རྒྱལ་ཡོངས་ཚོགས་ཆེན་ཐེངས་དང་པོའི་དབུ་འབྱེད་གསུང་བཤད།
༈ སྡེ་དགེ་རྒྱལ་ཡོངས་ཚོགས་ཆེན་ཐེངས་དང་པོའི་དབུ་འཛུགས་གསུང་བཤད།
༈ རྒྱ་ཆེའི་བཀུར་བར་འོས་པའི་ཚོགས་ཆེན་འདིར་ཆིབས་བསྒྱུར་བསྐྱངས་པའི་རང་རེ་སྡེ་དགེ་བའི་ཕུ་ནུ་མིང་སྲིང་ཡོངས་ལ་གུས་འདུད་སྔོན་དུ་བཏང་ནས། ཐོག་མ་སྡེ་དགེ་རྒྱལ་ཡོངས་ཚོགས་ཆེན་ཐེངས་དང་པོར་ཕེབས་པར་འཚམས་འདྲི་དང་བཀྲ་ཤིས་
བདེ་ལེགས་གྲངས་མེད་ཞུ་བཞིན་ཡོད།
དེའང་འོད་གསལ་ལྷ་ཡི་གདུང་རྒྱུད། རིག་པ་འཕྲུལ་གྱི་མཁས་རྒྱུད། འཇིག་རྟེན་སྟོབས་ཀྱི་ཆེ་རྒྱུད། གྲུབ་པ་ཐོབ་པའི་ཆོས་རྒྱུད་བཅས་ཁྱད་ཆོས་ཆེ་བ་བཞིས་མངོན་པར་མཐོ་བའི་མདོ་ཁམས་སྡེ་དགེ་བ་ཞེས་པ་འདི་མགར་གནམ་ཚ་འབྲུག་ནས་བརྩིས་པའི་ཐོག་མའི་གདུང་རབས་ལྷ་ལས་ཆད་པ་དང་། གདུང་རབས་བཞི་པ་ཆོས་རྒྱལ་སྲོང་བཙན་སྒམ་པོའི་བློན་ཆེན་མགར་སྟོང་བཙན་ཡུལ་བཟུང་ནས་བརྒྱུད་དེ། གདུང་རབས་སོ་ལྔ་པ་བོ་ཐར་བཀྲ་ཤིས་སེང་གེ་དང་གྲུབ་ཐོབ་ཐང་སྟོང་རྒྱལ་པོ་རྣམ་གཉིས་མཆོད་ཡོན་ཟུང་འབྲེལ་ཐོག་ ༡༤༤༦ ལོར་སྡེ་དགེ་ལྷུན་གྲུབ་སྟེང་ཞེས་པའི་རྒྱལ་ས་ཕྱག་བཏབ། དེ་ནས་རྩིས་པའི་གནམ་ལྷ་བབ་ཀྱི་རྒྱལ་པོ། ས་ལྷུན་གྲུབ་ཀྱི་མངའ་བདག་ཆོས་རྒྱལ་སྡེ་དགེ་ཚང་གི་ཉི་ཟླ་སྐར་གསུམ་ལྟ་བུའི་རྒྱལ་རབས་ཉེར་གསུམ་དང་། ཁྲི་རབས་བཅུ་བཞི། གཉེར་ཕྱག་བཞི། མདུན་སྐོར་སུམ་བཅུ། ཕྱོགས་བཞིའི་དཔོན་འགོ་བཞི། ཧོར་འདྲ་བརྒྱད་ཅུ། དེ་བཞིན་འབྲོག་སྦྲ་སྒོ་ཅན་གྱི་དཔོན་ཁག་ཉེར་ལྔ་དང་། རོང་ཤིང་སྒོ་ཅན་གྱི་རྫོང་ཁག་ཉེར་ལྔ་སོགས་ལྷ་སྡེ་མི་སྡེ་ཆོས་སྡེ་བཅས་ཀྱི་སྲིད་པ་ཆགས་ནས་ད་ལྟའི་བར་ལོ་ངོ་ ༥༦༧ སོང་ཡོད། རྒྱལ་རབས་བདུན་པ་བླ་ཆེན་བྱམས་པ་ཕུན་ཚོགས་ཀྱི་ཟིལ་ཤུགས་ལྡན་པའི་ཞི་དྲག་གཉིས་ལྡན་གྱི་ཐབས་བྱུས་འོག་ཕྱོགས་བཞིའི་མངའ་འོག་སྡེ་རིས་རྒྱ་བསྐྱེད་སོང་པ་ནས། སྡེ་དགེ་ཚང་གི་ཤར་ཡིད་ལྷུང་དཔོན། ལྷོ་རྒ་རྗེ་དཔོན། ནུབ་པ་འབྲོང་པ་དཔོན་། བྱང་སེར་ཤུལ་དཔོན་བཅས་མཐའ་མཚམས་ཕྱོགས་བཞིའི་དཔོན་འགོ་བཞི་ནས་རྩིས་པའི་སྡེ་དུད་ཁྲི་བདུན་དང་། མི་གྲངས་འབུམ་བཞི། ས་ཁྱོན་སྤྱི་ལེ་གྲུ་བཞི་མ་ 44320 ཙམ་གྱི་ལོ་རྒྱུས་བྱུང་ཡོད། ལོ་རྒྱུས་དེ་དག་གི་ནང་སྙིང་དུ་སྡེ་དགེའི་མི་རིགས་དང་ས་གནས་ཙམ་དུ་མ་ཟད། རྒྱལ་རབས་བཅུ་གཉིས་པ་ཆོས་རྒྱལ་བསྟན་པ་ཚེ་རིང་གིས་གསར་བཞེངས་གནང་པའི་པར་ཁང་ཆོས་མཛོད་ཆེན་མོ་བཀྲ་ཤིས་སྒོ་མང་གིས་གཙོས་ཤུལ་བཞག་བྱས་རྗེས་ཀྱིས་བོད་གངས་ཅན་པའི་ཆོས་དང་རིག་གཞུང་གི་རྒྱལ་ས་གཉིས་པ་ལྟ་བུར་གྱུར་པར་བྱས་ནས། རླབས་ཆེན་རིག་གཞུང་བཟང་པོ་གཅེས་སྐྱོང་དང་། ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་པའི་དགོན་སྡེ་རྣམས་ལ་བླ་ན་མེད་པའི་བསྙེན་བཀུར་ཞུས་པ་སོགས་ཀྱིས་མཚོན་ཤེས་ལྡན་མི་སྣ་གསོ་སྐྱོང་གནང་སྟེ་བོད་བརྒྱུད་ཤེས་རིག་དར་སྤེལ་བཏང་ནས་བོད་ཙམ་དུ་མ་ཟད་འཛམ་གླིང་ཁྱོན་ཡོངས་ལ་བསམ་ནའང་འབུར་དུ་ཐོན་པའི་ཞབས་འདེབས་རྒྱ་ཆེན་ཞུས་ཡོད།
འོན་ཀྱང་འདས་པའི་ལོ་རྒྱུས་ཀྱིས་ད་ལྟའི་ཚབ་བྱེད་ཐུབ་ཀྱིན་མེད་སྟབས། ད་ལྟའི་སྡེ་དགེ་བ་ནི་གནས་སྟངས་སྐྱུར་མོ་ཞིག་གི་འོག་མི་རེ་ངོ་རེའི་སེམས་ལ་ཚོར་སྣང་གྲང་ཤུར་ཤུར་རེར་ཁྱེར་ནས་གནས་ཡོད། གནས་སྟངས་འདི་སྡེ་དགེ་བ་ལ་མི་མེད་པ་དང་རྒྱུ་མེད་པ། རིག་གཞུང་མེད་པ་དང་ས་ཆ་མེད་པ། འདས་པའི་བྱས་རྗེས་མེད་པ་དང་ད་ལྟའི་རེ་བ་མེད་པ་དེ་འདྲས་རྩ་བ་ཉིད་ནས་མིན། འོ་ན་ག་རེ་བྱས་ནས་རེད་ལབ་ན། ནང་ཁུལ་འཆམ་མཐུན་དང་ཆིག་སྒྲིལ་མེད་པ་འདི་ཁོ་ནས་རེད། ཡིན་ནའང་ང་ཚོ་ཚང་མ་སྐྱེ་བོ་གཞན་དང་འདྲ་བ་ཕར་བལྟས་ན་གཞན་རིག་མཁན་དང་། ཚུར་བལྟས་ན་རང་རིག་མཁན་གྱི་མི་རེ་ཡིན་པ་ཙམ་དུ་མ་ཟད། སྐྱེ་བ་འདིར་སྡེ་དགེ་བའི་ཤ་ཁྲག་རུས་གསུམ་གྱིས་གྲུབ་ཟིན་ཡོད་སྟབས། ཁ་ཕོ་ཡང་སྡོམ་དང་། སྐེ་རགས་ཡང་བཅིངས་ཀྱི་ཐོག་ནས་ནང་ཁུལ་འཆམ་མཐུན་གྱིས་དཔུང་པ་མཉམ་གཤིབ་བྱས་ན། ཕོ་སུ་འདྲ་ཞིག་དང་བསྡུར་ཡང་སྔོན་ལ་མ་སླེབས་ནའང་རྗེས་ལ་ལུས་མི་སྲིད་པའི་ནུས་སྟོབས་ཤིག་ང་ཚོ་ལའང་ཡོད་པ་རེད། མདོར་ན་མི་རབས་རྗེས་མ་ཚོས་ད་ལྟའི་ང་ཚོའི་ལོ་རྒྱུས་གླེང་དུས་ཁོང་ཚོ་ཙམ་དུ་མ་ཟད་སྐབས་དེའི་ང་ཚོའི་རྣམ་ཤེས་ཀྱིས་ཀྱང་ང་ཚོ་ལ་ཁོང་ཁྲོ་བྱེད་དགོས་པ་ཞིག་མི་བཟོ་རྒྱུ་དེ་ད་ལྟའི་སྡེ་དགེ་བ་མི་རེ་ངོ་རེའི་ལག་ནང་ལ་ཡོད་པའི་གདམ་ཁ་ཞིག་རེད།
ད་ལྟའི་ང་ཚོ་ཚང་མའི་སེམས་ལ་སྡེ་དགེ་བའང་ལུང་ཚན་གཞན་དག་ལྟར་འཆམ་མཐུན་དང་ཆིག་སྒྲིལ་གྱི་ཐོག་ནས་འདུག་རྒྱུ་བྱུང་ན་ཅི་མ་རུང་དྲན་པ་དང་། སྡེ་དགེ་དབུས་སྤྱི་ཁྱབ་རྒྱུན་ལས་ཁང་ལྟ་བུ་ཞིག་ཡོད་ན་བསམ་མཁན་ཤ་སྟག་ཡིན་པ་ལྟར། ༢༠༡༢་༡༡་༡༧ ཉིན་ཕུ་ནུ་གྲོས་ར་ཞེས་པའི་འཕྲིན་ཕྲན་སྟེང་གི་ཚོགས་པ་འདི་སྟབས་ལེགས་སྟེས་དབང་གི་སྒོ་ནས་དབུ་བརྙེས་ཏེ་མ་བསྐུལ་དང་བླངས་ཀྱི་ཐོག་ནས་ཁྱོན་ཡོངས་ཀྱི་སྡེ་དགེ་བ་མང་པོ་ཞིག་འདུ་འཛོམས་བྱུང་བ་ལྟར། ལྷག་བསམ་དང་སྙིང་སྟོབས་ཀྱིས་ཕྱུག་པའི་ཕུ་ནུ་གྲོས་རའི་ཚོགས་མི་ཚོས་སྡིངས་ཆ་འདི་ནས་མ་འོངས་པའི་བོད་སྤྱི་དང་སྡེ་དགེ་བར་ཕན་ངེས་པའི་སྒྲིག་གཞི་བཟོས་ཤིང་། མང་གཙོའི་ལམ་སྲོལ་འོག་ནས་ལས་བྱེད་གདམ་བསྐོས་བྱས་ཏེ་སྡེ་དགེ་དྲ་བ་གསར་བཟོ་དང་འདས་པའི་ལོ་རྒྱུས་མཁོ་སྒྲུབ་བྱ་རྒྱུ། དེ་ལས་ཀྱང་རྒྱ་ཆེའི་མང་ཚོགས་ཀྱི་རེ་འདུན་ལྟར་ལོ་གཅིག་ཙམ་གྱི་ནང་ཚུན་སྡེ་དགེ་རྒྱལ་ཡོངས་ཚོགས་ཆེན་ཞིག་བསྐང་ཐུབ་པར་བྱས་ཏེ། སྡེ་དགེ་དབུས་སྤྱི་ཁྱབ་རྒྱུན་ལས་ཁང་ཞིག་འཛུགས་ཐབས་བྱ་རྒྱུ་བཅས་ཀྱི་ལས་འཆར་བསྒྲིགས་པ་ཡིན། འདི་ལོའི་ཕྱི་ཟླ་ ༢་ ཚེས་ ༥ ཉིན་སྡེ་དགེ་དྲ་བ་ཐད་གཏོང་ཞུས་ཤིང་། ལོ་རྒྱུས་ཀྱང་མཁོ་སྒྲུབ་ཞུ་མུས་ཡིན། དེ་རིང་ནི་སེམས་བསམ་པའི་ནང་གི་རེ་བའི་ཉི་མ་དངོས་སུ་འཆར་བའི་དུས་ཚོད་ཅིག་སྟེ། འདས་པའི་ལོ་གཅིག་ཙམ་གྱིས་རིང་དཀའ་བ་ཁྱད་དུ་བསད་ངལ་བ་དང་དུ་བླངས་ནས། ཉིན་ཉི་མ་ནང་ལ་གྲོས་བསྡུར་དང་། མཚན་ཉལ་ས་ནང་ནས་བསམ་བློ་ཡུན་རིང་བཏང་བཏང་པའི་འབྲས་བུ་དང་། རྒྱ་ཆེའི་སྡེ་དགེ་བ་ཡོངས་ཀྱིས་ཁ་ཙམ་མིན་པ་དོན་དངོས་པོའི་ལག་ལེན་གྱི་ཁྲོད་ནས་མཉམ་ཞུགས་དང་རྒྱབ་སྐྱོར་ཤུགས་ཆེན་བྱུང་པའི་ཐོག་ལོ་རྒྱུས་རང་བཞིན་ཅན་གྱི་གཟི་བརྗིད་ལྡན་པའི་ཚོགས་ཆེན་འདི་འདྲ་ཞིག་འཚོག་རྒྱུ་བྱུང་བའི་དུས་ཚོད་དེ་རེད།
གོ་སྐབས་འདི་བརྒྱུད་ནས་ལས་དོན་འདིར་ནུས་པ་འདོན་མཁན་གྱི་ལྷག་བསམ་ཅན་དང་། དོན་དམ་པའི་མགོ་རྣ་ཅན་ཚང་མ་ལ་སེམས་བསམ་པའི་གཏིང་ནས་ཐུགས་རྗེ་ཆེ་ཞུ་བ་དང་སྦྲགས། དུས་ཚོད་འདི་ནི་སྡེ་དགེ་ཚང་གི་ལོ་རྒྱུས་ཡིག་ཚང་ནང་འཁོད་འོས་པའི་ཉིན་བཟང་སྐར་བཟང་གི་དུས་ཚོད་ཅིག་ལ་ངོས་འཛིན་ཞུ་བཞིན་ཡོད་ཅེས་ཞུ་འདོད་བྱུང་། ཕུ་ནུ་གྲོས་རའི་ཚོགས་མི་ཚོའི་ངོས་ནས་ཚོགས་པ་འདི་གང་ཟག་སྒེར་རེ་ཉིས་ཀྱི་ཚོར་བ་དང་ཁེ་ཕན་ཙམ་མིན་པ། རྩ་བའི་སྒྲིག་གཞི་དང་ལས་འཆར་ཁག་གི་ནང་གསལ་ལྟར། ཚོགས་པ་དང་གང་ཟག་སྒེར། ལུང་ཚན་དང་ཆོས་བརྒྱུད་བྱེ་བྲག་པའི་དབང་ཤུགས་འོག་གནས་མེད་པ་དང་། དེ་དག་གི་ཁ་གཏད་དང་བརྒྱུད་བསྐུལ་ངན་པའི་ཐོག་རྒྱུད་འཛིན་བྱེད་ཀྱིན་མེད་པ་ལྟར་ཁྱོན་ཡོངས་ཀྱི་སྡེ་དགེ་བས་འདི་ལྟར་རྒྱབ་སྐྱོར་བྱུང་པ་ནི། ད་ལྟའི་སྡེ་དགེ་བའི་གནས་སྟངས་གང་འདྲ་ཞིག་ཏུ་གྱུར་ཡོད་ཀྱང་འདྲ། མདོར་དོན་སེམས་བསམ་པའི་གཏིང་ན་རེ་བ་དང་དམིགས་ཡུལ་གསོན་པོ་ཞིག་ཡོད་པ་གསལ་བསྟན་བྱུང་ཡོད་པས། ད་རེས་ང་ཚོ་ཚང་མས་མང་ཚོགས་ཀྱི་རེ་འདུན་ལྟར་ཡང་དག་པའི་དབུས་སྤྱི་ཁྱབ་རྒྱུན་ལས་ཁང་ཞིག་བཙུགས་ཐུབ་དགོས་རྒྱུ་ནི། ང་ཚོའི་རེ་བ་དང་སྨོན་འདུན་འདི་དག་གི་བརྟེན་ས་གཙོ་བོ་དེ་ཡིན་ལ། ང་ཚོའི་མི་ཐོག་འདིའི་འགན་འཁྲི་དང་། མི་ཚེ་འདིའི་རེ་སྨོན་གཙོ་བོ་ཞིག་ཏུའང་གྱུར་ཡོད་པས་མ་ཚད། འདས་པའི་སྡེ་དགེ་བའི་མེས་པོ་གོང་མ་ཚོའི་སྨོན་ལམ་དང་། ད་ལྟའི་སྡེ་དགེ་བ་གཞིས་བྱེས་གཉིས་ཀྱི་རེ་བ། མ་འོངས་པའི་རྒྱ་ཆེའི་སྡེ་དགེ་བ་ཡོངས་ཀྱི་མདུན་ལམ་ཀྱང་ཡིན་པས་མ་ཚད། བོད་སྤྱི་ལ་བསམ་ནའང་རྒྱལ་ཁའི་རང་བཞིན་ཅན་གྱི་བྱ་བ་བཟང་པོ་ཞིག་ཡིན་པས། འདིར་ཕེབས་པའི་རྒྱ་ཆེའི་མང་ཚོགས་ཀྱི་སྐུ་ཚབ་རྣམ་པས་ཀྱང་དེ་ལུགས་བོད་སྤྱི་དང་སྡེ་དགེ་བའི་ཁ་རྗེ་མགོ་རྣ་འདི་རང་ལ་བསམས་ནས་ལས་དོན་འདི་ལམ་ལྷོངས་ཡོང་བར་མི་རེ་ངོ་རེ་ནས་འགན་ཁུར་ཐོག་གྲུབ་འབྲས་ལྡན་པ་ཞིག་ཡོང་བར་སྒོ་ཀུན་ནས་འབད་འབུངས་གནང་རོགས་ཞེས་ཐོག་མའི་འབོད་བསྐུལ་ཞུ་བཞིན་ཡོད།
ལོ་རྒྱུས་རང་བཞིན་ལྡན་པའི་ད་ལྟའི་གྲུབ་འབྲས་འདི་དག་ནི་ད་ལྟའི་སྡེ་དགེ་བ་མཆམ་མཐུན་དང་མཉམ་ལས་བྱས་པའི་རྒྱལ་ཁ་ཞིག་ཡིན་པ་ལྟར། ད་ལྟའི་མཆམ་མཐུན་གྱི་གྲུབ་འབྲས་འདི་དག་རྒྱུ་མཚན་དུ་བཟུང་ནས། མ་འོངས་པའི་ལོ་ཟླའི་ནང་དུའང་ང་ཚོས་ནང་ཁུལ་འཆམ་མཐུན་དང་མཉམ་ལས་ཀྱི་རང་བཞིན་འདི་གཞི་རྒྱ་ཆེ་རུ་དང་གཏིང་མཐའ་ཟབ་ཏུ་གཏོང་ཐུབ་ན་དེ་དང་མཐུན་པའི་གྲུབ་འབྲས་དང་རྒྱལ་ཁའང་མང་པོ་ཞིག་འཐོབ་རྒྱུ་ཡོད་པ་ང་ཚོས་ངེས་པར་དུ་ཧ་གོ་དགོས། ཅི་སྟེ་ད་རེས་ཀྱི་སྡིངས་ཆ་འདི་གང་ཟག་སྒེར་དང་ཚོགས་པ་བྱེ་བྲག་པའི་གནད་དོན་དུ་བསྒྱུར་བས་མཚོན་སྦྱོར་བ་ངན་པའི་དབང་དུ་བཏང་སོང་ན། འདི་ལྟ་བུའི་གོ་སྐབས་གཉིས་པ་ཞིག་ཤར་མི་སྲིད་པ་ལྟ་བུ་ཡིན་པ་དེ་ཚང་མས་མཁྱེན་དགོས་པས་མ་ཚད། སྐབས་དེ་དུས་སྡེ་དགེ་བའི་མདུན་ལམ་གྱི་དཀག་རྡོ་ངོ་མ་དེ་སུ་ཞིག་ཡིན་མིན་ཀྱང་མངོན་གསལ་ཡོང་ངེས་རེད་ཅེས་དྲན་སྐུལ་ཞུ་འདོད་བྱུང་།
དེ་བཞིན་ཕྱོགས་བཞིའི་དཔོན་མགོ་བཞི་ནས་བརྩིས་པའི་སྡེ་དགེའི་ཡུལ་སྡེ་མངའ་རིས་ནི་མགོ་དང་སྐེ་ལྟར་ཁ་འབྲལ་ཐབས་མེད་པའི་ལོ་རྒྱུས་རང་བཞིན་ལྡན་པ་ཞིག་ཡིན་དུས། རྒྱ་ནག་གིས་བཟོས་པའི་ས་ཁུལ་བཅད་བགོས་ལ་བརྩི་བཀུར་དང་དང་ལེན་བྱེད་མཁན་ཞིག་ཡིན་ན་ལས། དེ་མིན་ཡར་ཁ་ཚོ་དུས་ཡར་ཁ་དང་། མར་ཁ་ཚོ་དུས་མར་ཁར་བལྡག་མི་འདུག་པ། གངས་ལྗོངས་ཤེས་རིག་གི་གཏེར་མཛོད་པར་ཁང་ཆོས་མཛོད་ཆེན་མོས་མཚོན་སྡེ་དགེ་ཚང་གི་གཟི་བརྗིད་དབང་ཐང་འདི་དག་ལ་རྒྱབ་གཏད་ནས་མི་འདུག་པ་ལོངས་སུ་སྤྱད་དེ། ལོ་རྒྱུས་རང་བཞིན་ཅན་གྱི་སྡེ་དགེ་ཞེས་པ་འདིར་བརྩི་སྲུང་གནང་རྒྱུ་ནི་རང་རང་སོ་སོའི་གཟི་བརྗིད་ཅིག་རེད་ལ། དམའ་མཐའ་ས་ནས་མི་གཞི་དང་འབྲེལ་བའི་གནད་དོན་ཞིག་ཀྱང་རེད་ཅེས་ཞུ་འདོད་བྱུང་།
དེ་བཞིན་བོད་སྤྱི་དང་། ཁྱད་པར་དུ་སྡེ་དགེ་བའི་གནས་དོན་འདི་ཡག་པོ་ཞིག་ཡོང་དགོས་ཀྱི་འདུག་ཅེས་ནམ་རྒྱུན་གླེང་འདུག་མཁན་ཚོས་ཀྱང་། གོ་སྐབས་མདུན་ལ་ཤར་དུས་མ་འགྲིག་མདོག་མདོག་དང་། གོ་སྐབས་མེད་ས་ནས་བྱེད་རྒྱུ་ཡོད་མདོག་མདོག་གནང་སྟེ། གཅིག་གིས་ལས་མགོ་བརྩམས་ན། གཉིས་ཀྱིས་དེ་ལ་དཀྲོགས་གཏམ་སྤེལ། གསུམ་གྱིས་དཀྲུགས་ཤིང་རྒྱག བཞིས་ལྟད་མོ་འདྲ་བལྟས་ནས་བསྡད་ན་ང་ཚོ་ལ་གྲུབ་འབྲས་གང་འདྲ་ཞིག་ཡོང་གིན་ཡོད་མེད་ནི་འདས་པའི་ལོ་རྒྱུས་ཀྱིས་མིག་དཔེར་གསལ་པོར་བསྟན་ཡོད་པས། ད་ནི་ཚང་མས་གོ་རྟོགས་སད་པའི་ཐོག་རང་ཚུགས་ཐུབ་པོའི་ངང་གནས་ལུགས་དངོས་ཧ་གོ་བར་བྱ་རྒྱུ་ཤིན་ཏུ་གལ་ཆེན་ཡིན་ལ། གོ་སྐབས་དམ་འཛིན་ཐོག་ལས་དོན་འདིར་ནུས་ཤུགས་མཉམ་འདོན་གནང་རོགས་ཞེས་འབོད་བསྐུལ་ཞུ་བཞིན་ཡོད།
ད་དུང་ཉེ་རབས་ཀྱི་ལོ་རྒྱུས་ནང་སྡེ་དགེ་བའི་གནས་སྟངས་ཛ་དྲག་གི་གནས་སུ་གྱར་ཡོད་པ་ཀུན་གྱིས་མཁྱེན་གསལ་ལྟར་རེད་ལ། ད་ནས་སྡེ་དགེ་བ་འདས་གསོན་གཉིས་ཀྱི་ཆེད་དུ་དང་། དུས་གསུམ་གྱི་ལོ་རྒྱུས་འདི་དག་གི་ཆེད་དུ་མཐོ་བླ་ཆེན་མི་དཔོན་ནས། དམའ་སྤྲང་རྒན་དབྱུག་པ་ཅན་ཡན་ཆད་ཀྱིས་སྡེ་དགེ་བའི་འཆམ་མཐུན་དང་། གཅིག་གྱུར་ཡོང་ཐབས་ལ་སྒོ་ཀུན་ནས་འགན་ཁུར་དང་། བསམ་ཤེས། ཤ་ཚ་དང་སྙིང་རྗེ་གནང་རོགས་གྱིས་ཞེས་མཐའ་མའི་འབོད་སྐུལ་ཞུ་བཞིན་ཡོད།
མཐའ་དོན་ ༸གོང་ས་རྒྱལ་བའི་དབང་པོ་གང་གིས་གཙོས་རིས་མེད་བསྟན་པ་འཛིན་མཁན་རྣམས་ཀྱི་སྐུ་ཚེའི་ཞབས་པད་ཡུན་དུ་བརྟན་ཅིང་མཛད་ཕྲིན་དར་ཞིང་རྒྱས་པ་དང་། བོད་ཀྱི་རྒྱལ་གཅེས་དཔའ་བོ་དཔའ་མོ་རྣམ་པའི་རླབས་ཆེན་དམིགས་ཡུལ་མཐའ་དག་མྱུར་དུ་འགྲུབ་པ་དང་། བོད་སྤྱི་དང་སྡེ་དགེ་བའི་འདས་མ་ད་གསུམ་ལ་དམིགས་པའི་ལས་དོན་བཟང་པོ་འདི་དག་ཅིས་ཀྱང་གེགས་མེད་མངོན་འགྱུར་ཡོང་བའི་སྨོན་འདུན་ཁྲི་ཕྲག་དང་བཅས།
བོད་རྒྱལ་ལོ་ ༢༡༤༠ བོད་ཟླ་ ༩ ཚེས་ ༥ ཕྱི་ལོ་ ༢༠༡༣་༡༡་༨ ཉིན་ཕུ་ནུ་གྲོས་རའི་དབུས་སྤྱི་ཁྱབ་རྒྱུན་ལས་ལྷན་ཚོགས་ཀྱིས།
བསམ་ཚུལ་འབྲི།
སྡེ་དགེ་རྒྱལ་ཡོངས་ཚོགས་ཆེན་གྱི་མཇུག་སྡོམ་གསུང་བཤད།