སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼དང་པོ།༽
༄༅། །སྡེ་དགེ་རྒྱལ་རབས་རིན་ཆེན་ཕྲེང་མཛེས། (ཚན་པ་དང་པོ་) མཛད་པ་པོ་བར་མ་མཁན་པོ་ངེས་དོན།
སྡེ་བཞི་དགེ་བཅུའི་འབྱོར་པའི་མཚན་ལྡན་ལྗོངས། །ལྗོངས་འདིའི་ཆོས་རྒྱལ་བསྟན་པའི་ཡོན་བདག་ཆེ། །ཆེ་དགུ་ཀུན་གྱིས་གཙུག་བཀུར་མི་ཡི་མཆོག །མཆོག་རྣམས་བྱོན་རབས་རིན་ཆེན་ཕྲེང་མཛེས་བཞུགས། །
དཀར་ཆག།
ཀ༽ཀླད་ཀྱི་དོན་ལ།
མཆོད་བརྗོད་དང་རྩོམ་པར་དམ་བཅའ་བ། ༡
ཁ༽གཞུང་གི་དོན་ལེའུ་གཉིས།
༡༽དང་པོ་ལ་སྡེ་དགེ་གང་དུ་ཆགས་པའི་ས་ངོས་བཟུང་བ། ༢
༢༽ས་གཤིས་ཀྱི་ཁྱད་ཆོས། ༣
༣༽སྔོན་སྡེ་དཔོན་སུ་ཡིས་བདག་གིར་བཟུང་བ། ༦
༡སྡེ་དགེའི་གདུང་རབས། ༧
༢སྡེ་དགེའི་རྒྱལ་རབས། ༡༧
༣སྡེ་དགེའི་ཁྲི་རབས། ༢༤
༤དེ་དག་གི་མཚན་ཐོ་ཟུར་དུ་བཀོད་པའོ། ༡༢༡
༡སྲིད་འཛིན་གྱི་རིམ་པ། ༡༢༤
༢ཁྱིམ་རྒྱུད་ཀྱི་རིམ་པ། ༡༣༤
༣ཐེམ་དུད་དང་མི་གྲངས། ༡༣༧
༤མདུན་བློན་འགའི་ལོ་རྒྱུས་དང་། ༡༤༢
བྱ་རྒོད་སྟོབས་ལྡན་དང་དེའི་ཁྱིམ་རྒྱུད་ཀྱི་ལོ་རྒྱུས། ༡༥༠
༥དཔལ་འབྱོར་དང་ཁྲལ་འུ་ལག་སྐོར། ༡༧༧
༦དམག་དོན་སྒྲིག་སྲོལ་སྐོར། ༡༨༢
༧ཁྲིམས་སྲོལ་དང་ལམ་ལུགས་སྐོར། ༡༨༧
༨རིག་གནས་སྐོར། ༡༩༠
༩གོམས་གཤིས་སྐོར། ༡༩༣
༡༠རྒྱལ་བློན་སོགས་ཀྱི་ཆས་གོས་དང་འཚོ་བའི་སྐོར། ༡༩༤
༡༡བག་མ་གཏོང་ལེན་གྱི་ཚུལ། ༡༩༨
༡༢དུར་འདེབས་སྲོལ་སྐོར། ༡༩༨
༡༣རྩེད་འཁྲབ་སོགས་ཀྱི་སྲོལ། ༡༩༩
༡༤ཡུལ་འདིའི་སྡོད་ཁང་སྐོར། ༢༠༠
དགོན་སྡེ་ཁག་གི་མཚན་ཐོ། ༢༠༠
དབུ་བླ་ཁག་ལྔའི་ལོ་རྒྱུས། ༢༠༣
༤༽དོན་ཚན་བཞི་པ་གདན་ས་འདི་ཉིད་དུ་བཤད་སྒྲུབ་ལས་གསུམ་གྱི་སྒོ་ནས་
བསྟན་པ་དར་རྒྱས་སུ་མཛད་པ་པོ་རྣམས་ཀྱི་མཚན་ཐོ་རགས་ཙམ་བཀོད་པ། ༢༠༥
༥༽ལེའུ་དང་པོའི་འཇུག་གི་དོན་བསྡུ་བ། ༢༡༠
ལེའུ་གཉིས་པ།
དང་པོ་བསྟན་འཛིན་སྐྱེས་བུ་རིམ་པར་བྱོན་པས་སྐྱོང་ཞིང་དར་རྒྱས་སུ་མཛད་ཚུལ། ༢༡༨
༡ལྷ་ཁང་སོགས་ཀྱི་སྐོར། ༣༡༢
༢རྟེན་གསུམ་སྐོར་རོ། ༣༡༦
༡དུས་མཆོད་ཀྱི་རིགས་ཇི་སྙེད་བྱུང་བ། ༣༢༡
༢དེ་དག་གི་དབུར་བཞུགས་སློབ་དཔོན་གང་ཡིན། ༣༣༠
༣དེ་དག་ལས་བློ་ལ་འཛིན་དགོས་པ་གང་དག་ཡིན་པ། ༣༣༢
༡བླ་གྲྭའི་རིམ་པ་དང་། ༣༣༣
༢ལས་འཛིན་གྱི་རིམ་པ། ༣༣༦
བཞི་པ་རྒྱུན་གྱི་དགོན་པའི་སྒྲིག་སྲོལ་ཇི་ལྟར་ཡིན་པ། ༣༣༧
གཉིས་པ་བསྟན་པའི་རྩ་བ་བཤད་གྲྭའི་སྐོར། ༣༤༩
གསུམ་པ་བསྟན་པའི་སྙིང་པོ་སྒྲུབ་གྲྭའི་སྐོར། ༣༥༡
༡ལྷ་ཁང་རྟེན་གསུམ་སོགས་དང་། ༣༥༥
༢ཚེས་དུས་སྒྲུབ་མཆོད་སོགས། ༣༦༩
༣བླ་གྲྭ་ལས་འཛིན་སོགས་ཀྱི་སྐོར། ༣༧༤
གཉིས་པ་ཀློག་པ་ཐོས་བསམ་གྱི་འཁོར་ལོ་བཤད་གྲྭའི་སྐོར། ༣༧༥
གསུམ་པ་སྤོང་བ་བསམ་བསྟན་གྱི་འཁོར་ལོ་སྒྲུབ་གྲྭའི་སྐོར། ༣༨༡
གཉིས་པ་བསྟན་འཛིན་གཙོ་བོ་འགའ་ཞིག་གི་རྣམ་ཐར། ༣༨༢
ག༽འཇུག་དོན་བསྡུ་བ་ལ་དངོས་དང་ཞར་བྱུང་གཉིས། ༤༡༦
༄༅། །སྐུ་བཞི་ཡེ་ཤེས་ལྔ་ལྡན་རྡོ་རྗེ་འཛིན། །ཐུགས་རྗེས་གདུལ་བྱ་དང་མཚུངས་སྐུ་བཞེངས་ཏེ། །མདོ་སྔགས་ཆུ་ཀླུང་ཁ་འབབ་རྣམ་བཞིའི་རྒྱུན། །ཐུགས་ཀྱི་རྒྱ་མཚོར་ངོམས་པ་མེད་གསོལ་ནས། །འགྲོ་ལ་ཆོས་ཆར་འབེབས་མཛད་ས་སྐྱ་པ། །མཚུངས་མེད་བླ་མ་ཁྱེད་ཀྱིས་རྟག་ཏུ་སྐྱོངས། །ཕྱི་རུ་སོ་ཐར་སྡོམ་པས་ལུས་ངག་གཙང་། །ནང་དུ་བྱང་ཆུབ་སེམས་གཉིས་ཐུགས་རྒྱུད་འབྱོངས། །གསང་བ་རིམ་གཉིས་ཟབ་མོའི་ཏིང་འཛིན་གྱིས། །རིགས་གསུམ་བསྟན་པ་རྒྱས་མཛད་རྣམས་ལ་འདུད། །ཇི་ལྟར་ཇི་སྙེད་མཁྱེན་པའི་རྒྱལ་བ་དང་། །གང་ཞིག་གང་གིས་ཆགས་བྲལ་ལུང་བཅས་ཆོས། །ཕྱིར་མི་ཟློག་པའི་འཕགས་དང་སོ་སྐྱེའི་ཚོགས། །ཕྱག་ཡུལ་ཀུན་ལ་སྒོ་གསུམ་དྭང་བས་མཆོད། །ཐོག་མའི་རྒྱ་ཆེན་ཐུགས་བསྐྱེད་བླ་ན་མེད། །བར་དུ་བརྩོན་པས་ཚོགས་གཉིས་རྫོགས་མཛད་དེ། །ཐ་མ་བསྟན་དང་གྲངས་མེད་འགྲོ་བའི་དོན། །ཕྱོགས་མེད་སྐྱོང་ལ་ཟླ་བྲལ་སྣང་བྱེད་བཞིན། །ཆོས་རྒྱལ་རིམ་བྱོན་རྣམས་ལ་གུས་པས་བསྟོད། །བསྟན་འཛིན་ཀུན་གྱི་གཙུག་རྒྱན་ས་སྐྱ་པ། །སྦྱིན་བདག་ཀུན་གྱི་མཆོག་གྱུར་ཆོས་རྒྱལ་རྣམས། །རྣམ་པ་ཀུན་ཏུ་མཆོད་ཡོན་དམ་ཚིག་གིས། །ཕུན་ཚོགས་ཀུན་གྱི་འབྱུང་གནས་སྡེ་དགེ་ཞེས། །བྱང་ཕྱོགས་འཛིན་མའི་ཁྱོན་ཀུན་ཡོངས་སུ་གྲགས། །དེ་ཕྱིར་མཆོད་ཡོན་དམ་པའི་བྱུང་བ་འགའ། །ཇི་ལྟར་འཚམས་པ་རང་གཞན་ཐམས་ཅད་ལ། །ཉན་བཤད་སྒོ་ནས་བསོད་ནམས་སྤེལ་ཕྱིར་དང་། །རང་ཉིད་གོམས་པར་བྱ་ཕྱིར་ཅུང་ཟད་གླེང་། །ཞེས་མཆོད་པར་བརྗོད་པ་དང་བཤད་པར་དམ་བཅའ་བ་སྔོན་དུ་སོང་ནས་བཤད་པར་བྱ་བ་ནི། གངས་ཅན་བསྟན་པའི་མངའ་བདག་དཔལ་ས་སྐྱ་པ་ཆེན་པོའི་རིང་ལུགས་འཛིན་པ་རྣམས་དང་། སའི་ཚངས་པ་ཆེན་པོ་སྡེ་དགེ་ཆོས་རྒྱལ་རིམ་བྱོན་དང་ཐུན་མོང་མིན་པའི་མཆོད་ཡོན་གྱི་འབྲེལ་བ་རྒྱ་ཆེ་གཏིང་ཟབ་ཇི་ལྟར་བྱུང་བ་དང་། དེ་ལས་སྡེ་དགེའི་རྒྱལ་ཁམས་སུ་གཞན་ལས་ཕུལ་དུ་བྱུང་བའི་ཆོས་དང་འཇིག་རྟེན་གྱི་ཕུན་སུམ་ཚོགས་པའི་འབྱོར་པ་ཡུན་རིང་དུ་དར་ཞིང་རྒྱས་ཏེ། བོད་ཆེན་པོའི་ལྗོངས་ཀྱི་སྐྱེ་འགྲོ་རྣམས་བདེ་སྐྱིད་ཀྱི་དཔལ་ལ་ཇི་ལྟར་ལོངས་སྤྱད་པའི་ཚུལ་སོགས་ལས་བརྩམས་ཏེ་སྡེ་དགེའི་རྒྱལ་རབས་མདོ་ཙམ་བཤད་པར་བྱ་བ་ཡིན་ནོ། །དེ་ལ། ཐོག་མར་སྡེ་དགེ་གང་དུ་ཆགས་པའི་ས་ཕྱོགས་ངོས་བཟུང་བ་དང་། ས་གཤིས་ཀྱི་ཁྱད་ཆོས། སྔོན་དུ་ཡུལ་འདི་སྡེ་དཔོན་སུ་ཡིས་བདག་གིར་བཟུང་བ། རྒྱལ་རབས་དངོས་བཤད་པ་དང་བཞི་ལས། དང་པོ་ནི། སྤྱིར་འཛམ་གླིང་འཛིན་མའི་ཁྱོན་ལ་དེང་དུས་གླིང་ཆེན་པོ་དྲུག་ཏུ་དབྱེ་བའི་ཤར་གླིང་ངམ་ཡ་གླིང་གི་ནང་གསེས་བོད་ཡུལ་དུ་གྲགས་པ་འདི་ལ་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཏུ་གྲགས་པ་ལས་ཕྱི་མ་འབྲི་རྫ་ཟལ་མོ་སྒང་ཞེས་འབྲི་ཆུ་དང་། རྫ་ཆུ་གཉིས་ཀྱི་བར་དུ་སྡེ་དགེའི་རྒྱལ་ས་ལྟེ་བ་དཔལ་ལྡན་ལྷུན་གྲུབ་སྟེང་ཞེས་པར་ཆགས་ཡོད། ས་དཔྱོད་ལ། ཇི་སྐད་དུ། དྷ་བཛྲ་༼ཆོས་ཀྱི་རྡོ་རྗེ༽ྎས་ལུང་བསྟན་དེ་ཇི་བཞིན། །མངོན་གྱུར་དངུལ་མདའ་ཞེས་པ་ཡུལ་གྱི་མཆོག །ནང་གི་ཕྱོགས་མཚམས་བཀྲ་ཤིས་རྟགས་བརྒྱད་བཀྲ། །ཤར་ཕྱེས་ལྷོ་སྤུངས་ནུབ་འདུད་བྱང་སྐྱོབ་པ། །ས་རྡོ་ཆུ་ཤིང་འབྲོག་སོགས་དགེ་བཅུའི་དཔལ། །གཡས་རི་གཡུ་འབྲུག་ནམ་མཁའ་འཕྱོ་འདྲའི་གདོང་། །སྲིད་ན་ཟླ་བྲལ་སྙན་གྲགས་སྒྲ་ཆེ་ཞིང་། །ལུགས་ཟུང་ཕྲིན་ལས་རྡོ་རྗེའི་མེ་ཆར་གྱིས། །ཕས་རྒོལ་དགྲ་སྡེ་ཐལ་བར་གཞོམ་པའི་རྟགས། །ཞེས་སོགས་གསུངས་པ་ལྟར། ཤར་ཕྱེས་ལྷོ་སྤུངས་ནུབ་འདུད་བྱང་སྐྱོབ་པ། ས་རྡོ་ཆུ་ཤིང་སོགས་ཡུལ་གྱི་དགེ་བཅུའི་དཔལ་དང་ལྡན་པ། གཡས་རི་གཡུ་འབྲུག་ནམ་མཁར་འཕྱོ་འདྲ་སྲིད་ན་འགྲན་ཟླ་བྲལ་བའི་སྒྲ་ཆེར་སྒྲོགས་པ། གཡོན་རི་གླང་ཆེན་ནོར་བུས་བརྒྱན་འདྲ་སྲིད་ཞིའི་ཕུན་ཚོགས་འདོད་རྒུ་སྩོལ་བ། མདུན་རི་སྒྲོམ་བུ་སེངྒེ་འགྱིང་འདྲ་ལུགས་གཉིས་ཁྲིམས་ཀྱི་ང་རོ་མཐོན་པོས་སྡིག་སྤྱོད་ཝ་སྐྱེས་ཀྱི་ཀླད་པ་འགེམས་པ། རྒྱབ་རི་བྲག་དཀར་པུསྟཀ་བརྩེགས་འདྲ་དམ་པ་ཆོས་ཀྱི་བཤད་སྒྲུབ་རྒྱུན་མི་ཆད་པ་འབྱུང་བའི་རྟགས། ནུབ་ཕྱོགས་མཛེས་པར་བྱེད་པ་རྨ་བྱ་ར་བའི་གདོང་ཐབས་ལྡན་སྲིད་སྐྱོང་ཆོས་བསྟན་རྒྱས་པ། གཡས་གཡོན་ཆུ་གཉིས་མདུན་དུ་འདུས་པས་ཁམས་གསུམ་དབང་དུ་སྡུད་པའི་ཆོས་རྒྱལ་འབྱུང་བའི་རྟགས་དང་། གཞན་ཡང་གནམ་འཁོར་ལོ་རྩིབས་བརྒྱད། ས་པདྨའདབ་བརྒྱད། ནང་གི་ཕྱོགས་མཚམས་སུ་གདུགས་དང་རྒྱལ་མཚན། གསེར་ཉ་སོགས་བཀྲ་ཤིས་པའི་རྟགས་ཀྱིས་མཚན་པ་ཡོད། དེང་སྐབས་འཛམ་གླིང་ས་ཁྲའི་ཤར་གྱི་གཞུང་ཐིག་༩༨་༣༤་བྱང་གི་འཕྲེད་ཐིག་༣༡་༤༨་འབྲེལ་མཚམས་ཡིན་ལ། རྒྱ་མཚོའི་ངོས་ལས་མཐོ་ཚད་སྤྱི་ཁྲེ་༣༢༤༠་ཡིན། སྡེ་དགེའི་མངའ་ཁོངས་ཀྱི་ས་མཚམས་ཤར་དུ་གླིང་ཚང་དང་། དཀར་མཛེས། ཉག་རོང་། ལྷོར་འབའ་དང་། སྨར་ཁམས། ནུབ་ཕྱོགས་གོ་འཇོ་དང་། ལྷ་ཐོག །ནང་ཆེན། བྱང་དུ་སྐྱེ་སྐུ་སོགས་མཚོ་སྔོན་ཕྱོགས་དང་འབྲེལ་ཡོད། སྔར་ལྷ་སྲས་ཚེ་དབང་བདུད་འདུལ་སྐབས་ཙམ་གྱི་སྡེ་དགེའི་སྲིད་འཛིན་ས་ཁུལ་གྱི་ས་ཁྲ་ཞིག་ལག་སོན་བྱུང་བ་འདིར་དཔྱད་གཞིར་བཀོད་ཡོད་ཀྱང་། ས་མཚམས་སོགས་ངེས་ཏིག་ཡོད་མེད་མ་ཤེས། གཉིས་པ་ས་གཤིས་ཀྱི་ཁྱད་ཆོས་ནི། སྤྱིར་འཛམ་གླིང་གོ་ལའ་ིནང་ནས་གངས་ཅན་བོད་ཀྱི་ཆགས་ཡུལ་འདི་ནི། བལ་རྗེའི་ཞལ་ནས། བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་དྲོ་བ་ལྷ་གནས་གཞལ་ཡས་ཁང་། །ཆུ་བོ་བཞི་འབབ་རྒྱ་མཚོ་བཞི་ཡིས་མཛེས། །འབྲུ་སྣ་སྣ་ཚོགས་རིན་ཆེན་སྣ་ཚོགས་འབྱུང་། །ཞེས་དང་། རྒྱ་རྗེས། བོད་ཅེས་བྱ་བ་ཁ་བ་ཅན་གྱི་ཡུལ། །ཡུལ་ལ་ཁྱད་དུ་འཕགས་པ་དེ་ཡིན་ཏེ། །གངས་རི་རང་བྱུང་མཆོད་རྟེན་ཡ་མཚན་ཅན། །ལྷུན་གྱིས་གྲུབ་པའི་གནས་མཆོག་དམ་པ་ནི། །མཚོ་བཞི་གཡུ་ཡི་མཎྜལ་བཀྲམ་པ་འདྲ། །ཐང་བཞི་རང་བཞིན་མཆོད་པ་བཤམས་པ་འདྲ། །ཆུ་བོ་བཞི་ཡི་མགོ་བཞི་རང་བཞིན་ཅན། །རི་མཐོ་ས་གཙང་གངས་རི་གཉན་གྱི་ལྗོངས། །བཀྲ་ཤིས་ཉམས་དགའ་གཡུང་དྲུང་བྲིས་པ་འདྲ། །ཞེས་གསུངས་པ་ལྟར། ས་ཆ་ཁ་མཐོ་བས་ས་གཞི་གཙང་ཞིང་། མཁའ་རླུང་དྭངས་བ། འབབ་ཆུ་གཙང་ཞིང་དྭངས་པ། རི་བྲག །ནགས་ཚལ། གངས་རི། སྤང་ལྗོངས། མཚོ་དང་མཚེའུ། ནེའུ་གསེང་སོགས་རྣམ་པ་སྣ་ཚོགས་པས་ཁྱབ་པ། རྩི་བཅུད་མེ་ཏོག་རིགས་མི་འདྲ་བ་དུ་མས་སྤྲས་པ། སྐྱེད་ཚལ་མ་བསྐྲུན་རང་གྲུབ་ལྟ་བུ་ཡོད་ལ། དེའི་ཡུལ་གྱི་བྱེ་བྲག་མདོ་ཁམས་སྡེ་དགེའི་ས་ཆ་ནི། གཙོ་ཆེར་ནགས་རི་སྟུག་པོ་དང་། ཨུཏྤ། སྤང་རྒྱན་སོགས་མེ་ཏོག་གི་རིགས་དབྱིབས་དང་ཁ་དོག་སྣ་ཚོགས་པས་སྤྲས་པའི་སྤང་ལྗོངས་ཀྱིས་ཁྱབ་ཡོད། ནང་གསེས་ཟིལ་ཆུའི་རྒྱུད་སྟོད་སྨད། ཤར་དུ་སྨན་ཤོད། གཏེར་ལྷུང་། འཛིང་ཁོག་སོགས། ལྷོར་དཔལ་ཡུལ། ས་དམར། སྒ་རྗེ། ས་ངན། དཔེ་ཝར་ཉིན་སྲིབ་སོགས། ནུབ་ཕྱོགས་སུ་རི་མདའ། ཡེ་རབ། གོ་འཇོ། འཇོ་མདའ། ཛཾ་ཐོག་སོགས། བྱང་དུ་འདན་ཁོག །མཁར་མདོ་སོགས་ཞིང་པའི་ས་ཁུལ་ཡིན་ཞིང་། ས་གཞི་ཁད་དམའ་ལ། ནགས་རི་དང་། སྤང་ལྗོངས། བྲག་རི་སོགས་ཀྱིས་གཞི་རྒྱ་ཆེ་བར་བཟུང་། ཞིང་པའི་ས་ཁུལ་དེ་དག་ཏུ་ནས། གྲོ། སྲན་མ། བྲ་བོ་སོགས་འབྲུ་རིགས། ཡུངས་མ། ལ་ཕུག །ཞོག་ཁོག །པད་ཚལ་སོགས་སྔོ་ཚལ་སྣ་ཚོགས་ཀྱི་ཐོན་ཁུངས་བཟང་པོ་ཡོད། ཁྱིམ་ཚང་རེ་རེ་བཞིན་ས་ཆའི་ཁྱད་ཆོས་ལྟར་ནོར་ཕྱུགས་དཀར་ནག་ཀྱང་ཅི་རིགས་ཡོད། འདི་དག་ཕལ་ཆེར་ཡུལ་མ་འབྲོག་གི་ས་ཁུལ་ཀྱང་ཡིན། ཤར་དུ་ཡིད་ལྷུང་། ཤུ་གུ། ཁྲམ་ཁོག་སོགས། ནུབ་ཏུ་འཛི་སྒར། སྐྱབས་ཀྱེ། སིབ་མདའ་སོགས་ཕྱི་འབྲོག་ཁག །བྱང་དུ་དགེ་རྩེ་གོང་འོག །སེར་ཤུལ། རྫ་སྟོད་སོགས་འབྲོག་ཁུལ་ཡིན་ཅིང་། ས་ཆ་ཁ་མཐོ་ཞིང་རྒྱ་ཡངས་པ། གཙོ་ཆེར་རྩ་ཐང་ལ་རྩི་བཅུད་མེ་ཏོག་རྣམ་པ་སྣ་ཚོགས་པས་སྤྲས་པ། རི་རྩེ་རྣམས་སྲིད་པའི་གངས་རྒན་གནམ་སྔོན་ལ་ཀ་བ་བཙུགས་པ་ལྟ་བུ། ཁ་དོག་སྣ་ཚོགས་པའི་རྫ་བྲག་གི་རི་བོ་རིན་པོ་ཆེ་སྣ་ཚོགས་ཀྱི་ཕུང་པོ་སྤུངས་པ་ལྟ་བུ་ཡོད། འབྲོག་ཁུལ་དེ་དག་ལ་ཤ་མར་དང་། སྤུ་རིགས་སྣ་ཚོགས་ཀྱི་ཐོན་ཁུངས་ཕུན་སུམ་ཚོགས་པ་ཡོད། གཞན་ཡང་རྒྱལ་ཁམས་ཡོངས་ལ། གསེར་དངུལ་ཟངས་ལྕགས་སོགས་ལྕགས་རིགས་དང་། རྫས་འགྱུར་རིགས་སྣ་ཚོགས་ཀྱི་གཏེར་རྫས་རིགས་མི་འདྲ་བ་དུ་མ་ཡོད། སྲོག་ཆགས་དང་། རྩི་ཤིང་གི་རིགས་མི་འདྲ་བ་དུ་མ་ལས་བྱུང་བའི་སྨན་རྫས་ཀྱིས་རི་ཀླུང་ཀུན་ཏུ་ཁྱབ་ཡོད་ལ། ཤྭ་སྐྱའི་བོག་རྭ། གླ་རྩི། དོམ་མཁྲིས། སྟག་གཟིག་གི་ཤ་ལྤགས་སོགས་དང་། དབྱར་རྩ་དགུན་འབུ། ཨ་བི་ཤ་སོགས་འཛམ་གླིང་ཐོག་མཐོང་ཆེན་བྱེད་པའི་སྨན་རྫས་དཀོན་པའི་རིགས་ཀྱང་མང་དུ་ཡོད། གནམ་གཤིས་ནི་སྡེ་དགེའི་མངའ་ཁོངས་སུ་སྤྱིར་བཏང་རྒྱ་དཀར་ནག་སོགས་ལས་གྲང་། བྱེ་བྲག་ཞིང་པའི་ས་ཁུལ་ཁག་སོགས་ས་གཞི་ཁད་དམའ་སར་དགུན་དུས་ཟླ་བ་གཅིག་གཉིས་ཙམ་རིང་ཆུ་འཁྱག་རོམ་དུ་འགྲོ་བ་དང་ཁ་བ་འབབ། འབྲོག་ཁུལ་དུ་ཟླ་བ་གཉིས་གསུམ་ཙམ་རིང་འབབ་ཆུ་འཁྱག་ཏུ་འགྱུར་ཞིང་། ཁ་ཆར་བུ་ཡུག་འཚུབ་པ་སོགས་སྐབས་འགར་གྲང་ངར་ཆེ་བས་ལྷགས་སྐྱོབས་སུ་པགས་གོས་གྱོན་དགོས་པ་ཡོད། འོན་ཀྱང་ཡུལ་དེར་སྐྱེས་པའི་མི་རྣམས་གྲང་ངར་ལ་ཞེད་སྣང་མེད། དཔྱིད་དང་དབྱར་སྟོན་སོགས་ཆར་ཆུ་ཁོད་སྙོམས་ཤིང་། སྐབས་སྐབས་སུ་རི་མགུལ་རྣམས་ཆུ་འཛིན་དཀར་པོའི་གོས་གྱོན་ཞིང་། སྐབས་འགར་འཇའ་སྤྲིན་ཁ་དོག་སྣ་ཚོགས་པ་བཀྲ་བ་ཡོད་དོ། །གསུམ་པ་སྡེ་དགེའི་རྒྱལ་བརྒྱུད་མ་བྱུང་བའི་སྔོན་དུ་ཡུལ་འདིར་སྡེ་དཔོན་སུ་ཡིས་བདག་གིར་བཟུང་བའི་སྐོར་ལ། འཛམ་གླིང་ན་མི་རིགས་དཀར་པོ་དང་། སེར་པོ། ནག་པོ་སོགས་ཀྱི་དབྱེ་བ་ལས་བོད་མིའི་འགྲོ་བ་ནི། མི་རིགས་སེར་པོའི་ཁོངས་སུ་བསྡུ། ནང་གསེས་མིའུ་གདུང་དྲུག་དང་། རུས་ཆེན་བཅོ་བརྒྱད་སོགས་ཀྱི་དབྱེ་བ་ལས་མདོ་ཁམས་སྡེ་དགེའི་ཕྱོགས་འདི་ནི་སྨུག་པོ་ལྡོང་གི་རུས་རྒྱུད་གཙོ་ཆེར་ཡིན། མདོ་ཁམས་འདིར་ལྡོང་ཤུལ་ཆེན་བཅོ་བརྒྱད་དུ་གྲགས་པ་ལས་དབལ་ཤུལ་ལས་ཆད་པ་ཡིན་ཚུལ་མདོ་སྨད་ཆོས་འབྱུང་དུ་བཤད། དེང་དུས་བརྟགས་ཤིང་དཔྱད་ན། སྡེ་དགེ དཀར་མཛེས། ཉག་རོང་། གོ་བྲག །རི་ཆབ། སྐྱེ་རྒུ། གླིང་ཚང་སོགས་ཀྱི་ས་ཁུལ་དུ་མི་རྣམས་བྱད་དབྱིབས་དང་སྐད་གཤིས་མཚུངས། དེའང་བསྐལ་པ་ཡ་ཐོག་ཏུ་རུས་ཚོ་རྣམས་ཀྱིས་ལུང་ཚན་རེ་བདག་གིར་བཟུང་སྐབས། ཡུལ་ཕྱོགས་འདི་གཙོ་ཆེར་འབྲོག་སྡེ་ལྟ་བུ་སྦྲ་གུར་ལ་བརྟེན་བཅས་ཏེ་གནས་སྤོ་བྱེད་པ་ཞིག་ཡིན་སྐད། དེ་ནས་ཞང་ཞུང་གི་རྒྱལ་པོ་ཁྲི་ཝེར་གསེར་གྱི་བྱ་རུ་ཅན་སོགས་ཀྱི་དུས་སྐབས་ཞང་ཞུང་གི་ཁོངས་སུ་གཏོགས། སྐབས་དེར་ཞང་ཞུང་སྒོ་ཕུགས་བར་གསུམ་ཞེས་པའི་ཐ་སྙད་ལ། ད་ལྟའི་སྟོད་མངའ་རིས་ལ་དྭགས་དང་བཅས་པར་ཞང་ཞུང་ཕུགས་དང་། དབུས་གཙང་གི་ཕྱོགས་ལ་ཞང་ཞུང་བར། མདོ་ཁམས་ཀྱི་ཕྱོགས་ལ་ཞང་ཞུང་སྒོ་ཞེས་གྲགས་པའི་ཕྱི་མའི་ཁོངས་སུ་ཡོད་པ་བོན་གྱི་ལོ་རྒྱུས་སུ་གསལ་བར་བཤད། དེ་ནས་མི་རབས་བདུན་ཙམ་ན་བོད་རྗེ་གཉའ་ཁྲི་བཙན་པོ་བྱུང་། འདི་ལོ་གནས་བརྟན་སྡེ་བའི་སྟོན་པའི་འདས་ལོ་སུམ་བརྒྱ་དང་བདུན་པ་ཤིང་བྱི་ལོ། ཕྱི་ལོའི་སྔོན་གྱི་ལོ་༢༣༧་པ་ཡིན། དེ་ནས་ཞང་ཞུང་གི་སྟོབས་ཤུགས་ཟད་དེ། དབུས་གཙང་ཕལ་ཆེར་བོད་ཀྱི་བཙན་པོ་རྣམས་ཀྱིས་བཟུང་། སྟོད་མངའ་རིས་ཕྱོགས་ཞང་ཞུང་དང་། སྨད་མདོ་ཁམས་ཕྱོགས་རྣམས་ཕ་ཚོ་སོ་སོས་བཟུང་། རྒྱ་ནག་གི་ལོ་རྒྱུས་ལ་དཔྱད་ན་ཏུང་ཧན་རྒྱལ་རབས་དང་དུས་མཚུངས། དེ་ནས་བོད་ཀྱི་རྒྱལ་པོ་སྲོང་བཙན་སྒམ་པོའི་སྐུ་དུས་སུ་བོད་ཡོངས་རྫོགས་གཅིག་གྱུར་ཙམ་དུ་མ་ཟད། རྒྱ་ནག །འཇང་ཡུལ། ལི་ཡུལ། རྒྱ་གར་སོགས་ཀྱི་ས་ཆ་མང་པོ་བདག་གིར་བཟུང་བའི་ལོ་རྒྱུས་རྒྱ་བོད་ཡིག་རྙིང་ཁག་ལས་གསལ་དོན་བཞིན། ཡུལ་འདིར་བོད་ཆེན་པོའི་རྒྱལ་ཁོངས་སུ་གཏོགས། བོད་སིལ་བུར་འཐོར་སྐབས་ཀྱི་སྔ་ཕྱི་ཙམ་ནས་ཡུལ་འདི་མདོ་ཁམས་གླིང་ཁྲི་གོང་འོག་བར་གསུམ་ཞེས་པའི་ཐ་སྙད་བྱུང་བ་ལས། གླིང་ཁྲི་བར་མའི་ཁོངས་སུ་གཏོགས་ཚུལ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་གསུངས། བཞི་པ་སྡེ་དགེའི་རྒྱལ་རབས་དངོས་བཤད་པ་ལ་དོན་ཚན་བཞི་ཡོད་པ་ལས། དང་པོ་ལ། སྡེ་དགེའི་གདུང་རབས་དང་། རྒྱལ་རབས། ཁྲི་རབས་རིམ་བྱུང་གི་ལོ་རྒྱུས་ནི། དེ་ཡང་མདོ་ལས། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་རིགས་ཕུན་སུམ་ཚོགས་པ་གང་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་ཆེན་པོ་དག་ཏུ་སྐྱེ་སྟེ། དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་རིགས་ཕུན་སུམ་ཚོགས་པ་ཡིན་ནོ། །ཞེས་སོགས་གསུངས་པ་ལྟར་རིགས་རུས་ཆོ་འབྲང་ཕུན་སུམ་ཚོགས་པའི་ཆོས་རྒྱལ་ཆེན་པོ་འདིའི་གདུང་རིགས་ཇི་ལྟར་བྱུང་བ་ནི། དཔལ་ས་སྐྱོང་སྡེ་དགེ་ཆོས་ཀྱི་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་འདོད་དགུ་རབ་འཕེལ་ལས། བོད་ཆེན་ལྗོངས་ཀྱི་འགྲོ་བ་འདི་དག་ཀུན། །སྒོ་འབྲུ་སྦྲ་གདོང་བཞི་ལས་ཆད་མོད་ཀྱང་། །དེ་དག་ཀུན་གྱི་ཞང་པོར་འོས་པ་ཡི། །ཚེ་རིང་གནམ་གྱི་མཐོང་ནས་འོད་གསལ་ལྷ། །བསམ་བཞིན་མི་ཡི་རྗེ་བོར་ཕེབས་པ་ཡི། །ཞང་པོ་ལྷ་སྡེ་དཀར་པོ་སྒོ་རིགས་ལས། །ཆད་དེ་སྟོད་སྨད་ཕྱོགས་སུ་ཡོད་ནང་ནས། །རྔུ་ཆེན་རྒྱལ་མོ་ཚོ་ཆེན་བཅོ་བརྒྱད་ལས། །ཞེས་སོགས་དང་། ལྷ་བབས་ནས་བརྒྱུད་སྟོང་བཙན་ཡུལ་སྲུང་ནས། །ད་ལྟའི་བར་དུ་རིམ་པར་དྲངས་པ་དང་། །དེ་ལས་རྔུ་ཚོ་ཉེར་གཅིག་གྱེས་ཚུལ་བཤད། །སོགས་དང་། གྲུབ་དབང་སངས་རྒྱས་རྒྱ་མཚོའི་ཞལ་སྔ་ནས། སྟོང་བཙན་ལྷ་རིགས་སྒོ་ཡི་གདུང་རིགས་ལས། །གསུངས་དང་དེ་མཐུན་རྗེས་འབྲངས་འཆད་པ་ལ། །བོད་ལྗོངས་འགྲོ་འདི་ཆགས་ནས་རིང་ཞིག་ནས། །འཆི་མེད་ལམ་ནས་འོད་གསལ་ལྷ་ཡི་བུ། །ཤར་ཕྱོགས་བཞག་ར་ལྷ་རྩེའི་རྩེ་མོར་བབས། །དེ་དུས་མི་རྣམས་ཀྱིས་ནི་ནམ་མཁའ་ལས། །བབས་དེའི་རྒྱུ་མཚན་བྱས་ཏེ་དེ་ཉིད་ལ། །མཚན་འགར་གནམ་ཚ་འབྲུག་ཅེས་བྱ་བར་གྲགས། །དེ་ཡི་ཁྱད་ཆོས་དང་པོ་ལྷ་བབས་ཞེས། །འབོད་པའི་གཏན་ཚིགས་ལེགས་བྲིས་པ་རྣམས་ནི། །ཐར་པ་ཆ་མཐུན་འབྲས་བུ་ལས་སྐྱེས་པ། །སེམས་རྒྱུད་ཞི་ཞིང་དུལ་ལ་གཙང་སྦྲ་དང་། །ལྡན་པས་འགྲོ་རྨོངས་གཞན་ལས་ཁྱད་འཕགས་སུ། །བསྔགས་སོ་སྙམ་ན་དེ་ཡི་རིགས་སོན་ཀུན། །བྱིངས་དང་མི་འདྲ་བ་ཞིག་དགོས་པར་མངོན། །ཞེས་གསུངས་ཏེ། སྤྱིར་བོད་ཀྱི་འགྲོ་བ་ཕལ་མོ་ཆེ་དག་ནི་སྒོ་འབྲུ་སྦྲ་སྡོང་སྟེ་རུས་ཆེན་བཞི་ལས་ཆད་ཅིང་། ལྔ་པ་དེ་རྣམས་ཀྱི་ཞང་པོར་འོས་པ་སྒོ་ལྷ་སྡེ་དཀར་པོའི་རིགས་ཏེ། དེ་ལས་རྔུ་ཆེན་རྒྱལ་མོ་ཚོ་བཅོ་བརྒྱད་དུ་གྲགས་པ་བྱུང་སྟེ། དེའང་འགར་༼ཚེ་བརྟན་ཞབས་དྲུང་གིས་འགར་ཞེས་བྲིས་ཡོད༽ཀེ་འགོར་གསུམ། གསུང་གསེར་འབྲོམ་གསུམ། ཤོལ་སྟག་འཕྱང་གསུམ། ཅི་འབུ་གཞག་གསུམ། གཅེ་སིང་རམ་གསུམ། ཕྱུག་པོ་བུ་གསུམ་སྟེ་བཅོ་བརྒྱད་ལས་འདི་འགར་གྱི་རིགས་སོ། །དེའང་ཤར་མི་ཉག་གཞག་ར་ལྷ་རྩེའི་རྩེ་མོ་ལ། སྟེང་འོད་གསལ་གྱི་ལྷ་ཞིག་བབས་པས་དེའི་རྒྱུ་མཚན་གྱིས་འགར་གནམ་ཚ་འབྲུག་ཅེས་གྲགས། དེ་ནི་སེམས་རྒྱུད་ཞི་ཞིང་གཙང་སྦྲ་དང་ལྡན་པ་ཞིག་ཡོད་ཅེས་གྲགས་ཏེ། འདི་ནི་རྒྱལ་རབས་འདིའི་འབྱུང་ཁུངས་ཡིན་ནོ། །འདི་ནས་གདུང་རབས་ཀྱི་གྲངས་བགྲང་བ་དང་། འགར་སྟོང་བཙན་ནས་བགྲང་བའི་བགྲང་ཚུལ་མི་འདྲ་བ་གཉིས་བྱུང་ངོ་། །དེའི་སྲས་འགར་བླ་མཆན་ཆེན་པོ། དེ་སྲས་འགར་སྟོང་མེས་ཁྲི་ཆགས་སོ། །ཡང་དེ་ཉིད་ལས། དེ་སྲས་ཕྱག་ན་པད་དཀར་འཆང་། །མི་རྗེའི་ཚུལ་བསྟན་སྲོང་བཙན་སྒམ་པོའི་དུས། །བློན་པོའི་མཆོག་གི་ཡ་གྱལ་གསང་བདག་གི། །རྣམ་སྤྲུལ་སྟོང་བཙན་ཡུལ་སྲུང་ཞེས་གྲགས་པ། །རྒྱ་བལ་ཡུལ་ནས་ཨཱཏཱ་རེ་མ། །རྣམ་གཉིས་སྤྱན་དྲངས་ཚུལ་དང་ཆབས་ཅིག་ཏུ། །སྟོན་པའི་ཞལ་སྐྱིན་ཇོ་ཤཱཀ་ཡིད་བཞིན་ནོར། །བྷ་ཊའི་བསོད་ནམས་མགྲོན་དུ་སྤྱན་དྲངས་ཚེ། །ཆོས་བློན་སྟོང་བཙན་ཡུལ་སྲུང་འདི་ཉིད་ཀྱིས། །རིག་པའི་འཕྲུལ་གྱིས་ཡ་མཚན་མཛད་པའི་ཚུལ། །འགྲན་བྲལ་བསམ་གྱིས་མི་ཁྱབ་སྟོན་པ་ཡི། །སྙན་པའི་གྲགས་པས་ལྷ་མི་ཀུན་ལ་ཁྱབ། །ཅེས་གསུངས་ཏེ། དེ་སྲས་འཕགས་མཆོག་ཕྱག་ན་པདྨ་མི་རྗེའི་ཚུལ་དུ་བྱོན་པ་ཆོས་རྒྱལ་སྲོང་བཙན་སྒམ་པོའི་འཕྲུལ་གྱི་བློན་པོ་མཆོག་ཟུང་གི་ཡ་གྱལ། གསང་བདག་ཕྱག་ན་རྡོ་རྗེའི་རྣམ་འཕྲུལ་འགར་སྟོང་བཙན་ཡུལ་བཟུང་ཞེས་སམ་འགར་བློན་རིག་པ་ཅན་ཞེས་པ་ཆོས་རྒྱལ་ཆེན་པོས་འཕགས་མའི་རྣམ་འཕྲུལ་རྒྱ་བཟའ་ཀོང་ཇོ་དང་། བལ་བཟའ་ཁྲི་བཙུན་གཉིས་དང་ཆབས་ཅིག་སྟོན་པའི་ཞལ་སྤྱིན་ཇོ་ཤཱཀ་རྣམ་གཉིས་༼༡༽ཇོ་བོ་ཤཱཀྱམུནི་ཞེས་པ་སངས་རྒྱས་ཤཱཀྱ་ཐུབ་པ་དགུང་གྲངས་བཅུ་གཉིས་ལ་ཕེབས་པའི་སྐུ་ཚད་དང་མཐུན་པའི་ལྷ་སྐུ་ཞིག་སྟེ། ཆོས་རྒྱལ་སྲོང་བཙན་སྒམ་པོའི་སྐུ་དུས་རྒྱ་བཟའ་ཀོང་ཇོའི་རྟེན་སྐལ་ལ་བོད་དུ་གདན་དྲངས་ཏེ་ད་ལྟ་ལྷ་ས་གཙུག་ལག་ཁང་དུ་བཞུགས་པའི་སྐུ་ངོ་མཚར་ཅན་ཞིག༼༢༽ཇོ་བོ་མི་བསྐྱོད་རྡོ་རྗེ་ནི་སངས་རྒྱས་ཤཱཀྱ་ཐུབ་པ་དགུང་ལོ་བརྒྱད་ཕེབས་ཀྱི་སྐུ་ཚད་དང་མཐུན་པའི་ལྷ་སྐུ་ཞིག་སྟེ། ཆོས་རྒྱལ་སྲོང་བཙན་སྒམ་པོའི་སྐུ་དུས་བལ་བཟའ་ཁྲི་བཙུན་གྱི་རྟེན་སྐལ་ལ་བོད་དུ་གདན་དྲངས་པའི་སྐུ་ངོ་མཚར་ཅན་ཞིག༽གངས་ཅན་འགྲོ་བའི་བསོད་ནམས་ཀྱི་ཞིང་དུ་སྤྱན་དྲངས་པའི་ཚེ། རིག་པའི་འཕྲུལ་ཡ་མཚན་པ་བསམ་གྱིས་མི་ཁྱབ་པ་སྟོན་པས་སྙན་གྲགས་ཕྱོགས་ཀུན་ཁྱབ། དེའང་བློན་ཆེན་འདི་ཉིད་བློ་རྩལ་དཀྱེལ་ཆེ་ཞིང་ངང་རྒྱུད་བརྟན་ལ་ཁྱད་པར་དམག་བཀོད་ལ་མཁས་པས་བོད་རྒྱལ་སྲོང་བཙན་སྒམ་པོའི་སྐུ་ཚེ་ཧྲིལ་པོ་ཕྱི་ལོ་༦༡༦་༩༨དང་། སྲོང་བཙན་གཤེགས་རྗེས་བཙན་པོ་མང་སྲོང་མང་བཙན་སྐུ་ན་ཤིན་ཏུ་ཕྲ་བ་བོད་ཀྱི་སྲིད་ཁྲིར་བཀོད་དེ། ཆབ་སྲིད་ཀྱི་གཉེར་ཁ་ཐམས་ཅད་མི་ལོ་བཅོ་ལྔའི་བར་དུ་དམ་པ་འདི་ཉིད་ཀྱིས་བསྐྱངས། དེའི་རིང་ལ་བོད་ཆེན་པོའི་རྒྱལ་ཁག་གཅིག་གྱུར་ཙམ་དུ་མ་ཟད་ཕྱོགས་ཀྱི་རྒྱལ་ཁབ་མང་པོའི་མངའ་ཁོངས་བདག་གིར་བྱས་པའི་ལོ་རྒྱུས་རྒྱ་བོད་ཡིག་རྙིང་དག་ལས་བྱུང་བས་ཡོངས་གྲགས་ལྟར་ལ། འདིར་རྒྱ་ཡི་ལོ་རྒྱུས་ཐང་ཡིག་རྙིང་མ་ལས་འབྱུང་བའི་དུམ་བུ་ཞིག་ངོས་བཤུས་བྱས་པ། ཡུན་ཧོས་ཀྱི་ཁྲི་ལོ་དང་པོར་ཕྱི་ལོ་༦༥༠། ཁྲི་སྲོང་བཙན་བཀྲོངས། གོང་མ་ཀོ་ཙུང་གིས་མྱ་ངན་ཞུས། གཡས་རུའི་དྲག་དཔོན་ཞན་ཡུས་ཁྲིན་ཅི་བྱ་བ་ལ་གོང་མའི་བཀའ་ཡིག་ཕྱག་རྒྱ་ཅན་གནང་སྟེ་འདས་མཆོད་དུ་མངགས། སྲོང་བཙན་གྱི་སྲས་ཆུང་ངུ་ནས་ཤི་བས་ཚ་བོ་ཞིག་རྒྱལ་སར་འཁོད། དེ་ལའང་བཙན་པོར་འབོད། དེ་དུས་ཁོང་ལོ་ན་ཕྲ་བས་སྲིད་ཀྱི་བྱ་བ་རྣམས་འགར་སྟོང་བཙན་ལ་བཅོལ། སྟོང་བཙན་གྱི་རུས་ནི་འགར་ཡིན། འགར་གྱིས་ཡི་གེ་མི་ཤེས་ཀྱང་། རང་བཞིན་གྱིས་རིག་པ་རྣོ་ཞིང་ངང་ཚུལ་བརྟན་ལ། གཡུལ་གྱི་བྱ་བ་ལ་ཤིན་ཏུ་མཁས། བོད་ཀྱིས་འཇང་བ་རྣམས་དབང་དུ་བསྡུ་ཐུབ་པ་ནི། བོད་ཀྱི་དབང་ཤུགས་བཙན་པ་དང་འགར་གྱི་བློ་ཐབས་རྣོ་བར་བརྟེན་པ་རེད། དང་ཐོག་གོང་མ་ཐེ་ཙུང་གིས་ཝུན་ཁྲིན་ཀོང་ཇོ་བག་མར་རྫོངས་སྐབས། བཙན་པོས་འགར་སྟོང་བཙན་ཀོང་ཇོ་བསུ་བར་མངགས་ཤིང་། གོང་མས་མཇལ་ཁ་གནང་དུས་འགར་གྱིས་སྨྲས་པའི་གཏམ་རྣམས་ཀྱང་གོང་མའི་ཐུགས་ལ་བབས་པས། གོང་མ་ཐེ་ཙུང་གིས་ཁོང་ལ་སྣེ་ལེན་བཟང་པོ་བྱས་པ་ནི་རྒྱལ་ཁབ་གཞན་དག་གི་ཕོ་ཉ་བས་འགྲན་དུ་མེད། གོང་མས་འགར་སྟོང་བཙན་ལ་གཡས་རུའི་སྐུ་སྲུང་དམག་དཔོན་ཆེན་མོ་༼ཡུག་ཝེ་ཏ་ཅང་ཅུན༽བྱ་བའི་ཆོ་ལོ་སྦྱར། གོང་མས་ལང་ཞེ་ཁྲང་ཀོང་ཇོ་བྱ་བའི་ཚ་མོ། རུས་རྒྱུད་དོན་ཡིན་པ་ཞིག་ཆུང་མར་བསྩལ་བ་ལ། འགར་སྟོང་བཙན་གྱིས་ཕྲན་ལ་རང་གི་ཁབ་ཏུ་ཁྱིམ་ཐབ་གཅིག་མཆིས་ཏེ། ཕ་མས་གཉེན་དུ་སྦྲེལ་བ་ཡིན། ཕྲན་ངེད་ཀྱང་ཁོ་མོ་དང་འབྲལ་འདོད་མེད། ལར་བཙན་པོས་ཀོང་ཇོའི་ཞལ་ཀྱང་མ་མཇལ་བར། བློན་པོ་བདག་གིས་ཆུང་མ་ལེན་པའང་མི་རུང་ཞེས་གསོལ་བ། གོང་མའང་ཁོའི་གཏམ་ལ་ཐུགས་མོས་ཤིང་དྲིན་གྱིས་སྐྱོང་བར་དགོངས་ནས་འགར་གྱི་གཏམ་བདེན་དུ་དགོངས་ཀྱང་གསན་དུ་ནི་མ་བཞེད། འགར་སྟོང་བཙན་ལ་སྲས་ལྔ་མཆིས་ཏེ། ཆེ་བ་བཙན་གཉའ་བྱ་བ་སྔར་ནས་འདས། གཉིས་པ་ཁྲི་འབྲིང་། གསུམ་པ་བཙན་བྲོད། བཞི་པ་ཟི་དོ་ཀན། ལྔ་བ་པོ་ལོན་བྱ་བའོ། འགར་སྟོང་བཙན་བཀྲོངས་རྗེས། ཁྲི་འབྲིང་སྤུན་མཆེད་ཀྱིས་སྲིད་བསྐྱངས། དེ་ལྟར་དམ་པ་འདི་ཉིད་ནི་དུས་གསུམ་རྒྱལ་བ་ཀུན་གྱི་མཐུ་སྟོབས་ཐམས་ཅད་གཅིག་ཏུ་བསྡུས་པའི་དཔལ་ཕྱག་ན་རྡོ་རྗེ་མི་ཡི་གཟུགས་སུ་བྱོན་པ། བོད་རྗེ་དམ་པའི་ནང་བློན་ཆབ་སྲིད་ཀྱི་མཛད་རྗེས་བླ་ན་ལྷག་པ་རྒྱུ་མཚན་དུ་བྱེད་ནས། ཆོས་རྒྱལ་སྡེ་དགེའི་གདུང་རབས་ཀྱི་ཐོག་མ་འདི་ནས་བགྲང་སྲོལ་ཡང་ཡོད། འགར་བློན་ཆེན་པོ་དེའི་སྲས་ཡོན་ཏན་རྒྱལ་བཟུང་། དེའི་སྲས་ལྷ་གཅིག་སྙན་ལྡེམ་བུ། དེའི་སྲས་ཁྲི་བཟང་དུམ་བུ། དེ་ལ་སྲས་གཉིས་བྱུང་བའི་སྔ་མ་ཁྲི་གཉེར། དེའི་སྲས་ཁྲི་ལྕགས། དེའི་བརྒྱུད་པ་དབུས་ཕྱོགས་ཚལ་པའི་ཁྲི་དཔོན་བྱུང་ཞེས་གྲགས། ཁྲི་བཟང་དུམ་བུའི་སྲས་གཉིས་པ་འགར་ཆེན་ཨ་མྱེ་དགེ་བ་དཔལ་ནི་གདུང་རབས་འདིའི་གྱེས་གཞི་ཡིན། དེའི་སྲས་ལྷ་རྗེ་བྱམས་པའི་དཔལ་ཏེ་འདིས་སློབ་དཔོན་པདྨི་ཐུགས་སྲས་རྒྱལ་བ་མཆོག་དབྱངས་དང་། འཁོན་སྟོན་ཀླུ་དབང་སྲུང་། གཡུ་སྒྲ་སྙིང་པོ་སོགས་ཀྱི་ཞབས་པད་བསྟེན་ཅིང་ཆོས་ཀྱི་མངའ་བདག་ཏུ་གྱུར། སྐུ་ཚེའི་སྨད་ལ་ཁམས་ཕྱོགས་སུ་བྱོན་ཏེ་འདན་གྱི་བྲག་ར་གླང་ཆེན་དུ་གདན་གཞིས་ཆགས་ནས་བཟུང་གདུང་བརྒྱུད་ཁམས་ཕྱོགས་སུ་བྱུང་། གནས་དེར་སྒྲུབ་པ་མཛད་པས་བྱམས་མགོན་གྱིས་ཞལ་མངོན་སུམ་དུ་བསྟན། བྱམས་ཆོས་སྡེ་ལྔ་ཉེ་བརྒྱུད་དུ་བསྩལ། རྟ་མགྲིན་དང་རྡོ་རྗེ་ཕུར་པས་ཞལ་གཟིགས། དགྲ་བགེགས་ཚར་བཅད་པ་དང་ཆོས་སྐྱོང་བྲན་དུ་འཁོར། འཆི་མེད་གྲུབ་པས་དགུང་ལོ་བརྒྱ་དང་བརྒྱད་ཅུ་རྩ་བཞིའི་དུས་སུ་དྲིལ་སེར་རྟ་སྐད་ཅན་བསྣམས་ནས་སྐུ་ལུས་མ་སྤང་པར་མཁའ་སྤྱོད་དུ་གཤེགས། དེའི་སྲས་དཔལ་གྱི་ཡོན་ཏན། དེའི་སྲས་དཔལ་གྱི་ཕུར་བུ། དེའི་སྲས་དཔལ་གྱི་འབྱུང་གནས། དེའི་སྲས་དཔལ་གྱི་ཤེས་རབ། དེའི་སྲས་དཔལ་གྱི་བཀྲ་ཤིས་ཞེས་པ་དེ་དག་ཀྱང་བྱམས་པའི་དཔལ་དང་དབྱེར་མེད་པའི་གྲུབ་བརྙེས་ཤ་སྟག་བྱུང་ཞིང་། ཕྱི་མ་འདིས་དྲིལ་བུ་ཧཱུྂ་སྒྲ་ཅན་བསྣམས་ཏེ་སྐུ་དངོས་སུ་བྱང་ཕྱོགས་ལྕང་ལོ་ཅན་དུ་གཤེགས་པར་གྲགས། དེའི་སྲས་དཔལ་གྱི་བླ་མ། དེའི་སྲས་བཀྲ་ཤིས་བླ་མ། དེའི་སྲས་ཡོན་ཏན་བླ་མ། དེའི་སྲས་ཤེས་རབ་བླ་མ། དེའི་སྲས་བྱང་ཆུབ་བླ་མ། དེའི་སྲས་གྲགས་པ་རྒྱལ་མཚན། དེའི་སྲས་དཀོན་མཆོག་རྒྱལ་མཚན། དེའི་སྲས་དགེ་འདུན་རྒྱལ་མཚན། དེའི་སྲས་བྱམས་པ་རྒྱལ་མཚན། དེའི་སྲས་ཡེ་ཤེས་རྒྱལ་མཚན། དེའི་སྲས་དཔལ་གྱི་བྱམས་པ་སྟེ་འདིས་གྲུབ་པ་ཐོབ་སྟེ་དགུང་ལོ་བརྒྱ་དང་བརྒྱད་ཅུ་བཞེས་དུས་སྐུ་མ་སྤང་པ་བྱ་རྒོད་ཀྱི་ཐུལ་བ་ཞིག་མནབས་ཏེ་དགའ་ལྡན་བྱམས་པའི་དྲུང་དུ་གཤེགས་པ་ཀུན་གྱི་མཐོང་སྣང་གྲུབ་པ་བྱུང་། དེའི་སྲས་དཔལ་གྱི་འབུམ་པ། དེའི་སྲས་དཔལ་གྱི་གྲགས་པ། དེའི་སྲས་དཔལ་གྱི་རྡོ་རྗེ་ཞེས་པ་དེ་ལས་ཆད་དེ་སྤོ་བོ་ཕུ་ལུང་གི་སྡེ་པ་ཀ་པ་ཞེས་པའི་ཁྱིམ་རྒྱུད་གྱེས་པར་བཤད། དེའི་སྲས་དཔལ་གྱི་བསོད་ནམས། དེའི་སྲས་དཔལ་གྱི་རྩེ་མོ་ཞེས་པ། ཁམས་ཀྱི་རྨེ་མདོར་བྱ་ཁྱི་ལྷ་ཁང་ཆག་བཏབ་པའི་གནས། ད་ལྟ་རྨེ་ཤོད་དམ། སྨད་ཤོད། སྨན་ཤོད་དུ་འབོད་པ་དེར་བཞུགས་གཞིས་ཆགས། དེ་ལ་སྲས་གསུམ་གྱི་འགར་ཆོས་སྡིངས་པ་ཞེས་སློབ་དཔོན་ཨེཝའི་སྤྲུལ་པར་གྲགས། འཇམ་པའི་དབྱངས་དངོས་ཆོས་རྗེ་ས་སྐྱ་པཎྜིཏ་དང་། འབྲི་གུང་སྐྱོབ་པ། སྒོམ་སྟོན་གཙུག་ཏོར་འབུམ་སོགས་བླ་མར་བསྟེན་ནས་ཟབ་ཆོས་མང་དུ་གསན་སྟེ་གྲུབ་པ་ཐོབ། སངས་རྒྱས་འོད་དཔག་མེད། ཡི་དམ་རྡོ་རྗེ་འཇིགས་བྱེད། རྡོ་རྗེ་ཕུར་པ། ཕྱག་ན་རྡོ་རྗེ་སོགས་ཀྱིས་ཞལ་གཟིགས། དམ་ཅན་ཆོས་རྒྱལ་དང་ཕུར་སྲུང་སོགས་བྲན་དུ་ཁོལ། ལྷ་འདྲེ་མཐུ་ཆེན་དབང་དུ་བྱས་ཏེ་རྫུ་འཕྲུལ་མཐའ་ཡས་པ་བསྟན། ཕྲིན་ལས་ཤིན་ཏུ་རྒྱས་ཤིང་ས་སྐྱ་པ་སོགས་ལ་འབུལ་སྐྱེལ་རྒྱ་ཆེར་མཛད། དེའི་གཅུང་འགར་ཆེན་ཡེ་ཤེས་བཟང་པོ་དང་། སྒོམ་སྟོན་གཙུག་ཏོར་འབུམ་གཉིས། ཕྱི་མའི་སྲས་དར་མ་ཡོན་ཏན་དང་། སྟོན་སྒོམ་དཔལ་གྱི་རྒྱལ་མཚན་གཉིས། འདི་ལ་སྲས་གསུམ་གྱི་ཨོ་རྒྱན་པ་ཞེས་པ་གྲུབ་ཆེན་བི༦་པས་ཞལ་གཟིགས་གདམས་ངག་མང་དུ་བསྩལ་ནས་ཉམས་དང་རྟོགས་པའི་དབང་ཕྱུག་ཆེན་པོ་ཞིག་བྱུང་། དེའི་གཅུང་དགེ་སློང་བསོད་ནམས་རིན་ཆེན་དང་། རྔུ་པ་གུ་རུ་གཉིས་སོ། །ཡང་ཞུ་ཆེན་སོགས་ཀྱིས་འགར་ཆེན་ཡེ་ཤེས་བཟང་པོ་ལ་སྲས་གཉིས་བྱུང་བ་དགེ་སློང་བསོད་ནམས་རིན་ཆེན་དང་། རྔུ་པ་གུ་རུ་གཉིས་ཡིན་པར་གསུངས། ༈ དགེ་སློང་བསོད་ནམས་རིན་ཆེན་ནི། དཔལ་ས་སྐྱོང་སྡེ་དགེ་ཆོས་ཀྱི་རྒྱལ་པོ་རིམ་བྱོན་གྱི་རྣམ་ཐར་དགེ་ལེགས་ནོར་བུའི་ཕྲེང་བ་འདོད་དགུ་རབ་འཕེལ་ལས། སྒོམ་སྟོན་དམ་པ་བསོད་ནམས་རིན་ཆེན་ནི། །གཙུག་ལག་ཟུང་གི་གཞུང་ལ་མཁྱེན་པ་རྒྱས། །ཡ་རབས་སྤྱོད་ཚུལ་མཛངས་པའི་ཡོན་ཏན་ལྡན། །གང་དེས་བོད་ཀྱི་ཤཱཀྱ་ཐུབ་པ་ཆེ། །ཁམས་གསུམ་ཆོས་ཀྱི་རྒྱལ་པོ་ས་སྐྱ་པ། །འགྲོ་མགོན་ཆོས་རྒྱལ་འཕགས་པའི་ཞབས་པད་དུ། །བཅར་ཚེ་འཕགས་མཆོག་ཆོས་ཀྱི་རྒྱལ་པོ་ཡི། །ཞལ་ནས་སྡེ་བཞི་དགེ་བཅུའི་ཡོན་ཏན་གྱིས། །ཕྱུག་པའི་སྐྱེས་བུ་ཕེབས་ཞེས་བཀའ་བསྩལ་བས། །སྡེ་དགེ་ཞེས་པའི་མཚན་ཡང་དེ་ནས་ཐོགས། །ལས་ཚན་བཅུ་གསུམ་ཐོག་མར་གསོལ་དཔོན་གྱི། །ཁུར་བླངས་ཞབས་པད་ཡུན་བསྟེན་འཕགས་མཆོག་དེའི། །ཆོས་ཀྱི་སྲས་གྱུར་འཕགས་པ་དབང་ཕྱོགས་ཀྱི། །རྒྱལ་པོ་སེ་ཆེན་ཁཱན་གྱི་མཆོད་གནས་སུ། །ཕེབས་ནས་བོད་ཁམས་མ་ལུས་དབང་མཛད་སྐབས། །འཇའ་ས་ཤེལ་ཐམ་ལེ་ཚེ་དགུ་པ་དང་། །སྟག་མགོ་ནོར་བུ་གསུམ་པ་སོགས་བསྩལ་ནས། །མདོ་སྨད་སྟོང་དཔོན་རྒྱལ་པོར་དབང་བསྐུར་རོ། །དེ་ནས་ས་དམར་དགོན་དུ་དགེ་འདུན་སྡེ། །སྟོང་ཕྲག་ཙམ་བསྐྱངས་བསྟན་པའི་གཞི་ཆེན་བཙུགས། །མཚན་དེའི་རྟེན་འབྱུང་སྡེ་བཞི་ཞེས་པ་ནི། །ནོར་དང་འདོད་པ་ཐར་པ་ཆོས་ཏེ་བཞི། །སྲིད་བཞིའི་དཔལ་འབྱོར་ཀུན་གྱི་རྒྱུ་འབྲས་ཚང་། །དགེ་ཞེས་སྐྱེ་ནས་སྐྱེ་བའི་ཕྲེང་བ་རུ། །བདེ་བ་ཁོ་ན་ཐོབ་པའི་རྒྱུའམ་ལམ། །དེའང་ཆོས་ཀྱི་ལེགས་ཚོགས་གཙོར་སྟོན་ཚིག །བསྟན་པ་ཕྱི་དར་སྐབས་ཀྱི་གངས་རིའི་བདག །རབ་བྱུང་འབུམ་སྡེའི་གཙུག་རྒྱན་འཕགས་མཆོག་དེས། །རབ་བྱུང་རྟེན་ཅན་བསོད་ནམས་རིན་ཆེན་ལ། །རབ་མཐོའི་གོ་སར་དབང་བསྐུར་ལུང་རྟགས་བསྩལ། །རབ་ཏུ་བསྔགས་འོས་ལེགས་ཚོགས་དེ་ནས་འཕེལ། །སྡེ་དགེའི་ལུགས་ཟུང་སྐྱོང་ལ་ཆོས་ཚུགས་ཀྱིས། །དགེ་བའི་གཏན་ཚིགས་དང་པོ་འདི་ཡིན་ནོ། །ཞེས་གསུངས་ཏེ། དེའི་དང་པོ་ནི་ཆོས་དང་སྲིད་པའི་གཙུག་ལག་ཟུང་གི་གཞུང་ལུགས་དཔྱོད་པ་ལ་བློ་རབ་ཏུ་གསལ་བ། བྱས་པ་གཟོ་བ། ལྷག་པའི་བསམ་པས་གནས་པར་གྱུར་པ་སོགས་ཡ་རབས་ཀྱི་སྤྱོད་ཚུལ་དང་། མཛངས་པའི་ཡོན་ཏན་ཅི་རིགས་པ་ཚང་བས། རྣམ་འདྲེན་བུ་རམ་ཤིང་པའི་རིང་ལུགས་མ་ནོར་བ་ཡོངས་སུ་འཛིན་པའི་སྐྱེས་བུ་ཆེན་པོ་ཆོས་ཀྱི་རྒྱལ་པོ་འཕགས་པ་རིན་པོ་ཆེའི་ཞབས་ཀྱི་པདྨར་བསྟེན་ནས་དེའི་ལས་ཚན་གྱི་རྣམ་གཞག །གསོལ་གཟིམ་མཆོད་གསུམ་མཇལ་ཡིག་མཛོད་པ་གསུམ། །ཐབ་འདྲེན་གདན་གསུམ་སྐྱ་རྟ་མཛོ་ཁྱི་བཞི། །ཆེན་པོ་ལ་འོས་ལས་ཚན་བཅུ་གསུམ་སྟེ། །འདི་རྣམས་ཆོས་ཀྱི་རྒྱལ་པོ་ས་སྐྱ་པ། །དཔལ་ལྡན་འཕགས་པའི་རིང་ལ་དར་བ་ཡིན། །ཞེས་པའི་ལས་ཚན་བཅུ་གསུམ་གྱི་ཐོག་མ་གསོལ་དཔོན་གྱི་ལས་ཀ་ཟིན་ཏོ། །དེ་ནས་རིམ་གྱིས་གོང་ནས་གོང་དུ་ཕྱིན་པར་གྱུར་ཏེ་གོང་མ་སེ་ཆེན་ཧན་ཁྲི་རབས་བཞི་པ། རབ་བྱུང་ལྔ་པའི་མེ་ཡོས་ཕྱི་ལོ་༡༢༦༧་ལོར། འཕགས་པ་རིན་པོ་ཆེའི་ཞབས་གྲས་སུ། གོང་མ་ཆེན་པོའི་ཕོ་བྲང་ཀྲུང་ཏུའུ་ཞེས་ད་ལྟ་པེ་ཅིང་དུ་འབོད་པ་དེར་ཕེབས་སྐབས། དམ་པ་འདི་ཉིད་ལ་འཇའ་ས་ཤེལ་ཐམ་ལེ་ཚན་དགུ་པ་དང་། སྟག་མགོ་ནོར་བུ་གསུམ་པ་དང་དམག་རྣམས་བྱིན་ནས་མདོ་སྨད་སྟོང་དཔོན་རྒྱལ་པོར་དབང་བསྐུར། ཕྱིས་སུ་ས་དམར་ཡང་དགོན་དུ་ཚོགས་པ་སྟོང་ཕྲག་ཙམ་བསྐྱངས་པ་དང་བཅས་ཏེ་དེར་བསྟན་པའི་གཞི་ཆེན་པོ་བཙུགས་སོ། །དེའི་གཅུང་པོ་རྔུ་གུ་རུ་ཅན་ལ་སྲས་དགུ་ཡོད་པའི་ནང་ནས་མཆོག་རྔུ་རྗེ་སྟོང་དཔོན་ཟླ་བ་བཟང་པོ་ཞེས་བྱ་བ་བློ་སྒྲིན་ཞིང་གཟུ་བོར་གནས་པ། སྐྱེ་བོ་ཀུན་གྱིས་བཀུར་བའི་འོས་སུ་གྱུར་པ་ཞིག་སྟེ། རྒྱལ་རབས་དེ་ཉིད་ལས། དེ་ཡི་གཅུང་པོ་རྔུ་པ་གུ་རུ་ལ། །སྲས་དགུ་བྱུང་བའི་ནང་ནས་མཆོག་གྱུར་ལ། །སྲིད་ན་མངོན་པར་མཐོ་བའི་ཡོན་ཏན་དང་། །ཡི་དམ་ཞལ་གཟིགས་ནུས་ལྡན་སྔགས་འཆང་ཆེ། །ཟླ་བ་བཟང་པོ་ཞེས་སུ་གྲགས་དེ་ལ། །སྔར་བཞིན་གོང་མ་ཆེན་པོ་མཆོད་ཡོན་གྱིས། །སྟོང་དཔོན་ལུང་དང་ལས་རྟགས་མངའ་དབང་བསྐུར། །ཞེས་སོགས་གསུངས་ཏེ། དེའང་གོང་མ་མཆོད་ཡོན་གྱིས་བཀའ་དྲིན་བཟང་པོས་ལེགས་པར་བསྐྱངས་ཤིང་རིམ་གྱིས་རྔུ་རྒྱུད་ས་དམར་ནས་བཟུང་སྟེ་ལྗང་མཚམས་བར་གྱི་སྟོང་དཔོན་གྱི་བསྐོས་བཞག་དང་ལུང་ལས་ཀྱིས་མངོན་པར་མཐོ་བ་ཆེན་པོའི་གོ་སར་བཞག་གོ །དེ་ལ་སྲས་དཔལ་ལྡན་སེང་གེ་དང་། རྒྱལ་བ་བཟང་པོ་གཉིས་འཁྲུངས་ཤིང་སྔ་མས་ཆོས་མཛད། ཕྱི་མའི་སྲས་སངས་རྒྱས་བཟང་པོ་དང་། པདྨབསྟན་སྲུང་གཉིས་སོ། །ཕྱི་མའི་སྲས་བསོད་ནམས་འབུམ་དང་། དཀར་ཆེན་བྱང་ཆུབ་འབུམ་གཉིས་སོ། །ཕྱི་མའི་སྲས་དཔོན་ཆེན་དགེ་འདུན་རྒྱལ་མཚན་དང་། བདེ་ཆེན་བསོད་ནམས་བཟང་པོ། རྔུ་ཆོས་ཀྱི་རྡོ་རྗེ་གསུམ་མོ། །དང་པོ་དེའི་སྲས་མགོན་པོ་གཟུངས་ནས་རིམ་གྱིས་མཆེད་པའི་མི་བརྒྱུད་ས་དམར་ཕྱོགས་སུ་བྱུང་ཞིང་། རྔུ་ཆོས་ཀྱི་རྡོ་རྗེ་སྔ་འགྱུར་བསྟན་པའི་སྒོར་ཞུགས་ཏེ་མངོན་ཤེས་དང་ནུས་མཐུ་དཔག་མེད་ཐོབ། རྒྱལ་རབས་དེ་ཉིད་ལས། གཅེན་པོ་བདེ་ཆེན་བསོད་ནམས་བཟང་པོ་དེ། །ཡུམ་དྲུང་གཤེགས་པའི་སྒྲིབ་སྦྱོང་དགེ་སྒྲུབ་ལ། །ཀཿཐོག་རྡོ་རྗེ་གདན་གྱི་ཆོས་གྲྭར་བྱོན། །དེ་ནས་ཡར་སྟོད་ཕྱོགས་སུ་འབྱོན་འདུན་དང་། །ཁྱད་པར་གྲུབ་ཐོབ་ཆོས་ཀྱི་རྡོ་རྗེ་ཡིས། །ཁྱོད་རང་འདི་ནས་ཡར་ལ་སོངས་ཤིག་དང་། །ལུང་པ་བཀྲ་ཤིས་རྟགས་ཀྱི་དགེ་མཚན་གྱིས། །ལེགས་སྤྲས་ཆུ་ཀླུང་དབང་ཕྱོགས་ནས་བབས་པ། །ཞིག་མཆིས་གནས་དེ་ལེགས་ཟུངས་ཡིད་ཅི་བདེར། །བག་ཕོབ་སྡོད་དང་བུ་བརྒྱུད་ཇེ་བཟང་དུ། །འགྲོ་བར་ངེས་ཞེས་ལུང་གིས་དབུགས་དབྱུང་བསྩལ། །དེ་ལྟར་ཐུགས་བཅངས་རིམ་ཕེབས་ལྕགས་རར་སླེབས། །དེ་ཚེ་ཆེན་པོ་བདག་དྲུང་ཞེས་བྱ་བས། །ཡུལ་དེ་འཛིན་སྐབས་དང་འཕྲད་དེའི་བློན་ཚུལ། །གནང་དུས་ཡུལ་སྡེར་དགེ་མཚན་ཅི་ཡང་གསལ། །དེ་འདྲས་རྒྱུ་མཚན་བྱས་ཏེ་ཐམས་ཅད་ཀྱིས། །སྡེ་དགེ་ཞེས་བྱའི་མིང་དུ་རབ་བསྒྲགས་ཏེ། །འཕགས་ཆེན་བླ་མའི་ལུང་དོན་ཆེས་གསལ་གྱུར། །ཞེས་གསུངས་ཏེ། བདེ་ཆེན་བསོད་ནམས་བཟང་པོ་ཡུམ་གྱི་དགོངས་རྫོགས་བསྒྲུབ་ཆེད་ཀཿཐོག་རྡོ་རྗེ་གདན་དུ་བྱོན་ནས་རིང་ཞིག་བཞུགས་པ་ན་ཀརྨ་ཆོས་གྲགས་རྒྱ་མཚོ་དང་། རྔུ་ཆོས་ཀྱི་རྡོ་རྗེ་ཟུང་གིས་ཡེ་ཤེས་ཀྱི་གཟིགས་པ་རབ་ཏུ་དྭང་པའི་མེ་ལོང་དག་ཏུ་ཇི་ལྟར་ཤར་བའི་ལུང་བསྟན་བསྩལ་བ་ནི། ཁྱོད་འདི་ནས་ཡར་ལ་སོངས་ཤིག་དང་ལུང་པ་བཀྲ་ཤིས་པའི་རྟགས་ཀྱིས་སྤྲས་པ་ཆུ་ཀླུང་དབང་ཕྱོགས་ནས་འབབ་པ་ཞིག་མཆིས་པས་གནས་དེ་ལེགས་པར་ཟུངས་ལ་ཡིད་ཅི་བདེ་བར་བག་ཕོབས་ཤིག་དང་ཕ་ལས་ཆེས་ལྷག་པའི་བུ་བརྒྱུད་ཇེ་བཟང་དུ་འགྲོ་བར་འགྱུར་རོ་ཞེས་ལུང་བསྟན་པ་ཐུགས་ལ་བཅངས་ནས་རིམ་གྱིས་བྱོན་པས་ལྕགས་རར་སླེབས། ཨུཏྤ་ཆུན་པོ་ལས། གླིང་ཁྲོ་ཐུང་ཉ་ཚ་ཨ་བརྟན་གྱི་བརྒྱུད་པ་དྲའུ་དར་གསུམ་ཞེས་པའི་མི་བརྒྱུད་ལྕགས་རའི་གླིང་དཔོན་བདག་དྲུང་༼གླིང་གི་གདུང་རབས་ང་གཉིས་པ༽གི་ནང་བློན་བྱས་པས་ཡུལ་གྱི་མངའ་རིས་དང་སའི་དུམ་བུའི་བདག་པོར་གྱུར་ཏེ། དེའི་མོད་ལ་སྔོན་གྱི་སྨོན་ལམ་གྱི་འཕེན་པས་ལྗོངས་དེ་ནའང་བདེ་བ་དང་། ལོ་ལེགས་པ། སྡེ་བཞིའི་འབྱོར་པ་ཕུན་སུམ་ཚོགས་པ་དང་ལྡན་པར་གྱུར་པ་དང་། དགེ་ལེགས་ཀྱི་མཚན་མ་གཞན་དག་ཀྱང་མངོན་དུ་བྱུང་བའི་རྟེན་འབྲེལ་བཟང་བ་དེ་རྒྱུ་མཚན་དུ་སོང་སྟེ་བླ་ཆེན་འཕགས་པའི་ལུང་དོན་བཞིན་སྡེ་དགེ་ཞེས་བྱ་བའི་མིང་གཏན་ཆགས་སུ་ཐོགས་སོ། ༈ རྒྱལ་རབས་དང་པོ་བོ་ཐར་བཀྲ་ཤིས་སེངྒེ། འདི་ནས་སྡེ་དགེའི་རྒྱལ་རབས་དབུ་ཚུགས། རྒྱལ་རབས་དེ་ཉིད་ལས། དེ་ལ་སྲས་བཞི་བྱོན་པའི་མཆོག་གྱུར་པ། །བློ་གྲོས་སྟོབས་ལྡན་བོ་ཐར་ཞེས་པ་བྱོན། །དེ་ལ་སྲས་མོ་མཛེས་ལྡན་ཞིག་བྱུང་བ། །གླིང་དཔོན་དེ་ཡིས་ཞལ་ངོའི་སྲིད་འཛིན་བཞེས། །དེ་ཡི་མོ་རིན་ས་ཞིང་ཉིན་རྨོས་ཤིག །དེའི་འཁྲིས་གྲོང་ཁྱེར་དུད་བཅས་སྦྱིན་ཁས་བླངས། །དེ་ཚེ་རྣམ་དཔྱོད་རྩལ་རྫོགས་བོ་ཐར་གྱིས། །ཉིན་རྨོས་ལྷག་མིན་ལྟ་བར་དཔོན་དྲུང་གི། །མི་དྲག་ཅིག་ཁྲིད་མཛོ་གཉིས་རྨོན་དོར་བཅས། །ནམ་ལངས་འཁོར་ལོ་མདོ་ནས་རྨོས་བཙུགས་དེད། །དགོང་མོ་ལྕགས་ར་སྙན་མདའི་རྟེན་རྡོར་སླེབས། །ཁ་ཆད་ཇི་བཞིན་བསྙགས་པས་བསྙད་མེད་སྟེར། །དེ་ལྟར་བློ་གྲོས་གོམ་པའི་སྟབས་ཤིག་གིས། །ས་ཁྱོན་དེ་ཁོངས་ཡུལ་གྲུ་རང་དབང་ཐོབ། །དེ་ནས་འཁོར་འབངས་མཐའ་དག་ཆོས་མཐུན་གྱིས། །བསྐྱངས་པས་ཀུན་གྱིས་གཙུག་གི་ནོར་བུར་བཀུར། །ཞེས་སོགས་གསུངས་ཏེ། དེ་ལ་སྲས་བཞི་བྱུང་བའི་གཉིས་པ་སྡེ་དགེ་བོ་ཐར་ཞེས་བྱ་བ་སྲེད་མེད་ཀྱི་བུའི་སྟོབས་དང་རྣམ་པར་དཔྱོད་པའི་རྩལ་ཡོངས་སུ་རྫོགས་པ་ཞིག་བྱུང་། དེ་ལ་སྲས་མོ་ཤིན་ཏུ་མཛེས་པ་ཞིག་སྐྱེས་པ་གླིང་དཔོན་གྱི་བཙུན་མོར་བཞེས་པའི་མོ་རིང་དུ་ཞིང་ཉིན་རྨོས་གཅིག །དེ་འཁྲིས་ཀྱི་གྲོང་དུད་བཅས་སྦྱིན་ཆད་བྱས་ཚེ། བོ་ཐར་གྱིས་མཛོ་གཉིས་དོར་བཅས་ཏེ་འཁོར་ལོ་མདོ་ནས་ནམ་ལངས་པའི་ཚེ་རྨོས་བཙུགས་ཏེ་དེད་པས་སྙན་མདའི་རྟེན་རྡོར་སླེབས་དུས་མུན་རུབ། དེའི་བར་གྱི་སྡེ་རྣམས་བསྙགས་པས་བསྙད་མེད་ཐོབ་སྟེ། དེའི་སྐབས་སུ་བོ་ཐར་བུ་མོས་འཚེངས། བདག་པོ་སྙིང་རླུང་ལང་། སྡེ་ཕྱེད་བློན་ལ་ཤོར། གཡོག་པོས་དཔོན་པོ་བྱེད། ཟེར་བའི་གྲགས་པ་བྱུང་། དེའི་བློ་གྲོས་ཀྱི་གོམ་སྟབས་ཆེན་པོ་གཅིག་གིས་ཟུལ་རྒྱུད་ཀྱི་མི་སྡེ་མཐའ་དག་རང་དབང་དུ་ཐོབ་པ་ནི། ཇི་སྐད་དུ། གོམ་པ་གང་གི་ས་བྱིན་པས། །སྟོབས་ལྡན་གྱིས་ནི་ས་གསུམ་ཤོར། །ཞེས་པའི་གཏམ་རྒྱུད་དང་མཚུངས་སོ། །ཐོབ་པའི་འབངས་འཁོར་ཐམས་ཅད་ཆོས་དང་མཐུན་པའི་ཕྲིན་ལས་ཀྱིས་བསྐྱངས་པས་ཐམས་ཅད་ཀྱང་བཀའ་ལུང་གང་དག་བསྩལ་བ་གཙུག་གི་ནོར་བུ་བཞིན་དུ་སྤྱི་བོས་ལེན་པ་བྱུང་ངོ་། །ཡང་དེ་ཉིད་ལས། དེ་ནས་མཆོག་ཏུ་དགེ་བའི་བློ་གྲོས་སྩལ། །རྒྱས་ཏེ་གྲུབ་པ་ཡོངས་ཀྱི་འཁོར་ལོས་སྒྱུར། །འཆི་མེད་གྲུབ་པ་ཐང་སྟོང་རྒྱལ་པོ་དེ། །རྩ་གསུམ་སྤྱི་གཟུགས་པདྨཾབྷས། །བོད་དང་བོད་ཆེན་འགྲོ་བའི་དོན་མཛད་པར། །བསྐུལ་དང་སྒོ་འགྲིགས་གནས་དེར་སྤྱན་དྲངས་ཕེབས། །སྣོད་བཅུད་ཕྱཱ་གཡང་ཕུན་ཚོགས་རྒྱས་པའི་ཕྱིར། །སྲིབ་རིའི་འཁྲིས་ན་ནོར་བདག་ཀླུ་ཡི་དབང་། །རྟེན་བཅས་དེ་བཏུལ་མཐུན་རྐྱེན་བསྒྲུབ་པར་བསྒོས། །དེས་ཀྱང་དམ་བཅས་གྲུབ་དབང་བླ་གོས་ཀྱིས། །མཚོ་བསྲུབས་སྟེང་དུ་གཙུག་ལག་ཁང་ཆེན་བརྩིགས། །དགེ་འདུན་བསྟི་གནས་བརྒྱ་དང་རྩ་བརྒྱད་བཞེངས། །གཙུག་ལག་དེ་རུ་ཆོས་སྐྱོང་བསམ་འཕེལ་ནོར། །ཞིང་སྐྱོང་ཙཏུར་མུཁའི་ལྗགས་བསྙེན་གནང་། །དེ་ལྟར་ཨོ་རྒྱན་གཉིས་པ་གྲུབ་ཐོབ་ཀྱིས། །པདྨི་ལུང་བཞིན་གནས་གཞི་དམ་པ་འདིར། །རྒྱལ་ས་ཆོས་སྡེ་རྒྱལ་པོ་སྡོམ་བརྩོན་གྱིས། །རིམ་པར་སྐྱོང་ན་ཐོག་མཐའ་བར་དགེ་ཞིང་། །སྲིད་ཞིའི་ལེགས་ཚོགས་ལྷུན་གྲུབ་ས་སྟེང་འདིར། །བསྟན་འགྲོའི་ཕན་བདེ་འབྱུང་བར་ངེས་གཟིགས་ནས། །བོ་ཐར་མཚན་ལ་བཀྲ་ཤིས་སེངྒེར་གསོལ། །དགོན་པའི་མིང་ལ་ལྷུན་གྲུབ་སྟེང་ཞེས་བསྔགས། །དགེ་ལེགས་རབ་འཕེལ་བསྟན་གཞི་དང་པོ་ཚུགས། །དེ་ཡང་སྡེ་དགེར་ཆོས་ཚུགས་དགེ་བ་ཡི། །གཏན་ཚིགས་མངོན་སུམ་གྲུབ་པ་གཉིས་པ་ཡིན། །ཞེས་གསུངས་པ་ལྟར། དེ་ཉིད་ཀྱི་བླའི་མཆོད་གནས་སུ་གྲུབ་ཐོབ་ཐང་སྟོང་རྒྱལ་པོ་ཞེས་སམ་བརྩོན་འགྲུས་བཟང་པོ་ཞེས་ཡོངས་སུ་གྲགས་པ་མཐུ་ཆེ་ཞིང་རྫུ་འཕྲུལ་ཆེ་བའི་གོམ་པའི་འདེགས་འཇོག་བསྒྱུར་བ་ཙམ་གྱིས་གང་དུ་བཞུད་ཀྱང་དཀའ་བ་ཅི་ཞིག །ཁྱད་པར་དཔལ་རི་པདྨའོད་ཀྱི་གཞལ་ཡས་སུ་སྐད་ཅིག་རེས་བྱོན་ཏེ་སློབ་དཔོན་ཆེན་པོ་པདྨཀ་ར་དང་དངོས་སུ་མཇལ་ནས། ལེགས་པར་གདམས་པའི་བདུད་རྩི་ཅི་ཡང་གསན་པ་དང་། སློབ་དཔོན་ཆེན་པོས་བོད་ཡུལ་དུ་འགྲོ་བའི་དོན་ལ་འབྱོན་དགོས་པར་ཇི་ལྟར་བསྐུལ་བ་དེ་བཞིན་དུ་བོད་དང་བོད་ཆེན་པོ་དང་། རྒྱ་ནག་སོགས་ཡུལ་དང་ལྗོངས་དང་གྲོང་དང་གྲོང་ཁྱེར་མང་པོར་ཡང་ཞབས་ཀྱིས་བཅགས་ཤིང་། སྐུ་དངོས་དང་རྣམ་པར་འཕྲུལ་པའི་བཀོད་པ་བགྲང་ལས་འདས་པ་དག་གིས་སེམས་ཅན་གྱི་དོན་ལ་རྩེ་གཅིག་ཏུ་གཞོལ་ཞིང་བབས་པ། ད་ལྟར་ཡང་སྐུ་དངོས་སུ་བཞུགས་པའམ་ལུས་མ་སྤང་པར་མཁའ་སྤྱོད་དུ་གཤེགས་པའི་ཚུལ་གཉིས་ཀར་གྲགས་པ་དེ་ཉིད་སྤྱན་དྲངས་ཏེ་གཙུག་གིས་བསྟེན་ནོ། །གང་གི་ཚེ་ན་གྲུབ་པའི་དབང་ཕྱུག་ཆེན་པོ་དེའི་ཡེ་ཤེས་ཀྱིས་གཟིགས་པའི་ངོ་ན་ཡུལ་དེར་ས་དཔྱད་ཕུན་སུམ་ཚོགས་ཤིང་། དེར་དགོན་པ་འདེབས་ན་བཤད་སྒྲུབ་ཀྱི་རྒྱུན་རྒྱ་ཆེན་པོ་དར་རྒྱས་སུ་འགྱུར་བའི་རྟེན་འབྲེལ་ཕུན་སུམ་ཚོགས་པ་ཤར་བ་གཟིགས་ནས། རྔུ་མདའི་སྲིབ་རིའི་འཁྲིས་དེ་ན་མཚོ་ཞིག་ཡོད་པར་ཀླུའི་དབང་པོ་ཞིག་གིས་བརྟེན་བཅས་པ་ལ། ཀླུ་དེ་བཏུལ་ནས་བསྟན་པ་ཇི་སྲིད་གནས་ཀྱི་བར་དུ་རྣམ་པར་མི་འཚེ་ཞིང་མཐུན་རྐྱེན་ཐམས་ཅད་སྒྲུབ་པའི་གྲོགས་སུ་བཀའ་བསྒོས་པས་དེས་ཀྱང་དེ་ལྟར་དུ་བགྱི་བར་དམ་བཅས་སོ། །མཚོ་དེ་ཡང་རྫུ་འཕྲུལ་གྱི་མཐུ་ཆེན་པོས་ལེགས་པར་བསུབས་ཏེ། དེའི་ཁར་གཙུག་ལག་ཁང་གི་རྨང་བཏིང་བ་ནས་བརྩམས་ཏེ། སྲིབ་ཀྱི་དགོན་དུད་བརྒྱ་དང་རྩ་བརྒྱད་བཞེངས་པའི་བདག་པོའི་རྐྱེན་སྦྱར་བ་ལ་སོགས་པ་ལེགས་བྱས་རྒྱ་ཆེན་པོ་བསྐྲུན་ནོ། །འདི་ལོ་གྲུབ་ཆེན་ཉིད་དགུང་གྲངས་གྱ་དྲུག་ཕེབས་པ་རབ་བྱུང་བདུན་པའི་མེ་སྟག་ཕྱི་ལོ་༡༤༤༦ལོར་ཡིན། གཙུག་ལག་ཁང་ལེགས་པར་གྲུབ་པ་དང་གྲུབ་ཆེན་དེ་ཉིད་ཀྱིས་དེར་དཔལ་མགོན་པོ་ཆེན་པོ་ཞལ་བཞི་པའི་ལྗགས་བསྙེན་ཞིག་ཀྱང་མཛད་དོ། དེའི་ཚེ་ཆོས་དང་སྲིད་པའི་དཔལ་འབྱོར་གྱི་སྒོ་འཕར་བྱེ་བ་བརྒྱ་སྟོང་དུས་ཅིག་ཅར་དུ་ཕྱེ་བའི་རྟེན་འབྲེལ་ཐམས་ཅད་འབད་མེད་ལྷུན་གྱིས་གྲུབ་པ་ཉིད་དུ་བྱུང་བས་དགོན་པའི་མཚན་དུ་ཡང་ལྷུན་གྲུབ་སྟེང་དང་བོ་ཐར་གྱི་མཚན་ལ་བཀྲ་ཤིས་སེངྒེ་ཞེས་བྱ་བར་གསོལ་བ་ཡིན་ཏེ། གནའ་བོའི་ཡིག་ཚང་ལས། གཡས་རི་གཡུ་འབྲུག་འགྱིང་བ་འདྲ། །གཡོན་རི་སེངྒེ་འཕྱོང་བ་འདྲ། །རྒྱབ་རི་ཤེལ་གྱི་མཆོད་རྟེན་འདྲ། །མདུན་རི་གླང་ཆེན་འདུད་པ་འདྲ། །གཡུ་སེང་བར་ན་དགོན་པ་བཏབ། །ས་འདུལ་ཐང་སྟོང་རྒྱལ་པོས་མཛད། །ཡོན་བདག་བཀྲ་ཤིས་སེངྒེས་བྱས། །དགོན་མིང་ལྷུན་གྲུབ་སྟེང་དུ་བཏགས། །ཞེས་གསུངས། དེ་ཡང་ཀུན་གཟིགས་འཇམ་དབྱངས་མཁྱེན་བརྩེའི་དབང་པོས། གྲུབ་ཆེན་འདི་ཉིད་ངོར་ཆེན་རྡོ་རྗེ་འཆང་གི་སློབ་མ་ཡིན་པས་དེང་དུས་ཆོས་རྗེ་ངོར་པའི་ཕྲིན་ལས་ཀྱི་རྒྱུན་སྐྱོང་བའི་རྟེན་འབྲེལ་དུ་གྱུར་ཅེས་གསུངས་པ་ལྟར་ཆོས་རྒྱུད་ས་སྐྱ་པ་ཡིན་ནོ། །སྡེ་དགེ་བོ་ཐར་གྱི་རིགས་སྲས་གཉིས་ལས་ཆེ་བ་དཔལ་ལྡན་སེང་གེ་ཞེས་བྱ་བས་རྒྱལ་བས་ལུང་བསྟན་པའི་སྐྱེས་བུ་ངོར་ཆེན་རྡོ་རྗེ་འཆང་གི་གདན་ས་བརྒྱད་པ་རྒྱལ་བ་ལྷ་མཆོག་སེངྒེ་སོགས་བླ་མར་བསྟེན་ཅིང་མདོ་སྔགས་ཀྱི་གཞུང་ལུགས་མང་པོ་ཐོས་བསམ་གྱི་བགྱི་བ་མཐར་སོན་ཏེ་སྒྲུབ་པའི་སྙིང་པོ་ལྷུར་མཛད་པ་དང་། གནས་དེའི་ཉིན་རིའི་ཕྱོགས་སུ་ངུར་སྨྲིག་འཆང་བ་འདུས་པའི་སྡེ་བཙུགས་ཤིང་། གཙུག་ལག་ཁང་བཞེངས་པ་ལ་དེང་སང་ཉིན་དགོན་དུ་གྲགས་ཤིང་། དངུལ་ཕུའི་བྲག་གི་ཕུག་པ་སེངྒེ་རྫོང་དུ་གྲགས་པ་འདི་ཡང་དེ་ཉིད་ཀྱི་སྒྲུབ་གནས་མཛད་པས་ཕྱི་ནས་རྟེན་ལ་བརྟེན་པའི་མིང་དུ་ཐོགས་པ་ཡིན་ནོ་ཞེས་གླེང་ངོ་། །རྒྱལ་རབས་གཉིས་པ་རྒྱལ་མཚན་འབུམ་ནི། བོ་ཐར་གྱི་སྲས་གཉིས་པ་རྒྱལ་མཚན་འབུམ་གྱིས་སྲིད་སྐྱོང་ཞིང་སྲས་བཞི་བྱུང་བའི་རྒྱལ་རབས་གསུམ་པ་དཔོན་ཆེན་ཨ་སྔ་ཡིས་སྲིད་བཟུང་། དེ་ལ་སྲས་གཉིས་༼སྲས་བདུན་ཡོད་པར་གསུངས་ཀྱང་མཚན་མ་བྱུང་༽འཁྲུངས་པའི་ཇོ་གདན་ནམ་མཁའ་ལྷུན་བཟང་ཞེས་བྱ་བ་འདིས་བླ་མ་མང་པོའི་གདམས་པའི་མཛོད་བཟུང་ནས་རྡོ་རྗེ་འཇིགས་བྱེད་ལྷག་པའི་ལྷར་བཟུང་ཞིང་། དེའི་རྩ་སྔགས་ཡམརཱཛ་དུང་ཕྱུར་གཅིག་སོང་བའི་མཚམས་སུ་ལྗགས་ཀྱི་སྟེང་ནས་ལྕགས་ཀྱི་རིལ་བུ་རང་རྡོལ་དུ་བྱུང་། བསྐྱེད་པའི་རིམ་པ་ལ་བརྟན་པ་ཐོབ་པས་ཉེ་གནས་འགའ་ཞིག་གིས་མཐོང་སྣང་དུ་རྡོ་རྗེ་འཇིགས་བྱེད་མངོན་སུམ་དུ་བཞུགས་པར་མཐོང་བ་སོགས་གྲུབ་པའི་མཚན་མ་མང་དུ་བརྙེས་སོ། །རྒྱལ་རབས་བཞི་པ་དེའི་མཆེད་ཡ་རྒྱལ་འཕེལ་གྱིས་སྲིད་སྐྱོང་ཞིང་སྲས་གསུམ་བྱུང་བའི་ཆེ་བ་རྒྱལ་རབས་ལྔ་པ་སྡེ་དགེ་བླ་ཆེན་ཀུན་དགའ་རིན་ཆེན། འདིས་ནི་ཤར་ཆེན་བྱམས་པ་ཀུན་དགའ་བཀྲ་ཤིས་དང་། མཁན་ཆེན་བསོད་ནམས་རིན་ཆེན་སོགས་ཡོངས་འཛིན་མང་པོ་བསྟེན་ནས་ཟབ་དོན་གྱི་བདུད་རྩི་ངོམས་པར་བཞེས་ནས། ཡི་དམ་གྱི་ལྷ་མང་པོའི་བསྙེན་སྒྲུབ་དང་ཁྱད་པར་ཆོས་སྐྱོང་གི་བསྙེན་པ་ལ་བཞུགས་པའི་ཚེ་སྒྲུབ་ཁང་ཐམས་ཅད་མེའི་ཕུང་པོ་གཅིག་ཏུ་འབར་བར་ཀུན་གྱིས་མཐོང་བ་སོགས་ལུང་རྟོགས་ཀྱི་ཡོན་ཏན་བསམ་གྱིས་མི་ཁྱབ་པ་བརྙེས། སྡེ་དགེ་བླ་བྲང་ལྷ་ཁང་ཞེས་པ་ལྷ་ཁང་དང་བླ་བྲང་ཟུང་དུ་འབྲེལ་པ་འདི་ཉིད་གསར་དུ་བཞེངས་པ་དང་། ངུར་སྨྲིག་འཆང་བའི་དགེ་འདུན་གྱི་སྡེ་མང་དུ་བསགས་པ་ལ་སོགས་པའི་སྒོ་ནས་བསྟན་པ་དར་རྒྱས་སུ་མཛད་དེ། དེ་ཉིད་ལས། དེ་ནས་སྡེ་དགེ་ལྷ་ཁང་པ་ཞེས་གྲགས། །དེ་ཡི་དོན་གྱིས་ད་ལྟ་གཟུངས་གཞུག་གི། །པར་ལ་སྦྱིན་བདག་སྡེ་དགེ་ལྷ་ཁང་པ། །བླ་དཔོན་ཞེས་པ་བྱུང་བ་འདི་བཞིན་ཡིན། །ཞེས་གསུངས། དེའི་གཅུང་ནམ་མཁའ་དང་རྡོ་རྗེ་ལྷུན་གྲུབ་ཅེས་བྱ་བ་གཉིས་སུ་བྱོན་པའི་ཕྱི་མ་དེའི་རིགས་སྲས་ལ་གྲགས་པ་ལྷུན་གྲུབ་དང་། ཀརྨ་སྲུང་ཞེས་བྱ་བ་གཉིས་བྱོན་ནོ། །དེའི་དང་པོས་ནི་རྒྱལ་བ་ལྷ་མཆོག་སེངྒེ་སོགས་བསྟེན་ནས་ཟབ་ཆོས་མནོས། ཐུགས་དམ་གྱི་གཙོ་བོར་དགྱེས་པའི་རྡོ་རྗེ་དང་། ཆོས་སྐྱོང་བའི་སྲུང་མ་གུར་གྱི་མགོན་པོ་ལ་མཛད་པས། སྲུང་མའི་དབང་པོ་དེ་ཉིད་དུས་རྟག་ཏུ་ལུས་དང་གྲིབ་མ་བཞིན་དུ་འགྲོགས་ཤིང་། ཇི་ལྟར་བསྒོས་པའི་ཕྲིན་ལས་ཐམས་ཅད་ཐོགས་པ་མེད་པར་སྒྲུབ་པ་གདོན་མི་ཟ་བ་དང་། རེས་འགའ་གར་གྱི་ཉམས་དགུ་ཡོངས་སུ་རྫོགས་པའི་སྐུའི་དཀྱིལ་འཁོར་ཡང་མངོན་སུམ་དུ་བསྟན། མགོན་པོའི་སྐུ་རྟེན་ཞིག་ཐུན་མོང་མ་ཡིན་པའི་ཆོ་གས་བཞེངས་ནས་རབ་ཏུ་གནས་པའི་ཆོ་ག་བགྱིས་པའི་ཚེ་མགོན་པོར་ཡེ་ཤེས་པ་དངོས་སུ་ཐིམ་པའི་སྣང་བ་བྱུང་ཞིང་བྱིན་རླབས་ཀྱི་གཟི་འོད་འབར་བ་ཉིད་དོ། །ཕྱིས་སུ་ཡུལ་ལྗོངས་འདི་ཉིད་ཀྱི་བསྟན་སྲིད་ལ་རྣམ་པར་སྡང་ཞིང་ཕྲག་དོག་གི་དུག་ཆུས་མྱོས་པའི་ཕ་རོལ་གྱི་དཔུང་ཚོགས་མི་སྲུན་པ་དག་གིས་ཉེ་བར་ལྷགས་པའི་དུས་ན། མགོན་ཁང་དུ་གཉུག་མར་བཞུགས་པའི་བླ་མས་མཆོད་གཏོར་རྒྱ་ཆེན་པོ་ཕུལ་ནས་དྲག་པོའི་ཕྲིན་ལས་བསྐུལ་བ་དང་བཅས་ཏེ་མགོན་ཁང་གི་ཐོག་ཁར་སྤྱན་དྲངས་ནས་དགྲ་ཕྱོགས་སུ་ཞལ་བསྟན་ཏེ་བཞག་གོ །དེའི་དུས་ན་འགྲོ་བ་མང་པོའི་མཐུན་སྣང་དུ་མགོན་པོའི་སྐུ་ཤིན་ཏུ་མི་སྡུག་པའི་ཉམས་ཅན་གྱིས་བདུད་རྟ་ནག་པོ་རླུང་གི་ཤུགས་ལྡན་ཞིག་ལ་བཅིབས་ཏེ། དུས་ཀྱི་མཐའི་འཐོར་རླུང་དྲག་པོ་ལྟ་བུའི་རླུང་ནག་འཚུབ་མ་ཆེན་པོ་དང་ཆབས་ཅིག་ཏུ་དགྲ་སྡེ་ཡོད་པའི་ཕྱོགས་ག་ལ་བ་དེར་མངོན་སུམ་དུ་རྒྱུག་པར་མཐོང་ཞིང་། རིང་པོར་མ་ཐོགས་པར་དགྲ་སྡེ་དེ་དག་ནང་འཁྲུགས་པ་དང་། ཆོ་འཕྲུལ་དུ་མ་བྱུང་སྟེ་རང་ཞིར་སོང་བ་ལ་སོགས་པ་བསྟན་སྲུང་དངོས་སུ་འཁོར་བར་བསྙོན་དུ་མེད་པ་གྱུར་ཏོ། །གཉིས་པ་ཀརྨ་སྲུང་གིས་ཁྱིམ་ཐབས་འཛིན་པའི་བརྒྱུད་པ་ཕྱིས་སུ་བླ་མ་བཀྲ་ཤིས་རྒྱ་མཚོ་སོགས་བཞུགས། རྒྱལ་རབས་དྲུག་པ་ཀུན་དགའ་རིན་ཆེན་པའི་གཅུང་དཔོན་ཆེན་ནམ་མཁའི་སྲས་དཔོན་ཆེན་ལྷུན་ཐུབ་ཅེས་བྱ་བ་བསོད་ནམས་ཀྱི་ལྗོན་པ་མངོན་པར་རྒྱས་པ་ཞིག་བྱུང་སྟེ། དེ་ལ་སྲས་དྲུག་བྱོན་པའི་དང་པོ་སྡེ་དགེ་གྲུབ་ཆེན་ཀུན་དགའ་རྒྱ་མཚོ་ནི། རིག་འཛིན་རྒོད་ཀྱི་ལྡེམ་འཕྲུ་ཅན་གྱི་སྐྱེ་བའི་ཟློས་གར་དུ་གྲགས་པ་སྐྱེས་ཐོབ་དང་སྦྱངས་སྟོབས་ཀྱི་མཁྱེན་རབ་ཕུལ་དུ་བྱུང་ཞིང་། ཐུགས་རྒྱུད་ཐོག་མ་ཉིད་ནས་བྱང་ཆུབ་སེམས་ཀྱི་བརླན་གྱིས་ལེགས་པར་བསྒོས་པའི་སྐྱེས་བུ་དམ་པ་ཞིག་སྟེ། འདིས་ནི་ས་སྐྱ་པ་འཇམ་དབྱངས་བསོད་ནམས་དབང་པོ། རྩེ་གདོང་གི་བདག་ཆེན་ཀུན་དགའ་བསོད་ནམས་ལྷུན་གྲུབ། སྒར་ཆེན་མཐུ་སྟོབས་དབང་ཕྱུག །སྤྱན་སྔ་ཀུན་དགའ་དོན་གྲུབ། ཤར་ཆེན་བྱམས་པ་ཀུན་དགའ་བཀྲ་ཤིས། རིག་འཛིན་འཇའ་ཚོན་སྙིང་པོ་སོགས་གསང་སྔགས་གསར་རྙིང་གི་གྲུབ་པའི་ལུགས་སྲོལ་འཛིན་པའི་མཁས་གྲུབ་ཀྱི་བླ་མ་མང་པོ་བསྟེན་ཅིང་། དེ་དག་ལ་ཇི་ལྟར་མངའ་བའི་ཟབ་ཆོས་ཀྱི་བདུད་རྩི་ཐམས་ཅད་བུམ་པ་གང་བྱོའི་ཚུལ་དུ་གསན་བསམ་སྒོམ་སྒྲུབ་མཐར་ཕྱིན་མཛད་པས། གསང་སྔགས་ཀྱི་བསྟན་པའི་རྩ་ལག་དམ་པར་གྱུར་ཏོ། །རྟོགས་པའི་ཡོན་ཏན་ནི་སྲ་མཁྲེགས་རྡོའི་གཞི་མ་ཡང་འཇིམ་པའི་ཕུང་པོ་ལ་བརྫིས་པ་ལྟ་བུའི་ཞབས་རྗེས་འཇོག་པ། ལྐོག་གྱུར་གྱི་གནས་ལུང་དུ་སྟོན་པའི་མངོན་ཤེས། འབྱུང་པོ་གདུག་པ་ཅན་གྱི་རིགས་རྣམས་དམ་ལ་འདོགས་པ་ལ་ཡང་དཀའ་བ་མེད་པའི་སྔགས་ཀྱི་མཐུ་ཆེན་པོ་གྲུབ་པ་སོགས་ཡོན་ཏན་བསམ་གྱིས་མི་ཁྱབ་པ་ལ་དབང་འབྱོར་རོ། །གཙུག་ལག་ཁང་བསམ་གྲུབ་མཐོང་གྲོལ་བརྩིགས་པའི་ཐོག་མར་ས་འདུལ་དང་། མཐར་རྟེན་དང་བརྟེན་པར་བཅས་པ་ལ་ཡེ་ཤེས་ཀྱི་འཁོར་ལོ་འཇུག་པའི་རབ་ཏུ་གནས་པའི་ཆོ་གའང་མཛད་དོ། ཆོས་གྲྭ་འདིས་མཚོན་པའི་ཕྱོགས་དང་ཕྱོགས་བྲལ་རྣམས་ནས་ལྷགས་པའི་དོན་གཉེར་གྱི་སློབ་མ་མང་པོ་ལ་རང་རང་གི་བློ་དང་འཚམ་པའི་དབང་། ལུང་། ཉམས་ཁྲིད། གྱེར་དབྱངས། གར་འཆམ། རོལ་མོ་སོགས་ཕྱག་ལེན་གྱི་རིགས་ཤིན་ཏུ་ཕྲ་མོ་ཚུན་ཆད་ལ་གཅེས་སྤྲས་ཀྱི་སྒོ་ནས་གཏན་ལ་འབེབས་པ་སོགས་རྣམ་པར་དཀར་བའི་ཕྲིན་ལས་ཀྱི་རྒྱུན་ཆེན་པོས་བསྟན་པ་རིན་པོ་ཆེ་ལ་གཅིག་ཏུ་བཀའ་དྲིན་ཆེ་བར་མཛད་དོ། །རིག་འཛིན་འཇའ་ཚོན་སྙིང་པོས་ཚོགས་འཁོར་སྐབས་ཟན་ལས་པདྨཐོད་ཕྲེང་གི་ཕྱག་རྟགས་སྡིགས་གཟུགས་ཤིག་བཅོས་ནས་ཁྱེད་རང་གི་བརྒྱུད་པས་འདི་འདྲའི་ཕྱག་རྟགས་འཆང་ན་དགེ་ལེགས་འཕེལ་ཞེས་གསུངས་པ་བཞིན། ཕྱིས་སུ་གཏེར་སྟོན་ཀློང་གསལ་སྙིང་པོས་སྡིག་ཐམ་གཏེར་ནས་བླངས་ཏེ་ཕུལ་བས་མི་དང་མི་མིན་ཀུན་ཀྱང་ཟིལ་གྱིས་གནོན་པར་གྱུར་ཏོ། །མཐར་དམ་པ་དེ་ཉིད་མྱ་ངན་ལས་འདས་ཚུལ་བསྟན་ཏེ་སྐུ་གདུང་ཞུགས་འབུལ་སྐབས་ངོ་མཚར་བའི་ལྟས་དུ་མ་དང་རིང་བསྲེལ་དང་རང་བྱོན་མང་དུ་བྱོན་པར་བཤད་དོ། སྲས་གཉིས་པ་ཀླུ་འཕེལ་ཞེས་བྱ་བ་དང་། གསུམ་པ་རྒྱལ་རབས་བདུན་པ། ༈ ཁྲི་རབས་དང་པོ། ས་གཞི་སྐྱོང་བའི་དབང་པོ་བླ་མ་བྱམས་པ་ཕུན་ཚོགས་ཞེས་བྱ་བ་འདི་ནི་རྒྱལ་བ་ཀུན་གྱི་མཐུ་སྟོབས་གཅིག་ཏུ་བསྡུས་པ་གསང་བདག་ཕྱག་ན་རྡོ་རྗེ་སྡོམ་བརྩོན་རྒྱལ་པོའི་ཚུལ་འཆང་བ་ལུང་གིས་ཟིན་པའི་སྐྱེས་བུ་ཆེན་པོ་ཞིག་སྟེ། ཇི་སྐད་དུ། གསུམ་པ་རྒྱལ་བ་ཀུན་གྱི་མཐུ་སྟོབས་ཀུན། །ཀུན་འདུས་གསང་བདག་ཕྱག་ན་རྡོ་རྗེ་ཉིད། །སྙིགས་དུས་མ་རུངས་གདུག་པ་ཀུན་འདུལ་ཞིང་། །སྟོབས་བཅུ་མངའ་བའི་བསྟན་པ་རིན་པོ་ཆེ། །སྡེ་བཅས་དར་ཞིང་འགྲོ་ཀུན་ཐར་པའི་ལམ། །བཀྲི་ཕྱིར་སྡོམ་བརྩོན་རྒྱལ་པོའི་ཚུལ་འཆང་བ། །བླ་མ་བྱམས་པ་ཕུན་ཚོགས་ཞེས་བྱར་བྱོན། །ཚོགས་གཉིས་རབ་རྫོགས་སྐྱེས་ཐོབ་ཡོན་ཏན་གྱི། །བདག་ཉིད་ཆེ་དེས་སླར་ཡང་རང་ཉིད་རྒྱུད། །སྦྱོང་ཚུལ་སྟོན་ཕྱིར་ཐུབ་པའི་རིང་ལུགས་མཆོག །ས་ངོར་བསྟན་པའི་སྒོར་ཞུགས་ཤར་ཆེན་པ། །ཤེས་རབ་འབྱུང་གནས་ལ་སོགས་དམ་པ་བསྟེན། །ཡོངས་རྫོགས་སོ་སོར་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པ་དང་རྗེས་འབྲེལ། །ཟབ་རྒྱས་ཆོས་ཀྱི་བདུད་རྩི་ངོམས་གསོལ་བས། །ཐུགས་རྒྱུད་སྨིན་ཅིང་གྲོལ་ཏེ་འཇམ་དཔལ་གྱི། །བློ་གྲོས་པད་དཀར་འཛིན་པའི་སྙིང་རྗེ་དང་། །ལག་ན་རྡོ་རྗེའི་མཐུ་དཔལ་གསུམ་ཆར་རྫོགས། །ཞེས་སོགས་གསུངས་པ་ལྟར། གཙུག་ལག་ཟུང་གི་མཁྱེན་དཔྱོད་རབ་ཏུ་གསལ་བས། ཤར་ཆེན་ཆོས་ཀྱི་རྒྱལ་པོ་ཤེས་རབ་འབྱུང་གནས་སོགས་མདོ་རྒྱུད་རྒྱ་མཚོའི་ཕ་རོལ་ཏུ་སོན་པའི་མཁས་གྲུབ་དུ་མའི་ཞབས་ཀྱི་པདྨཉེ་བར་བསྙེན་ཅིང་། སྡོམ་པ་གསུམ་དང་རྗེས་སུ་འབྲེལ་བའི་ཟབ་པ་དང་རྒྱ་ཆེ་བའི་ཆོས་ཀྱི་བདུད་རྩི་ཟད་མི་ཤེས་པའི་རྒྱུན་ཆེན་པོ་ངོམས་པར་གསོལ་བས་རང་དོན་སྤང་རྟོགས་མཐར་ཕྱིན། གཞན་དོན་ཐུགས་ལ་བཅངས་བའི་ཚེ། དུས་དེ་སྐབས་ཙམ་ན་ཡུལ་མདོ་ཁམས་ཀྱི་ཕྱོགས་འདིར། སྡེ་ཤོག་རེ་ལ་དཔོན་ཆེན་རེ། ལུང་ཆུང་རེ་ལ་ཚོ་རྒོད་རེ། རི་འབུར་རེ་ལ་རྫོང་ཆུང་རེ། དཔོན་ལ་ཁྲིམས་མེད། ཚོ་ཆེན་གྱིས་ཚོ་ཆུང་ཟ་བ། ཤེད་ཡོད་ཀྱིས་ཤེད་མེད་བརྡུང་བ། རྫི་འུས་ཁ་ཆེམས་བཞག་དགོས་པ། ཆུ་ལེན་གྱིས་དགྲ་ཆས་སྤྲད་དགོས་པའི་དུས། ཡུལ་དེར་སྐྱེས་པའི་སྐྱེ་འགྲོ་རྣམས་ཡ་ང་བའི་གནས་སུ་གཟིགས་ཏེ། དེ་དག་གནས་སྐབས་དང་མཐར་ཐུག་གི་བདེ་བ་ལ་བཀོད་དགོས་ན། ཐོག་མར་དབང་ཤུགས་བཙན་པོས་མངའ་འོག་ཏུ་མ་བསྡུས་ཐབས་མེད་ཡིན་པར་དགོངས་ནས་ཆབ་སྲིད་ཀྱི་བྱ་བ་གཙོ་ཆེར་མཛད། གཅིག་ཏུ་མཚུངས་པ་མེད་པའི་བསོད་ནམས་ཀྱི་མཐུས་སྐྱེ་འགྲོ་ཐམས་ཅད་དབང་དུ་འདུས་པ་ཞིག་སྟེ། དེ་སྐབས་ཉེ་སྐོར་རྣམས་གླིང་དཔོན་གྱི་མངའ་ཁོངས་ཡིན་པ་དཔོན་ལ་ལུགས་གཉིས་ཀྱི་ཁྲིམས་མེད་པས། འོག་སྡེ་རྣམས་དཔོན་ལ་ཡིད་སུན་ནས་འབངས་གྱེན་ལོག་བྱུང་ནས་ནང་ཚན་སོ་སོར་འཐོར། སྐབས་དེ་དང་བསྟུན་ནས་ས་སྐྱོང་བླ་ཆེན་མཆོག་དང་ཕྱག་མཛོད་ཀུན་དགའ་རྒྱལ་མཚན། གད་ཐོག་གཉེར་པ་ཀུན་དགའ་དོན་གྲུབ་སོགས་རྒྱལ་བློན་དཔུང་ཚོགས་ཡན་ལག་བཞི་ལྡན་གྱི་གཡུལ་བཤམས་ནས། ངན་པ་རྣམས་ཆམ་ལ་ཕབ། དམན་པ་རྣམས་ཀྱི་མགོ་བླངས། དྲེགས་ལྡན་རྣམས་ཀྱང་སྔོན་ལས་དང་སྨོན་ལམ་གྱི་མཐུ་དགག་ཏུ་མེད་པའི་རྒྱུད་གྲིམས་པོས་དཀའ་བ་མེད་པ་རང་དབང་དུ་བཀུག་སྟེ། ཆབ་འབངས་རྫོང་ཆེན་བཅོ་བརྒྱད། འབངས་མི་ཁྱིམ་སུམ་ཁྲི་དྲུག་སྟོང་མངའ་ཞབས་སུ་བསྡུས། འདི་སྐབས་བེ་རི་རྒྱལ་པོ་དོན་ཡོད་རྒྱལ་ཞེས་པ་དར་ཆེ་བ་བྱུང་བས་ཕན་ཚུན་འགྲན་ཟླ་ཆེ་ཡང་། གཅིག་འོག་གཅིག་མ་ཚུད་པ་རེ་ཞིག་ནས་བླ་ཆེན་འདི་ཉིད་ཀྱི་མཆེད་ཡ་དབོན་ཀརྨ་ལ་བེར་བཟའ་ཞིག་བསུས་ཏེ་ཁ་མཆུ་གཉེན་འོག་ཏུ་བསྡུས་པ་ཞིག་བྱུང་ཡང་། བེར་བཟའ་ལ་རིགས་བརྒྱུད་ནི་མ་བྱུང་། ཕྱིས་བེ་རི་རྒྱལ་པོ་བོན་ལ་བློ་ཕྱོགས་ཆེས་ཆེ་བས་ཁམས་ཕྱོགས་ཀྱི་དགེ་ལུགས་ཕྱོགས་གཙོས་པའི་བསྟན་པ་སྤྱི་དང་ནང་མི་མཐུན་པའི་འགལ་ཟླ་ཆེན་པོ་བྱུང་བའི་སྐབས། བོད་ན་གཙང་པ་སྡེ་སྲིད་དང་དགེ་ལུགས་ཕྱོགས་ཀྱི་འགལ་ཟླ་ཆེས་ཆེར་བྱུང་སྐབས་དང་དུས་མཚུངས་ཡིན། དགེ་ལུགས་ཕྱོགས་ཀྱི་རྒྱབ་གཉེར་གུ་ཤྲི་ཁཱན་ནམ་རྗེས་སུ་རྒྱལ་དབང་ལྔ་པས་གནང་བའི་མཚན་གུ་ཤྲི་བསྟན་འཛིན་ཆོས་རྒྱལ་གྱིས་བྱས། དེས་དང་ཐོག་བེ་རི་རྒྱལ་པོ་བཏུལ། དེ་ནས་གཙང་པ་སྡེ་སྲིད་བཅོམ་རྒྱུའི་འཆར་གཞི་ལྟར། སོག་པོ་གུ་ཤྲི་བསྟན་འཛིན་ཆོས་ཀྱི་རྒྱལ་པོས་བླ་ཆེན་འདི་ཉིད་ལ་བཀའ་ཤོག་རྟེན་བཅས་མཛད་ནས། བེ་རི་འདིས་བསྟན་འགྲོ་ཡོངས་ལ་གནོད་འདུག་པས་ངེད་ཀྱིས་དམག་དཔུང་གཏོང་བརྩིས་ཡིན་པས། ཁྱེད་ནས་དགྲ་ཐབས་ཀྱི་དཔུང་གྲོགས་གྱིས་དང་། ངེད་ནས་རྒྱལ་བའི་ཚེ་བེར་སྡེ་འབྲོག་པ་སྦྲ་ཐག་འཐེན་ཚད་ངས་བྱེད། ཡུལ་སྡེ་ཤིང་སྒོ་བཙུགས་ཚད་ཁྱེད་ལ་དཔའ་རྟགས་སུ་སྦྱིན་ཟེར་བ་བྱུང་དུས། བླ་ཆེན་འདི་གཞུང་དྲང་སྟབས་ཀྱིས་སྔོན་དུས་བེ་རི་དང་ཟེར་བརྗོད་བྱུང་ཡང་། དེང་སང་སྐུ་ཉེ་གཉེན་ཡང་ཡིན། ལར་ཡང་བོད་སྐད་རིགས་གཅིག་པའི་མགོ་རྣ་དང་བསྟུན་ན་བེ་རི་ལ་ལོག་པ་མི་བྱེད་གསུངས་ཀྱང་། དེ་སྐབས་གཉེར་པའམ་ཕྱག་མཛོད་ཀུན་དགའ་རྒྱལ་མཚན་དང་། ཚེ་རིང་ཐར་གཉིས་ཀྱིས་དེང་སང་སོག་པོ་ཨོ་རོད་ལས་དབང་བསོད་ནམས་ཡར་དར་དུ་འདུག་ཅིང་། བེ་རི་རྒྱལ་པོའི་བྱ་བ་བསོད་ནམས་ཐམས་ཅད་ཟད་པའི་ལས་ཀར་དོད་འདུས་པས་བསོད་ནམས་ཅན་གྱི་རྒྱབ་ལ་མི་འདུག་ནས། བསོད་ཟད་ཀྱི་ཕྱོགས་ལ་བསྡད་ནས་མཉམ་དུ་བརླག་པ་དེ་འདྲ་བྱེད་དོན་མི་འདུག་ཅེས་ཐག་བཅད། རབ་བྱུང་བཅུ་གཅིག་པའི་ལྕགས་འབྲུག་ཕྱི་ལོ་༡༦༤༠་ལོར།༼ཕྱི་ལོ་༡༦༣༩་ཞེས་པའང་ཡོད༽གུ་ཤྲི་བསྟན་འཛིན་ཆོས་རྒྱལ་དཔུང་དང་བེ་རི་རྒྱལ་པོ་འཐབ། དེ་སྐབས་སྡེ་དགེའི་བླ་ཆེན་དཔུང་རོགས་ཞུས་ཏེ་བེ་རི་རྒྱལ་པོ་རྩ་བརླག་བཏང་བའི་སྐྱེས་སུ་འབྲི་ཆུའི་ནུབ་རྒྱུད་ཀྱི་བེ་རིའི་སྡེ་ཤིང་སྒོ་བཙུགས་ཚད་དང་། འབྲི་ཆུའི་ཤར་རྒྱུད་འདན་མ་སོགས་སྡེ་དགེ་བླ་ཆེན་གྱི་ཆབ་འོག་ཏུ་ཕུལ་བ་ཡིན་ཏེ། དེ་ཉིད་ལས། དཔུང་དང་སྟོབས་ཀྱིས་སྙེམས་ལྡན་ས་ཡི་བདག །གུ་ཤྲི་བསྟན་འཛིན་ཆོས་ཀྱི་རྒྱལ་པོས་ཀྱང་། །བླ་ཆེན་འདི་ལ་གུས་བཏུད་དཔུང་གཉེན་བཅོལ། །ལེགས་གསོལ་ཆབ་འབངས་མང་པོ་གུས་ཕུལ་ཞུས། ཞེས་སོགས་གསུངས་ཏེ། སྡེ་དགེའི་རྒྱལ་རབས་ཚིགས་བཅད་མའི་མཆན་ལས། ཕོ་བྲང་ཁག་དང་མི་སེར་བཅས་ཀྱི་འབྱུང་ཁུངས་ལོ་རྒྱུས། སྔོན་ལྷ་སར་དཀར་ཆག་ཏུ་གསལ་ཙམ་ཡོད་ཚོད་ཀྱང་། ཕྱིས་སུ་མ་ཡུམ་བདེ་གཤེགས་དེ་ཉིད་ཀྱི་སྐབས་ཕོ་བྲང་ཁང་ལས་ཞིག་གསོས་གནང་བའི་ཞར་ལ་ལྷ་སར་དཀར་ཆག་རྗེས་མེད་དུ་བསུབས་པར་མཛད་པ་དང་། འགའ་ཞིག་གིས་རྩོམ་པའི་ལོ་རྒྱུས་ལའང་འོལ་ཚོད་ལྟ་བུ་ལས་ཞིབ་གསལ་མེད་པ་དང་། ཐེ་ཚོམ་གྱི་ཆ་འགའ་ཞིག་འདུག་པ་བཅས་ཞིབ་པར་བརྗོད་རྔོ་མ་ཐོགས་ཀྱང་ས་བཅད་ཙམ་སྤྲོ་ན། རྨེ་ཤོད་ནི་གླིང་དཔོན་དུ་སི་ཟེར་བ། བྲ་དགེ་སོགས་ངོ་ལོག་གི་ནང་འཁྲུགས་ཐོག་བླ་ཆེན་གྱི་དཔུང་ཤུགས་ཀྱིས་མནན་ཏེ་ཆབ་འོག་ཏུ་བསྡུས་ནས་བསད་མཁན་རྣམས་ལ་མི་སྟོང་ཡང་བཀལ་བར་མཛད་པ་སྟེ། ད་ལྟའང་དུ་སི་བསད་སྟོང་དུ་གླིང་ཞེས་ཐོག་འཇལ་རྒྱུན་ཡོད་འདུག །དཔེ་ཝར་ནི་བླ་ཆེན་གྱི་དཔུང་གིས་ཞབས་འོག་ཏུ་བཅུག་ཟེར་བ་ཙམ་ལས་ས་བདག་མ་ངེས་པ་ཞིག་དང་། ཡང་བེ་རི་དོན་ཡོད་རྒྱལ་གྱི་སྡེ་དེ་ཆུས་ཉེས་ནས་བསྟན་འཛིན་ཆོས་རྒྱལ་གྱིས་སྡེ་དགེ་ལ་བསྩལ་ཟེར་སྲོལ་ཡང་མཆིས། མཁར་མདོ་ཚུ་རི་ནི་གླིང་དཔོན་ཞིག་གི་སྡེ་ལ་དཔོན་དེ་ཕྱོགས་གཞན་དུ་འགྲོ་ཚེ་ཚོ་མི་དྷཤྲཱིས་སྡེ་དགེར་བྱ་བཏང་སྟེ། དེར་བླ་ཆེན་གྱིས་དམག་དཔུང་བཏེགས་ནས་འབངས་སུ་བྱས་པར་གྲགས། མཁར་མདོ་ཕ་རི་ནི་བེ་རིའི་སྡེ་ཡིན་པ་སོག་པོས་ཕུལ། ཀུ་སེ་སྡེ་རྙིང་། ཉག་གཤིས་བཅས་གོ་འཇོ་དཔོན་མོའི་ཁོངས་གཏོགས་གསེར་མདོག་བླ་མ་ཟེར་བས་བདག་པ་ཞིག་ལ་བླ་ཆེན་གྱིས་ཆབ་འོག་ཏུ་བསྡུ་བར་མཛད་པ་དང་། སྤོ་ལུ་ཡང་གོ་འཇོ་དཔོན་མོའི་ཁོངས་གཏོགས་ཤིག་ཡིན་པ་བླ་ཆེན་ལ་སྤོ་ལུ་བླ་མ་ཀརྨས་དཀར་པོ་སུམ་ཚན་གྱིས་བརྒྱུད་ནས་མགོ་བཏགས་ཞུས། ཀུ་སེ་སྡེ་གསར་ཡང་གོ་འཇོའི་ཁོངས་གཏོགས་ལ་བསམ་པ་ཕུན་ཚོགས། གནས་ར་ཨ་གྲོ། སྤྱང་ཞིང་ཕུན་ཚོགས་གསུམ་གྱིས་གོ་འཇོ་ལ་ངོ་ལོག་ནས་བླ་ཆེན་ལ་མགོ་བཏགས་ཞུས། སྒ་རྗེ་དང་དཔལ་འབར་ཡང་སྟོང་ར་སྡེ་པའི་ཁོངས་གཏོགས་ལ་སྡེ་བཟའ་ཞིག་སྒ་རྗེར་ཕྱིར་གནང་བ་སོགས་ཀྱི་གཡོ་ཐབས་དང་། སྔ་ཕྱིར་དམག་དཔུང་གིས་ཆབ་འོག་ཏུ་བསྡུས་པ་བླ་ཆེན་གྱི་སྐབས་སུ་ཡིན་པར་མངོན། དཔལ་ཡུལ་ཡང་འདི་དང་ཁོག་མཚུངས་ཤིག་ཡིན་ཚོད་འདུག །ཙམ་མདོ་ནི་དཔོན་ཆུང་གེ་འཕན་ཨི་གཞིའི་སྡེ་ཡིན་པ་བླ་ཆེན་ལ་གཙང་འབུལ་དུ་ཞུས། དབོན་སྟོད་ཚུ་རི་ནི་བླ་མ་ཞིག་གི་སྡེ་ཡིན་པ་དཔུང་གིས་སྤ་བཀོང་ནས་འབངས་སུ་བྱས། ཕ་རི་ནི་བེར་སྡེ་ཡིན་པ་ལ་སོག་རྒྱལ་གྱིས་བླ་ཆེན་ལ་ཕུལ། ཡེ་ན་ནི་དྲུང་དཀོན་མཆོག་ལེགས་པས་བླ་ཆེན་ལ་མགོ་བཏགས་ཞུས་ནས་ཕུལ། འཁོར་ལོ་མདོ། རག་ཆབ། ཛཾ་ཐོག་བཅས་གད་གཉེར་མགོ་བཏགས་ཞུས་ཁོངས་སུ་གཙང་འབུལ་ཞུས། ལྕགས་ར་དང་། རབ་བརྟན་ནི་ཨ་ཡུ་མདོ་མང་དང་། ཀམ་པ་དྲུང་པ་གཉིས་བཀུམས་ཏེ་བྲན་དུ་བྱས། ཡིད་ལྷུང་བ་ནི་བེ་རིའི་འབྲོག་སྡེ་ལ་གུ་ཤྲི་བསྟན་འཛིན་ཆོས་རྒྱལ་གྱིས་སྡེ་དགེར་ལེགས་གསོལ་ཕུལ། ལྷ་རུ་དཔོན་ནི་འདི་ཕྱོགས་ནས་རྐྱ་མི་བདུན་ཕར་སོང་སྟེ་ཡིད་ལྷུང་དུ་ཆགས་པ་ལས་རིམ་གྱིས་འགོ་པར་བསྐོས་པའི་བརྒྱུད་དང་། དེ་དག་ལས་འཕེལ་བའི་མི་བརྒྱུད་རྣམས་ལ་ལྷ་སྟག་གཉིས་གྲགས་པ་ཡིན། ལྕགས་ར་ནི་ཚེ་ཚ་ཚོ་པ་མགོན་པོ་ཟེར་བ་བཀུམས་ཏེ་བདག་གིར་མཛད། ཧོར་པོ་ཨ་གྲོ་སྦ་ཞར་ཟེར་བའི་སྡེ་ཡིན་ཚོད་སོགས་དེ་དག་གིས་མཚོན། མདོ་སྨད་ཕྱོགས་ཀྱི་ལུས་ཅན་མཐའ་དག་བླ་ཆེན་མཆོག་གིས་མཆོག་ཏུ་དགེ་བའི་ལས་དབང་གསེར་གྱི་འཁོར་ལོའི་སྟོབས་ཤུགས་ཀྱིས་ཆབ་འབངས་སུ་གྱུར་པ་ཤ་སྟག་ཡིན་འདུག་ཀྱང་རྒྱུ་མཚན་གོང་སྨོས་བཞིན་ཞིབ་ཏུ་སྤྲོ་མ་ཤེས་པས། སླར་རྒྱུ་མཚན་དྲང་པོ་ཁུངས་ཐུབ་འདྲ་བྱུང་ན་རིམ་གྱིས་སྤེལ་བར་སྤྲོ་ཞེས་བཀོད་འདུག །དེ་ལ་སོགས་པ་ཉི་འོག་གི་དྲེགས་ལྡན་མ་ལུས་པ་ཀུན་གྱིས་བླ་ཆེན་གནམ་བསྐོས་མི་ཡི་བདག་པོ་ཆེན་པོ་འདིའི་ཞབས་པད་གཙུག་ཏུ་བཀུར། དེ་ལྟར་ཕྱོགས་ཀྱི་རྒྱལ་ཁམས་དབང་དུ་བསྡུ་བ་རེ་ཞིག་དེ་ཙམ་གྱིས་ཆོག་པར་མཛད་དེ། མངའ་སྡེ་བྱམས་པས་སྐྱོང་བ་ལ་ལུགས་གཉིས་ཀྱི་ཁྲིམས་དགོས་པར་གཟིགས་ཏེ། མི་དགེ་བ་བཅུ་སྤང་ཞིང་དགེ་བ་བཅུ་སྒྲུབ་དགོས་པའི་བཅའ་ཁྲིམས། བོད་རྗེ་མེས་དབོན་གྱི་ཁྲིམས་སྲོལ་ལྟར་མི་ཆོས་གཙང་མ་བཅུ་དྲུག་གི་ཁྲིམས་སྲོལ་བཅས་ནས། རྒྱལ་ཁྲིམས་གཅིག་གི་ཁྲིམས་ལུགས་ལས་གཞན་ས་ལ་ང་ཆེ་ཡུལ་ལ་ང་དབང་གི་ཁ་ཚིག་ཟུར་ཙམ་སོ་དཀར་རྒྱབ་ལ་དྲངས་མི་ནུས་པ་བྱས། མཐོ་བ་གཉའ་བཅགས་དམའ་བ་འོག་ནས་བསྐྱངས་ཏེ། ཕ་བསད་ཀྱི་བུ་དང་ཕ་ཤིའི་བུ་གཉིས་ཀྱང་གཅིག་གིས་གཅིག་ལ་འཚེ་བ་མི་ནུས་པ་མཉམ་དུ་སྡོད་ཆོག་པ་བྱུང་ཞིང་། ཉམ་ཆུང་རྒན་མོས་གསེར་གྱི་ཁུར་པོ་འཁུར་ནས་ས་ལམ་དོག་པོར་རྒྱུ་ནའང་བདེ་བར་འགྲོ་ཆོག་པ། ཁྲིམས་སྲོལ་དྲང་བས་སྡེ་དགེའི་ཁྲིམས་རྒན་མ་ཞེས་ཀུན་གྱིས་ཚད་འཇོག་བྱེད་པ་བྱུང་། མངའ་སྡེ་རྫོང་སྒོ་རེ་ལ་རྫོང་དཔོན་རེ་བཞག་ཅིང་། མངའ་འབངས་ཀྱི་ས་བོན་གྱི་དྲུག་ཆ་རེ་དཔྱ་ཁྲལ་ལེན་རྒྱུ་དང་། དཔྱ་ཁྲལ་བླངས་པའི་དངོས་རྫས་ཐམས་ཅད་ཀྱི་ཕྱེད་ཆ་ཆོས་ཕྱོགས་ཀྱི་གཏོང་སྒོ་བྱེད་རྒྱུའི་གཏན་འབེབས་གནང་བ་བཞིན་སྡེ་དགེའི་སྲིད་དབང་མ་རྫོགས་བར་དེའི་སྲོལ་རྒྱུན་གནས་འདུག །འདི་སྐོར་ཞིབ་པ་འོག་ཏུ་འཆད་རྒྱུ་ཡིན། འདི་དང་གཏན་གྱི་བདེ་ཐབས་མཐར་ཐུག་པ་དམ་པའི་ཆོས་ཁོ་ན་ལས་མེད་པ་དང་། དམ་པའི་ཆོས་སྒྲུབ་པ་ལའང་ཕྱི་ཚུལ་ཙམ་མམ་རྨོངས་དད་ཙམ་གྱིས་མི་ཕན་པ་ཆོས་རྣལ་མ་ཞིག་དགོས། དེའི་ཆ་རྐྱེན་དུ་རྡོ་རྗེ་སློབ་དཔོན་ཚད་ལྡན་ཞིག་མེད་ཐབས་མེད་པར་དགོངས་ནས་སྔར་རྒྱུན་བཞིན་དཔལ་ལྡན་ས་སྐྱ་པའི་བསྟན་འཛིན་གྱི་བྱེ་བྲག་ངོར་ཨེཝཾ་པ་ཆེན་པོའི་གདན་ས་སྒྲུབ་ཁང་བླ་བྲང་ནས་མཁན་ཆེན་དཔལ་མཆོག་རྒྱལ་མཚན་སྤྱན་དྲངས། མཆོད་ཡོན་བཀའ་གྲོས་ཀྱིས་རྫོང་ཁག་གི་ཕོ་བྲང་གཙོ་ཆེ་རེ་དང་ཆོས་སྡེ་རེ་འབྲེལ་མར་མཛད་དེ་དགོན་སྡེ་བརྒྱ་རྩ་བཏབ། ལྷུན་གྲུབ་སྟེང་གི་ཉིན་དགོན་དང་སྲིབ་དགོན་སྔར་ལས་ཀྱང་ཆེས་ཆེར་རྒྱར་བསྐྱེད་པ་དང་། རབ་བྱུང་བཅུ་པའི་མེ་འབྲུག་ཕྱི་ལོ་༡༦༡༦ལོར་སྤྲུལ་པའི་ལྷ་ཁང་ཆེན་པོ་བསམ་གྲུབ་མཐོང་གྲོལ་ཆེན་མོ་བཞེངས། སྡེ་དགེའི་ཆབ་འོག་ཏུ་གཏོགས་པའི་ས་དགོན་ཐམས་ཅད་ངོར་ཨེཝཾ་ཆོས་ལྡན་དུ་གྲྭ་རྒྱུན་ཆག་འཕྲི་མེད་པར་འགྲོ་དགོས་པའི་སྲོལ་གཏོད། ཆོས་གྲྭ་ཆེན་པོ་ལྷུན་གྲུབ་སྟེང་འདི་ཉིད་གཙོར་སྨོས་པའི་ཆོས་སྡེ་མང་པོར་བཤད་སྒྲུབ་ཀྱི་རྒྱུན་ཉམས་པ་སླར་གསོ་ཞིང་། མེད་པ་གསར་དུ་སྤེལ་བ་དང་། མངའ་ཞབས་སུ་ཡོད་པའི་རིས་མེད་ཆོས་སྡེ་ཁག་ལ་བཤད་སྒྲུབ་འཁྲུལ་མེད་རྒྱུན་གཙང་རྣམ་དག་དགོས་རྒྱུའི་བཀའ་དང་དག་ཐེར་མཛད། རྒྱལ་ས་གདན་སའི་ལྟེ་བ་ལྷུན་གྲུབ་སྟེང་གི་ཆོས་གྲྭར་བྱེད་རྒྱུ་དང་། གདན་ས་པ་གདུང་རྒྱུད་ལ་རིགས་སྲས་གཅིག་རེ་ལས་མེད་པའི་སྐབས་མ་གཏོགས་རབ་བྱུང་ཁོ་ནས་གནང་དགོས་རྒྱུའི་སྲོལ་རྒྱུན་བཙུགས། ཁྱད་པར་རྒྱལ་བའི་བསྟན་པའི་རྩ་ལག་ཏུ་རིན་པོ་ཆེ་དཔལ་མཆོག་རྒྱལ་མཚན་དེ་ཉིད་མདོ་སྨད་ཕྱོགས་ཀྱི་ཆོས་གྲྭ། ཡུལ། གྲོང་ཁྱེར། གྲོང་རྡལ། རྒྱལ་པོའི་ཕོ་བྲང་ལ་སོགས་པ་རྣམས་སུ་བསྟན་པའི་སྣང་བ་ཆེན་པོ་བཀྱེ་བའི་ཆེད་དུ་སྤྱན་དྲངས་ཏེ་རིགས་ཀྱི་ཅོད་པན་གཅིག་པུ་ཉིད་དུ་མངའ་གསོལ། རིག་པ་འཛིན་པའི་དགེ་འདུན་གྲངས་མེད་པ་ལ་བསྙེན་བཀུར་གྱ་ནོམ་པ་སྟོབ་པ་དང་བཅས་ཏེ། ཀྱེ་རྡོ་རྗེ། གུར། སཾཊ། བདེ་མཆོག །གསང་འདུས་ཏེ་ངོར་ལུགས་དཀྱིལ་འཁོར་ལྔའམ་བདུན་དུ་གྲགས་པ། འཇིགས་བྱེད་དྲུག་ཅུ་པའི་གཏོར་བཟློག་སོགས་གསང་ཆེན་རྒྱུད་སྡེ་ཆེན་པོའི་དཀྱིལ་འཁོར་མང་པོའི་ཞལ་ཕྱེ་བའི་སྒྲུབ་མཆོད་ཀྱི་རྣམ་པ་མང་པོ་ཡང་གསར་དུ་འཛུགས་པར་མཛད། འཇམ་དབྱངས་དཔལ་མཆོག་རྒྱལ་མཚན་གྱི་བླ་བྲང་གསར་དུ་བརྒྱབས་པས་ཕྱིས་མཁན་རབས་རིམ་བྱོན་གྱི་བཞུགས་གནས་ཐར་རྩེ་སྒྲུབ་ཁང་དུ་གྲགས། བླ་ཆེན་འདི་ནས་བཟུང་སྟེ་སྡེ་དགེའི་ཁྲི་རབས་ཀྱི་དབུ་ཚུགས། མདོར་ན་སྔར་སྲོལ་བཟང་པོ་མི་ཉམས་པར་སྐྱོང་བ་དང་། གསར་བྱུང་གི་སྒྲིག་སྲོལ་བཟང་པོ་བཅའ་བ་ལ་སོགས་པས་ལུགས་གཉིས་ཀྱི་རྒྱུན་གཙང་དྲི་མ་མེད་པ་བསྐལ་པ་ནམ་གནས་ཀྱི་བར་དུ་མི་ནུབ་པར་སྤེལ་བའི་བགྱི་བ་ཐམས་ཅད་ཆོས་རྒྱལ་ཨཤོཀའི་རྣམ་པར་ཐར་པའི་ངོ་མཚར་ཡང་འགོག་པར་ནུས་པའི་རང་བཞིན་ཁོ་ན་ཉིད་དོ། དེ་ལྟར་བླ་ཆེན་ཆོས་ཀྱི་རྒྱལ་པོ་འདི་ཉིད་ཀྱིས་ལུགས་གཉིས་ཀྱི་ཁྲིམས་སྲོལ་དྲང་པོར་བཅས་པ་དང་། ལྷག་པར་དམ་པའི་ཆོས་རྣལ་མ་སྒྲུབ་ཆོག་པའི་ཆ་རྐྱེན་མང་དུ་བསྐྲུན་པས། བོད་ཆེན་པོའི་ཡུལ་འདིའི་མིའི་འགྲོ་བ་ཀུན་ཆོས་རྒྱལ་མེས་དབོན་རྣམས་ཕེབས་ནས་དམ་པའི་ཆོས་ཁོ་ན་དོན་གཉེར་སྙིང་ནས་བཅང་བའི་གོམས་གཤིས་ལ་བརྟེན་དད་གུས་དང་དགའ་ཞེན་ཚད་མེད་བྱས། སྐབས་དེར་དམ་པ་འདི་ཉིད་ཀྱི་དབང་ཟིལ་དང་གྲགས་སྙན་ལ་བརྟེན། མདོ་ཁམས་ཆུ་བཞི་སྒང་དྲུག་གི་རྒྱལ་ཕྲན། སྡེ་དཔོན། བླ་ཆེན་ཕལ་མོ་ཆེས་ལེགས་སྐྱེས་ཕུལ་ཞིང་གུས་ཞབས་སུ་བཏུད་པ་ཁོ་ན་བྱུང་བར་གྲགས་སོ། ། མུ་འགོད།་་་་་་་་་་་་་
' རྩོམ་འོག་མ།
སྡེ་དགེ་རྒྱལ་རབས་རིན་ཆེན་ཕྲེང་མཛེས། ༼གཉིས་པ་༽