སྡེ་དགེ་རྒྱལ་པོའི་དབྱར་ཐོངས་ཀྱི་སྤྲོ་སྐྱིད་གླིང་།
སྡེ་དགེ་རྒྱལ་པོའི་དབྱར་ཐོངས་ཀྱི་སྤྲོ་སྐྱིད་གླིང་།
རྩོམ་པ་པོ། མཁས་དབང་ཐུབ་བསྟན་ཕུན་ཚོགས།
མདོ་ཁམས་སྡེ་དགེའི་རིག་གནས་ཀྱི་ལྟེ་བ། ཤར་དཔལ་སྤུངས་ཐུབ་བསྟན་ཆོས་འཁོར་གླིང་ཞེས་གངས་རིའི་ལྗོངས་འདིར་སྙན་པས་ཡོངས་སུ་ཁྱབ་པའི་གནས་མཆོག་དེ་ནི། དེང་སྡེ་དགེ་རྫོང་གི་ཤར་ཕྱོགས་ལེ་དབར་བདུན་ཅུ་ཙམ་གྱི་ས་གནས་སུ་ཆགས་ཡོད། དགོན་པ་དེ་ནི་སྤྱི་ལོ་༡༧༢༧ལོར་སྡེ་དགེའི་རྒྱལ་རབས་ལྔ་པ་ཆོས་རྒྱལ་བསྟན་པ་ཚེ་རིང་གིས་སྦྱིན་བདག་གནང་ནས་བཏབ་ཅིང་། སི་ཏུ་ཆོས་ཀྱི་འབྱུང་གནས་ཀྱིས་ཆོས་དང་རིག་གནས་ཐམས་ཅད་དར་སྤེལ་གཏོང་བའི་གདན་ས་གཙོ་བོར་ཞིག་ཆགས།
དཔལ་སྤུངས་དགོན། བཀའ་བརྒྱུད་པ།
ལྷག་པར་དུ་མདོ་ཁམས་ཕྱོགས་འདིར་གནས་ལྔ་རིག་པའི་སློབ་གྲྭ་ཐོག་མར་བཏབ་ཅིང་། སློབ་གྲྭ་དེར་ལ་བཟོ་དང་། གསོ་བ། བརྡ་སྤྲོད་རིག་པ་དང་། ཚད་མ་རིག་པ། སྙན་ངག་དང་། སྐར་རྩིས་རིག་པ་སོགས་ཐུན་མོང་གི་རིག་གནས་སློབ་གཉེར་རྒྱ་ཆེན་སྤེལ་སྟབས། ལོ་རྒྱུས་ཐོག་མཛད་རྗེས་མང་པོ་ཞིག་འཇོག་ཡོད་པ་ནི། དེང་གི་དུས་འདིར་ཟུར་ལུགས་གསོ་བ་རིག་པའི་འབྱུང་ཁུངས་སྡེ་དགེའི་ཡུལ་ཟེར་བ་འདི་ཡང་སྐབས་དེར་སི་ཏུ་ཆོས་ཀྱི་འབྱུང་གནས་ཀྱིས་སློབ་རིག་སློབ་གྲྭ་ནང་དུ་ཟུར་ལུགས་གསོ་བ་རིག་པའི་ཁྲིད་རྒྱུན་དང་། ལག་ལེན་འཆད་ཁྲིད་གནང་སྟེ་གསོ་བསྐྱངས་གནང་བའི་མཁས་པ་གླིང་སྨན་བཀྲ་འབུམ་པ་དང་། དབོན་ཀརྨ་བསམ་གཏན། ཀརྨ་ངེས་དོན་བསྟན་འཛིན། ཀོང་སྤྲུལ་ཡོན་ཏན་རྒྱ་མཚོ། འཇུ་མི་ཕམ། གནས་གནས་བཀྲ་ཤིས་ཆོས་འཕེལ། ཇ་ཡོག་བསྟན་འཕེལ་ལ་སོགས་པའི་དུས་རབས་རིམ་བྱུང་གི་ཟུར་ལུགས་གསོ་རིག་རྒྱུན་འཛིན་དང་དར་སྤེལ་གཏོང་མཁན་རྣམས་བྱུང་ཞིང་། དེ་བཞིན་དུ་མཚུར་ལུགས་ལོ་ཐོ་དཔལ་སྤུངས་པའི་ཕྱག་བཞེས་དང་། བོད་ཀྱི་མཛེས་རྩལ་རི་ལས་སྒར་ལུགས་གསར་མ་སི་ཏུའི་ལུགས་སོགས་བོད་ཁམས་ཡོངས་སུ་སྙན་གྲགས་ཆེ་བའི་རིག་གནས་ཕལ་ཆེའི་འབྱུང་ཁུངས་གཙོ་བོར་གནས་འདིར་ཆགས་ཡོད་པ་རེད། །
སྤེ་ཝ་དགོན། ས་སྐྱ་པ།
ཡུལ་འདིའི་རིག་གནས་ཀྱི་ཁྱད་ཆོས་ནི། ཐོག་མར་དཔེ་རོང་འགག་ནས་ཡར་འོང་བ་དང་དཔེ་ཝ་དགོན་པ་མཇལ་རྒྱུ་ཡོད། དེ་ནི་བོད་ཀྱི་ས་སྐྱ་པའི་གྲུབ་མཐའ་ཡིན་ཞིང་དགོན་འདིར་ས་སྐྱའི་ཆོས་ལུགས་ཀྱི་རིག་གནས་དང་། རྟེན་གསུམ་མི་འདྲ་བ་མང་པོ་མཇལ་རྒྱུ་ཡོད།
དེ་ནས་ལེ་དབར་ལྔ་ཙམ་གྱི་ས་ན་དཔལ་སྤུངས་དགོན་པ་ཡོད་ཅིང་དེ་ནི་བོད་གངས་ཅན་ལྗོངས་འདིར་རྒྱལ་བ་བཀའ་བརྒྱུད་པའི་གདན་ས་གཙོ་བོ་གོང་འོག་བར་གསུམ་ཞེས་པའི་ཡ་གྱལ་གཅིག་རེད། དེ་ལ་བཀའ་བརྒྱུད་པའི་ཐུན་མོང་མ་ཡིན་པའི་ཆོས་དང་རིག་གནས། རྟེན་གསུམ། སྤར་ཤིང་སོགས་དང་། བོད་ལྗོངས་ཡོངས་ལ་ཤིན་ཏུ་དཀོན་པའི་གསང་སྔགས་ནཱ་རོ་ཆོས་དྲུག་གི་བསྙེན་སྒྲུབ་ལོ་གསུམ་ཟླ་གསུམ་གཅད་རྒྱ་བཞུགས་ཡུལ་གྱི་སྒྲུབ་ཁང་གོང་འོག་གཉིས་ཡོད། ལོ་ལྟར་བོད་ཀྱི་ལོ་སར་སྐབས་སུ་རྩ་རླུང་འཕྲུལ་འཁོར་ལ་སྦྱོང་བརྡ་མཐར་ཕྱིན་པར་སོང་པའི་སྒྲུབ་བླ་རྣམས་མི་ལ་རས་པའི་རྣམ་ཐར་ལྟར་རས་རྐྱང་ཁོ་ནའི་གོས་ཀྱིས་མཚན་ཐུན་གཅིག་གི་གྲང་ལྷག་བརྒལ་ནས་ཞོགས་པ་གཏུམ་མོའི་མེ་དྲོད་ཀྱི་ནུས་པ་ཁྲོམ་སྟོན་ཆེད་དུ་རས་པ་རྣམས་ཁྲོམ་བསྐོར་ཕེབས་པའི་ལྟད་མོ་ཡོད། །
དཔལ་སྤུངས་རས་ཆོས།
དགོན་དེའི་ལྷོ་ནུབ་ཕྱོགས་ཀྱི་ཕ་རི་ན་རྡོ་བྲག་དགོན་པ་ཡོད། དེ་ནི་གསང་སྔགས་རྙིང་མའི་དགོན་པ་ཞིག་ཡིན། དེ་ལ་སྔགས་རྙིང་མ་པའི་ལུགས་ཀྱི་ཆོས་དང་རིག་གནས་སྐོར། ལྷ་སྐུ་རྟེན་གསུམ་སྐོར། འཆམ་དང་གར་སྟབས་སོགས་རྙིང་ས་སྐྱ་དང་བཀའ་བརྒྱུད་གཉིས་ཀ་མི་འདྲབའི་ཐུན་མིན་གྱི་ཁྱད་ཆོས་ཅན་མཇལ་རྒྱུ་ཡོད། །
རྡོ་བྲག་དགོན། རྙིང་མ་པ།
དཔལ་སྤུངས་དགོན་ནས་རི་འགོ་ཡར་ལེ་དབར་གསུམ་ཙམ་གྱི་རི་ཁྲོད་ན་རི་ཁྲོད་དགོན་པ་ཡོད། དེ་ནི་ཤང་པ་བཀའ་བརྒྱུད་ཀྱི་དགོན་པ་ཡིན། དེང་དུས་བོད་ཁམས་ཡོངས་ལ་ཤང་པའི་དགོན་པ་གཉིས་ལས་མེད། གཅིག་ནི་བོད་ལྗོངས་རྣམ་གླིང་རྫོང་གི་ཤང་གི་ཞུང་ཞུང་དགོན་པ་རེད། གཞན་གཅིག་ཡོད་པ་ནི། སི་ཁྲོན་སྡེ་དགེ་རྫོང་གི་དཔལ་སྤུངས་རི་ཁྲོད་དགོན་པ་རེད། དེར་ལ་ཤང་ལུགས་ཀྱི་ནི་གུ་ཆོས་དྲུག་དང་། གསེར་ཆོས་རྣམ་ལྔ་ཉམས་ལེན་བྱ་ཡུལ་གྱི་སྒྲུབ་ཁང་དང་། ལྷ་ཁང་ཆུང་ངུ་གཅིག གྲྭ་ཤག་ཁ་ཤས་ཙམ་ཡོད། ཤང་པ་བཀའ་བརྒྱུད་ཀྱི་རིག་གནས་ལ་ཤེས་རྟོགས་དགོས་ན་མདོ་ཁམས་ཕྱོགས་སུ་དགོན་པ་འདི་ལས་མེད་པ་ཞིག་རེད། དེས་ནས་ལུང་པ་འདིའི་ནང་དུ་ཆོས་ལུགས་ཀྱི་དབང་དུ་བྱས་ན་ས་སྐྱ་པ་དང་། རྙིང་མ་པ་དང་། མར་པ་བཀའ་བརྒྱུད་དང་། ཤང་པ་བཀའ་བརྒྱུད་བཅས་གྲུབ་མཐའ་བཞིའི་རིག་གནས་ལ་ཉིན་གཅིག་གིས་ལྟ་བསྐོར་བྱེད་ཆོག་པ་རེད།
དཔལ་སྤུངས་རི་ཁྲོད་དགོན། ཤང་པ་བཀའ་བརྒྱུད།
མཛེས་ལྗོངས་ཀྱི་དབང་དུ་བྱས་ན། དཔལ་སྤུངས་དགོན་གྱི་ཤར་ཕྱོགས་སུ་ག་ས་ནགས་དང་། ལྷོ་ནུབ་ཕྱོགས་སུ་སྡོང་པོ་ནགས་སོགས་དགོན་དེའི་ཕྱོགས་མཚམས་རྣམས་གདོད་མའི་ནགས་ཀླུང་མཐུག་པོས་བསྐོར་བ། དད་ལྡན་རྣམས་ལ་འཇམ་མགོན་ཀོང་སྤྲུལ་ཡོན་ཏན་རྒྱ་མཚོས་གནས་སྒོ་ཕྱེས་པའི་ཙཱ་རི་ཊ་གཉིས་པའི་གནས་རི་རང་བྱུང་གི་གཟུགས་བརྙན་སྣ་ཚོག་གྲུབ་པའི་བྲག་རི་དང་། ནགས་ཀླུང་གིས་བསྐོར་བ། དེ་ནས་བྱང་ཕྱོགས་སུ་ལེ་དབར་ཉི་ཤུ་ཙམ་སོང་ན་དཔའ་འོག་ཕུ་ན། ཀོན་སྤྲུལ་ཡོན་ཏན་རྒྱ་མཚོས་མདོ་ཁམས་གནས་ཆེན་ཉེར་ལྔའི་མདོ་བྱང་གཏེར་ནས་བཞེས་པའི་གནས་རི་དཔའ་བོ་དབང་ཆེན་བྲག་དཀར་ཞེས་པ་བུ་དཔའ་བོའི་དབུ་རྨོག་ཐང་ལ་བཞག་པ་ལྟ་བུའི་རི་དེའི་ཞོལ་དུ་དཔའ་འོག་ཕུག་ཞབས་ཟེར་ཐང་ཟེར་བ་ཞིག་ཡོད།
དཔའ་བོ་དབང་ཆེན་བྲག
ཐང་དེའི་ཉེ་སྐོར་གྱི་རི་ཀླུང་རྣམས་ལ་དབྱར་གྱི་དུས་སུ་མེ་ཏོག་ཁ་དོག་སྣ་ཚོགས་འཇམ་མཚོན་ལྟར་བཀྲ་བ། གཡང་དཀར་ལུག་ཁྱུ་ལྷོ་སྤྲིན་ལྟར་འཁྲིགས་པ། ནོར་ཕྱུགས་རྣམས་ནི་འབྲོང་ཁྱུ་ལྟར་རྒྱུ་བ། ཆུ་བོ་རྣམས་ཡན་ལག་བརྒྱད་ལྡན་ལྟར་དྭངས་ཤིང་བསིལ་བའི་གནས་དེར། ས་སྐྱོང་མི་ཡི་དབང་པོ་སྡེ་དགེའི་རྒྱལ་རབས་རིམ་བྱོན་རྣམས་ལོ་ལྟར་དབྱར་ཉི་ལྡོག་གི་རྗེས་སུ་དབྱར་ཐོངས་ཕེབས་ནས་རྟ་རྒྱུག མདའ་འཕེན། བྲོ་བརྡུང་། གླུ་ལེན། ཡུལ་ལྷ་གསོལ་མཆོད་ཀྱི་བསང་དང་། སྒྲ་བླ་དཔང་བསྟོད་བྱ་ཞིང་། སྤྲོ་སངས་ཀྱི་ལྟད་མོ་བདུན་ཕྲག་རེར་བཞུགས་པའི་སྲོལ་དར།
དཔའ་འོག་གི་དབྱར་གྱི་མཛེས་ལྗོངས།
སྡེ་དགེའི་རྒྱལ་རབས་ལོ་རྒྱུས་ལས་འཁོད་པ་ལྟར་ན། སྡེ་དགེའི་རྒྱལ་རབས་བཞི་པ་ས་སྐྱོང་བསོད་ནམས་ཕུན་ཚོགས་ཀྱི་སྐབས་སུ། དཔའ་འོག་རྩིག་མདའི་མཆོད་རྟེན་གསར་བཞེངས་བྱས་པའི་སྐོར་འཁོད་ཡོད་པ་ལ་བརྟག་ན་ཆོས་རྒྱལ་བསྟན་པ་ཚེ་རིང་གི་སྔོན་ནས་དཔའ་འོག་ཕུག་ཞབས་འདི་སྡེ་དགེའི་དབྱར་ཐོངས་རྟ་རྒྱུག་བྱེད་ས་བྱུང་ཡོད་པ་འདྲ།
ཐང་འདིའི་ཐང་དཀྱིལ་ལ་མ་ཎི་རྡོ་མཁར་དང་། དེའི་མདུན་ན་སྡེ་དགེ་རྒྱལ་པོའི་གཟིམ་གུར་ཕུབ་ས། དེའི་མཐའ་སྐོར་ན་རིམ་བཞིན་དཔོན་རིགས་རྣམས་དང་། སྡེ་འབངས་རྣམས་སྒར་འདེབས་ས། དེའི་རྒྱབ་ཙམ་ན་ལྷ་བསངས་གཏང་སའི་བསང་ཁྲི་ཡོད། དེ་ལས་ཡར་ཙམ་ན་བྲག་དིལ་ཞིག་ཡོད་པ་དེ་ལ་དེང་སང་ཡང་སྡེ་དགེ་བཞུགས་ས་ཟེར། རྟ་རྒྱུག་པའི་ཉིན་མོ་དེར་སྡེ་དགེ་རྒྱལ་པོ་བྲག་དིལ་དེའི་འགོ་ལ་བཞུགས་ནས་ལྟད་མོ་གཟིགས་སྲོལ་ཡོད་པ་རེད། །
དཔའ་འོག་ཕུག་ཞབས་ཐང་།
མདོར་ན་དཔལ་སྤུངས་ཡུལ་འདིར་ཐུན་མོང་མ་ཡིན་པའི་ཁྱད་ཆོས་དྲུག་དང་ལྡན་པའི་ཡུལ་ཞིག་ཡིན་པ་ནི།
དཔལ་སྤུངས་དགོན་པའི་ཐུན་མིན་གྱི་ཆེ་བ།
1 གནས་ཀྱི་ཆེ་བ། འབྲི་གུང་བྱང་ཆུབ་གླིང་པས་གདན་ས་བཏབས་ཏེ་བྱིན་གྱིས་བརླབས་ནས་ལོ་ངོ་བརྒྱད་བརྒྱ་ལྷག་ཙམ་ཕྱིན་པ་དང་། ཀོང་སྤྲུལ་ཡོན་ཏན་རྒྱ་མཚོས་ཙཱ་འདྲའི་གནས་སྒོ་ཕྱེས་པས་འཕགས་ཡུལ་གྱི་ཙ་རི་ཏྲ་དང་གཉིས་སུ་མེད་པའི་བྱིན་བརླབ་ཀྱི་ཚན་ཁ་ཆེ་བའི་སྒྲུབ་པའི་གནས་ཀྱི་ཆེ་བ།
2 ཆོས་ཀྱི་ཆེ་བ། རྒྱལ་བའི་བཀའ་ལུང་དྲི་མ་མེད་པ་མར་ལུགས་དང་། ཤངས་ལུགས་གཉིས་ཀྱི་རྒྱུད་སྡེའི་སྙིང་ཁུ་ཐམས་ཅད་ཚང་ལ་མ་ནོར་བ་བླ་མ་དམ་པ་ཟམ་མ་ཆད་པའི་སྙན་བརྒྱུད་ལོ་གསུམ་ཟླ་གསུམ་གྱི་གཅད་རྒྱའི་སྒོ་ནས་ཉམས་ལེན་གནད་དུ་བཟུང་བས་བསྒྲུབ་བྱའི་ཆོས་ཀྱི་ཆེ་བ།
3 བླ་མའི་ཆེ་བ། གནས་ལྔ་རིག་པའི་མ་ཧཱ་པཎྜི་ཏ་ཆེན་པོ་སི་ཏུ་ཆོས་ཀྱི་འབྱུང་གནས་དང་། མཛོད་ཆེན་རྣམ་ལྔའི་སྲོལ་འབྱེད་ཀོང་སྤྲུལ་ཡོན་ཏན་རྒྱ་མཚོ་རྣམ་གཉིས་ཀྱིས་གཟིགས་སྐྱོང་འོག་ཕྲིན་ལས་ཕྱོགས་མཐའ་རུ་འཕེལ་བས་ཆོས་བདག་བླ་མའི་ཆེ་བ། །
4 སྲིད་ཀྱི་ཆེ་བ། སི་ཏུ་པདྨ་དབང་མཆོག་གིས་ས་སྐྱོང་སྡེ་དགེ་རྒྱལ་པོའི་དབུ་བླ་དང་རྒྱལ་ཚབ་གཅིག་ལྕོག་གནང་སྟེ་སྡེ་དགེའི་ཆོས་སྲིད་ལུགས་གཉིས་དགུང་དུ་བཏེགས་པས་དབུ་བླ་ཁག་ལྔའི་ཡང་རྩེར་གྱུར་པའི་འཇིག་རྟེན་སྲིད་ལུགས་ཀྱི་ཐོབ་ཐང་གི་ཆེ་བ།
5 ཤེས་རིག་ཡོན་ཏན་གྱི་ཆེ་བ། དཔལ་སྤུངས་ལྔ་རིག་སློབ་གླིང་འདིར་ཆོས་དང་རིག་གནས་གཉིས་ཀར་ཐུན་མོང་དུ་སློབ་གཉེར་བྱ་ཡུལ་དང་། མདོ་ཁམས་མཁས་པ་ཐམས་ཅད་ཀྱི་འབྱུང་གནས། བོད་ཀྱི་གཙུག་ལག་སློབ་སྡེ་ཐོག་མར་གྱུར་པས་ཚན་རིག་རིག་གནས་ཀྱི་ཆེ་བ།
6 འབྱོར་པའི་སྦྱིན་བདག་གི་ཆེ་བ། གངས་ལྗོངས་བཀའ་ཡི་མདུན་ན་འདོན་ཆེན་པོ་མདོ་མཁར་ཞབས་དྲུང་ཚེ་རིང་དབང་རྒྱལ་དང་། ང་ཕོད་ངག་དབང་འཇིགས་མེད་རྣམ་གཉིས་ཀྱིས་ཐུགས་བརྩེས་བསྐྱངས་ཤིང་། རྒྱ་འཇང་ལ་སོགས་ཕྱོགས་ཀྱི་རྒྱལ་ཕྲན་མང་པོའི་མཆོད་གནས་སུ་གྱུར་པས། རྒྱ་ནག་པོའི་ཡུལ་གྱི་ཇ་ཞིང་དང་། འཇང་ཁྲ་མོའི་ཡུལ་གྱི་འབྲས་ཞིང་སོགས་སྟོབས་འབྱོར་དང་མངའ་འབངས་ཀྱིས་ཕྱུག་པས་འབྱོར་པའི་སྦྱིན་བདག་གི་ཆེ་བ་བཅས་སོ། །
དེ་ལྟར་ཆེ་བ་དྲུག་ལྡན་ཤར་དཔལ་སྤུངས་ཐུབ་བསྟན་ཆོས་འཁོར་གླིང་གི་ལོ་རྒྱུས་ངོ་སྤྲོད་མདོར་བསྡུས་སྒྲོ་བསྐུར་དང་བྲལ་བ་འདི་ནི་རེ་དོགས་མེད་པའི་རྒྱལ་ཁམས་པ་དེས་བྲིས་པའོ། ཐམས་ཅད་བཀྲ་ཤིས་པར་གྱུར་ཅིག
སྔ་འགྱུར་རྙིང་མའི་དབུ་འཛིན་ཁྲི་རབས་ ༧ པར་འཚམས་འཕྲིན།
འབྲེལ་ཡོད་ཀྱི་རྩོམ་གཞན།
-
སྡེ་དགེ་རྒྱལ་ཡོངས་ལྷན་ཚོགས་ཀྱི་དབུས་རྒྱུན་སྐབས་ ༣ པའི་ལོ་འཁོར་༣ གྱི་ལས་བསྡོམས་སྙིང་བསྡུས།
-
ཨ་ཧྥི་ཏབ་ཀརྨ་སིང་པུ་རེ་ཝལ་ (Aftab Karma Singh Pureval) ལགས་ཨ་རིའི་གྲོང་ཁྱེར་སིན་སི་ན་ཊི་( Cincinnati) ཡི་སྤྱི་ཁྱབ་གྲོང་ཁྱེར་དཔོན་པོའི་གོ་གནས་ཀྱི་རྒྱལ་ཁ་ཐོབ་པ།
-
བོད་ཕྲུག་༢༧་ལ་སྲིད་སྐྱོང་གི་སློབ་ཡོན་གཟེངས་རྟགས་ཐོབ་པའི་ནང་རང་རེ་སྡེ་དགེ་བའི་སློབ་མ་གཅིག་ཡོད་པ་རེད།
-
༈ གདུང་སེམས་མཉམ་བསྐྱེད་ཞུ་བཞིན་ཡོད།
-
དབུས་རྒྱུན་སྐབས་གསུམ་པའི་ཚོགས་ཐེངས་གཉིས་པ་དེ་བསྐོང་ཚོགས་གནང་