འདོན་སྤེལ། 2014/08/22 3:12 PM རྩོམ་པ་པོ།

2014_8_22 དེ་རིང་ཕྱི་ཚེས་༢༢ ཉིན་གྱི་སྔ་དྲོར་སྡེ་དགེ་རྒྱལ་ཡོངས་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་དང་། དྷ་ས་ས་གནས་སྡེ་དགེ་ཚོགས་པ་ཟུང་གི་གོ་སྒྲིག་འོག་བཞུགས་སྒར་དྷ་ས་རུ། དེང་སྐབས་སྡེ་དགེ་འདན་མ་རུ་ཛ་དྲག་གནས་ཚུལ་ཐོན་བཞིན་པར་གདུང་སེམས་མཉམ་བསྐྱེད་ཆེད། སྔ་དྲོར་མཆོད་འབུལ་དང་། དགོང་དྲོར་མར་མེ་ཁྲོམ་སྐོར་ཞིག་བྱས་ཡོད་པ་དང་། དེར་སྐུ་མགྲོན་གཙོ་བོ་བོད་མི་མང་སྤྱི་འཐུས་བློ་བཟང་ཡེ་ཤེས་ལགས་ཀྱིས་བོད་ནང་གི་བོད་མི་ཚོའི་དཀའ་ངལ་སྤྱི་དང་། ལྷག་པར་དེང་སྐབས་སྡེ་དགེ་རུ་ལྷག་བཞིན་པའི་དཀའ་ངལ་སྐོར་གསལ་བཤད་དང་། དེར་རྒྱ་གཞུང་གིས་དོན་དམ་གྱི་འགན་ཁུར་དགོས་པའི་སྐོར་སོགས་གཏམ་བཤད་གནང་སོང་ལ། སྡེ་དགེ་རྒྱལ་ཡོངས་ལྷན་ཚོགས་ཀྱི་དྲུང་ཆེ་མཁན་པོ་འགྱུར་མེད་རྡོ་རྗེ་ལགས་ཀྱིས་དེང་སྐབས་བོད་སྤྱི་དང་། ལྷག་པར་སྡེ་དགེ་འདན་མའི་ཕྱོགས་ཀྱི་ཛ་དྲག་དཀའ་ངལ་སྐོར་སོགས་འཁོད་པའི་དགོས་འདུན་དོན་ཚན་གསུམ་ཅན་གྱི་གསར་འགོད་བསྒྲགས་གཏམ་སྒྲོག་སྦྱོང་གནང་སོང་། དེ་བཞིན་སང་ཉིན་ཕྱི་ཚེས་ ༢༣ ཉིན་སུད་སི་ས་གནས་སྡེ་དགེ་ཚོགས་པས་རེབ་སྐོང་ཆོས་འཁོར་དགོན་དུ་བསྔོ་སྨོན་མཆོད་འབུལ་ཞིག་ཞུ་རྒྱུའི་ལས་རིམ་ཀྱང་ཡོད་པ་རེད་འདུག
༄། །གསར་འགོད་བསྒྲགས་གཏམ།
༈ རྒྱུན་དུ་བོད་ས་ཁྱོན་ཡོངས་ནས་རང་དབང་དང་ཐོབ་ཐང་བརྩད་དེ་རང་ལུས་ཀྱང་མེར་སྲེག་བཞིན་ཡོད་པ་ནི། གུ་དོགས་དང་དྲག་གནོན་གྱི་བྱ་སྤྱོད་རྒྱུན་ཆད་ཀྱིན་མེད་པས་ཡིན། དེ་བཞིན་ ༢༠༡༤།༨།༡༡ ཉིན་སྡེ་དགེ་འདན་མ་ཕྱོགས་ནས་སྡེ་དཔོན་དབང་གྲགས་ལགས་རང་ཁྱིམ་ནས་མཚན་མོའི་ཆུ་ཚོད་ ༡༢ ཙམ་ན་བཙན་ཁྲིད་བྱས་པ་དང་། ཚེས་ ༡༢ ཉིན་སྲིད་གཞུང་སྒོ་འགྲམ་དུ་མང་ཚོགས་ཀྱིས་ཁོང་གློད་བཀྲོལ་དགོས་པའི་མཐེ་བོང་གནམ་སློང་གི་ཞི་བའི་འབོད་སྐུལ་བྱས་པར་དུག་བླངས་དང་མེ་མདས་དྲག་གནོན་བྱས་ཏེ། དབང་གྲགས་ཀྱི་བུ་ཀུན་དགའ་ཤེས་རབ་དང་། སྤུན་མཆེད་བཟང་པོ་སོགས་བོད་མི་ ༡༠ ཙམ་ལ་རྨས་སྐྱོན་རྫབ་ཆེན་བཟོས་འདུག ད་དུང་སྡེ་དཔོན་གཞོན་པ་དབང་ཆེན་གྱིས་གཙོས་བོད་མི་ ༢༠ ཡན་མན་ཞིག་འཇུ་བཟུང་བྱས་འདུག ཚེས་ ༡༣ ཉིན་ཤུག་པ་གྲོང་སྡེ་ཁྱོན་ཡོངས་ནས་དྲག་པོའི་དམག་གིས་བསྐོར་ཏེ། ས་གནས་མང་ཚོགས་རང་ཁྱིམ་དུའང་ལྷོད་ཀྱིས་སྡོད་དབང་མེད་པ་མེ་མདའི་སོ་ཁ་གཏད་ནས་འགྲོ་འདུག་གི་རང་དབང་མ་སྤྲད་པ་དང་། ཕྱི་ཚེས་ ༡༦ ཉིན་ཤུག་པ་མེ་རུ་དགོན་པའི་དཀོན་གཉེར་དང་། སྒྲུབ་དཔོན་གྱིས་གཙོས་ཤུག་པ་སྡེ་བའི་སྐྱེ་སེར་གཉིས་ཀྱི་སྐྱེས་པ་ཆ་ཚང་འཛིན་བཟུང་ཐོག་ལོ་ཕྱུག་ས་ཁུལ་གྱི་བཙོན་ཁང་ནང་མ་ཤོང་པ་རྣམས་སྨན་ཁང་གསར་པའི་ནང་བཀག་བསྐྱིལ་བྱས་ཏེ། ཁོང་ཚོའི་མགོ་ནས་སྐྲ་བྲེགས་ནས་མགོ་རིལ་བཟོས་འདུག དེ་བཞིན་དཔོན་དབང་གྲགས་ཀྱི་བུ་ཀུན་དགའ་ཤེས་རབ་ཀྱིས་གཙོས་རྨས་མ་རྣམས་ཀྱི་ལུས་སྟེང་ནས་མདེལ་མགོ་ཕྱིར་བཏོན་རོགས་མ་བྱས་པས་མཚོན་སྨན་བཅོས་བྱེད་མ་བཅུག་པའི་རྐྱེན་གྱིས་ཕྱི་ཚེས་ ༡༧ ཉིན་བུ་རང་ལོ་ ༢༢ ཅན་གྱི་བཀག་བསྐྱིལ་ཁང་དུ་འདས་གྲོངས་དང་། བློ་དཔལ་བཟང་གིས་རང་སྲོག་བཅད་ནས་རྒྱ་གཞུང་ལ་ངོ་རྒོལ་བྱས་ཡོད་པ་རེད། ཕྱི་ཚེས་ ༡༨ ཉིན་དཔོན་དབང་གྲགས་ཀྱི་ཨ་ཞང་ཚེ་དབང་མགོན་པོ་དང་། སྤུན་མཆེད་ཡེ་ཤེས། མག་པ་སྦྱིན་པ་མཐར་ཕྱིན་བཅས་ཉེན་རྡུང་འོག་དམར་གསོད་བཏང་འདུག དེ་བཞིན་ཉིན་འདི་དག་ལ་ཤུལ་ལུས་མང་ཚོགས་བཙན་གྱིས་ཚོགས་འདུར་བསྐངས་ཏེ་དཔོན་དབང་གྲགས་འཇུ་བཟུང་བྱེད་དོན་ནི་འདན་མའི་རྟ་རྒྱུགས་དང་། བསང་གསོལ་གྱི་བྱེད་སྒོ་ཁག་དང་འབྲེལ་བ་མེད་པ། ཁོས་མང་ཚོགས་ཀྱི་རྩྭ་ཁྲལ་དང་། འབུ་ཁྲལ་ལྐོག་ཟས་བྱས་པ་རེད་ཅེས་པ་སོགས་ཀྱི་རྫུན་སྒྲོག་དང་མགོ་སྐོར་གྱི་དྲིལ་བསྒྲགས་ལོག་པར་བྱས་ཡོད། འདི་ནས་ཤེས་གསལ་ལྟར་ན་ད་བར་མི་ལྔ་འདས་གྲོངས་ཟིན་པ་དང་། བོད་མི་བརྒྱ་ནས་ཉིས་བརྒྱ་བར་འཇུ་བཟུང་བཀག་འོག་ཡོད་པས་མ་ཚད། དེ་དག་རྡུང་རྡེག་དང་། འདྲི་བརྩད་རིམ་པ་བྱས་ཏེ་མང་ཚོགས་འ་ཆད་འུ་ཐུག་ངང་ལུས་འདུག་པར་སྡེ་དགེ་རྒྱལ་ཡོངས་ལྷན་ཚོགས་ཀྱི་ངོས་ནས་སེམས་ཚོར་ཆེན་པོའི་ཐོག་གདུང་སེམས་མཉམ་བསྐྱེད་ཞུ་བཞིན་ཡོད་ལ། སྐྱོ་གདུང་དང་དཀའ་སྡུག་ཇི་ཙམ་ཆེ་ནའང་བཟོད་བསྲན་དང་ཞི་བའི་ལམ་ནས་སེལ་ཐབས་ལས་བཟང་བ་མེད་པ་དྲན་གསོ་ཞུ་བཞིན་ཡོད།
རྒྱ་གཞུང་གིས་མི་རིགས་ས་གནས་རང་སྐྱོང་གི་བཅའ་ཁྲིམས་དོན་ཚན་ ༡༠ པ། “རང་ཉིད་ཀྱི་ཡུལ་སྲོལ་གོམས་གཤིས་སྔར་མུས་འཛིན་པའམ་བསྒྱུར་བཅོས་བྱེད་པའི་རང་དབང་ཡོད་པར་འགན་སྲུང་བྱ་རྒྱུ་”ཞེས་པ་དང་། དོན་ཚན་ ༡༡ པ། “མི་རིགས་ཁག་གི་སྤྱི་དམངས་ལ་ཆོས་དད་རང་མོས་ཀྱི་རང་དབང་ཡོད་པར་འགན་སྲུང་བྱ་རྒྱུ་”ཞེས་གཏན་འབེབས་དྲིལ་བསྒྲགས་བྱེད་བཞིན་ཡོད་ཀྱང་། ཕྱི་ཚེས་ ༡༡ ཉིན་འདན་མའི་བསང་གསོལ་གྱི་ཆོས་ཕྱོགས་བྱེད་སྒོ་དང་། འདན་མའི་རྟ་རྒྱུགས་འགྲན་བསྡུར་གྱི་སྲོལ་རྒྱུན་བྱེད་སྒོ་ཁག་བཅས་ལ་སྲིད་གཞུང་གིས་དམ་དྲག་ཤུགས་ཆེན་བྱས་པས་མ་ཚད། ཤུག་པ་སྡེ་བའི་བྲོ་བ་དག་ལ་མཐོང་ཆུང་དང་བརྙས་བཅོས་བྱས་པའི་བརྒྱུད་རིམ་འོག གོང་གསལ་གནས་ཚུལ་བྱུང་པ་ནི་འགྲོ་བ་མིའི་བཟང་སྤྱོད་ལས་ཡོངས་སུ་འདས་ཤིང་། རྒྱ་གཞུང་རང་ཉིད་ཀྱིས་གཏན་འབེབས་བྱས་པའི་བཅའ་ཁྲིམས་ལའང་འགལ་འཛོལ་བྱས་འདུག་པར་ཧ་ཅང་བློ་ཕམ་བྱུང་།
ནམ་རྒྱུན་རྒྱ་ནག་གི་སྲིད་འཛིན་ཞི་ཅིང་ཕིན་གྱིས་གཙོས་དཔོན་རིགས་ཚོས་སྤྱི་ཚོགས་འཆམ་མཐུན་ཡར་སྐུལ་ཞེས་ཤུགས་ཀྱིས་སྒྲོག་བཞིན་ཡོད་པ་དག་འདྲ་མཉམ་གྱི་ལྟ་བ་དང་། ཞི་མོལ་གྱི་ལམ་ནས་ཡོང་དགོས་པ་ཞིག་ལས་དེ་དག་ལས་ལྡོག་ཚེ། མ་འོངས་པའི་འཇིག་ཉེན་ནི་ཁ་ཙམ་གྱིས་ཐག་གཅོད་ཐུབ་པ་ཞིག་གཏན་ནས་མིན་པས། གཤམ་གསལ་འབོད་བསྐུལ་དག་སྐབས་འཕྲལ་ལག་བསྟར་མ་བྱས་ཚེ། འདན་མའི་ཡུལ་ཕྱོགས་འདིར་མཚོན་ན་ཞིང་ཆེན་གསུམ་དང་། རྫོང་ཁག་བཞིའི་མི་མང་འཚོ་སྡོད་བྱས་ཡོད་པས་འུ་ཐུག་ཐབས་ཟད་ཀྱི་གནས་སུ་བཀར་བཞིན་པ་འདི་དག་གི་མཇུག་འབྲས་ཅི་ཡོང་ཚོད་དཔག་དཀའ་བ་ཞིག་ཡིན་དུས། དེའི་འགན་ཚང་མ་ས་གནས་སྲིད་གཞུང་དང་རྒྱ་ནག་གཞུང་གི་ལས་བྱེད་ཚོས་ཁུར་དགོས་པ་རེད།
༡༽ སྡེ་དཔོན་རྒན་གཞོན་གྱི་གཙོས་འཇུ་བཟུང་བྱས་པ་རྣམས་ཆ་རྐྱེན་མེད་པའི་ཐོག་འཕྲལ་དུ་གློད་བཀྲོལ་དགོས།
༢༽ ཤུག་པ་སྡེ་བའི་ནང་ཡོད་པའི་དམག་མི་རྣམས་འཕྲལ་དུ་ཕྱིར་ལོག་དགོས།
༣༽ རྨས་མ་རྣམས་ལ་གཡས་ཁག་གཡོན་བཀྲི་མེད་པར་དུས་ཐོག་སྨན་བཅོས་གང་ལེགས་བྱ་དགོས།
མཐའ་དོན་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་གཙོས་དྲང་བདེན་དང་ཞི་བདེར་དགའ་བའི་འཛམ་གླིང་རྒྱལ་ཁབ་ཁག་དང་། ཚོགས་པ། དེ་བཞིན་མི་མང་ཡོངས་ཀྱིས་སྡེ་དགེ་འདན་མའི་ཡུལ་གྱི་ཛ་དྲག་དཀའ་སྡུག་འདི་དག་འཕྲལ་དུ་སེལ་ཐབས་སུ་སྒོ་ཀུན་ནས་རྒྱབ་སྐྱོར་དང་ནུས་པ་འདོན་རོགས་ཞུ་ཞེས་སྡེ་དགེ་རྒྱལ་ཡོངས་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་ ༢༠༡༤་༨་༢༢ ཉིན་ཕུལ།༼འདྲ་པར། བོད་ཀྱི་བང་ཆེན།༽

བསམ་ཚུལ་འབྲི།

' རྩོམ་འོག་མ།

སུད་སི་དང་མཚོ་པདྨ་གསོག་སྒར་སློབ་གྲྭ་བཅས་ནས་མཆོད་འབུལ

སྡེ་དགེ་དབུས་ས་གཉིས་ཀྱིས་མཆོད་འབུལ་དང་མར་མེའི་ཁྲོམ་སྐོར།

བསམ་ཚུལ་འབྲི།

འབྲེལ་ཡོད་ཀྱི་རྩོམ་གཞན།