སྡེ་དགེ་དགོན་ཆེན་དགོན་པའི་བཤད་གྲྭར་གསུང་བཤད། མཁྱེན་བརྩེ།
འོ་དེ་རིང་ད་དགོན་ཆེན་དགོན་པའི་བཤད་གྲྭ་དང་།མ་དགོན་དེ་ཚོ་ལ་དམིགས་བསལ་གྱི་འབྲེལ་བ་ཞིག་ཡོད་ཕྱོགས་གཅིག་ནས་དེ་དང་།ཡང་ཕྱོགས་གཅིག་ནས་གདན་ས་གནད་འགག་ཆེ་ཤོས་ཤིག་ཡིན་པའི་རྒྱུ་མཚན་དང་།ཡང་སྒོས་མཁན་པོ་སྐལ་ལྡན་ཁོང་རྣམ་པ་ངོ་ཤེས་པ་མང་པོ་ཡོད་པའི་རྒྱུ་མཚན་གྱིས་ཡང་བསྐྱར་ཚར་གཅིག་སླེབས་ཐུབ་པར་དགའ་བོ་ཞེ་དྲག་བྱུང་སོང་།དེ་ནས་ད་ལོ་རེ་ལོ་རེར་ཕྱིའི་རྟེན་དང་བརྟེན་པ་དེ་ཚོའི་སྟེང་ནས་ཞེ་དྲག་གི་དགོན་པ་ཡིན་ན་བཤད་གྲྭ་ཡིན་ན་ཡག་པོ་ཞེ་དྲག་ཆགས་ཀི་འདུག།སྡེ་དགེ་རྫོང་ལ་ཡིན་ནའང་དཔལ་འབྱོར་དང་ག་ས་ཅི་ཐད་ནས་ཧ་ཅང་གི་ཡར་རྒྱས་ཆེན་པོ་ཧ་ལས་པ་དེ་འདྲ་ཡིན་ས་རེད།ད་དུང་ཡིན་ནའང་མུ་འཐུད་ནས་དེ་འདྲར་འགྲོ་གི་རེད་དྲན་གི་འདུག། ཡིན་ནའང་ཕྱིའི་ཡར་རྒྱས་ག་ཚད་ཕྱིན་པ་ནང་ལྟར་ནང་གི་བསམ་བློའི་སྟེང་ནས་ཀྱང་ཡར་རྒྱས་འགྲོ་དགོས་པ་དེ་གལ་ཆེན་པོ་ཡིན་ཙང་།དེ་ནས་མ་གཞི་སྤྱིར་བཏང་ཁྱེད་རང་ཚོ་ཚང་མས་ཧ་གོ་གི་རེད་དེ་དྲན་གསོའི་ཆེད་དུ་སྐད་ཆ་ཉུང་ཉུང་ཞིག་ཞུ་རྒྱུ་ཡིན།བླ་མ་གྲྭ་བ་ཚོ་ལ་དམིགས་བསལ་གྱི་ཞུ་རྒྱུ་ཞིག་ག་རེ་ཡོད་ཟེར་ན།བླ་མ་གྲྭ་བ་ཟེར་བ་བཟོ་བའི་རྒྱུ་མཚན་འདྲ་བོ་གཙོ་བོ་གང་ལ་ཐུག་བསྡད་ཡོད་ཟེར་ན།དེ་ནས་ཆོས་ཉམས་ལེན་བྱེད་མཁན་ཞིག།ཆོས་དེ་ཡང་ཁ་ཡོད་ལག་ཡོད་ཀྱིས་ཉམས་ལེན་བྱེད་མཁན་ཞིག།འཇིག་རྟེན་དང་མ་འདྲེས་པ།གཙོ་བོ་ཁ་སྐད་ཀྱི་ཐོག་ནས་ཞུས་པ་ཡིན་ན།ཆོས་པ་འཆག་ཐུབ་པ་ཞིག།ཆོས་པ་ཆགས་ཟེར་དུས་དོན་དག་ལྡོག་ལྡོག་དེ།ཚེ་འདི་ཡི་སྐད་གྲགས་ཆེན་པོ་འཆག་ཐུབ་པ།དཔལ་འབྱོར་ཆེན་པོ་འཆག་རྒྱུ།བླ་བྲང་ཆེན་པོ་འཆག་རྒྱུ།ཐོབ་དང་གོ་ས་ཆེན་པོ་འཆག་རྒྱུ།ད་དེ་འདྲའི་སྐོར་དེ་ལ་ཁམས་པ་ཚོས་མགོ་རྣ་འབྱོག་ཟེར་གི་ཡོད་རེད།ད་དེ་རྐྱང་པའི་དོན་དག་ལ་གྲྭ་བ་བྱེད་ཟེར་རྒྱུ་འདྲ་དང་།བཤད་གྲྭ་ལ་འདུག་རྒྱུ་ཟེར་བ་འདྲ་དང་།སྒོམ་ཉམས་ལེན་བྱེད་ཟེར་རྒྱུ་འདྲ།ད་དེ་ཚོའི་དབང་དུ་མ་ཤོར་བ་ཞིག།ཧ་ལས་པའི་བྱ་གཏོང་བ།ཐམས་ཅད་བློས་བཏང་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ།ད་ཐམས་ཅད་བློས་གཏོང་མཁན་དེང་སང་དཔེ་དཀའ་བོ་ཞི་དྲག་རེད།བླ་མ་དང་སྤྲུལ་སྐུ་དེ་ཚོས་ཀྱང་གཏང་ཐུབ་ཀི་མི་འདུག།དེ་ཡིན་དུས་གྲྭ་བ་གྲྭ་རྐྱང་ཞིག་གིས་གཏང་ཐུབ་རྒྱུ་མ་རེད་དེ།ཡིན་ན་ཡང་།ག་ཚད་ཡིན་ན་ཡང་ང་ཚོ་བླ་མ་གྲྭ་བ་ཟེར་བ་དེ་འཇིག་རྟེན་དང་འཁོར་བའི་ལས་ཀ་དང་ག་ཚད་ཡིན་ནའང་མ་འདྲེས་པ།ཚང་པ་འདོད་པ་ཆེན་པོ་ཡོད་མཁན་དེ་འདྲ་མ་ཡིན་པར།།དཔལ་འབྱོར་རྐྱང་རྐྱང་ལ་རྔམ་བསྡད་པ་དེ་འདྲ་མ་ཡིན་པར།ནམ་ཞིག་ང་ཚོ་ཤི་དགོས་ཀི་རེད།ཤི་ནས་འགྲོ་མཁན་དང་ཚེ་ཕྱི་མ་ལ་ཕན་ཐོག་ཐུབ་མཁན་དེ་ཆོས་མ་གཏོགས་ཡོད་མ་རེད་བསམ་པ་དེ་ག་ཚད་ཡིན་ན་ཡང་མར་སྙིང་ཁོང་རུས་པའི་གཏིང་ན་ཏོག་ཙམ་ཞིག་འགྲོ་ཐུབ་པ་ཞིག་ངེས་པར་དུ་རེད་དགོས་ཀི་རེད།དེ་མ་བྱུང་ན།ང་ཚོ་བླ་མ་གྲྭ་བ་ཟེར་བ་འདྲ་དང་།བཤད་གྲྭ་ཟེར་བ་འདྲ་དང་།དགོན་པ་ཟེར་བ་འདྲ་དང་།ད་དེ་ཚོའི་སྐོར་དེ་གཅིག་འཇིག་རྟེན་གྱི་ལུགས་སྲོལ་ཙམ་ཞིག་ཆགས་བསྡད་པ་མ་གཏོགས་དངོས་གནས་སངས་རྒྱས་ཤཱཀྱཱ་ཐུབ་པའི་བསྟན་པ་དེ་ཁ་ཡོད་ལག་ཡོད་ཀྱི་ཐོག་ནས་ཉམས་སུ་ལེན་མ་ཐུབ་མཁན་ཞིག་རེད་འདུག་གི་ཡོད་ས་རེད།དེ་ཡིན་དུས་ཁྱེད་རྣམས་ལ་ཡང་བསྐྱར་དུ་གཅིག་ཞུས་པ་ཡིན།དེ་ནས་དེའི་སྟེང་དུ་དམིགས་བསལ་དུ་གཅིག་ག་རེ་ཞུ་རྒྱུ་ཡོད་ཟེར་ན།ང་ཚོ་སངས་རྒྱས་ཤཱཀྱ་ཐུབ་པའི་རྗེས་འཇུག་ཡིན་དུས་སངས་རྒྱས་ཤཱཀྱ་ཐུབ་པའི་རྗེས་འཇུག་ཡིན་པའི་དབང་དུ་བཏང་ནས་སངས་རྒྱས་ཤཱཀྱ་ཐུབ་པའི་བསྟན་པ་ལ་ཞབས་རྗེས་ཤིག་ཞུ་དགོས་ཀི་ཡོད་རེད།ཞབས་རྗེས་ཞུ་ཟེར་ན་སྲི་ཞུ་སྒྲུབ་ཟེར་རེད།ཞབས་རྗེས་ཞུ་ཟེར་རེད་དོན་དག་ལྡོག་ལྡོག།དེ་ཡང་གཙོ་བོ་གང་ལ་བརྟེན་ནས་ཞབས་རྗེས་ཞུ་དགོས་ཀི་ཡོད་རེད་ཟེར་ན།ཚུམས་ཁྲིམས་ལ་གནས།ཐོས་བསམ་བྱེད།དེ་ནས་མཐའ་མའི་མཐའ་མ་སྒོམ་ཉམས་ལེན་བྱེད།ད་དེའི་སྟེང་ནས་ཞབས་རྗེས་ཞུ་དགོས་ཀི་ཡོད་རེད།དེ་ངེས་པར་དུ་བསྒྲུབ་ཐུབ་པར་ཞིག་དང་།དེ་བྱས་པ་ཡིན་ན་དེ་ནས་སངས་རྒྱས་ཤཱཀྱཱ་ཐུབ་པའི་བསྟན་པ་ལ་དངོས་གནས་ཞབས་རྗེས་བསྒྲུབ་ཟེར་བ་དེ་ཐོས་བསམ་སྒོམ་གསུམ་གྱི་སྟེང་ནས་བསྒྲུབ་ཐུབ་ཀི་ཡོད་པ་རེད།
ད་དེའི་སྟེང་ལ་ད་ལྟའི་དུས་ཚོད་འདི་ལ་ང་རང་ཚོ་ནང་པའི་ཆོས་ལ་དད་པ་ཡོད་མཁན།མོས་པ་ཡོད་མཁན་ད་དེ་འདྲ་ཏོག་ཙམ་ཏོག་ཙམ་མཐོང་རྒྱུ་ཡོད་རེད།དཔེར་ན་དེ་རིང་ངས་དབང་སྐུར་དུས་ཁྱེད་རང་ཚོ་འདི་འདྲའི་མང་པོ་འཛོམས་འདུག།ཆར་བ་འདི་འདྲ་བརྒྱབ།འདམ་བག་འདི་འདྲ་མང་པོ་ཡོད་རེད་དེ།འདི་འདྲ་མང་པོ་འཛོམས་འདུག་ད་འདིའི་མཇུག་ལ་ལོ་བཅུ།ཉི་ཤུ།སུམ་ཅུའི་རྗེས་སུ་འདི་འདྲ་ཡོང་མཁན་དཀའ་ལས་ཁག་པོ་རེད་དཱ་གཅིག་བྱས་ན།ཡང་གཅིག་བྱས་ན་ཡག་ཏུ་འགྲོ་གི་ཡོད་ནའང་ཅི་ཤེས།ཡིན་ནའང་ཆོས་ལ་དད་པ་ཟེར་བ་འདྲ་དང་།ཆོས་ལ་མོས་པ་ཟེར་བ་དེ་ཉུང་ཉུང་འཆག་སྲིད་ཀི་རེད།དེ་ཆགས་པའི་རྒྱུ་མཚན་གཙོ་བོ་དེ།ང་ཚོ་བླ་མ་གྲྭ་བ་ཟེར་བ་འདྲ་དང་།དེ་ནས་ང་ཚོའི་བསྟན་པའི་བྱ་བ་བྱེད་མཁན་དེ་ཚོས་ཕྱག་ལས་གནང་སྟངས་དེ་ངེས་པར་དུ་རྒྱང་རིང་པོ་ཞིག་ལ་ཐུགས་བསམ་བཞེས་ནས་གནང་དགོས་པ་དེ་གལ་ཆེན་པོ་ཞེ་དྲག་རེད།དེ་ཡིན་དུས།དམིགས་བསལ་དུ་བཤད་གྲྭ་བ་སློབ་སྦྱོང་བྱེད་མཁན་ཚོས་སློབ་སྦྱོང་བྱེད་རྒྱུ་དེ་གཙོ་བོར་མ་འོངས་པ་ལ་སངས་རྒྱས་ཀྱི་བསྟན་པ་འདི་ལ་ཞབས་རྗེས་ཤིག་ཞུ་ཐུབ་པ་ལ་བསམ་བློ་བཏང་ནས་གནང་རོགས་གནོངས་ཟེར་ཞུ་བ་ཡིན།ཡང་སངས་རྒྱས་ཀྱི་བསྟན་པ་ལ་ཞབས་རྗེས་ཞུ་ཟེར་དུས་ལམ་སང་ང་ཚོ་བོད་པ་རྣམས་ཀྱི་སེམས་ལ་དགོན་པ་ཞིག་བརྒྱབ་བཞག།བཤད་གྲྭ་ཆེན་པོ་ཞིག་བརྒྱབ་བཞག།གསེར་གཡབ་ཆེན་པོ་ཞིག་ཕུབ་བཞག་ཟེར་ནས་ལམ་སང་གཅིག་ཁང་པ་རྒྱག་རྒྱུ་འདྲ་ཞིག་ལ་བསམ་བློ་གཏང་འགྲོ་གི་འདུག།དེ་སྤྱིར་བཏང་དགོས་ཀི་ཡོད་རེད།ཡང་ཁང་པ་མེད་ན་སྡོད་ས་ཡོད་མ་རེད།དེ་རིང་ནང་བཞིན་ཆར་བས་སྦང་འགྲོ་གི་ཡོད་རེད་།དེ་ཡིན་དུས་ཏོག་ཙམ་ཏོག་ཙམ་དགོས་ཀི་རེད་དེ།གཙོ་བོ་བསླབ་པ་སློབ་གཉེར་དང་སྒོམ་ཉམས་ལེན་བྱེད་རྒྱུ།དེའི་ནང་ནས་ཀྱང་བླ་མ་གྲྭ་བ་དེ་ཚོ་དེང་སང་རྒྱ་བོད་ཀྱི་ས་ཆ་ག་ས་ག་ས་ལ་ཏོག་ཙམ་ཏོག་ཙམ་འགྲོ་གི་ཡོད་རེད།དེ་ཚོའི་གྲས་དེས་ག་ཚད་ཡིན་ནའང་སེམས་ཅན་མི་སེར་ཁོ་རང་ཚོ་ལ་ཕན་པའི་ལས་ཀ་ཞིག་བསྒྲུབ་ཐུབ་རྒྱུ་དེ་གལ་ཆེན་པོ་ཞེ་དྲག་རེད་དྲན་གི་འདུག།དེ་མ་ཡིན་པར་སྒོར་མོ་གཅིག་མ་གཏོགས་མེད་ནའང་ང་རང་ཚོའི་ཕ་ཡུལ་ཚུར་འཕེན།གཉིས་མ་གཏོགས་མེད་ནའང་ཚུར་འཕེན།གསུམ་མ་གཏོགས་མེད་ནའང་ཚུར་འཕེན།མདོར་ན་རུག་རུག་བྱ་ས་དེ་ང་རང་ཚོའི་ཕ་ཡུལ་ལ་བསམ་བློ་བཏང་པ་ཡིན་ན་རྒྱལ་བའི་སྲས་པོ་བྱང་ཆུབ་སེམས་དཔའི་ལག་ལེན་མ་འབྱོངས་པ་རེད།དེ་དམིགས་བསལ་དུ་ཞུ་དགོས་པའི་རྒྱུ་མཚན་ཅི་རེད་ཟེར་ན།ད་ལྟ་འདྲ་ཞིག་ཡིན་ན་འཛམ་བུ་གླིང་ལ་ནང་པ་སངས་རྒྱས་པའི་ཕོན་ཆེ་ཆུང་དེ་ག་འདྲ་ཡོད་རེད་ཟེར་ན།རྒྱ་ནག་གི་རྒྱལ་ཁབ་འདིའི་ནང་གི་ནང་པ་སངས་རྒྱས་པའི་གྲངས་ཀ་དེ་དང་གཞན་འཛམ་གླིང་གི་ས་ཆ་ཡོངས་རྫོགས་ཀྱི་ནང་པ་སངས་རྒྱས་པའི་མིའི་གྲངས་ཀ་དེ་ཚུར་བསྡུར་ཡོང་ན།ད་དུང་རྒྱ་ནག་ལ་ཡོད་པའི་ནང་པ་སངས་རྒྱས་པ་དེ་མང་གི་ཡོད་རེད་ཟེར་ལབ་ཀི་ཡོད་རེད་ཕྱོགས་གཅིག་ནས།ཡང་ཕྱོགས་གཅིག་ནས་བཤད་སྲོལ་གཅིག་ལ་ཕྱི་རྒྱལ་ལ་ཡོད་པའི་མི་ཚོས་བསམ་བློ་གཏོང་སྟངས་གཅིག་བྱེད་ཡོང་དུས་མ་འོངས་པ་ལ་ལོ་བཅུ་།ཉི་ཤུ།སུམ་ཅུའི་མཇུག་ཏུ་རྒྱ་ནག་ལ་ཡེ་ཤུ་དང་ཁ་ཆེ་ཨ་མེ་རི་ཀ་ལས་ཀྱང་མང་ཚད་ཅིག་ཡོང་གི་ཡོད་རེད་ཟེར་དེ་འདྲའི་སྐད་ཆ་བཤད་མཁན་ཡོད་རེད།བཤད་མཁན་དེ་ཚོས་ཁ་རོག་མོ་བཏབ་ལུང་བསྟན་པ་དེ་འདྲ་མ་ཡིན་པར་དངོས་གནས་སྤྱི་ཚོགས་ཀྱི་འགྲོ་སྟངས་དེ་ཚོ་ལ་བསམ་བློ་མང་པོ་བཏང་ཚར་མཁན་དེ་ཚོའི་སྐད་ཆ་རེད།གཅིག་བྱས་ན་བདེན་པ་ཡིན་སྲིད་ཀི་རེད་དྲན་གི་འདུག།དེ་ཡིན་དུས་ང་ཚོ་ཆོས་འཆད་ཉན་བྱེད་ཟེར་མཁན་དང་།བཤད་གྲྭ་བ་ཡིན་ཟེར་མཁན་དང་།བླ་མ་ཡིན་ཟེར་མཁན་དེ་ཚོས་ངེས་པར་དུ་བསམ་བློ་གཏང་དགོས་ཀི་ཡོད་རེད།ག་ཚད་ཡིན་ནའང་རང་དོན་ཁོ་ན།ང་རང་ཚོའི་དགོན་པ།ང་རང་ཚོའི་ལྷ་ཁང་།ང་རང་ཚོའི་ཕ་ཡུལ་ཟེར་ནས་ཆུང་ཆུང་ཞིག་འཛུགས་ཐུབ་པའི་བསམ་བློ་གཏང་བསྡད་རྒྱུ་མ་ཡིན་པར་རྒྱ་ཆེན་པོ།དད་པ་ཡོད་མཁན་དེ་ཚོ་མགོ་སྐོར་རྒྱུ་དང་།དེ་ནས་རང་རང་སོ་སོའི་དཔལ་འབྱོར་གྱི་དོན་དག་ཙམ་མ་ཡིན་པར་དངོས་གནས།ཐ་ན་སངས་རྒྱས་ཤཱཀྱཱ་ཐུབ་པ་ཟེར་བའི་མཚན་དེ་མཐའ་ཁོབ་ཀྱི་གང་ཟག་དེ་ཚོའི་རྣ་འབྱོག་ནང་ལ་བླུག་ཐུབ་པའི་སེམས་བསྐྱེད།དེ་འདྲའི་བསམ་བློ་བཏང་ནས་བྱ་བ་བྱེད་རྒྱུ་དེ་གལ་ཆེན་པོ་ཞེ་དྲག་རེད།འོ་ད་དེ་རེད་དེ་ངས་དམིགས་བསལ་དུ་བླ་མ་གྲྭ་བ་ཚོ་ལ་ཞུས་པ་ཡིན།
དེ་ནས་ཁྱེད་རང་ཚོ་མི་སྐྱ་ཕོ་མོ་མང་པོ་འཛོམས་བཞག།མི་སྐྱ་ཕོ་མོ་ཚོ་ལ་དམིགས་བསལ་དུ་ཞེ་དྲག་ཞེ་དྲག་ཞུ་རྒྱུ་མེད།ད་རེས་བཤད་པ་ནང་བཞིན་ཕྱིའི་དཔལ་འབྱོར་གྱི་ཡར་རྒྱས་དེ་ཞེ་དྲག་གི་ཆེ་རུ་ཆེ་རུ་འགྲོ་གི་ཡོད་རེད།ང་སྡེ་དགེའི་ཕྱོགས་ལ་ཚར་མང་པོ་ཡོང་བ་ཡིན།ཚར་རེ་རེ་ཡོང་དུས་ཞེ་དྲག་གི་ཡར་རྒྱས་ཆེ་རུ་ཆེ་རུ་ཕྱིན་འདུག།དཔེར་ན་ང་སྡོན་མ་དང་པོ་ཡོང་དུས་ཁྱེད་རང་ཚོ་ལ་ཁ་པར་གཅིག་ཀྱང་ཁུར་རྒྱུ་མེད་རེད་པཱ།ད་ནི་མི་རེ་རེས་ཁ་པར་རེ་རེ་ཁུར་འདུག།ད་ནི་མི་ཚོས་ཕྱག་དབང་ཞུ་བར་ཡོང་དུས་ཕྱག་དབང་ཞིག་གནང་རོགས་གྱིས།ག་ཤེད་ཅིག་ལ་ཕུར་ཞིག་རྒྱག་རོགས་གྱིས།ག་ཤེད་ག་ཤེད་ཅིག་མོ་ཞི་རྒྱག་རོགས་གྱིས་དེ་ནས་ཐམས་ཅད་ཀྱིས་རྒྱུད་ལ་པར་ཞིག་རྒྱག་རྒྱུ་འདྲ་བོ་བྱེད་ཀི་འདུག།དེ་འདྲའི་དཀའ་ངལ་ཞིག་སླེབས་འདུག།ད་སྤྱི་ཚོགས་ཀྱི་ཐོག་ལ་ཡར་རྒྱས་ཆེན་པོ་ཞིག་འགྲོ་གི་ཡོད་རེད།ད་དུང་ཡིན་ནའང་འགྲོ་རྒྱུ་རེད།ཡིན་ནའང་ཁྱེད་རང་ཚོ་སེམས་ཀྱི་སྟེང་ནས་ཡར་རྒྱས་འགྲོ་རྒྱུ་དེ་གལ་ཆེན་པོ་ཞེ་དྲག་རེད་དྲན་གི་ཡོད།དེ་ཡིན་དུས་ནང་གི་ཡར་རྒྱས་དེ་གང་ལ་བརྟེན་ནས་འགྲོ་དགོས་ཀི་ཡོད་རེད་ཟེར་ན།ང་རང་ཚོ་བོད་རིགས་དེ་ལ་གོམས་གཤིས་བཟང་པོ་མང་པོ་ཞིག་ཡོད་རེད།ནང་ཆོས་ཀྱི་སྟེང་ནས་ཚུར་བསླབ་བཞག་པ་ཞིག་དང་ཕ་མའི་སྟེང་ནས་ཚུར་བསླབ་བཞག་པ།དེ་འདྲའི་སེམས་པ་བཟང་པོ་བྱེད་རྒྱུ་འདྲ་དང་།ཐ་ན་བོད་རིགས་ཟེར་བ་དེས་འབུ་ཞིག་གསོད་པ་ལའང་དེ་བསོད་མི་རུང་བསམ་པ་འདྲ་བོ།འོ་དེ་འདྲའི་སྙིང་རྗེ་ཟེར་དགོས་ཨེ་རེད།བརྩེ་དུངས་ཤིག་ཡོང་གི་ཡོད་རེད།དེ་ཚོའི་གྲས་དེ་ངེས་པར་དུ་བརླག་མ་ཤོར་བ་ཤིག།དེ་ཚོའི་གྲས་དེ་ཕ་མ་རྒན་རབས་ཚོས་བྱིས་པ་ཚོ་ལ་སློབ་སྟོན་བྱ་རྒྱུ་དེ་གལ་ཆེན་པོ་ཞེ་དྲག་རེད་གཅིག་བྱས།གཅིག་དེ་ཡར་རྒྱས་དང་ཁེ་བཟང་།ཁེ་བཟང་ཟེར་གི་ཡོད་རེད་པཱ།ཚང་རྒྱག་དུས་ཁེ་བཟང་འཐོབ་དགོས་ཀི་རེད།ཁེ་བཟང་དང་ཡར་རྒྱས་ཟེར་བ་དེ་ཚོ་ལ་འགྲེལ་བཤད་རྒྱག་སྟངས་མ་འདྲ་བ་མང་པོ་ཡོད་རེད།མང་ཆེ་བས་ཡར་རྒྱས་དང་ཁེ་བཟང་ཟེར་དུས་གཅིག་དཔལ་འབྱོར་མང་པོ།སྒོར་མོ་མང་པོ།ཁང་པ་ཆེན་པོ།མོ་ཊ་རྫིག་པོ་དེ་ཚོ་ལ་ཡར་རྒྱས་དང་ཁེ་བཟང་།གོང་འཕེལ་ཟེར་ནས་འགྲེལ་བཤད་རྒྱག་མཁན་ཡོད་རྒྱུ་རེད།ཡིན་ནའང་དེ་ལ་བསམ་བློ་ཡག་པོ་གཏང་དགོས་ཀི་རེད།ཡར་རྒྱས་ཟེར་བ་དེ།ད་ལྟ་ང་རང་ཚོའི་འདིའི་ཕྱོགས་ལ་དཔེ་མི་སྲིད་པར་ཡག་པོ་ཞེ་དྲག་ཡོད་རེད།དེའི་ཡར་རྒྱས་དེ་ག་བར་ཡོད་རེད་ཟེར་ན་ལྷོད་ལྷོད་བྱས་ནས་སྡོད་རྒྱུ་དང་།སེམས་ཕྲལ་ཞེ་དྲག་མི་བྱེད་པ་དང་།ཕན་ཚུན་བྱམས་བརྩེ་ཡོད་པ།ཕར་ཚུར་འཛིང་མོ་མི་བྱེད་པ་དང་།ཁྲམ་པ་མི་བྱེད་རྒྱུ་དང་།རྐུན་མ་ཞེ་དྲག་ཞེ་དྲག་མི་བྱེད་རྒྱུ་དང་ད་དེ་ཚོའི་སྟེང་ནས་ང་ཚོའི་སེམས་ཀྱི་ཐོག་ལ་ཡར་རྒྱས་ཆེན་པོ་ཞེ་དྲག་ཅིག་ཡོད་རེད།དེའང་ཡར་རྒྱས་ཀྱི་གྲས་སུ་བརྩི་དགོས་ཀི་རེད་ལ་ཡར་རྒྱས་དེ་དག་བརླག་མ་ཤོར་བ་དེ་ཞེ་དྲག་གལ་ཆེན་པོ་རེད།དེ་ངས་ལབ་ཀི་ཡོད།ལབ་དགོས་ཀི་འདུག།གང་རེད་ཟེར་ན་ང་འཛམ་བུ་གླིང་གི་ས་ཆ་ག་ས་ག་ལ་ཏོག་ཙམ་ཏོག་ཙམ་འགྲོ་གི་ཡོད་རེད།དེ་ཡིན་དུས་དཔལ་འབྱོར་ཆེན་པོ་ཡོད་མཁན་མི་དེ་འདྲ་མང་པོ་ཐུག་མྱོང་།དེ་ཐམས་ཅད་སེམས་ཕྲལ་ཆེན་པོ།སྡུག་བསྔལ་ཧ་ཅང་གི་ཆེན་པོ།ག་ཚད་དཔལ་འབྱོར་ཆེན་པོ་ཡོད་ན་དེ་ཚད་ཅིག་སྡུག་བསྔལ་ཆེན་པོ་ཡོད་མཁན་དེ་འདྲ་མང་པོ་འདུག།དེ་ཚོ་ལ་བལྟས་ན་ཡར་རྒྱས་ཟེར་བ་འདྲ་དང་།ཁེ་བཟང་ཟེར་བ་དེ་ཚོ་གོ་བ་གོ་སྟངས་དེ་ཡིན་གཅིག་མིན་གཅིག་དངུལ་མང་པོ་ཡོད་མཁན་ཞིག་དང་།ཁང་པ་མང་པོ་ཡོད་མཁན་ཞིག་དེ་འདྲ་མ་ཡིན་པར་སོས་དལ་བྱས་སྡོད་རྒྱུ་འདྲ་དང་།ཧ་ཅང་གི་བྲེལ་བ་ཆེན་པོ་མ་ཡིན་པ་དང་།རང་རང་སོ་སོ་མགོ་ཐོན་ཐུབ་པ་ཙམ་ལའང་ཆོག་ཤེས་བྱ་ཐུབ་པ་དེ་འདྲ་ལ་ཡང་ཡར་རྒྱས་ཟེར་བརྩི་ཐུབ་ཀི་རེད་དྲན་གི་འདུག།བསམ་བློ་གཏང་སྟངས་དེ་ཚོའི་གྲས་དེ་བརླག་མི་ཉེས་ཟེར་ཞུས་པ་ཡིན།
དེ་ནས་སློབ་སྦྱོང་ཟེར་བ་དེ་ཧ་ཅང་གི་གལ་ཆེན་པོ་ཞེ་དྲག་རེད།ད་དུང་ལོ་ཆུང་བ་དེ་ཚོ།ལོ་ཆུང་བ་དེ་ཚོས་སློབ་སྦྱོང་བྱེད་ཟེར་དུས་སློབ་སྦྱོང་བྱ་བའི་དམིགས་ཡུལ་དེ་རང་ཉིད་མི་ཡག་པོ་ཞིག་དང་།མི་བཟང་པོ་ཞིག།དེ་ནས་སྤྱི་ཚོགས་ཀྱི་སྟེང་དུ་ཕན་ཐོག་ཐུབ་མཁན་ཞིག་དང་།ཐབས་ཤེས་འདྲ་དང་མི་འདྲའི་སྟེང་ནས་སྤྱི་ཚོགས་ཀྱི་སྟེང་ལ་ཞབས་རྗེས་ཞུ་ཐུབ་མཁན་ཞིག།འོ་ད་དེ་འདྲའི་ཆེད་དུ་སློབ་སྦྱོང་བྱེད་དགོས་ཀི་རེད་མ་གཏོགས་ཁ་རོག་སྲིད་གཞུང་གི་ལས་ཀ་འདྲ་བོ།གང་ལྟར་དེ་འདྲའི་ལས་ཀ་ཆུང་ཆུང་ཙམ་ཞིག་དམིགས་ཡུལ་བྱ་རྒྱུ་མ་ཡིན་པར་དམིགས་ཡུལ་རྒྱ་ཆེན་པོ་བྱེད་དགོས་ཀི་རེད།དེ་ནས་ཡུན་རིང་ཞིག་ལ་བསམ་བློ་གཏང་དགོས་པ་ཡིན་དུས་ལོ་གཞོན་པ་དེ་ཚོ་རང་རང་སོ་སོས་བོད་ཀྱི་སྐད་ཡིག་དང་།དེ་ག་ནང་བཞིན་ཕྱི་རྒྱལ་གྱི་སྐད་ཡིག།རྒྱ་ནག་གི་ཤེས་ཡོན་དེ་ཚོའི་སྐོར་དེ་སློབ་སྦྱོང་བྱེད་དགོས་རྒྱུ་ཧ་ཅང་གལ་ཆེན་པོ་ཞེ་དྲག་རེད་ཟེར་ཞུས་པ་ཡིན། དེ་ནས་ལུང་པ་དང་རྒྱལ་ཁབ་ལ་ཁྲིམས་རེ་རེར་ཡོད་རེད།དེ་ངེས་པར་དུ་ཁ་ཡོད་ལག་ཡོད་ཀྱིས་བསྲུང་ཐུབ་རྒྱུ་དེ་གལ་ཆེན་པོ་ཞེ་དྲག་རེད།ཡང་ཁ་ཤས་ཀྱི་བསམ་པ་ལ་ཁྲིམས་སྲུང་ཟེར་བ་དེ་གཞུང་ཁོ་རང་ཚོའི་དོན་ལ་སྲུང་དགོས་ཀི་ཡོད་སྣང་འདྲ་ཞིག་ཤར་གི་འདུག་སྟེ།དེ་འདྲར་མ་རེད།ཁྲིམས་བསྲུངས་ན་རང་རང་སོ་སོ་ལ་ཕན་ཐོབ་ཐུབ་ཀི་རེད།འོ་དེ་ཡིན་དུས་རང་རང་སོ་སོ་ལམ་འགྲོ་འགྲོ་བ་དང་རང་རང་སོ་སོ་དཀལ་ངལ་ལ་མི་འཕྲད་པའི་ཆེད་དུ་སློབ་སྦྱོང་བྱེད་རྒྱུ་དང་ཁྲིམས་སྲུང་རྒྱུ་དེ་གལ་ཆེན་པོ་ཞེ་དྲག་རེད།འོ་ད་དེ་ཁྱེད་རྣམ་པ་ལ་ཞུ་རྒྱུ་བྱུང་།
༼གསལ་བཤད།འདི་ནི་སྐྱབས་རྗེ་རྫོང་སར་མཁྱེན་བརྩེ་རིན་པོ་ཆེས་སྡེ་དགེ་བཤད་གྲྭར་གནང་བའི་འཆད་ཁྲིད་ཅིག་ཡིན་ལ་འདིར་གཙོ་བོ་དགོན་སྡེའི་སློབ་གསོ་དང་མང་ཚོགས་སློབ་གསོ་སྟེ་ཁག་གཉིས་ཡོད་ལ།དེ་གཉིས་ཀའང་དུས་རབས་འདིར་དགོས་ངེས་པའི་བཀའ་སློབ་གལ་ཆེན་ཞིག་རེད་འདུག་པས་དེ་གར་ཙམ་ཡལ་མི་འགྲོ་བའི་ཆེད་དང་ན་གཞོན་ཚོར་ཅུང་ཟད་ཕན་དུ་རེ་བས་བརྡ་སྤྲོད་དང་བསྟུན་ཅི་ཐུབ་ཀྱི་སྒོ་ནས་ལྷག་ལུས་མེད་པར་རང་གི་སློབ་སྦྱོང་གི་བར་སྟོང་དག་བེད་སྤྱད་ནས་ཕབ་སྒྲིག་བྱས་པ་ཡིན།དེས་ན་ནོར་འཁྲུལ་ཅི་མཆིས་རང་གི་ཡིན་པས་དགོངས་ཆར་ལྷུག་པོར་སྩོལ་བར་མཁྱེན་ཞེས་ཕབ་སྒྲིག་པས།༽
བསམ་ཚུལ་འབྲི།
མདོ་ཁམས་འདན་མའི་ཡུལ་གྱི་ཀློང་ཐང་སྒྲོལ་མ་ལྷ་ཁང་།