ར་རུ་བསྟན་རྣམ་གྱི་ལོ་རྒྱུས་རགས་བསྡུས།
ར་རུ་བསྟན་རྣམ་་གྱི་ལོ་རྒྱུས་རགས་བསྡུས།
༼སྤྱིར་བཏང་ར་རུ་བསྟན་རྣམ་གྱི་ལོ་རྒྱུས་འདི་ཧ་ཅང་རྔམ་ཟིལ་ཅན་ཞིག་དང་སྐད་གྲགས་ཡོད་པ་ཞིག་ཡིན་མོད།ད་བར་མགོ་མཇུག་ཚང་བའི་ལོ་རྒྱུས་ཡག་པོ་ཞིག་འབྲི་མཁན་བྱུང་མེད་པ་ནི་ཤུལ་ལུས་བོད་ཀྱི་རྩོམ་པ་པོ་རྣམ་པ་དང་།དེ་ལས་ཀྱང་སྡེ་དགེ་བའི་ང་ཡིན་ཁོ་ཡིན་ཟེར་འདུག་མཁན་འདི་ཚོར་མཚོན་ན་ངོ་ཚ་དགོས་ས་ཞིག་རེད་དྲན།ད་ཐེངས་ཀྱང་ངག་ཐོག་ལོ་རྒྱུས་དག་རྩ་བའི་བཤད་སྲོལ་གཅིག་ནའང་།ཕྲན་བུ་མི་འདྲ་སའང་ཡོང་བཞིན་པ་འདི་དང་།ཡུལ་དུས་ཀྱི་དབང་གིས་ཡག་པོ་ཞིག་འབྲི་ཐུབ་ཚོད་མི་འདུག༽
དེ་ལ་ར་རུ་ཚང་ནི་མདུན་སྐོར་གྱི་གོ་ས་ཡོད་པའི་སྡེ་དགེ་ཚང་གི་ཁྱིམ་དུད་ཆེ་གྲས་ཤིག་ཡིན་པ་དང་།དབོན་པོ་སྟོད་འབྲི་ཆུ་ནུབ་བརྒྱུད་དུ་ཆགས་ཡོད།ལྔ་བཅུ་ང་གྲངས་ནང་ཁམས་ཕྱོགས་སུ་རྒྱ་དམག་བཙན་འཛུལ་བྱས་ནས་ངོ་རྒོལ་རིམ་པ་བྱེད་བཞིན་བས་མ་ཚད།སྡེ་དགེ་ཤར་ནུབ་གཉིས་ནས་ཀྱང་འཆར་གཞི་ལྡན་པའི་དམག་གི་སྒྲིག་འཛུགས་འོག་ཕར་རྒོལ་དྲག་པོ་བྱེད་བཞིན་པའི་དུས་དེར།རྒྱ་དམག་གིས་ར་རུ་བསྟན་རྣམ་ལ་དམིགས་སུ་བཀར་ནས་དམིགས་འབེན་བཟུང་སྟེ་རྗེས་འདེད་གཏོང་གི་ཡོད་འདུགཁོང་ལ་དམིགས་བསལ་རྗེས་འདེད་གཏོང་དགོས་དོན་ནི།ཁོང་ཀརྨ་པ་སྐུ་ཕྲེང་བཅུ་དྲུག་པ་རིག་པའི་རྡོ་རྗེའི་ཚ་བོ་ཡིན་པ་དང་།དེ་ལས་ཀྱང་དགྲ་འགོ་ཧ་ཅང་རྒོད་པོ་ཞིག་ཡིན་པས་མ་ཚད།དཔའ་བློ་ཁོག་དང་།མེ་མདའ་རྒྱག་རྒྱུ་ལ་དམིགས་བསལ་གྱི་ལག་རྩལ་ཡོད་པས་ཡིན་ཚོད་འདུགདེའང་བྲག་ཡག་ཚང་འབྲི་ཆུ་ཤར་བརྒྱུད་ནས་དགྲ་དང་འཛིངས་ཏེ་ནུབ་བརྒྱུད་དུ་འབྱོར་ཡོད་པ་དང་།ར་རུ་ཚང་གི་དབྱར་ས་ཕུ་མདོ་ལ་ས་གཡར་བྱས་ནས་སྡོད་ཡོད་པའི་སྐབས།བསྟན་རྣམ་ཀྱང་དེར་སོང་ནས།བྲག་ཡག་མགོན་རྣམ་དང་དཔུང་མཉམ་བསྒྲིགས་བྱས་ཏེ་དགྲ་བོ་རྒོལ་རྡུང་རིམ་པ་གཏོང་ཡོད་འདུགདེའང་བྲག་ཡག་མགོན་རྣམ་གྱི་ལོ་རྒྱུས་སུ་ “ཁོང་ལའང་ང་དང་འདྲ་བ་དམག་མི་ཟེར་ནའང་འདྲ།གཡོག་པོ་ཟེར་ནའང་འདྲ་བཅུ་གྲངས་ཤིག་ལས་མི་འདུགསྤྱིར་བཏང་འབྲི་ཆུ་ཤར་བརྒྱུད་དུ་སྐབས་དེར་སྲིད་བྱུས་ཏོག་ཙམ་གུ་ཡངས་ཀྱི་རྣམ་པའི་ཐོག་ནས་རྒྱ་མིས་མགོ་སྐོར་གཏོང་གིན་ཡོད་རེད།དེ་འདྲ་བྱེད་དུས་བསྟན་རྣམ་གྱི་ནང་མི་ཡང་ཁྱིམ་དུ་རང་འཇག་བསྡད་ཡོད་རེད་དེ།བསྟན་རྣམ་གྱིས་གཡོག་པོ་ཚོ་ཁྲིད་ནས་ག་ས་གང་དུ་དམག་བརྒྱབ་ནས་འགྲོ་གིན་ཡོད་རེད།ཁོང་དང་ང་གཉིས་ཕལ་ཆེར་ལོ་མཉམ་འདྲ་ཞིག་ཡོད།ཁོང་གིས་ནམ་རྒྱུན་རི་མགོ་ནས་མར་ཡུང་དེ་འདྲ་གཡུག་སྟེ་མེ་མདས་བཙགས་ནས་མདའ་རྩེད་རྩེ་བཞིན་ཡོད་འདུག་ལ།དེ་འདྲ་བྱས་ནས་མེ་མདའ་གཉིས་ཙམ་འཕྲོ་བརླག་བཏང་ཟིན་འདུགཁོང་ལ་མཚོན་སྲུང་གཙོ་བོ་གནམ་ལྕགས་ཕུར་པ་ཞིག་ཡོད་རེད།དེ་ལ་ཁོང་གིས་གོང་ཆེན་པོ་སྤྲད་ནས་ཟ་འདོད་ཚང་གི་འགྲམ་ནས་ཉོས་འདུགབཤད་སྲོལ་ལ་མཚོན་སྲུང་དེས་ནས་ཁལ་མལ་ཙམ་གྱི་ས་ཁྱོན་གྱི་མཚོན་ཁོག་གི་རེད་ཟེར་གྱིན་འདུགའོན་ཀྱང་ངེད་གཉིས་འདུག་ས་གཅིག་ལ་བསྡད་དེ་རྒྱ་དང་འཛིང་ཡོང་དུས་རྡོ་མགོ་ས་མགོར་མདེའུ་ཁེལ་ནས་ཐལ་ལ་དང་རྡོ་ཕྱེ་མཆོད་དེ་མིག་གིས་བལྟ་མི་ཐུབ་པ་བཟོ་ཡོང་གིན་འདུག་ལ།མཚམས་རེར་ཤིང་སྡོང་འོག་ལ་བསྡད་ནས་དགྲ་དང་འཛིང་དུས་དགྲ་བོའི་མདེའུ་ལོ་མ་ལ་ཁེལ་ནས་ལོ་མ་རྣམས་ཐ་ར་ར་གཟུགས་པོའི་སྟེང་འཐོར་ཡོང་གི་འདུག་པས།ངས་མཚམས་རེར་ཁོ་ལ་ཁྱོད་ཀྱི་ནས་ཁལ་མལ་ཙམ་ཁོག་པའི་མཚོན་སྲུང་དེ་དེ་འདྲ་ཁོག་གི་མི་འདུག་དྭ་ཞེས་རྩེད་མོ་རྩེ་མྱོང་།ང་ལ་མཚོན་སྲུང་གཙོ་བོ་ལྷ་འབྲང་དགོན་པའི་སྤྲུལ་སྐུ་ཨ་འཇིགས་ཀྱིས་གནང་པའི་སྐུ་འདྲ་ཟིལ་ཆེན་ཞིག་ཡོད།ངེད་གཉིས་ཆ་དགྲ་འཛིང་རྒྱུ་ལ་ཧ་ཅང་དགའ་བོ་ཡོད་ལ།དགྲ་དང་ཐུག་ན་སྐྱིད་འདུག་མི་གཉིས་ཡོད།གཉིས་ཆ་ལ་མཚོན་ལུས་ལ་འགྲོ་གིན་མེད་པ་དང་ལོ་ཚོད་མཉམ་པ།ད་དུང་མེ་མདའ་འཕེན་རྒྱུ་ལ་མདའ་གཟེར་མོ་གཅིག་འདྲ་བོ་གཉིས་ཡོད།སྐབས་དེར་སྡེ་དགེ་མཐིལ་རྒྱ་དམག་གིས་འཕྲོགས་ཟིན་པ་ཡིན་དུས།ངེད་གཉིས་ཀྱིས་དགྲ་དང་འཐབ་ནས་སྡེ་དགེ་ཚུར་བླངས་ཏེ་བོད་ནས་རྒྱ་དམག་རྣམས་མཐར་སྤྲོད་གཏོང་རྒྱུའི་དམིགས་ཡུལ་བཟུང་ཡོད།ནམ་རྒྱུན་དམག་བརྒྱབ་སྟེ་རྒྱལ་ཁ་ཐོབ་དུས་དམག་གླུ་དེ་འདྲ་བཟོས་ནས་གཏོང་གིན་ཡོད།དམག་གླུ་འདི་འདྲ་རེད། (སྐབས་འདིར་ཁོང་གིས་ངར་རྒོད་ཆེན་པོས་གདངས་བཀུགས་ནས་བླངས་སོང་།འོན་ཀྱང་མཐའ་ནས་མར་བློ་ལ་བསྡད་མི་འདུག་གསུངས།)
ཤར་ཕྱོགས་ཀྲུང་གོའི་ཡུལ་ནས།།དམ་སྲི་མའོ་ཚར་བྱུང་།།
སྐྱེས་པའི་བུ་ཕྲུག་ཐམས་ཅད།།རྩ་མེད་བཙོན་ལ་བཅུག་སོང་།།
དེ་འདྲའི་བྱ་བ་ཡིན་ཚེ།།ཡུན་རིང་སྡོད་ཀྱང་སྐྱིད་མེད།།
ལངས་ཤོགལངས་ཤོགབོད་མི་ཤ་ཁྲག་གཅིག་པའི་སྤུན་ཟླ་ཐམས་ཅད་ལངས་ཤོག
་་་་་་་་་་་་་
དམག་གླུ་འདི་འདྲ་བླངས་ཏེ་རྒྱ་མགོ་རྡུང་བཞག་ཟེར་ནས་འདུག་བཞིན་ཡོད་ལ།སྐབས་འདི་དག་ང་ཚོ་ལ་སྤོབས་པ་ཧ་ཅང་མཐོ་པོ་ཡོད།ཕོ་སུ་འདྲ་ཞིག་སླེབས་སོང་ནའང་མི་སྐྲག་བསམ་པ་ཞིག་དང་།འཛིང་དགོས་བསམ་པ་ཞིག་ལས་མེད།ད་ལྟ་བསམ་དུས་ངོ་མ་ལྐུགས་པ་རེད་འདུགགང་ཡིན་ཟེར་ན་རྒྱ་དམག་ལ་མེ་མདའ་ཡག་པོ་ཡོད་པས་མ་ཚད་མདེའུ་ལ་སེར་སྣ་མེད་དུས་བོག་འཕེན་ཐེངས་གཅིག་ལ་མདེའུ་མང་པོས་བང་བསྒྲིགས་ནས་བཙག་ཡོང་གི་རེད།ང་ཚོ་ལ་ནི་མདེའུ་རེ་འཕངས་ཟིན་དུས་ཡར་སྐྱར་མདེའུ་གཉིས་པ་དེ་བརྫངས་ནས་འཕེན་དགོས་པའི་བོག་དེ་འདྲ་ལས་ཡག་ག་ཞིག་ཡོད་མ་རེད།དེ་ནས་ཉི་མ་ཞིག་ལ་རྒྱ་དམག་༣༠༠ཙམ་སླེབས་འདུག་པས།བསྟན་རྣམ་ངེད་གཉིས་ཀྱིས་རང་དམག་སུམ་ཅུ་མ་ཟིན་ཙམ་དེ་ཁྲིད་ནས་ཕུ་མདོ་ནས་མར་ཡ་རྩ་ནང་སོང་ཞིང་།དེ་ནས་དཀྱིལ་ལེ་རུ་ཕྱིན་ནས་ག་ཟམ་ལ་བསྡད་ཡོད་པའི་དགྲ་བོའི་སྟེང་དུ་དམག་བརྒྱབ་པ་ཡིན།སྐབས་འདིར་རྒྱ་དཔོན་གཉིས་དང་དམག་ཉོབ་མང་པོ་ཞིག་སོད་སོང་།དེ་འདྲ་བྱས་ནས་རྒྱ་དམག་ཕྱིར་བྲོས་སོང་པ་རེད།
དེ་ནས་ཡང་དམག་མང་པོ་ཞིག་ཕབ་བྱུང་བས།ར་བྲག་མཉམ་སྦྲེལ་གྱིས་འཐབ་འཛིང་དྲག་པོ་བྱས་ཏེ་སྐབས་འདི་རྒྱ་དམག་སུམ་བརྒྱ་མ་ཟིན་ཙམ་བསད་ཐུབ་སོང་བས་དགྲ་བོ་དཔའ་ཞུམ་དགོས་པ་ཞིག་བཟོས་པ་རེད།
དེ་ནས་ཡང་ཉི་མ་ཞིག་ལ་སྐམ་ཐོག་ནས་ར་རི་དང་བྲག་ཡག་ངེད་གཉིས་ཀྱི་ཆེད་དུ་དམིགས་བསལ་དམག་མི་ཁས་ལེན་པ་༥༠སླེབས་ཡོང་གིན་འདུག་ཟེར་གོ་བྱུང་།ཁོང་ཚོ་ཡ་རྩ་ནང་བར་དུ་སླེབས་ཚར་འདུགད་དུང་ལམ་བར་ནས་བྱ་རྒོད་ཚང་གི་གཡོག་པོ་རྒན་པ་དཀར་དབྱངས་ཀྱང་བསད་སོང་འདུགདེ་ནས་ཡང་ང་ཚོའི་དམག་ཆས་སོང་པ་ཡིན།སྐབས་འདིར་རྒྱ་དམག་ཁས་ལེན་པ་དེ་འདྲ་དམིགས་བསལ་རྐྱང་རྐྱང་སླེབས་ཡོད་དུས།བསྟན་རྣམ་ངེད་གཉིས་ཀྱིས་འཐབ་ར་ཡག་པོ་ཞིག་བདམས་ནས་གཡོག་པོ་ཚོ་ལ།ཁྱོད་ཚོས་དེ་རིང་འཛིང་མི་དགོས།མདའ་འཕྲོ་བརླག་འགྲོ་གི་རེད།དང་པོ་ངེད་གཉིས་ཀྱི་འཛིང་ཡོང་།དེ་ནས་རྗེས་སུ་ཅི་དགོས་བལྟ་ཆོག་གི་རེད།ཁྱོད་རང་ཚོ་ཡར་ཙམ་ལ་སྡོད་ཤོག་ལབ་པ་ཡིན།དེ་འདྲ་བྱས་ནས་ངེད་གཉིས་ཀྱིས་འཛིང་འཛིང་སྟེ་རྒྱ་དམག་ཁས་ལེན་པ་བཅུ་ལྷག་ཅིག་བསད་ཐུབ་སོང་།དེ་ནས་ང་ཚོ་དམག་མཚམས་ཆད་སོང་།
དེ་འདྲ་བྱས་ནས་ལོ་གཉིས་ལྷག་ཕུ་མདོ་ལ་བསྡད་རྗེས་ཡར་དབུས་ལ་གཏད་དེ་བྲོས་བྱོལ་ཡོང་བ་རེད།དེ་ནས་མདོ་གཞུང་མའི་ཕྱོགས་སུ་འབྱོར་ནས་ཆོས་གླིང་ས་རུ་མ་ལ་སྒར་བརྒྱབ་ནས་མི་རྟ་གཉིས་ངལ་གསོ་བྱས་ཏེ་བསྡད་པ་ཡིན།འོན་ཀྱང་ང་ཚོ་དམག་མི་རྣམས་སི་མདའ་རུ་སོང་སྟེ་སི་མདའ་དགོན་ནང་དུ་བསྡད་པ་རེད།འོན་ཀྱང་ཉི་མ་ཞིག་ནངས་སྔ་སྔ་མོ་ནས་རྒྱ་དམག་གིས་དགོན་པ་སྐོར་ཚར་འདུག་པས།ང་ཚོ་རྟ་སྒ་རྒྱག་ལོང་ཡོད་མེད་ཀྱིས་དགོན་པའི་ཕྱིར་ཐོན་ནས་བྲོས་པ་རེད།སྐབས་འདིར་ར་རུ་བསྟན་རྣམ་དཔོན་གཡོག་རྣམས་ཡར་དབོན་སྟོད་ཕྱོགས་སུ་བྲོས་པ་རེད།དེ་ནི་ཁོང་གི་ནང་མི་ད་དུང་གཞིས་སུ་བསྡད་ཡོད་པས་རེད།དངོས་གནས་བྱས་ན་བསྟན་རྣམ་གྱིས་ཡར་དབུས་ལ་ཕྱིན་ན་དྲན་གྱིན་འདུག་མོད།ཁོང་གི་ཨ་ཁུ་འཇམ་དབྱངས་བློ་གྲོས་(ར་སྒུར་ཡང་ཟེར་)ཀྱིས་ངོས་ལེན་བྱེད་ཀྱིན་མེད་དུས་ཁོང་ཡར་ནང་མི་ལ་འཁོར་འདུག་གིན་ཡོད་རེད།
ང་ཚོའི་ཕྱོགས་ཁག་དེ་སྔོན་མ་ནང་རྣམས་བཞག་ཡོད་སའི་ས་ཆ་དེར་ཕྱོགས་ནས་བྲོས་པ་རེད།ཡིན་ནའང་རྒྱ་དམག་མང་ཤོས་དེ་བསྟན་རྣམ་རྗེས་ལ་སོང་འདུགཉི་མ་དེ་ནས་བཟུང་བསྟན་རྣམ་ངེད་གཉིས་གསོན་བྱེ་བྱུང་སོང་།ཁོང་དངོས་གནས་དཔའ་བློ་ཁོག་ཆེན་པོ་ཡོད་རེད།དགྲ་དང་ཐུག་དུས་གཏན་ནས་སྐྲག་ངོ་མི་ཤེས་མཁན་ཞིག་རེད།’’ཅེས་བཤད་འདུག
ཕྱི་ལོ་༡༩༥༧ལོའི་ཟླ་བ་བཅུ་པ་ཙམ་གྱི་ནང་།ཁོང་སི་མདའ་རུ་སི་མདའ་དགོན་པའི་བླ་མ་རྫོགས་ཆེན་རིན་པོ་ཆེས་གཙོས་བླ་སྤྲུལ་ཆེ་ཁག་རྣམས་ལ་མཇལ་བཅར་དང་འབྲེལ་དུས་སྐབས་དེའི་ཛ་དྲག་གི་གནས་སྟངས་སྐོར་གྲོས་བསྡུ་གནང་མཁན་ཕེབས་འདུགསི་མདའ་ལ་ར་རུ་ཚང་གི་ཚོང་ཁང་ཡང་ཡོད་འདུག་ལ།ཉིན་ཞིག་ནམ་ལངས་པ་དང་མཉམ་དུ་སི་མདའ་དགོན་པའི་རྒྱབ་རི་་་་་་་་ཡོངས་རྫོགས་རྒྱ་དམག་གིས་སྐོར་ཚར་ཡོད་པ་རེད།གནས་ཚུལ་མི་ལེགས་པ་དེ་ཧ་གོ་བ་དང་།དཔོན་གཡོག་ཚང་མ་ཡར་ལངས་ནས།སྲུང་འཁོར་རྣམས་གཅིག་བཏགས་གཉིས་བཏགས་དང་།སྐེད་གྲི་དང་མེ་མདའ་གཅིག་ཁུར་གཉིས་ཁུར་བྱས་ཏེ།སྒོ་རའི་ནང་གི་རྟ་རྣམས་ལ་སྒ་སྟན་དུས་གཅིག་ཏུ་བརྒྱབ་ནས།མེ་མདའ་རྣམས་ལག་གཡས་པས་རྒྱག་ཆོག་ཆོག་བྱས་ནས་ཁྱེར་ཤིང་།རང་རང་གི་རྟ་རྣམས་ལག་གཡོན་མས་ཁྲིད་བཞིན་རྒྱ་རའི་སྒོ་རྩར་ནས་མར་ཐོན་ཏེ་དགོན་པའི་མདུན་ཐང་་་་་་ནས་ཕར་འགྲོ་བའི་སྐབས།རྒྱ་དམག་ཁ་ཤས་ཤིག་དགོན་པའི་ནང་དུ་ཡར་སླེབས་ཚར་ཡོད་པ་དང་།ཁོང་ཚོས་ར་རུ་དཔོན་གཡོག་གི་སྟེང་དུ་མེ་མདའ་སེར་རྒོད་འབབ་འབབ་རྒྱབ་པ་རེད།ཡ་མཚན་པ་ཞིག་ལ།དགོན་པའི་མདུན་ཐང་་་་་ནས་ལེ་དབར་ཕྱེད་ཙམ་གྱི་ས་ན་ཆུ་ཞིག་ཡོད་པ་དེར་སླེབས་དུས་བསྟན་རྣམ་གྱིས་རང་དམག་རྣམས་སྔོན་ལ་མངག་ནས།རང་གི་རྟ་ལ་ཆུ་རྒྱགས་ཚད་ཅིག་འཐུང་བཅུག་པ་རེད།རྟས་ཆུ་འཐུང་བཞིན་པའི་སྐབས་སུའང་རྒྱ་དམག་གིས་མེ་མདའ་རྒྱག་ཆེ་བས།ཆུའི་ཟིལ་པ་འཐོར་ནས་ཁོང་མི་རྟ་གཉིས་མི་གཞན་དག་གིས་མི་མཐོང་བའི་ཚོད་ཅིག་བཟོས་ནའང་།བྲེལ་འཚུབ་དང་ཟང་ཟིང་གི་རྣམ་པ་གཏན་ནས་མེད་པ་དལ་གྱིས་རི་སྡེབས་དེར་སོང་པ་དང་།དེར་སླེབས་པ་དང་གཞི་ནས་ཚུར་ཁ་བསྐོར་ཏེ་དགྲ་བོའི་སྟེང་དུ་མེ་མདའ་རྒྱག་འགོ་བཙུགས་པ་རེད།སྐབས་དེའི་རྒྱ་དམག་ནི་བསྟན་རྣམ་གྱི་ཆེད་དུ་དང་བླངས་ཀྱིས་ཐོན་པའི་ཟི་ལིང་རྟ་དམག་ཁེར་གཙང་ཡིན་པ་དང་།དམག་མི་ཉིས་བརྒྱ་ལྷག་ཙམ་ཡོད།དམག་དཔོན་གྱི་མིང་ལ་་་་་་་་་་་ཟེར་ཞིང་དམག་དཔོན་འདི་སྐབས་དེའི་གུང་ཁྲན་ཏང་གི་དཔའ་རྒོད་བདུན་ཅུ་ཞེས་གྲགས་ཅན་དམག་དཔོན་བདུན་ཅུའི་གྲས་ཀྱི་གཅིག་ཡིན་པ་རེད།ཁོའི་ཕྲག་པ་གཉིས་ཧ་ཅང་མཐོ་བ་དང་།སྐེ་ཐུང་ཐུང་ཞིག་མེད་པས་གཞན་དག་གིས་རྒྱ་མགོ་གསུམ་མ་ལབ་ཀྱིན་ཡོད།ཁོས་སྐབས་འདིར་རྟ་བྲ་ནག་ཅིག་ཞོན་འདུག་ལ།ཁོའི་དམག་འདེད་བྱེད་སྟངས་ནི་ཧ་ཅང་ཛ་དྲག་ཅིག་རེད།སྐབས་དེར་བསྟན་རྣམ་གྱི་མཉམ་དུ་ཕུར་པ་དང་།ར་རུ་ཕྱག་མཛོད་དཀར་དགེ་སྙན་གྲགས་བཅས་རང་དམག་བདུན་ལས་མེད་པ་དང་།རྒྱ་དམག་ཧ་ཅང་མང་པོ་ཞིག་བསད་རྨས་ཐུབ་ཀྱང་སྤྱིར་བཏང་རྒྱ་དམག་གི་སྒྲིག་འཛུགས་དེ།དམག་དཔོན་གྱིས་དམག་མིའི་རྒྱབ་ལོག་ནས་ཚ་འདེད་བྱེད་བཞིན་དམག་མི་མདུན་མཆོང་མི་ཕོད་པ་ཕྱི་ནུད་བྱེད་མཁན་ཡོད་ན།དེ་མ་ཐག་དམག་དཔོན་དེས་གསོད་ཀྱིན་ཡོད་པས།དམག་མི་རྣམ་ནི་མདུན་དུ་སོང་ནས་མ་ཤི་ནའང་རྒྱབ་ཏུ་བྲོས་ནས་ཤི་རྒྱུ་ཡིན་སྟབས།དམག་ཁོངས་སུ་ཚུད་རྗེས་ཤི་མཆོང་རོ་མཆོང་གིས་ཁ་གཏད་ལ་རྗེས་འདེད་གཏོང་སྲོལ་ཡོད།དེ་ནས་དམག་མིའི་གྲངས་ཀ་དང་།གོ་མཚོན་གྱི་བཟང་ཞན་ཐུག་ནས་རང་ཕྱོགས་ལ་རྒྱལ་ཁ་ཐོབ་བའི་རེ་བ་ཆེན་པོ་མེད་པ་ཤེས་ནས།བསྟན་རྣམ་གྱིས་གཡོག་པོ་གསུམ་ལ་གཞོན་རྟ་རྣམས་ཡར་ཡར་ཁྲིད་བཅུག་པ་དང་།གཡོག་པོ་གཅིག་ལ་ཁོང་རང་གི་མེ་མདའ་གཉིས་ཡོད་པ་དེའི་མདའ་རྫོགས་རིམ་ལྟར་མདེའུ་བརྫངས་བཅུག་སྟེ་མེ་མདའ་གཉིས་རེས་མོས་བྱས་ཏེ་བརྒྱབ་ནའང་།ཁོང་ཚོའི་ཕྱོགས་ལ་མེ་མདའ་རྒྱག་མཁན་མི་གཉིས་ལས་མེད་པ་དང་།བསྟན་རྣམ་ལ་མཚོན་གཏན་ནས་མི་འགྲོ་བས་མ་ཚད་ཁོང་གི་ཉེ་སྐོར་གྱི་གཡོག་པོ་ཚོ་དང་།རྟ་ལའང་སྐྱོན་ཆག་ཡོང་མིན་མེད་པ་མ་ཟད།མདེའུ་སྐད་སྒྲའང་ཐོས་ཀྱིན་མེད་པ་རེད།ཡིན་ནའང་དམག་མི་གཞན་དག་གི་རྟ་གཉིས་ཙམ་རྨས་ཟིན་འདུག་པ་དང་།རྒྱ་དཔོན་དེས་ཀྱང་ཁོང་རང་གི་ཐུང་མདའ་ནམ་མཁར་འཕངས་ནས་མཆོང་རྒྱུག་སོད་ཅེས་ཁོ་རང་གི་དམག་མི་རྣམས་ཚ་འདེད་གཏོང་གིན་ཡོད་སྟབས།དམག་མི་རྣམས་ནི་ཤ་ཁྱིས་ཤ་བ་དེད་པ་ལྟར་གཅིག་རྒྱུག་གཉིས་མཆོང་གིས་བསྟན་རྣམ་ཕྱོགས་སུ་འཐབ་བཞིན་འཛིང་བཞིན་ཡོང་གིན་འདུག་པས།ད་ཕལ་ཆེར་དགྲ་བོས་འཛིང་བཟུང་བྱེད་ས་རེད་བསམ་པའི་མཚམས་ཤིག་སླེབས་དུས།བསྟན་རྣམ་གྱིས་ད་ནི་རྒྱ་དཔོན་འདི་མ་བསད་ན་ཕན་ས་མ་རེད་གསུངས་ཏེ།ར་རུ་ཚང་གི་གཡང་མཛོད་བུ་ར་ཞེས་པའི་མེ་མདའ་དེ་བླངས་ནས་མདའ་ལྔ་ཆག་ཅིག་ཁོག་ཏུ་བླུགས་ཏེ་གཡོག་པོ་ཞིག་ལ་བོག་ར་བྱེད་ཞོར་རྒྱ་དཔོན་དེར་གཏད་ནས་འཕངས་པས།རྒྱ་དཔོན་དེ་རྟ་ཐོག་ནས་དམར་ཆེན་གཏོར་མ་ཞིག་རིལ་བ་ལྟར་མགོ་མཇུག་བསློགས་ནས་སར་ལྷུང་པ་རེད།དེ་མ་ཐག་དམག་མི་གཞན་པ་ཚོས་རྒྱ་དཔོན་གྱི་རོ་དེ་ལ་རུམ་རུམ་བྱས་ཏེ་འཐམ་ནས་ངུ་འབོད་བྱས་ནས་རེ་ཞིག་ཚུར་རྒོལ་མི་ཐུབ་པ་གྱུར།གོ་སྐབས་དེ་བཟུང་ནས་བསྟན་རྣམ་ཕྱོགས་ཀྱིས་དམག་ས་བཙན་པོ་ཞིག་བཟུང་ནས་དམག་འཐབ་ཀྱི་གྲ་སྒྲིག་ཡང་སྐྱར་བཟོས།འོན་ཀྱང་དགོན་པའི་རྒྱབ་རི་ནས་སྐོར་ཡོད་མཁན་གྱི་སྔོན་མའི་རྟ་དམག་རྣམས་ཀྱང་གཅིག་རྗེས་གཉིས་འཐུད་ཀྱིས་དེར་ཚུར་བསྡོངས་ནས།ཡང་སྐྱར་འཐབ་འགོ་རྩོམ་ན་ཡང་།སྟབས་ཡག་པ་ཞིག་ལ་རྒྱའི་དམག་དཔོན་བསད་ཟིན་པ་དེས།ར་བསད་ནས་ལུག་འདར་ཞེས་པ་ལྟར།དམག་མི་བྱིངས་རྣམས་ཀྱང་དཔའ་ཆག་པ་དང་།རྒྱབ་ནས་ཀྱང་ཚ་འདེད་གཏོང་མཁན་མེད་སྟབས།རང་གར་དམག་མཚམས་བཞག་སོང་བ་མ་གཏོགས།སྐབས་དེར་བསྟན་རྣམ་དཔོན་གཡོག་གི་མདེའུ་ཡང་མང་པོ་ཞིག་ལུས་མེད་པ་རྫོགས་ཡོང་གིན་ཡོད་པ་རེད།དེ་ནས་ཏོག་ཙམ་ལྷོད་ལྷོད་འདྲ་ཞིག་ཆགས་ཏེ་བལྟས་ཡོང་དུས།ཁོང་དང་ཁོང་གི་འཁྲིས་སུ་ཡོད་པའི་གཡོག་པོ་གཉིས་བཅས་མི་གསུམ་གྱི་གྱོན་གོས་མདེའུས་ཕུག་པ་དང་།གཟུགས་པོའི་སྟེང་དུ་མདེའུ་ཕོག་པའི་རྗེས་ཤུལ་མང་པོ་མཐོང་རྒྱུ་ཡོད་ནའང་།གཟུགས་པོའི་སྟེང་དུ་གནོད་སྐྱོན་གཏན་ནས་བྱས་མེད་པ་མ་ཟད།བསྟན་རྣམ་གྱི་རུམ་བརྡབ་བརྡབ་གཏོང་དུས།མདེའུ་འགོ་དེ་འདྲ་ཟག་རྒྱུ་བྱུང་འདུགདེ་ནས་ཉི་མའང་ནུབ་ལ་ཁད་རེད་འདུག་པས།ཁོང་རྣམས་ཀྱིས་དཔའ་ཚོད་བཟུང་སྟེ་རི་མགོ་ནས་ཡར་བུད་ནས་རི་རྒྱབ་ནས་མར་བབ་དུས་དགྲ་བོས་རྗེས་འདེད་ཀྱང་བྱས་མེད་པ་རེད།
ཁོང་རྣམ་པ་དགོན་པ་ནས་ཐོན་ཏེ་རི་ལ་སོང་ནས་དགྲ་བོ་དང་འཐབ་འཛིང་བྱས་རིང་།ར་རུ་ཚང་གི་རི་མདའི་ཚོང་ཁང་ནང་དུའང་དགྲ་བརྒྱབ་སྟེ།ར་རུ་ཚང་གི་སི་མདའི་ཚོང་དཔོན་ཨ་འབོང་དང་།ཐུབ་བསྟན་གཉིས་ཀྱིས་ཚོང་ཁང་གཡས་གཡོན་ནས་ཕར་རྒོལ་དྲག་པོ་བྱས་ཀྱང་།རྒྱ་དམག་མང་པོ་ཡིན་སྟབས་བརླག་མ་ཁེལ་བ་ཚོང་དཔོན་ཨ་འབོང་དགྲ་ལག་ཏུ་ཤོར་བ་དང་།ཐུབ་བསྟན་ཡང་རྨས་སྐྱོན་ཚབས་ཆེན་བཏང་ནས་མཐར་གསོན་བཟུང་བྱས་སོང་པ་རེད།།
གང་ལྟར་དམག་འཐབ་འདིའི་ནང་རྒྱའི་དམག་དཔོན་དེས་གཙོས་རྒྱ་དམག་སུམ་ཅུ་ལྷག་ཅིག་བསད་པ་དང་།བཅུ་ལྷག་རྨས་ཐུབ་པ་བྱུང་།རྒྱ་དཔོན་གྱི་རོ་དེ་རས་དཀར་པོ་ཞིག་གིས་བཏུབ་ནས་ཁྱེར་བ་དང་།རྒྱ་དམག་རྨས་པ་རྣམས་རྟ་ལ་བསྐྱོན་དེ།དེ་དག་གི་ལྷན་དུ་ཐུབ་བསྟན་ཡང་སྐྱེ་རྒུ་མདོར་ཁྲིད་སོང་པ་རེད།ཉི་མ་དེ་ནས་ར་རུ་ཐུབ་བསྟན་ཤི་གསོན་ཅི་རེད་ཡོད་གཏན་ནས་ཧ་མ་གོ་བ་རེད།རྒྱ་དཔོན་དེ་ཧ་ཅང་དམག་དཔོན་གོ་ས་མཐོན་པོ་ཅན་ཞིག་ཡིན་སྟབས།རོ་དེ་པེ་ཅིང་དུ་ཁྱེར་ནས་གོང་ལ་སྙན་སེང་ཞུ་དགོས་པའི་བཤད་སྲོལ་ཡོད།
དེ་འདྲའི་གཡུལ་འཐབ་དེ་བྱས་རྗེས་སུ་བསྟན་རྣམ་དཔོན་གཡོག་རྣམས་དབོན་པོ་སྟོད་དུ་ཚུར་ཕེབས་ནས།བསྟན་སྲུང་དང་བླངས་དམག་གི་སྒྲིག་འཛུགས་བཙུགས་ནས།སྤྱི་ཁྱབ་བཀོད་འདོམས་པ་ར་རུ་བསྟན་རྣམ་མཆོག་དང་།ལས་རོགས་ཤོ་སྟར་བཀྲ་ཤིས་རྡོ་རྗེ་སོགས་བསྐོས་དེ།དབོན་སྟོད་དང་རི་མདའི་ཕྱོགས་ནས་ལོ་ངོ་༡༨ནས་༦༠བར་གྱི་སྐྱེས་པ་ཚང་མ་དམག་ཁོངས་འཛུལ་དགོས་པའི་གསལ་བསྒྲགས་བྱས་པ་རེད།ལས་དོན་དེ་ཉིད་ཚག་ཚུད་པོ་ཞིག་ཡོང་ཆེད་དུ་ཨ་སྨུག་མས་གཙོས་པའི་བུད་མེད་ཀྱང་མང་པོ་ཞིག་དམག་ཁོངས་སུ་ཞུགས་པ་དང་།ཚོགས་འདུའི་ནང་ལ་མེ་མདའ་ཁྱེར་ནས་བསྟན་སྲུང་རྒྱལ་སྐྱོབ་ཀྱི་དམག་དཔུང་ནང་ཞུགས་ནས།དགྲ་བོ་ལ་ང་ཚོས་དམག་རྒྱག་དགོས།རང་སྲོག་བློས་གཏོང་གིས་འཐབ་འཛིང་བྱེད་དགོས་ཞེས་སྐད་བརྒྱབ་སྟེ་མང་ཚོགས་ལ་སེམས་འགུལ་ཐེབས་བཅུག་པ་རེད།སྐབས་དེར་མའོ་ཡི་དམག་དོན་རིག་པའི་གཞུང་ལུགས་ནང་གི་དམག་མིའི་སྒྲིག་འཛུགས་དང་བཀོད་སྒྲིག་བྱེད་སྟངས་སོགས་བེད་སྤྱད་དེ་དགྲ་བོ་རྒོལ་རྡུང་ལན་མང་བཏང་ནས་རྒྱ་དམག་མང་པོ་བསད་པ་དང་།གོ་མཚོན་མང་པོ་ཞིག་ཀྱང་བླངས་པ་རེད།རང་ཁོངས་ཀྱི་ར་རུ་ཚང་གི་གཡོག་པོ་དང་དམག་མི་བཅུ་སྐོར་ཞིག་བསད་ཤོར།རྒྱ་དམག་རྣམས་དཔའ་ཆག་སྟེ་འཇོ་མདའ་ལ་ཕྱིར་བྲོས་སོང་པ་དང་།བསྟན་རྣམ་གྱི་དམག་མི་རྣམས་ཀྱང་ས་ཁུག་ཅིག་ཏུ་ངལ་གསོ་བྱས་ནས་བསྡད།འོན་ཀྱང་རྒྱ་དམག་ནི་སྟོང་སོང་ན་ཁྲི་དང་།ཁྲི་སོང་ན་འབུམ་ལངས་ཡོང་གིན་ཡོད་སྟབས།དམག་དཔུང་སྐྱར་བསྡུ་དང་དེ་དག་ལའང་དམིགས་བསལ་ཀྱི་སྦྱོང་བརྡར་དེ་འདྲ་སྤྲད་ནས་ཚུར་རྒོལ་བྱས།གཡུལ་འཐབ་དེའི་ནང་རྒྱ་དམག་བཅུ་གྲངས་ཤིག་བསད་པ་དང་བཅུ་གྲངས་ཤིག་རྨས་མ་བཟོས་ནའང་།རང་ཕྱོགས་ཀྱི་གཡོག་པོ་དྲག་ཤོས་བཀྲ་ཤིས་ཚེ་རིང་སོགས་དམག་མི་བཅུ་ལྷག་བསད་ཤོར་བ་དང་།རྨས་པ།ད་དུང་འགའ་རེ་ནི་བཟུང་ཤོར་བ་བཅས་ཀྱི་ཕམ་ཉེས་ཏོག་ཙམ་ཡང་བྱུང་བ་སོགས་ཀྱི་ལོ་རྒྱུས་རྔམ་ཟིལ་ཅན་དེ་འདྲ་ཡོད།(སྒྲིག་འཛུགས་དེའི་འོག་ནས་འཐབ་འཛིང་ཇི་ལྟར་བྱས་ཚུལ་ལོ་རྒྱུས་ཞིབ་ཚགས་འདྲི་བརྩད་དགོས་)
དགྲ་འཐབ་ལན་མང་གི་མཐར་བསྟན་རྣམ་དཔོན་གཡོག་རྣམས་ཁ་སུམ་མདོར་ཕེབས་ནས་དམག་ས་བཙན་པོ་ཞིག་བཟུང་རྒྱུ་བྱས་ཏེ་སྡིག་ཕུག་ཅེས་པའི་བྲག་ཕུག་དེའི་ནང་གསང་སྟབས་སུ་ཕེབས་ཏེ།དམག་མི་རྣམས་ངལ་གསོ་བྱས་ནས་བཞུགས་པ་རེད།བྲག་ཕུག་དེ་ནི་སྒོ་ཆུང་ཆུང་ཞིག་ལས་མེད་ཀྱང་ནང་ལོག་ཏུ་དམག་མི་བརྒྱ་ཚོ་ཙམ་ཤོང་པའི་གཞི་རྒྱ་ཆེན་པོ་ཞིག་ཡོད་པ་དང་།འགའ་རེས་ཟེར་ན་ཆུའང་འབབ་ཀྱིན་ཡོད་ཚུལ་འདུགའོན་ཀྱང་ཉིན་ཞིག་མཁར་མདོའི་བུད་མེད་ཆོས་ཉིད་སྒྲོལ་མ་ཟེར་བ་ཞིག་གིས་རྒྱ་དམག་༣༠༠ཙམ་བྲག་ཕུག་གི་སྒོ་རྩར་ཁྲིད་ནས་བསྟན་རྣམ་འདིར་ཡོད་ཚུལ་མིག་བསྟན་བྱས་པ་རེད།དེ་ནས་རྒྱ་དམག་གིས་བྲག་ཕུག་སྒོ་རྩར་དམག་སྒར་བརྒྱབ་ནས་བྲག་ཕུག་གི་སྒོ་དང་ནང་དུ་བསྟུད་མར་མེ་སྒྱོགས་བཅུ་གྲངས་ཤིག་བརྒྱབ་པ་དང་།མཚམས་རེར་བྲག་ཕུག་གི་སྒོའི་ཡ་ཐོད་ནས་མར་དམག་མི་རྣམས་ཐག་པའི་སྟེང་བཏང་སྟེ་ཞོར་དུ་ལག་འབོམ་དང་དུག་རྫས་དེ་འདྲ་བྲག་ཕུག་ནང་དུ་གཡུགས་བཅུགཡང་སྐབས་རེར་མགོ་ཐོག་དང་མི་བྱེད་པའི་སྲིད་བྱུས་ཟེར་བ་ལག་ལེན་བསྟར་ཆོག་རྒྱུའི་སྐད་ཆ་བཤད།འོན་ཀྱང་བསྟན་རྣམ་དཔོན་གཡོག་ལ་མགོ་འདོགས་ཞུ་རྒྱུའི་བསམ་བློ་དང་ལག་ལེན་གཏན་ནས་མེད་པའི་ཐོག་ཉིན་གྲངས་བཅུ་ཙམ་རིང་ནང་མར་ཕྱི་ལ་འཐབ་འཛིང་གང་ཐུབ་བྱས།དཔེར་ན་དམག་མི་བྲག་ཕུག་གི་སྒོ་ལ་སླེབས་ཚད་ལ་མེ་མདའ་བརྒྱབ་རྐྱང་བྱས་པས་མང་པོ་ཞིག་ཀྱང་བསད་ཐུབ་པ་བྱུང་།
འོན་ཀྱང་དགྲ་བོ་ནི་བྲག་ཕུག་གི་ཕྱི་རོལ་དུ་ཡོད་དུས་ཐབས་བྱུས་འདྲ་མིན་སྟོན་ཆོག་གིན་ཡོད་ལ།བསྟན་རྣམ་དཔོན་གཡོག་ནི་ནང་ལོག་ཏུ་ཚུད་སོང་སྟབས་ཨུ་ཚུགས་བྱས་ནས་དགྲ་བོ་སླེབས་དུས་འཛིང་འདུག་རྒྱུ་ཙམ་རེད།དེས་ན་རྒྱ་དམག་གིས་བྲག་ཕུག་གི་སྟེང་ཕྱོགས་ཀྱི་དཀྱིལ་མ་ནས་མར་ས་དོང་བྲུས་ནས་བྲག་ཕུག་ནང་ལོག་བར་དུ་བཏུག་པ་དང་།དེ་ནས་ལག་འབོམ་དང་།དུག་རྫས་འདྲ་མིན་གཡུགས་ཏེ་གནམ་ས་བླ་འོག་ཏུ་བསྒྱུར་བ་ལྟ་བུའི་ཚུར་རྒོལ་དྲག་པོ་བྱས་པ་དང་།ར་རུ་ཚང་གི་གཡོག་པོ་དྲག་ཤོས་དཀར་རྡོ་དང་།ཕྱག་དགའ་ཡིས་གཙོས་རང་དམག་མང་པོ་ཤིག་ད་ག་རང་བསད་ཤོར།དམག་མི་ལྷག་ལུས་མང་ཤོས་ནི་དུག་རྫས་ཀྱི་སྦྲིད་ནས་དྲན་པ་འཐོར་བ་དང་།དྲན་པ་ཡོད་པ་ཁག་ཅིག་བྲག་ཕུག་ནང་ནས་མར་ཕྱིར་ཐོན་ཡང་།རྒྱ་དམག་གིས་སྔ་ས་ནས་གྲ་སྒྲིག་བྱས་ཡོད་པའི་དམག་མིས་མེ་མདའ་རྦག་རྦག་དང་མེ་སྒྱོགས་བརྒྱབ་ནས་ལྷག་ལུས་མེད་པ་རྐྱེན་ལམ་བཏང་།སྐབས་དེར་བྲག་ཕུག་གི་ཕྱི་ནང་བར་གསུམ་ཚང་མར་འགད་འཐོར་དང་ཐལ་རྡུལ་གྱིས་ཁེངས་ཏེ་སྡོད་ཐབས་བྲལ་བའི་གནས་སུ་ལྷུངས་པ་དང་།རང་དམག་རྣམས་ཀྱང་བསད་རྨས་དྲན་པ་འཐོར་བ་སོགས་ཀྱི་ཕམ་ཉེས་ཚབས་ཆེན་ཡོང་གིན་ཡོད་སྟབས།དམག་དཔོན་ར་རུ་བསྟན་རྣམ་གྱིས་ཤུལ་ལུས་རང་དམག་རྣམས་ལ།ད་མགོ་ཐོགས་ཤིག་ཞེས་བོས་ནས་དམག་མི་རྣམས་མར་ཕྱི་ལ་འགྲོ་རུ་བཅུགདེ་དང་མཉམ་དུ་རང་ཉིད་ཀྱིས་ལག་འབོམ་བཞི་ཙམ་དུས་གཅིག་ཏུ་ཁ་ཕྱེས་ནས་དགྲ་བོའི་ཕྱོགས་སུ་གཡུག་པ་དང་སྟབས་ཅིགརྒྱ་ལག་ནས་བླངས་པའི་མེ་མདའ་རྦག་རྦག་ཅིག་རྒྱག་གིན་བྲག་ཕུག་སྒོར་ཐོན་ཏེ་རྒྱ་དམག་མང་པོ་ཞིག་བསད་རྨས་བྱས་མོད།དགྲ་བོ་ནི་ཆུ་ལོག་འཕྱུར་འཕྱུར་དང་།རང་དམག་ནི་སྣུམ་ཟད་ཀྱི་མར་མེ་ལྟར་གྱུར་ཡོད་དུས།ཁོང་གིས་དམག་མཐའ་མ་བརྟན་པ་དམག་ས་དེར་སྐུ་སྲོག་ཤོར་བའི་ཤོར་སྲོལ་ཡོད།དེ་ནས་ཤུལ་ལུས་དམག་མི་ཡོད་ཚད་པོ་གཅིག་ཀྱང་མ་ལྷག་པ་འཛིན་བཟུང་བཙོན་འཇུག་བྱས་སོང་པ་རེད།
ཤོད་སྲོལ་གཞན་ཞིག་ལ།ཀརྨ་པས་རྗེས་མ་གནད་འགག་ཆེ་དུས་བེད་སྤྱོད་ཐོངས་ཞེས་སྲུང་བ་ཞིག་བྱིན་པ་རེད།འོ་དེ་དེ་ཉིན་མ་ཁ་ཕྱེས་ནས་ཟོས་ཏེ་ཐར་སོང་པ་རེད་ཅེས་དང་།ཡང་ཀརྨ་པས་གནད་འགག་ཆེ་དུས་འདི་གྱོན་ལབ་ནས་སྣམ་བུའི་གོས་དཀར་པོ་ཞིག་གནང་པ་རེད།དེའི་གོས་དེ་དེ་ཉིན་མ་གྱོན་ནས་ཐར་སོང་པ་རེད་ཅེས་དང་།ཡང་ཁོང་གིས་དམག་ཤོར་གྲབས་བྱེད་དུས་ཁོང་རང་དང་འདྲ་བའི་གཡོག་པོ་ཞིག་དང་ཁོ་རང་གི་གོས་ལོག་ཚང་མ་བརྗེས་ནས།གཡོག་པོ་ཡིན་ཁུལ་བྱས་ཏེ་ཐར་སོང་པ་རེད་པ་སོགས་ཀྱི་ཤོད་སྲོལ་མི་འདྲ་བ་མང་པོ་ཞིག་འདུགདེ་བཞིན་བོད་ནང་ལོག་ནས་ཀྱང་ར་རི་བསྟན་རྣམ་སྐབས་དེར་ཐར་ནས་ད་ལྟ་རྒྱ་གར་ལ་ཡོད་རེད་ཅེས་ཤོད་སྲོལ་བྱུང་ཡོད་ལ།རྒྱ་གར་ཕྱོགས་ནས་བསྟན་རྣམ་སྐབས་དེར་ཐར་ཏེ་དེང་སང་བོད་ནང་གི་ས་ཁུག་ཅིག་ལ་ཡིབ་བསྡད་ཡོད་རེད་ཅེས་ཤོད་སྲོལ་བྱུང་འདུག
གང་ལྟར་རྒྱ་ཕྱོགས་ནས་སྐབས་དེར་བསྟན་རྣམ་སུས་སོད་ན་འཇོན་ཐང་ཆེན་པོ་ཞིག་བརྩི་བཞིན་ཡོད་པ་དངོས་ཡོད་ཡིན་སྟབས།དམག་དཔུང་དེས་ཀྱང་འཇོ་མདའ་རྫོང་དུ་བསྟན་རྣམ་བསད་ཡོད་ཟེར་ནས་མི་ཚང་མའི་མདུན་རོ་ཞིག་བསྟན་པ་དང་།ཁྱབ་བསྒྲགས་ཤུགས་ཆེན་བྱས་པ་རེད།སྐབས་དེར་འཇོ་མཇའ་བའི་མི་ཁྱི་གཟའ་ཉི་མ་ཟེར་བ་དེས།རོ་ལ་རྡོག་ཐོ་བརྒྱབ་ནས་ཕར་སྒྲིལ་ཚུར་སྒྲིལ་བྱས་ཏེ།རེད་རེད།འདི་ར་རུ་བསྟན་རྣམ་ངོ་མ་རེད།ཁོ་ལ་འདི་འདྲ་ཞིག་ལོས་ཡོང་།སྐེར་མགུལ་དང་སྟོད་ཐུང་ལ་ལྟོས་དང་།ཤིག་དང་སྲོ་མས་ཁེངས་འདུག་ཅེས་ལབ་པ་རེད།ཁོའི་དོན་དག་ལ།འདི་བསྟན་རྣམ་མ་རེད་ཅེས་པའི་དོན་རེད།འདི་ལའང་ཤོད་སྲོལ་འགའ་འདུག
ཅི་དང་ཅི་ཞིག་བཤད་ཅིང་།གང་དང་གང་ཞིག་གྱུར་ཡོད་ཀྱང་།མདོར་ན་ཉི་ནམ་དེ་ནས་བཟུང་ར་རུ་བསྟན་རྣམ་ཞེས་པའི་རྒྱ་སྟག་ངར་མ་དང་འདྲ་བའི་དཔའ་རྒོད་ཡ་མེད་དེ་སུ་དང་གང་གིས་ཀྱང་མཐོང་ཐོས་ཀྱི་ཡུལ་དུ་གྱུར་མེད་པ་རེད།
༢༠༡༢་༡་༣ལ་ཕྱོགས་སྒྲིག་ཚར་བ་བྱེད་མཁན་ནི་འཆམ་ར་དྲི་མེད་རྒྱལ་མཚན་ཡིན།
བསྡུ་སྒྲིག་གི་ཁུངས།ཤྲི་ལ་ལྷུན་གྲུབ་དབང་རྒྱལ་གྱི་མི་ཚེའི་ལོ་རྒྱུས་ཀྱི་དེབ་དང་།
བོད་ཕྱི་ནང་གཉིས་ཀྱི་ཤོད་སྲོལ་ཡོངས་གྲགས་ཅན་རྣམས་ཡིན།
བསམ་ཚུལ་འབྲི།
རྒྱ་སུག་བསྟན་རྒྱལ་གྱིས་དགྲ་འཐབ་བྱས་པའི་ལོ་རྒྱུས།