རོང་མ་འབྲོག་གི་ཉིན་རེའི་འཚོ་བ་སྐྱེལ་སྟངས་སྐོར།
ལྷུན་གྲུབ་དབང་རྒྱལ་གྱི་མི་ཚེའི་ལོ་རྒྱུས་ལས་དཔེར་མཚོན་དུ་དྲངས།
དགུན་ཁའི་དུས་སུ་ནམ་ལངས་པ་དང་མཉམ་དུ་གཡོག་མོ་དང་མནའ་མ་རྣམས་ཐོག་མར་ལངས་ཏེ།ཐབ་ནང་མེ་བཏང་སྟེ་ཆུ་ལེན་པར་བསྐྱོད།ཟོག་གི་སྙི་བ་འཕོ་བ་སོགས་ཁང་པའི་སྟེང་ཤོད་གཙང་མ་བྱེད།དང་ཐོག་ཞོགས་ཇ་ཟེར་བ་དེ་ཇ་འཁོལ་བ་ནང་འོ་མ་བླུག་ཅིང་བསྲུས་པ་དེ་རྩམ་པ་དང་སྐྱུར་བ་བསྲེས་པའི་སྟེང་དུ་བླུགས་ཏེ་འཐུང་།འགའ་རེས་དེ་ལ་ཁ་གསོ་ཡང་ཟེར།དེ་མཚམས་རྟ་ཟོག་སེམས་ཅན་རྣམས་རི་འགོར་རྩ་ཁའི་སྟེང་དུ་འདེད་དེ་གཡོག་མོ་གཅིག་གིས་འཚོ་སྐྱོང་བྱེད་ནས་གཅན་གཟན་སོགས་ཀྱི་ཉེན་འཚེ་འགོགམཆོད་ཁང་ནང་མཆོད་པ་བཤམ་བཀོད་ནི་བླ་མཆོད་ཡོད་ན་དེས་བྱེད།མེད་ན་ཕ་མ་གང་རུང་ནས་ཁ་ལག་གདོང་གསུམ་གཙང་མ་བཀྲུས་ཏེ་དེས་བྱེད།ངས་དྲན་སོས་པའི་སྐབས་ནས་ངའི་སྤུན་མཆེད་ཆེ་བ་བླ་མ་ཡིན་པས་ཁོང་ཡོད་དུས་ཁོང་གིས་བྱེད།ཁོང་ཁྱིམ་དུ་མེད་དུས་ཕ་མ་གང་རུང་ནས་ཡར་ལངས་རྗེས་ཁ་ལག་བཀྲུ་བཤལ་ཡག་པོ་བྱས་ཏེ་མཆོད་ཁང་ནང་མཆོད་པ་བཤམས་པ་དང་།དྲི་སྤོས་དང་མཆོད་མེ་སྤར་བ་སོགས་མཆོད་འབུལ་དང་སྨོན་ལམ་ཟབ་མོ་ཞུ་གསོལ་ཡོད།ཆུ་ཚོད་བཅུ་པ་ཙམ་ལ་སླེབས་སྐབས་དན་ཇ་ཞེས་པ་ཕོར་པ་ནང་མར་དང་རྩམ་པ་སྐྱུར་བ་བཅས་མཉམ་དུ་འདེབས་ཤིང་སྤྲུས་པ་དེ་ལ་ང་ཚོས་དགའ་སྤྲུས་ཟེར།མར་འདེབས་ཆེ་དྲགས་ན་ལྕེ་ཡིས་ལྡག་མི་ཐུབ་པར་མཛུབ་མོས་གཤོར་དགོས་པ་དེ་འདྲ་བྱུང་དར།ཉིན་གུང་ཆུ་ཚོད་བཅུ་གཉིས་ཙམ་དུ་སླེབས་སྐབས་རྫ་ར་ཞེས་པ།རྩམ་པའི་ཨ་ལོག་དང་མཉམ་དུ་ཤ་བཙོས་པའམ་ཡང་ན་ཤ་འཁིང་བཅད་བཏུབ་བྱས་པའི་ཤ་སྐལ་བཅས་ཟ་སྲོལ་ཡོད་པ་དང་།ཡང་ན་ཤ་ཁུ་བསྐོལ་བ་དང་།ཡང་ན་སྔོ་ཚལ་ནང་དུ་ཤ་བཏུབ་སྟེ་བསྐོལ་བ་གང་རུང་དང་མཉམ་དུ་ཨ་ལོག་དང་སྦྲགས་ཏེ་ཟ་འཐུང་བྱེད་ཀྱི་ཡོད་པ་རེད།ཡང་ཆུ་ཚོད་བཞི་པ་ཙམ་དུ་སླེབས་སྐབས་རྩམ་པ་དང་སྐྱུར་བ་སོགས་མཉམ་དུ་བསྲེས་ཏེ་ཇ་ཞིག་འཐུང་སྲོལ་ཡོད་པ་དེ་ལ་ཕྱི་རྫ་ཟེར།ས་མ་རུབ་གོང་དུ་རྟ་ཟོག་སེམས་ཅན་རྣམས་རི་ནས་བསྡུས་ཏེ་རྒྱབ་ར་ནང་བཏགས།སྟེར་དགོས་རིགས་ལ་གཟན་རྩ་སོགས་སྟེར་ཚར་བ་དང་མཉམ་དུ་ས་རུབ་པ་དང་འཁེལ།ཚང་མ་ཇ་ཁང་དཀྱིལ་དུ་མེ་འབུད་སའི་མཐའ་སྐོར་དུ་འཛོམས་ནས་མེ་བཏང་སྟེ་མེ་འདེ་བྱས་ཏེ་བསྡད།ནམ་རྒྱུན་གྱི་འཚོ་བའི་ལབ་གླེང་འདྲ་མིན་རྣམས་བྱེད།སྔོ་ཐུག་དང་ཞོ་ཐུགགྲོལ་རིལ་ཐུག་པ་སོགས་གང་རུང་བསྐོལ་ནས་འཐུང་བ་དེར་དགོང་ཐུག་ཟེར།ས་རུབ་རྗེས་མེ་ཕུང་འབུད་འདེ་བྱེད་ནས་ཆུད་ཚོད་གསུམ་བཞི་ཙམ་བསྡད།དེའི་རིང་སྐྱབས་འགྲོ།མ་ཎི་བརྒྱ་ཚར།སིདྡྷི་བརྒྱ་ཚར།ཕྱག་རྡོར་བསྙེན་པ་བརྒྱ་ཚར།དེ་ནས་སྒྲོལ་མ་ཚར་བཅུ་བཏོན་ནས་རང་རང་སོ་སོའི་ཉལ་ས་ནང་ལོགགཡོག་མོས་རྒྱབ་ར་ནང་སོང་ནས་བསྐོར་ཁྱི་མངགས་གཏོང་བྱེད་པ་བཅས་ཉིན་གཅིག་གི་འཚོ་སྤྱོད་བྱེད་སྟངས་བསྡུས་ཙམ་ཡིན།ངའི་ཁྱིམ་ཚང་ལ་མཚོན་ན་བསྐོར་ཕྱི་གཉིས་ནས་གསུམ་བར་ཡོད།ཁྱི་རིགས་བཟང་བ་དང་ཤ་ཁྱི་ལྟ་བུའི་ཁྱི་ཚང་མ་སྤུ་ར་ཡིན་པ་མ་ཚད་སྤུ་མདོགས་ཀྱང་རྒྱ་སེར་དང་རྒྱ་དམར་ཡིན།གཟུགས་སྟོབས་ཤིན་ཏུ་ཆེ་བས་ངར་ན་འཐེན་ཤུགས་ཆེན་པོ་ཡོད།ལྕགས་ཐག་གིས་ཁང་པའི་གདུང་མར་བསྐོར་ཡོད་པའི་རྐྱེན་གྱིས་མགྲོན་འགྲིམ་ཁྱིམ་དུ་སླེབས་པ་དང་།རྒྱ་རའི་ཕྱི་ལོགས་སུ་སྤྲང་པོ་སོགས་སླེབས་དུས་ཁྱི་དེ་ཚོས་ཤུགས་འཐེན་བྱེད་སྐབས་ཁང་པ་འགུལ་ཤིག་ཤིག་བཏངས་ཀྱི་ཡོད་པ་རེད།སྐད་གྲགས་ཆེ་བའི་ཁྱི་རིགས་རྣམས་ཀྱི་ཁྱི་ཕྲུག་བཞག་དུས་ནས་ང་ལ་བཙོང་རོགས་ཁོ་ལ་བཙོང་རོགས་ཟེར་ནས་ཧར་ཐོབ་བརྒྱབ་ཀྱི་ཡོད་པ་རེད།དེ་ལྟ་བུ་ཁྱི་དེ་བཙོང་ན་ཁྱི་རེ་ལ་ཇ་སྒམ་རེའམ་ཡང་ན་ཁལ་སོ་བཞི་རེ་བྱེད་སྲོལ་ཡོད།མང་ཆེ་བ་ཉེ་འབྲེལ་དང་ཤག་པོ་སོགས་ལ་སྟེར་ཏེ་རིན་པ་ལེན་སྲོལ་ཤིན་ཏུ་ཉུང་།ཁྱི་དེ་ཚོ་ལ་ཉིན་རེར་མིས་བཟས་པའི་ལྟོ་ཐེངས་ཇི་བཞིན་སྤྲོད་དགོས་ཀྱི་ཡོད།ལྟོ་ཟས་སྤྲོད་རྒྱུ་ནི་ཡུང་མ་ཞིབ་པོ་བཏུབ་པ་དང་ལྷན་དུ་དགུན་བཤས་བྱས་པའི་ཁྲག་དང་བསྐོལ་བ་དང་།ཡང་ན་གློ་བ་དང་།ཤ་བཙོས་པའི་ཁུ་བ།རྩམ་པ་བཏབ་པའི་ཁྲུད་སོགས་བླུད་དགོས།ངའི་ཁྱིམ་ཚང་ནས་ལོ་རེ་ལ་དགུན་བཤས།འབྲི་གཡག་བཞི་ཙམ་དང་།ར་ལུག༢༠ཙམ་བཤའ་ཡི་ཡོད།ངའི་ཁྱིམ་ཚང་ནི་ཟ་གྱོན་སོགས་ཀྱི་ཐད་ལའང་རྒྱས་པོ་དང་ཡག་པོ་བྱེད་དགོས་པའི་ཁྱིམ་ཚང་ཞིག་ཡིན།དེར་བརྟེན་ཡུལ་ལུང་ནང་དུའང་ཟ་གྱོན་བཟང་པོ་ཡོད་པའི་མི་ཁ་ཡོད་དར།ངེད་ཚང་སར་བླ་མ་དང་མི་ཆེན་མི་དཀྱུས་བཅས་ཧ་ཅང་མགྲོན་འགྲིམ་མང་བས་ཟས་གྲོན་ཡང་ཆེན་པོ་བཏང་སྲོལ་ཡོད།བོད་ཟླ་༡༢པའི་ཚེས་གཅིག་ཉིན་ལོ་ཆུང་བཏང་བ་དང་།བོད་ཟླ་དང་པོའི་ཚེས་གཅིག་ཉིན་ནས་ཉིན་ཞག་འགའ་ཤས་ལ་ལོ་ཆེན་སར་བ་དང་།ལོ་གསར་ཆེ་ཆུང་གཉིས་ཀ་རྒྱས་པ་སར།ལྷག་པར་དུ་ལོ་ཆེན་ཟླ་བ་དང་པོའི་ཚེས་གཅིག་ཉིན་དེ་ལོ་འཁོར་གཅིག་གི་ཉིན་དང་པོ་ཡིན་པས་ལོ་གཅིག་རིང་སྐྱིད་སྡུག་ལེགས་ཉེས་ཡོང་མིན་དང་།བདེ་སྐྱིད་དང་འཚོ་གོས་རྒྱས་མིན་རྟེན་འབྲེལ་གྱི་འགོ་མ་ཞིག་ཏུ་བརྩི་གི་ཡོད་པས།རྟེན་འབྲེལ་འཕྱུག་པའི་བྱ་བ་དང་གཏམ་བརྗོད་སོགས་མི་བྱེད་རྒྱུའི་དོགས་ཟོན་ཆེར་བསྐྱེད་བྱས་ཏེ་བཟང་པོའི་རྟེན་འབྲེལ་བསྒྲིགས་པའི་བྱ་བ་རྒྱས་ཤིང་བརྩོན་པར་བྱེད།ཟླ་བ་བཅུ་གཅིག་པའི་༢༩འམ་ཡང་ན་ཟླ་བཅུ་གཉིས་པའི་༢༩བཅས་ཁོམ་ལྕོགས་ལ་བསྟུན་ཏེ་ཇ་ཁང་སོགས་ཀྱི་ཁང་པའི་དུ་དྲེག་དང་ཐལ་བ་བསྡུས་ཏེ་གད་ཕྱིས་གཙང་མ་རྒྱབ།དུ་ཕུད་དེ་ཇ་ཁང་ཁང་ཐོག་གི་དུ་ཁང་སྟེང་དུ་གཡུང་དྲུང་གི་རི་མོ་བྲིས་ཏེ་བླུགས།དེ་བྱིངས་ཐལ་པ་དང་མཉམ་དུ་གད་བརྡར་རྒྱབ་སྟེ་ཕྱི་རོལ་དུ་དོར།མགོ་བོའི་སྐྲ་དང་གཟུགས་པོ་སོགས་དེའི་ཉིན་ངེས་པར་དུ་བཀྲུ་དགོས་པ་ལས་མ་བཀྲུས་པར་ལོ་གསར་པ་ལ་བཞག་ན་རྣམ་རྟོག་དུ་བརྩི་སྲོལ་ཡོད་པས་དེར་བརྟེན་གཙང་མར་བཀྲུས་ཏེ་ལོ་གཅིག་གི་ནད་གདོན་སྡིག་སྒྲིབ་ཚང་མ་གཙང་མར་དག་པར་བརྩི།དེ་ནུབ་ཟས་རིགས་སྣེ་འཛོམས་ལས་གྲུབ་པའི་དགུ་ཐུག་ཀྱང་བསྐོལ་ནས་འཐུང་།གནམ་གང་ཉིན་གྲོ་བཅུར་སོགས་ཁ་ཟས་རིགས་སྣུམ་བསྲེགས་བྱེད།གནམ་གང་དགོང་མོ་ནམ་མཁའི་སྐར་མ་ཚང་མ་ཤར་ཟིན་རྗེས་སྐར་ཆུ་ཟེར་བ་དེ་ལེན་ནས་ལོ་གསར་གྱི་ཚེས་གཅིག་ཉིན་ཁ་ལག་གདོང་གསུམ་གཙང་མ་དེས་བཀྲུས།རྟ་ཟོག་སེམས་ཅན་རིར་བཀོད་ཚར་རྗེས་ཚང་མ་ཁྱིམ་དུ་ལྷན་ཅིག་ཏུ་འཛོམས་ཏེ་སྟོན་མོ་རྒྱས་པ་བརྒྱབ།མི་རེར་མདུན་དུ་གཡག་ཤ་ཤ་སྐལ་ཆེན་པོའི་སྟེང་ལུག་ཤ་གཟུགས་རེ་བཞག་པ་དང་།དེའི་སྟེང་དུ་གྲོ་བཅུས་བཅུ་རེ་བཞགདེའི་མཉམ་དུ་གྲོ་དང་སྐྱུར་ར་བཅས་སྤྲུས་པའི་གྲོ་ཐུད་རེ་དང་།དབྱར་ཁ་མར་དང་སྐྱུར་བ་མཉམ་དུ་སྤྲུས་ཏེ་སྐམ་པའི་སྐྱུར་ཐུད་བཅས་ཡོད་པའི་སྐལ་བ་རེ་བཟའ་ཚང་ཆེ་ཆུང་ཚང་མ་དང་གཡོག་འཁོར་ཚང་མ་དབྱེ་བ་མེད་པར་སྟོན་མོ་ལྟ་བུ་བརྒྱབ་དགོས་པ་མ་ཟད།ཁྱིམ་མི་སྤུན་མཆེད་ཉེ་འབྲེལ་གྱི་མི་རེ་རེ་བཞིན་ལ་སྐལ་བ་སྤྲད་དགོས་སྲོལ་ཡོད།དེ་བཞིན་མངར་ཆའི་རིགས་འདྲ་མིན་སྡེར་མ་ཆེ་ཆུང་སྣ་ཚོགས་ནང་གཤམ་ནས་བཞག་ཡོད།དེ་དག་ཚང་མའི་རྩེ་ཕུད་རྣམས་མཆོད་ཁང་ནང་དུ་སྐུ་གསུང་ཐུགས་རྟེན་གྱི་མདུན་དུ་དང་ཐོག་མཆོད་འབུལ་ཞུས་ནས།དེ་ནས་ནང་མི་རྣམས་ཀྱིས་ཟས་སྣའི་དགའ་སྟོན་ལ་རོལ།ལོ་གསར་གྱི་ཚེས་གཅིག་ཉིན་མི་སུ་ཡིན་ཡང་ཁྱིམ་ཚང་གཞན་དག་ནང་འཁྱམ་འཁྱམ་འགྲོ་སྲོལ་མེད།ཚེས་གཉིས་དང་གསུམ་བཞི་བཅས་ལ་གྲོང་པའི་ནང་ཡོད་ཉེ་འབྲེལ་དང་གྲོགས་པོ།དགའ་མཐུན་རྣམས་མགྲོན་ཕར་འབོད་ཚུར་འབོད་བྱེད་སྲོལ་ཡོད།རྩེ་རིགས་ཀྱང་རྟ་རྒྱུགས།བོག་འཕེན།གླུ་བྲོ་གཞས་གར་བཅས་རྩེ་མོ་སྣ་ཚོགས་བརྩེ་སྲོལ་ཡོད།
ཕྱི་ཟླ་གཉིས་པའི་ནང་དཔྱིད་རྨོས་ཀྱི་གྲ་སྒྲིག་གི་འགོ་ཚུགས།དང་པོ་ཞིང་ཁའི་ནང་ས་མགོ་ཡོད་པ་རྣམས་བརྡུངས་ཏེ་ཞིབ་ཞིབ་འཁོད་སྙོམ་བྱས་པ་དེ་ལ་སྤོ་ཐོ་བརྡུངས་ཟེར།དེ་ནས་ཞིང་ཁ་ནང་ལུད་བླུགས།ལུད་ནི་སྒྲོ་ཁུག་ནང་བླུགས་ཅིང་ཁལ་མཛོ་ལ་བསྐལ་ནས་ཞིང་ཁར་ཕྱིར་འདྲེན་བྱེད།དེ་ནས་རྡོ་ཡི་ཞིང་ར་སོགས་བརྩིགས་ཏེ་ཞིང་ནང་འབྲུ་འདེབས་ཏེ་རྨོས་རྒྱབ།ཞིང་ཁ་རྨོ་ཚར་བ་དང་མཉམ་དུ་དཔྱིད་རུ་སྐྱས་པོ་བྱེད།དེར་གར་སྦྲ་ཕུབ་མི་དགོས་པར་རུ་ཁང་ནང་སྡོད་ཆོགབོད་ཟླ་ལྔ་པའི་ཚེས་༡༥ཉིན་འཛམ་གླིང་སྤྱི་བསང་གི་ཉིན་མོ་ཡིན་པས།དུད་ཚང་ཚང་མས་སོ་སོའི་འབྱོར་པ་ལ་དཔགས་པའི་རྒྱལ་མཚན་རྩེ་མོ་དང་།སྒྲོལ་མ།བསམ་པ་ལྷུན་གྲུབ།བར་ཆད་ལམ་སེལ།རྟ་གཟུངས།ནོར་གཟུངས།རླུང་རྟ་སོགས་རས་ལ་སྤར་བཏབ་སྟེ་དར་བཟོས་པ་རྣམས་ཡུལ་ལྷ་གཞི་བདག་རྩ་ཆེན་བརྩི་བའི་རྩེ་མོར་སྒྲོན་ནས།ཆོས་སངས་རྒྱས་ཀྱི་བསྟན་པ་དར།སེམས་ཅན་ལ་བདེ་སྐྱིད་འབྱུང་།མི་ལ་ན་ཚ་དང་།ཕྱུགས་ལ་གོད་ཁ་མི་འོང་བ།ཆར་ཆུ་དུས་སུ་འབེབས་ཤིང་ལོ་ཏོག་ལ་རྩ་སད་སེར་གསུམ་མི་འོང་བ།ཡུལ་ཁམས་ཀུན་ཏུ་ནད་མུག་མཚོན་འཁྲུག་མི་འོང་བ་བཅས་ཀྱིས་སྨོན་ལམ་ཟབ་མོ་བཏབ་ནས་བསང་བཏང་སྟེ།ཀི་ཀི་བསོ་བསོ་ལྷ་རྒྱལ་ལོ་ཟེར་འབོད་སྒྲ་ཆེན་པོ་སྒྲོག་ཅིང་བསང་སྐོར་བྱེད།དེ་ཉིན་ཟས་སྣ་ཕུན་སུམ་ཚོགས་པའི་དགའ་སྟོན་ལ་རོལ་ནས་ཉིན་གང་རི་མགོ་ཕན་ཚུན་ལྟད་མོ་བལྟས་ཏེ་དགུང་མོ་ནང་ལ་ལོག་དབྱར་ཟླ་འབྲིང་པོའི་ཚེས་༡༥ཡས་མས་སུ་ས་མཐོ་སར་དབྱར་རུ་འགྲོ་སྟེ་མི་རྣམས་སྡོད་སར་སྦྲ་གུར་ཕུབས།ནོར་ལུག་རྣམས་འོ་མ་འཇོ་ཚེ་སྦྲ་གུར་ཉེ་སར་སྤང་ལྗོངས་སྟེང་དུ་འདོགས།དེ་མིན་རི་བོ་དང་ཀླུང་གཤམ་ཚང་མར་དབྱེ་བ་མེད་པར་རྩྭ་དང་རྩི་ཏོག་རྣམས་བཀྲག་མདངས་རྒྱས་ཤིང་དཀར་སེར་དམར་ལྗང་ཅན་གྱི་ཁྲོད་དུ་བཀྲམས།དེ་ནས་རྟ་ཟོག་སེམས་ཅན་རྣམས་ཤ་སྟོབས་རྒྱས་ཤིང་སྤུ་ཁར་འོད་མདངས་འཕྲོ།འབྲི་དང་།མཛོ་མོ།ར་ལུག་རྣམས་མ་རྗེས་སུ་ཁྲིད།དཀར་འོ་ཞོ་ཆུ་གཏེར་རྒྱས་པ་ཇི་བཞིན་འཕེལ་ཁ་ཤིན་ཏུ་ཆེ་བའི་སྒང་ཡིན་པས་མར་དང་ཕྱུར་བ་སོགས་དཀར་གསོག་བྱེད།སྐབས་དེར་ལས་ཀའི་བྲེལ་འཚབ་སོགས་ཆུང་བས་མི་རྣམས་སྐྱིད་དལ་ཆེ་ཤོས་ཀྱི་དུས་སྐབས་ཡིན་པས་དབྱར་སྐྱིད་གཏོང་བའི་དུས་ལ་སླེབས།དེ་ནས་དབྱར་སྐྱིད་སྐབས་འབྲི་གཡག་གཉིས་གསུམ་ཙམ་བཤས་ཏེ།རུ་ཚོ་རྣམས་ལྷན་ཅིག་ཏུ་གུར་ཆེ་ཆུང་མང་པོ་ཕུབས།དུད་ཚང་གཅིག་གམ་ཡང་ན་གཉིས་དང་གསུམ་མཉམ་དུ་བསྡོམས་ཏེ་སྡོད།ཤ་མར།ཐུད་འདྲ་མིན།འབྲས་གྲོ་མ།ཞོ་འོ་མ།ཆང་ཨ་རགཁ་ཟས་དང་མངར་ཆའི་རིགས་འདྲ་མིན་གྱིས་སྡེར་ཁ་དུ་མ་བསྒྲིགས་ཏེ་འདོད་དགུ་ལོངས་སྤྱོད་ཕུན་སུམ་ཚོགས་པའི་དཔལ་ལ་རོལ་བ་དང་།མི་རྟ་རྣམས་ལ་རྒྱན་ཆས་སྤྲས་ཏེ།རྟ་རྒྱུགས།བོག་འཕན།གླུ་བྲོ་གཞས་གར་སོགས་ཀྱི་རྩེད་སྣ་དུ་མ་རྩེ་སྟེ་དབྱར་སྐྱིད་གྲོལ།དེ་ནས་བོད་ཟླ་བདུན་པའི་ནང་སླེབས་སྐབས་འབྲུ་རིགས་ཀྱི་སྙེ་མ་རྣམས་སྙེ་ཁྲི་འགྲིགས་ཤིས་ལས་ཀའི་འགོ་ཚུགས་གྲབས་ཡོད་པའི་སྐབས་ལ།དགུན་ཁ་མེ་ཁ་ཕྱེ་ས་ཤིང་ཡུལ་སུར་ཟེར་བ་དེ་འཐུ་ནས་ཡུལ་པའི་ཁྱིམ་དུ་ཁལ་མཛོ་ལ་བཀལ་ནས་འདྲེན།དེ་ནས་ཞིང་ཁའི་མུ་རྩ་དང་རི་རྩ་འཐུ།བོད་ཟླ་བརྒྱད་པའི་ནང་སྟོན་ཐོག་བརྔ་བསྡུ་བྱེད།སྟོན་ཐོག་བརྔ་ཚར་རྗེས་སྟོན་རུ་བབས།དེ་མཚམས་ལོ་ཏོག་ཉི་མར་སྐམ་སྟེ་ཐོག་ཁང་དུ་བཅུག་པ་ལ་སྐམ་གསོག་བཙུད་ཟེར་བ་དེ་བྱེད།ཞིང་ཁར་ས་ལོག་རྒྱབ།འབྲུ་རིགས་བརྡུངས་འཕྱར་བྱེད།སོག་མ་དང་འདོབས་ཕུབ་སོགས་ཚང་མ་གཙང་མ་བཟོས་ནས་འབྲུ་རྣམས་སྣོད་དང་ཁང་པའི་ནང་དུ་བླུགས་རྗེས།ཡུངས་མ་བརྐོ།ཡུང་ལས་ཆ་ཚང་ཚར་རྗེས།རྟ་ནོར་མི་གསུམ་ཚང་མ་ཡུལ་པའི་གྲོང་ཁྱིམ་དུ་བསྡོམས།དེ་ནས་སྟོན་ཟླ་མཐའ་མ་བོད་ཟླ་དགུ་པའི་ནང་སླེབས།ཟླ་བ་དགུ་པར་དེར་སྡིག་ཟླ་ཡང་ཟེར།རྒྱུ་མཚན་ནི་བོད་མི་ས་ཁུལ་མང་ཆེ་བས་དགུ་པའི་༢༠ནང་སླེབས་སྐབས་དགུན་བཤས་བཤའ་ནས་འབྲི་གཡག་ར་ལུག་མང་པོ་སྲོག་གཅོད་པའི་དུས་ཡིན་པས་དེར་ཟེར།དེ་ནས་དགུན་ཁའི་དུས་ལ་སླེབས་པས་རྩི་ཤིང་མེ་ཏོག་གི་ལོ་མ་དང་འདབ་མ་རྣམས་ས་ཁར་ལྷུངས་ནས་གྲང་ངར་ལངས་པའི་འགོ་ཚུགས།རྟ་ཟོག་སེམས་ཅན་གྱི་ཤ་ཤེད་རྣམས་ཀྱང་མར་ཆགས་ཏེ་འོ་ཞོ་སོགས་ཀྱང་མར་ཉུང་དུ་འགྲོ་བའི་དུས་ལ་སླེབས་པ་ཡིན།བོད་ཟླ་བཅུ་པའི་ནང་སླེབས་སྐབས་བཤས་བཤའ་བའི་ཤ་རྣམས་ལྕགས་ལྟར་འཁིངས།ཆུ་ལ་དར་ཆགས།ས་རྣམས་འཁྱགས་ཅིང་སེར་ཁ་གས།མདོར་ན་མི་ཟོག་རྟ་ནོར་སོགས་སེམས་ཅན་སྤྱི་མཚུངས་ལ་གྲང་འཁྱགས་ཀྱིས་མནར་བའི་དུས་ལ་སླེབས་སོ།།
བསམ་ཚུལ་འབྲི།
ཁེད།(གབ་ཚིགས)