སྡེ་དགེ་ཡིད་ལྷུང་གི་ངག་རྒྱུན་ལས་སྟག་རོང་གི་སྦྲ་བཤད།
༈ ཡིད་ལྷུང་གི་ངག་རྒྱུན་ལས་བྱུང་བའི་སྟག་རོང་གི་སྦྲ་བཤད།
བསྡུ་སྒྲིག་པ། དགེན་དཔལ་བསྡུས། (ཡིད་ལྷུང)
ཕོ་དགྲ་ལྷའི་གདུང་རྒྱུད་དུང་སྐྱོང་མཆོད།།
མགོན་དགྲ་ལྷ་ཝེར་མ་བཅུ་གསུམ་མཆོད།།
ཡར་ལྟོས་དང་ལྟད་མོ་འདི་འདྲ་གདའ།།
གངས་རྒྱབ་རི་པོ་སྟི་བརྩེགས་པའི་མདུན།།
སྡེ་འབྲོག་པ་ལྷ་ཡུལ་འཕོས་པ་འདྲ།།
ས་སྐྱིད་པོ་སྡེ་དགེ་ཡིད་ལྷུང་ན།།
བུ་སྐྱེས་བུ་སྣང་ངུ་ཨ་དཔལ་འཁྲུངས།།
སྤང་དཀར་པོ་རྩི་ཐོག་རྒྱས་པའི་ས།།
རྟ་ནོར་ལུག་འཕེལ་ཁ་དར་ས་ཡིན།།
དུས་དབྱར་དགུན་མཚན་ཉིད་ཚང་ས་རེད།།
སྨན་འབྲུག་མོ་ལྷ་ཡི་སྨིན་ལེགས་མ།།
དགུན་འབྲིང་པོའི་ཉི་ཤུ་གསུམ་ལ་འཁྲུངས།།
དགུང་ཨ་སྔོན་གནམ་ནས་གཡུ་འབྲུག་གྲགས།།
ཕུ་དཀར་ཡག་གངས་ནས་སེང་གེ་འགྱིང་།།
མར་ནར་མ་གཞུང་ནས་རྐྱང་ཞིག་འདྲོགས།།
ཁོང་སེང་ལྕམ་འབྲུག་མོ་དེ་ནས་ཐོགས།།
འདི་ལྷ་ཀླུ་གཉན་གྱིས་སྦྲ་རེ་ཕུབ།།
གཡང་ལྷ་གཡག་བརྒྱ་ཡི་དཔུང་རྩིད་གཅིག།
འབྲི་ཐུལ་མ་བརྒྱ་ཡི་གློ་རྩིད་གཉིས།།
གླང་རོག་པོའི་བྲང་ཁའི་སྙིང་རྩིད་གསུམ།།
ཕྱུགས་ཟོག་གནག་བརྒྱ་ཡི་རྩིད་པ་བཅས།།
སྦྲ་འཁེལ་མི་ལྷ་མོ་སྟོང་གིས་བཀལ།།
ཁོག་འཇུར་བུ་ལན་གཅིག་ཤོར་མ་མྱོང་།།
སྦྲ་འཐག་མི་ཀླུ་མོ་སྟོང་གིས་འཐག།
ཡ་སྐུད་ནོར་ལན་གཅིག་ཤོར་མྱོང་མེད།།
སྦྲ་དྲུབ་མི་གཉན་རིགས་སྟོང་གིས་དྲུབས།།
ཁབ་སྐུད་པའི་ཡོར་བ་ཤོར་མྱོང་མེད།།
སྦྲ་ཕུག་ཆོན་རྒྱ་ནག་ཡུལ་ལ་འཐེན།།
དེའི་སྒོ་ཆོན་རྒྱ་ནག་མཐིལ་ལ་ཡོད།།
དེའི་ཆོན་ཆེན་རི་ཆེན་རྩེ་ལ་བཏབ།།
དེའི་ཆོན་ཆུང་རི་ཆུང་མགོ་ལ་འཐེན།།
དེས་མི་ཚད་དར་གྱི་ཆོན་ཐག་བཅིངས།།
ཀ་མི་རྟ་གཟི་ཡི་ཆར་ཆུང་བསྒྲིགས།།
ཡར་མི་འབུད་སེང་ལྡེང་ཕུར་པ་འདེབས།།
ཆག་མི་འགྲོ་གསེར་གྱི་ཀ་རས་བཏེགས།།
སྦྲའི་ཀ་རྟིང་ལུ་གུའི་རྩེ་ར་གདའ།།
ཡར་ཀ་ཁ་སེང་ཁ་གདང་འདྲ་ཡོད།།
སྦྲ་འཐེན་མི་དཔའ་བོའི་ལྷ་དམག་ཡིན།།
སྦྲའི་ཡ་ཕུག་ཆོས་ཀྱི་དར་ཆེན་འཕྱར།།
སྦྲ་མ་ཕུག་རྒྱ་ནག་ཁྲིམས་དར་བསྒྲེངས།།
སྦྲའི་སྐེད་པ་ཉི་ཟླ་ཁ་སྤྲོད་དང ་།།
སྦྲའི་མཐའ་སྐོར་བ་དན་མཛེས་པ་གདའ།།
བུ་སྐྱེས་བུའི་ཁྱིམ་ལ་འཛོམས་ལེ་ཡོད།།
སྦྲ་ཡར་ནང་བླ་མའི་གྲལ་ཞིག་གདའ།།
མགོ་ཞྭ་དཀར་ཅན་གྱི་གྲལ་མགོ་ན།།
རྗེ་ཨོ་རྒྱན་པདྨའི་སྤྲུལ་པ་བཞུགས།།
སྦྲ་བར་སྐེད་གཞོན་ནུའི་གྲལ་ཞིག་གདའ།།
མགོ་རྨོག་དཀར་ཅན་གྱི་གྲལ་མགོ་ན།།
གླིང་ཆེ་རྒྱུད་སྟག་རོང་གཟིག་འཕེན་བཞུགས།།
ཡང་དེ་ནས་མ་སྲུའི་གྲལ་ཞིག་བསྒྲིགས།།
མགོ་གཡུ་བྱུར་ཅན་གྱི་གྲལ་མགོ་ན།།
སྨན་ཨ་འབྲུག་མཛེས་མ་དེ་ན་བཞུགས།།
ཡང་ཇ་ཆང་འོ་མའི་བཏུང་བ་མཆོག།
དེ་ཡིད་ཆུ་བབས་འདྲ་འཛད་པ་མེད།།
འདི་ཤ་མར་ཐུད་དང་དཀར་མངར་ཟས།།
འདི་རྫ་རྡོ་བཞིན་དུ་དྲངས་ནས་ཤོག།
གླིང་སྐྱེས་བུའི་ཁྱིམ་ལ་འཛོམས་ནས་གདའ།།
གླིང་ཁྲིམས་རྔ་གསལ་བའི་འོད་ལྡན་གཅིག།
གླིང་དུང་ཆེན་དཀར་མོ་རྒྱང་གྲགས་གཉིས།།
གླིང་སིལ་སྙན་དཀར་མོ་འབྲུག་གྲགས་གསུམ།།
གླིང་ཕ་ཆོས་དུམ་པ་བཅུ་གཉིས་བཞི།།
གླིང་གནམ་སར་སྦྲགས་པའི་འཁོར་ལོ་ལྔ།།
གླིང་བྱུ་རུ་རྒྱལ་མོ་ལག་ཡ་དྲུག།
གླིང་དགྲ་བཞི་གཅོད་པའི་ལེབ་ཆེན་བདུན།།
གླིང་རྨ་རྒྱལ་གཏེར་ཟོག་ནོར་བུ་བརྒྱད།།
གླིང་སྐྱེས་བུའི་ཁྱིམ་ལ་འཛོམས་ལེ་རེད།།
ངས་ཁ་སྨོན་མ་ཡིན་དོན་སྨོན་ཡིན།།
གང་བསྟོད་པའི་བསམ་དོན་འགྲུབ་པར་ཤོག།
ཡོང་ཁུངས། 《ཁམས་པའི་མཛུམ་རིས》
བསམ་ཚུལ་འབྲི།
བོད་ནང་གི་ནད་པ་བསོད་ནམས་སྒྲོལ་དཀར་ལ་རོགས་རམ་བྱེད་རོགས།