རིན་པོ་ཆེ། ཁྱེད་ཉིད་གང་དུ་བཞུགས་ཡོད།
ལོ་ཟླའི་ཕྲེང་བ་རིམ་གྱིས་འདས་སོང་།
དུས་ཀྱི་འགྱུར་བ་དྲག་ཏུ་རྒོད་སོང་།
ས་ཆེན་འགུལ་ཐེངས་གཅིག་གིས།
ཚེ་སྲོག་མང་པོ་ཁྱུད་མིད་བྱས་ཐལ།
རིན་པོ་ཆེ། ཁྱེད་ཉིད་གང་དུ་བཞུགས་ཡོད།
མཆོད་རྟེན་མཐོན་པོའི་བང་རིམ་འཁྲུགས་སོང་།
ལྷ་ཁང་ཆེན་མོ་གས་ཀ་རྒྱུགས་སོང་།
སྐུ་བརྙན་བྱིན་ཅན་ཐང་ལ་འགྲིལ་ཐལ།
རིན་པོ་ཆེེ། ཁྱེད་ཉིད་གང་དུ་བཞུགས་ཡོད།
མེས་པོ་རྟོགས་ལྡན་འོ་བརྒྱལ་མྱོང་སོང་།
མ་ཡུམ་དྲིན་ཅན་ཐུགས་ཁྲལ་ཆེ་སོང་།
གྲྭ་ཚང་ཁྲ་མོ་སྐྱོ་བས་ཁེངས་ཐལ།
རིན་པོ་ཆེ། ཁྱེད་ཉིད་གང་དུ་བཞུགས་ཡོད།
འདི་ལྟར་གོད་ཆགས་ཀྱི་ཁྲོད་དུ་དཀའ་ངལ་དང་ཉམ་ཉེས་ཀྱིས་སེམས་པ་སྐྱོ་གདུང་གིས་ཁེངས་དུས་མིག་ལམ་དུ་ཁྲ་ལམ་མེར་འཆར་བ་ནི་རིན་པོ་ཆེ་ཁྱེད་ཉིད་ཡིན་ལ། ཁྱེད་མེད་ན་ང་ཚོའི་མིག་སྔར་གྱི་དཀའ་ངལ་དག་ལ་གདོང་ལེན་བྱེད་ཐབས་གཏན་ནས་མི་འདུག། རིན་པོ་ཆེ་ཁྱེད་ཉིད་མགྱོགས་མྱུར་ཕེབས་རོགས་གནང་། གལ་སྲིད་ཁྱེད་ཉིད་ད་དུང་མ་ཕེབས་ན་ཁྱེད་ནི་འཁོར་བ་ལ་གདོང་གཏད་མི་ཐུབ་པའི་མི་སྡར་མ་ཞིག་དང་། ལྟོས་བཅས་ཀྱི་འཁོར་འབངས་ལ་འགན་མི་ཁུར་བའི་མི་ནུས་མེེད་ཅིག་ལ་བརྩི་རྒྱུ་ལས་མ་འདས། ཁྱེད་ཉིད་རི་ཁྲོད་དུ་བྱ་བྲལ་ཕེབས་ཁར་ལོ་གསུམ་རྗེས་སུ་སྐུ་འཚམས་གྲོལ་ཏེ་ཕྱི་ཕེབས་གནང་རྒྱུའི་ཞལ་བཞེས་དེ་བརྗེད་སོང་ངམ། རིན་པོ་ཆེ། ལོ་ངོ་བཞི་ལ་ཉེ་དུས་ཁྱེད་ཉིད་གང་དུ་བཞུགས་པའི་གཏམ་སྐད་ཙམ་ཡང་ཐོས་རྒྱུ་མེད་པ་འདི་ནི་ང་ཚོའི་སློབ་མའི་ངོས་ནས་བཟོད་པ་དཀའ་བའི་སེམས་ཁྲལ་དང་། དྲན་གདུང་། དད་འདུན་སོགས་ལ་ཁྱེད་ཀྱིས་སྣང་ཆུང་དང་ཐུབ་ཚོད་བཏང་བ་མ་ཡིན་ནམ། འཛམ་གླིང་ཤར་ནུབ་ཀྱི་སྐྱེ་བོ་སྟོང་ཕྲག་མང་པོས་མགོ་ཟུར་གྱི་རྣ་བ་ཁྱེད་ཕྱོགས་སུ་གཏད་དེ་སེམས་ཁམས་གྱི་འདུན་པས་ཁྱེད་ཉིད་དྲན་ཏེ་ལོ་ཟླའི་ཉག་མ་རེ་སྒུག་གིས་སྐྱེལ་བ་འདི་ཁྱེད་ཀྱིས་མི་ཤེས་སམ། དེ་རིང་ས་ཆེན་གྱི་སྲིན་མོ་དྲག་ཏུ་ཁྲོས་པའི་གཡོ་འགུལ་ཁྲོད་གངས་རི་ཇོ་མོ་གླང་མ་ཡང་ས་ལ་བརྡབ་པར་ཉེ་ཞིང་། མཐོ་སྒང་གི་ཧི་མ་ལ་ཡི་རི་བརྒྱུད་སྟོང་ལ་ཁད་དུ་གྱུར་དུས་ང་ཚོས་ཁྱེད་ཉིད་དབེན་གནས་གང་ཞིག་ལ་བཞུགས་ཡོད་མེད་ཙམ་ཡང་མི་ཤེས་པ་འདི་ནི་ངོ་མ་སེམས་ཁྲལ་ཞིག་གི་བསྣོན་མ་རུ་གྱུར། གལ་ཏེ་ཁྱེད་ཉིད་བྱམས་སེམས་ཀྱི་མངའ་བདག་ཅིག་ཡིན་ན། གལ་ཏེ་ཁྱེད་ཉིད་ཉམ་ཐག་གི་མགོན་སྐྱོབ་ཅིག་ཡིན་ན། ངེད་ཅག་སློབ་འབངས་རྣམས་ཀྱི་གདུང་བའི་རེ་འབོད་འདི་གསོན་དང་། ཉམ་ངའི་གནས་སྟངས་འདི་གཟིགས་དང་། རེ་སྒུག་གི་སྐྱོ་གདུང་འདི་སོལ་དང་། ཁྱེད་ལ་དཀའ་སྡུག་བཟོད་པའི་སྙིང་སྟོབས་དང་། འབད་བརྩོན་ཟབ་མོའི་བརྟུལ་ཞུགས། དབེན་གནས་འགྲིམས་པའི་འདུན་པ་བཅས་མངའ་བ་བདེན་མོད། ལྕང་ལོ་ཅན་ནས་དུང་བའི་ཕྱི་མིག་འགྲོ་ལ་འཕངས་ཤིང་། རྡོ་རྗེ་གདན་ནས་ཐུགས་བསྐྱེད་ཟབ་མོ་བདག་གིས་བཞེས་ཏེ། ཁ་བ་ཅན་ནས་སྨོན་ལམ་ཟབ་མོ་བོད་ལ་བཏབས་པའི་ཕྱག་ན་རྡོ་རྗེ་དང་། དགེ་སློང་མ་འགག་པ། ལྷ་སྲས་མུ་ཁྲི་བཙན་པོ་སོགས་ཀྱི་སྐྱེ་འཕྲེང་རྒྱུད་མར་བྱོན་པ་དེ་ངེད་ཅག་གདུལ་བྱའི་ཆེད་དུ་མ་ཡིན་ནམ། དད་པའི་སེམས་ཀྱིས་ཁྱེད་ལ་བསྟེན་ཞིང་དྭངས་བའི་ཡིད་ཀྱིས་ཁྱེད་ལ་རེ་བའི་བའི་ངེད་ཅག་གཏེར་སྒར་གྱི་སློབ་ཚོགས་རྣམས་ཅི་བྱ་གཏོལ་བྲལ་གྱི་དུས་སུ་ཐུགས་རྗེ་ཁྱེད་ཀྱིས་མི་གཟིགས་ན་སུ་ཡིས་གཟིགས། བྱིན་རླབས་ཁྱེད་ཀྱི་མི་སྩོལ་ན་སུ་ཡིས་སྩལ། རིན་པོ་ཆེ། ཁྱེད་ནི་གསང་བདག་མི་གཟུགས་སུ་བྱོན་པའི་ཡེ་ཤེས་ཀྱི་སྤྱན་དང་ལྡན་སྤྲུལ་པའི་གཏེར་ཆེན་ཞིག་ཡིན་སྟབས་དུས་གསུམ་སྒྲིབ་གཡོགས་བྲལ་བའི་མཁྱེན་པ་ཟབ་མོས་ངེད་ཅག་སློབ་མའི་སྐྱོ་གདུང་དང་རེ་སྒུག་འདི་ལ་དགོངས་ཏེ་མྱུར་དུ་ཕེབས་རོགས་ཞུ། མགྱོགས་མྱུར་དུ་ཕེབས་རོགས་ཞུ། མི་གསོན་པོས།
བསམ་ཚུལ་འབྲི།
རྫོང་སར་མཁྱེན་བརྩེ་རིན་པོ་ཆེ་གླེང་བ།