ས་སྐྱ་པའི་དགོན་པ་གཞན།
༢༽ལྕགས་ར་དགོན་ནི།གླིང་རྗེ་གེ་སར་རྒྱལ་པོའི་ཕུ་བོ་དཔའ་ཡ་མེད་རྒྱ་ཚ་ཞལ་དཀར་གྱི་གདན་ས་ལྕགས་ར་བསམ་འགྲུབ་རྩེ་འདི་ན་རབ་བྱུང་དང་ངཔོའི་སྔོན་ནས་རི་ཁྲོད་ལྟ་བུའི་སྒོམ་པ་མི་ལྔ་བཞུགས་པའི་དགོན་ཆུང་ཞིག་ཡོད་འདུགདེ་ཚོད་དཔག་བྱས་ཕལ་ཆེར་སློབ་དཔོན་པདྨ་འབྱུང་གནས་ཀྱི་དུས་སུ་གསང་སྔགས་རྙིང་མའི་སྒོམ་གྲྭ་ཞིག་ཡིན་པར་ངེས།གནས་འདིར་ལོ་ཆེན་བེ་རོ་ཙཱ་ནའི་དབུ་སྐྲ་ནང་རྟེན་དུ་བཞུགས་པའི་མཆོད་རྟེན་དཀར་སྡོང་མ་ཞེས་པ་བྱིན་རླབས་ཅན་ཞིག་ཡོད་པ་འདི་དེ་དུས་སུ་བཞེངས་པར་གྲགས།ཕྱིས་སུ་གསེར་ཉ་འཁྱུག་ལྡེམ་བྱེད་པ་ལྟ་བུའི་རི་རྒྱུད་འདིའི་སྒང་གི་རྩེ་མོར་ཞལ་ལུའི་དངུལ་ཆུ་ཁྲོ་རྫོང་ཆགས།དཔལ་རྡོ་རྗེ་འཇིགས་བྱེད་ཀྱི་ལྷ་ཁང་ཞིག་བཞེངས།དེའི་རྗེས་སུ་འབྲི་གུང་སྐྱོབས་པ་འཇིག་རྟེན་གསུམ་མགོན་གྱི་དབོན་པོ་དཔལ་སྤོས་བྱང་ཆུབ་གླིང་པས་འབྲི་གུང་བཀའ་བརྒྱུད་དུ་བསྒྱུར་ནས་གླིང་དཔོན་ཚང་དང་མཆོད་ཡོན་ཟུང་འབྲེལ་གྱིས་སྔོན་གྱི་རྨང་གཞིའི་ཐོག་དར་རྒྱས་སུ་བཏང་ཞིང་བླ་གྲྭ་བརྒྱ་ལྷག་བརྒལ་བ་བྱུང་།འབྲི་གུང་སྲུང་མ་ཨ་ཕྱི་མཆེད་ལྔ་ད་ལྟའང་གསོལ་མཆོད་བྱེད་སྲོལ་ཡོད།དེ་རྗེས་ས་སྐྱའི་བླ་བསྐོས་ཆེན་མོ་དྲུང་རྡོ་རྗེ་རྒྱལ་མཚན་གྱིས་ས་སྐྱར་བསྒྱུར།དྲུང་རྡོ་རྗེ་རྒྱལ་མཚན་སྐུ་ཚེ་ཧྲིལ་པོར་ལྕགས་ར་དགོན་དུ་བཞུགས་ཏེ་གཟུགས་སྐུའི་བཀོད་པ་བསྡུས་པས་སྐུ་གདུང་མཆོད་རྟེན་ཡང་འདིར་བཞུགས་སོ།།
ས་སྐྱོང་སྡེ་དགེའི་རྒྱལ་རབས་རིམ་བྱོན་གྱི་ཆོས་རྒྱལ་རྣམས་ལྕགས་ར་དགོན་བསམ་འགྲུབ་ལྷ་རྩེའི་ཕོ་བྲང་དུ་བཞུགས་ནས་དགོན་འདི་ཉིད་ཀྱི་གྲྭ་སའི་སྒྲིག་ལམ་ཀུན་སྤྱོད་དང་།སྡོམ་གསུམ་གྱི་བླང་དོར།འདུལ་ཁྲིམས་དང་མི་མཐུན་པའི་གྲས་རྣམས་དག་ཐེར་ལེགས་སྒྲིག་མཛད་པ་མ་ཟད།ད་རུང་དབྱར་དུས་ལྕང་རའི་ཕོ་བྲང་ལྷ་ཀླུའི་དགའ་ཚལ་དུ་བཞུགས་སྲོལ་ཡོད།དགོན་ཆེན་ལྷུན་གྲུབ་སྟེང་དང་།ལྕང་ར་ལྷ་ཀླུའི་དགའ་ཚལ།དབོན་སྟོད་ལྷུན་པོ་རྩེ་རྣམས་ནི་སྡེ་དགེ་རྒྱལ་པོའི་ཕོ་བྲང་གཙོ་བོ་གསུམ་ཡིན།ལྕང་ར་དང་ལྕགས་རའི་བར་ལེ་བར་གཉིས་ཙམ་གྱི་རྒྱང་ཐག་ལས་མེད་སྟབས་ལྕགས་ར་དགོན་པའི་བླ་མ་སློབ་དཔོན་རྣམས་སྡེ་དགེ་རྒྱལ་པོའི་དབུའི་མཆོད་གནས་སུ་གྱུར།ཕྱིས་སུ་དགོན་ཆེན་དགོན་པར་མ་དགོན་དང་།དེའི་བུ་དགོན་དུ་གྱུར་པའི་ལྕགས་ར་དགོན་པ་དང་རབ་བརྟན་དགོན།ཡེ་ན་དགོན་པ།སྒ་ལེན་དགོན་པ།འཁོར་མདོའི་དགོན་པ།མཎྜལ་དགོན་བཅས་དགོན་ལག་དྲུག་དེ་ལོ་ལྟར་བོད་ཟླ་༡༢ཚེས་༢༥ནས་ཚེས་༢༩བར་ལ་དྲུག་ཅུ་ཆེན་མོ་དང་།བོད་ཟླ་༡ཚེས་༢ནས་ཚེས་༡༦བར་ངོར་ལུགས་དཀྱིལ་འཁོར་བདུན་གྱི་སྒྲུབ་མཆོད་ཆེན་མོར་དགོན་ཁག་བདུན་པོ་ལྷན་ཅིག་ཏུ་འཚོགས་སྲོལ་ཡོད།དགོན་འདིའི་གྲྭ་རྩ་འབྱུང་ཁུངས་གཙོ་བོ་ནི་ལྕང་ར་ཤད་གི་སྡེ་ཚོ་མང་ཆེ་བ་དང་།འབྲི་ཆུ་ཕར་ཁའི་དཔེ་ཝར་ཤོག་ཁའི་སྡེ་ཚོ་ཁ་ཤས་བཅས་ཡིན།སྔོན་དགེ་འདུན་པ་བརྒྱ་དང་བརྒྱད་ཅུ་ལྷག་དང་ད་ལྟ་བདུན་ཅུ་ཙམ་ཡོད།གཞན་ཡང་༡༩༣༥ལོར་བྲིས་པའི་རྒྱ་ཡིག་གི་དཔྱད་ཡིག་ཞིག་ཏུ་དགོན་པ་འདི་ལ་གྲྭ་པ་སུམ་བརྒྱ་ཙམ་ཡོད་བྲིས་འདུག
༣༽རྫོང་སར་དགོན་ནི།སྤྱི་ལོ་༧༤༦ལོར་བོན་གྱི་རིག་འཛིན་ཞིག་གིས་ཐོག་མར་ཕྱག་བཏབ།དེ་སྐབས་ལྷ་ཁང་ལ་ཀ་བ་གཅིག་དང་དེར་བོན་སྟོན་གྱི་སྐུ་གཅིག་ཡོད་པས་ཇོ་བོ་ལྷ་གཅིག་ཀ་གཅིག་ཟེར།དེའི་བོན་སྟོན་གྱི་སྐུ་དེ་སྤྱི་ལོ་༡༩༥༨ལོར་དགོན་པ་མ་བརླག་བར་མ་ཉམས་པར་ཡོད།ཕྱིས་སུ་གསང་སྔགས་རྙིང་མར་གྱུར།དེ་རྗེས་ཇོ་བོ་བཀའ་གདམས་པའི་རིང་ལུགས་སུ་གྱུར།རབ་བྱུང་ལྔ་པའི་ཤིང་ཕག་ལོ་༡༢༧༥འགྲོ་མགོན་ཆོས་འཕགས་ཀྱི་ཀྱིས་དཔལ་ལྡན་ས་སྐྱ་པའི་རིང་ལུགས་སུ་བསྒྱུར།ཕྱིས་སུ་བཀའ་བབས་བདུན་ལྡན་འཇམ་དབྱངས་མཁྱེན་བརྩེ་དབང་པོས་གདན་ས་མཛད་ནས།གསུང་ངག་རིན་པོ་ཆེ་ལམ་འབྲས་བུ་དང་བཅས་པའི་བཀའ་སྲོལ་གཙོ་ཆེར་འཛིན་པའི་དཔལ་ལྡན་ས་སྐྱ་པའི་རིང་ལུགས་གཙོ་བོར་བསྐྱངས་ཐོགསྒྲུབ་བརྒྱུད་ཤིང་རྟ་བརྒྱད་ཀྱི་རིང་ལུགས་ཟབ་མོ་ཉེ་བརྒྱུད་ཀྱི་བཀའ་བབས་ཏེ།རིས་མེད་བསྟན་པའི་སྤྱི་དཔལ་དུ་གྱུར་པས།རྫོང་སར་དགོན་ནི་བོད་ཡུལ་གྲུབ་མཐའ་གཞན་པའི་དགོན་སྡེ་དུ་མ་དང་འབྲེལ་ལམ་བཟང་ཞིང་།སློབ་བརྒྱུད་ཀྱིས་འཛམ་གླིང་ཤར་ནུབ་ཀུན་ཏུ་ཁྱབ་ཡོད།ད་ལྟ་བླ་གྲྭ་ཉིས་བརྒྱ་ལྷག་ཡོད།
༤༽ལྷ་རྒྱལ་དགོན་ནི།ཆེས་སྔ་བའི་དུས་སུ་དཔལ་ཨེ་ཝཾ་པའི་ཆོས་བརྒྱུད་འཛིན་པའི་ཨ་འཛི་ཟེར་བའི་སྒར་ཞིག་གིས་ཡུལ་ཕྱོགས་འདི་ལ་བདག་སྐྱོང་གནང་བའི་སྐབས་སུ།ཆོས་སྒར་དེ་ལས་བྱུང་བའི་མཚན་ལྡན་བླ་མ་མང་པོས་བརྟེན་པའི་རི་ཁྲོད་གཙོ་བོ་ཡིད་ལྷུང་ལྷ་མཚོ་ཁ་ཡིན།རྗེས་སུ་རབ་བྱུང་བཅུ་ལྕགས་ཕོ་འབྲུག་ལོར་སྤྱི་ལོ་༡༥༨༠ཨ་འཛི་གྲྭ་ཚང་ཞེས་སྦྲ་གུར་ནང་དུ་བསྟི་གནས་བྱེད་པའི་འབྲོག་དགོན་དེ་སྔར་ལས་རྒྱ་བསྐྱེད་བཏང་།དེ་རྗེས་ངོར་ཤར་ཆེན་མི་འགྱུར་རྒྱལ་མཚན་གྱིས་པར་ཁང་ཆོས་མཛོད་ཆེན་མོའི་ནང་གི་རྒྱལ་བའི་བཀའ་འགྱུར་ཞུ་དག་གནང་།དེ་ནས་བླ་མཆན་བླ་མ་རབ་དཀར་ལྷུན་གྲུབ་ས་འཚོལ་དུ་བཏང་བས།ཡིད་ལྷུང་ཕྱོགས་ཀྱི་མི་རྒན་བཀྲ་ཤིས་ལྷ་རྒྱལ་ཞེས་པའི་མི་དེས་ས་ཕུལ་ནས་རྟེན་འབྲེལ་ཤིན་ཏུ་འགྲིགས་པས།རབ་བྱུང་བཅུ་གསུམ་པའི་མེ་མོ་ཕག་ལོ་སྤྱི་ལོ་༡༧༦༧ལྷ་རྒྱལ་སྲང་ཞེས་པ་ཕྱག་བཏབ།དཔལ་ས་སྐྱའི་ངག་དབང་ཀུན་དགའ་བློ་གྲོས་ཀྱིས་འགྲོ་མགོན་ཆོས་འཕགས་ཀྱི་དུང་དཀར་རྒྱང་གྲགས་དང་རྒྱ་གསེར་གྲོ་ལོ་མའི་བླ་བྲེ་བཅས་མཆོད་ཆས་རིགས་མང་ཙམ་གནང་སྟེ་བདེ་ཆེན་མཁའ་སྤྱོད་གླིང་སྲིད་གསུམ་དགེ་ལེགས་ཡོངས་སུ་འདུས་ཞེས་མཚན་བྱང་གནང་།སྡེ་དགེ་ཆོས་རྒྱལ་རིམ་བྱོན་སོགས་ཀྱི་མཐུན་རྐྱེན་ལ་བརྟེན་ནས་སངས་རྒྱས་ཀྱི་བསྟན་པ་གོང་དུ་སྤེལ།སྔོན་བླ་གྲྭ་ཉིས་བརྒྱ་ལྷག་དང་ད་ལྟ་བརྒྱ་དང་བཅུ་དགུ་ཙམ་ཡོད།
༥༽དྲྭ་མ་དགོན་པ་ནི།རབ་བྱུང་བཅུ་གཅིག་པའི་ནང་ལ་གྲུབ་དབང་ཀུན་དགའ་བློ་ལྡན་གྱིས་ཐོག་མར་རི་ཁྲོད་ཞིག་ཕྱག་བཏབ།དེ་རྗེས་སྡེ་དགེ་ཆོས་རྒྱལ་དང་ངག་དབང་རིན་ཆེན་མཆོད་ཡོན་ཟུང་འབྲེལ་གྱིས་སྒྲུབ་གྲྭ་བཙུགས།ཕྱིས་སུ་དུས་འགྱུར་དབང་གིས་འཇིག་སོང་བས།དཔོན་སློབ་ངག་དབང་ལེགས་གྲུབ་ཀྱིས་རབ་བྱུང་བཅུ་བཞི་པའི་ས་རྟ་ལོ་སྤྱི་ལོ་༡༨༥༨ལོར་དགོན་པ་གསར་དུ་བཏབ།དྲྭ་མ་དགོན་ཐུབ་བསྟན་མ་ཕམ་ཆོས་འཁོར་གླིང་ཞེས་མཚན་གསོལ།སྡེ་དགེ་ཆསོ་རྒྱལ་དབུ་བླ་མཛད་ནས་རྒྱུད་སྡེ་དང་སྒྲུབ་ཐབས་བཅས་ཀྱི་དབང་ཁྲིད་ལུང་བཅས་དུ་མ་གནང་།སྔོན་དགེ་འདུན་པ་དྲུག་ཅུ་ལྷག་དང་ད་ལྟ་ཉེར་ལྔ་ཙམ་ཡོད།
༦༽མཎྜལ་དགོན་ནི།སྔོན་བོན་གཡུང་དྲུང་རྫོང་ཆེན་དགོན་ཞེས་པའི་བོན་དགོན་ཞིག་གངས་ཅན་སྒང་ཞེས་ད་ལྟའི་དགོན་པ་ཆགས་གནས་ཀྱི་ཉེ་སྐོར་དུ་ཆོགས་ཡོད་པར་བཤད།རེ་ཞིག་བོན་དགོན་དེ་ཉམས་དམས་སུ་གྱུར་ཏེ་འཇིག་ཉེ་སྐབས།ངོར་ཨེ་ཝཾ་པའི་མཁན་རབས་ཉེར་བཞི་པ་མཁན་ཆེན་སངས་རྒྱས་ཕུན་ཚོགས་ཀྱིས་སྡེ་དགེ་ལྷུན་གྲུབ་སྟེང་དུ་སྙན་བརྒྱུད་ལམ་འབྲས་ཀྱི་ཆོས་འཁོར་དུ་བསྐོར་དུས།བོན་དགོན་དེའི་བླ་གྲྭ་རྣམས་ས་སྐྱའི་ཆོས་སྒོར་ཞུགས་ཏེ་རིམ་བཞིན་ས་སྐྱར་འགྱུར།དགོན་མིང་ལ་རྫོང་ཆེན་མགོ་བ་ཟེར།དེ་ནས་རབ་བྱུང་བཅོ་ལྔ་པའི་ཆུ་ལུག་ལོར་སྤྱི་ལོ་༡༨༨༣དགོན་པ་མཆོད་མེས་མཆེད་ནས་མེར་ཤོར།ཕྱིས་སུ་འཇམ་དབྱངས་མཁྱེན་བརྩེ་དབང་པོའི་ཞལ་བཀོད་ལྟར་རབ་བྱུང་བཅོ་ལྔ་པའི་མེ་ཁྱི་ལོར་སྤྱི་ལོ་༡༨༨༦དགོན་པ་མཎྜལ་ཐང་དུ་སྤོས་ནས་དཔལ་ལྡན་མཎྜལ་ཕུན་ཚོགས་དགའ་ཚལ་བཀྲ་ཤིས་ཆོས་གླིང་ཞེས་མཚན་གསོལ།སྔོན་དགེ་འདུན་པ་བརྒྱད་ཅུ་ལྷག་དང་།ད་ལྟ་ཐོ་བཙུན་བདུན་ཅུ་དོན་གཅིག་ཙམ་ཡོད།
༧༽སྒ་ལེན་དགོན་ནི།ལྷ་ལུང་དཔལ་གྱི་རྡོ་རྗེས་བོད་རྒྱལ་གླང་དར་མ་བཀྲོངས་རྗེས་མདོ་ཁམས་སུ་ཕེབས་ནས་སྤྱི་ལོ་༩༠༨ལོར་ཐོག་མར་ཕྱག་བཏབ།ཕྱིས་སུ་རབ་བྱུང་བཅུ་གཅིག་པའི་ནང་ཆོས་རྒྱལ་བསྟན་པ་ཚེ་རིང་གིས་འདུ་ཁང་ཐུབ་བསྟན་རྣམ་རྒྱལ་གླིང་གཙོས་པའི་རྟེན་དང་བརྟེན་པ་བཅས་ཆ་ཚང་བཞེངས།སྔོན་དགེ་འདུན་པ་བརྒྱ་ལྷག་དང་ད་ལྟ་བཞི་བཅུ་ཙམ་ཡོད།
༨༽འཁོར་མདོ་དགོན་ནི།སྒང་སྣེ་གདོང་ཞེས་པའི་སར་སྐྱེས་མཆོག་ནམ་མཁའི་ཆོས་རྒྱལ་གྱི་དུས་སུ་ཐོག་མར་ཕྱག་བཏབདེ་ནས་རབ་བྱུང་ལྔ་པའི་ནང་འགྲོ་མགོན་ཆོས་རྒྱལ་འཕགས་པ་རྒྱ་ནག་ཏུ་ཕེབས་སྐབས་དགོན་འདིར་བྱོན་ནས་རབ་གནས་མཛད་པ་དང་།དགོན་པའི་ཉེ་འདབས་སུ་སྐུ་འབུམ་ཅན་གྱི་མཆོད་རྟེན་ཞིག་བཞེངས་པར་སྐུ་འབུམ་མཆོད་རྟེན་ཞེས་གྲགས།སྔོན་བླ་གྲྭ་སུམ་ཅུ་སོ་ལྔ་དང་ད་ལྟ་ཐོ་བཙུན་ང་ལྔ་ཡོད།
༩༽དབོན་སྟོད་དགོན་ནི།ཆེས་སྔ་བའི་དུས་སུ་འདི་ནི་བོན་དགོན་ཞིག་ཡིན་ཞེས་བཤད།དེ་རྗེས་རྙིང་མར་གྱུར་པའི་ཁང་རྙིང་ད་ལྟའང་ཡོད།དེ་ནས་འགྲོ་མགོན་ཆོས་རྒྱལ་འགས་པ་རྒྱ་ནག་ནས་ཡར་ཕེབས་ལམ་ས་སྐྱར་ཞལ་བསྒྱུར།སྡེ་དགེ་ཆོས་རྒྱལ་བླ་ཆེན་བྱམས་པ་ཕུན་ཚོགས་ཀྱིས་སྦྱིན་བདག་གནང་ནས་གཙུག་ལག་ཁང་ཀ་བ་བརྒྱ་དང་བཅུ་དྲུག་ཅན་རྟེན་དང་བརྟེན་པ་བཅས་བཞེངས།ད་ལྟ་བླ་གྲྭ་ང་བརྒྱད་ཡོད།
༡༠༽ཡེ་ན་དགོན་ནི།ཐོག་མར་འབྲུག་པ་བཀའ་བརྒྱུད་པ་ཡིན་པའི་ས་སེར་བླ་མ་བསོད་ནམས་རྒྱལ་མཚན་གྱིས་ཕྱག་བཏབ།དེ་རྗེས་འགྲོ་མགོན་ཆོས་རྒྱལ་འཕགས་པས་ས་སྐྱར་བསྒྱུར།དེ་ནས་སྡེ་དགེ་ཆོས་རྒྱལ་རིམ་བྱོན་དང་ངོར་གྱི་མཁན་རབས་རིམ་བྱོན་མཆོད་ཡོན་ཟུང་འབྲེལ་གྱིས་བསྟན་པ་འཛིན་སྐྱོང་སྤེལ་གསུམ་མཛད།ད་ལྟ་བླ་གྲྭ་བདུན་ཅུ་ལྷག་ཡོད།
༡༡༽མཁར་མདོ་དགོན་ནི།སྔོན་གྱི་དུས་སུ་གླིང་གྲོགས་མར་ཞེས་པས་བཞེངས་པའི་མཁར་དམར་པོ་རྙིང་མའི་དགོན་པ་དེ་ཕྱིས་སུ་རབ་བྱུང་བདུན་པའི་ནང་སྡེ་དགེ་བླ་ཆེན་བྱམས་པ་ཕུན་ཚོགས་ཀྱིས་མཁར་མདོ་དབང་དུ་བསྒྱུར།དེ་ནས་ས་སྐྱ་པར་གྱུར།སྔོན་བླ་གྲྭ་ལྔ་བརྒྱའི་ནང་དགེ་སློང་ཉིས་བརྒྱ་བརྒྱད་ཅུ་ཁ་ལྷག་དང་ད་ལྟ་བརྒྱ་དང་བདུན་ཅུ་ཙམ་ཡོད།
༡༢༽དཔེ་ཝར་དགོན་ནི།རབ་བྱུང་གསུམ་པའི་ནང་དུ་འབྲི་གུང་སྐྱོབས་པ་འཇིག་རྟེན་གསུམ་མགོན་གྱི་ཞལ་སློབ་གཙོ་བོ་གདུགས་ཐོགས་བཅུ་གསུམ་གྲགས་པའི་ཡ་གྱལ་དཔལ་ལྡན་བྱང་ཆུབ་གླིང་པས་ཐོག་མར་ཕྱག་བཏབ།ཕྱིས་སུ་འབྲི་གུང་གླིང་ལོག་བྱུང་སྟེ་ས་སྐྱ་པའི་ཆོས་བརྒྱུད་འཛིན་པའི་དགོན་སྡེར་གྱུར།སྔོན་བླ་གྲྭ་བརྒྱ་ཕྲག་ལྷག་དང་ད་ལྟ་ལྔ་བཅུ་ཙམ་ཡོད།
༡༣༽ལྷ་ས་སྟེང་དགོན་ནི།རབ་བྱུང་བཅུ་གསུམ་པའི་ནང་ངག་དབང་འཇམ་མགོན་གྲུབ་པའི་དབང་ཕྱུག་གིས་ཐོག་མར་ཕྱག་བཏབ།ད་ལྟ་དགེ་འདུན་པ་ལྔ་བཅུ་ཙམ་ཡོད།
༡༤༽ས་སྐྱ་དགོན་ནི།འགྲོ་མགོན་ཆོས་རྒྱལ་འཕགས་པས་ཐོག་མར་ཕྱག་བཏབ་ད་ལྟ་དགེ་འདུན་པ་བཞི་བཅུ་ལྷག་ཡོད།
༡༥༽རབ་བརྟན་དགོན་ནི།ཐོག་མར་བོན་ལུགས་ཡིན།རྗེས་སུ་འགྲོ་མགོན་ཆོས་རྒྱལ་འཕགས་པའི་དུས་སུ་ས་སྐྱར་བསྒྱུར།
༡༦༽རྫོང་ཟླ་དགོན་ནི།རབ་བྱུང་བརྒྱད་པའི་མེ་ཕོ་ཁྱི་ལོ་སྤྱི་ལོ་༡༤༦༧ལོར་བདག་ཆེན་རྡོ་རྗེ་འཆང་བློ་གྲོས་རྒྱལ་མཚན་དགུང་ལོ་ཉེར་གསུམ་སྟེང་ཐོག་མར་ཕྱག་བཏབ།ད་ལྟ་བླ་གྲྭ་དྲུག་ཅུ་ཙམ་ཡོད།
༡༧༽འགོ་ཟི་དགོན་ནི།འགྲོ་མགོན་ཆོས་རྒྱལ་འཕགས་པས་སྤྱི་ལོ་༡༢༥༣ལོར་ཕྱབ་བཏབ།སྔོ་བླ་གྲྭ་བཞི་བརྒྱ་ལྷག་དང་ད་ལྟ་བརྒྱ་ཙམ་ཡོད།
༡༨༽སེང་འགྱིང་དགོན་ནི།མཁན་ཆེན་བོ་དྷི་ས་ཏྭའི་ཡང་སྤྲུལ་དུ་གྲགས་པའི་མཁན་དཔལ་ལྡན་ཆོས་སྐྱོང་གིས་སྤྱི་ལོ་༡༧༣༩ལོར་སེང་གེ་འགྱིང་འདྲའི་དཔུང་ཁུག་ཏུ་ཕྱག་བཏབ།སྔོན་དགེ་འདུན་པ་བརྒྱ་དང་ཉི་ཤུ་ལྷག་དང་ད་ལྟ་དྲུག་ཅུ་ཙམ་ཡོད།
༡༩༽འབར་ཆུང་དགོན་ནི།རབ་བྱུང་བཅུ་བཞི་པའི་ནང་ཤར་ཇ་མ་ཀུན་དགའ་དཔལ་ལྡན་གྱིས་ཤུ་འུར་རེ་ཞེ་ལུང་པའི་ཕུ་སྟོད་དུ་དགོན་ས་གཟིགས་ནས་འབར་རེ་བླ་མ་ཆོས་དཔལ་རྒྱ་མཚོ་དང་བླ་མ་ཚེ་བརྟན་གཉིས་ཀྱིས་སྦྱིན་བདག་མཛད་དེ་འདུ་ཁང་བཞེངས།སྔོན་བླ་གྲྭ་བདུན་ཅུ་ལྷག་དང་ད་ལྟ་བཞི་བཅུ་ཙམ་ཡོད།
༢༠༽དཔལ་རྫོང་དགོན་ནི།སྤྱི་ལོ་༡༢༢༩ལོར་རིག་འཛིན་ཆེན་མོས་ཐོག་མར་ཕྱག་བཏབ་པ་འདྲ།ཕྱིས་སུ་སྡེ་དགེ་ཆསོ་རྒྱལ་བསྟན་པ་ཚེ་རིང་གིས་རབ་བྱུང་བཅུ་གཉིས་པའི་ས་བྱི་ལོ་སྟེ་སྤྱི་ལོ་༡༧༢༩ལོར་གཙུག་ལག་གསར་དུ་མཛད།སྔོན་ཆད་བླ་གྲྭ་བརྒྱ་དང་ལྔ་བཅུ་ལྷག་དང་ད་ལྟ་བརྒྱ་དང་ཉི་ཤུ་ཙམ་ཡོད།
༢༡༽གྱ་གྱུས་དགོན་ནི།གྱ་གྱུས་མར་ཁུར་མཛོ་མོ་གནས་སུ་བླ་མ་དབུ་རྒྱ་བོས་ཕྱག་བཏབད་ལྟ་བླ་གྲྭ་བདུན་ཅུ་ཙམ་ཡོད།
༢༢༽འཛིངས་རྣམ་རྒྱལ་མགོན་ཁང་ནི།རབ་བྱུང་བཞི་པའི་ཤིང་འབྲུག་ལོར་འཇམ་དབྱངས་ས་སྐྱ་པཎྜི་ཏས་ཕྱག་བཏབ།ཕྱིས་སུ་བྱ་རྒོད་ཚང་གིས་གསེར་འཕྲུ་དང་རྒྱ་ཕིབས།རྨ་བྱ་ཆོས་འཁོར་སྤེན་རྒྱན་བཅས་བཞེངས།
༢༣༽རབ་ཆོས་དགོན་ནི།རབ་བྱུང་བཞི་པའི་ནང་འགྲོ་མགོན་ཆོས་རྒྱལ་འཕགས་པས་བསམ་གྲུབ་དགོན་དང་རབ་ཆོས་དགོན་གཉིས་ཕྱག་བཏབ།དེ་རྗེས་ས་གཡོས་འཇིག་པ་བྱུང་ནས་དགོན་པ་དེ་གཉིས་ཞིག་རལ་དུ་སོང་།རབ་བྱུང་བཅུ་གཉིས་པའི་སྨད་ཙམ་དཔལ་ས་སྐྱའི་བདག་ཆེན་དཔལ་ལྡན་ཆོས་སྐྱོང་གིས་དགོན་པ་དེ་གཉིས་གཅིག་ཏུ་བསྡེབས་ཏེ་གསར་བཞེངས་མཛད།སྔོན་ཆད་བླ་གྲྭ་སུམ་བརྒྱ་ལྔ་བཅུ་ལྷག་དང་ད་ལྟ་བརྒྱ་ཙམ་ཡོད།
༢༤༽ཁྲོམ་རྡོ་ཁོ་དགོན་ནི།རབ་བྱུང་བདུན་པའི་ནང་གྲུབ་པའི་དབང་ཕྱུག་ཐང་སྟོང་རྒྱལ་པོའི་དང་སྡེ་དགེ་རྒྱལ་པོ་བོ་ཐར་བཀྲ་ཤིས་སེང་གེ་མཆོད་ཡོན་ཟུང་འབྲེལ་གྱིས་ཐོག་མར་ཕྱག་བཏབ།སྔོན་གྲྭ་སྟོང་ལྷག་དང་ད་ལྟ་སྤྲུལ་སྐུ་གཅིག་དང་བླ་གྲྭ་བརྒྱ་དང་བཅུ་དགུ་ཙམ་ཡོད།
༢༥༽རབ་མཐོ་དགོན་ནི།རབ་བྱུང་བཞི་པའི་ཆུ་ཡོས་ལོར་སྤྱི་ལོ་༡༡༤༢འགྲོ་མགོན་ཆོས་རྒྱལ་འཕགས་པས་ཐོག་མར་ཕྱག་བཏབ།སྔོན་བླ་གྲྭ་བརྒྱ་དང་བཅུ་གསུམ་ལྷག་དང་ད་ལྟ་ལྔ་བཅུ་ང་བརྒྱད་ཡོད།
༢༦༽གླིང་ཡག་གླང་ནག་དགོན་ནི།ཐོག་མར་གྲུབ་ཆེན་ཤ་ཝ་རི་པའི་རྣམ་འཕྲུལ་ཧོར་བླ་མ་གླང་ནག་སངས་རྒྱས་རིན་ཆེན་གྱིས་གནས་ངེས་མེད་ཀྱི་སྦྲ་གུར་ལ་བརྟེན་པའི་ཆོས་སྡེ་ཞིག་དབུ་བཙུགས།ཕྱིས་སུ་རབ་བྱུང་བཅུ་གཉིས་པའི་མཇུག་ཙམ་ལ་ཤར་བ་ཀླུ་ལྡིང་མི་འགྱུར་རྒྱལ་མཚན་གདན་རབས་སོ་དྲུག་པས་རི་གསེར་ཉ་འདྲ་བའི་དབུས་སུ་ཕྱག་བཏབ།སྡེ་དགེ་ཆོས་རྒྱལ་གྱིས་གཙུག་ལག་ཁང་སོགས་བཞེངས་རྩའི་མཐུན་རྐྱེན་གནང་།སྔོན་བླ་གྲྭ་དགུ་བཅུ་ལྷག་དང་ད་ལྟ་སྤྲུལ་སྐུ་གཅིག་ཐོ་བཙུན་བརྒྱད་ཅུ་གྱ་གསུམ་ཡོད།
༢༧༽བདེ་དགོན་ནི།རབ་བྱུང་བཞི་པའི་ནང་འགྲོ་མགོན་ཆོས་རྒྱལ་འཕགས་པས་ཐོག་མར་ཕྱག་བཏབ།སྔོན་བླ་གྲྭ་ཆིག་བརྒྱ་ལྷག་དང་ད་ལྟ་བཞི་བཅུ་ཙམ་ཡོད།
༢༨༽འདན་ཤུག་ར་དགོན་ནི།རབ་བྱུང་བཞི་པའི་ནང་འགྲོ་མགོན་ཆོས་རྒྱལ་འཕགས་པས་ཐོག་མར་ཕྱག་བཏབ།ད་ལྟ་ཐོ་བཙུན་བརྒྱད་ཅུ་གྱ་ལྔ་ཡོད།
༢༩༽འབུར་ལེགས་དགོན་ནི།རབ་བྱུང་ལྔ་པའི་མེ་ཡོས་ལོ་སྟེ་སྤྱི་ལོ་༡༢༦༧ལོར་འགྲོ་མགོན་ཆོས་རྒྱལ་འཕགས་པ་དགུང་ལོ་སོ་གསུམ་ཐོག་ཕྱག་བཏབ།ད་ལྟ་བླ་གྲྭ་ཞེ་བཞི་ཡོད།
༣༠༽ཝ་ར་དགོན་ནི།སྤྱི་ལོ་༡༢༥༣ལོར་ས་སྐྱ་དཀར་པོ་རྣམ་གསུམ་དང་དམར་པོ་རྣམ་གཉིས་བཅས་ས་སྐྱ་གོང་མ་རྣམ་ལྔ་ནང་གི་འགྲོ་མགོན་ཆོས་རྒྱལ་འཕགས་པ་བློ་གྲོས་རྒྱལ་མཚན་རྒྱ་ནག་གོང་མའི་དབུ་བླར་བཀུར་ནས་ཡོན་རྒྱལ་རབས་ཀྱི་གདན་སར་བྱོན་སྐབས་སུ་ཐང་ཕུག་ཏུ་དགོན་ས་བཏབ་པ་དང་།ལྷན་དུ་དགོན་གསར་དགོན་དང་།གསེར་ལྗོངས་དགོན་པའང་ཕྱག་བཏབ་གནང་།
༣༡༽མཚོ་སྔོན་སྐྱེ་དགུ་ཁྲི་འདུ་སྐལ་བཟང་དགོན་ནི།ཐོག་མར་དབོན་དགོན་ཞིག་ཡིན་པ་འདྲ།རྗེས་སུ་ཀརྨ་བཀའ་བརྒྱུད་ཀྱི་དགོན་ཆུང་གཉིས་སུ་གྱུར།སྤྱི་ལོ༡༣༩༨ལོར་ས་སྐྱའི་བླ་ཆེན་ཤེས་རབ་རྒྱལ་མཚན་འདི་གར་ཕེབས་ནས་ཆོས་གསུངས།དེའི་སྐབས་སུ་ཡུལ་གྱི་དཔོན་པོ་དང་མཆོད་ཡོན་ཟུང་འབྲེལ་གྱིས་ས་དགོན་བཏབ།པཎ་ཆེན་ཆོས་ཀྱི་ཉི་མ་རྒྱ་ནག་གི་ས་གནས་ཁག་ཏུ་བཀའ་ཆོས་གནང་ཞིང་ཕྱིར་བོད་དུ་ཕེབས་པའི་ལམ་བར།སྤྱི་ལོ་༡༩༣༧ལོའི་ཟླ་བ་༡༢ཚེས་༡ཉིན་ལ་དགོན་འདི་ཉིད་དུ་དགོངས་པ་ཆོས་དབྱིངས་སུ་ཐིམ།
༣༢འཛིང་ཁྲ་བོ་རི་ཁྲོད།༣༣ས་དཀར་དགོན།༣༤སྟག་ཚང་དགོན།༣༥འུག་འགོ་དགོན།༣༦ཝཾ་དགོན།༣༧ཁྲི་ཚོ་དགོན།༣༨རྣམ་རྒྱལ་དགོན།༣༩ཁྱེའུ་དགོན།༤༠རྭ་ཅོ་དགོན།༤༡སྤོ་ལུ་དགོན།༤༢དམར་ཡོན་དགོན།༤༣གསེར་ལྗོངས་དགོན།༤༤དུར་མདོ་དགོན།༤༥བཀྲ་ཤིས་དགོན།༤༦མདོ་སྲིབ་མདོ་དགོན།༤༧ཤང་ཐོ་དགོན།༤༨འགིས་ཐོ་དགོན།༤༩ཛཾ་ཐོག་དགོན།༥༠དམ་ཆོས་དགོན།༥༡བཀྲ་ཚེ་དགོན་སོགས་ཡོད་དོ།།
བསམ་ཚུལ་འབྲི།
སྡེ་དགེ་རྒྱལ་པོའི་ཕྱག་ཐམ་སྡིག་ཐམ་སྐོར།