ཡུལ་སྲོལ་གོམས་གཤིས་སྐོར་ཁག་ཅིག
༈ ཡུལ་སྲོལ་གོམས་གཤིས་སྐོར་ནི།
སྡེ་དགེའི་རྒྱལ་རབས་དངུལ་དཀར་མེ་ལོང་ལས་དྲངས།
༈ བརྒྱད་པ་ཡུལ་སྲོལ་གོམས་གཤིས་སྐོར་ནི།
བག་མ་བཏང་ལེན་གྱི་ཚུལ་ནི། རྒྱལ་པོའི་རིགས་དང་། མདུན་སྐོར་དཔོན་ཁག་གི་རིགས། ཧོར་འདྲ་རིགས། མི་སེར་གྱི་རིགས། ཤན་པའི་རིགས། ཕྱི་མཁན་གྱི་རིགས་སོགས་རིམ་པ་གོང་མས་འོག་མ་དང་གཉེན་སྒྲིག་བྱེད་སྲོལ་མེད། གལ་ཏེ་བྱས་ན་གོང་མས་འོག་མ་དང་འབྲེལ་ན་སྨད་པའི་གནས་བྱེད་ཅིང་། འོག་མས་གོང་མའི་རིགས་ཐོབ་ན་དགའ་ཚོར་བྱེད། མང་ཆེ་བ་ཕ་མ་དང་ཉེ་འབྲེལ་ཁག་གི་རིགས་རུས་འོས་མིན་དཔྱད་དེ་མོ་རྩིས་དང་བསྟུན་ནས་མནའ་མ་དང་མག་པ་བསུ་བཏང་བྱེད་སྲོལ་འདུག དངོས་སུ་བག་མ་ལེན་པའི་མཛད་སྒོ་སྤྱིར་བཏང་ཙམ་ལ། བླ་མཆོད་བཀུག་ནས་བག་མ་ལ་དགེ་བའི་ལས་ཕྲན་བདུན་གྱི་ཆོ་ག་དང་འབྲེལ། སྣ་འདྲེ་བཀྲད་པ། མནོལ་གྲིབ་བཀྲུ་བ། བག་གདན་གཏིང་བ། དཀར་གསུམ་གྱིས་ངོ་གསོ་བ། མིང་འདོགས་པ། ལྷ་ལ་འདོགས་པ། གཡང་འགུགས་པ། མཐར་རྟེན་ཤིས་པར་བརྗོས་པ་བཅས་དང་འབྲེལ་སྟོན་མོ་དང་། བྲོ་གཞས་སོགས་ཀྱི་རྟེན་འབྲེལ་མཛད་སྒོ་འོས་བསྟུན་བྱེད་སྲོལ་དང་། མི་ཆེན་ཁག་གིས་རྒྱས་སྤྲོས་སྐབས། མདའ་བཤད། འབེབས་བཤད། སྒོ་བཤད། གཡུ་བཤད་སོགས་སྙན་བརྗིད་དང་ལྡན་པའི་བཤད་པ་སོགས་མཛད་སྒོ་རྒྱས་པ་ཡོད་ཀྱང་རེ་རེ་བཞིན་བྲི་བར་མ་ལོང་།
དུར་འདེབས་སྲོལ་ལ་འབྱུང་རྩིས་དང་། འཆི་ནད་ལ་བརྟགས་ཏེ་མེ་དུར་ཞེས་སྦྱིན་བསྲེག་གི་ཆོ་དང་འབྲེལ། ཆུ་དུར་དང་ལྕགས་དུར་ཞེས་བྱ་རྒོད་ལ་སྦྱིན་པ་ཕལ་ཆེར་དུར་གཅོད་དང་འབྲེལ། ས་དུར་ཞེས་སར་སྦ་དང་ཤིང་དུར་ཞེས་ཤིང་ལ་དཔྱང་སྲོལ་བཅས་ཐམས་ཅད་བླ་མཆོད་ཀྱི་ཆོ་ག་དང་མ་འབྲེལ་ཐབས་མེད་བྱེད། བླ་སྤྲུལ་དང་ཆོས་རྒྱལ་ཆེན་པོ་སོགས་བསྟན་འཛིན་དམ་པ་རྣམས་ཀྱི་སྐུ་པུར་དམར་གདུང་ངམ་ཞུགས་སུ་ཕུལ་བའི་གདུང་ཐལ་མཆོད་རྟེན་དུ་འཇོག་སྟེ་དུས་དང་རྒྱུན་དུ་མཆོད་པ་བྱེད། མི་ཤི་ནས་ཞག་ཞེ་དགུའི་བར་རང་རང་གི་ཡུལ་ལུང་ལ་ཆོས་རྒྱུད་གང་ཡིན་གྱི་གཤིན་ཆོག་ནར་མའམ་མ་མཐའ་བདུན་ཚིགས་ནམ་ཁེལ་བླ་མཆོད་མེད་ན་ཐབས་མེད་ཀྱི་སྲོལ་འཇགས་འདུག འདི་དག་ཞིབ་པར་བརྗོད་ཀྱིས་མི་ལོང་།
ཡུལ་འདིའི་རྩེ་འཁྲབ་སོགས་ཀྱི་སྲོལ་ནི། གོང་སྨྲས་བཞིན་སྡེ་དགེ་ལྷུན་འགྲུབ་སྟེང་དུ་རྒྱལ་པོ་ནོར་བཟང་གི་རྣམ་ཐར་སོགས་དང་། རྫོགས་ཆེན་དགོན་དུ་གླིང་གི་ཕུ་ནུའི་ཟློས་གར། སྡེ་དགེའི་བྲོ་ཆེན་ནམ་མདུན་བྲོ་དང་ཡུལ་བྲོ། དེའང་མདུན་བྲོ་ལ་གོས་རྒྱན་གོང་དུ་སྨྲས་པ་བཞིན་དང་། ཡུལ་བྲོ་ལའང་ཆས་བྲོ་དང་རྒྱུས་བྲོ་སོགས་གོས་རྒྱན་དང་བྲོ་ཚིག་གི་ཁྱད་པར་ཡོད་ཅིང་། དེ་རེ་རེ་ལའང་ཐོག་མར་འཛམ་བྲོ། བྲོ་མཆོད། གཞུང་བྲོ། བཀྲ་གདན། བཀྲ་ཤིས་སོགས་གོ་རིམ་ངེས་པ་ཅན་ཡོད། དེང་སྐབས་སྡེ་དགེའི་བྲོ་ཆེན་ཞེས་སྐྱེས་པ་རྣམས་ཀྱིས་སྲམ་གཟིགས་སྟག་སོགས་བརྩེགས་མ། མཆན་གབ་གསུམ་བཞི་འགེལ་བ་དང་། བུད་མེད་རྣམས་སྐྲ་མགོ་བོར་དཀྲི་ཞིང་། ཕུ་དུང་ཕུད་ནས་འཁྲབ་འདུག་པ་འདི་དག་དེང་སྐབས་སྡེ་དགེའི་བྲོ་ཆེན་ཡིན་ལས་གནའ་རབས་ཀྱི་སྡེ་དགེའི་བྲོ་ཆེན་མིན་པ་ཞར་བྱུང་དང་། གཞན་ཡང་གཞས་བྲོ། གླུ་བྲོ། ལ་གཞས། མགུར་མ།་མགུར་མོ། གླུ་ཁག་བཀྱེ་བ། རྟ་རྩེད། བོག་རྩེད། མདའ་རྩེད། ཤོག་བག མིག་མང་། རྩལ་འདྲེན། རྐང་རྒྱུག ཐག་རྩེད་སོགས་རྩེད་མོའི་རིགས་ཤིན་ཏུ་མང་པོ་དུས་རྒྱུན་ལུང་ཚན་སོ་སོར་རྩེར་འཛུགས་སྲོལ་མཆིས། ཡོ་ག་རྩ་འཆམ་དང་། རྡོ་རྗེའི་མཆོད་གར་སོགས་ནི། དཀྱིལ་འཁོར་གྱི་ཆོ་ག་དང་འབྲེལ་བས་སྟངས་སྟབས་རེ་རེ་བཞིན་བརྡ་རྟགས་ཡོད་པས་བཅོས་ལྷད་དང་གང་བྱུང་འཆམ་རྒྱུ་སོགས་གཏན་ནས་མི་ཆིག་ཅིང་། དེར་འགའ་ཤས་ཐུན་མོང་དུ་མཇལ་མི་ཆོག་པ་དང་། འགའ་ཤས་མཇལ་ན་ཕྱི་མ་བག་ཆགས་དགེ་བའི་ས་བོན་ཐེབས་པ་སོགས་བཤད་ཀྱང་། དེང་སྐབས་ཡུལ་མི་རྣམས་ཀྱིས་ལྟད་མོའི་ཆེད་དུ་ཟློས་གར་ལྟ་བུའི་གོམས་གཤིས་ཆགས་འདུག ཡུལ་འདིའི་སྡོད་ཁང་གནའ་རབས་ཇོ་ཁང་ཡིན་ཚུལ་ཡུལ་བཀོད་རྙིང་པ་སོགས་ལ་ཡོད་ཀྱང་སོག་པོའི་དགྲ་ཐེངས་གསུམ་དུ་བྱུང་ནས་གནས་ཁང་ཚང་མ་མེར་བསྲེགས་ཤེས་ལྡན་གྱི་སྐྱེས་བུ་ཐམས་ཅད་མཚོན་གྱིས་བསད་པས་ཕྱིས་སུ་ས་ཁང་ལེབ་མོ་འདི་བྱུང་བའི་ལོ་རྒྱུས་ཡོད་ཅེས་དཔལ་སྤུངས་ལྷ་བྲིས་མཁས་དབང་ཐང་བླ་ཚེ་དབང་ནས་གསུང་སྒྲོས་འདུག ཕྱོགས་འདིའི་ས་ཆ་ཕལ་ཆེར་ཇོ་མོ་དང་སོ་ཕག་རྙིང་པ་ཕོན་ཆེན་དོན་འདུག་པར་དཔྱད་འོད་པ་འདུག་གོ།
བསམ་ཚུལ་འབྲི།
ནང་པའི་གནས་ཆེན་ཁག་གི་ངོ་སྤྲོད་མདོར་བསྡུས།།