རྙིང་མ་པའི་དགོན་པ་གཞན།
༥༽རྡོར་བྲག་དགོན་ནི།རབ་བྱུང་གཉིས་པའི་མེ་རྟ་ལོ་༼སྤྱི་ལོ་༡༡༢༦༽རྡོར་བྲག་རིག་འཛིན་ཆེན་པོ་སྐལ་བཟང་ཐེག་མཆོག་བསྟན་པའི་རྒྱལ་མཚན་གྱིས་ཕྱག་བཏབ།སྔོན་དུས་མཆོད་སོགས་སྐབས་སུ་དགེ་འདུན་པ་བརྒྱ་དང་བརྒྱད་ཅུ་རེ་ཙམ་དང་ད་ལྟ་དགོན་བཞུགས་གྲྭ་པ་བཞི་བཅུ་ཡོད།
༦༽ཡ་ཆེན་དགོན་ནི།རབ་བྱུང་བཞི་པའི་དུས་སུ་ཀ་དམ་པ་བདེ་གཤེགས་ཀྱི་སློབ་བུ་བྱང་ཆུབ་འབུམ་པས་ཁྲོམ་ཡ་ཆེན་སུམ་མདོ་ཞེས་པའི་ས་ཆ་རུ་ཐོག་མར་ཆོས་སྒར་བཏབ།ད་ལྟར་མཁན་ཨ་ཁྱུང་གིས་ལུང་རྟོགས་ཀྱི་བསྟན་པ་འཕེལ་རྒྱས་སུ་བཏང་ནས་ཇོ་སེར་སྟོང་ཕྲག་ཁ་ཤས་འདུས་ཡོད།
༧༽རྩ་ཤུལ་དགོན་ནི།རབ་བྱུང་བཅུ་གསུམ་པའི་ལྕགས་ཁྱི་ལོ་༼སྤྱི་ལོ༡༧༩༠༽རྒྱལ་བ་ཀཿཐོག་པའི་དགེ་རྩེ་པཎྜི་ཏ་འགྱུར་མེད་ཚེ་དབང་མཆོག་གྲུབ་ཀྱི་ཕྱག་བཏབ།ཆུ་སོགས་ཀྱི་གནོད་རྐྱེན་གྱིས་རིག་འཛིན་ཀློང་གསལ་སྙིང་པོའི་ཡང་སྤྲུལ་གྲུབ་དབང་ལུང་རྟོགས་བསྟན་པའི་རྒྱལ་མཚན་སོགས་ཀྱི་བཀའ་ལུང་ལྟར།སྤྱི་ལོ་༡༩༩༨ལོར་ད་ལྟའི་གནས་འདི་རུ་སྤོས།སྔོན་དགེ་འདུན་པ་བརྒྱ་དང་སུམ་ཅུ་ལྷག་དང་ད་ལྟ་དགུ་བཅུ་ཙམ་ཡོད།
༨༽ཨེ་ཝཾ་དགོན་ནི།གནམ་ལ་ཨེ་དང་ས་ལ་ཝཾ་ཡིག་ཚང་བའི་གནས་དེ་ན་ཚ་སའི་བླ་མ་ཤེས་རབ་རྒྱ་མཚོས་སྤྱི་ལོ་༡༢༠༠ལོ་ཡས་མས་སུ་ཕྱག་བཏབ།བླ་གྲྭ་བརྒྱ་ལྷག་ཡོད།
༩༽རྒྱལ་རོང་དགོན་ནི།རབ་བྱུང་བཅུ་གཉིས་པའི་ཆུ་ཁྱི་ལོ་༼སྤྱི་ལོ་༡༧༤༢༽གྲུབ་དབང་པདྨ་ཀུན་གྲོལ་རྣམ་རྒྱལ་བཟང་པོ་དགུ་ལོ་སོ་བདུན་སྟེང་ཐོག་མར་ཕྱག་བཏབ།སྡེ་དགེ་ཆོས་རྒྱལ་རིམ་བྱོན་གྱིས་ཐུགས་ཁུར་གཟིགས་སྐྱོང་འོགརྫ་སྟོད་ཤོག་ཁའི་ས་ཞིང་དང་རྫ་སྨད་ཕྱོགས་ཁའི་ས་ཞིང་དེ་དག་དགོན་སྡེ་བ་ཡིད་ལྷུང་སྤྱིའི་ཁོངས་གཏོགས་མཛད།དེའི་སྐབས་སུ་རྫོང་དཀར་དམར་གཉིས་སུ་དབྱེ།རྫོང་དཀར་པོ་ནི་ཡིད་ལྷུང་ལྷ་རུ་ཚང་དང་།རྗེས་སུ་དཔོན་པོ་བྱ་རྒོད་ཚང་།རྫོང་དམར་པོ་ནི་སྔ་མ་རྒྱལ་རོང་ཚང་ཡིན།དཀར་མདར་གཉིས་ཀྱིས་བསྟན་པ་དར་རྒྱས་སུ་བཏང་།དགེ་འདུན་པ་ཉིས་བརྒྱ་ལྷག་ཡོད།
༡༠༽ལྷ་འབྲང་དགོན་ནི།སྡེ་དགེ་ཆོས་རྒྱལ་ཁྲི་རབས་དང་པོ་བླ་ཆེན་བྱམས་པ་ཕུན་ཚོགས་སོགས་ཀྱི་མཐུན་རྐྱེན་ལ་བརྟེན་ནས་རིག་འཛིན་འཇའ་ཚོན་སྙིང་པོའི་དངོས་སློབ་དཀོན་མཆོག་བསྟན་འཛིན་གྱིས་སྤྱི་ལོ་༡༦༡༦ལོར་ཕྱག་བཏབ།སྔོན་ཆད་གྲྭ་པ་བརྒྱད་ཅུ་ལྷག་དང་ད་ལྟ་སུམ་ཅུ་ལྷག་ཡོད།
༡༡༽བརྩེ་ཆེན་ཆོས་གླིང་ནི།གཡུ་སྒྲ་སྙིང་པོ་དང་བཻ་རོ་ཙ་ན་རྣམ་གཉིས་གནས་འདིེར་ཕེབས་ནས་ཐོག་མར་སྒྲུབ་པ་སྙིང་པོ་མཛད་དེ་སྒྲུབ་གནས་སུ་བྱིན་གྱིས་བརླབ།བར་དུ་བཻ་རོའི་ཕྱག་མཁར་དང་གཡུ་སྒྲའི་དབུ་ཞྭ་ཞིག་གཏེར་དུ་སྦས།སྒྲུབ་གནས་སེང་གེ་མཆེད་བརྒྱད་དུ་གྲགས།ཡུལ་མི་ཀུན་གྱིས་བཻ་ཕུག་ཅེས་འབོད་དོ།།
༡༢༽རྫ་ལེགས་དགོན་དགོན་ནི།རྫོགས་ཆེན་དཔོན་་སློབ་འདྲེན་མཆོག་ནམ་མཁའ་འོད་གསལ་གྱིས་སྤྱི་ལོ་༡༧༢༤ལོར་ཕྱག་བཏབ།སྔོན་དགེ་འདུན་པ་ཉིས་བརྒྱ་སུམ་ཅུ་ལྷག་དང་ད་ལྟ་བདུན་ཅུ་ཙམ་ཡོད།
༡༣༽རྫོང་མགོ་དགོན་ནི།རྗེ་བླ་མ་དམ་པ་པདྨ་འགྲོ་འདུལ་རྩལ་མཆོག་གིས་ཐོག་མར་ཕྱག་བཏབ།སྔོན་ཆད་གྲྭ་པ་སུམ་བརྒྱ་ལྷག་དང་ད་ལྟ་བརྒྱ་དང་སུམ་ཅུ་ཙམ་ཡོད།
༡༤༽གེ་སར་ལྷ་ཁང་ནི།གླིང་རྗེ་གེ་སར་རྒྱལ་པོའི་འཁྲུངས་ཡུལ་སྐྱིད་སོས་ཡག་གི་མདོ་རུ་ཉག་བླ་བསོད་རྒྱལ་རིན་པོ་ཆེས་གེ་སར་ལྷ་ཁང་ཞིག་བཞེངས།རྗེས་སུ་རིག་གནས་གསར་བརྗེའི་སྐབས་སུ་རྟེན་དང་བརྟེན་པ་བཅས་པ་བརླངས་ཤིང་།ཕྱིས་སྤྱི་ལོ་༡༩༨༤ལོ་ནས་བཟུང་།དཔལ་བརྒྱ་རིན་པོ་ཆེས་ཐུགས་ཁུར་འོགགེ་སར་རྗེས་དྲན་ཁང་ཞེས་པ་ཉམས་གསོ་དར་རྒྱས་བཏང་།སྔོན་བླ་བསྐོེས་མཁན་པོ་རེ་དང་གྲྭ་བདུན་བརྒྱད་རེ་དང་ད་ལྟ་མགོན་བླ་དང་གྲྭ་པ་བཅུ་ཕྲག་ཙམ་ཡོད།
༡༥༽ཨོ་གུར་དགོན་ནི།རིག་འཛིན་ཉི་མ་གྲགས་པའི་དངོས་སློབ་སོག་པོ་ཨ་གུར་བླ་མ་བསོད་ནམས་བཀྲ་ཤིས་སྡེ་དགེ་ཆོས་རྒྱལ་སངས་རྒྱས་བསྟན་པ་དང་མཆོད་ཡོན་དུ་གྱུར་ནས་ཆོས་རྒྱལ་གྱིས་ས་གཞི་འབངས་འཁོར་དང་བཅས་པ་ཕུལ་ཞིང་།སྡེ་དགེའི་ཡིད་ལྷུང་འབུམ་སྐྱབས་ཀྱིས་སྦྱིན་བདག་མཛད་ནས་ཨོ་གུར་བླ་མས་རབ་བྱུང་བཅུ་གཅིག་པའི་ཤིང་གླང་ལོ་༼སྤྱི་ལོ་༡༧༨༤༽ཐོག་མར་ཕྱག་བཏབ།སྔོན་གྲྭ་བརྒྱ་ཙམ་དང་ད་ལྟ་བརྒྱད་ཅུ་མ་ཟིན་ཞིག་ཡོད།
༡༦༽གཡག་ཟེ་དགོན་ནི།ཆེས་སྔ་བའི་དུས་ནས་གནས་འདིར་བོན་དགོན་ཞིག་ཡོད་པ་འཇིག་སོང་བར་གྲགས།རྗེས་སུ་རབ་བྱུང་བཅུ་གཉིས་པའི་མེ་མོ་ཡོས་ལོར་༼སྤྱི་ལོ་༡༦༨༧༽སེ་རའི་བླ་མ་ཨོ་རྒྱན་རྒྱ་མཚོའམ་གཙང་གཡག་སྡེའི་བྱམས་པ་ལྷུན་གྲུབ་ཀྱིས་ཡིད་ལྷུང་སའི་ཐིག་ལེ་འཕགས་མཆོག་ཕྱག་ན་པདྨའི་མདུན་རི་གཡག་གི་ཟེ་བ་དང་འདྲ་བའི་གནས་སུ་ཡིད་ལྷུང་ལྷ་རུ་དཔོན་གྱིས་སྦྱིན་བདག་མཛད་ནས་ཕྱག་བཏབ།སྔོན་བླ་གྲྭ་སུམ་བརྒྱ་ལྷག་དང་ད་ལྟ་བརྒྱ་ཙམ་ཡོད།
༡༧༽ཨ་འཛོམས་དགོན་ནི།རབ་བྱུང་བཅུ་བཞི་པའི་ལྕགས་འབྲུག་ལོར་ཨ་འཛོམས་འབྲུག་པ་འགྲོ་འདུལ་དཔའ་བོ་རྡོ་རྗེའི་ཡབ་རྒན་བླ་མ་བསོད་ནམས་རྒྱ་མཚོས་དགུང་ལོ་དྲུག་ཅུ་རེ་ལྔའི་ཐོག་ཕྱག་བཏབ།སྔོན་སྤྲུལ་སྐུ་བཞི་བཅུ་དང་དགེ་འདུན་པ་ཉིས་བརྒྱ་བརྒྱད་ཅུ་གྱ་དགུ་དང་།ད་ལྟ་སྤྲུལ་སྐུ་གཉིས་དང་དགེ་འདུན་པ་སུམ་ཅུ་སོ་གཉིས་བཞུགས།
༡༨༽སྒོམ་ཕུག་དགོན་ནི།ཀཿཐོག་བླ་རབས་བཅུ་གསུམ་པ་མཁས་གྲུབ་ཡེ་ཤེས་རྒྱལ་མཚན་གྱི་དངོས་སློབ་ཨ་གཟི་བསོད་ནམས་འབུམ་པ་རབ་བྱུང་བརྒྱད་པའི་མཇུག་ཙམ་ན་གོ་ཆེན་ཟེར་བའི་གནས་འདིར་ཞབས་ཀྱིས་བཅགས་ཏེ་སྒྲུབ་པ་ལོ་མང་བཞུགས་པས་གང་ཟག་གི་མིང་གནས་ལ་ཐོག་སྟེ་མི་ཚོས་ད་ལྟ་གོ་ཆེན་བསོད་ནམས་འབུམ་ཞེས་ཟེར་སྲོལ་ཡོད།དེ་ཡང་བྱ་བྲལ་གྲུབ་ཐོབ་མང་པོའི་སྒྲུབ་གནས་ཡིན་པས་སྒོམ་ཕུག་ཞེས་མིང་གྲགས།ཕྱིས་སུ་རབ་བྱུང་བཅུ་གསུམ་པའི་ས་ཡོས་ལོར་རྨོག་གྲུབ་ནམ་མཁའ་ཆོས་དབང་གིས་ཐོག་མར་ཕྱག་བཏབ།སྔོན་དུས་སྤྲུལ་སྐུ་གཉིས་དང་བླ་གྲྭ་དྲུག་ཅུ་རེ་དགུ་དང་།ད་ལྟ་སྤྲུལ་སྐུ་གཅིག་དང་ཇོ་སེར་བཞི་བཅུ་ཞེ་དགུ་ཡོད།
༡༩༽ར་སྐོར་དགོན་ནི།ཐོག་མར་གཉེན་ཆེན་རི་ཁྲོད་དང་དཔལ་ཡུལ་དགོན་གྱིས་བླ་ཚབ་མངགས་པའི་དགོན་ལག་ཞིག་ཡིན།དགོན་འདི་དུས་ནམ་ཞིག་བཏབ་པ་སོགས་ཀྱི་ལོ་རྒྱུས་གསལ་པོ་མ་རྙེད།ད་ལྟ་བླ་གྲྭ་བདུན་ཅུ་ལྷག་ཡོད།
༢༠༽ཀློང་ཐང་དགོན་ནི།རབ་བྱུང་བདུན་པའི་ནང་༼སྤྱི་ལོ་༡༤༠༣༽ལྭ་སྟོན་ནམ་མཁའ་རིན་ཆེན་གྱིས་ཐོག་མར་ཕྱག་བཏབ།སྔོན་སྡེ་དགེ་ཆོས་རྒྱལ་གྱིས་གནང་བའི་ཞིང་དུད་འཁོར་འབངས་བསྟེན་ནས་བསྟན་པ་ཇེ་རྒྱས་སུ་གཏོང་།གྲྭ་ཚང་ཉི་ཤུ་ཙམ་ཡོད།
༢༡༽རབ་ཁྱབ་དགོན་ནི།སློབ་དཔོན་པདྨ་དངོས་ཀྱི་ཞབས་ཀྱིས་བཅགས་པའི་གནས་འགྲོ་འདུལ་ཕྲིན་ལས་རབ་ཏུ་ཁྱབ་པའི་ཞིང་ན་ཀཿཐོག་དམ་པ་བདེ་གཤེགས་ཀྱི་དངོས་སློབ་གླིང་གི་གྲུབ་ཐོབ་མ་ཎི་རིན་ཆེན་གྱིས་རབ་བྱུང་གསུམ་པའི་མེ་་སྤྲེལ་ལོར་སྒྲུབ་སྡེ་ཐོག་མར་བཏབ།
༢༢༽འཛིང་སྟག་མོ་དགོན།རབ་བྱུང་བཅུ་གཅིག་པའི་ཆུ་བྱ་ལོར་གར་དབང་འགྲོ་འདུལ་གླིང་པའམ་རིག་འཛིན་ཆེན་པོ་ཉི་མ་གྲགས་པས་ཕྱག་བཏབ།དེའི་སྐབས་སུ་ཐོ་བཙུན་སུམ་བརྒྱ་ལྷག་ཙམ་ཡོད།སྡེ་དགེ་ཁྲི་ཆེན་སངས་རྒྱས་བསྟན་པས་གཏེར་ཆེན་ཉི་གྲགས་ཆེད་དུ་གདན་དྲངས་ནས་ཏོག་དང་།ཐམ་ཀབཀའ་རྟགས་ཡིག་རིགས།གྲྭ་སྡེ་འཁོར་དུད་ལྔ་བརྒྱ་བཅས་ཕུལ།ཁོང་གིས་ཁྲི་ཆེན་ལའང་གུ་རུའི་གསང་ལུང་དང་མཐུན་དགོངས་གསུངས་པ་དང་།གཏེར་རྫས།ཤོག་སེར་དུ་མ།སྐུ་ཚབ་དྲི་མེད་བཤེས་གཉེན།ཕུར་པ་ཧུར་ཆེན་སྒྲ་སྒྲོགས།ཀླུ་དབྱངས་ཕྱག་བྲིས།སྨན་མདོ་ཨ་རུའི་གླེངས་ཤིང་།ཁྱད་པར་དུ་འཁོན་ཀླུ་ཡི་དབང་པོའི་ཕྱག་སྨྱུག་གཏེར་ནས་བཞེས་པ་བཅས་ཕུལ།མ་འོངས་པ་ན་སྡེ་དགེ་ལྷུན་གྲུབ་སྟེང་འདི་ཆོས་ཐམས་ཅད་ཀྱི་མཛོད་དང་།ཆོས་ཀྱི་འབྱུང་གནས་སུ་གྱུར་ནས་གཞན་ཕན་མཐས་པ་འབྱུང་བའི་རྟེན་འབྲེལ་ཡོད་ཅེས་གསུངས།དེ་རྗེས་ཆོས་རྒྱལ་བསྟན་པ་ཚེ་རིང་གིས་རྟེན་ཐེབས་ས་ཆུས་བདུན་བཅས་ཕུལ།ཆོས་རྒྱལ་ཚེ་དབང་བདུད་འདུལ་གྱིས་གཡོན་འགུ་ནས་ཞང་ཐང་རྩ་ལམ་མན་ཆད་ཀྱི་ཞིང་གནང་།བླ་གྲྭ་སུམ་བརྒྱ་ཞེ་གསུམ་ཡོད།
༢༣༽ཁམས་དབུས་དགོན་ནི།ཀཿཏོག་མ་ཎི་རིན་ཆེན་གྱིས་ལུང་བསྟན་པ་ལྟར་རབ་བྱུང་དྲུག་པའི་མཇུག་ཙམ་ལ་སྒ་ཆེན་མངའ་རི་རྡོ་རྗེའི་སྲས་སྒ་ཨ་གཉན་དམ་པས་ཐོག་མར་ཕྱག་བཏབ།དེ་རྗེས་ལོ་ཉིས་བརྒྱ་ཙམ་ཕྱིས་སུ་དགོན་པ་ཉམས་རྒུད་བྱུང་ནས་སྒ་དྲུང་པ་ཆོས་སྐྱོང་རྒྱ་མཚོས་ཉམས་པ་གསར་བཞེངས་གནང་།ད་ལྟ་སྤྲུལ་སྐུ་གཉིས་དང་དགེ་འདུན་པ་བརྒྱ་དང་ཉེར་གཉིས་བཞུགས།
༢༤༽བརྡ་གོ་དགོན་ནི།རབ་བྱུང་བཅུ་གཅིག་པའི་ལྕགས་ཁྱི་ལོར་རིག་འཛིན་ཀུན་བཟང་ཤེས་རབ་ཀྱིས་ཕྱག་བཏབ།དེ་རྗེས་སྤྱི་ལོ་༡༩༠༠ལོ་ཡས་མས་ཙམ་ལ་རང་བྱུང་མེ་དགྲས་འཇིག་པ་སླར་པདྨ་གར་དབང་བསྟན་འཛིན་གྱིས་འདུ་ཁང་གསར་བཞེངས་གནང་།བླ་གྲྭ་བརྒྱ་དང་བཅོ་ལྔ་བཞུགས།
༢༥༽ཁྲོམ་དགེ་དགོན་ནི།སྐུ་མདུན་ཉི་མ་རྒྱལ་མཚན་དཔལ་པོས་ཕྱག་བཏབ།དགོན་བཞུགས་གྲྭ་པ་ལྔ་བཅུ་ཡོད།
༢༦༽སྨྱོ་ཤུལ་ལྗོན་པ་ལུང་དགོན་ནི།རབ་བྱུང་བཅོ་ལྔ་པའི་ཆུ་ཕག་ལོར་མཁན་ཆེན་ངག་གི་དབང་པོ་དགུ་ལོ་ཞེ་ལྔའི་ཐོག་གཙུག་ལག་ཁང་དང་རྟེན་དང་བརྟེན་པ་བཅས་བཞེངས།ད་ལྟ་སྤྲུལ་སྐུ་བླ་གྲྭ་ཞེ་བདུན་ཡོད།
༢༧༽སྨྱོ་ཤུལ་ཡུལ་ལེ་དགོན་ནི།སྨྱོ་ཤུལ་སྤང་ཐར་ཨ་མྱེ་ལྷ་མགོན་ཚང་གིས་ལུང་བསྟན་ལྟར་བླ་མ་སྐལ་བཟང་རབ་བསྟན་གྱིས་ཁྲོམ་སྨད་ཡུལ་ལེ་པདྨའི་ཐང་དུ་ཐོག་མར་ཕྱག་བཏབ།སྔོན་བླ་གྲྭ་མང་དུས་བརྒྱ་དང་ཉི་ཤུ་ཙམ་དང་ཉུང་དུས་བརྒྱད་ཅུ་ལྷག་ཡོད་པ་དང་ད་ལྟ་བླ་གྲྭ་བཞི་བཅུ་ལྷག་བཞུགས།
༢༨༽ཉིན་དགོན་ནི།སྤྱི་ལོ་༡༦༨༨ལོར་གསང་བདག་ཆོས་སྐྱོང་མགོན་པོ་དང་བྱང་ཆུབ་ཆོས་ཀྱི་སེང་གེ་རྣམ་གཉིས་ཀྱིས་སྡེ་དགེ་རྒྱལ་པོའི་མཐུན་རྐྱེན་ལ་བསྟེན་ནས་སྒྲུབ་རྟེན་དང་གཙུག་ལག་ཁང་བཞེངས།དེའི་སྐབས་སུ་དགེ་འདུན་པ་བརྒྱ་ཕྲག་ཙམ་དང་དེང་དུས་བརྒྱད་ཅུ་ལྷག་ཡོད།
༢༩༽བྲག་དམར་དགོན་ནི།སྤྱི་ལོ་༡༦༨༨ལོར་རིག་འཛིན་སྙིང་པོའི་དངོས་སློབ་རིག་འཛིན་རྒྱ་མཚོས་ཁོང་གི་བླ་མའི་ལུང་བསྟན་ལྟར་རྗེ་འབངས་ཉེར་ལྔའི་སྒྲུབ་ཕུག་ས་དམར་བྲག་དམར་གཙོ་ལུང་དུ་སྐུ་མཚམས་བཞུགས།ད་ལྟ་རིག་འཛིན་རྒྱ་མཚོ་སྒྲུབ་ཕུག་ཡང་ཟེར།སྔོན་དགེ་འདུན་པ་བརྒྱད་ཅུ་ཙམ་དང་ད་ལྟ་སྤྲུལ་སྐུ་གཅིག་དང་དགེ་འདུན་པ་བཞི་བཅུ་ཡོད།
༣༠༽ཁང་དམར་དགོན་ནི།རིག་འཛིན་ཀུན་བཟང་ཤེས་རབ་ཀྱིས་ཐོག་མར་ཕྱག་བཏབ།སྔོན་གྲྭ་བརྒྱ་དང་ཉི་ཤུ་ལྷག་དང་ད་ལྟ་དགེ་འདུན་པ་བརྒྱད་ཅུ་གྱ་དགུ་ཙམ་ཡོད།
༣༡༽འོ་ཐང་དགོན་ནི།འོ་མའི་མཚོའི་གནས་མཆོག་ཏུ་སྡེ་དགེ་ཆོས་རྒྱལ་དང་ཙམ་མདོ་གེ་གཞི་དཔོན་གཉིས་ཀྱིས་དགོན་གོང་འོག་གི་གཙུག་ལག་ཁང་རྟེན་བརྟེན་པ་བཅས་གསར་བཞེངས་གནང་།རེ་ཁོ་ཆོས་ཉིད་རྒྱ་མཚོ་དང་དཔལ་ཡུལ་རིག་འཛིན་ཀུན་བཟང་ཤེས་རབ་རྣམ་གཉིས་ཀྱིས་དགོངས་དབྱངས་ཅིག་གྱུར་ཐོགདཔལ་ལྡན་འོ་ཐང་དགོན་དུ་བསྟན་པ་འཛིན་སྐྱོང་སྤེལ་གསུམ་མཛད་དགོས་པའི་བཀའ་ལུང་བསྩལ་ཏེ་སྤྱི་ལོ་༡༦༠༠ནང་ཙམ་ལ་ནམ་མཁའ་ཆོས་གྲུབ་བམ་བླུ་ཆོག་བླ་མ་ཆོས་ཁྲིར་མངའ་གསོལ་གནང་།དེའི་སྐབས་སུ་དགེ་འདུན་པ་ཉིས་བརྒྱ་ལྷག་དང་ད་ལྟ་བླ་མ་གསུམ་དང་གྲྭ་ལྔ་བཅུ་བཞུགས།
༣༢༽རྒྱ་ཤོད་དགོན་ནི།གཏེར་ཆེན་རིག་འཛིན་ཆེན་པོ་ཀློང་གསལ་སྙིང་པོས་ཐོག་མར་ཕྱག་བཏབ།ཕྱིས་སུ་རབ་བྱུང་བཅུ་གཉིས་པའི་ནང་ཚན་ཀཿཐོག་དྲི་མེད་ཞིང་སྐྱོང་མགོན་པོའི་ཞལ་བཞེས་ལྟར་ཁོང་གི་དངོས་སློབ་བླ་མ་ངག་དབང་ཡོན་ཏན་གྱིས་རི་ཁྲོད་བཏབ།ད་ལྟ་བླ་གྲྭ་བརྒྱ་ལྷག་ཡོད།རྒྱུན་བཞུགས་གྲྭ་པ་ལྔ་བཅུ་ཡོད།
༣༣༽རྫ་ཀཿཐོག་དགོན་ནི།ཤར་རྒྱལ་བ་ཀཿཐོག་པ་གྲུབ་དབང་ཚེ་རིང་རྡོ་རྗེས་སྟག་འཛི་ལུང་པའི་གནས་སུ་ཕྱག་བཏབ་ཅེས་པ་དང་གྲུབ་དབང་མཆོག་དང་རྫོགས་སྤྲུལ་གཉིས་པ་འགྱུར་མེད་ཐེག་མཆོག་བསྟན་འཛིན་རྣམ་གཉིས་ཀྱིས་ཐོག་མར་བཏབ་ཅེས་དཔྱད་པར་འཚལ།སྔོན་གྲྭ་ཉིས་བརྒྱ་ལྷག་ཡོད།
༣༤༽མདའ་ཁོ་དགོན་ནི།རབ་བྱུང་བཅོ་ལྔ་པའི་ནང་ཁྲོམ་དགེ་གཟུང་སྤྲུལ་གཏེར་ཆེན་རིན་པོ་ཆེས་ཕྱག་བཏབ།དགེ་འདུན་པ་དྲུག་ཅུ་ལྷག་ཡོད།
༣༥༽དྲུང་ཡིག་དགོན་ནི།ཀ་དམ་པ་བདེ་གཤེགས་ཀྱི་སློབ་མ་གཙང་སྟོན་རྡོ་རྗེ་དཔལ་པའི་གདན་ས་གཙང་ལུ་གུ་དགོན་དེ་དང་དྲུང་པ་བྱང་ཆུབ་ཀྱིས་བཏབ་པའི་ཡི་ཚི་ལྷ་ཁང་སུམ་མདོའི་དགོན་པ་དེ་གཉིས་དུས་སྐབས་ཤིག་ལ་གནས་སྤོས་ཏེ་ད་ལྟའི་གདན་ས་འདིར་ཆགས།སྔོན་སྤྲུལ་གསུམ་མཁན་གཅིག་གྲྭ་བརྒྱ་ལྷག་བཅས་དང་།ད་ལྟ་སྤྲུལ་སྐུ་གཉིས་དང་གྲ་བཞི་བཅུ་ལྷག་ཡོད།
༣༦༽བར་ཁྱིམ་དགོན་ནི།རབ་བྱུང་གཉིས་པའི་ནང་སྤྱི་ལོ་༡༡༣༠ལོ་ཡས་མས་ལ་ཀཿཐོག་དམ་པ་བདེ་གཤེགས་ཀྱིས་བཤད་སྒྲུབ་ཀྱི་བསྟན་པ་ཐོག་མར་བཙུགས།དེ་ནས་རབ་བྱུང་དགུ་པའི་ནང་སྟེ་སྤྱི་ལོ་༡༥༠༠ལོར་བུ་འབོར་བ་བཀྲ་ཤིས་རྒྱ་མཚོས་དགོན་ས་བཏབ།གྲྭ་ལྔ་བཅུ་ལྷག་ཡོད།
༣༧༽སྒ་ཆེན་བདེ་ཆེན་དགོན་ནི།རབ་བྱུང་དགུ་པའི་མགོར་འབའ་རོང་རྡོ་རྗེ་ཕག་མོ་བདེ་ཆེན་གསང་བ་མཆོག་གི་གནས་སུ་ཉག་ཨ་གཟི་ཡེ་ཤེས་འབུམ་པས་གྱང་ངོས་དགོན་ཞེས་པ་བཏབ།ཕྱིས་སུ་གསེར་བྱ་རྒྱལ་པོ་ཉམས་རྒུད་བྱུང་ནས་དེའི་དགོན་པ་དང་འབངས་སྡེ་བཅས་དྲི་མེད་ཞིང་སྐྱོང་མགོན་པོ་ལ་ཕུལ།རབ་བྱུང་བཅུ་གཉིས་པའི་མཇུག་ཙམ་ལ་གསར་དུ་ཕྱག་བཏབ།སྔོན་ཆད་དགེ་འདུན་པ་བདུན་ཅུ་ཙམ་དང་ད་ལྟ་བླ་གྲྭ་ལྔ་བཅུར་ཉེ་བ་བཞུགས།
༣༨༽ཨ་རིག་ཡང་ལེ་ཤོད་ནི།རབ་བྱུང་བཅོ་ལྔ་པའི་ལྕགས་འབྲུག་ལོར་པདྨ་འགྱུར་མེད་རྒྱ་མཚོས་ཐོག་མར་ཕྱག་བཏབ།༣༩༽སེང་རི་དགོན་ནི།གཏེར་སྟོན་དྲི་མེད་རིན་པོ་ཆེའི་སྲས་བདེ་ཆེན་རྣམ་རྒྱལ་ལ་ལུང་བྱང་བབ་ནས་ཡབ་སྲས་ཚང་མ་སེང་རིར་ཕེབས་ནས་རབ་བྱུང་བཅོ་ལྔ་པའི་ས་ལུག་ལོར་གནས་སྒོ་ཕྱེས་ནས་གཙུག་ལག་ཁང་དུ་གསར་དུ་བཏབ།
༤༠༽ཛཿཀ་དོན་ནི།ཛ་དང་ཀ་ཡིག་རང་བྱོན་གནས་པའི་ས་རུ་ཀཿཐོག་དཔལ་འབར་ནམ་མཁའ་རྒྱ་མཚོའི་དངོས་སློབ་ཀོ་མོ་ཆོས་ཉིད་རྒྱ་མཚོས་རབ་བྱུང་བདུན་པའི་ཙམ་ལ་ཐོག་མར་ཕྱག་བཏབ།སྡེ་དགེ་ཆོས་རྒྱལ་སངས་རྒྱས་བསྟན་པས་འཁོར་དུད་ཉེར་ལྔ་དང་ཆོས་སྤྱོད་བཅུའི་འདུས་སྡེའི་སྲོལ་བཟང་གི་ཆོས་ཁྲིམས་བཀའ་ཤོག་ལས་ཐམ་བཅས་ཐོབ།གྲྭ་དྲུག་ཅུ་ཁ་ལྷག་ཡོད།
༤༡༽ཕྱག་ཚ་དགོན་ནི།རབ་བྱུང་བཅུ་གསུམ་པའི་སྤྲེལ་ལོར་ཀཿཐོག་པདྨ་ཆོས་ལྡན་གྱིས་ཐོག་མར་བཏབ།སྔོན་གྲྭ་སུམ་བརྒྱ་ཙམ་དང་ད་ལྟ་བླ་གྲྭ་བརྒྱ་དང་ལྔ་ཡོད།
༤༢༽ཕུག་ཁང་དགོན་ནི།རབ་བྱུང་བཅུ་གསུམ་པའི་ཆུ་ཕོ་སྤྲེལ་ལོར་དགེ་རྩེ་གྲུབ་དབང་པདྨ་རིན་ཆེན་གྱིས་ཕྱག་བཏབ།སྔོན་དགེ་འདུན་པ་སྟོང་དང་ད་ལྟ་མཁན་སྤྲུལ་བཅུ་ཕྲག་ཟུང་ལ་ཉེ་བ་དང་གྲྭ་བཞི་བརྒྱ་ཙམ་ཡོད།
༤༣༽དགེ་གོང་དགོན་ནི།རབ་བྱུང་བཅུ་གཅིག་པའི་ནང་དུ་ཆགས་གནས་ངེས་མེད་ཀྱི་ནག་སྒར་ཞིག་ཏུ་རོག་བཟའ་བསོད་ནམས་དཔལ་དགེས་བསྟན་པ་འཛིན་སྐྱོང་གི་འཕྲིན་ལས་སྤེལ།ཕྱིས་སུ་དུང་ཆུ་གོང་མ་ན་མཁན་པོ་ཀུན་བཟང་ཆོས་གྲགས་ཀྱིས་ཕྱག་བཏབ།སྔོན་དགེ་འདུན་པ་བརྒྱ་ལྷག་དང་ད་ལྟ་བླ་གྲྭ་བདུན་ཅུ་དོན་དྲུག་ཡོད།
༤༤༽འགོ་ཚྭ་དགོན་ནི།རབ་བྱུང་གསུམ་པའི་ཆུ་སྟག་ལོར་མགོ་ཚྭ་ཀུན་དགའ་བྱམས་པ་རྒྱལ་མཚན་དགུང་ལོ་ཞེ་དགུ་ཐོག་ཕྱག་བཏབ།མཁན་སྤྲུལ་བཅུ་གསུམ་དང་གྲྭ་པ་ལྔ་བརྒྱ་ལྷག་ཙམ་ཡོད།
༤༥༽ལྕང་མ་དགོན་ནི།རབ་བྱུང་བཅུ་བཞི་པའི་ནང་དཔལ་སྤྲུལ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོས་ཕྱག་བཏབ།ད་ལྟ་བླ་གྲྭ་སོ་བཞི་ཡོད།
༤༦༽དགེ་མང་དགོན་ནི།སྤྱི་ལོ་༡༦༨༠ལོར་སངས་རྒྱས་དགེ་ལེགས་ཀྱིས་ཐོག་མར་ཕྱག་བཏབ།ད་ལྟ་ཐོ་བཙུན་ཉིས་བརྒྱ་བཅུ་གཅིག་ཡོད།
༤༧༽ཀི་ལུང་དགོན་ནི།རབ་བྱུང་བཅུ་གཉིས་པའི་ལྕགས་ཁྱིའི་ལོར་སྡེ་དགེ་རྒྱལ་པོས་ཤིང་བཟོ་རྡོ་བཟོ་ལྷ་བཟོ་སོགས་ཆེད་དུ་མངགས་ཤིང་འགྲོ་གྲོན་ཡང་སྦྱར་ནས་ཀིཿལུང་འཇིགས་མེད་ངོ་མཚར་རྒྱ་མཚོས་ཕྱག་བཏབ།སྔོན་བླ་གྲྭ་བརྒྱ་ལྷག་དང་ད་ལྟ་དྲུག་ཅུ་ཙམ་ཡོད།
༤༨༽རྫ་རྒྱལ་དགོན་ནི།རབ་བྱུང་བཅུ་གཅིག་པའི་ཆུ་བྱིའི་ལོ་སྟེ་སྤྱི་ལོ་༡༦༧༢ལོར་ཝ་བླ་མ་ངག་དབང་བཟང་པོས་ནག་སྒར་ཞིག་བཏབ།སྡེ་དགེ་རྒྱལ་པོ་དང་རྫོགས་སྤྲུལ་ངེས་དོན་བསྟན་འཛིན་བཟང་པོ་ནས་སངས་རྒྱས་གླིང་པའི་གདུང་རྟེན་གནང་།དེ་ད་ལྟ་ཡང་བཞུགས་ཡོད།དེའི་རྗེས་སུ་རྗེ་འཇིགས་མེད་རྒྱལ་བའི་མྱུ་གུས་ཕྱག་བཏབ།དགེ་འདུན་པ་ཉིས་བརྒྱ་ལྔ་བཅུ་ལྷག་ཡོད།
༤༩༽འབར་ཆུང་དགོན་ནི།བླ་མ་དམ་པ་འཆི་མེད་མགོན་པོས་ཐོག་མར་ཕྱག་བཏབ།བླ་གྲྭ་ང་དགུ་ཙམ་ཡོད།
༥༠༽དུང་དཀར་དགོན་ནི།རབ་བྱུང་བཅོ་ལྔ་པའི་ལྕགས་ཕག་ལོར་ཨོ་རྒྱན་འགྲོ་འདུལ་རྡོ་རྗེས་ཕྱག་བཏབ།དགེ་འདུན་པ་ཉིས་བརྒྱ་ལྔ་བཅུ་ལྷག་ཡོད།
༥༡༽ཉི་ཟེར་དགོན་ནི།རབ་བྱུང་བཅུ་གསུམ་པའི་ནང་ཙམ་ལ་ཀླུ་ལྡིང་རིན་ཆེན་མི་འགྱུར་རྒྱལ་མཚན་གྱིས་ཐོག་མར་ཕྱག་བཏབ།ད་ལྟར་མཁན་སྤྲུལ་བདུན་གྲྭ་བདུན་ཅུ་དོན་ལྔ་ཡོད།༥༢༽འབུམ་རྙིང་དགོན་ནི།རབ་བྱུང་བཅུ་གཉིས་པའི་དཀྱིལ་ཙམ་དུ་ཆོས་རྒྱལ་བསྟན་པ་ཚེ་རིང་གི་མཐུན་རྐྱེན་སོགས་བརྟེན་ནས་དཔོན་བསོད་ནམས་འབུམ་གྱིས་ཕྱག་བཏབ།བླ་གྲྭ་སུམ་བརྒྱ་ཉེར་ལྔ་ཙམ་ཡོད།
༥༣༽རྔ་ཡབ་བྲག་ཆེན་དགོན་ནི།རབ་བྱུང་བཅུ་གཉིས་པའི་ནང་བྲོས་བླ་ཨོ་རྒྱན་བསྟན་སྲུང་གིས་ཐོག་མར་ཕྱག་བཏབ།བཤད་གྲུབ་བསྟན་གཉིས་དར་རྒྱས་གླིང་ཞེས་མཚན་དུ་གསོལ།རྗེས་སུ་རབ་བྱུང་བཅོ་ལྔ་པའི་ལྕགས་འབྲུག་ལོར་མཁན་ཆེན་ཚུལ་ཁྲིམས་རྒྱ་མཚོས་རྔ་ཡབ་བྲག་ཆེན་དགོན་བཀྲ་ཤིས་ཐེག་མཆོག་གླིང་གསར་དུ་བཏབ།ད་ལྟར་གྲྭ་ལྔ་བཅུ་ཙམ་ཡོད།
༥༤༽ནོར་གླིང་དགོན་ནི།སྡེ་དགེ་རྒྱལ་པོས་མཐུན་རྐྱེན་གྱི་རོགས་སྐྱོར་མཛད་ནས་རབ་བྱུང་བརྒྱད་པའི་དཀྱིལ་ཙམ་ཁྱེའུ་རིག་འཛིན་ཆེན་པོས་ཐོག་མར་ཕྱག་བཏབ།སྔོན་ཆད་བླ་གྲྭ་ཉིས་བརྒྱ་ཙམ་དང་ད་ལྟ་བརྒྱ་ལྷག་ཡོད།
༥༥༽འཇུ་ཉུང་དགོན་ནི།རབ་བྱུང་བཅུ་གསུམ་པའི་ཆུ་སྤྲེལ་ལོ་སྟེ་སྤྱི་ལོ་༡༧༥༢ལོར་འཇུ་བླ་གསང་སྔགས་འཛིན་གྱིས་ཕྱག་བཏབ།ད་ལྟ་གྲྭ་དགུ་བཅུ་བཞུགས།
༥༦༽འཚོ་བ་རི་ཁྲོད་ནི།རབ་བྱུང་བཅུ་དྲུག་པའི་ལྕགས་སྦྲུལ་ལོ་སྟེ་སྤྱི་ལོ་༡༩༢༧ལོར་གཡག་ཟེ་མཁན་པོ་ཚེ་དབང་འགྱུར་མེད་དགུང་ལོ་སུམ་ཅུ་སོ་བདུན་ཐོག་སྒྲུབ་སྡེ་བཙུགས།ད་ལྟ་བླ་མ་བརྒྱད་ཡོད།༥༧༽ཇོ་མོ་དགོན་ནི།སྤྱི་ལོ་༡༢༠༨ལོར་གྲུབ་ཆེན་པདྨ་ཇོ་ལྗིང་གིས་ཕྱག་བཏབ།ད་ལྟ་སྤྲུལ་སྐུ་གཅིག་དང་གྲྭ་ཉི་ཤུ་ལྷག་ཡོད།༥༨༽ཨ་སེན་དགོན།༥༩༽སོག་མོ་དགོན།༦༠༽ཟླ་ཡི་དགོན།༦༡༽བྲག་དཀར་དགོན།༦༢༽གུ་ལུང་དགོན།༦༣༽ཡིད་ལེགས་དགོན།༦༤༽ཀི་འགུ་དགོན།༦༥༽ཡང་ལེ་དགོན།༦༦༽དགོན་ཕུག་དགོན།༦༧༽བ་ཐུལ་དགོན།༦༨༽གནམ་བྲག་དགོན།༦༩༽མཉམ་སྐྱིད་དགོན།༧༠༽རྨུགས་སངས་དགོན་ནི་སྤྱི་ལོ་༡༣༤༣ལོར་ཕྱག་བཏབ།༧༡༽རྨོག་རྩ་དགོན།༧༢༽བསམ་འགྲུབ་དགོན།༧༣༽སིབ་མདའ་དགོན།༧༤༽བྲོ་རྡུང་དགོན་ནི།སྤྱི་ལོ་༡༠༤༢ལོར་ཕྱག་བཏབ།༧༥༽དཔོན་རུ་དགོན།༧༦༽ཁྲ་སྐྱབས་དགོན།༧༧༽དྲོད་ཆེན་དགོན།༧༨༽དགེ་གུང་དགོན།༧༩༽ནོར་ནག་དགོན།༨༠༽ནོར་གླིང་དགོན།༨༡༽ཤུ་གུ་ལྗོན་པ་དགོན།༨༢༽རྡ་གོ་དགོན།༨༣༽རྣམ་གྲགས་དགོན་ནི་སྤྱི་ལོ་༡༦༢༥ལོར་ཕྱག་བཏབ།༨༤༽འགུ་རུ་དགོན་ནི་སྤྱི་ལོ་༡༧༥༢ལོར་ཕྱག་བཏབ།༨༥༽སྦྲ་ནག་དགོན་ནི་སྤྱི་ལོ་༡༧༩༨ལོར་ཕྱག་བཏབ།༨༦༽རྣམ་གྲོལ་དགོན་སོགས་ཡིན།
One Response
བསམ་ཚུལ་འབྲི།
བོད་རྒྱལ་གདུང་རབས་རིམ་བྱོན་གྱི་སྐོར།
ཚང་མ་ཀློགས་ཡིན་བཀའ་དྲིན་ཆེ་ ཁམས་དབུས་དགོན་ལ་སྤྲུལ་སྐུ་གསུམ་ཡོད་པ་ཡོངས་གྲགས་རེད་ མ་ཟད་སྤྲུལ་སྐུ་གསུམ་ག་ད་ལྟ་སྐུ་འཚོ་བཞུགས་སུ་ཡོད་ །