རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོ།
རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོ།
རྫ་དཔལ་སྤྲུལ་དང༌། འཇུ་མི་ཕམ་རྣམ་གཉིས་ནི་ཐོག་མར་ཆུང་ངུའི་དུས་ནས་ཕྱོགས་མེད་ཀྱི་དགོན་སྡེ་འགྲིམས་ཞིང༌། རིས་མེད་ཀྱི་མཁས་གྲུབ་དུ་མར་བསྟེན་ནས་མདོ་སྔགས་རིག་གནས་དང་བཅས་པ་ལ་མཁས་པའི་མཚན་སྙན་རྒྱས།བར་དུ་སྒྲུབ་པ་དང་ཉམས་ལེན་མཛད་པས་འཇིག་རྟེན་གྱི་སྣང་ཚུལ་ཐམས་ཅད་ལ་ངེས་འབྱུང་དང་ཞེན་ལོག་སྐྱེས་པས་གནས་གཅིག་ཏུ་འཛིན་པའི་དགོན་སྡེ་དང༌། ཕ་ཡུལ་སོགས་སྤངས་ཤིང་ཕྱོགས་མེད་ཀྱི་རྒྱལ་ཁམས་འགྲིམས་ཏེ་གནས་ངེས་མེད་ཀྱི་བྱ་བྲལ་པར་གྱུར།མཐར་གནས་དང་ཡུལ་གྱིས་སྤྲོས་པས་མ་བཅིངས་པ་བྱ་རྡོ་ཐོག་ནས་འཕུར་བ་བཞིན་ཕྱིར་མི་ལྡོག་པའི་ས་ལམ་སྙེགས་པའི་གྲུབ་པའི་གོ་འཕང་མཐོན་པོར་གཤེགས་པ་ཡོངས་གྲགས་ཡིན།དེས་ན་དམ་པ་འདི་གཉིས་སྐུ་བཞུགས་པའི་ཚེ་བདག་ཏུ་བཟུང་བའི་དགོན་གནས་མེད་པ་དང༌། སྐུ་གཤེགས་པའི་དུས་སུ་ཡང་སྲིད་བརྩད་གཅོད་སོགས་ཀྱི་སྤྲོས་པ་བྱེད་སྲོལ་བྱུང་མེད། འོན་ཀྱང་དེང་དུས་ཆོས་ཀྱི་ཚོང་རའི་ཁྲོད་དུ་རྫ་དཔལ་སྤྲུལ་དང༌།འཇུ་མི་ཕམ་རྣམ་གཉིས་ཀྱི་སྤྲུལ་སྐུ་ནི་གྲོང་གི་ཁྱི་འཁྱམས་ལས་ཀྱང་མང་བ་ཞིག་མཐོང་རྒྱུ་འདུག་པ་འདི་དག་ནི།སྐྱེས་ཐོབ་ཀྱི་ཤེས་རབ་དང༌།སྦྱོང་སྟོབས་ཀྱི་ཡོན་ཏན་གང་གི་ཐད་ནས་དམ་པ་འདི་གཉིས་ཀྱི་མཚན་སྙན་ལ་ཞབས་འདྲེན་ཞུ་མཁན་ཁོ་ན་མཐོང༌།རྫ་དཔལ་སྤྲུལ་རིན་པོ་ཆེའི་ལོ་རྒྱུས་གནད་བསྡུས་ནི།གཟན་དཀར་མཆོག་སྤྲུལ་ཐུབ་བསྟན་ཉི་མས་མཛད་པའི་རྫ་དཔལ་སྤྲུལ་གྱི་རྣམ་ཐར་མདོར་བསྡུས་ལས།དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་ནི།རབ་བྱུང་བཅུ་བཞི་པའི་ས་འབྲུག་སྤྱི་ལོ་1808ལོར་ཁམས་བྱང་འབྲོག་དགེ་རྩེ་རྫ་ཆུ་ཁའི་སྡེར་གཏོགས་རྒྱལ་ཐོག་ཅེས་པའི་གདུང་ལས་སྐུ་འཁྲུངས།
རྡོ་གྲུབ་ཆེན་འཇིགས་མེད་ཕྲིན་ལས་འོད་ཟེར་གྱིས་དཔལ་དགེ་བསམ་གཏན་ཕུན་ཚོགས་ཀྱིས་སྤྲུལ་སྐུ་ངོས་འཛིན། ཨོ་རྒྱན་འཇིགས་མེད་ཆོས་ཀྱི་དབང་པོ་ཞེས་མཚན་གསོལ།སྐུ་ན་ཆུང་ངུའི་དུས་ནས་ཡི་གེ་འབྲི་ཀློག་རྣམས་ཚེགས་མེད་དུ་མཁྱེན། མཁན་ཤེས་རབ་བཟང་པོ་ལས་རབ་ཏུ་བྱུང༌།རྡོ་བླ་འཇིགས་མེད་སྐལ་བཟང་དང༌།འཇིགས་མེད་ངོ་མཚར།རྒྱལ་སྲས་གཞན་ཕན་མཐའ་ཡས་སོགས་ཀྱི་དྲུང་ནས་ངལ་གསོ་སྐོར་གསུམ་དང༌།སྤྱོད་འཇུགརྩ་རྒྱུད་གསང་བ་སྙིང་པོ་སོགས་མདོ་སྔགས་ཀྱི་གཞུང་མང་པོ་དང༌།རིག་གནས་བཅས་གསན།ཞེ་ཆེན་དབོན་སྤྲུལ་མཐུ་སྟོབས་རྣམ་རྒྱལ་ལས་བཀའ་འགྱུར་ལུང་དང་སྒྲ་རིག་པ་གསན། བཀའ་བསྟན་འགྱུར་རོ་ཅོག་དང༌།རྙིང་མའི་ཀུན་མཁྱེན་ཡབ་སྲས།ས་པཎ།རྗེ་ཙོང་ཁ་པ་སོགས་གསར་རྙིང་སྐྱེས་ཆེན་རྣམས་ཀྱིས་ལེགས་པར་བཤད་པའི་གནས་མཐའ་དག་ལ་གསན་བསམ་ཕྱོགས་མེད་དང་དཔེ་གཟིགས་རྟག་འགྲུས་སུ་མཛད་པས་མཁས་པའི་ཕ་རོལ་ཏུ་ཕྱིན། འཇིགས་མེད་རྒྱལ་བའི་མྱུ་གུ་ལས་ཀློང་ཆེན་སྙིང་ཐིག་གི་སྔོན་འགྲོའི་ལམ་ཁྲིད་སྔ་ཕྱིར་ལན་གྲངས་ཉེར་ལྔ་གསན་པ་མ་ཟད། ཁྲིད་སྦྱང་དེ་སྙེད་ཅིག་གྲུབ་པར་མཛད།གཞན་ཡང་རྩ་རླུང་དང་རྫོགས་ཆེན་གྱི་ཁྲིད་སོགས་དང༌།སྔ་འགྱུར་བཀའ་མའི་ཆོས་སྐོར་རྣམས་མང་དུ་གསན། མདོ་མཁྱེན་བརྩེ་ཡེ་ཤེས་རྡོ་རྗེ་ནས་བརྟུལ་ཞུགས་ཐབས་ཀྱི་སྤྱོད་པས་རིག་པ་བཅར་ཕོག་གི་ཚུལ་དུ་ངོ་འཕྲོད།ཀློང་ཆེན་སྙིང་ཐིག་གི་རྩ་རླུང་གི་ཁྲིད་སྦྱང་རྒྱུན་རིང་དུ་བསྐྱངས། རྫོགས་ཆེན་རིན་པོ་ཆེ་མི་འགྱུར་ནམ་མཁའི་རྡོ་རྗེ་སོགས་ལས་ཆོས་ཀྱི་བདུད་རྩི་མཐའ་ཡས་པ་བཞེས།རུ་དམ་ཡང་དབེན་གཤིན་རྗེའི་སྒྲུབ་ཕུག་དང༌། ཚེ་རིང་ཕུག་སོགས་སྒྲུབ་པར་ཡུན་རིང་གནང༌།དགུང་ལོ་སུམ་ཅུའི་ནང་སྐོར་ནས་གསེར་ཐར་ཡར་ལུང་པདྨ་བཀོད་སོགས་སུ་ཕེབས་ཏེ་སྐལ་ལྡན་རིག་པ་འཛིན་པའི་ཚོགས་ལ་རྒྱུད་གསང་བ་སྙིང་པོའི་ལྗགས་ཁྲིད་རྒྱས་པར་གནང༌། གསེར་ཐར་དང་རྡོ་སྟོད་སྨད་ཀྱི་འདུས་སྡེ་ཡོངས་ལ་སྤྱོད་འཇུག་དང༌།མ་ཎི་བཀའ་འབུམ། བདེ་སྨོན་སོགས་ཀྱི་ཆོས་སྦྱིན་གྲངས་མེད་བསྩལ། རྐུན་ཇག་གི་རྒྱུན་བཅད།དམར་སྟོན་གྱི་སྲོལ་བསྣུབས།དེ་ནས་ཛམ་ཐང་དུ་ཕེབས་ཏེ་གཙང་པ་ངག་དབང་ཆོས་འབྱོར་ལས་སྦྱོར་དྲུག་གསན།མི་ཉག་གི་ཡུལ་དུ་བྱོན་ཏེ་འདྲ་དགེ་བཤེས་ཚུལ་ཁྲིམས་རྣམ་རྒྱལ་ལ་ཕར་ཕྱིན་སྐོར་གྱི་དྲི་བ་དང་བགྲོ་གླེང་མང་དུ་མཛད་པ་སོགས་གནས་ངེས་མེད་དུ།ཀུན་སྤང་བྱ་བཏང་གི་མཛད་པས་འགྲོ་དོན་ཕྱོགས་མེད་དུ་བསྐྱངས།
རྫོགས་ཆེན་ཤྲཱི་སེང་གི་ཆོས་གྲྭ་དང༌།པདྨའི་ཐང་སོགས་སུ་བྱམས་ཆོས་དང༌།དབུ་མ།མངོན་པ།རྒྱུད་གསང་སྙིང༌། ཡོན་ཏན་མཛོད།སྡོམ་གསུམ་རྣམ་ངེས་སོགས་འཆད་ཁྲིད་ཡུན་རིང་གནང༌།ལྷག་པར་དུ་ལོ་བསྟུད་མར་སྤྱོད་འཇུག་ལྗགས་ཁྲིད་གནང་བས་རྫོགས་ཆེན་ཤྲཱི་སེང་གི་ཉེ་འགྲམ་དུ་མེ་ཏོག་སེར་ཆེན་འདབ་མ་སུམ་ཅུ་དང༌།ལྔ་བཅུ་ཅན་མང་དུ་སྐྱེས་པ་ལ་སྤྱོད་འཇུག་མེ་ཏོག་ཏུ་གྲགས་པར་བྱུང༌།གཏེར་སྟོན་མཆོག་གྱུར་བདེ་ཆེན་གླིང་པས་རྫོགས་ཆེན་གངས་ཁྲོད་ནས་བདེ་མཆོག་སངས་རྒྱས་མཉམ་སྦྱོར་གྱི་གཏེར་ཁ་བཞེས་སྐབས་རྗེ་ཉིད་ཆོས་སྐོར་དེ་དང་།རིགས་གསུམ་སྙིང་ཐིག་སོགས་ཀྱི་ཆོས་བདག་ཏུ་མངའ་གསོལ་ཞིང་དེ་དག་གི་དབང་ལུང་ཁྲིད་ཡོངས་རྫོགས་བརྣོག་ཆོས་སུ་བསྩལ།ཀཿ་ཐོག་རྡོ་རྗེ་གདན་དུ་ཕེབས་ཏེ་དམ་གཙང་བྱམས་གསུམ་གྱི་གདུང་འབུམ་ལ་ཕྱག་སྐོར་མཛད།སི་ཏུ་མཆོག་སྤྲུལ་ཆོས་ཀྱི་བློ་གྲོས་སོགས་ཀྱིས་གསོལ་བ་བཏབ་པ་ལྟར་འདུས་སྡེ་ཡོངས་ལ་སྤྱོད་འཇུག་གི་བཤད་ཁྲིད་རྒྱས་པར་གནང༌།སེར་ཤུལ་དགོན་དང༌།ལབ་ཁྲི་འདུ་དགོན།ཆུ་ཧོར་དགོན་སོགས་རི་བོ་དགེ་ལྡན་པའི་དགོན་ཆེན་དག་ཏུ་བྱོན་ནས་སྤྱོད་འཇུག་གི་བཤད་པ་རྒྱ་ཆེར་མཛད་ཅིང༌།དེ་དག་ཀྱང་ཞལ་གསལ་བ་སྒྲ་དག་པ།ཚིག་ཉུང་ལ་དོན་འདུས་པ།གནད་ཉམས་ལེན་གྱི་སྟེང་དུ་བསྐོར་ནས་གསུང་པས་དགེ་བཤེས་ལྷ་རམས་པ་མང་པོས་ཀྱང་བསྔགས་བརྗོད་ཀྱི་མེ་ཏོག་འཐོར་ཞིང་གུས་པས་བཏུད།རྫ་རྒྱལ་དགོན་གྱི་ཉེ་སྐོར་དུ་ཆོས་འཁོར་གྱི་གདན་ས་མཛད།སྐུ་ཐོག་གོང་མ་དཔལ་དགེ་བསམ་གཏན་ཕུན་ཚོགས་ཀྱིས་བཞེངས་པའི་རྡོ་འབུམ་ཆེན་མོ་དེར་ཁ་གསོའི་ཚུལ་དུ་སྔོན་གྱི་རྡོ་འབུམ་ལས་ཀྱང་རྒྱ་ཆེ་ཞིང་དཔངས་མཐོ་བ།འབྱོན་སྒྲོས་ཤིང་སྤུས་ལེགས་པར་ཞིག་བཞེངས་ཏེ་དཔལ་སྤྲུལ་རྡོ་འབུམ་ཞེས་གྲགས་པར་བྱུང༌།རྗེ་འདི་ཉིད་ཀྱི་སྐུ་ཚེ་ཧྲིལ་པོར་རང་དོན་དུ་ཐོས་བསམ་སྒོམ་གསུམ་དང༌།གཞན་དོན་དུ་འཆད་རྩོད་རྩོམ་གསུམ་གྱི་མཛད་པ་ཁོ་ནས་རྣམ་ཐར་བསྐྱངས་ཏེ་མདོ་ཁམས་སྟོད་སྨད་བར་གསུམ་དུ་སྤྱོད་འཇུག་དང༌། བྱམས་ཆོས། སྡོམ་གསུམ། ཡོན་ཏན་མཛོད་སོགས་ཀྱི་འཆད་ཉན་ས་དར་རྡོ་དར་དུ་གྱུར་པ་དང༌། ལྷག་པར་དུ་རྒྱུད་གསང་བ་སྙིང་པོའི་བཤད་རྒྱུན་དང༌། ཀློང་ཆེན་སྙིང་ཐིག་གི་རྩ་རླུང་དང་ཁྲིད་སོགས་ཀྱི་ཆོས་རྒྱུན་སྣུམ་ཟད་ཀྱི་མར་མེ་ལྟ་བུར་གྱུར་སྐབས།
རྗེ་འདི་ཉིད་ཀྱི་བཀའ་དྲིན་ལ་བརྟེན་ནས་སླར་ཡང་ཆེས་ཆེར་དར་བར་གྱུར་ཏེ་འོད་གསལ་རྡོ་རྗེ་སྙིང་པོའི་བསྟན་པའི་རིང་ལུགས་འཛིན་སྐྱོང་སྤེལ་བར་མཛད་པའི་རྗེ་ཡི་ཞལ་སློབ་ཏུ་གྱུར་པ་ཀཿ་ཐོག་སི་ཏུ་མཆོག་སྤྲུལ་ཆོས་ཀྱི་བློ་གྲོས། རྫོགས་ཆེན་སྐུ་ཕྲེང་ལྔ་པ་ཐུབ་བསྟན་ཆོས་རྡོར། རྒྱལ་རོང་ནམ་སྤྲུལ་ཀུན་བཟང་ཐེག་མཆོག་རྡོ་རྗེ། རྡོ་གྲུབ་ཆེན་སྐུ་ཕྲེང་གཉིས་པ་འཇིགས་མེད་ཕུན་ཚོགས་འབྱུང་གནས། སྐུ་ཕྲེང་གསུམ་པ་འཇིགས་མེད་བསྟན་པའི་ཉི་མ། མདོ་མཁྱེན་བརྩེའི་སྲས་བདེ་ཆེན་རིག་པའི་རལ་གྲི། མཆོག་སྤྲུལ་གཞན་ཕན་ཆོས་ཀྱི་སྣང་བ། ཨ་འཛོམ་འབྲུག་སྤྲུལ་འགྲོ་འདུལ་རྡོ་རྗེ། གཏེར་སྟོན་ལས་རབ་གླིང་པ། འཇུ་མི་ཕམ་རྣམ་རྒྱལ་རྒྱ་མཚོ། མཁན་ཆེན་པདྨ་དམ་ཆོས་འོད་ཟེར། སྨྱོ་ཤུལ་ལུང་རྟོག ཨ་ལག་མདོ་སྔགས་རྒྱ་མཚོ་སོགས་རྙིང་མའི་མཁས་གྲུབ་ཀྱི་སྐྱེས་ཆེན་རྣམས་དང༌། གཞན་ཡང་སེ་རའི་གྲྭ་སར་མཁས་གྲགས་ཀྱི་རྒྱལ་མཚན་ཐོབ་པའི་སེར་ཤུལ་ལྷ་རམས་པ་ཐུབ་བསྟན། དཔལ་སྤུངས་བླ་མ་བཀྲ་ཤིས་འོད་ཟེར། འཇུ་བླ་མ་གྲགས་པ་རྒྱལ་མཚན་སོགས་ས་དགེ་བཀའ་བརྒྱུད་ཀྱི་མཁས་གྲུབ་དེ་དག་གིས་གཙོས་སློབ་མ་བསྟན་འཛིན་གྱི་སྐྱེས་བུ་དམ་པ་མང་དུ་བསྐྱངས་པའི་མཐར། རབ་བྱུང་བཅོ་ལྔ་པའི་མེ་ཕག་ལོའི་ས་ག་ཟླ་བའི་ཚེས་བཅོ་བརྒྱད་ཉིན་སྤྱི་ལོ་1887ལོར་སྐུ་གཤེགས་སོ།།
དམ་པ་འདི་ཉིད་ཀྱིས་གདུལ་བྱ་རང་རང་གི་མོས་ངོར་འགྲོ་བའི་བློ་དང་འཚམས་པའི་ལྗགས་རྩོམ་མཐའ་ཡས་པ་ཞིག་གནང་མོད།དེ་དག་ནི་སོ་སོས་རྩིས་ཆེན་བྱས་ཏེ་ཉར་ཚགས་བྱས་པ་ལས། རྗེ་རང་ཉིད་དང༌།ཉེ་གནས་རྣམས་ཀྱིས་གཅིག་ཏུ་བསྡུ་ཉར་མ་བྱས་པས་མང་ཤོས་ཞིག་འཐོར་ནས་པར་དུ་འཁོད་མ་ཐུབ་པར་སྣང༌།སྔོན་མར་པར་དུ་འཁོད་ཅིང༌།དེང་སྐབས་མིག་གི་བདུད་རྩིར་གྱུར་པ་ནི་གླེགས་བམ་དྲུག་བཞུགས་ཡོད་པ་འདི་དག་གོ།གསུང་རྩོམ་དེ་དག་གི་ཁྲོད་དུ་བྱམས་ཆོས་དང༌།སྤྱོད་འཇུགཡོན་ཏན་མཛོད་སོགས་ཀྱི་གཞུང་འགྲེལ་དང་ས་བཅད་ཡོད་ལ།སྔོན་འགྲོའི་ཁྲིད་ཡིག་ཀུན་བཟང་བླ་མའི་ཞལ་ལུང་སོགས་གདམས་ཟབ་གནད་ཀྱི་མན་ངག་གི་ཉམས་ཁྲིད་སྐོར་དང༌།གཏམ་པདྨའི་ཚལ་གྱི་ཟློས་གར་སོགས་གཏམ་ཚོགས་དང་ཞལ་གདམས།བསྟོད་ཚོགས་སོགས་རིགས་སྣ་ཚོགས་ཤིག་མཛད་པ་ཐམས་ཅད་མཁས་ངོམས་ཀྱི་སྤྲོས་པ་མ་མཛད་པར་གདུལ་བྱའི་རྒྱུད་དང་བསྟུན་ནས་གསུངས་པས་ཐུན་མིན་ཁྱད་ཆོས་བླ་ན་མེད་པ་ཞིག་ཡོད་པ་ནི།རྡོ་གྲུབ་ཆེན་འཇིགས་མེད་བསྟན་པའི་ཉི་མས་མཛད་པའི་དཔལ་སྤྲུལ་རྣམ་ཐར་ལས་འདི་སྐད་ཅེས་གསུངས་ཏེ། “མཁས་པས་བརྟགས་ན་དོན་བཟང་བ།བླུན་པོས་ཉན་ཡང་གོ་སླ་བ། གནད་འདུས་ལ་འཛིན་བདེ་བ། རན་ལ་འབྲེལ་ཆགས་པ། སྙན་ལ་རོ་ཉམས་དང་ལྡན་པ། འཇམ་རྩུབ་ཇི་ལྟར་བཤད་ཀྱང་གདམས་ངག་གི་རོ་གཅིག་ཏུ་མཐུན་པར་འབྱུང་བས་མཁས་རྨོངས་བར་མའི་སྐྱེ་བོ་མཐའ་དག་གི་ཡིད་འཕྲོག་པ་ཡོད།”ཅེས་གསུངས་པ་ལྟར་ལགས་སོ།། ཞེས་གསུངས་པ་ལྟར་རོ།།
སྡེ་དགེའི་ལོ་རྒྱུས་སྤྱི་དོན་ཟླ་ཤེལ་གསར་པའི་མེ་ལོང་ལས་ཚན་བཤུས་བྱས།རྩོམ་པ་པོ།སྡེ་དགེ་ཐུབ་བསྟན་ཕུན་ཚོགས།
བསམ་ཚུལ་འབྲི།
སྤོབ་བྲག་རྒྱལ་སྲས་སྤྲུལ་སྐུའི་རྣམ་ཐར།
འབྲེལ་ཡོད་ཀྱི་རྩོམ་གཞན།
-
༧སྐྱབས་རྗེ་ཁམས་སྤྲུལ་རིན་པོ་ཆེ་དགོངས་པ་གཞན་དོན་དུ་གཤེགས་པར་མྱ་ངན་དང་གདུང་སེམས་མཉམ་བསྐྱེད་ཞུ་བཞིན་ཡོད།
-
༈ འཕགས་ཡུལ་རྫོང་སར་བཤད་གྲྭའི་མཁན་ཆེན་ཀུན་དགའ་དབང་ཕྱུག་མཆོག་གི་མཛད་རྣམ།
-
འཛི་སྒར་བླ་མ་དབང་རྡོར་རིན་པོ་ཆེའི་རྣམ་ཐར།
-
མཁན་ཆེན་རྣམ་གྲོལ་རིན་པོ་ཆེ་མཆོག་གི་མཛད་རྣམ།
-
མཁན་ཆེན་པདྨ་ཤེས་རབ་རིན་པོ་ཆེ་མཆོག་གི་མཛད་རྣམ།