འདོན་སྤེལ། 2016/08/9 4:10 AM རྩོམ་པ་པོ།

གསེར་རྟ་བླ་རུང་སྒར་དུ་རྒྱ་ནག་གཞུང་གིས་སྔ་ཕྱིར་སུན་བཙིར་བྱས་དང་བྱེད་བཞིན་པའི་སྡུག་བསྔལ་གྱིས་མ་བཟོད་པར་བླ་རུང་སྒར་གྱི་བཙུན་མ་རིག་འཛིན་སྒྲོལ་མ་ཞུ་བ་ཞིག་གིས་རང་སྲོག་བཅད་ཡོད་འདུག
དེ་ཡང་ཉེ་ཆར་སྤྱི་ཟླ་བདུན་པའི་ཚེས་༢༠་ཉིན་ནས་འགོ་བཙུགས་ཏེ་རྒྱ་ནག་གཞུང་གི་བཀོད་ཁྱབ་འོག་དམག་མི་དང་ལས་ཀ་བྱེད་མི་སོགས་ཀྱིས་འཕྲུལ་ཆས་བཏང་ཡོང་སྟེ། གསེར་རྟ་བླ་རུང་སྒར་པདྨ་མཁའ་འགྲོའི་འདུ་གླིང་གི་ཉེ་འཁྲིས་ཀྱི་རྒྱུན་སྡོད་སློབ་གཉེར་བ་གྲྭ་བཙུན་ཚོའི་སྡོད་ཤག་བཙན་དབང་གིས་གཏོར་བཤིག་གཏོང་འགོ་བཙུགས་ཡོད་ཅིང་། ཚེས་ ༢༠ ཐམ་པའི་གོང་ཏག་ཏག་དེར་གསེར་རྟ་བླ་རུང་སྒར་གྱི་བཙུན་མ་རིག་འཛིན་སྒྲོལ་མ་ཞུ་བ་ཞིག་གིས་རང་ཉིད་ཀྱི་སྐེ་ལ་ཐག་པ་བརྒྱབ་ནས་རང་སྲོག་བཅད་ཡོད་འདུག
ཁོ་མོས་ཁ་ཆེམས་ཡི་གེ་ཞིག་དང་སྒོར་མོ་ཁ་ཤས་ཤུལ་དུ་བཞག་ཡོད་ཅིང་། ཁ་ཆེམས་ཡི་གེ་དེའི་ནང་། བླ་རུང་སྒར་དུ་སློབ་གཉེར་བྱེད་པ་ལ་སྔ་ཕྱིར་རྒྱ་ནག་གཞུང་གིས་སུན་བཙིར་ཚད་མེད་བཟོ་བཞིན་པར་བརྟེན་སེམས་ལ་སྡུག་བསྔལ་ཀྱིས་བཟོད་ཐབས་མི་འདུག ཁོ་མོ་འདས་ཚར་པའི་རྗེས་སུ་ཤུལ་བཞག་གི་སྒོར་མོ་འགའ་ཡོད་པ་དགོན་པར་འབུལ་རོགས་ཞེས་བྲིས་ཡོད་འདུག
རིག་འཛིན་སྒྲོལ་མ་ལགས་ནི་བླ་རུང་སྒར་དུ་རྒྱུན་སྡོད་སློབ་གཉེར་བ་ཞིག་ཡིན་ཞིང་། སྐྱེས་ཡུལ་བོད་སྡེ་དགེ་ཕྱོགས་ནས་ཡིན་འདུག
དེ་མིན་ཡང་བླ་རུང་སྒར་དུ་གྲྭ་ཤག་གཏོར་བཤིག་བྱས་དང་བྱེད་བཞིན་པར། རྒྱ་ནག་གཞུང་གིས་གཏོར་ཟིན་པའི་གྲྭ་ཤག་རེ་རེར་རྒྱ་སྒོར་ཁྲི་གཉིས་མ་ཟིན་ཙམ་རེ་གུན་གསབ་ཀྱི་ཚུལ་དུ་སློབ་གཉེར་བ་ཚོར་སྤྲད་ཡོད་འདུག་ལ། ད་དུང་དེའི་སྟེང་ལ་སྒར་གྱི་ངོས་ནས་ཀྱང་དཔལ་འབྱོར་ཅུང་ཙམ་ཞིག་རོགས་རམ་བྱས་ཡོད་འདུག ད་ལྟའི་ཆར་གྲྭ་ཤག་གཏོར་ཟིན་ནས་སྡོད་ས་རྩ་བ་ནས་མེད་མཁན་རྣམས་གནས་སྐབས་རིང་སོ་སོའི་ཆོས་གྲོགས་ཀྱི་གྲྭ་ཤག་དུ་མཉམ་སྡོད་བྱས་ནས་སློབ་གཉེར་མུ་མཐུད་དུ་བྱེད་བཞིན་ཡོད་འདུག།
གསར་འགོད་པ་གུ་རུ་ཆོས་སྐྱིད། ཡོང་ཁུངས། ཨེ་ཤི་ཡ་རང་དབང་རླུང་འཕྲིན་ཁང་།

བསམ་ཚུལ་འབྲི།

' རྩོམ་འོག་མ།

སྡེ་དགེ་ཧོར་པོའི་སྲོལ་རྒྱུན་མགར་བཟོའི་ལག་ཤེས་སྐོར།

སྡུག་བསྔལ་གྱིས་བཟོད་ཐབས་མི་འདུག་ཅེས་རང་སྲོག་བཅད་འདུག

བསམ་ཚུལ་འབྲི།

འབྲེལ་ཡོད་ཀྱི་རྩོམ་གཞན།