སྒར་རིས་དང་སྡེ་རིས་བྱུང་ཚུལ།
བཟོ་མཆོག་ལྟད་མོ་ཀུན་མཐོང་ནས་དྲངས། རྩོམ་པ་པོ་སྡེ་དགེ་ཡོན་ཏན་ཚེ་རིང་།
༈ སྒར་རིས་གསར་མའི་བྱུང་ཚུལ་ནི།
ཁྱད་པར་བཟོ་སྤྱོད་འཇིག་རྟེན་དབང་ཕྱུག་མཆོག །གཙུག་ལག་ཆོས་ཀྱི་སྣང་བའི་རྣམ་དཔྱོད་ནི། །ཚུར་མཐོང་བློ་འདས་མིག་གི་བདུད་རྩིར་གྱུར། །ཅེས་དེ་དག་ལས་ཐམས་ཅད་ལས་ཁྱད་པར་དུ་འཕགས་པ། མཁས་གྲུབ་སི་ཏུ་ཆོས་ཀྱི་འབྱུང་གནས་གྲགས་ཏེ་རབ་བྱུང་བཅུ་གཉིས་པའི་ལྕགས་འབྲུག་ལོར་སྐུ་འཁྲུངས། དཔལ་སྤུངས་ཐུབ་བསྟན་ཆོས་འཁོར་གླིང་གི་ཆོས་སྡེ་བཏབ། རྒྱ་འཇང་སོགས་ས་མཐའ་རྣམས་ལའང་ཀར་ལུགས་དགོན་སྡེ་མང་དུ་བཞེངས། རྗེ་རང་ཉིད་ཀྱི་ཀརྨ་སྒར་རིས་གསར་དུ་ཕྱག་བསྟར་དགྱེས་པའི་རྣམ་དཔྱོད་ལས་འཁྲུངས་པའི་བྲིས་འབུར་རྣམས་ནི་ཚུར་མཐོང་གི་བློ་ཡི་ར་བ་ལས་འདས་ཤིང་རྫུ་འཕྲུལ་ཆེན་པོས་བཀོད་པ་ལྟར་ད་ལྟ་ཐ་མ་པ་རྣམས་ཀྱི་མིག་གི་བདུད་རྩིར་མངོན་སུམ་གྱུར་པ་སྟེ། དེ་ལྟར་ཁྱད་པར་དུ་འཕགས་པའི་ཚུལ་སྐྱེས་རབ་དཔག་བསམ་འཁྲི་ཤིང་གི་ཞལ་ཐང་ཉེར་ལྔ་བྲིས་པའི་མཇུག་ཏུ་བཀའ་རྩོམ་གནང་བར། ཚོ་དང་རི་མོའི་ཉམས་རྣམ་འགྱུར། །རྒྱུ་ནག་མཁས་པའི་རྗེས་འབྲངས་ནས། །ཡུལ་དང་ཆ་ལུགས་ཁང་བཟང་སོགས། །འཕགས་ཡུལ་མངོན་སུམ་མཐོང་བཞིན་བྱས། །སྨན་ཐང་གསར་རྙིང་མཁྱེན་ལུགས་པ། །བྱེའུ་སྒང་པ་སྒར་བྲིས་པའི། །རྣམ་དཔྱོད་དེ་ཀུན་འདིར་ལྡན་ཡང་། །ཉམས་འགྱུར་འབུམ་གྱིས་ཁྱད་པར་བྱས། །ཞེས་པ་ལྟར་ཀརྨ་སྒར་རིས་གསར་མའི་སྲོལ་ཕྱེ། དེའི་རྗེས་འབྲངས་མང་པོ་བྱུང་བའི་ནང་ནས། ཀརྨ་ཐེག་མཆོག་རྡོ་རྗེའི་རྩར་ཀརྨ་བསྟན་འཛིན་དགེ་ལེགས་ཉི་མས་སྒར་ལུགས་རི་མོ་སྦྱོང་བྲིས་འབུར་གཉིས་དང་ཐིག་རྩ་བརྐོས་བླུགས་སོགས་ཕུལ་དུ་བྱུང་རྗེས་ཐིག་ཆེན་བཅུ་གཉིས་རྣམ་གཞག་ཅན་གྱི་ཐིག་དཔེ་བློ་གསལ་དགྱེས་བྱེད་དེ་བརྩམས་པའོ། །དེ་ལྟར་ཀརྨ་སྒར་རིས་གསར་རྙིང་པར་གསུམ་གྱིས་སྲོལ་ཕྱེས་པ་ཡིན་ནོ།།
༈ སྡེ་རིས་བྱུང་ཚུལ། གོང་གི་ལུགས་སྲོལ་ཐམས་ཅད་ཀྱི་ལེགས་པའི་ཆ་རྣམས་བླངས་ནས་བྲིས་པ་ཞིག་སྟེ། སྔོན་མཁས་དབང་ཆུ་རྒྱུད་ཕུན་ཚོགས་དར་རྒྱས་དང་ཏཱ་རེ་ཡོ་ཀས་སྒར་སྨིན་འདྲེས་མ་མཛད། དེ་དག་གི་བྲིས་པ་ལ་ཉམས་ཁྱད་མཚར་ཅན་ཡོད་ནའང་རྒྱུན་སྲོལ་དུ་མ་བྱུང་། ཉེ་ཆར་ཀརྨ་བློ་གྲོས་འོད་ཟེར་རམ་ཐང་ལྷ་ཚེ་དབང་འབོད་པའི་བཤེས་གཉེན་དམ་པ་དེའི་རི་མོའི་སྒྱུ་རྩལ་ཐམས་ཅད་ཀྱི་མཛེས་པ་རྣམས་གཅིག་ཏུ་བསྡུས་ནས་བྲིས་པ་ལ་སྒར་སྨིན་འདྲེས་མའམ་སྡེ་རིས་ཀྱི་སྲོལ་གསར་དུ་བྱུང་བ་ནི་གངས་ཅན་ལྗོངས་སུ་རི་མོའི་མ་དཔེ་ལྟར་གྱུར་ཡོད། ང་ཚོའི་མིག་ལམ་དུ་མཐོང་ཐུབ་པ་དགོན་སྡེ་ཁག་གི་ལོགས་རིས་དང་སི་ཐང་མང་པོ་མཇལ་རྒྱུ་ཡོད་པ་དང་། ཁྱད་པར་སྡེ་དགེའི་སྤར་ཁང་གི་ཤོག་ཐང་གནས་བརྟན་བཅུ་དྲུག་དང་གུ་རུ་མཚམ་བརྒྱད། སྒྲུབ་རྒྱུད་ཤིང་རྟ་བརྒྱད་སོགས་ཀྱི་ཤོག་ཐང་རི་མོ་དངོས་སུ་མཐོང་ཐུབ་དེ་ལ་ཞིབ་གཟིགས་མཛོད་དང་སྒར་སྨིན་ནམ་སྡེ་བྲིས་རི་མོའི་ཉམས་ངེས་པར་གསལ་ལོ།།
བསམ་ཚུལ་འབྲི།
ཆས་གོས་དང་གོང་གཤམ་སོགས་ཚེམས།