སྡེ་དགེ་དྲ་བའི་སྒོ་འབྱེད་གཏམ་བཤད། ༢༠༡༣་༢་༡༥།
སྡེ་དགེ་དྲ་བའི་སྒོ་འབྱེད་གཏམ་བཤད། དུས་ཚོད། ༢༠༡༣་༢་༡༥། ས་གནས། བལ་ཡུལ།
༈ སྙིང་ནས་བརྩེ་བའི་སྡེ་དགེ་པ་ཡོངས་ལ་གུས་འདུད་ཆེན་པོའི་ཐོག་འཚམ་འདྲི་བཀྲ་ཤིས་བདེ་ལེགས་ཞུ་བཞིན་ཡོད།
དེའང་འོད་གསལ་ལྷ་ཡི་གདུང་རྒྱུད། རིག་པ་འཕྲུལ་གྱི་མཁས་རྒྱུད། འཇིག་རྟེན་སྟོབས་ཀྱི་ཆེ་རྒྱུད། གྲུབ་པ་ཐོབ་པའི་ཆོས་རྒྱུད་བཅས་ཁྱད་ཆོས་ཆེ་བ་བཞིས་མངོན་པར་མཐོ་བའི་མདོ་ཁམས་སྡེ་དགེ་བ་ཞེས་པ་འདི་མགར་གནམ་ཚ་འབྲུག་ནས་བརྩིས་པའི་ཐོག་མའི་གདུང་རབས་ལྷ་ལས་ཆད་པ་དང་། གདུང་རབས་བཞི་པ་ཆོས་རྒྱལ་སྲོང་བཙན་སྒམ་པོའི་བློན་ཆེན་མགར་སྟོང་བཙན་ཡུལ་བཟུང་ནས་བརྒྱུད་དེ། གདུང་རབས་སོ་ལྔ་པ་བོ་ཐར་བཀྲ་ཤིས་སེང་གེ་དང་གྲུབ་ཐོབ་ཐང་སྟོང་རྒྱལ་པོ་རྣམ་གཉིས་མཆོད་ཡོན་ཟུང་འབྲེལ་ཐོག་ ༡༤༤༦ ལོར་སྡེ་དགེ་ལྷུན་གྲུབ་སྟེང་ཞེས་པའི་རྒྱལ་ས་ཕྱག་བཏབ། དེ་ནས་རྩིས་པའི་གནམ་ལྷ་བབ་ཀྱི་རྒྱལ་པོ། ས་ལྷུན་གྲུབ་ཀྱི་མངའ་བདག་ཆོས་རྒྱལ་སྡེ་དགེ་ཚང་གི་ཉི་ཟླ་སྐར་གསུམ་ལྟ་བུའི་རྒྱལ་རབས་ཉེར་གསུམ་དང་། ཁྲི་རབས་བདུན། གཉེར་ཕྱག་བཞི། མདུན་སྐོར་སུམ་བཅུ། ཕྱོགས་བཞིའི་དཔོན་འགོ་བཞི། ཧོར་འདྲ་བརྒྱད་ཅུ། དེ་བཞིན་འབྲོག་སྦྲ་སྒོ་ཅན་གྱི་དཔོན་ཁག་ཉེར་ལྔ་དང་། རོང་ཤིང་སྒོ་ཅན་གྱི་རྫོང་ཁག་ཉེར་ལྔ་སོགས་ལྷ་སྡེ་མི་སྡེ་ཆོས་སྡེ་བཅས་ཀྱི་སྲིད་པ་ཆགས་ནས་ད་ལྟའི་བར་ལོ་ངོ་ ༥༦༧ སོང་ཡོད། ལོ་ངོ་དེ་དག་གི་ནང་ནས་རྒྱལ་རབས་བདུན་པ་བླ་ཆེན་བྱམས་པ་ཕུན་ཚོགས་ཀྱི་ཟིལ་ཤུགས་ལྡན་པའི་ཞི་དྲག་གཉིས་ལྡན་གྱི་ཐབས་བྱུས་འོག་ཕྱོགས་བཞིའི་མངའ་འོག་སྡེ་རིས་རྒྱ་བསྐྱེད་སོང་པ་ནས། སྡེ་དགེ་ཚང་གི་ཤར་ཡིད་ལྷུང་དཔོན། ལྷོ་རྒ་རྗེ་དཔོན། ནུབ་པ་འབྲོང་པ་དཔོན་། བྱང་སེར་ཤུལ་དཔོན་བཅས་མཐའ་མཚམས་ཕྱོགས་བཞིའི་དཔོན་འགོ་བཞི་ནས་རྩིས་པའི་སྡེ་དུད་ཁྲི་བདུན་དང་། མི་གྲངས་འབུམ་བཞི། ས་ཁྱོན་སྤྱི་ལེ་གྲུ་བཞི་མ་ 44320 ཙམ་གྱི་ལོ་རྒྱུས་བྱུང་ཡོད། ལོ་རྒྱུས་དེ་དག་གི་ནང་སྙིང་དུ་སྡེ་དགེའི་མི་རིགས་དང་ས་གནས་ཙམ་དུ་མ་ཟད། རྒྱལ་རབས་བཅུ་གཉིས་པ་ཆོས་རྒྱལ་བསྟན་པ་ཚེ་རིང་གིས་གསར་བཞེངས་གནང་པའི་པར་ཁང་ཆོས་མཛོད་ཆེན་མོ་བཀྲ་ཤིས་སྒོ་མང་གིས་གཙོས་ཤུལ་བཞག་བྱས་རྗེས་ཀྱིས་བོད་གངས་ཅན་པའི་ཆོས་དང་རིག་གཞུང་གི་རྒྱལ་ས་གཉིས་པ་ལྟ་བུར་གྱུར་པར་བྱས་ནས། རླབས་ཆེན་རིག་གཞུང་གི་བརྒྱུད་འཛིན་དར་སྤེལ་དང་། ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་པའི་དགོན་སྡེ་རྣམས་ལ་བླ་ན་མེད་པའི་བསྙེན་བཀུར་ཞུས་པ་སོགས་ཀྱིས་མཚོན་ཤེས་ལྡན་མི་སྣ་གསོ་སྐྱོང་གནང་སྟེ་བོད་ཙམ་དུ་མ་ཟད་་སྤྱིར་འཛམ་བུ་གླིང་ལ་བསམ་ནའང་ཞབས་འདེབས་རྒྱ་ཆེན་གནང་ཡོད།
འོན་ཀྱང་འདས་པའི་ལོ་རྒྱུས་ཀྱིས་ད་ལྟའི་ཚབ་བྱེད་ཐུབ་ཀྱིན་མེད་སྟབས། ད་ལྟའི་སྡེ་དགེ་བ་ནི་མི་རེ་ངོ་རེའི་སེམས་་ལ་ཚོར་སྣང་གྲང་ཤུར་ཤུར་རེར་ཁྱེར་ནས་གནས་ཡོད། གནས་སྟངས་འདི་སྡེ་དགེ་བ་ལ་མི་མེད་པ་དང་རྒྱུ་མེད་པ། རིག་གཞུང་མེད་པ་དང་ས་ཆ་མེད་པ། འདས་པའི་བྱས་རྗེས་མེད་པ་དང་ད་ལྟའི་རེ་བ་མེད་པ་དེ་འདྲས་རྩ་བ་ཉིད་ནས་མིན། འོ་ན་ག་རེ་བྱས་ནས་རེད་ལབ་ན། ནང་ཁུལ་འཆམ་མཐུན་དང་ཆིག་སྒྲིལ་མེད་པ་འདི་ཁོ་ནས་རེད། ཡིན་ནའང་ང་ཚོ་ཚང་མ་སྐྱེ་བོ་གཞན་དང་འདྲ་བ་ཕར་བལྟས་ན་གཞན་རིག་མཁན་དང་། ཚུར་བལྟས་ན་རང་རིག་མཁན་གྱི་མི་རེ་ཡིན་པ་ཙམ་དུ་མ་ཟད། སྐྱེ་བ་འདིར་སྡེ་དགེ་བའི་ཤ་ཁྲག་རུས་གསུམ་གྱིས་གྲུབ་ཟིན་ཡོད་སྟབས། ཁ་ཕོ་ཡང་སྡོམ་དང་། སྐེ་རགས་ཡང་བཅིངས་ཀྱི་ཐོག་ནས་ནང་ཁུལ་འཆམ་མཐུན་གྱིས་དཔུང་པ་མཉམ་གཤིབ་བྱས་ན། ཕོ་སུ་འདྲ་ཞིག་དང་བསྡུར་ཡང་སྔོན་ལ་མ་སླེབས་ནའང་རྗེས་ལ་ལུས་མི་སྲིད་པའི་ནུས་སྟོབས་ཤིག་ང་ཚོ་ལའང་ཡོད་པ་རེད། མདོར་ན་མི་རབས་རྗེས་མ་ཚོས་ད་ལྟའི་ང་ཚོའི་ལོ་རྒྱུས་གླེང་དུས་ཁོང་ཚོ་ཙམ་དུ་མ་ཟད་སྐབས་དེའི་ང་ཚོའི་རྣམ་ཤེས་ཀྱིས་ཀྱང་ང་ཚོ་ལ་ཁོང་ཁྲོ་བྱེད་དགོས་པ་ཞིག་མི་བཟོ་རྒྱུ་དེ་ང་ཚོ་མི་སྒེར་སོ་སོའི་ལག་ནང་ལ་ཡོད་པའི་གདམ་ཁ་ཞིག་རེད།
དེང་སང་གི་སྡེ་དགེ་བའི་སྤྱི་ཚོགས་ཟང་ཟིང་དུ་གྱུར་པའི་གནས་སྟངས་འདི་འདྲ་ཞིག་གི་ནང་དུ་ང་ཚོ་ཚུད་ཡོད་ནའང་། ཁ་འཐོར་གྱི་རྣམ་པའི་ཐོག་རྒྱལ་ཕྱི་ནང་དུ་འཁོད་པའི་སྡེ་དགེའི་ཕུ་ནུ་མི་སྲིང་མི་རེ་ངོ་རེའི་སེམས་ལ་ངོ་ཚ་དང་ཁྲེལ་སྣང་། རེ་བ་དང་ཞེན་ཆགས་ཆེན་པོ་ཞིག་གིས་ནམ་ཡང་སྡེ་དགེ་བའང་ལུང་ཚན་གཞན་དག་ལྟར་འཆམ་མཐུན་དང་ཆིག་སྒྲིལ་གྱི་ཐོག་ནས་འདུག་རྒྱུ་བྱུང་ན་ཅི་མ་རུང་དྲན་པ་དང་། སྡེ་དགེ་དབུས་སྤྱི་ཁྱབ་རྒྱུན་ལས་ཁང་ལྟ་བུ་ཞིག་ཡོད་ན་བསམ་མཁན་ཤ་སྟག་ཡིན་པ་ལྟར། ༢༠༡༢་༡༡་༡༧ ཉིན་ཕུ་ནུའི་གྲོས་ར་ཞེས་པའི་འཕྲིན་ཕྲན་སྟེང་གི་ཚོགས་པ་འདིསྟབས་ལེགས་སྟེས་དབང་གི་སྒོ་ནས་དབུ་བརྙེས་ཏེ་མ་བསྐུལ་དང་བླངས་ཀྱི་ཐོག་ནས་གཞོན་སྐྱེས་མང་པོ་ཞིག་འདུ་འཛོམས་བྱུང་བ་ལྟར། ལྷག་བསམ་དང་སྙིང་སྟོབས་ཀྱིས་ཕྱུག་པའི་ཕུ་ནུ་གྲོས་རའི་ཚོགས་མི་ཚོས་སྡིངས་ཆ་འདི་ནས་མ་འོངས་པའི་བོད་སྤྱི་དང་སྡེ་དགེ་བར་སྨིན་ངེས་པའི་སྒྲིག་གཞི་བཟོས་ཤིང་། མང་གཙོའི་ལམ་སྲོལ་འོག་ནས་ལས་བྱེད་བདམས་ནས་ལས་འཆར་བསྒྲིག་རྒྱུ་བྱུང་། ལས་འཆར་གཙོ་བོ་ཁག་གསུམ་ཡོད་པ་ནི། དང་པོ་སྡེ་དགེ་དྲ་བ་གསར་བཟོ། གཉིས་པ་འདས་པའི་ལོ་རྒྱུས་མཁོ་སྒྲུབ། གསུམ་པ་མ་འོངས་པའི་ལོ་གཅིག་གི་ནང་ཚུན་རྒྱལ་ཡོངས་སྡེ་དགེའི་ཚོགས་ཆེན་ཞིག་བསྐང་ཐུབ་པར་བྱས་ཏེ། སྡེ་དགེ་དབུས་སྤྱི་ཁྱབ་རྒྱུན་ལས་ཁང་ཞིག་འཛུགས་ཐབས་བྱ་རྒྱུ་བཅས་རེད། དེ་རིང་ནི་ཕུ་ནུ་གྲོས་རའི་ལས་རིམ་དང་པོ་སྡེ་དགེ་དྲ་བ་ལེགས་གྲུབ་བྱུང་ནས་མཛད་སྒོ་བྱེད་བཞིན་པའི་དུས་ཚོད་བཟང་པོ་ཞིག་ཡིན་ལ། མི་སུས་བཤད་ཀྱང་འདྲ། གྲུབ་འབྲས་འདི་ནི་ད་ལྟའི་སྡེ་དགེ་བ་མཆམ་མཐུན་བྱས་པའི་རྒྱལ་ཁ་ཞིག་རེད། དེས་ན་ད་ལྟའི་མཆམ་མཐུན་གྱི་གྲུབ་འབྲས་འདི་དག་རྒྱུ་མཚན་དུ་བཟུང་ནས། མ་འོངས་པའི་ལོ་ཟླའི་ནང་དུའང་ང་ཚོས་ནང་ཁུལ་མཆམ་མཐུན་གྱིས་ལས་རིམ་འདི་རྒྱ་ཆེ་རུ་དང་གཏིང་ཟབ་ཏུ་གཏོང་ཐུབ་ན། དེ་དང་མཐུན་པའི་གྲུབ་འབྲས་དང་རྒྱལ་ཁའང་མང་པོ་ཞིག་འཐོབ་རྒྱུ་ཡོད་པ་ང་ཚོས་ཧ་གོ་དགོས། ད་ལྟའི་ཕུ་ནུའི་གྲོས་ར་ནི་དབུས་ས་གཉིས་ཀྱི་རྣམ་པར་གྲུབ་ཡོད་ལ། དབུས་ལ་རྒྱལ་ཁབ་བཅུ་ལྷག་ནས་འདུ་འཛོམས་བྱུང་པའི་གྲོས་ར་གོང་འོག་བར་གསུམ་གྱི་སྡེ་དགེ་བའི་གནད་ཡོད་མི་སྣ་བརྒྱ་ལྷག་དང་། ས་གནས་འཐུས་མི་ཉི་ཤུ་རྩ་གསུམ། དབུས་རྒྱུན་ལས་མི་དགུ་བཅས་ཀྱིས་གྲུབ་ཡོད། དེ་བཞིན་སུད་སི་དང་སྦིར། བལ་ཡུལ། རྡ་ས། མཚོ་པདྨ། ཕྷི་རན་སི་སོགས་ས་གནས་ཁག་ཀྱང་མང་པོ་ཞིག་ཚུགས་ཟིན་ཡོད།
འདི་ནས་མཁྱེན་དགོས་པ་ཞིག་ལ་ཕུ་ནུ་གྲོས་ར་ནི་གང་ཟག་སྒེར་རི་ཉིས་ཀྱི་ཁེ་ཕན་དང་། མགོ་རྣའི་ཆེད་ཙམ་མིན་པ། རྩ་བའི་སྒྲིག་གཞི་དང་གོང་གསལ་ལས་འཆར་ཁག་གསུམ་གྱི་ནང་གསལ་བ་ལྟར། བོད་སྤྱི་དང་སྡེ་དགེ་བ་མཆམ་མཐུན་དང་ཆིག་སྒྲིལ་ཡོང་ཐབས་ཁོ་ནའི་ཆེད་དུ་གོང་གི་དོན་ཚན་གསུམ་གྱི་ལས་རིམ་ལྟར་གནས་ཡོད་པ་ལས། ཚོགས་པ་ག་གེ་མོ་དང་། གང་ཟག་སྒེར། དེ་བཞིན་ཁྱིམ་ཚང་དང་བླ་བྲང་བྱེ་བྲག་པའི་ཁ་གཏད་དུ་བཙུགས་པའམ། བརྒྱུད་བསྐུལ་ངན་པའི་ཐོག་གནས་མེད་པ་ལྟར། ཚོགས་པ་གསར་རྙིང་གི་རྣམ་པའི་ཐོག་ནས་ཀྱང་ཚུགས་མེད་པ་གསལ་པོ་ཡིན་པས། ལས་དོན་འདི་འབྲེལ་གྱི་སྐད་ཆ་བཤད་མཁན་དག་གིས་ཀྱང་དེ་ལུགས་འགན་ཁུར་ཡོད་པ་གནང་རོགས།
མཐའ་དོན། འདི་གའི་ལས་མི་ཚོའི་ངོས་ནས་བློས་གཏོང་དང་ཆོད་སེམས་ཆེན་པོའི་ཐོག་དྲང་ཚུགས་དང་། ཕུགས་རྒྱང་རིང་པོའི་ཉམས་ལེན་བྱེད་ཀྱིན་ཡོད་པས། འདས་པའི་ལོ་རྒྱུས་ནང་སྡེ་དགེ་བ་ཆིག་སྒྲིལ་ཡོང་རྒྱུར་འགོག་རྐྱེན་དུ་གྱུར་པ་ཚོས་གཙོས། རྒྱ་ཆེའི་མང་ཚོགས་ཀྱིས་ཀྱང་བསམ་རྣོ་རྒྱ་ཆེ་ཙམ་བཏང་ནས། ལས་དོན་འདི་མངོན་འགྱུར་ཡོང་བར་རམ་འདེགས་ཤུགས་ཆེན་གནང་རོགས་ཞེས་སྐྱོ་གདུང་ཆེན་པོའི་ངང་འབོད་བསྐུལ་ཞུ་བཞིན་ཡོད།
འདི་གའི་ལས་མི་ཚོའི་ངོས་ནས་ལས་དོན་འདིའི་ཆེད་གྲ་སྒྲིག་འཐུས་ཚང་ཡོད་པ་བཞིན། གྲུབ་འབྲས་མངོན་འགྱུར་ཡོང་བའི་ཡིད་ཆེས་ཀྱང་ཆེན་པོ་བྱེད་ཀྱིན་ཡོད། ཅི་སྟེ་ཁོར་ཡུག་གཡག་རྭའི་སྦུག་འདྲ་བོ་དང་། གནོན་ཤུགས་སྐེ་རྩ་བསྡམས་པ་ལྟ་བུའི་གནས་སྟངས་སྐྱུ་མོའི་འོག་གོ་སྐབས་འདི་ད་རེས་ཤོར་སོང་ན། རྗེས་མ་གོ་སྐབས་གཉིས་པ་ཞིག་ཤར་མི་སྲིད་པ་ལྟ་བུ་རེད་ལ། ལྡོག་ཕྱོགས་ནས་སྡེ་དགེ་ཚང་གི་བྱེད་གཏེ་ངོ་མ་དེ་སུ་ཞིག་ཡིན་མིན་ཀྱང་མངོན་གསལ་ཡོང་ངེས་རེད་སྙམ་བཞིན་ཡོད།
ཉེ་བའི་ཟླ་བ་གཅིག་ལྷག་གི་ནང་ལོ་རྒྱུས་མཁོ་སྒྲུབ་ཀྱིས་མཚོན་པའི་ཉིན་མཚན་ལྟོས་མེད་ཀྱི་དཀའ་ངལ་མང་པོ་ཞིག་གདོང་ལེན་བྱས་པར་བརྒྱུད། སྡེ་དགེ་དྲ་བ་ཞེས་པ་ཞིག་ཐོན་ཡོད་ལ། དྲྭ་རྒྱ་འདིའི་ནང་ད་དུང་ལོ་རྒྱུས་སོགས་མང་པོ་ཞིག་བླུག་རྒྱུ་ལྷག་བསྡད་ཡོད་པ་བཞིན། དུས་ཡུན་ཐུང་ཐུང་ཞིག་གི་ནང་བྱ་དཀའ་བྱེད་གཏད་ཀྱི་ཁྲོད་ནས། ད་ལྟ་འདིར་འཁོད་མེད་པའི་གལ་ཆེན་ལོ་རྒྱུས་སོགས་ཡིག་ཆ་གཞན་དག་ཀྱང་རིམ་པས་ཁ་གསབ་ཡོང་ངེས་ཡིན་དུས། རྣམ་པ་ཚོས་ཀྱང་མེད་པ་ནས་ཡོད་པའི་གྲུབ་འབྲས་འདི་དང་། རྙོག་ཟིང་ཁྲོད་ཀྱི་ལས་བྱེད་ཚོའི་དཀའ་སྡུག་དང་བློས་གཏོང་འདི་དག་ལ་ངེས་པར་དུ་བསམ་ཤེས་དང་། ཡིག་ཆ་མཁོ་སྒྲུབ་ནས་བཟུང་རམ་འདེགས་གནང་རོགས།
དེ་བཞིན་སྡེ་དགེ་བའི་མིང་ཁྱེར་མཁན་དང་། ནམ་རྒྱུན་མི་རིགས་དང་ལུང་པ་ལ་དགའ་ཞེན་ཡོད་ཟེར་མཁན་ཚོས་ཀྱང་གོ་སྐབས་མདུན་ལ་ཤར་དུས་མ་འགྲིག་མདོག་མདོག་དང་། གོ་སྐབས་མེད་ས་ནས་བྱེད་རྒྱུ་ཡོད་མདོག་མི་གནང་པ་ཅིས་ཀྱང་ལས་དོན་འདིར་ནུས་ཤུགས་མཉམ་དུ་འདོན་རོགས་ཞེས་སྐྱར་དུ་འབོད་བསྐུལ་ནན་པོར་ཞུ་བཞིན་ཡོད། དེ་མིན་གཅིག་གིས་ལས། གཉིས་ཀྱིས་དཀྲོགས་གཏམ་སྤེལ། གསུམ་གྱིས་དཀྲུགས་ཤིང་རྒྱག བཞིས་ལྟད་མོ་བལྟས་ནས་བསྡད་ན་ང་ཚོ་ལ་གྲུབ་འབྲས་གང་འདྲ་ཞིག་ཡོང་མིན་འདས་པའི་ལོ་རྒྱུས་ཀྱིས་མིག་དཔེར་བསྟན་ཡོད།
མཐའ་དོན་བོད་ཀྱི་རྒྱལ་གཅེས་དཔའ་བོ་རྣམ་པའི་རླབས་ཆེན་དམིགས་ཡུལ་མཐའ་དག་སྨོན་པ་ལྟར་འགྲུབ་ནས་བོད་ཀྱི་བདེན་མཐའ་མྱུར་དུ་གསལ་བ་དང་། ༸གོང་ས་རྒྱལ་བའི་དབང་པོ་གང་གིས་གཙོས་རིས་མེད་བསྟན་པ་འཛིན་མཁན་རྣམས་སྐུ་ཚེ་བརྟན་ཅིང་མཛད་ཕྲིན་རྒྱས་པ། དེ་བཞིན་བོད་སྤྱི་དང་སྡེ་དགེ་བའི་འདས་མ་ད་གསུམ་ལ་དམིགས་པའི་ལས་དོན་བཟང་པོ་འདི་དག་ཅིས་ཀྱང་གེགས་མེད་མངོན་འགྱུར་ཡོང་བའི་སྨོན་འདུན་ཤུགས་དྲག་དང་བཅས།
བོད་རྒྱལ་ལོ་ ༢༡༤༠ བོད་ཟླ་དང་པོའི་ཚེས་ ༥ ཕྱི་ལོ་ ༢༠༡༣་༢་༡༥ ཉིན་ཕུ་ནུ་གྲོས་རའི་དབུས་སྤྱི་ཁྱབ་རྒྱུན་ལྷན་ཚོགས་ཀྱིས་བལ་ཡུལ་ནས།
བསམ་ཚུལ་འབྲི།
རྒྱལ་ཡོངས་ཚོགས་ཆེན་ཐེངས་དང་པོའི་དབུ་འབྱེད་གསུང་བཤད།