ཤྲི་ལ་ལྷུན་གྲུབ་དབང་རྒྱལ་གྱི་ལོ་རྒྱུས་མདོར་བསྡུས།
ཁོ་བོ་ལྷུན་གྲུབ་དབང་རྒྱལ་ནི།སྤྱི་ལོ་༡༩༣༩ལོར་སྡེ་དགེ་འཇོ་མདའ་རྫོང་།མཁར་སྒང་གྲོང་།ཤྲིར་ལ་ཚང་གི་ཁྱིམ་དུ་ཕ་ཆོས་མཛད་དང་མ་གསེར་སྐོང་བུ་མོ་གཉིས་ཀྱི་བུ་རུ་སྐྱེས།རང་ལོ་བརྒྱད་ནས་ཉི་ཤུ་བར་རང་ཁྱིམ་དུ་དགེ་རྒན་བསྟེན་ནས་བོད་ཡིག་འབྲི་ཀློག་དང་།བརྡ་དག་སོགས་ལ་སྦྱང་བརྩོན་བྱེད་ཁུལ་བྱས་ཤིང་།ཞོར་དུ་ཞིང་འབྲོག་གི་ལས་ཀ་ཡང་ཙག་ཙིག་བྱས།ང་ཚོའི་གྲོང་པ་ནི་ས་མ་འབྲོག་ཡིན་ཞིང་ས་ཞིང་དང་སེམས་ཅན་གཉིས་ཀ་ལ་བརྟེན་ནས་འཚོ་ཐབས་བྱེད་ཀྱི་ཡོད་ཅིང་།ཕྱུགས་རིགས་ནི་འབྲི་གཡག་མང་ཤོས་ཡིན་ལ།མཛོ་དང་མཛོ་མོ་ར་ལུག་ཀྱང་ཡོད།ས་ཞིང་ནང་དུ་ནས་དང་ཡུངས་མ་གཉིས་མ་གཏོགས་འབྲུ་རིགས་གཞན་འདེབས་ལས་མི་བྱེད།ཡུལ་ལུང་གི་ཆགས་དབྱིབས་ནི་རི་མཐོ་ལ་སྤང་ལྗོངས་ལྡན་པ།ས་ཁུལ་འགའ་རེ་ལ་ནགས་ཚལ་ཀྱང་སྟུག་པོ་ཡོད་ལ།ས་འོག་གི་གཏེར་རྫས་ཕུན་སུམ་ཚོགས་པ་ཡོད་ཅིང་རང་བྱུང་ཁམས་ཀྱི་ཐོན་རྫས་དབྱར་རྩ་དགུན་འབུ་དང་།བེ་མོགརྫ་ཡུངས།སྨན་རྫས་སོགས་མི་ཡི་རིགས་ཀྱི་དགོས་མཁོ་རིགས་འདྲ་མིན་སྣ་མང་ཡོད།གཞན་ཡང་ཤ་རྭ་དང་གླ་རྩི་དོམ་མཁྲིས་སོགས་ཀྱང་ཡོད།དབྱར་ཁའི་དུས་སུ་རྩི་ཐོག་སྣ་མང་དང་།ཤུག་པ་སུ་རུ་དཀར་ནག འབོ་ལོ།སྟག་མ།གྲོ་ག།ཉག་རིག གླང་མ་སོགས་ཤིང་རིགས་སྣ་མང་ཡོད་ལ།ཤིང་རིགས་སོ་སོའི་ཁྱད་ཆོས་ལྟར་འདབ་མ་རྒྱས་ཤིང་བཀྲག་མདངས་འཕེལ་བའི་མཛེས་སྡུག་ལྡན་པའི་ཡུལ་ལྗོངས་ཁོར་ཡུག་ལ་ཡུལ་འབྲེལ་གྱི་ཚུལ་དུ་ཆགས་ཡོད།ས་ཁུལ་དེ་དག་ལ་གནས་པའི་རི་དྭགས་ཤ་བ་དང་།གླ་བ།རྒོ་བ།གཅན་གཟན་གཟིག་དང་།སྤྱང་།དྲེད།ཝ།གཡི།བྱ་རིགས་སྣ་མང་དང་།ཆུ་ནང་ཉ་སྲམ་བཅས་མང་པོ་འཚོ་ཞིང་གནས།རྒྱ་དམར་བོད་ལ་མ་འོངས་ཡར་སྔོན་དུ་དེ་དག་ཐམས་ཅད་འཚེ་མེད་་ཞི་བདེའི་ངང་དུ་གནས་ཡོད།གཞན་ཡང་རྩྭ་ཆུ་འཛོམས་ཤིང་ཕྱུགས་རིགས་དཀར་ནག་ཚོ་སྐྱེ་སྟོབས་ཆེ་ལ།ཤ་ཤེད་ཀྱང་ཧ་ཅང་བཟང་པོ་ཡོད།ཡུལ་ལུང་ལ་ཤ་མར་ཧ་ཅང་འབེལ་པོ་ཡོད་པས་མང་ཆེ་བ་ཤ་མར་ཟ་སྤྱོད་བྱེད་པའི་གོམས་གཤིས་ཤུགས་ཆེར་དར་ཡོད་པ་རེད།
རང་ཉིད་གནས་པའི་ཉག་གཤིས་རྫོང་སྒོའི་ཁོངས་སུ།ཕར་ལུང་ཤོག་ཁག་ལྔ་དང་།ཚུར་ལུང་ཤོག་ཁག་དྲུག་ཁྱོན་བསྡོམས་ཤོག་ཁག་བཅུ་གཅིག་ཡོད།ཕར་ལུང་ཤོག་ཁག་དྲུག་ལས་ཤོག་ཁག་བཞི་ཡུལ་མ་འབྲོག་ཡིན་པས་ནས་དང་ཡུང་མ་འདེབས་ལས་བྱེད།ཤོག་ཁག་གཉིས་ནི་འབྲོག་རྐྱང་ཡིན།རང་ཉིད་ཀྱི་ཁྱིམ་ཚང་ལ་ཆ་མཚོན་ན་ལྷོ་སྨད་ཤོག་ཁག་གཅིག་གི་འགོ་དཔོན་ཡིན་ལ།དཔལ་འབྱོར་སོགས་གང་ཅིའི་ཐད་ལྷོ་སྨད་ཤོག་ཁག་གཅིག་ནས་ཨང་དང་པོ་ཡིན།ཉག་གཤིས་རྫོང་དཔོན་སྡེ་དགེའི་མདུན་སྐོར་གང་རུང་ཞིག་གིས་གནང་གི་ཡོད་པར།ངའི་ཕ་ཁུ་གཉིས་ནི་རྫོང་དཔོན་གྱི་ལས་རོགས་ཨང་དང་པོའི་ཡིད་ཆེས་སླེབས་པའི་གྲས་ཡིན་ལ།སྔོན་ཆད་ཆིང་སྲིད་གཞུང་གི་ཨ་བན་བོད་སར་འོང་ནས་གཏོར་བཤིག་མ་ཐེབས་གོང་ང་ཚོའི་ས་གནས་སུ་ཡོད་པའི་ཉག་གཤིས་མཁར་སྒང་ཕོ་བྲང་དེ་ཡང་ཉག་གཤིས་རྫོང་དཔོན་བཞུགས་ཁང་དང་།བོད་གཞུང་གི་སྐུ་ངོ་དང་བོད་ཀྱི་མཐའ་སྲུང་དམག་རྣམས་ཡར་མར་ཕེབས་སྐབས་ཕེབས་བསུ་སྣེ་ལེན་ཟབ་རྒྱས་ཞུ་སའི་སྐད་གྲགས་ལྡན་པའི་ཕོ་བྲང་ཞིག་ཡིན།བོད་གཞུང་མདོ་སྤྱི་དང་།སྡེ་སྤྱི་སོགས་ལ་ཁྲལ་རིགས་འཇལ་འབུལ་ཞུ་དགོས་ཀྱི་ཡོད་ན་ཡང་།ཡུལ་མི་ཚང་མར་སོ་སོའི་ཆ་རྐྱེན་ལ་དཔག་པའི་ཞི་བདེའི་འཚོ་བ་ལོངས་སུ་སྤྱོད་རྒྱུའི་རང་དབང་གི་གོ་སྐབས་བཟང་པོ་ཡོད་ལ།འབྱོར་མེད་དབུལ་པོ་ཞིག་ཡིན་ཀྱང་སོ་སོས་སློང་མོ་དང་གླ་པ་ཚོང་སོགས་འགྲོ་སྡོད་གང་དུ་བྱས་ཀྱང་རང་དབང་ཞི་བདེའི་འཚོ་བ་སྤྱོད་ཆོག་པའི་གོ་སྐབས་ཀྱང་ཡོད།མ་ཚད་ནང་པ་སངས་རྒྱས་པའི་ཆོས་ལུགས་ལ་དད་འདུན་ཧ་ཅང་ཆེ་བའི་ཡུལ་ལུང་ཞིག་ཀྱང་ཡིན་པས་གཞན་ལ་མི་འཚེ་བའི་སྟེང་དུ་གཞན་ཕན་གྱི་ལྷག་བསམ་ཤིན་ཏུ་ཆེ་བའི་ཡུལ་ཞིག་ཀྱང་ཡིན།
༡༩༥༦དང་༡༩༥༩ལོར་རྒྱ་དམར་གྱིས་དྲག་པོས་བཙན་གནོན་བྱས་པ་ལ།བོད་ཁྱོན་ཡོངས་ནས་རྒྱལ་སྲུང་དགྲ་རྒོལ་གྱི་དམག་འཐབ་བྱེད་སྐབས།རང་ཡུལ་སྡེ་དགེའི་དམག་འཐབ་དཔུང་ཁག་སྒྲིག་འཛུགས་དང་།ཕ་དམ་པ་ཆོས་མཛད་ངེད་གཉིས་ཀ་དམག་འཐབ་སྒྲིག་འཛུགས་ནང་དངོས་སུ་ཞུགས་ཤིང་།དྲག་པོའི་འཐབ་འཁྲུག་ཐེངས་མང་བརྒྱབ་མྱོང་བར་མ་ཟད།བོད་མི་རིགས་ཀྱི་རྩ་དོན་དང་ཆོས་དང་རིག་གཞུང་བཅས་སྲུང་སྐྱོབ་བྱེད་པའི་དོན་དུ་རང་སྲོག་ཕངས་མེད་ཀྱིས་དམིགས་བསལ་བྱས་རྗེས་བཞག་མྱོང་བ་ཞིག་ཀྱང་ཡིན།དེར་བརྟེན་ངེད་ཕ་བུ་གཉིས་༡༩༥༩ལོའི་ཟླ་བ་བརྒྱད་པའི་ནང་བྲག་གཡབ་གསེར་གཞུང་ཟེར་བའི་ས་གནས་སུ་ནུབ་གཅིག་དམག་སྒར་བརྒྱབ་བསྡད་པའི་སྟེང་།ཕྱི་ཉིན་ནམ་ལངས་པ་དང་མཉམ་དུ་རྒྱ་དམག་གིས་བསྐོར་ཚར་འདུག་པས།ཉིན་དེར་དམག་འཐབ་ཐེངས་བདུན་ཙམ་བརྒྱབ་ཀྱང་མཐར་རྒྱ་དམར་གྱི་དཔུང་སྡེས་ཕྱི་ནང་རིམ་པ་མང་པོ་བསྐོར་བའི་ནང་ཚུད་ནས་ང་ཚོའི་ཕྱོགས་ནས་མི་གྲངས་བཅུ་ཙམ་བསད་རྨས་བྱས་པ་དང་།རྨས་མ་ཚོའི་རེ་བ་དང་སྲོག་ཉེན་ལ་གཞིགས་པའི་བྱེད་ཐབས་བྲལ་ཞིང་ཉི་མ་ནུབ་རིར་བཞུད་ལ་ཉེ་བའི་སྐབས་སུ་བྲག་གཡབ་ས་ཆ་རྒྱ་འགའ་དགོན་ཟེར་ས་དེ་ནས་ངེད་ཕ་བུ་གཉིས་འཛིན་བཟུང་བྱས་ཤིང་བཙོན་དུ་བཅུགཕ་ཡུལ་ནས་ཁྱིམ་ཚང་གི་ས་ཞིང་ཁང་པ་རྟ་ནོར་དཔལ་འབྱོར་ཚང་མ་གཙང་དག་འཕྲོག་ལེན་བྱས་ནས།ང་ཚོའི་ཤྲིར་ལ་ཚང་གི་ཁང་པ་མ་ཁང་དང་སྒོ་ར་ཧ་ཅང་ཆེན་པོ་ཡིན་སྟབས་རྒྱ་དམར་གྱིས་ཆུས་ཁང་བྱས།སྨག་མུན་འཐིབས་པའི་ཁང་རྙིང་ཐབས་ཆག་ཆུང་ངུ་ཞིག་ནང་ངའི་ཁྱིམ་མི་རྣམས་བཙན་ཤེད་ཀྱིས་བཀར།ངའི་ཁུ་བོ་བསོད་ནམས་དབང་གྲགས་༡༩༥༩ལོའི་བོད་ཟླ་གཉིས་པའི་ནང་འཇོ་མདའ་རྫོང་བཙོན་ཁང་ནང་བཟུང་ནས་བཅུགངེད་ཕ་བུ་གསུམ་དང་།ངའི་མ་རྒན།ངའི་སྤུན་མཆེད།ངའི་བཟའ་ཟླ་བཅས་ནང་མི་བཅུ་གསུམ་ཡོད་པ་ཚང་མར་རྒྱ་དམར་གྱིས་མནར་གཅོད་སྡུག་སྦྱོང་ཚབ་ཆེན་བཏང་བ་མྱོང་བཞིན་པ་ལས།རྒན་འཁོག་ཨ་འུ་གཉིས་ཡོད་པ་ནི་སེམས་ཀྱི་སྡུག་བསྔལ་རི་རབ་ཙམ་འཁུར་བཞིན་ལྟོག་ཤི་ཐེབས།ངའི་ཨ་མ་ཡང་སྤོས་ཤེལ་དང་གཟི་སྐེ་སོགས་སྦས་སྐུང་བྱས་ཡོད་ཟེར་ནས་ཁུངས་མེད་རྡུང་རྡེག་སྣ་ཚོགས་བཏང་མཐར་སེམས་ཕམ་ཆེན་པོའི་སྒོ་ནས་གྲོངས།ངའི་བཟའ་ཟླ་ལ་རྒྱ་དམར་གྱི་ལས་བྱེད་ཚོས་གཡོག་མོ་བྲན་བཀོལ་དང་བཙན་གཡེང་བྱས་ཕྲུ་གུ་བཟོས།འཇིག་རྟེན་མི་ཡུལ་དུ་སྡོད་ཐབས་བྲལ་ཞིང་སེམས་སྐྱོ་ཡིད་མུག་ཆེན་པོའི་སྒོ་ནས་རང་སྐེ་རང་གིས་བསྡམས་ནས་མ་བུ་གཉིས་ཀ་མཉམ་མེད་བྱས།ངའི་ཁུ་བོ་བསོད་ནམས་དབང་གྲགས་ཆབ་མདོའི་བཙོན་ཁང་ནང་རྡུང་རྡེག་གིས་རྐྱེན་པས་ནད་གཞི་ཚབས་ཆེན་ཕོག་ནས་འཆི་རན་པའི་སྐབས་སུ་ནད་དགོངས་ཟེར་བའི་ཁ་དབྱངས་ལ་བསྙད་ནས་རང་ཁྱིམ་དུ་བཏང་བས་གཟུགས་ཕུང་སྐམ་སྒོག་ཡ་ང་བའི་ངང་ནས་གྲོངས།ངའི་ཕ་རྒན་ཆོས་མཛད་ཆབ་མདོ་སིལ་ཐོག་སྟེང་བཙོན་ཁང་དུ་རྒྱ་དམག་གྱིས་སྡུག་སྦྱོང་མནར་གཅོད་ཚད་ལས་འདས་པ་བཏང་བའི་འོག་སྤྱི་ལོ་༡༩༧༠དོན་གྲངས་ནང་གྲོངས་འདུགང་རང་ཡང་༡༩༥༩ནས་༡༩༨༢བར་རྒྱ་དམར་གྱི་དྲག་རྩུབ་རྡུང་རྡེག་མནར་གཅོད་རབ་དང་རིམ་པ་མྱོང་བའི་འོག་མི་ཚེ་ཕལ་ཆེར་བཙོན་ཁང་དུ་རྫོགས།ངའི་མལ་དུ་ཡོད་པའི་ཁྱིམ་ཚང་གི་དཔལ་འབྱོར་ཅི་ཡོད་༡༩༥༩དང་༡༩༦༢།༡༩༦༨ལོ་སོ་སོར་བསྡུ་ལེན་ཐེངས་གསུམ་བྱས་ནས་ཁྱིམ་ཚང་རྣམས་སྤྲང་པོ་ཡ་ང་བ་ཞིག་ཏུ་བཟོས་ནས་ནང་མི་ཕལ་ཆེར་མུ་གེའི་དཀའ་ངལ་ལ་སྦྱར།མ་ཚད་ལོག་སྤྱོད་གྲལ་རིམ་དང་དབྱེ་མཚམས་གསལ་འབྱེད་བྱེད་དགོས་ཟེར་ནས།དབྱར་ཀའི་དུས་སུ་རུ་བ་ཡན་གར་འགྲོ་དགོས་པ་དང་།མི་དམངས་དང་ཕན་ཚུན་ངོ་ཐུག་སྐབས་ཁ་གྲག་མི་ཆོག་པར་མ་ཚད་ཉེ་འབྲེལ་རྣམས་དང་འབྲེལ་བ་བྱེད་པའི་གོ་སྐབས་རྩ་བ་ནས་བཅད་འདུགརྒྱ་དམར་གྱི་ལས་བྱེད་རྣམས་ཡར་མར་འགྲོ་སྐྱོད་སྐབས་ལམ་བར་ངོ་ཐུག་བྱུང་ཚེ་མངའ་བདག་གི་མི་ངོ་རྣམས་ལམ་འོག་ཏུ་བྱོལ་ནས་གོས་ཀྱི་ཕུ་དུང་ཕྲག་ཐོག་ཏུ་ལེན་ནས་ལྕེ་མནར་ཞིང་མགོ་སྐྲ་འཁྲུགས་ནས་གུས་ཞབས་ཞུ་དགོས་པ་དང་།ཟླ་རེར་ལས་དོན་སྙན་ཞུ་ཟེར་བ་ཐེངས་གཉིས་རེ་འབུལ་དགོས་པའི་སྐབས་ཚིག་གི་འགལ་འཛོལ་ཤོར་ཚེ་ཉེས་རྡུང་མནར་གཅོད་གཏོང་རྐྱང་བྱེད་ཀྱི་ཡོད་པ་དང་།འཚོ་བ་བརྟེན་ཐབས་ནི་གཙོ་བོ་རམ་པ་དང་སྔོ་རིགས་ཁོ་ནས་སྲོག་འཚོ་དགོས་པ་ལས་འབྲུ་རིགས་ནི་ཕལ་ཆེར་མཐོང་རྒྱུ་མེད།གལ་སྲིད་རྩམ་པ་ཕྲན་ཙམ་ཡོད་ཀྱང་ཟླ་རེར་ཐེངས་གཉིས་གསུམ་ཙམ་ལས་བཟའ་རྒྱུ་རྙེད་ཀྱི་མེད་པ་རེད།རྒྱ་དམར་གྱི་ལས་བྱེད་དེ་ཚོ་གློ་བུར་དུ་ཡོང་སྟེ་ཁྱིམ་ཚང་སྔོག་གཤེར་བྱས་ནས།འབྲུ་རིགས་འབོ་རེ་ཟུང་ཡོད་ན་གང་ནས་བྱུང་ཟེར་ནས་ཚ་འདྲི་དང་རྡུང་རྡེག་བཏང་ནས་འཕྲོག་རྐྱང་བྱས་པ་མ་ཟད།ཐབ་ཀྱི་སྣོད་ཆས་ཡན་ཆད་ཁ་བཀྱགས་ནས་ག་རེ་བཙོ་སྐོལ་བྱས་འདུག་བལྟས་ནས་ཁྱེར་འགྲོ་ཡི་ཡོད་པ་རེད།
༡༩༨༢ལོར་རང་ཉིད་བཙོན་གྲོལ་ཐོབ་ནས་ཁྱིམ་དུ་འབྱོར་སྐབས་ཁྱིམ་མི་རྣམས་དབུལ་ཞིང་ཕོངས་པའི་སྡུག་བསྔལ་གྱི་གནས་སུ་གྱར་ནས།ཐབ་ཐོག་ཏུ་ཕན་ཐོགས་ལྡན་པའི་སྣོད་ཁ་མེད་པ་མ་ཟད་ཟ་ཆས་ཟླ་བ་གཉིས་འདང་བའི་འགན་ལེན་ཐུབ་པ་ཡང་མི་འདུག་ཅིང་།གྱོན་རྒྱུའི་གོས་དང་གདིང་རྒྱུའི་གདན་དེ་བས་ཀྱང་ཞན་ཞིང་།འོག་ཏུ་གདིང་རྒྱུ་ནི་རའི་རིལ་མ་དང་།ལོ་ཏོག་གི་སོག་མ་རེད།ཉལ་གོས་རྙིང་སོང་རེ་རེའི་འོག་བཟའ་མི་གསུམ་བཞི་ཙམ་ཉལ་དགོས་པ་ཆགས་འདུགརང་ཉིད་བཙོན་གྲོལ་ཐོབ་ནས་ཁྱིམ་དུ་ཐེངས་དང་པོ་འབྱོར་སྐབས་ཉལ་གོས་དང་གདན་སོགས་དུད་ཚང་གཞན་པ་ས་ནས་གཡར་བ་ལས་རང་ཁྱིམ་ལ་གང་ཡང་བཞག་མི་འདུགཁྱིམ་མི་ཡ་ང་བ་རྣམས་དབུལ་ཕོངས་ཀྱི་སྡུག་བསྔལ་ལས་སྐྱོབ་ཆེད་རང་ཉིད་བོད་ས་སྟོད་སྨད་གང་ས་གང་དུ་འགྲོ་སྐྱོད་བྱས་ནས་ཤིང་བཟོའི་ལག་རྩལ་དང་ཚོང་ལས་བརྟེན་ནས་ཉིན་མཚན་མེད་པར་དཀའ་ལས་བརྒྱབ་ཅིང་།གླ་ཆ་གླས་ཏེ་ཁང་ཁྱིམ་བཟོ་སྐྲུན་དང་འཚོ་བ་ཡར་རྒྱས་བཏང་པས་ཁྱིམ་མི་རྣམས་འཚོ་སྡོད་ཀྱི་དཀའ་ངལ་ལས་སེལ་ཐུབ་ཙམ་བྱུང་སོང་།
ཡིན་ན་ཡང་།༡༩༥༩ནས་བཟུང་རང་ཉིད་གང་དུ་གནས་ཀྱང་བོད་མི་རིགས་ཀྱི་རྩ་དོན་ལ་རེ་བ་ཆེ་ཞིང་།རང་ཉིད་ལ་ཡིད་མུག་སེལ་བའི་བསམ་བློའི་ནུས་ཤུགས་ཤིག་དང་།སྤྱིར་རྒྱ་དམར་གྱིས་བོད་བསྟན་སྲིད་དང་མི་རིགས་རིག་གཞུང་རིག་དངོས་དང་བཅས་པར་འདི་འདྲའི་ཚབས་ཆེན་གཏོར་བཤིག་གོད་ཆག་བཟོས་པ་དང་།རྒྱལ་ཁབ་དང་མི་རིགས་ཀྱི་དོན་དུ་ངའི་འཐབ་གྲོགས་དཔའ་བོ་སྟོང་ཕྲག་མང་པོ་ཚེ་སྲོག་བཅད་ཡོད་པ་དང་།བྱེ་བྲག་ཏུ་ང་ཚོས་མི་རབས་ནས་གསོག་འཇོག་བྱས་པའི་རིན་ཐང་བྲལ་བའི་སྐུ་གསུང་ཐུགས་རྟེན་སོགས་རྒྱུ་ནོར་ཕོན་ཆེན་བཙན་འཕྲོག་བྱས་པ་མ་ཚད།ནང་མི་ཚང་མར་རྒྱ་དམར་གྱིས་བཙན་གནོན་མནར་གཅོད་གཏོང་བཞིན་འོག་ནང་མི་བདུན་པོ་ཡིད་སྐྱོ་སེམས་ཕམ་ཆེན་པོའི་སྒོ་ནས་ཚེ་སྲོག་ཕྲོགས་པ་འདི་ནི་མི་རབས་ནས་མི་རབས་སོང་ཡང་བརྗེད་མི་ཐུབ་པ་ཞིག་གྱུར་ཡོད།
དེར་བརྟེན་ངའི་མི་ཚེ་ལྷག་མ་དེ་ཡང་བོད་མི་རིགས་ཀྱི་དགྲ་བོ་རྒྱ་དམར་ལ་འཐབ་རྩོད་དང་ཁ་གཏད་གཅོག་རྒྱུའི་ཆེད་དུ་རང་ས་བཞག་ནས་ཁྱིམ་མཚེས་རྒྱལ་ཁབ་ལ་སྐྱབས་བཅོལ་ལ་འོང་བ་ཡིན།ངོས་རང་ཇི་ལྟར་ཡུན་རིང་བཙོན་འོག་ཏུ་བསྡད་ཀྱང་བློ་སྟོབས་འཕེལ་བའི་བསམ་བློའི་གཞི་རྩ་ཞིག་ཡལ་ཏུ་མེད་པ་བརྟན་པོར་གནས་ཡོད་པ་ནི་༧གོང་ས་མཆོག་ཉིད་ཀྱིས་བོད་ཀྱི་བསྟན་སྲིད་མི་རིགས་རིག་གཞུང་དང་བཅས་པར་ཐུགས་ཁུར་བླ་མེད་ཆེ་བཞེས་མཛད་ཅིང་ཁོང་གི་དངོས་ཡོད་བདེན་པའི་འོད་ཟེར་འཛམ་གླིང་ཡོངས་སུ་འཕྲོ་བཞིན་ཡོད་པ་བཅས་ཀྱིས་ངོས་རང་སེམས་ཤུགས་ཇེ་ཆེར་དང་རེ་བ་ཇེ་ཆེར་དུ་ཕྱིན་སོང་།
དེར་བརྟེན་སྤྱི་ལོ་༡༩༩༣ལ་ངའི་ཁྱིམ་པ་རྣམས་སྤྱིར་བཏང་གི་འཚོ་བ་སྤྱོད་རྒྱུའི་གནས་ཐབས་ཐོན་ཙམ་བྱུང་དུས།གུས་པས་བོད་མི་དམངས་ཀྱི་ད་ལྟའི་ལས་དབང་གི་ཀྱོག་མཚམས་སུ་མི་རིགས་ཤིག་གིས་མི་རིགས་ཤིག་བཙན་འཛུལ་དང་བཙན་གནོན་གྱི་བདེ་སྡུག་བྱུང་རིམ་གྱི་ཚིག་ཐོ་ཞིག་མ་འོངས་པའི་གངས་ཅན་གྱི་བུ་ཕྲུག་རྣམས་ལ་འཇོག་ཆེད་དང་།དེ་བཞིན་མ་འོངས་པའི་བོད་མི་རིགས་འདི་གནས་ཐབས་ཀྱི་བསམ་ཚུལ་རེ་ཞུ་རྒྱུ་དང་།༧གོང་ས་མཆོག་གསེར་ཞལ་མཇལ་བའི་ཆེད་དུ་ཐེངས་དང་པོ་རྒྱ་གར་ལ་འོང་བ་ཡིན།སྔར་བཙོན་ཁང་ནང་ལ་ཡོད་སྐབས་ཀྱང་༧གོང་ས་མཆོག་ཉིད་མཇལ་ཁ་ཞུ་ནས་བདེ་སྡུག་ཞུ་རྒྱུ་དང་།བོད་བསྟན་སྲིད་ལ་རྒྱ་མཚོར་ཆུ་ཐིག་ཙམ་གྱིས་ལེགས་སྐྱེས་འབུལ་ཐུབ་པའི་རེེ་བ་དང་སྨོན་ལམ་ཁོ་ན་བརྒྱབ་ནས་བསྡད་པ་ཡིན།དེ་ནས་སྤྱི་ལོ་༡༩༩༣ལོར་ཐེངས་དང་པོར་འོང་སྐབས་དངངས་སྐྲག་ཤིན་ཏུ་ཆེ་བའི་འགྲམ་གྱི་འགག་སྒོ་རིམ་མང་དེ་དག་བརྒྱུད་སྐབས་དཀའ་སྡུག་མང་པོ་འཕྲད་ཀྱང་ཤིན་ཏུ་ཉེན་ཁ་ཆེ་བ་ཞིག་ལ།བལ་པོའི་རྦ་ར་སྦིས་སི་མར་ནང་ནས་ཆུ་བོ་ཆེན་པོ་ཞིག་བརྒལ་སྐབས་ཁོ་བོ་ཆུས་ལེ་དབར་གཅིག་ལྷག་ཙམ་ཁྱེར་སོང་།རོགས་པ་རྣམས་ཀྱིས་པ་ལགས་ཆུས་ཁྱེར་སོང་ཟེར་འབོད་སྐད་བརྒྱབ་པ་ལས་གཞན་བྱ་ཐབས་གང་ཡང་མི་འདུག།ཁོ་ཚོའི་འབོད་སྐད་དེ་ངའི་རྣ་བར་ལྷང་ལྷང་ཐོས་བཞིན་ངའི་སེམས་སུ་༧སྐྱབས་མགོན་རིན་པོ་ཆེ་ཁྲ་ལྷམ་མེར་བསྒོམས་ཤིང་དཀོན་མཆོག་གསུམ་ལ་སྐྱབས་བཅོལ་ཡིད་ནས་ཞུས་པས་ཆུ་དཀྱིལ་ཕ་བོང་ཞིག་ཐུག་འདུག་པ་དེར་རྡོ་བྲེག་ཆེན་པོ་ཞིག་བཞུས་པར་བརྟེན་ཁོ་བོ་གན་རྐྱལ་ནས་ཁ་སྦུབ་བྱེད་ཐུབ་པ་བྱུང་།ངའི་ལྷམ་དང་སྨད་འདུང་བཅས་སྐེ་རུ་བཏགས་ཡོད་པ་དེ་ཆུས་འཁྱེར་མི་འདུག་ལ།ལག་གཡས་པའི་ནང་གློག་མེ་ཞིག་བཟུང་ཡོད་པ་དེའང་ལག་པས་ཤོར་མི་འདུགགློག་མེ་དེས་ཆུས་ཡོག་ནས་ཆུ་ཕར་ཀར་སླེབས་ཐུབ་པ་བྱུང་།ལམ་འཁྲིད་པ་ཚེ་རིང་གི་དངུལ་དང་སྤ་སེ་སོགས་བལ་སྒོར་ཁྲི་གསུམ་ཙམ་གྱི་རྒྱུ་དངོས་སྐེ་ནས་ལྷུང་ཞིང་ཆུས་འཁུར་ཤོར་སོང་།དེ་ནས་བལ་ཡུལ་སྣེ་ལེན་ཁང་བརྒྱུད་རྡ་སར་བཞུགས་སྒར་དུ་འབྱོར་ཞིང་།གོང་ས་མཆོག་ཉིད་སྤྱི་མཇལ་དང་སྒེར་མཇལ་དམིགས་བསལ་གྱིས་ཐོབ་པས་ངའི་སྙིང་དབུས་སུ་བཅངས་པའི་རེ་བ་དང་པོ་དེ་འགྲུབ་པས་སླར་བོད་དུ་ཕྱིར་ལོག་བྱས།དེ་ནས་ངོས་རང་༧གོང་ས་མཆོག་མཇལ་བཅར་ཞུས་ཏེ་སླར་ཐེངས་གསུམ་པ་བོད་དུ་སླེབས་པའི་སྐབས་སུ་དེ་སྔོན་བཙན་བྱོལ་གཞུང་དང་༧གོང་ས་མཆོག་གི་དགོངས་གཞི་རྣམས་བོད་མི་དམངས་ལ་གསལ་བཤད་བྱས་པའི་གནས་ཚུལ་རྣམས་རིམ་པས་རྒྱ་ཁྱབ་ཏུ་སོང་ནས་རྒྱ་མིའི་ལས་བྱེད་པས་ཤེས་པས་མཐར་རྒྱ་དམར་གྱིས་སྡང་ཟུག་དང་མིང་འདོགས་ལྟར་སྲུང་བཅས་ཀྱི་འོག་རི་དྭགས་རྨས་མ་ལྟ་བུར་གྱུར་ནས་རང་ཉིད་ཀྱི་སྙིང་ལས་གཅེས་པའི་བཟའ་ཟླ་དང་སྤུན་མཆེད་བུ་ཕྲུག་ཚོ་བཞག་སྟེ་དིང་རི་རྫོང་ནས་བལ་བོད་ས་མཚམས་རོང་ཤར་རི་རྒྱུད་བརྒལ་ནས་ཉིན་གྲངས་ཉི་ཤུ་རྩ་བཞི་རིང་རྐང་བགྲོད་ཁོ་ནས་དཀའ་སྡུག་ཆེན་པོ་མྱོང་བཞིན་ཐེངས་བཞི་པ་བལ་ཡུལ་སྣེ་ལེན་ཁང་དུ་འབྱོར་བ་དང་།དེ་ནས་བཞུགས་སྒར་རྡ་སར་འབྱོར་ཐུབ་པ་བྱུང་།རང་ཉིད་ཀྱི་མི་ཚེའི་ལྷག་མའི་རིང་༧གོང་ས་མཆོག་ཉིད་ཀྱི་སྐྱབས་འོག་ཏུ་འདི་ཕྱི་གཉིས་ཀར་སྐལ་བཟང་དགེ་བའི་གོ་སྐབས་ཐོབ་པ་ཞིག་ཡིན་སྙམ་པའི་སྤོབས་པ་དང་ཡིད་ཆེས་གཙང་མ་ཞུ་བཞིན་ཡོད།
རང་ཉིད་ལ་བུ་ཕྲུག་དགུ་ཡོད་པ་ལས་བུ་ཕྲུག་གསུམ་༧གོང་ས་མཆོག་གི་བོད་བསྟན་སྲིད་གཉིས་ཀྱི་དགེ་བའི་འོད་ཟེར་འབུམ་ཕྲག་འཕྲོ་བའི་ཁྱབ་འོག་ཏུ་བོད་མི་རིགས་ཀྱི་བདེན་པའི་འཐབ་རྩོད་ནང་ལེགས་སྐྱེས་ཕྲན་ཚེགས་འབུལ་ཐུབ་པའི་མི་རབས་རྗེས་མ་ཞིག་འཚར་ལོངས་ཡོང་ཐུབ་པའི་རེ་བ་ཆེན་པོ་ཡོད་ཕྱིར་བུ་ཕྲུག་གསུམ་རྒྱ་གར་བོད་གཞུང་གི་སློབ་གྲྭ་ནང་སླེབས་ཐབས་ཀྱི་འབད་བརྩོན་ཆེན་པོ་བྱས་པས་ད་ལྟ་མ་སུ་རི་སློབ་གྲྭ་ལ་སློབ་སྦྱོང་བྱེད་བཞིན་ཡོད།
རང་ཉིད་གསོན་པོ་ལྷག་པ་འདིའང་ཤི་གསོན་ཀུན་གྱི་ཕུག་རེ་མངོན་དུ་འགྱུར་ཆེད་ཁོང་ཚོས་བསྒྲུབ་བྱ་ལྷག་པའི་བྱ་གཞག་རྣམས་བསྒྲུབ་དགོས་པ་ཞིག་དང་།ལྷག་པར་དུ་སྡེ་དགེའི་འབངས་སྡེ་ཁག་གི་དབུ་ཁྲིད་རྣམས་དང་།འདས་པོའི་དཔའ་བོ་ཕོ་མོ་རྣམས་ཀྱིས་མི་རིགས་ལ་བཅངས་པའི་བྱས་རྗེས་མིང་མེད་དུ་མི་འགྲོ་བར་ལོ་རྒྱུས་ཀྱི་དེབ་ཐེར་ནང་ཆ་ཤས་ཤིག་འགོད་ཐུབ་ཐབས་བྱེད་རྒྱུ་དེ་ནི་རང་ཉིད་ལ་འཁྲི་བའི་འོས་འགན་ཞིག་ཞིག་ཡིན་པར་དུས་ནམ་ཡང་ཡིད་ལ་འཁོར་བཞིན་ཡོད་པ་དང་།དེ་ནི་བོད་ཀྱི་ན་གཞོན་རྣམས་དང་ཁོ་ཚོའི་ནང་མི་བུ་ཕྲུག་ཚོས་ཀྱང་ཤེས་རྟོགས་ཐུབ་པ་དགོས་རྒྱུ་དེ་ནི་གལ་ཆེའི་གནད་དོན་ཞིག་རེད་བསམ་གྱི་ཡོད།རང་རེའི་བོད་རྒྱལ་ཁབ་ཀྱི་ལོ་རྒྱུས་ནང་ཕྱི་རྒྱལ་དམར་པོས་བཙན་འཛུལ་བྱས་པའི་གོད་ཆག་བྱུང་བ་རྣམས་ནི་བོད་མི་ཡོངས་ལ་བྱུང་བ་ཞིག་དང་།བོད་མི་ཚོས་རྒྱ་དམར་གྱིས་བཙན་འཛུལ་ལ་འགོག་རྒོལ་བྱས་པའི་ལས་འགུལ་གྱི་རིམ་པ་ཐུན་མོང་དང་ཐུན་མོང་མ་ཡིན་པའི་ཇི་སྙེད་ཅིག་བྱུང་མྱོང་ཡོད་ཅིང་།རྒྱ་དམར་བཙན་འཛུལ་བར་ངོ་རྒོལ་བྱས་པའི་ལོ་རྒྱུས་ཀྱི་ཟིན་ཐོའི་ནང་རང་ཡུལ་སྡེ་དགེ་ཁོག་པའི་ནང་ལུས་སྲོག་ལོངས་སྤྱོད་དང་བཅས་པ་ཚད་མཐོའི་ཡོངས་སུ་བློས་བཏང་བའི་ཁྲག་དང་མིག་ཆུའི་ཁེངས་པའི་ལོ་རྒྱུས་དེ་དག་ང་ཚོ་གསོན་པོར་གནས་པའི་མི་རྣམས་ཀྱིས་ལོ་རྒྱུས་ཀྱི་དོན་དངོས་རྣམས་དེབ་ཐེར་ནང་འཁོད་ཐབས་བྱེད་རྒྱུ་དེ་ནི་ལོ་རྒྱུས་ཀྱི་འོས་འགན་འབའ་ཞིག་ཡིན་པར་མ་ཟད།མི་རབས་རྗེས་མ་ཚོས་ཀྱང་སྔར་ཤུལ་རྗེས་འཛིན་གྱི་བོད་རྒྱལ་ཁབ་དང་མི་རིགས་བསྟན་པ་རིག་གཞུང་བཅས་ཀྱི་ཆེད་དུ་རྒྱལ་གཅེས་ལྷག་བསམ་སྐུལ་འདེབས་ཡོང་རྒྱུ་དང་།ལྷག་པར་དུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་ཀྱང་མི་རབས་རྒན་པ་ཚོས་སྔར་མྱོང་དངོས་བྱུང་གི་སྒེར་གྱི་ལོ་རྒྱུས་རྣམས་རྫུན་ཚིག་དང་མ་འདྲེས་པར་ཇི་མ་ཇི་བཞིན་དེབ་ཐོག་ཏུ་འགོད་གལ་ཆེ་སྐོར་བཀའ་སློབ་བཀའ་དྲིན་སྤྱི་སྩལ་གནང་བར་མ་ཟད།གུས་པར་ལོ་རྒྱུས་ཡིག་ཆ་དགོས་པའི་བཀའ་ལུང་གསེར་གྱི་ཅོད་པན་དམིགས་བསལ་གནང་བ་དང་།གཞན་ཡང་གཞུང་ཞབས་དབུ་ཁྲིད་མཁས་དབང་འགའ་ཞིག་ནས་ལོ་རྒྱུས་རྩོམ་དེབ་འབྲི་བཟོ་དགོས་པའི་སྐུལ་ལྕག་དང་རྒྱབ་སྐྱོར་གནང་བ་དེ་ཚོས་རང་གི་དམིགས་ཡུལ་དང་མཐུན་པའི་སེམས་འགུལ་ཚད་མེད་ཐེབས་བཞིན།རྫུན་མ་དང་སྟོང་གཏམ་བཤད་པ་བཅས་ནི་མ་འོངས་པར་ལོ་རྒྱུས་ཀློག་པ་པོ་ཚོའི་སྔོན་རོལ་དུ་ངོ་ཚ་དང་ཞེ་འཁྲེལ་འཇོག་ཡུལ་ཞིག་ཏུ་ཆགས་རྒྱུ་ནི་སྨོས་མེད་ཡིན་པར་ཤེས་རྟོགས་ཟབ་མོའི་ཐོགརང་ཉིད་ཀྱིས་དངོས་སུ་མཐོང་ཆོས་མྱོང་གྱུར་ཡོད་པ་རྣམས་ཁུངས་ལྡན་ཡིད་ཆེས་འཕེར་ངེས་ཀྱི་གང་དྲན་གང་ཤེས་ཀྱིས་ཟིན་བྲིས་ཕྲན་ཚེགས་ཤིག་ལོ་ཤས་སྔོན་ནས་ཤོག་ཐོག་འགོད་ཐུབ་པ་བྱུང་ཡང་།ང་ལ་སྐྱེས་སྦྱང་གི་ཡོན་ཏན་དང་།ལོ་རྒྱུས་འབྲི་རྩོམ་བྱས་པའི་ཉམས་མྱོང་གང་ཡང་མེད་པ་མ་ཟད་ཚིག་གི་སྡེབ་སྦྱོར་དང་གོ་རིམ་སྒྲིག་སྟངས་བརྡ་དག་སོགས་གང་ཡང་མ་ལྡན་པའི་ནོར་སྐྱོན་ཅན་ཞིག་ཏུ་བཏོན་ཐབས་བྲལ་བ་བརྟེན།ད་བར་ནར་འགྱངས་སུ་ལུས།ལོ་འདིའི་སྔོན་ཙམ་ནས་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་རྩོམ་སྒྲིག་པ་བྲག་གཡབ་གྲགས་པ་ལགས་དང་དེབ་འདིའི་སྐོར་གླེང་སློང་བྱུང་བ་ལ་གཞི་བྱས་ནས་ཁོང་ལ་ཚིག་གི་སྡེབ་སྦྱོར་དང་གོ་རིམ་སྒྲིག་སྦྱོར་སོགས་གང་དགོས་འགན་འཁུར་གནང་བར་ཞུས་པས།ཁོང་ནས་མ་ཟིན་ཞིབ་གཟིགས་ཀྱིས་འགོད་འོས་པའི་བརྗོད་བྱ་དོན་གྱི་ལོ་རྒྱུས་མང་པོ་ཞིག་ཆད་ལྷག་བྱུང་ཡོད་པ་རེ་རེ་བཞིན་སློབ་སྟོན་གསལ་བཤད་དང་དྲི་རྩད་བྱུང་པ་ལ།ངོས་ཀྱིས་ཀྱང་རེ་རེ་བཞིན་སློབ་སྟོན་གསལ་བཤད་དང་།ངོས་ཀྱིས་ཀྱང་རེ་རེ་བཞིན་གང་ཤེས་ཟིན་བྲིས་བཏབ་པ་དང་ངག་ཐོག་ནས་བཤད་པ་རྣམས་ཁོང་ནས་སྒྲིག་སྦྱོར་བྱས་པ་ཇེ་རྒྱས་སུ་ཕྱིན་ནས་མཐར་སུམ་བརྡབས་སུ་ཆགས་ཏེ་ལོ་རྒྱུས་ཀྱི་རི་མོའི་ཕྲེང་བར་བསྟར་བའི་དེབ་གཟུགས་ཤིག་གྲུབ་དོན་དེ་ལྟར་བྱུང་བ་གཙོར་བྱས་པ་དང་།གཞན་ཡང་ཕྲན་ནས་གངས་ཅན་བཙན་རྒོལ་རྒྱལ་སྐྱོབས་ཀྱིས་དམག་འཐབ་རིམ་པ་ཁག་དང་།རྒྱ་དམར་གྱི་བཙོན་འོག་བསྡད་པའི་གནས་ཚུལ་དང་།སྤྱི་ཚོགས་ཀྱི་གནས་སྟངས་ལོ་རྒྱུས་བཅས་དངོས་མཐོང་དངོས་མྱོང་འགའ་རེ་འབྲི་བཀོད་བྱེད་པ་ལ་རྒྱུས་སྟོན་རོགས་རམ་དང་སེམས་ཤུགས་རྒྱབ་སྐྱོར་གནང་མཁན་ཚོར་སྙིང་ཐག་པ་ནས་ཐུགས་རྗེ་ཆེ་ཞུ་གི་ཡིན།
ལྷུན་གྲུབ་དབང་རྒྱལ་གྱི་མི་ཚེའི་ལོ་རྒྱུས་ལས་ཟུར་འདོན་བྱས།
བསམ་ཚུལ་འབྲི།
སྡེ་དགེའི་རོང་འབྲོག་གཉིས་ཀྱི་ཐོན་ཁུངས་དང་ལག་རྩལ།