རྫོང་སར་མཁྱེན་བརྩེ་རིན་པོ་ཆེ་གླེང་བ།
བོད་བརྒྱུད་ནང་བསྟན་ཆོས་ལུགས་ཀྱི་བྱུང་རིམ་ཁྲོད་དུ་ཆོས་བརྒྱུད་ཆེན་པོ་དག་གིས་ཕན་ཚུན་ལྟ་གྲུབ་མཐུན་མིན་གྱི་དགག་བཞག་དང་། ཆོས་ལུགས་ཀྱི་མིང་བྱང་ཁྱེར་ནས་གོ་ཐོབ་དང་མངའ་དབང་ཆེད་དུ་སེར་དམག་ཀྱང་རྒྱག་རེས་བྱས་སྐད། འོན་ཏེ་དུས་རབས་བཅུ་དགུ་པའི་ནང་དུ་མཐུན་འབྲེལ་གྱི་ལམ་དུ་གོམ་སྟབས་སྤོས་ནས་གཅིག་གྱུར་གྱི་ཐོག་ནས་ཉམས་བཞེས་མཛད་ཏེ་རིས་མེད་ཅེས་གྲགས་པའི་ལྟ་སྤྱོད་འོག་ཆོས་བརྒྱུད་ཆེན་པོ་དག་གི་མཐུན་འབྲེལ་ནི་ཧ་ཅང་ཚད་མཐོན་པོར་སླེབས་ཡོད། དེ་ལྟའི་མཐུན་འབྲེལ་གྱི་བྱེད་པོ་དང་རིས་མེད་ཀྱི་སྲོག་ཤིང་དུ་གྱུར་པའི་མཁྱེན་ཀོང་གཉིས་ལས་རྫོང་གསར་མཁྱེན་བརྩེ་སྐུ་འཕྲེང་གཉིས་པའི་ཡང་སྤྲུལ་དེ་མ་ཐག་པ་འཇམ་དབྱངས་ཐུབ་བསྟན་ཆོས་ཀྱི་རྒྱལ་མཚན་ནི་ཁམས་སྤོ་བོ་ཀ་གནམ་རྒྱལ་པོའི་རྒྱུད་པ་སྙིགས་མའི་དུས་སུ་སློབ་དཔོན་པདྨ་སླར་ཡང་འབྱོན་པ་གྲགས་པའི་༧སྐྱབས་རྗེ་བདུད་འཇོམས་ཚང་གི་གདུང་འཛིན་གྲུབ་ཐོབ་ཆེན་པོ་འཕྲིན་ལས་ནོར་བུའི་གདུང་སྲས་འཁྲུལ་མེད་ཅིག་རེད། བོད་ཀྱི་བླ་སྤྲུལ་ངོས་འཛིན་་བྱེད་པའི་ལམ་ལུགས་ལྟར་༧དཔལ་ས་སྐྱའི་གོང་མ་བདག་ཁྲི་རིན་པོ་ཆེས་ཐུན་མིན་མཉམ་གཞག་གི་ལམ་ནས་མཁྱེན་བརྩེ་ཆོས་ཀྱི་བློ་གྲོས་ཀྱི་ཡང་སྲིད་དུ་ཐུགས་ཐག་བཅད། སྐུ་ན་ཧ་ཅང་ཆུང་བའི་དུས་ནས་ཞི་བར་བཤེགས་པ་མཁན་ཆེན་ཨ་པད་རིན་པོ་ཆེ་དང་། ༧སྐྱབས་རྗེ་དིལ་མགོ་མཁྱེན་བརྩེ་རིན་པོ་ཆེ། མཁན་ཆེན་ཀུན་དགའ་དགའ་དབང་ཕྱུག་སོགས་དམ་པ་མང་པོའི་མདུན་ནས་བོད་བརྒྱུད་ནང་བསྟན་ཆོས་ལུགས་ཀྱི་བཀའ་སྲོལ་ཕལ་ཆེ་བ་དག་གསན་སྦྱོང་མཐིལ་ཕྱིན་མཛད། ཁྱད་པར་དུ་༧དཔལ་ས་སྐྱའི་གོང་མ་བདག་ཁྲི་རྡོ་རྗེ་འཆང་གི་ཞལ་སྔར་ནས་གསང་སྔགས་རྒྱུད་སྡེ་ཡོངས་ཀྱི་ཟབ་ཆོས་ཕལ་ཆེར་གྱི་དབང་བཀའ་མན་ངག་ཡོངས་རྫོགས་བུམ་པ་གང་བྱོལ་ཚུལ་དུ་ཞུས། ཤར་ནུབ་ཀྱི་ཡུལ་གྲུ་མང་པོར་ཕེབས་ནས་ནང་བསྟན་རིག་པ་སྤྱི་དང་བྱེ་བྲག་ཕྱག་རྫོགས་ཀྱི་གདམས་པ་ཕྱོགས་མེད་རྒྱ་ཁྱབ་ཏུ་སྤེལ། དུས་རབས་བཅུ་དགུ་པའི་ནང་དུ་མཁས་པའི་འབྱུང་གནས་དང་རིས་མེད་ཀྱི་བསྟི་གནས་སུ་གྲགས་པའི་ཁམས་བྱེ་རྫོང་སར་བཤད་གྲྭའི་རྒྱུན་འཛིན་ཆེད་འབྲུག་དང་རྒྱ་གར་སོགས་བཤད་གྲྭ་གསར་འཛུགས་གནང་། ནང་ཆོས་ཉམས་བཞེས་བྱེད་ཚུལ་གྱི་སྐོར་དེང་རབས་མི་ཡི་སེམས་ཁམས་དང་མཐུན་པའི་དེབ་ཁག་ཅིག་རྩོམ་གནང་བས་མཁས་པའི་མཚན་སྙན་ཕྱོགས་ཀུན་ཏུ་ཁྱབ། བོད་བརྒྱུད་ནང་བསྟན་ནུབ་ཕྱོགས་ཡུལ་དུ་དར་སྤེལ་བྱུང་བའི་ཁྲོད་ནས་སློབ་མ་མང་ཤོས་དང་མཚན་སྙན་ཆེ་ཤོས་ཀྱི་བོད་ཀྱི་བླ་སྤྲུལ་ཞིག་ཡིན། ཁོང་ལ་བླ་སྤྲུལ་གཞན་དང་མི་མཚུངས་པའི་གསར་གཏོད་ཀྱི་བསམ་བློ་དང་སྒྱུ་རྩལ་གྱི་འཚོ་སྙེགས་མངའ་བས་དུས་རབས་ཀྱི་འགྱུར་འགྲོས་དང་སྒོ་བསྟུན་ནས་སྒྱུ་རྩལ་གྱི་ཐོག་ནས་གཟེངས་སུ་ཐོན་པའི་གྲུབ་འབྲས་བླངས་ཡོད། ཕོར་པ་དང་ཆང་ཧུབ་ཐེངས་གཅིག་གི་འཁྲུལ་སྣང་སོགས་གློག་བརྙན་མང་པོའི་འཁྲབ་ཁྲིད་པ་མཛད་ནས་གྲགས་ཅན་གྱི་འཁྲབ་ཁྲིད་པ་དང་སྒྱུ་རྩལ་བ་དེ་བཞིན་མི་མང་བཅས་ནས་བསྔགས་བརྗོད་ཐོབ། ཁྱད་པར་དུ་ཕོར་པ་ལ་ནུབ་ཕྱོགས་ཀྱི་རྒྱལ་ཁབ་མང་པོ་ནང་ནས་ཕུལ་བྱུང་གློག་བརྙན་གྱི་མཚན་གནས་དང་བྱ་དགའ་ཡང་ཐོབ་འདུག ཕོར་པ་ཞེས་པའི་གློག་བརྙན་འདིའི་ནང་དུ་བོད་གཞིས་བྱེས་གཉིས་ཀྱི་རེ་འདུན་དང་བསམ་བློ་གཙོ་འདོན་མཛད་ཡོད་ལ་གསར་རྙིང་གཉིས་ཀྱི་ལྟ་བ་མཐུན་འགྲིག་ལམ་དུ་བསྒྱུར་ཐུབ་པའི་གནས་ལུགས་ཀྱང་བཤད་ཡོད། ཕོར་པའི་ནང་དུ་བྱེས་སྡོད་བོད་མིའི་ཚབ་མཚོན་གྱི་ལོ་ན་ཡོལ་ནས་དབུ་ལོ་དཀར་པོ་ཆགས་ཟིན་པའི་བླ་རྒན་དེའི་རེ་བ་ནི་རང་ཡུལ་བོད་ལ་ལོག་རྒྱུ་ཁོ་ན་རེ་སྒུག་བྱས་ནས་མི་ཚེ་སྐྱེལ་བཞིན་པ་དང་། སྙིང་ལྟར་གཅེས་པའི་རང་གི་བུ་རྒྱུད་བཙན་བྱོལ་དུ་བཏང་ནས་རེ་བ་ཡོད་ཚད་བྱེས་སུ་བཅོལ་བཞིན་པའི་མ་རྒན་མོ་ཞིག་གི་གཟུགས་སུ་བཀོད་པའི་གཞིས་སྡོད་བོད་མིའི་སེམས་ཁམས་དང་དད་པ་རེ་འདུན་སོགས་དངོས་རྒྱུད་ཅི་རིགས་ནས་འབུར་དུ་ཐོན་པར་མཛད་ཡོད། ད་དུང་བོད་དོན་རྒྱབ་སྐྱོར་པ་དག་ལ་བོད་མིས་སེམས་གཏིང་ནས་བཀའ་དྲིན་ཚོར་བའི་རྣམ་པའང་ཐོན་པར་མཛད་འདུག ངས་གློག་བརྙན་འདི་ལ་བལྟ་ཐེངས་རེར་རང་གི་གནས་བབ་དང་མ་རྒན་མོའི་རེ་འདུན་སོགས་དྲན་ལམ་དུ་འཁོར་ནས་མིག་ཆུ་བཞུར་བ་ལན་གྲངས་བྱུང་། མདོར་ན་སྐུ་སྐྱེ་གོང་མའི་ཞལ་འབག་རྫིག་པོ་རེ་གདོང་དུ་གྱོན་ནས་མཚན་གནས་སྐམ་པོ་རེས་གནས་སྐབས་གཞན་མགོ་བསྐོར་ཞིང་མཐར་ཐུག་རང་མགོ་གཡོགས་པའི་བླ་སྤྲུལ་གཞན་དང་མི་འདྲ་བར་རྫོང་སར་མཁྱེན་བརྩེ་རིན་པོ་ཆེས་རང་གི་རྣམ་དཔྱོད་ཀྱི་ལམ་ནས་ཐོན་པའི་སྒྱུ་རྩལ་གྱི་ཕྱག་རྗེས་དག་ནི་ངོམ་དུ་འོས་པའི་གཟི་བརྗིད་ཀྱི་རིན་ཐང་བླ་མེད་དུ་བསྐྲུན། ད་དུང་ཆེས་བསྔགས་པ་འོས་པའི་རླབས་ཆེན་གྱི་མཛད་རྗེས་གཞན་ཞིག་ནི་འགྲོ་ཁམས་ཞི་བདེའི་བྱེད་པོ་སྟོན་པ་སངས་རྒྱས་ཀྱི་བཀའ་ལུང་རྒྱུ་མཚན་སྟོང་དང་རིགས་པ་ཁྲི་ཡི་འབྱུང་ཁུངས་སུ་གྲུབ་པའི་རྒྱལ་བའི་བཀའ་འགྱུར་རིན་པོ་ཆེ་བོད་སྐད་དུ་བཞུགས་པ་དེ་ཉིད་དབྱིན་སྐད་དུ་བསྒྱུར་བའི་མཛད་འགན་གཙོ་བོ་བཞེས་ཏེ་ད་སྐབས་ལས་འཆར་གྱི་ཕྱེད་ཙམ་ལེགས་གྲུབ་བྱུང་ཟིན། ད་དུང་ལོ་འདིར་ཁོང་གི་སྟོན་པ་སངས་རྒྱས་ཀྱི་ཕ་ཡུལ་དུ་གྲགས་པའི་རྒྱ་བལ་གྱི་རྒྱལ་ཁབ་གཉིས་པོས་སངས་རྒྱས་ཀྱི་ཆོས་ཚུལ་ལམ་ནང་བསྟན་གྱི་གནས་བབ་ཐོག་ཏུ་འགན་ཁུར་བྱེད་དགོས་པའི་རེ་སྐུལ་གྱི་སྙན་ཞུ་རྩོམ་ཡིག་དགག་སྒྲུབ་ཀྱི་རིགས་པའི་གནད་དང་ལྡན་པ་དེ་འདྲ་བོད་ཀྱི་བླ་མ་ཕལ་ཆེ་བའི་ཡིད་ངོར་ལའང་འཆར་མྱོང་མེད་ཅེས་བརྗོད་ནའང་ལོས་ཆོག མདོར་ན་ཁོང་དང་ཁོང་ལྟ་བུར་གསར་གཏོད་ཀྱི་བསམ་བློ་དང་སྒྱུ་རྩལ་གྱི་བྱས་རྗེས་ཡོད་པའི་མི་སྣ་ནི་ང་ཚོ་བོད་པ་ཚང་ལ་ཆེས་མཁོ་བའི་དུས་རབས་ཀྱི་ནོར་བུ་ངོ་མ་དེ་ཡིན་ངེས། ད་དུང་རིན་པོ་ཆེས་སྟོན་པ་སངས་རྒྱས་ཀྱི་སྐྱེས་རབས་ཤིག་ཀྱང་འཁྲབ་ཁྲིད་གནང་རྒྱུའི་ཐུགས་བཞེད་ཡོད་ཚུལ་གསུངས་འདུག་པས་གོ་སྐབས་བྱུང་ན་ང་ཚོ་བོད་ཀྱི་ན་གཞོན་འཁྲབ་སྟོན་པ་ཁ་ཤས་ཀྱང་མཉམ་ཞུགས་བྱེད་རྒྱུ་ཧ་ཅང་གལ་ཆེ། ང་ཚོ་བོད་པ་ཚང་ཡང་འཛམ་གླིང་རྒྱལ་ཁབ་གཞན་དང་མཉམ་དུ་གོམ་པ་སྤོ་ནས་གོ་ལའི་ཐོག་ཏུ་བསྐྱོད་དགོས་སྟབས་སྒྱུ་རྩལ་དང་འབྲེལ་བའི་ལས་རིགས་དག་ནི་ང་ཚོར་ཆེས་མཁོ་བ་དེ་མ་ཡིན་ནམ། རིན་པོ་ཆེ་སྐུ་སྒེར་ངོས་ནས་ཀྱང་བོད་མི་ན་གཞོན་རྣམས་ལ་དེ་ལྟའི་གོ་སྐབས་བསྩལ་གནང་རྒྱུའི་ཐུགས་བསམ་བཞེས་དགོས་པ་ནི་རིན་པོ་སྐུ་སྒེར་ལ་འཁྲི་བའི་ལས་འགན་ཞིག་ཀྱང་ལོས་ཡིན། འཁྲབ་ཁྲིད་པ་ཁོང་ལྟ་བུས་ལམ་སྟོན་འོག་འཁྲབ་སྟོན་བྱེད་ཐུབ་ཚེ་འཁྲབ་སྟོན་པ་རང་ཉིད་ཀྱང་རྒྱལ་སྤྱིའི་རང་བཞིན་ཅན་དུ་འགྱུར་ཐུབ་པས་ཧོར་ལི་ཝོལ་སྒྲི་དང་བྷུ་ལི་ཝོལ་སྒྲི་སོགས་ཀྱི་ནང་དུ་བོད་པའི་གློག་བརྙན་འཁྲབ་སྟོན་པ་གྲགས་ཅན་མང་པོ་འཛུལ་ཞུགས་ཐུབ་པའི་རྒྱུ་རྐྱེན་དུ་འགྱུར་ཐུབ། གལ་སྲིད་དེ་ལྟར་བྱུང་ཚེ་རིན་པོ་ཆེ་སྐུ་ཉིད་ཕ་མེས་ཀྱི་རྒྱུད་པ་བོད་མིས་ཆེས་གུས་བཀུར་ཞུ་ཡུལ་གྱི་བོད་ཀྱི་བླ་ཆེན་ཞིག་གི་གདུང་རྒྱུད་ལས་བྱུང་ཞིང་རིན་པོ་ཉིད་ཀྱང་བོད་ཀྱི་བླ་ཆེན་ཞིག་གི་གནས་བབ་ཡོད་པའི་འགན་འཁྲི་དང་རིན་ཐང་ངོ་མ་དེ་མངོན་ཐུབ། དེས་ན་ངས་ཆེས་ཞུ་འདོད་པ་ནི་སྒྱུ་རྩལ་གྱི་འཇིག་རྟེན་དང་། དེང་རབས་ཀྱི་སྤྱི་ཚོགས། ཁྱད་པར་དུ་ང་ཚོ་གངས་ཅན་བོད་པ་ཚང་ལ་ཁྱེད་ལྟ་བུར་ཧ་ཅང་མཁོ་བས་ཁྱེད་ཀྱི་བྱ་གཞག་དང་སྐུ་ཚེ་ལ་བར་ཆད་མེད་པའི་སྨོན་འདུན་སྙིང་ནས་ཞུ།། །།
མི་གསོན་པོས་གུས་འདུད་བཅས།།
བསམ་ཚུལ་འབྲི།
ནུ་མའི་འབྲས་སྐྲན་གྱིས་འཆི་ལམ་དུ་སོང་བ།