སྐུ་ངོ་འཇུ་ཆེན་ཐུབ་བསྟན་མཆོག་ལ་བསྔགས་པ།
སྐུ་ངོ་འཇུ་ཆེན་ཐུབ་བསྟན་མཆོག་ལ་བསྔགས་པ།
མནའ་དེང་ཀྱི་གཞུང་ལུགས་ཀུན་ལ་བྱང་ཆུབ་ཅིང་།།
རྣམ་དཔྱོད་དང་བློ་རིག་མྱུར་པའི་སྐུ་ངོ་ལགས།།
བསྔགས་བརྗོད་ཀྱི་ཚིག་གི་ཕྲེང་བ་འགས།།
དུག་ཚེར་ངས་ཁྱེད་ལ་ངོ་སོ་བསྟོད་ན་འདོད།།
ལོ་རྒྱུས་ལ་ཞིབ་འཇུག་མཁས་པའི་སློབ་དཔོན་ཅིག།
རང་རིགས་ལ་དུང་བ་ཟབ་པའི་མི་ཡག་ཅིག།
མེས་པོ་ལ་བློ་སྙིང་དཀར་པའི་གངས་བུ་ཅིག།
ཞིབ་དཔྱོད་ཀྱི་བློ་རིགས་བཟང་པའི་ལྡེའུ་མིག་ཅིག།
མགོ་ནག་གི་དབུ་རྒྱན་གྱུར་པའི་དཔའ་མཛངས་ཤིག།
སྙིང་སྟོབས་ཀྱི་དཔའ་ངར་ལྡན་པའི་གྱད་རྒོད་ཅིག།
མི་རིགས་ཀྱི་ལ་ཞེན་རྒྱལ་པའི་རྟུལ་ཕོད་ཅིག།
སྐད་ཡིག་གི་སྲོག་རྩ་ཟིན་པའི་སྒྲོན་མེ་ཅིག།
ན་ཟུག་གི་ཡོ་ལང་ཁྲོད་ནས་ཨ་ཕོ་ཞིག།
བདེན་དོན་གྱི་གནས་ལུགས་ཕྱུག་པའི་སྐྱེས་བུ་ཞིག།
མུན་ནག་གི་ལོ་ཟླའི་གསེབ་ནས་འོད་ཐིག་ཅིག།
རྙོག་འཛིང་གི་དུས་རབས་ཁྲོད་ནས་དཔའ་རྒོད་ཅིག།
སྒང་དྲུག་གི་སྐྱོ་གར་ཁྲོད་ནས་རྟོག་སད་ཅིག།
སྙན་ངག་གི་ལང་ཚོའི་ཁྲོད་ནས་ན་སོན་ཞིག།
རྒྱལ་ཕམ་གྱི་དབྱེ་འབྱེད་རྩོད་པའི་ལག་དམར་ཞིག།
མིག་ཟུང་གིས་གངས་རི་འཚོལ་པའི་སྙིང་ནོར་ཅིག།
སྣེ་མང་གི་དུས་རབས་དབལ་ནས་རྡོ་རིང་ཞིག།
སྤྱི་ཚོགས་ཀྱི་ཡོ་ལང་ཁྲོད་ནས་གསར་བརྗེ་ཞིག།
མི་རིགས་ཀྱི་གོམ་སྟབས་སྒྱུར་པའི་ལྕགས་སྨྱུག་ཞིག།
སྐུ་ངོ་ཁྱེད་བཙན་པོ་ཚང་གི་བུ་རྒྱུད་ཞིག།
དུག་ཚེར་ངས་ཁྱེད་ལ་གུས་ནའང་འདོད་དོ།།
དུག་ཚེར་ངས་ཁྱེད་ལ་འབྲི་ནའང་འདོད་དོ།།
དུག་ཚེར་ངས་ཁྱེད་ལ་བསྔགས་ནའང་འདོད་དོ།།
བཀའ་དྲིན་ཆེ་སྐུ་ངོ་ཐུབ་བསྟན་མཆོག་ལགས་སོ།།
———ཁམས་དུག་ཚེར་ནས།
བསམ་ཚུལ་འབྲི།
ས་སྐྱ་བདག་ཁྲི་རིན་པོ་ཆེའི་ལོ་གསར་འཚམས་འཕྲིན།