འཛེམ་བྱ་ཁག་ཅིག
ཡོང་ཁུངས།ཁམས་པའི་དྲ་བ།
ལོ་གསར་སྐབས་ཀྱི་འཛེམ་བྱ།
ལོ་གསར་ཚེས་པ་གཅིག་ཉིན་རྟེན་འབྲེལ་གྱི་བྱ་བ་བཟང་པོ་ཁོ་ན་སྤེལ་དགོས་པ་ལས།ཁ་བརྡ་ངན་པ་ལ་སོགས་བཀྲ་མི་ཤིས་པའི་བྱ་བའི་རིགས་མི་ལྷག་པ་བྱ་རྒྱུར་དོ་སྣང་ཧ་ཅང་ཆེན་པོ་བྱེད་སྲོལ་ཡོད།ལོ་གསར་པ་འདིའི་ནང་བཀྲ་ཤིས་ལོ་ལེགས་ཡོང་བ་དང་།བསམ་དོན་ལྷུན་གྱིས་འགྲུབ་ཕྱིར།གནམ་ལོ་གསར་ཚེས་ཀྱི་ཚེས་གཅིག་ཉིན་གད་ཕྱིས་མི་རྒྱག་པ་དང་།ཁ་རྩོད་མི་རྒྱག་པ།ཁ་ནས་བཀྲ་མི་ཤིས་པའི་སྐད་ཆ་མི་ཤོད་པ།གཞན་པར་གཤེ་གཤེ་མི་གཏོང་བ།མི་ཚང་གཞན་ནས་དངོས་ཟོག་གཡར་སྐྱིན་མི་བྱེད་པ།དཀར་ཡོལ་སོགས་པའི་སྣོད་ཆས་ཀྱི་རིགས་བཅག་གཅོག་མི་ཡོང་བ་བཅས་བྱེད་ཀྱི་ཡོད།གལ་ཏེ་དེ་ལས་གང་རུང་ཞིག་བྱུང་ན།རྣམ་རྟོག་ལ་བརྩིས་ནས་དགའ་པོ་གནང་གི་མེད།ཡང་ལ་ལ་བས་དེ་བཟློག་ཐབས་བྱེད་སྲོལ་ཡང་ཡོད།གཞན་ཡང་དེ་དུས་ཚེས་གཉིས་ཚིགས་མདོ་བསྐུམ་ཞེས་ཚོང་གཉེར་ལ་སོགས་ལས་ཀའི་རིགས་རྣམས་ཚང་མ་མཚམས་བཞག་ནས་དགའ་སྐྱིད་རྟེན་འབྲེལ་ཁོ་ནར་རོལ་གྱི་ཡོད།
སྤུན་མཆེད་བར་གྱི་འཛེམ་བྱ།
བོད་མིའི་ཡུལ་སྲོལ་གོམས་གཤིས་ལ་ཕ་དང་བུ་མོའི་བར་དང་།གཅེན་པོ་དང་གཅུང་མོའི་བར།གཅུང་པོ་དང་གཅེན་མོའི་བར།ཨ་ཞང་དང་ཚ་མོའི་བར།སྲུ་མོ་དང་ཚ་བོའི་བར།ཨ་ཁུ་དང་དབོན་མོའི་བར།ཨ་ནེ་དང་དབོན་པོའི་བར་ལ་སོགས་སྤུན་མཆེད་ཕོ་མོ་ཕན་ཚུན་བར་ངོ་ཚ་སྲུང་ནས་བཙོག་གཏམ་ཙམ་ལ་ཡང་འཛེམ་པ་བྱ་དགོས་པ་མ་ཟད།ངོ་ཚ་བའི་ལྟད་མོ་ཡང་མཉམ་དུ་ལྟ་སྲོལ་མེད།དཔེར་ན་གཉེན་སྒྲིག་སྐོར་གྱི་གྲོས་མོལ་བྱེད་དགོས་ཚེ་ངེས་པར་དུ་ཕ་དང་བུའི་བར་གྲོས་བསྡུར་བྱེད་པའམ་ཡང་ན་མ་དང་བུ་མོའི་དབར་གྲོས་བསྡུར་བྱེད་པ་ལས།མ་དང་བུའི་བར་རམ་ཡང་ན་ཕ་དང་བུ་མོའི་བར་གྲོས་བསྡུར་བྱེད་སྲོལ་མེད།དེ་ལྟར་འཛེམ་དགོས་པའི་རྒྱུ་མཚན་ནི་གཉེན་སྒྲིག་སོགས་འཇིག་རྟེན་ཆགས་སྲེག་གི་བྱ་བ་དག་ཉོན་མོངས་པའི་ཀུན་སྤྱོད་ལ་བརྩི་བ་མ་ཟད།ཐ་ན་དེའི་ཐད་ཀྱི་སྐད་ཆའང་མི་དགེ་བར་བརྩི་བའི་རིང་ལུགས་ལས་བྱུང་བ་ཡིན་སྐད་འདུག（རྩོམ་སྒྲིག་པ་བདེ་ཆེན་དབང་མོ།
མི་ཤི་བྱུང་རྗེས་ཀྱི་འཛེམ་བྱ།
གང་ཞིག་ཚེ་ལས་འདས་པའི་རྗེས་བླ་མས་འཕོ་བ་མ་གནང་གོང་དེ་ཡི་ཕུང་པོར་མི་གང་བྱུང་གིས་ལག་པ་འཆང་བའི་རིགས་དང་།དེ་འབྲེལ་གྱི་སྤུན་མཆེད་ཆོས་མྱ་ངན་གྱི་དུས་ཚོད་མ་འདས་གོང་ནས་སྐྲ་ལྷས་གདོང་འཁྲུ་བྱེད་པ།གྱོན་ཆས་གསར་པའི་རིགས་གྱོན་པ།ཁང་ཐོག་གི་དར་ལྕོག་མི་འབེབས་པ།གླུ་གར་དང་རྩེད་འཇོའི་རིགས་ལ་འཛེམ་དགོས་པ་མ་ཟད།ཐ་ན་གྲོང་པ་ཁྱིམ་མཚེས་དང་དགའ་ཉེ་བློ་དཀར་ཆོས་ཀྱང་དམ་པ་ཚེ་ལས་འདས་པའི་མྱ་ངན་མཚོན་བྱེད་དུ་རེ་ཞིག་གོང་གསལ་གྱི་འཛེམ་བྱ་དག་ལ་དོ་སྣང་ཆེན་པོ་གནང་སྲོལ་ཡོད།གཞན་ཡང་སྐུ་ཕུང་སྐྱེལ་དུས་ཕྱི་མིག་ལྟ་བ་དང་སྡུག་ཆང་འདྲེན་དུས་ཡར་སྒྲོན་རྒྱག་པའི་རིགས་ནི་དེ་བས་འཛེམ་དགོས་པའི་བྱ་བ་ཞིག་རེད། གཞན་ཡང་སྐུ་ཕུང་སྐྱེལ་དུས་ལམ་བར་དུ་ངལ་གསོ་བྱེད་པ་དང་།བྱ་གཏོར་གྲུབ་རྗེས་སྐྱེལ་མི་རྣམས་དམ་པའི་ཁྱིམ་ལ་ཕེབས་པ།ཚྭ་ལ་སོགས་པའི་ལྟོ་ཆས་ལྷག་མ་རྣམས་རང་གི་ཁྱིམ་ལ་འཁྱེར་བ་སོགས་ནི་དེ་བས་བྱེད་མི་ཉན་པ་ཞིག་རེད།（རྩོམ་སྒྲིག་པ་བདེ་ཆེན་དབང་མོ།
བསམ་ཚུལ་འབྲི།
འབྲོག་པའི་ལག་ཤེས་དང་ཡུལ་སྲོལ།