིས་གནོན་པའི་མཐུ་དང་ལྡན་པར་བྱའོ་སྙམ་པ་ལ་སོགས་པའི་བློ་ངན་ཐམས་ཅད་རིང་དུ་སྤངས་པ། སྒོ་གསུམ་དགེ་བའི་རྩ་བ་ཐམས་ཅད་ལ་གཅིག་ཏུ་འདུན་པའི་ཡ་རབས་དང་དམ་པའི་ངང་ཚུལ་བཟང་པོ་ལས་གཞར་ཡང་མི་འགྱུར་བས། འགྲོ་བ་ཐམས་ཅད་ཀྱི་ཡིད་ཀྱི་དབང་པོ་ཀུན་ནས་འཛིན་ནུས་པར་གྱུར་ཏོ། །ནམ་ཞིག་ན་ཆོས་དང་སྲིད་པའི་གཙུག་ལག་ཟུང་གི་ཕྲིན་ལས་ཀྱི་འཁོར་ལོ་མུ་མེད་ཕྱོགས་ཀྱི་ཕ་རོལ་དག་ཏུ་བགྲོད་པའི་གདན་རབས་དྲུག་པའི་ཁྲི་འཕང་མཐོན་པོ་ག་ལ་བ་དེར་ཞབས་ཀྱི་ཆུ་སྐྱེས་ཟུང་ཉེ་བར་བཀོད་དོ། དེ་ལྟར་གཙུག་ལག་གཉིས་ཀྱིས་མཐོ་བའི་ཁྲི་ལ་བཞུགས་མ་ཐག་ནས། སྐྱེས་རབས་ལས། རྟག་ཏུ་དམ་པས་བསྟེན་འོས་ཤིང་། །རྩོད་དུས་རབ་ཏུ་འཕྲོག་བྱེད་པ། །རྫོགས་ལྡན་ལྟ་བུས་གང་གིས་ནི། །སྐྱེ་བོ་ཆོས་རྣམས་འཛིན་པར་བྱས། །ས་བདག་བཟོད་ལ་ཀུན་ཆགས་ཤིང་། །དཔལ་གྱིས་དཀྲིས་གྱུར་སྙིང་རྗེར་དགའ། །རབ་གྲགས་ལ་ཡང་དབང་ཐུལ་གང་། །སྐྱེ་དགུ་རྣམས་ཀྱི་དགའ་བྱེད་གྱུར། །ཞེས་པ་ལྟར་སྙིང་རྗེའི་བདག་ཉིད་དང་ལྡན་པ་གང་གི་མཐུས་ཆབ་འབངས་ཀྱིས་མཚོན་པའི་རྒྱལ་ཁམས་ཐམས་ཅད་རྟག་ཏུ་བདེ་ཞིང་འབྱོར་པ་དང་། ལོ་ལེགས་པར་གྱུར་པས་ནང་དུ་དགའ་བ་རབ་ཏུ་རྒྱས་པས་སྐྱེ་བོ་མ་ལུས་པ་རྩེ་བར་བྱེད་ཅིང་། ཆ་ལུགས་བཟང་ལ་མི་འཕྱར་བ། མིའི་བདག་པོའི་བཟོད་པ། དེས་པ། སྙིང་བརྩེ་བ། གྲགས་པའི་ཡོན་ཏན་མི་ཟད་པ་དག་སྙིང་གི་དཀྱིལ་ནས་ཡང་ཡང་དྲན་པར་བྱེད་ཅིང་། དགེ་བའི་ཡོན་ཏན་དེ་དག་ཀྱང་ཕྱོགས་ཕྱོགས་ཀུན་ཏུ་སྒྲོག་པར་བྱེད་པའི་བསྟོད་པ་དང་བཀྲ་ཤིས་ཀྱི་རོལ་མོ་མང་པོ་འཁྲོལ་བ་ལ་ལྷུར་བྱེད་པར་གྱུར་ཏོ། །དེ་ནས་བཟུང་སྟེ་ཡངས་པའི་ས་ཆེན་པོའི་དཀྱིལ་འཁོར་ཐམས་ཅད་བྱམས་པ་ཆེན་པོའི་དཔུང་གིས་ལེགས་པར་བསྲུངས་པའི་སྐབས་དེར། སྔོན་གྱི་དྲང་སྲོང་རྣམས་ཀྱིས་ལེགས་པར་བཞག་པའི་འཇིག་རྟེན་ལུགས་ཀྱི་བསྟན་བཅོས་དང་རྗེས་སུ་གདམས་པ་ཟབ་མོ་རྣམས་དང་མི་འགལ་བར་བྱ་བ་ཐམས་ཅད་བརྟགས་ནས་བྱེད་པ་དང་། མི་འོས་པའི་ལས་ལ་གཡེར་པོར་གྱུར་ཀྱང་མི་འཇུག །འོས་པའི་ལས་ཐམས་ཅད་ལ་དཀའ་ཡང་ལེ་ལོ་དང་ཕྱི་བཤོལ་གྱི་དབང་གིས་མི་འདོར་བ། གནའ་དུས་ཡན་ནས་ཡོངས་སུ་དར་བའི་དཔྱ་ཁྲལ་རྣམས་ཀྱང་དུས་དང་གནས་སྐབས་དག་ལ་ལེགས་པར་བརྟགས་ནས་ཚོད་ཟིན་པར་ལོངས་སྤྱད་པ་ལས་རིགས་པ་མ་ཡིན་པའི་འདོད་ཆེན་གྱི་ལས་མི་བརྩམ་པ། དབང་དང་སྟོབས་ཀྱི་སྒོ་ནས་བརྩམ་ན་ཁྱབ་འཇུག་བཞིན་དུ་གཞན་སྡེ་རྣམ་པར་ནོན་པ་ལ་མི་མཐུན་པ་ནི་འགའ་ཡང་མེད་དོ། ཆོས་དང་འགལ་བར་གྱུར་པའི་ཆགས་སྡང་གི་ལས་མི་བརྩམ་པར་ཀུན་གྱི་སེམས་བསྲུང་བ། རྟག་ཏུ་དགེ་སྡིག་གི་ལས་འབྲས་ཞིབ་ཏུ་བསམས་ཤིང་སྒོ་གསུམ་དགེ་བའི་ལམ་དུ་རང་གཞན་ཐམས་ཅད་འཇུག་པ། །འཁོར་བ་དང་མྱ་ངན་ལས་འདས་པའི་འབྱོར་པ་ཕུན་སུམ་ཚོགས་པ་དག་ལ་དབང་འབྱོར་ཡང་། རྒྱགས་པ་དང་ཁེངས་པའི་སེམས་མི་འཛིན། བློ་གཏད་ཀྱི་དཔང་དཀོན་མཆོག་གསུམ་ལ་བཅོལ་བས། གཡོ་སྒྱུ་རྣམ་པར་སྤངས་ནས་ལྷག་པའི་སེམས་ཀྱིས་རྟག་ཏུ་གནས་ཤིང་ཞི་དུལ་གསང་པོར་སྨྲ་བ། བག་དང་བཅས་པའི་ངང་ནས་སྐྱེ་བོ་ཐམས་ཅད་བུ་བཞིན་དུ་སྐྱོང་བའི་སྤྱོད་ཚུལ་ཕུན་སུམ་ཚོགས་པ་མངའ་བ་ཡིན་ཏེ། སྐབས་འགར་ཆབ་འབངས་ཀྱི་བདེ་སྡུག་གཟིགས་ཞིབ་ཏུ་སློང་མོ་མུ་ལྟོ་བར་བརྫུས་ནས་རྒྱལ་ཁམས་ན་རྒྱུ་བར། ཀམ་ཐོག་གྲུ་ཁར་སླེབས་ཚེ། གྲུ་བ་ཤིན་ཏུ་གཏུམ་པས་ཁྱོད་ཆོས་རྒྱལ་བསྟན་པ་ཚེ་རིང་གི་དབུ་འདྲ་བྱེད་མགོ་སྒུར་ནས་སྡོད་བྱས་ཏེ་གྲུ་སྐྱ་དབུ་ལ་བཞུས། རྗེས་ཀམ་ཐོག་གྲུ་བར་ཉེས་ཆད་ཕོག་པ་དང་། འཛིང་ཁོག་ཉིན་ལུང་ནང་ཕེབ་སྐབས། རྒན་མོ་ཞིག་གིས་སྟོན་ཐོག་བརྡུངས་ནས་འཕྱར་བཞིན་པར་ཕེབས། རྒན་མོ་དེས་འབྲུ་ཨང་རིམ་གསུམ་ཕྱེས་པར་གཟིགས། དེ་ཅི་ཡིན་དྲིས་པས། ཨང་དང་པོ་འདི་བདག་པོ་སྡེ་དགེ་ཚང་ལ་ཐོག་ཕུད་ཕུལ་རྒྱུ་ཡིན། གཉིས་པ་འདི་ས་བོན་བཞག་རྒྱུ་ཡིན། གསུམ་པ་འདི་རང་གི་ཟ་འབྲུ་ཡིན་ཅེས་ལབ་པས། རྗེས་རྒྱལ་ཆུས་ལ་བསམ་དཀར་ཅན་གྱི་རྒན་མོ་དེ་འདྲ་འདུག་ཅེས་གཟེངས་བསྟོད་བྱས་ཚུལ་ཡོད་པས་མཚོན་རྒྱལ་ཁམས་བྱམས་པས་སྐྱོང་བས་ཀུན་གྱིས་བུ་རིན་པོ་ཆེ་ཞེས་གུས་ཞབས་ཆེ། སྐབས་འདིར་བོད་ན་དབུས་གཙང་ནང་འཁྲུགས་དང་། ཁམས་བོད་ཕལ་ཆེར་སོག་པོ་ཨོ་རོད་རྒྱལ་པོས་དབང་བསྒྱུར་བྱས་པར། ཆིང་རྒྱལ་རབས་ཀྱི་གོང་མ་ཡུང་ཀྲེང་གིས་དྲག་པོའི་དཔུང་གིས་ཞི་འཇགས་ཟིན་རྗེས། མདོ་ཁམས་ཕྱོགས་ཀྱི་སྡེ་དཔོན་ཁོད་སྙོམས་པར་ཅིའུ་ཏཱ་ལོ་ཡེ། རུས་མིང་ཀྲུའུ་ཞེས་པ་བཏང་སྐབས། སྡེ་དགེའི་མངའ་འོག་འདིར་རྐུ་ཇག་ཁྲམ་གསུམ་མེད་པའི་རྒྱལ་ཁྲིམས་ཚད་ཐུབ་སྔར་ནས་ཡོད་པ་དང་། ལྷག་པར་ཆོས་རྒྱལ་འདི་ཉིད་ཀྱི་རྣམ་དཀར་མཛད་བཟང་འགྲན་ཟླ་བྲལ་བ་གོང་མ་ཆེན་པོའི་སྙན་དུ་གསོལ་བས། ཡང་ཀྲེང་ཁྲི་ལོ་བདུན་པ་སྟེ་རབ་བྱུང་བཅུ་གཉིས་པའི་ས་བྱ་ཕྱི་ལོ་༡༧༢༩ལོར་གོང་མ་ཆེན་པོས་ཐེ་ཨན་ུ་སིའི་ཆོ་ལོ་གནང་བ་དང་། ཡང་ཀྲེང་ཁྲི་ལོ་བཅུ་པ་ཕྱི་ལོ་༡༧༣༡་ལོར་གོང་མ་ཡང་ཀྲེང་གིས་ཐུ་སི་བུ་བཞི་བཅུ་ཞེ་དགུའི་གཙོ་བོ་གསན་ཡུ་སིའི་ཆོ་ལོ་གསེར་གྱི་ཐམ་ཀས་དབང་བསྐུར། གན་གོས་ཡུག་བརྒྱ། དངུལ་སྲང་སྟོང་ཕྲག་ལྔ། ཤར་དར་མདོ་ནས་ནུབ་འདམ་སོག་ལ་སྐྱ་བོ་མན་ཆད་དབང་དུ་བསྒྱུར་ཆོག་པའི་བཀའ་ལུང་བཅས་བསྩལ། དེའི་བདག་རྐྱེན་ལ་བརྟེན་བྱང་འབྲོག་དགེ་རྩེ། རྫ་ཆུ་ཁ་སྟོད་སྨད། འབྲོག་ཀ་བཞི། རྨ་རོང་། ལྷོ་འབྲོག་སྐོར་ཁྲམ་ཐར་སོགས་འགའ་ཞིག་སོག་པོ་ལ་ཇུས་ཉེས་དང་། འགའ་ཞིག་དེ་སྐབས་ཚོ་ཡན་ལྟ་བུ་ཡིན་པའི་དཔོན་ཆུང་རྣམས་ཆབ་འོག་ཏུ་བཅུག་པ་ལས། གཞན་སྔར་ཕན་རང་སྲིད་ཀྱིས་ཆོག་ཤེས་མཛད་དེ་གཡུལ་འགྱེད་པ་སོགས་ཡུལ་ཁམས་མི་བདེ་བ་མ་མཛད་དོ། ཇི་སྐད་དུ། །གྱ་ཚོམ་མི་སྨྲ་ཤེས་ཀྱང་མ་བཅོལ་རང་ཞུགས་ཡང་མི་བྱེད། །ཟིན་ཁར་མི་འདོར་འོག་ནས་སྔར་བརྩམས་འགྱོད་མི་སྨྲ། །ལྷག་པར་ཁེ་མཐོང་བཙལ་གླགས་ཡོད་ཀྱང་མི་རིགས་འདོད་ཆེན་ཡང་མི་བྱེད། །དབང་དང་ཚན་གྱིས་ཐུབ་ཀྱང་འཕྱས་གནོན་གཟན་མི་འཚོལ། །ཉེ་ཞེས་ཉེ་མགོན་མི་བྱེད་རིང་ཞེས་སྙོམ་ལས་ཡང་མི་སྤྱོད། །དབང་སར་ཕྱིན་ཅིང་ཀུན་གྱིས་བཀུར་ཡང་མཐའ་དག་སེམས་བསྲུང་བྱ། །ལེགས་ཉེས་བསམ་ཞིང་སྲོད་དང་ཐོ་རངས་དགེ་བ་སྤྱད། །ང་རྒྱལ་ཁེངས་སེམས་མུ་ཅོར་སྨྲ་དང་རྒྱགས་ཆོས་མེད། ཞེས་སོགས་གསུངས་པ་ལྟར་རོ། ཁྱད་པར་དུ་འཇིག་རྟེན་གྱི་ཆེ་དགུ་རྣམས་ཀྱིས་ཀྱང་རང་རང་གི་རལ་པའི་ཐོར་ཚུགས་ནོར་བུ་རིན་པོ་ཆེ་དག་གིས་ལན་བརྒྱར་བཏུད་ཅིང་མཆོད་པའི་གནས་སུ་གྱུར་པ། བསྟན་པའི་བདག་པོ་ཆེན་པོ་དཔལ་ས་སྐྱ་པ་ཞེས་སྙན་གྲགས་ལྷའི་རྔ་བོ་ཆེ་ལྟར་ཡོངས་སུ་ལྡིར་བ་དེ་ཉིད་བརྒྱུད་པ་དང་བཅས་པའི་ལུགས་བཟང་དྲི་མ་མེད་ཅིང་རྩོད་པ་ཀུན་ལས་གྲོལ་བ་དེ་ཉིད་ཀྱིས་མཚོན་ཏེ། སངས་རྒྱས་པའི་གྲུབ་པའི་མཐའི་གཞུང་ལུགས་དྲི་མ་མེད་པ་གང་དུ་དར་ཞིང་རྒྱས་པར་གྱུར་པ་རྣམས་དང་། དེ་ཉིད་མཁས་པའི་བགྱི་བ་གསུམ་གྱི་སྒོ་ནས་འཛིན་པར་བྱེད་པའི་བསྟན་འཛིན་གྱི་སྐྱེས་བུ་ཕྱོགས་བཅུའི་འཇིག་རྟེན་གྱི་ཁམས་མུར་ཐུག་པ་མེད་པ་རྣམས་སུ་བྱོན་པ་དང་། འབྱོན་པར་འགྱུར་བ། ད་ལྟ་འཚོ་ཞིང་གཞེས་པ་ཇི་སྙེད་ཅིག་མཆིས་པ་རྣམས་ལ་དད་པ་གསུམ་གྱི་རྩ་བ་རབ་ཏུ་བརྟན་པས། དོན་ཡོད་རྣམ་པ་བཞིས་བཀུར་སྟིར་བྱེད། བླ་མར་བྱེད། རི་མོར་བྱེད། མཆོད་ཅིང་རྗེད་པར་བྱེད། དེ་དག་གི་རྣམ་པར་དཀར་བའི་ཕྲིན་ལས་ཀྱི་རྒྱུན་ཆེན་པོ་དག་རིང་དུ་གནས་པའི་ཐབས་ཀྱང་བྱེད་དོ། མི་བདག་ཆེན་པོ་རང་གི་རིགས་ཀྱི་ཅོད་པན་ཉིད་དུ། བཅོམ་ལྡན་འདས་ཤཱཀྱའི་རྒྱལ་པོའི་ལུང་དང་རྟོགས་པའི་ཆོས་ཀྱི་རྒྱལ་སྲིད་ཆེན་པོ་ལེགས་པར་བཟུང་ནས་མདོ་སྡེ་དང་རྒྱུད་སྡེར་གཏོགས་པའི་ཆོས་ཀྱི་ཕུང་པོ་ཇི་སྙེད་པ་དག་འཆད། རྩོད། རྩོམ་པའི་ཕྲིན་ལས་ཀྱི་འཁོར་ལོས་སྒྱུར་བའི་བསྟན་འཛིན་གྱི་སྐྱེས་བུ་རིམ་པར་བྱོན་པ་རྣམས་ནི་འདི་ལྟ་སྟེ། ཡོངས་རྫོགས་བསྟན་པའི་མངའ་བདག་འཇམ་པའི་དབྱངས་སངས་རྒྱས་ཕུན་ཚོགས། གཞུང་ལུགས་རབ་འབྱམས་སྨྲ་བའི་དབང་པོ་འཇམ་མགོན་བཀྲ་ཤིས་དཔལ་ལྡན། རྒྱ་ཆེན་ཆོས་ཀྱི་སྤྱན་ལྡན་མཁན་རིན་པོ་ཆེ་བཟང་པོ་རྒྱལ་མཚན། གསང་ཆེན་རྒྱ་མཚོའི་མངའ་བདག་ཀུན་དགའ་ཆོས་འཕེལ། གཞུང་ལུགས་རྒྱ་མཚོའི་མངའ་བདག་བཀྲ་ཤིས་དབང་ཕྱུག །རྣམ་འདྲེན་བསྟན་པའི་རྩ་ལག་ཆེན་པོ་སི་ཏུ་ཆོས་ཀྱི་འབྱུང་གནས། མཐུ་སྟོབས་གྲུབ་པའི་དབང་ཕྱུག་སངས་རྒྱས་རྒྱ་མཚོ་སོགས་བསྟན་འཛིན་གྱི་དགེ་བའི་བཤེས་གཉེན་མང་པོ་དང་། ཁྱད་པར་ངོར་ཆེན་རྡོ་རྗེ་འཆང་ཀུན་དགའ་བཟང་པོའི་ལུགས་བཟང་བདུད་རྩིའི་རྒྱུན་མ་ལུས་པ་བཟུང་ནས། སེམས་ཅན་གྱི་ཁམས་ཀྱི་ཉོན་མོངས་པའི་རིམས་ནད་མཐའ་དག་ཞི་བར་བྱེད་པའི་ཆོས་ཀྱི་སྨན་པ་ཆེན་པོ་ཐམས་ཅད་མཁྱེན་པ་བཀྲ་ཤིས་ལྷུན་གྲུབ། ཡར་ལུང་བཀྲ་ཤིས་ཆོས་སྡེ་ནས་རྒྱལ་བ་ཀུན་གྱི་ཕྲིན་ལས་སྐྱོང་བ་ངག་དབང་ཀུན་དགའ་ལེགས་པའི་འབྱུང་གནས་ཏེ། རྗེ་བཙུན་དམ་པ་དེ་དག་རང་གི་བླའི་མཆོད་གནས་ཀྱི་ཆེད་དང་། མདོ་སྨད་ཕྱོགས་ཀྱི་སྐྱེ་དགུ་མ་ལུས་པ་མངོན་མཐོ་ངེས་ལེགས་ཀྱི་གྲོང་དུ་ཁྲིད་པར་བྱེད་པའི་ལམ་མཁན་དམ་པ་ཉིད་དུ་སྤྱན་དྲངས་ཏེ། ཆབ་འོག་ཏུ་གཏོགས་པས་མཚོན་པའི་སེམས་ཅན་རྒྱ་མཚོ་ཆེན་པོའི་རྡུལ་གྱི་གྲངས་དང་མཉམ་པ་རྣམས་ཀྱི་རྒྱུད་ལ་ཆོས་ཀྱི་ས་བོན་མ་རྨས་པར་བཏབ་ཏེ། ལ་ལ་ནི་དཀོན་མཆོག་གསུམ་ལ་སྐྱབས་སུ་སོང་ཞིང་བསླབ་པའི་གཞི་རབ་ཏུ་བཟུང་བ་ལ་བཀོད། ལ་ལ་ནི་ཁྱིམ་ནས་ཁྱིམ་མེད་པར་རབ་ཏུ་བྱུང་བ་དགེ་སློང་གི་དངོས་པོར་བསྒྲུབས་ཏེ་འཁོར་བ་ལས་མངོན་པར་འཕགས་པའི་གནས་ལ་བཀོད། ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་བསྩལ་ཏེ་ཐེག་པ་ཆེན་པོའི་རིགས་སུ་བཀོད། ལ་ལ་ནི་གསང་སྔགས་རྡོ་རྗེ་ཐེག་པའི་ཆོས་ཀྱི་སྒོར་སྨིན་པར་བྱས་ཏེ་རིང་པོར་མི་ཐོགས་པར་རྣམ་པར་གྲོལ་བའི་སྐལ་ལྡན་དུ་བྱས་ཏེ། མདོར་ན་འཁོར་བ་ཕལ་མོ་ཆེ་སངས་རྒྱས་ལ་གཞོལ་བ། ཆོས་ལ་བབས་པ། དགེ་འདུན་ལ་བཞག་པར་མཛད་དེ། དེ་དག་ཐམས་ཅད་ཀྱང་མི་བདག་ཆེན་པོ་འདིའི་སྐུ་དྲིན་ཁོ་ན་ལས་བྱུང་བ་ཡིན་པས། ལེགས་པར་བསམ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཛམྦུ་གསེར་གྱི་ཕུང་པོས་ཡོངས་སུ་བཀང་སྟེ་བཅལ་བར་བྱས་ཀྱང་མི་བདག་ཆེན་པོ་འདི་ཉིད་ཀྱི་སྐུ་དྲིན་དང་གཞར་ཡང་མཉམ་པར་དཀའ་བའི་རང་བཞིན་ཁོ་ནའོ། དེ་ལྟར་ཇི་སྐད་སྨོས་པའི་འདྲེན་མཆོག་དམ་པ་དེ་དག་སྤྱི་བོའི་རྒྱན་དུ་བསྟེན་ཅིང་སྒོ་གསུམ་ལོངས་སྤྱོད་དང་བཅས་པས་མཉེས་པར་འགྱུར་བའི་ལས་གང་ཡིན་པ་དེ་རྟུན་པ་ལྷུར་བྱེད་ཅིང་། དེ་དག་གི་ཞལ་སྒོ་ནས་བྱུང་བའི་གསུང་གི་བདུད་རྩི་ནི། རྒྱུད་སྡེ་ཆེན་པོ་རྣམས་ལས་འབྱུང་བའི་དཀྱིལ་འཁོར་རྣམས་ཀྱི་དབང་བསྐུར་བ། རྗེས་སུ་གནང་བ། ལུང་འབོགས་པ། མན་ངག་གི་ཉམས་ཁྲིད་ཟབ་མོ་སྤྱི་དང་། ཁྱད་པར་སྙན་བརྒྱུད་ཚད་མ་བཞི་ལྡན་སློབ་བཤད་སྐོར་གྱི་ཟབ་རྒྱས་ཀྱི་ཆོས་དཔག་ཏུ་མེད་པ་གསན་ཅིང་། ཇི་ལྟར་ཐོས་པའི་ཆོས་དེ་དག་ལས་ཀྱང་ཕལ་ཆེར་གྱི་བསྒོམ་བཟླས་མ་ཆག་པའི་ཉམས་བཞེས་ཆུ་བོའི་རྒྱུན་བབ་པ་ལྟ་བུས་ཉིན་མཚན་གྱི་དུས་འདའ་བར་མཛད་དོ། དེའང་ཐོག་མར་དཀར་ཆ་བཞི་དང་གཏོར་མ་བརྒྱ་རྩ་སྔོན་དུ་འགྲོ་བས། དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་བགྲོད་པ་གཅིག་པའི་ལམ་ཟབ་མོ་བླ་མའི་རྣལ་འབྱོར་གྱི་ཉམས་ལེན། དཔལ་ཀྱེ་རྡོ་རྗེ་ལྷ་དགུ་མན་ངག་ལུགས་ཀྱི་མངོན་པར་རྟོགས་པ་འབྲིང་དུ་བྱ་བ་ཡན་ལག་དྲུག་པ་ལམ་དུས་ཀྱི་དབང་བཞི་ལེན་པ་དང་བཅས་པ། དཔལ་ནཱ་རོ་ཏ་པའི་ཐུགས་བཅུད་ཀྱི་གདམས་པ་ཟབ་མོ་རྗེ་བཙུན་རྡོ་རྗེ་རྣལ་འབྱོར་མའི་བསྒོམ་བཟླས། རྡོ་རྗེ་འཇིགས་བྱེད་རྭ་ལུགས་ཀྱི་མངོན་རྟོགས། འབྱུང་འདུལ། རྟ་མགྲིན་གསང་སྒྲུབ། ཐུགས་རྗེ་ཆེན་པོ་དང་ཕྱག་རྒྱ་ཆེན་པོ་ཟུང་འཇུག་གི་བསྒོམ་བཟླས། སྒྲོལ་དཀར་ཡིད་བཞིན་འཁོར་ལོའི་སྒྲུབ་ཐབས། རྡོ་རྗེ་ནག་པོ་ཆེན་པོ་གུར་གྱི་མགོན་པོ་ཁྲོ་བོ་བཅུ་དང་བཅས་པའི་སྲུང་བའི་འཁོར་ལོ་རྡོ་རྗེའི་བྲག་རྫོང་མ་ཕྱི་ནང་གསང་བ། མགོན་དཀར་ཚེ་སྒྲུབ་དང་བཅས་པ། དཔལ་མགོན་ཞལ་བཞི་པའི་སྲུང་འཁོར་ཚེ་སྒྲུབ་སོགས་རིམ་གཉིས་ཀྱི་ཉམས་ལེན་དང་། གཞན་ཡང་རྗེ་བཙུན་ས་སྐྱ་པའི་མན་ངག་གསེར་ཆོས་ཀྱི་སྐོར་ལ་སོགས་པ་གསང་སྔགས་གསར་རྙིང་གི་ཡི་དམ་གྱི་ལྷ་དུ་མའི་བསྒོམ་བཟླས་མང་པོ། དེ་དག་གི་འཇུག་ཏུའང་གཏོར་མའི་ནལ་འབྱོར་དང་བཅས་པ་རྣམས་རྒྱུན་པར་ཆག་ཉམས་མེད་པའི་དམ་བཅའ་ངེས་པ་ཅན་དུ་མཛད། ཐུན་མཚམས་རྣམས་སུ་ཡང་དཀོན་མཆོག་གསུམ་རྗེས་སུ་དྲན་པའི་མདོ། ཡན་ལག་བདུན་པ། རྒྱ་བོད་ཀྱི་བླ་མ་བརྒྱུད་པ་དང་བཅས་པའི་སྐུ་བསྟོད་དང་གསོལ་འདེབས་ཀྱི་རིགས་མང་པོ། འཇམ་དཔལ་མཚན་བརྗོད་ཉི་མ་རེར་ཚར་བདུན་རེ། གང་བློ་མ་ཚར་ཉེར་གཅིག་རེ། སྒྲོལ་བསྟོད་ཚར་ཉེར་གཅིག་རེ། སྒྲོལ་བསྟོད་རྣམ་དག་གཙུག་ན་ཅན་ཚར་རེ། སྒྲོལ་མའི་མཚན་བརྒྱ་རྩ་བརྒྱད་པ་ཚར་རེ། ཤེས་རབ་སྙིང་པོ་ཚར་དགུ་རེ། རྣམ་རྒྱལ་མ། རྣམ་འཇོམས། ཚེ་དཔག་མེད། ལས་སྒྲིབ་སྦྱོང་བའི་གཟུངས་རྣམས་དང་། ཕུང་པོ་གསུམ་པའི་མདོ། བཟང་སྤྱོད་སྨོན་ལམ་སོགས་སྨོན་ལམ་གྱི་སྐོར་མང་པོ་རྣམས་ཞལ་འདོན་དུ་མཛད་པ། རྟེན་གསུམ་ལ་ཕྱག་འཚལ་བ་དང་བསྐོར་བ་བྱེད་པ། ཆག་མེད་སཱཙྪ་བཅོ་ལྔ་འདེབས་པ་སོགས་མདོར་ན་ས་བདག་ཆེན་པོ་འདི་ཉིད་ཀྱིས་ཉི་མ་རེ་ལ་དམ་བཅར་བགྱིས་པའི་དགེ་སྦྱོར་ཁོ་ན་ལ་ཡང་། དགེ་སྦྱོར་བྱེད་པར་རློམ་པ་ཕལ་གྱིས་ཉི་མ་མང་པོ་འཕུལ་བའི་རྒྱུར་འགྲོ་བ་ལ་སོགས་པའི་ཡོན་ཏན་བརྗོད་ཀྱིས་མི་ལྡང་བ་ནི་རྣམ་པར་འཕྲུལ་པ་མཆོག་གི་ལེགས་བྱས་གཅིག་པུས་རྗེས་སུ་འགྲོ་བའི་རང་བཞིན་ནོ། །གསང་སྔགས་ཟབ་མོའི་བཟླས་བརྗོད་གྲངས་སུ་བགྱིས་པ་ཡང་། རྡོ་རྗེ་འཇིགས་བྱེད་ཀྱི་སྙིང་པོ་ཡི་གེ་བཅུ་པ་དུང་ཕྱུར་གཅིག །ཐུགས་རྗེ་ཆེན་པོའི་སྙིང་པོ་ཡི་གེ་དྲུག་པ་དུང་ཕྱུར་གཅིག །གུར་གྱི་མགོན་པོའི་སྙིང་པོ་ཡི་གེ་བདུན་པ་དུང་ཕྱུར་གཅིག །སེང་གདོང་མའི་བསྙེན་པ་དུང་ཕྱུར་གཅིག་རྣམས་རང་གི་ལྗགས་ཐོག་ནས་བསགས་པ་སོགས་སྒོ་གསུམ་བག་མེད་ཀྱི་དབང་དུ་བཞུགས་པ་ནི་རྟག་ཏུ་ཞབས་འབྲིང་ན་འཁོད་པ་རྣམས་ཀྱིས་ཀྱང་ཡེ་མ་མཐོང་ངོ་ཞེས་ཀུན་གྱིས་ཁ་མཐུན་པར་ལན་གཅིག་མ་ཡིན་པར་སྙན་དངགས་དམ་པའི་གླུ་བཞིན་དུ་ལེན་པར་བྱེད་དོ། དེ་ཡང་སྡེ་དགེའི་རྒྱལ་རབས་ཚིགས་བཅད་མ་ལས། ཇི་ལྟར་ཐོས་པ་དེ་དག་ཉམས་བཞེས་རྒྱུན། །ཆུ་བོའི་རྒྱུན་འབབ་ལྟ་བུའི་ཉིན་མཚན་ཆ། །སྲོད་ལ་ཅུང་ཟད་མནལ་ཞིང་ཉིན་མོའི་དུས། །ཇ་སྦྱོར་གཉིས་ཙམ་ཐུན་མཚམས་འཇོག་གནང་ལས། །ཁོར་ཡུག་རིམ་གཉིས་རྣལ་འབྱོར་ཁོ་ནར་གཞོར། །ཡོངས་རྫོགས་བསྟན་པའི་ཉམས་ལེན་ས་སྐྱ་པའི། །ཟབ་ཆོས་ཡང་རྩེ་གསུང་ངག་ལམ་འབྲས་ཀྱི། །སོགས་ནས། སྒོ་གསུམ་ལྷ་སྔགས་ཡེ་ཤེས་རོལ་པ་ལས། །སྐུ་ཚེ་ཧྲིལ་པོར་ནམ་ཡང་མི་འདའ་བར། །མཛད་པས་རིག་སྔགས་འཆང་བ་ཀུན་གྱི་རྩེ། །ཨུ་རྒྱན་རྒྱལ་པོ་ཨིནྡྲབོ་དྷ་དང་། །གཉིས་སུ་མེད་པ་གྲུབ་པའི་འཁོར་ལོས་སྒྱུར། །གང་གི་ངོ་མཚར་མཛད་པ་དང་པོ་འོ། །ཞེས་དང་། སྲིད་ཞིའི་དཔལ་སྟེར་འཇམ་མགོན་གནས་གསར་རྗེ། །བསྟན་པའི་མངའ་བདག་རྗེ་བཙུན་ས་སྐྱ་པའི། །གདམས་པ་ཟབ་མོ་དམར་པོ་སྐོར་གསུམ་གྱི། །ཆོས་སྐོར་ཟབ་རྒྱས་སྩལ་དང་ནོར་སྟེར་ལྷ། །རྒྱལ་པོ་ཆེན་པོ་རྣམ་མང་ཐོས་སྲས་ཀྱི། །ཆོས་བཀའ་སྩལ་ཞིང་རྟེན་འཛུགས་གནང་བའི་སྐབས། །གོང་གི་བྱིན་རླབས་དགེ་མཚན་མངོན་གྱུར་གྱི། །གནམ་བསྐོས་གོང་མ་འཇམ་དབྱངས་རྒྱལ་པོ་ཡིས། །རྒྱལ་སྲིད་ཆོས་བཞིན་སྐྱོང་ལ་ལེགས་གསོལ་གྱི། །བསྔགས་བརྗོད་གཟེངས་བསྟོད་མདོ་ཁམས་སྤྱི་རྗེ་རུ། །དབང་བསྐུར་གསེར་གྱི་ཐམ་ག་གན་གོས་ཡུག །བརྒྱ་ཕྲག་དངུལ་སྲང་སྟོང་ཕྲག་ལྔ་བསྩལ་ཞིང་། །རྒྱལ་པོའི་མཚན་རྟགས་སྐྱོང་ཞིང་ས་ཡི་ཁྱོན། །གང་འདོད་རང་དབང་ཆོག་པའི་ལུང་བཟང་བུད། །དེ་བཞིན་གོང་གི་བཀས་མངགས་མི་ཆེན་གྱིས། །གུས་བཏུད་བསྔགས་བརྗོད་ཐུགས་བཞེད་མ་ལུས་བསྒྲུབས། །ཕྱོགས་རྣམས་ཀུན་ལས་རྣམ་པར་རྒྱལ་བར་གྱུར། །དེ་ཚེ་ཆོས་རྒྱལ་མཆོག་ཉིད་རབ་དགེས་ཏེ། །གནས་གསར་འཇམ་མགོན་བླ་མར་བཀའ་དྲིན་གྱི། །གཏང་རག་ལེགས་འབུལ་རྒྱ་ཆེན་མཛད་ཅེས་ཐོས། །དེ་ལྟར་སྐྱེས་ཆེན་དམ་པ་མཆོད་ཡོན་གཉིས། །སྡེ་དགེ་རྒྱལ་བརྒྱུད་ལྟོས་པ་འཁོར་བཅས་ལ། །གཞལ་དུ་མེད་པའི་བཀའ་དྲིན་ཆེ་ལྡན་ནོ། །དེ་དག་ངོ་མཚར་མཛད་པ་གཉིས་པ་ཡིན། །ཞེས་གསུངས་སྟེ། མདོར་ན་རིན་ཆེན་ཕྲེང་བ་ལས། །དམ་པའི་ཆོས་དང་ཆོས་སྨྲ་ལ། །ཉིད་ཀྱིས་བཀུར་སྟི་མཆོག་དང་ནི། །གུས་པར་མཛད་དེ་གནས་ལས་བཞེངས། །མེ་ཏོག་གཏོར་ནས་ཆོས་ཉན་ཅིང་། །ཆོས་ཀྱི་སྦྱིན་པ་དག་ཀྱང་མཛོད། །འཇིག་རྟེན་གཏམ་ལ་དགའ་མ་མཛད། །འཇིག་རྟེན་འདས་ལ་དགྱེས་པར་མཛོད། །འཁོར་རྣམས་ཟིལ་གྱིས་མནན་པའི་ཕྱིར། །ལྷུན་སྟུག་བརྟན་ལ་ངེས་པར་མཛོད། །ཅེས་གསུངས་པ་ལྟར་དང་། དེ་དག་གི་བར་སྐབས་རྣམས་སུ་ཡང་གཟུ་བོར་གནས་པའི་བློ་གྲོས་ཀྱིས་ལེགས་པར་བརྟགས་པའི་བཀའ་ཁྲིམས་བཙན་པོས་རྒྱལ་ཁམས་ཐམས་ཅད་ཀྱང་བྱམས་པའི་ཆོས་དང་མཐུན་པའི་ཕྲིན་ལས་ཀྱིས་བདེ་བར་སྐྱོང་བ་ལ་བློ་སྒམ་ཞིང་གཏིང་མི་རྟོགས་པ། བྱ་བ་གང་བརྩམས་ཀྱང་རང་གི་ངང་གིས་འགྲུབ་པ་ལ་སོགས་པ་ཡོན་ཏན་བསམ་ལས་འདས་པ་ཞིག་སྟེ། དེ་ཉིད་ལས། ཇི་ལྟར་རྒྱལ་སྲིད་བསྐྱང་བ་དང་། །འབངས་ཀུན་བདེ་ལ་འཁོད་པ་དང་། །བསྡོ་བའི་དགྲ་རྣམས་འདུལ་བ་དང་། །རྒྱལ་ཁམས་ཆོས་ཀྱིས་བསྐྱང་བགྱི་བ། །ཞིབ་ཏུ་དགོངས་ནས་སྒྲུབ་པར་མཛོད། །འགྲུབ་བམ་མི་འགྲུབ་མ་ངེས་པར། །དགོངས་མ་ཐག་ཏུ་མ་གསུངས་ཤིག །ཡུན་ཇི་སྲིད་ཅིག་ཆོས་སྒྲུབ་ཅིང་། །སེར་སྣ་འཇུར་གེགས་མ་མཛད་པར། །བདོག་པ་ཐམས་ཅད་གཏུགས་ཏེ་མཛོད། །ཁྱོད་ནི་བདོག་པ་ཀུན་བོར་ནས། །གཅིག་པུ་ག་ཤེད་གཤེགས་འཚལ་བས། །ཆོས་ཀྱི་སླད་དུ་སྤྱད་པ་ཀུན། །ཁྱོད་ཀྱི་མདུན་དུ་འོང་བ་ཉིད། །འབངས་ལ་རེ་བ་མ་འཇོག་པར། །ཞལ་བཞུགས་ཚེ་ན་མྱུར་བར་མཛོད། །ཅེས་བྱ་བ་སོགས་སྔོན་གྱི་དྲང་སྲོང་མཁས་པ་རྣམས་ཀྱིས་ཇི་ལྟར་གདམས་པའི་བདུད་རྩི་ལྟ་བུའི་ཆོས་རྣམས་ལ་ནམ་ཡང་མི་འདའ་བ་ལྷུར་བྱེད་པ་ཉིད་དོ། དེར་མ་ཟད་རིན་ཆེན་ཕྲེང་བ་ལས། གཙུག་ལག་ཁང་དག་བརྩིག་པ་དང་། །མཆོད་རྟེན་བརྩིག་དང་ན་བཟའ་གསོལ། །ཞིག་རལ་བཅོས་དང་མཆོད་པ་གཟུགས། །ལྷ་ཁང་ལ་སོགས་གཞན་བགྱིས་པ། །སྔ་ལུགས་བཞིན་དུ་རྒྱས་པར་མཛོད། །དམ་ཆོས་ཚུལ་བཞིན་སྤྱོད་པ་ཡི། །དགེ་སློང་དགེ་བསྙེན་ལ་སོགས་པ། །གཞན་གྱིས་གཙེ་བ་མེད་པ་ཡི། །དཔུང་གཉེན་སྐྱབས་དང་ཁ་འཛིན་མཛོད། །འདི་ཀུན་ཡུལ་དུ་བདེ་བ་ཡི། །མྱ་ངན་འདའ་བའི་དགེ་ཚོགས་ལགས། །ཞེས་གསུངས་པ་བཞིན་དུ་མི་བདག་འདི་ཉིད་ཀྱི་སྐུ་རིང་ལ་ལྷུན་གྲུབ་སྟེང་སོགས་སྟོད་སྨད་ཀྱི་དགོན་སྡེ་བཅུ་གསུམ་ཙམ་དུ་གཙུག་ལག་ཁང་རྟེན་དང་བརྟེན་པར་བཅས་པ་གསར་དུ་བསྐྲུན་པར་མཛད་པའང་། འདི་ལྟ་སྟེ། གཙང་ཨེཝྂ་ཆོས་ལྡན་དུ་གླིང་པ་སྤྱི་ཁང་། ལྷུན་གྲུབ་སྟེང་གི་ལྷ་ཁང་གསར་པ། མགོན་ཁང་ཤར་རྟེན་དང་བརྟེན་པར་བཅས་པ། ལྕགས་ར། ཛཾ་ཐོག །ཡེ་ན། རབ་བརྟན། དུང་མདོ། སྤོ་འཛོང་། དཔལ་སྤུངས། རྒ་ལེན་སྟེང་། རྣམ་རྒྱལ་གླིང་། འདན་གྱི་དྲན་ཐང་རྣམས་སུ་གཙུག་ལག་ཁང་བཅུ་བདུན་ལྡེབས་རིས་དང་བཅས་པ། དེ་དག་གི་ནང་དུ་དུས་གསུམ་གྱི་སངས་རྒྱས་སོགས་ཀྱི་སྐུ་བརྙན་ལྡེར་བཟོ། ལྷུན་གྲུབ་སྟེང་འདིར་གསེར་ཟངས་ལས་གྲུབ་པའི་ལམ་འབྲས་བླ་མ་བརྒྱུད་པ་དང་ཡི་དམ་སངས་རྒྱས་བྱང་སེམས། ཆོས་སྐྱོང་ནོར་ལྷ་རྣམས་ཀྱི་སྐུ་བརྙན་བཟོ་བཀོད་ཤིན་ཏུ་ལེགས་པ་སྔ་ཕྱིར་བཞེངས་པ་ཕྱེད་བཞི་བརྒྱ་ཙམ་དང་། ཙནྡ་དཀར་དམར་ལས་གྲུབ་པའི་བསྐལ་པ་བཟང་པོའི་སངས་རྒྱས་སྟོང་གི་སྐུ་བརྙན་ཆ་གཉིས་ཀྱིས་མཚོན་ཏེ་གཞན་མང་པོ། བ་སོ་ལས་གྲུབ་པའི་སྒྲོལ་མ་ཉེར་གཅིག་གི་སྐུ་བརྙན་སློབ་དཔོན་ཉི་མ་སྦས་པའི་ལུགས། གསེར་སྲང་སུམ་བརྒྱས་བལ་པོའི་ཡུལ་ནས་བསྒྲུབས་པའི་ཙནྡ་དཀར་དམར་སྤེལ་མ་ལས་གྲུབ་པའི་དེ་བཞིན་གཤེགས་པའི་མཆོད་རྟེན་ཆེན་པོ་བརྒྱད་ཐོག་ཚད་དུ་ལངས་པ་བཟོ་དབྱིབས་ཁྱད་པར་དུ་འཕགས་པ་ཅན། ཙནྡ་གྱི་ལྡེ་གུ་ལས་གྲུབ་པའི་སངས་རྒྱས་བྱང་སེམས་སོགས་ཀྱི་སྐུ་མང་པོ། ཤར་མགོན་ཁང་བདུད་དཔུང་ཟིལ་གནོན་དུ་མགོན་པོ་ལྕམ་བྲལ་སོགས་ཀྱི་སྐུ་བྱིན་རླབས་ཀྱི་གཟི་འོད་འབར་བ་ཅན་མང་པོ་གསར་དུ་བསྐྲུན། སངས་རྒྱས་སྟོང་གི་ཞལ་ཐང་། རྒྱལ་བའི་བཀའ་འགྱུར་རོ་འཚལ་གསེར་བྲིས་སུ་བྱས་པ་གླེགས་བམ་བརྒྱ་དང་བདུན། བསྟན་བཅོས་འགྱུར་རོ་འཚལ་དངུལ་བྲིས་སུ་བྱས་པ་གླེགས་བམ་ཉིས་བརྒྱ་བརྒྱད། རྗེ་བཙུན་གོང་མ་ལྔའི་བཀའ་འབུམ་ཤོག་སྐྱར་བྲིས་པ་གླེགས་བམ་བཅུ་དྲུག་སྟེ་དེ་དག་ཐམས་ཅད་ཀྱང་གླེགས་ཤིང་གླེགས་ཐག་ན་བཟའ་ཚུན་ཆད་ཁྱད་པར་དུ་འཕགས་པ་དང་། དེ་དག་གི་མཚོན་པའི་གླེགས་བམ་ཆེ་ཆུང་བགྲང་ལས་འདས་པ་བཞེངས་སོ། ། མུ་འགོད།་་་་་་་་་་
' རྩོམ་འོག་མ།
སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼གསུམ་པ།༽