༈ རབ་བརྟན་དགེ་ལེགས་ཕུན་ཚོགས་ལགས་ནི།

རབ་རྒྱལ་ལྕགས་བྱ་༡༩༨༡ལོར་མདོ་སྨད་སྡེ་དགེའི་མངའ་ཁོངས་འབྲི་རྒྱུད་རབ་བརྟན་དགོན་དང་ཉེ་བའི་ས་ཆ་ཞིག་ཏུ་འཁྲུངས་ཤིང༌། ལོ་བཅུ་དྲུག་ཐོག་རབ་བརྟན་དགོན་པའི་ཚོགས་ལ་ཞུགས། ལོ་བཅོ་བརྒྱད་ལ་སོན་པ་སྤྱི་ལོ་༡༩༩༨ལོར་དགོན་ཆེན་ལྔ་རིག་བཤད་གྲྭ་བཀྲ་ཤིས་རབ་བརྟན་གླིང་དུ་སློབ་གཉེར་ལ་ཕེབས་ནས། གཞུང་པོད་ཆེན་དྲུག་དང༌། གྲགས་ཆེན་བཅོ་བརྒྱད་གཙོ་བོར་སྨྲོས་པའི། སྒྲ་སྙན་སྡེབ་སྦྱོར། རྩིས་རིག་སོགས་མདོ་སྔགས་རིག་གནས་དང་བཅས་པ་ལ་སྦྱངས་པ་དཔྱིས་ཕྱིན་པར་མཛད་ནས། བཤད་གྲྭ་དེར་ཆུ་ལུག་ལོར་སྐྱོར་དཔོན་དང༌། ཤིང་སྤྲེལ་ལོར་སློབ་དཔོན་ཆེན་མོའི་འགན་བཞེས་ནས་ཕྱོགས་མེད་ནས་ཕེབས་པའི་སློབ་མའི་ཚོགས་ལ་མདོ་སྔགས་རིག་པའི་ཆོས་འཁོར་བར་མེད་དུ་སྐོར་བ་དང༌། ཞོར་ལ་དགེ་ལེགས་འདོད་འཇོའི་དཔེ་ཚོགས་ཞེས་པའི་གླེགས་བམ་གྱི་ཕྲེང་ཚོགས་ཆེན་མོ་རྩོམ་སྒྲིག་མཛད་བཞིན་ཞལ་བཞུགས་པའོ། །ཁྲོམ་ཐར་འཇམ་དབྱངས་ཡོན་ཏན་རྒྱ་མཚོས།

  ༈ རབ་བརྟན་དགེ་ལེགས་ཕུན་ཚོགས་དང༌། ཉི་མ་བློ་གསལ། དབྱངས་ཅན་སྙེམས་པའི་ལང་ཚོ་བཅས་ནི་ཁོང་གི་མཚན་གྱི་རྣམ་གྲངས་ཡིན་ལ། ལྕགས་བྱ་སྤྱི་ལོ་༡༩༨༡ལོའི་ནོར་འཛིན་གྱི་དཀྱིལ་འཁོར་ལ་མ་རྒད་ཀྱི་ཁུ་བས་བྲན་པའི་དབྱར་གཞུང་ཞིག་སྟེ་བོད་ཟླ་ལྔ་པའི་ཚེས་བཅུ་བདུན་ནི་འབྲི་ཀླུང་གསེར་ལྡན་སྒེག་མོའི་གཡས་ཕྱོགས་སུ་ཁོང་གི་ཚེ་སྲོག་གི་མྱུ་གུ་གསར་དུ་འབུས་པའི་དུས་བཟང་ཡིན། ལང་ཚོའི་འདབ་ལོ་རིམ་གྱིས་རྒྱས་པའི་དུས་དང་བསྟུན་དབྱངས་གསལ་སོ་བཞིའི་རོལ་དབྱངས་དེ་གཡང་དཀར་ལུག་གི་འབའ་སྒྲ་དང༌། ཐུལ་དཀར་འབྲི་མོའི་ངུར་སྒྲ། འདོ་དྲུག་རྟ་ཕོའི་མཚེར་སྒྲ་དང་ལྷན་དུ་དཀྲོལ་བས་ཁོར་ཡུག་གི་ལྷིང་འཇག་དལ་གྱིས་དཀྲོག །རང་ལོ་བཅུ་བཞིའི་ཐོག་བཅོས་མིན་གྱི་ངེས་འབྱུང་ཞིག་གམ་སྔོན་སྨོན་གྱི་མཚམས་སྦྱར་ཞིག་ལ་བརྟེན་ནས་ཐུགས་རྗེའི་ཕྱག་རིང་ཡོངས་ལ་རྐྱོང་པའི་མཁན་སློབ་གྲངས་ཚང་བའི་དབུས་སུ་གནག་སྣུམ་གྱི་སྐྲ་ལོ་རྣོ་དབལ་གྱི་ཟས་སུ་བསྟབས་ནས་ངུར་སྨྲིག་ངུར་སྨྲིག་རྒྱལ་མཚན་འཆང་བའི་བརྟུལ་ཞུགས་དང་དུ་བླངས། རང་ལོ་བཅོ་བརྒྱད་ཐོག་རིགས་ཞེན་གྱི་སྙིང་སྟོབས་སམ་རྟོག་སད་ཀྱི་སྤོབས་པས་བསྐུལ་ཏེ་ས་དཀར་བསྟན་པའི་འབྱུང་གནས་དཔལ་སྡེ་དགེ་ལྷུན་འགྲུབ་སྟེང་གི་ཆོས་གྲྭ་ཆེན་མོ་མཛེས་ཕུ་ལྔ་རིག་བཤད་གྲྭ་བཀྲ་ཤིས་རབ་བརྟན་གླིང་དུ་ཕེབས་ཏེ་བགྲང་བྱ་བཅུ་ཡི་རིང་ལ་ཤེས་རབ་ཀྱི་རྟ་མཆོག་བརྩོན་འགྲུས་ཀྱི་ལྕག་གིས་བསྐུལ་ནས་ལྔ་རིག་གི་ཐང་ཆེན་ཡངས་པོར་བག་ཡངས་སུ་རྩེན་པའི་སྐལ་བ་བྱུང༌། སྤྱི་ལོ་༢༠༠༡ལོ་ནས་བཟུང་རང་གི་ཁོར་ཡུག་ན་འཚོ་བའི་བློ་གསལ་རྐང་པ་དྲུག་པའི་ཁྱུ་ཚོགས་ལ་ཤེས་རིག་སྦྲང་རྩིའི་བགོ་བཤའ་ཕངས་མེད་དུ་བསྩལ་བས་རྣམ་དཔྱོད་ཀྱི་ལུས་ཟུངས་བརྟས་པའི་བརྒྱུད་འཛིན་མང་དུ་བྱུང༌། ཁོང་གིས་གསུང་རྒྱུར་ཉེར་ལེན་གྱིས་འཕངས་པའི་ལྔ་ཕུང་འདི་ཉིད་འབྱུང་བཞིའི་ཀློང་དུ་རྒྱས་མ་བཏབ་ཀྱི་བར་དུ་ངུར་སྨྲིག་གི་འཇིག་རྟེན་འདི་ནས་དྲི་མེད་རྒྱལ་བསྟན་རིན་པོ་ཆེ་ལ་ཞབས་ཞུ་ཅི་ནུས་རེ་དང༌། ང་ཚོའི་མེས་པོ་ཚོའི་བཞུད་ཟིན་པའི་བཤུལ་ལམ་རིང་མོ་དེ་དྲང་བདེན་དང་སྙིང་སྟོབས་ཀྱིས་འཚོལ་རྒྱུ་དེ་ཡིན་ལ། ལྷ་ལྡན་ཕོ་བྲང་དམར་པོའི་གཟི་བརྗིད་དེ་སྔར་ལྟར་བརྟན་དགོས་ལ། རི་བོ་ཧི་མ་ལ་ཡི་བཀྲག་མདངས་དེ་སྔར་ལྟར་འཚེར་དགོས། ཚང་མས་ཤེས་རིག་མངར་མོའི་རྩི་བཅུད་མྱོང་དགོས་ལ། ཟུངས་ཁྲག་དྲོན་མོའི་མཆོད་པ་བཤམས་དགོས་ཟེར། ཁོང་གིས་ང་ཚོར་གནང་བའི་ལེགས་སྐྱེས་གཅིག་ཕ་སྐད་གཙང་མའི་ལྗགས་རྩལ་མ་ཉམས་པའི་དགེ་ལེགས་འདོད་འཇོའི་དཔེ་ཚོགས་ཞེས་པ་འདི་ཡིན་ལ། འདི་ལ་བདག་གིས་ངོ་དགའ་དང་ཟོལ་བསྟོད་ཙམ་མ་ཡིན་པར་གངས་རི་དཀར་པོ་ལ་གཟི་བྱིན་བསྣོན་པའི་གླེགས་བམ་ཞེས་པའི་ཆོ་ལོ་ཞིག་འབུལ་བར་འདོད་དོ། །

   ༈ དུས་རབས་ཀྱི་དཀྱོག་མཚམས་ཤིག་ནས། མི་རིགས་ཤིག་དང༌། ཤེས་རིག་ཅིག་གི་སླད་དུ། ཞུམ་མེད་ཀྱི་སྤོབས་པ་བསྐྱེད། ཟློག་མེད་ཀྱི་དམ་བཅའ་བཞག་ནས། འདི་ལྟར་འཚར་ལོངས་བྱུང་སོང༌། གངས་ཅན་པ་དག །མིག་དཔེར་ལྟོས་དང༌། དགའ་འོས་པ་ཞིག་མིན་ནམ། ལོ་དུ་མ་ཞིག་ལ་འབད་པ་ཆེར་བསྐྱེད་ཀྱིས། ཤེས་རིག་གི་འདབ་སྟོང་བཞད་པའི་དགའ་ཚལ་ནས། ཡོན་ཏན་གྱི་གཤོག་ཟུང་རྒྱས་ཏེ། སློབ་དཔོན་དང༌། མཁན་པོ་ཡི་ཆོ་ལོ་བཞེས་ཏེ། ཤེས་ལྡན་དུ་མ་ལ། ལྔ་རིག་གི་བསྒོ་བཤའ་གནང་བ་མ་ཟད། བོད་པ་ཚང་གི་ཆེས་ཐུན་མོང་མ་ཡིན་པའི་རིག་གནས། ཆེས་ཉག་ཕྲ་བའི་རིག་གནས། ཆེས་མང་ཚོགས་ལ་ཁ་ཕྱོགས་ཤིང༌། དུས་རབས་ཀྱི་ཚབ་མཚོན་པའི་རིག་གནས་ཏེ། བོད་དམངས་ཁྲོད་ཀྱི་རིག་གནས་མང་པོ་ཞིག །དུས་རབས་འདི་དང༌། སྤྱི་ཚོགས་འདིར་ཁ་བྲལ་ཏེ། རྩ་མེད་དུ་སོང་དང་འགྲོ་བཞིན་པ་ཐུགས་ལ་བརྣག་སྟེ། དཀའ་མོའི་ཚེགས་དང༌། དཀོན་མོའི་རྒྱུ་ལ་མི་འཛེམ་པར་རིག་གནས་གང་མང་ཞིག་འདི་ལྟར་ཉེན་ཁ་ལས་བསྐྱབ་པ་ངོ་མ་བཀའ་དྲིན་ཆེ། མཇུག་ཏུ་མུ་ནས་མུ་འཐུད། རླབས་ཆེན་གྱི་བྱ་བ་རྣམས་མཐར་ཕྱིན་ཡོང་བའི་ཤིས་སྨོན་དང་བཅས། གང་ལ་འབྲེལ་བ་ཆེས་ཟབ་པའི་ཁྲོམ་གྲྭ་འཇམ་བློ་ནས་བྲིས་པ་ལགས།

  ༈ བཅོས་མའི་ངེས་འབྱུང་ཞིག་གམ། སྔོན་བསགས་ཀྱི་ལས་སྨོན་ཞིག་གིས། མཉམ་མེད་ཐུབ་པ་མཆོག་གི་རྗེས་སུ་ཞུགས་ཤིང༌། བཅུ་ཕྲག་རིག་པའི་གནས་ཀྱི་བསྒོ་སྐལ་ཡང་མི་དམན་པ་ཐོབ། ཐལ་ངག་གི་སྒྲ་དབྱངས་དང་ལྷན། ཤེས་རིག་ལ་ངེས་ཤེས་བསྐྱེད་ཅིང༌། མི་རིགས་ལ་དུང་ཞེན་ལྕི་བས། ལུགས་ཟུང་གི་གནས་ལ་བསྐྱོད་པའི་བློ་མིག་མི་གསལ་ཡང༌། ངའི་ཚེ་སྲོག་གི་སྐུད་པ་ལ་གནོད་འཚེ་མ་བྱུང་ན། ངའི་གུ་ཡངས་ཀྱི་བསམ་བློ་ལ་བཀག་རྒྱ་མ་ཐེབས་ན། ངའི་འཁོས་ཆུང་གི་ཁྱིམ་གཞིས་ལ་ཤུགས་རྐྱེན་མ་ཐེབས་ན། ངའི་མི་ཚེ་ཡི་བརྒྱུད་རིམ་ལ་འགྱུར་ལྡོག་མ་བྱུང་ན། སྤོབས་པ་ཆེར་བསྐྱེད་ཀྱིས། རིགས་གཅིག་པའི་གདོང་དམར་སྤུན་ཟླ་ཡོངས་ལ་ལེགས་སྐྱེས་ཕྲ་མོ་ཞིག་སྟེ། དགེ་ལེགས་འདོད་འཇོའི་དཔེ་ཚོགས་མུ་ནས་མུ་འཐུད། དབྱངས་གསལ་སོ་བཞིའི་རང་སྒྲ་ལ་དབྱངས་རྟ་ཇེ་སྙན་དང༌། ཁ་བའི་རྩམ་པ་དཀར་པོ་ལ་བྲོ་བ་ཇེ་ཞིམ་དུ་བཏང་ནས་འབུལ་རྩིས་ཡོད། རྩོམ་པ་པོས།

  ༈ དུས་རབས་ཁད་ཀྱིས་འགྱུར་ཞིང་གསར་རྙིང་ལྟ་བའི་འགལ་འདུའི་རླུང་དམར་དྲག་ཏུ་འཚུབ་པའི་དུས་འདིར། ང་འདི་ལྟར་འགྲེང་ཞིང༌། འདི་ལྟར་བསྐྱོད་བཞིན་ཡོད། འདི་ནི་མི་རིགས་ཤིག་གི་ལས་དབང་དང༌། རིག་གནས་ཤིག་གི་དར་རྒུད་ཀྱི་ཆེད་ཡིན་ཞེས་བཤད་ན་ཅུང་ཐལ་ཆེ་མོད། མི་བུ་ཞིག་གི་སྙིང་སྟོབས་དང༌། དུས་རབས་ཤིག་གི་འགན་ཁུར་ཡིན་ཞེས་བཤད་ཆོག་ཆོག་ཡིན། ལྷག་བསམ་འོ་མའི་མཚོ་ལྟར་ཟབ་ཅིང༌། ང་དང་ངའི་ངག་རྩོམ་ལ་དོ་སྣང་དང༌། རྒྱབ་སྐྱོར་གནང་བའི་རྒྱ་ཆེའི་གྲོགས་པོ་མང་པོ་ཞིག་གི་ཐུགས་ཁུར་དང༌། རོགས་རམ་ལ་བརྟེན། དེ་རིང་ཡང་དགེ་ལེགས་འདོད་འཇོའི་དཔེ་ཚོགས་ལ་གསོན་ཤུགས་ཅུང་ཟད་སྣོན་པའི་དཔེ་དེབ་འདི་ཡང༌། རྣམ་པ་ཚོའི་སྤྱན་སྔར་འགྲེམ་པའི་སྐལ་བཟང་ལ། གུས་པོ་དགའ་ཞིང་སྤྲོ་བའི་རྣམ་པས་དྲི་མེད་ཁ་བཏགས་ཤིག་གི་ཚབ་མཚོན་དུ་བྱས་ཡོད། འདི་ལྟར་མུ་ནས་མུ་མཐུད། འདས་སོང་གི་མེས་པོ་དམ་པའི་ཤུལ་བཞག་ལ་ཡིད་སྨོན་འཆོར་བཞིན་མིག་དཔེར་བཟུང༌། ད་ལྟའི་གངས་ཅན་པའི་སྤྱི་ཚོགས་ལ་ཐེ་གཏོགས་བྱ་བཞིན་སྙིང་རླུང་བསླངས། མ་འོངས་པའི་གངས་ཕྲུག་ཚོའི་བགོ་སྐལ་ལ་བསམ་བཞིན། ཐོབ་དང་གོ་ས། དཔལ་དང་འབྱོར་པ་གང་གི་ཆེད་མ་ཡིན་པར། བསམ་གཞིག་བརྩེགས་མའི་བར་སྟོང་ནས་རྙེད་པའི་མང་པོ་ཞིག་འཇོག་རྩིས་ཡོད། དེ་བས་ཐེངས་རྗེས་མར་ཡང་ཡང་མཇལ་ཡོང༌། རྩོམ་པ་པོས།

  མདོ་ཁམས་སྡེ་དགེའི་ཡུལ་དུ་དར་བའི་ཞབས་བྲོའི་རྣམ་པར་བཞག་པ་ལེགས་སྨོན་ནཱ་དའི་རོལ་མོ། སྡེ་དགེའི་མདུན་བྲོའི་སྐོར་ལ་བྲོ་སྣ་ཉིས་བརྒྱ་རེ་དགུ། བོན་སྒྲུང་ལྡེའུ་གསུམ་གྱི་ནང་ཚན་ལྡེའུའི་བྱུང་རིམ་ལས་འཕྲོས་ཏེ་ཁེད་ཀྱི་རིམ་པ་བསྟར་ཆགས་སུ་བཀོད་པ་མེས་གཏམ་ནོར་བུའི་ཕྲེང་བ། མདའ་དར་བཤད་པ་མདོར་བསྡུས། གཉེན་སྟོན་དང་འབྲེལ་པའི་དར་བཤད་མེས་པོའི་ཞལ་རྒྱུན། མདོ་ཁམས་ཨ་ཕྱུག་ཡུལ་གྱི་གཉེན་དར་གྱི་བཤད་པ། བག་མའི་རྟ་ཁ་ལེན་དུས་ཀྱི་བཤད་པ། མེས་པོའི་གྱང་གླུ་ཁུ་བྱུག་མགྲིན་སྒྲ། བག་བཤད་བསྡུས་པ་དགེ་ལེགས་ཀུན་འབྱུང༌། སོ་ནམ་ལས་ཀ་དང་འབྲེལ་བའི་བཤད་པ། ཤྭ་བཤད་མེས་པོའི་ཤགས་འདེབས། ཐེ་གེ་རྩེ་ཚུལ་ཕྱི་མོའི་ལག་ཤེས། གཟིངས་བཅའ་ཞིང་འདྲེན་ཚུལ་གྱི་ཡི་གེ། སྡེ་དགེའི་དམངས་ཁྲོད་གཏམ་རྒྱུད་ཀྱི་སྐོར་འདྲ་མིན་ང་གསུམ། ཁམས་པའྀ་གནའ་རབས་ཀྱི་ཟེར་སྲོལ་འགའ་ཞིག་ཕྱོགས་གཅིག་ཏུ་བརྗོད་པ་མེས་པོའི་ཞལ་ལུང༌། བྱ་སྒྲུང་མཐོང་བ་འཛུམ་ཤོར། མ་ཎི་བསྐུལ་བ་ཐར་པའི་ལམ་སྟོན། འབྲས་དཀར་འདོད་དོན་ཀུན་འགྲུབ། འབྲས་དཀར་བསམ་པའི་དོན་འགྲུབ། འབྲས་དཀར་བཀྲ་ཤིས་དགེ་ལེགས། འབྲས་དཀར་བཀྲ་ཤིས་དོན་འགྲུབ། ཁྲ་མོ་གླིང་དང་འབྲེལ་བའི་གཞི་བདག་གསོལ་མཆོད། ཨོ་རྒྱན་སྒོམ་ཞུ་ཁྲ་ཆུང་གི་བཤད་པ། ཚེ་མི་རྟག་པ་བསྒོམ་པའི་གླུ་ཆུང༌། ཆུང་གཞོན་རྒས་གསུམ་གྱི་ལོ་རྒྱུས་དྲན་པའི་གླུ་ཆུང༌། ཡུང་མའི་ཁྱད་ཆོས་བརྗོད་པ། །ཕྱིང་པ་འཇོག་གླུ། གཞན་ཡང་གླུ་དང༌། མགུར་མོ། གཏམ་དཔེའི་སྐོར་སོགས་ཤིན་ཏུ་མང་བ་ཞིག་ཡོད་དོ། །»

  འཛམ་གླིང་སེང་ཆེན་སྐྱེས་བུའི་རྟོགས་པར་བརྗོད་པ་འཁྲུངས་གླིང་པདྨའི་དགའ་ཚལ་དང་རྨ་ས་བཟུང་དར་དཀར་མདུད་པ་བཅས་ལེགས་སྒྲིག་བྱས་པ། མདོ་ཁམས་སྡེ་དགེའི་ཡུལ་གྱྀ་ཁྲ་མོ་གླིང་དང་འབྲེལ་བའི་རྗེས་ཤུལ་འགའ་ཞིག་གསལ་བར་བརྗོད་པ་སེང་ཆེན་དགྱེས་པའི་རོལ་མོ། འཛམ་གླིང་གེ་སར་རྒྱལ་པོའི་འཁྲུངས་ཡུལ་ས་སྐྱིད་ལྕི་སོས་ཡག་གིས་གཙོས་རྫ་ཆུའི་རྒྱུད་ན་གླིང་རྗེའི་མཛད་རྗེས་ཇི་ལྟར་བཞུགས་པ་རྣམས་ཕྱོགས་གཅིག་ཏུ་བརྗོད་པ་ངོ་མཚར་གཏམ་གྱི་མཆོད་སྤྲིན། མདོ་ཁམས་འདན་མའི་ཡུལ་དུ་བཞུགས་པའི་གླིང་དཀར་ཕུ་ནུ་རྣམས་ཀྱི་གནའ་ཤུལ་དང་འབྲེལ་བའི་གཏམ་སྔོན་བྱུང་གསལ་བའི་མེ་ལོང༌། འཁྲུངས་གླིང་ལས་གསལ་བའི་འགོག་ཡུལ་གང་ཡིན་བཤད་པ་འགོག་ཡུལ་གསལ་བའི་མེ་ལོང༌། སྒ་སྟོད་ཁྲ་ཁོག་ཡུལ་དུ་བཞུགས་པའི་སྤྱི་དཔོན་རོང་ཚ་ཁྲ་རྒན་གྱི་རྗེས་ཤུལ་དག་བརྗེད་ཐོར་བཀོད་པ་ཁྲ་ཡུལ་གསལ་བའི་མེ་ལོང༌། »གླིང་རྗེ་སེང་ཆེན་མི་ཡི་ཉི་མའི་འཁྲུངས་ཡུལ་ས་སྐྱིད་སྐྱིད་སོས་ཡག་ལ་ཅུང་ཟད་བསྔགས་པ་དོན་འགྲུབ་ཝེར་མ་དགྱེས་པའི་མཆོད་སྤྲིན། གེ་སར་སྒྲུང་གི་ས་མིང་ཞིབ་འཇུག་བཀླགས་པའི་ཞར་ལ་ཤོར་བའི་གཏམ་མ་དག་རྙོག་མ་བགྲུང་པའི་ཀེ་ཏ་ཀ། «མ་ཡུམ་འགོག་བཟའ་ལྷ་མོའི་འབྲི་མོ་བཞོ་དབྱངས། སྟག་རོང་ཚང་གི་སྦྲ་བཤད། ཁྲ་མོ་གླིང་དང་འབྲེལ་བའི་གཞི་བདག་གསོལ་མཆོད། ཨོ་རྒྱན་སྒོམ་ཞུ་ཁྲ་ཆུང་གི་བཤད་པ། གླིང་སྒྲུང་པ་གྲགས་ཅན་གླིང་བློན་འགྱུར་མེད་ཐུབ་བསྟན་འཇམ་དབྱངས་གྲགས་པའི་ངོ་སྤྲོད། ལྷ་གླིང་གབ་རྩེ་དགུ་སྐོར་དང་འཁྲུངས་གླིང་མེ་ཏོག་ར་བ་རྟ་རྒྱུག་ནོར་བུ་ཆ་བདུན་སོགས་ལས་བཏུས་པའི་ཆོས་ཀྱི་རྣམ་གྲངས། གླིང་གེ་སར་རྒྱལ་པོའི་རིགས་དང་འཁྲུངས་ཡུལ་ལ་རགས་ཙམ་དཔྱད་པ་ཞེས་པ་ལ་ལན་དུ་བརྗོད་པ་གཟུར་གནས་དགྱེས་པའི་རོལ་མོ། སྐྱེས་མཆོག་དམ་པ་རྣམས་ཀྱིས་མཛད་པའི་གླིང་རྗེ་གེ་སར་རྒྱལ་པོའི་ཆོས་སྐོར་གྱི་དཀར་ཆག་ཨུཏྤལ་ལའི་ཕྲེང་བ། མདོ་ཁམས་ས་ཡི་རྗེ་བོ་གླིང་དཀར་ཆོས་རྒྱལ་ཆེན་པོའི་རྒྱལ་རབས་ཇི་ལྟར་བྱོན་ཚུལ་འཇིག་རྟེན་ལུགས་ཀྱི་རྣམ་བཞག་དང་བཅས་པ་ཅུད་ཟད་བཤད་པ་སྐལ་བཟང་ལྷ་ཡི་དགའ་ཚལ། གླིང་དཀར་ཆོས་རྒྱལ་ཆེན་པོའི་རིགས་རུས་ཀྱི་ཁྱད་པར་དང་གདུང་རབས་བཅས་མདོར་ཙམ་བརྗོད་པ། གླིང་གཏེར་རྗེ་དྲུང་རིན་པོ་ཆེ་པདྨ་གར་དབང་འགྲོ་འདུལ་རྩལ་གྱི་ཟབ་ཆོས་སྐོར་གྱི་དཀར་ཆག །གླིང་གཏེར་པདྨ་བཞད་པ་རྩལ་ལམ་ས་སྐྱོང་གཏེར་ཆེན་བླ་མ་ཆེན་པོ་དབང་ཆེན་བསྟན་འཛིན་ཆོས་རྒྱལ་གྱི་ཚེ་ཡུམ་ཙཎྜ་ལཱིའི་ཆོས་སྐོར་གྱི་དཀར་ཆག་བཅས་ཡོད་དོ། །

ཕུན་སུམ་ཚོགས་པ་ལྔ་དང་སྦྱར་བའི་བཤད་པ་དགེ་ལེགས་བསོད་ནམས་རྒྱས་པའི་སྤྲིན་ཆེན། ཕུན་ཚོགས་བཤད་པ་ཤིན་ཏུ་བསྡུས་པ། ཡིད་སྤྲུལ་མཎྜལ་གྱི་རྣམ་པར་བཤད་པ་ཀུན་ཏུ་བཟང་པོའི་མཆོད་སྤྲིན། ལེགས་འབུལ་བསྟབས་པའི་ཡི་གེ་སྣ་ཚོགས་ཕྱོགས་སུ་བསྡོམས་པ་ཆགས་ལྡན་དགའ་བ་བསྐྱེད་པའི་མཛའ་མོ། དཔལ་ས་སྐྱའི་གདུང་སྲས་རིན་པོ་ཆེ་ཟུང་ལ་ལེགས་འབུལ་སྟོབས་པའི་ཡི་གེ་གཉིས། ཉེར་མཁོའི་འཕྲིན་ཡིག་གི་དཔེར་བརྗོད་བློ་གསལ་མགུལ་རྒྱན། བཟོ་རིག་པའི་འབེལ་གཏམ་ཡིད་འཕྲོག་སྒེག་མོའི་དོ་ཤལ།

༼གཞུང་བཤད་ཟིན་བྲིས་སོགས་ཀྱི་སྐོར།༽

བསམ་ཚུལ་འབྲི།

མིང་། (required)

གློག་ཕྲིན་ཁ་བྱང་།(required)