ལྷ་འབྲང་དགོན་གྱི་ལོ་རྒྱུས།
༄༅།།ལྷ་འབྲང་དགོན་གྱི་ལོ་རྒྱུས།
༼སྔོན་གླེང་།༽
དེ་ཡང་བསྐལ་པ་བཟང་པོ་མི་འཇེད་འཇིག་རྟེན་གྱི་ཞིང་ཁམས་འདི་ལ་སྒྲོན་མེའི་བསྐལ་པ་ཞེས་བྱ་བ་སངས་རྒྱས་སྟོང་རྩ་གཉིས་བྱོན་པའི་ནང་ནས་ད་ལྟའི་རྣམ་འདྲེན་བཞི་པ་བདག་ཅག་གི་སྟོན་པ་ཤཱཀྱ་ཐུབ་པ་ཞེས་བྱ་བ་ཐུགས་བསྐྱེད་ཕྲིན་ལས་རྨད་དུ་བྱུང་བ་རྩོད་ལྡན་ཚེ་ལོ་བརྒྱ་པའི་དུས་སྐབས་མཛད་པ་བཅུ་གཉིས་ཀྱིས་སྒོས་ནས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་ནས།རྨུ་རྒོད་བག་མེད་ཀྱི་སྐྱེ་འགྲོ་ཐམས་ཅད་རྣམ་གྲོལ་ཐར་པའི་ལམ་ལ་བཀོད་པར་མཛད་པའི་བསྟན་པ་རྣམ་དག་གནས་པའི་ཡུལ་དབུས་རྡོ་རྗེ་གདན་ལས་དཔག་ཚད་བརྒྱར་བསྒྲོད་པའི་བྱང་ཕྱོགས།ཁ་བ་ཅན་གྱི་ལྗོངས།འཕགས་མཆོག་ཕྱག་ན་པདྨོའི་གདུལ་ཞིང་དུ་གྱུར་པའི་བོད་ཡུལ་ས་ཚིགས་ཀྱི་ཡུལ་དབུས་མ་ཡིན་ཀྱང་།ཆོས་ཚིགས་ཀྱི་ཡུལ་དབུས།སྟོད་མངའ་རིས་སྐོར་གསུམ།བར་དབུས་གཙང་རུ་བཞི།སྨད་མདོ་ཁམས་སྒང་དྲུག་ཅེས་ས་དུམ་བུ་གསུམ་དུ་གནས་པའི་སྨད་མདོ་ཁམས་ཆུ་བཞི་སྒང་དྲུག་གི་ནང་ནས།འབྲི་ཆུ་གསེར་ལྡན་ཁྲ་མོ་ལྷབ་ལྷུབ་ཏུ་གཡོ་བའི་འབྲི་རྫ་ཟལ་མོ་སྒང་གི་ཆར་གཏོགས།སྡེ་དགེ་བཞི་དགེ་བཅུས་མངོན་པར་མཐོ་བའི་ཡུལ་དབུས།སྡེ་དགེ་ཆོས་རྒྱལ་ཆེན་པོའི་མངའ་འབངས།འབྲི་རོང་དབོན་སྟོད་ཕྱོགས་སུ།སྔོན་རྒྱལ་དབང་པདྨ་སཾ་བྷ་ཝས་རྫུལ་འཕྲུལ་གྱིས་ཞབས་ཀྱིས་བཅགས་ཤིང་།ཏིང་ངེ་འཛིན་གྱིས་སྒྲུབ་པའི་བྱིན་གྱིས་རླབས་པའི་ར་རུ་པདྨ་ཤེལ་ཕུག་གི་གནས།ཡར་ཀླུང་ཤེལ་བྲག་དང་ཆ་འདྲ་བ་སྐུ་གཟུགས་དང་།ཕྱག་མཚན།ཡིག་འབྲུ།ཚོགས་གཏོར།རྔ་རོལ།ཚེ་ཆུ་སོགས་ད་ལྟ་དངོས་སུ་གནས་ཡིག་ནང་འཁོད་ལྟར་ཀུན་གྱིས་མཐུན་སྣང་དུ་གྲུབ་པའི་གནས་མཆོག་དེའི་རི་ཞོལ་དུ་ལྷ་རི་བདེ་ལྡན་གཉིས་པ་ཞེས་པའི་གནས་རི་དེ་ཡི་ས་དཔྱད་དང་ལོ་རྒྱུས།
༼སའི་དཔྱད་པ་དང་གནས་ཀྱི་ཆེ་བ།༽
༡༽ཤར་ནས་བལྟས་ན་སྒམ་ཞྭའི་དབྱིབས།།རི་རྒྱལ་གླང་ཆེན་ཆུ་སྙེགས་འགྲིལ (འདྲ)།།ཞེས་དང་།ཡང་།བླ་མ་ཡི་དམ་མཁའ་འགྲོའི་ལྷ།།རྟག་པར་འབྲང་པའི་རི་རྒྱལ་ལྟ་ན་སྡུག།།རྩེ་མོ་སུམ་རྩེན་ཡུལ་ལ་སྙེགས་པ་འདྲ།།ནམ་མཁའ་ཨིནྜལ་ནི་ལའི་ལྡིང་འཁྱིལ་ལ།།ཉི་ཟླ་སྐར་མའི་ཐིག་ལེ་ཟེར་མདང་འཚེར།།གཡུ་འབྲུག་སྔོན་མོའི་གསུང་དབྱངས་འུ་རུ་རུ།།བདུད་རྩི་ཟིལ་མ་སྦྲང་ཆར་སི་ལི་ལི།།འཇའ་ཚོན་སྣ་ལྔའི་དྲ་བ་དྲ་ཕྱེད་སྦྲེལ།།གཡའ་སྤང་གསེར་བྲག་རྩྭ་ལྗོན་འབྲས་བུ་བཀྲ།།མཐར་ལྡན་གཡུ་ཆབ་སྔོན་མོའི་ཤམ་ཀྲིས་ཅན།།གཅན་གཟན་གཏུམ་པོའི་ཚོགས་ཀྱིས་ཞི་ཉམས་སྟོན།།རི་སྐྱེས་གཞོན་ནུའི་ཚོགས་ཀྱིས་རྩེད་བྲོ་འཁྲབ།།དབྱར་སྐྱེས་འབྲུ་རིགས་ཚོགས་ཀྱིས་མནྜལ་སྤུངས།།སྤང་ལྗོངས་མཛེས་པའི་མེ་ཏོག་ཁྲ་ཚོམ་བཀོད།།བྱ་རིགས་སྣ་ཚོགས་ཉམས་འགྱུར་སྐད་རིགས་སྨྲ།།འདི་འདྲའི་དབེན་གནས་ངོ་མཚར་ཁྱད་འཕགས་ཅན།།རྣལ་འབྱོར་ཉམས་རྟོགས་ཤུགས་ལ་འཆར་བའི་གནས།།བདེ་ཆེན་ཞིང་ཡང་གུད་དུ་མི་གདའ་ན།།ཞེས་སོགས་གནས་ཀྱི་ཡོན་ཏན་མང་དུ་གསུང་པ་སྒྲུབ་པར་བྱས་ན་ཉམས་རྟོགས་འཕེལ་བ།ཕྱག་སྐོར་བྱས་ན་སྒྲིབ་པ་འདག་པ་སོགས་སྡེ་དགེ་གྲུབ་ཐོབ་ཀུན་དགའ་རྒྱ་མཚོ།རྒྱལ་སྲས་བསོད་ནམས་མགོན་པོ།རྒྱལ་སྲས་དམ་ཚིག་རྡོ་རྗེ།གཏེར་ཆེན་བདུད་འདུལ་རྡོ་རྗེ།མཆོག་གྱུར་བདེ་ཆེན་གླིང་པ།བོན་པོའི་གཏེར་ཆེན་ཚེ་དབང་དྲག་པ།ཟེ་ཆེན་རབ་འབྱམས།རྫོགས་ཆེན་མི་འགྱུར་ནམ་མཁའི་རྡོ་རྗེ།འཇམ་དབྱངས་ཆོས་ཀྱི་བློ་གྲོས་རྣམས་དངོས་སུ་ཞབས་ཀྱིས་བཅགས་ཤིང་བོད་ཁམས་ས་ཡིག་མེ་བཙའ་ཞེས་གསུང་གིས་བཅད་ནས་ཞལ་གྱིས་བཞེས་སོ།།
༼ཐོག་མ་ཕྱག་བཏབ་ཚུལ་དང་ཆོས་བརྒྱུད་གང་ཞིག་ཡིན་མིན།༽
༢༽དགོན་པ་ཕྱག་བཏབ་པ་དང་དུས་ཚོད་ནམ་ཙམ་དར་བ།ཆོས་བརྒྱུད་གང་ཞིག་ཡིན་མིན།
ལྷ་འབྲང་དགོན་འདིར་རིག་འཛིན་འཇའ་ཚོན་སྙིང་པོའི་དངོས་སློབ་འཇང་བན་དཀོན་མཆོག་བསྟན་འཛིན་ལ་རྡོ་རྗེའི་ལུང་གིས་བསྟན་ནས།མདོ་སྨད་ཆུ་བོ་གསེར་ལྡན་འབབ་པའི་འགྲམ།རི་གླང་ཆེན་ཆུ་སྙེགས་འདྲ་བ།ལྷ་འབྲང་ཞེས་བྱ་བ་ཡོད་པ་དེ་ན་གཙུག་ལུག་ཁང་དང་།དགེ་འདུན་གྱི་སྡེ་ཚུགས་ན།མདོ་ཁམས་སའི་མེ་བཙའ་གསོ་བ་དང་།བོད་ཁམས་བསྟན་པ་སྤྱིར་དང་།ཁྱད་པར་ས་སྐྱོང་རིམ་བྱོན་གྱི་བསྟན་སྲིད་གོང་འཕེལ་དང་།ལྷ་སྡེ་མངའ་འབངས་ཀུན་ལ་བདེ་སྐྱིད་འབྱུང་ཞིང་།མི་ཉམས་པ་ཡུན་དུ་གནས་པའི་རྟེན་འབྲེལ་ཡོད་པས།དེ་ཉིད་བསྐྲུན་བཞེངས་བགྱིས་པར་གཏེར་ཆེན་ཁོང་ཉིད་དངོས་སྐྱོད་དགོས་རྒྱུ་ཡིན་ནའང་།ན་སོ་རྒས་པ་སོགས་ཀྱིས་སྐབས་སུ་མ་བབས་པས།ཁྱོད་སོང་ལ།དེར་སྒྲུབ་སྡེ་ཚུགས་ངེས་དགོས་པའི་བཀའ་བསྩལ་ནས།འཇའ་ཚོན་ཉིད་ཀྱི་ཟབ་ཆོས་སྐོར་དཀོན་མཆོག་སྤྱི་འདུས།མགོན་པོ་མ་ནིང་པུ་སྟི་གཉིས།གཏེར་གྱི་ཡང་ཚ་ཕྱག་རྟགས་སྤྲས་པ་དང་།ཆོས་སྐོར་ཡོངས་རྫོགས་བསྐུར་ནས་ཕེབས།སྡེ་དགེ་གྲུབ་ཐོབ་ཀུན་དགའ་རྒྱ་མཚོ་ལའང་རིག་འཛིན་ཆེན་པོ་ཉིད་ཀྱིས་ཞལ་ལུང་ནང་ལྟར།མངའ་བདག་བྱམས་པ་ཕུན་ཚོགས།གྲུབ་ཐོབ་ཀུན་དགའ་རྒྱ་མཚོ།རྒྱལ་སྲས་ཀརྨ་བསམ་འགྲུབ་མཆེད་ཞལ་གྱིས་རྗེས་སུ་བཟུང་ནས་མཐུན་རྐྱེན་སྩལ།དགེ་འདུན་སྡེ་བཙུགས།ཆོས་བརྒྱུད་སྔ་འགྱུར་གྱི་འདོན་སྲོལ་དང་།འཇའ་ཚོན་ཉིད་ཀྱི་གཏེར་བྱོན་གཙོ་བོར་བྱས་པའི་དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་།ཞེ་ཆེན།རྫོགས་ཆེན་གྱིས་ཚོགས་སྒྲིགཆོ་ག་དབྱངས་གདངས་།རོལ་མོ།གར་འཁྱམ་བཅས་ཐམས་ཅད་སྨིན་གྲོལ་གླིང་སྒྲིག་ལྟར་ད་བར་དུ་ཆད་ལྷག་འགྱུར་ལྡོག་མ་སོང་པ་སྔ་ལྟར་ཡིན།ཕྱག་འདེབས་པ་པོ་བྱ་བྲལ་བ་དཀོན་མཆོག་བསྟན་འཛིན་ཉིད་ཀུན་སྤང་བྱ་བྲལ་བའི་ཚུལ་དུ་བཞུགས་པས་དགོན་པའི་བྱ་བ་ཚགས་སུ་ཚུད་པ་མ་བྱུང་པས།དགོན་འདིར་སྡེ་དགེ་རིམ་བྱོན་གྱིས་རྗེས་སྐྱོང་གནང་ནའང་།བར་སྐབས་སུ་ཉམས་རྒུད་སོང་པའི་དགོན་སྡེའི་མིང་ཙམ་དུ་གྱུར།དགོན་པ་འདི་ཕྱག་བཏབ་པའི་དུས་ཚོད་མེ་འབྲུག་ལོ་ཕྱི་ལོ་༡༦༡༦ཡས་མས་ཙམ་ན་བཏབ།
༼དཔལ་ལྡན་སྐྱེ་ཕྲེང་ཕེབས་པ་དང་ཉམས་གསོ་ཇི་ལྟར་བྱས་པ།༽
༣༽བར་དུ་ཉམས་པ་སླར་གསོ་བགྱིས་པའི་དུས་ཚོད་དང་།སླར་གསོ་བགྱིད་པ་པོ་ནི།
ཕྱི་ལོ་༡༨༣༠ཡས་མས་སུ་བླ་མ་དཔལ་ལྡན་ཆོས་རྒྱལ་ཞེས་པ་རིམ་གཉིས་ཀྱི་བརྟན་པ་ཐོབ་པ།ལྷ་འདྲེ་མི་གསུམ་བྲན་དུ་ཁོལ་བ།ཕྲིན་ལས་ནམ་མཁའ་དང་མཉམ་པ་དེ་ནི།མ་གྲོང་ཨ་མྱེ་ཡི་རིགས་རྒྱུད་དུ་སྐུ་འཁྲུངས་ཤིང་ནར་སོན།སྡེ་དགེ་བླ་མ་དཔལ་ལྡན་ཆོས་སྐྱོང་ལ་གཙུག་ཕུད་ཕུལ།མཚན་དཔལ་ལྡན་ཆོས་རྒྱལ་དུ་གསོལ།དེ་ནས་ལྷ་ལྡན་གྲྭ་ས་ཆོས་བསྐོར་ལ་བྱོན།ངོར་མཁན་ཆེན་ཐར་རྩེ་ནམ་མཁའ་མཆི་མེད་ལས་རབ་ཏུ་བྱུང་།དེ་ནས་མར་བྱོན་ནས་དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་དུ་སྔ་འགྱུར་བའི་དབང་ཀ་རྗེས་གནང་ཆོས་ཀ་ཡོངས་སུ་རྫོགས་པ་གསན་སྦྱང་སྒོམ་བཟླས་མཐར་ཕྱིན་པར་མཛད།དགུང་ལོ་བཞི་བཅུ་ཡན་མན་ནས་དཔལ་ཡུལ་བཞུགས་ནས་བསྟན་པའི་མཛད་རྗེས་རྒྱ་ཆེར་གནང་།དེ་ནས་རང་དགོན་དུ་ཡར་ཕེབས་ནས་དགོན་པ་ཉམས་གསོ་སྡེ་དགེ་རྒྱལ་སྲས་ཁྲི་རབས་བཅུ་གཅིག་པ་སྲས་དམ་ཚིག་རྡོ་རྗེས་སྦྱིན་བདག་མཛད།གཙུག་ལག་ཁང་ཕྱི་ནང་གཉིས་ལ་ཀ་བ་ཉི་ཤུའི་ཁ་ཞག་གསར་བཞེངས་གནང་།ལྡེབས་བྲིས་ལྷ་ཁང་ནང་མ་ལ་རྙིང་མ་ས་སྐྱ་གཉིས་ཀྱི་ཡི་དམ་རྒྱུད་སྡེ་བཞི།དྭོངས་སྤྲུགས།བཀའ་དགོངས་ཕུར་གསུམ།ཆོས་སྐྱོང་མགུར་ལྷ་བརྒྱད།མ་གཟའ་དམ་གསུམ་སོགས་རིས་སུ་མ་ཆད་པའི་ལྡེབས་བྲིས་དག་གཙང་ཁུངས་ལྡན་སྤུས་ལེགས་ཐམས་ཅད་ལ་རིན་ཆེན་དང་པོ་གསེར་བྲིས།གསེར་ཐམས་ཅད་སྣང་སྲིད་སྒྱུ་མ་བརྟག་པས་ལྷ་སྲིན་སྡེ་བརྒྱད་ལ་བཀའ་བསྒོས་པས་གང་འདོད་ཕུལ་བ་དང་།གཏེར་ནས་བཞེས་པ་དང་།ལྷ་ཁང་ཕྱི་མ་ལ་སངས་རྒྱས་སྟོང་སྐུ་གསེར་བྲིས་ཅན་ཁྱད་འཕགས་བཞུགས་པ་དང་།ནང་རྟེན་ཟངས་གསེར་ལས་གྲུབ་པའི་འོད་དཔག་མེད་ཐོག་བརྩེགས་ཅན།ཚེ་དཔག་མེད་ཐོག་ཚད།པདྨ་འབྱུང་གནས་ཐོག་ཚད།སྐུ་གདུང་མཆོད་རྟེན་གཉིས་ཟངས་གསེར་ལས་གྲུབ་པ་ཐོག་ཚད།བུམ་སྒོ་བྱེ་རུ།གཟི།སྤོས་ཤེལ་གྱི་འཕྲ་ལྡན།གསེར་དངུལ་ལྗོན་སོགས་བསྲེས་པའི་ཕྲ་མེན་མཆོད་རྟེན་མཐོ་ཚད་བརྒྱ་དང་བརྒྱད།རིགས་གསུམ་སེམས་དཔའ་བཞེངས་སྐུ་མདའ་ཚད་རེ།གསེར་སྐུ་སངས་རབ་བདུན་སྐུ་མཐོ་ཚད་རེ།རྗེ་འབངས་ཉེར་ལྔ་གསེར་སྐུ་མཐོ་ཚད་རེ།གྲུབ་ཆེན་བརྒྱད་ཅུ་མཐོ་ཚད་རེ།བསམ་གླིང་རྩ་ལྷ་སུམ་བཅུ་མཐོ་ཚད་རེ།འོད་དཔག་མེད་ཟངས་གསེར་སྐུ་མཐོ་ཚད་བརྒྱ་དང་བརྒྱད།སྤྱན་རས་གཟིགས་བཅུ་གཅིག་ཞལ་ཕྱར་གྲུ་གང་།ཐུབ་པ་སྐུ་ཕྱར་གྲུབ་གང་།སློབ་དཔོན་སྐུ་ཕྱར་གྲུ་གང་།ལི་ལས་གྲུབ་པ་སྤྱན་རས་གཟིགས།ཐུབ་པ།ཚེ་དཔག་མེད།སྒྲོལ་མ་སོགས་ཆེ་ཆུང་གྲངས་མང་།གསུང་རྟེན་རྒྱལ་བཀའ་རིན་པོ་ཆེ་མཚལ་སྤར་བརྒྱ་དང་གསུམ།རྙིང་རྒྱུད་པུ་ཏི་ཉེ་ཤུ་རྩ་དྲུགམཛོད་བདུན་པོད་བཞི།སྙིང་ཐིག་པོད་ལྔ།བཀའ་བརྒྱད་པོད་བཅུ།གནམ་ཆོས་པོད་བཅུ།ལམ་འབྲས་བླ་རྒྱུད་པོད་གཉིས།བཀའ་བརྒྱུད་གསེར་ཕྲེང་།བློ་བཟང་གྲགས་པའི་རྣམ་ཐར།ཚེ་མདོ་མཚལ་སྤར་ཅན་བརྒྱ་དང་བརྒྱད།ཐར་མདོ།སྨན་མདོ།བརྒྱད་སྟོང་།གཤགས་རྒྱུད།མདོ་ཏིང་འཛིན་རྒྱལ་པོ།པདྨ་དཀར་པོ།རྟ་མགྲིན་པོད་བཅས་ཤོག་ནག་གསེར་དངུལ་བྲིས་མ།འཇའ་ཚོན་ཆོས་སྐོར་ཡོངས་རྫོགས།བསམ་གླིང་ཆོས་སྐོར་ཡོངས་རྫོགས་ལ་སྡང་གཟར།གླེགས་ཤིང་།གླེགས་ཐག་བཅས་སྤུས་ལེགས་དང་།མཆོད་ཆས།རོལ་མོ་ཧོར་བརྒྱ།བལ་རོལ་སོགས་གྲངས་མང་།བརྒྱ་གླིང་གསེར་དངུལ་བཀྲ་མ་ཆ་གཉིས།དུང་དམར་ཆ་བཞི།བདུན་ཚར་ལི་ལྗོན་དངུལ་རག་བཅས་ཆ་ཉེ་ཤུ།ཐང་སྐུ་སྤུས་ལེགས།ཐུབ་པའི་མཛད་བཅུ།མཚན་བརྒྱད།ལམ་འབྲས་བླ་བརྒྱུད།བཀའ་བརྒྱུད་གསེར་ཕྲེང་།བསམ་གླིང་ཆོས་སྐོར།འཇའ་ཚོན་ཆོས་སྐོར།བླ་མ་ཡི་དམ་ཆོས་སྲུང་སོགས་ཐང་ཀ་གྲངས་ཀ་གཅིག་ཏུ་མ་ངེས་པར་བཞུགས།དེ་ལྟར་བླ་མ་དམ་པ་དེ་ཡིས་མཁའ་མཛོད་ལ་མངའ་བརྙེས་ཤིང་།རང་སྣང་དབང་དུ་སྡུད།གཞན་སྣང་ཟིལ་གྱིས་གནོན་པའི་སྒྱུ་མ་ལྟ་བུའི་ཆོས་ལ་འཁོར་འདས་མཉམ་པར་གདལ་བའི་ངང་དུ་བཞུགས་པ་ལ་འགྲོ་དོན་ཕྲིན་ལས་ཕྱོགས་མེད་དུ་འཕེལ་ཏེ།ཡུལ་དུ་ཐན་པ་ཤར་བའི་ཚེ་དགོངས་པ་གཏད་པ་ཙམ་གྱིས་ནམ་མཁའ་གཡའ་དག་པ་ལས།འབྲུག་དང་གློ་བུར་ཆར་འབབ་པ་དང་།གུ་རུ་རིན་པོ་ཆེའི་ཞལ་མཇལ་བ།གསུང་ཐོས་པ་གྲངས་ཀ་ཅན་དང་།དངོས་ཉམས་རྨི་ལམ་སོགས་ལ་ཞིང་ཁམས་བསྒྲོད་པ།ཟངས་མདོག་དཔལ་རི་དཔའ་བོ་མཁའ་འགྲོའི་ཚོགས་གྲལ་དུ་བྱོན་པ་དང་།གོ་འཇོ་བསམ་གཏན་གླིང་པ་རྣམ་གཉིས་ལྷན་རྒྱས་ས།ཞེ་ཆེན་དཔྱལ་མོ་བྲག་མདན་པདྨ་རི་ཐང་།བྲག་ནོར་བུ་ལྷ་རྩེ་སོགས་ནས་ཆོས་གཏེར།ནོར་གཏེར།རྫས་གཏེར་དཔག་མེད་སྤྱན་དྲངས་པ་དང་།མངོན་སྤྱོད་དྲག་པོས་མཐའ་དམག་བཟློག་པ་དང་།སྐུ་དགྲ་བསྒྲལ་བ།སྡེ་དགེ་རྒྱལ་པོའི་ལྷ་སྲས་ལ་རྒྱལ་འཁྱམ་ཞུགས་ནས་ཐུགས་མཐོ་དམན་ལ་དབུ་བླ་ཁག་ལྔ་ནས་མ་ཐུལ་བ་དམ་པ་འདིས་སྨྱོ་འདྲེ་རྒྱལ་འགོང་ཐུལ་པ་དང་།རྒྱལ་སྲས་ནད་ལས་གྲོལ་བ།ལྷ་འབྲང་དབུ་རྩེ་སྒྲུབ་ཁང་དུ་ཐུགས་སྲས་སློབ་བུའི་ནང་།རང་སོ་ཟིན་པ་དང་།སྒོམ་མེད་ཟད་པ་འཁོར་བ།རྫུ་འཕྲུལ་བཀོད་པས་གནམ་གྱི་ཐོགཀླུའི་གདོན་གང་གིས་ཀྱང་མི་ཚུགས་པ།འཇའ་ལུས་འོད་སྐུར་གྲོལ་བ་མང་དུ་བྱུང་།འོད་སྣང་སྒྲུབ་པ་ལྷ་སྐུའི་གསུང་འབྱོན་པདང་།འཇའ་འོད་ཧྲི་སྒྲུབ་ཀྱིས་རིལྦུ་འཕེལ་བ།རིམས་ནད་དྲག་པོ་ལས་གྲོལ་བ་ད་ལྟའི་བར་དུ་ལྷ་འབྲང་རྫས་རྒོད་ཅེས་གྲགས་པ་མཐའ་ཡས་བྱུང་།
༼དཔལ་ལྡན་ཕྲེང་གཉིས་པ་དང་གསུམ་པའི་སྐོར།༽
དེ་རྗེས་དེ་ཡི་ཡང་སྲིད་ཚེ་དབང་དཔལ་གྱི་རྡོ་རྗེ་ནི།ཧོར་སྒྲ་རྒན་ཚང་རྩར་འཁྲུངས།དགོན་འདིར་ཁྲི་འཁོད་ནས་རྫོགས་ཆེན་མི་འགྱུར་ནམ་མཁའི་རྡོ་རྗེ་དང་།འཇམ་དབྱངས་མཁྱེན་རྩེ་དབང་པོ།ཀོང་སྤྲུལ་ཡོན་ཏན་རྒྱ་མཚོ་སོགས་མདོ་སྨད་མངའ་ཁུལ་གྱི་ཡོངས་འཛིན་དུ་མ་ལས་གསན་བསམ་སྒྲོ་འདོགས་བཅད།སྔ་འགྱུར་པའི་བཤད་ལུང་རྒྱ་མཚོ་ལུང་རིགས་མན་ངག་གིས་བརྒྱན་པ་ལ་སྐུ་སྐྱེ་སྔ་མ་དཔལ་ལྡན་ཆོས་རྒྱལ་གྱིས་སྨོན་ལམ་ལོག་པའི་རྒྱལ་འཁྱམ་བཏུལ་བ་དེའི་བར་ཆད་ཀྱིས་སྐུ་སྤྲུལ་འདི་ལ་འགྲོ་དོན་ཆེར་མ་འཕེལ།དགོན་འདིར་འཚོ་སྐྱོང་བཞིན་བཞུགས།དེའི་སྐུ་སྤྲུལ་ལ་གང་མངད་མདའ་འཁྲུངས་པ་དགོན་འདིར་ཁྲི་ཕེབས་ཀྱང་དམ་གྲིབ་ཀྱི་རྐྱེན་དང་དུས་དབང་གིས་རྒྱ་གར་ཕེབས།
༼དབུ་རྩེ་སྒྲུབ་ཁང་དང་དགོན་པའི་ཐོབ་རིམ་འགའ།༽
༤༽སྐུ་ཕྲེང་རིམ་བྱོན་གྱི་མཛད་རྗེས་དབུ་རྩེ་སྒྲུབ་གྲྭ་བརྒྱད་གྱིས་འོད་སྣང་སྒྲུབ་པ་དང་།རང་ལུགས་ལྷ་སྲུང་གྱི་བསང་གསོལ་ཁ།ཤི་གསོན་གྱི་དགེ་རྩ།བྱང་ཆོག་དང་བསུར་བསྔོ་སྨོན་བཅས་དང་།ནང་ནུབ་ཕྱག་བརྒྱ་རེ་རྒྱུན་འགྱང་དང་།འཚམས་པ་རེའི་གྲྭ་ཤག་ཏུ་ཨ་མི་དྷེ་ཝའི་འཁོར་ཆེན་རེར་ཡོད་པ་བསྐོར་དགོས་པ་སོགས་སྒྲུབ་ཡོད།དགོན་པའི་འགན་བཞེས་པའི་སྤྲུལ་སྐུ་སྔ་ཕྱི་དང་།དཔལ་ཡུལ་རྣམ་རྒྱལ་བྱང་ཆུབ་ཆོས་གླིང་ནས་བཀའ་ལུང་མན་ངག་གིས་བརྒྱན་ནས་དེའི་སྒྲུབ་གྲྭ་ནས་ཡི་དམ་ལྷ་ཐམས་ཅད་ཀྱི་བསྙེན་པ་ཐོན་མཚམས་དཔལ་ཡུལ་རྣམ་རྒྱལ་དགོན་ནས་མཆོག་སྤྲུལ་རིམ་བྱོན་གྱིས་ཐོབ་ཞྭ་མཚན་གསོལ་གནང་རྗེས།དགོན་འདིར་དགོན་དཔོན་གྱི་དབང་ཆ་འཛིན་མཁན་ཁྲི་པ་དང་།དེའི་འོག་ཏུ་དུང་དཔོན་གཉིས།དབུ་མཛད།དགེ་སྐོས་བཅས་ཀྱིས་དགོན་པ་སྤྱིའི་དོན་སྒྲིག་ལམ་བཅས་ལ་ལྟ་ཞིབ་གནང་རྒྱུ།དགོན་འདིར་ལྷ་ཁང་ཆེན་པོའི་མཚོན་ལྷ་ཁང་རྙིང་པ་གཅིགཚེས་བཅུའི་གར་འཁྱམ་མཛད་པའི་ལྷ་ཁང་ཀ་བ་དགུ་ཅན་གཅིག་བཅས་ལྷ་ཁང་གསུམ།མགོན་ཁང་༼སྡེེ་དགེའི་རྒྱལ་སྲས།༽སྲས་དམ་ཚིག་རྡོ་རྗེའི་ཐུགས་དམ་རྟེན་ཨོ་རྒྱན་སྨན་འདག་གི་སྐུའི་ཐུགས་ཁར་བྱེའུའི་དྲོད་ཡོད་པ་གཅིགདམ་ཅན་རྡོར་ལེགས་གྱི་མགོན་ཁང་སྡེ་དགེ་རྒྱལ་པོས་བཞེངས་པ་བཅས་མགོན་ཁང་གཉིས།དབུ་རྩེ་སྒྲུབ་ཁང་ལྷ་ཁང་ཆུང་བ་གཅིགགྲྭ་བརྒྱད་ཅུའི་གྲངས་ལྡན་གྱི་གྲྭ་ཤག་བཞི་བཅུ་ཞེ་བརྒྱད།
༼མནའ་བོའི་ལྷ་འབྲང་དགོན་པའི་དུས་མཆོད་ཁག༽
དགོན་འདིར་དུས་མཆོད།ཧོར་ཟླ་༡༡ཉི་ལོག་རྟ་མགྲིན་གཏོར་བཟློག་ཉིན་གསུམ་གཏང་རག་ཚོགས་སྐོང་ཉིན་གཅིགཟླ་བ་༡༢པ་ལ་དྲུག་ཅུ་རཏ་གླིང་ཕུར་སྒྲུབ་ཉིན་༥།ཟླ་བ་དང་པོའི་ནང་འདུལ་བ་ཞི་ཁྲོ་ངེས་དོན་སྙིང་པོ་ཉིན་༤།སིདྡྷི་དུང་སྒྲུབ་ཉིན་༡༣།ཟླ་བ་ལྔ་པ་ལ་ཚེས་བཅུ་བླ་མ་གསང་འདུས་ཉིན་༥།སྤྲོས་བཅས་གར་འཁྱམ་ཉིན་༢།ཟླ་བ་བདུན་པར་སད་སྲུང་ཉིན་༢༠།ལ་གསོལ་ལྷ་གསང་ཉིན་༡།གཡང་སྒྲུབ་ཉིན་༣།ཟླ་བ་དགུ་པར་སེང་གདོང་ཉིན་༣།དབྱར་གནས་དགེ་ཚུལ་སློང་ཉི་ཤུས་ཉིན་༤༥གཏང་རག་ཉིན་༡བཅས་འཚོག་རྒྱུ་ཡོད།
འདི་ནི་དབོན་སྟོད་མཁྱེན་རབ་ཆོས་ཀྱི་འོད་ཟེར་ཞེས་མདོ་ཁམས་སྨད་ན་ཡོངས་སུ་གྲགས་པའི་ས་སྐྱའི་མཁན་ཆེན་དེའི་དངོས་སློབ་དཔལ་ལྷ་འབྲང་པའི་གྲྭ་རྒྱུན་དུ་བཞུགས་པའི་མཁས་པ་བསམ་དམིགས་ཀྱིས་ཕྱི་ལོ་༢༠༠༠ནས་༢༠༠༧ཙམ་གྱི་བར་ན་མཛད་ཡོད་པ་མངོན། ཞེས་གོང་གི་ས་བཅད་གསར་སྣོན་དང་བཅས་འཆམ་ར་དྲི་མེད་རྒྱལ་མཚན་གྱིས་ ༢༠༡༠ལོར་བྱས།
ཉེ་ཆར་རྒྱལ་ས་རྡ་རམ་ས་ལར་(ལྷ་འབྲང་སྤྲུལ་སྐུ་རིན་པོ་ཆེའི་གདུང་རུས་ལས་བྱོན་པའི་ལྷ་སྐུ་དང་རིང་བསྲེལ་ཁག་བཞུགས་སོ།།)ཞེས་པའི་འགྲེམ་སྟོན་ཞིག་གནང་ཡོད་ལ།འགྲེམ་སྟོན་དེའི་ནང་ལྷ་འབྲང་སྤྲུལ་སྐུ་རིན་པོ་ཆེ་འདས་ནས་ཞུགས་འབུལ་ཞུས་རྗེས་ཁོང་གི་དབུ་ཐོད་ནང་རྒྱལ་བ་རིགས་ལྔ་རང་བྱོན་དུ་ཕེབས་པ་དང་།འགྲམ་པ་གཡས་གཡོན་དང་།རྐང་རུས་དག་ལས་སྤྱན་རས་གཟིགས་དང་།སློབ་དཔོན་ཆེན་པོ། ཚེ་དཔག་མེད།སྒྲོལ་མ།རྡོར་སེམས།དེ་མིན་མཆོད་རྟེན་དང་།ལན་ཛའི་ཡི་གེ་སོགས་རང་བྱོན་དུ་ཕེབས་པ།རིགས་བསྲེལ་སྣ་མང་འཁྲུངས་པ་སོགས་རེད།
དེའང་ལྷ་འབྲང་སྤྲུལ་སྐུ་ཞེས་པ་ནི་དགོན་མིང་གང་ཟག་ལ་ཐོགས་པ་ཡིན་ལ།ལྷ་འབྲང་དགོན་ཞེས་པ་ནི།ཕྱི་ལོ་༡༦༡༦ཡན་མན་ན་བྱ་བྲལ་དཀོན་མཆོག་བསྟན་འཛིན་ཞེས་པ་དེས་ཕྱག་བཏབ།ཁོང་ནི་རིག་འཛིན་འཇའ་ཚོན་སྙིང་པོའི་དངོས་སློབ་ཅིག་ཡིན་ལ།དགོན་འདིའི་ཕྱག་བཞེས་གཙོ་བོའང་འཇའ་ཚོན་གཏེར་ཆོས་སྐོར་ཡིན།དགོན་འདི་ནི་ཁམས་སྡེ་དགེ་དབོན་པོ་སྟོད།བཀྲ་ཤིས་སྟེང་ཞེས་པའི་གྲོང་ཚོ་དེའི་ཟུར་དུ་ཆགས་ཡོད།ཆོས་བརྒྱུད་སྔ་འགྱུར་རྙིང་མ་པའི་ཁོངས་སུ་གཏོགས་ཤིང་།ཐོབ་ཁུངས་རྙིང་མའི་མ་དགོན་དྲུག་གི་ཡ་གྱལ་ཤར་རྒྱལ་བ་དཔལ་ཡུལ་དགོན་ཡིན།དུས་འགྱུར་སྔོན་ལ་དགོན་འདིར་སྒྲུབ་སྡེ་དང་།ལོ་ལྟར་ཚེས་བཅུའི་འཆམ་སྣ་ཁག་འཁྲབ་རྒྱུ་བཅས་དྲ་རྒྱས་པོ་དང་རུ་འགྲིག་པོ་ཡོད་འདུག་མོད།དེང་སང་ནི་དགོན་པ་དང་འཆམ་སྣ་ཁག་བཅས་ཀྱི་མིང་མ་བོར་ཙམ་ལས། ཚགས་ཚུད་པོ་ཞིག་དང་མཐུན་རྐྱེན་འགྲིག་པོ་ཞིག་མེད་པ་ཆགས་འཇིག་གི་གནས་སུ་ཚུད་ཡོད།
ད་ལྟའི་གླེང་གཞི་ལྷ་འབྲང་སྤྲུལ་སྐུ་ནི།
༡༽སྐུ་ཐོག་དང་པོ་དེ་༡༨༣༠ཙམ་ན་དགོན་འདིར་ཕེབས་པ་དང་།ཁོང་གི་མཚན་ལ་གྲུབ་ཆེན་དཔལ་ལྡན་ཆོས་རྒྱལ་ཞུ།དེ་ནས་བཟུང་མཚན་འདིདཔལ་ལྡན་ཆོས་རྒྱལ་ཞེས་པ་འདི་སྐུ་ཕྲེང་རིམ་བྱོན་གྱི་མཚན་དུ་ཆགས།བླ་མ་འདིས་དགོན་པ་འདིའི་བསྟན་པ་དར་རྒྱས་ཡུན་གནས་བྱས།
༢༽སྐུ་ཕྲེང་གཉིས་པ་ལ་ཚེ་དབང་དཔལ་གྱི་རྡོ་རྗེ།འདིས་སྡེ་དགེའི་རྒྱལ་སྲས་ཐུགས་ལ་གདོན་གསོལ་སྐབས་བཏུལ་བ་སོགས་ཀྱི་ངག་ཐོག་ལོ་རྒྱུས་འཆད་རྒྱུ་ཡོད་ལ།གསུང་ཐོར་བུ་འགའ་ཡང་མཇལ་རྒྱུར་ཡོད།
༣༽སྐུ་ཕྲེང་གསུམ་པར་མཛད་པ་ཆེར་མ་འཕེལ།
༤༽སྐུ་ཕྲེང་བཞི་པ་ནི།༡༩༢༢ལོར་སྡེ་དགེར་འཁྲུངས་ཤིང་།༡༩༨༨ལོར་རྒྱ་གར་འདས།བོད་རང་བཙན་ཤོར་སྐབས་རྒྱ་གར་དུ་ཕེབས་ཤིང་།ཏེ་ཛུ་དར་རྒྱས་གླིང་དུ་བཞུགས།ཁོང་གིས་བླ་མ་གཙོ་བོ་ཞིག་ནི་ཀརྨ་པ་༡༦པ་སོགས་ཡིན།ཁོང་ཞིང་ལ་ཕེབས་རྗེས་ད་ལྟའི་རང་བྱོན་དང་ཐུགས་ལྗགས་སྤྱན་གསུམ།རིང་བསྲེལ་ཡ་མཚན་པོ་འདི་དག་ཕེབས་པ་རེད།དམ་པ་ཁོང་གི་གདུང་རུས་སོགས་ཆ་ཚང་བ་ཁོང་གི་ཐུགས་སྲས་གཅུང་པོ་རྫོགས་ཆེན་དགའ་ནོར་རིན་པོ་ཆེས་ཉར་ཚགས་གནང་ཡོད་ལ།དམ་པ་ཁོང་གིས་ད་ལྟ་རྒྱ་གར་ཨ་བསམ་ཕྱོགས་ཀྱི་ཏེ་ཛུ་དར་རྒྱས་གླིང་བོད་མིའི་གཞིས་སྒར་རུ་བྱེས་ཀྱི་ལྷ་འབྲང་དགོན་པ་རྒྱ་བསྐྱེད་ཀྱིས་མཛད་ཕྲིན་སྐྱོང་བཞིན་བཞུགས་ཡོད།
བསམ་ཚུལ་འབྲི།
སྡེ་དགེའི་དབུ་ཁག་ལྔ།